Drose 9

D' ROSE… (9)

Ziaktu : Toni Râlte

Zan dar 7:05  chiah chiah a ni. An kawngka chu an rawn kik dat dat a. In leng neih a hun tan tawh a, chutiang turah chuan an ngai. Nu ber Pi Hmangaihi chuan, "Lo lut ru" a ti a. Kawngka chu rawn inhawngin, Hmeichhe hleitling zet zawt, zahawm taka inthuam,  hmel tha fahran leh amah aia sang hlek tur mipa, hmel zahpuiawm lo tak te chu an rawn lut hlawl mai a. Hmuh tawhna chu an nei naa tu te nge tih erawh an sawi thei mai lo. 

"Eng nge in duh tak? Lo thu ru" tiin Pi Hmai bawk chuan a lo dawngsawng a. Thutthleng sei pakhatah chuan Naute duhawm zet, chum biang hi an monu chuan a lo pawm mek a. Pa ber erawh hahdam hmel zetin a thu thung. 

"Amanda ka nia, Hei ka thawhpui Samsona " tiin nula chuan an inhmelhriattir phawt a. Alice-i chuan rang deuh hian, "Ka hria che u.. Ehe.. Awii ka ngaisang lutuk che u" a ti chul a. Pi Hmai mitmeng erawh a buai deuh. 

Pa ber chuan, "Eng nge in duh tak? " a lo ti dam thluam a. 

"Englo ania.. In mo nu thih dan chungchangah thil felhlel a awm nia hriain a nauin chhui turin min rawn ngen a. Thil rawn zawtfiah tur che u in kan lo kal a ni" Amanda chuan a ti dap dap a. 

An hawi phâwk nghal hrû mai. Sangtea chu a nuin rooma a awm chu a ko chhuak nghal a. Malsawma leh Maliani te pawh an rawn lang ve nghal zat. 

"Tu a nau maw? " Pi Hmai chuan a ti a. 

"Zodingpuii kha a nia.. Bultan dan tur a váng riau. Ruang lah phum a ni daih tawh a, engpawhnise kan hriat duh chin chu min hrilh thei tho turah ngai ang" Amanda chuan a ti leh a. 

"Chhui a ngaihna ka hre lo. Ngai nise kei hian report ka thehlut ang. Diteij chuan a tuar thiam lo lutuk a, a zeldin kual anih ka ring.. Khawngaihin he thil hi chu ti tlang lo mai ru.. Rem ka ti lo" Sangtea chuan a ti ta hmiah hmiah a. Amanda chuan chîk zetin a melh a, Sama pawh chuan mi dang ho chu a mitmei ru ve reng tho. 

"Min hrethiam la, kan hna a ni tlat. Felhlel a awm lo anih leh a tha a ni mai a.. Kan hna min thawhtir rawh" Fiah zet hian Amanda chuan a ti ta a. 

Pi Hmai chu a lungawi loh hmel kher mai. Pa ber erawh chuan eng emaw ngaih tuah hmel a pu thung. Mi dangho erawh an phâwklék ti mai ang, an phâwk hrû reng mai. Mami thih dan tak chu khunkhan takin a han zawt ta a. Sangtea chuan thinrim insum tih hriat tak hian, "Aw le, ka'n sawi ange. Ka nupui a ni a, hetia mi zawng zawng hriata puanzar te hi ka duh vak lo asin. A thih dan a rapthlak deuh bawk nen. Ni e, khami zing khan a insu a, bal bawmah a thawmhnaw suk chu dahin in chungah a chawi chho va, zep loh chuan a thawh hlim atang khan lungawi lohna nei niawm takin a tum bûr reng a, ka ngaih a tha vak lo. Ka nu nen an inkhik khak leh anih ka ring deuh a. Chutia in chunga a chho chu ka zui chho a, a thinrim chhan zawh ka duh vang a ni. Thawmhnaw chu a pho mawlh mawlh a, 'Lungawi lohna i nei mi? ' ka ti a. Ka va hnaih a. 

