Drose 6

D' ROSE… (6)

Ziaktu : Toni Râlte

"Ehe.. I lo kal law? " Diteii chuan makti zetin a ti a. A inbengkang deuh bawk a. 

"Umm, ka lo kan che" Dinfela chuan khum sira thut pah chuan a ti a. 

Eitur vel chu Diteii khum bul dawhkanah chuan a dah bawk. 

"Kan in te i hria a" Diteii chuan a ti sap a. 

"I lar ve aniang, pakhat ka zawt a, a lo hre nghal" Dinfela chu a nui suk a. 

Diteii hmel hmai vel a han hmuh takah chuan thil dik lo a awm tih a hai lo. Tin, a luh tirha zu rim nam hum hum leh lo awm ve ho a hmuh atang khan ngaihdan a nei thiam deuh mai. Diteii'n nuam lo a ti ang tih a hlauh vangin zawhna neih loh hram a tum. 

"Ka dam tep ang" Diteii chuan a'n ti ngawt a. Sawi tur a haihchham ve chiang alawm.. 

"Nia, i dam vat mai ang, Ka khua a har dawn sia, i dam loh rei chuan" Dinfela chuan zaidam deuh hian a lo ti a. 

Lawma a rawn lut ve a, a ding bu lûk lûk mai. Dinfela chu a thlek ang hé hâw a, "Diteii te zjrtirtu maw i nih? " a'n ti ngawt a. Diteii a îp chawih!  

"Aw ni e, a rawn kal si lo va, ka rawn ngaihven alawm" Dinfela chuan a ko ti awlsam èt a. Diteii tawng tum zuau pawn a thulh leh. A U Lawma te bulah an sir angin a lo insawi tih a hrethiam ve mai. A nuih erawh a za deuh. 

"I fel hle mai mahse, khawiah emaw ka hmu tawh che a ni. Khaw nge kha aw" Lawma chuan a ti vung vung a. Chunglam melhin a thle leh buk thin. Ni e, Lawma leh Diteii bik hian a nu hi an ngaihven lo zual a, Dinfela lah he lama awm khât a lo ni bawk nen, in hriat loh ve theih tak tur chu a ni. 

"Hmu tawh ang.. Ka rawn tei fo alawm.. Helamah" Dinfela chuan a lo ti ve mai a. A hnunga rawn ben thek thek pahin, Lawma chuan, "A lawmawm e, i fel hle mai.. Diteii pawh a dam veleh a lo kal ang" a ti a. A chhuak leh ta chhur chhur a. 

"Ngah nge kan sir anga i insawi kher? " Diteij chuan a ti vat. 

Nui chungin, "I rooma luh an phal loh ka hlau sia" a lo ti a. Diteii room chu a melh kual zauh zauh, a felfai chu thuhran, bungrua tihtham a awm vak lo hlein a hria. Hmeichhe room a ang lo. Mabse, Diteii mizia a hriat tawh vangin mak a ti lem lo. 

Thu ho mai mai sawiin an ti ti a, Dinfela chuan sawi chák leh zawh châk a nei. A ngam chiah si lo. Rilru pangkhing angreng takin a hawnsan ta phawt a. Diteii pawh chu eng emawti zawng deuh hian a hlim riau. A beisei loh lutuka Dinfela a rawn lan vang a ni mahna. 

Puia chuan Diteii dam loh thu a hriat chuan pawi a ti angreng hle. A chhan pawh a thawmhnaw chah a rawn thleng nual a. Model a mamawh a ni. Puia û nula ti ila fa pakhat nei nuthlawi Heleni hi Mizoramah chuan designer lar pawl a ni a, a design hi mi lar tam zawk chuan an ha vek tawh a ni. Chung a û design tilartu atan chuan ania Diteii kha a hman. A û te atangin hlawh a neih bakah IG atangin a la lut bawk nen.. Model satliah ho ai chuan Diteii kha a lo tla na phian si a, a zawngchhawng ta tlat a ni. A phone chu a la a, "Aw, nunu" a ti sup a. 

"A mak, i rawn kal dawn lo mi? I rei" a rawn ti hlak hlak a. A hrechhuak thut, a chal a dawm vung vung mai. Vawiin tlaiah Nunui te inah zanriah a ei dawn tak kha mawle.. 

A phur tehchiam lo hle mai. 

"Ka insiam mek" a ti nghut a. Phone a dah. Nur nâng chungin inbual turin bathroomah a lut ta a. 

Mami chuan a fanu, Duati tia an koh chu a awi hliau hliau a, a pasal leh a nu inhau thawm chu a hre pha reng. Anu hi pawnlama thuro, in chhungkhura sakei kan tih ang chiah kha a ni. Mi lakah chuan a tha duam duam viau. Mami pawh a mo tirh chuan a nu kha a nel hmasa ber reng a, mahse, hei an innei rei tial tial a, a nu zia a hre hnem tawlh tawlh. Thenawm khawvengte bula Mami nèk deuh rana tawngte chu a chinh chho a. Lawma ten zu an zawrh tak hnu phei chuan hmusit rawngkai deuh hian a tawngkhum ta fô mai. A chhanglet ngai lem lo va, a tuar tawp mai a ni. Tun tuma Sangtea nen an inhauh chhan pawh Mami chu kar kalta atang khan a lei a durh vak mai a, thil pawh a ei hleithei lo. A pum lam dik lo aniang tiin pum damdawi man tlawm deuhte chu a ei ve a. Eng a ang thei si lo chu inentir a duh a.  Anu bulah a sawi a, "Lei durh mai mai te chu kan kalpah mai mai alawm.. Zuau lutuk" a lo ti zèk si a. Sangtea lungawi ta lo chuan a nu chu a khak ve a. An inhau zui ta mai a ni. 

"I tawng duh dan te hi ka hai hleimem, eng emaw hleka mei nei zetin i tawngkhum hlek hlek a, a dik lo. Mami hi kan nu a nih vanga tan ka ni lo.. I awm dan hi a dik lo a ni" Sangtea chuan a ti ta hmiah hmiah a. A puakkeh ve ta a niang. 

