Pu Lianmawia Thuruk

PU LIANMAWIA THURÛK..! 

Ziaktu : Toni Râlte

"Puitlin nan pawh a tha e, i nau te lah an chhangchhe chho tan dawn si a, in hrang chu han chang ve phawt mai teh u" ka pain kan pa melh chunga a tih chuan, ka lo thaw hawk. Ni e, mo sual pawh min ti dawn mah se; kan pa nena kan indang tur chu ka lawm èm a ni. Ka tlin lo lam a ni tawh. A dik, mizo te chu kan inchenpawlh nuk nuk a, vai ho angin administration a tha leh si lo va, buaina  a tam. 

Kum 24 ka nih in kan pa nen hian kan innei a. Khaw khat ve ve kan ni. Kan pa te hi unau pathum niin a upa ber a, a farnu hi tlema mi phak chiah lo, tawng duh ve tak, tawng thei a ni mah zawk ang chu tiang mi kha a ni ve a. Mi pangngai anga khin dawnin thil nuam ni si lo, mi á treat-a treat chi ni chiah si lo, mi pawisawi hrat zet a ni a. Ka nu ai pawn tawrhhlelhawm ka ti zawk. Ka nu hi chu pawnlama nu tha tawp, in chhunga sakei ang deuh hi a ni. A mood a that lai erawh chuan min duat huam huam. Ka hlau deuh roh, a lung tih awi loh chu kan pa nen inhauh ai pawn ka hlau zawk. Ka pa erawh pa tha tak a ni. Kan han chengho ve naw naw a. Buaina lian tak erawh a chhuak èm bik lo, kan fa pahnihna tur ka pai laiin kan pa nau (an naupang ber)  chuan nupui a nei ve ta a. Kan khaw thenawm ami kan khuaa Hindi teacher-a rawn thawk a ni. Ka mo tirh ai chuan ani chu nuamsa tak a ni. Hlawh a nei miau bawk a. In lal hleih lo chi pawh kan ni lo. 

Fa ka nei a, nau buchip zual laiin ka che hlei thei mang si lo, ka la santen zui. Rei tak ka silawng a ni. Chung hunah chuan ka nu nen min hmumawh thei em em a, ka inthlahrun em vangin kan in lamah kar hnih zet ka va awm nghe nghe. Ka retheih ve zia chu kan thenawm ten an hrechiang ber ang. Chulam chu ka sawi tum ber a ni lem lo bawk a, kual vak lo ila. Kan dam ve tak hnuah kan pa bulah in hrang chan ka rawt ve ta râwih a. Aniin ka pa bulah a sawi a. Tichuan, ka pa remtihnain kan in dang ve dawn ta. Ka pa hi pa mawl a ni hauh lo, in hmun lo ram hi a lei a lei fô a, nakinah kan tan a la tangkai dawn tiin. A in lei pakhat chu kan luah turin a dah ta a. 

Chu ka pa in lei, kan luah tur chu ka'n sawi zau leh lawk ang a, kan thupui innghahna a ni bawk a. Pu Lianmawia in a ni thin. Pu Lianmawia chu kan pian ve hmaa kan khuaa lo pem lut a niawm e. Fanu pakhat chiah an nei a, an fanu chu kan upa ber te nen an inkawm ve hman. A rawn pem luh hlimin tuna a in sakna hmun khi a lei nghal a, sum lamah a buai lo hle chu mak an ti, Thingtlang pa ve mai a ni si a. Tichuan, in a sa ta nghal a, an chhungkaw zat ngaihtuah chuan a lian mah mah tihtheih tur a ni nghe nghe. Pa remhre tak a ni ngei mai, sap ho in ang deuhin nghet tlet tlawtin lung a rem vek a, a hmanraw hman te pawh a hun laia manto leh mi nazawng hman phak loh hlir a ni. A sak zawh hlim chuan kan khuaah a in aia in nalh leh mawi reng reng a awm lo a niawm e. Tichuan, an chhungkua chuan an khawsa ve ta rak rak a. Pu Lianmawia chu pa lian tak, rorum hmel tak, zaidam phian lawi si a ni a, a huaisenzia an sawi fo thin. Kan khaw paho neih ngam loh, Paheh tlang chu lo atan a vat hmiah a. A atthlak tih hrilh mah se, "Tuma neih ngai loh ram chang chu a tha dawn em mai, engmah a thleng lo vang" a ti mai zel a. An nu pawh kha a huai ve thawkhat a niang, ram lamah hun an hmang tam zawk an ti. 

An fanu chu Zampuii a ni a, ka û te nen an inkawm thin vangin kei pawn ka zui ve det det thin. Amah chiah fa an neih vangin an duat viau aniang, thawmhnaw leh eitur eng ilo pawh a nei tha lawtlak thin. Mahse, vanduaina an pumpelh hleithei ta lo nge pi pu chena an lo serh thin a ngaihpawimawh loh vang zawk. Paheh tlang an neih kum tawp lam, buhsenga ram an riah lai chuan, an nu chu thih ngamin a na ta a. Ram lama inenkawl ngawt thu awm hek lo, Mi tlawmngai ten an zuk zawn a, kei pawn ka hmu ve. Pi Muanzovi chu a dâng em em a, a sam te chu a tlem hle, a tla kawlh ni ngei tur a ni. A meng chang chang a ni mai. Ka sawi thiam dan ber chuan pitar tawh tak hi a ang ber. A la naupang hle si a. Damdawiinah an han awm ren rawn a, amah kha hlauh nei niawm takin a awm thin a, a phun bel bel thin. A thi tur chalchang phei chu nurse ho pawh an darh hak e an ti hial a ni. A insiamchhe nasa a niawm e. Amah Pu Lianmawia ngei chuan a nupui chu a dawm hlum a ni. U Zampuii chu a nu thih hian kum 12  a ni ve tawh. Pi Muanzovi thih zan chuan Pu Lianmawia in bula thing kung lian zet zet velah chuan thla a ai nasa hle a niawm e. An in hi a fâl ve hlek bawk a, tlang bawk angreng deuhah han awm a lo ni bawk nen, a nelawm loh viau mai. 

