Thlarau Thuchah

THLARAU THUCHAH.. (8)

Ziaktu : Toni Râlte

"Azel, awii enteh, nizanah kan veng nula a inawkhlum a, nang hi a thlarau te hi i lo hmu leh mial lo maw? A inawhhlum chhan hi ka hre chák e" a thiannu ti ila a thawhpui Lindai chuan a ti sar sar a. An tawng ri hre pha, Nu Rami a lo khi sak. 

"Ringawt a che. Hmu mai mai lo.. " Azeli chuan a lo ti hluk a. Lindai chuan khi deuh tha chungin, "Amah chu Sawmi a nia, kum 23 lek mawle, a hmel chhe lo sia, a nulian bawk si. Bialpa nghet fel deuh a nei bawk nen, a intihlum ringawt hi mak ka ti em a ni" a ti leh a. 

"A va pawi ve. A mak e, ti nge thih hi an duh tlat zel le.. Miin dam duhin kan insengso táwk tâwk a.. A zia lo e" Azeli chuan a lo ti ve a. A ngaihdan dik tak pawh a ni. Mahse, mi nun a va hriatthiampui vek bik lo va, an nun a lo beidawng viau pawh a ni thei. A buaina tur pawh a ni lo ve. Thil dang a ngaihtuah ta daih a. 

Tlai banah chawhmeh a lei kawi leh a, ruah a tla leh siar siar mai. Hmanhmawh deuhin bus-ah a tlan lut a. Seat awl a lo awm tawh lo lehnghal. A hnung ber seat bula pipe chu vuanin bawr deuhin a ding a. Hmalam a va hawi chuan, Driver thutna hnung chiaha  hnunglam hawi zawnga lo ding chu a va nuih sak a. Ani erawh a nui ve miah lo. Ngui zet hian a rawn melh ta reng a. Azeli chuan mak a ti deuh. Conductor chuan fare a khawn a, Azeli chuan a en reng, a mi hmuh erawh a khawn ve miah lo tih a hre thei. Chutah chuan thil dik lo a thleng tih a hrethiam ta. A hamhaih ve tlat!  A rang teh phut lutuk. A ni thei lo.. 

Rem leh rem lo vin a phone a phawrh a. Number pakhat a hmet chhuak a, a call nghal. Switch off!  Nu Rami number a hmet chhuak leh. Rei fe hnuah a rawn pick up chauh. 

"Nu Ram, Lindai chanchin i hria em? " a ti nghal tâwng a. 

"Hre nang.. Ti nge?" A lo ti hû!  Conductorin a rawn dinchilh tawh bawk si, pawisa a phawrh leh rih. Lindai te vengah hriat a nei der bawk si lo. Hmalam a va hawi leh a, Lindai chu a lo awm tawh lo. A va mak em! 

A chhukna tur hmun an thlen chuan a chhuk vat a. An in a pan nghal. A ngaihtiahna erawh kal ding ngat ngat tak a ni. Tu emaw nen an insu chawrh zui!  A harh zawk. Ngaihdam te an indil hnuah tha tak chuan an inkalsan ve leh thei mai. In a thleng a, a nauten eirawng an lo bawl a. Roomah lutin khumah a thu hnawk. Vawiina bus-a a mi hmuh kha Lindai a ni tin a hrechiang khawp mai. Conductorin fare a khawn kân atang khan Lindai chu thlarau a ni tih a hrethiam chiah. Tin, a hmel ngui leh dáng lèp te kha.. A hmai a hup a, a khur deuh. Inkawmngeih tak chu an ni hran lo, mahse, office-ah a rualpui awmchhun a ni a. An thu a rual dun bik.. Engvangin nge a thih? An ban khan Lindai chu a scooty-in a haw nghal a. A chesual tihna em ni ang?  An ban leh Bus-a a chuan inkar kha darkar hnih vel chu a ni maithei. Chawhmeh a lei kawi chhung kha a rei ve deuh nen. Chumi chhung lek chuan Lindai chu a lo thi hman tihna em ni ang?  