"Khanglang a che. Kei i nu ai hian i nupui, nu uiresan saw i tan zawk a maw? " a ti leh kher a.. Mami a insum zo lo teuh kher mai. 

"Engpawh sawi rawh, a pawi lo. A hmingin hlawh ka nei ve a, naktukah kan inentir dawn ani mai. In pawisa cheng khat pawh kan hmang lo vang" Sangtea chuan a ti a. A rin aiin Mami hi dawhthei a ti. Anuin a sawi dan zawng zanwg a hre ve vek a, mo dang chu nise an pasal te bulah pawh an vui tawh ngei ang. Mami erawh a vui lo mai ni loin, anu chu a sawi chhe ngai lo hrim hrim. Chung avang chuan a lainat zual a, a zahawm a ti bawk. A farnu leh a nau te chu Mami lakah an tha reng, mahse, anu bawk hian a farnu pawh a tikhaw lo zo a ti mai, Mami awm ve chinah Maliani chu a che ngai mang lo a ni ber. Anu in tir ngai hek lo. Mami chu hah pawh a hah ve reng a, Maliani'n puih ve a han tum chang pawn a nu chuan thil dangah a tir daih zel. Mami tan lah phût ngam a ni thin si lo. A nulat laia thau ve káng thin kha a cher ta hle reng a. A thawhrim bakah a rilru a chawl si lo, a naute ngaihtuah ngai ve bawk nen.. Sangtea chuan a khawngaih thin. 

Sangtea pa a lo haw a. A fapa leh a nupui inhnial chu a ngaithla ve reng a. "A tawk e. Duhtawk ru, inzahpuiawm em mai.. Va inentir rawh u, naktukah chuan" tiin a khap ta a. An ngawi ve ta hram. Mami tan boruak chu a nuam lo ta khwp mai. Zanriah pawh tih tham a ei lo, eitui a har ve em bawk a ni. 

An ei kham chaw ei thleng a sil dawn lai chuan Duati a rawn tap a, Hnute a va pe leh sawk sawk, a bang duh mai lo lehnghal. A nuamsam lo ve deuh mawni.. Nau paw chung chuan thleng chu a sil a, Maliani thu reng chu Sangtea chuan, "Ma-i, i u saw va sil chhawk rawh. Nau paw chungin nuamsam mang lovin a che ziah a, dam pawh a dam theih loh hi" a ti a. Maliani chu a tho ve mai, mahse, anu chuan, "A tul awzawng lo, thleng te a sil ve em em lohin eng nge a tih ang.. Maliani te chu fanu duatlai ania, engahmah phut reng reng suh u" a lo ti hmarh hmarh a, Sangtea chu a inhumruh hman, mahse, Chutih lai tak chuan inleng an nei ta hlauh a. An inbengdai ta hlawm a. 

An inleng te chu an kohhran rawngbawltu leh upa an ni a. An thutak hmel viau mai. 

An rawn kal chhan an han sawi chuan, Sangtea nau, an naupangber Malsawma chuan sâwn a lo thlak ve reng a lo nia, sawn man an lo thing a lo ni. Malsawma chu kum 23 chauh a la ni a, mak an ti hle. Amah chu a leng daih thung. An veng ami tho Pu Ramliana fanu tlum ber Alice  lakah sawn a lo thlak ve a lo nia,. Alice pawh kum 20 vel awrh chauh a la ni. 

Pa ber chuan sawn man pe lo va inrem dan kawng zawn zawk an duh thu te a sawi a. Palai tir turin an inthlah ta kha a nia. An inleng te chhuah hnuah, nu ber chuan, "Alice  chu a fel reuh alawm.. A hrisel bawk ang ani chu, an hausa bawk nen, a tha dawn lutuk" a ti lar lar a. A tawng mei neihzia chu tuman an hai lo. Nu maksak tak zawng a ni ve e. 

Mami chuan a dinhmun chhiatzia a hre reng a, tawrh ngawt ngawt bak tibtheih a nei rih lo bawk a, vuivai a tum rih lo. A la tuarchhuak ve mai turah a ngai. 

Pu Vanlala te in a thlen chuan an lo awm thap tawh a. Nunui chuan a lo chiauau vat. Pu Vanlala pawh chuan a lo danwgsawng tha angreng. Puia chu mipa puitling a ni tawh bawk a, han zah tit tet ang kha a nei tawh lem lo. A bialnu te inah chaw a ei ve dawn a ni mai a. Thil mak pawh a ni hran lo. Zanriah an ei laiin Dinfela pek chuan, "Puia, Kha i model thar Diteii kha a va tha reuh ve, i hlawkpui viau lo maw? " a ti a. Teteii leh Nunui an inmelh ralh. 

Puia chuan, "Umm nia, model naranho ai chuan ka hlawkpui, amah hi a la zakzum rih em zawk a. Nawrluih vak hi ka hreh a" a lo ti ve mai a. 

Nu ber chuan, "Diteii hi chu a dangdai ve em asin. Ka chhuang teh mai ania" an pa mitmei veng ru deuh chuan a lo ti ve a. A thlalak te kha a lo hmu ve vek bawk a, a chhuang ru takzet reng a ni. Teteii te nena an buaina erawh engmah a hre ve lo thung. 

"Pawisa a mamawh sia, tanpui zel rawh" Nunui chuan a lo ti nghat a. Pu Vanlala chuan a melh kâwk. 

"Mama, Diteii chu i lo hre ve reng reng a ni maw? " anu chuan a lo ti a. 

Dinfela chuan chaw thial pahin, "Hre ve e, kan inkawmngeih nak alai a, ka ngaina lutuk. A rilru thianghlim lutuk saw an la bum fo ang tih ka hlau" a ti nghut a. Teteii a lo îp chawih. Dinfela sawi awmzia chu a hre ve reng. Puia pawn a hai hauh lo. A rilru tibuaitu zawk erawh thil dang daih. Dinfela hian Diteij chu a lo hmu fô tihna annia, unau an ni tih Diteii hian a hria angem? Unau pianghmun an ni si lo va, Dinfela hian farnu enin a en tak zet angem?  Tihah a buai daih. Chu chu amah pawn mak a ti. Diteii chu tu emaw bialnu ni turin a phal lo a ni thei ang em? 

