D Rose 14

D' ROSE…. (14)

Ziaktu: Toni Râlte

Doctor chuan a tarmit chawikan zauh pahin, "Ti nge i va rawn kal har em em ve, tunah thla thum lai a ni tawh si a" tiin Teteii chu a melh a. Nunui chuan a hmui a lo hup chawt. Teteii leh Doctor chu a melh tawn zak zak a. Teteii fa pai chu thla thum a ni tawh maw?! Wow!  Engtin? Thla khat vel lek a la ni emaw a ti si a. Teteii dul chu a puar lian a ti reng a. Mahse, thil chîk mi a ni lo va, a dul a lian ve hrim hrim ni turah a lo ngai a ni. Chuti ang a lo nih si chuan, Teteii fa pai chu A u Dinfela fa a ni lo tihna a ni thei em? 

"Tete, ka lo ngaih dan chuan.. " a ti hman chiah, na zeta rawn melhin, "I ka kha chip hmak la a that zawk ka ring. Video ka kawl a nia" a lo ti vawt raih a. Doctor pawh a hawi lawl lawl ringawt. Nunui chu a tawng tawp chiang kher mai. Damdawiin an chhuahsan hnuah pawh an inbe ta miah lo. Nunui chu a lungawi hlawl lo, mahse, a tilang thei tlat si lo. Teteii chuan a video hmangin a ka a hup tlat si!  A thisen zawmpui Dinfela chu a khawngaih, a fa a ni lo tih hi a hriat a tul. Anih chuan eng nge a tih ang? An in thlen dawnah a ngaihtuahna hria niawm takin, "Ka fa pai hi thla thum a ni tawh tih i sawi chhuak a nih chuan, thih i chak ngawih ngawih dawn a ni mai. Mi nasa ka nih hi, ka duh anga awm turin engmah ka pawisa lo a nia.. I hrethiam em? " a ti chang fak a. Nunui chu a bu nghat ringawt. A tah te a chhuak. Teteii suah sualzia a hrechiang ta bawk a, a huatin a haw hlur tawh. Mahse, a sawi chhuak ngam ang em? 

Dinfela a zin daih a. Diteii te pawn film an shoot chho mek zel. Nuam a ti chho ve ta phian a. A sam pawh a sei ta viau, Dinfela khan zuah turin a ti tawh a, a tan duh ta bik lo. Hmeichhia a ni a, hmeichhia anga a han awm tak chinah phei chuan a duhawmin mit hi a la ngawih ngawih a ni ber mai. A film chanpui Zorema chuan a bekbawr deuh reng a, ngaizawng han tihtheih ni chiah lo hian a ta hauh deuh chawt ni maiin a lang. Puia pawh a buai ve thin khawp mai. 

Sialsukah tunah an awm mek a. Phul hmunah puan in kaihin hlim takin an ri ve mam mam reng mai. A zan hnihnaah meipui chhepin a hualin an thu a, an zai tlang tlang a. Nuam an ti dar dar hle. Mipa thenkhat chuan zu an in bawk a, Puia pawn a khap lem lo. Hmeichhia erawh chuan beer an dawm far thung. Diteii chiahin a in lo. An piah lawka thing hmunah chuan tui khuah lian vak lo a awm a, chuta mi chu eirawngbawl nan pawh an ring deuh mai a. Inbual nan an hmang bawk. Diteii chuan lum a ti deuh nge boruak a zo vak lo zawk a sahal deuh a, chumi hmuna va insil thlandai tur chuan a phei a. A hlau hran lo. Meipuiin a en phak deuh bawk a. Ngawi rengin a insil mawlh mawlh a, "a lum i va ti awm ve" a hnung lam atanga rawn titu avang chuan a phu zawk. A lehhawi vat a. Zorema a lo ni. 

"Nia, mei kan chhem bawk sia, a uap lutuk a" a ti ve mai a. A kekawr chu thlepin a leih barh barh a. A hnunglam atang chuan Zorema chuan a rawn kuah ta chawt a. A phu leh dawrh. 

