Boss Amanda 3

BOSS AMANDA.. (Chapter- 3)

Ziaktu : Toni Râlte

Muanpuii thihnaa a kaikuang ber Agent kha an man ta a. Vai naran a ni lem lo, a zâm lo viau bawk. Lawyer a nei ţha a ni mahna le.. An thu inmun chhungin case hotê anga lang, ril ru riau si kan nei pek a. Chu chu ania rawn hrilh che u ka tum zawk ni. 

Zing ni chhuak a ţha bawk a, khua a lum over lo nen, boruak a nuam angreng viau mai. Office-ah kan awm mai mai a. Lehkhabu a bih kual a, inzir reng renga hun awl pawh hmang ţhin a nia ka hrethiam. 

"Inngaizawng kan ni ve sia" ka ngaihtuahna chu ka lo sawi chhuak lehpek! Mawl theih ngei mai. 

"Maw.. Oh! Sam, ka hria alawm.. I ta ka ni tihah chiang la, a tawk rih mai lo vem ni? " a ti chang fak a. 

"Tawk lo" ka ti hmuk. Ka bulah a rawn ţhu a.. "Eng nge i duh? " a ti zawi sap a. 

"Engkim" pangchang zetin ka lo ti. A khi sak a, "I nupui ka nih hma chuan i boss angin min lo en hram hram rih rawh aw.. A ţha em? Kan inneih hunah chuan i lakah chauh detective hna ka thawh a ngai tawh dawn si a" a ti duah a. A sawi awmzia pawh ka hre nek lo ve. Tâu búrin ka ţhu ngawi ngul a. Kawngka an lo kik. Amanda chuan zangkhai zetin lo lut turin a hrilh a. 

Nu kum 50-57 bawr vel tur, nu lian lo tak, ngo var mai, lu zawh ve hmel tak hi a rawn lut ta a. 

"Min puih theih beiseiin ka lo kal tawp a ni" a ti tham ţiak a. A aw chu a tham bakah a zawi angreng. Ţhutna kan kawhhmuhah chuan a ţhu thla a. A incheina en chuan nu rethei leh khawsak harsa zawk zawk a ni lo tih ka hre ve thei mai. A kut veilam zungţang pathumah rangkachak zungbun a bun ţhât te, a nghawnga rangkachak ţhi hrawl angreng tak kual raih avangte pawh chuan nu chenbeh tak a ni lo tih chu a chiang mai awm e. 

"Puih theihna che kan neih chuan kan pui hreh reng reng lo che. Ka pi, hahdam la, i duh duh han sawi teh le" Nelawm zetin Amanda chuan a ti a. A ţhut dan chu siamremin a aw a thian leh kharh a. Amanda melh chung chuan, "Fapa ka nei a, fapa mal a ni. Ka pasal hian kum 10 liamtaah khan min boralsan tawh a. Tichuan, ka fapa chu ka mal khalh chho ta a ni. Shillong lama awm reng reng ţhin kan ni a. Kan pa a boral hnu paw'n rei tawk fang chu kan awm. He lamah kan pa chhungte chu awm bawk mah se; kan pa nen khan an phal lo chung innei kan nih vangin kan intlawhpawh lem lo. Kan pa khan sumdawnna chhete a nei ve a. A boral takah chuan kei hmeichhia a zawnga mawlmang ber mai chuan ka chhunzawm lo thei ta lo va, mahse, ka unaupa anga ka neih kan pa assistant James hian engkimah min buaipui ta a. Ka inzir chho ve zel a. Kan sumdawnna chu chhang siam a ni a, a hun lai chu lar ve tak a ni. 

Mahse, chhang siam leh a kaihhnawih lam hi ka tui reng reng lo va, hlawk tho mah ila tuina ni miau lo chu ka hlim thei lo. Ka fapa erawh hostelah ka dah a. A ţha thei ang bera chher ka tum ve a ni. Tichuan, kan sumdawnna chu hralh mai ka rilruk ta a. James bawk chuan min leisak a duh ta a ni. Man man takin ka hralh ta a.

Ka'n sawi thui lawk ang a. Kei hi Mizoram khawthlang lam Thingtlang khuaa piang leh seilian ka ni a. Ka tleirawl chhuah hlim hlawt atangin Aizawlah mi nau awmin ka inhlawh tawh a ni. Tichuan, kum 20 ka tlin kumin kan pa nen kan intawng a, a mak khawp mai, min duh ve miau si a. A chhungte chuan mi nau awm mai mai chu mo atan min lo duh awzawng lo va, ka dem reng reng lo. Mahse, mi lunglian tih takah kan pa chuan Shillong-a a ţhiante bulah min tlanpui ta daih a. James-a te hi kan zuk bel nghe nghe a ni. Tichuan, lehkhathiam tih takah a thawh awm tawk a dap ve char char a, James-a pa ţhianpa chhang dawrah thawkin khatatang khan a inchher hriam chho ţan a, kum 5 hnuah meuh chuan ama pualim dawr a nei ve thei ta a ni. Fa hi pahnih lai ka chhiat hnuah ka fapa hi ka hring a, Doctor ten fa neih min phalsak tak loh vangin fapa pakhat teh tlawng kan nei ta a ni. Mahse, kan hlim em em tho. Ka chhungte pawh ka be pawp theintawh a, a khat tawkin pawisa kan thawn fô mai. Mahse, tikhan kan pa khan khawsikpui vangin min boralsan ta thut mai si a. Ka chavai hle nghe nghe. 