'Nei lo' a lo ti hmuk a. Kei hi hmeichhe thlem thiam chi vak ka ni lo va, an lungawi hun nghak mai thin ka ni. 'Nih chuan nakinah i lungawi hunah min hrilh dawn nia' ka ti a. Ka chhuk san leh ta mai a. In hnuai ka la thleng hman lo tihin a rak tuarh a. Ka tlan chho leh ta vat. Engtin chiah nge a tlak ka va hmu hman lo a ni. A lo tla thla tawh. Ka rin dan chuan khatia a puan pho kha lungawi vak lo nen kawng a en tha lo ang a, cubic lung kan dah nual bawk si a, a inchhuih anih ka ring. Khami a petek kha a tla a ni ngei ang. Tlak dal chu kan siam ve tho naa, puitling tan chuan a hniam deuh bawk nen,. Ka zuk tlan thla nghal a, a biak theih tawh loh. Thisen a chhuak nasa si a.. " tiin a nupui thih dan chu a sawi ta a. Amanda chuan a ngaithla uluk kher mai. 

"Anih in nu nen tun hnaiah buaina in nei reng em? Mimal nun angah te? " rinhlelhna tel miah loin Amnda chuan a ti a. 

"Nei lo.  Kan nei ngai lo.. Zep thu a cheng lo, hman deuh khan hmeichhe pakhat nen kan inzui ve deuh a, ka sual vang a nia. Ngaihdam ka dil a, min ngaidam a, ka sim ta hmak a ni.. " tiin Faki nen an chungchang chu a sawi ta hmiah a. 

"I nu nen hian an inngeih vak lo em ni? " Pi Hmai han melh zauh pahin a ti leh a. 

"Ngeih loh pawh a awm lo.. Ka nu hi a thinchhe ve a, han inhnial chang te chu an nei ve thin alawm" a lo ti leh thliam a. Amanda pawh a bu nghat nghat mai. 

A tho va, "Engpawhnise, In chung chu kan han en kual ve thuak thuak ang e aw.. Tihtheih engmah a awm vak rih si lo va" a ti a. Sama nen an inzuichhuak nghal. Sangtea chuan a hnu lawkah a han zui ve nghal a. 

Eng em em chu an han hmu lem lo, Sangtea sawi ang khan cubic lung chu a lo let rum tak a, tlak dalna an siam pawh a sang falua lo. Mau hmanga siam a la ni zui a. Tlangban chu a sirah a kual phei zai zai a, a puan zar tur han in chhuih zauh chu tlak a awl viau ngei ang. Amanda chuan chik zetin a tlakna lai nia a sawi chu a en kual a,a tlakna zawn pawh a zuk thlir. Zan a ni a, a hmuh fiah vak theih loh. Engmah sawi vak tawh loin Sama nen chuan an haw ta a. 

"Chuti maia finfiah theih a ni dawn hlek lo mai. Mita hmutu an awm miau si lo va.. Tuin nge a pasal duhlaiin a namthla tih ring duh ang? " Motora an chuan lai chuan Amanda chuan a ti sap a. Sama chuan, "Chu!  A nam thla ngei tih chu i chiang leh der tawh mi? " a lo ti vat a. 

"Sam, i inthlahdah sâwt riau, ngaihtuah kir lawk teh. Cubic lung kha in chung lai hawlah an rem a, awmze nei taka rem erawh a ni lo. A tlakna lama puan a va zar tur kha in chhuih mah se; tla thla tur chuan va petek thui a ngai lutuk. Tin, a tlakna zawn taka tlak dalna kha eng emaw ti talin a âwn emaw a tliak ngei tur a ni dawn lawm ni? Chutiang reng a awm hauh lo. A nghet tha em em vek. Khami tlak dalna chung zawna tlangbana puan a pho mek laiin thawm nei miah lova a hnunga lo pen mek chuan a nam thla tih a chiang reng. Diteii kha a lo kal tlai a ni. A ruang tal hmu hman ila, a ke ka en châk khawp mai.. " a ti ta a. Sama chuan ngaihsan hmel fahranin a lo melh a. 

"Diteii te kha ka lainat reuh khawp mai" Sama chuan a ti a. 