"Hlau suh, Dite, engtin mah ka ti dawn lo che. Ih maw.. Ka inzep thei tawh lo, ka duh lutuk che. Ka vei bur che a ni ber" a ti ta mawlh mawlh a. Zu rim a nam hak bawk. Diteii chuan, "Ka lawm e. Mahse, bialpa ka nei duh lo" a lo ti a. Thinrimna awka a lang hran lo. 

"Venghimtu i mamawh alawm.. Enteh, he ta mipa zawng zawng deuhthaw hian an ît vek che. An khawih mai ang che tih ka hlau a ni" Zorema chu a sehchilh deuh. 

"Ka inveng ve thei alawm.. Min hrethiam rawh. Thian kan ni reng dawn nia".. Diteii chuan hmalam a pan nghal a. Zorema chuan a pawt hnai hrâwk. Diteii hmui a hup nghal. Hnunglam atangin a hnute chu a hup chat a, amah a palian roh si, Diteii chu a tal chhuak thei lawk lo lehnghal. A nghawng te chu a rawn hrawm nawk nawk a, theihtawpa insangmarin hmalam a bawh ta rawp a. A tal chhuak ta. A ding vat a, Zorema rawn kal phei chu a bula thingtang ro tuah tura an sah lawksa chuan a lo hlap nghek mai. A bekah tak a fuh ni tur a ni. A rak ta thawt a. A tlu mai si lo va, Diteii lah mangang bawk si a tukhumah tak a theihtawpa na in a hlap leh ta a. A awk rawp mai. An thawm chu hriat loh theih ni nghal lo chuan, an rawn lang ta sap sap a. Zorema bek veilam atanga thisen rawn chhuak pawh an rawn hmu nghal. 

"Dite, eng nge i tih tak? Eng nge thleng? " Puia chu a kai deuh tawh naa a rilru chu a fim deuh tho, Diteii chu a sawi nawk nawk a. Diteii lah chuan, "A hur em anih kha" a lo ti sam èt!  Thil awmzia chu an ring thiam mai. Zorema'n Diteii a hauhzia leh a sawi peihzia an hre vek. Tuman Diteii chu an thiam lo hran lo. A la naupang a, a tihawm tawk a ti a ni mai. Zorema chu an bawihsawm a, a bek chu a thi duh viau lehnghal. A thianpa ve ber Chhana chuan a kuah phei ta a. Diteii pawh Puia chuan a kai a, an riahna puan inah a kalpui a, Mi dang erawh chuan Zorema an buaipui thung. 

"Engtin chiah nge a tih che? Sawi vek rawh" Puia chuan a ti thur thur a. A lo kamnam deuh nen, a thinrim deuh ringawt mai. 

"Engtin em em chuan min ti lo. Ka hnute a khawih a, min kuah bawk a" Diteii chuan pawisawi lo zet hian a lo ti a. 

"I hnute a khawih maw.. Hmm… zawnga mai mai chuh. Bang nghal rawh se" a ti ta tûn tûn a. Diteii zawk chuan a'n khap dai leh rih. 

"Changtupa ber a ni si a, chan that leh vek a ngai dawn asin.. " a lo ti niah niah a. Mahse, Zorema nena inngeih hmel zeta lan der leh chu a phur tehchiam tawh lo khawp mai. 

"Kan shoot tha a nga a ni mai lawm.. Ani lo pawh saw an tam lutuk.. Khanglang a. ". puia chuan a lo ti hmiah.. A tho nulh a, Zorema te awmna lamah chuan a kal phei a. 

"A pawi hle mai. Heti ang thil a thleng hi.. Zorema pawh i tisual chiang khawp mai. Naktukah i hlawh ka pe che ang a, min lo va hawnsan mai dawn nia.. I thawh hlawh erawh ka pe ang che" a va ti ta a. Tumah an tawng lo. Zorema chu a zak bawk si, a inchhir hle tih a lang reng mai. Mahse, Ngen luih chiamin awmzia a awm dawn lo tih a chiang. A nih niha awm tawp bak kawng dang a nei lo. 

