DRose 10

D' ROSE… (10)

Ziaktu: Toni Râlte

Puia chuan Diteii number chu hmetchhuakin, "Aw, Dite, naktukah chuan zin chhuak tur chuan i inring maw? " a ti a. Diteii chuan a inrin thu leh zan khat bak a riah theih loh tur thu erawh a sawi thung. Puia chuan pawi a ti hran lo. Diteii chuan Bena a hruai tel ve dawn a. A him turah a ngai. Duati enkawlna chungchangah court lamah inlan a ngai dawn a, chumi hmaa rilru tihthawven paha pawisa va hlawh chu a hreh hran lo. Zaithiam lar tak Zosangpuii Music video-ah modelah a tang dawn a ni. A zei lo teh ang chu.. Mahse, sum a hmu dawn a, a zia tal e. Puia lahin chang dang kan a tum si lo. Teteii'n a rawn khap a ring deuh a, mahse, engmah a rawn sawi lo teh mial!  A chhan dik tak erawh Teteii hian Diteii hi model a ni dawn tih a hriat loh vang leh Dinfela laka a beidawn nat lai a nih vang a ni. Dinfela erawh Diteii chungchanga rilru a siamfel hnu lawkah a hna thilah zin a ngai a, training tenau a hmachhawn dawn vang a ni. Thla 3 lai a awmbo dawn avangin Diteii chu hmuh fala a thutlukna hrilh a duh hle a. Mahse, Diteii lah Duati vangin a lo buai phili ve hle si. 

A zin dawn zanah erawh a leng a. Diteii pawh a lo awl ve hlauh mai. Lawma te nupa hian huatna chhan tur an nei lem lo bawk a, an lo hlauhthawnna zawng zawng lah chinfel a ni tawh si a. An pahrawn fapa a nihna chauh lo chu han hnualsuatna tur em em a awm lem lo bawk nen, an be chhe hran lo. Chumi zan pawh chuan an ni khawtlang hruaitute laka mark that nan zu zawrh chu an bansan der a, an tirhkah ber Patea'n an veng thenawmah a hralhsak reng thung. Teremi te ina leng turin an chhuahsan daih kha a nia. 

Dinfela meuh pawh a zâm hle. Diteii lah intipa takin a thu ngawi kar mai si. Mahse, mipa zawk na na na chu le.. "Class Xii i pass anga, kan innei ang" a ti ta piap a!  Diteii mitmeng a en duh lo lui tlat. 

"Pasal ka nei thei lo" a lo ti ta tawl a. 

"I thei.. Hmeichhia i nih hi"

"Ni lo chutiang lam a ni lo. Duati ka enkawl dawn alawm" a ti ta a. 

"Dite, i kal thui mah mah.. Duati chu a khawngaihthlak, kan hria. Mahse, nang hian engtia enkawla chawm nge i tum? " Dinfela chuan a vei ruk a sawi ta a. 

"Ka hre lo. Mahse, saw in chhung, a nu thattu te bulah saw chuan a cheng thei lo vang" a lo ti hmiah. 

Dinfela chuan, "A dik alawm.. Chuvang tak chuan sawrkar pawn an ngaithah dawn hauh lo. Khawi hmunah emaw a himna tur leh tha  taka enkawl a nihna tur hmunah an dah thei alawm.. Nangin i enkawl theih hunah i la chhuak thei ang. Chu chu thil kal. dan tur a ni" a ti a. Diteii pawn dik a ti ru ve reng. Duati chu a hmangaih a, enkawl a chak bawk. Mahse, tun dinhmunah leh an chhungkaw eizawnna zawng zawng nen chuan tha taka a enkawl seilen theih a inring bik lo. Kawng dang zawh tur erawh a hre bik si lo a ni. 

"Anih Sawrkar hian apa chhungte enkawl tura an tihtluk rinna i nei ve? " a ti a. 

"Ka hre lo le.. Apa a la dam miau a, mahse, jail chhungah hun a hmang tlat a.. Chu zawng ka sawi lawk thei lo. " a lo ti a. 

Ngawi renga melhtu Diteii lam chu hawiin, "Min nei duh ang tiraw?" A ti sup a. 

"Aih" a lo ti teh hmuk.. 

Dinfela nuih a za deuh. "Kan infawh tawh kha.. " a ti thut a. Diteii tang teuh chu a puakkeh nge Dinfela hnungzangah a chum awk. A lai lutuk chu Dinfela chuan hmuhnawm tizetin a lo thlir thung. Chum leh tuma a rawn ban lai takin a kut a lo la a, a lamah pawt hnaiin a lo fawp leh hmiah. Mahse, a rei lo, Diteii a i lahrang rang êm a. 

"Haw tawh rawh. I nau ka nia. Min rim angin awm suh" a ti nghat a. 

"Sawi phawt la.. Kan innei dawn em? " a lo ti thung. 

"Zin phawt la.. I lo haw hunah kan sawi tha dawn nia" a ti ve tlat.. A chhan a zawh chuan, "Rilru fim takin kan inngaihtuah hman ve ve ang a. Rinawm leh rinawm loh fiahna a ni bawk ang a.. " a ti ve reuh a. Dik a tihpui ve tho sia.. A hnial thla ngam ta bik lo. Nawr vak khan a tihhel a hlau ve bawk si. A hawn dawnah, "Nih inngaizawng angin inbe tawh ang aw.. " a ti a. Diteii chu a nui pût pût ringawt. Aw a tihna angah a ngaihsak ta mai. Lungawi tak chuan a haw ve tak kha.. Mut dawna an inmang tha dawnin, "Ka lo hawn hunah chuan hmeichhe dik tak ka hmu duh ania" a ti zauh a. A rawn têk teh e. Engtin pawn awm se, pa deuh emaw nu deuh emaw pawn awm mah se; Diteii hi a hmangaih tho tho.. 

Puia te nen Lunglei-ah an zin dawn tih a hriat chuan a za vek thei. Kal suh a ti dawt ngam lo va, pehhel taka kal lo tura a duhna lah Diteii chuan a hrethiam îkhaw si lo. Bena lamah a tuan ta ngawt a. Bena lah a sas then lungleng, Zin a lo châk ngang si. Dinfela chu awmhmunah a insawh a insawh ringawt. Lawma te êm han hrilh chu Diteii'n a hua ang tih a hlau ve bawk si. A ngaihtuahna a chawl mang lo tihtheih a ni. Zaithiam Zosangpuii reng reng pawh Lunglei lama shooting neih han duh tlat chu.. Hmun dang pawh a tam vei nen.. Pukpui leh Theiriat tlang vela va inthehthil kha a chak tlat si a. Dinfela tan chuan a ruka lo tawrh ngawt ngawt bak tihtheih a awm vak lo a ang khawp mai. 

Diteii te pawh phur zetin an insiam a. Zing dar 5 vela chhuaha Zotlang Guest House-a thlena a tuka shooting neih zawha hawn leh nghal mai tum an ni. Zosangpuii leh a thiannu bakah Puia leh Henry te nen an vaiin mi paruk an nih chu.. Puia motorah Diteii leh Bena an chuang a. Henrya'n Zosangi leh a thiannu a phur thung. Aizawl an chhuahsan têp tihin Zosangi thianpa tuai in a rawn zawm ve leh hnuhnawh a. Hlim takin Aizawl chu an chhuahsan ta a ni. Lawma te phalna thlapa kal ani bawk a, Diteii pawh a thawveng kher mai. Puia motor back seat-ah Bena nen an thu dun a, anmahni tawkah an titi ve nasa ngang mai. Puia hian Nunui hruai a tum zet a, mahse, Diteii a tel ve dawn si a, boruak a chhe palh ang tih a hlau ta deuh a. Tin, Nunui nen inthen leh inthen lo karah an awm mek bawk a, a thlahlel vak si lo nen, a hruai ta lo a ni. Diteii leh Dinfela inkar boruak hi chiang takin hre lo mah se; rinhlelhna erawh a nei lian viau. 

Zotlang an thleng ta. An la chau em em lo. An han inbual fai a. Diteii leh Bena chuan room pakhat an luah a. An inbual fai zawhah an chhungte an be liam liam a, dawrah thil lei turin an inzui chhuak ta a. Lunglei chu an kal vawikhatna a ni a, nuam an ti ve hrim hrim. Zotlang chu a han sang deuh bawk a, boruak pawh a vawt raih mai. A mi chengte pawh an no sûk hlawm mai. Dawra thil an lei buai lai chuan, "Ehe.. Model kha i ni chiang.. Ih.. Diteii kha" tleirawl amah aia u hlek tur hmel tha zet hian a rawn ti hlut mai a. A lo nui tawp. Thla te a lakpui a, a lai viau mai. Bena lah a lo khi ve vur vur bawk. 

An rooma an luh leh hnuah, "Celeb thian ka nei ta chu ania" Bena chuan a ti zauh a. A lo melh rum ngang mai. Dinfela call a dawn tak avangin a chhang ta lo va. Balcony-ah chhuakin Dinfela bulah chuan a han inreport zuai zuai a. A tawng duh ve barh barh hle. Dinfela pawn a lo ngaithla ve tawp. Chuti taka Diteii hlim leh tawng nuam chu a la hre ngai lo va, thinrim khum chi niin a hre lo. 

"Zanah chhuak suh aw" Dinfela chuan a ti a. 

"Chhuahna chhan tur a awm lo.. " a lo ti vat. 

"Puia pawh kha in roomah rawn lut hlek suh se.. I hria em? " 

"U Puia te chu i nau nen an ni reng.. I mawl siah"

"Ngaihzawng a neih leh neih loh ka ngaihtuah lo, ka hriat zawng chu ani kha mipa ania, nang hmeichhia i ni" a rawn ti nghut nghut a. Diteii chuan, "i á tawh anih chu" a ti ringawt. 

Dar 8 velah Puia'n a rawn ko a. Zosangi te roomah an inzui phei a. Grape Juice an lo in a lo nia. Bena chuan a in ve hmiah. Diteii erawh a tîm hle. An tuai hruai, Jojo chuan, "Kha ti ve rawh. A ruih theih loh" a ti a. "Ruih theih loh tak tak maw? " a lo ti a. An vai mai chuan a ruih theih loh thu an sawi vek. A taste a hre chak si, a ban ve ta da da a. A tlak pawp mai. 

A thlum tui viau mai. A rim pawh a tui lo hran lo. A in a in ve ta mai. No 3 a in meuh chuan a awmdan danglam chu a hrethiam ta. A lu a hai chiai chiai a; a zahzumna a bo tial tial bawk. A záng haih mai bawk nen, a tawng pawh a sehchilh nawk mai. 

"A ruih theih loh in tia.  Ka ruih hi" a ti chhar chhar a. 