Inbual turin bathroomah a lut ta a. A awm a nuam thei meuh lo. Hlauhna mak takin a tuam reng mai. Ni e, thlarau dang te chu a la hmuh leh hriat ngai lohte an ni a. Hlauh nachang vak a hre ngai lo a nih kha.. Lindai erawh a hrechiang ngang si. A inbual laia a phone ri ral ral chu a hre reng. Tu tak ni ang maw.. 

A inbual zawha a phone a en chuan Nu Rami a lo ni a. A call back nghal. 

"Aw i la leh thei si lo va, enteh, Lindai a boral?! A mak ka ti em mai.. " a rawn ti nghal bawrh bawrh a. A lo hriat lawk sa anih vangin a thawng lutuk lo. 

"Engtia thi nge? " a ti nghal a. 

"An in a thleng, a inbual tur bathrooma a lut kha.. A inawkhlum ringawt a niawm e.. " a ti nia!  Azeli a phu chiang kher mai. A theih hlawl loh. Darkar hnih chhungin chutianh a ti hman dawn em ni? Mahse, An office leh Azeli te veng a inhlat loh dan a ngaihtuah chuan a theih ang tih a ring thiam. Mahse, engvangin?  An veng nula inawkhlum pawh mak tia sawi rengtu kha a inawkhlum ve ringawt a maw? A chhan tha tak zawng a awm ngei tur a ni. 

Azeli chaw ei pawh chu a tui lem lo hle anih hmel. A ei tlem kher mai. Zanriah ei khamah a insiam nghal a. A thawhpui la valai deuhte nen va kal ve an tum a ni. A tah te chu a chhuak ut ut mai. Mak tihna hlira a khah avangin tun tum zet chu Lindai thlarau hmuh ngei ngei a duh tlat. A chhan a hriat a tul. A insiam zo hma viau. An in chhak kawngpuiah a thiante a lo nghak dawn a ni. Rei a nghah hmain an lo thleng a. Ngawi rengin Lindai te veng lam chu an pan nghal. 

Nu leh pa zawk an lo awm nual a. Thalai lam chu zan rei lamah an lo lang dawn ani mahna. A nu leh a  unaute chu an tap rawng rawng a. Azeli ngei pawn Lindai biang zuk chulin zawitein, "Linda, a va mak em.. Ka ring thei lo.. Min lo tlawh hram teh" a ti sap a. A mittui a hru fap fap mai. Ruang chu an han kil ve ren rawn a, mahse, chhungkhat an ngah bawk a, an insaseng leh thuai. 

Zai loh karah Lindai pa chu meng sen rûm chungin a lo ding chhuak ta a. 

"Hei le, zaninah kan chunga thleng tura kan rin leh besei phak loh chu kan tawng ta tlat mai si a. Thenrualte pawh inzahawmin, rilru a na vawng vawng mai. Kan fanu hi mi tha famkim a ni ka ti hauh lo, mahse, ama tawka nula fel leh hminghliauna nei ngai lo, kan thu awih em em thin a ni. Tuna a nunna a la ta mai hi keini a chhungte ngei pawh hian a chhan tur awm ang kan dap ngial pawhin kan hre thei lo a ni. Office bang a lo haw a, ni dang aia a danglamna kan hre lem lo kan lo chîk lem lo bawk a. A roomah lutin ngawi rengin a inthlak a. A reh vang vang danah a inbual anih kan ring a. Chutihlai tak chuan a phone cover chah a lo thleng a, a chah ang kha a ni ngei em tih hriat kan duh vangin anu hi a roomah lutin bathroom chu a va kik a, a lo chhang mai si lo. Rei fe a koh hnuah pawh a rawn chhan mai loh vangin a nu ngaihtha lo hian min rawn pun a. Kei pawn ka ko vak vak. Chutah kawngka kan tichhe ta a. A lo inkhai ringawt tawp mai a ni. A hrilhhai thlak duh khawp mai mahse, a thihna. ala rei lo tih a hriat. A la zawi nen danah khan.. Chhan hman tumin theihtawp kan chhuah a, mahse, kan chhan hman ta ngang lo a ni. A pawiin a runthlak takzet.. " tiin Lindai ruang an hmuh dan chu hnukulh teuhin a sawi a. Thalai lama tuidul zual chuan mittui an hru fap fap mai. 

