D Rose Last

D' ROSE…. (Last) 

Ziaktu : Toni Râlte

"Dite, I tha em? Hei harh teh.. " tiin Puia chuan a sawi nawk nawk a. Zingah a lo chhuk har em vangin kaitho turin a han chho kha a nia. Kawngka a lo la kalh si, a kik vak vak a, thawm engmah a rawn chhuah der si lo, a ngaih a tha ta vak lo va. Henry zu punin kawngkhar chu an tichhe ta a ni. A room chhuatah nikhaw hre lo vin a lo let reng mai. Rang takin an bawihsawm a, a lang chinah hliam a nei hran lo. Dinfela nen an inhmuh hnuhnunber atangin kar khat a liam chiah a ni. Puia chuan rin dan a nei thiam nghal. Khami kar khat chhung khan Diteii nen hian an inhmu ngai lo tluk a ni. 

"U Pui, ka rilru leh taksa a chau rih ve lutuk a, ka chawl hahdam ve lawk ang aw" a tih vangin film pawh an shoot rih lo va. Damdawi hrang hrang a leisak a, mahse, a lo ei ngai miah lo nge ni.. A chau viau si a. Damdawiin an thlen chuan an lo buaipui nghal mawlh mawlh. Thil ei tha lo, mut hmu bawk si lo, inngaihtuah nasa lutuk, chau a lo ni a. A lainatawm reuh takzet. Puia chuan a thutchilh ran a, a rawn harh thei lawk si lo. A chhungte hrilh hriat ve hrim hrim chu tul a ti angreng si, mahse, mawlhtu a nei ve tho bawk. A tawpa tawpah Teteii chu a call ta nge nge a. 

"Diteii hi hei nikhaw hre loin a awm mek a, i nu te kha i lo hrilh ve hrim hrim dawn em ni ang? " tiin. 

Call loh tur a lo call a, a pawi. A hrilh lêk lo vang e. 

Lawma number erawh a nei tawh tlat lo. 

Teteii dul chu a ni telin a thanglian ve zel a, Dinfela chuan a rukin a chhui ve reng bawk. A fa a nih rin lohna a nei lian tial tial bawk. A fa nise chuti em ema la puar tur a ni lo. Inthup teh mah se; a dul chu thup sen a ni mawlh si lo. Anu chuan a vil deuh reng bawk. Pu Vanlala erawh a lusun hlima a chawl tih loh kha chu sumdawnna a buaipui chho leh tan a, Nunui boral ta mai chu awih harsa a la ti fô mai. 

"Vawiin ka hman ngang si lo va, Bawiha, Teteii hi i va hruai lawk mai dawn em mawni le, a inentir a hun tawh si a" Pi Zawmi chuan inthlahrung zet hian a ti a. Dinfela chaw bar lai a tawp chawt. Mahse, hnaa kal pahin a drop thei ang chu. Phurh ringawt pawh chu a phur lo. Apa a awm ve si a, zahawm a tih deuh vangin a aw ve ta hram. Kalkawngah pawh an inbe thak lo. An ngaibtuahna an kawm phei dun mawlh mawlh ringawt. Teteii inentirna tur clinic chu an thleng a, lehkha chu Dinfela'n a va laksak.

"Tikhan i hawn dawnah chuan taxi i la mai dawn nia" a ti sup a. A motorah a lut nghal. A start chiah tihin Puia a va hmu a, Hospital lam pana chak zeta a chho chu.. Hm.. A ho em mai. A kal ve a ni mai. A tlan ta daih. Teteii chuan a thlir zui vang vang mai. Dinfela fa pai lo mah se, a nih nih a ni zo tawh a, Dinfela chu a paa puha nakin zelah pawh rokhawmtu a la ni thei tih a ngaihtuahna chuan a intihlim lui ve hram hram thin. Chubak beisei a nei tawh bik lo. Pu Vanlala hian a tu chu a thlauhthla dawn lo tih a chiang. Dinfela hian nei duh lo mah se; a fa chu a rethei dawn lo tih a hre ve kar a ni. 

"Dina, bialnu tha deuh ka hualsak che. Tun tum chu i duhzawng tak a ni tih ka ti ngam sak" Mike chuan a ti sur sur a. Dinfela a khi suk ringawt. Diteij avangin hmeichhia hi a enliam vek tawh. A kalpah vel mai mai a ni ber. Amah Diteii kha a beisei phakah par tawh lo mah se; a tan a rinawm reng tih a hriat theih nan kawppui vawn hmasak chu a tum lo bur. Diteii'n kawppui nei phawt se a la ngaihtuah ve ang chu. Diteii kum zat a hria, naupang mai a la ni a, pasal a neih lawk chu a ring bik lo. Chu ringawt pawh chuan a awm a tinuam thei nia!  Engvanga he nau hi hmangaih ngawih ngawih nge maw a nih le…?! 