Dawr ka hralh hnu chuan kan pa lung pawh ka phun zui nghal a. A chhan pawh Mizorama rawn chuan chhoh ka tum tak vang a ni. A thih khan anu leh a farnu naupang zawk chiah an rawn lang a, a ruang pawh Shillongah kan phum ta kha a nia. Pasal dang neih leh hi a tin pawn ka la tin chhin miah lo. Nakinah Mizoram aţanga thiltih a harsat ka rin vangin kan chhoh hmain a lung ka phun mai zawk a ni. 

Aizawlah in hmun ka lei ve a, Saw Zemabâwkah sawn a thawl laiah a fâl deuh hlekin in ka sa ve a. Ka tuina ber ran vulh leh pangpar khawi lam chu ka ţan chho ta a. A tirah chuan ar chiah ka vulh a, kum khat hnuah vawk leh ui ka vulh belh a. Tunah chuan ka farm pawh zauh belh a ngai ta hial mai. Insawi theihna lam ni lo se; ka tui bawk a, a hlawkna pawh ka tel tam. Ui phei chu ka vulh rei hman mang lo a ni e. Ka chhungte ka hre ve reng a, ka ú fanu nula tawh hi ka awmpui ta bawk a. In lam chetah min awl hneh viau mai. Ka fapa pawh a tlangval ve ta viau a. A neihchhun ka nih vangte pawh aniang min ngai a, min zah bawk. Ka thu a awih loh hi ka la hre mang lo a ni. Ka kum te a lo tam ve ta bawk a, tu hmel hmuhte ka châk ve ta bawk nen, nupui nei turin ka nawr chho ta a. Tlangval hmelchhe lo tak anih vangin ngaihzawng hi chu a hmai bik lo chuan ka hria. 

Thla hnih liamtaah khan a bialnu Puiteii te in lamah palai ka tir ta nge nge a. Puiteii hi mize nu zêm mai, Pathian ţih mi tak niin ka hria. A ngainatawm bawk a, kei pawn ka fapa nupui atan chuan ka duh viau a ni. An ni lamah pawh harsatna a awm ta lem lo va, inneih kan tihtuah ţan ta nghal a. Naktuk hi an inneih ni tur a ni nghe nghe.. 

Kan buaina chu amah Puiteii chu nimin piahah khan a bo ta tlat mai! An sawi danin zinga an va kaitho tur kha a lo awm lo tawp mai a ni. A zing chhuak a lo la haw loah ngaiin an han ngaichang a, mahse, nghah chhuah tur reng a lo awm lo. An mangangin min rawn hrilh a, Bawiha nen kan lo hrilhhai viau mai. Zep loh chuan ka thinrim phat zawk. Tlangval dang a um nia ka ngaih vangin. Mahse, Bawiha chuan chu chu a ring tlat lo. Puiteii mizia a hrechiang a, mipa dang tlakzeh vang niin a ngai thei hlawl lo mai. A chhungte nen pawh kan han inberawn a, hrehawm an ti ve hle niin ka hria. Police kuta thlen mai turin ka ti a. Mahse, an pa ber khan kan han zawng ru leh phawt ang e,a ti a. Ka zahsak ve bawk nen, kan ngawi ta rih a. Tukinah khan Puiteii pa chuan min lo biain, "Tihngaihna kan hre ta hauh lo mai. Kan fanu hian tlangval dang a um anih chuan kan tan mualphona a ni si a, nangni lamin hma la mai teh u. In tih ang apiang kan pawm ania.. Chhuak vak thei pawh kan ni rih si lo" a rawn ti a. Bawiha nen sawi dunin nangmah hi kan sawi chhuak ta che a. Ka rawn pun tawp che a ni" tiin.. Dawhkana tuisik chu a in khawlh khawlh a. Kei chuan Puiteii a tih chu tlangval dang nen an inruk loh reng ka lo ring lo. Tunlaiah mi kan inthup thei tawh si a, Puiteii hian bialpa a lo nei ru reng a nih ka ring. 

"Anih chuan i lo kal hi i fapa pawn a hre ve maw! " Amanda chuan a ti a. 

