Drose 7/

D ' ROSE… (7)

Ziaktu : Toni Râlte

Lawma te chuan chaw an lo ei kham ve tawh a. Dinfela pawh lut ve loin a inkhalh haw nghal. Diteii chu hlim takin a lut a. Sitting roomah chuan an lo thu thap a, "Dite, lo thu teh" Lawma chuan thutak deuh hian a ti a. Diteii chuan Teteii thusawi kha a hre chhuak nghal. Hlauthawng ru zetin a thu a. Teremi leh Mimi te chu an huana zu la turin an chhuak nghal. 

"I hnathawhna chu a nuam em? I hah em? " Lawma chuan a ti thluam a. 

"Umm nuam a ni mai. A hahthlak vak loh"

"Lehkha i zir tha thei lo vang tih a hlauhawm ka ti, thawk lo mai zawk ta che. Kan chawm zo tho che lawm" a ti ta a. 

Diteii chuan a kut tin sik niap niap chungin, "Ti nge? Tlaiah ka zir ngai lo ka tih kha, Tihian ka inbual anga, ka zir mai dawn lawm" a ti a. A aw chu a ngenngawl hle. 

"Teteii'n min lo bia a, a zahthlak, zirlai naupang a nia, in tan pawh a mualphothlak a rawn tia" Lawma chuan E ti a. 

Diteii a insehruh, "Au Lawm, Teteii hi ka hrethiam lo, ka thiltih apiang a sawisel a, min puih a tum chuang lo va, chuvang chuan hrilh rawh. Ka nunah hian rawn inrawlh buai tawh suh se. Ani chu a chhuak tawh alawm" a ti ta hmak mai le.. Lawma pawh chuan a hrethiam nghal ruak. Teteii mizia hre thang a ni tawh bawk a. Diteii chu nawr vak a duh lem lo. 

"A tha alawm..mahse, in exam dawn thlaah chuan thawk suh aw" a ti ta a. Diteii pawh a thaw huai mai. "Umm tehreng mai" a ti a. A roomah a lut nghal. 

Teteii nen an boruak chu a ngaihtuah neuh neuh a, engvanga huaa hmu mawh tlat nge anih tih a hre duh a ni. Puia kha a thîk vang a ni thei. Tuna a thawhna erawh Dinfela te chu a thiannu û a ni ringawt a. Thîkna chhan tur a nei dawn em ni ang.. A buai zo vek. Mahse, engpawhnise, a mamawh thawk chhuak ve tura thawh zui zel chu a tum bur mai a ni. 

Kar hnih zet a thawk ve ta. Dinfela nen chuan rei tak inkawm tawh ang maiin an awm tawh. Mahse, dawra a thawh lai erawh chuan hmuh tur a awm ngai mang lo. A buai ve thin pawh aniang chu.. A thlah haw hman loh erawh chuan a thianpa Mike-a talin a thlah thin. Mikea nen pawh an innel sawt tawh viau mai. Diteii hi chu tu pawi mah sawi ngai lo, hlim reng thei a ni miau a, dawra a thawhpuite nen pawh an innelin an infi bawrh bawrh tawh. Dinfela chuan Diteii chu a thianpa nau a nih thu a sawi lawk vek tawh a, tuman a nuhrawn fa a ni ang tih rin ngaihna an hre lo. 

Hetih lai mek hian Mami dinhmun erawh a derthawng ta tlat!  Duati pawh a lian ve tawhin lawm pawh a hlawh viau tawh. Sangtea pawh a hnaah nitin a kal ve zel a. Nikhat Mami'n Sangtea kekawr a su tur a han check vel chuan, Hotel receipt a hmu ta tlat. A hma ni chiaha Hotel room pakhat a bookna a ni. A tirah chuan ngaihthat lohna pawh a nei hran lo, hna thilah a niang a ti mai a. Mahse, chumi tlaiah chuan Sangtea rawn haw chu zu rim a nam ta tlat!  Rui chhia erawh a ni hauh lo thung. Mami pawh chuan a thuphungin a zawt mai mai, Ka hah ve deuh a ka in mai mai a lo ti sam èt a. 

Zanah an pa mutthilh tawh hnuah mami chu a inngaihtuah chho ta a. Thil hriatchhuah a nei. A buai thin atalángin an pa phone a khawih lohna a rei tawh viau, hmanni lawka a thiannu Rebeki number lak a tumnaah an pa chuan a patern a thlak tih a hria. Amah Sangtea chuan rawn hawngin number chu a pe anih kha. A ngaihtuah thui zel a, bathrooma rei tak a inthiar thinin biak nei niawm taka a phum sup sup thin thu te, a phone a charge changa a thutchilh run zel te.. Nupa nun an hman khât tak zia te.. Engkim chu a fiah kuar mai. Mahse, fiahna a nei lo. An pa hi inah a awm khât èm a, Kohhran thilah a chhuak nasa a, An branch-ah OB a ni mek bawk nen, Mami paw'n dan a tum ngai lo. Pasal kohhrana inhmang tak te chu a tan pawh a ngaihthatthlak a ti zawk thin. Chhuna a lehkha them chhar te, a pasal zu rim nam ngawt te leh a phone te avang chuan ngaihtha vak loin a awm chho ta a. Rinhlelhawma awm si, rinhlelh ber tur hre si loin a hun a hmang a ni ber. 