"U Lawm, U Teremi a rawn kal" a bialnu thar, naupangtè Zami chuan a ti a. A hlauhthawn hmel kher mai. 

Teremi chu a rawn pai deuh chhat chhat a. A lang tar bâwih mai. Zu a tlan nasa bawk a, a dul te chu a kiar luah a, a mawng a dèp bawk si, itawmna renh reng a nei lo. Khawngaihthla te pawh a la letling. 

"Eng nge i lo tih dawn? " Lawma chuan a lo ti ram hmak a. Lawma ve thung chu a lang thar sar mai. A hnar chu a tawk deuh nain a inmet fai vang a, a landan chu a tha viau mai. Kar kaltaa Teremi ten bungrua an rawn lak atanga ni hnihnaah khan tleirawl Zami hi zu in turin a rawn lut ve nawlh mai a. A rui lungpuam chu a tap hliam hliam mai, pahrawn a hrawn thu leh a pahrawn chuan khawih a tum thin thu te, anu bula a sawi vanga a nu nen an inhauh hrep thu te leh an hnawhchhuah thu sawiin a tap char char ringawt mai. Lawma chuan a lainat ta riau a. Chumi zan chuan a riahtir ve ta nghe nghe a. A tukah pawh, "Zamte, i duh chen chen i awm ve thei, eirawngte i bawl ve a nga" a ti a.. Kalna tur dang nei hek lo, Lawma bulah chuan a cheng ve ta ngawt kha a nia. A felin a thothang a tha em em a, zu pawh a heh hran lo, chaw ei hmain no hnih vel a in ve a. Mut dawnah no khat. A taksa chuan a thatpui tawk vel emaw tih turin a thau nalh tawk em em a. Chutia cheng duna in khata riak dun reng ta na na na chu an lo inhmel duh ta thuai a, nupa ang deuhin an awm ta mai a ni awm e. An awmpui pa erawh a la awm ve reng tho. Zami chuan kar khat lek chhungin Lawma chu a hmel lan dan a thlak danglam thei a ni. A zu in tur zat a bituksak thlap a, intifai turin a hrilh reng bawk. In chhung bungrua hrim hrim pawh a chingfel reng a, in pawh a faiin a nuam ta hle mai. Amah Lawma tak pawh chuan nuam a ti. Teremi a neih lai kha chuan in a tawpin engkim kha a let rem rum a, eirawng nise a bawl peih si lo. Tunah chuan Zami vangin an in chu vanram a ni ta ringawt. Ei leh in pawh an ei tha a, an taksa ngeih tawk an ei ve thei ta. 

"Hei hi maw in nu thar chu.. Nangmah zawk hi a nih hi tenawm. Bialnu i lo nei reng tihna a nia" Teremi chuan sehchilh deuh hian a ti nawk nawk a. A thle deuh chhar chhar bawk. 

Lawma chuan sawifiah kher tulin a hre lem lo. Teremi lakah chuan a rilru a let chiang tawh em a ni. 

"Eng nge i duh? " a lo ti leh a. Zami hian a hmain Teremi chu a lo hmu tawh a. Mahse, Lawma nen an boruak Teremi chuan a la hre lo thung. 

"I in leh lo hralhna zahve kha ka chan tur a nia, ka rawn lam dawn" Teremi chuan a ti a. A irh uk uk bawk. 

Lawma a nui hawk hawk, "Mihring i ni ve em? i va zam lo haih haih tak em.. " a lo ti nghek. Teremi lah chu a thu ve tlat bawk si. Zami chuan, "U Lawm, saw chawhmeh ka chhuang ania, ka inbual dawn nia, lo en rawh aw" a rawn ti a. Lawma chu a lo bu nghut. Teremi huat tawk a lo tling nasa. 

"Lallawmzual, min va zah lo em em ve, pasal pawh ka neih hmain tihian nupui i nei a maw.. Eng ang mihring nge i nih? " a ti ta hrep mai a. Zami erawh a inbual tawh. Lawma chu a ding hluai a, Teremi chu nawr chhuah pahin, "Khawngaihin lo kal tawh suh. Ka tan engmah i ni tawh lo. Uirenu i ni tihah chiang ang. Ka mamawh tawh lo che" a ti ta hmiah mai a. Teremi chuan sawi leh chuan tur a nei lo kher mai. Han ân chiam a tum pawn Lawma'n engahmah a ngaih lohzia a hre tawh si. Lunghnur zetin a haw ta a. Chu chu Lawma leh Teremi tawp hlenna chu a ni ta. 