Mi dangho pawh chu an kai chha vek mai. Tawng an inchuh nak nak a. Jojo lah chuan Henry chu a star nge mawni, a melh zauh zauh reng a. Henry lah a ngawi ngul a, juice chu a birh tlut tlut mai. Puia pawh a nuam tawh hle. A camera a va la a, thla a la ta chuai chuai reng a, Zosangi chuan Diteii chu kuah titih pawm titih hian khumah chuan thla a lakpui a, inngeih hmel zet hian an lang dun. Puia chuan a hmet mawlh mawlh bawk. An phur tulh tulh a ni ber e. Zosangi chuan a thawmhnaw phelhin, kekawrbul chhing tei tawi tak a ha a, tawnzau dar bah sin zet nen Diteii chu a kuah deuh chial reng a. "Cute lutuk mai" tih paha a bianga a va chuks zauh lai te chu Puia chuan a lo capture vek. An ni erawh chuan an hre lo. 

Diteii chu a mut a chhuak ta thuai a, Bena nen an room lam panin an inkai dun ta ral ral a. A mutui kher mai. A zing tho erawh a rit lûk a, a luak a chhuak bawk. Bena erawh a la hnar kuk kuk mai. A tho va, a intifai a, zan lama an thiltih chu a ngaihtuah let a, a khi sak ringawt. Tihnawn erawh a tum hran lo. Mi dng pawh an lo tho a. An han insingsa a, tukthuante an eikhamah Theiriat tlang lamah shooting nei turin an inkhalh thla leh ta a. An hawi nasa ngang mai. Lunglei leh Aizawl hi la inthlau viau mah se, Khawpui lun leh chep zet atanga zin an ni bawk a, a la thawl vangte chuan nuam an ti phian a, tin, thil reng reng chu a vawikhatna hi chu a lo nuamin a lo hlimawm bawk nen.. An rak teng tung reng mai. Theiriat tlang an thleng a, uluk takin shooting chu an han nei chho ta a. Diteii biang pawh a tai tèk mai. Zosangi pawh a che tha thawkhat e. 

Hetia hun hlimawm tak an hman mek lai hian Teteii leh Nunui erawh awmhmunah an lo insawh nasa thung. Nunui chuan amah hruai ve lo va Puia a zin daih chu a thinrimpui a. Teteii erawh chuan amah aia a nau lar tur chuan a chhun na zawk zawk niin a hria. Zosangi modela tang pha ngat te chu an lar zui tlangpui tawh thin a. Amah ni lo va a nau zawk an thlang chuan a tilungawi thei hlawl lo a ni ber e. Tin, engkimah a lawm hlawl lo bawk. A chanpual tura a ngaih Dinfela lah chuan Diteii neih a tum thu a sawi mauh mai si.. Diteii nen in khata an chen dun phei chuan a thi thei hial ang. A mize ngainatawm tak avangin amah aiin duhsak a la ni thuai dawn tih a hai der si lo.. A thlentir thei lo vang. Eng emaw tak chu a tih a ngai a ni. Mami thihna chungchangah an buai zo ta deuh bawk a, tunah chuan a ma tana ke pen a tum ta khawp mai. Mami fanu Duati chu hriat pawh a hre zui tawh lo. Engtin pawn awm se, a mawhphurhna a ni lo tih hi a pawm hmui hmak. A career a ngaipawjmawh ber.. Diteii paihthlak nen. 

.. Nunui a fuihpawrh char char mai. Puia nen an inkar chhia se, Diteii chu do ve se a duh a ni ber. Nunui lah fuihpawrh nuam lutuk a lo ni bawk si, Teteii tawngkam atangin thil a zeldin kual vak vak a, tak tak emaw a ti a, a insawh tau reng mai. Puia lah a be tlang hleithei der bawk si lo. 

Diteii te erawh shooting an zawh meuh chuan an han ineipuar a, haw turin an intintuah chho ta a. An chau viau naa hawn chu an duh zawk tho mai. Dinfela nen an la inbe hleithei der lo mai a. Tlem chuan a rilru a kap deuh. Bena nen bawk an chuang dun leh a, Mualthuam an tlan pel tihah Nunui'n Puia chu a rawn call ta a. Speaker a on si, a tawng chu an hre vek mai.

"Kha patil nu lakah khan min phatsan a, i duh duh danin awm rawh. Engkim a tawp e. Kha nu pawh kha lo hrilh rawh, ka u nen hian engtikahmah an innei lo vang. Ka dam chhung chuan" a rawn ti bawrh bawrh mai. Diteii leh Bena chu an inmelh hrek hrek ringawt. Sawi tur a vang ta kher mai. Puia lah chuan, "Aw le, inthen hi ka duhna a rei tawh. Tikhan kan tawp aw" a ti hmiah mai. Nunui pawh a hrilhhai ngawt ang. An inbiak zawh chuan, "U pui, keimah vanga in inthen ka duh lo ania. Be tha leh rawh aw. Nuam lo em mai" Diteii chuan a ti mawlh mawlh a. Puia lah chuan, "A ho. Nangmah vang ani lo e. Ka hmeichhe duhzawng a ni lo alawm" a lo ti sam êt a. Bena erawh a ngawi reng. Diteii leh Dinfela chungchang zawk chu a lo ngaihtuah ve daih. An la buai viau a ring tlat. Diteii chu a khawngaih lawk. 

Lawma leh Teremi an lo rui leh viau. Hah a dam lo thin mang e. Diteii chu a chau bawk a. A mu nghal thlawp. An thleng tlai ve bawk nen. Dinfela erawh a reh hmak, va biak tumna erawh a nei hran lo. Bakah a tihharh a hlau ve deuh bawk nen. Ngaihthat lohna em em pawh a nei lem lo. Tui deuhin a muhil bawrh bawrh mai. 

Zingah pawh Dinfela a reh char char. Tlem chuan a ngaih a tha ta lo deuh. A call ve ta tawp a. A vawikhat callna a ni. A la thei thak lo lehnghal. Eirawng bawl a ngai nen, a call nawn ta lo. Chhunah in hnawk vel a chingfel a, a tukah court-ah kal a ngaih vangin a inbuatsaih pah ve deuh bawk a. Lawma te erawh anmahni buai buaiin an buai ve char char. Zanriah an ei laiin, khawtlang hruaitu te an rawn leng ta hlawl. Mi pali lai an ni. Diteii chuan a lo dawngsawng ve a. A ngaih erawh a tha vak lo hle. 

"Hei le.. Kan hriat tawh angin vawi tam warning kan inpe tawh a. Lehkha pawh vawi hnih ngawt kan inpe tawh a. Mahse, in sumdawnna hi sim in tum si lo va, veng chhung mi leh sa hlun in ni a, i pa thlarau kan zah ēm vangin in chunga action han lak pawh kan hreh hle a. Mahse, veng chhung a lo thianghlim zawk nan kawng dang kan nei ta lo a ni ber e. In in lah a ualauin veivak an tam thin si a, sawi in hlawh tawh bawk nen.. Tihtheih kan nei ta tlat lo. In in leh lo hi chu engtia tihtheihna dan kan nei lo va, mahse, Ni 15 hmaa in insawn chhuak lo anih chuan khawtlang mipui thinrim hian an sawisak mai a hlauhawm ta riau mai a. Tihian kan lo enkawl mai ang a, in nun insim a, eizawnna in thlak dawn anih phawt chuan in ta a ni a. In luah thei reng.. Tun dinhmunah erawh in insawn mai loh chuan, in in zawk hi an vawmchhe lo vang tih a sawi theih tlat loh" tiin an rawn sawi ta hmiah mai le… tuman chaw an ei zawm thei ta lo. 

Lawma chuan pawr zet hian, "Ka in anih hi.. Min hnawtchhuak ngawt thei lo" a lo ti a. Teremi a ang hlak hlak bawk. Diteii erawh a ngawi reng. A zak ngawih ngawih. A lo hlauhthawn ruk, a taka lo thleng ta chuan a tina ngei mai. An chhuah hnuah an pathum chuan an thu ngawi kar hlawm a. Sawi tur reng reng an hre lo. 

A tawpa tawpah, "Au Lawm, sim ve mai ula, pawisa te chu hmuh dan a awm ve zel mai ang. Insawn ka duh lo" a ti ta a. 

"Kan chhuak lo vang. Court-ah ka zualko a ni mai. Khanglang a.. " Lawma chuan a ti páng páng a. Teremi chuan, "Kan vengah awm ila a ni mai.. Mi eizawnna lo hmuhmawh em em mai. " a lo ti hlar a. Diteii a tim sawk. A duh awzawng si lo. Awmngaihna reng a hre lo. Hma deuhah mu turin a roomah a lut ringawt. Dinfela lah a reh tlawk tlawk si. Fim takin a inngaihtuah a, Ani chuan zu a zuar ve hleinem, Lawma te nupa in an zuar a ni mai. Ani chu an hnawtchhuak ve kher hleinem ti ang zawngin a ngaihtuah a. Mahse, amah maia an inpui han luah chu a ngaingam bawk si lo. Dinfela a call, a switch off hmak si!  A thinrim hlur tawh. Bena a call a, ani lah chuan han hnem vak ngaihna a hre si lo, "Kan inah awm mai rawh" tih bak sawi tur a hre lo. Diteii chuan a khawpkham si lo. Eng emaw tak chu a ngaihtuah a ngai a ni. Zing khua lo var se, Lawma te nupa pawh an inngaihtuah harh maithei asin.. 

Dinfela erawh chuan a thianpa phone hmangin a phone tihbo chu a call char char, a in off takah chuan an chhar tawh aniang a ti rilru a. A hmuhlet leh a ring tawh lo. Dinfela hi computer thiam leh fing tak mahnise, chak lohna a nei a. Number a vawng thei ngai lo. A pa motor number pawh a vawng lo.Tu number mah a vawng hauh lo nia!  Diteii takngial pawh. Chu chu ania pawi a tih em em. A chhungte chu a ngaipawimawh ber hran lo. Mahse, Diteii number tal chu vawng tur a nih laiin a hre tlat si lo. A mangang takzet a ni. Phone thar a lei hunah IG emaw Fb emaw atanga neih dan a ngaihtuah mai loh chuan.. A phone lah a hmuh hmel tawh si loh. Diteii mawlh chu a ngaihtuah. An zin tih a hre bawk si. Puia lakah a ringhlel hran lo naa, Puia hian a duh deuha hriatna a nei tlat. Diteii te ang engmah tawnhriat nei lo chu hneh an harsa dawn lo. A rang thei ang bera phone a lei a ngai. Vanduai asiamin a lei tum niin ram dang atanga rawn kal Professor in hun a la rei lutuk a, an ban meuh chuan eng han tihna hman a ni tawh lo. Thinrim tûn chungin a roomah a insawh a insawh ringawt. An awmna atangin dawr a hla mai bawk si.. A tuk nghakhlel deuhin a mu ta a. A tukah a thianpa nen phone chu an va lei thei ta hram. 

Diteii khan Fb a khawih vak lo tih a hre tho naa, engtin emaw biak pawh theih a inring a, Fb-ah a lut nghal chat. Diteii profile en a tum chu a lo deactivate daih si!  A hrilhhai hle. Chhuah leh mai a tum lai chuan a home page-ah ZAWLNEI Group-a post pakhat chu a hmu ta a. Thlalak pahnih a ni. A captionah, "Ka rin dan chiah, tenawm eee.. " tih hi a posttu chuan a dah bawk. 

