Thlarau Thuchah

THLARAU THUCHAH (7)

Ziaktu : Toni Râlte

Pu Zomuana chu in chhung dungah chuan a tei sek a, a chal chuar leh náng danah thil eng emaw chu a ngaihtuah muk hle tih a lang. A nupui eirawng bawl mek chu a va melh leh zauh thin a. A rum leh nghut thin bawk. A phone a rawn ri ta ral ral a, hmanhmwwh zetin a la a, "Aw.. Call tlang in va har em em ve le.. " a ti nghal a. 

Lehlam ami chuan, "Signal hi a chiang lo lutuk a.. Eng nge ni ta? " a rawn ti a.

"Hei Kan Zothanpuii leh Remruata an tlan ve ringawt mai a. Khalamah khan an rawn kal mial em ka ti deuh mawle" Pu Zova chuan a ti a. An nu chuan a rawn melh zauh zauh mai. 

Lehlam ami chuan, "Kal miah lo, u Lawma te be teh, an ni in hi lawiluh a rem deuh a, an kal zawk ang a.. Ngah nge maw Zothani pawh chu aw" a rawn ti vawng vawng a. 

Pu Zova pawh chuan thu tam sawi lem lo vin, Lawma tih chu a call nghal a. Mahse, ani pawn an kal loh thu a lo sawi ve tho. Pu Zova hi Aizawla awm niin, a va biaka te kha Lunglei lama a naute an ni. Pu Lawma kha Thenzawlah a awm a, Pu Rina kha Lunglei a ni thung. A fanu Zothanpuii leh a bialpa Remruata te chu nimin chawhnu lamah khan Lunglei lam pana an inphur chhuak an hmu a, An han call thin a, a tlang thei tlat lo a ni. 

Mi fate pawh an inru fô alawm tiin ngaihdan i nei mai thei. Hetia pu Zova buai riauna chhan chu Zothanpuii leh Remruata te hi unau, cousin an ni tlat a tin ni. Remruata hi Zothani nu û fapa a ni miau a!  Phaia awm char char thin a ni a. A rawn haw ve chhunah Zothani nen hian inkawmngeih nghalin an inzui kual nasa thin a. Cousin mah nise, an inhmu khat a, mi hrang ang maiin an inkawm ti mai ang. Chutia inzui reng ta na na ná chu an inkarah mak takin inngaihzawnna a awm ta tlat a!  An inthup seng ta lo a ni ber mai. Zothani rooma an infawp lai a nuin a phawk ta hial a! Khata tang khan an nu leh pa te ve vein an khuahkhirh chho tan a, mahse, hun remchang an hmu zel tho. A mualphothlak an ti a, Zothani zawk chu Lungleia a pa Rina te bula va khawsaktir rih an tum nghe nghe. Mahse, an tum mek laiin tihian an tlan dun ta mai si a. Pu Zova thin chu a rim hlur mai a ni. 

Lehlamah Remruata nu leh pate pawh an buai ru ve viau bawk. Remruata pa phei hi chu pa thinchhia leh tawngkar insum thei vak lo a ni bawk a. A an pawh a chhe viau. "Kan Remruata hurherh lutuk chu aw.. An duh duhnaah kal rawh se. Ngaihven hlek suh ang che u. An inchhir hunah an rawn let leh mai ang" a ti hmiah mai a. A farnu fanu chu a fapa nupui atan a duh bik lo hle a ni. 

Chumi ni chu eng em em thleng lo vin a liam a, Ngaihven vak theih ni hek suh. Remruata pa sawi ang deuh khan an baihvai hunah inchhira an rawn let leh mai an beisei a ni. Pu Zova rilru nat em em chhan pakhat pawh Zothani hi a fanu neihchhun a ni a, a hmel that bakah nula fela sawi a ni ve a, a chhuan pawh a chhuang ru ve hle. Heti ringawta mualpho leh hmingchhe taka pasal a nei tur hi a rilru a na a ni. A nute te pawh an thinrim viau naa eng han tihtheih ni hek lo. An inhrosa kuk kuk ringawt mai. Remruata farnu Mami erawh a ngaihtuahna a kal thui viau. Remruata hi a nau chiah a ni a, a duat hle bawk. Nula senior a pawl tan tawh a, chutianga upa lutuk erawh a ni lo. A nau Remruata leh a nau tho Zothani te awmdan chu mualphothlak a tih rualin a khawngaih ru viau zawk a. Mi te pawh chhungkhat innei an awm teuh tih a hria, a naute pahnih hmangaihna kawng bumboh ve tak chu puih theih pawh a duh rum rum. Tin, An tlan dun zan zing lam dar 3 bawr vel khan mumang mak tak a mang pek a, chu chuan a awm a tinuam hleithei meuh lo a ni. 

