Boss Amanda 2

BOSS AMANDA.. (Chapter-2)

Ziaktu : Toni Râlte

Thisen thâng rim chuan ka pum a tino leh nghulh mai. Ruang chu a bawkkhup zawngin a mu a, Constable pakhat chuan a han kuai let a. Tupawh chu kan phawk hrû mai. Kei phei chu ka petek hman thelh a ni. Ni e, ruang ka hmuh tawh azawnga rapawm ber a la ni ngei chhap e. Hmeichhe ruang zawng a ni naa, a hmai vun zawng zawng chu hih vek a ni. A awm bawr chu thil zum tak hmanga vih chih hrup a ni bawk a, thisen chu a khang lek lek hman tawh bawk. Saruak ngalngatin a let reng bawk si. Amanda meuh pawn a en rei duh miah lo. Tu nge a nih tih hriat theihna tur engmah a awm lo. A bul velah lah hnuhma chhete mah hmuh tur a awm hek lo. Kan bangbo viau mai. Amanda min lo call angin zing dar 4-ah ruang an hmuhna lam panin ka inkhalh phei a, ani chu a lo awm der tawh a. Mahse, ruang an hmuhna tak Aizawl tlak lam venga tuikhur bulah kan pahnihin kan kal kha a nia. Ka lo zui kher kher chu pawi ka ti hnuhnawh. Ruang hmu hmasa bertu chu Addict a ni a, Zosiama a inti. Tuikhur tui hi hman a duh vangin a pan a, ni dangah pawh a lo hmang fô tawh a niawm e. Awmna mumal vak a neih loh vangin nizanah pawh tuikhur chhak lawka waiting shed-ah a lo riak a. Zing dar 3 bawr velah a damdawi châkin tiharhin a la neihsa tlem chu hman tumin tui awmna a zuk pan a niawm e. A tirah a hmu mai lo va, mahse, rim danglam na nâ na chu hai theih ni hek lo, a hnar len vat vat paha a han hawi kual chuan bawkkhup zawnga ruang lo let reng chu a hmu ta a ni. Hetah hian a inchiu tawh a, a kai tir rui sualin thil a hmu sualah ngaiin a va pan a, a kein a va tlawh vel a, mahse, thisen thâng rim zawng zawng nen mitthi a ni ang tih a ring thiam ta ni tur a ni,  rang taka insasengin in hnai ber tuikhur atang chuan a hla deuh chutah chuan a han zualko ta ngawt a. A tirah an lo awihsak mai lo. A chhan pawh rui reng, vak kual reng, rukru ve reng thin a lo ni a. Rin a hlawh vak lo hi a mak hran lo. Mahse, a tihtak em vangin torch light nen chiang zawka en turin in neitupa leh a fapa te nen an zu thawk chhuak leh a. Dawt a ni lo tih an hriat veleh police an call ta nghal a ni. 

Ruang chu an senghawi fel a, postmortem turin an phur chho ta. Mipui nawlpui hriat ve hmaa an senghawi fel thei chu a tihzia e. Mipui hmuh atan a lainatawm mah mah tlat. Hmeichhe hleitling tak, khal zet mai kha a nia, a ngo a. Tin, a pian pawh a nalh thlarh mai. A sam kha a inchen lo nuaih a, tin a ruang hmuhna bul hnaiah sam hlawm kha hmun hnih velh a awm vangin an tansak a nih a rinawm. A sam erawh a dum tih ka hre thei. Tu emaw fanu duatlai a ni ngei awm si a, khatia rawng taka thah kha a phu hauh lo vang le. 

"Thinrim inhrikthlakna a nih duh hmel ka ti.. " ka ti a. 

A ngawi ran ringawt. Ruang hmuhna bul vel chu a en kual leh ngial a. Kei chuan hnar hup chungin ka lo nghak. 

"Engmah an hnutchhiah miah lo mawle.. He lai hmuna thah a nih a rinawm loh" a mah leh amah chu a inbia a ni ber. 

"Lo kal tawh mai rawh. A rim chhe si.. Pum ruak nen ka luak mai dawn" ka ti a. Ka pa lo ve hle a ni. 

