Thuruk Last

THURÛK..!  (20)

Ziaktu : Toni Râlte

Dr Zira chuan Emy mitah tak melh chung chuan, "Tichuan, chairman chuan kan zavaiin min lo bum tihna maw? " a ti sup a. Boruak chu a uap churh mai. 

"Aw.. Engkimah min set up vek. Anihna takah chuan min that hman lo pawh hi pawi a ti hle ang. A kawng dal thei tur zingah ka langsar ber si a.. Hetiang taka lem a chang thiam hi Lucifera puihna a tel chiang" Emy chuan a ti nghat nghat a. Dr Zira pawh a inngaihtuah muk kher mai. Emy'n inhmuh a rawn sawi khan he thu hi a sawi a lo ring lem lo kha a ni a. Chairman leh a thuihhruai ten an hriat ve na tel lo va an plan siam a han hriat meuh rapthlak a ti ve viau mai. 

"Chairman paihthlak tuma ruahmanna ka siam kha lo tichhe zel lo ni la chuan, vawiinah hian thil a danglam tur" Pu Zira chuan a ti nghut a. 

"Ni lo, a danglam chuang lo vang. Ka fanu hman tangkai i tum ve tho alawm. Ka remti lo kha kha. Tin, kei inrawlh lo mah ila, saw ramsa Pu Liana saw tichhe tur chein a chhuah tho vang" Emy chuan a lo ti ve thung a. An ngawi dun vang vang mai. A hnu fe ah thawk la hawkin, pu Zira chuan, "Anih eng nge i ruahmanna chu" a ti ta a. 

Emy chuan fiah fel takin, "Ka fanu pa hi ka hre duh a. Tin, inthlan lo awm turah hian Pu Zamliana hi a chak loh a ngai bawk ang. Pu Liana saw chu ka thunun thei mai ang. Lucifera hnena ka fanu hlanna an neih hma ngeiin ka fanu saw i ru bo tur a ni" a ti ta a. 

Pu Zira chuan, "Anih chutah chuan eng hlawkna nge ka tel ve dawn le? " ti el lek lek hian a lo ti a. 

"Society-a thuneihna saw i duh a ni lawm ni?  I nei ang. Mahse, kei leh ka fanu kan zalen thung ang. Ka fanu aiawh tur mihring chu i ngaihtuah mai ang chu" Emy chuan a ti a. 

Pu Zira chu a inngaihtuah vung vung, "Emy, i fanu hi kan mamawh ber kher lo maithei a ni. A pa diktak kan hriat hunah phei chuan" a ti ve ta a. 

"E chuan, Erica saw i chhuah zalen tur a ni. Eng thilah mah a inhnamhnawih tawh tur a ni lo. A zalen tur a ni. A chiang em? " thupe aw deuh hian Emy chuan a lo ti a. 

"A tha alawm…i hlawhchham ngai lo va, chairman dinhmuna min dintir ngei ka beisei ania" Zira chuan a ti ta a. 

Zochhingpuii chuan silai chu lek kangin target zawnah chuan a tin vang a. Mit siai vang vangin a kap ta a. A kap fuh chiang ngei mai. Chairman chu a khi suk a. He tleirawl hian kum a tlin veleh Khawvel thara rorelna kengkawh tur fapa a hring dawn a ni. Ni e, Lucifera chi ngei mai chu.. Chu fapa chu a lo puitlin hunah Anti- Christ a ni tih miten an hre tawh ang a; Sakawlh no 666 awmze dik tak an hmu tawh ang. Chutih hunah chuan ani chu chawisanin a awm ang a. Hausakna leh nawmsakna tinreng nen khawvelah lal a hrawt ang. Khawvel ram lianpui pui ten Zoram chu chibai bukin an hlau tawh ang a, Isua ringtu inti te erawh hrehawm takin an vakvai ang. 

"Chairman, eng nge i ngaihtuah.. Tukinah ka pa ka la hmu miah lo va. Ka hmu thei ang em? " Zochhingpuii chuan a ti a. A mitmeng lian zet chuan a melh kal mai. 

"Aw le.. Chawhnu lamah i hmu dawn nia. Tunah chuan hahdam i mamawh. Thil. Entir tur che ka nei a, i chawlh hahdam zawhah ka entir ang che" chairman chuan a lo ti sawk sawk a. 

Ni e, a ruahmanna kal tluanzia a ngaihtuah chuan a hlim ru veng veng mai. A tir phat atanga a tum dan kha a la sawhsawn eih lo. Pu Liana'n Zohlupuii a thlan lai atang khan ani chuan tum a lo nei sa ran tawh anih kha. Pu Liana paihthlaka amah in lalram din a duhna chu a lian hle a, nasa taka a ngaihtuah hnuah Lucifera hnenah inhlan tharna neiin inremsiamna a neihpui a nih kha. Pu Liana khan Zohlupuii chu a pawl ngei taka, mahse, a chi erawh a nung zo lo. Zohlupuii chhula naute rawn insiam kha mi dang chi an kah luh a ni. Ni e, Chairman chuan ama hma sial takin a thisen thlah kal zel anih theih nan, a fapa Zoliansanga chi ngei mai chu kap lutin Zohlupuii chu a rai ta anih kha.. Zohlupuii nau pai chu a thlah a ni thei ta. Pu Liana'n Ramsa nih a duhna kha hmang tangkaiin a thunun zawh loh tur khawpa chak virus chu a thisenah an kap lut a, damdawi dang hmanga thunun sak theih a ni. Pu Liana chu a buai phah ta reng a. A buai zual lai leh a thluakin hna a thawh loh lai hmang tangkai lehin Ariana hmangin Pu Liana thluak an suk sak ta kha a nia. Heng thil hi amah chairman leh a mi rin zual mi panga bakin an hre ve lo. Tichuan, Pu Liana chu pindan thim takah khung boin sa hel leh damdawi hmangin an chawm a, anihna takah chuan chhuah anih hun atan training an pe a ni ber. Mi dang bum nan tuma tlawhpawh ngai loh angin an lantir mai zawk a ni. 

A beisei ang ngeiin Zochhingpuii a rawn lang ta a. Ani pawh Bum ve zelin apa thunun angin an lantir a. Anihna takah chuan Pu Liana hmangin an control a ni zawk. Amah Pu Liana ho Robot anga an enkawl a ni miau a. Heng zawng zawng a tih chhan hi thuneihna duh vang a ni tawp mai. Lucifera a hmangaih vang leh a lalram a zau zel theih nana ti anga lang mah nise;a rilru takah chuan thuneihna a pumhmawm duh vang a ni. Risk sang tak a la a, a hlawhchham thiang lo a ni tawp. Pu Zira a rawn inrawlh ta a. Tlemin a tibuai ta deuh. Mahse, Emy chak lohna a hre tawh, a fanu avang chuan eng pawh a ti dawn tih a hai lo. Emy a tawktarh ta reng a. Pu Zira khan Emy a dah that theih mai a lo beisei a, mashe, a beisei loh deuhin Emy chu a fapa nen intawng lehin a thuruk pawh a fapain a hre ta vek a. Kha khan nasa takin a tibuai ve a ni. Bansan tumna erawh a nei lo. Emy a lakluh lehna chhan pawh a fanu ngei chuan that se kumkhua atan bo hmiah se a duh a ni. An meeting tuma Pu Liana'n ruahmanna mawlmang tak a chhak chhuah te kha a plan vek a ni. Mi dangin hotu fing leh remhre tak anga an en theih nan a duanlawk a ni. Pu Zamliana lal an duh chhan pawh an duh dan anga ro a rel nan leh Zochhingpuii kawng daltu an awm loh nan a ni ber. An society chu man chhuah niin puanzar ni ta pawh nise, an ram roreltu ten an hum miau chuan a dai hlen dawn lo va, an huang an zauh zel thei dawn a ni. 