Chaw eikhamah an han thukhawm leh phawt a, Nunui chuan a nu leh pa pawh zah zo lem lo vin Puia chu a ngheng deuh chial reng a. Teteii erawh a tuka an show neihna tur thil vel a buaipui thung. 

"Naktulah chuan Teteii va tawiawm ve ang aw" Nunui chuan a ti sar sar a. 

"Ka hre lo le, Tachhipah hna ka nei a, ka kal maithei" Puia chuan a lo ti a. 

Nunui a meng hnual nghal, "Chhuanlam i hre siah" a ti hmak a. 

"Chulam pawh a ni lo, ka hna aia pawimawh a awm lo ka tih kha" A lo ti dam thlap. Puia chuan hawn a tum chho tan a, A la hma viau naa tum dang a nei tlat. Nunui nen an inmuah zuai. Diteii te in lam pan in a tlan thla ta nghal a. 

A va luh chuan mipa pathum leh hmeichhe pahnih an lo awm a. Zu rim a nam leh huk mai. A ner sawk. Zu hi a in ve zeuh zeuh, local erawh a ti hleithei lo achha a ni e. 

Lawma chu a lo kai leh viau tawh a. "Lawma, Diteii eng nge a an? " a ti a. An lo en thap mai. Lawma chuan Puia chu a thlek vang vang a, chutah ding deuh hluaiin, "Nang hi tiraw Diteii inhralhna kha.. Engtin nge i rawn kal ngam zawk? " tih leh a kawr awma va tham a rual nghal a. Puia chuan a hrethiam lo hman thelh. Mahse, A thluak fing tak chuan a chhuidawn thiam nghal. 

"Min hrethiam teh, chutiang chuan tuin nge hrilh che a. Sawi fel ang.. Tha takin" a ti a. Lawma chu a pawt thu nghal. Teremi pawh inla eng emaw zetin Puia bulah a thu ve tharh. 

"I nau hi a inzuar reng reng hleinem keiman ka sawm zawk. A thla bak ka la hek lo, amah leh amah a intuak ve a ni mai. Mawi lo leh zahawm lo khawpin a inchei ngai hek lo. " Puia chuan a ti ta a. Lawma a khap fuk fuk, "Mahse, Teteii kha chuan i bula inzuar angin a sawi sia.. " a ti nuah nuah a. Dik tak chuan a thinrim ngam vak tawh lo. Diteij a khawih na angreng si a, a inthiam meuh lo a ni. 

Puia chuan a phone phawrhin Diteii thlalak ho chu Laawma chu a entir ta a, "Khang thlalak vang khan pawisa ka pe ringawt alawm. Diteii hi i rin ang a ni lo. Kei pawn thlalaksak bak ka tum lo. Tikhan hlawh kan nei ve ve ringawt" a ti a. Lawma chuan Diteii thlalak chu a en uluk kher mai, chutitaka a nau nalh chu a la hmu ngai lo va, hmuhnawm a ti ve hle. 

"A tha e. Hetiang anih chuan.. Ni e, Teteii khan khatiang khan a lo sawi a, ka insum hman loin ka khawih na ta deuh a ni.. A roomah a awm" a ti ta a. Puia a tho uaih, "I khawih a maw? " a ti tuar. A kut a humruh nghal. 

Lawma chuan ti dui hian, "Ka thinrim em a ni" a lo ti sup. Puia chuan eng sawi tawh lo vin Diteii room a pan, a lo inkalh lo bawk a. A lut hmiah. Diteij chu a lo muhil a. A hmai duk leh a kamsir kak chu a thlir ngawih ngawih. A lainat hle a ni. Dawt vang mai mai lehnghalin. Kaihthawh a hreh si a, a chhuahsan leh ta a. 

"Lawma, vawikhatmah kut lo thlak tawh suh aw. Diteii hi ka hrechiang, tleirawl fel leh pawisawi lo a ni. Ngaihtuahawm a ni lo" tiin Lawma chu a chah mawlh mawlh a. Kut a lo thlak leh ang tih mawlh a hlau a ni. 

A hawn kawngah te chuan Teteij rilru chhe lutuk chu a ngaihtuah neuh neuh a, he nu hi eng emaw ti kawng tala hmeh mih a ngai a ni. A lar tawh angreng si a. A thla laksak pawh a har talh tawh. Mahse, Pawi a ti hran lo. Teteii te ang mi pawnlang, lar khel reng renga khawsa te nen inhnimhnaih loh chu a duh fe zawk. Nunui pawh hi a hne tan, a duh hiam hiam lutuk chu. Mahse, nakinah mamawh hun a la neih a rin vangin han then tawp erawh a tum rih lem lo. 

Dinfela chuan Apuii msg chu nui vur vur chungin a chhiar a. "Lal u, naktuk chu i office-ah ka lo lut dawn ania" a rawn ti. A ngampa sawt ve viau mai. Diteii a ngaihtuah loh kar lakah Apuii chu a ngaihtuah thin. Eng maw?!  Tunah khan eng nge a ngaihtuah, Diteii a ngaihtuah thin tih a sawi! A thu hnawk. He nau hian a rilru a tibuai tawh tlat. Unau an ni tih hi a hrilh tawh mai dawn nge.. Mahse, Diteii hian a hlat phah sawt angem? Teteii anga sum ûm chi a ni ve hulhual bawk si lo. Puia tawngkam atang kha chuan Diteii zawkin a va pûr lo tih a chiang viau. A naute pahnih hian engvanga Diteij chu mil lo riau nge maw an nih le.. Nunui hi chuan Puia lakah a thik anih a ring. A hrethiam ve mai. Teteij mawlh hi a mak a ti. A laizawn ngei ngei pawh phiarru duh chu.. Eng ang chiaha nasa ni ang maw.. 