"Lawk aw.. A sam hlawm khat hi ka'n la ve reng reng ange.. Hawh le.. Kal ang" tiin kan inzui chho nghal a. A tawng leh tawh miah lo. 

Mitthi kha tu nge tih hriat a la nih si loh vangin news-ah thehdarh loh theih a ni lo va. A hmel dik tak lantir dan a awm bawk si lo. A hmai vun kha hih vek a nih si avangin.. Mahse, a pianzia, a san zawng, a vun rawng nen an han ti chhuak a. Ni khat a ral a. Ngaihventu a nei lo. A lainatawm ka ti takzet a ni. Mahse, a tuk a ni hnihnaah chuan thuthar kan hre ta. Hmanhmawh takin damdawiin lam kan pan ta a. Kan va thlen chuan pitar ti ila, nu upa lam zawng a ni. Khawpui nu a ni lo tih ka hre ve thei mai, hna a thawk hah hle tih a hriat a, a kum zat aiin a lang upa ang tih a rin theih mai. Chu kan pi chuan ruang chu hmuh a lo dil a niawm a. A chhan pawh a fanu a bo vang a ni. 

Ruang chu an hmuhtir ta a. A petek nghal dawrh. A hmai chu bandage-in an tuam phui lûk naa a ruangam atang chuan a fanu ni ngeiin a hria ni tur a ni. A tap nghal ta mai a. Chutah, "Ka pi, a ni chiang a maw.. A hmel i hmu si lo va.  I fanu a ni takzet tih fiahna a awm thei em? " Doctor chuan a ti a. 

A va pan hnai a, a malpui dinglam chu bih sawt sawt a, "Hei a tetlaia tuiso-a a inleihna ser pawh a la ngai reng. Ka fanu ngei a ni" a ti ta a. Ni e, a malpui dinglamah kutphah tiat zet ser langsar lutuk lo a lo nei reng mai. A chiang ta. 

"Lalmuanpuii a ni a, kum 3 lek anih laiin a pa hian min boralsan a. Kan nufain kan khawsa ve nawk nawk a. Thingtlangah chuan kan retheihpui te pawh an la awm ve zel a, mualpho êm chuan kan la awm lo. Kei hi Pathian zarah ka hriselna a tha ve hlauh a, tin, ka taima ve bawk nen. Lo te pawh ka vat ve mai zel a, khawtlangin min khawngaiha min khai chhuah tum pawh a awm ve. Muanpuii hi ka feh dawn chuan apa û te inah ka dah ve mai zel a. Kei hi kan khua chu khawchhak lamah daih anih vangin chhungkhat han belh tur em em ka nei lem lo. Muanpuii pi leh pu (apa nu leh pate)  lah an dam rei lo hle bawk si, Muanpuii nî leh a papuia te erawh kan khuaah an la awm ve a. An bulah ka dah chhawk ve mai a. An faten an lo awm ve lehchhawng thin. Ka la naupang bawk a, heltu pawh ka hmu ve reng thin a. Mahse, muanpuii pa nen khan kan inhmangaih em a, ka chhungte tuithlar pawh pawisa lovin ka zui kha a nia. Awm tawh lo mah se, pasal dang han neih chu uirenaah ka la ngaih tlat vangin mipa lam chu ka hawi ta lo reng reng a. Min beiseitu pawh nikhua a rei chuan an awm ta lo reng a. Pawi ka ti lem lo. Hun a liam ve zel a, Muanpuii pawh a lo nula chho ve ta reng a. Min hmangaih a, kei pawn a nat ka phal ngai lo. Min khawngaih luatah pawl 12 a pass khan Aizawla awm te a ngai tawh dawn si a, A chawl ta ringawt. Min kalsan kha a hreh a ni ber. A tul tul min thawhpui ta a, kum 3 liamtaah khan a thiannu ve ber Maruati nen an sumdawng ve ta a. Maruati hi sumdawng thang a ni a, Muanpuii pawh a kaihruai chho ta zel a. A rei a, Mateii pawh a zeihawi ve ta khawp mai. An sumdawn dan chu silchar leh Gauhati-ah Bungraw hrang hrang zuk lain, kan khua leh a chhehvelah an zuar kual ta thin a. A hlawma pek te pawh an nei bawk. Ka hriatpui ve vak lo. A tirah hlawk vak lo mah se; kum 2 hnuah chuan a hlwwk ve ta hle mai a. Kei pawh hna thawh a phal tawh lo. Mahse, in sakna tuak ang kan tih vangin thlai hmun ka nei ve leh a. Ka thlai thar ang ang ka zuar ve ta zel a. Mateii duhdan angin kan in bula kan ram zimteah dap râp mai maiin dawr angreng kan siam ve a. Chawhmeh bakah Mateii bungraw hralh bang te kan dah ve a ni. A tum dan chuan in te kan sa ve anga, chumi zawhah dawr pangngai tak hawn vea eichawp dawr thlenga tih ve a tum a, chu ringawt pawh chu kan nufa tan chuan a tawk reng mai. 