Chawhnu thlangher a ni lek lek tawh a. Zochhingpuii leh Pu Liana te chuan chess an khel a, an tang viau. 

"Zaninah kan chhuah a ngai dawn a" Pu Liana chuan a ti sup a. 

"A tha lawm. " Zoi chuan a lo ti mai a. 

Zanriah an ei kham atanga rei vak loah Pu Liana chu rawn lut lehin, "Tun atanga darkar hnihah aw" a ti a. A chhuak leh nghal. 

Pawnlamah Dr Zira leh a hote chuan Zoi te pafa lo lan hun chu an lo nghak ran bawk. Tunah chuan D Zira tan pawn Emy chu rin phawt a ngai a ni. Kawng dang a nei tlat lo. A kawng sial ve pawh Emy bawk hian a tichhe zel si a. Haw viau mah se, tanrual hun a ni miau si. Ui an bauh chuah chuah a. An awmna tlang chhip zawl lam rawn pan mek mi pahnihte chu a thlir vang vang a. 

"Mipa zawk khu chu in kaltir dawn nia" a ti sap a. 

Zoi te pafa pawh nunchan zir tur niawm takin tlang chhip zawl chu an pan ve zel a. Pu Liana chu a hawi hrek hrek. Tlang chhip an thlen chuan an han thu chawl te te a. 

"Tlak lam ruam fang ve thung ang aw" Pu Liana chuan a ti a. 

Zoi chuan, "Mihring chu khawih tawh lo ila.. Hun tiam hma chu" a lo ti thung. 

"Tehreng mai" Pu Liana'n a tih lai mek chuan, anmahni hual in mi eng emaw zah an lo ding khawm ta a. Zoi chu a hrilhhai hle. Silaia tin chungin, "In chet rualin in lu kha a darh nghal ang" an ti riap mai. Zoi chuan Pu Liana chu a melh zauh a, apa anga a ngaih chuan engkim tithei turah a ngai a ni chèk ang chu. Mahse, Pu Liana chu a chechang eih lo. Zawimuanga thoin a ban a phar a. "Eng nge in duh? " a ti ta a

"I fanu hi kan duh.. Nang chu i haw thei ang" Silaia tintu ber chuan a ti a. Chutih rual chuan mi dang chuan Zoi chu an lo phuar mek bawk. Zoi pawn tan vak a sawt lo tih hriain thuawih takin a lo dawh ve mai. Mahse, mak erawh a ti ru hle thung. Motora an nawrluh lai chuan, "Ka fanu, ka rawn chhan chhuak leh ang che" Pu Liana chuan a ti vau vau a. Zoi erawh a ngawi reng thung. 

Pindan zau lem lo takah an dah lut a. A kut an la phuar bawk. Khum a awm a. Tui an chhawp bawk. Darkar tam a liam lo tihah Dr Zira a rawn lut ta a. 

"I tha em?  An tina che em? " nelawm takin a ti a. 

Zoi chuan Pu Zira chu a lo hmuh ve fo tawh vangin mak a ti viau. "Ti nge hetia min tih? " a lo ti nghal chat a. 

"Thil tam tak a awm" a lo ti bung vut a. 

"Engvangin nge min man? " Zoi aw chuan ngaihno a bei vak tawh lo. 

"Tunah chuab engmah ka la hrilh thei lo che. I saltanna atangin kan chhanchhuak che tihah hian lungawi phawt rawh" Pu Zira chuan a ti ta a. Zoi rilru erawh a buai viau. A chhan engmah a hre tlat si lo va. 

"Ka nu, ka pa hi a lo la haw lo em ni? " Zoliansanga'n a tih lai mekin apa chu a rawn hawng a. 

"Ee.. Ka pa, hun i neih chuan biak che ka duh" a lo ti var a. Apa pawh chu a bu nghat. A inbual zawhah apa private roomah an inzui lut ta a. Chairman chuan a fapa thusawi tur chu hre lawkin a inhria. Ni e, Society chungchang a ni lo thei lo. 

"Ka pa, nasa takin ka ngaihtuah a. He thil hi chu a tha lo a ni. Bansan na hun i la nei ania. Ka nu pawh kan la tanpui thei" Zoa chuan a pa rin ang ngei chuan a ti ta a. 

"Bawiha, engkim hi in tan a ni asin. Nakinah rethei taka in awm loh nan hma ka laksak lawksak zawk che u a nih hi" Chairman chuan a ti a. 

"Aa.. Ka pa, setana ta ni chunga nawmsip bawl leh hausakna nena nun hman ai chuan rethei taka Isua lama tan ka thlang zawk" Zoa chuan a ti a. 

"Ka hrethiam che alawm.. Ni e, Nang hi chu hnuhluh che ka duh renh reng lo. Mahse, kei chu bansan thei ka ni tawh lo alawm. Kalkawng a thui lutuk tawh a ni. Engkim a khirh vek tawh. Kei ka thi ang a, nangin kan thlah kal zelte chu i lo kaihruai dawn nia" Apa chuan a ti ta a. A hmel chu a ngui deuh. A ngaihtuahna a kal thui ve bawk a. A fapa ngei chuan a hman tangkaizia hria se a that duh hial maithei a ni. A nula hmangaihber a laksak a, a rukin a fa a paitir lehzel tih te hre ta se.. A ngaihtuah ngam lo. 

"Emy pawh in hnuklut thuk zel a. Pa, kei chuan amah bak hmangaih ka nei lo va, neih ngei ka duh bawk asin. Mahse, ka tan pawh hun nei thei lo khawpin in chingphar a. A fanu lah dinhmun derthawngah a awm reng bawk a.. Engkim hi a tawp thei asin" Zoa chuan a duhthawh viau mai. Apa chuan a fapa chu lainat hmel taka melhin, "A pawi ka ti. Engkim hi ka thiam loh a ni. Siam that lehna hun ka nei tawh lo, nangman i pa sulhnu hi i la rawn thup mam a niang chu.. " a ti zawi sup a. 