"Kei deuhin" a lo ti nghat. Amanda in lamah an tlan tlang a, "Zanin chu ka lo riak mai dawn mawni.. Ka ngai riau che" an chhuk hnu chuan Sama chuan a ti a. Amanda a ding chat, "Mikhual room ka nei alawm.. I thu thu" a ti a. A kal leh nghal. Mahse,  hnunglam atang chuan a nui a ni tih Sama chuan a hre thei tlat!  

"I room kawngka i kalh loh phawt te chuan" a ti sup a.. 

Diteii te inah chuan an pungkhawm chak kher mai. Sangtea thinrim inhrosa thawm lah a ring bawk. 

"Zodingpui, engvangin nge min râwn miah lo va, report i lo thehluh? Amanda inrawlhna chi pawh a ni lo. I va zak lo ve, ka nupui ania, ka duh chuan report ka thehluh ve mai ang.. " a ti khur khur a. Malsawma'n a chelh bet bawk. Lawma chuan Diteii chu a chelh ran bawk. Teremi erawh chumi tum chu a mak ve teh tlat, Diteii lamah a tang ve teh mial a. Tlaiah khan an chaw ei laiin Amanda a biak thu a sawi a. Lawma nen a ngaihna an hre thiam vak lo naa thil dik lo a awm anih chuan chingfel vat se an duh ve tho a ni. 

"Ka û kha thah a ni tlat alawm" Diteii aw chu a ring lem lo, mahse, Sangtea chuan a hrechiang kher mai. 

"Anih chuan tu thah nge a? Sawi la, a thattu chu.. Kei pawn ka hre duh lutuk alawm" a ti hluk hluk a. 

"Chutak chu Amanda khan min hriatsak dawn a ni.." A lo ti nghat. Kohhran hruaitu leh khawtlang hruaitu thenkhat te an lo lang a, Sangtea chu an bengdai ta hram. An hawnpui ta a. Engvanga lungawi lo vak nge maw anih le.. Amah hian Mami kha a namthla tak tak em ni dawn le..?! 

Diteii mu tur chu Teteii'n a lo call a. A rawn ankhum hrep ringawt. "A zah pawh i zak lawm ni?  Tu thah pawh nise mitthi khin te chu a harsa hleinem, inla fing viau suh" a rawn ti hlawih hlawih a. 

Diteii chu a ngawi reng thung. Chhan let vakin awmzia a nei dawn lo tih a hria. Mami thih sarhu laiin Dinfela'n a vil reng a, mahse, hei ni 2 zet a reh ta daih. Diteij chuan biak pawh tumna a nei hran lo. A chhan a awm anih a ring. Tin, Puia pawn a rawn tawiawm ve reng a, Dinfela vangin a hnaih thei lo zawk a ni. Diteii kha a chiang lo rei êm a, mumalin thil engmah a hre lo. Dinfela bulah a him hle tih erawh a hria. Teteii sawi kha a hrechhuak a, Amah vangin apa chuan a hnawtchhuak ta em ni ang? An chhungkua an buai zo ta em ni ang..? A rilru a la hmang vak thei bawk si lo. A ngaihtuah ru ve hle. 

Dinfela erawh a thianpa Mike nen khunkhan takin an titi mek thung, Diteii'n Mami chungchangah Amanda a ruai tih pawh a hre lo. A chau tawngkhawng kha ni khat leh zan khat kha engmah ti loin a mu hlawm tawp. A chhan chu Diteii vangin zan tam a tlaivar tlat a ni. Khawi kipah a zui a, vawi hnih phei chu a tahpui ve hial anih kha. Mipa mahnise, Diteii chavai mangang kha a lainat em a ni. Diteii a tha ta deuh bawka tiin a inthlahdul ta deuh a. Thil dang a la awm bawk. 

Khatia Diteii a buaipui lai kha chuan a tu amah khan tawngkam an cheh hauh lo va, apa pawh a ngawi reng. Mahse, a rawn that tak deuh hnu khan Lawma'n a ko fal a. 