Dinfela kut chu a khur nia mawle!  A chhan chu, chu thlalak-ah chuan Diteii leh zaithiam Zosangpuii te pahnih induh hmel deuha duhdah deuh taka khuma an thu lai a ni tlat!  Pakhat zawkah phei chuan Zosangpuii chuan Diteii chu a kuah bet a, duh hmel zetin a melh bawk. Comment a chhiar nghal char char, Diteii chu patil a nihzia thu ngawt bak an sawi lo. Zosangpuii an ngaihsanna a reh tak thu leh tenawm an tihzia te.. Tuman thu chiang fekfawk erawh an hre lo anih hmel. Dinfela a insum zo ta lo. A post tu chu a va inbox ta ngawt a

"Thlalak kha khawi atanga i neih nge? " tiin. A seen thei lawk lo lehnghal. Hrep tak chuan.. Nunui a va inbox ta a, a nau number takngial pawh a hre si lo. Nunui chuan a rawn chhang ta nghal.. An biak tlang theih loh vanga a pa manganzia te a rawn sawi luam. Nunui number a la a, puia number a dil nghal bawk. Diteii number chu a hriat a ring lo aniang. Bakah Diteii thlalak avang khan a tîm deuh tlat. Puia number a neih veleh a call ta nghal a. 

"Thlalak kha eng nge a awmzia? " a ti nghal tâwng. 

"Ni e, kha a zia lo khawp mai. Zosangpuii alawm, amah leh amah a invawchhia anih kha. A kamnam khan whatsapp status-ah a hmang pek a, a ni lo zawngin an lo thehdarh ta si a. A pawi tak tak, Diteii pawh ka khawngaih khawp mai" a rawn ti ta a. Dinfela insangmar teuh pawh tlem chuan a inthlahdul thei ta deuh. Diteii number chu a dil ta a. A lo pe ve mai. 

"Dite.. "

Diteii chu a ngawi veng veng, a hnuah hritlang aw deuh hian, "Umm..min lo la be duh alaw" a rawn ti ta a. A tap a ni ngei ang. 

"Ka phone ka tibo a, in number ka vawng si lo va, ka che buai alawm.. Eng nge i an? I tha em? " Zangkhai deuh hian a ti a. 

"Tha chiah lo. Ka lar lutuk a. Ih, patil angin ka thang mek a, a hrehawm lutuk, Au Lawma'n min khawih bawk a" a aw chu a ri chang chang a ni ber e. Dinfela a insehruh, "Kut a thlak leh che maw.. Hmela chuh" a ti a. 

"Min khawih na lo, mahse, ka damchhungin mipui hmuh theihin thla ka la tawh dawn lo.. Bialnu nei thin angin min hre vek tawh si a.. " a rawn ti a. Tlem chuan a zangkhai ve deuh. 

"Dite, ka hmu vek. Kha thil kha.. Patil i ni lo tih ka hria alawm.. Keiin ka hriat chuan a tawk. Bakah patil an tam lutuk, Lesbian, Bisexual an kat nuk alawm.. Nang chu thiktu i ngah a, mi hriat i hlawh bawk a, an sawi duh mai mai che anih kha.. Hun a kal ang a, a reh ve leh mai ang. Kan inneih hunah thudik an hre tho dawn alawm.. A tha em? " 

Diteii chu mittui tla chungin a nui sak. Dinfela chu a ngai ngawih ngawih. A hlauh ruk em em, Dinfela'n a be duh tawh lo vang tih a lo rinna kha thiahin a awm ta a. Tunah chuan a tha ta deuh e. A lawm bawk si, a lungchhe tho bawk si.. Dinfela chu a tan mipa awmchhun a ni ta.. 

"Ka lawm e.. I thinrim ka lo ring a" 

"A tirah chuan min thawng ve deuh a, mahse, Puia ka va bia a.. Ka man thiam nghal vek e.. Ka hmangaih che" Dinfela aw ah chuan inrintawkna a lang chiang kher mai. Haw vat vat a chak zual ngei mai. 

Mizote thanmawhbawk pakhat, thil zeldin vaka a tak anga sawi hi.. Ni e, Diteii pawh a patil tak tak em tih prove miah loin an sawi nghal luai luai a. Zosangpuii lah an tenrawn em em bawk. Kha thlalak kha thian inkawmngeih tak lak ni se, tuman an sawi lo vang. Diteii thika lo elreltu bakah Zosangpuii lo er ngawih ngawih ten an vulh lian a, an vawrhdarh ta vak mai a ni. Han en mai pawn inngaizawng an ni tak tak em tih a hriat loh, mahse, inngaizawng angin an sawi tlat si. Mipa duh rawn hmeichhe Pahnih te chanchin sawi nuam ti ber ber te chu hmeichhia tho an ni. Mipa mawl leh lar khel ve fahranhoin an sawi ve bawk. Media a chak tawh si a, Diteii chu lehlamah mi lar tak tak ang a la ni lo deuh zawk a, a zia zia a la awm. Zosangpuii career erawh a chhe ve hlek dawn anih hmel e. Amah pawn pawi a ti khawp ngei ang. 

Lawma te nupa lah chuan zu an la zuar kal reng a. Warning pek an ni tawh tih an hre lo reng reng. An luhlul ngat ngat khawp mai. Sunday tlai khat phei chu an lun viau mai a, veng dang atangin an rawn dawr nasa bawk si. An ni nupa lah rui chhur reng bawk si, Diteii erawh Bena nen Mami thlanah an kal daih a. Lawma hnekna a mitko kak leh a biang duk chu a thup ve hram hram. Nat chu a na tawh lo naa a dikna rengah kutthlak a ni ziah chu a rilru a na thlawt. A awm zel dan tur pawh a ngaihtuah thiam tawh lo. Mami thlanah chuan thuin hnuailam a melh ran a, a tah a chhuak viau naa tah loh hram a tum. 

"Taka ana, Duati kha engtin nge ni ta? " Bena chuan a ti a. 

Thawk la halhin, "U Puia chhung ten an enkawl dawn" a ti nghat a. 

"Naa.. An va ti ang lo, a nu leh pa an awm si lo va, tu sawn nge enkawl ang a" Bena chuan a ti hâ a. 

"Ka hre bik lo. Hmangaih ber niawm takin an insawi thiam sia, ka khawngaih Duati chu.. A la te si, U Puia nu sawn a tiduhdah ngawt ang. " naupangchhia fe hian a lo ti a. An ngawi dun ta reng mai. Tun hnaiah thil a tawng nasa ve si a, a taksa pawh a tla ve rawk rawk mai. A cher kuam a, a thu thet bawk. Rilruin taksa a kaihhruai thui theihzia hi aw.. 

Hetih lai mek hian Lawma te erawh an lo buai ve mek. Veng chhung thalai thenkhat chu tu in nge lo fuihpawrh ni.. Lawma te in chu an rawn vawm ta mai a.. An buai ta nuai nuai mai. Lawma a inhrosa, a chhuak ngam si lo. Teremi a lo áng ve bawk, an inleng te lah chhuak ngam bik hek suh. Thalai lam lah an inrawt phur nge hriat ni suh, a rawn thleng hnuhnung hnung chu an pawr mai a. Kawngkapui bula tukverh darthlalang chu an rawn vawm keh ta chhuai mai. Teremina rak chul a, thalai khapdai turin hruaitu te an rawn lang ve zat, mahse, inkhap daih hleihtheih pawh a ni meuh lo. A tu amah lah chuan police an call hauh lo lehnghal. Mak ve tak chu a ni. 

"Khawtlang tana mi hnawksak, veng chhung titawptu an nih khu.. Dim vak a ngai lo, warning pawh an hmu tawh, engmah an pawisa lo va. An chantawk a lawm" ti pawl an awm a, nghawng a nei lian viau bawk. An buai nuaih nuaih laiin Diteii pawn an kawt a rawn thleng ve chiah. Rapthlak a ti lutuk a, awm dan tur pawh a hre lo. An khawtlang hruaitu pakhat hian a lo chelh vat, an thenawmte inah a luhpui ta a. Diteii tak hi chu tuman an hmumawh hran lo. A rukin an khawngaih thûm zawk. A hamhaih em vangin engmah sawi leh tih nachang a hre lo. A thu tlawk tlawk ringawt. An in chung ri dawp dawp kara thalai au thawm te, Lawma inhrosa thawmte chuan a beng a luh a, a mangang takzet a ni. A hlauhthawn ang ngeiin an insawn chhuah a tul dawn ta. An buaina chu a punlun chhoh zel tak si-ah chuan police an rawn lang ta nge nge a. An rawn bengdaibthei ta hram. Diteii te in erawh thawm that a ngai nasa ta hle. Police tan pawh chet lak a har, tu ber nge an man ang tih pawh hriat va ni suh. Mahse, dan pawisa lo ve ve an ni a, Lawma te pawh sawrkar phal loh thil zuar an nih laiin thalai lam pawn an in tihchhiat theihna an nei lo bawk. 

Darthlalang keh them nuaih chu a thlir kual a, an in chung pawp huau te, an in chhunga lung nawi awm teuh te.. A tah hi a chhuak ngawih ngawih. Apain harsa taka a lo din ve an in chu hmuh tlak a ni ta meuh lo. A bul chu Lawma vek a ni. Nupui. Dukdak lo lutuk a neih vang a ni. Lawma leh Teremi chu an insiam sawk sawk a. Teremi te in lama phei an tum a ni. Diteii erawh a inngaihtuah buai hle. Teremi te zui ve ngawt chu thih hreh takin a hreh si. A patea te in lama eng emaw chen awm mai chu a rilruk ta a. A hrehawm tak viau leh Kolasib lamah a chhuk tawh mai ang chu. Lehkha zir pawh bansan mai a nâp hial. A hmalam hun tur a ngaihtuah ngam lo. Lawma te pawn zui turin an nawr hran lo bawk. Mahse, an bungraw thahnem tak han kalsan ngawt chu thil tihchi a ni chiah si lo. An rilru a buai tlang hle. Zan thil a ni bawk si. An in lah kalh engang mah se, luhna tur a tam tawh lutuk. Lawma pawh buai tak a ni. 

"Zanin chu riak leh phawt zawk mai teh ang u. Dite, ngun takin ngaithla rawh. In hi ka hralh dawn a, veng dangah emaw khaw dang daihah emaw kan pem dawn.. Min zui i duh chuan ka hnial hran lo, mahse, min zui lo anih chuan nangmah inngaihtuah ve mai rawh" A ti ta a

Diteii chu a lo insangmar teuh, apa in, an in ngei kha a tawpa tawpah chuan hralh a ni dawn ta. A rilru na lutuk chu tah vak a chak.. 

"Hralh loh dan a awm lo mi? " a ti sap a. 

"Kan luah thei dawn chuang lo, eizawnna tur dang kan nei lo va, heta kan awm chuan zu kan zuar thei tawh dawn lo.. " a lo ti a. 

"Zuar tawh lo mai ula.. Hna te thawk ve ula" a ti nghat a. 