An pafa chuan an khawsa ve ta rak rak a. Pu Lianmawia hian an lo pem tirh khan chhungkhat ve ang deuhin a hnampui Pi Tlansangi te a rawn belbul ve a, an ni hian engkimah an pafa chuan an chhawmdawl ve bawk. Chhawmdawl em em erawh an ngai hran lo, amah Pu Lianmawia hi a taima èm a, an ni pafa eikhawp ringawt te chu a thawk chhuak lutuk ve a ni. 

Paheh tlang atanga an thar chhuah, an buh chu a tam èm vangin kan venga chanhai leh thawkmawh deuhte a sem ve hial nghe nghe. Pi Muanzovi thih sarhu lai khan an in bawr ve chu sawi neuh neuh a awm thin. Keini naupang phei chuan kan hlau em em a, intihthaih nan tak kan hmang thin. An in hnaihah kan kal duh ngai lo. Anu thih atanga kum khat tling lo velah U Zampuii chu a dam lo vak a, ka u te pawn an han kan ve nghe nghe. A tawngvai bial bial thin. Anu hming a lam nasa hle an ti. Apa chuan theihtawpa enkawlin a dam chhuak leh ta hram a. Mahse, a dam tak hnuah chuan a mizia a hloh ta daih. Mi â tihtheih ni si lo hian amaha awm a duh a, thian a kawm ngai tawh lo. A en ngai te hi a en ngawih ngawih thin. Biak loh chuan a tawng ngai lo bawk. A mak ve khawp mai. 

VC inthlan dawn lai vel a ni a, kan khawtlangah pawh boruak dang a leng meuh lo. Kei pawh naupang fel tawh tak ka ni a, in lamah pawh ka tangkai tawh viau. Inthlan dawn hnaiah chuan kan khawtlangah thil mak tak a thleng ta a. Kan khuaa nula hmel tha em em, U Sangzuali a bo tlat mai!  Tuikhura a insu chu a haw har em vangin an zuk en a, a thawmhnaw suk la awm vek siin amah chu a lo bo hmiah ringawt mai a ni. Mi tlawmngai ten an zawng nasa, an hah hle nghe nghe. Mahse, hmeithai ina mipa sazu zawn ang vel a ni. Hmuh tur eih a awm lo va, thawm ri va hriat tur a awm hek lo. Ni 7 an zawn hnuah an vui tawp. Mai a ni. Anu tah hla avang khan kan khawtlang nu leh nula tam zawk chu an tap deuh vek. A uiawm em bawk a ni. Tlangval pawn an ui. Vc kan inthlang a, boruak pawh a reh ta deuh. Thla hnih  a liam leh meuh chuan, kan veng nula, nula mawlmang ve tak, mahse, hmel tha deuh mai U Rempuii a bo leh ta a! Chu erawh ni 10 hnuah Pu Lianmawia hian a lui kalna kawr kamah a ruang a hmu teh daih a! A tirah phei chuan amah chu rinhlelh a ni hial nghe nghe. Mahse, han thah ngawt nachhan tur a nei si lo, ui tak chungin an thlah liam leh ta ringawt a ni. Heng ka'n sawi kai duah chhan chu Pu Lianmawia hian khang nula bo te kha an bo hnu hian mumangah a hmu thin a, an awmna an lo hrilh thin niin a sawi. Mahse, an awmna an sawi an va en erawh chuan an hmu ngai lo. Amah Pu Lianmawia paw'n hrehawm a tiin a inthiam lo hle thin. 

Nupui nei leh turin an nawr fo a. "Nupui pakhat bak neih ka tum lo" a ti bau mai si a. A fanu nen an khawsa ta zel a ni. U Zampuii'n kum 16 a tlin chuan, Apa chuan, "Heti ringawt chuan kan damkhawchhuak lo vang, ani tal hi lehkhathiam leh fing tak a nih a ngai" tiin Aizawl lamah an chhungte bulah a va dah a. U zampuii chu chumi hnuah tuman an hmu leh ta lo.Kumtawpah pawh a lo haw ngai lo, amah Pu Lianmawia hi a va zin zeuh zeuh thin. Pi Tlansangi ten lo hruai haw ve tawh la an tih pawn, "Amah Bawihteii hian lo haw a hreh tlat tawh a ni. A chhan ka hre lo" a ti mai zel.  U Zampuii a awmbo atanga kum 5 hnuah Pu Lianmawia chu ama in ngeiah inawkhluma hmuh a ni ta a ni. Mi zawng zawng a thawng a, mi mak tih a tling. Pa tha duam, fing fel em em, tlawmngai bawk si, kohhranah pawh a theihna zawna inhmang leh tangkai tak kha amah a intihhlum theih an ring meuh lo a ni ber. Mahse, ngaihbel tur ting chuan an thenawm te hian, "Zampuii a va dah hnu atang khan a mizia hi a dâng sawt. Rual a pawl meuh tawh lo, a lungleng anih a rinawm, a fanu a ngai aniang, a duat ve bawk si a.. " an ti. Mahse, chung vang ringawta intihhlum chu a rinawm chiah si lo. 

An thenawmpa, Pu Rama sawi danin "A thih zan khan Pu Lianmawia chu an huan thlang kawrah chakai a chhit a niawm e. A lo haw har lem lo va, a lo haw ina a lut lai la han hmu, ka au nghe nghe, 'i man tam em' ka ti a. "Eikhawp tawng tawng a ni e' tiin min lo chhang a. A bak chu ka hre tawh lo" a ti a. A ruang hi a farnu anga a en Pi Tlansangi fapa Dampuia'n a hmu a ni. Chawhmeh a han suah dawn a, kawngka a lo inkalh lo va, a va hawn chuan tumah an lo awm lo. A ko va, a rawn chhang thei bawk si lo, Roomah a va lut a, ruang chu a hmu ta mai a ni. A khum bulah stool dawhin ceiling fanah hrui thlungin a lo inkhai a ni. Dampuia chuan a hmuh chian ve bawk vangin rei tak a dam lo nghe nghe. Zampuii biak pawh ngaihna an hre hauh lo mai a, Pi Tlansangi te takngial pawn an hre si lo. A fanu tel lo vin a ruang chu an vuiliam ta ngawt a ni. A lukham hnuaiah a in leh lo chi Pi Tlansangi kuta a dah thu a lo ziak thlap bawk. Ti nge a fanu tan a dah loh tih chu mi tam tak zawhna a ni. Tuman a chhanna an hre si lo. Sawi twh ang khan Pu Lianmawia hi a fanu aawm loh hnu atang khan amah maia zanlaia an in tuala a vei sek te hi tlangval leng haw ten an hmu zauh zauh, a in hnunglam huana a thu run reng te,. Eng emaw tak chu a awm ang tih an ring. Eng nge anih an hre si lo lai chu buaina a ni ta a ni. 