"Tha taka thil a kal theih nan Diteii hi hnaih tawh lo mai ta che" a ti anih kha. Amah huat vanga sawi a ni lo tih a chiang. Eng emaw tak chu a awm a ni ngei mai. Unau an nih vang em ni ang.. Teteii thusawi a hrechhuak a, "I hnaih zel chuan hmun dangah awmtir a tum ania" a tih kha.. Lawma chuan amah a huat vang ni loin unau an nihnaah mualpho a duh loh vang zawkin Diteii pawh a dah bo mai a hlau a, warning a lo pe ve kawkalh bawk nen, hahchawlh a lo mamawh ve reng reng bawk sia, Diteii chu a ngaihven duh lo lui ve ta mai kha a nia. A thinlung chhungril berah erawh a thi ngai reng reng lo. 

"Ka neih mai chu a ngaiin ka hria.. " a ti hul hak a. 

Mike chuan thutak zet in, "Mahse, a la nau lu deuh a ni. Nghak leh rih phawt rawh. In dinhmun heti hi a nia. I pa pawh a zahawm rih alwm.. "A lo ti a. 

"A dik alawm.. Neih nghal ka tum hran lo. Mahse, ka tan ka hauh tlat tih erawh lantir ka duh a ni" a ti a. A mitmeng a dul hle. 

"Lawma pawh puitling deuhin bia la, i hreh deuh pawn ka awm tho alawm.. " mikea chuan a ti a. Dinfela a nui suk, "Ka lawm e, thianpa.. Nang hi chu aw.. Ni e, Lawma chu la biak ka tum alawm..chumi hma chuan Diteii hi ka biak a ngai.. Kan inthlah liam dan chu i hriat tawh kha" a ti a.. 

Chutihlai chuan a roomah chuan Nunui a lo lut a. Thingpui a rawn dah, "Kan nula a chhuak daih a.. U Mike, in nu chu a rai lian tawh em? " a ti a. A nui sâng bawk. 

"Lian ve tawh e.. Chaw a heh tawp" a lo ti a. An nui hak hak. Nunui chu kal leh mai a tum naa a let leh a. A û melh chungin, "Diteii khan a û thih chungchangah Amanda a ruai a.. ' a ti ta a. Dinfela a tho zawk. 

"Tu nge sawi? " a ti vat. 

"Teteii'n a sawi a. Mami pasal chhungte an thinrim lutuk a, an luhchilh a niawm e.. " Nunui chuan a chhang felfai hle.. Dinfela chuan a chal a dawm vang vang a, "Min hrilh hmasa se aw.. " a ti vawng vawng a. 

"Ti nge maw an thinrim ve vak le ka ti. Amah Diteii ka tan vang pawh ni loin" Nunui chuan a ti leh a, a chhuak zui nghal. 

Dinfela chu a inthlak nghal mawlh mawlh. "Mike, tun hi a remchang ber ang, zuk kal teh ang. Lawma te pawh an lo thlabar viau thei tlat. Mami pasal te lam kha an thawm a lian ve viau sia" a ti sawk sawk a. Mikea pawh chuan thingpui chu a in vat vat a. Diteii tlawh tur chuan an chhuak ta a. 

An lo reh dûk tawh a. Zan a rei ve deuh bawk nen, Men erawh an lo la meng. Diteij chu roomah a awm thung. Lawma'n Dinfela te a hmuh chuan a ding uaih a, "Eng nge ni ta? " a lo ti nghal vat a. Dinfela hi a haw thei miah lo. A pahrawn fapa a ni tih a hriat hnu pawn a hmaa a en dan kha a la danglam thei chuang miah lo. Mahse, Teteii thusawi, Diteij leh Dinfela an inkawp chuan, a nu leh Teteii chu an vakvai dawn. Hetah an rawn let anih chuan Teremi a lungawi lo anga, an kehdarh vat dawn. A zu in nasat vangin a rilru a hmang tha thei tawh lo va, Teteii dawt sawi kha rilru fim tak chuan ngaibtuah se a belhchiandawl lohzia a hrethiam mai tur.. Mahse, Zu ngawlvei, chhaw hûih tawh anih vang tak ania Teteii pawn a bawl zan theih.. 