Zan hmasa maiah an veng chhungah tho Nula la naupang tak a lo inawkhlum tawh bawk. A mak bakah a rapthlak tel tlat. Zai lah chuan a nuam phian a. Azeli pawh maimichhing chungin a zai hliam hliam mai. A rilru erawh a vak thui nasa. Lindai hian bialpa a neih awm a hre miah lo va. Nei pawh nise a hrilh kher a rinawm loh ve bawk a. Ngaihzawng vang a nih chu a ring chiah lo. 

Nu Rami'n an kal ho na kawnga a sawi, "Chawhnu dar 2 bawr vel atang khan a chezia kha ngaihbelh theih tur chuan a buai tlatin ka hria. A phone kha a bih ngawt ngawt a, a thaw leh hawk zel a. Kan ban pawh khan a haw hmanhmawh hle anih kha.. Ni dangah te chuan canteenah te a tawi khawmuang ve ziah sia.. Eng emaw tak zawng a awm chiang" a tih te kha a ngaihtuah zui a. Buaina eng emaw tak chu a tawk a ni ngei ang. Mahse, a rang mah mah a ni. A buaina hi a lianinna ril hle pawh a ni mahna le.. 

Khawvar dawn hnaihah a muthlu ve sek a, a mumangah Linda leh hmeichhe pakhat hmel tha leh lian ziai zuai hi Linda te inah chuan an lo inzui lut a. Linda ruang chu kil vein, ngawi rengin an thu ve ngawt ngawt mai a. Chutia an thut reng lai chuan mipa pakhat pavalai aia upa hlek tur hi a rawn lut ve hlawl mai a. Chu pa an hmuh rual chuan Lindai te chu hmanhmawh takin an chhuak zui leh daih.. Chu pa rawn lut chuan Azeli chu rawn enin, a phun sup a. Eng nge a sawi erawh a hre lo. A harh zui ta nghal a. An lo la zai tleng tleng mai. Inthiam lo ru deuhin a zai zui ve leh nghal a. A mumang erawh chuan awmzia a neih a ring tlat thung. Kha pa khan pawimawhna a nei ngei ang, tin, Linda ruala tel ve nula pawh khan. 

Khua a var zui a, an niho pawh chu intifai ve phawt turin an haw leh ta phawt. Chhunah an va lang ve leh a, Azeli chu a chau angreng. Khawsikin a tham er er lehnghal. Thla te an lakpui zawhah an haw zui ta mai. In a thlen chuan nachhawkna a hmawm nghal a, vawt em em lo mah se, tuilumin a inbual a. A mu zui ta thèn mai. Eirawngbawl hi chu a naute an awm hi chuan an bawl mai zel bawk a. An hrethiam turah a ngai. A muhil nghal bawrh bawrh a. A naute school bang thawmin a tiharh a. A intiharh lui a, a tho chhuak ve ta nghal a. Zanriah ei khamah khumah phone khalin a mu mai mai. A khawsik pawh a ziaawm ta deuh. Groupah Lindai chungchang an sawi nak nak a, sawi tur erawh a hre ve lem lo. 

Pu Tluanga chuan, "Azel, Lo inring deuh rawh. A rawn tlawh che ka ring tlat" a rawn ti a. Smiley a va dah tuar ringawt. Nia, amah pawn a ring, Lindai thih chhan chu amah ngei pawn hriat ve a chak. Mahse, hlauhna erawh a nei tho. A naute an mu fel tihin a hmai a va phih a. A ha te nawtin mu turin a inpuahchah zui ve nghal. A tui bottle a lo ruah tawh vangin thun turin a chhuak leh a. A rooma a va luh leh chiah chuan Linda a awm ve tih a hre ta a. 