Diteii erawh a mu tui falua lo. Zorema chu a khwwngaih deuh bawk si, a ngei bawk si. Han ban tawp chu a tha ber loin a hria a, mahse, an role a pawimawh dun si a. Hmm.. Dinfela'n hre ve ta se engtin nge a tih ang le.. Tih a ngaihtuahna chuan a tihahr tulh tulh a, rei iak Dinfela a ngaihtuah phah. A rawn text reng tho naa chhan loh chang a ngah zawk. A ngai ve lutuk tho, mahse, ngaihdam ngawt kha tlawm thlak a tih bakah Teteii hmalam hun zel tur a ngaihtuahin ani chu a la chhe vr lo va, Teteii chu a chhe tawh. Chuvang chuan ser an inhnutchhiah ta sa sa, a tawp thlenga tawrh law law a tum tawp mai a ni. 

Lawma erawh a hma aiin zu a in nasa a, a nupui duh ve em em, a naute leh an in leh lo ai pawha a thlan zawkin a chahthlak laia a lo uiresan chu tawrh dam harsa a ti a. Ngaihdam pawh a tum hran lo. Teremi zawk chuan a rawn hel dûk dûk thin a. Amah rawn lang ngam chiah si loin tu te emaw a rawn enthlaktir thin. Lawma hi mipa lerh leh nula lawma phi ruai chi a ni ve lem lo va, zu a duh a, a inchhawp tawp a. A tlan hem hem reng ringawt mai a ni. A taksa pawh a chhe chak kher mai. Mahse,Teremi chu koh tumna a nei chuang lo. 

Chumi zana Teremi rawn lang hlawl pawh chu mak ti zetin a lo melh kuau a. An veng bawrah a rawn kal fo tih hre mah se, an inah em chuan a rawn luh ngam a ring lo a ni. 

"Lawma, Bungrua kan rawn la ang. Naktuk zingah" a ti nghal thâwr a. A inchei viau bawk. 

"In rawn la har tawh ka ti reng a" a lo ti liam puat a. 

"Dikbtak chuan, engkim kha i thiam loh a nia, hetia keimah min burbun vek ringawt hi ka ngaihdan a ni lo. Chuvang chuan bungrua pawh zat leh zatin kan insem ang, pawisa pawh ka thawh chhuah a tam zawk" Teremi chuan zam lo fe hian a ti ta a. Awm ve te chuan nasa an lo tiru viau. Lawma tan erawh a mak lem lo. 

"Tehreng mai, bungrua erawh kan in atanga kan chhawm ho kha chu i la thei lo vang. Heta kan awm hnua kan leiho chu la vek rawh. Pawisa pawh kan in ka hralhna tih loh kha chu i duh zat zat i la thei ang. Tichuan, vawikhatmah ka hmaah rawn inlan tawh suh" Lawma chuan nin hmel zet hian a lo ti a. Teremi a ter at mai. A ngaihdanah kha chuan Lawma lungleng chu a awm thei lo hmasa zawk a nih leh a ring a, a rawn hnár leh thuai a ring rilru kha a nia. Mahse, A rin ang a lo ni ta awzawng si lo. Lawma chu a reh hmiah mai si a. Amah zawkin awmngaihna a hre ta lo zawk a nih hi. An in lamah lah mo an nei tawh a, a tlatlum thei tawh si lo. Chubakah an khawsak a harsa chho ta viau bawk si nen, a nu leh pa takngial pawn hnawk an tiru tih a hrethiam ve kar a. Chuvang chuan Lawma lung tihlen leha neih leh chu a tum bur a ni. Lawma in leh lo hralhna kha bank-ah a la dah vek a, khatah khan chan neih ve hram a duh bawk. 