Alice leh Malsawma te inneih ni a lo her chhuak a. Nau pai tawh a ni bawk a, ropui taka lawm an tum kher lo. An Kohhran Thalai member thenkhat ten an rawn tawiawm a, A hmingin Zanriah erawh an buatsaih ve, mi pawh an sawm zau lem lo. Mami rilru nat vena deuh chu ama chhungte a naute lam pakhatmah an sawm ve lo chu a ni. That lam a ni bawk a tiin a inhnem ta vel mai mai a, an pa bulah pawh a sawi duh lem lo. 

Alice chuan thuam chhawm a ngahin a nei ropui kher mai. In hnuaiah an room a awm a, a leng lo lam a ni. Mami pawh mo a nih miau vangin a che nasa pawlah a tang leh a, a fanu an lakchhawk hlauh zawk a. A zia deuh. Sangtea erawh inneih hunserh zawh atangin a la hmu miah lo. Khawiah emaw a kal ani mahna. Ngaihven chung a duh bik lo. Tlai chaw ei dawnah chuan An thalai member ti ila, an venga hnathawka rawn awm, An khua tak chu Hnahthial lam daih Faki an tih mai nen Sangtea chu an rawn lang hlawl mai a. Faki hi nula phanchang ve tawh lam a ni a, amahin in a luah nghe nghe. Kohhranah a inhmang a, fak pawh a hlawh viau nghe nghe. Mahse, Mami thiannu ve ber Rinpuii pasal nen thla 5 liamta vel khan an inngaizawng a. A hmingchhe viau. Mahse, boruak ngam ve ta nafam chu an sawina te chu engahmah ngai duh lem lo vin Kohrhan a la bel ve zel a, a tlangtla leh viau tawh nghe nghe. A sulhnu lo hre tawhtu Mami chuan chutia an pa nen an rawn inzui ral ral a hmuh takah chuan rinhlelhna hian a khat ta tlat mai. A lungawi lohna erawh a tilang duh lem lo. Faki zawk chuan a rawn be hurh hurh a, tha tak chuan a lo chhang ve mai. Chaw an ei kham a, eina ningnawi leh seng fel ngai te chu an han sengfel thuak thuak a. Sangtea te pahnih chu a hmu zui leh miah lo. Zanah mo lawm ho haw rem hnu daihah Sangtea chu a lo haw a. A pawr chhap mai. An buai ve bawk nen, tuman a awm leh awm loh an lo chîk vak lo aniang, zawh pawh an zawt lem lo. Khuma an mut hnuah,. 

"Faki nen khan eng nge in tih a? " mami chuan a ti ta a. 

"Kan group sumtuak dan tur leh Bible chhiar hun tur kan duang lawk a" a lo ti sam èt a. Faki te nen group khatah awmin, Faki hi Group Teeasurer a ni nghe nghe. 

"Nih chu" a ti hmak a. A saisir a. A mu ngawi ta reng mai. Sangtea lah chuan enhmah a sawi zui tawh lo bawk. A tuka Mami online chuan Faki status a hmu ta a. Faki number hi a save sa reng a, a chhan pawh a rai puar lai khan Faki te office-ah eng emawni lam ngai a awm vangin a va chahna lamah a save tawh a ni. Mahse, Faki chuan a save ve lo nge a status a hmu ngai lo. Chumi zinga Faki status a hmu ta mai chu a rin danin Faki chuan a number a save tawh a nih a ring a, chu chuan chhan a neih ngei pawh a ring a ni. Mahse, fiahna engmah a nei lo va, ngawih rih phawt a ngai. 

A ni telin Sangtea nen chuan in hlat tial tial a. Sangtea nu pawh a tawrhhlelhawm tawh tehlul nen, a pasal ngei rinhlelhawma a han awm ta chuan a timangang zual a, awmngaihna tak pawh a hre lo. A thiannu Rinpuia bulah a inhrithla ve thin. Ani lah chuan Faki chu a lo ringhlel nasa mai a, a hmaa a pasal a lo tawmpui ve tawh avang khan. Mahse, fiahna awm lo va rinhlelhna tihlan ngawt kha a finthlak si loh. Mami rilru chu a buai map map thin hle. 