Zoa chu a ding a, "Pa, dik tak chuan Detective ka ni a, journalist ka ni bawk. Ka hna hian in society hi a khawih thei ve ve.. Ka duhthlanna a ni. I bansan lo anih chuan, ka tihtur ka tih ve mai a ngai dawn a ni. In society phindarh tur hian tihtheih ka nei ve maithei ania"  a ti ta a. 

Chairman a thaw hawk. "Chu, min vau tihna  em ni? " a ti a. 

"Vauna anga i ngai anih pawhin i ngai thei ang. Mahse, ka hmangaih em em ka pa leh ka nupui hual te saltanna society tichhe tur hian ka theibtawp ka chhuah ang" a lo ti hmiah mai. 

"Ngawi teh, bawiha, i inchhir ang tih ka hlauhpui che. Kei chu kei ka ni a. Emy zawk saw a ni. Vawi tam tak mi nunna a la tawh a, hmanni maia I thianpa jona thlama thil thleng te, engkim zawng zawng i pholan huna i hmangaih Emy kutkawl nena a awm lai chu i thlir ngam meuh ang maw? " chairman chuan a ti ta a. 

Zoa pawh a ding ngil awt. Mahse, a nui hawk a, "Chu chu ka hre lawk vek. Hremna pawh a hmu ngei ang. Mahse, a zalen tawh thung ang. Hmuh theih loh hruaihruala phuar rengtu an awm tawh lo vang a, a fanu tana tha ber tur a nih bawk avangin Emy pawn a pawm thiam em em ang tih ka ring" A ti ve hmiah a. 

"Mahse, neih i duh a ni lawm ni? " 

"Duh e. Ka nei dawn alawm.. Ka nupui ni chungin hremna a tuar dawn a. Kei ka awm chuan a tuar nep deuh ngei ang" inringtawk zetin Zoa chuan a ti a. Apa pawh a ngawi hmak mai. Ngawi rengin a pa chu a chhuahsan ta a. A ti lo anih chuan a damchhungin a rilru a nuam tawh dawn lo tih a hria. Apa leh a hmangaih Emy mantir chu thil awlai tak a ni lo tih a hria, mahse, kawng dang a nei lo. Emy zalenna tur chu dan anga mana hremna hmachhawntir a ni tawp. Dan hnuaia khuahkhirh a nih chuan society mi leh sa te pawn an umzui ngam lo deuh ang chu.. 

Chairman pawh rilru buai takin zanriah pawh kil lo vin a ngaihtuahna a kawm a. Lucifer inlan hun chu thleng vat vat se a duh. A nih tur ang ni vat vat zawk se, a hmachhawnntur thil te pawh hmachhawn tawp tawp tawh se a duh tawh. A fapa mizia a hria a, a sawi ang khan a ti duh tak tak dawn tih a hai lo. Chutih hunah chuan a ruahmanna zawng zawngte kha vaivutah a chang vek dawn. A ui thlawt. A nghah rei tawhzia a ngaihtuah phei chuan a thinur hlur tawh hial. 

A phone ri ral ral chu lain, "Aw Pu Ding" a ti nghal a. 

"Chairman, Zochhingpuii a bo! " a rawn ti teh tawp!  Chairman chu a chhing sawk. Teh chai a na.. Hrep tak hian. Emy game khelh bawk a ni lehpek anh. He nu hi a hnawksak takzet a ni. 

Rang taka insiamin Society lam a pan ta a. A hmel te chu a tar bawih hian a lang. Hun tiam a thleng tep tawh si a, Zoi chu bo thiang a ni lo. 

"Engtia bo nge? " a ti nghal a. 

Pu Dinga chuan, "Pu Liana nen an chhuak a, a la hmuh ngai loh ten an rawn hual bet tawp a niawm e.. Tu emaw thiltih zawng a ni chiang ang" a lo ti zung zung a. 

"Pu Liana chu ka hmu duh" chairman chuan a ti a. 

Pu Liana a rawn luh lai chuan rum zet hian a lo melh a, a ti dai mai. "Engtin nge i thlentir theih?  Venghima enkawl tur i ni si a" a lo ti nghal thâwr a. 

"Silai kaw hmaah chuan chet lak ngam a ni hleinem" a lo ti dam thlap. 

"Tu thiltih nge? Emy tiraw.. A dik em? " chairman chuan a ti sek sek a. 

"Ka hre lo. Tumah kha ka hre ngai lo" a lo ti a

"Chhuah kha eng nge a tulna? " 

"Aman min ngen miau alawm" Pu Liana chuan inthiam lo ru deuh hian a lo ti a. Chairman chu a hawi tau sawk. 

"Zawng rawh. Engpawh ti rawh. Ramsa nih i duh pawn ni rawh. Mahse, Zochhingpuii i rawn hawn ngei tur a ni" a ti chang fak fak a. Pu Liana a chhuak zui nghal. Emy a rawn lang ve leh chiah. 

"Ka fanu i hloh a maw?  Eng nge i tih hi? I venghim thei lul lo em ni? " Emy chuan a rawn ti lut nghal tâwn tâwn a. Chairman pawh a hawihai zawk hle. 

"Ka tih a ni lo. A chhan ka hre hek lo. I tih anih ka lo ring zawk asin" tlema aw ki nem deuh hian a lo ti a. 

"Engvangin nge ka fanu chu ka ruk bo a nga. Zawng rawh. Tunah.. Him dama ka hmu leh lo anih chuan, ka tihtheih ka ti ang.. " Emy aw chu a chang kher mai. Chairman pawn inrawlhna a neih a ring ta lo. A thu hnawk a. Pu Zira a mitthla nghal. Ani hian remruatna dang a lo nei leh ani lo maw.. 

A chhuak a, Pu Zira enthla tur leh a building luh chhuak turin mi a tir ta nghal a. Emy chu a pindanah chhukin a kawngkhar chu a kalh te te phawt a. 

A phone phawrhin, "Luhchhuak turin mi a rawn tir chiah e. Hmun himah i dah tawh maw? " a ti sap a. 

Lehlam ami chuan, "Aw.. Tunah khan kan dah lut chiah e. Ngaihtha takin awm rawh" a rawn ti a. 

Emy chuan Dorothy number hmet chhuakin, " Aw Dory,Zanin dar 11 ah ka rawn kal dawn a. Valtea kha i lo hrilh dawn nia. " a ti sap a. Phone chu a dah nghal. Phone hman rei vak chi a ni lo, an hack thin vangin. 

Zoliansanga chuan laptop phawrhin, Emy nen an intawn leh atanga a thu hriat zawng zawng chu a type tan ta a. Society luh chhuak tura thil pawimawh leh tul te a ngaihtuah bawk. A phone lo ri chu hun lo ti viau mah se, a thianpa a ni tlat. A la ta hram a. 

"Aw.. Thianpa" a ti thum chhak a. 

