Drose 4

D' ROSE…. (4)

Ziaktu : Toni Râlte

Diteii school bang in a thleng chu a phone a on rual rualin number hriat loh atangin call a dawng nghal. Lak loh a tum zet a, a pawimawh takin tiin a la ta a. 

'Hello"

"Aw.. Dite, keimah Puia ka nia, hei ka ni boral vangin Lungleiah ka zin leh thut sia, i ph i off char char a" a rawn ti a. 

"E.. Nia, school ka bang chiah" Diteii chuan a ti a. 

"Chuan i lo inngaihtuah tawh em? "

"Umm, ka remti a, mahse, i zin daih chuan, dik tak chuan tunah hian pawisa ka mamawh ve tawp a. " inthlahrung zet chuan a ti ta a. Amah chu a inthiam lo, nuam lo tihna a nei. 

"Aw nih chu aw, ni 2 vel ka la awm hmel sia, i mamawh viau chuan i ac ah ka lo thun advance mai dawn mi niang. Gpay i hmang em? " a rawn ti a. A ac ah chuan tlem a zawng a awm sa reng a, mahse, khawih chet loh hram a tum ve kha a nia. 

"Umm pawi i tih loh chuan, a pawi lo. Material lei a ngai a" a ti a. 

"Aw ka lo thun ang.. Ka lo haw veleh kan khawih tan dawn nia aw. Nih phawt.. Hei kan buai ve deuh a" Puia chuan a ti a. An dah nghal. 

Chaw chhum tur a siam lai takin a u te nupa an lo hawng a. An rawn bawr haw angreng. Chhuatah an thil lei chu an dah a, Teremi thawmhnaw a ni deuh vek. 

"Kha hei hi ka lo lei che a" Teremi chuan tawnzau dum, mipa hak chi hi a rawn vawm phei a. Diteii chuan lo dawn pahin, "Pawisa in va ngah ve. Teteii pawisa chu in lo ru ngei anih dawn kha" a ti ta hmiah a. A la naupang a, sawi awm chi leh chi loh a hre vak bik lo. 

"Ngawi hmak rawh. Kan duh leh kan ngah anga, i sawi ve tur a awm lo. Hlawh ka la lawm" Lawma chuan a ti pawr huar a. Ani hlawh ve mai mai khan chutiang thawmhnaw zozai chu a lei thei lo tih Diteii chuan a chiang viau. 

Zanriah pawh amahin a ei. An chhungkaw buaina chu a alh zel a hlauh rualin, inhmakhua lawk pawh thain a hre ve a, mahse, a ngaihtuahna a bîng rih, awm dan tur a hre thiam chiah lo. Thleng a sil mawlh mawlh lain a phone a rawn ri a. A va en chuan Sangtea a lo ni. A la nghal a, "Hei i u in nau a nei dawn a. Lo kal ve ta che.. " a rawn ti a. Diteii ngui hmel kha a rawn parh nghal vek, "Awiij ni maw.. Aw ka insiam nghal" a ti nghal zung zung a. Thleng chu sil zawk zawkin a thlak sawk sawk a. Lawma te room kawngka atang chuan, "Au Lawm, mami'n nau a nei dawn a, ka kal ve ania" a ti a. An rawn chhang lem lo. A chhuak ta vang vang mai. 

A hmaah tak Dinfela chu a thut vangin Teteii chu a lai ru hle. Nunui nen hi chuan an inmilin engkimah an inpawh em em. Dinfela hi chu a hun tam zawk hmun dangah a hman thin vangin a hmu ngai lo tluk a ni. Nel pawh a nel lo reng a. 

Pu Vanlala a zin si a, an ngawi reng hlawm. Eikhamah thleng a seng a, an ina a tih peih loh tha tha kha mo thar hlim ang maiin a ti zung zung mai. Awmpui an nei tho naa mark tihthat hun a ni tih a hai lo. Dinfela erawh roomah a lut leh daih, chu chuan a tihnual deuh. An tihfel zawhah Nunui nen a roomah an inkawm a. Naktukah an intihsiakna an tan tawh dawn a. Inbuatsaih ve pawh a ngai. 