Tichuan, kumin kumtirah in chu kan sa ve thei ta a.  Aw… mate, i thawhrahah pawh i cheng rei hman si lo va tiraw? A va na em.. Tichuan, dawr erawh a duh ang khan kan la siam chiah lo. Kar hnih liamta khan amahin bungrua a zuk la a, Maruati khan pasal a neih tak vangin Mateii hi amahin a kal mai zel tawh a. Ka ngaihtuah thin viau nain him dam tak hian a rawn haw ve leh mai zel a. Thawk chhuaktu a nih miau vangin ka tan han phal loh bur kha thil tih chiah ka ngai si lo. Tin, amah pawn dawr hawn hunah chuan zin fo a ngaih tawh loh tur thu a sawi bawk nen, tichuan, Tun tumah pawh khan a zin ta a. A zin rei ngai lo va, mahse, tun tum kha chu kal fô ngai lo tura bungraw tam zawk lak a tum vangin a cham hlek tur thu a sawi a. Kar hnih a liam hnuah pawh a la rawn haw si lo, kan inbe pawp hleithei miah lo lehnghal a. Ka mang a ang ta deuh. Maruati te ka pun a, tihngaihna an hre bik si lo. Phone kan tum thin, a tlang thei reng reng bawk si lo. Mahse, police te hnena thlen ngawt kha ka hreh ta tlat a. A chhan chu sumdawng a ni a, sumdawng hmeichhe thenkhet chet dan kan hre ve vek a, eng emaw zawngin an lo ngai anga kan mualpho èrh ang tih ka hlau a ni. 

Tichuan, mangang deuha ka lo nghah tlawk tlawk laiin ruang chhar thu kha Maruati chuan min lo hrilh a. A pianzia leh ruangam in sawi hmangah Mateii a nih duh hmel riaua hriatna kan nei a. Ka rawn kal ta tawp mai a ni.. Ka hlauh ang ngeiin a lo ni ta chiah a.. " tiin Muanpuii nu Pi Lawmi chu a tap hawm hawm a. Kan khawngaih tlang kher mai. Amanda pawh a heh a pet fan fan ringawt. 

"Tu pawh ni se, eng mi pawh ni rawh se. I fanu rawng taka thattu hi ka zawng chhuak ngei ngei ang" a ti vawt ta raih a. A mitmeng pawh a nelawm loh kher mai. 

Muanpuii thiannu Maruati atanga bultan a ngai niin a lang. An khaw lamah kan tlan ta nghal a. Maruati pawh a thiannu thihna chuan a nghawng ve hle a nih a rinawm. A tap nasa khawp mai. Uitu leh sûntu pawh a ngah zet mai. Nula fel leh vengva tak, hawiharh tak a lo ni bawk nen, a hmel lah a lo chhe lo kher bawk si. Ka lainat takzet a ni. An han vui zo va, Amanda nen Maruati ho vin an in lamah kan kal ta a.

"Engtin nge in sumdawn hian in kal thin? Motor in hire nge? Khaw nge in zu thlen a, bungraw lakna bik in neih ngei a rinawm a. Kan hriat atana tul zawng zawng min han hrilh teh.. Khawngaihin" Amanda chuan a ti a. 