"Hria e, amah ber berin alawm rawt zawk. Mahse, 'kei chu ka zak em mai. Eng emaw a nih thut chuan ka mualpho dawn si.. Ka lo kal ve lo mai ang' a tia" kan inlengnu chuan a ti a. 

"Chuan Puiteii chhungte lam in hrilh hre leh em? "

. "Aw hrilh e, anmahni zawkin kan kuta an dah vangin han ngawih ral tawp kha thil dik lo eng emaw te a lo nih hlauh chuan ka inthiam thei dawn si lo va. Kan fanu la ni chiah lo mah se, kan tihtur a nihve na chin niin ka ngai a" felfai fakin a ti a. Amanda pawh a bu nghat nghat mai. 

"Puiteii chhungte kan biak phawt a ngai dawn anih chu" a ti zawi raih a. A phur hmel hle lehnghal. 

Kan inlengnu chu Pi Zikpuii a ni a. A hoin Puiteii te in lam chu kan pan ta nghal a. An lo zi nak nak mai. Inleng neuh neuh an lo nei nual a. An vengchhung YMA ten an zawng kal ve reng bawk nen, Pasal um a nih teh chuan a zahthlak duh ve khawp ang. Pi Zikpuii chuan Puiteii chhungte chu thil awmziana hrilh zung zung a. An mitmengah beiseina te pawh ka zuk hmu thei e. Puiteii roomah kan inzui lut ta hlawm a. A room chu a zua lo naa a felfai kher mai, lehkhabu a chhiar ve nasa thin tih hriat takin lehkhabu a intiang úrh mai. Make up lam a uar vak lo bawk aniang, a ngah hran lo. Khum chu fel takin a lo inthlep ţha thân a. Engmah an khawih danglam loh vangin a chhuah dawn hian fel takin a thlep a ni ngei ang. Khumah chuan kan ţhu a. Amanda chuan zawhna ţhenkhat a zawt chho a. 

"Zanah thawm engmah in hre lo maw? A nih loh pawn a bo hma chhun velah khan a hmel landan te a danglam em? Ngui hmel emaw thinrim hmel emaw a pu em? " tiin a han chhep ţan a. 

Puiteii nu chuan, "Aw zingah khan va kaih thawh ka tum a, a mu rei thei lutuk hi ka hauhna a ni ţhin hrim hrim a. A lo awm si lo va, kan hriat lohin a chhuak ang a, pawimawh a va ti aniang tiin kan han ngaichang a. Mahse, a lo haw thei ta si lo va" tiin a chhang vat a. 

"Zawhna dang kha" nelawm takin Amanda chuan a ti a. 

"Aih, thawm kan hre miah lo. Zanah Johny (a pasal tur) a lo leng a, dar 9 bawr velah a haw a. Dar 10-ah Bawihi chu a mu. A mut hian ka la mu lo, ka account audit a nih dawn vangin kan pa nen kan enfel a.. Chuan, ngaibel tur anga a landan engmah ka hre thiam lo. Mi dang hian an lo hrethiam em ka hre lo va" tiin an pa chu a mitmengin a va râwn a. 

Pa ber chuan, "Kei pawn ka hre bik hauh lo mai. Ka lo chík em em lo bawk nen" a lo ti ve boh a. 

Hmalak dan tur a vâng hlein ka hria. 

"Anih sawi nuam chu a ni lo ang a, Johny nen an inzui hmaa a bialpa te hi in hre mial em? " Amanda chuan a ti leh a. 

Nu chu a ngawih vang vang hnuah, "Umm.. Hria e, Johny hma chiahah hian kan veng ţhenawm ami Akima nen an inzui ve ţhin a. Kum 4 dawn an inzui a ni. Mahse, kan duhpui ngang lo va, Akima khan nupui te a ruksan ta bawk a, an inthlah ta a ni" nuam tih loh hmel deuh hian a ti a. 

"Han inzawt zel ila, Akima chu eng nge in duh loh chhan le?"

"Nia, zep thu a cheng lo, addict a nia. No 4 a lo khawih ve nasa a. A landan mai chuan misual a ni lem lo" a lo ti ve mai a. Amanda a bu nghat nghat mai. 

"A lawmawm e. Engpawhnise amah Akima pawh la biak a ngai maithei. Tunah chuan tihtheih a awm ta rih lo bawk a, kan kal hmain thil pakhat chuah, Johny nen an innei tur hi a phur em? Zep miah loin min han hrilh teh u" a ti ta a. 

Pa zawk chuan "Phur tehreng mai. Engkim kha a phur vek a ni tawp. Johny hi kan lo duhpui ve bawk nen, a hlim lutuk" a lo ti vat a. Amanda chuan a duhtawk aniang. Kan chhuahsan ta phawt. 

