Drose

D' ROSE…. (8)

Ziaktu : Toni Râlte

Teteii leh Nunui chuan Dinfela te pahnih chu maktih hmel zetin an melh tawn sek a. Diteii chu chhuah mai tumin a inher a, Dinfela rawn pen phei pâwkin a banah a chelh nghal. 

"Min thlah rawh" a ti vin thak. 

"Min huatna tur engmah ka ti lo. Min haw suh" Dinfela chuan a ti hrâwk a. Teteii te makti lutuk chuan tawng nachang pawh an hre lo. 

"Ka nu pasal fapa i nih vang ni loin, rei tak ka laka i inthup vangin ka hua ang che. Inhmelhriat kan ni tawh lo" Diteii chuan a ti fiah fel thlap a. Chuti taka tawngkam a thiam chu amah pawn mak a ti. Teteii chu a lo meng kâwk, unau an ni tih Diteii chuan a hrechhuak chauh tihna maw.. Engvang nge?! 

"Mam, eng nge a awmzia? " Nunui chuan chang fe hian a rawn ti ta a. Dinfela chuan Diteii banah a la chelh reng. 

"Ani hian min haw mek a nih hi.. " Dinfela chuan a ti nghut a. An pahnih lam chu hawi lehin, "Eng nge in rawn tih dawn? " nelawm vak lo hian a ti leh a. Diteii a tal aih aih. A chelh nghet ropui si. 

"Certificate ka mamawh a, min siamsak la ka tia. Mahse, kan rawn kal timing vak lo a nih hmel" Nunui chuan nèm deuh zawkin a ti a. A û hi a hlau ve a, suahsual a chhuah vak ngam lo. 

"Anih hmel khawp mai. Ka bialnu thar nen hian thil pawimawh tak kan la sawi zo lo va, min chhuahsan rih phawt ta che u" Dinfela aw chu a chang kher mai. 

"Bialnu a?! " Diteii leh Teteii chuan an ti rual thawt.. Dinfela chu za lo zeta nui hul hakin, "Aw ani hi ka bialnu a ni" tiin Diteii chu a lamah a pawt hnai salh a, Teteii leh Nunui mitmeng chu hmuhnawm tak a ni. Teteii ngat phei chu a thin a rim hluah hluah tih a lang reng mai. Nunui erawh chuan mak a ti takzet tih a hriat. 

Dinfela hmelah chimbuai a ngai thei lo tih a lan chian em vangin an chhuak ta hna hna a. Zawhna an ngah kher ang chu.. Teteii chuan a heh a pet fan fan, tah loh hram a tum. A thu hriat khan a deng na lutuk, hmanni lawka sex a hmanpui, zawi zawia hneh a tum khan a nau patil maw a thlan zawk a. Engkim chu a chiang kuar mai, a school kal tur a thlah thin te, a dawra a thawhtir te.. Engkim mai chu.. Nunui'n a biakna pawh engmah a hre lo. Amaha awma tah vak vak a chak kher mai. 

"Ka thlah ang che" Dinfela chua Diteii chu a melh a. 

"Mi tenawm tak i ni. I bialnu ka ni lo. Engvanga khatia sawi ringawt nge i nih. I va zak lo ve" a lo ti tán tân a. A tap lek lek mai. Dinfela chuan lainat hmel zeta melh ran chungin, "Ka bialnu chu i ni duh lo em ni? " a ti zawi sup a. 

"I nau ka nih hi.. Ka nu pasal fapa i ni" a lo ti tuar. 

"Unau nih i duh loh kha.. A ni lawm ni? " tiin a lamah a pawt hnai leh hrâwk. Diteii chu Dinfela âwmah a va bei thlawp. A lungphu chu rang tak a ni. 

"Unau ni zawk ang" a ti bah niai a. Dinfela a huatna lah kha a sawm khawm that leh a ngai hial. Thinlung takin a haw miah lo. A chhan a hre lo. 

"Ka thlah haw ang che.. Lo kal teh" tiin a kai chhuak a, Motorah chuan an thu ngawi kar. Diteii te in lam pan loin hmun dangah a tlan daih. Diteii pawn engmah a sawi hran lo. A rin dan sa kha a ni miau a. Kawngpui atanga peng pheiin hmun zawl nuam deuh, thing dinna hmunah a ding ta a. Ngawi renga an thut dun vang vang hnuah.. 

