Drose 5/

D' ROSE… (5)

Ziaktu : Toni Râlte

Lawma lungleng rui lungpuam a tap pur a, a chang leh a inhorsa kûk kûk thul. Diteii tihngaihna hre bawk si lo chuan a va bih chhen ringawt. Lehkha pawh a zir thei lo. Dawhkanah a bawk a, apa a ngai takzet. Apa khan amah aiin Teteii a duat zawk niin a hre thin, mahse, a han awm loh takah chuan a lo duat ve tho zia leh pa uap loh chhungkaw retheihzia a hrechiang telh telh. Anu tal khi an bulah awm se zawng thil a danglam deuh tur. Dinfela a ngaihtuah chhuak thut, he pa hian thian atan a duh ve tak tak nge a fiam kual pawh a hre lo. Amah aiin a û ve hle tih hre tho mah se, a rualpui kawm deuh titih. Bena nen a endan a danglam lem lo. Puia pawh a lo haw anga, thla an lak hunte a ngaihtuah kai a, a ding thut. Darthlalangah a va inen a, a pian nalh ru zet, a pholan ngai si loh chu nalh ang pawn a hre ve pek lo. A bawp erawh a sei a ti.. Pheikawk sang bun ngai hek lo, a chawn lah mam puak mai si, a hmel a en leh, mipa hmel a pu lo va, mahse, hmeichhe nu zèm hmel erawh a pu si lo. A chek hlak a. Hmeichhia a nihna hi a lungawi pui chiah lo em ni ang tihte a ngaihtuah leh. A rilru chu a buai nuaih mai. Puia pawisa lo thawn kha a la chhuak tawh a, a material pawh a lei tawh. Project lama rilru pek a hun in a hria a. Dawhkan lam chu a pan leh ta a. 

Teteii pawh a ni khatna chu a tlingtla tha viau mai. Amah lo lar sa a ni bawk a, judges zingah pawh hretu an awm. A contestant pui te pawn an hre nual, nuam a ti ve khawp mai. A nalh a, a hmel tha bawk. Thian a ngah tawkin a hria a, vote lak hunah pawh a hmuh that ber a ring. Mahse, hei chu ama ngaihdan mai a ni. A thian nia a hriat tam zawk hian an ei loh ruk bakah er tawk an awm ve nuk tih a hre lo. Thenkhat hi chuan an stalk duh vanga rawn hnaih, a chet chhiatna chang ran an ni ve bawk. A lamah an tan vek a rinawm loh. Ani lah hi a mizia te reuh hi a lo chapo ve angreng si a, mi a tawngkhum na thei phian bawk si. Mil lo tu a nei teuh tih hi a ngaihtuah pha miah lo. 

"Dite" a u Lawma aw a hriat rual chuan a thu chhuak nghal a. 

"Ummm" a ti a. 

"I U Teremi ka hruai dawn a. I hlauh chuan kawngka hi pawn lamah ka kalh mai ang' a ti chhar chhar a. Diteii a hnual rawih. A mutchhuak pawh s reh vek. An inthen hlen a rin tehrenh nen, a va daih rei lo lulai em.. 

"Aw le" a ti tawi tâk a. A mu leh hmak. Lawma pawh pai khut khut chungin a chhuak a. Pawnlamah kawngka chu a kalh rak rak bawk. Teremi'n a rawn bia a, hruai turin a rawn ti miau a ni. Ani lah amah ngaia a lo kûr lai tak a lo ni vei nen. Phur ru takin a chhuak ta anih kha.. 

A tukah a u te nupa room chu a va hawng dek dek a, an lo haw tlai nge an rawn hawn lai a hre miah lo. An lo mu dun rial mai. An rooma zu thing rim chambang chu a nerpui sak.. Eirawng a bawl ta nghal a. Lawma hi a hnaah a kal tha lo viau mai a, A pa Pension lah Teteii'n a chang dawn bawk si. An khawsak a harsa chho viauin a rinawm. 

A school kal dawn thleng pawn an lo la tho lo. Tha takin kawngka a khar a, a chhuahsan ta a. Anihna takah chuan Lawma hi a neihchhun a ni tawh a. Phatsan a tum bik lo, tin, Lawma pawh hian Teremi hlau viau mah se; Diteii tak hi chu hauh pawh a hau khât. A ngaihtuah ve a ni tih chu a lantir ve tho, a tihtheih tawk a tlem em mai pawh a!  Anu te in a kalpelh lai chuan chak zetin a kal a, Dinfela'n a rawn hmuh tawh loh hram a beisei. A beisei ang ngeiin vawiin chu a reh daih! A rawn lang miah lo. A beisei ruk thlenh dik mah se, a lawm chuang miah lo. Amahah lungawi lohna riau a awm tlat. A. Chhan a hre bik lo. 

School a thleng a, an lo melh leh hrek hrek tawh. Ni e, patil leh tuai te chuan enbik an hlawh fô reng alawm. Mahse, a patil lohzia hi a la lantir mawlh ang. Lehkha pawh a zir tha.. Classah hian a nungchang tha pawl a ni ve thin hrim hrim. 

Lunch break-ah Bena te nen an School piah deuhah Restaurant-ah an chawl thin a. Puia pawisa pek a hman ban kha a thukru ve rih a, mamaawh zualpui lei nan a ti ve a ni. 

'Vawiin chu nangmahin lo va haw leh mai ta che. Hei Tki hi Chanmari-ah kalpui a ngai sia" Bena chuan a ti a. 

"Umm pawi lo' a lo ti mai a. A tih than fô alawm le. 

Amahin an in lam panin a chhuk leh ta hnak hnak a. 