Pi Zikpuii te in lam kan pan ve thung. Amanda chu a ţawng lo va, eng emaw tak a ngaihtuah leh a ni mahna. Kei chuan ngaihtuah dan ka thiam vak lo. Pi Zikpuii te in kan thleng a, in nuam tak a nih a rinawm. A sak dan pawh a sap style zet mai. A hmun a lo rem bawk nen. An nufa chauha chen nan chuan a lian lam deuh chu a ni. 

Johny leh a û ti tawh mai ang, Pi Zikpuii û fanu an awmpuite kha an lo awm a. Johny chu a nu ang lo takin a lian thelh thawlh viau. A hmel pawh nula tan chuan ngaihno a bei hle in ka ring. A ngui hmel erawh a thup zo meuh lo. Nupui tur an bo tlat chuan tu nge hlima nui vur vur thei ang. Pi Zikpuii û fanu Lawmi an tih erawh a phanchang lam a ni deuh a, a hmel erawh a chhe hran lo ve. 

"Zawhna inzawt nghal mawlh mawlh mai ang aw.. Johny, Puiteii nen in inzui hnuah ama lam atang emaw nangmah lam atangin buaina in tawk tawh em? " a ti nghal a. 

"Tawk chiah lo ti ila, a bialpa hlui Akima khan vawikhat chu a ruih laiin a lo vau a.. Phone-ah.. Kha pa kha i nei anih chuan a tu emaw zawk zawk chuan in tuar ang tiin.. Mahse, nupui te a nei tawh bawk a, engmah a rawn sawi leh tawh lo" fel fai takin a lo ti a. 

"Chu a vauna chu i hmuhpui ve a maw? "

"Umm amah zawkin min hmuhtir alawm.. Kei pawn ka ngai haw lem lo. An lo inzui rei ve bawk nen" a lo ti ve mai a. 

An nula thingpui rawn dah chu kan in khalh khalh a. "I nu sawi danin tuna a bo chungchangah mipa an inrawlh i rin loh thu a sawi a. Eng nge a chhan? " Amanda chuan a ti leh a. 

"Aa.. A mizia kha ka laka a thup viau anih loh chuan mipa dang vang niin ka ngai thei lo a ni ber. Rinhlelh tura a awm hi ka la hre lo hrim hrim a. Bakah khatiang last minute-ah chuan min phatsan duh kherin ka ring lo. " a ti niah niah a. A bialnu chu a hmangaih hlein ka hria. A ringtawk bawk. 

"Anih kidnap lam niin i ngai deuh em ni? " 

"Ka hre chuang lo chu pawh. Kidnap ni se, hlawkna tel tumin a chhungte an be daih tawh awm sia.. Ka rindan chuan amahah eng emaw inthiam lohna riau anei anga.. Min kalbosan aniang" a ti chuai raih a. Ka lo khawngaih ve tawp. Heti ang tlangval hmeltha han kalsan duhtu chuan chhan tha tak zawng a nei ngei ang mawle. 

"A tira an call khan a la tlang thei kha an tia, a hnuah a switch off ta kha a nia.. Kha khan ngaihtuahna dang chu min neihtir " Zawhna em em pawh ni lo vin Amanda chuan a ti a. 

Pi Zikpuii chuan, "Nia tiraw.. Mahse, a bettery te hi a low ve pawh a ni maithei sin" a lo ti nem diai a. A dik ve thei tho mai. 

Kan lét leh lamah chuan Amanda chuan hmalam a bih ngar a, "Sam, he thil hi a tawpna a lungchhiatthlak viau ka ring tlat.. Chhui rei pawh a ngai lo vang. Zaninah ka chhuak dawn a, engpawh thleng se koh theihin i awm dawn nia" a ti a. 

"Min hruai ve mai la" ka lo ti vat. A nui a, "Keimah hian a felfai zawk ang. A hlauhawm hleinem" tiin min rawn en a. A mitmeng takzia kha aw.. Ka va duh ngawih ngawih tak. 

Pi Zikpuii te case chuan ka ngaihtuahna a luah ve reng mai. Eng han tihtheih awm hek lo le.. Puiteii khan mipa dang a um anih ka la ring tho mai. A chhan pawh ama nu leh pa te ni loin min rawn pun daih pawh hian a hrilin ka hria. A chhungte sawn an hriatpui anga, an sawi hreh anih te ka ring rum rum mai. Zanah awm nuam mang lo vin nghah nei rûnin ka awm a. Amanda min lo call hun ka ngaichang rûn mai. A reh tlawk tlawk thung si. A va ho mai mai tak. Min hruai ve mai tur a nia. 

Zingah phak tawkin ka tho. Ka phone ka en hmasa ber, engmah a lo awm lo. A va hlawhtling a nih ka beisei. Ka call ta nghal a, "Nakinah i hre mai ang" a ti ringawt. 