"Ka sawi ang. Ni e, a tirah ka nau i ni tih ka hre bik lo. Mahse, a hnuah ka hre ta a. A dik, ka hrilh lo che. Ka thiam loh a ni. Mahse, a harsa thlawt. I hria em? Hrilh che ka duh apiangin ka duhna che hi a lian zawk zel a, mi hrang daih angah min ngai la, unau kan ni lo tihah chiang la, inngaizawn ka duh a ni. Vawi tam ka hel ve tawh, he thil thlen loh nan hian, mahse, Dite, ka thei lo. Ka hre lo.. Ka duh che… ka duh che a ni" Dinfela chuan a ti ta mawlh mawlh a. Lungchim zetin Diteii chu a melh ngawih ngawih bawk. Diteii chuan a chil a lem khawlh. Sawi tur reng reng a hre ve lo. A hmaa a natna zawng zawng kha vawm bo ang diak a ni,. Ni e,dik tak chuan zantina a mangphan ve thin, dawr atanga a thlah haw loh changa hnual thin, mipa zinga mipa dik tak anga a suangtuah theih kha Dinfel a ni a. A suangtuahtu pawh amah Diteii chu a ni miau alawm.. Unau an ni tih a hriat khan Dinfela'n a laka a zep chu a thinrimpui emaw a tih laiin, an inngaizawng thei lo tura a ngaihna khan a vaw na zawk. A hrethiam duh lo lui mai mai alawm.. Pa taka awma patil nih tak tak a chák ta rum rum mai. 

"Min en rawh" a rawn ti a. A en ngam lo. A khabea dawmin a lamah a kuai her a. Chiang zetin mit pahnih te chu an inmelh ta kal mai. 

. "Ka ta i nih loh chuan rilru hah vangin ka thi thei hial ang" tih hrâwk pahin Diteii hmuiah chuan a fawp ta a.. Hmui pakhatmahin a la bawhthuah loh Diteii hmui chu a chesawn eih lo, a dawngsawng mawl tawp. Infawh awmzia a hria, infawh dan a hre lo. A hmui erawh a nem hle si a. Dinfela chuan zawite tein a nul a.. Diteii chu harh chhuak thutin a nam kiang vat. 

"Ti suh. Aih, ka duh lo. A theih loh.. Haw ang" a ti nghal chul a. A tap pur bawk. Chuti taka a tihlau chu Dinfela chu a inthiam lo takzet. Khawih chak si, khawih ngam si loin, "Ka.. Ih, pawi ka ti lutuk. Engmah ka ti tawh lo vang.. Mahse, khawngaihin sawifel ang" a ti bah nak a. 

"Sawifel tur eng nge awm.. Nang leh kei chu a theih loh" a lo ti hlar a. 

"A chhan? "

"I hria.. Unau kan ni.. Unau" a auin a au a ni ber. 

Dinfela chuan zawi te hian, "Thisen tel lova in unauna hian awmzia a nei lo ve.. Ka ta i ni tawh" a ti ta a. Diteii chu  a hmai hupin a tap tawp. A rilru a mangangin a buai em a ni. Tawnhriat pakhatmah a la nei si lo. A vawikhat hmangaihna kawng hi a bumboh lu deuh a ni. 

An hawn kawngah erawh a tu amah an tawng tawh lo. An ngaihtuahna an kawm a ni mahna.. Diteii te inkawtah chuan dingin Diteii chhuk tur chu, mit sen râma melhin, "Khawngaihin ka nau ni suh aw" a ti sup a. Diteii chuan a chhang lo. Ngawi rengin in chhungah a luhsan ta a. Dinfela pawh an in lamah a tlang chho ve ta nghal a. Mikea'n a dawr chu a lo buaipui mai ang chu. Hahchawlh a mamawh takzet. 

Lawma chuan vawksa a lo chan mek a, Teremi erawh chuan alu a lo vel ve tehmial. An rin aia hmaa Diteii lo haw chu mak an ti deuh a, "Vawiin chu kan bang hma a" a ti sep a. Roomah a lut nghal. 

"Diteij kha tap a ang tawp" Teremi chuan a ti  a. Lawma erawh chuan a lo en chîk lo bawk a, a hrethiam lo. A tah ngawt chhan tur a hre hek lo. 

