Ruatsangi

RUATSANGI… (Fiction) 

Ziaktu : Toni Râlte

Zopui khuaa transfer ka ni tih ka inhriat chuan ka tap lo chauh. Kan khuaa ka thawhna thla 5 em pawh a ral hmaa sawn chhuah ka ni chu na ka ti. A chhan pawh kan venga party worker fanu pakhat nen min thlakthleng vang a ni a. Thil dang vang ni se ka na lo vang, tenawm taka thil an ti kual chu ka lai a na ve tlat. Mahse, ka pa chuan, "I tana tha tur pawh a ni ang. Mahni kea din ve a hun tawh alawm.. Pasal te pawh i zuk hmu maithei asin" a ti a. Pasal tih tak chu a fiamthu tih hre tho mah ila, ka lo tum khum bûr mai. Ni e, pasal maw? Pasal ka mamawh lo. Ka vanduainna chanchin hi tlem ka sawi loh chuan ka tawt up up mai. 

Kum 30-na ka hmang mek a. Kum 5 liamtaah khan Middle School zirtirtu hna ka hmu ve hlauh a, kum khat lek ka thawh hnuah kan nghet zui lehnghal. Mahse, kan khaw thenawmah ka thawk thung. Scooty ka nei ve a, ka lâng thei mai zel. Hrehawm pawh ka ti lem lo. Chu khua ka va thawhnaa ka thawhpui Rampuia nen kan inhmel duh ve ta bawk a. Nuam ka ti chho leh. Rampuia chu an khuaah pawh a awmthei pawl, chhungkaw belhchiandawl deuh an ni nghe nghe. An inah te pawh chaw ka ei ve zut hman. A nu kha mi tha em em, nu anga ka pawm theih nghal a ni a. Tlangnel lo thei lo vin min siam ve bawk a. Kum 3 tling lo hret kan inzui hnuah inneih mai kan tintuah ve tan a. Palai rawn tirin, buaina awm lo vin kan inrem zui nghal. Ka û mipa nupui nei tawh a awm a. Ka nau te pahnih erawhin kawppui an la nei lo thung. Ka nu te paw'n Rampuia mizia leh nungchangah sawisel tur an hre lem lo bawk a. Hlim takin kan inneih hun tur kan thlir ta ran a. 

Man inhlan hma ni khatah chuan Rampuia chu nikhaw hre lo vin a tlu ta thut mai. Anuin min lo hrilh a, a rang arangin kan va tlan phei nghal. Anu sawi danin, "A thiante sawm khawmin a room (an in hnuaiah an sa leh)  tharah an insawn thla a, an buai ve nak nak viau. Thingpui in turin an rawn chho leh dam dam a, A hnung berah Mama chu a lo lut a. A chal a dawm vung vung a, 'ka lu a va na em'. A ti a. Nachhawkna ka va zawnsak nghal, mahse, damdawi ka zawn mek lai chuan an ri ta chul a. Hmanhmawh taka ka va tlan phei chuan a lo tlu reng tawh. Nikhua engmah ka hre lo zui" a ti a ni. An khua a tanga hnai ber Damdawiin pan turin an lo insiam mek bawk a, kei pawh kal ve ka tum. Mahse, an thenawma Health Worker Pa Dina kan tih mai chuan, a han dap kual vel chuan a beidawn hmel ta tlat. 

"Mihring kan inchan zo tawh lo niin ka hria.. A mar ka hmu miah lo". ati ta a. Kei chuan eng mah ka awih lo, ka awmdan kha a ni ruai mai. Ka chhaw huih. ani ber. Anu leh pa te chuan an han bawihsawm leh a,  a thiante pawn. Mahse, a che eih lo. An dah ang ang chuan a awm tawp. Chutah meuh chuan ka hmangaih chu a awm tawh lo tih a chiang ta. An tap nghal rawih rawih a. Kei erawh ka ding tlat ringawt. Min thawng lutuk a, engmah tih nachang ka hre lo. 