"Kan peih lo. Awlsam taka sum hmuh theih reng, hnathawh te lo sawi.. Hnathawk thei pawh kan nih tawh loh hi" Teremi chuan a lo ti hlawih hlawih a. 

"Anih tu hnenah nge i hralh dawn" tiin a u chu a melh a. 

"A hmain ka be lawk tawh a. Ka sawi duh lo anih kha.. Pu Siamliana hnenah sawn ka hralh dawn.. " Lawma chuan a ti a. Pu Siamliana chu an veng pa hausa a ni. 

"Engzatin? " ngui zet hian a ti a. 

"Nuai 20 in.. In hmun nen hian a nia" Lawma awah chuan inthlahrunna a lang tel. 

Diteii chuan engmah sawi tawh loin a room a pan nghal. Khumah a bawk thlawp a. A tap.. 

Dinfela'n a lo call a, a reject. Tumah a be chak rih lo. Ti nge maw a vanduai em em mai le.. Naupangte siin thil a tawng hnem ta khawp mai. Dinfela chuan a lo call zel si avangin message-in thil thlen dan chu a zuk hrilh ta nge nge a. A rilruin ar bo a zawng nasa hle. Naktukah chuan an in hi a chhuahsan tawh dawn si a. Khaw nge a kal ang? A patea te in a mithla a, a nuteii hmel tur khai a rawn lang nghal. An fate tawng thei zet zet te nen. A chak hlawl lo a ni. Ani Lapuii a ngaihtuah a, a pasal zu ngawlvei leh an fanu sawn Pawm, inla lal zet te a hrechhuak nghal. Bakah an khawsak a harsa ve si. Kolasib-a a ni Muani a ngaihtuah leh, an ni chu an fate an la tè a, Diteii aiin an la naupang vek. Ani Muani pasal Pa Zova hmel dam dup leh tawng muang churh a mitthla a, ani Muani thinchhe ve tak, rilru erawh tha tak si te nen.. An bula chen ve mai chu a tihchi berin a hre ta. A pawisa neih ve tlem te chu a rilruin a chhiar malh malh a. A ac ami pawh a lak chhuah a ngai tawh ang. In chhungkhur atan a hmang nasa ve a, Teremi hian in chhungkhur engmah a ngaihtuah si lo va, ani talin a ngaihtuah loh chuan an tlabal dawn lutuk. Mahse, khang a insensona ve te kha tunah chuan engmah a ni ta si lo. Lawma hian a in hralhna sum hi a pe ve ang em aw.. Teremi chuan a phal pawh a ring lo. Mami tal kha la dam ni se chuan kawng a dap pui thei tur.. Huh… thih ve mai te a chak rum rum mai. 

Dinfela chuan Diteii buaina a hriat rual khan a pa a call nghal. 

"Diteii kha naktukah zuk hruai ula, kan bulah cheng ve rawh se.. Awmna tur a nei lo. Anu a la dam a, a tuamhlawm ngei tur a ni" tiin. Apa pawn a pawm thlap. Diteii nuin an chanchin a han hriat chuan a mangang ta riau, a fanu a ngaihtuah tha lo lutuk chu a inthiam lo kher mai. Social mediaa a lar chiam pawh kha a lo hre ve tho a, mahse, amah Diteii'n hrehawm a tih a hlauh vangin a be ta lo law law kha a nia. Tunah buaina lian tak an tawk a, chu pawh a hre ve leh pek lo ania. A inthiam lo hluah hluah. Pu Vanlala nen a tuka Diteii zuk hruai tur chuan thu an titlu ta a ni. Nunui leh Teteii te erawh an hrilh hre lem lo.. 

A tuk khua a lo var a. An in chhe sawp nuaihah chuan tukthuan an rel ve zel a. An chhuahsan tho dawn a. Han siam leh thawm that an tum lem lo. Tukthuan an ei khamah Pu Siamliana a rawn lang ta a. Lehkha te ziak felin, in hmun patta te tifelin an indawr fel ta. Diteii chuan ngawi rengin a lo thlir ve tawp. Pu Siamliana te chhuah hnu lawkah an in kawtah 407 a rawn ding ta a. In chhung bungrua an hralh ban ho chu an hlang ta mwwlh mawlh a. Chutia an inhlan buai lai tak chuan Pu Vanlala te nupa an rawn lang ta hlawl mai. Diteii chuan mak a ti deuh, Lawma chu a rui lo bawk a, a lo dawngsawng tha ve fu roh. Anu chuan a thuphungin a han hau ve hlak hlak a, huat enah a en bik lo a nih hmel. An lo kal chhan an han sawi takah chuan Diteii a ding khawng lah. A u Te kal liam hnuah ticket la tura chhuah a tum kha a nia, zanin erawh Bena te inah emaw a patea te inah ema a riak anga, a tuka Kolasib-a chhuk a tum kha a nia. Mahse, tunah Pu Vanlala ten rawn hruai an tum ta mai si. A bangbo angreng khawp mai. Nunui leh Teteii avang pawn awm a chak hlawl lo. Dinfela a lo haw ang a, a buaithlak.. In khata cheng dun chunga inngaihzawn te chu thil mawi ni pawn a hre lo. Bakah a nu hi a ngaina lo. 

"Kolasib-ah chhuk ka tum a. Ka awm lo mai ang, in inah chuan" a ti a. Ani Muani pawh a be fel tawh, a lo nghakhlel viau lehnghal. 

"Ka fanu i nia, ka ngaihtuah tur i ni. I nu ka la dam ve alawm.. I hmalam hun atan kan bula i awm ve mai hi a fuh zawk a ni.. Khawngaihin" Anuin ngenngawl taka a han tih chuan a hmin lek lek. Nu neih vea pangngai taka nun te chu a duh ve alawm.. Mahse, Amah khera runluih reng tur Nunui leh Teteii an awm. A hreh a ni. 

"Nia, mahse, Âni ka lo be vek tawh sia. Ka lo zin thin ang" te a ti ta vel. Mai mai a. Lawma lah chuan, "A va tihzia tak em.. Tihbuai che u ka hreh vangin engmah pawh ka rawn sawi lo anih kha.. Amah Diteii hian kan bula awm ve a duh si lo va, Kolasib-a awm chu ka remtih loh vang pawh ni loin, in bulah chuan lehkha te pawh tha takin a zir thei ang a.. A tha dawn khawp mai. Dite, awm ngei ngei ang che"  A ti sûrh sûrh a. Diteij chuan a ngei ru hle. An thu tlat bawk si. Teremi erawh chuan eng a sawi ve lem lo. 

"Hawh ka insiampui ang che. Motora dah theih chin chin dah ila, i pa hian a la bang chu a zuk la leh mai dawn nia" a nu chuan a ti a. Diteii chu a va za lo tak. Anu a ni a, han hnial fun kha a hreh ve deuh bawk si. Lehlamah chuan Dinfela avang pawn inchenchilh chu a chak ve tho a, thil tha ber ni chuan a hre chuang lo. An insiam ta nge nge a. Bungrua a ngah ve lem lo. Anu chuan, Lawma chu roomah a ko lut a. 

"In i hralh a, Teteii khi chu pek ngai pawh ka ti lo. Mahse, Diteii hi a tawp thlenga in bula awm a nia, tlem a zawngte chu i Pe ve dawn lawm ni.. A ac ah dah se, nakinah kei ka boral pawn ngaihtuahawm lutuk lo va a awm theih nan" a ti ta a. Lawma pawh chuan, "Pek ka tum lo pawh a ni lo. Zat leh zat em em chu nupui nei ka ni bawk si a, hmun thuma thena hmun khat chu pek ka tum alawm.. Tunah bank ka la dawr hman rih si lo va, ka dawr fel hnuah Diteii ac ah chuan ka thunsak mai ang. " a lo ti ve a. A tawpkhawkah chuan a nau chu a thlauhthla thei bik lo a ni ngei ang. Anu pawh chu a bu nghat nghat a. Teremi eraeh hrilh hre kher lo turin a hrilh. Mahse, a hre tho vang. 

Pu Vanlala motorah chuan an inhlang lut a. Diteii chuan a ni Muani a be bawk. A chin tur chu a hrilh zung zung a, "E.. Mambawih, a lawmawm lutuk, i nu te kha an hausa a, i rethei hauh lo vang. Rilru nei takin awm rawh aw" a rawn ti thliam a. Diteii phur lohzia a hre ve si lo. Ngui zetin motorah chuan a thu a. Sawi tur pawh a hre lo. 

A nu te in chu an thleng ta. An awmpui te chuan a bungrua chu an rawn hlang thla a, an khai lut nghal. In chhung an lut chiah tihin Nunui leh Teteii te an room atangin an rawn chhuak ve nghal. 

"Hetah a cheng ve dawn a. Tha takin dawngsawng ang che u. In nau a nih hi" Pu Vanlala chuan a ti a. Nunui ner sawk chu Diteii chuan a hmu reng. Teteii erawh chuan a rawn melh reng ringawt. Lungawi hmel a pu miah lo bawk. A room chu in hnuaiah, mikhual room bul chiahah an zuahsak a. A room hmasa ai khan a zau zawk. An awmpuiten an han tihfelpui zung zung a. Chawhnu a nih meuh chuan engkimna felfai ta thlap mai. Mahse, Diteii awm chu a nuam thei chuang lo, a khua te chu a sik lek lekin a hria. A inbualfai a, roomah chuan a tawm tlawk tlawk ringawt. Zanriah ei hma deuhin Nunui lej Teteii an rawn lut ta a. 

"I zahpuiwwm hle mai. Kan nun i tihbuai nasat tawh nen, kan bula chen ve i tum chu a nia.. Nangmah vangin ka hmangaih ka chân asin.. " Nunui chuan a ti hlak hlak a. 

"Nangman i rawn then ringawt anih kha.. Engmah kan inkarah a awm hleinem"/Diteii chuan a lo ti ve hmiah. A sawi dik lo hran lo. 

"Ngawi rawh. Zodingpui, Puia saw i hnaih mah mah a ni. Nunui bialpa a ni tih i hre ve reng.. Zak thei lo reuh lutuk mai. He tah hian rei tak awm inbeisei suh.. Ka nau mahnila, chenpui che hi ka chak lo" Teteii tawngkam chu na ti zetin a lo ngaithla. Sawi tur a hre lo. A laizawnnu ngeiin a huat miau chuan, Nunui'n a hua pawh chu a mak lo ve. 

Zanriah an ei a. Engmah a thleng hran lo. Nunui te pawn an zia an chhuah lo. Mahse, lang lo lam atangin an la bei reng dawn tih Diteii chuan a hre ve kar. Teteii sawi ang deuh khan heta chen hlen tumna a nei lo va, engtikah emaw chuan a chhuak ang a, amahin in te a la luah ve ang chu.. Dinfela erawh chuan a chelh tlat ang.. 