"U pui.. " aw tham chil chhel hian a ti sap a. Puia lo indawmkun reng chu a rawn harh kâwk. 

"I lo harh tawh maw.. A va lawmawm em.. Doctor ka va ko nghal ang e" tih leh thawh a rual nghal a. A chhuak zui daih. Corridor chu a zawh a, a hmanhmawh luatah mi pakhat nen an insu dawt mai. "Sorry" tih paha a hawi chhuah chuan Dinfela a lo ni reng mai. Puia chuan, "Khai a" a tih zawm zat a. Dinfela chu a thianpa nen an ni a. 

"Eng nge i tih? " Dinfela chuan a ti khawmwi a. 

A kal pah chuan, "Diteii a awm a" a ti liam puat. Dinfela'n a koh zuina pawh a hre tawh lem lo. Dinfela erawh ngawi rengin a ding zum reng. Mike chuan, "Thianpa" a rawn ti a. 

"Mike, lo va kal rawh. Ka rawn zui ang che. Mi hmuh lawk tur ka nei a" a ti a. Puia a rawn let leh mek. Mike chuan a kalsan ta a. 

"Diteii maw.. Engtin nge a awm? " a lo ti nghal var. Puia chuan, "Teteii ka rawn hrilh reng kha, hei ni 2 a awmna a ni tawh. In ranw lang mang sj lo va, in ngaihsak duh tawh lohah ka ngai" a lo ti deuh hmak. Dinfela chuan a zui ve zel. Cabinah chuan an lut dun ta a. Diteii chuan thei leh thei lo vin tui bottle a lo ban a. Dinfela a lawr zawk, rang zetin bottle chu a va pe ta a. Diteii chuan a melh zawk, Mahse, a tui a hal tawh em vangin a melh rei lo.. A in khawlh khawlh a, a mu thla leh hnawk.

"Eng nge a chhan? " Puia melh chungin Dinfela'n a ti a. 

"Nikhaw hre loin a awm tawp. A chauh lutuk vang a nia" a lo ti ve mai a. Khatia Diteii in atanga a chhuah hnu atang khan vawikhatmah Diteii chu a be ta lo kha a nia. Amah aia Puia a thlang zawk nia a hriatna khan a vaw na em a, a luhlulna a kai chhuak bawk. 

"Dite" tiin a thut chilh a. Puia pawh a zah zo lo. A kut zawi nen chu a vawnsak a. 

"Ti nge hetia i awm? I inngaihtuah nasa lutuk aniang. Tha vat rawh aw.. Khawngaihin" a ti dam thlup a. Doctor a rawn lut ve mek. A han check vel a, thisen chaw an khai leh nghal. Damdawi lei tur a ziah chu Puia chuan zuk lam nghal a tum a. 

"I hah tawh awm em mai. Ka zuk kal ang" tiin Dinfela chuan lehkha chu a pawtthla a. A chhuak zui nghal. Puia chu a ngei tawh lo. A vantirhkoh lo venghimtu a ni a, Diteii chu a lo duh ve deuh a nih pawhin huatna a nei lo. A lakah bat neiin a inhre hial zawk. 

Mike thiannu chu a va kan ve zuai a, An hawn dawnah Diteii roomah a peng leh a, zana riahpui a tum thu a sawi nghal bawk. Puia tana hnial theih. Miah loh turin a tumruh a ni. Diteii lah a muhil daih si. Zanriah an ei laiin Diteii nen an inhmuh dan leh tuna damdawiina a awm thu te chu a sawi ta a. Teteii a chhuah chhal nghal bawk. Teteii erawh chuan, "Amah Diteii hian kan hriat loh a duh. Zawk ka ring a" a lo ti. A rilru hi a chak zet mai. Misual tih takah. 

Zanriah ei kham veleh a insiam nghal a. Eitur eng emaw nen Hospital chu a pan ta nghal. A va thlen chuan Puia bakah hmeichhe pahnih an lo awm ve. A film chanpui te an nih thu Puia chuan a lo sawi a. An han inchibai liam liam. Diteii pawh chau chung chungin a meng ve hram hram. 

"Puia, min hawnsan tawh rawh.. Hahdam deuhin va muhil rawh" a ti a. Puia pawh chuan hnial enah a en vak lo. A tho ve ta tuih tuih a. Diteii lu chul zauh pahin, 'Muttui" a ti a. A chhuahsan ta. Dinfela chuan Diteii chu a siamrem a, A chauh em vangin a tawng peih ve mang si lo. 