Office ka va thlen chuan, chair-ah hahdam zetin a lo thu mu ar ar a. A sam chu a hnawng chhap bawk. 

"Nizan chu engtin nge? " ka ti nghal tâwng a. 

"A awmna tak ka la hre lo. A bo chhan erawh hriain ka inhre deuh" a lo ti mai a. Thil a pehhel ziah hi ka ning. 

"Engvangin nge a bo? Mipa dang a um tiraw? " ka ti vat. A nui sak a, "Um nang aw.. Mahse, a vanduai khawp mai." Tiin a mit a khap fak a, "Sawi chiang ve thin la" ka lo ti leh hrâwk. 

"Dawhthei thin rawh ka tih kha.. Coffee kha in zo ila, chhuak teh ang" a ti a. Coffee tak ngek ngawk kan in zawhah kan inzui chhuak leh ta poh a. 

Akima kan va hmachhawn ta a. Ruihhlo a nghei nge a lo thau kûng mai. Ka hmuh tum ai daihin ka hmu hmel tha bawk. Kan va lang thut chu a hamhaih tih a hriat. An nu erawh a zahzum hmel angreng. A hmel a pha dai mai. 

Kan kal chhan te kan han sawi chuan tha tak chuan min lo dawngsawng a. 

"I video hmangin i vau thin tih ka lo hria a.. " a ti nghal tâwng a. Akima a phâwk kher mai. 

"I sawi awmzia ka hre lo" a aw chu a hmel en aiin a sin. 

"Puiteii kha mi dang tan i phal ngang lo va, Johny nen an inzui hnuah pawh in la inhmu ru fô tih ka hria. Mi dang a neih dawn ai chuan thah mai pawh pawi i ti lo a ni lawm ni? Chuan, video tenghneng zet i kawl a. Chumi hmang chuan i vau thin a.. A dik em? " Amanda aw chu a nelawm chiah lo. 

Akima chuan zâm hmel a pu miah lo chu mak ka lo ti deuh, "Ngawi teh, madam, min ringhlel tihna a niang maw? Puiteii bo chungchangah hian inrawlhna chhete mah ka nei lo ania. Ka lo mangang ve em em zawk asin. Video kha chu a dik, ka kawl ngei. Mahse, Johny nen an inzui tirh khan kan inhmu a, tha takin kan sawi dun. Keipawn ka delete ang ka ti a. Engmah va tihbuai tumna ka nei lo. Mahse, zan khat ka rui sual a, chumi tum chuan ka va ankhum a. A tukah ngaihdam ka dil nghal. Amah zawkin inhmuh a duh thu a sawi a, chutah chuan video pawh chu delete hram turin min ngen a, keipawn ka delete lawk loh vanga ngaihdam dil chungin ka delete ang tiin ka intiam. Mahse, mak deuh chu khami tlai kan inhmuh tlai khan ka phone ka tibo ta daih a! Ka mangang khawp asin. Video kha a la awm si a. Ka in chhung zawng zawng ka dap kual tawh. Ka hmu zo si lo. Zanah dar 8 bawr velah kan nu phone-ah an lo call a, ka phone an chhar thu.. Lawm takin ka va la ta a. Video pawh ka delete nghal. Chu chu hmanni lawk kha a nia.. An innei dawn tawh si a, a chunga thil tha lo tih kha ka duh bik lo a ni" a ti ta dap dap a. Dâwt a sawi loh hmel viau mai. 

"I phone tihbo lo chhartu chu tu nge? " Chîk zetin a melh a. 

" Ka hre ngai bik lo. Saw Puiteii te veng nen kan inrina bula dawr kawtah sawn a lo awm a. Tlangval fel tak a ni. Lawmmanah cheng 500 ka pe nghe nghe. Rinawma tiin a insawi a, a hmanhmawh vangin a kal leh nghal daih a" a ti a. Amanda chu a bu nghat nghat mai. 

"Engpawhnise, lo kal bo lo la, Puiteii hi i ru chhuak kan ti lo ania. Mahse, eng emaw thulhah koh theihin lo awm ang che" Thupe aw deuh hian a ti a. Akima pawh a bu nghut mai. 

Kan chhuah hnuah, "Sam, a tawp kan hnaih ta. Puiteii chu a vanduai hle mai" a ti sap a. 

"Engmah ka la hrethiam chuang lo" ka lo ti hmanhmawh. 

"Puiteii hi khawiah emaw khungbo mek a ni. Johny nen innei lo se titu in a hreng bet mek.. A chiang em? " a ti fak a. 

"Chiang chuang lo. Tu nge chu chu? " ka ti leh hû! 

A chek hlak a. "Chu tak chu kan hmabak aw.. Chîk takin tu pawh i lo en tur a ni" a ti a. Puiteii te in lam kan pan leh nghal. 