"Dite" a ding chawt. A bula car lo inhung dawt chu a va melh nghal. Puia chu a lo nui sáng mai. A nui ve tawp. 

"Ka lo thlenna pawh a la rei lo, ka rawn nan loh che ka hlau sia.. Lo thu lut la" a ti a. A nelawm hle. Diteii pawh chu a thu lut ve mai a. 

"Pawi i tih ka ring lem lo, tunah hian ka studio chu pan mai ang aw. Naktukah ngei ngeiin Ka zin a ngai leh sia. Kan pending rei dawn tlat' Puia bawk chuan a ti a. Diteii chu a tîm deuh naa, pawisa a hmu vek tawh si a, hnial chi niin a hre bik lo a, a bu nghat mai. 

"Mahse, eirawng ka bawl loh chuan, Au Lawma te an thinrim leh ang" sawi chhuah a tum pawh a ni lo. A lo ri chhuak ve tawp. 

"I bawl hman kher lo maithei, Dinner ka treat ang che. Chhuanlam i siam mai dawn nia. I ph i keng em? " a ti a. 

A lu a lo thing nar nar. Puia chuan a phone a pe a. "Kha bia la, i thiante nen chaw in eikhawm tur thu hrilh mai rawh" a ti a. 

Diteii chuan a lo la ve mai, Lawma number chu a hmet kauh kauh a, "Aw.. Au Lawm, keimah Diteii, ih maw, Bena te nen project kan buaipui laklawh sia, Tki te inah chaw ka ei nghal dawn ania aw" a ti a, a dawih aw viau mai. Puia a lo khi suk. He tleirawl innocent zia hi tih a lo ngaihtuah. 

"Aw.. Mahse, lo haw hma rawh aw.. " a rawn ti ve mai a. Diteii a lawm hle. 

Puia studio chu a nuamin a changtlung khawp mai. A kal vawikhatna a nih vangin a hawi nasa ngang mai. Nula saruak lek lek thla te, Teteii thlalak te pawh a hmu. Puia thawhpui nge a thianpa Henry a lo awm ve bawk a. Puia ang lo takin a tawngmawh hmel hle. Diteii pawn a nel lem lo. 

Puia chuan thawmhnaw a ranw pe a, dressing room a kawhhmuh nghal. Diteii pawh a lut vat a. A inhlip a. A rin anga thawmhnaw sexy a lo ni lo va, a lawm hle. A inha sawk sawk a, thawmhnaw pangngai mai niin a hria. A kekawr erawh a duh ai chuan a tight deuh a ni. mahse, a pawisa dawn a ngaihtuah a, a lungawi ve leh mai. Puia hrilh ang zel chuan a ding a, a zei hlawl lo chu nuam lo a ti ve reng. Teteii te ang chu nise hrilh chawp pawh a ngai tawp nang. Puia chuan a hmet char char mai. Henry pawh chuan a lo thlek ve zauh zauh. 

"Umm, hei hi va ha leh la, Siamteii lo thlen hmain theitui kan in lawk dawn nia " Puia chuan a ti a. A thawmhnaw pek chu Korean serial film vela an high school uniform ang mai kha niin a hria. A duh ai chuan a chhing ta deuh. A mal lang chin chu a hup leh cháih châih thin a. Siamteii pawh rei rial lo vin a lo thleng ve nghal. Ani hian a hmai a chei dawn a ni. Hun a duh rei vak lo, a sam erawh a sawisa rei. A tawi si a, han tihmawi vak dan a vâng dawn hlein a hria. Mahse, beutician na na na chuan a tikual a tikual a, darthlalanga a han inen chuan a inawih lo hial.. Hmeichhe naupang, harhvang tak leh simple si, nalh viau bawk si a ang in a inhria. Hmeichhe dik tak hmel a pu bawk. A nui ve sak. Puia pawh a lungawi hmel kher mai. 

Tichuan, a han in pose kual leh char char a. A hahthlak vak loh, a zei loh èm avang erawh chuan awm ve dangte chu a hmaizah deuh. 

"Kan zo e.. " Puia'n a tih chuan a thaw hawk mai. 

Puia bawk chaun, "Tihian Zaninah IG ah ka dah ang. I lo en ve dawn nia. Chuan, i uniform kha chu ha tawh lo mai rawh. Kha hei hi ha rawh" tiin tishirt var loose hek hawk leh kekawr dum a rawn pe a. Lawm takin a lo ha ve mai. A inhmeh leh phian. Khua a thim lek lek tawh. Rin aiin a tlai chak. An chhuak a, Puia Studio thlang lawka Hotel pakhatah chuan zanriah ei turin an lut ta a. 

A vawikhatna vek a ni a, a che reng reng chu tihsual hlau leh ti tak chungjn a ni vek a. Puia pawn a hrethiam. He nau hi a chher hriam phawt chuan a tan larna chance a sang zel dawn tih a hai lo. Nula nalh satliah chu an tam, anmahni ngei lo kalin a thla laksak turin an rawn ti fô. A ngaihlu vak tawh lo. Diteii erawh a dangdai tlat.. Amah pawh hian a la inhre thuaiin a ring. An zanriah chu a tui khawp mai. Diteii pawn a ei ve teuh. An eikhamah awm khawmuang lo vin Diteii te in lam panin an tlanchhuak ta a. 

"Ka lo lut ve ang aw" Puia chuan a ti a. A hmaa an buaina kha a lo la hrereng aniang, "Aih, ngai lo" a ti tlat. Puia pawh nuihza insum takin a bu ve nghut mai. 

In chhung a luh chuan, a lo reh huai a. An awm lo maw a ti hial. Mahse, room atanga khuh khak khak thawm a hriat chuan a thaw huai a. 