A uniform pawh phelh loin khumah a bawk thlawp. Lukhamah chu a hmer ngawt ngawt a. Tah rik loh hram a tum. A ngik faih faih a. A chhungril chu sawi thiam theih si lohin a na ngut ngut mai. A ril pawh a tam hek lo. A u te ngaih a tha lo ang tih a hlau si a, a inhlip a, inbual turin bathroomah a lut zui ta a. Bathroomah tui herh hawin a tap leh phawt. Rilru paukhauh deuh si, ném em em si a ni a. An unauah a naupang ber, a u chiah nen pawh kum inthlau tak an ni. Nu enkawlna dawng miah lovin a u in a enkawl selian a, naupangtein a pa a sûn tawh bawk. A û chiah lahin a tibuai reng a, tunah hmeichhia a nih anga a mipa dream ve thin chu a nu pasal fapa a ni tih a hre leh ta si. Ani naupangte tawrh atan chuan a na tawk êm a ni. A mit bui lâk chu tihreh dan a hre si lo.. A buai ru hle. 

Zanriah an ei dawn chuan Lawma chuan a rawn ko va, "Ka ril a tam lo" a lo ti a. A ril chu a tam khawp mai. Mahse, engmah a ei châk lo. A luak a chhuak ut ut zawk. Khumah a mu a. Chunglam melhin Dinfela thusawi zawng zawngte kha a ngaihtuah let a.. 

Lawma chaw ei kham kut hruk hul lai chuan a phone a lo ri a. Teteii a ni. 

"Au Lawm, Zodingpuii kha i hlap lo anih chuan keiman ka rawn hlap ang. I hria em? Ka nu pasal Pa Vanlala fapa Dinfela nen an inngaizawng" a rawn ti bawrh bawrh mai. 

Lawma pawh a hrilhhai kher mai. 

Teteii chuan a dah leh hmak. Lawma chuan call back a tum a, a pick up duh tawh thak lo. Diteii roomah a lut a, khuma mu meng reng Diteii chu zuk melhin, "A dik em?  Ka thu hriat hi. Ka nu pasal fapa nen in inngaizawng em ni? " a ti ta a. A thin a rim hran lo. Mak a la ti èm a ni. 

"Aih" a lo ti hmiah. 

"Teteii'n a rawn sawi. Sawi chiang teh" 

Muangchangin a tho va, A u Lawma melhin, "Ani chu ka unaupa a lawm.  Engvangin nge ka ngaihzawn ang? " a ti a. 

"Mahse, i mittui kha.. " Lawma chuan a lo ti vat.. Ni e, a mittui a lo tla leh tawh. 

A nui lui sak a.. "Patil ka ni alawm.. Bialpa ka nei ngai lo" tiin a heh a pet a, a hawisang vah a. "Hmeichhia alawm ka ngaihzawn thin" a ti leh a. Lawma chuan a nau cheiza chu mak ti zetin a melh reng ringawt. 

"Dite.. I tha em? " Lawma chu a la rui chhe lo bawk a, Diteii awmdan chuan a tihrilhhai em a ni. 

"Ka tha.. Teteii chu hrilh la, Diteii chuan hmeichhia alawm a ngaihzawn ti ang che. Chu chu ani lawm ni a duh" a ti sap a. Lawma chu a chhuahsan daih. An in kawtah chuan a ding vang vang a. Van lam a hawi a, arsi te chu an lo de iarh a. Thla lah chu a eng viau. 

"Diteii chu patil alawm anih" ama hriat tawk lek chuan a ti sap a. 

Pu Vanlala chu a vei nghut nghut a. An room kawngka chu a lo inhawng a, Dinfela chu a rawn lut a. 

"Ka thu hriat hi a dik em? " Pu Vanlala chuan a ti nghal tâwng. 

"Eng thu nge" Dinfela chuan zamna nei miah loin a ti a. 

"I nu fanu nen in inhnaih hle tih hi" a awki chu a ring hran lo, mahse, Thudik a hre duh hle tih a chiang. 

"A dik ang ka ring" a lo ti nghut a. 