"Puia chu a ni a boral a, a zin daih lawm.. Engtin nge i tih dawn.. Thlalak vel pawh" Nunui chuan a ti a. 

"A thianpa khan a thiam ve tho a, a tih nawk nawk theih mai ang. Ninawm, thlalak phawt ngai hi" Teteij chuan a ti hmarh hmarh a. 

"Puia nen chuan eng nge in boruak.. A tha zel em? " Nunui en chung chuan a ti nghal zat a. Nunui a nui pût pût. 

"Ka zei lo tawp a. Ka zak zel. Haha.. Lo haw phawt se.. Nangmah nen kan sawi tha dawn nia" a ti ringawt a. Teteij a lo nui. 

"Ti daih ila, Dinfela hi bialnu a nei ve ngai em? " A ti sar sar a. 

Nunui chuan, "Nei ve ang. Ka hriatpui vak lo. A tleirawl chhuah hlimah kan veng thenawm ami nuthlawi a atchilh tlat a. Kha bak kha bialnu nghet a neih awm ka hre tawh lo" a ti a. 

"Nuthlawi zunah a lo uai ve ngei tawh ni maw.. Ti nge an inthen? Ka pa ten an duh lo mi? " Teteii chuan a ti a. 

"Aih.. A luhlul a. An hau peih lo. A bialnu zawk kha a lo rinawm lo va.. An inthen ta in ka hria" nunui chuan a ti a. Dinfela chunhchang chu an sawi leh ta rih lo. 

Teteii nungchang leh zeizia vel chu Dinfela chuan a man nghal chat. Inlak mark that tum reng renga attention seek tum reng renga a khawsa chu a la chenpui rei loh nen a hre vek. A mil viau lo naa mipa a ni a, mi mil loh neih a duh lo. A nuhrawn ngei pawh ngaina lo mah se, zah lo taka mi dang hmaa hmachhawn a nei ngai lo. A nuhrawn fanu lo cheng ve chu hnawk tih loh hram a duh. Lehlamah an dinhmun a buaithlak ve bawk nen, an tuamhlawm tur a nihna chen a awm ve tlat. A farnu thar chuan mipa enin a en tih a hai lo, mahse, hmeichhe enin a en ve dawn lo tih erawh a chiang viau. A hmeichhe duhzawng a ni tlat lo. Bakah hmeichhia hi a ngaihsak peih tak tak lo. Hmel tha chu hmuh nuam a ti a, a va vei zui chuang lo. A tum ber chu a sumdawnna tihlen zela ama puala in neiha inkhawrpum ve a ni tawp. A kum a ngaihtuah a, a la naupan ngaihtuaha a tihtheih chu a ngaihlu khawp mai. A nu thihna khan tibuai viau mah se; a chher puitling tih loh rual a ni lo. Mahni indahsana chapo erawh a hlau. Thian a kawm tam lo va, a kawm chhun te hian an ngaina ve viau chuan a hria. Tawk a ti mai. 

A hmeichhe hmuh fo thin Patil deuh reuh kha a hrechhuak a. A nui suk mai. Kha tleirawl duhawm zet kha, amah ai chuan a naupang ve deuh hlek ang. A mizia te kha a ngaina tlat. Thian ni se an inkawm thei viauin a ring. Tuai leh patil hi a ngaithei ngai lo kha a nia. Mahse, kha nau erawh kha chu a patil si lo, a pa tho si lai kha a ngainat chhan a niawm e. 

Mike-a msg chu a chhiar nui vur vur a. "Broo, nupui ka nei tep tawh sia, zanin chu ride ve lawk ang u, kan ti khat tawh em mai" tih chu. 