"Chaw pawh kan la ei lo. I U Teremi hian a bawl thei si lo va" Lawma chuan a nau thawm a hriat rual chuan a rawn ti a. Diteii hmel a tum hmak. A chau ve viau asin le.. A inthlak. sawk sawk a, mut dawnah ka inbual mai ang ti rilru chungin a u te ei tur chu a siamsak leh ta a. Eirawngbawl hi nuam a tih tho vangin a awlsam a. Mahse, Teremi a ngei ve em vangin zanin erawh a tûm ve bûr mai. A thatchhe lutuk chu mak a ti. 

Chaw chu an ei a. An ei lai chuan, "Dite, hei ka pa pension hi Zomuanawmi'n a chuh tlat si a, dik tak chuan i ta tur a nia. Chuvang chuan i neih dan tur ngaihtuah a ngai. Heti ringawt chuan kan rethei dawn em mai" Lawma chuan chaw thial nuau nuau chungin a ti a. 

"Teteii pasal neih hunah chauh alawm ka chan ve dawn.. Chu pawh a theih angem ka hre lo" Diteii chuan a lo ti a. 

Teremi chaun, "Tih dan a awm hrim hrim ang, ukil hmelhriat ka nei alawm.. " a lo ti a. 

"Aa.. Ka hrethiam lo, Mami thu thu a ni mai" a lo ti daih. 

"Mami hi chu i pathian ve ngawt mai" Lawma chu a nui huk. A thinrim hran lo tih erawh a hriat. An ei khamah an eina a seng fel leh vek a. A sil fai hnuah a inbual ve chauh. A mut dawna a phone a han khawih ve chuan, whatsappah Puia chuan a thlalak ho a rawn thawn a. A en ning thei thlawt lo. 

Msg a dawng zut zut chu mak a ti deuh. Mahse, a hriatchian hnu chuan khang a thlalak te kha IG-ah a lo lar hle tawh a lo ni. 

Teteii msg erawh mak a ti deuh, "Puia sawn a bawl che nih saw.. Ti nge i inbawltir duh a. Mawl lutuk. Vawikhatmah la tawh suh" a rawn ti.!  Mami erawh chuan, "Ka naute nangmah i ni lo emaw ka ti hman hial alawm.. I va nalh tak, ka chhuang che aw" a rawn ti thung. 

"Hlawh min pe lawm. Pawisa ka nei lo va, ka mamwh sia" Teteii hnenah chuan a ti ve hmiah. A rawn chhang tawh lo. 

Dinfela pawn Diteii thlalak chi a crop chhen mai. Mawi a ti takzet. Nula diktak a ang. Mahse, rilru nawm lohna a nei. Puia nula mi zia leh lerh zia a hre si a. Diteii chu a lo bum mai ang tih a hlau. A sava hual lai hi a lo hup hman teh chuan aw… a tho thut, unau an ni a, chutiangte a ngaihtuah renh reng ni. A inthing nawk nawk. "Mawla, i nau anih saw" a ti sup a. A nui bawk. 

A room kawngka an rawn kik a,. Teteii a lo lut. 

"I tha maw? " a rawn ti a. A nui sâng bawk. 

"Ka tha khawp mai" ngeiawm rawngkai lek lek hian a ti a. 

"Thil ka zawt duh che a. Diteii nen khan engtin nge in inhriat? " A ti ta a. 

"I nau a ni tih ka hriat hma khan kan inhre tawh alawm.. " a lo ti mai a. 

Teteii chu a hrilhhai deuh. "Nia, Diteii chu a danglam ve a. Ka zawt mai mai che. Pawisa a dil che em? " a ti a. Dinfela'n a melh kâwk, "Engvangin nge min dil ngawt ang? " a lo ti sup. 

"A dan ve ania, mi pawisa dil tawp a hrat lutuk a, ka hauh tamna ber pawh a ni. Puia pawh a lo va kal chilh a, a thlalaksak turin.. A zia lo khawp mai" Teteii chuan tîm map lo vin a ti a. Dinfela chuan awih harsa a ti ngat ngat hle. Mahse, A sawitu hi Diteii û a ni miau si a. 

"A bialnu te ho hi thil pek a duh ve thin sia, chuvang a nia.. A lo dil che pawn pe suh aw. A zahthlak.. Unau ni tho mah ila" Teteii chuan a ti leh ta zel a. Dinfela chu a insangmar ru teuh tawh. A hlauh ang ngeiin bialnu a lo nei a maw?!  Mihring hi an lo va inthup thei ve mawle. 

"Bialnu a nei law? " a ti hrám. 

"Neih lohin, amah i hmuh sawn i hre mai lo mi? Mipa a mamawh hleinem" a lo ti nghat. Dinfela a na zawk mai. Teteii lah chuan dawtsawi hmel a pu si lo. 

" a va mak ve" a ti chhum hmak. 

"Ka rawn sawi mai mai nih chu.. Thil dangah chuan a fel lutuk ania.. " a tih hnuah Teteii chu ngawi rengin a chhuak leh daih. Dinfela erawh a thu ngawi reng mai. A chhan ber swi theih chiah lohin a thinur hlur nia!  Diteii vang em ni ang?! 

A tuka Diteii leh Dinfela inphur leh ta chu boruak a uap churh ni hian a lang. Diteii chuan Dinfela chu a melh zauh zauh a, a mood a off hle nih a ring. A be ngam chiah si lo. 

"I bialnu chu a zei em? " a rawn ti ta hlawl a!  Diteii a meng râng teh e, "I zak lo" a lo ti teh tawp. 

"Mawh.  A zei em? A hmel tha bawk em? " a rawn ti leh a. 