Tun hnua an sawi leh hmangin a vein pui a chat a nih an ring ber. A lu na lutuk vanga thi kha a ni ta ber mai a nih chu.. A va na dawn tak em.. Han thihpui khawp chu. A thih sarhu lai chuan kei chu ka â vek. Ka awih thei thlawt lo. Tupawn min lainat tih ka hria. Anu pawh a â lo chauh. Kei erawh chuan tawrh ngaihna ka hre mang bar lo. Kan han haw ta a. A thih atanga kar hnihna vel atangin ka tuar tan ve chiah. A hrehawm dan chu lusûn tawh ten an hrethiam ang. Ka mihring tawngka hian a sawi thiam lo. Ka tah tlawk tlawk chang a awm a, keimah chauha ka phun bel bel chang a awm bawk. Ka nu hian min vil chawt thin. Ka thuam chhawm tura kan leisa te chu a then te chu ka lo hal a!  Ka hal tih pawh ka inhre lo. Ka bawraw em vangin ka hna pawh zawm thei ka ni ta rih si lo va, ka patea fapa aikalah kan tir ta ngawt a. Rei tak ka ai a kal ta a ni. Rampuia te khawtlang pawn ka dinhmun an hriat vangin aikal ka la pawh chu an sawisel lem lo. Min khawngaih ve em em zawk. 

Tichuan, hun rei tak hnuah kan khuaah sawn ka ni ve ta hlauh a. Ka lo ziaawm ta deuh bawk a, keimah ka kal chho ve leh ta a ni. Mahse, mipa ka ngaihvenna a bo ta hlauh thung. Mipa chu ka tan thian satliah bak an nei thei ta lo. Rampuia thlarau ka zah chu thuhran, hmangaihna ka nei tawh lo pawh aniang. A ruka tah zeuh zeuh erawh ka la ching. Kan khuaa ka la awm rei loh tehrenh nen, tunah min sawn leh ta chu a nia. Ka thinrim bakah ka rilru a na viau. Engmah tihtheih kan nei ve bawk si lo. 

Tichuan, Ka pa nen Zopui khuaah chuan kan kal ta vang vang a. Kan khua nen a inhlat ta khawp mai. In 300 bawr vel an ni a, a ropui falua lo nain,  a khawthleng vel a nuam riau. Boruak pawh a zia viau e. Vcp inah kan innghat a. An lo awm thei viau nghe nghe. An felin an hawihhawm bawk. Joining report te ka pek fel hnuah ka haw leh phawt a. Ka haw hmain in luah tur kan hmu fel bawk. Kan school atanga hla vak lo, Kan Headmaster te in hnuai ka luah dawn a ni. Tichuan, bungrua nen ka lèt leh ta a. In pawh chu ka luah lut ta nghal. Ka nu nen kan ni a, aniin engkim min ngaihtuahpuiin min lamsak zung zung a. A zia viau mai. 

Ka in luah chu a zau lutuk lo naa a nuam reuh khawp mai. Ka bungrua a tam lem lo bawk a, ka in nen a inmawi tawk viau e. Ka in luah lehlam chiah chu nula pakhatin a luah ve tho a. An khuaa a haw lai a ni rih thung. Ani pawh zirtirtu ve tho niin Primary-ah a thawk thung. Kan inkawmngeih pawh ka beisei khawp mai. Ka nuin min hawnsan ta a. Ka khua a har nghal rawih rawih mai. Mahse, ka in luahna te an fel em em a, fapa harh zet zet pahnih an nei bawk nen, ka khawhar pawh a ziaawm chho ve zel e. Headmaster te hi chu Zopui khua an ni sa a, an khuaah chuan a awm thei pawl an ni ve bawk. Fa pathum an nei a, an hmeichhe neihchhun zia a zawih tehreng nen a unau te pahnih erawh an nung vat vat khawp mai. 

School pawh kan kal chho zel a. Ka thenawmnu pawh a rawn let ve ta. A hming chu Ruatsangi a ni. Kei aiin a lian hlek ang, a háng zawk thung. A pian erawh a dik reuh khawp mai. Tin, a hmaifang pawh a dik,. A zia a zawi ve viau niin a lang. Biak loh chuan a tawng mang mang lo. Kei lah mi biangbiak thiam em em ka ni hran si lo va, kan innel falua lo. Kan awm rei anga, kan inngainat chhoh vat erawh ka ring. Kohhranah pawh ka pa min fuih angin ka intatlut ve zel a, Inkhawm ka pelh ngai lo. Mi hriat leh lawm pawh ka hlawh chho ve ta zel a, thalai lamah pawh ka tlangtla ve thuai mai. An felin min titlangnel thiam em bawk a ni. Ina ka awm chuan phone hi ka thian a ni mai a, ka leng vak ngai lo. An library a changtlung reuh riau a, lehkhabu ka hawh zeuh zeuh. Thla hnih zet ka han awm ve takah chuan, khuaa mi pawimawh leh langsarte hming ka hre ve ta ta deuh vek. Thian pawh ka nei ta nual. Nuam ka ti chho ta hle. 