He pa tak hi chu aw.. Ni e, a bialnu a rai si a, nei lo thei lo dihmunah a ding tlat.. An innei rei ang em aw? Mahse, a bialnu hi a fel reuh a, a dawm thiam phianin a ring. Mikea ten an lo nghahna hmun lam pan turin a insiam a, a chhuak zui ta nghal a. 

Civil Hospital ah chuan Diteii leh Sangtea chu an vei sek mai. Sangtea chhungte pawh an awm ve tho naa an buai fal bik. A vei rei angreng si a. Diteii phei chu a za sek tawh. Mami fa chu a duat dawn nasa si a, a hming phuah ngei a tum ruh hle. Teteii pawh a hrilh ve a, mhse, an rawn lang dawn lo aniang e. 

Naute tap ri ngák ngák, puan vara an tuam chu melhin, "I van hmel tha tak" a ti sap a. A hnukte a ulh lek lek mai. Fa pawh nei se, hei ai hian a thinlungah a tla na bik kher lo maithei ni. Mami chu a nu aiawh kha a ni miau a. 

"Hmeichhia a la ni zui" Diteii chuan a ti leh a. Sangtea pawh a khi reng mai. Fa tir atan chuan hmeichhia ngei hi an duhthusam a lo ni bawk nen. An lawm ve khawp mai. Mami erawh a chau ngang mai. A vei rei em bawk a ni. A mu hle hle mai. Diteii chu khum bul thutthlengah thuin a u chal chu puan huhin a dep a. "Mami, a hming ka phuah dawn nia aw" a ti a. Mami pawh a nui tawp. 

Sangtea chuan, "Dite, a tlai tawh sia, engtin nge niang, ka va thlah dawn che mi niang" a rawn ti a. Riah ve mai a duh hial. Mahse, an phal dawn si lo va. 

"Umm.. Naktuk chawlh a nia, nilengin naute ka lo awmpui ang" a ti a. A ding a, mami nen chuan an inmangtha ta a. 

Sangtea hnunga bei tlan chung chuan naute hmel kha a mitthla char char, Hmingthansiami a tih loh pawn Remruatsangi a ti ang. A koh dan tur pawh mawi deuh a la ngaihtuah ang. Bike chu a ding chawt a, a ri tuarh nghal. Diteii chuan Sangtea a va tauh chawrh. A chal chu a tuai vat vat mai. 

"In va tlan chak ve" Sangtea chuan vin deuh thakin an bula ding ve dawt  car sen duk lam chu a hawi a. 

"Nangmah ni zawk anih kha.. Mai mai a che.. "front seat atanga rawn chhuk mek chuan a ti pawr ve hlar bawk a. An ruih hmel kher mai. Mipa pathum an lo chhuak bawk a. Sangtea te chu an rawn hual tuau tuau a. 

"Thianpa, bike i la khalh thiam lo anih kha.. Nula fawrpui te chuan fimkhur ve tur alawm.. " an ti vel a. Diteii chuan rum zetin a lo melh ve rám rám hlawm. 

"Khanglang a che u, rui chungin motor in khalh a, in la pawr em em zui. Ka nau anih hi.. Nangni angin kan fawr ve lo e" Sangtea lah mi thinchhe mi lo ni bawk nen, a insum hleithei bik lo a ni. 

"Aniang, hmeichhia pawh a nih loh hi.. Patil.. Huhu.. Mahse, hei a chhiat vak loh hi, a dèp rai theih ang" Anmahni hnaih bertu chuan a ti a. A tawng pah chuan Diteii chu a thlek kual vel a. 

"I zak lo anih chu a" Diteij chuan a lo ti chang fak. Chupa chuan a hmai a rawn chul thuak a, a awmbawrah a hrut thla zauh bawk. Sangtea chuan, "In va zak lo ve mawle.. " tih pahin chhuk a tum uaih a. 