Inhru chawt chawt chungin, "Aw le.. Ih, sumo kan hire tawp thin. Kal lam chu hire chuang lo vin ticket kan la ve mai a. Hawn lamah erawh kan bawr deuh thin vangin kan hire mai zel a. Remruata a ni nghe nghe. A second driver pawh Puia a ni. An fel khawp mai. Remruata hi anmahni sumo a nia. Zu pawh an in vakin ka hre lo. Chuan, Silcharah chuan kan bungraw lakna thin Pu Gunji kan ti mai a, chupa inah chuan kan thleng ve mai zel a. Zan hnih khat bak kan riak ngai lo bawk a, an fel ve viau zel. Gauhati erawh Mizoram House a remchan loh chuan hotel man tlawm deuhah kan thleng mai thin. Bungraw lakna bik chu nei e, kan inhre Tha khawp mai.. " a ti ta dap dap a. 

"Remruata number chu min pe la tiraw? Chuan, in zuk thlenna te pawh.. Taka Muanpuii thih hmaa in inbiak hnuhnun berin eng nge in sawi.. I la hre thei em? " Amanda chuan zangkhai takin a ti a. 

"Umm la hre thei e. Eng em em kan sawi lo, hei kan pa rain coat tur hi ka chah a. Quality tha law law min lo hawnsak turin, a la buai thu bakah kan bungraw lakna pakhat zawk chhungte an thih vangin a nghah thu a sawi. Gauhati lam zawk an nia. Pu Zoduha kan ti mai a. Mizo hian kan dawr nasa a" Maruati chuan a ti a. 

"Chuan a nuin a rawn pun hma che kha chuan in inbe tawh lem lo tihna mi? "

"Umm kei ka lo buai ve thin bakah a buai ve tho sia, zuk biak sek nachhan tur kha ka nei em em lo bawk sia" a ti tha ve mai a. 

"Anih Muanpuii hian ngaihzawng a nei em? " Amanda chuan a ti tâwng a. 

Maruati chuan, "Nei ve thin a, mahse, an inthen lai a nia. Ngaihzawng pakhat chiah a la nei, kan khaw thenawm ami saw a nia" a ti a. 

"An inthen na a rei tawh em? " a ti lehzel a. 

"Rei ve tawh angreng, thla 3 dawn chu a ni tawh. Chupa chuan sawn a thlaksan a. Ngaihdam dil viau mah se; Muanpuii khan a ngaidam thei ta bik lo a ni" a lo ti a. 

"Aw le.. Chu pa biak pawhna pawh chu kan mamawh dawn e" Amanda chuan a ti a. 

Kan biak pawh tur number zawng zawng lain leh  A thiam ang tawka Maruati a hnem hnuin kan chhuahsan ta a. Muanpuii nu kan va râl leh zuai a. Ani erawh thu zawh tlak a ni meuh si lo va, kan hnem ve luam hnuah Aizawl lam panin kan hawnsan leh ta phawt a. 

Zanah kan riak dun!  Mahse, engmah a thleng lo. A rilru a hmang lehpek a. Kan infawp ringawt. A ho thei e. Ka ît ropui si, mahse, ka fight duh teuh lo. Martial Arts a thiam nasa si. Min kick hrep ang tih ka hlau. A bula awm nuam thin viau mah se, a bialpa ka nihna angin ka pangchang ve thin si a. A hrehawm chang a awm thin. Mahse, chantawkah lungawi zel phawt ang. 

Remruata leh Puia chu office-ah kan ko a. Mi pangngai tak hmel an pu. Zawhna pawh an chhang tha viau. 

"Muanpuii kha in lo phur haw ngei tih ka hre tawh a.. Khawiah nge in drop? " Amanda tawngkam teh tlawng chu.. Ka lo bo deuh. 

Remruata zawk chuan, "Madam, i hre sual aniang, Muanpuii kha kan phur haw reng reng lo. Biak chu min rawn be ngei mai. Mahse, a hawn hun nia a sawiah khan a reh ta hmak sia, ka call in a tlang thei bawk si lo. I duh leh ka phone pawh i check thei ang. Ka thinrim viau nghe nghe. Passenger dang ka lo hnar tawh sia" a ti a. A pawr miah lo thung. 