"Chau khawp khawp ten i lo awm le..i dam ang a, ka bulah i awm tawh ang. Ka enkawl ang che. Kan innei bawk ang" a ti sar sar a. Diteii a ngawi reng. Mahse, Dinfela dehna leh khawihna chu nuam a ti, a bula a awm ve ringawt pawh chu a thla a muang tih erawh a lang. Dinfela phone ami movie te chu an en dun ta vel mai mai a. Dinfela koki nghenga a muthlu siar siar chu hmuhnawm tizetin a melh a, A kalsan leh tawh tur a ni lo. A kalsan leh tawh ngai lo vang. 

Diteii pawh a mutui ve khawp mai. A tuka Doctorin a rawn en pawh chuan, a that chak thu leh thil a ei theih hunah chuan a chhuah theih mai tur thu a sawi nghe nghe. Dinfela chuan a û angin a insawi a, a ni ve chiah bawk si. Diteii nu leh Pu Vanlala te pawn an rawn tlawh ve ta hial a. "I dam veleh i lo haw leh ang" tih chu an thu rolum a ni tawp. Diteij tan pawh hnial harsa tur khawp a ni. Puia'n a rawn vil ve reng bawk a. Dinfela tana mit tikham turin a awm ngai lo. Mabse, hman zan khan engvanga khatia awm tlat kha nge maw a nih ang le.. Puia haw tur chu a zui a, damdawi lei pah a ngai bawk nen.. 

"Inbe lawk ang hmiang" a ti a. Puia pawn a lo hnial hran lo. 

"Hman zan kha eng nge i awmzia? Thudik tak sawi dun teh ang. Diteii hi kei ang bawkin i hmangaih ve em ni? " a ti ta hlawl a. 

Puia chuan, "Ni lo ve. I tina em a, ka khawngaih vang anih kha.. Khatia tih kha a tan a tha emaw ka tih vang a ni. Tunah chuan ka tisual tih ka hre tawh e" A ti ta a. Ni e, chu chu a rilru dik tak pawh a ni. Diteii kha a pui emaw a inti tak tak a, mahse, a lo nih lohzia leh Diteiin Dinfela a hmangaihzia a hre tawh. A inchhir viau nghe nghe. Tunah chuan Dinfela kutah a hlan fel thei ta e. 

Sangtea leh Faki rawn inzui lut an hmuh chuan a nu te chuan, "Eng nge thil awmzia" an lo ti vat. 

"Kan rawn inhruai ta mai.. " Sangtea chuan a ti mawl tawp. A nupui pawh a thah chhan Faki nena inneih mai loh chu kawng dang a nei bik lo aniang e. Hmeichhe dang lakah a tlatlum tak tak thei tawh si lo nen. Faki lah zak leh inkiltawih reng rengin hun a lo hmang ve tawh bawk si. An inru ve leh tawp mai a ni. A nu leh pate tan pawh sawi zui vak tur a awm lem lo. Palai tir tura inbuatsaih a ni deuh mai. Mut hmunah Sawma chuan, "Duati pawn nu a nei ve tawh ang a, nang pawh i hahdam ve thei deuh tawh ang chu" Tiin an nu Alice chu a hrilh a. Alice a ner sak, "Saw ramhuai kuta Duati dah ka phal awzawng lo mai.. " a ti hmak. Sawma chu a hrilhhai letling. Alice ngaihdan chuan Duati chu an tirethei hle turah a ngai tawp. Chuvang chuan hah deuh mah se, enkawl zel a duh zawk. Sangtea nunzia chu a ei loh bakah a hlau ru deuh hial thin. Mahni nupui ngei pawh that duhtu chuan pawisak dang vak a neih a ring lo. Biak pawh a be hmasa ngai lo reng a ni. A chan tha rengte chu mak a ti, Pathian hian phuba a la tak tak ngai lo anih dawn hi a tih phah hial a ni. 

Diteii pawh a chhuak ve thei ta a. A in luah lama a bungrua tlemte te chu va lain, Dinfela te in lam an pan ta. Amah pawn a hnial bik lo. Dinfela a mamawhna chu a thup seng tawh bik lo a ni ber. Nupa an nih lohna chu. Sex an la hmang lo tih chauh a ni. Teteii nen erawh an la inbe thei lo a chha a ni. Dinfela fa paitu a ni miau si a. Diteii u a ni bawk si. A khawlhkham mang e. 