"Diteii kan hmu thei ang em? " Dinfela chuan a ti dam thlup a. A dang duh ta lo. Diteii roomah chuan an va lut a. Khumah a lo mu bawkkhup a. Tah erawh a tap lo. 

"Dite" a ti dat a. 

A lo hawi chhuak nghal. 

"Nangni maw.  U Mike, i dam em? " a ti vat a. A tho chhuak nghal. 

"Dam e, i u boral ni bak kha ka rawn lang thei ta si lo va, min hrerhiam dawn nia, a hranin ka la râl ang che" Mikea chuan a lo ti sawk sawk a. 

Dinfela chuan a melh chîk kher mai. "Amanda i bia em ni? " a ti ta a. Diteii pawh chuan a rinhlelhna zawng zawng, Hotela Sangtea leh nula pakhat a hmuh dan te leh a ngaihbel kual dan te a sawi ta vek a. An lo bu nghut nghut mai. 

"Mami ruang phum a ni daih tawh a. Finfiah a harsa viau ang. Mahse, i lamah kan tang aw" Dinfela chuan a ti sup a. Diteiii chu a lo thaw halh, "Ka u i nia, ka lama i tan a ngai alawm" a ti zawi sap a. Dinfela a na zawk. 

"Mike nen hian kan sawi dun zo chiah a. Lawma pawh ka la bia ang ka tia.. Dite, unau nih kan duh lo ve ve tih hi hrilh mai a tha zawk" a ti ta hmiah a. 

"Chuan, in atangin i chhuak ang maw? Keimah vangin in chhungkua in kehdarh ang maw.. Ka thlentir lo vang" a lo ti chhum hmak. Dinfela a lo meng phar.. 

"Engvangin nge ka chhuah ngawt ang. Keimaha awm hran hi chu ka la tum hrim hrim, mahse, nangmah vang a ni lo" a lo ti a. Diteii chuan Teteii nen an inbiak dan chu a sawi ta a. Mike nen an innuih tawp. Dinfela pawh chuan Tetei'n a bula a sawi dan a sawi ve, engkim chu an hailang ta kuar mai. Lawma an ko lut bawk a, Mikea'n fel thlupin engkim a chinchhuakin a sawi ta a. Lawma a chek hluk hluk. 

A tawp nan Dinfela chuan, "I nau hi neih ka duh a. Class xii te hi pass phawt se ka duh a. Engmah keima lamah hlauhthawn tur a awm lo ania. Khawngaihin min neihtir ang che" a ti ta tawp mai. Diteii a lo îp chawih. 

Lawma lah a rui tawh si, a riat nawi mai mai. A harhfim huna biak that lehah an ti ta ngawt. Diteii erawh a kha a chiha, engmah a sawi ve thei miah lo. Mahse, Dinfela rawtna chu a hnial thei miah lo. A mamawh em em tih chu a hrechiang lutuk tlat. 

Dinfela'n in a thleng a, a pa a ko nghal. Thutkhawmna pindanah an thu thap mai. A hmel chu a tak ngûn mai. 

"Ka pa, Diteii saw ka nei dawn a ni. Class xii pass se, zirzawm a la duh leh ka bul atangin a zir mai ang. Min dal lo ula ka duh a ni" a ti ta fak fak a. 

Teteii leh Nunui an phâwk kher mai. Anu zawk chuan, "Bawiha, i zahawm ka ti khawp mai. Mahse, Diteii saw ka fanu a ni a, i pa hi ka pasal a ni bawk. Mi min ngaihdan tur chu i hrethiam ang ka ring" a ti ta ta a. 

Dinfela chuan dam thlupin, "Mahse, nang hi ka nu ni loin ka pa nupui i ni.. Thisenah inzawmna engmah kan nei lo.. Chu chu Diteii nen kan inneih theihna chhan tur a ni" a ti a. Pu Vanlala erawh muk taka inngaihtuah tih hriat takin chhuat lam a melh ran a. 