"Ka nei awkawng lo, ka nei bawk lo vang. Patil ka ni lo ka tih khaaaa" a ti vin hlar a. Dinfela a khi suk. 

"Anih Puia khan engzat nge a pek che a. " a ti leh a. 

"A tam ve mai. Hlawh an inzawt ngai lo" a lo ti vei hmân. Dinfela chu a nuih a za ta riau, Teteii sawi ang kha a ni lo a nih rinna a nei deuh tlat. Diteii mzia leh nungchang zawng zawng a hriat theih chinah pawisawi lo tak a ni si a. Puia zawk khan a bum anih a ring. 

A chhuk dawnah, "Khawi i number" Dinfela chuan ngam sarh hian a ti a. Diteii chuan a melh vung vung, a hrilh ve ta mai a. Mipa, a thian ni lo number a pek vawikhatna a ni hial ang. Puia lahin a dil ni miah loin a hre si a. 

School a han thleng chu an lo melh leh nasa. Class a lut chiah, samuela a rawn lawr nghal, "Wow, kan model chuh. I lo chhiat loh kha le.. " a lo ti lung lung a. An lo nui dar dar. Hmusit nuihsawh a ni lem lo bawk a, Diteii pawh a nui ve ringawt. 

"I lo Les miah lo mi? Ti te khan i awm ve a? " ring zetin Samuela chuan a ti leh. 

"Les nang" a ti zawi sap. Mahse, an class chuan an hre pha vek ang. Tikhan lesbian anih lohzia an hre tawh ang chu. Mahse, hmeichhe thawmhnaw hak erawh a la suangtuah chuang lo. An uniform pawh engtia tih thu loh. Thut fimkhur a ngai thei si, a ning ania. Chumini chu hlim leh thawveng takin a hmang ve. Bena te lahin an fiam reng a, an thiannu danglamna chu an lawm hle niin a lang. 

Teteii pawh a ni hnihna atan a inbuatsaih chho leh a, a mamawh zualpui an lei fel tawh bawk a. Sang taka thleng turin a thawkrim ve hle. A nau chu a rin aiin a lo lar a, a thlalak pahnih khat vang leka thlir a ni chu amahah thîkna a rawn piang vat reng a. Nunui lah in mood off nan a lo hmang!  A chhan pawh Niminah khan Puia kha zanriah ei puiah a lo sawm a. Mabse, ahnar tlat. A chhan pawh Kha Diteii vang khan. Puia lah a zin leh hmak si. Diteii chu Teteii nau, a nuhrawn fa mah nise, a ralkhat mil lo nghal. Amah aiin a hmel tha miau si a. Teteii pawh chu a mil loh phah lek lek naa thiam taka Teteii'n a han sawimam takah chuan a rilru kha zual chu a reh chhawm ve mai. 

Vawiinah personal interview an hmachhawn dawn a. Teteii chuan zam loh a tum hle. Amah kawmtu atana Mapuia an hmang erawh a chhungrilah nuam tih lohna a nei. Mapuia nen hian thawk khat lai khan an lo ck ve zuai tawh tlat a ni. Tu khawkhain hriatpui lo mah se, amah Mapuia'n a ngaihdan turah a buai tlat.. A virgin tawh lo tih a hrechiang ropui si.. Mahse, confi luih hram hram a tum. 

"Modelling hi Mizoramah eizawnna tlak niin i ngai em? " tia zawhna chu, nui sáng chungin, "Ngai e. Mipuite hian an ngaihhluta an thlir dan a danglam hunah phei chuan. Tunah erawh eng emaw ti deuh hû hian an la hmu a, lehlamah kan model tam tak hian an nun an lo thlahdah ve bawk nen, eizawnna tlak tak tak a nih hun hi chu a la awm ang" tia a sawi chu dik an ti ve hle. 

"Nangmaha phurna siamtu leh model ni tura tichaktu che eng nge? " tih zawhna erawh, confi zetin, "Ka nalh a, ka mawi a, ka hmeltha bawk. Chuvang chuan Model ni turin ka tha tawk a, chu chuan min tiphur a ni' a ti hmiah. Ei lo fe fe an awm laiin, mipa lamin an lawm letling. Teteii kha a ni ve miau a. 

Diteii pawn a lo en ve a. A lo tang ru ve kher mai. Teteii chu sang takah invawrh se, a duhthusam thleng thei se a lo duhsak. A laka Teteii rilru putdan erawh a hre der si lo. 

Hun a kal ve zel a. Puia zin a lo la haw lo bawk a, Diteii pawn thla a la leh ta rih lo. Dinfela nen an inhmu in an inkawm tam tial tial a, an inngaina säwt hle. Langsar takin an inkawm ngai lo thung. Ph call pawn an inbe khát, msg eraeh an inthawn ve chhen mai. Dinfela hian msg type hi a peih vak lo ania, Diteii tan erawh a taima viau lawi si!  A ngaizawng niin a inhre fô! Chu eraeh a duh si lo. A kawm lo thei bawk si lo. Unau an ni tih lah Diteii hian a hre ve der si lo. Teteii nunzia a ei lo tawlh tawlh thung. Mahse, a tilang ngai lo. A dawr pawh a lun chho zel a, hnathawk pawh a lakbelh leh tawh. Chunglai tak chuan tihtakzeta ngaizawngtu a nei ta a. An institute-a zirlai naupang, Apuii a ni. Diteii ai chuan a upa hlek anga, mahse, an that dan a inchen vel ang. Apuii hi a nu zèm thung a, chu chu an danglamna a ni mai awm e. Amah hnaih tumtu tam tak zingah Apuii chu a danglam tlat!  Rilru hneh theihna riau a nei nge Dinfela pawn a ngaihven ru ve riau. Mahse, chutia va ngaihzawn let tumna erawh a nei rih lem lo. Diteii vang em em pawh a ni lo. Hetia single chunga han lerh ve zauh hi a duhtawk mai. A la naupang ve bawk nen. Inthup ru chunga Teteii'n mitmei a hmuh fô pawh a hai miah lo, thil awm ang lo lutuk anih vangin a hre lo der mai zawk a ni. 