"Engvangin nge? A chhan ka hre duh"

"Ka pa, ka nu lung êm kan phun hmaa nupui dang i nei leh thei anih chuan, engvangin nge ka nuhrawn fanu chu ka hmangaih theih loh bik ang? " Dinfela aw chu zawi teh mah se; Pu Vanlala bengah chuan ring tak a ni. 

"Hei hi a thleng thei lo.. Mama.. "

"Ka thlentir miau sia lawm.. Chuan, ka duh duh ka ti dawn a. Khawngaihin lo inrawlh suh ang che… " Dinfela chuan a ti bung nghut a. 

Pu Vanlala hmai chu a sen tâwn tâwn mai, "I pa hi ka mualpho hle dawn anih chu" a ti a. 

"A fapa chuan a pa a chhun hle mai.. An ti ngei ang. Tunah pawh hian hmu turin ka kal dawn a.. Ka pa, khawngaihin ka tihtur hi min tihtir ang che.. " a ti ta hmiah a. A chhuak zui nghal. A pa laka a lungawi lohna zawng zawng nen zanin zet chu Dinfela pawh a rilru a mang vek. In atanga a chhuah chuan Diteii te in lam a pan a. Teteii'n Lawma a hrilh vek tawh a rin vangin va luha buaina va siam kher chu tulin a hre lo. Diteii chenna in chu a thlir ngawih ngawih ringawt. 

Rem thei lo, thinlung inhnaih tawn em em si te hmangaihna kawng hi a la bumboh telh telh dawn nge chinfelin a awm vat ang.. Chunglamin a hria ang chu. 

Mami chuan Sangtea phone chu a ban dèk dêk a. An pa muhil hnar burh burh chu a harh a hlau kher mai. Ni e, Kar khat vel lai chu Sangtea leh Faki te chuan thawm an nei lo,mahse, chutimaia an inthlah thut chu rin harsa a ti tlat si a. A rukin thu an thlung a nih rinna a nei tlat. Sangtea chuan pattern a lo thlak leh tawh a. Mami chuan a risk nasa, a dik thei si lo. A thinur hlur tawh mai. Tih dan tur a ngaihtuah ta neih neuh a. Mahse, a rin ang ni ta lo se, an pa chu a hel daih thei tih a hre ve kar. Sangtea'n ngaihzawng a neihsan mai chu awih harsa a la ti fô!  A chhuanlam lah kha a awihawm loh nasa si,. A theih tawp chu chhuah vein a inhre si a. A tling tawk thei ngang lo a ni mahna. 

A tuk tlai eirawng a bawl laiin Ditei'n a lo call a. 

"Mami, kan va inhmu khât tak.. Duati a tha maw, ka ngai eee.. Ka hman veleh ka lo leng ang" a rawn ti a. Thil dang an sawi nual hnuah, Thutak deuh zawkin Diteii chuan, "Ka lo call chhan ber zawk che chu, ih.. U Sangtea vel a nia. Ih maw, vawiinah Bena nen a patea te hotelah kan rawn peng haw a, U Sangtea leh hmeichhe pakhat hian room an lo book a, kei chu chokaa ka awm lai a nia, mahse, ka hmu hman. Bena pawn a lo hmu ve a, min zawt a, a chhan ka hre si lo va.. " a ti ta a. Mami a chhing sawk mai. 

"A va mak awm ve aw.. I hmu sual a ni lo maw? " a ti naa Faki nen bawk an ni ang tih a ringhlel lo. 

"Hmu sual nang aw, min hmu ve lo hlauh zawk a. A kalpuinu chu sang lam deuh, hmel pawh chhe vak lo, inhnawih sen ve deuh ania' Diteii chuan a ti niah niah a. Faki hmel a mitthla nghal. 

Diteii thil rawn sawi vang chuan chaw pawh a ei tlem kher mai. Sangtea chuan chaw ei hma deuh khan a rawn bia a, hnaa an laklawh thu leh chaw chu hotela a ei mai tur thu a rawn sawi anih kha. An ni hna sang pawh thawk lo khan khaw thim thlenga hna neih thu a awm lo. A chhungte bulah erawh a sawi duh lem lo. 

Puia chuan lo call tu chu makti zetin a melh reng a, ber kher a a ti rilru a, a lawm ru viau bawk. 

"Aw Dite" a ti a. 

