Thlarau thuchah

THLARAU THUCHAH (9)

Ziaktu : Toni Râlte

Azeli khawsik chu a sang viau mai. A khur hlak hlak a, a nauten rizai rawn vur belhin an bawh thul. Damdawi a ei naa a chhawk har hle mai. Chutia. a khua sik ringawt chu a ngaihna a hre lo khawp mai. Inentir ngei a ngai dawn anih hmel. Hriau hi a hlau riau a, inchiu a ngai ang tih a hlau ber mai. Nachhawkna chuan a rawn chhawk tan ta aniang, a thaw a sa tan a. A muhil ta bawrh bawrh mai. 

A mumangah an khuaah a lo haw a, a pa nen luiah lo kalin sangha an lo man a. An lo rak teng tung mai. Chutia hlim zeta sangha mana an buai viau lai chuan, li pakhat lian ve angreng tak chu a pa chuan deng turin a len a zar pharh mek a. Mahse, A rak thawt!  Azeli chuan phawk zetin a pa a va en a, ani chuan li lai tak chu a lo kawk vâ a. Azeli'n a va en nâk chuan, Lu bung thisena khat huh pur hi a lo lang nulh nulh mai a lo nia. Râp zetin an thlir dun a, chu lu bung chu a rawn hnai zel lehnghal. Apa nen chuan chak zein lui hnar lamah an chho ta a. An hmanhmawh luatah Azeli chu lungah inchhuihin a tlu bawkkhup ta thuai mai a. A harh nghal zawk. A lo insangmar nasa mai a, a hah vek thei. A thu chhuak a, khua chu a lo thim ruai tawh a, a naute thawm erawh a hre lo. A ko va, an reh tlawk tlawk si. Khawiah emaw a kal em mawni dawn le.. 

Luhai bûrin a tho chhuak a, sitting room a va chhuak chiah tihin a naute chu an rawn tlan lut a. "Ehe, u, i lo harh tawh law.. Ih, motor an insu a, kan han en ve lawk alawm" an ti a. An thaw hliam hliam mai. 

"Eng motor nge a? " a lo ti a. 

"Truck leh Xenon an insu a, mahse, tumah thi an awm lo.. Xenon driver kha a na deuh a, mahse,  athi lo vang" Puia chuan a lo ti var a. A lo thaw huai mai. Thihna ringawt hriat hi a kham tawh reng reng. A intifai a, zanriah an ei zui ta nghal a. A zia chho viau. A khawsik pawh a awm leh ta rih lo. Khumah muin phone a khal pah a, mutchhuakin a rawn zem chiai chiai a. A muhil zui ta bawrh bawrh mai. 

Zan lai ar khuang thliai thliaiin a tiharh a, a zun a lo chhuak nasa mai a. A va zung a, bathroom atanga a chhuak leh chiah chu an in thlanglam tukverh thla engin a rawn chhun en ah chuan hlim thla a lo ding reng mai!  A ding châwih a! Ngaiah a nei hleithei lo a nih hi maw.. Chu hlim thla chu parda phenah a awm ni hian a hriat a, a che telh telh a. A rawn chhuak ta hlawl mai. 

Nu, kum 40-45 inkar bawr vel tur, hmai hriam lam lek lek, sam sei tak, vun ngo lam niin a dâng viau bawk. Amaha danglamna awm chu a huh hliam chu a ni. A chhip atanga a ke hmawr thlengin a huh hluam a, a kawr atangte chuan tui a far kauh kauh bawk. Azeli chu a rawn pan hnai a. A kalna hnu erawh a huh miah lo thung. Azeli chu a lo ding ran a. Sawi tur a haihchham tlat! 

"Min pui rawh" aw chher lam lek lek hian a ti ta a. 

"Engtin' a lo ti sap. 

"Tunah min pui rawh.. " a rawn ti leh ringawt. A ban var pap chu rawn lek chhuakin Azeli hmai bulah chuan a lek vá a, A lo tawlhhnung dâwrh. Mahse, a ban chu a fân ni maiin a hria, a thin zawnah a rawn khawih ta a. Azeli a rak thawt. A thim ta mup mai. 