Teteii pawh a thleng sang zel a, lawmtu an tam ang bawkin ngeitu an tam. A nalh tih erawh tuma hnial rual a ni lo. 

Diteii nuna thil danglam tak a thlen lai chuan, Teteii chuan Super Model dinhmun a luah ve chiah!  Ni e, a tling tawk bawk a ni. Diteii erawh chu Lawma te nupa vangin a dinhmun chhe sa kha a hniam zual leh ta. Ni e, Lawma te chuan zu an zuar anih chu!!  Diteii chuan a tirah a hrethiam lo va, an ina zu heh hmel. Zet zet rawn lut fô chu mak a ti viau a. Mahse, vawi khat Teremi'n zu a pe lai a hmu ta a. A chiang ta. Lawma'n hna a thawk ngai lo te, An rui reng thei te chu a chhan a hre ta chiah. A thinrim em em a, a tah a chhuak ut ut bawk. Mami a call nghal a, a tap tawp. Mami lah a lung a lo chhe ve kher mai. 

A tukah a rawn kal ta reng a, Lawma nen an inhau hrep. "Ka in a ni tawh a, engmah sawi theih in nei tawh lo. Ka duh duh ka ti ang. Engmah rawn saei ve suh. Zodingpuii pawh a duh chuan a chhuak thei ang" a lo ti hmiah. Mami tan pawh han inrawlh vak kha thil tihchi-ah a ngai si lo. A hawihil hle. Diteii a lainat bawk si. Teremi chu a ngein a ngeiin ngawih ngawih a ni ber e. 

Diteii erawh a la chhuak em lo. Chhuak se kalna tur a nei lo. An chhungte bulah a awm châk lo vek. Kolasib-a zuk awm daih lah a hreh ve tawh si. Mami te chuan in dang luah vat vat se a ti takzet a ni. 

Pawisa lamah an buai ta vak lo va, mahse, hmanpui loh hram a duh. Loh theih loh chin erawh a awm. An in chu a tawp ta hle hian a hria, zu rui chatthla tawp te, Nula nge nuthlawi hur hmel tak tak, an mikhual rooma mipa mutpui thei mai te an kat nuk a. A mangang thin. A school kal hlan te hian a roomah an lut ang tih a hlauh vangin tala te a lei a, a kalh hmiah thin. Teremi te pawn an sawisel lem lo. An ni lah rui reng, engmah thawk si lo an ni a. Rukru duh tu tan pawh a remchang ngawt ta ve ang. Teremi chu a thau hnûr ti mai anh, a puam a ni zawk mah ang chu. A dul chu a kiar luah a, a mawng a zuih tát thung. A lerh ve em vang hian make up chu a inbel reng thung. Sikret pet vâ chunga a dak zet zet tawh chuan Lawma hian a ngaichâng rang thin. A u Lawma nep lutuk chu Diteii chuan a ten lek lek hial. Teteii lah a thawm a reh hmak, a lar tawh si a, a rawn hre duh tawh lo aniang e. Biak pawh an inbe ngai mang lo. A hmu khât nasa bawk si. 

Kum pawh a lo tawp ve lek lek ta mai. Puia pawh a lo haw ta. Diteii a rawn belbul leh chat. An chhungkaw dinhmun te a han hriat takah phei chuan a lainat ru viau. Nunui khan a la zar ve reng a, an hausa in sumah an buai lo bawk a, nakinah hman tangkaina a la awm ang tiin a chhang ve ta a. A lo hawn tuk zanah zanriah a ei chhuahpui a, Nunui chu a thei nghal nia!  A easy dan tehhrep chu'h! A zei em em lehnghal. 

A pum a nawm vak loh vangin tuilum chi al in tumin tui a va lum a. Sitting roomah chuan mipa paruk leh hmeichhe pahnih an lo thu thap. Mipa pali te chuan card an deng thung. Chokaah chuan a ri rak rak a, Lawma chu a chatthla leh daih tawh. Teremi'n chung zu in ho chu rui chungin a vil a. A tawng phar phar mai. 

"Tui i lum e law? " a hnunglam atang chuan a rawn ti dût a. A hawi let zawk. Mipa thu ve, a chhuah laia tawng chhur chhur kha a ni tih a hria. Palian lam, balh hmel zet a ni nghe nghe. A hmuihmul te chu a to ang siar a. Tenawm rawng a kai. 

"Aw" a lo ti hmak a. 

"I nalh hlr mai. Ka rawn kal fo chhan hi zu vang a ni lo, nangmah vang ania. Enteh, naute, in tha tawk ka nei a, keimahin ka awm asin. Lo awm ve daih mai la.. I duh duh ka leisak ang che" a ti ham ham a. A zu in rim chu Diteii chuan rimchhia ti zetin a lo ner nâwng. 

"Ka duh lo mai" a ti a. 

A kawngah rawn kuahin, "I u te pawh ka dil vek tawh. An phal asin.. I u nen sawn kan inthian tha lutuk alawm.. Heta i awm reng chuan miin an hmusit dawn che asin" a ti huam huam a. Diteii chuan rang lutukin a kawnga a rawn kuahna chu a thingthla nghal. 