Tichuan, a in chu Pi Tlansangi fapa nupui nei hlim ten an luah zui ta a. Thla khat pawh an awm hmain an chhuak leh nghal. Thawm mak zet zet an hriat fô thu leh tap ri niawm tak te, nui hawk hawk thawm te, zan laia an mut tawh hnua an thutkhawmna lama thil ri dup dup, ceiling atanga mihring tla dup thawm niawm tak te, an chawhmeh a lo hin vek thin tu te leh ei vetu awm ang maia a lo darh nuaih thin thu te an sawi. Kan hlau thei khawp mai. Tichuan, luah tu awm lo vin a ding ta reng a, zep nâk emaw a hrân kha chu kan ring deuh vek. Pu Lianmawia thih dan avang pawh khan. 

Hun a kal zel a, mikhual leh pem thar neuh neuh ten an luah zeuh zeuh, an chhuak rang thin viau thung. Pi Tlansangi pawh chuan tumah luahtir a duh ta lo va, ka pa in a hralh phal leh phal loh a zawh chuan awlsamtein a phal thu a lo sawi a. Ka pa chuan to vak lo vin a leisak ta a ni. Kan inneih hma daiha a lei a ni a, sak that vek a duh laiin Pu Lianmawia hmanrua te kha chhia a la awm si lo va, lung te kha a la chang tha si. A ui leh ta deuh a, in chu thiat lo vin a chei danglam ta zawk a. In nuam tak, thawveng tak a lo ni ta a ni. Mahse, luah lo va rei fe awm ta anih vangin kan luah luh dawn chuan kan tifai rei hle tho mai. 

Kan pa hi mistiri a ni a, thiam thil hi a ngah ve reng reng bawk. Wiring te pawh a khawih tel theih laiin two wheeler han siam mai te pawh a thiam leh zel a, kan in sawn hnu lawkah kan in kawt zawlah chuan in lian vak lo,  a bang dapin kan sa a. Workshop atan hmangin, thingzai khawl a lei ta bawk a. Amah chhuak vak loin hnathawk a ruai a, sum chu kan lalut ve ta deuh reng mai. Khawsak sang tak erawh kan ni hran lo. Kan fa pahnihna pawh thla 7 lai a ni ve ta a, a û hi kum 3 a ni ve tawh bawk. School kan la luhtir lo thung. A tir chuan kan in chu ngaihngam takin ka luah thei lo ti mai ang, a hmaa an sawi zawng zawng kha kan hre ve vek si a. Mi dawihzep lutuk chu ni lo mah ila; huai leh hráng hi chu ka ngaina viau lo. Kan thenawm te lah an in an sak that vangin mi in luahin an awm daih a, kan hrang dû bik mai. Tichuan, kan khawsa ve ta nawk nawk a. Kan in hi ka pa khan a siksawi hlek vangin, Bed room pahnih awmin, sitting room atanga penhleh deuhah choka a awm bawk. Bathroom erahw pakhat a awm. Bed room pakhat zawk chu tuman luah hek lo, store room ang deuhin ka hmang a, ka fate toys dah nan ka hmang bawk. Kan luah luh atanga thla hnihna thlengin thawm engmah kan hre ve miah lo, chuvang chaun kan pa phei chuan, "Sazu thawm vel kha an ngaihbel vangin an sawi uar mai mai aniang" a ti hial reng a. Ni e, bakah khang a hráng an tih hun lai kha chu a rei ve ta deuh bawk a, keipawh ka la nulat lai daih a ni. Tunah chuan a hráng duh tawh lo a ni mahna. 

Zan khat chu ruah a sur cherh cherh a, zan dar 9 bawr velah mu turin roomah kan lut  a, Ka fa û zawk hi Duati kan ti mai a, a nau erawh Bawiha a ni. An pahnih chuan an muhil tawh. Kan mu fel awrh chauh tihin Information atangin chhiat tawh thu an rawn puang ta a. Kan beisei loh lutukin kan chhungkhat, kan pa nuteii pasal Pa Zova a lo ni reng mai. Nat lawkna a nei miah lo, an rawn puanah pawh lungphuchawl an ti reng a. Mahse, ani hi thisen sang ve reng a ni a, a buai a nih ka ring nghal mai. Kan pa pawh a thawng ve hlein ka hria. A tho a, a insiam mawlh mawlh a, "Lumen a ngai dawn sia, naktukah lang zawk mai rawh" a ti a. Nia, chhangchenu ka ni bawk nen, va kal ve ngawt kha a tul berin ka hre lo. A tukah kan kal dawn tho bawk nen. Mahse, a ruk tak chuan kan pa kal tur chu ka ui ru hle, ruah a sur bawk nen, thla mang lai lo ni bawk. Pa Zova lah ka fate duat em em, keimah nen pawh innel tak kan lo ni chhap bawk nen, mahni maia ka fate mutpui chu sawi ngam si loin ka hlau riau mai. Kal suh intih chi lah a ni si lo. Kan pa kal tur chu ka thlah a, kawngka ka kalh nghal. Current chu a awm a, choka light ka off a, sitting room leh bed room light ka on thung. Khumah chuan ka mu vang vang a, Pa Zova te in leh kan in hi a inep bawk a, an thawm leh tap thawm pawh a hriat theih kher mai. Duati muhil thaw sák sák chu ka zuk melh a, ka awt ta hle mai. Ka mut lah chu chhuak lo tak a ni. 