Inrinni a ni a, khua a thiang nuam viau mai. Diteii pawh a zia chho ve zel a, a nâk pawh eng emaw ti zawnga a awm loh chuan a na vak tawh lo. A biang duk erawh tlem a la chambang. Mimi nen eirawng an bawl dun thin a, a la che tha thei lo deuh naa mut reng kha a ning ve si a, Mimi hi a ngaina sawt khawp mai. Zu chu a in ve, mahse, mi tha a ni tlat. Diteii rilru mil tawka kawm dan a hre si. A taimainna viak a tha si, Diteii tan chuan unaunu ang mai a ni. An kum erawh a inthlau angreng. 

"U Mimi, Zu hi in tawh lo la" a ti sar sar a. Antam an mal mek a. 

Mimi chu a nui hak,"Ka in loh chuan ka muhil thei lo lawm" a ti a. 

"Kan bulah hian awm ve reng tawh rawh aw" Diteii chuan a ti leh a. A ngaihtuahna mawlmang tak avang chuan, Mimi hnukna ulh lek lek .. 

"Nia, awm ang. Mahse, sumdawng ka nia, ka chhuah zeuh zeuh a ngai alawm" a lo ti a. 

"Khaw nge i chhungte an awm? "

"Thingtlangah daih.. Nakinah ka chanchin hi ka la hrilh ang che.. " mimi chuan a ti a. Antam sil turin a thawhsan ta a. An inah chuan Mimi bakah hmeichhe chi hrang hrang an lut chhuak ve reng thin. An mikhual room chu an hmang thin tih a hre bawk. Ks an nih a ring a, ks tia sawi tawl erawh a ngam lo. Hmeichhe pakhat phei chu hman zanah a rui buai a, a tap, a thawmhnaw te a hlip vek a, chhuatah a sapatal a. Diteii mak tihzia kha. Zu hi far khat mah a la in lo va, an ruih hian engtin nge an awm tih erawh a hre chak ve thin. Mahse, kha nu anga ruih kha chu a duh miah lo. Mimi bawk hi zu a in kal ve renh naa a ruih lai awm hi a la hre thei miah lo. A awmdan chu a ngai reng ni maiin a hria. Lawma te zu zuar chu a khap bet thei chuang lo va, a enliam ve tawp tawh. Dinfela kha a lo kal leh ta miah lo. A buai ve a nih a ring. Engkim hrilh a chak a, mahse, Lawma a timualpho danwin a hre si a, a ngawinta mai a ni. Puia pawn chanchin a rawn zawt fo a. A hna chu thawhsak tawh lo mai thain a hre fô.. Mahse, pawisa a mamawh ve tho si.. A inkhâp buai ve thin khawp mai. 

"Dite, bialpa i nei em? " Mimi thusawi chu awih loh hmel zetin a lo ngaithla. 

"Nei lo ka nei duh hek lo" a ti sap a. 

"Tete, hmanhmawh rawh. Ka nu te an inpeih vek tawh ania" Nunui chuan a rooma rawn dakin a ti lar lar a. 

"Aw ka hman tep" a lo ti a. An chhungkuain an picnic dawn a ni. Puia bakah an thiannu Kimi a tel ve dawn bawk. Chuan, an cousin Remruata nen. Dinfela pawh a kal ve dawn khiah. Hlim takin an picnicna tur hmun lam pan chuan an kal ta a. Dinfela chuan Diteii hruai ve a chak viau naa, unau an ni tih a hre dawn si a, puia a kal ve dawn bawk nen, boruak tha lo a thlen palh a hlau. Apuii a sawm mai dawn mawni aw a tih laiin Apuii chu a thiannu te inneihna lamah a kal a ngai si a. A sawm buai ta lo mai, sawm se chuan a rawn kal duh zawk a ring. A ho em mai, hmeichhe tel lo pawn a hlim thei a ti ta ringawt mai a ni. 

Cook an hruai tel loh vangin hmeichheho chuan rawng an bawl a, Remruata nen tui an cheng barh barh, Puia erawh chu thla lain a buai leh hle. Camera awrh pawh hi a inhmeh viau tawh a ni. Remruata pek chuan zu a lo pai niin, chawhnu lam chaw la ei hma siin an thlang in teah chuan an lut thla ta diak a. Puia pawn a in ve karh karh, Dinfela chuan a in tam lem lo. Zu hi a duh chuan a in lo thei khawp. Remruata erawh chintawk a hre vak lo. Chutia an in ho mam mam lai chuan, Kimi te an lo lut hlawl mai. 

"Khawi kan duh ve" an ti nghal tâwng. Remruata lah a phur, a dang a han lak belh sauh sauh a. Nunui erawh chu a u a zah vang nge a in ve lo. Teteii chu a ruka in zauh zauh a ni bawk a, bakah zah vak tur awmin a hre lo nen, a thawkkhat vei piap piap reuh a. Mipa ho chuan an notice lem lo. An titi tui viau. Pu Vanlala te nupa erawh nisaah inphoin an taksa te an inhmeh sak tawn a, an hlim nupa ve khawp mai. 

Puia leh Nunui an inzui chhuak, thla kan la dawn an ti a. Kimi chuan, "Remruat, tui hleuh min zirtir ve teh" tiin a pawt tho bawk. An ni hi chu inngaizawng chi an ni lem lo. Kimi hi a hmelchhiat bakah a ngaihzawnawm loh. A itawm loh a ni tawp mai. Dinfela leh Teteij an thu dun ran mai. An awmna in chu pool atangin a hla deuh hlek a, tumah an rawn kal a rinawm loh. Dawhkan lian zet a inhung a, chair tlem nen, chubak bungrua em em a awm lem lo. Teteii chuan a zu no sawi hliau hliau pahin, "I bialnu i sawm ve lo va" a ti a. 

"Bialnu ka neih hunah aw" a lo ti thum chhak. Chu chuan beiseina a neihtir deuh nge a va hnaih hrat a. 