"Ka pu, i va hur ve" a ti tuar.. An thawm a bengchhen em vangin sitting room lam ami te chuan an hre phak lo maithei. 

"Ka îtna che a rei tawh. Ka siam nula ang che aw.. Bawihte" 

Diteii chu a luak a chhuak ut ut. Chu tar hur mai mai chu le.. Tui chu a so a, no ah a bun chhuak a, chi tlem a al bawk. 

A rooma phei mai tuma a pen lai chuan a rawn kuah leh thuak, "I room saw kalh lo la, zan reiah ka lo lut ang aw.. Pawisa chu i duh zat zat ani mai" a ti ham ham a. 

Diteii a insum thei tawh lo, a tuilum ken lai chuan a hmaiah a theh ta thawt a. Chu pa chu a rak nghal tuarh. A pai khut khut bawk. Diteii chuan a kapah na zeta tlawh sak in, "Zawnga, i hur lutuk, thi dawn mah ila ka duh lo che. Vawikhatmah kan inah hian rawn kal tawh suh. Thuiii.. I hmel chhe si, ka luak i tichhuak" a ti ta hrep mai. An thawm a na ta deuh bawk a, an rawn phei nghal dial. 

Thil awm dan chu an hrethiam tlang a niang, engmah an sawi lo naa chu pa chu an khawngaih loh hmel angreng. A tawng chapo theih em vanga an ngei ruk kha a ni reng reng bawk a. Pakhat chuan a kai tho a, kawngkaah a nawr chhuak, "Rawn inlan tawh lo mai rawh" a ti zui hmiah. 

Teremi chuan ngaibtuah hmel zetin, "Dite, i tha em?  Ti nge engmah i sawi loh, min lo koh vat tur alawm.. " tiin a hmai te chu a rawn bih hnai vel a. 

"Ka tha.. Tuman min tibuai lo se a tha a ni mai" a lo ti hmak. Tuilum dang a va thli a. A roomah a lut nghal. Mi dang pawh chuan an hna ngai an chhunzawm zui leh mai. Kha thil kha a vawikhat tawnna a la ni chauh a, nakinah kha pa aia tawrhhlelhawm te rawn lang leh ta se.. A ngaihtuah ngam lo. Eng emaw hi chu a tih a ngai a ni. A la naupang si, engmah a ngaihtuah thiam lo. 

A tukah Puia studio-ah a thu leh ta ran mai. Tun tum chu maksak deuh hlekin a inchei thung. An tih ang ang chuan a awm tawp. Puia pawn hlawkna a tel miau a. 

A inthlak zo a va chhuah chuan Teteii leh Nunui lo thu reng chu a va hmu ta a. An rawn lut chiah a ni maithei. Teteii chuan a melh no lo khawp mai. Nunui pawh a tûm hmak. 

"Ehe, in lo kal ve law.. " nui chungin a ti a. 

"Eng nge i tih ve zawk a. Pawisa i va mamawh awm ve" Teteii chuan a lo ti hmak. A ding chawt. Siamteii pawh chuan a rawn thlek zauh zauh mai. Puia lo kal phei mek chu, "Ti nge henu hi i laksak ve ziah a.. " Teteii chuan a lo ti nghal bawrh bawrh. Puia zawk pawh a hrilhhai letling. 

"A lar alawm.. Duhtu an tam em hi" a ti sup a. Nunui mitmeng a danglam nghal. 

"Chupawhnise, ka nau ania, hetiang ti tur hian ka duh lo. A mizia pawh a ni lo. Dite, eng zat chiah nge i duh, pawisa nise ka pe reng che a.. Engzat chiah nge i mamawh? " Teteii tawngkam tin chuan a thawng takzet. Tawng nachang pawh a hre lo. 

"Ka.. Ih, pawisa maw.. " a lo ti hû a. A mitmeng buai zet chu Puia chuan a lo hrethiam nghal, "Tete, duhtawk rawh. Diteii hi keima sawm ania. A duh em em vang a ni lo" a lo ti vat a. 

Nunui chu a ding a, Diteii chu a pan a, "Bawlin i awm mek tih i inhre der si lo va, tihian lar emaw i intia, anihna takah chaun i patilna hi an hmang tangkai aw.. Hre tawh rawh" a ti ta hrep mai. A mitmeng lah a hlauhawm viau. Diteii a îp chawih, "Ka patil lo" a ti thám chhal a. Tah loh hram a tum. Mahse, a lung a chhe tlat nia. 

Puia chuan, "Duhtawk teh u, a mak..buaina siam turin em ni in lo kal a? A tawk. Tuman engmah sawi tawh suh u. Dite, nang pawh i thawmhnaw la la, haw rawh. I rilru tihah duh miah suh an sawi ang kha a ni lo ania.. " a ti ta hmiah hmiah a. Nunui a lo ner nawk. 

"He nu hi i eng nge a nih? " a ti tuar. Henry takngial pawh a rawn chhuak ve. An thawm a ring mah mah a ni. 

"Ka eizawnna atana role pawimawh tak changtu a ni. Abak a awm lo. Nau angin ka en bawk. Rilru kawi pu suh u" Puia chuan nem zawkin a lo ti a. 

Teteii chuan dam deuhin, "Nia, ka hrethiam alawm.. Kei chuan ka nau anih vangin hetiang lam hi khawih ve lo se ka duh a, a nun te a chhiat phah ang tih ka hlau. Lar hi a nuam. Vak lo, zirlai a la ni bawk si a" a lo ti a. Diteii a chhing sawk. Teteii chuan a rilru dik tak a sawi angem le.. 