"U Pui, thlalak leh ka duh. Ka rilru ka thlak a.. " a rawn ti ta a. Puia a khi suk mai. Diteii a rawn let leh ta. 

Diteii'n a hna a bansan lawk chhung reiloteah khan a hna pawh a kal tluang hleithei miah lo. Model pakhat Remruati nen an thawk dun naa duh angin a hit tlat lo. Remruati chu a chhe lo hle naa ngeitu a ngah tlat. Teteii nen an mizia a inan bakah a rui chhe thei riau a, mi pasal pawh a kawp hreh lo chuan mi ngaihsanna tur a ti nep vek. A nun a uluk tlat lo a tin ni. Teteii tak hi chu a thla a laksak vak lo, amah aia lar zawk Johny nen an inkual deuh zawk a, mahse, a vui hran lo. Diteii a nei leh tawh dawn alawm.. 

Dinfela chu a thinrim bur mai. Diteii hmel hmuh tur awm ta lo chuan a mood zawng zawng a tichhia a ni ber mai. Mahse, han rik hluta han tihlan vak a rem chiah si lo. Office ah a tawm deuh tlawk tlawk mai. A thawh chhunga a hlawh erawh pek ngei a tum. Diteii chu palzam chi niin a hre lo va, engti kawng zawng mahin a dawrah a thawk duh tawh dawn lo tih a chiang. 

Bena pawn Tki a then tawh. A mize dik tak a hre chiang ta bawk nen. A tuar ve reuh khawp mai. Class xii em pawh an la pass lo va, ngaihzawng an la runthlak lutuk chu a tha tlat lo. Diteii pawh hmangaihna avangin a buai chho ve ta chu a ni der mai. Mahse, tal buai loh hram tumin a kawng thlan a zawh dawn chu a nia. Eng tak ang ang maw.. 

Lawma te nupa pawh khawtlang hriat khawpin zu zuar an ni ta a, veng chhung an titawp tan viau mai. Khawtlang hruaitu ten an ngaithei lo tan ta viau. Veng chhung atanga hnawhchhuah èm chu dikin an hre si lo va, vawi hnih lai an zu zawrh bansan turin lehkha an pe tawh a. An zawm duh reng reng si lo. An mit a kham tan ta viau. 

Puia chuan Diteii chu mak ti zetin a melh a, "Chutiang lak chu i duh tlat a maw? " a ti a. Diteii a bu nghat. A nui sáng bawk. Tomboy ang baka lan a duh ta miah lo chuan Puia rilru a tibuai viau. Tin, a hma ai khan a lang pain a kal dan, a tawngkam engkim chu mipa tur hmeichhiaa piang tihtheih chiah chiah a ni. Kar reilote chhunga Diteii lo danglam ta chu a chhan a hre si lo, rilru buai ru tak chungin Diteii rawtna chu a pawmsak ta tho va. A photo a tlangzarh zanah chuan a maka maka tamin Tleirawl rual hoin an raen comment..!  A tla na takzet. Mipa chhe lo leh pa tak tak aiin Diteii chuan fans a ngah ta der mai. Mahse, bialnu a neih awm hriat a ni lo va; a pa tak tak em tih pawh hrechiang an awm lo. Dinfela nen an inhmuh lohna a rei ta viau. Hma tawkah school a kal thin. Dinfela hmu hman lo tawk velin. A number a block bawk. Thil tam tak ama tawkah a ngaihtuah ve a, chu bak chu kawng dang neiin a inhre lo tlat a ni. Mahse, a ngai thin. A rilru mil tawka kawm dan a thiam a, a hlimpui zawng pawh a hlimpui ve leh mai thin. Bena bak neih a nei ta hauh lo mai. Lehkha a zir nasa ta bawk, mahse, a û te zu zuar chu an zualkai telh telh a, chu eraeh chuan a kap deuh. Tihtheih lah a nei mang si lo. Teremi lah hi a rai thei lo nge a thau mum kûng reng mai a, zu in dan tawk a thiam ve tan bawk nen, a itawm chho viau mai. Lawma erawh a chhe zawr telh telh thung. 

A u pasal Sangtea leh hmeichhia a hmuh kha a ngaihtuah leh zauh thin a. Ngaihzawng nei tur chuan a ring phal chiah lo naa, a rilru kilkhatah erawh ngaihthat lohna a nei tho. Ngaihzawng a nei anih chuan a haw viau ngei ang. 