Tlai khat ka eirawngbawl laiin Ruatsangi rak tuar ka hria a. Ka phu zawk nghe nghe. Ka in leh a in hi tile-a pin a ni mai a. Thawm a inhriattheih viau. Tile chhanah chuan,, "Ruati, Ruati" ka ti dat dat a. A reh tlawk tlawk mai. A rak zui leh tak loh vangin ka phei duh ta lem lo. Zanriah ka ei khamah inkhawm turin ka insiam a, Ruati che sat sat ri ka hre thei. "Inkhawm ila" ka va ti a. 

"Zanin chu ka peih lo tlat.. Va inkhawm mai rawh" a rawn ti a. A aw a zangkhai viau. 

. "Tlaiah khan ti nge i rak vak a" ka ti a. 

"Sazu ka hmu a" a rawn ti. Ka nui sak mai. Inkhawm turin ka chhuak ta nghal a. Inkhawm banah dam lo te kan han kal leh lawp lawp a. Valtea'n min thlah haw leh. In leng hi ka nei lutuk lo, keimah hi ka inhawng vak lo nen, thian tha thingpui rawn in hi chu an awm ve nek nek naa a hranpa taka min rimtu an la awm meuh lo. Ka luck vak lo te pawh aniang. Ruatsangi erawh zantin deuhthaw hi inleng a nei tihtheih a ni. Mahse, a bialpa a niang chu, mi pakhat bak a leng pawn ka hre ngai lo. Tawng ri zawng zawng a hriat vek theih bik loh a, an titi thin tih chu ka hria. He mi khua tho a ni ngei ang. 

Thawhtanni a ni a. Ka tho fuh vak lo nge ka awm a nuam meuh lo. Mahse, ka insiam tho a.. Ruati pawh a zai ve rat rat mai. He nu zia hi a mak ka tihzawng tak a ni. Kei aiin a awm rei tawh zawk a, mahse, thenrual a pawl tlem ve khawp mai. A ina chuangkai pawh an tam lo. Ka sawi mi pakhat kha a ni mai. Chu pa lah chu ka la hmu ve hauh lo. An thawm ka hria a a ni mai. Kei tak pawh ka va leng khát, a ina kal tur chuan hel kual ve deuh a lo ngai nen, ring deuha tawng chuan kan inbe thei tho tiin kan inlenpawh vak lo a ni ber mai. 

"Tukin chu i mood a va fuh awm ve " ka va ti a. A zai tawp nghal chawt.. "Fuh ve reng. I kal dawn tawh em? " a rawn ti ve lauh lauh a. 

"Kal tep" ka ti a. Kan ngawi zui. Kan school kalna kawng a inang lo va, kan innghak ngai lem lo. School ka thleng a, Nu Muani a rawn thleng zui ve nghal.

"Pu Sawm, naktuk hi engtia tih chi nge ni dawn.. Lungphunna lamah khan kal ve i tum em? " Nu Muani chuan kan Headmaster chu a bia a. 

Pu Sawma chuan, " Nia maw le.. Kha.. Pu Thlenga te kher an lo ni sia, tawiawm pawh a tha viau mai. Chawhma chiah hi kan kal mai dawn mawni le ka lo tia" a lo ti a. Thingtlangah chuan Sawrkar chawlh ni kher lo, khuaa eng emaw a awm chuan chawlh a ni fô. Hei hi chu hriatthiam ve a ngai. 

Ni e, naktukah kan vcp Pu Thlenga'n a fapa lung a phun dawn a. Khaw pum a sawm tihtheih a ni. Nu Muani leh Pu Thlenga te hi unau an ni bawk. Pu Sawma te nen lah inbe tha em em an ni bawk. Ka thawhpui dangte pawh hemi khua vek an lo ni nen, Chawhma School kala chawhnua Lungphunna lama hun va hman ve chu kan titlu ta a ni. 