"Zo, thil thleng a awm tlat. Tunah ka huanah i rawn kal thei ang em?  Ka naute nupa in balhla chin tumin ka huan an lai phut a. Ruang pahnih an chhar tlat mai" a rawn ti ta a. Hmmm, a rin aia hmain Society chu a hnaih ta tlat!  A phone leh laptop chu dahin a inthlak sawk sawk a. Chabi lain Jona huan lam chu a pan ta nghal a. 

Emy chuan kawngka a kik dat dat a. Valtea'n a rawn hawng. A lut vat a. An inhmu lo rei tawh naa thu dang sawi vak hman a ni lo. Zuitu a neih vaih chuan, Zochhingpuii an hmu leh thuai thei tlat. 

"Zochhingpuii hi in kutah ka dah dawn a. Buaipui tur dang chu ka chingfel mai ang. Mahse, hmun himah a awm ngei tur a ni" a ti a. 

"Goa kha a him mai ang em? " Valtea chuan a ti a. 

Emy chuan, "Aih, mahse, Goa-a kal angin in lang tur a ni thung. An zawn buai chhungin society kan tichhe hman ang. Villa-ah kirpui leh mai rawh" a ti ta a. Valtea chuan a melh reng ringawt. 

"Aw. atha alawm.. Anih engtin? "

"Naktuk zan dar 1-ah ka sawina hmunah lo awm ula, Zochhingpuii chu an rawn hruai ang. Zawhna tam tak a nei dawn a. Keimah min mawhpuh vek mai dawn nia. Tin, hliam a nei tur a ni lo va, a taksaah thisen a kai tur a ni lo. I hrethiam em? " Emy chuan a ti kalh kalh a. Valtea a lo bu nghut nghut. 

Dorothy chuan, "Emy, engtia chet lak zel nge la ngai dawn.. Puih theihna che ka nei em? " a lo ti ve a. 

Emy chu nelawm taka nuiin, "Keimah vanga thil thleng hi keimah ngeiin ka titawp ang. Hremna pawh ka hmu tawh maithei. Lo mangang lo ula, ka fanu a hima hmeichhe pangngai anih chuan a tawk aw" a ti sap a. Valtea erawh a ngawi reng. A inngaibtuah buai a ni maithei. 

Zochhingpuii chu khumah a let ngat a. Buaina hrang hrang a hmachhawn zing ta, ngaia neih harsa erawh a ti a ni. Anihna a hre chiang tawh a, chu a nihna vang chuan an ru bo tihna a ni thei ang em? Zoram thunun theih chu ani pawn a chak a, An sawi leh tih ang apiang chu ihe lo va zawm zel pawh a tum. Rorelna a kenkawh theih hunah eng nge a tih ang tih erawh a la ngaihtuah ngai hauh lo. Thudik zanwg chhuak tura rawn hrilhtu kha a ngaihtuah let a, tu nge anih ang le.. A rawn inlan duh tawh miah lo lehnghal. Thudik dang la awm cheu chu a ngaihtuah thiam lo. Tunah ruk bo a ni leh bawk si. 

Kawngka chu a lo inhawng a. Erica a lo lut nawlh mai. A hmu lo rei tawh a, ni tlemte chhung an lo inzui ve hman kha a nia. A bo ta daih chu mak a ti ru angreng viau anih kha.. 

"I tha em? " Eric chuan a ti a. A nui sâng bawk. Mahse, a taksa chu a hma aiin a te zawk a, a chetzia pawh a muangchang deuh bawk. 

Zoi chuan "Ka tha a ni mai ang chu.. Khawngahin heta tang hian min hruai chhuak rawh" a lo ti a. 

"I chhuak tep e. Mahse, Society-ah i kir tawh dawn lo. I putea bulah i cheng tawh rih dawn. I lawm em? " Erica chuan a ti a. Zoi chu a meng phawk deuh. A putea chu ngai viau mah se, Society-a a hna. ala zo fel tlat lo. 

"Hna ka la nei asin.. Eng vang nge? " a ti ta a. 

Eric chuan a aw a thian a, "Thil i hre tam tawh si a. I buai phah ang tih ka hlau viau mai. Mahse, thil nihna dik tak erawh hrilh hriat che hi a tha si a.. Tuna ruk bo i nihna hi i nu ruahmanna a ni. Chhanchhuak tur chein mi dang a ruai a ni. Tunah chuan i ngaihtuah thiam rih lo maithei. Mahse, nakinah i la hrethiam mai ang.. Hemi chin hi hria la a tawk rih" A ti dap dap a. Zoi mitmeng erawh buai tak a ni. 

"Chhanchhuah ka ngai hleinem.. Zoram roreltu ka ni dawn zawk alawm.. Chu chu Emy chuan a remti lo tihna em ni? " Zoi chuan a lo ti nghat a. A lungawi hmel vak loh. 

"Zoram roreltu i ni dawn reng reng lo. Hmanrua mai chauh i ni. An set up che a, an duh ang tihlawhtling turin i tihtheihte an hmang tangkai mai zawk a ni" Eric chuan a ti ta hmiah hmiah a. Zoi pawh a ngawi hmak mai. A rilru erawh hriat ni suh. Erica chhuah hnu chuan a mu thlawp a. A tah a chhuak. Ti nge a nun chu a buaichuar em em bik le? Thuruk mak zet zet a hre nitin a, awih tur leh awih loh tur pawh a hre hrang thiam tawh lo. A tap ta fap fap a. A tap khât viau asin le… 

"Ka fanu.. " a rawn ti nem diai a. A hawi chhuak vat. Kawngka bulah a hmaa a hmuh ngei mai kha a lo ding reng a. A nui sâng bawk. Chupa a hmuh rual chuan a thawveng hawk niin a inhria. 

"Mangang mah ta che. I nu thu hi zawm zel rawh. Chu chu i tana thil tha leh tul tak a ni.. " a ti dam thlap a. Zoi chuan sawi tur a hre lo. 

"Thlamuang takin awm rawh. Chhandama i awm theih nan Emy thu hi awih zel ang che aw" a ti leh a. Zoi'n a en reng lai chuan a ral leh daih. A tah reng reng a chhuak tawh lo. Hlimna leh lawmna mak takin a tuam a. A putea te bula ramhnuaia chen chu a chak ta hliah hliah mai. Amah ngei pawn a awmdan chu a hrethiam lo. 

Hetih lai mek hian Emy erawh thlarau sual ho ten an chaih buai mek thung. A mang ram atanga kai harhin, khum bulah an hual tuau a. An hmel lah hmuh hrehawm khawpa rapthlak vek an ni. 

"Kal bo rawh u" a ti tuar a. A hma zawn chiaha ding, palian leh sang zet chuan, "I thiltih mek hi i bansan lo anih chuan, kan rawn thawk rip tawh ngawt ang. I nunna i la ngaihlu anih chuan, bansan rawh" a ti thum chher chher a. 