Puia nen hna an thawk dun leh dawn a, class xii admision an la fel tawh bawk. Zan tin Dinfela nen a roomah an awm dun tihtheih a ni. An film shoot na turah a hruai in a thlah ziah bawk a, a tawiawm tha khawp mai. Dinfela zawk chuan inthup buai a peih tawh lo va, a film chanpuite pawn an hre vek tawh. A tirah mak an ti naa, an inhmehzia leh induh dunzia an hmuh fo takah chuan duhawm an tiin innei ngei se an duh pui ve vek. Venthawn nei miah lo va pawn lama an inzui theih laiin in lamah erawh Diteii zawk chuan Teteii leh a nu a vengthawng thin a. Mawlhtu a nei thin. Tin, Duati a va ngaihven zauh zauh thin a. Alice nen an inbe nasa bawk. Duati chuan kum 4 tal tling phawt se, court-a kal that leh a duh a ni. Tunah rih chuan enkawl thei dinhmunah a la ding rih si lo va. Dinfela tak pawn a lainat ve a, Sangtea te nupa lah in hrang changin Duati chu an thlauhthla hmiah. Anihna takah chuan Alice phal loh vang a ni zawk. Faki tan lah a lawmawm zawk mah ang chu. Fahrawn tel lo va zalen taka awm te chu.. 

An film pawh an shoot zo ta,. An zawh zanah Puia in lamah chaw hlui an kil ho ve a. Nuam an tiin an inpawh tlang tawh bawk a, an ri le lu mai. Puia pawn bialnu a nei ve ta bawk. Baby a ni a, Diteii nen pawh an inkawm thei fu mai. Engkim chu a tha a, a pangngai chho tan tihtheih a ni. Chumi zan chuan Diteii  te pawh an haw tlai ve hle mai. In chhung an lut a, an room ve veah an lut nghal. Diteii chu a inbual leh rih a, a inbual chhungin a roomah Dinfela a rawn lut. A inbual zo, Towel chauh biha a rawn chhuak chu khum atangin a lo thlir reng a. Diteii a lai kher mai. 

"Chho rawh" a ti tâwng a. 

"Aih" a lo ti tlat. Diteii inthlak tur chu a va kuah chawt a, towel a phelh nghal. Kekawrte nen chauh a ding teu mai. A nalhzia chu Dinfela chuan mak a ti zawk. A chil a lem khawlh. 

"Chho rawh ka tih chuuu" a ti vin leh thak. A rawn kuah leh, Dinfela dehna chu a sa hat hat zel a, a nghawng lej ir vel chu a nûl kual a. A za mer mer mai. A hmuiah fawpin rei ngial an infawp ta a. Khumah chuan a bawhthlu nghal. Diteii taksa nal hen chuan a tikhawng vek, awmngaihna a hre tawh lo. A tawp thlenpui turin a inpeih der mai. 

"Khawngaihin.. ' Diteii chuan a ti sap a. Hnai takah inmelh dunin, an thaw ham ham. 

"Ka duh lo ania". ati leh a. Dinfela a harh zawk. A tho ta tharh a. Diteii pawh rawn thoin a inthlak nghal.. Kawngka an khar phui loh kar atanga bih kartu hmel landan rapthlakzia chu hria se, an khur dun thei hial ngei ang. Teteii chuan a dul dawm vang vang chungin thawk a la hawk a. Dinfela rawn chhuah hmain a chho leh ta a. A muhil lo tihtheih a ni. 

A tukah Diteii chu Lawma'n a rawn be teh tlat a. Dinfela nen Lawma in lam chu an va pan a. An hmuh tum ai daihin an hmu tha,  lo sar ve vuah tawh mai. Zami lah chuan a lo be siam siam a. Diteii hnuk a ulh lek lek hial. 

"Kan in kha lei let leh ka tum a, kan inbe chho mek a, a lo siam that nual avang khan a man a san deuh a, kei lahin ka lo nei daih tawh si lo va, i puihna ka ngen a nih hi. Ka pa in kha pangngai taka luah leh ka duh a ni.. " Lawma chuan a ti ta a. Diteii lawm lutuk chu a mittui a hnam sawk. 

"Awiii tehreng mai, engmah ka la hmang hleinem. I duh chuan la vek rawh. Kei chuan ka thwwk chhuak ve thei alawm.. Mahse, au Lawm, zu chu zuar tawh su aw" a ti chul a. 

"Tunah pawh kan zuar tawh hleinem. Hei i u zami hian min thlak danglam vek tawh a ni. Ani hi sumdawn lam timi deuh a nia, dawr hawn ve a duh a. Chupawh kan la ngaihtuah zel ang chu" Lawma chuan a ti chuar chuar a. Dinfela ngawi reng chu a lo tawng chhuak ve phawng, "Mi hrang kan ni hleinem. Ka pa hnenah pawh inhlawhna tur chu a awm reng ang. Sumdawnna lam a tui phei chuan a tih awm tawk a dapsak theiin ka ring.. Chuan, Lawma, ngaih loh lamah lo ngai lo la, Diteii i pek tawh pawisa kha chu khawih che lo se ka duh a. Ka pa bulah ka lo sawi ang a, in i lei leh theihna khawp chu ka dil chhuak thei ang. A fapa tho alawm i nih le.. " tiin. Diteii leh Lawma te chuan mak ti zetin an melh dun reng. Zami'n thingpui a rawn sem a, a thu ve nghal a. 