Phone ka phawrh a, story ka'n chhiar mai teh ang ka ti rilru a. Ka saisir thawk a, ph chu ka khawih ta mual mual a. Ka story duhzawng tak ka hmu fuh hlauh mai. Ngaihnawm ti takin ka chhiar a, ka hlau tih pawh ks hrechang tawh lo. Ri bak thawm ka hria a, mahse, sazu a nih ka ring. Sazu hi an awm ve reng nen. Ka chhiar zawm leh a, mahse, choka bungbel chu a ri ta rum rum mai. Ka tho ta hlawl a. Ti deuh chungin ka va kal, kareii! Kan dal bel chu chhuatah a lo let ngût a. Kan arsa buhchiar lah dawhkanah inhawng sain a lo awm bawk. Chhuatah chuan chaw mal a lo tla nuaih bawk. A ngaihna reng ka hrethiam lo. Hlau chung chungin ka tifel a, bathrooma thawm ri leh khut khut thin chu ka hre reng.. Kawngka bulah chuan ka ding vang vang a, zawitein kawngka chu ka hawng ta riai riai a. Comode chunga ventilation sang lutuk lo va kan dah chu a lo inhawng a, tui chu herh tawp hman loh tih hriat takin a lo dir zaih zaih bawk. Ka herh phui rual chiah chuan, kan in hnunglama tlan khut khut thawm ka hre zui ta nghal a. Ka inrin hmain, "Tu nge" ka ti tuar. Mihring ni ngeia ka hriat vangin ka hlauhna a bo duak nia!  Mahse, tuman min chhang lo. 

Light ka off a, bed roomah ka lut leh ta a. Eng thawm pawh awm leh mah se; thawh ka tum tawh lo. Ka hriat loh karin ka lo muhil ve daih a, kan pa kawngka kik thawmah ka harh chiah. Ka fate hi mut an duh viau a, a zia zawk. Zan lama thil thleng chu kan pa ka hrilh malh malh a, a awih nge awih lo pawh ka hre chuang lo. Rin ang ngeiin ka pa Zova chu a luhai a tlu a, an bawihsawm lai velin a kal ringawt a nih awm chu!  Thihna hi zawng a mak a ni. 

Chhun lamah Pa Zova vuinaah kan va lang ve a. Thla kan lakpui zawhah ka haw leh nghal. Eirawng ka bawl a, Bawiha a tlei tlat lo, ka paw pah bawk. Duati erawh toys roomah a thiannu kikii nen an inkhualtelem thung. Kikii hi kan in atanga hla vak loah an awm a, chaw rawn ei ve changte a nei fô. Ka fate ang thoin ka duat a ni. 

Chaw chhum tur ka siam lai mek chuan Duati rak hlut chu ka hria a, Kikii a tap zui nghal bawk. Hmanhmawh zetin ka va kal a, an toys chu chhuatah a lo let rum a, bang rinchhana chhuar, lehkhabu leh thawmhnaw thenkhat hak tawh loh ka dahna lam chu hawiin an lo tap pur mai a. Ngati nge tiin ka han thlem a. 

"Lamhuai.. Lamhuai kan hmu" Duati chuan a ti nawk nawk a. A tawng hi a la fiah lutuk lo, ka mangang deuh thin reng a. 

"Engmah a awm. Lo chutiang, bang tawh ru le" ka ti a. Ka kuah dun a,. 

"Aih, Anu, kan hmu tak tak alawm.. Ih a hmelchhe lutuk, chuan maw a sam a sei asin"... Kikii chuan fiah zet hian a rawn ti ve thung. Tlem chuan ka buai ta deuh. 

"Khawiah nge in hmuh? " ka tih chuan, tukverh lam chu kawkin, "Tah sawn a lo ding a" An ti a. Tukverh chu a inhawng sa a, ka va dak chhuak a, engmah ka hmu lo. Tukverh piah lawkah khiang lian zet a ding a, a piah hlekah zawngtah lian ve tak a ding bawk. 

"Engmah a awm lo, in hmusual mai maj anih chu.. E ka hre leh si, U Abawihi'n a lo tihthaih che u lawm" ka ti ta ringawt a. Abawihi chu mi ang chiah lo, chhul lam chiang lo a ni a, naupang te hi a ngaina ve a, an hlau em em thung. 

"Anih ti nge he lai hi in lo en reng " tiin chhuar bulah chuan ka ding a. 

Kikii chuan mit khap fak fak chungin, "Ih, kha tami lehkhabu kha a lo tla a.. " a ti a. Ho ka ti leh si, lehkhabu chu rem leh rem loin an lo dah chho ve ngei bawk. An hlauh miau vangin ka hruai chhuak a, sitting roomah chuan ka awmtir  ta a. Kan pa pawh a lo haw a. 

Pa Zova thlan nghah ni chuan kan pa pawh thlan lamah a kal ve a, kei pawh ka intifai a, Duati kaiin, bawiha ka pua a. Ka nute inah ka fate chu dahin Nuteii  te inah chuan ka va chuangkai ve a. Nuteii a tap a tap mai. Nupa induh leh inzui chawt kha an ni a, a na viau ang. Ka khawngaih khawp mai. Chawhnu a ni lek lek tawh tihin ka haw a, Duati te pawh an lo tlei viau mai. Ka hawnpui leh ta a. Lehlamah ka nute in lamah hian ka leng khât angreng, mo kan nei ve tawh a, an chhangchhe ve si a, va chawhbuai fô kha ka hreh ve a ni. 

Eirawng ka bawl leh a. Duati te unau erawh sitting roomah an inchhaih a. A nau hi a chhaih tham ve tawh a, an intitap fo mai. Bawkbawn ka chan lai tak chuan vawi leh khatah Duati chu a rawn rak tuar mai. Ka phu zawk nghe nghe,. Rang takin ka va kal a, a mitmengah chuan hlauh a nei a ni tih a lang reng mai.

"Eng nge ni leh ta? " ka ti a. 