Emy chuan a kut hum ruhin, "Ka thiltih hi thil tha ni lose chuan, min dal hauh lo vang le.. Chuvang chuan ka ti zel ang" a lo ti hmiah a. A sira ding chuan hneh zetin a rawn rek bet nghal. A tal awt awt a. Khum chu a che lawih lawih mai. Khum atanga hnuk thlain bangah an nem bet a, Emy chuan a thi dawn ngeiin a hria. Mahse, inlamlet a tum lo bur.. 

"I bansan khawp ang. Lucifera ta i ni a, a hna thawk rawh. I pensan thiang lo.. " A rawn ti leh chhur chhur a. 

Thei leh thei loin,  Emy chuan, "Ka nunna hi ka ngaihlu tawh hleinem.. In duh chuan la rawh u. Mahse, ka fanu thlarau erawh in chang tawh lo.. " a ti tâwk tâwk a. An thlah hnawk. Chhuatah chuan a tlu ta hnawk a. 

"Kan kawng dal zawnga chet i la leh anih chuan, Vilaah kan luhchilh zel ang" An hotu ber chuan a ti ta a. Emy a phu zawk. Engkim an lo hre vek a ni maw.. Hrep taka.. Ramhuai an ni tlat alawm.. 

A rilruin a tawngtai a, chu chu hria niawm takin, "Hahaha… tawngtai duh suh. Nang ang Lucifera tirhkoh rinawm tawngtai hi chhan a nih beisei suh. Kan ta i ni. I ni kumkhua bawk anh" a rawn ti a. Emy thinrim hmel chu nuihzat hmel zetin a melh a. An mitmeng rapawm zet chuan an melh kul hlawm bawk. 

Mahse, thawk leh khatah thil eng zet hi an inkarah chuan a rawn lang thut mai!  A en em vangin emy pawh a mit a vai hial. A tawlh hnung rawk rawk mai. Thlarau sualte pawh chu an tlu sawp nghal nulh nulh a, hlauhlawp leh thlabar zet hian, "Lalpa, min ngaidam rawh' an ti tuar tuar a. Eng chu a lian telh telh a,Ramhuai ho chu a mal te tein an ral ta riai riai hlawm a. Emy chuan ngam leh ngam lo vin eng chu a melh a, ramhuai ho ral zawh hnuah a eng chu a reh ta tial tial a. 

Tu nge ni ang?  Lucifera thiltih chu a ni lo tawp ang le.. Thil mak tam tak a lo hmu tawh thin. Tun ang ema thiltihtheihna mak kha a la hmu ngai lo. Pathian hnathawh a ni ngei mai le.. A thingthi hnawk a. "Min pui rawh" a ti sap a. 

Pu Zamliana chuan phur rilru takin a bial chhung khaw hrang hranga a vote hmuh dan tur duanlawk chu a en fel a, a khi leh suk thin. A lo tanpui tawhten a hming an vawrhlar zel chuan a dinhmun a tihsan belh zel a. Society te thu a lo zawm kha a inchhir ta lo kher mai. A phone a ri ral ral a. Number hriat loh a ni. 

"Hello" 

"Pu Zamliana maw.. Buaina pakhat a awm tlat mai. Khawngaihin min rawn hmu ta che, nangmahin aw. Society hruaitute nen in meeting dawn a.. " Mipa aw hian a rawn ti a. 

Eng buaina tak ni ang maw.. Hmanhmawh taka insiamin a chhuak zui nghal. Zuitu neih a duh lo bawk. Inhmuhna tur hmun a rawn sawiah chuan a ding a. Motor atanga chhukin amah lo nghaktu Scorpio lo dingah chuan a lut ta nghal a. A la hmuh ngai loh mipa pa lian lam chuan, "Kal nghal mai ang aw' a ti sup a. A lo bu nghat. Aizawl khaw pawn an tlan thleng ta. Zan dar 11 a ri tawh a. Society buildingah a la luh loh vangin Pu Zama pawh chuan ngaibthat lohna a nei hran lo. Motor chu a ding dat a. 

'Chhuk rawh" a ti nghut a. Pu Zama pawh a chhuk ve mai. Motor dinna bul lawk kham pang awih zet chungah chuan an ding a. 

"An lo thleng tep ang. Building chhunga meeting a rem lo a" chupa bawk chuan a ti leh a. Pu Zama chuan a sana a bih zauh. 

"Eng buaina nge ni reng reng? " a ti ta a. Chu pa chuan rawn hnaih sawt pahin, "Buaina lian tham tak a ni. Chuvang chuan i thih hi a ngai tlat mai" tih pahin a chemte ken ruk zum zet chuan Pu Zama thinhnunah tak chuan a vit hrâwih mai. Pu Zama chu a hamhaih luatah rak pawh a rak eih lo, a meng phawk hle ringawt. A pai chawn chawn a. A tlu ta hnawk mai. Chu pa chuan hmanhmawh takin Pu Zama thinhnuna chemte chu phawiin khamah chuan a paih ta a. Pu Zama ruang chu a dap rak rak a. A phone chu phawrhin a call log-a a number lo lang chu a delete a. Ruang ipteah phone chu a dah leh nghal. Chutih lai tak chuan motor a rawn tlan a. Rang takin ruang chu a hliah vat. A tlan liam hnuah Pu Zama ruang chu motorah hlang lutin motor chu a start nghal. Aizawl lam panin a tlan leh ta a. An party office kawtah a ding dat a. A hawi kual fe hnuah ruang chu kawngah a namthla a. A tlansan ta vang vang mai. 

A tuka boruak erawh a dang ta zak mai. Inthlan lo awm tura candidate lian ber, CM ni tura an rin thup ruang hmuh a nihna chuan Zoram a thawng takzet a ni. Mi tin chu an phawk hru a ni ber mai. Thah a ni tih a chiang a, a thattu niawma rinhlelh kai zingah opposition lam an lian hle. Mahse, an pha nasa ngang mai si. Chu thil zet chuan nghawng a nei rei viau ngei ang. Society lam pawh buai mep mep tak an ni. An rinchhan leh an innghah rukna ber a thi leh ta si, an hmanrua ber lah bo bawk. Chairman hmel chu hmuh hrehawm khawpin a ling a ni ber. Biak pawh huphurhawm tak a ni. A vei sek a,  a hui leh pap thin. Ti nge a kawng zawh a tawp tep tawh tihah buaina a tawh leh tak. A fapa hian chet a la tan tihna a ni thei ang em? Mahse, Pu Zamliana thihnaah chuan a inhnamhnawih a ring si lo. Phiarrukna a tel ngei a ring tlat a ni.

Pu Dinga a lo lut. Chairman chu a khawngaih hmel hle. A beih nasat tawh tehlul nen. 

"Zochhingpuii chanchin in hre tawh em? " a lo ti a. 

"Hre chiah lo. Pu Zira building chu kan va luh chhuak a. Mahse, kan hmu lo. Khawiah emaw a thukru a ni maithei" a ti a. 

Chairman chu a ding dat a, "Emy nau Valtea te enthlak hna thawk nghal ru.. Emy thiltih anih chuan, anni sawn tel vena an nei ngei ang" a ti a. 