Khumah chuan rizaia inkhuh vek siin mu an awm tih a hai lo. Mihring ruangam a ni tlat. A va hai hawng ngam teuh si lo. Bakah a naute a tithlabar ang tih a hlau bawk. Chu ruangam chu a che telh telh a, a rawn inhai hawng ta hlawl mai. Lindai ngei mai chu.. A dam laia a hmel ang chiah pu khan a rawn thu chhuak ta a. Azeli chu a melh kal mai. A râp lek lek,. A ding khawng reng ringawt mai. 

"Lo thu teh" ring lo te hian Lindai chuan a ti ta a. Azeli pawh intihuaisen luiin a thu ve a. 

"Min hlau suh. Engtinmah ka ti dawn lo che. Thil pakhat chiah min tihsak la ka duh a ni.." A ti ta a. 

Azeli chuan zawite hian, "Ka naute an la muhil lo maithei a. Ka tawng ring ngam lo. I duh leh heta i lo kal chhan zawng zawng sawi la.. Ka lo ngaithla ang" a ti ve ta a. Lindai chu a rum hawk.  A hmel landan chu a danglam tial tial a. Thinrimna te, pawi tihna te chu a hmel hmaiah a inlar zut zut mai. A tawpa tawpah chuan.. 

"Ih maw.. Azel, mihringte hi kan lan dan ang ngawt kan nih lohzia chu ka han sawi anga i hrethiam mai ang. Kei hi nula fel leh rualpawl thiam tak, nulat tlangvalna kawnga hminghliauna nei lo, Kohhran leh khawtlangah pawh a langsar chin niin min hre vek. Ni e, ka nihna vek an ni. Mahse, heng ka nihna phèna ka chhungril nun tenawmzia hi tuman an hre lo. Nangni ka thawhpuite ngei pawh hian in hre lo. Mahse, ka tenawm tlat si a. 

Hna ka hmuh hma khan ka rilru hi a mangang thin, chhungkaw khawsa thei tak kan ni bik lo tih chu i hriat kha. Ka nu lah a hrisel lo em em bawk si. Hna ka hmu mai tjei bawk si lo. Chutia rilru baihvai taka ka awm lai chuan, mi pakhat hian fbah min lo be hlawl mai a. Sumdawnna hlawk deuh a hriat thu leh ka thawh duh leh duh loh min zawt a. Kei pawisa mamawh ta reng reng chuan hriatchian ka lo chak nasa mai a. Number te inpein whatsapp ah kan sawi dun ta a. Chu pa chu Aizawl pa hausa ve thawkhat tak, sumdawnna changtlung tak nei a ni. A hming chu Pu Lawmsanga a ni. Nang pawn tikhan i hre thei mai ang chu.. 

A sumdawnna lamah hna min pe dawn anih ringin hawihawm takin ka be ve zel a. Mahse, a duh chu thil dang daih a lo ni. A sawi dan chuan, i hmel lang lo vin i taksa hnuailam kha saruakin a thla i la anga, chu chu website pakhatah kan dah ang a, i rin aia tam hlawh i nei ang. Hnamdang ka thawhpui a, nula tam tak chuan sum hmuh nan an hmang mek a ni tiin. Mak ka ti khawp mai. A tirah phei chuan chutiang ti ve mai duh tura min hmu chu ka lawm lo khawp mai a. Ka hau ta hrep nghe nghe. 

Mahse, chumi karah chuan ka û hi a hnathawhnaah a chesual palh a, a ke a tliak a, sum neih loh nak alaiin hmanna tur kan neih belh leh ta si. Ka pa mangang hmel ka hmuh chuan ka rilru a na em em a. Pu Lawmsanga ka hre chhuak ta nghal. Eng nge mawni le.. Kan hmel pawh a lang dawn chuang lo va, tuman min hre dawn chuang lo tiin sumdawnna chu ka pawmsak ta a. A vawi khat nan bathroomah lutin ka inphelh ruak vek a. Ka hmai cut in ka thla chu ka la ta a. Ka thawn ta a ni. Ka thawn tukah ka accountah pawisa cheng 5000 a lo lut nghal. Ka lawm rualin ka rilru erawh a nuam thei meuh lo. Ka u pawh chu ka sum hmuh hmang chuan kan enkawl a. Ka pa te bulah chuan Ka thiannu in online shopping a ti ve a, ka zawrhsak a, hlawh min pe ka ti mai a. Min zawt chîk lem lo. 