"A harsat lai zawng zawngin ka tawiawm che a, engkim ka ti a. Tunah min thlauhthla leh a. Eng mihring nge i nih a? " tiin a han thawi kual leh vel a. Lawma chuan zu a tlak pup a, ner nâwng chungin, "A tisual hmasatu zawk i nih kha.. Ngawi mai mai teh. Bungrua chu rawn la vat la a ni mai. Uire bungraw kawl pawh hi ka duh lo ania" a lo ti leh hmiah. Teremi tan sawizui tur a vang khawp ang le. Chuti taka Lawma lo danglam ta chu mak a ti. Ngaihzawng a nei mawni le a ti rilru hial. Mahse, rinhlelh tur an awm der bawk si lo. 

Hetih lai mek hian Mami pasal Sangtea pawh a chhung ten theihtawp an chhuahna azarah bail-a chhuah lailawk a ni thei ta a. Faki erawh kha chu kum hmasa lamah khan a chhuak tawh thung. Sangtea chu a thiltih vanga zaka indawmkun tur a nih laiin, a zak mang hauh lo. A inla piangthar em em a, Jail-ah Rawngbawltu a lo ni hman nge mawni, Kohhran a rawn bel leh chat a. Zak map loin testemony a sawi piap piap mai. Hlimsang inti ho chuan an fak kur leh dup a, Halleluia thawm pawh a ring leh hle. Mi nawlpui rilru erawh a la hel deuh. Mahni nupui that duhtu chu a pianthar tak tak theih an ring lo a ni mahna. An fanu Duati kha Alice kutah a awm a ni deuh ber. Enkawl peih mang si lo vin mi laka thang thatnan Diteii kha an lo chuhpui mai mai zawk a lo nia!  Alice lah nau no pawm ve tho ni bawk si, Mahse, Duati chu a hmangaih tlat. A fapa nen a en dan a danglam em em lo. Zanah pawh an bulah a mu mai a, a pasal Sawma pawn a duat ve viau mai. Alice te nupa chu Duati tan vantirhkoh an ni mai awm e. A pa a lo hawn pawn a pa chuan a ngaihsak eih lo. Vawi hnih khat chu a han lawm ve tak naa Duati aia pawimawh dang a ngah tlat. Nge a fanu chu a zah ve riau zawk hriat va ni suh. 

Bena pawh a la ngai reng mai. Darkar hnih khat han fim chang chu a nei. Mahse, Ramthari a tih mai khan a rawn chenchilh leh zel si a. Thil hrang hrang hmangin tihdam an tum tawh. Thil mak a ni tih bak sawi tur an hre ngai lo. Tihian a rawp ral ringawt dawn a nih hmel e. A khawngaihthlak khawp mai. 

Teteii pawh a dul a lian ve zel a. Anu meuh pawn a ringhlel ta. Thla hnih vel lekah chutianga a dul a puar chu a hrethiam thei lo. A rukin a zawt ta tawp reng a. Nu te bulah na na na chuan inthup hlen thei hek lo le.. Tap chungin, "Nu, ni e, ka rai tih ka hriatna a rei tawh. Dinfela fa a ni lo tih pawh. Mahse, eng nge ka ngaihtuah ka hre lo. Ka fa paina pa nen hian innei thei kan ni si lo va, ka rilru a hah em a, Dinfela kha ka hmang tangkai ta mai a ni. Pawi ka ti lutuk. Diteii a bo phah a. Mahse, nu, sawi suh aw. Khawngaihin min thup pui ve rawh. Nunui hian a hre bawk a, mahse, ani chu ka la khap bet thei.. Ani pawh khap zawh sen loh hun ka la nei ang. Engmah ka hrethiam tawh lo" a ti ta a. A inhnit hlap hlap mai. Pi Zawmi ngaihtuahna a kal thui kher mai. A fanu chu a hmangaihin a khawngaih tho, mahse, chu thuruk rapthlak tak chu a pasal leh Dinfela ten hre ta se an chhungkua an kehdarh ang em? Teteii rai vang ringawt pawn an kehdarh lo chauh kha a ni si a. A rilru a hah ta khawp mai. 