'Duhtawk rawh u" thim zing atang chuan a rawn ti thawt. An hawi phei dual mai. 

Dinfela leh Mike-a chu an rawn inzui phei a, Diteii chuan mak a ti deuh. 

"Saw lai dawr kawtah sawn kan thu reng alawm.. In thiam lo zawk.. Haw nal nal ru"Dinfela chuan a ti ta hmiah hmiah a. Chung mipa pathum te mitmeng chu a nelawm loh ta hle. 

"A tu phiangsen nge i nih a, i lo inrawlh ve ngawt.. Min cho mi? " Diteii khawihtu khan a ti nghal thur thur a. Boruak a sosang dawna a hriat vangin sangtea pawh chu chhukin Diteii pawh a chhuk a. 

"Thiante u, intihbuai a ngai lo ve. Zan a rei tawh a. Tha te tein inthlah ang u" Sangtea chuan aw nem deuh zawk hian a ti a. Mahse, Chung mipa pathum te chu an rui nen, buaina an cho ni fahmiang, Dinfela chu an dinchilh ran mai. 

"Ni e, intihbuai hi a tha lo. Thianpa hawh lo kal rawh.. " Mike-a chuan a va pawt a. Dinfela pawh a kal ve mai. Mahse, a hawi let a, "Eng mi pawh nise, tupawh nise, kan mihringpui te chu kan zah tur a ni. Kha hmeichhia kha patil a ni lo bawk aw" a ti salh salh a. An rawn tawng leh hmain,  Sangtea chuan, "Ni e, ka nau ania. Engpawhnise, hei zan a rei tawh a. Buai hi a tha lo. Keini pawh kan haw dawn e" tiin a bike a tinung a. Diteii pawh ngawi rengin a chuang a, an tlan zui nghal. 

An beisei loh taka buaina a kian tak avang chuan zu ruiho chu an thinrim ta zawk emaw tihnturin an inhrosa chawp a, Dinfela te lah chuan Diteii te an kal liam ta maw tihah an motorah lutin engahmah ngai lo niawm takin an tlan liamsan ve daih. An hrilhhai letling viau. 

Dinfela erawh chuan Diteii a mitthla zui ta tlat!  Khatia an intihbuai chhoh vel lai khan an va thleng a, Diteii chu a va hre nghal. Chutia mipa nena an inphur a hmuh chuan mak a tiin a rin a ang lo hle nghal a. Mahse, Sangtea'n ka nau a tih khan mak deuhin a thèp suai suai mai. Zu rui pakhatin Diteii hmai chula a awmbawr a hrut thlak vel lai khan a lo inhumruh vek, a tuar thei ta ngang lo va, a va inrawlh ve ta ngawt anih kha. A ho hle a ni. Intihbuai hi kalsan a tum ve mek si a. Ni e, a thing, insual buai te hi a hmanlai tawh. Mahse, va lang ta lo se, zan a rei tawh si a, miin an thawm an hriat tak tak hmain eng emaw chu a thleng maithei. Sangtea zawk pawh chu an nawp nek thei tlat. Dinfela chuan a inrawlh ve chu pawi tih lohna a nei ve tho mai. Diteii lah khan a be mang si lo. A school kal tur a lo chang leh mai ang chu.. 

Diteii Te pawh in an thleng a. Sangtea erawh a let leh nghal. "Tu nge kha kha i hria em? " tia Sangtea'n a zawh khan, "Hre miah lo" a ti kha a nia. A hre reng sia. Vawi hnih lai a school kal tur a phur tawh. Kha pa khan a ngaizawng mi le.. Tih a ngaihtuah thlen chuan a lei a chhuak zuk. A inthiam lo leh hnuhnawh a ni ngei ang. Dinfela kha lo lang lo se chaun khang mi mawl deuh deuhte khan Sangtea kha an khawih a ring. Amah pawh an khawih maithei. Mi muhil lo thawh hmain. Mahse, Tikhan a lo lang a, tluang tein an haw thei a. Lawmthu la hrilh ngei a ngai ang. 