A han men chuan a lo eng deuh iar tawh a. Rak noh noh thawm a hre zui. A inbengkang a, a han hawi chhuah nak chuan, Li pakhat bulah a lo thu reng mai. A ngaihna reng a hre hauh lo. A hawi kual a, a thlang lawkah chuan mi tam vak lo an lo awm laih mai. Chu lam pan chuan a chhuk chhet chhet a. Mi pali hi an lo thu bial laih a, an dinglama li lian vak loah chuan naupang pathum hi hlim em emin an lo cheng bârh bârh bawk. Puitling pali zinga hmeichhe pakhat chuan a rawn en a. Kha nu chiah kha a ni. Rawn tlawhtu ngei kha. A thawmhnaw hak pawh a danglam eih lo. Makti zetin a melh ta reng a. Chu nu bulah chuan mipa hmel fai ving veng, pa te lam deuh hian mau theiah sangha leh tumbu hi a lo thun mawlh mawlh bawk. A sir chiahah a hmeichhe hmuh aia nau hlek tur hmeichhia hian bahkhawr a lo chan malh malh thung, an piah lawka mei chhem mek patling erawh tlema upa lam deuh, hang lek lek a ni. An picnic a ni maithei. 

"Eng nge in tih? ' a han ti ngawt a. Tumah chuan an ngaihsak miah lo. A thusawi an hre thei lo anih a ring thiam. Zèl angin a awm a ni mahna. 

Rei mawi tawk chutia an chevel a thlir hnuah boruak chu a inlumlet a, khua pawh a tlai dâwrh mai. A tira a lo mutna bula li bulah bawk khan a lo awm leh tawh a. Li lam pan chuan Hmeichhe pahnihte kha an lo chho mek. An titi suam suam bawk. An ina rawn kal zawk kha in hlipin li thuk lo laiah chuan a va inchiah a, a inbual dawn a ni ngei ang. Pakhat zawk erawh vaukam hnaih hretah thuin eng emaw ni a sawi a, a nui har har thung. Chutia a en reng lai chuan vaukam hnaia thu zawk chu a tho nalh a, Li pawn langa a lu su mek, bungbu ût chu a va pan ta a. Vawi leh khatah li thuk lam hawi chuan a nam ta thut mai. Chu nu chu a rak tuar a, a pil nghal bâwrh. A rawn lang leh pawh chu a nem pil zel a, tui hleuh a thiam lo tij hriat takin a invai vak vak a, a mangang takzet tih a lang. Au a tum a, a pil nghal zel si. A taksa a zawi tawh hnu a pil thuk tawh hnuah chu hmeichhia nam thlatu zawk chu hlauhlawp hmel taka thlanglam hawiin, "U Muan, U Rami tuiah a tla.. Hmanhmawhin lo chho ru" tiin a au ta chul a. Azeli chuan kut humruhin a lo melh ngawt ngawt. Awmhmunah a lo thinrim ve hle. 

Muana a tih te chu an rawn tlan chho nghal a. Rang takin li-ah chuan an lut nghal. A taksa zawi vek tawh chu an rawn pawm chhuak ta a. Vaukamah nghatin theihtawpin thawktir an tum a, a kaah an fawp thul, eng a ang thei tlat lo. Namthlatunu lah mangan hmel tawkin a lo rak ve chhen bawk. An beidawng titih ta a. 

"U Muan, ka u chu a kal tawh. Hei a mar pawh ka hmu tawh lo. A va pawi tak em.. Ka û, min kalsan thei i la ni lo asin.. I pasal fanaute hi i ngaibtuah lo em ni? " tiin Namthlatu. Chu a tap ta hawm hawm a. A pasal ni ngei tur Muana tia a koh erawh a la beidawng duh lo nge a nupui taksa chu a sangbawl kual a, a sawi nawk nawk bawk. Mahse, che tur a awm tawh lo. A thi tawh. 