Ngawi rengin a thawmhnaw a la a, a chhuak. Siamteii khan a umzui a, Diteii hi a ngaina riau, mi tam tak a chei tawh thin, a tlangpuiin an tawngpeihin sawisel tur an hria. Diteii erawh a ngawi reng zel a, "U Siamte, nalh i tih ang ang khan a ni mai" a ti tawp a. Bakah an titi dun tlemteah pawh tleirawl rilru tha tak a ni tih a hria. Chutia a u leh thiannuin an ti vak chu a lainat a ni. 

"Dite, ka scootyin ka va thlah ang che. Keipawh penna tur ka nei a" a ti a. 

"Ka van lawm.. " a lo ti ve mai. An tlan chak lo bawk a, eng emaw an sawi ve. 

"U Siamte, keini chu zu kan zuar a" a rawn ti phawng mai. Siamteii chu a phu zawk. 

"Kan tih lemah ka u te nupain ania. Teteii kha chu ka nute bulah a awm a" a ti leh a. Thil awmzia a hre thiam ta deuh. 

"An sawi zawng zanwg kha engahmah ngai suh aw.  Puia hian a hmang tangkai reng reng lo che, in inpuitawn zawk alawm.. Chuan, patil i ni lo tih ka hrechiang" Siamteii chuan a ti sar sar a. Diteii thinlung tâwt ûl pawh a thèp suai suai mai. Amaah lainattu chu an lo awm ve zel anih hi. 

Puia te erawh an inhnial nasa. 

"A hma pawn model tam tak thla ka laksak tawh, in sawi ngai lo, thenkhat phei chu saruak thawthangin ka laksak, in sawi lo. Ti nge Diteii kher chu in hmuhmawh em em" a ti ve ta ngat a. A ngei ve deuh bawk a ni. 

Nunui chuan zawi raih hian, "Kei aiin i ngaipawimawh zawk alawm" a lo ti a. 

"Hna a ni. Hna aia pawimawh tih ka nei lo. I duh chuan min kalsan thei alawm.. Ka hna aiin tumah ka ngaipawimawh ngai lo, ka intunnun vena a nih hi" a lo ti ta hmak mai le.. 

Teteii chu a rawn inrawlh ta vat, "Nia, a dik, Nunu, nang pawh Puia hi hrethiam rawh. Ani hi chu ka hrechiang alawm.. Hmeichhe lamah a lerh lo, chuan Puia, nang pawh Nunui hi ngaipawimawh ve deuh la, dik tak chuan vawiin pawh kan thiannu Birthday partyah kan sawm che a, Diteii thla laksak i thlang leh zawk tlat a. Khatiang kha Nunui tan chuan a na ve alawm.. Tha takin sawi mai tur ania" a ti ta thliam thliam a. 

"A ho e a" Puia pek chuan a lo ti nghut. Teteii hi a ei vak bik lo tlat a. Diteii laka a rilru putdan pawh a hrethiam, chuvanga ngei pawh a ni deuh. 

Mahse, an han awm rei takah chuan lungawi tak chuan an inthlah ve leh thei mai. Puia lung erawh a zîng ru hle. Diteii hrilhhai hmel kha a mitthla chhen lehnghal. He nau hi nau angin a en ta meuh lo em mawni le.. A taksa nalh leh mam hen te chu a lo hmu thuak tawh a, a taksa vang chauh pawh ni lovin a rilru pawisawi lo zet vang chuan a lainat a, a ngaipawimawh bawk niin a hria. Nunui sawi kha a dikna chen a awm. A hmang tangkai ve tho, mahse,  abawl lo. 

Dinfela chu a hawi nasa, Uniform ha a hmuh ho chu sam sei vek an ni. Khaw nge Diteii.. Ani pui hian a kalsan daih mawni le.. Nge school a kal lo zawk aw.. An school a tlan pelh pah chuan a han hawi chho thuak a. Tumah a han hmu chuang lo. Diteii chu a kal lo anih a ring. Va kal chilh hial a nâp rum rum. A kim tlat tawh lo. A phone phawrh ta nge nge a, a ring ral ral. 

"Hello" mutchhuak aw zet hian a rawn ti a. 

"School i kal na nge? " a ti nghut a. 

"Umm.. Ka dam tha lo va"

"I eng nge na.. Damdawi i ei em? "Chung chung a, a ngaihtuah mah mah chu a inthiam lo. Ka nau a nia tiin a inhnem ringawt. 

"Umm ei e. I kal tawh mi? "

"Umm ka zawng nasa che lawm.. Min kalsan anih ka ring a"

"Ka lo hrilh theihnghilh daih che lawm.. Tunkar chhung chu ka chawl maithei aw"

"Inentir la, i khuasik nge..i eng nge na? "

"Aa.. Ka tha mai ang" Diteii chuan then chak chak chungin a ti a. 

"Lo dam vat rawh aw. Ka khua a har" Dinfela aw thûk zet chuan engtin emaw a chhungril a khawih zawk mai. 

"Umm dam ang.. Nang pawh aw" tiin an inbiakna chu an titawp ta a. 

A theihtawpa insangmarin a tho chhuak a, a nak chu na a ti hle. A ner leh náng thin, a biang duk chur leh a kamsir kak chu a langsar hle. Zana thil thleng a ngaihtuah chhuah rual chuan a mittui a rawn hnam tiam tiam a. 