"Ka thiannu birthday kan lawm a, min hawnsan vek sia, min lo hruai thei ang em? " Apuii Msg chu Dinfela chuan a melh vang vang a. Diteii avangin tun hnaiah Apuii chu a thlahthlam sâwt hle. Inngaizawng tak tak an ni chuang lo bawk a, inthiam lohna pawh a nei hran lo. Zan dar 10 a ri tep tawh a, in atang chuan a chhuak ta a. Apuii sawina hmun a va thlen chuan a thiannu nen an lo thu dun ran a. An chezia chu ruih nei an ang khawp mai. Hmanhmawh takin an lo lut nghal a. A thiannu chu Ramhlunah an drop phawt a, Apuii te veng lamah an tlan leh ta a. 

"Ka van lawm.. I fel e" Apuii chuan a ti sap a. 

"A ho e, ka tihtur alawm.. Mahse, ti nge an hawnsan vek che u" a lo ti a. 

"Nia, kan intibuai a. Ih, Beiseia a awm ve a, min ngaizawng deuhtu a nia. Tuna a birthday kan lawmsak Hruaii cousin a nia. Beiseia ka lo hnar kha a thinrimpui a, a thian dangte ho chu a fuihpawrh a, an rui tawh nen, min hawnsan vek alawm" a ti siam siam a. Hreh hmel zetin a irh deuh uk uk bawk. 

"Engin nge in kal reng reng,. " rinhlelh hmel deuh hlek hian a lo ti a. 

"Hruaii te chuan min lo lam, a thianpa carin" a ti a. 

Ngawi rengin an tlan dun leh mawp mawp. Apuii te in an thleng tep tihah Apuii chuan a mal bawr vel rawn chul thuak pahin, "Leng rih ila, tihi chuan ka haw ngam lo deuh e. Ka pa a strict over a" a ti ham ham a. A mitmeng phi chiai chu a sexy zet mai. 

"Lenna tur ka hre ve hleinem" Dinfela chuan a lo ti khauh. 

"Hotelah kal ila" Apuii chuan amah rawn melh sawr sawrin a ti ta a. Dinfela rilru a buai hle, he nu hi hotela a hruai chuan sex an hmang dawn tih a chiang. Chuan beisei nei zelin a bialpa angah a ngai zui dawn tih lah a hai hek lo, chutih rualin Apuii chu a bialnu tur anga a lo suangtuahna zawng zawng kha a bo vek tawh thung si a. Diteii vang pawh a ni lo. Chuti ang hmeichhe fake lutuk, institute-a innocent ngawih ngawih, tihnat hlauhawm khawpa no leh nèm, nungchang zawiawi em em, Zu ruih avanga a chhungril mizia rawn phawrh ta vek chu a duhzawng an ni tlat lo. Mipa ngam leh nel lutuk hmeichhia hi a ngaina ngai lo. Mahse, a tilang lo mai zawk a ni. 

"Ni lo e,  haw rawh" a ti nghut a. Apuii a lo meng phar deuh. 

"Ka bialpa emaw an ti che a" tiin topic a rawn thlak a. Dinfela nuih lam a za, "A va zia lo ve. Kan inngaihzaw lohzia ka lo puangzar dawn em ni ang"?  A lo ti hmak. 

"Ka rui ve deuh a, tiang mizia hi ka ni lo ania. Enteh, i ngaih ang kha ka ni lo ania aw.. Ka ruih vang mai mai nih hi" awmze nei lo zetin Apuij chuan a ti leh a. Dinfela chuan chhan pawh a chhang peih tawh lo. An in chu an thleng a, ngawi rengin a chhuak a, Apuii chu kawngkhar a hawnsak a, hreh zetin a chhuak ve mai. Ina a luh hma chu dawhthei takin a ding ve.. A luh rual rualin a tlan zui ta nghal a. A thaw huai mai. Bialnu nghet tak, a mimal nun zawng zawng a hrilh ngamna, a hahdamna tur a mamawh a ni. A rilruah hmeichhe pakhat chu a rawn lang.. A lu a thing nawk nawk a. 

"Ni lo, ani chu ka nau a ni, " a ti sup a. 

A rooma Bena rawn lut chu a lo hmu mai lo va, note copyin a buai leh hle. A rawn barakhaih thutah chuan a eu awrh mai. Bena hmel a han hmuh erawh chuan thinur zetin, "Lalfamkim, mawla" a ti hlak. 

"Ka mood chhe lutuk ka on lawk anih kha" Nui chung hian a lo ti a. 

"Nge i rawn tih?  Tun ang zanah te" a lo ti a. Bena nen an inkawmngeihzia an hriat vangin Lawma te pawn Bena hi chu Diteii nen an enhrang lem lo. 

"A pawimawh tawp a. Tki hian min kawpin ka hria a" a ti ta a. Diteii chuan a lo melh kâwk, "Daw lo mai teh" a lo ti vat. 