"Unau kan ni lo, a dik em? " Teteii chuan ngam sârh hian a ti a. 

Dinfela a khi suk.. "Ni e, unau kan ni lo. " a lo ti a. 

"Ka awmdan hi i hai ka ring lo va.. Ka mipa duhzawng chu ka hlah ngai lo bawk" confi fe hian a ti leh a. A zu chu a tlak pap.. 

"I mipa duhzawng ka ni i tihna maw? "

"Inla mawl viau suh. I hre vek" 

"Chuan"

"Chuan" Beisei nei zet hian Dinfela darah a khabe a va nghat a. A nui sáng bawk. Dinfela chuan, "Eng nge i duh? " a lo ti ta a. 

Teteii chuan a pum sa hat hat chu a hre thei, a lu hai deuh chiai bakah, a thawveng riau te, a bula mipa, a dream fo thin, a khawih leh deh châka a hnaih ruk fo zawng zawng nen chuan tun bak hi chance nei dawnin a inhre lo. Dinfela rawn hawithla leh chiah chu a han kiss ta chat mai. Dinfela chuan a hriatlawk anih avangin mak a ti hran lo. Mipa a ni a, thisen lum ve thei a ni, sex lamah tawnhriat lo nei tawh, thil tawrh hrehawm zawk zawk a ni lo tih hrechiang ve tawk tak a lo ni bawk si. Teteii chu a mil loin a mizia chu a ten zawng tak mah nise, a unaunu lem, model nalh tak a ni tih a hai chuang miah lo.. Teteii beisei ai mahin a lo dawngsawng tha a. A samah hrawm nawk nawkin a kiss ve ta mial mial mai le.. 

Dawhkan lian zetah chuan Teteii chu nam muin, a malpui chin erawh a uaithla a, a inpeih titih der mai. A meng si sap a, a hur hmel ngawih ngawih. Mahse, tisa châkna mita thlirtu tan chuan chu aia sexy chu an awm thei kher lo vang. Dinfela kap chu rawn hup chatin, pha leh pha lovin a zen lut a. Dinfela pawh a khawng awt mai. A zu in kha a tam lo bawk a, thisen lum nan chuan a tawk chiah. Mahse, mi an lo lut thut thei tih a hrechhuak. Kawngka chu a va kalh ta khap mai. Teteii kawr hak themlem zet chu hlim chho pawkin a hnute var hai, mum tang chu a sawk tawn tawn a, he hmeichhia hi a zei lo miah lo a ti rilru bawk. Teteii kut pawh a awl hauh lo. 

Hmanhmawh a ngai tih chu an hre ve ve. Rang taka zawh tumin Teteii kekawr bul chu a pawtthla a, a kekawrte chu keuin, Dim lutuk lo vin a nawrlut ta pâwk mai. A lo tui hlap tawh a, chuti taka tight a ni hran lo. Teteii rum nghar nghar chu duh aia a rin a hlau, a hnute fawn hlawrh hlawrh chu hmet hrualin chunglam melhin a ang phiau a, a si hlarh hlarh bawk. Dinfela chuan a thiltih laiah insawrbin tumin an duhthawh hret a, a zo lek lek tihin, Diteii hmel hi chiang fahranin a mitthlaah a rawn lang hlawl mai. Mak takin a zawi nghal rawih rawih nia!  Hrep taka! A zo tep asin. Amah pawn mak a ti. A phawi hmiah, Teteii hrilhhai chu a melh duh lo lui tlat. A inhak that hnuah, "Ka zo" a ti chhum hmuk a. Mipa lo mutpui ve fo tawh Teteii chuan a zo lo tih a hming a hriat chian tlukin a chiang. Thil dang vang a ni ngei ang. 

"Chho ang" Dinfela chuan a ti leh nghut a. A kal nghal daih. Teteii hrilhhai lutuk chu a ding khawng reng ringawt. A vawrtawp tal thlenpui awm a ti rilru a. Dinfela pawh chuan nuam a ti hran lo, Teteii chuan pa lo, zei lo a tih a hlau ve tho. Mahse, a tilui thei thlawt lo a ni ber. Enhvanga Diteii kha hrechhuak ngawt nge a nih ang le? A kut a hum ruh a, "Eng nge maw tak zawng a awm a ni. Ka hre ngei tur a ni" a ti sup a. 

Nunui leh Puia pawh hnahthel chungah rem leh rem lovin an inbawhbet thial thial mai. Nunui boruak ngam lutuk chu Puia pawn mak a ti deuh, a chhungte an awm hnai ve reng sia, an rawn hmu ang tih a hlau miah lo em mawni le.. A hmeichhia zawkin a ngam phawt a hnu le tiin chet a la ve hmiah. 

Chaw an eia an hawn thlengin Dinfela a tawng tawh lo. Anu chuan thil dik lo eng emaw. aawm anih a ring a, a zawt ngam teuh si lo. In an thlen veleh a roomah a lut a, a inbual nghal. A inthlak sawk sawk a, bike chabi lain, a chhuak zui nghal. Diteii te in kawtah chuan a ding chat a. In chhungah chuan an ri leh nuai nuai mai. In tawp tak chhunga Tleirawl pawisawi lo cheng ve chu inhmeh lo hlein a hria. Kawngka pawh kik lem lovin a lut hmiah. Teremi chuan a lo hmuh rualin, "YMA an strict lutuk a, kan pe chhuak ngam lo" a lo ti ngjal ngawt. 

Dinfela chuan nelawm deuhin, "Diteii zawk ka rawn kal chhan a.. Ka hmu thei ang em? " a ti a. Lawma chuan a rawn en ve a, "An sir anih kha.. A roomah a awm.. Va kal rawh" a lo ti nghal sawt sawt. Dinfela chuan Diteii room a pan nghal. 

A room kawngka rawn kik dat dat avang chuan a thil ziah lai chu a chawl dat a, tlaiah Bena'n tlawmngai takin a  note a rawn hawhtir a, a copy mek a ni. 