A naute pahnih chu chirhdumah an lo táng a, inhai chhuah tumin theihtawp an lo chhuah ve nasa a, an chet nasat poh leh an tla thuk zel si. Mangang takin anmahni chhan chhuak turin an lo au a, va puih tuma a tlan lai chuan, Remruata zawk chu sava lian zet hmui zum tak hian a rawn tham chhuak nawlh a, a thlawh bo pui ta daih mai a ni. Mangang taka a au laiin a harh ta kha a nia. A muhil zui tawh lo chiang kher mai. A naute pahnih chungah hian thil tha lo tak a thleng em ni dawn le.. 

Boruak vawt leh hit mup chuan a muhil lai chu a rawn thawng tho a, a meng a, engmah a hmu lo. A thim vek. Tun ang July thlaa khaw vawt viau chu mak a ti deuh. A inbengkang a, a taksa na thûm chu a ner pui sak mai. A awmna hmun lah a hre hauh si lo. "Remruat.. " tiin a phun sep a. Thawm erawh a reh tlawk tlawk thung. Thei leh thei lo vin a ding chhuak a. A khur dar dar mai. Ralkhata eng chu a hmu thei, mahse, a awmna hmun erawh a rawn en pha lem lo. 

A hma aia ring zawk hian, "Remruat" a ti leh a. Lo chhawntu a nei leh chuang lo. A ngaihtuahna chu a rawn fim chho tan a. A bialpa Remruata nen Haulawnga a thiannu, Becky te ina tlan dun turin Aizawl kha an chhuahsan a. An chhungte inah chuan kal ngam chi niin a hre lo. Inruk kha an duh em em vang pawh a ni chiah lo, khamini khan a rukin an inhmu a, an inhmu tih chu Apain a lo hre leh si. A rawn call a, thinrim zetin haw turin a rawn ti anih kha.. A pa leh a nuta ten kut an thlak leh ngei dawn tih a hriat vangin hlauthawng takin Remruata chu a hrilh a. Ani mipa inti ve tak chuan, "Haw tawh lo mai rawh.. " tiin tlan dunpuiah a sawm a nih kha. Kawng dang neia a inhriat loh vang leh Remruata a thlakhlelh vangin a zui ta mai kha a nia. A thiannu fel leh hrethiam em emtu Becky call in hun reilote an ina awm ve a rem leh rem loh a zawt a. Ani lahin a lo remti em em mai si a. Tikhan thawmhnaw pawh keng lem lo vin an inphur chhuak ve tawp mai a ni. 

Mahse, zan dar 8 bawr vela Thenzawl an pelh hnu lawkah chetsualna rapthlak tak an tawk ta a. Motor dang an tlan vak lo lehnghal. Kawng thlang awih pang, sang angreng taka an thlawh thlak lai chu a hre vuai vuai. A bak a hre zui lo. Tunah a harh leh chiah. Motor tlan thawm a hriat loh danah an awmna chu a hlat viau loh pawn motor veivak an awm vak lo a ni thei ang. Mangang zetin a bawkvak a, "Remruat" tiin a tap pur a. A rilruin a tawngtai mawlh mawlh bawk. 

A hminga ko niawm tak chu a ralkhat hriat ruai ruai a. Men a tum a, a thei hlek lo. Awrawl tal chhuah tumin a insangmar a, a thei chuang lo. Thawm chu a ngaichang reng a. A hmangaih em em Zothanpuii aw ngeiin tap pur chunga, "Remruat" a rawn tih leh chuan a harh káwk mai. A theih tawpa ring hian, "Eih.. Zoi" a ti nghek a.. A chau hle lehnghal. Chutah Zothani thawm chu a hre zui nghal a, an inko dun mawlh mawlh mai. An inhmu ta. Thim thamah chuan an indap nawk nawk a, an inpawm thawk mai. Zan lah chu a thim chhah nasa si. 