"Û,.. Harh teh.. Hei.. U.. Engtin nge i awm? " A lu-a sawi nawk nawktu avang chuan a meng kâwk a. A naute pahnihin thlabar hmel taka an rawn melh reng chu a hmu ta a. A thaw hawk. Chhuat laiah a lo mu reng chu niin. Ni e, kha thlarau khan a thih dan dik tak a kawhhmuh a nih ber kha.. 

"Ka tho â anih dawn hi.. Tiru, mu leh ang u. A la hma si" tiin a tho a, a lu a hai ru hle. Mahse, a naute tihmangan a hreh vangin a insangmar lui a, zangkhai thei ang berin a room lam a pan ta a. Mutthilh theih erawh a inring chiah tawh lo. 

A tukah a han inentir a, a thisen te lain test neuh neuh a nei a. A chau angreng hle. In a thlen veleh whatsapp lamah tun hnaiah tui tla an awm leh awm loh a zawt kual ta a. An rawn hre mai si lo. A tawp atawpah a beidawn tawh lamah a thiannu Zioni,  Tuikual ami chuan, "Kar hnih liamtaah khan tui tla chu an awm. Dinthar veng ami an nia. An picnic na lamah a tla a niawm e. Mahse, mediaah an puangzar lem lo va, chuvangin i hre lo aniang. An pa a khawngaihthlak tawp.. Ka nau te hi an va kal ve a" a rawn ti ta a. A thaw huai mai. Dik lo taka inthahna hi a hua. Kha thlarau rethei tak khan a duh vang ni miah loin a mah hmangaihtu leh amah la mamawh em emtu a pasal leh fate a kalsan a nia. A dikna chanvo chu a hmuhsak ngei tur a ni. 

Mahse, a taksa lam chiankuan loh vangin a ngaihtuah vak duh rih lo. Tin, thlarau khan a la rawn tlawh leh maithei bawk. A lo nghak deuh chawt a ni ber e. Zanriah chu a ei lui hram. A naute chuan an ngaihtuah ru hle tih a hre reng, chuvang chuan na anga lan a tum lo lui ve tang tang. 

Zing dar 1 a ri chiah tihin an kawngkhar chu a ri ta rek rek a. A ngaithla kar. A hlau tawh miah lo. A lo ngaichang deuh tawp. Rei vak loah a room kawng chu a rawn inhawng ta a. A hma ang bawka huh hliam khan a rawn lut leh ta. A hmel chu khawngaih duhtu tan chuan rapawm aiin khawngaihthla a la zawk. Azeli pawn a lainat takzet. A khum mawngah chuan a ding a. A mittui te chu a tla niin a hria. 

"Hun ka nei tam tawh lo va, he khawvelah hian ka cham rei ta. Ka thusawi hi khawngaihin ngun takin min lo ngaithlaksak la, ka pasal leh ka fate sawn thudik an hriat ngei ka duh a ni. 

Kei hi Lalrinfeli ka ni a. Feli tiin min ko thin. Falkawn khua saw kan nia, kan pa nen hian kum 2 kan inzui hnuah kan innei a. Kan pa hi a pa fabik a ni a, a nuhrawn fate nen an inngeih vak loh vangin kan inneih atanga thla 3naah kan indang a. Kan pa hian sawrkar hna a thawk ve a. Kan khawsak a hrehawm lem loh. Keipawh awm mai mai ka duh bik loh vangin kuhva te siamin sahdah te ka nuai ve thin a, a rei hnuah phei chuan ka thawh hlawh chu in chhungkhur mamawh atan kan hmang a, kan pa hlawh chu bank-ah kan dah hmak hmak zel tawh a ni. Fa hi pathum kan nei a. A kum zawn deuhthawin an piang a, kan chhangchhiat zual lai chuan buai thei tak kan ni. Kan pa hi a fel em zawk a, engkimah min puibawm a, nu dang ai chuan ka awlthawng zawk. Tichuan, kan fa u ber pawh tunah chuan pawl 8 lai a lo zir ve thei ta a. Kan pa nen hian kan innei hmain kan la naupang dun naa kan inhmangaih tawp ti mai ang. Inhauh leh inhnial chang nei mah ila, inthen duhna rilru kan pu ngai lo. Kan inngai telh telh ni maiin ka hria. 