"Aih, ka rilru a na tawp. Fiah ngei ka duh. Vawiin chawhnu khan Johny inah kan inhmu a. A phone ka check sak a, biak a ngah rap mawle.. A ph password pawh a lo thlak reng a, ka tihluih tlat vangin min hrilh a. Mipa a be hnem lutuk. A lo insawi single char char bawk.. Ka na tawp" Bena chuan a ti ta a. 

"Biak ngah ringawt a ho eee" a lo ti satliah a. 

"Bialpa i la nei lo va i hrethiam lo anih khaa.. Kei ni lo a biak te saw hmeichhia emaw a thian tha pangngai nise ka haw lo vang. Mipa hlir bakah an inkawm thin tih ka hriat ngai loh an tam zawk.. Ka check chhuak vek lo lehnghal" Bena chuan a ti hlaih hlaih a. 

Mak a lo ti ve deuh. "Chuan, in inthen mi? " a lo ti a. 

"Then chiah lo, thil min tihsak la ka duh a ni. Mipa angin Tki saw be rawh" Bena chuan a ti ta a. 

"I â nih chu" a lo ti nghat. Bena chuan thutak deuh hian, "Kei chuan ka ti thei lo lawm. Ka na dawn lutuk a, fiah nan ringawt alawm i biak dawn" a ti a. 

"Ka thiam awzawng lo, engtin nge ka thiam ang a" a lo ti há a. 

"Tih dan tur ka hrilh dawn che lawm"

"Ka number a nei ve reng alawm" 

"Chuvang tak chuan hei hi i vuah dawn alawm.. Sim thar, tuman an la hre lo" tiin sim card a lek vâ a. Diteii chuan a huphurh hmel kher mai. A thianpa lah a mangan hmel angreng si. Mipa thian chu nei ve tho mah se, a rinngam lo a nih a ring. Tki renh reng pawh chu a mak mang e. A rin a ang lo. Sim card chu a phone ah a thun ta a. Clone app in whatsapp dang a install leh a. Tki chu a va text ta nghal. A seen thei lawk lo,. 

"Tu nge aw" a rawn ti ta a

Bena hrilh ang zelin a ti. Mahse, "Hei ka mu tawh dawn a. Nih phawt" a rawn ti ta daih a. Bena chuan, "A la induh ve rih anih kha.. Tihdan ka hria, mipa thlalak chhe lo ve deuh hlek dp ah i hmang dawn nia" a ti zung zung a. Amah bwwk chuan, "Kha i thawhna pa kha U dinfela kha hmang la, Tki hian a la hmu chiang vak loin ka hria.. Amah U Dinfela chu hrilh bawk la, Amah anga i va biak chuan Tki rilru a hriat nghal ang. A chhan chu hausa hi a ngaisang ve a.. Ka tan pawh fiahna chiang tak ka hmuh chuan ka bansan thei ang" a ti ta a. Diteii a lo thaw hawk. Bena hawn hnu chuan lehkha pawh zir zawm peih bik loin a mu ve nghal daih. 

Teteii chuan, "Nu, tak tak alawm.. Hrilh rawh, a chi loh. Au Lawma te tan pawh a tlawmthlak, miin an nau lehkha zir lai dawrah a inhlawh thin tih hria se.. Ngaihtuah la" tiin a nu chu a nek salh salh a. A nau Diteii chungchang bawk a ni a sawi ni. 

Anu chuan, "Aw.. A û dawrah a thawk ve a ni mai a. Mi pawn an hrethiam tho ang" a lo ti sam êt si. 

Tetei chu a ner nâng a, " mahse, ka tan a nuam hleinem.. Ka nau a ni tih an hre vek a, min zawhin a nuam lo alawm" a ti leh a. Chhuanlam siam tur a hre mai tawh lo. A ngaihdanah chuan Dinfela hi Diteii hian a nu pasal fa bik a ni tih a hre tho turah a ngai a ni. 

"Diteii chu a fel zawk ngawt alawm.. Nang eng nge show in nei hnai em? " Anu chuan a ti a. 

"Umm.. Hnai lutuk lo naa, pui deuhin thla leh lamah a awm dawn, Tak ana Ka bag chah kha Nu, min khulsak rawh aw.. " a ti ngher ngher a. Anu chuan, "Thil i chah nasa mah mah thin a, i pa lakah a inthlahrunawm thin. A to thei si a,. " a lo ti a. Thinrima sawi pawh a ni hran lo. 

Teteii chuan a hmel tikhawngaihthlak kualin, "Nia, engmah ka chah tawh lo vang, dik tak chuan super anga min en vang hian kan incheina engkim hi a brand pawh belhchian dawl a nih a ngai ve a.. Kan hlawh lah hi a tlem ve thei bawk nen.. " a ti zawi raih a. Anu chuan inthiam loh hmel deuh hian, "Ka sawi mai mai anih kha, chah rawh.. I duh ang chu. Tih tak em ah te chuan i pa sumdawnna pawh. a kaltluang a, nanga thawmhnaw lek te chu a hek phah lo em mai" a ti leh hnuhnawh a. Teteii chu a nui sak mai. 