(Sei deuh in beisei tih ka hria. Ka tlin tawk hi khawngaihin min lo pawmsak hram mai teh u. Nitin rawn dah ka tum dawn tho aw… 😘😘

D' ROSE… (10)

Ziaktu: Toni Râlte

Puia chuan Diteii number chu hmetchhuakin, "Aw, Dite, naktukah chuan zin chhuak tur chuan i inring maw? " a ti a. Diteii chuan a inrin thu leh zan khat bak a riah theih loh tur thu erawh a sawi thung. Puia chuan pawi a ti hran lo. Diteii chuan Bena a hruai tel ve dawn a. A him turah a ngai. Duati enkawlna chungchangah court lamah inlan a ngai dawn a, chumi hmaa rilru tihthawven paha pawisa va hlawh chu a hreh hran lo. Zaithiam lar tak Zosangpuii Music video-ah modelah a tang dawn a ni. A zei lo teh ang chu.. Mahse, sum a hmu dawn a, a zia tal e. Puia lahin chang dang kan a tum si lo. Teteii'n a rawn khap a ring deuh a, mahse, engmah a rawn sawi lo teh mial!  A chhan dik tak erawh Teteii hian Diteii hi model a ni dawn tih a hriat loh vang leh Dinfela laka a beidawn nat lai a nih vang a ni. Dinfela erawh Diteii chungchanga rilru a siamfel hnu lawkah a hna thilah zin a ngai a, training tenau a hmachhawn dawn vang a ni. Thla 3 lai a awmbo dawn avangin Diteii chu hmuh fala a thutlukna hrilh a duh hle a. Mahse, Diteii lah Duati vangin a lo buai phili ve hle si. 

A zin dawn zanah erawh a leng a. Diteii pawh a lo awl ve hlauh mai. Lawma te nupa hian huatna chhan tur an nei lem lo bawk a, an lo hlauhthawnna zawng zawng lah chinfel a ni tawh si a. An pahrawn fapa a nihna chauh lo chu han hnualsuatna tur em em a awm lem lo bawk nen, an be chhe hran lo. Chumi zan pawh chuan an ni khawtlang hruaitute laka mark that nan zu zawrh chu an bansan der a, an tirhkah ber Patea'n an veng thenawmah a hralhsak reng thung. Teremi te ina leng turin an chhuahsan daih kha a nia. 

Dinfela meuh pawh a zâm hle. Diteii lah intipa takin a thu ngawi kar mai si. Mahse, mipa zawk na na na chu le.. "Class Xii i pass anga, kan innei ang" a ti ta piap a!  Diteii mitmeng a en duh lo lui tlat. 

"Pasal ka nei thei lo" a lo ti ta tawl a. 

"I thei.. Hmeichhia i nih hi"

"Ni lo chutiang lam a ni lo. Duati ka enkawl dawn alawm" a ti ta a. 

"Dite, i kal thui mah mah.. Duati chu a khawngaihthlak, kan hria. Mahse, nang hian engtia enkawla chawm nge i tum? " Dinfela chuan a vei ruk a sawi ta a. 

"Ka hre lo. Mahse, saw in chhung, a nu thattu te bulah saw chuan a cheng thei lo vang" a lo ti hmiah. 

Dinfela chuan, "A dik alawm.. Chuvang tak chuan sawrkar pawn an ngaithah dawn hauh lo. Khawi hmunah emaw a himna tur leh tha  taka enkawl a nihna tur hmunah an dah thei alawm.. Nangin i enkawl theih hunah i la chhuak thei ang. Chu chu thil kal. dan tur a ni" a ti a. Diteii pawn dik a ti ru ve reng. Duati chu a hmangaih a, enkawl a chak bawk. Mahse, tun dinhmunah leh an chhungkaw eizawnna zawng zawng nen chuan tha taka a enkawl seilen theih a inring bik lo. Kawng dang zawh tur erawh a hre bik si lo a ni. 

"Anih Sawrkar hian apa chhungte enkawl tura an tihtluk rinna i nei ve? " a ti a. 

"Ka hre lo le.. Apa a la dam miau a, mahse, jail chhungah hun a hmang tlat a.. Chu zawng ka sawi lawk thei lo. " a lo ti a. 

Ngawi renga melhtu Diteii lam chu hawiin, "Min nei duh ang tiraw?" A ti sup a. 

"Aih" a lo ti teh hmuk.. 

Dinfela nuih a za deuh. "Kan infawh tawh kha.. " a ti thut a. Diteii tang teuh chu a puakkeh nge Dinfela hnungzangah a chum awk. A lai lutuk chu Dinfela chuan hmuhnawm tizetin a lo thlir thung. Chum leh tuma a rawn ban lai takin a kut a lo la a, a lamah pawt hnaiin a lo fawp leh hmiah. Mahse, a rei lo, Diteii a i lahrang rang êm a. 

"Haw tawh rawh. I nau ka nia. Min rim angin awm suh" a ti nghat a. 

"Sawi phawt la.. Kan innei dawn em? " a lo ti thung. 

"Zin phawt la.. I lo haw hunah kan sawi tha dawn nia" a ti ve tlat.. A chhan a zawh chuan, "Rilru fim takin kan inngaihtuah hman ve ve ang a. Rinawm leh rinawm loh fiahna a ni bawk ang a.. " a ti ve reuh a. Dik a tihpui ve tho sia.. A hnial thla ngam ta bik lo. Nawr vak khan a tihhel a hlau ve bawk si. A hawn dawnah, "Nih inngaizawng angin inbe tawh ang aw.. " a ti a. Diteii chu a nui pût pût ringawt. Aw a tihna angah a ngaihsak ta mai. Lungawi tak chuan a haw ve tak kha.. Mut dawna an inmang tha dawnin, "Ka lo hawn hunah chuan hmeichhe dik tak ka hmu duh ania" a ti zauh a. A rawn têk teh e. Engtin pawn awm se, pa deuh emaw nu deuh emaw pawn awm mah se; Diteii hi a hmangaih tho tho.. 

Puia te nen Lunglei-ah an zin dawn tih a hriat chuan a za vek thei. Kal suh a ti dawt ngam lo va, pehhel taka kal lo tura a duhna lah Diteii chuan a hrethiam îkhaw si lo. Bena lamah a tuan ta ngawt a. Bena lah a sas then lungleng, Zin a lo châk ngang si. Dinfela chu awmhmunah a insawh a insawh ringawt. Lawma te êm han hrilh chu Diteii'n a hua ang tih a hlau ve bawk si. A ngaihtuahna a chawl mang lo tihtheih a ni. Zaithiam Zosangpuii reng reng pawh Lunglei lama shooting neih han duh tlat chu.. Hmun dang pawh a tam vei nen.. Pukpui leh Theiriat tlang vela va inthehthil kha a chak tlat si a. Dinfela tan chuan a ruka lo tawrh ngawt ngawt bak tihtheih a awm vak lo a ang khawp mai. 

Diteii te pawh phur zetin an insiam a. Zing dar 5 vela chhuaha Zotlang Guest House-a thlena a tuka shooting neih zawha hawn leh nghal mai tum an ni. Zosangpuii leh a thiannu bakah Puia leh Henry te nen an vaiin mi paruk an nih chu.. Puia motorah Diteii leh Bena an chuang a. Henrya'n Zosangi leh a thiannu a phur thung. Aizawl an chhuahsan têp tihin Zosangi thianpa tuai in a rawn zawm ve leh hnuhnawh a. Hlim takin Aizawl chu an chhuahsan ta a ni. Lawma te phalna thlapa kal ani bawk a, Diteii pawh a thawveng kher mai. Puia motor back seat-ah Bena nen an thu dun a, anmahni tawkah an titi ve nasa ngang mai. Puia hian Nunui hruai a tum zet a, mahse, Diteii a tel ve dawn si a, boruak a chhe palh ang tih a hlau ta deuh a. Tin, Nunui nen inthen leh inthen lo karah an awm mek bawk a, a thlahlel vak si lo nen, a hruai ta lo a ni. Diteii leh Dinfela inkar boruak hi chiang takin hre lo mah se; rinhlelhna erawh a nei lian viau. 

Zotlang an thleng ta. An la chau em em lo. An han inbual fai a. Diteii leh Bena chuan room pakhat an luah a. An inbual fai zawhah an chhungte an be liam liam a, dawrah thil lei turin an inzui chhuak ta a. Lunglei chu an kal vawikhatna a ni a, nuam an ti ve hrim hrim. Zotlang chu a han sang deuh bawk a, boruak pawh a vawt raih mai. A mi chengte pawh an no sûk hlawm mai. Dawra thil an lei buai lai chuan, "Ehe.. Model kha i ni chiang.. Ih.. Diteii kha" tleirawl amah aia u hlek tur hmel tha zet hian a rawn ti hlut mai a. A lo nui tawp. Thla te a lakpui a, a lai viau mai. Bena lah a lo khi ve vur vur bawk. 

An rooma an luh leh hnuah, "Celeb thian ka nei ta chu ania" Bena chuan a ti zauh a. A lo melh rum ngang mai. Dinfela call a dawn tak avangin a chhang ta lo va. Balcony-ah chhuakin Dinfela bulah chuan a han inreport zuai zuai a. A tawng duh ve barh barh hle. Dinfela pawn a lo ngaithla ve tawp. Chuti taka Diteii hlim leh tawng nuam chu a la hre ngai lo va, thinrim khum chi niin a hre lo. 

"Zanah chhuak suh aw" Dinfela chuan a ti a. 

"Chhuahna chhan tur a awm lo.. " a lo ti vat. 

"Puia pawh kha in roomah rawn lut hlek suh se.. I hria em? " 

"U Puia te chu i nau nen an ni reng.. I mawl siah"

"Ngaihzawng a neih leh neih loh ka ngaihtuah lo, ka hriat zawng chu ani kha mipa ania, nang hmeichhia i ni" a rawn ti nghut nghut a. Diteii chuan, "i á tawh anih chu" a ti ringawt. 

Dar 8 velah Puia'n a rawn ko a. Zosangi te roomah an inzui phei a. Grape Juice an lo in a lo nia. Bena chuan a in ve hmiah. Diteii erawh a tîm hle. An tuai hruai, Jojo chuan, "Kha ti ve rawh. A ruih theih loh" a ti a. "Ruih theih loh tak tak maw? " a lo ti a. An vai mai chuan a ruih theih loh thu an sawi vek. A taste a hre chak si, a ban ve ta da da a. A tlak pawp mai. 

A thlum tui viau mai. A rim pawh a tui lo hran lo. A in a in ve ta mai. No 3 a in meuh chuan a awmdan danglam chu a hrethiam ta. A lu a hai chiai chiai a; a zahzumna a bo tial tial bawk. A záng haih mai bawk nen, a tawng pawh a sehchilh nawk mai. 

"A ruih theih loh in tia.  Ka ruih hi" a ti chhar chhar a. 