A tukah Mami awmpui turin a chho leh a. Mak a tih chu a u Lawma'n chanchin engmah a zawt lo chu a ni. Teremi lak atang chuan a beisei miah lo,. Mahse, a ho mai mai tia namnul chungin phur takin a chho hnak hnak a. Anu te in a kal pelh dawn lai tak chuan Teteii a rawn chhuak hlawl. 

"Mami i kan ve dawn mi?  Lo call che ka tum a, i cll tlang theih loh reng reng" Diteii chuan a ti nghal bawrh bawrh a. Teteii hnungah Nunui chu a rawn phei ve bawk a. Ani hi chuan Teteii nau a ni tih a hria. 

"Vawiinah kan tan tawh dawn lawm.. Kan intihsiakna kha. Mami chu ka kan hman lo,. "teteii chuan a ti sawk sawk a, Dinfela motor rawn tlan chhuak mek chu a mitsirin a va hmu bawk. 

"Nunui nen hian kan kal dawn a. Lo han kal rawh.. " tiin Diteii hnungah chuan a nem a, Diteii lah chuan engmah hrethiam hek lo, a chho zui ve leh mai a. A chang chuan anu te ina awm ve tur angin a insuangtuah thin. A hreh em em ziah. Teteii'n a chhuahsan hnu hian an hrang ta riaua hriatna a nei bawk. Amah zawk hian a call zeuh zeuh, Teteii hi chuan msg takngial pawn engmah a rawn sawi ngai lo. An awmho lai pawha inngeih tehchiam lo kha an ni bawk a. Teteii lak atanga ngaihsakna chu beisei phakah a inngai lem lo. A vui lo khawp mai. 

Horn a ri tuar, a per dâwrh. A hawi let a, a ner sak. Dinfela bawk. Mahse, zan lama thilthleng avang khan a insiamrem vat. Lawmthu a hrilh a ngai tak alawm.. 

"Hawh le.. " a rawn ti a. Eng sawi set set loin a lut leh hmiah. An thlang deuh anmahni hmu phak sia scooty-a rawn chho mek te men phawk zia a hre lo thung. 

"Teteii te nen khan in inhria mi? " Dinfela chuan a ti ta a. 

"Ehe.. I hria law.. Ka û alawm. " a lo ti a. Dinfela chu a meng kâwk!  An gate chhaka an dingho kha a han hmu hman a, an inhria aniang a ti kha a nia. Unau maw an lo nih.. Anuhrawn fa maw lo ni a! 

"Hria e, ka naute nen an inkawm thin a" Dinfela chuan a lo ti a. Engvanga a nuhrawn fa a ni tih a sawi mai loh le?  A chhan a hre bik lo. 

Diteii zWk chuan phâwk fe hian, "U nunui kha i nau maw? " a lo ti hâw a. 

Dinfela chuan a chil a lem khalh, "Aih, Nunui te leh ka nau leh i û te chu an inkawm thin" a ti ta a. A chhing sawk. Dawt chiang lutuk a sawi chhan chu a hrethiam miah lo. Ti nge he tleirawl hnenah hian a nu pasal fabik a ni tih a insawi mai loh?  Thisena inzawm si lo va unau an ni tih hi.. Diteii lah chuan a lo awih hmiah. 

"Englo, nizan kha ka lawm e aw. Lo awm lo la chu min khawih ka ring, an sual sia" pawisawi lo zet hian Diteii chuan a ti a. 

A nui hawk a, "A ho lutuk. Ka thian i nia, ka tih tur alawm.. Thian kan ni lawm tiraw? " naupangchhia zet hian a lo ti ve a. 

"Nia.. Mahse, e chuan kan school ami ten an star lutuk che a. I number min dil a" Diteii chuan a ti a. 