Dinfela nen School an panna kawngah chuan, "Ih maw.. Thinrim miah suh aw" Diteij chuan a ti a. 

"Eng" a lo ti nghut. 

"Ka thianpa kha i hria em?  Bena kha, kha pa bialnu Tki kha maw a ringhlel a, chu chu fiah kan duh sia, number dang atangin ka bia a. Ih, i thlalak ka hmang a" Diteii inthlahrung lutuk hmel chuan a nuih a tiza kher mai. Mahse,a inla thutak tlat.. 

"Ti maw ka thlalak i hman? " a ti hmuk a. 

"Aa.. Ih, Tki hian hausa hi a lawm ve a. Bakah ih, englo, hei mipa chhe lo deuh te hi a duh a" a ti niah niah a. A insum thei lo tep, lehlam hawiin a khi suk. 

"Ka thlalak i nei reng reng a mi..ka hre ta.. A rukin ka thla i lo la ru thin chiang" a ti ta a. Diteii mangang hmel chu hmuhnawm a ti kher mai. 

"I zak lo. A teuh lo. Ka nei ve tawp, i dp ka dl a" a lo ti hlar a. 

"I be ve thiam dawn mi?  Bakah i che buai ang e" Ngaihtuah hmel zetin a ti ta a

"Nia, thiam vak lo, chu chu nia a hmuh hunah che pawh hria ang deuhin awm rawh aw. A rei lo vang" a ti ve ta zung zung a. A hnial thei miah lo chu mak a inti. Hmeichhe dang nise chutia amah hman tangkai chu a remti hauh lo vang. Mahse, Diteii chu a hnial ngam lo nge a hnial phal lo pawh a hrethiam tawh lo. Hlim takin School kawtah chuan an inthlah ta a. Mipa chhe lo?!  Diteii chuan chhe lo a lo ti ve reng tihna em ni ang? A ngaihtuahna chu a nuihpui ruh ruh mai. Mahse, a tawpna erawh a danglam thei chuang lo, Diteii chu a nau a ni tlat! 

Mami chuan a pasal insiam mawlh mawlh chu enin, "Duati a dam tha bawk si lo va, chhuak lo mai la" a ti sap a. 

"Ka rei lo vang. Bible chhiarho ka va tawiawm zuai anga, a hmingin OB te kan ni ve si a. Ka rawn haw vat ang" a ti dam thluam a. Tun lai hian an Kohhran Thalai pawlin Bible chhiar chhuahna hun an hmang mek a ni. Mami chuan a pasal kal chhuak lai chu a thlir zui reng a, a thaw a ippik. Zan tin a chhuak a, Duati lah a hma ang khan a ngaihsak tawh miah lo bawk. Faki nen an inkarah awm chu a awm ngeiin a hria. A la manchhuak hleithei si lo. An fimkhur nge whatsapp velah an inbiakna a hmu hman ngai lo, an pa chuan a clear ziah a ni ngei ang. Anu lah a la danglam lo va, Alice awm laia hauh leh tawng khum a hrat riau bawk. Alice-i chu an tlawn em em a, a nau pai pawh a rai ve lai ai thlawt chuan an ngaihsak thain damdawi nise an ngaihtuah chuk chuk reng a. Alicei a la naupang ve bawk nen, awmdan a thiam lo lek lek. Mahse, Alicei te chhungkua hi mi hlun, mi tha chhung an ni ve a, anu hi nu fing leh hawihhawm tak a ni bawk nen, Alicei chu Mami'n a lo huphurh ruk angin a awm miah lo. A mo tirh vang nge zawng a hre lo. Anu tawngkhum dan te chu a hnua an pahniha an awm hnu te hian, "U mami chu i dawhthei e, chhang ve pawp zel ta che" a ti thin. Tin, a dam tha a nih phawt chuan Mami chu a puibawm ve zel reuh a, Eirawngbawl pawh thiam thathum lo kha Mami bulah a inzir ve zel a, anu chuan chungte chu, "I phût lutuk, naupang a la nia, naupai a ni bawk.. Engmah tihtir a ngai lo" Tiin Mami a tawng khum thin. Alicei erawh chuan a sim duh chuang lo, Mami an en dan chu a hrethiam chho ve zel a, a khawngaih tlat. A nulat laiin a u te nen an inkawm ve thin bawk a, Mami chu a lo ngaina sa ve tawh bawk nen. An rin loh ang takin Mami awm tinuamtu ber a ni ta hlauh zawk a ni. 