"Okay,.. Anih chuan Gauhati-ah in zuk inhmu reng em? " hahdam hmel zet hian a ti a. 

"Vawikhat chu hmu e. Paltan-ah kan inhmu zuai. Bungrua a lo dap khawm mek a" Puia chuan a lo ti vat a. Puia mitmeng ka chîk hian ka rin zawng a ni lo tan riau. Rinhlelhna mita melh a tul tlat si a. 

"Anih khaw nge a thlen te a sawi em? "

"Sawi lo. Kan lo zawt bik lo va" Remruata chuan a ti a. 

"Aw le, engpwhnise, nangni pawn theihtawp min lo chhuahpui u la.. Kan tanho a ngai maithei ania. " a key a thlak leh ta daih! Remruata leh Puia te chu an bu nghut nghut a. Min puih an hreh loh hmel hle. An chhuah hnuah, "Ka mi rin zawng an ni hauh lo mai. Gauhati lama kan liam thlak a ngaih hmel tlat. Kha mite pahnih hun hman dan hre turin" a ti thawp sat a. Ka lo in ready leh viau. 

Gauhati khaw lum dan rapthlak lutuk hi chu aww… Mizoram House-ah kan thleng thei hram. A remchanna em em chu Sumo Counter kan hnaih kha a ni. Counter nghaktu lah a nuthlawi fing fel leh biak nuam zet a lo nia. Remruata te hun hman dan tlangpui pawh a lo hre zet mai. Muanpuii ruang hmuh hma bawr khan Remruata leh Puia te chu Mizoram House bulhnaiah hmuh tur an awm loh thu a sawi ta.. Amanda beng verh zawng tak a lo nia!  Khawiah emaw pawh an leng kual ve pawh a ni thei a. Mahse, chuti tut tuta bawhzui nghal chu a remti lo. Muanpuii thihnaah an inhnamhnawih a nih pawhin a kaikuang an nih a rinawm tlat loh. Thahna chhan tur an nei lo. Chuvang chuan a kaikuang ber kan hriat a tul ta a ni. A sumdawn pui te kan biak a tul. 

A dawr thin te number kan nei vek bawk a. A harsa lem lo. Maruati bula a sawi ang khan Zoduha an tih mai chu a lo la awm lo va. A bak mi pathum chu kan be ta a. Mahse, ka beidawng. Rinhlelhawm ka hmu tlat lo. Pakhat phei chuan pawi a lo ti ve em em a, an customer hlun ve kha a nia, huat ngawt chhan leh han thah ngawt chhan tur an nei si lo. Thiam taka Amandain a'n chhimbudawi kual vel pawn engkim an sawi chat chat thei. Tin, receipt a tangin Muanpuii thil lak bakah a kal ni thlengin an rawn phawrh nalh nalh thei si. An hnathawkte lahin an hriatpui vek bawk. Amanda meuh pawh a buai ve tan ta. Silchar lam zawk em mawni dawn le.. Mahse, Silcharah a inlei lawk vek tawh hnua Gauhati-a chhuk leh kha a ni a, Gauhati- atanga hawna Silchara a bungrua lam kawi kha a tum dan a ni si a. Silchar chu a rinhlelhawm tlat lo. 

Zoduha dawrah pawh chuan kan va kal ve tho va. A lo inkhar thiap si. Ani hi an khuaa hawng angin an sawi a. An khua erawh a hla vak lo. Amanda chuan kal a duh ta tlat!  A kawtawpah a tang tawh tih a lang reng mai. Zoduha chu beiseibo a ni ka tan chuan. Hmuh pawh inhmu lo napui chu Muanpuii thihnaah a inhnamhnawih lo vang. Mahse, kan kal ta tho va. Gauhati atanga 30kms vel a ni. A la thingtlang ve viau mai. Zoduha hming dik zawk Sindhu Singh tiin kan han zawt kual a. An lo hre nasa mai. An khaw pa hausa ve tak a lo ni reng bawk nen, a lo lar ve zèk a niawm e. A in pawh a awmna a laili angreng. Kan va thlen chuan a nupui leh fate an lo awm a. Khaw nge tia kan han zawh chuan, Gauhati-ah an ti heu mai!  Chhei le! 