Break laiin Nu Muani bulah, "Pu Thlenga fapa hi engtia thi nge ni hrim hrim le.. A la thalai angreng sia" ka ti ta tawp a. Ka hriat chakna a rei tawh angreng a. An ina kan va thlen khan an sitting roomah a thlalak lianpui an tar a, a thihin kum 27 chauh a la ni. Nikum kumtira thi a ni nghe nghe. A hmel pawh a tha phian. Han zawh chawt kha ka hreh sia, Nu Muani ka zawt ta ringawt a ni. 

'Ni e, Mama kha a uiawm asin. Tun thleng sawn a nu phei saw chu a la tap, a lung pawh hi phun a la phal lo va, mahse, ka u sawn a ti tlat si a. An phun dawn a nih hi. Englo ania, an thianho lui kal kha malaria a rawn chhar haw a, a khua a sik hluah a, a tukah Damdawiin an panpui a, Mahse, i hria anga, kan khaw thenawm damdawiin te chu enkawlna tha tak kha a awm thei lo hrim hrim a, Aizawl an refer a, Aizawl kal tura an inpuahchah mek laiin a kal ta mai a ni. A khawsik kha a thluakah a lut tawh anih an ring ber, a ran dan em em kha" a ti ta duah a. Ka lo khawngaih ve kher mai. 

"A van pawi ve aw. Pu Thlenga te tan chuan a na ngawt ang.. " ka ti a. 

"I thenawmnu Ruatsangi ber saw a khawngaihthlak, an inzui ve reng hman a.. A thih lai kha an khuaa a hawn lai a nia, a ruang erawh a rawn hmu hman hram" Nu Muani'n a tih chuan ka phu zawk. Mi chanchin ka ngaihven loh a leiah Ruatsangi chanchin pawh ka hre lo reng a. Keimah ang bawka bialpa sûn a lo ni ve reng tih ka hriat chuan ka ngaina sawt ti mai ang kan inhnaih sawt niin ka hria. Ka khawngaih ve lehchhawng kher mai. 

"Awii.. Ka lo hre reng reng hleinem. Chuvang anih chu Ruati chu a nun a lo zawiawi em em" ka ti tha ve mai a. 

Nu Muani bawk chuan, "Ni e, a rawn awm tirh te chuan nula harhvang leh vengva tak a ni alawm.. Mama boral tak hnu khan a zia zawng zawng a paih vek. Inleng a duh lo va, amaha awm a duh ber, Ka u te pawh sawn an ngaihven ru renh thin naa, veng kar a lo hla deuh nen a inngaihven sen loh a, an intlawh pawh ta vak lo. A sarhu lai kha chuan an inah sawn a tâp chawt a. Ka u te pawn an khawngaih khawp asin' a ti dap dap a. 

Ka ngaihtuahna a kal thui hle. Ruati chu ka lainat takzet. Mahse, bialpa a nei leh em mawni le, zan tin deuhthaw a ina leng thin a awm sia. Chu erawh Nu Muani bula sawi kher tulin ka hre lo. School kan bang a, Dawrah mamawh ka lam kawi a. Ruati te an rawn bang ve chiah nge kan haw rual ta a. 

"Naktuk kal ve i tum em? " ka ti a. 

A hmel chu a ngui rawih niin ka hria, "Ka hre lo le" a ti zawi sap a. Sawi vak tur ka hre tawh lem lo. 

Zanriah ei khamah lehkhabu ka chhiar a, Ruati pawh a thawm a reh riau. Lehkhabu chhiar paha hmawmsawm han ei hi nuam ka tia, wai wai ka kheh ri rak rak. Chutih lai tak chuan Ruati chu a rawn nui hawk hawk a. Ka phu zawk mai. A nui ring angreng si. A va mak mai mai tak. Tlaia a ngui tehreng nen. Hlim taka a awm theih chuan ka lawmpui. Wai wai chu ei ri riap riap pahin ka inchhiar zui leh a. Mahse, rilruah a lut mawh tawp. A chhan chu pindan lehlama Ruati leh mipakhat titi sur sur chuan ka ngaihtuahna a kai peng tlat. An sawi ber erawh a hriat hleitheih loh. Ruati nui leh hak thawm erawh a ring viau lawk a. 