Mizo society-ah hian hetiang family problem hi a mikhual hran lo. Mi hausa ho bikah hian a zualkai lehnghal. An problem chu engpawh nise, sex hi a tel ngei ngei tihtheih a ni. An hausa a, an mualpho lo mai zawk thin. Pi Zawmi pawh chuan Teteii chu hum rih phawt mai a tum ta a ni. Nau a lo piang anga, zawhna a awm dawn. Thla 7-a nau hring an tam alawm tiin a inhnem a, mahse, a pianken a fuh veka a len viau phei chuan an ringhlel tho vang. Hetiang fanu a lo nei hi a pawi a ni. Diteii lah a hloh hmak bawk si. 

Zorema haw hnu chuan a bul atanga beih leh ngai lo va, chhunzawm dan tur an han ngaihtuah ta a. Puia pawn a rilru a seng nasa hle. Zorema han dahbo ngawt dan a vâng ngang si. A tawp a tawpah, "Hmm.. A bul atangin kan let leh mai aniang chu.. Zorema aiawh tur kan thlang ang.. " Puia chuan a ti ta nge nge a. An thaw sang sang mai. Diteii chu a inthlahrung, amah vanga a bul atanga engkim tih leh ngai angin a hria a. An dem ruk a ring bawk. Mahse, tuman engmah chu an sawi hran lo. Puia an hlau pawh a ni mahna. Hmuifang lam panin an chhuak leh ta sang sang mai. Zorema aiawh atan Apuia chu an thlang ta a. Ani hi chu ngawichawi tak, ri ve chung lo, pa deuh an tih ang hi a ni. Diteii nen phei chuan an innel vak lo. An chang dun thei em ang chu maw.. 

"Hetah eng nge i tih? ". Teteii aw chu a zawi hle naa a fiah khawp mai. Nunui chu a phu zawk. 

"Ka ih.. I awm maw ka tia, ka lo lut a" a ti bah nuaih a. Teteii chuan a mita chiang taka melhin, "I thil tum ka hria alawm.. Video kha i zawng tiraw. I hmu mai mai lo vang. Mi rintlak tak hnenah a copy ka dah tawh, ka thuruk i puanchhuah rualin a darh nghal ang" a ti hriam hrâk a. Nunui chu a khur deuh. 

"Tete, min vau nasa mah mah tawh. Ka hlau tawh bik lo che i duh leh tidarh rawh. Ka pa ka hrilh vek dawn. Hetianga ka u i hmang kual hi ka duh lo" a ti khur dat dat a. Teteii mitmeng chu a danglam chak kher mai. Chutih lai tak chuan Pi Zawmi a rawn lut ve a. A fate chu a melh dun a, "Buaina in nei em ni? Eng nge thleng? " a ti dam thlap a. 

Nunui zawk chuan, "Nang pawh hian i lo hriatpui reng lo maw? I fanu hian ka u fa a pai lo tih hi" a lo ti ta kalh kalh a. 

Pi Zawmi chu inthunun hram hramin, "Ka hriatpui hauh lo.. Eng nge i sawi awmzia? " a ti a. Teteii erawh a ngawi reng thung. 

"Aw ka u fa a pai lo, mi dang fa a pai anih hi.. A fa hi thla thum aia tam a ni tawh. Thla li dawn a ni tawh ang" a ti ta tâwn tâwn a. 

"Nunu, i chiang maw? Sawi rinhawt suh. A dik em? Tete, nunui thusawi hi" engmah hre lo niawm takin a nu chuan a zawt a.. 

"Dawt vek a ni. Dinfela fa ngei alawm ka pai" Teteii chuan a ti a. Nunui a ner sawk. 