"Dite, vawiin chu in be lawk ang" Teteii msg chu a chhiar nawn zing khawp mai. 

Engvanga hmu duh tlat nge maw a nih le.. A hmu peih lo viau asin le.. 

A school bang chu Teteii sawi Restaurant lam pan chuan a kal nghal a. Teteii chu a lo thu reng tawh. Coffee a lo in mek a. Diteii chu ngawi rengin a va thu ve. 

"Puia hnenah i let leh ni maw? " a lo ti nghal a. 

"Aw" a ti tawi tâk. 

"Ka sawi tum chu thil dang daih, Dinfela khan ka pa te bulah nangmah nen inngaizawng angin a sawi a. Ka nau i nia, hetia miin an ngai tur che hi ka duh bik lo. Ka pahrawn lah a thinrim khawp mai. A haw viau chein ka hria. Chuvang chuan, ka pahrawn  hnenah û anga i en zia leh i ngaihzawn loh thu sawi ang che. Ka nu pawh i tizak lutuk alawm" a ti nghal bawrh bawrh a. Diteii a thu ngil awt. Dinfela'n chutiang chu a sawi anih chuan ti nge rawn hmuh a tum miah loh? 

"Ka sawi tur awmin ka hre lo. Amah Dinfela buaina a nih chu" a ti a. 

Teteii chuan, "A ngaizawng che mi? " nem deuh zawk hian a ti a. 

"Aw" a ti leh hmiah. Teteii a ner sak. 

"Chuan nang pawn i lo duh ve a maw? "

"Ka hnar avang lawm kan inhmuh ngai tawh loh" a lo ti a. 

"Dite, thil hi a tha dawn lo tlat. Kolasib-ah zuk awm la a tha ang. Mi chhungkua i chawk buai dawn tlat. Hei hi hrilh che ka hreh viau. Mahse, ka sawi mai ang e. Ka pahrawn chuan Dinfela nen a hmu dun che u anih chuan, Dinfela hi hnawhchhuah a tum a nia" a ti ta a.  

Diteii a ding ta nge nge a. 

"A hnawtchhuak lo vang" a ti sap a. 

 Engmah sawi tawh loin a chhuak daih. Teteii chu milim angin a thu khawng reng mai. A thangkam chuan a thawk tha turah a ngai. Mipakhat la hmuh a ngai. 

Dinfela dawrah a kal a. A office a pan nghal. A buai lohna tura a lo buai ve chiam chu engvang nge tih a hria. Dinfela hi a duh a ni. Sex an hman atang phei kha chuan hloh a tum miah lo. Zawi zawia hneh a tum takzet. Mahse, a laizawn ngei a rawn tlazep a. A ngaithei hlawl lo. 

"Inbia ang" Dinfela thil type lai chu a rawn hawi chhuak vat.. Diteii avang nge a hmel chu a pawr fap mai a. Mut a hmu tha vak lo niin a lang. 

"Eng nge" a lo ti hmuk a. 

Zawi muanga chaira thuin, "Diteii nen kan inbia a, a nun atanga kalbo tura hrilh tur chein min ti a ni. A hua che a, kei chuan ka pa te nen he thil hi amah Diteii awm laia sawiho ka duh ania. Mahse, Ditei chuan a duh lo bur.. Ka nau a nia, a nun a hrehaem sa tawh nak alaia i va zar chhen hi la phal lo" a ti mial mial a. Dinfela chu a lo nui hawk. 

"Awihsak tur chein min duh tihna em ni? " Teteii en kar chung chuan a ti ta a. Teteii chuan Dinfela hmuh lohin a kut a hum ruh hle. 

"Min ring rawh. Dawt ka sawi lo. Amah Diteii ngei pawh zawt rawh. Hnaih tawh suh, bansan rawh" a lo ti thawt. 

"Ka hnaih hleinem. Hun thawl ka pe rih alawm.. Ka be ngai hek lo. " a lo ti mawl tawp a. 

"Nia, nakin zelah pawh Diteij aiawhin ka ngen lawk che. Ka nau nunah hian inrawlh tawh suh. A nun tichhe suh.. Class xii te saw pass ve phawt rawh se.  Chutiang anih loh chuan AU Lawma sawn Hmun danga awmtir a tum ania.. A hmu dun che u anih chuan Diteik saw a thawn bo dawn" A ti ta a. Dinfela hmel chu a danglam deuh. 