A tawi zawngin sawi ila, nikum May thlaah khan Ka nu nau fanu Mamit ami hi puanthui zirin a rawn awm ve a. Siami a ni a, a felin ka zangkhai phah khawp mai. Ka fate nen pawh an inngaina khawp. Ani hi a nulat chhuah hnuah an ru ve zuai tawh a, mahse, a mipa lam ten an duh loh vangin an innei ta lo. Fa an nei hman lo bawk a, nula lenin a leng chho ve leh a, mi biangbiak thiam tak, hlim thei tak a ni. A mawng a zangin a kut a lo themthiam lehzel a, kan chhungkaw tan tangkai tak a ni. 

Christmas pawh kan bulah a hmang ve zel a. Dik tak chuan an khawsak a harsa ve a, kan bula awm chu a tan pawh a nuam zawkin ka ring. Puanthui pawh a thiam thawkhat ta bawk a, dawrah a thawk ve ta nghe nghe a. Kan pa nen a office kal tur hi an inphur chhuak thin. Bialpa te pawh a nei chho ve a, mahse, a bialpa chu mi pasal a ni tlat!  Vawi khat a bialpa nupui leh an thenawmnu an lo leng a. Tah khan mi pasal a ngaizawng tih ka hre chiah. An pangngai khawp a, "Kan pa pawh a dik bik lo, ama thiam loh hmasa zawk ania, mahse, nang chu hmabak la ngah zawk leh eng zawk nei i ni a. Khawngaih takin kan pa hi lo kiansan hram zawk teh.. Keini lawm pawn theihtawp kan chhuah ang a" an lo ti a. Ka zak angreng khawp mai. Chumi tum chuan Muana pawn a kamkhat nghe nghe. Ani pawh chuan a sim tur thu a sawi a. Kan awih sak mai. 

Tichuan, kan awmho chho zel a, a chhan sawi fak tur awm si lo hian kan pa chuan min rinhlelh a ching chho riau mai a. Ka phone te a han check leh uaih thin, engmah a hmu ngai azeng pawh ni si lo. A ngaihna ka hre lo thin khawp mai. Zan khat chu a rawn rui haw ta tlat!  Meizial bak zuk leh hmuam pawh ti ngai lo kha a nia. Ka thinrim kher mai. 

Muthmunah ka hau hrep a, "I awmdan hian min tingaihtha lo alawm. Ka hnathawh hlan te hian inleng i lo nei thin a ni lawm ni? Chuan, i bialpa hlui pawn a rawn biak che kha" a ti ta a. Ka phu chiang hle. A chhuah hlan hian inleng nei hmanin ka khawsa ngai meuh lo. Sahdah ka nuai loh pawn kuhva ka siam a, mawng ka hung hman meuh lo, tupawh lo leng se tha takin ka kawm hman meuh lo, ka sahdah leh kuhva sem chhuah a ngai thin bawk nen. Tin, ka bialpa hlui nia a sawi Rema chuan fbah min lo be ngei mai a. Mahse, an nu dam loh thu vel bak a sawi lo. Kan inhaw lo va, thian tha tak angin kan inbia. 

"Tu nge sawi a? " ka ti ve ta ngat a

"Hei en la.. Min rawn hrilh zel alawm.. " tiin a phone a phawrh a. Number ka hriat ngai loh hian, "I chhuak chiah tih khan tlangval pakhat chu a lut zauh mai. Hei a lo la chhuak leh lo" tih angreng vel hi a lo khat dul mai a. Mak ka ti nasa mai. Ka call nghal a, a tlang lo chiang. Tha takin kan pa chu ka hrilhfiah a, Rema nen kan inbiak dan pawh ka hmuhtir vek. "Biak i remtih loh chuan biak luih ka duh hleinem" tiin a ngaihthat nan Rema pawh chu ka block ta daih. Chu number chu tu ta nge tih zawn chhuah ngei ka tum thu ka hrilh bawk a. A ngaih a tha ve ta nge lungawi tak chuan kan mu leh ta phawt a. 