A tawp atawpah, "Hmm.. Bawiha, i thiltum hi i tilui tlat zel si a, engpawhnise, Diteii chuan pawl 12 chu pass phawt rawh se. Thil thlengte pawh a la awm thei. Amah ka hnualsuatna ni loin, chhungkaw pakhat vek ang kan ni tlat a, ngaihtuahna chu a buai lo thei lo a ni e" tiin a fapa chu a melh a. Dinfela mitmenga phurna awm erawh a dai miah lo. Teteii mitmeng erawh thinrimna hlirin a khat thung. Engmah a sawi ve ngam bawk si lo, awmngaihna a hre mang bar lo tihtheih a ni. Nunui lah awmhmunah a lo sa ve vak ringawt. Diteii chu Puia vangin a ngei a, ngeina chhan tur dang a nei ve vak lo. A û te ang mipa luck leh to ve tawk takin an hmangaih tlat pawh chu thik tham a tling ve tho awm e. Chumizan chuan rilru inag lo tak leh ngaihtuahna hran theuh neiin mutmu an tuah ta hlawm a. 

Diteii leh Amanda chu an inhmachhawn ran a. Thil tam tak an sawi dun. Diteii a bu nghat nghat bawk. 

"Tha i tih apiang ti rawh. Kei chuan ka ringhlel a, ka û khan a dikna chanvo hmu se ka duh a ni mai" A tawpah chuan a ti ta a. 

Amanda hian Sangtea te in lam va tlawh nawn lehin eng eng emaw a va sawipui a. Thu thar erawh a awm hran lo. Mahse, vanneihna a tawng baw ta tlat.. Amanda te chhuah hnuah phone call a dawng a. Alice a lo ni. Inhmuh a duh thu a sawi a. Alice chu a nute in lama kal tur anga insawiin a chhuak a. Amanda te chuan lo changin thil tam tak an sawi dun ta a ni. Alice chuan Sangtea leh Faki te chungchang a hriat theih zawng zawng a hrilh fai ta kèlh a. Tin, Mami thih tukah khan Mami au ri an hriat ve loh thu leh Sangtea a rawn chhuk nghal lawk loh thu a sawi a. Chu chu an tan a tangkai viau mai. Amanda pawh a bu nghat nghat,. Mahse, chung zawng zawng chu hre mah se; fiahna an la nei chuang lo. Buaina chu an la chingfel thei tlat lo. Heng mi pahnih te hi anmahni ngei an inpuantir a ngai tih a hre ta a. Chu zawng thil harsa niin a hre lo.

Mami fanu Duati mawlh a khawngaihthlak, nu ngai rual a ni a. A tap reng mai. Alice-i chuan thiam leh thiam lovin a buaipui ve a, apa lah chuan a pawm tlei thei meuh bawk si lo. Pi Hmai lah a inla awlthawng hmak bawk si. Alice rilru chu a hah thei viau. Mahse, Diteii hian Duati chu enkawl a tum tih an hre lo. A û thihna chingfel phawt se Court-a kala a û fanu enkawl dilna thehluh a tum ran a ni. Case chinfel a nih hma chuan an phal dawn lo tih a hre ve kar. An enkawl that peih loh pawn mi laka thiamchan nan an ui der dawn hrim hrim.. 

"Min kalsan rawh.. Khawngaihin" tiin a rak tuar tuar a. Rang takin a nu leh pa te chu a roomah an rawn lut nghal. Tukverh thlanglam chu kâwkin, "Amah a ni.. amah.. " a ti tial ruan a. Tukverh chu a inhawng huai a, apa chu a va dak vat. tumah a hmu lo. 

"Tumah an awm lo, mangchhia mai mai aniang.. " Apa chuan a ti dam thlup a. Sangtea erawh a meng sen rûm a, a hawi hruk hruk bawk. 

"A ni lo, Mami ngei a ni.. Min tihrehawm turin a lo kal alawm.. " a ti a. A thlabarzia chu a aw rawl atang pawn a hriat theih. 