"Meichia.. Nula ka hmu.. U abawihi a ni lo lenh leng" a ti ta a. Chutihrual chiah chuan store room lam chu a ri khap. Ka hriat dan ber chuan motor kawngkhar khar ri ang hi a ni. Bawiha a tap zui ngjal bawk. Manganthlak thin. An pahnih chuan ka thlem a, keimahah chuan mak takin hlauhna a lo piang bawk. An tap a bang zui ve mai a. Ka bulah ka awmtir ta a. 

Zanah kan pa chu leng chhuak lo mai turin ka ti a. A fel ve a, a chhuak lo ve mai. Bakah a hah ve bawk nen, an hrethiam thoin ka ring. Chumi zan chuan thinthi diaiin ka muhil ve. 

Thawm chu a reh leh rih a. Pa Zova thihcham zanah erawh ka tlanchhuak hial mai. Kan pa a han kal ve si a, current a awm bawk si lo. Bati chhiin ka fate nen kan mu a. Dar 10 a ri dawn hnai tihin kan pa a lo haw a. "Rinawma lui kal a chesual a niawm e. Kan zuk zawng dawn a" a ti a. Rinawma chu kan khaw tlangval taimaa saawi a ni. Kan pa chu a insiam mawlh mawlh a, a chhuak zui nghal. Current lah awm thei si lo. Ka phone battery low tep tawh bawk si. Ka ippik tawp. Dar 12 a pel tawh ang tihin Ka muhil lai chu Duati tap in min tiharh hlawl.. Ka va en vat. A mumang vangin a lo tap chhuak aniang, a muhil zui lej daih. Bati chu a ral lek lek tawh vangin ka va thlak nghal a. Bawiha mut dan ka siamrem hnuin ka mu ve leh nghal a. Ka chhing siar siar tihin kan room dep chiaha store roomah chuan motor kawngkhar khar thawm ang kha a ri leh ta khep mai. Ka meng hlawl a, thawm ka ngaichang ran. Zawitea ke pen ri chu ka hre zui, chhuat chu cement-a zût vek a ni naa ka hre thei tlat. Carpet chu a ri hraih hraih mai. Ka lungphu chu a thum tluk tluk, a thlawk chhuak ang tih pawh hlauhawm a ni. Room kawngka a hawng a, sitting roomah a vei vel, ka inhumruh thlan hluam mai. Chokaah lut lehin bungbel chu a khawih ri ta rak rak a, eitur a dap a ni chiang mai. Rilrua tawngtai chungin thawm dim thei ang berin ka tho a, choka chu ka pan ta them them a. A thim lutuk lo, thla a eng ve deuh a, a rawn chhun eng ve ruai mai. Choka ka lut chu ka rak nghal thawt!  Kan tuikhawihnaah chuan min hnungchhawn zawngin mihring a ding! A sam a sei a, kawr var lam a ha tih chiah ka hria, ka rak rual chuan rang lutukin bathroomah a lut a, ventilation a ri nghal bawrh bawrh. Kei chu ka khur nasa lutuk a, din pawh ka ding ngil hleithei lo.Bawiha a rawn tap ve chiah.. Hmanhmawh zetin ka va pawm a, Duati ka kaitho bawk, harh chiang mang hlei loin ka kai hlawk hlawk a, kan in chu kan chhuahsan ta. Hlauh râlah chuan kan lo chak aniang e, ka nu te in kha engtik laiin nge ka thlen phei pawh ka hre lo e a. 

Mahse, ka chhungte leh kan pa ngeiin sawi darh vak lo turin min ti a. An hre vak hlawm lo. Ka hlauhna erawh a kiang mawh hle. Rinawma pawh kha an zuk zawn haw a, Damdawiinah a awm mek. Kan pa chuan min lenchhuahsan ngai ta vak lo. A chhuah dawn chuan ka nute inah emaw kan pa nute inah emaw kan leng ve mai zel. Chuan, min lo hruai leh thin. Ka fate nen ringawt chuan ka awm duh tawh lo. Chhun lamah erawh ka hlau bik lem lo. 

Ni khat chu room ka chingfel e ka tia. Store room chu ka luh khat deuh vangin a lo hnawk niaih tawh. Ka tih deuh tlat a ni. Thawmhnaw vel chu ka thlep tha a, an toys bawm, chhuar angreng deuh laksawn theih chu ka chawi sawn a, ka chawi sawn zawng chuan eng emaw ni ri tèt a awm. A ngaihna ka hre lo. Ka chawi leh a. A ri si lo.. A bul vel chu ka phiat fai a, ka chet deuh apiang chuan a ri leh thin. Ka dinna zawk chu niin ka hre ta.. 

Ka ding vang vang a, ka ke chu ka'n per pawp a!  Hmm.. A chiang, a ri ta thak mai. Ka dinna zawn chu cement a ni ve lo tih ka hre thei ta. Kan pa a awm lo va, a lo hawn huna chinfel tura dah mai chi em ni ang tih ka ngaituah a, hriatchian chakna chuan min tur et et mai. Hlauhna leh phurna chuan min thunun tlat. Ka dinna carpet chu bangkil atang chuan khawh tumin ka va pawt a. Ka hrilhhai letling, a rawn kau nghal tuar mai. Han en mai kha chu a bet nghet hle khan a hriat sia, bang depah chuan, Thir tuiek tawh lam ka hai chhuak ta hlawl mai. Mihring leng tawk aia lian hlek, kawngkhar a lo awm reng mai. Sawi tawh ang khan Pu Lianmawia hian lung a rem vek si a, engvanga chu kawngkhar chu lo awm ngawt nge maw a nih ang le?  