"Aw le.. Pu Zamliana thihna hi.. " Pu Dinga'n a tih mek laiin, "Hei chu police lamin hma an la zawk ang chu.. Kan lo inrawlh ve chuan man chhuah kan ni zawk ang. Anih tur ang a ni tawh a. Tunah chuan kawng thar kan dap a ngai" Chairman chuan a ti a. Pu Dinga pawh a bu nghut mai. 

Valtea chuan ticket lek va pahin phone a hmang mek a, a sir dinglama motor phen atanga lo thlir rengtu hriat phak ngei tur chuan, "Aw.. kan chhuk phawt ang. Umm.. Ka tunu hruaiin, a tan a him ber ka ring a ni. Goa kha chu ka ti leh ta lo mai. Shillongah Dory chhung ten min pui thei dawn ani awm e. Vawiin tlaiah kan chhuak ang, chuan ramri-ah ka tunu chuan min lo nghak dawn" a ti mial mial a. A nui hak hak bawk. 

Lo thlir rengtu pawh a khi suk mai. Chairman chu a lawm teh ang chu. 

Pu Zira leh Erica chu coffee no dawmin inhmatawnin an thu dun a. 

"Ka ti tak tak. Ka umzui miah lo vang che. I kal thei. I zalen alawm" Pu Zira chuan a ti a. 

Eric chuan, "ni lo ve, kawng dik zawk angah ngaiin Emy ka pui a, a lo dik lo a. Tunah chuan ka phatsanna che kha ka rul let ang che. A hma angin kan thawk dun leh thei alawm. Keimah anga rin i nei dawn chuang lo, a dik em? " a ti a. Pu Zira pawn chu chu dik a ti. Erica anga thluak tha leh a hnungdawl thei tur mihring hi a la hmu ngai lo, a phatsan pawn na a ti hle anih kha. Beiseia lah a chân tawh si. Erica bak a nei tawh lo a ni ber. 

"A tha alawm.. Anih chuan, kan inrem ni rawh se.. Emy vangin kan kal hrang a, amah vang bawkin kan insuihzawm leh chu ania. He hmeichhia hi mi mak tak zawng a ni e" pu Zira chuan a ti a. 

Erica pawh a nui suk, "Hmeichhe danglam tak a ni" a lo ti ve a. 

"Neih hial i duh em? " pu Zira chuan a ti a. 

"Duh tawh lo. A hmangaih ka ni lo va, ka laka ba a neih vang chauha min nei turin ka duh lo. Hlim takin awm se tih hi ka duh ber" Eric chuan a ti sap a. A serious zia chu a lang thei mai. 

Chutih lai tak chuan mipa pakhat cher lam deuh hi a rawn lut a. 

"Beiseia leh Zuia te ruang an ni ngei tih fiah a ni tawh" A rawn ti lut nghal. 

Ni e,, Jona huana ruang chhar kha Beiseia leh Zuia te ruang ani tih an veng chhung ami ten an rawn finfiah tawh a ni. An ruang a chhiat tawh deuh vangin an phum zuo nghal kha a nia. A thattu zawn mek a ni. 

"Tu thah nge nia i rin? " pu Zira chuan Erica a melh a. 

Erica chuan, "Ka ngaihtuah i hre reng sia, engvanga min zawt nge i nih? " a lo ti thung a. 

"Emy hi kan mantir anih chuan buaina dang kan hmachhawn leh dawn si a. Ka naute thattu hi tunah chuan ka hum a ngai rih zawk tlat si" pu Zira chuan a ti a. A ngui rawih mai. 

Chairman pawn Beiseia te ruang thattu chu a hai lo va, sawi chhuah tumna a nei bik lo. Emy a ni tih puang se, Emy'n a thah chhan puanzar a tul leh anga. A tawpna chu society a ni dawn. Ngawih ral mai aia tha a hre rih lo. A fapa hian chet a la ang em a hre lo. A hmangaih chu a man thei bik chiah ange maw.. A theih a ring chiah lo. 

Ni e, Zoa chu Jona pawn vawi tam a dawp tawh. Ruang endik anih khan an thih hun leh Zoa la awm hun kha a inmil hle a. Jona tan chuan rinhlelh loh chi a ni tlat lo. An sulhnu thup viau mah se, ruang ber an hmu chhuak nulh si. Zoa chuan, "Engmah ka hre lo. Anmahni pawh ka hre ngai lo. Tu emaw thiltih a ni" tih bak sawi tur a hre lo. Jona pawn a thianpa hian tual a thah ngawt a ring hran lo, mahse, thil hriat eng emaw a neih chu a ring a ni. A sawi duh tlat bawk si lo. Police bulah erawh Zoa a zuk awm thu a sawi lang duh bik lem lo. 

Zoa rilru pawh a buai ve ta hle. Emy chu man se, society tichhe tura bultanna tha tak a ni tih a hria. Majse, Emy biak hmasak phawt tha a ti si. A hmu maithei bawk si lo. Tualthattu hum reng chu dikin a hre bawk si lo. Rilru hah leh buai renh rengin a awm ve tho a ni. 

Zochhingpuii la kir turin ramri-ah an inthawn thla mek a. Valtea te erawh muangmarin an insiam thung. Bungraw ritsak an keng dawn lo va, eitur erawh an lei khawl nual. Engtianga rei nge an awm dawn an hre si lo va. Emy'n a lo biak hun an nghak deuh tawp mai. 

Emy erawh a pindanah a thu tlawk tlawk thung. Sana a bih zauh zauh a, a rilruin a tawngtai mial mial mai. Tuna a hlawhtlin loh chuan chance a neih a ring tawh lo. A tlin tawh kher lo bawk ang. Zan dar 10:30ah Pu Zira chuan a rawn be ta a. 

"Tunah an chhuahpui dawn mek e. " a rawn ti sup. A thaw huai mai. 

Villa panna kawng pengah chuan Xenon dum tliang hlarh chu a ding dat a. An piah lawk huan peng atang chuan Zochhingpuii leh Erica chu an rawn inzui phei ta ral ral a. Valtea pawh a thaw hawk mai. A hnuk te a ulh lek lek mai. Thawm dim takin motorah chuan a rawn lut a. Eric pawh ngawi rengin a let leh vut. Dorothy chuan Zoi chu a lo kuah vat a. Valtea chuan motor tinungin, Villa pan ramhnuai kawng zim teah chuan an tlan thla ta a. 

Chairman mitmeng sen rûm chu ti takin an melh a. "In hloh thei a maw? Laktlak loh lutuk.. Engkim a tawp ta a nih hi" a ti tuar tuar a. Ramhuai hmel a pu hial tawh. A thinrim em a ni. Ni e, Ramri ah khan Zochhingpuii hmel renh reng an hmu tlat lo a ni. Valtea khan a bum a ni ngei ang le.. 