Mahse, mak deuhin kha number kha khami zan atang khan a in off ta char char, a chhia nge eng nge ka hre lo. Zawn chhuah dan chu a awm tho anga, mahse, kan pain, "A ngai lo ve ka ring tawk che alawm.. Ka ringhlel tawh lo vang" a tih vangin zawn chhuah ka tum buai ta lo. Tun hnu hian Siami thiltih vek anih ka ringhlel ta lo. 

Zan khat chu Siami a lo la haw lo va, a lo haw tlai zeuh zeuh avangin chaw pawh kan eisan a. Zanriah kan ei kham hnu lawkah Muana chu a lo call a, "Min lo hruai mai teh.. Hei ka thiante hi an rui lutuk a, min thlah tur pawh an awm lo" a rawn ti a. Muana chuan a va hruai ta a. An rei tak viau vangin ka ngaih a tha lo ta tlat!  Thil ka ngaibtuah vak vak a, Siami awmdan leh Muana a biak thiamzia te.. Ka inngaihtuah thinrim a ni ber mai. Dar 10 dawnah an lo haw ta a. Ka lo be duh miah lo. Siami chu a rui tih a lang reng mai. A hmel phelh phang leh Muana hmel pawr fap te chuan ka rinhlelhna a tizual a. Ka mu tau daih. 

Muana chu a rawn mu ve a, a ti dui ni ten ka hria a, ka ringhlel telh telh. "Eng em em nge in va tih a? " ka lo ti hlar a. 

"A sawina hmunah khan ka va kal a, an lo awm si lo va, ka kal kual leh hrep alawm.. Sawi lo mai teh. Ka thinrimzia hi. An lo rui chhaw hlawm a, amah Siami lah lo rui bawk. A bialpa mi pasal nen khan an lo la inzui renh alawm le.. Chu chu nia ka thinrim em em" a ti ta a. Ka thaw deuh huai mai. Mahse, Siami chu ka hmumawh ta riau. Ka tilang duh lo naa ka mitmei ru ta reng a. Eng em em mah chu ka hmu chhuak chuang lo. 

Tichuan, kar hnih liamta khan picnic ang u tiin kan inrawt phur a. Kan pa thianpa Pu Sawma a lo tel ve bawk. Ka fate lah an lo phur bawk. Hlim takin hun kan zuk hmang a. Mahse, i hmuh tawh ang khan ka nau Siami ngei chuan tuiah min namthlain min that a nih kha.. A duh dan ang ngeiin kan pa khawhar lai denchhenin tunah te hian a hnem kual a, pawisawi lo leh ka thihna chu tuar ber ang hrimin a awm thiam a. Kan pa lah a rilru a buai a, engmah a ngaihtuah thei si lo. Ka fate pawh a ngaihsak hleithei lo a ni ber. 

Tisawn a awmpui zui zel anga, thla hnih khat a liam leh meuh chuan kan pa saw a hneh dawn. Kan pa chhungte leh ka chhungte lam lahin engmah hrethiam ve hek lo, fiamthu titakin, "Feli mitmu te han keh se, unau an ni tho bawk a, Siami hian a hnial loh chuan innei zui mai se, a unaunu fate chu a hmangaih dawn si a, Muana lah a khua a harin a tuar si a, kawng dik lo te a zawh phah reu reu ang" an ti chhen lehnghal a. Ka thihna kar 3 èm pawh a liam hmain chutiang thu chu an sawi ania. An mak chu ka ti ve, mahse, hriatthiamna erawh ka nei. Kan fate an la naupang a, nu ngai rual leh mamawh ngawih ngawih an ni a. Siami lah kan hnena cheng reng sa, ka fate pawn an ngainat em em sa a lo ni si, amah lah a intifel thiamin a mawng a zang si a. An lung a dum hle a ni mahna, ka pasal leh fate an hmangaih vang mah nise, ka nunna la tu kher saw chuan ka fate a enkawl ka phal thei thlawt lo a ni" Rinfeli chuan hnukul teuhin a ti ta dap dap a. Azeli a lo insehruh ve teuh. Siami chu awmhmunah a lo haw ve em em tawp mai a ni. 