"I nau i hmangaih tak tak vang nge nang aiin a tlatlum ang tih i hlauh vang zawk? " Dinfela aw chu a thûk hle. 

"Ka nau a nih saw. A chang chuan a lakah tisual thin mah ila, ka nau a ni reng tho. Tin, hmun dang a awm i duh mi? Class Xii pass lo va, hmun chengker taka khawsa turin i phal em ni..? " Teteii chuan a ti leh hmiah hmiah. 

Dinfela chu a ngawi ta reng a. A rilru a buai ve deuh. Teteii pawh chuan a thil sawi chuan hna a thawk tha tih a hriat vangin ngawi rengin a chhuahsan ta a. Pawna a chhuah hnu chuan Lawma a call zui nghal. 

"Ngun takin lo ngaithla rawh. Dinfela leh Diteii a hmuh dun rualin ka pa hian kei leh ka nu hi min hnawhchhuah a tum ania. I nau ka nia, ka nu pawh nangmah hringtu. ani. Rethei taka kan khawsak chu i phal ka ring lo. Chuvang chuan, Diteii kha khuahlhirh viau ang che. Kan tana i tih ve theih tawk a nih chu" a ti mawlh mawlh a. Lawma tawng ve hmain a dah leh daih. Lawma rilru hi chu a hria, a rilru a bung a, tu thusawi pawh a ring nghal tawp thin. Tikha chuan Dinfela leh Diteii tan kawng a ping tan viau tawh ang le.. 

"Hotela inhmuh hram kha a la ngai fô a ni maw? ' Sangtea melh chungin Mami chuan a ti zawi sap a. 

"Tu maw? " a lo ti hû. Diteii thusawi kha a awih thlap rualin fiahna hmuh a duh a, Sangtea hriat lohin a thawmhnaw a check nghal. A lo fimkhur seng lo nge hotel room an bookna receipt a hmu leh ta nawlh mai. A rin dan kha a ni reng a. 

"Ka hre lo emaw ti suh. Chuan, ka sawi lawk tawh a. A thleng leh anih chuan tiin. Ka chhuahsan dawn che. Zaninah erawh Duati a damsam loh vangin naktukah ka chhuak ang. Ka hrilh sa che a nih chu" a ti ta khawl khawl a. Sangtea chu a khap fuk fuk ringawt. Engkim a lo hre leh vek a maw?!!  Zan dar 9 velah in atanga chhuakin Faki a call nghal.. Thil pawimawh tak a sawipui a ngai tlat a ni. 

Mami zing tho chu a mit a bui lâk mai. Ni e, zanah khan a tap nasa a, a pasal chhuah leh hnu te khan a fanu melhin lainat takin a thlek vawng vawng a ni. Sangtea mawlh chu a ni mak a tih em em.. Engtin nge hetiang mi hi a nih theih? An inngaihzawn chhung zawng pawn pelhena nei ngai miah lo kha a ni si a. A mak a ni.. 

Diteii chu chawlh anih vangin darthlalang nawt turin a inpuahchah a. Chawhnu lamah Mami te ina va len a tum nghe nghe. Eirawngbawl chu a hmanhmawh duh lo mai. A rilru ippik zet tihthawl tumin a zai rât rât a. A u Lawma te ho erawh an factory lamah an liam diak mai. A thawventhlak a tih  rualin a khua a har dûk mai. Bena tal awm se tia call a tum lai mekin Sangtea'n a lo call a. 

"Aw.. " a ti a. 

"Dite, Lawma te an awm em? hei mami'n accident a tawk a. Tunah Civil Hospitalah kan awm mek,. ' a rawn ti ta a. Diteii a ding châwih. 

"Engtia accident? "

"In chung atangin a tla thla a. A lu a sawh na khawp mai. Dite, mihring kan inchan lo mai ang tih a hlauhawm. I u te nen lo chho vat ru, i nu te pawh hrilh rawh" Sangtea chu a hmamhmawh hmel kher mai. Diteii chuan a phone chu a thlauh tawp. A hamhaih vek. A harh chhuah chuan hmanhmawh taka insiamin Teteii a call pah a, Lawma erawh a call tlang thei miah lo. Teteii te pawh a nu nen an lo kal ve dawn e. Bena a call a, han hruai turin. A rawn thleng phei rang viau. Vung zetin Damdawiin lam chu an pan ta a. 