Emy erawh tui takin a muhil sâk sâk a. Thil pakhat chiah tihtur a nei ta. A fanu pa dik tak a hre chhuak anga. Tichuan, police kutah inpein a fanu venghim turin a ngen bawk ang. Tichuan, society a tichhia anga, zalen takin jailah a hun a hmang ral tawh ang. Emaw a thi tawh ang. Thi mah se, a fanu nunna a chhanchhuah chuan a lawm tawk e. 

Emy pindanah chuan chairman chu lutin a tawp thleng law law turin a inpuahchah tawh a ni. Hahdam hmel zeta Emy lo thu chu huat hmel zetin a melh a. 

"Tunah hian Villa pan turin mi ka tir thei reng.. Ka video kha ka duh a ni" a ti ram hmak a. 

"I tlai.. I fapa kut a thleng tawh" a lo tih khum. Hmak. 

"Anih chuan nang pawh i thih a ngai anih chu" Chairman chuan a ti ta a. 

Emy chu a khi sak, "He hun hi lawm ka lo nghah. Min la that dawn tho tho tih ka hriat vang ania, video kha i fapa ka pek tak ni. Ka ruang chu khawiah pawh thukru mah la, thudik erawh zoram khawvel hian an la hre tho ang" a lo ti a. A zâm loh zia hmutu chairman chu a zâm lek lek zawk. 

"Ni e, i fanu pawh ramsa a nih miau vangin an khung hrang anga, a damchhungin a hmangaihte hmel a hmu tawh lo vang' a ti a. 

Emy chuan, " Pawi ka ti lo.. " a lo ti chhum hmak. 

"Mahse, ramsa anih miau vang leh thiltihtheihna a neih miau vangin Society hi a tung ding leh ang" chairman chuan a ti ta a. 

Emy a ding zawk, "Ramsa a ni lo.. " a ti tuar a. Chairman a lo nui. "A thisena kan kah luh kha a tam tawk viau a, naktuk zan hi thla bial zan a ni a, i naute pahnih thisen chu a luang tam viauin ka ring" a lo tih khum a. Emy chu a khur dawt dawt. Mitmeng ling hlara chairman melhin, "Aw le, a tha e. Thil pakhat min hrilh la, ka fanu chu ka hruai kir leh ang.. A tha em? " a ti ta a. 

"Eng nge i hriat duh? " a lo ti a. 

"Ka fanu pa dik tak ' a lo ti sap. 

Chairman chuan a rawn kal hual a, "Zochhingpuii pa maw.. Hmm.. I fanu hi ka tunu ve tho a ni ti ta ila.. Eng nge i ngaihdan" a ti a. Emy a meng phak awk mai. 

"Nang.. Nang hian i tithei hauh lo. A theih loh" a lo ti nawk anwk a. 

"Ka thei alawm.. Zochhingpuii hi Zoliansanga fanu a ni e.. A chiang em? I hriat duh i hre ta bawk a. I thutiam hlen ve rawh le" a ti sup a. Emy a chhing diar diar. 

"Naktuk zanah ka fanu chu i hmu thei ang' a ti zawi raih a. 

Zoliansanga rilru buai vei tawn sek chu a nu in a rawn ko lâng láng a. "An hmu duh che" a ti a. 

A roomah a rawn chhohtir a. Chu pa hmel a hmuh chuan a ding chawt. He pa hi a beisei hauh hleinem. A hmangaih ber khumpui kaipui thin pa hmel chuan a thin a tiur nghal awt awt. 

"Eng nge i duh? " a lo ti ram hmak a. 

"Society tichhe turin i inpeih tawh em? " Erica chuan a ti vawt raih a. Zoa chu a ding khawng lah. 

"Engtikah.. "

"Zaninah.. Emy'n a tihtur a hlen tawh dawn a ni" Erica chuan a ti a. Engmah sawi zui tawh lo vin a chhuak nghal hmiah. Zoa chu a hrilhhai letling. 

Villa lam erawh an boruak a nuam viau. An inngeih tlang bawk a. Zoi pawh hmana zochhingpuii mizia ang chiah kha a rawn pu chho tan ta bawk a. Valtea chu la thlamuang kim lo mah se, a phurrit zual chu a kiang ta deuh. A hmangaih te pahnih nen chimbuaitu awm lo vin an khawsa mek si a. A rifle erawh hman mai theih turin a hung lang reng tho. 

Zan dar 9 a ri mek tihin Zochhingpuii room a tang chuan thawm danglam tak a rawn chhuak ta a. Dory nen hmanhmawh takin an va tlan lut nghal. Am thil hmuh chuan a ti dâng sâwp sâwp mai. Tleirawl duhawm leh pawisawi lo kha ramsa hlauhawm tak leh rapthlak takah a lo inthlak mek a ni. Dory chu a thidang titih nghal. Valtea chuan Zoi chu va hnaihin, "Naute, nangmah i ni. Zochhingpuii i ni. Ramsa i ni lo. Duhtawk rawh. Engkim a tha vek ania" a ti tuar tuar a

Dory buaipui ngai bawk. A. Indaih lo kher mai. Zoi lah a ngur chhur chhur reng a. A miitmeng rapawm zeta Valtea melh ngur chung chuan a rawn pan ta chhur chhur mai. Valtea pawh a tawlh hnung zel a. Dory lah harh mai thei si lo. 

"Ti suh. Ti miah suh. Ka tunu i nih kha.. Hetianh hi i ti duh lo" a ti khur dat dat a. Zoi chu rapthlak zeta ngur chhur chhurin a awm chu a chum vak vak a. Chutih lai tak chuan inthazo zeta rawn zuanglutin Emy chuan Zoi nghawngah chuan syringe a vit lut thawih mai. Zoi chuan Emy chu a lo beng per lawp. Dressing table a deng dawt a, bungrua chu a tla darh nuaih mai. Zoliansanga chuan a rawn buaipui nghal vat. Zoi lah chuan thinrim hmel zetin Emy chu a pan hriau hruai a. Ei zawh ngei tum niawm takin a a ha zum takte chu a then thu bawk. 

Zoliansanga chuan mangang zetin a silai chu phawrhin Zoi chu a tin ta a.. 

"I tawlhsawn lo anih chuan ka kap. Dawn che ania" a ti tuar a. Zoi chuan ngaihnep hmel zetin a lo ngur khum. Kah tak tak tuma a tinzawn mek laiin,  Emy chuan, "Kap suh.. Zo, i fanu anih kha.. I fanu' a lo ti ta tuar a. Zoliansanga chuan a silai a thlauh tawp. Zoi pawh a ding chuih mai. Valtea lah chuan phawk zetin Emy a rawn melh bawk. Emy chu thei leh thei lo va rawn thoin, "Ka fanu, duhtawk  tawh rawh. Ramsa i ni lo. I thisenah khan virus an kap lut mai zawk a ni. I thunun thei. Zohlupuii leh Zoliansanga fanu i ni a. Mi pangngai i ni. Khawngaihin duhtawk rawh" a ti dap dap a. Ramsa chu va hnaihin, a ban hmul thup chu a va chul a. 