5000 ringawt chu a zo ta thuai a. Pu Lawmsanga duh dan positionin thla chu ka la leh ta a. Ing euh deuh deuh ten lak a ngaih chang a awm a. Ka zei hawi lo nasa si a, ka buai thin khawp mai. Pawisa ka hmuh nghal zel vangin ka zawng chhang a ni ber mai. A hnuah phei chuan ka serh ngei mai khal kuala video-a cover turin min ti ta a. Chu zet erawh harsa ka ti ngang mai. Mahse,  amak lutuk setana hian a pui a nih ka ring. Chutia nawr ka nih mek lai chuan ka pa lung tha lo a lo chhuak leh ta tlat. Nikhaw hre loin a awm nghe nghe a, a rang a rnagin kan inphur chho a, a dinhmun a tha ta lo khawp mai. Ti lo thei lo dinhmunah ka ding a nih ber chu.. Tichuan, video chu ka thawn ta a. 15000 ka dawng.. Ka pa enkawl nan ka hmang fai vek. 

Kan chhungkua kan dam kim hnuah pawh sumdawnna chu kan la ti dun ta zel a. A rei a. Ka ngam sang ve tial tial bawk. Ka hna ka hmuh hma lawk hian Pu Lawmsanga chuan inhmuh a rawt ta a. Kan inhmu ta a. Kha chen thlalak leh video bawlhhlawh tak tak inthawn tawh kan ni bawk a, pawisak kan nei zo ta lo. Ani chu Ka Sugar Daddy a ni chho ta a ni. Sumah ka buai ta ngai lo. Mahse, min mamawh hun apiangin min mutpui ta thin a. Tuman engmah an hre lo niin ka ngai. Kan khawsak pawh keimah vangin a kang chho ve tan a. Kan in te pawh ka chei chho ve zel a, hna ka hmu zui ta bawk nen. Kan khawsak a nuam ve ta khawp mai. Mahse, hna ka hmuh hnuah pawh Pu Lawmsanga nen chuan kan la indawr tawn ta zel a ni. 

Kei chauh min dawr emaw ka tih laiin kan veng nula hmel tha leh duhawm tak, Sawmi nen an lo indawr ve tlat tih ka hriat chuan ka thinrim em em a. Ka rilru a na bawk. A chhan chu keimah ang maia dinhmun laklawh taka dintir kha ka duh lo a ni. Bialpa nghet a nei bawk si. Ka thik vang ni miah lo vin a hmalam hun ka ngaihtuah vang zawkin bansan se ka duh a. Pu Lawmsanga pawh ka hrilh nghe nghe. Mahse, kei aimahin a hmel that bakah a zei a. A kaltir phal teuh lo mai. Tichuan, remchang ka zawng ta a. 

Pu Lawmsanga nen an mu dun lai video chu ka nei thei ta a. Chumi hmang chuan ka vau ta a ni. "I hna hi a tlai hma ngeia i bansan loh chuan he video hi ka thehdarh ang" tiin. Ka rin loh deuhin thil a kal ta a. Pawi hi ka va ti tak em.. Sawmi mangang chuan thih a lo thlang ta tlat mai. Tichuan, a inawkhlum ta a.. Ka thiltih pawizia ka hriat chuan ka tlai tawh si. I la hria ang, niminah pawh a thlarauin a rawn tlawh leh tlawh loh che ka zawh nghe nghe che kha… ka mangang em a ni. Ka hlau bawk. 

Sawmi thih chhan kha Pu Lawmsanga chuan a lo man thiam ta tlat a. Amah Sawmi khan video kha a lo va thawn ve bawk nen.. Kei chu min haw ta a. Ka video a kawl hnem ropui si. Amah ngeiin min nawr vanga a hmaa saruak ngal ngata ka inkhalh kualna ngei mai, ka hmel lan chianna em em chu min lo thawnin.. 