Thla 3 zet a rawn haw tawh loh thu an sawi takah chuan Amanda mitmeng chu phurna hlirin a khat. A nuam chho dawn e. Tihtheih vak kan neih loh vangin Gauhati-ah kan let leh a. Zoduha dawr lam kan pan nghal. A dawr bula sumdawngho chu kan kawm kual ta hrep a. Vaiho hi zawng dawihzep tih takah an khap ang zek zek a, engmah an sawi tha duh lo. Mahse, Mi thluak tha ngang Amanda tan thil harsa a lo awm tak tak lo ve. 

Muanpuii ruang hmuh ni kha ni 24 a ni a, ni 20- atangin Zoduha dawr a inkhar bawk. A karah ni 4 a tla a, ni 4 chhung chuan thil tam tak a thleng thei tlat. Zoduha dawr Opposite chiaha tlereuh dawr nghaktu chuan thu bengverh tak a sawi ta chiah a. 

"Ni 19 khaw thim hma si khan mipa pahnih leh nula chu an lo kal ngei mai a. An awm rei angreng, an lo chhuah leh chuan nula chu a lo chhuak ve tawh lo. Zan dar 9 thleng ka inhawng thin a, ka hmuh loh kara a lo chhuak anih loh chuan a chhuah lai awm ka hre miah lo. Mahse, a tuk atangin dawr a khar ta sia, ka lo ngaihven zui tawh lo va. In sawi nula chu a ni em tih erawh ka hre lo" a ti ta a. Amanda chuan rang takin Muanpuii dam lai thlalak an tar a capture leh chhawn chu a hmuh ta vat. Vaipa chu a bu ta nghat mai. "Anih ngei hi" a ti sup a. Remruata te thlalak kan lo kawl mai lo chu Amanda chu a phun hlak mai. Mahse, mipa pahnih ruangam vel a sawi danah an ni bak an nih a rinawm loh. Ni 20 atanga Zoduha an hmu ta miah lo leh an khuaa a awm ta bawk si lo chu a mak viau bawk. Chuvang chuan rang takin Gauhati Police lam be pawpin, Zoduha dawr hawn phalna warrant kan la a, an ni te ho nen chuan kan hawng ta a. Ani hi a dawr hnuaiah hian pindan te reuhte a awm a. A cheng zui nghal mai niawm a ni. Dawr chhung chu a lo zau viau mai. Naupang atanga puitling thawmhnaw chi hrang hrang chu a lo khat tûn a. Dawr chu kan han fang kual a. Engmah thil danglam kan hmu lem lo. A pindan lam panin kan inzui thla a. Step tawp ber kan rap chiah tihin thil rimchhe tak kan hre zui ta a ni. In chung lama kan hriat loh chhan pakhat chu a pindan kawngka kha a lo phui viau a lo nia. Rei pawh zawn ngai lo vin a khum bul chair-ah thu mu titih, a hrawka zaina hnuhma awmin Zoduha ruang chu kan va hmu ta a ni. A khawng vek tawh a, a room Ac avang chuan nge ka hre lo, a lo chhe tawih uchuak lo thung. A rim erawh a chhe zet mai. 

Tunah chuan Remruata te pahnih kan bitum thei ta. An ni pahnih bak han rinhlelh tur an vâng tlat. A chhan erawh kan hre thuai ang chu.. 

A tirah an tang nasa ngang mai. Fiahna kan nei miah bawk si lo. Mahse, Hahdam hmel zeta Amandain, "Muanpuii bungraw thahnem tham tak kha tunah hian khawi hmunah nge a awm ka hria asin. Ka sawi dawn em ni ang.. " a tih takah chuan an ngawi dûk a. 

"Tin, damdawi pawh kha.. In dealer hi tunah an veh mek bawk e" a ti zawm leh zat. An inmelh hrek hrek a, tlan chhuak thut duh hmel an pu. Mahse, kan hual thap si a. A tawpah hah hmel zetin a thaw hap a. Thisen zám pawng tawlh tawlh khawpa insangmarin hetiang hian Muanpuii leh Zoduha an thah dan chu a sawi ta a ni. 