Zochhingpuii chu a nguk hruih, a tawlh hnung hret hret a, bathroomah a tlan lut ta a. Dory pawh a rawn harh ve chiah. 

"Eng nge i sawi kha.. Zochhingpuii hi ka fanu maw.. Engtin.. " Zoa chuan harh chhuak thut niawm takin a lo ti a. 

"Thuruk ril tak a ni.. " Tiin Emy chuan thil awm dan, chairman thiltih dan zawng zawng chu a sawi ta a. An mitmengah mak tihna chauh lo chu engmah hmuh tur a awm lo. 

Boruak a reh vawng vawng lai takin bathroom atang chuan ngik faih faih an hre ta a. Emy chuan a va hawng a, saruak ngal ngatin Zochhingpuii chu chhuatah a lo mu ngát a. A mittui chu a luang ngiai bawk. Puana khuh vatin Emy chuan a pawm tho a. Lainat hmel em emin a fanu chu a melh vawng vawng a. 

"Min ngaidam thei lo anih pawhin ka venhim che hi chu phal hram rawh aw" a ti sap a. Zoi chu a nu angchhungah tlu lutin a tap hawk hawk mai. 

Chulai hmunah chuan thuruk zawng zawng chu puanchhuah a ni ta a. Society tiche tura ruahmanna nen. 

A tukah chuan Video rapthlak tak a darh ta a. Doctor lar tak Dr Ramhluna inpuanna chu.. Police thahnemtham takin Society building luhchilhin a kil khawr ber thlenga dapin an man fai ta phiar a. Dr Zira pawh a him bik lo. Erica erawh Emy puihnain Mizoram a chhuahsan fel chiah thung. Emy ngei pawh police kutah a awm ta. Zoram khawvelah chutiang thil mak leh awih awm si loh, a tak ngei ni bawk si chu mitin ngaihven a ni ta a. Politician lar leh mi lian tak tak te pawh an lo bang bik hauh lo. Chung zawng zawng puangzartu Emy chu hmana zaithiam lar em em Zohlupuii kha a ni tih tuman rin ngaihna an hre lo. 

Secret Society member te puanzar an ni a, Thiah a ni ta bawk. Mahse, an thiat hlen tak tak ang em tih erawh tuin nge hria?  Pawikhawih zawnga che ve lem lo, member ni ve tawpte chu counselling pek tura chhuah an ni a. Man ngawt na chhan tur kha a awm tlat lo a ni. An duhthlanna a ni miau a. Thil dik lo leh tualthahna lama inhnamhnawih te erawh an vaiin man an ni a, Jail runthim an bel dawn ta. 

Dr Zira thinur lutuk leh Emy haw lutuk chu a intihlum duh mai ang tih hlauhawm khawp a ni. Emy bumna hnuaiah Emy chu a lo pui ve char char tih a hriat meuh chuan a tlai tawh si. Erica pawn a lo la bum fó!  Engkim chu a hloh ta. ani ber mai. Chairman erawh a ngawi reng thung. A phutawk a hmuah a ngai a. A mantute zingah a fapa a tel ve miau avangin a thiamthu sawi a tum hek lo. Emy chu a ngaisang letling. A set up zawk emaw a tih laia a bum let nalh lutuk chu..

Central jail-a an riah hmasak ber zanah chuan ruah a sur cherh cherh a. Tupawh chu an ngui nghiai mai. Emy pawh a cell-ah ngawi rengin a thu kar mai. Tuman an be lo va, tumah biak a tum hek lo. Mut hunah a mu ve tawp. Mahse, a muhil thei lo. Zing lam dar 2 bawr velah rak tuar tuar thawm leh silai puak ri in jail compound chu a khat ta. An tho sung sung a. Pawnah an tlan chhuak nghal. 

Jail thlanglam hungna bang chungah chuan ramsa hrawl leh rapthlak em em hi a lo ding vung mai a. A mitmeng mei alh ang maia sen chuan a melh kual dun dun a. Silai a puak leh dawt. Silai puahna lam chu hawiin hmuh hman loh khawpa ranh hian silai kengtu chu a vai thlu tawp a, a hrawkah a seh nghal bawrh. Bawrh. Thisen a chik tuar tuar a, tui tih hmel zetin a lo dawt kiang kiang mai. Tumah chuan engmah tih nachang reng an hre lo. Emy erawh chuan a melh kal a, a kut a hum ruh nasa hle. Chutah chu ramsa chu rawn tho chhuakin Emy lam chu a pan ta a. An tlanchhe hum hum mai. Emy bul a thlen chuan a ngur chhur chhur a. Rang zetin Emy chu a la nawlh. A darah a seh kawh vu a. Chak zetin a lim puat, jail hungna bang chu zuan khumin a kal bo ta daih mai… Emy a awm ta lo. 

Khawvel thar.. 

"Emy,.. Oh.. Ka nu, lo en vat teh

.. Hei hi a mawi lutuk" tiin Zochhingpuii chu a au chul a, Rose par sen duk nalh zet chu thliah tumin a ban a. 

"Ni lo, Bawihte, khawih suh. Ka lo thliak zawk ang. I pa  va kai tho la, eitur ka siam. Zo tawh tih va hrilh rawh" Tiin Emy chuan a rawn pan nghal a. Zochhingpuii pawh a pa mutna lam panin a tlan phei nghal. Emy chuan thlir zui vawng vawngin a khi sak a. A mittui a tling pam bawk. 

"Pa.. Tho teh.. Ka nuin eitur a siam zo tawh. " tiin apa chu a sawi nawk nawk a. Zoliansanga chu rum tuah tuah chungin a lo tho a. A fanu biang tai tek chu piai in, "I nu eisiam chu a tui lo leh ngawt ang" a ti sup a. An pafa chuan an nui dun a. 

Zochhingpuii leh Huntera Lui lama an inzui thla mek thlir chungin, "A hmel tha tiraw? " Emy chuan a ti sap a. 

Zoa chuan, "Anu a chhun a. Aw a hmel tha" a lo ti sup. 

"Ve che. Apa zawk alawm a chhun.. E taka Valtea te pawh naktukah an lo chho dawn.. " a ti a. 

"I fanu khu hrilh miah suh. Surprise ang.. A putea a hmuh huna a hlim hmel ka hmu duh" Zoa chuan a lo ti a. An nupa chuan inmel dun vawng vawng a. 

Khawvel tharah hian Secret Society chuan kua a hreuh leh mek ang em? Zochhingpuii thisena virus chu eng chen nge an thunun theih ang le.. Engpawhnise, nupa chak tak an ni a. An pahniha khawvel an hmachhawn zel tawh avangin an tan hneh theih loh tur khawpa chak a awm lo ve.. Mahse, thuruk tam tak a la awmin in hria em?  Thuruk a ni miau alawm le… 

(Thuruk fans te in zavai chungah ka lawm e. Ka duhtawk ta e. Love story a rawn awm thuai ang.. Ka lawm e.)