"Dite, i u hian a sawi zing thei che sia, hmuh che hi ka chak thei lutuk.. A sawi ang chiahin i lo hmel tha a nih hi.. A chhuang thei teh mai che nia" a ti sar sar a. Diteii'n Lawma a va en, inthlahrun hmel zet hian a lo melh let ve a. An hnuk a ulh dun tih hai rual a ni lo. Dinfela rawtna chu a inthlahrunawm an tih em vangin an pawm ngam lo va, mahse, Mi luhlul Dinfela chuan a rilru a thlak eih lo. 

Ni thum lek a liam tihin Lawma chuan apa in chu a nei let leh thei ta. A luah luh ni chuan Diteii te pawh an chhungin chaw an zuk ei ve a. Diteii nu pawh a hlim ve hle mai. Teteii. Chiah hmuh a nuam lo. Zami pawn a nel lem lo. A be chhe chuang lo thung. Pu VANLALA chuan Lawma te nupa thawh awm tawk hna a pe dawn lehnghal. An hlimnain a thlen san ber hun a ni mai awm e. Diteii phei chu a tap ru deuh reng, apa leh Mami kha la dam ve se a ti lutuk. Lawma han tha ta leh chhungkaw pangngai tak a han din ve chuan a lung a tichhe em em a ni. Pu Vanlala pawh a ngainat phah sawt bawk. 

In an thlen hnuah Dinfela nen green tea an in dun a, "Nang pawh film in chang rih chuang lo va, hna thawk la a tha. Ka dawrah bawk aw" Dinfela chuan a ti a. 

"An hre vek dawn asin" a lo ti ringawt. 

"Hria se ka tih nak alaia, khawvel hian hria se ka duh" a ti chiam a. Diteii a lo nui. Thutak deuh zawkin, "Chuan inneih hi kei chu ka hmanhmawh tawh" Dinfela chuan a ti sup a. Diteii chuan, "Chutiang lam chu sawi rih lo vang. Buaina a tam rih em mai. Teteii hian fa nei phawt se.. Ummm" a lo ti a. A hmel chu a ngui nghal vek. Teteii fa neih hun tur chu a nghahhlelh rualin a huphurh bawk. A dul a puar tawhin nau a lian hle a niang, a inzo lo lam tawh hial lehnghal. A khawngaih ru ve tho thin bawk si. Biak chu inbe ngai lo mah se, haw deuh anga lan a duh bik lo. 

Dinfela duh dan angin dawrah a thawk ve leh ta a. Amah a confi tawj bawk a, a lian uaih bawk si. Tleirawl naupang lutuk tih a hriat miah lo. Customer lah a hîp. Biak a nuamin a zuan a zang bawk nen, Dinfela mit hi a tlung ngawih ngawih a ni ber e. Ni khat In chunga a chho tur a ke a chhep sual a, step atangin a tla thla ta a. A kerek chu a tiche ngam ta hauh lo, Dinfela'n damdawiinah a phur phei nghal. An lo tuamsak a, nachhawknain an chiu bawk. Damdawi hnawih tur te an pek hnuah an kaltir leh mai a. Dawra che chi ni hek lo, in lamah an inphur thla ta a. 

A lo reh thap. Thawm nei em em loin an lut a, awmpui te lah hmuh tur awm lo. Diteii roomah an inkuah lut a. A mut dan te siamremsakin Dinfela chuan a buaipui vat vat a. A haw tak rau rauah chuan tiin a pendrive la turin a roomah a chho a. Teteii room-a thinrim inhnial thawm chu a hre nghal. Engahmah ngai loin a roomah a lut a, pendrive chu a hmu mai si lo, an zawng kual leh deuh a. Chutia a kun dûk dûk lai chuan Teteii room kawngka chu a inhawng rawk a, Pi Zawmi chu a rawn tek chhuak nawlh, An awmpuite a ko nghal chul a. Dinfela pawh chu rang takin ava chhuak nghal. 

Roomah chuan Teteii chu a lo thu niaih a, a kap atangin thisen a rawn chhuak nguai nguai bawk. Hlauhthawn hmel zetin a lo meng bawk. Dinfela chuan, "Eng nge awmzia? " ti chungin a va buaipui a. Teteii chu a tap ta. 