Mi dangho pawh chu an kai chha vek mai. Tawng an inchuh nak nak a. Jojo lah chuan Henry chu a star nge mawni, a melh zauh zauh reng a. Henry lah a ngawi ngul a, juice chu a birh tlut tlut mai. Puia pawh a nuam tawh hle. A camera a va la a, thla a la ta chuai chuai reng a, Zosangi chuan Diteii chu kuah titih pawm titih hian khumah chuan thla a lakpui a, inngeih hmel zet hian an lang dun. Puia chuan a hmet mawlh mawlh bawk. An phur tulh tulh a ni ber e. Zosangi chuan a thawmhnaw phelhin, kekawrbul chhing tei tawi tak a ha a, tawnzau dar bah sin zet nen Diteii chu a kuah deuh chial reng a. "Cute lutuk mai" tih paha a bianga a va chuks zauh lai te chu Puia chuan a lo capture vek. An ni erawh chuan an hre lo. 

Diteii chu a mut a chhuak ta thuai a, Bena nen an room lam panin an inkai dun ta ral ral a. A mutui kher mai. A zing tho erawh a rit lûk a, a luak a chhuak bawk. Bena erawh a la hnar kuk kuk mai. A tho va, a intifai a, zan lama an thiltih chu a ngaihtuah let a, a khi sak ringawt. Tihnawn erawh a tum hran lo. Mi dng pawh an lo tho a. An han insingsa a, tukthuante an eikhamah Theiriat tlang lamah shooting nei turin an inkhalh thla leh ta a. An hawi nasa ngang mai. Lunglei leh Aizawl hi la inthlau viau mah se, Khawpui lun leh chep zet atanga zin an ni bawk a, a la thawl vangte chuan nuam an ti phian a, tin, thil reng reng chu a vawikhatna hi chu a lo nuamin a lo hlimawm bawk nen.. An rak teng tung reng mai. Theiriat tlang an thleng a, uluk takin shooting chu an han nei chho ta a. Diteii biang pawh a tai tèk mai. Zosangi pawh a che tha thawkhat e. 

Hetia hun hlimawm tak an hman mek lai hian Teteii leh Nunui erawh awmhmunah an lo insawh nasa thung. Nunui chuan amah hruai ve lo va Puia a zin daih chu a thinrimpui a. Teteii erawh chuan amah aia a nau lar tur chuan a chhun na zawk zawk niin a hria. Zosangi modela tang pha ngat te chu an lar zui tlangpui tawh thin a. Amah ni lo va a nau zawk an thlang chuan a tilungawi thei hlawl lo a ni ber e. Tin, engkimah a lawm hlawl lo bawk. A chanpual tura a ngaih Dinfela lah chuan Diteii neih a tum thu a sawi mauh mai si.. Diteii nen in khata an chen dun phei chuan a thi thei hial ang. A mize ngainatawm tak avangin amah aiin duhsak a la ni thuai dawn tih a hai der si lo.. A thlentir thei lo vang. Eng emaw tak chu a tih a ngai a ni. Mami thihna chungchangah an buai zo ta deuh bawk a, tunah chuan a ma tana ke pen a tum ta khawp mai. Mami fanu Duati chu hriat pawh a hre zui tawh lo. Engtin pawn awm se, a mawhphurhna a ni lo tih hi a pawm hmui hmak. A career a ngaipawjmawh ber.. Diteii paihthlak nen. 

.. Nunui a fuihpawrh char char mai. Puia nen an inkar chhia se, Diteii chu do ve se a duh a ni ber. Nunui lah fuihpawrh nuam lutuk a lo ni bawk si, Teteii tawngkam atangin thil a zeldin kual vak vak a, tak tak emaw a ti a, a insawh tau reng mai. Puia lah a be tlang hleithei der bawk si lo. 

Diteii te erawh shooting an zawh meuh chuan an han ineipuar a, haw turin an intintuah chho ta a. An chau viau naa hawn chu an duh zawk tho mai. Dinfela nen an la inbe hleithei der lo mai a. Tlem chuan a rilru a kap deuh. Bena nen bawk an chuang dun leh a, Mualthuam an tlan pel tihah Nunui'n Puia chu a rawn call ta a. Speaker a on si, a tawng chu an hre vek mai.

"Kha patil nu lakah khan min phatsan a, i duh duh danin awm rawh. Engkim a tawp e. Kha nu pawh kha lo hrilh rawh, ka u nen hian engtikahmah an innei lo vang. Ka dam chhung chuan" a rawn ti bawrh bawrh mai. Diteii leh Bena chu an inmelh hrek hrek ringawt. Sawi tur a vang ta kher mai. Puia lah chuan, "Aw le, inthen hi ka duhna a rei tawh. Tikhan kan tawp aw" a ti hmiah mai. Nunui pawh a hrilhhai ngawt ang. An inbiak zawh chuan, "U pui, keimah vanga in inthen ka duh lo ania. Be tha leh rawh aw. Nuam lo em mai" Diteii chuan a ti mawlh mawlh a. Puia lah chuan, "A ho. Nangmah vang ani lo e. Ka hmeichhe duhzawng a ni lo alawm" a lo ti sam êt a. Bena erawh a ngawi reng. Diteii leh Dinfela chungchang zawk chu a lo ngaihtuah ve daih. An la buai viau a ring tlat. Diteii chu a khawngaih lawk. 

Lawma leh Teremi an lo rui leh viau. Hah a dam lo thin mang e. Diteii chu a chau bawk a. A mu nghal thlawp. An thleng tlai ve bawk nen. Dinfela erawh a reh hmak, va biak tumna erawh a nei hran lo. Bakah a tihharh a hlau ve deuh bawk nen. Ngaihthat lohna em em pawh a nei lem lo. Tui deuhin a muhil bawrh bawrh mai. 

Zingah pawh Dinfela a reh char char. Tlem chuan a ngaih a tha ta lo deuh. A call ve ta tawp a. A vawikhat callna a ni. A la thei thak lo lehnghal. Eirawng bawl a ngai nen, a call nawn ta lo. Chhunah in hnawk vel a chingfel a, a tukah court-ah kal a ngaih vangin a inbuatsaih pah ve deuh bawk a. Lawma te erawh anmahni buai buaiin an buai ve char char. Zanriah an ei laiin, khawtlang hruaitu te an rawn leng ta hlawl. Mi pali lai an ni. Diteii chuan a lo dawngsawng ve a. A ngaih erawh a tha vak lo hle. 

"Hei le.. Kan hriat tawh angin vawi tam warning kan inpe tawh a. Lehkha pawh vawi hnih ngawt kan inpe tawh a. Mahse, in sumdawnna hi sim in tum si lo va, veng chhung mi leh sa hlun in ni a, i pa thlarau kan zah ēm vangin in chunga action han lak pawh kan hreh hle a. Mahse, veng chhung a lo thianghlim zawk nan kawng dang kan nei ta lo a ni ber e. In in lah a ualauin veivak an tam thin si a, sawi in hlawh tawh bawk nen.. Tihtheih kan nei ta tlat lo. In in leh lo hi chu engtia tihtheihna dan kan nei lo va, mahse, Ni 15 hmaa in insawn chhuak lo anih chuan khawtlang mipui thinrim hian an sawisak mai a hlauhawm ta riau mai a. Tihian kan lo enkawl mai ang a, in nun insim a, eizawnna in thlak dawn anih phawt chuan in ta a ni a. In luah thei reng.. Tun dinhmunah erawh in insawn mai loh chuan, in in zawk hi an vawmchhe lo vang tih a sawi theih tlat loh" tiin an rawn sawi ta hmiah mai le… tuman chaw an ei zawm thei ta lo. 

Lawma chuan pawr zet hian, "Ka in anih hi.. Min hnawtchhuak ngawt thei lo" a lo ti a. Teremi a ang hlak hlak bawk. Diteii erawh a ngawi reng. A zak ngawih ngawih. A lo hlauhthawn ruk, a taka lo thleng ta chuan a tina ngei mai. An chhuah hnuah an pathum chuan an thu ngawi kar hlawm a. Sawi tur reng reng an hre lo. 

A tawpa tawpah, "Au Lawm, sim ve mai ula, pawisa te chu hmuh dan a awm ve zel mai ang. Insawn ka duh lo" a ti ta a. 

"Kan chhuak lo vang. Court-ah ka zualko a ni mai. Khanglang a.. " Lawma chuan a ti páng páng a. Teremi chuan, "Kan vengah awm ila a ni mai.. Mi eizawnna lo hmuhmawh em em mai. " a lo ti hlar a. Diteii a tim sawk. A duh awzawng si lo. Awmngaihna reng a hre lo. Hma deuhah mu turin a roomah a lut ringawt. Dinfela lah a reh tlawk tlawk si. Fim takin a inngaihtuah a, Ani chuan zu a zuar ve hleinem, Lawma te nupa in an zuar a ni mai. Ani chu an hnawtchhuak ve kher hleinem ti ang zawngin a ngaihtuah a. Mahse, amah maia an inpui han luah chu a ngaingam bawk si lo. Dinfela a call, a switch off hmak si!  A thinrim hlur tawh. Bena a call a, ani lah chuan han hnem vak ngaihna a hre si lo, "Kan inah awm mai rawh" tih bak sawi tur a hre lo. Diteii chuan a khawpkham si lo. Eng emaw tak chu a ngaihtuah a ngai a ni. Zing khua lo var se, Lawma te nupa pawh an inngaihtuah harh maithei asin.. 

Dinfela erawh chuan a thianpa phone hmangin a phone tihbo chu a call char char, a in off takah chuan an chhar tawh aniang a ti rilru a. A hmuhlet leh a ring tawh lo. Dinfela hi computer thiam leh fing tak mahnise, chak lohna a nei a. Number a vawng thei ngai lo. A pa motor number pawh a vawng lo.Tu number mah a vawng hauh lo nia!  Diteii takngial pawh. Chu chu ania pawi a tih em em. A chhungte chu a ngaipawimawh ber hran lo. Mahse, Diteii number tal chu vawng tur a nih laiin a hre tlat si lo. A mangang takzet a ni. Phone thar a lei hunah IG emaw Fb emaw atanga neih dan a ngaihtuah mai loh chuan.. A phone lah a hmuh hmel tawh si loh. Diteii mawlh chu a ngaihtuah. An zin tih a hre bawk si. Puia lakah a ringhlel hran lo naa, Puia hian a duh deuha hriatna a nei tlat. Diteii te ang engmah tawnhriat nei lo chu hneh an harsa dawn lo. A rang thei ang bera phone a lei a ngai. Vanduai asiamin a lei tum niin ram dang atanga rawn kal Professor in hun a la rei lutuk a, an ban meuh chuan eng han tihna hman a ni tawh lo. Thinrim tûn chungin a roomah a insawh a insawh ringawt. An awmna atangin dawr a hla mai bawk si.. A tuk nghakhlel deuhin a mu ta a. A tukah a thianpa nen phone chu an va lei thei ta hram. 

Diteii khan Fb a khawih vak lo tih a hre tho naa, engtin emaw biak pawh theih a inring a, Fb-ah a lut nghal chat. Diteii profile en a tum chu a lo deactivate daih si!  A hrilhhai hle. Chhuah leh mai a tum lai chuan a home page-ah ZAWLNEI Group-a post pakhat chu a hmu ta a. Thlalak pahnih a ni. A captionah, "Ka rin dan chiah, tenawm eee.. " tih hi a posttu chuan a dah bawk. 