Chu kawngkhar chu ka pawt ta a. Awlsam zetin a inhawng mai bawk. Tu emaw chuan luh chhuah nan a hmang fô tawh tih a lang reng mai. Carpet phawh awlsam zia a tangte pawh khan. Kawnghar chu ka zuk bih a, a thim vek. A uih kher bawk. Ka uak thawt thawt mai. A thim khup bawk si. Mahse, ka ti laklawh tawh. Hlauhna aiin phurna ka ngah tawk zawk. Kan pa torch light ka va la sauh sauh a, a chhung chu ka zuk en ta a. Leilawn sang vak lo a lo awm a, ka chhuk ang nge chhuk lo vang tih ka ngaihtuah nasa.. Duati leh Bawiha te ka va en leh te te a, an la tlei khawp mai. Engpawhnise tiin ka chhuk ta hmiah a. Leilawn pawh chu thir vek a ni. A ngheh hmel kher bawk. Chhuat niawm takah ka tum thla chhak, a rim chhiat em vang erawh chuan thawk harsa ka ti.. Room zim teah ka awm tih ka hre ta. Thaw dèp dèp chungin ka en kual ta a. Awngphawh chhe zet, thler hnu tawh chungah mihring a lo mu reng mai!  Ka tawlh hnung dâwrh a, mahse, ka èn reng tho. A bawkkhup zawngin a mu. 

"Tu nge i nih? " ka ti ta tuar a. A che zawk ni maiin ka hria, ka hmaah tak a rawn ding ta rûn mai. Ka rak nasa teh e. Ka rak rual chuan a rak ve chiam bawk. Hmeichhia niin thlahrang film-a thlahrang lema chang ho hmel hi a pu.. Torchlight chuan a èn fiah vak lo naa ka hlauhna tur khawp chu ka hmu e. A hmai rapthlak zetin min rawn hnaih tial tial chuan ka khawhmuh a fiah lo va, ka awn ta ruai ruai mai. Engmah ka hre ta lo. Ka thidang a ni ngei ang. 

"Mawite, mawite" kan pa aw ri chu hla tak atanga lo ri hnai zel ang hian ka hria. Ka meng a, ka mit ka khap fak fak. Kan pa ngei mai chuan min lo en reng.. Min ngaihtuah hmel kher mai. Mi dang pawh an awm nual mai. Tu tu nge ka hre lo. 

"I harh em? I tha em? " kan pa chuan a ti mawlh mawlh a. Ka thu chhuak tur chu min lo pui bawk a. Ka thu chhuak chiah tihin sitting room chhuata an phuarbeh chu ka va hmu nghal. Kan pa ka kuah thlawp.. Ka khur nasa lutuk. Kha mihring ngei kha a ni. Ka hawi chhuah leh chuan ka nute leh kan pa nute bakah thenawm khawveng an lo awm nual mai. Thil thlen dan chu ka hrethiam lo. 

A hnuah kan pa chuan a sawi ta a. "Ka lo haw lai khan i lo awm si lo, Duati leh Bawiha an lo tap nasa bawk si, ka ko che a, i reh hmak bawk si. Ka zawng che a, store roomah khan ka rawn lut a, carpet in phawk leh kawngkhar lo inhawng kha ka hmu ta a. Ka rawn chhuk ve nghal. Chhuatah torchlight i bula let bal chungin i lo mu a.  I lu chungah saw mi mak sawn a lo bih kur che a, mi râp khawp mai. Ka rak ve thawt kei pawh. Mahse, ka intipachang a, amah sawn min lo hlau bawk nen, keimah. Mai chuan ka hruai chhuak thei dawn lo che tih hriain ka chho leh a, mi dang ka va pun ta a ni. Tichuan, kan hruai chhuak che a. Saw pawh saw kan hruai chho ve ta nghal a ni. " tiin. 

Zan dar 8 a rik meuh chuan kan khaw pum deuhthaw chu kan in leh kan kawtah an khat hmur tawh. Chu thilmak danglam tak chu an hmu chák theuh a ni. Amah lah chu a hawi vual vual a, a khek leh tuar thin. Biak in engmah a hre thiam lo. "Ka pa" tih erawh fiah takin a sawi thei. A bak chu a riat nawi mai mai. Mi â a ni mai, ka sawithiam danin. Chhul tha lo â ruai, engmah hrethiam lo a ang ber mai. A cher em em a, a banrek phei chu hmuh hrehawm. Khawp a ni.  A balin a rimchhe takzet bawk. A sam lah a seiin a pheng em em bawk. A khawngaihthlak letling zawk. 

Kan vcp Pu Rosanga chuan, "Ngawi teh u, rindan ka nei ta tlat mai. He nu hi Zampuii, Pu Lianmawia fanu kha a ni lo maw le? A nih theih dan a awm tlat ania" a ti ta a. Chu chu kan lo rin ruk, kan sawi ngam si loh a ni. Pi Tlansangi tu leh fate an awm ve bawk nen. Kan pa chuan, "Engpawhnise, eng emaw tal zawng hmuh chhuah tur a awm ngei ang. Ka zuk lut leh ange" a ti a. A thianpa Remmawia nen in hnuaiah chuan an zuk lut leh a. Lehkhabu kawm sen, chhah lutuk lo nen an lo chhuak leh. 

"He thil hian engkim min hrilhfiah thei ngei ang" an ti a. 

Chumizan chuan tlaivar deuhthawin Pu Lianmawia thurûk chu kan ngaithla ta a ni. 

Pu Lianmawia: 

" Ka nu hoin kan hmeithai a, ka pa chu kum 18 ka nihin a boral tawh a ni. Tlangval chak leh taima tak ka ni a. Hnathawh ka zak hek lo. Ka farnu leh ka nute tan chuan theihtawpin ka thawk thin. Kan khawsak pawh a harsa lo reng a. Mhase, vanduaithlak takin ka farnu chuan sâwn pawmin raichehin a thi zui ta a, ka nu chuan a tuar na em em a, a at phah lek lek em aw tih theih a ni. Tichuan, ka nau boral atanga thla 10naah ka nu duhtak pawh chuan min boralsan ve leh ta a. Keimah mai ka ni ta. Ka mal ngawih ngawih mai. Mahse, ka mala ka khawhar lai em em pawha min hnem theitu pakhat a awm. Muanzovi a ni a. Ka bialnu a ni. An khawsak a harsa lo va, a pa hian min duh lo nasa khawp mai.. Fahrah ka nih tak hnuah phei chuan a fanu chu kei min hmu tawh lo turin a hrilh chamchi a, kei ngei pawh min vau thin. Mahse, kan inhmangaihna erawh a pung telh telh si. 