"Lo lut rawh" a ti a. Dinfela a hmuh chuan a meng phâwk deuh. Ngati fô nge mawni.. "Ti nge i lo kal leh? " a lo ti mawl tawp. 

"Ka ngai che a" Dinfela pawn a thusawi chu a mak a ti. A inrin hmain a sawi. Diteii hlei hlei chuan mak a lo ti. 

"Nge min ngaih ve ngawt" a lo ti hlar thung. 

"Ngaihawm hek che"

"Note ka lo copy a.. " 

"I ziak thei mi? I nâk a na lo mi? "

"Na vak tawh lo e. Mondayah chuan school ka kal ve thei tawh ang" 

Dinfela chu a mah si deuhthawin a lo thu a. A hawrawp pa zet, chhe pherh phurh zet chu a zahpui thut. A hup vat a, "En suh" a ti a. Dinfela nuih a za ngang mai. 

"Doctor tur i ni tihna anih kha" a ti sup a. 

"Police zawk asin ka nih dawn" a lo ti vat. 

"Model alawm i nih" awmze nei zet hian a lo ti a. 

Ditei'n a hmui a tisawi zauh, "zu rim i namin ka hria" a ti hâw a. A la nam mawni le.. "I ngaihbel nih chu" a lo ti a. 

"Lo kal tawh suh. A zahthlak. Ih, zu zuar kan ni si" inthlahrun hmel zeta Diteii'n a tih chuan, Dinfela thinlung a nghawr dat. Diteii bek sam tla thla chu a bengah a zehsak a, "I zuar ve hleinem.. Chuan, Dite, i dam loh chhan kha min hrilh duh ang em? " thutak zet hian a ti ta a. Diteii chu a che sek, Dinfela mitah pawh a en ngam lo. A sawi thiam lo, engtin emaw a awm. 

"Ih, Au Lawma hi miin an lo bia a, U Puia bula inzuar angin.. Engmah hrechiang lo vin kut min thlak a" a ti ta a. A aw chu a zawi hle. Dinfela chuan a lo rinlawk mah nise,  atak ngeia a han hriat takah chuan a insum hman lo thelh a ni. Hetiang vantirhkoh te chu tuin nge nunrawng taka kutthlak duh ang.. 

"Tuin nge i U chu hrilh? " a ti ram hmak a. Diteii chuan mak a ti deuh aniang, a rawn melh kâwk a. 

"Miin" a ti ringawt. Teteii chu humhim hram a la tum tak tâwk tâwk chu a ni si a. 

"Dite, Thla hi la tawh lo la" a ti zawi sup a. 

"Ngati maw? "

"Miin an ngai dik lo ang che tih ka hlau. Model ho chu i hriat kha" satliah thei ang berin a lo ti a. A rilru erawh chuan, "Puia hi hnaih tawh lo la ka duh" a ti thung. 

"Nia, pawisa kha ka mamawh em a. Tih tawh loh mai pawh ka duh tho.. Ee.. In hausak hmel sia, inhlawhna tha deuh te i hre lo maw! " a ti ta vut a. Dinfela a lo hamhaih. 

"Hm.. Ih, ka lo ngaihtuah ang aw.. Thla chu la tawh suh aw" a ti dam thlap a. He pa hian a lakah thu a nei riau, a sawi thiam lo, a thunun thiam tlat. "Umm la tawh lo vang" a ti ta a. Amah pawn he pa vanga han duh loh ngawt chu a ti rilru, mahse, lehlam takah chuan miin an sawinruk dan a hre ve deuh tho bawk a, Model an en dan a la ngai reng si.. Teteii nen buaina an nei tawh lo bawk ang chu.. A beisei. 

Dinfela chuan a note thenkhat chu a copy pui ve bawk a, Mimii'n thingpui a rawn lumsak bawk. Inngaizawng te pawh an ang. Mahse, chutiang chu engmah a awm si lo. Dinfela rilru pawh a buai ru viau, Diteii chuan a thlawnin pawisa a danwg duh dawn hauh lo tih a hriat vangin eng emaw tal a tih a ngai a ni. 

Teteii erawh khumah muin a hun tawn chu a ngaihtuah a, Dinfela nen an hun hman dun te, a khi leh sak thin. A lo rinndan chuan Dinfela chuan a pawh chho deuh deuh ang a, a lamah a la hîp hnaih theih a beisei tlat a ni. Unau dik tak an ni lo bawk a, innei mah se, a tirah miin mak an ti tho anga, a rei anga, mi sawina chu a la reh mai a ring a ni. Mahse, Difela'n laklawh taka a tawpsan kha a ngaihna la hrethiam lo. Mak a ti a, a ui ru hle bawk. 

Diteii chanchin pawh kha a lo hre vek, Lawma'n kut a thlak dan te kha. Khatiang em em kha a thlen a beisei lo naa, Puia nen an inhnaih tawh loh hram a beisei. Awmkhawmna hmuna a mah aia Diteii thlalak an lo bih nasat zawk te hian a na zawk zawk thei. A nau patil chuan a lar khalh a hlau. A chang chuan a nau ngei laka rilru chhe zet a pu thin chu a inngei ve thin tho. Mahse, amah inthiamchawp nan,  model hi chu a ni thei lo alawm a tan a tha lo tiin a inhnem ringawt thin. Nunui laka mark tihthat hi a tihmakmawh a ni bawk. Nunui nen an inkawm tak tak hma khan Puia nen hian an inhre diah tawh a, an lo ck zuai tawh. Mabse, sex em chu an la hmang lo. Nunui hian kherh tlat lo se, puia chu a bitum hreh hlek lo, a tan chance a tha dawn tlat. Mahse, Nunui hian a atchilh nasa si a, inrawlh a duh lo. A tihlungawi a ngai tih a hai bik tlat lo. Engkimah a mamawh chu anu hnenah aiin a pa hnenah a lam thin, Chu chuan pa rilru tluang tak Pu Vanlala rilru a hneh fo. Apa tak tak angin a en niah a ngai. A mamawh pawh a tihsak nasa reng bawk. 