Ka mu hma daih. Ka mutui vak lo, ka mumangah ka in luah lai chu an lo thiat a. Ruati pindan chhuat hnuaiah chuan ruhro an lo chhar a. Makti zetin kan lo thlir thup mai.. Amah Ruati ngei pawh chuan mak a lo ti ve hmel khawp lehnghal.. Mak ti deuha kan thlir reng laiin ruhro chu a lo che tual tual a, a ding ta mai, kan teh nghal hak, kei ka lo fimhur lo deuh nge ka tlan sawn tur chu ka inchhuih palh a, ka tlu khut khut mai. Ka harh zui nghal.. Ka dang a lo ro em em zui a, tui ka in khawlh khawlh. 

Dar 1:45 chiah chiah a lo ni. Ruati pawh a mu tawh aniang, thawm chu a reh kher mai. Ka'n zung law law teh ang tiin ka va zung sur sur a. Khuma ka mu leh tur chiah chu tap ri faih faih thawm ka hre ta a. Ka phu chiang kher mai. Ruati in luah atanga rawn ri chhuak ngei a ni. Ka hlau hran lo. Ka ngaihtuah chak zet chuan a tuka a bialpa lung an phun dawn vanga tapah ka ngai nghal mai. Ka khawngaih zawk hial. 

Mutchhuakin min zem chiai chiai a. Ka muhil ta daih. Mumang pawh ka nei leh tawh lo. A tukah chawhma chu school kan va kal a, chawhnuah in lamah peng kawi tawh lo vin VCP in lam kan pan ta dial a. An lo tam twh viau. Zai pawh a nuam chho khawp mai. Ruatsangi ka zawng ru deuh a, ka hmu miah lo. Ani hi a rilru a na viau nge mawni dawn le.. Tlai dar 4 velah chaw kan ei a. Tawi khawmuang lem lo vin ka haw ve daih. In ka thlen chuan Ruati thawm ka hre miah lo, ani hi ka hmu lo mai mai zawk aniang. Saw lamah a awm ka ring leh ta zawk mah. 

Chaw kan ei tawh sia, tih vak tur awm hek lo, ka inbual zawhah lehkhabu ka chhiar leh mai mai. Zan a nih thleng pawn Ruati thawm reng reng ka hre lo. 

A tukah In chungah ka peng a. "Ruati khu Pu Thlenga te inah a riak mawni le.. " ka ti satliah a. 

Nu Saii chuan, "A haw alawm.. Niminn zingah khan a lo kal a, 'Ka nu a tha vak lo va, ka haw dawn ' a tia nih kha.. " a ti ta a. 

"Ehe.. A van pawi. Chu, lungphunnaah pawh a kal ve hman lo a ni maw.  Ka hmu lo ka ti reng a" ka ti ve mai a. 

"Lungphunnaa a kal hreh vang mawni aw ka lo ti zawk a. A khawngaihthlak anih hi" Nu Saii bawk chuan a lo ti ve mai a. Keipawh ka chhuak zui nghal. 

School naupang kan ngah lutuk lo bawk a. Kan hna hi a hahthlak em em loh. Zirtirtu kan indaih bawk si. Mahse, mahni khua a nih lohnaah a nuam lo ve deuh. 

Eirawng ka bawl leh char char, Holam deuh deuha inhnawhpuar hi ka duh ve lem lo. Eisiam hi nuam ka ti bawk nen.. Chaw ei ka siam lai tak chuan, Ruati thawm niawm tak ka hre ta a. Ehe a lo va haw leh hma si ve.. Ka ti rilru a. 

"I nu chu eng nge a an a.. I lo va haw leh hma thei zawk ve" ka ti a. 

"Nia, a lo tha leh deuh a. School chawlh reng a nuam si lo va" a rawn ti ve mai. A thawm a reh zui danah a inbual dawn a nih ka ring. 

Kei pwh ka insengfel a, inkhawm turin ka insiam nghal. Ka inkhawm bang chu Valtea leh Puia ten min zuk haw a. Thingpui te ka lum a, kan titi ve hlut mai. 