A taksa la chak lo chung chungin nawrtu a nasa deuh nge a tukah Dinthar lam a pan ta vang vang mai. Chawlh a la rih bawk a, a hna lam chu a ngaihven rih lem lo. Rinfeli te in chu a thleng a, Siami ngei mai chuan a lo hmachhawn ran mai. Muana erawh a hnaah a kal a, naupangho pawh school an kal. Feli chhungte lam an lo awm nial a. Han sawi dawt chi nia a hriat loh vangin Feli thiannu a nih thu leh a rawn ral ve thu a sawi a. Siami zawk hian a lo hre sa tawh ang tih a hlau viau. Muana te office lama a kal lo chu pawi a ti leh hnuhnawh. Mahse, rei a awm hmain Muana pawh a lo haw ve ta a. Tuna a tih loh chuan a rei zel anga a buai chho zel ang tih a hlau si.. 

"Pu Muan, khawngaihin U Feli nu leh pate nen khan ka be fal lawk thei che u ang em? " a ti ta tawp a. An hawi phawk deuh naa Muana te nupa room lamah chuan an lut phei ta diak a. Siami chiai hmel chu a hmu hram. 

"Tu nge ka nih in hria em? Min han en vang vang ula" tiin bul a han tan ta phawt a. An han en vang vang a, Muana zawk chuan mitmeng buai tak hian, "Ih, thlarau hmu thei kha i ni em? Aw i ni chiang.. Feli i hmu tiraw.. Eng nge a sawi? " a ti ta sek sek a. Azeli a lo hrihhai lek lek zawk. 

Muangchangin Feli a hmuh dan leh a thih dan te chu a sawi ta mial mial a. Feli nu lo chek leh hlak thin tih mai loh chu thawm dang reng a awm lo. 

"U Feli hian a dikna chanvo a hmu ngei tur a ni. U Muana chhungte nen sawi ho ula.. In duh danin chet in la mai dawn nia" a tih mek lai chuan, Muana te fa naupang ber hmeichhia a rawn tlan lut a, "Apa, Anuteii a haw daih.. " a rawn ti ta a. An ding rual thawt hlawm. Rang takin an va chhuak a, Khatia rooma an luh ho hnu lawkah khan Siami chuan a thawmhnaw siam nghaln lo awm ve te bulah chuan, "Ka nuin min lo bia a, ka pain accident a tawk a niawm e. Ka hawn vat a ngai.. " a lo ti a. A chhuak zui daih a niawm e. 

Rinfeli pa chuan, "Buichhia laih lohin a inpuang a nih ber hi a.. A va pawi em.. Ka fanu chu ka va lainat tak em aw.. Muana, engtin nge chet lak i tum le? Min vengthawng reng reng suh. Kan chhungte mah nise, i nupui hi kan fanu a ni tih hrereng ang che" a ti ta thlup a. 

Muana erawh a melh ngai melhin a mittui tling piau chu a khap per sak sak a. 

"Kan zawngchhenu vangin ka nupui ka chân a maw? Phuba ka la khawp ang. Ka pu, i fanu thattu chuan jail tan a phu lo, thih chiah a phu' tij leh tlan chhuah a rual nghal. An umzui ta vat hlawm a. 

Azeli pawh a tihtur a tizo ta bawk a. A haw nal nal. A tuka a thu hriat erawh chuan a tinuam ta deuh. Siami chu manin, dawp em em pawh ngai lo vin a inpuang nghal a niawm e. Jail runthimah a damchhung hun hmang tura tirhliam a ni ta a ni. Muana erawh engtin nge a hringnun chu a hman zel ang tih chu chunglamin a hria  ang chu.. 

" Dikna hi ngawi rengin tlawm angin lang thin mah se, hun hian dikna dikzia a puangzar leh thin.. Dik leh rinawm takin i nun hmang la, i tan hlauh tur a awm lo ve"