"Tihian khua nghak var mai ang" Remruata chuan a ti a. A sana lah a bun tawh hauh lo. Phone phei chu a hnaivai lo nasa. Zothani khur dat dat chu lainat takin a pawm bet chial a, a ngaihtuahna a buai vek. A thluak chu a fim lo tihtheih a ni. 

"Ka pa ten an hre awm si lo" Zothani chuan a ti chuai raih a. 

Remruata a lo bo hû!  Mahse, engmah a sawi lo. Zothani chu a pawm ngawt ngawt ringawt. An hriat loh karin an lo muhil nge an harh chuan khua a lo eng iar tawh a. An awmna hmun chu ramhnuai, mau hmun a ni. A chhengchhe angreng a, Remruata bike pawh an awmna thlang lawka thingkung bulah a let ngût mai. 

"Engtin nge kan thih loh zawk le? " Zothani chuan a ti sap a. 

"Nia" a lo ti ringawt. Zothani chuan a taksaah hliam neuh neuh a nei nual mai. A malpui veilam a duk chur bakah a ban dinglam chu a tliak nge a tiche ngam meuh lo. Pilh leh khem neuh neuh a nei nual bawk. Remruata erawh a bek dinglam chu a pawp nge thisen luanna hnuhma a awm kulh a, a kaw deuh dûk bawk. Chubakah a nák veilam chu a inrik ruak mai a. Nat hmel tak a ni. 

"Kawngpui kan pawh thei em ang chu" Zothani chuan a ti sap a. 

"Nia.. Chhoh tum chhin ang aw"Remruata chuan a ti ve a. An kal tan ta. Kawng chu awih phihrit lutuk a ni lo naa, hliam tuar sa tan chuan kal a harsa lam a ni. Mabse, damkhawchhuah an tum ve em a. Ngawi rengin an kal mawp mawp mai. 

"Khaih.. " Remruata chuan a ti thawt a. Zothani a rak tuar. Remruata lum thla nawk nawk chu a au zui tuar tuar a, Remruata chu hnim pik zingah a lum lut ta. Mangang zetin Zothani chuan a ko vak vak a, rei fe hnuah Remruata chuan, "Ka tha e.. Ka rawn chhuak chho dawn e" a rawn ti ta hlauh a. Zothani pawh a thaw huai mai. An inpawh leh hnuah an kal tan leh a. Kal thui an inti tawh hle. An ril lah a tam viau mai si. An chau takzet a ni. 

A tawpa tawpah kawngpui an pawh ta hlawl mai. An na te chu a dam ta vek emaw tih turin an hlim a ni. Remruata chuan Zothani hlim hmel chu hmuhnawm ti zetin a thlir reng a. A mitmengah erawh lungchhiatna a inphum tel. Zothani erawh a hlim ngang mai. Ralkhata motor lo tlan chu an va hmu a, an lo nghak a. Truck chu a lo tlan hnai zel a, An lo phar nasa. Mahse, a tlanpel daih. An hrilhhai kher mai. Zothani phei chu a tap tep, "Lungngai suh. Tihian kal pah ila, kan hmu em em ang" Remruata chuan a ti a. Zawi tetein kawngpuian chuan an kal dun ta ral ral a. 

Remruata û Mami mumang avang chuan Remruata nu ngaih a tha thei tlat lo. Zothani chhungte pawh va biain sawi ho thain an hre ta a. Hetih lai mek hian, Haulawnga Zothani thiannu Becky chuan Zothani nau Sangtea a lo be ve mek bawk a. A û te a call tlang theih loh thu leh a nghah reng thu te a sawi. Chu chuan an ngaih a titha lo zual ta telh telh a. Police hnena thlen chu eng èm an la ti lo vang, zawng phawt ila kan beidawn hunah thlen zawk ang u, mi dang pawh hrilh hre rih lo ang an tih vangin report an thehlut ta rih lo. Lehlamah chhungkaw mualphona angaah an ngai ve deuh tlat si a. 

Thenzawl lama an chhungte an be leh a, an ni lahin engmah boruak thar an lo hre lem si lo. Mahse, ngaihven erawh an tum. An pahnih thlalak keng kawpin Thenzawla Thingpui dawr hoah chuan an lut kual a, an chawlh leh chawlh loh zawtin, vanneihthlak takin Thenzawl daia thingpui dawr an hawn thara thawk nula chuan, "Nimin piah tlai lam khan an lo chawl.. An ril a tam viau aniang, an chah hnem khawp mai.. " a lo ti ta a. Thenzawl chu an thleng ngei tih a chiang ta phawt. An ni hi kawng reh laiah accident tawkin ramhnuai khawi laiah emaw an lo tlu reng te hi a ni thei mai angem tih chu an ngaihtuahna a ni chho tan a. Thinrimna pawh a kiang ta deuh. 