"I thenawmnu chu a va reh ve" Puia chuan a ti a. 

"A mu tawh ni maithei. A rawn haw chau ve dawn bawk nen" ka lo ti mai a. Thil dang kan sawi zui daih. 

An haw a, kei pawh mu turin ka inpuahchah zui. Ka mu chiah tihin Ruati leh mipa phun sur sur thawm ka hre zui nghal. Ear phone ka vuah a. Zai ka ngaithla daih. Ka lo muhil zui a. Dar 3 bawr velah ui bauh vak vak vangin ka harh hlawl. Current a lo thim vek sia, thla en lai a ni si lo nen. A thim viau mai. Ka zun a chhuak bawk nen, ka ph flashlight ka on a, ka va zung a. Ui lah chu kan in chhak kawngah a bauh tuar tuar reng mai a. Thli lah a thaw hur hur bawk. Hlauhna mak tak hian min rawn tuam a, ka hmulthi a ding sung sung mai. Mabse, ka intihlau lo lui ve a. Khumah chuan muin ka inkhuh ta hlán a. 

Hmeichhe huaisen ka ni lo va, ramhuai thawnthu tih vel pawh chhiar ngai lo ka ni. Mitthi hi ka hlau thhin a, Rampuia thih atang khan hlauhna em em ka nei ta lo mai pawh a. Mahnia in luah pawh hi ka chhungte phei chuan ka hlauh an rin vangin min ngaihtuah viau, mahse, a zau lem loh bakah thenawm ka nei ve bawk nen. Ka awm ve thei mai kha a nia. 

Ka lung phu dat dat chu a ring mah mah niin ka hria. Pindan lehlama ri khet khet chu ka hre leh zauh bawk. Mut lah a chhuak lo nasa. Ui chu bauh mai pawh a ni lo, a tap ni berin ka hria. Chutia ngawi renga ka insanruh teuh lai chuan, Ruati in atang chuan nui har har thawm ka'n hre ta mai a!  Ka thu chhuak lo chauh. Ka kut chuan rizai ka hmer ngawt ngawt mai. Nui thawm chu a reh a, tap thawm nge rum thawm ka hreghiam chiah lo, ngik faih faihin a rawn chhunzawm leh nghal. Ka mangang kher mai. 

Eng nge mawni vei le.. Tiin, "Ruatu" ka'n ti piap mai a. Thawm chu a reh nghal vawng vawng. Ka hlau leh roh sia.. Ka tawng ngam tawh der lo. Ka muhil tawh lo chiang kher mai. A tukah mit thial ûrhin ka tho a. Ka za lo teh e. Schoolah pawh ka ngui bur mai. Mi han hrilh chi ah ka ngai bawk si lo. Bakah Ruati lungleng thawm pawh a ni thei. A bialpa lung an phun chauh kha a ni si a. 

Zanah Puia te bawk an lo leng leh a. An leng rei lem lo, mak ka tih chu inleng ka neih chhung zawng Ruati te thawm a reh a, an hawn veleha an thawm hriat tur a awm leh thin chu a ni.. Ka mu fel chiah tihin Ruati chuan Vanlasailova zai a rawn play  a. Awmhmunah ka lo zaipui ve vel. Nizan ang khan hlauhna ka nei lem lo. 

Naktuk chu va tlawh ve ila a tha ang, kan inhmu khât ee.. Inthenawm si hi ka ti rilru a. A ni reng bawk a. Kan inhmu khât riau. An school kalkawng lah saw lamah a awm daih si. Sawi tawh ang khan inhnaih viau e ti lo chuan a in leh ka in kal tur chuan in hel kual a ngai zel si a. Mi lenglam lo ve ve tih takah kan inlenpawh meuh lo a ni ber. A zia lo lam chu a ni. 