"I nau tleirawl ngei mai kha ka tan i hlan ve anih loh chuan, he video hian zoram khawvel a dengchhuak ang. Kei hi chu min khing buai duh suh. Ka sumdawnna hi tuman an hre lo va, fiahna an nei thei bawk lo vang. Mualpho tur chu nangmah chiah.. I nau chu ka duh. Nang chu ka mamawh tawh lo che.. Zaninah i nau i rawn hruai ngei tur a ni" tiin min vau ta a. Ka puakkeh a ni ber e. Ka lo mawl luatah ka tuhrah ka seng ta a nih ber chu. 

Keipawh tih tawh nak alaia ka nau lehzel in a tuar tel Tur chu ka ngaingam ta ngang lo va. Ka theih loh thu ka hrilh ta a. Ani chuan Ka video chu ni 2  hnua a darh tur thu a sawi ta a ni. Chu video chu a darh chuan tupawn ka inawhhlum chhanah an ngai anga, ka chhungte an zak anga, an mualpho bawk ang. Chu vang chuan khawngaihin Pu Lawmsanga chu min va hmuhsak la.. Video kha thehdarh lo hram turin min va ngensak hram teh.. " Lindai manganzia chu a aw rawl atang pawn a hriat. Azeli pawh a mittui a tling pam mai. 

A tukah Pu Lawmsanga chu a va hmu ta a. Tar hur a nih rin ngaihna a awm lo. Pa fel duam, tawng nem duam mai, biak nuam tak a ni. A nunrawng hle tho si a. 

Azeli chuan Lindai chungchang chu pehhel buai lo vin a sawi ta mial mial a. A tawpah, "I thehdarhsak anih chuan thuhretuah la tang hreh dawn lo va, i mualpho tel ve dawn tih hria la, ka thiannu tan theihtawp ka chhuah ang" a ti a. 

Pu Lawmsanga chuan mitmeng buai zet hian, "Thlarau thusawi ka ring hrep lo ve" a ti hluk a. 

"I ring lo anih chuan ti rawh. I duh duh ti rawh. Mahse, i tla chhia ang. Tuma hriat loha he thil hi chinfel. Theih a nih reng laia i tilui anih chuan.. I hming thatna leh i sumdawnna, i engkim hi i chân ve ang. Chu chu ka ti ngei ang" Azeli chuan a ti ve tlat. A tumruh hle bawk. Pu Lawmsanga pawh chuan, "Ka vau satliah mai mai alawm.. A thi tih ka hriat khan tih duhna rilru ka pu tawh lo hrim hrim.. Thlamuang deuhin awm rawh" a ti ta a. 

Azeli chuan a chhuahsan dawnin, "Chuan enhvanga mantir lo che nge ka nih tih hi i lo inzawt anih chuan, Mitthi khin a harsat lohzia lam ai mahin ka thiannu thi tawh tihmualphoa a chhungte zak taka siam kher hi tula ka hriat loh vang a ni. Chu chu Linda duh dan pawh a ni bawk.. Mahse, hei hi hre reng rawh. Hmeichhe rethei leh baihvai hmang tangkaia sumdawnna tenawm leh i nawmsip bawlna kha i bansan lo anih chuan.. I tlakchhiat hun a la thleng ngei ang. Lo inngaihtuah ang che" a ti ta fak fak a. A chhuak zui nghal. 

"Linda, ti nge kan mantir mai loh.. Saw ti sawn zalen takin tihsual nei miah lo angin a la leng vel si a" tiin a mang lama Linda lo inlar bulah chuan a ti sar sar a. 

Linda chuan tlema hlim hmel pu deuh chung hian, "Lungngai suh. A chetsual hun a la awm dawn alawm.. Keimah anga hmeichhe derthawng ni lo hmeichhe chak leh huaisen tak a la hmachhawn em em ang.. " a ti a. 

Ni e, vawiin thlengin Lindai inawhhlum chhan chu Azeli leh Pu Lawmsanga tih chauh lo chuan an hre ta lo. 

"Sum leh pai ngah hi hausakna a ni lo va, chantawka lungawia mahni neih tawka lungawi thiam mite tluka mi hausa an awm lo ve.. "