Hetih mek lai hian Remruata te pawh Thenzawl lam panin an kal ve bek bek zel a. Motor lo veivak lah chuan an phur duh malèk a. Zothani chu a phun hlak hlak reng a, Remruata erawh a ngawi reng thung. Thenzawl khaw dai an thlen chuan khua a thim tan ta mai a. Kawngpui chhuah chhoh nan khan hun an hmang rei viau aniang e. 

"Khaw chhung lut lo vin, hetah hian riak mai ang" tiin Remruata chuan petrol pump bul lawka in mal ding chu a kawk a. Zothani chuan hriatthiam loh hmel takin, "Ka pa Lawma te inah kan riak dawn lawm.. Bakah chaw te kan ei ang a" a ti a. 

Remruata chuan, "I pa ten an be lawk vek tawh ang a, min lo lawm miah lo vang. Naktukah kan kal zawk dawn nia" a ti deuh tlat si a. Lungawi zan lo chungin Zothani pawh chuan a pawm ve ta hram. Remruata tawng mawh ta lutuk chu mak a ti daih tawh bawk. In mal ding chu kawngka a inkalh lo bawk a. An lut ta mai. Thlam angreng deuh a lo ni a. Chhuatah chuan awngphawng fai lem lo pante hi a lo inphah sa a. An tlu zal nghal. 

"Mutthilh tum rawh" Remruata chuan a ti sup a. Zothani chu a maimichhing a.. Remruata chuan lainat hmel takin a melh vawng vawng mai. 

Azeli inbual zo chuan a sam a khuih dalh dalh a. A naute lehkhazir thawm chu ngaihtha zetin a ngaithla pah bawk. Darthlalanga a in en reng lai chuan light a rawn thim thut. Emergency light la tura an tv dahna a pan tur chu room kawngkaah tak chuan mipa pakhat nen an intawk chawt!  A rak tuar mai. A naute chuan, "Uu.. Eng nge? " an lo ti vat a. Azeli chuan aw khur deuh hian, "Ka inchhuih palh a" a ti a. Tlangval pawh chu a la ding reng. A kalpel a, emergency light chu a va la ta a. A hmet eng dawn chiah tihin light chu a rawn eng leh pap lawi a! A khum bul chair awngrawp tawha tlangval thu ngawi reng chu a melh ta reng a. A bekah hliam a tuar tih a lang, a hmel chu a ngui hle a. Tawrhna thuk tak nei hmel a pu bawk. A naute an la meng si, tih chiai a duh si lo. Zaizirin tlangval chu a hui a, "In chungah ka han leng lawk ange.. Tha deuh khan lo zir ru aw" tiiin a naute a chah a. Tlangval chu a chhuah pui ta a ni. 

An inzui zel a. Azeli te in atanga hla fe, bawlhhlawh paihna kawr bul, hmun reh lai takah chuan an ding dun ta ran a. 

"Tu nge i nih?  Eng nge i duh? " Azeli chuan a ti sap a. 

"Remruata ka ni a. Ka mangang khawp mai. Ka bialnu nen kan inru a, mahse, kan accident ta hlauh mai a. Thenzawl daiah a ni. Chuan, kan accident tih hi kan chhung ten an hriat ka ring lo. Khawngaihin min hrilhsak rawh" a ti a. 

"I bialnu chu a thi ve em ni? " 

"Aw.. Mahse, a thi tih a inhre lo. Kei pawn ka thi tih ka inhre lawk lo va, mahse, kawngpui pawh tura kan chhuah chhohna lamah ka lum a, ka lumna hmunah chuan kan pahnih ruang ka hmu ta a ni. Chutah chuan mitthi mai kan ni tawh tih ka hre ta a, ka bialnu erawh ka hrilh ngam ngang lo a ni. Ani chuan dam angah a inngai a.. " a hnuk a ulh lek lek mai. Azeli pawh chuan a chil a lem khawlh. 