Ka lo muhil sek a, ka harh hlawl. Thawm erawh ka hre lo. Mahse, ka mutna zawna tukverh ka zuk en chuan ka rak thawt. Tukverh hliah lek lek hian mihring hlimthla a lo ding reng mai. A mak em emna chu lei atangin tukverh chu a sang tlat. Chuti maia lawn chi a ni lo. Mihrinh hlimthla lah chu a ding tlat bawk si. Ka hmuhsual a niang e tiin ka mit ka nuai. A fiah telh telh, chu hlimthla chu inkhai niawm takin a then nelh nelh lehnghal. Ka khur ta chiam mai a. Chet lak dan tur ka haihchham. Pawna tlanchhuaha in chungte kaihthawh ka ngam si lo, Ruati ka hrechhuak, "Ruati.. Ruati" ka ti a. Ka aw erawh a ring lem lo vang. Ka hlauhna khan ka aw pawh a tithâm vek. Ruati thawm reng reng hriattur a awm lo. Chutah hlimthla chu ka va melh leh a, a inthen tawh lo naa a la inkhai reng. Mak deuh maiin ka intihuai lui a, "Ka thih phah lonvang" tiin khum atanga zuanthlak ka rual a. Tukverh chu ka va bawh rawk nghal. Hawn tuma a kalhna ka han vawn lai tak chuan hlimthla chu a bo daih!  Ruatsangi aw ngei hian, "Melody, eng nge thleng a? " a rawn ti fiah kâk mai. Ka ding chawt. Ka hlauhna te kha an kiam ta duak bawk. Ka thawm kha a hre ve a ni ngei ang. 

"Tunah chuan engmah a ni tawh lo ve" ka ti khur dat dat a

"Ka muhil lai ka harh phah alawm.. Mutui aw" a rawn ti a. Ka thaw huai mai. 

Ka thil tawn mak deuh chu tuma bulah ka sawi rih lem lo. Ruatsangi tlawh turin ka school bang chu a in lam kawngah ka peng thla a, an lo la bang lo nge a lo inkalh thiap mai. In chungah ka peng ta ringawt a. 

Zanriah ka ei khamah ka nu te ka bia a. Tukverh bulah thuin pawnlam ka thlir pah. Nizan lama ka thil hmuh kha a rawn inlar leh ang em aw.. Rampuia a thih khan hlauhna engmah ka nei ngai lo. Ka mumangah te rawn inlar se ka duh hle zawk. Mahse, vawikhatmah ka la hmu lo. 

Tukverh ka khar a. Ka mu zal mai mai. Chutih lai tak chuan thil rim na zet mai hi a rawn nam huk mai. Ka kang awk thei, a rimchhiatzia chu ka sawi thiam lo. Mahse, a nam reng lo, a rawn nam huk huk chauh. Eng tak ni ang maw.. 

Ruati pawh a zai leh riai riai tawh a. "Tlaiah khan rawn kal ka tum a, in la bang lo aniang, i lo awm si lo va" ka va ti a. 

"Nia kan bang tlai deuh hlek a. Naktukah ka lo leng ang" a ti ve mai a. 

"Inleng i nei dawn na nge, zanin chu thawm a va reh ve" ka ti fiamthu a. 

"Aniang.. Chawlh te hi lak ve a ngai alawm" a rawn ti a.. A nui hak hak zui. Kei pawh ka chau riau. Ka mutui khawp mai. A tuk ka school kal tur chu Nu Saii'n min lo ko peng leh a, "Thil uih deuh rawn nam huk thin hi i hre ve em? ". ati a. Zingah pawh khan ka hria. Kawmthlangah sa ruang an paih a nih ka ring. 

"Hria e.. Kawmthlangah khuan eng emaw an paih mawni aw ka tia " ka ti a. 

"Zuk zawntir tur anih chu. A rim a na sia a hrehawm em mai" a ti ve mai a. 

Kan tlai bang chu ka peng kawi a, thingpui a lo lum bawk nen, ka thu khawmuang nghal. "Kawmthkang chu i zuk entir ta em? " ka ti a. 

. "Aw Vanlala te ka zuk en tir a, engmah an hmu lo. Chhunah pawh khan a rawn nam leh huk zel a. A mak em mai" a ti ve mai a. 

"Ruati te hi an bang tawh em le.. Nimin khan kal ka tum a, an lo la bang si lo va" ka ti a. Nu Saii chuan phawk zetin min rawn melh. 

"Eng a.. A lo haw tawh mi? " a ti ta mai a. 

"Haw daih tawh kha mawle.. " ka lo ti mai a. 

"A lo haw te chuan chabi hi rawn lak awm tak.. Bakah min rawn tlawh awm.. I hriatsual aniang" a ti a. 