An Biak in bul lawka a thiannu, An inneiha thian atana a hman Thiangi a va call ta tawp a. "Thiang, Biak inah i awm em?  " tia bultanin a buai rukna chu a hrilh thuak thuak a. Thiangi chuan," Hrilh che ka tumna a rei tawh asin. Eng em a ti lo vang tiin ka la insum alawm.. I rilru a na dawn bawk sia, ih e, inpa hi Keini a OB pui te hian a rukin kan tawngtaipui reng thin tawh. Faki nen an awmdan hian kan mit a tihkhamna a rei tawh lutuk a ni" a rawn ti ta phiar phiar mai. Mami chuan awmngaihna reng a hre lo. A zak bawk si. 

Thiangi chu Biak Inah chuan va kalin Sangtea awm leh awm loh chu a va en a. A awm lo.. Mami chu a tho lawk a, "Nu, ka chhuak lawk dawn.. Ka rei lo vang" a ti a. Duati a muhil rih bawk a. Ding takin Faki te in lam a pan ta a. A ngaihtuahna a thui kher mai. Nat vak dan pawh a hre rih chaung lo. Faki hi mi in hnuai luah a nia, a in luahna te pawh Mami chuan a hre lutuk, an innel ve  viau. Stepah chuan zawitein a chhuk chhat chhat a, Faki in luahna te piah lawka an pa Bike a hmuh atang khan an pa chu Faki inah a awm ngei tih a chiang tawh. Kawngka chu a kik ta dat dat a.. Rei fe hnuah a rawn inhawng ta. 

Kekawrbul chhing zet leh bahder hain, bra pwh hreng lo, sam hnawk niaih leh hmel pawr fapin Faki chu a lo ding ran mai.. Mami a hmuh rual chuan a tawlh hnung däwrh. In chhung a va luh chuan, a hawi kual a, an pa a hmu lo. Roomah a awm a ni ngei ang. Room lam chu a pan hmawk hmawk, Faki chuan, "Eng nge i hriat a.. I va zak lo ve" a lo ti a. A ngaipawimawh duh lo. Room kawngkhar chu a nam hawng a. Khuma a pasal kawr ha lo va lo thu reng chu a va hmu ta.. A kehsawm chiang kher mai. A pasal chu a melh ta tlawk tlawk a.. Tawng nachang a hre lo, ni lo, sawi tur a hre lo zawk a ni. 

"Eng nge i lo tih? " Sangtea aw chuan ngaihno a bei lo kher mai. 

"He thil hi a dik em tih ka rawn fiah.. " a ti nghat a. A mittui a rawn dir nghal zung zung. 

Faki chuan, "I rin dan kha. ani lo, a kawng a herh a, ka zutsak alawm.. Bakah i van nasa ve, a neitu phalna tel loin roomah te i lut a nia.. Chhuak rawh" a lo ti pawr hlar a. 

Mami chu tawlh sawn hretin, an pahnih chuan a melh tawn a. "Ka pasal chuan kan in a chhuahsan hnuah a kawng a herh thut a ni maw, tichuan, nang hian sam hnawk niah leh hmel phelh vek khawpin i lo zûtsak a, i hah awm hle mai. Pawisa pek te i ngai em? Bible chhiar tura chhuak kha nula roomah kawr ha loin a lo thu ta daih a nih chu.. Haha.. He thil hi in thup thei emaw thei lo emaw chunglam khian phuba a la em em ang. Milem in nih hi" Fiah fai takin a ti ta kalh kalh a. Faki pawh tawng ngaihna vak a hre lo aniang, a mit a khap sek ringawt. 

"Haw rawh. Ka rawn haw ang" Sangtea chuan a ti a. Tlemin a dawih aw dueh bawk. 

"Aw le" a ti nghat a. A haw zui hmiah. Sangtea leh Faki te chuan sawi zui tur an vân ta kher mai. A nupui khan an chesual lai a rawn phâwk tluk a ni. 

"Sangte, then mai rawh.. Anih nih ni mai ang" Faki chuan a ti a. Sangtea rilru erawh buai tak a ni. Kohhrana a nihna chuan a timangang ve tan ta. A lemchanna kâwr phawrh mualphoa a awm tur chu a tuar ngam ang em? A nupui kâ chu a la hup thei hram ang em? Tichuan, mualpho em em lo vin hun a la hmang thei ang chu.. 

In chhunga mami rawn lut chu an lo en thap, "Zan zanah khawiah tehlul chuan nge i chhuah a. I va za ve" Anu chuan a lo ti nghal tâwn tâwn a. 