Dinfela kut chu a khur nia mawle!  A chhan chu, chu thlalak-ah chuan Diteii leh zaithiam Zosangpuii te pahnih induh hmel deuha duhdah deuh taka khuma an thu lai a ni tlat!  Pakhat zawkah phei chuan Zosangpuii chuan Diteii chu a kuah bet a, duh hmel zetin a melh bawk. Comment a chhiar nghal char char, Diteii chu patil a nihzia thu ngawt bak an sawi lo. Zosangpuii an ngaihsanna a reh tak thu leh tenawm an tihzia te.. Tuman thu chiang fekfawk erawh an hre lo anih hmel. Dinfela a insum zo ta lo. A post tu chu a va inbox ta ngawt a

"Thlalak kha khawi atanga i neih nge? " tiin. A seen thei lawk lo lehnghal. Hrep tak chuan.. Nunui a va inbox ta a, a nau number takngial pawh a hre si lo. Nunui chuan a rawn chhang ta nghal.. An biak tlang theih loh vanga a pa manganzia te a rawn sawi luam. Nunui number a la a, puia number a dil nghal bawk. Diteii number chu a hriat a ring lo aniang. Bakah Diteii thlalak avang khan a tîm deuh tlat. Puia number a neih veleh a call ta nghal a. 

"Thlalak kha eng nge a awmzia? " a ti nghal tâwng. 

"Ni e, kha a zia lo khawp mai. Zosangpuii alawm, amah leh amah a invawchhia anih kha. A kamnam khan whatsapp status-ah a hmang pek a, a ni lo zawngin an lo thehdarh ta si a. A pawi tak tak, Diteii pawh ka khawngaih khawp mai" a rawn ti ta a. Dinfela insangmar teuh pawh tlem chuan a inthlahdul thei ta deuh. Diteii number chu a dil ta a. A lo pe ve mai. 

"Dite.. "

Diteii chu a ngawi veng veng, a hnuah hritlang aw deuh hian, "Umm..min lo la be duh alaw" a rawn ti ta a. A tap a ni ngei ang. 

"Ka phone ka tibo a, in number ka vawng si lo va, ka che buai alawm.. Eng nge i an? I tha em? " Zangkhai deuh hian a ti a. 

"Tha chiah lo. Ka lar lutuk a. Ih, patil angin ka thang mek a, a hrehawm lutuk, Au Lawma'n min khawih bawk a" a aw chu a ri chang chang a ni ber e. Dinfela a insehruh, "Kut a thlak leh che maw.. Hmela chuh" a ti a. 

"Min khawih na lo, mahse, ka damchhungin mipui hmuh theihin thla ka la tawh dawn lo.. Bialnu nei thin angin min hre vek tawh si a.. " a rawn ti a. Tlem chuan a zangkhai ve deuh. 

"Dite, ka hmu vek. Kha thil kha.. Patil i ni lo tih ka hria alawm.. Keiin ka hriat chuan a tawk. Bakah patil an tam lutuk, Lesbian, Bisexual an kat nuk alawm.. Nang chu thiktu i ngah a, mi hriat i hlawh bawk a, an sawi duh mai mai che anih kha.. Hun a kal ang a, a reh ve leh mai ang. Kan inneih hunah thudik an hre tho dawn alawm.. A tha em? " 

Diteii chu mittui tla chungin a nui sak. Dinfela chu a ngai ngawih ngawih. A hlauh ruk em em, Dinfela'n a be duh tawh lo vang tih a lo rinna kha thiahin a awm ta a. Tunah chuan a tha ta deuh e. A lawm bawk si, a lungchhe tho bawk si.. Dinfela chu a tan mipa awmchhun a ni ta.. 

"Ka lawm e.. I thinrim ka lo ring a" 

"A tirah chuan min thawng ve deuh a, mahse, Puia ka va bia a.. Ka man thiam nghal vek e.. Ka hmangaih che" Dinfela aw ah chuan inrintawkna a lang chiang kher mai. Haw vat vat a chak zual ngei mai. 

Mizote thanmawhbawk pakhat, thil zeldin vaka a tak anga sawi hi.. Ni e, Diteii pawh a patil tak tak em tih prove miah loin an sawi nghal luai luai a. Zosangpuii lah an tenrawn em em bawk. Kha thlalak kha thian inkawmngeih tak lak ni se, tuman an sawi lo vang. Diteii thika lo elreltu bakah Zosangpuii lo er ngawih ngawih ten an vulh lian a, an vawrhdarh ta vak mai a ni. Han en mai pawn inngaizawng an ni tak tak em tih a hriat loh, mahse, inngaizawng angin an sawi tlat si. Mipa duh rawn hmeichhe Pahnih te chanchin sawi nuam ti ber ber te chu hmeichhia tho an ni. Mipa mawl leh lar khel ve fahranhoin an sawi ve bawk. Media a chak tawh si a, Diteii chu lehlamah mi lar tak tak ang a la ni lo deuh zawk a, a zia zia a la awm. Zosangpuii career erawh a chhe ve hlek dawn anih hmel e. Amah pawn pawi a ti khawp ngei ang. 

Lawma te nupa lah chuan zu an la zuar kal reng a. Warning pek an ni tawh tih an hre lo reng reng. An luhlul ngat ngat khawp mai. Sunday tlai khat phei chu an lun viau mai a, veng dang atangin an rawn dawr nasa bawk si. An ni nupa lah rui chhur reng bawk si, Diteii erawh Bena nen Mami thlanah an kal daih a. Lawma hnekna a mitko kak leh a biang duk chu a thup ve hram hram. Nat chu a na tawh lo naa a dikna rengah kutthlak a ni ziah chu a rilru a na thlawt. A awm zel dan tur pawh a ngaihtuah thiam tawh lo. Mami thlanah chuan thuin hnuailam a melh ran a, a tah a chhuak viau naa tah loh hram a tum. 

"Taka ana, Duati kha engtin nge ni ta? " Bena chuan a ti a. 

Thawk la halhin, "U Puia chhung ten an enkawl dawn" a ti nghat a. 

"Naa.. An va ti ang lo, a nu leh pa an awm si lo va, tu sawn nge enkawl ang a" Bena chuan a ti hâ a. 

"Ka hre bik lo. Hmangaih ber niawm takin an insawi thiam sia, ka khawngaih Duati chu.. A la te si, U Puia nu sawn a tiduhdah ngawt ang. " naupangchhia fe hian a lo ti a. An ngawi dun ta reng mai. Tun hnaiah thil a tawng nasa ve si a, a taksa pawh a tla ve rawk rawk mai. A cher kuam a, a thu thet bawk. Rilruin taksa a kaihhruai thui theihzia hi aw.. 

Hetih lai mek hian Lawma te erawh an lo buai ve mek. Veng chhung thalai thenkhat chu tu in nge lo fuihpawrh ni.. Lawma te in chu an rawn vawm ta mai a.. An buai ta nuai nuai mai. Lawma a inhrosa, a chhuak ngam si lo. Teremi a lo áng ve bawk, an inleng te lah chhuak ngam bik hek suh. Thalai lam lah an inrawt phur nge hriat ni suh, a rawn thleng hnuhnung hnung chu an pawr mai a. Kawngkapui bula tukverh darthlalang chu an rawn vawm keh ta chhuai mai. Teremina rak chul a, thalai khapdai turin hruaitu te an rawn lang ve zat, mahse, inkhap daih hleihtheih pawh a ni meuh lo. A tu amah lah chuan police an call hauh lo lehnghal. Mak ve tak chu a ni. 

"Khawtlang tana mi hnawksak, veng chhung titawptu an nih khu.. Dim vak a ngai lo, warning pawh an hmu tawh, engmah an pawisa lo va. An chantawk a lawm" ti pawl an awm a, nghawng a nei lian viau bawk. An buai nuaih nuaih laiin Diteii pawn an kawt a rawn thleng ve chiah. Rapthlak a ti lutuk a, awm dan tur pawh a hre lo. An khawtlang hruaitu pakhat hian a lo chelh vat, an thenawmte inah a luhpui ta a. Diteii tak hi chu tuman an hmumawh hran lo. A rukin an khawngaih thûm zawk. A hamhaih em vangin engmah sawi leh tih nachang a hre lo. A thu tlawk tlawk ringawt. An in chung ri dawp dawp kara thalai au thawm te, Lawma inhrosa thawmte chuan a beng a luh a, a mangang takzet a ni. A hlauhthawn ang ngeiin an insawn chhuah a tul dawn ta. An buaina chu a punlun chhoh zel tak si-ah chuan police an rawn lang ta nge nge a. An rawn bengdaibthei ta hram. Diteii te in erawh thawm that a ngai nasa ta hle. Police tan pawh chet lak a har, tu ber nge an man ang tih pawh hriat va ni suh. Mahse, dan pawisa lo ve ve an ni a, Lawma te pawh sawrkar phal loh thil zuar an nih laiin thalai lam pawn an in tihchhiat theihna an nei lo bawk. 

Darthlalang keh them nuaih chu a thlir kual a, an in chung pawp huau te, an in chhunga lung nawi awm teuh te.. A tah hi a chhuak ngawih ngawih. Apain harsa taka a lo din ve an in chu hmuh tlak a ni ta meuh lo. A bul chu Lawma vek a ni. Nupui. Dukdak lo lutuk a neih vang a ni. Lawma leh Teremi chu an insiam sawk sawk a. Teremi te in lama phei an tum a ni. Diteii erawh a inngaihtuah buai hle. Teremi te zui ve ngawt chu thih hreh takin a hreh si. A patea te in lama eng emaw chen awm mai chu a rilruk ta a. A hrehawm tak viau leh Kolasib lamah a chhuk tawh mai ang chu. Lehkha zir pawh bansan mai a nâp hial. A hmalam hun tur a ngaihtuah ngam lo. Lawma te pawn zui turin an nawr hran lo bawk. Mahse, an bungraw thahnem tak han kalsan ngawt chu thil tihchi a ni chiah si lo. An rilru a buai tlang hle. Zan thil a ni bawk si. An in lah kalh engang mah se, luhna tur a tam tawh lutuk. Lawma pawh buai tak a ni. 

"Zanin chu riak leh phawt zawk mai teh ang u. Dite, ngun takin ngaithla rawh. In hi ka hralh dawn a, veng dangah emaw khaw dang daihah emaw kan pem dawn.. Min zui i duh chuan ka hnial hran lo, mahse, min zui lo anih chuan nangmah inngaihtuah ve mai rawh" A ti ta a

Diteii chu a lo insangmar teuh, apa in, an in ngei kha a tawpa tawpah chuan hralh a ni dawn ta. A rilru na lutuk chu tah vak a chak.. 

"Hralh loh dan a awm lo mi? " a ti sap a. 

"Kan luah thei dawn chuang lo, eizawnna tur dang kan nei lo va, heta kan awm chuan zu kan zuar thei tawh dawn lo.. " a lo ti a. 

"Zuar tawh lo mai ula.. Hna te thawk ve ula" a ti nghat a. 