An in pawh a lun leh viau. Laina chhungkhat ten an awmpui reng bawk nen. Amanda chuan an be zung zung a, ka lo chîk ve viau pawn tumah rinhlelh tur ka hre lo. Mahse, rinhlelh loh aiah a pa chu ka chîk zual deuh, "Ka fanu khan pasal a neih dawn ruaiah mipa dang a um hi chu rin harsa ka ti a ni" Tia a pain a sawi lai chuan, "Chu! A um tih i chiang em ni? " Amanda chuan a ti khauh! 

. "Ka sawi awmzia chu.. Um lo se a chin hriat hi a hun tawh lawm ni? " a chil lem khawlhin a lo ti a. 

"Um se chanchin a rawn sawina a rei tawh zawk lawng maw? " a lo ti ve leh khauh. Mahse, inhnial buai loin kan chhuak leh daih. 

. "Rinhlelh tur an awm anih chuan A pa kha ka ringhlel" ka ti a. 

"Maithei, a fanu hi a chhuang ve a. Johny hi a iai leh thut emaw tu emaw tan a hual leh thut pawh a ni thei. Akima pawh kut a thlak duh hial danah a fanu hi thunun a tum hle anih a rinawm" a lo ti puat a. A lo chhui leh vek anih chu.. 

Pi Zikpuii in lam kan pan leh ta. An lo kim leh thap. An ni lam hi chu rinhlelh tur vak an awm pawn ka hre lo. 

"Akima ka bia a. A tang na viau mai. Mahse, inrawlhna a neih ka ring tlat a ni" Amanda chuan hrilh bik pawh nei loin a ti a. 

"Akima chu a ni thei dawn em ni? Ni se khawiah emaw an kal daih lawng maw? " Pi Zikpuii chuan a lo ti a. 

Johny erawh a ngawi reng.. Lawmi chuan, "Kei pawh Akima chu ka ring vak lo. Puiteii khan ka bulah a sawi ve nasa thin a, Amah Puiteii zawk hian a duh lo vang. " a lo ti ve a. Johny erawh a la ngawi tlat. Thlanglam tukverhah a dak vang vang a. 

"Puiteii hi damin kan hmu leh ang em? " a ti zawi raih a. Ka lo khawngaih kher mai. 

"Ka beisei.. A dam beisei ang aw" Amanda chuan a lo ti a. Pi Zikpuii chuan, "Bawiha, intipachang hram hram rawh aw.. Eng em a ti lo vang.. Kan hmu leh em em ang " tiin a fapa chu a hnem a. 

"Puiteii leh Akima Video kha i lo hre ve reng reng em? " Amanda chuan a ti a. Johny chu a rawn inher a. "Video a, eng video maw? " a ti ta hû a. Amanda chu a khi sak.. 

"Hre lo la a tha zawk ang e" a ti thliam a. Johny chuan, "Khawngaihin Puiteii chu min zawn hmuhsak vat rawh.. Tunah te hian hrehawm takin a awm maithei asin" a ti leh sek sek a. 

"Tehreng mai. Zaninah kan lo lang leh zuai ang. Chumi zawhah Puiteii awmna lamah kan kal dawn nia" a ti ta mai a. Kan lo phâwk hlawm hle. Engmah a sawi thui duh si lo. 

"A va lawmawm dawn ve.. Puiteii chu a la dam ang tiraw? " Lawmi chuan a lo ti vat a. 

"Dam e. A thih hman loh hram ka beisei. A thi a nih zawngin a thattu te hian an damchhungin jail bang an zút dawn sia.. " a ti mai a. 

"E taka Pi Zikpui, i insak dan hi ka duhzawng tak ania.. Tu te nge i rawih? Thlaleh atang khian Muthi lama ka ram veah in sak ka tum ve a. Chhawr ve ka duh em mai.. Pasal fanau te pawh ka la nei ve dawn sia" a ti leh daih a. Min rawn melh zauh bawk. Ka lo lai ve em em lehnghal. 

"Ee. .. Ruai ve rawh. Mahse, ka chhawr laia an leader kha a thi tawh tlat mai a. A aiawhtu number hi ka pe ang che. An chhuang ve bawk aniang, hei kan inbiak pawh phah ta reng mai" tiin number an han inpe leh rih a. 

Kan hawn lamah "Zanah kan chhuak dawn maw? " ka ti a. 

"Dawn, haw lo la, ka inah zanriah ei mai ang" tumruh fé hian a ti a. Ka easy leh teh e. Ka nu ka bia a. A fel a ni mai. Kelsa kan order a, hlim takin a in chu kan thleng. Kan inbual fai a, eirawng kan bawl leh char char. 

"Nupa kan ang e" ka ti zauh a. A nui ve pût pût mai. 