"Nau ka chhiat dawn aniang, ka naute hi.. Ka naute" a ti chul a. Thisen pawh ngaipawimawh ta lo chuan a pawm nawlh a, Teteii nu chuan a rawn zui nghal. Damdawijn lamah bawk an tlan leh ta nghal. Teteii chu na tiin a rum a rum a, anu chuan a hnem mawlh mawlh.. Dinfela chuan phonein Diteii chu thil awmzia a hrilh hram. Teteii tan chuan a runthlak ve khawp ang le.. 

Doctor te an han che ta sap sap a, Thisen a lo hloh hnem hman deuh si a, an buaipui rei viau mai. Dinfela pawh hnaa kir leh ngawt chu dikin a hre si lo. A awm ve ta reng a. Pu Vanlala. Leh Zami an lo thleng tawh bawk. Operation room atanga Doctor rawn chhuak chuan, "A pawi khawp mai. Naute chu kan chhan hman ta lo a ni. Thla 7 chu nise tih dan a awm a, thla 8 hi chu chance a chhe em a ni.. " a ti ta a. Dinfela bengah chuan ring tak a ni. Tunah khan Doctor khan thla 8 a nih thu a sawi em ni? Ni e, ani chuan thla 5na chiah niin a lo hria asin. A bing mup mup a, a tlu mai dawnin a hria. Ngawi rengin a haw nal nal. 

"Dite, Thla. 8. ani tawh. Thla 8,a awmzia chu Teteii hian ka fa a pai reng reng lo" Diteii rooma luh pah chuan a ti nghal thâwr. Diteii a lo meng phawk kher mai.. Ni 3 hnuah Teteii chu a rawn chhuak. A dâng bai a, a mitkhur te chu a tla dâwk mai. A lo chhuah zanah an awmpuite tel loin Pu Vanlala'n a nupui fanaute chu a ko khawm ta a. A pawimawh viau a nih hmel. 

"In nufain min lo bum ngat ngat a, ka rilru a na a, ka thinrim bawk. Dinfela ngei pawh awmngaihna in hriattir lo va, Diteii lah rei tak a bo phah bawk. Engtin nge he thil hi in tihtheih? Zomuanawm, tu fa nge i pai sawi ang che. I sawi duh loh pawn a pawi lo.. Mhase, hei hi ka thutlukna a ni. Diteii leh Dinfela hi a rang thei ang berin an innei ang.. Engmahin a dal tawh lo vang" a ti ta dap dap mai. Teteii leh a nu chuan hnuailam an melh reng. Pa ber thu chu tuman an hnial ngam lo. Thurûk dang a la awm chèu tih hria se, Pu Vanlala chu engtin tak awm ang maw…?! 

Puia leh Baby inruk thu an hriat rualin Dinfela nen an va kal ve vat. A ke a la dam chiah lo naa a kal thei sawlh sawlh tawh. An pali chuan chaw an ei khawm a, hun chu a nuam a, engkim chu a mawi a ni tawp. Puia pawh a khi var var reng mai. 

Diteii'n a la hnial rih vangin an ni pawh an la innei lo tih mai chauh a ni. Kum lehah kum a tling dawn chiah a, a birthdayah tak inneih a duh tlat. Pawmsak loh chi pawh ni lo chuan… 

Kum a tawp dawn hnai ta. Teteii nun chuan a hma a pha ta meuh lo. A pha lutuk zawk nge pawh hriat va ni suh. Inah a awm ngai mang lo va, zu leh sa nen, sex nen a chawm bawk a, a hawp bawk. Hauh a sawt lo va, zilh phei chu chilper a uiawm. A nun inthlahdahna chuan a nu a kangkai ve lo thei lo va. Rilru hah leh zak reng rengin a hun a hmang chho a ni ber. Pu Vanlala erawh a that. Ngaiin a la tha reng, Diteii tan lek phei chuan pa nih a tlin takzet a ni. Hetih lai mek hian chunglam phuba chuan hnai a rawn la tan ta a. Sangtea chu a dar na reng leh a pum nuam lo reng entirin test te an han nei chho a, a chuap a lo cancer reng mai tih an hmu chhuak ta. Vanduainain a pumhmawm emaw tih mai turin a cancer tih an hriat atanga thla hnih lekah an nu Faki chuan a uiresan ta a. An thenawm tlangval lakah lehnghal. An tlan dun daih nghe nghe. Sangtea tan chuan vanpui a chim ta a ni ber e. A tihsual tawhte phuba chu a tuar rei lo angreng zawk, Faki'n a chhuahsan hnua a nu ten an in lama an enkawl hnu thla hnih lekah a boral ta a ni. Mami nen khan intawng tak ang maw…?! 