"Kan peih lo. Awlsam taka sum hmuh theih reng, hnathawh te lo sawi.. Hnathawk thei pawh kan nih tawh loh hi" Teremi chuan a lo ti hlawih hlawih a. 

"Anih tu hnenah nge i hralh dawn" tiin a u chu a melh a. 

"A hmain ka be lawk tawh a. Ka sawi duh lo anih kha.. Pu Siamliana hnenah sawn ka hralh dawn.. " Lawma chuan a ti a. Pu Siamliana chu an veng pa hausa a ni. 

"Engzatin? " ngui zet hian a ti a. 

"Nuai 20 in.. In hmun nen hian a nia" Lawma awah chuan inthlahrunna a lang tel. 

Diteii chuan engmah sawi tawh loin a room a pan nghal. Khumah a bawk thlawp a. A tap.. 

Dinfela'n a lo call a, a reject. Tumah a be chak rih lo. Ti nge maw a vanduai em em mai le.. Naupangte siin thil a tawng hnem ta khawp mai. Dinfela chuan a lo call zel si avangin message-in thil thlen dan chu a zuk hrilh ta nge nge a. A rilruin ar bo a zawng nasa hle. Naktukah chuan an in hi a chhuahsan tawh dawn si a. Khaw nge a kal ang? A patea te in a mithla a, a nuteii hmel tur khai a rawn lang nghal. An fate tawng thei zet zet te nen. A chak hlawl lo a ni. Ani Lapuii a ngaihtuah a, a pasal zu ngawlvei leh an fanu sawn Pawm, inla lal zet te a hrechhuak nghal. Bakah an khawsak a harsa ve si. Kolasib-a a ni Muani a ngaihtuah leh, an ni chu an fate an la tè a, Diteii aiin an la naupang vek. Ani Muani pasal Pa Zova hmel dam dup leh tawng muang churh a mitthla a, ani Muani thinchhe ve tak, rilru erawh tha tak si te nen.. An bula chen ve mai chu a tihchi berin a hre ta. A pawisa neih ve tlem te chu a rilruin a chhiar malh malh a. A ac ami pawh a lak chhuah a ngai tawh ang. In chhungkhur atan a hmang nasa ve a, Teremi hian in chhungkhur engmah a ngaihtuah si lo va, ani talin a ngaihtuah loh chuan an tlabal dawn lutuk. Mahse, khang a insensona ve te kha tunah chuan engmah a ni ta si lo. Lawma hian a in hralhna sum hi a pe ve ang em aw.. Teremi chuan a phal pawh a ring lo. Mami tal kha la dam ni se chuan kawng a dap pui thei tur.. Huh… thih ve mai te a chak rum rum mai. 

Dinfela chuan Diteii buaina a hriat rual khan a pa a call nghal. 

"Diteii kha naktukah zuk hruai ula, kan bulah cheng ve rawh se.. Awmna tur a nei lo. Anu a la dam a, a tuamhlawm ngei tur a ni" tiin. Apa pawn a pawm thlap. Diteii nuin an chanchin a han hriat chuan a mangang ta riau, a fanu a ngaihtuah tha lo lutuk chu a inthiam lo kher mai. Social mediaa a lar chiam pawh kha a lo hre ve tho a, mahse, amah Diteii'n hrehawm a tih a hlauh vangin a be ta lo law law kha a nia. Tunah buaina lian tak an tawk a, chu pawh a hre ve leh pek lo ania. A inthiam lo hluah hluah. Pu Vanlala nen a tuka Diteii zuk hruai tur chuan thu an titlu ta a ni. Nunui leh Teteii te erawh an hrilh hre lem lo.. 

A tuk khua a lo var a. An in chhe sawp nuaihah chuan tukthuan an rel ve zel a. An chhuahsan tho dawn a. Han siam leh thawm that an tum lem lo. Tukthuan an ei khamah Pu Siamliana a rawn lang ta a. Lehkha te ziak felin, in hmun patta te tifelin an indawr fel ta. Diteii chuan ngawi rengin a lo thlir ve tawp. Pu Siamliana te chhuah hnu lawkah an in kawtah 407 a rawn ding ta a. In chhung bungrua an hralh ban ho chu an hlang ta mwwlh mawlh a. Chutia an inhlan buai lai tak chuan Pu Vanlala te nupa an rawn lang ta hlawl mai. Diteii chuan mak a ti deuh, Lawma chu a rui lo bawk a, a lo dawngsawng tha ve fu roh. Anu chuan a thuphungin a han hau ve hlak hlak a, huat enah a en bik lo a nih hmel. An lo kal chhan an han sawi takah chuan Diteii a ding khawng lah. A u Te kal liam hnuah ticket la tura chhuah a tum kha a nia, zanin erawh Bena te inah emaw a patea te inah ema a riak anga, a tuka Kolasib-a chhuk a tum kha a nia. Mahse, tunah Pu Vanlala ten rawn hruai an tum ta mai si. A bangbo angreng khawp mai. Nunui leh Teteii avang pawn awm a chak hlawl lo. Dinfela a lo haw ang a, a buaithlak.. In khata cheng dun chunga inngaihzawn te chu thil mawi ni pawn a hre lo. Bakah a nu hi a ngaina lo. 

"Kolasib-ah chhuk ka tum a. Ka awm lo mai ang, in inah chuan" a ti a. Ani Muani pawh a be fel tawh, a lo nghakhlel viau lehnghal. 

"Ka fanu i nia, ka ngaihtuah tur i ni. I nu ka la dam ve alawm.. I hmalam hun atan kan bula i awm ve mai hi a fuh zawk a ni.. Khawngaihin" Anuin ngenngawl taka a han tih chuan a hmin lek lek. Nu neih vea pangngai taka nun te chu a duh ve alawm.. Mahse, Amah khera runluih reng tur Nunui leh Teteii an awm. A hreh a ni. 

"Nia, mahse, Âni ka lo be vek tawh sia. Ka lo zin thin ang" te a ti ta vel. Mai mai a. Lawma lah chuan, "A va tihzia tak em.. Tihbuai che u ka hreh vangin engmah pawh ka rawn sawi lo anih kha.. Amah Diteii hian kan bula awm ve a duh si lo va, Kolasib-a awm chu ka remtih loh vang pawh ni loin, in bulah chuan lehkha te pawh tha takin a zir thei ang a.. A tha dawn khawp mai. Dite, awm ngei ngei ang che"  A ti sûrh sûrh a. Diteij chuan a ngei ru hle. An thu tlat bawk si. Teremi erawh chuan eng a sawi ve lem lo. 

"Hawh ka insiampui ang che. Motora dah theih chin chin dah ila, i pa hian a la bang chu a zuk la leh mai dawn nia" a nu chuan a ti a. Diteii chu a va za lo tak. Anu a ni a, han hnial fun kha a hreh ve deuh bawk si. Lehlamah chuan Dinfela avang pawn inchenchilh chu a chak ve tho a, thil tha ber ni chuan a hre chuang lo. An insiam ta nge nge a. Bungrua a ngah ve lem lo. Anu chuan, Lawma chu roomah a ko lut a. 

"In i hralh a, Teteii khi chu pek ngai pawh ka ti lo. Mahse, Diteii hi a tawp thlenga in bula awm a nia, tlem a zawngte chu i Pe ve dawn lawm ni.. A ac ah dah se, nakinah kei ka boral pawn ngaihtuahawm lutuk lo va a awm theih nan" a ti ta a. Lawma pawh chuan, "Pek ka tum lo pawh a ni lo. Zat leh zat em em chu nupui nei ka ni bawk si a, hmun thuma thena hmun khat chu pek ka tum alawm.. Tunah bank ka la dawr hman rih si lo va, ka dawr fel hnuah Diteii ac ah chuan ka thunsak mai ang. " a lo ti ve a. A tawpkhawkah chuan a nau chu a thlauhthla thei bik lo a ni ngei ang. Anu pawh chu a bu nghat nghat a. Teremi eraeh hrilh hre kher lo turin a hrilh. Mahse, a hre tho vang. 

Pu Vanlala motorah chuan an inhlang lut a. Diteii chuan a ni Muani a be bawk. A chin tur chu a hrilh zung zung a, "E.. Mambawih, a lawmawm lutuk, i nu te kha an hausa a, i rethei hauh lo vang. Rilru nei takin awm rawh aw" a rawn ti thliam a. Diteii phur lohzia a hre ve si lo. Ngui zetin motorah chuan a thu a. Sawi tur pawh a hre lo. 

A nu te in chu an thleng ta. An awmpui te chuan a bungrua chu an rawn hlang thla a, an khai lut nghal. In chhung an lut chiah tihin Nunui leh Teteii te an room atangin an rawn chhuak ve nghal. 

"Hetah a cheng ve dawn a. Tha takin dawngsawng ang che u. In nau a nih hi" Pu Vanlala chuan a ti a. Nunui ner sawk chu Diteii chuan a hmu reng. Teteii erawh chuan a rawn melh reng ringawt. Lungawi hmel a pu miah lo bawk. A room chu in hnuaiah, mikhual room bul chiahah an zuahsak a. A room hmasa ai khan a zau zawk. An awmpuiten an han tihfelpui zung zung a. Chawhnu a nih meuh chuan engkimna felfai ta thlap mai. Mahse, Diteii awm chu a nuam thei chuang lo, a khua te chu a sik lek lekin a hria. A inbualfai a, roomah chuan a tawm tlawk tlawk ringawt. Zanriah ei hma deuhin Nunui lej Teteii an rawn lut ta a. 

"I zahpuiwwm hle mai. Kan nun i tihbuai nasat tawh nen, kan bula chen ve i tum chu a nia.. Nangmah vangin ka hmangaih ka chân asin.. " Nunui chuan a ti hlak hlak a. 

"Nangman i rawn then ringawt anih kha.. Engmah kan inkarah a awm hleinem"/Diteii chuan a lo ti ve hmiah. A sawi dik lo hran lo. 

"Ngawi rawh. Zodingpui, Puia saw i hnaih mah mah a ni. Nunui bialpa a ni tih i hre ve reng.. Zak thei lo reuh lutuk mai. He tah hian rei tak awm inbeisei suh.. Ka nau mahnila, chenpui che hi ka chak lo" Teteii tawngkam chu na ti zetin a lo ngaithla. Sawi tur a hre lo. A laizawnnu ngeiin a huat miau chuan, Nunui'n a hua pawh chu a mak lo ve. 

Zanriah an ei a. Engmah a thleng hran lo. Nunui te pawn an zia an chhuah lo. Mahse, lang lo lam atangin an la bei reng dawn tih Diteii chuan a hre ve kar. Teteii sawi ang deuh khan heta chen hlen tumna a nei lo va, engtikah emaw chuan a chhuak ang a, amahin in te a la luah ve ang chu.. Dinfela erawh chuan a chelh tlat ang.. 

(Sei deuh in beisei tih ka hria. Ka tlin tawk hi khawngaihin min lo pawmsak hram mai teh u. Nitin rawn dah ka tum dawn tho aw… 😘😘