"Awihawm loh ee.. Zantin kan inbe ziah alawm.. ' ka lo ti si. 

Nu saii chu a chiái ta riau. Pu Sawma inbual zo lo chhuak chu, "Paa, Ruatsangi a lo haw tawh mi? Chabi a rawn la bawk si lo va. Bakah ka hmu ngai lo reng reng. Ani hi a lo tawm leh tlawkntlawk zawk nge" a lo ti vat a. 

"Ka hre nang. Chabi spare a nei aniang chu. Ani te chu a tihdan alawm.. A tawm leh tawh aniang.. " Pu Sawma. Chuan a lo ti mai a. Ruatsangi an sawi dan ka hrechhuak, a leng chhuak ngai lo va, in chung pawh tul tawpah lo chuan a tlawh ngai lo. An sawi dik viau a niang. 

Ka thingpui in zo chhuk ka tum lai takin Primary Zirtirtu tho Pu Hmuna a rawn lut ve chiah a. Nu Saiin a lo be lumlam a. 

"Englo ania, Ruati ka rawn ngaihven.. Hei engmah sawi loin Thawhlehni atang khan a reh ta hmak sia. Ani hi a dam lo nge a haw nge.. Engmah kan hre si lo, kan be tlang thei bawk si lo" a rawn ti ta a. Kei chu ka vir zawk a ni ber. 

"Eng a..?! " Nu saii nen kan ti rual thawt. Pu Hmuna chuan a sawi ngai a sawi nawn leh a. Kan inmelh ta hrek hrek. 

Mahse, hlauhthawnna kan nei lem lo. An sawi ang khan a tawm leh tlawh tlawk a niang. Mahse, niminah te khan a in kha. akalh tlat bawk sia. Kan dinkhawm taih lai chuan thil rimchhe zet chu a rawn nam leh huk. Nu Saii chuan, "Zuk en teh ang.. Ruati chu" a ti ta a. Kan zavaiin a in lam panin kan chhuk ta dal dal a. 

A lo inkalh thap. Chabi a han la leh a, a hawng ta a. A hawn rual chuan kan uak nghal tuarh. Karei.. Mi râp lutuk. Sitting room ti ve mai ang, chumi chunga ceiling atanga rod lo uai thla, fan khaina atan an tihah chuan Electric wire hian Ruatsangi chu a lo inkhai zuah mai le!  Kan hamhaih vek. Tumah kan chechang thei lo. Pu Sawma a harh chhuak hmasa ber, rnag takin Ruatu ruang chu a chawi a, Pu Hmuna'n rawn puiin an pahnih maiin an la thla thei si lo, Nu Saii chu a rak chul bawk a, thenawm hnai an rawn lang nghal tak tak. Ruang chu an la thla thei ta a. A rimchhiat tawh vangin an uak thawt thawt hlawm mai. A hmai vel bawr tak chu a la chhe lutuk lo. Mahse, a rapthlak. Chunglam a melh kuau bawk si. Rei ka en lo en chiang kher mai. 

Thil chu a thleng zung zung. An khuaah phurh phei nghal a ni a. An tuam phui tlat. Mi titi a tling nghal. 

Kei erawh Nu Saii te inah ka mu chawrh chawrh. Hlauhna chuan min la tham dawn chauh a nih hmel e. 

Tu nge zantina a titipui thin kha. Tu nge zai rat rat thin kha? Tu nge ka tukverh bula hlimthla lo lang kha.. Tu nge fiah taka ka biak apianga min lo chhang thin kha?  Ni lo, engkim chu a rapthlak em em a ni. Ka ngaihtuah ngam lo va, ka ngaihtuah lo thei si lo. Engvangin nge Ruatsangi chu a intihhlum? Tu nge hria? In ngaihtuahna kha lo seng ve mai teh u. Kei chuan engmah ka ngaihtuah thiam lo. Ka hlau takzet tih chauh lo chu.. 

Kan khuaa kan in, ka khumah ngei ka mut zan chuan ka taksa cher lutuk leh dawldang lutuk avangin ka nu a tap hial!  Ni e, Mitthi tawh nen khang zan mak pui pui kha kan lo hmang dun reng tih ka ngaihtuahna hian min kiansan thei si lo va. Ka hlau èm a ni…