Mami thinrim lutuk, rilru na bawk si chuan a zahpah duh tawh lo. Khur hlak hlak chungin, "Ka nu, tunah chuan i duhthusam mo i nei leh dawn ta e.  Hlawh nei ngat i nei dawn. I fapa leh a bialnu te ka va hmu zo chiah a ni. I lawm em? Nui ta che. Nui rawh. I fapa, Thalai pawla Asst Secretary chuan nupui nei chungin bialnu a nei anih chu, i fapa YMA Treasurer khan nula a tawmpui aw.. Nuam i ti em? I duh loh i hmuhsit em em i mo hian ka chhuahsan dawn che.. Lam vak vak rawh.. Ka nu, lam ta che.. " a ti tâwn tâwn mai. A aw chu a ring hauh lo naa fiah tak a ni. Mami a nulat laia nula fel leh nungchang thaa sawi meuh pawh a insum zo ta bik lo a ni mahna. A chhungte chuan ngawi rengin Mami chu an melh thap ringawt. Pa ber a awm lo thung. 

"Daw hlek suh. Ka fapa hi chutiang chuan a awm lo vang" anu chuan ti bawk mah se, amah ngei pawn a thusawi chu a ring zo lo tih a hmelah a lang reng mai. 

mami chu roomah a lut a. Khumah a thu vang vang, a thaw hrawih hrawih bawk. A thaw te chu chham mai dawnin a hria. A lo rinhlelh ruk mah nise, a pasalin a phatsan a ni tih a mit ngeia a hmuh takah chuan a tawrh theih zawng zawng aia nasain a na a ni. A pasal hi a neihchhun a ni asin. Sangtea lo haw thawm a hria a, a nuin thil awmdan a lo zawt vat. Chhang mumal loin roomah a rawn lut nghal. Mami hmaah chuan a thingthi a, "Min ngaidam rawh. Khawngaihtakin, ka sim tawh ang. Khawngaihin min then suh.. Ka tihpalh liau liau a ni. Amah Faki vek khan alawm, engkim bul a tan a. Min thlem thiam si a.. " tiin ngaihdam a dil ta ngawih ngawih mai. Chutihlai chuan Anu pawh a rawn lut ve a. A fapa awmdan atang chuab Mami thusawi chu a dik ngei tih a chiang ta. 

"Mipa chuan vawikhat han pelhe zauh an nei thin alawm.. Tawrh ve tur, fa in nei tawh a. Inthen ringawt a tha lo.. Ngaidam rawh. I fanu kha ngaibtuah rawh" a rawn ti a. Anu chu ni lo se Mami chuan a kek duh hial awm e. 

"Ka nu, lo inrawlh suh.. Khawngaihin" a ti vawt raih a. Mak deuh maiin a kal kiang zui nghal ve mai. 

A pasal inngaitlawm hmel chu a melh vang vang a, "Min hmangaih em? " a ti sap a. 

"Hmangaih, ka hmangaih reng che. Duati hlir i buaipui a, i ngaihsak a. Ka tan hun i nei ngai lo va, ka khua a har em a ni" a lo ti zung zung. 

A nui lui sak a, a mittui erawh a hul tawh. "Aw le, a vawi khatna a ni bawk a ; a thleng lo angah ka ngai lui ang. Mahse, ka thinlungah erawh a thi ngai dawn lo aw.. Vawikhat lek pawh i pelhe leh anih chuan, engmah sawi a ngai tawh lo ang. Ka chhuahsan nghal ang che" a ti ta dap dap a. Sangtea pawh a thaw huai mai. 

Mami chuan thil tam tak a ngaihtuah vanga sawi a ni. Haw ringawt se, a fanu seilen nan an in saw a awt hlawl lo. An rethei nufa dawn lutuk. Tin, Sangtea hi a hmangaih em em a, phatsan mah se, a mualpho chu a la phal chuang lo, miin an inthen chhan an la hre ngei ang a. Chutih huna a pasal an hmusit tur kha a ngaingam lo bawk. Ni e, A chan chhe zawk a ni a, chance la pek chu nakinah pawh a thleng leh anih chuan tuman an dem lo vang. Hmeichhe chhel zia hi chu aw.. 

Sangtea te chungchang chu khawiahmah a ri chhuak ta lo. Ringhlel tawk la awm mah se, Sangtea chu theihtawpin a inveng chho a, Faki nen hmuh dun an ni ngai ta lo bawk a. Engkim chu a tha chho tanah an ngai. Mami ngei pawn a ngai a ni. Beiseina nen hmalam hun a thlir leh thei ta. Anuin khati taka an inthen a hlau leh si kha a chhan a hre reng, a fapa mualpho a duh loh vang a ni. A bak a awm lo. A fapa hi a chhuang ve em a, a nihna zawng zanwg te avangin. Chung thil a chhe rup tur chu a ngaingam lo a ni. Mahse, Sangtea a ngaihdam atang chuan tawrhhlelhawm taka a khawsa thin pawh a zia ta deuh e. 