"Zawngi, i hre dawn khawp. Ka pa ka hrilh dawn.. " tih leh chhuah a rual nghal. Teteii leh Anu chu an inmelh rual thawt. "Kan tihtir thei lo vang. Min hnawtchhuak dawn asin" Teteii chuan a ti zawi sap a. Anu erawh milim ang maiin a ding khawng tlat. Teteii chu a dul dawm chungin a tlan chhuak a, Nunui a roooma a lut tur chiah chu a tukhum samah a va kek ta lawp mai. Thapui hmang a ni bawk a; a chak hrep mai. Nunui chu a tlu nghal hawl. Room luh dawna vase rit tha nelh nawlh tak chu lek kangin, Teteii chuan Nunui lu-ah tak chuan a tha tawpin a'n hlap nghek mai a! A zal nghal raih mai. Chuveleh Pi Zawmi chu in hnuaiah chhukin awmpui nula te bulah.. "Nunui'n accident a tawk tlat mai. Driver lo call ula, damdawiin kan panpui a ngai" a ti chul a. A hlauhthawn hmel kher mai. 

In chungah a tlan chho lehnghal. Teteii chuan vase chu a lo hung tha mek a, Nunui erawh thisen nen a lo mu kawi niai mai. Khur dawt dawt chungin Pi Zawmi chuan, "Damdawiin kan panpui a ngai" a ti a. 

"Eng a?! I mawl em ni? A harh chhuah vaih chuan engkim a sawi dawn asin" Teteii chuan a lo ti hlar a. 

"Mahse, kan thihtir ngawt thei hleinem.. " Pi Zawmi chu a thaw hlawp hlawp. Nunui chu a sawi nawk nawk a. A zawi nen mai. An awmpui nula pakhat chu a rawn thleng chho ve nghal a, Driver a call thu a sawi bawk. Nunui chu a ko ve nghal mawlh mawlh a, engtin nge a accident tih a hre hauh lo. A zawt hman hek lo. Driver a rawn thlen chuan Nunui chu a pua a, Pi Zawmi leh an nula pakhat te nen Hospital lam chu an pan ta nghal a. Teteii erawh inah a awm thung. A vei sek a, a thlan a tla bap bap mai. He nau hi eng ramhuai sual emaw tak chuan a chenchilh a ni mahna. Duhamnaa khat, pawisak nei lo, engpawh ti duh a ni tlat si. Nunui chu a thi lo vang tih a hlau!  Hrep taka! 

Pu Vanlala pawh a rawn thleng phei ve ta thuai a. A fanu duatlai chu ICU-ah an dah. Chuti tehthuta thil thleng chuan a thawng takzet a ni. Pi Zawmi sawi danin, a rooma a lut tur kha a lu a hai thut nge a tlu ta a, a tlukna lamah vase a pawtthla palh a, chu chuan a luah tak a delh niin a sawi. Teteii'n a va hmuh hmasak ber thu nen. Tuman an ringhlel lo. Dinfela pawh chanchin an zuk hrilh ve a, ani pawh a thawng ve khawp mai. A farnu neihchhun kha a ni ve miau si a. Hawn pawh a duh rum rum, mahse, an zirlai a pawimawh ber lai a ni si a. Ni 3 hnua hawn tumin a intintuah ta zawk a ni. Dinfela bawkin Diteii hnenah Nunui chetsual dan chu a hrilh ve. Diteii pawn mak a ti, mak deuhin Nunui chetsual thu a hriat rual khan amahah ngaihthat lohna a piang tlat! A chhan a hre lo. A buaina tur a ni lo tiin a han insiamrem dawn thin a.. Mahse, a lo ngaihtuah leh ngut ngut thin. 

"U Pui, U nunui chetsual thu kha i hre tawh em" an break laiin a ti a. Puia chuan a lo la hre ve miah lo zui. An han inhrilhfiah leh rih. Puia pawh eng emawti deuhin a awm. Nunui chu a ngaihtuah ve viau mai. Hnawksakin ninawm ru viau thin mah se; chhiatna a lo thlen meuh chuan khang kha chu hriatreng a harsa ve a ni mahna.. 