Lawma te erawh an hlimin an nun chu a pangngai ve zel a. Mahse, buaina an nei ve ta tlat!  Zami chuan chi kawngah nau a pai a, a lo puakkeh lo chauh! A thi thelh nghe nghe. Lawma pawh mangang tak a ni. Loh theih lohin a chhul an paihsak ta. Fa a pai thei ta lo. Mahse, Diteii chuan an manganna chhawk turin thu lawmawm a rawn nei ta tlat!  Duati chu court-ah enkawl dilna an thehlut a, a nu leh pa an thih tawh bakah a pi leh pute enkawl dan an hriatin Court pawn enkawl theihna a pe ta. Alice chuan ui viau mah se, Lawma te nupa tan malsawmna a nih zawk nan Lawm takin Duati chu a thlah liam ta a. Lawma te chuan fanu duhawm tak kum 3 mi an nei ta reng mai. Lawma aiin Zami'n a atchilh zawk lehnghal.. Duati pawh a tlangnel chho ta thuai a, Diteii lawm pawh a kim ta e. Dinfela nena inneih chiah a hmabak ta. Chutihnrualin Teteii nun dan chu tha a ti loin a vei ru ve em em a, a mawhphurhna ni pawn a hre ve. Amah vanga tianga awm ni ten a ngaihtuah fô bawk. Tihtheih a nei der si lo.. 

Thlasik lai mah nise, ruah a sur bur bur a, Diteii khumah chep chetin an mu dun. An inkuah rial a. Sex lam erawh a lang lem lo. An infawp ngun hle thung. 

"Teteii hi ka khawngaih thin" Diteij chuan a ti ta hlawl a. A rilru thatzia hre tawhtu tan chuan a mak lo ve. 

"Nia, a la tha ve mai ang" a lo ti ringawt. Tunah pawh a chhuak leh daih a, tlem lai khan veng pakhat Vdp ten a lu an rawn mehsak a, sam lem a lei leh mai a. A nun dan ngaiin a nung chho leh mai. A nun chu a ruak viau aniang e. Model nalh tak ni thin kha, cher chhe tak, zu vanga thu that, hmai tawk hler hlur, mitmeng hriam tak a ni tawh a. A lan dan chu a tawpin a itawm hlawl loh. Khawngaih duhtu tan erawh lainatawm tak a ni thung. 

"Dite, dite, tho vat teh u.. Hei policein min lo bia a.. Ruang an chhar a. Teteii niawm tak a ni an tia" tap pur chungin Pi Zawmi chuan Diteii kawngka chu a chum dawt dawt a. Rang zetin a rawn hawng nghal. Hmanhmawh zetin Police station lam an pan a, Damdawijnah an lo phur phei hman tawh. An let leh a. Mitthi dahna roomah chuan tîm daiin an lut thâm thâm a. Ruang khuhna chu pu Vanlala chuan khur dar dar chungin a han hawng a, Pi Zawmi a rak nghal tuar. Zomuanawmi chu nunna nei tawh lo tih hriat takin a lo mu reng mai. 

A taksaah kutthlakna hnuhma, vihna leh zaina hnuhma te a awm a. Pawngsual a ni bawk. Tualthattu chu tu tak ni ang maw? Amanda a chet leh a ngai ngei ang. 

A damlai zawng zaengin a thisen zawmpui ngei a laizawn chungah nunrawng takin a che thin a, mahni hmasial reng reng leh thikna in a khat thin. A tawpna erawh a lungchhiatthlak takzet a ni. Dinfela rin aiin Diteii chuan a tuar na. Anu erawh chu thawveng hawk hmel a pu zawk.. Thil mak tak zawng a ni e. Nunui leh Teteii thlan an tlawh tum chuan,... 

"Dite" tiin a hnunglam atangin a rawn ko va. A hawi let chuan, a hmaah Dinfela chu a thingthi a, Rose par sen duk bawr khat hi a lek vâ bawk, nui sâng chungin, "Khawvela hmeichhe hlim bera siam tur chein thuneihna min pe tawh ta che.. " a ti sup a.. Diteii chuan mittui kar atangin a lo nuih sen sen thung.. 

An piah lawka thlan pahnih, an lainate ruang zalna chuan thurûk pakhat a la mutpui reng tih erawh an hre si lo… 

(Ih maw u, lehkha zir hi ka ngai ve tawh em a ni. Tikhan a tawp aw.. DRose chhiartute, ka lawm e. Min support a,ka hmangaih vek che u. Innduhkhawp lo tih ka hria. Ka dama Pathianin rem a ti anih chuan, September thla atangin Boss Amanda season 2 nen kan inhmu leh theuh dawn nia. Lo dam tha vek ang che u 😍❤