"E taka i bula ka awm hian ka tihtur ka theihnghilh ziah. Mi biak tur ka nei tak e" a ti vut a. Pi Zikpuii number pek kha a hmet chhuak a. Roomah a va be daih. A insak tum pawh ka lo la hre ve lehpek lo va. Hmm.. A nuam ngawt ang. Duhtawkin ka che ve thei tawh ang chu.. 

Dar 8 rik dawnah kan chhuak a. Phone a hmang zauh zauh bawk. Pi Zikpuii in pawh a lo eng kulh a. Min lo welcome tha leh hle. Johny erawh a ngui telh telh ni maiin ka hria. 

"Akima hi ka ringhlel telh telh a, zaninah hian a in khi dap kan tum a ni. Puiteii a awm ka beisei" a ti a. Ka rin loh lam daih a sawi leh tawh. Johny chuan, "A thukru dawn em ni? An nu a awm ve reng si a' a lo ti a. 

"An nu khian a hlau alawm.. Engpawh ti se a hnial ngam lo vang" tiin titi phungleng eng emaw a vawrh kual a. Lawmi'n thingpui a rawn chawi. Kan in tan vel tihin an in hnuai lam atang chuan thawm ngaihnawm loh zet a rawn awm ta a. Kan phâwk hrû mai. Johny chu rang takin a tlan chhuak nghal. 

An in hi chhawng 3 a ni a. A hnuai ber chu store room-an hman a ni. Mahse, dangdai takin an in chhung atang chauha luh thlak theih vekin an siam a ni. A lai chu mutna room atan an hmangin ka hria. Keini pawh kan tlan chhuak ve nghal. Karei le! Ka rin loh lutukin mi pathum kawr dum vek hi in hnuai ber tukverh zawnah chuan an lo ding khap mai. Tin, mak lehzual chu tukverh chu bar a inkham vek avangin bar chu an lo zai bung vek bawk. 

"Inrawkna a nih hi.. Madam, man rawh" Johny chuan a ti nghal chul a. Amanda a pen thla chiah tihin in hnuai ber atang chuan Hmeichhe mangang au ri a rawn ri chhuak ta tlat! Ka phu chiang ngei mai. Hmanhmawh takin mi pathumte chu an che sawk sawk a. Amanda chuan a lo pui bawk! Misual a pui anih chu! Eng nge a awmzia?! Tukverh atang chuan pakhat chu a va lut ta a.. 3mins velah hmeichhe pakhat nen an rawn chhuak ta hlawl mai. 

Puiteii ngei a ni e..!! 

Amanda chuan phone a hmang nghal a, police an rawn lang ta bawk. Misual pathum te chu in rawk tum anga an lan a ngaih si avangin dan anga man an ngai ve tlat a. An man ve ta tho. Mahse, a ruaitu chu kan Amanda ngei a ni. A hnua a sawi leh danin, In dap phalna warrant kha dil ka tum ûk a, mahse, Ka hrechhuak tan tih Johny te khan an hre ta tlat si a.. Khami zan an sawn chhuak lo anih chuan an thah mai ka ring a, ka che hmanhmawh ta mai a ni… tiin. 

"Khai le.. I nupui hual, i nupui tur inrukbo dan leh a chhan hi i sawi a ngai a.. Kan lo ngaithla ang e" Tiin Johny chu a va melh a. Hahdam takin a thu bawk. Lo awm ve te pawn Johny chu kan melh thap. A thaw hawk a, a thlan fim a bawl tawk tawk mai. 

"Oh.. I sawi hreh viau paw'n i bialnu Lawmi kha kan sawitir thei tho ania.. " Amanda chuan a ti leh. Chu zawng kan tan thu thar a ni tlat! Pi Zikpuii makti lutuk chuan a awm a dawm tawp. Engmah a la hre bik lo a ni ngei ang. 

Johny chuan thawk la leh kâwkin, "Aw ka sawi ang. Tual ka that pawh a ni hleinem.. 

Ni e, a dik, Lawmi nen hian hun rei tak atangin nupa angin kan lo khawsa tawh thin. Unau mah ni ila, kan inhmuhna a la rei lo va, unau ang tak taka in en kha a harsa tlat a ni. Kei aia a upat zawk vangin min duat a, engkimah ka hlimna turin a awm thiam a ni ber mai. Mahse, ka nu hi kan zah ém vangin rinhlelhawmin kan awm ngai lo. Bialnu te pawh ka nei thin. Puiteii nen kan inzui tak hnuah ka nu khan nupui nei turin min ti ta reng a, hnial thei loh hun ka nei ta reng a. Amah Puiteii'n min tur ve reng bawk si. 