"Aih, mi dang i pek dawn ai chuan ka pe lo vang che. Nangmah i duh vang a nih reng kha" fiamthuin a lo ti a. 

A meng rum nghal, " I zak lo.. Ka duh bawk lo" a lo ti bawl a. Dinfela a nui.. 

"School in chawl sia, eng nge i tih dawn? " a ti a. Diteii chu harh chhuak thut niaem takin a thu ngil auh a, pawn lam a hawi nghal. 

"Nangmah vang vek, Hospitalah ka kal dawn.. Kan pel daih asin.. I va â tak" a ti hlak hlak a. Dinfela chu a tlan muang deuh a, "I sawi hleinem.. Kan titi tui aniang. Kan let leh dawn nia" a ti ve mai a. Kawng zau laiah a inturn a, an inphur let leh ta a. 

Teteii lungphu chu a su dup dup a ni ber e. A hmuh lai renga a nau leh Dinfela inphur khan a awm a tinuam thei hlek lo mai. Dinfela motor a hmuh vangin Diteii pawh kha kal vat turin a nam kha a nia. Mahse, Dinfela motorah a lut si!  A hmusual der si lo. Mak a tih bakah lungawi lohna riau a nei tlat! Engvanga Diteii leh Dinfela kha inhre lo se a duh tih pawh a hrethiam chuang lo. Diteii chu a zahpui niin a lang. A pahrawn fate bula ka unaunu tih kha a zak nge a thîk zawk? Mi ngainat a hlawh theih em vangin Dinfela khan a lo ngaina ve mai ang tih a hlau zawk em ni ang.. Engmah a hrethiam lo. Nunui lah chuan, "Ka u leh I nau chu an inhria nimaw? " a ti zui lehnghal. An lo inhre daih tawh ani mahna le. Dinfela motora a chuan ve hma hawtin Diteii chu a chuang ta si a. 

Mami pawh a lo harh tha tawh a. Diteii an hmuh chuan an lawm hle. Sangtea leh anu pawh intifai turin an haw ve nghal a. Naute chu pawm an la phal vak si lo va, a va thlir sek ringawt. Mami chuan a nuih a nuih mai. 

"Teteii te chu vawiinah an intihsiak dawn tak asin.. " Diteii chuan a ti a. 

"A va thleng sang ve em ang chu maw" Mami chuan a lo ti a. 

"Kei chu, mami, Teteii hi a mak ka ti. Ka nu te ina a awm atang hian min be hmasa ngai lo renh reng. Keiman ka be zel zawk" vui hmuipu tih hriat zetin a ti ve ta nge nge a. 

Mami chu a inbengkang a, a ner náng náng mai, "A buai ve aniang. Bakah thian a ngah si a. Chutiang vel chu aniang, anih Dite, Ka nu te ina awm hi i hreh em? " a ti ta a. 

A mit a khap fak fak a, "Ngati nge? A theih hram chuan awm loh ka duh" a ti zawi sap a. 

"I dinhmun ka ngaihtuah hian ka lungngai thin. Lawma te nupa sawn engmah an ngaihtuah bawk si lo. Nakinah phei chuan kan in leh lo saw an la tiral duh hialin ania ka rin ni. Chutih hunah chuan i rethei dawn em mai. Kan bulah lo awm rawh ti dawn ila kan la chengho vek bawk si, ka patea te emaw ka ni Muani te bulah emaw i awm hi a la ngai maithei a. Nang pawh inralring deuh sa rawh aw" Mami chuan a ti ta dap dap a. Hetiang thil hi chu a la ngaihtuah ngai loh a nia. A dinhmun derthawnzia chu a hre ve tho, mahse, hrehawm deuh mah se, Lawma te bula awm ve reng theih a inring thin. 

"Patea te inah chuan nuteii a sual si" a ti nur nâng a. 

"Ni Muani te in a zia zawk ang" Mami chuan a lo ti vat a. 