Ni e, eirawng a bawl a, hlim takin a zai rat rat. Chaw an ei a. An eikham atanga rei vak loah lehkha zir turin roomah a lut a. Dar 8 bawr velah Lawm'n pawr zetin, "Zodingpui" a rawn ti tuar a. A ngaihna hre lo zeta a va chhuah chuan, a lo kek nghal bawrh bawrh. A beng nghal thuai bawk. Mak ti zeta a u a han melh chuan a kuttum chang zet chuan a rawn hnek leh dawp, a kamsir a rawn thi ta ser ser anih kha. Chutah duhtawk loin abiangah a hnek leh, Diteii chu a tlu hnawk a. A nákah a rawn chhuih nghal bawk. Lo awm ve dangten an rawn chelh bet ta hlauh zawk a. Thil chu a thlen mawlh mawlh vangin engmah sawina hun a awm lo. Enhvanga a u chuan kutthlak nge anih a hre hauh lo. 

"Zawngi, i lo inzuar thin a maw? Tenawmnu, zu kan zuar, kan sual, mahse, inzuar tur khawpin em ni i lo tenawm.. Engkim ka hre vek tawh. I thlalak pawh ka hmu e. Kha Photographer hur lutuk lakah khan maw i lo inzuar thin a.. Ka'n that law law teh ang che" tiin Lawma chuan a ti ta buan buan mai. Diteii hrilhhai zia leh mak tihzia chu chulai hmuna awm ve te chuan an hrethiam in a rinawm. 

"Ka inzuar lo.. Tuin nge sawi? " a ti tham chhal a. 

"I û ngeiin a rilru nat em vangin min lo hrilj. A rawn phawk nghe nghe che u a ni lawm ni.. zawngi.. Chhuak rawh. Ka hmuh phakah pawh awm suh. I patil emaw tia mipa te i lo mutpui" a ti leh ta phiar phuar a. Ditei chu a kehsawm a ni ber. Teteii thiltih vek maw ni a?!!  

"Au Lawm, i hre sual anih chu. U Puia pawh i zawt thei ang. Ka inzuar lo, ka thla a la a, pawisa min pe thin. Chuan, hmeichhe virgin ka nih hi" Khawngaihthla la hliah hliah hian a ti ta a. Lo awm ve hmeichhe pakhat chuan a rawn bawihsawm ta a. A nâk na avang chuan a tho thei lawk lo. 

"Lawma, duhtawk rawh. Diteii thusawi hi ka ring. Tu ten emaw dawt an hrilh che aniang. Chutiang hmeichhia a ni lo. Hei chen in inah ka tal ve tawh. Diteii hi mahni inzuar chi a ni lo hulhual" Rawn buaipuitu chuan a ti ta sak sak a. Diteii chu kuahin a roomah a kuahlut a, khumah muttir in, nachhawkna a va zawnsak a, a dawlhtir ta a. 

"Ka lawm e" mittui tla chunga Diteii'n a tih chuan a hnuk a lo ulh ve tawp. Hetiang dinhmunah hian ani pawh a lo ding ve tawh tlat atin ni. 

Lawma chu an chilh nghal luai luai a, Diteii rin phak bakin amah lainattu leh duhsaktu a ngah. Zu in mi zawng zawng hi an sual lo va, an tenawm vek lo tih pawh a hrechiang ta khawp mai. Lawma pawh a thinur zualpui te a reh takah chuan a inngaihtuah ve ta vung vung a. 

Teteii'n a lo call a, "Au Lawm, Diteii kha zilh deuh teh, veng tha bawk la, ina a lo haw tlai apiang hian photographer hnenah a va inhralh thin ania. Pawisa a duh vangin. Vawiin tlaiah kan va phawk a. Mahni inzuar tur èm chuan ka ring phal lo.. Mahse, a lo dik sia.. Ka rilru a na lutuk. Chuvang chuan, Photographer hi hmu tawh lo turin hrilh rawh" a rawn ti anih kha. A taksa hralha mipa mutpui ti chuan a rawn sawi miah lo thung!  Teteii finzia chu! Mahse, Lawma rui tawh bengah chuan Ks anga inzuar, Sex va hmang angin a ri tlat si a. A nau Diteii a mize pa vanga ngaihthatna em em, an unaua a duat ve ber chutianga khawsa anga a hriat chuan a insum zo ngang lo a ni e. 

A lo khawih na deuh si a. A tukah pawh a rawn tho peih ta lo reng kha a nia. Vanneih asiamin an inah hian Diteij buaipui vattu Mimi kha a riak zeuh zeuh thin a. A che peihin a taima reuh a. A awm phawt chuan eirawng a bawl ve ziah thin. Diteii thawh peih loh tukah chuan a lo bawl hlauh zawk a. Chuti ni lo se, tukthuan an nghei leh a ngai maithei a ni. 

Lawma chu a inchhir ru hle tawh. Diteii roomah ti dûkin a va lut a, "I eng lai nge na? " a va ti a. 

"Ka nák hi a la na a" a lo ti a. A khawngaih ru hle. A chhuak leh vut a. An in hrik, an tirhkah ber zu heh zet Patea an tih mai chu Damdawi lei turin a tir ta a. Heng zanwg zanwgah hian Teremi chu a ngawi hmiah. A buai vel peih lo pawh aniang e. Diteii chuan Mami bulah engmah sawi loh tha zawkin a hria a, a sawi vaih chuan a rawn kal anga, engkim a buai leh vek ang tih a hlau a ni. Teteii chu mak a ti ngawih ngawih. Eng nge a chhan tur a hre bawk si lo. A na ngawih ngawih mai. 

Khua a thim lek lek tawh. Sitting rooma tawng nawk nawk thawm chu a hre reng,. A mu chawrh chawrh ringawt.. Chutah a room kawngka chu a lo inhawng a. 

"Ka lo kal a" titu aw a hriat rual chuan a meng kâwk. 

Dinfela chu inkhai bawrh teuhin a lo ding reng mai… 

(In chawh leh ta 😂