Nunui chu a harh ta lo char char mai. Teteii lah a rilru a lo hah bawk. Dinfela rawn hawn zanah chiah Nunui chuan khawvel a chhuahsan ta a ni. A tlukna lamah a lu kha a sawh tel chu thuhran, vase-a Tetei'n a hlapna kha a na em a lo ni. A luruh a khik bakah a thluak thlengin a lo khawih pawi a. A damchhuahpui zo ta lo. Veng chhung nula hmel tha leh hausa boral chuan ui a hlawh in vuina pawh a ropui kher mai. Dinfela pawh awmngaihna a hre mang lo. A nau chuan a lo nghak niawm takin a thlen zanah a kalsan ta chu a ni si a. Na a va ti tak em.. Puia leh Diteii te pawn a thih thu an lo hriat chuan engtin nge niang tiin an inrawn a. Diteii chuan va lan ve loh mai a la duh fan. Teteii a hmu peih lo. Puia erawh chu a kal ve ngei a ngai ang. 

An film shoot pawh an chawl lailawk ta rih. Tin, Aizawl khaw chhunga chan theih a ni deuh tawh bawk nen. Nunui thlan nghah ni zanah Dinfela a rawn lang nghal. Diteii pawn a be chhe duh lo. Lu a sûn rih miau si a. Inhmatawnin an thu dun vang vang a. 

"Kei chu U Nunui thih danah khan thil fel lo a awm ka ring tlat.. " Diteii chuan a ti ta hlawl mai a. A vei ngang a niang e. 

"Mahse, tu nge inrawlh ang? " Dinfela chuan a rawn melh chiang ngang mai. 

"Ka hre lo. Mahse, lo chhui ru rawh. Ka ngaih a tha thei miah lo" a lo ti a. Dinfela chuan a va thut hnaih ta nge nge. Insi rialinn an thu dun a. 

"Dite, min ngaidam tawh em? " a ti zawi sup a. Mut a hmu tha lo deuh nge a pawr chhap mai a, a cher ve kuam bawk. 

"Aih" a lo ti leh hmiah. Dinfela chuan a kut rawn lain, nghet zetin a hum a. "Ka dam chhungin ka nghak mai ang che. Mi dang ta i nih dawn ai chuan min tihlum hmasa mai rawh" a ti ta thlawt a. Diteii pawh a mangang. A bula thu chu a ngai ve ngawih ngawih, a sawi chhuah thiam si loh hian a chhungrilah a kher nget nget reng a. Upat ve deuha Huaisen deuha hmachhawn a chak thin. 

"Kei chu ih, ka la naupang bawk sia, class xii pawh ka la pass si lo, i tan pawh ka tling lo vang" a ti niah niah a. Chu chu a sawi tum ber pawh a ni lo. 

"Chungte chu ka hre hlei hlui,.Min duh tawh ngang lo mi? " Hah hmel fe hian a lo ti a. 

"Chutiang pawh ni lo" a ti ringawt. Duh tawh lo tih tawp kha a hreh si, ni e, mi dang tan a la phal bik si lo. Chhan dan tur a hre lo a ni ber. 

"Teteii vang maw"

"Ummm"

"Teteii saw i u mah nise, ka ten a ni. Ka luak a tichhuak thin.. Chuvanga mahnia awm pawh tum ka ni" Dinfela chuan a ti a. 

"Naute a nei anga, i ensan thei lo vang" 

"Naute chu ka fa a nih takzet chuan ka hmangaih maithei.. Mahse, chu pawh ka sawinthei lo.. Naaa, Dite, min ngaidam tawh mai teh" naupangchhia zetin a ti leh hlawl. Diteii pawh a nui tawp. Chu chuan a ngampattir ta deuh nge Dinfela chuan a lamah a kuai her a, Diteii a maimichhing leh tlat.. A hmui sen chekah chuan a zuk nûl zauh a. Diteii a inla hrang nghal. Puia'n kawngka a rawn kik ve mek bawk. 