Mami te chhungkua pawh mo nei turin an inbuatsaih chho a, Alice chu a lo rai lian hle tawh alo nia. Chu chen chen an hre lo thei chu Malsawma inthup theih vang bakah amah Alice hian a fa paina chu a lo sawi duh lawk lo a lo nia. Tunah chuan an khawtlangin an hre ta bawk a, Malsawma pawh a leng lut ta zauh zauh. Sangtea nu pawh Mami lakah a la khirh zui zel a, Mami erawh chuan beisei a nei. Alice a rawn lawi chuan, an in dan ve thuai a beisei. Sangtea bulah erawh a sawi lo. A nau te a ngaihtuah fô a, a bikim Diteii, Lawma te zu zuar chu Diteii tan zawk pawi a ti. A nun a khaw loh phah mai ang tih a hlau thin. A rawn be khât viau lehnghal. 

"A mak, koh i va hre thei lo ve..thingpui lum rawh" anu aw teng zet a vang chuan a phu zawk. A maian hih lai chu dahin thingpui chu a va chhuang a. Maliani pawh a mu mai mai sia,  tirh ve mai awm. Maliani pawh hi a zia a dang tawh, a mo tirh chuan a felin engkimah an inkawm thei em em. Mahse, anuin hetia a han voh deuh atang hian Mami chu puih tumna leh biak hmasak tumna vak a nei ta lo. Hmeichhe zia tak hi chu aw.. 

"Thingpui siam lamah hi chuan i pachhe ve thlawt, luak a tichhuak" tia a nuin a thingpui siamsa a leihbuak chu a thlir reng a. Indona chu a nasa ta hlein a hria. 

Ngawi rengin no ruak chu a sil a. Anu erawh a phun hlak hlak. Chhanlet chuan an buai thui dawn tih a hria. Fa an lo nei hman khanglang si a, bakah Sangtea hi chu a tan pasal tha tak ala ni reng. Then ngawt chhan tur a awm lo. Intjen se Lawma te a belh a ngai anga, Teremi nen an inmil dawn si lo. 

A phone ri ral ral chu lain, "Hello, min va be khat min ngai lo" a ti nghal sar sar a.. 

"Ka buai ve lawm.. Lehkha zir a ngai sia.. Ih maw, Mi pakhatin part time-a inhlawhna min siamsak dawn a. Thlalak ai chuan a tha zawk em? " a rawn ti a. 

"Kha chu i thu thu lawm.. Nia, thlalak kha chu nakin zelah i la buai ka hlau. Tu nge chu pa chu, a va fel ve" Mami chuan a ti hlut a. 

"I hre ve lo vang, Dinfela a nia, Institute a hawng a,.  Eng ber nge ka thawh dawn chu ka la hre lo" a rawn ti a. Dinfela.. Chu hming chu a hriat tawh hnu a ang, a hrechhuak zo tawh lo thung. 

"A tha lutuk alawm ka naute,. Mahse, i lehkha zir kha dah pawimawh ber rawh aw" a ti a. Thil daang sawiin an titi leh luam a. An inbiakna chu an titawp ta a. 

"I naute lah saw an inla model ve sia, tisawn Officer choice an la ni anga, pasal pawh an la hmu zo lo ang ti nia. Pawisa duh lutuk" anu chuan a lo ti leh hlawih hlawih. Chu em em chu a tuar thei tawh lo. 

"Ka nu, ka lakah hian eng nge i duh a i phût? Ka tihdik loh chu sawi la, ka insiam tha ang. Ka naute chungchang chu sawi tawh lo la ka duh khawp mai" a ti ve ta hmak mai. Maliani pawh a rawn inbengkang ûr nghal, "Khanglang che chuan, ka chhang e te min han tih.. Pasal nu pawh zahna nei lo.. I engkim hi ka duh lo, in inneih hma atang khan ka duh tawh lo che.. Mahse, kan fapain chang dang kan a tum miau loh vangin ka lalut mai che a ni. Hre reng rawh. Mi rethei, nu uiresan, pa nei tawh lo hi, chhungkaw bul lutuk hi chu tuman mo atan an duh lo vang" a ti ta phiar phiar mai. Mami chu a khap fak fak a, a thinrim ve hle tih a lang reng. 

"A tawk e. Ka nu kha a uire lo. I rilru chu ka hrethiam e. Mo fel deuh, chhungkaw hausa deuh atanga chawrchhuak i nei dawn alawm.. I hlim ngawt ang.. " a ti kha ve fak fak a, Duati muhil a thawh vangin roomah a lut nghal. A khur der der mai. A thinrim takzet a ni. 

Dinfela chuan Diteii thawh awm tawk a ngaibtuah nasa a. An institute-ah chuan eng em em tih a ngai hran si lo. A dawrah lah thawktu an indaih si. A buai angreng hle. Mahse, a vanneih asiamin a dawra thawk, Thingtlang lam mi chu an chhungkaw thil vangin a haw a ngai ta thut a. Chumi ai ah chuan Diteii chu a la ta a ni. A thaw huai mai. Hlawh pawh mi dang aia tam pek a tum ran. Puia hnena kal chu a thinlung takin a phal tawh lo. Tuesday-a School an pan dun laiin, a hna chu a sawi ta a. Diteii nui hmel chu a mawi takzet. 

"Mahse, eng tik hunah nge ni ang? " a ti a. 

"I school banah ni mai. Inthlakna tur i keng lawk anga, keiin ka lo phur phei anga, dawr i lo thlen hunah i inthlak thin ang a" a lo ti a. 

"Ka thawk rei hman awm lo ee.. " a lo ti niah niah a. A inthlahrun vanga sawi a ni. 

"Chaw pawh ka dawr bula hotelah sawn an ei nghal mai zel. Zan dar 7 thleng kan inhawng thin a" a lo ti a. 

"A tha lawm.. Engzat nge min pek ve ang" zak deuh chung hian a ti a. 

"I thawh hunah kan sawi mai dawn nia. Kha chu. I tihtur chu paper thler leh, lo rem fel vel a ni mai. A hahthlak loh" 

"Hahthlak se ka ti. Ka thawk rei dawn si lo va" a lo ti. A rilru chu hrethiam zetin Dinfela a nui suk. 