" Ni e, Muanpuii kha thah kan tum bik lo. Zoduha te nen hian hman atanga inhre tawh, a hnen atanga damdawi inpe tawn thin kan ni a. Kan dealer hian Muanpuii hi a ît hle mai a. Keini tan lah a laka tlaktlumna hmanrua atan hman kan duh ve tumhrang si a, mahse, kan dealer a zin rih vangin Muanpuii bulah dawt sawiin a cham rih theih nan Zoduha a haw thu kan hrilh a. Mahse, rin aia hmain Dealer a rawn haw leh hma a. Sum tam tak min offer si a, hnar phal chi ni nghal lo chuan.. Tichuan, khamini ni 19ah khan Muanpuii bulah Zoduha a rawn haw leh zawk thu leh kan kal tur thu leh kalpui a duh chuan kan hman thu kan hrilh a. A lo duh khawp mai a. Kan va kal anih kha.. 

An han indawr fel a, Muanpuii chu tihluihna hmangin Zoduha pindanah kan khung ta a. Kan hawnsan ta phawt. A tuka va lam leh mai tum kan ni. Thil a thleng vek tawh anga, amah pawn sual a chhuah zui loh kan ring a. Mahse, thil a lo kal sual hlauh. Zoduha khan Muanpuii chu a khawngaih ta tlat a niawm e. Kan dealer nen chuan an lo inchai fe a, Muanpuii lahin tan a lo khawh ve nasa.. Zoduha khan a thih phah ta a nih kha. 

Duh tawka a pawngsual hnuah a chhuahsan a. Min lo bia a, Zoduha a thah vangin Muanpuii chu a rang thei ang bera hruai chhuak turin min rawn hrilh a. Zing dar 3 velah a ruk thei ang berin Zoduha dawrah chuan kan va lut ta a. Muanpuii chuan min lo haw ngang mai a. Thlem chitinin kan inthlem, a phone a lo vawmchhiat vangin police a lo be thei lo hlauh zawk a. Kan vannei ta hlauh. Mahse, kan ruala hawn chu a duh ta bau lo va, engkim puanzar a tum thu a sawi bawk. Mahse, tihluihnain kan hruai kir thei hram. Damdawi hmangin kan chiu tawp a. Eng em ti lo in Mizoram kan rawn inhruai thleng ta hram a. Mahse, kan buai ta a ni. 

A harh anga, thudik a puang dawn tih kan hre ve kar.. Kan dealer kan bia a. That mai turin min ti ta a. Tin, kan that anih chuan sum pawh a tam thei ang ber min pek a tum thu a sawi a. A harsa ve khawp mai. Man chhuah kan nih loh nan dangdai taka that turin min ti lehnghal. Zu leh damdawi kan tih pawlh sauh sauh a. Muanpuii chu kan nghaisa ta a ni. Chumi hmain ni e, a bungrua kha ka phur haw nual a. Thu a awih zui mai ka rin vang ania. Mahse, amah ber a thih takah chuan tiin a bungrua kha ka tiral ta a ni. 

A hmai vun kha Puia hian a hîk a. Kan kai em vangin engtin chiah nge kan sawisak ka hre ta lo. Tichuan, kha lai hmunah khan kan phur phei a. A ruang kha kan va dah ta a ni… " 

Mizo nula hralha that zuitu te pahnih chu mipui kuta hlan an chakawm kher mai.. Mahse, dan a awm tlat si a!  

Zanriah kan kil dun laiin, "An dealer kha tu nge? " ka ti a. 

"Sam, a la hun lo. Tunah hian veh mek a ni.. " a lo ti mai a. 

"Tun tum chu a khirh viau dawn aiin a awlsam phian tiraw" ka ti leh a. 

"Nia, chhui vak kha a ngaih ka ring lo sa reng a. Mahse, kan hah phah ve thung.. Ka kut ngeia Remruata te thah ka chakzia hi i hrethiam pha lo hial ang " a ti sap a. A mitmeng de sawr sawr chu rilru mang deuhin ka thlir tawp… 

Fawh chu khawilamah…