Chutih lai tak chuan, Alice chu a rawn te chhuak tuar bawk. Malsawma pawh a zuang tho zawk mai. An va luh chuan, "U Mami khan Duati hi rawn lak a tum.. Tah sawn a kal chhuak" a ti a., a thaw hlawp hlawp mai. An mutna ep chiah tukverh chu a lo inhawng huai bawk. Duati erawh a mutui kher thung. Thil thlen dan chu mak an ti tlang hle. A hmu ve lo te tan chuan awih a harsa anga, Sangtea leh Alice erawh chu hlau hlawpin an awm mek thung. Sangtea phei chu zan 2 lai a buai tawh a, a intih pa êm vangin a tilang duh lo mai pawha.. Zanin erawh a tuar thei ta ngang lo aniang. Mami ngei mai kha a khum bulah lo dingin a chhiat khum a, a hrawka rawn reh tum niawm takinna rawn ban dû dû a nih kha.. Patling tan pawh chhel a harsa ve khawp ang. 

Thup reng theih ni hek lo le.. Mami thlahran thu chu a darh ta thuai a. Hetih lai mek hian Faki pawn tibuaitu a nei ve ta zeuh zeuh. Zan khat phei chu zan laiah rak tuar tuar chungin a tlan chhuak hial a ni. Amah maia awm a ni bawk nen, a thlabar viau ngei ang. Faki ber kherin Mami thla a hmu chuan sawi a titam a, a ruka sawi a hlawh hrep mai.. 

A rei a, Sangtea a buai tial tial mai. Mi thenkhat leng haw ten Mami chu a tlakna in chunga lo ding reng an hmu fô bawk. Faki phei chu amahin a riak ngam tawh lo va, a cousin ten an riahpui tawp mai a ni. Zan khat chu thli a thaw vûk vûk a, ruah erawh a sur lem lo. Sar thi an awm aniang tih theih tur hian thli chu a thaw vur vur a, thla lah a eng si lo. A rapawm riau mai. Sangtea pawh an meeting zo a thianpa nen an haw mek a, a hnaah a kal hleitheih loh vangin chawlh a la rih a ni. A thianpa nen chuan an inmangtha a, in chhungah a lut ta a. A mut dawnah Faki nen inbiain a mut tlem thin em vangin mutthilh vat tumin a inkhuh sauh sauh a.. A chhing sek tihin a rizai chu an rawn pawtthla lawp mai. A tho hlawl a, a hawi kual a, tumah a hmu lo. 

A mu tha leh a, mahse, a khum hnuaiah chuan ngik faih faih leh thaw ham ham ri a hre ta tlat. A zuk bih ngam der si lo.. A mu meng kar a, a chhungte kaihthawh a hreh tawh bawk si.. Chutia thawm a reh tlawk tlawk lai chuan, khum hnuai atang chuan aw hian, "Inpuang la, i thiltih kha puangzar la, i hmaah ka rawn inlan tawh lo vang" a rawn ti ta a. A hmulthi a ding vek. Rak chhuak lo turin a insum hram hram a ni ber… 

Khum hnuai atang chuan a rawn dawk chhuak zawk a. Sangtea chhuk melh run chungin, "Naktukah i puang lo anih chuan.. I ruang an hmu ang". ati ta chher chher a. Zawimuangin Tukverh atang chuan a tawlh chhuak ta a. Sangtea chu a thaw a chham lek lek mai. A meng sen rûm bawk. 

A tuk zingah Police station hnai ber panin a tlan chhuak ta a ni. 

Amanda chuan chutiang taka a awlsam chu a lo ring lo va, a rin aia a lo awlsam vang chuan a nui ver ver mai. Ni e, kha thlahrang kha Mami a ni lo va, a mi rawih Zualteii a ni. Mami hmel ang chiahin hmaikawr an siamtir a, tuman Mami a ni lovang tih rin ngaihna an hre lo a ni. Sangtea chuan Mami chu a namthlak a nih thu leh Faki nen inthuruala an tih a nih thu a puang ta a ni. Zoram khawvelin thudik chu an hre ta. Diteii pawn Duati a enkawl thei turah ngai ang.. 

Sangtea leh Faki chu Central Jail-ah an phur thla ta. Amanda leh Sama pawh an hahdam thei ta. Chutihrualin, Diteii'n Duati enkawl a tumna kawngah puih a tum tho bawk… 

(Ngawi teh u. Ka ziak thei tawh hlawl lo.. Ka buai em mai.. Min hrethiam teh u)