Tichuan, kan inneih dawn tak takah khan kan mang a ang ta a. Tihdan tur kan hre mai si lo. Puiteii bula thudik hrilh ila ka nu thlengin a mualpho dawn si. Lawmi hian ngaihtuahna thar a rawn nei ta a. Akima hmang tangkaiin Puiteii chu kidnap rih ila, Akima hmin bawk ila, an pahnih chuan tlanbo ta mai se tiin. A chhan chu Akima hian englai pawn a duh tih ka hria, Puiteii pawh hian an lo inzui rei tawh vangin a theihnghilh thei hek lo. Chu bak remruatna kan neih tak si loah chuan Akima in rinhlelh theih nan Puiteii nen an video chu neih dan kawng kan zawng ta phawt a. A phone kan ruk sak a, video kan inthawn hnuah kan pe let leh ta a ni. A pe lettu kha kan rawih a nia, engvang nge tih erawh a hre lo vang. 

Tichuan, puiteii bo zan khan mut tawh hnuah, Akima anga biain, 'Lo chhuak lawk la, a tawp nan thu pawimawh tawp sawi a ngai a, i lo chhuak lo anih chuan pasal i nei thei kher lo maithei" tiin.. Puiteii hian Akima hi video vang khan a hlau tih kan hre tawh hrim hrim a. A rawn chhuak ta ngei bawk. Akima hminga kan tih chhan chu nakinah eng emaw thulhah chetsual te a awm thei a, keimahni kan ni tih a hriat loh theih kha kan duh ber a ni. Tin, Video kan lak ruk chhan pawh nakinah min hriatchhuah hun a awm tak thutah vau nana hman kan tum a ni. Tichuan, Puiteii chu a hnunglam atanga a hmui hupin nikhaw hre loin kan awmtir a. Kan in lamah kan phur ta a ni. 

Store roomah kan dah a, kan store hi a la hmu lo hrim hrim. Kan hrai rui char char a. Nikhua a hre mang lo. Eitur erawh kan pe zeuh zeuh. Ka nu hi inhnuaiah a chhuk ngai lo va, kan hlauthawng lem lo.. Engtin nge min chhui chhuah ka hre thiam tawh lo ve" A ti ta a. 

Amanda a nui hak, "Mipa um nise a chin kan hre daih tawh ang. Hlawkna ûm vanga rukbo nise a chhungte emaw nangmah ngei pawn betu i nei tawh ang. Tumah chutiang an awm tak lohah chuan Puiteii hian pasal a um lo va, Hlawkna ûm vanga rukbo a ni hek lo. Tu emaw in inneih duh lotuin a ru bo a ni mai. Chutah chuan Akima a rawn langsar ta nalh a. Ka sawi hmaih tak.. Khamini i nuin min rawn hmuh ni zanah khan in in bulah khan ka tâp tlaivar deuhthaw a, ka rinhlelh sa vang che u a ni hran lo. Palh awm thei a nih vangin.. Zan reia store room lam eng pup ka hmuh khan ngaihdan ka nei thei ta deuh a. Mahse, ka la fiah lo va, ka sawi thui ngam lo. Chuan Lawmi hi rinhlelhna mita ka en nachhan chu khami tlai kan rawn kal hmasak ber tlaiah khan a call ka dawng a, "Puiteii chuan engkim min hrilh thin alawm.. Video chungchang pawh.. Chuti khati" tiin ka hriat tura a duhho a rawn sawi vang khan ka ringhlel ta zawk a ni. Akima burbun in tum luatah thudik ka va hre ta zawk si a. Akima kan va hmu a, a phone bo chungchang a sawi khan engkim a chiang tawhah ka ngai. Mahse, ka la duhkhawp ta lo chéu! Hmeichhe doctor lar tak pahnih ka hmelhriatte be rawni Lawmi thlalak hi ka entir ta hlawm a. Pakhat zawk chuan vawi hnih lai nau titlaa a pan thu a lo sawi ta nalh. Hei hi a dik lo hle naa.. Nupaa duhthlannaa tihtlak duh anga in insawi vangin anih kha a tihtlaksak che u.. Ka chiang ta ka tithei ta a ni, in in satu ka bia a, luh ruk ngaihna a awm lo a tih hlawl vangin leh in dap phalna ka lak hman tawh si loh vangin khang mi pathum te kha ka ruai ta a ni. " a ti fak fak a. Chhuang zetin ka lo melh ngawih ngawih thung. 

"Ka sawi kha.. Puiteii chu a vanduai hle a ni" a in lam pana kan kal laiin a ti a. 

"Nia, Johny te chu an timak ka ti khawp mai" ka lo ti a. 

"Hmangaihna leh sex hi thliar thiam a har ve bawk a ni. Inhmangaih tak tak se nau kha an titla lo vang. An duh chu zalen taka intih kha.. " frank zetin a ti le pek.. Ka lo nui tawp. 

"Innei ang" ka ti thâwr a. 

Makti zeta min rawn melh hâw pahin, "Ka thi a la hul lawk dawn hleinem" a ti sap. Ka nui chhuak hawk… chak zetin a lim nghal..