Remruata chhungte awmna hmun te inhrilhin zanin la laa va hrilh turin an inngen ta a. Azeli pawn tihhlawhtlinsak ngei a duh. Inah a haw leh phawt a. A naute bulah thil awmze tlangpui hrilhin an inchung tlangval chu kalpuiah a han sawm ta chawt a. Lirthei nei ve hek lo le.. Remruata te ina an va luh chuan, an lo awmkhawm tiai a. An fapa te chungchang bawk an sawi khawm a ni. 

Mami'n Azeli hmel a hmuh rual chuan a ding nghal zawk, "Nang.. Nangmah maw.. Eng nge thleng? " a ti nghal chul a. A ngaihthat lohna chuan a vawrtawp a thleng a ni ber. Azeli chu a hre tlat si a. Ni e, thlarau hmua be thei a ni tih a hria. Chu chu ngaih tih thatna chi a ni lo. 

Azeli chuan a dam thei ang berin thil awmdan chu a sawi ta dap dap a. A then an lo tap, a then an lo indawm kun bawk. Awih loh ngawt chi a ni si lo. Azeli chu a hawi kual a, Choka dep bang bula Remruata lo ding reng chu a hmu ta a. 

"Hei amah pawh a awm alawm.. Hrehawm a ti ve hle tih ka hria. In thu awih lo va, an duhna an kaltlangpui avang khan in ngaihdamna a dil takzet a ni" Azeli chuan a ti a. An hawi hu hu hlawm mai. 

Tichuan, a rang arangin Remruata te ruang hlawm tur chuan khawtlang an inpunkhawm ta a. Thenzawl lam an pan ta mup mup mai. Zothani chhungte pawh an hrilh hre ve nghal a, an ni veng lam thalai te pawh an liam ve nghal. Mizo nih a nuam thin e. 

Zothani chu a meng kâwk a. Remruata thu ngawi reng chu a han hmu nghal. A thu chhuak ve a. "I muhil thei lo em ni? " a ti sap a. Na engmah a hre tawh lo chu mak a ti hle. 

Remruata chu a rawn hawi chhuak a, a hmel dâng var pap leh hmui duk tluk te chu Zothani chuan ngaihthat loh hmel taka melhin, "I khuasik mi?  Ti nge min kaihthawh loh.. Khawi maw.. Ka lo kuah lum ang che" tiin a va pan nghal ruak a. A lo vawt vek mai. Hnai takah Remruata chuan Zothani hmel dang var vek, mitkhur tla dûk chu a melh vawng vawng a. 

"Zoi, pawi ka ti khawp mai. Kan pahnih hian kan dam tawh lo a ni. Thlarau mai kan ni tawh a ni" a ti ta a. Zothani a meng bial kal mai. 

Ni e, Remruata lum thla khan mihring a delh a, a han thawh kan nâk chuan ama taksa ngei mai, a chala hliam tuar leh nunna nei tawh lo tih hriat taka let reng mai chu a lo delh reng a lo ni. A ruang atanga pen nga velah A hmangaih leh duh em em Zothani chu a ring ruh tliak tih hriat zetin a lo thle kawi ngût bawk a. Khatah khan engkim a hrechiang chauh a ni. Thlarau mai an ni tih chu.. 

Zothani chu a ding hluai a, "Fiamthu thawhna hun a nih loh hi.. Kan haw tep alawm" a ti a. A lungawi hmel vak loh. Remruata erawh a ngawi reng. Zothani pawh chuan a ngaihtuah chiang chho a. Motor lo tlan reng rengin an phur duh miah lo te kha.. Eng nge a chhan?  An hmuh theih loh vang a ni mai lo maw? Tuna a taksaa hliam tam tak a awm laia na engmah a hre tawh miah lo te hi..! 

An zi mup mup a, motor pawh a ding nual mai. Kawng thlang atang chuan hruia inpawtin ruang pahnih chu an inhlan tawn zel a. Kawngpui an rawn hlang thleng ta. Kawng sir zau laiah chuan an zalh dun ral a. Tap thawm nen, tawng thawm nen, boruak chu a uap churh mai. 

An ruang bula ding rengte pahnih erawh tuman an hmu ve lo. An ni pahnih erawh chuan inkai chungin an taksa nunna nei tawh lo, chhe tan lek lek tawh chu an melh dun vang vang a. Chutah inkai zelin an accidentna hmun awih pangah chuan an chhuk thla dun ta ral ral a. 

Khang thlarau rethei tak pahnih kha an chawl hahdam ve thei ngai ang em le?