Ni khat chu kan khaw thenawm ramah sa chángin ka va kal a, he lai ramngaw hi an kal pawh zen zen lo bawk a, hlawhtlin ngei pawh ka inbeisei. Mahse, sa reng reng ka hmu ta lo. Mak ka ti khawp mai. Lunghnûr taka haw tuma ka intintuah lai chuan, ka thlang kawr te kamah chuan thil tle ver hi ka zuk hmu ta a. Saisawium keh mai mai anih ring chungin enfiah tur chuan ka kal ta tho va.. Leiah a chanve a lo inphum a, a chanve dang a lo lawr thung. Ûm sei tak, sawl lek lek, mak dangdai zet a ni a. A rit nalh bawk. A mawng chu mak takin a rawn pawngchhuak a, a ding thei lo tihna a nih chu. A rawng chu a hring lam lek lek, han lek kuala de sep sep hi a ni reuh a. A dangdai em mai tiin ka ak haw ve ta mai a. In ka thlen pawn ka vei zui lem lo. Mahse, chumi zan ka mangah chuan putar hmuihmul tuak vek tawh hi ka khum bulah dingin, "Tlangval, i thil chhar hi i hre chiang lo a ni. Khawvel thil hlu zinga man to ber pawl a ni asin.. Fimkhur hle rawh" a lo ti a. Ka harh zui nghal. Ka mangphan mai maiah ka ngai. Mahse, ka rilruah a awm ta tlat a. Ka vei ngawih ngawih a ni ber e. 

Chung lai chuan paihte sumdawng lo kal lai a ni a, kan thenawmah an thleng nghe nghe. Pakhat mizo tawng thiam ve ber chu ka ko fal a, Ka ûm chu ka entir ta a. A meng bial kawk kawk mai. "Kei chuan ka lei zo lo vang a, a lei duh tur ka hria. " a ti ta a. Kan inremsiam a, lei duhtur a hmuh hunah a hlawh ka pe ve dawn a ni. Thla khat zet a liam hnuah chu paihte chu pa sang zet nen an lo kal ta a. Ka helhhawlh kher mai. 

"Nuai 10 in ka lei ang e" chu pa chuan a ti a. Ka chil ka lem khawlh. Chutih lai huna Nuai 10 chu rapthlak khawpa tam a ni. Mahse, ka mawl bik lo va, "Nuai 20 " ka ti ta tlat a. Ka hralh phal lo takngial dawna a hriat vangin a pawm ta a. Pawisa fai ngei ka duh vangin an haw leh phawt a. Kar hnihnaah an lo lang leh ta a. Pawisa pawh an lo keng thlap.. Muanzovi nen kan duhthusam kan tihlawhtling thei dawn ta. 

Ka in leh lo chu ka tiral a, Muanzovi ka be bawk. Ihe loin min zui a tum hmiah mai. Tichuan min hre ngai miah lo te khuaah ka pem pui ta a ni. Chutah chuan chhung leh khat anga ka neihte ka bel ve a, in leh lo tha tak ka din ta bawk. Fanu duhawm tak kan nei leh ta zel a. Kan hlimna khan van a tawng hial awm e. 

Hun a kal zel a, Chulai khua ami ten an neih ngam loh Paheh ram chu lo atan ka nei ta a. A hminga hna kan thawh ve loh chuan kan pawisa ngahzia an hria anga, min rinhlelh kan hlau a ni. Kei hi huai lam hriatchian chak ka ni a, paheh ram pawh chu hriatchian ka duh vanga nei lui ngat ka ni. An hlauh ang em em anih ka rin loh laiin ka nupui a dam lo ta a. Khami zan kha ka la hrereng mai.. 

Buhsengin kan riak a, Bawihteii a muhil tawh. Ka mu tur zun zung chu a rak thawt mai a. Ka tlan chhuak nghal. Kan thlam kawta thing bul lian zet bulah chuan kan nu chu dingin a lo tawng mawlh mawlh mai. A mit chu a var vek  mai. Ka kuah lut ta a. Zankhuain kan mu lo. A phu zawk zawk reng a, a rawn rak leh thawt thin. Thil dik lo a awm ngei tih ka hria. A tukah erawh mak takin a rawn tha leh vek. Zan lama thil thleng engmah a hre lo. Buh kan seng leh a, a chak kher mai. Khua a lo thim a, zan a lo nih leh meuh chuan kan nu a danglam leh ta a. Amahah chuan awm ve dang an awm nj berin ka hria. Hlauh erawh ka hlau lo. Chhunah a tha vek tho si, hawn lah chu a duh bau si lo va.. A ngaihna tak pawh ka hre lo. Kar khat dawn lai chutiang a awm hnu chuan kan nu chu a lo chhe tawh hle tih ka hre ta a. A cherin, a hmel te chu a rapawm lek lek hial. Chaw a ei ve reng khan ka hre si a. Ka mangang ta a. Khuaah hawin mi dang ka han pun ta a. Kan nu duh lo chung chu kan zawn haw ta a ni. 

Ka hmangaih leh duhber, ka nupui chuan min kalsan ta. A va na em.. Tawrh theih zawng zawngah tawrh a har ber awm e. Kan nu thihna chuan ka nunkhua a tidanglam ta a ni. Hmeichhia ka hua a, hmel tha deuh phei chu kan nu vangin ka haw zual. Ti nge an ni hi kan nu aiin an thih zawk loh? Engvangin nge an la dam bik?  Tiin ka inzawt a. Chhanna ka hmu thei lo. Zan khat ka lungleng khawhar lutuk kan in hnung huana ka thut laiin zawngtah kung atang chuan hlimthla niawm tak hi a rawn vak thla zawi zawi a. Hlauh nachang pawh ka hre lo. 