Mahse, Dite, i tlai..!  I tlai ta.. 

Mami chu a lo thaw tawh lo. A ruang an lo singsa mek tawh. Diteii hrilhhaizia leh thlabarzia chu hmuh theihin a lang. Tah nachang pawh a hre lo. A tawt vek. Mami ruang chu a melh ngawih ngawih ringawt. Awm ve dangte chu an tap hawm hawm a. Diteii chuan Mami kutah a chelh tlat, phelhsak an tum pawn an phelhsak thei lo. An in lama an phurh phei pawn a chelh tlat. Ni e, a thlah phal lo. Mami hi a nung leh dawn. A thi lo.. Engkim chu a tan mumang buai nuaih nuaih ang a ni. Dinfela nge Bena nge pawh a hre lo, chu chuan a rawn pawm chhuak a, khawi hmunah emaw a kal pui a, "Dite.. Tap rawh.. Tap bawrh bawrh rawh.. Tikha chuan i â mai ang" a lo ti a. A tap thei si lo. Chu pa bawk chuan Mami bulah a hruai leh a, thla te a laksak a. Mami chu thingrem chhungan an dah a, hawn a tum pawn an phal si lo va. Lei khur chhungah an thlak thla daih a. Zuan thlak ve a lo tum a, mi pakhat bawk khan a rawn chelh bet tlat a, khawiah emaw a kalpui leh daih.. 

A harha a men chuan Mami thih atangin ni 3 a lo liam tawh. A vawi khat nan Mami sûn nan nasa theihtawpin a tap ta a nih kha. A tap zo thei dawn lo emaw tih tur hiala nasain a tap. Mami kha a thi tak tak ang tih rin harsa a ti. Engmah a ei thei lo va, a taksa pawh hmuh theih khawpin a chhia. A awm awmin a awm ve tawp. Dinfela'n a rawn awmpui thin. Kal bo turin a ti thei lo. Dinfela bulah chiah a him. Lawma te pawn tihngaihna an hre lo. Huanah amahin dar 2 bawr velah te a chhuk a, Mami a ko thin.. A mumang chu a thanharhsan thei si lo. 

Mami thih cham a thlen chuan, A inbual fai a. Thawmhnaw fai inbelin, zangkhai takin in a chhuahsan ta a. Tuman a kalna tur an hre lo. A kal zel a. Building lian tak, Uniform ha te lo awm nak nakna hmunah chuan a lut ta a. A mi hmuh tum hming chu sawiin an kawhhmuhna lamah chuan a kal ta a. Kawngka chu a kik dat dat hnuah lo lut tura rawn titu aw a hriat chuan a pen lut ta. 

"Nula, engtin nge ka puih theih ang che" tia nelawm taka lo betu mitah chuan a melh ran. A huhang natzia chu an sawi ai daihin a nasa zawk a nih hi… 

"PI AMANDA, khawngaih takin min pui rawh. Ka u kha thah a ni" a ti tham chhal a. Amanda assistant Samsona chu a rawn kal hnai a. Tuisik a rawn chhawpsak a. A in khawlh khawlh mai. 

"Hahdam la, i sawi tum ber chu hmanhmawh miah lohin min han hrilh teh le" Amanda chuan a ti a. A aw chu a la nelawmin puih chak ngawih ngawih mitmengin a rawn melh bawk. 

"Ka u a thi a. Mahse, an that a ni. An that.. A pasal leh a bialnuin" a sawi zo thei lo. A tap khur ta ngat ngat a. Amanda chuan Sama melh chungin, "Sam, Hna hautak tak kan nei leh dawn a nih hmel.. He nau nen hian inanna kan nei i ti ve em? Ka puih châk zawng tak a ni" a ti sap a. A hmaa tleirawl tap hlawp hlawp chu en lehin, "Naute, insum miah suh.. I tan kan awm alawm.. Engkim a tha vek mai ang" a ti a.. Diteii kuah turin a chair atang chuan a tho ta nge nge a.. 

(Eirawng bawl a ngai leh ta 😁❤