"Mahse, Pa Zauva saw zu a heh e.. " a lo ti leh. A nau rilru chu a hrethiam. A lainat ngawih ngawih. Tihtheih a nei rih bawk si lo. Ni e, a patea nupui Pi Saii hi nu tha a ni lo va, apa thih pawh khan a rawn lang ve mang lo. Kolasib-a an ni Rami te erawh an tha reng, mahse, Kolasibah daih an awm. si. An ni Muani pasal pa Zauva lah zu ngawlvei, nupui fanaute hnawtchhuak reng a ni a. Diteii dinhmun chu a chèp takzet a ni. 

"Engpawhnise, Lawma te pawh an la fel thut maithei sin. Fate an neih chuan an puitling ve mai ang. I tih theih tawk ti zel la, an thu hnial lo bawk la… lehkha tha takin zir la a tawk mai. Sangtea nen kan indan hunah kan bulah i awm daih dawn nia" Mami chuan a ti siam siam a. Diteii rilru pik zualpui pawh a kiang duak mai. Mami te bula awm aia thlakhlelh nei hek lo le.. 

Khaw thim dawnah in a thleng a, in a lut chiah tihin Teremi thinrim ang thawm a hre zui nghal. 

"Nileng lengin eng nge i tih a? Eirawng pawh bawl hman lo khawpin.. " a lo ti hlawih hlawih a. 

"Mami te ka awmpui dawn ka tih kha" a lo ti tha ve mai a. 

"Eirawng sae va bawl rawh. Ka bawl peih teuh lo mai. Bawl peih loh leh ei loh a ni mai" Teremi chuan a ti a. Lawma a lo chhuak chiah. 

"Eirawngte chu lo bawl ve em em awm alawm le.. Eng nge in tih chuan" Diteii chu a phun ve hlak hlak a. 

Lawma chuan "Ni e, ti nge i bawl loh? A chhuak tih i hre ve renh sia.. Awm lo ta se chaw kan nghei dawn tihna mi?  Nilengin i mu a, zu i in leh ringawt a. Thatchhe lutuk" Teremi melh chung chuan a ti ve a. 

Teremi lah lo duai lo nasa, "Lawmzual, tikhan mi ti reng reng suh. Nangmah anih kha.. Zu i lo hawn a, zu ka in in ka che peih hleinem.. In unau khan va bawl ru" a ti tûn tûn a. 

Diteii chuan titau bûrin chaw a chhuang a, chawhmeh siam tur a váng si. A tah a chhuak. Lawma pawh an nu lakah chuan a lawm lem lo aniang, a thu tûm bûr mai. Diteii hi chu Teteii ang èmin a nghal ve lo bawk a, Lawma pawh hian a duat ve viau thin. A nupui hian a chingzal hneh ta èm zawk a. 

Chaw chu dar 7 pelhah an ei hman hram. Eina zawng zawng a sengfel leh vek a, a tihfai zawhah a inbual ve chauh. A chau khawp mai. A u te nupa lah hriat hleih theih si loh hian an inkhak fel fek reng a, a ning ru hle. 

A mu zal mai mai chu a lo muhil daih aniang, Teremi ang thawmin a tiharh a. 

"Ka chhuak khawp ang. Zawnga, min rawn ko hlek suh. Thatchhe si, rethei si. Ka nei peih tawh lo che" a ti hlawih hlawih a. Lawma erawh chu a ngawi reng. Teremi chu a insiam ani maithei, a ri bur bur mai. Reivak lohah an kawngkapui chu a inhawng ri thuai a.. A chhuak ta a ni ngei ang. 

"Au Lawma nen hian a nuam daih zawk ang" Diteii chuan a ti rilru a. 

Mahse, Lawma lungleng hian a umzui leh duh mai ang em? 

(Ka va hmangaih tak che u em.. Mutchhuak chung chung, buai chumg chunga ka ziah tlemte hi lo sit lo hram. Ru aw 😍😊