Chumi tlai chuan Diteii pawn Puia a be nghal a, a thawh theih tawh loh tur thu a hrilh a. Puia a ner sawk. A lo beisei ru reng sia, chutia a bansan mai chu a hrilhhai takzet a ni. 

"Hlawhah i lungawi lo deuh mi? Kan san dawn nia" a tih pawn, "Teuh lo, ka lungawi lutuk. Mahse, Au Lawma ka vengthawng a, bakah kei aia tha an tam em mai" a ti ringawt a. 

"Kan va inhmu khât tawh awm" Puia chuan a ti a. 

"Nia, i lo leng thei tho lawm.. Mahse, inrim ni loin" a ti zauh a. Puia pawh a khi vur vur mai. 

A tuk atangin Dinfela dawrah chuan a thawk tan dawn a ni. Zanriah an ei laiin a sawi ta a. Teremi a tûm hmak. Lawma erawh chuan, "A tha alawm.. I tihtheih ang i tih chu. Model ai kha chuan a tha zawk. Mahse, lehkha i zir thei lo ange" a lo ti a. Lawma fel ta viau chu Diteii pawn mak a ti. A lakah a inthiam lo a ni mahna. 

"Tlaiah ka zir ngai chuang hleinem, mahse, buaitjlak deuh chu eirawng ka bawl hman tawh dawn lo va, Sawtah Dawrah an ei nghal zel a. Zan dar 7 velah ka rawn haw tawh dawn a. U Teremi hian eirawng. abawl peih si lo va, awmpui la mai ula" a ti a. Teremi chuan melh hrâwk pahin, "Ka bawl peih lo a ni lo, ka thiam lo alawm.. Eirawng ka bawl ngai lo" a lo ti a. 

"Nia, chuvang chuan awmpui la mai ru. Eirawngbawl tur" a lo ti vat. 

Lawma chuan, "Chutia hlawh neia lak kher pawh a ngai nang, Patea a awm alawm.. Mimi lah a lo riah changin a ti vek thei bawk. He lam chu vengthawng suh" a ti thliam a. Diteii chu a hlim takzet chutitaka Lawma fel ta chu. 

"Ka lawm lutuk, ih, hlawh ka lak veleh thil ka leisak ang che u" a ti sar sar a. 

A tukah inthlakna tur nen a chhuak a, a pheikhai a zang kher mai. Dinfela hrilh lawk angin Dinfela te in chhak lawka waiting shed-ah a thu ta ran a. Dinfela pawh a rawn lang ve nghal mai. Hlim deuhin a titi siam siam a, a u Lawma mak a tihzia thu te. Dinfela pawn chuti taka Diteii hlim chu a la hmu ngai lo. A lo hlim ve em em ringawt. 

School ban veleh taxi lain Dinfela dawr lam chu a pan ta nghal a. A la zûm viau. Mipakhat Sang lam, ngo lam deuh hian nelawm zetin a lo dawngsawng a. Bathroomah a va inthlak sawk sawk. A tihtur chu an lo dah lawk ve a, phur takin a ti nghal zung zung. Mi a be vak lo va, dawra thawk chu an vaiin pali an ni. An tihtur erawh a hrang thliah. An dawr chu lun mep mep tak a ni. Stationary lam an zuar tel bawk si. Mahse, Diteii chuan a chan pual chu ngawi reng in a ti mawlh mawlh a, hmeichhe pakhat a awm ve bawk a, chu erawh xerox machine bulah a ding ran a, a awl hman meuh lo. Nula cher lam, tarmit vuah, hmel sanwgnawi ve tak a ni a, a fel hmel viau thung. Mipahnih in computer hran ve ve an thutchilh bawk. Amah lo dawngsawngtu erawh dawr lamah a buai thung a, a indaih lo lek lek, Diteii chuan a tihtur a tihzawh veleh a va pui nghal zat. 

"Zuia ka nia" tiin hming an han inhrilh chawp leh rih a. A tawng duh sia, Diteii chuan a ngaina nghal. Dinfela erawh a la hmu miah lo thung. Khua a tlai lam ta, a thim chhulh tawh tihin Teteii leh a thiannu Model lar ve tak Sarah te an rawn lut hlawl mai. Chutihlai chuan Diteii chuan dawra thil lo lam te mamawh a lo pack mek a, Teteii chu a rawn hmu ve lo. 

"Inchungah chho lawk ang" tiin Teteii chuan Sarah chu a mitmei a. An inzui chho nghal. A lar ve bawk nen, dawra thawk te bakah customer ho chuan an en duh viau. Chutiang chu Teteii nuam tih zawng tak a ni. 

Rei awm lovin an pahnih bawk chuan an lo chhuk thla leh a, Diteii nen chuan an inhmu ta.. Teteii hmelah chuan mak tihna hlir a lang. 

"Hetah.. Eng nge i tih? " a ti ram hmak a. A meng no viau lo. 

Buaina an tawk ang tih hlau takin,, "Ka inhlawh a. " a lo ti dam thlap. 

Sarah chuan, Diteij thlalak a lo hmuh tawh vangin,, "In inhria law.. " tiin Teteii chu a melh a. 

Teteii chuan Diteii a melhna chu lasawnin, "Ka cousin a lawm " a ti ta a. Diteii bengah chuan ring tak a ni. 

"Zanah I U Lawma ka lo bia ang" Tiin Diteii chu a va melh leh a. 

"Aw le" Ditei chuan a lo ti ve hmak. An pahnih buaina hre sa lo tan chuan an inbiakna ringawt chuan awmzia a nei hran lo, mahse, an pahnih nunah erawh awmze thuk tak a nei a ni. Teteii te chhuah hnu chuan Diteii chu bathroomah a lut a. Darthlalanga a hmai lo lang chu biain, "A hua che a ni tiraw.. Engvang nge ni ang? " a ti sap a. 

(Ka kut a aikhirh 😒