Diteii leh Tki pawh ni 2 leh zan 3 lai an inbe ta. Tki chu a inhawng sâwt hle. Diteii chuan mak a ti khawp. Tki mizia leh nungchang a hre ve reng sia, chuti taka a zei vel leh mipa a nel chu mak a ti. Dinfela chu a lo hre ngang mai. Diteii pahrawn fapa a ni tih pawh a hria. A la sawi chhuak lo thung. A chhan chu Diteii chungchang an la sawi dun tlat lo a ni. A chhan chu Diteii hian, Tki te venga a hmelhriat te atanga hria angin a insawi miau a ni. Sawi tur a haihchham thei sia, a nui a nui ringawt thin. Dinfela dawrah Diteii a thawk tih hriain Tki chuan a hma aiin a be thain a hnaih zawk a. A man ve vek. Mahse, Bena zawk chuan chu aia chianga fiah zel a la duh tlat si. Ni e, Bena hian Tki hi a duh ve em a ni. 

"Dite, Bena bulah sawi miah suh. I u nen khan kan inbe thin a" Tki chuan a ti sar sar a. Diteii chu a lo bo hû mai. 

"Ka u maw.  Au Lawma nen sawn maw" a lo ti. 

"A mak, i u tihah i pahrawn fapa Dinfela nen khan.. Awii chhe lo sia e.. An hausa bawk si, Bena hrilh suh aw" a ti leh sar sar. Diteii hmel erawh a en lo thung. Diteii hmel lan dan chu danglam tak a ni. Hmalam a melh ngawt ngawt a, a chiâi takzet tih a lang reng mai. Dinfela chu a nu pasal fapa maw?!!  Engtin.. A ni lo.. A ni thei lo a ti rilru mawlh mawlh. 

"Ka biak che chu.. I ngaithla lo reng reng, Vawiin tlaiah i kal leh ang tiraw.. Ka lo kal ve dawn.. Min hruai angin awm rawh aw" amah nek deuh salh hian Tki chuan a ti a. A um e kual mai mai. Sawi tur reng reng a hre hauh lo mai. 

"Bena, thil sawipui che ka duh" tiin Tki hmuh loh laiin Canteen lam a panpui a. Tki chuan a rawn zawm vat dawn vangin hmanhmawh taka a sawi a ngai. 

"Dinfela saw ka nu pasal fapa maw.. I hriatna a rei tawh em? " a ti nghal thâwr a. Bena chu a lo hawi â deuh. Mahse, "Ka hre ve chiah, ti ila, ngawi rawh.. Hman deuh khan Tki hian a sawi zuai tawh. Ka lo ngaithla chiang lo va, Diteii nu pasal fa a nia a tih chu ka hre tawh" a ti a. Diteij ai mah chuan a mangan hmel zawk. Diteii chuan awmngaihna reng a hre lo. A thin a rim a, a rilru a na bawk. Dinfela'n chu chen chen a bum chu.. School ban velah dawrah a phei nghal a. Dinfela chu in chungah a awm. Eng sawi set set loin in chungah a pen chho pawk pawk a. Zirlai an lo awm thap. Dinfela office a pan ding nalh. Kik pawh kik buai loin a lut hmiah. Phone call in tu emaw a lo be mek a. Diteii a hmuh chuan mak a tih hmel deuh, a be zo ta thuai a. 

"Teh thut che chuan" a ti a. 

Dawhkana a kut nghatin a va kun phei deuh a, a mita chiang zeta melhin, "Unau maw kan lo nih? " a ti hriam hrâk a. Dinfela a chhing sawk. A hrechhuak ta nge nge maw.. Engtin?! 

"Hahdam phawt rawh. Tha takin sawi dun ang" a ti sup a. 

"A teuh lo. Ka bang tih rawn hrilh tur chea lo kal ka ni. Hlawh pawh min pek a ngai lo vang. I nau ka nihna anga min khawngaihnaah ka lawm. Mahse, ka nu lam atangin tuma khawngaihna ka mamawh lo e. Ka dam ve thei mai an" Diteii tawngkam tin chu a kha fak fak hle. 

"Dite.. Unau kan nih vang a ni lo" 

"Anih engvang nge.  Engvangin nge min tanpui.. I pa hausak vang maw.. Nge ka nu chu i pa nupui anih van" duh aiin a awrawl a ring. A thinrim chhan ber chu Dinfela inzep rei lutuk chu a ni. 

"A ni lo vek" Dam thlup hian a ti leh a. 

"Sawi ta che.. Engvang nge? " a ti leh tuar.. 

"A chhan chu ka duh che a ni" Dinfela aw chu a zawi raih a. A damin a thûk em em bawk. 

Diteii chu a ding khawng lah a, Dinfela chu a melh ngawih ngawih ringawt.. Chutih lai tak chuan kawngkhar a ri rak a, Teteii leh Nunui an rawn lut hlawl.. 

(Inleng ka nei a. Ka ziak thei lo a ni e. A tawi maithei. Ka hman tawh ngang lo. Eirawng ka bawl ve bawk si. Muah vek u ❤