"That vek la, i nupui chu a rawn kir leh ang" a ti a. Chu thu chu a sawi tak tak nge ka ngaihruatna tih erawh ka chiang ngam lo. Ka rilrua lo awm sa kha ka duhdanin ka nemnghet mai zawk niin ka hria. Tichuan, ka rilru chu a fim lo tial tial a, Sangpuii ka ru bo ta a ni. Ka sawi hmaih palh, In ka sak khan, "Rikrum thilah pawh tawmna tur" tiin sap ho style-in lei ka lai lawk a, a kalpawhna tur tha takin ka siam lawk vek a ni. Chu chu tangkai takin ka hmang chho ta a. Sangpuii chu chu hmunah chuan ka dah a, ka pawngsual nghe nghe. Ni 3 zet a dam a ni. Ni 4naah chuan a chal atanga zaiin a hmai vun ka hîk a, rapthlak takin a thi ta a ni. Tihsual erawh ka nei ta a.. Ka thiltihlai zawng zawng chu ka fanu chuan a lo hmu ve vek tih ka hriatchhuah chuan ka tlai tawh.. 

Sangpuii ruang chu ka in hnung huanah ka phum ta a ni. Chumi hnuah Rempuii ka ru bo leh a, Sangpuiii kha tuikhura a insuk laiin ka ru a, tuikhur thlang changel hmunah ka phuarbet a. An zawn khan an hmuh ka hlauh vangin ka thuhrukna velah khan keimah ka kal ta hlauh anih kha.tichuan, zan reiah inah ka hruai haw ta a ni. Tuman min hmu lo. Rempuii erawh a thingphur kha ka zui ru a, ramhnuai pilrilah ka thukru tlat a ni. Mabse, ani kha chu ka that lo, amah leh amah a intihlum a ni. 

Ka tuihalna chu a reh thei chuang lo, kan khuaa ka chet leh chuan min hriatchhuah ka hlau tawh si a, khaw thenawm leh khaw dang hla ve deuhah te hmeichhe tlahlang zawngin ka kal thin. Zan reiah ka hawnpui leh mai thin a. Ka ina bunkerah chuan ka khung thin. Nula panga zet ka that a ni. Ka tuihalna erawh a zual zel zawk. Mi ka ang pha ta lo tih erawh ka inhre si lo. Ka fanu chuan engkim a hriat ve vangin venthawn a ngai ta bawk nen, mahse, khawiahmah a sawi chhuah ka ring lo tho. Min hmangaih em a ni. Mahse, a mizia a hloh thung. Hlauhna nen a nun chu a hmang chho ta. 

Kum 16 a tlin khan a rilru a lo huai ve ta deuh bawk nen, "Ka pa, i thil tih hi a tha lo, police ka hrilh dawn" a ti ta mai a. Ka zâm ta hle. Rem ka ruat ta a. Ka fanu ngei chu ka khungbo ta a ni. Mi dnag bulah erawh Aizawlah ka dah tiin ka sawi thung. An awih reng bawk. Room thimah ka khung ta ngat ngat a, Aizawla ka fanu kana va zin anga min hriat te khan hmeichhia ka va zawng zawk a ni.. Zan reiah ka hruai lut a, Room thimah ka fanu hmuh laiin ka sawngbawl ta thin a. Chu chu nuam ka tih ber a ni. Ka fanu in tap zawih zawih chunga ti tawh lo tura min ngen pawn ka sim thei lo, ka uar sauh zawk. Hmeichhe pakhat phei chu thla 3 zet ka kawl hman.. Mi bo an awm zeuh zeuh avang khan mipui pawh an ralti reng a nih kha. Khang zawng zawng kha keima tih a ni. An ruang chu room thim chhuat chu lai khuar lehin chutah chuan ka zalh a, ka zut hnán leh mai thin. Hriat ngaihna. awm lo reng a ni. Ka fanu erawh a thih mai ka phal bik lo va, eitur ka la pe reng, a kuma kum ka khung takah chuan mihring a ang ta lo. A â ta hial a. A tawng ngai tawh hek lo. 

Hun a kal ve zel a. Ka inhrikthlakna chuan a vawrtawp a thleng chho ta nge keimahah nghawng a nei ta a. Nitin zantinin chhungrilah min kher ngut ngut a. Ka mi that tawhte ruang thisenin a bual chhuah vek ten khuma ka mu lai te hi min rawn kal hual thin niin ka hria. Hlauhna chuan min thunun fô a, awmze nei loin ka nun chu ka hmang chho ta. Ka fanu pawh ka ngaihtuah theinta meuh lo.. 

Tihtawp dan ka hre tawh lo va, ka awm zel dan tur pawh ka hre lo… " 

Chumi chin zawng chu Pu Lianmawia thuziah chu a ni. A inawhhlum chhan niawm erawh a hriat theih ta e. Pu Lianmawia thuziak chu rapthlak ti lo reng kan awm lo. Chu aia mak leh rapthlak zawk, U Zampuii, kum engemaw zat kaltaa an hmuh tawh loh, thi tawh emaw Aizawla awm daih anga an ngaih he lai hmuna dama a la awm ve reng chu.. A mak ti lo chu mi mawl an ni ngei ang. 

Eng nge a ei thin ang le? Hei zawng a chhiar tu ten ngaihruat ve tawh mai ru. Room thim leh rimchhe zeta kumpui linglet zet a damkhawchhuak thei kha a pa Pu Lianmawia thuruk haichhuah nan a ni mahna le.. U Zampuii chu Damdawiin lamah enkawl niin, kar hnih zet an han enkawl takah chuan a hmel pangngai a pu ve thei ta deuh. Tawng erawh a la tawng lo. 

"Pu Lianmawia khan sum thahnem tak a hnutchhiah ngei awm sia, khaw nge a awm ang le? " kan pa chuan a ti sur sur a. 

"Ka hre lo. Bakah kan ta tur pawh ni hlei lo" ka lo ti a. 

"Eng nge a nih loh ang? He in hi kan lei tawh alawm" a lo ti tlat. 

"Naktukah room thimah zuk en leh ila" ka ti a. A lo bu nghut. 

Duati leh Bawiha te thlamuang taka muhil thaw sâk sák chu lungawi takin kan thlir dun a… 

(A va hautauk reuh e 😁😂