"Dinfel, Teteii chu neih i tum lo mi? " Puia rui thawveng chuan a ti pek a! Dinfela a ner nâng. A chhang lo. 

"Dite, naktukah hna kan tan leh ang. Mu tha la aw.. Ka chhuk dawn" Tiin Puia chuan Diteii biangah a va chuk zauh. Heng thil a tih chhan hi Diteii pawn a hrethiam lo. Amah Puia erawh chuan a hria, Dinfela hian Diteii a hmin leh tan tih a hrethiam a. Chu chu a ngaihtuah chhuah apiangin a na thin. Zah pawh dawn lo vin Dinfela hnawhbo nan atthlak takin a che mai a ni. A chet dan chuan nghawng a nei rang hle bawk. 

"A bianga fawp tur khawpin a tan eng nge i nih? " kawngka a hawng chiah tihin Dinfela'n a rawn ti ta a

"Amah kha zawt la" a ti ve hmak. 

"Dite, Puia hi i tan eng nge a nih? " Dinfela chuan Diteii mitah tak a melh. Diteii erawh chechang lo vin a ding ngawi reng. Sawi tur a hre lo. 

Puia chu rawn let lehin, "A tan hian thil tam tak ka ti a ni. I phatsan vanga a vahvaih laia tuamhlawmtu ka ni a, hna petu ka ni bawk. Nangin i lerhsan chhung khan ka lo venghim asin. A tan eng nge i tih ve zawk? Natna bak pek i nei em ni? " tiin Dinfela chu a dinchilh ta ran mai le.. A sawi zawng zawng kha dik lo pakhatmah a awm lo. Hei erawh a hre lo, Diteii hian mi pakhat chiah a hmangaih tih hi. 

"Ka phatsan lo. Ka phatsan ngai reng reng lo. Ani hi ka nunna tlukin ka hmangaih, ani pawn min hmangaih bawk" Dinfela chuan inringtawk zet hian a ti a. Puia chuan Diteij lam hawiin, "A dik em chu chu.. Ani hi i la hmangaih reng em ni? " a ti ta a. 

Thil tam tak a ngaihtuah ve. Dinfela'n a tihnat laia a natzia leh a tana Puia hlutzia te. Chenna tur in a pe a, hna a pe a, tawrhna a nasat lutuk loh nan a kawm hlim reng bawk. Engkimah a care hlawm tawp ti ila kan sawi sual awm lo ve. Chutiang anih vang chuan Puia mitmei chu a veng lo ngam tlat lo. Nula ni lo vin tleirawl chauh a la ni si a. Dinfela leh Puia chuan an rawn melh reng mai si, a chil a lem khalh a. Harsa ti zet hian, "Aih, ka hmangaih tawh lo" a ti ta a. Dinfela a chhing sawk. 

"I hria maw? Ran langin a rilru rawn tibuai fo tawh suh. Ka hrethiam thin che a, ka khawngaih  bawk Che. Mahse, a ni em em tawh lo. Bansan ve tawh rawh. Zalenna pe rawh.. Ani hi i tel lo pawn a tha e " Puia tawngkam tin chuan an rawn chhun zawk zawk a ni ber e. Diteii lam a hawi a, chhuat lam a lo melh daih. 

"Aw le, in duh ang ngei chuan ka rawn lang leh tawh lo vang. Dite, ka tihnat tawhnaah che ngaihdam ka dil che. Inenkawl tha rawh aw.. I hlim. Hi alawm la duh fö… anih mang tha le" tiin Diteii samah a va tuai a. Inpetruh chungin a chhuak ta a.. 

Diteii chu a thu hnawk.. "Keimah hi thi daih zawk ila " tiin a phun sep a. 

(Naktukah a tawp ang. Vawiin atan chuan a tawk 😎