D' Rose. (3)

D' ROSE… (3)

Ziaktu: Toni Râlte

A thianpa dawra a thil pawimawh a va dah zo a let leh chu Teteii nau, Diteii ngei mai kha uniform ha chungin a hmu ta hlauh mai. Puia chuan zah pawh dawn lovin a va pan chawt a. A thianpa leh thiannu niawm tak te nen kawng chep zetah an lo inhnawh phei mek a. 

"Dite" a ti tâwng a! A lo melh vak ringawt. 

"Ka zin daih a, i lo dam maw? " Puia chuan zah theih loh chhuahin a ti nghal bawrh bawrh a. Diteii chuan a lo la hai bik lo va, tha tak chuan a chhang ve mai. Amah aiin Bena leh Tki te chuan mak an lo ti. 

"In haw dawn maw.. Ka va thlah ang che u. In veng lamah kalna tur ka nei tho a" puia chuan a ti a. 

"A ngai lo, kan lawm" Diteii chuan a ti sap a. Mahse, a nghak tlat si. Bena te chu mitmeiinna rawn a. An lo duh ve nge Puia motor lam pan chuan an phei ta a. 

Front seat-ah Bena ten an nawr luh tlat vangin bet lo zetin a thu a. Puia leh Bena chu an titi malh malh. Hmeichhe pahnih erawh an ngawi reng. Bena te in lamah kualin, Tki an drop hmasa ber a, chumi hnuah Bena. Diteii te in lam chu an pahnih chuan an pan dun ta a. 

"Ih maw.., Dite, ngaih loh lamah lo ngai lo la, in ina kan rawn kal zan atang khan ka ngaihtuah reng che. Ka sawi awmzia chu, i nalh sia, i lo intitlangval ang tih ka hlau a" Puia chuan a ti ta tawp a. A tawngkam chu a dengkhawng deuh tih a hai lo. Mahse, a thluaithlum thiam ngang bik lo a ni. 

Diteii chu a ngawi reng tawp. 

"I thinrim mi? " Puia'n a tih chuan, "Sawi tur ka hre ve hleinem" a lo ti sam èt a. 

"I thla hi ka la chak, i lar chak ngawt ang. I duh em? " Puia chuan a ti leh a. 

"Aih, ka thiam lo.. Bakah lar ka duh lo" a lo ti nghat. Diteii te kawt an thlen chuan, "Ka lo peng lo mai ang. Teteii chu ka la rawn hmuh tho a ngai, Music video kha aw.. Duh la ka ti sin le" Puia chuan a ti hnual raih a. 

"Min thlah a, ka lawm e aw.. " a lo ti daih. Hawi let tawh miah lo vin an in lam a pan ta nghal a. Puia chu a khi suk. He hmeichhia hi a ngaizawng hran lo, mahse, amahah hian mi hîp theihna riau a awm tlat, chu chu hman tangkai a duh a ni. Amah pawh a lar phah dawn a, a sumdawnna pawn a hlawk phah thei tih a hre ve kar. La hneh chu a tum ruh viau. 

Zanriah an ei hma deuhin mipa cher lam hian parcel lian vak lo a rawn dah a. A ngaihna an hre lo viau, mahse, Room atangin Teremi a rawn chhuak a. "Ka chah anih kha" tiin a mit a nuai chat chat a. Delivery boy hnenah chuan Rs. 3600 a pe a, parcel chu a hawng nghal. Pheikawk leh kekawr dum a lo ni a. Teteii chu a meng râng kher mai. Lawma pawh a lo haw tawh a. 

"Pawisa neih loh nak alaia thil lo chah ham ham chu" Teteii chuan a ti ta nge nge a. Teremi tawng ve hmain,  Lawma chuan, "Zomuanawm, nangtè hi i rilru a chhe tlat. A duh zawngte chu a chah ve ang chu. I thawh chhuaha a lei pawh a ni lo" a lo ti hmarh hmarh a. 

Teteii insum thei lo chuan, "A thawh chhuah a ni bik lo. Tih tak takah chuan ka pa Pension kha ka ta tur asin. Fanu pasal nei lo te ta tur a nia, pasal ka neih hunah Diteii tan kan dil leh ang, tikhan in kawl hmiah a. Tunah pawh kei pawh competitionah ka tel dawn a, engmah leina tur pawh ka neih loh laiin in lo hmang ham ham a" a ti ve ta bawrh bawrh a. Lawma chu a ding uaih a, a nau chu ben tumin a zak a kau tawh, Diteii'n a lo chelh hman a. 

"Au Lawm, insum teh. Teteii hian a sawi dik reng alawm. U Teremi pawh a hun rih lo ve alawm. Kei pawh kan project tur atana ka material mamawh leina pawh min pek theih loh laia khatiang lo chah kha" a ti ve ta hmiah a. Lawma pawh chuan a kut chu a la thla ve mai. 

Teremi chu lungngai hmel taka meng hnual raihin, "Ka thiam loh vek a ni. Ka awt ve lutuk a, ka chah ve tawp anih kha.. Kei hi buaina ka nih hi, awm lo ila in hlim zawk ang.. Ka chhuak mai ang" a ti a. Roomah a lut zui nghal,Lawma chuan rum zeta a naute melhin, "Kha a rilru in tihnat kha.. Ka la hlap vir ang che u" a ti tûn tûn a. A nupui thlem turin roomah a lut ve nghal. 

Zawi sapin, "Chhuak daih se ni mai lawm.. Ka hne lutuk" Teteii chuan a ti sap a. Ani ve lah taka. Diteii School kal tur pawh hi engmah an paitir tawh ngai lo. A hmaa a lo inkhawl ve tlem tlem kha a hmang ve mai mai a ni. Thla nawi lam a lo ni bawk nen. 

Chawhmeh leh eng ilo mamawh lei nan an hmang azeng a ni si lo va, tlai tin zu an in thei bawk si. Teteii te tan chuan rilru nat thlak ve tak tur a ni. An pahnih chuan chaw an ei a, an tawng lem lo. An ngaihtuahna an kawm ni hmiang. 

A tukah Teteii chu an class banah a nu te in lamah a kual a. A pahrawn a awm hram a beisei. Zah pawh a dawn zo tawh bik lo a ni. In chhung a va luh chuan a beisei ang ngeiin Pu Vanlala chu a lo awm a. Anu erawh in hnuai lam a lo singsa daih a. 

A pahrawn chuan a lo be bawrh bawrh a. Inthlahrun hmel fe hian, "Pa, ka inthlahrung viau naa, ka mamawh lutuk sia, chuvangin ka lo kal tawp a ni" tiin a mamawhna te chu thiam zetin a sawi a. Apa chu alo bu nghat nghat.. 

A nu pawh a lo chho tawh a. An bulah a lo thu ve reng. 

"A tha alawm.. Sang tak thlen tum tur aw. Thil tih ve tawha tawpsan hni hne hi a tha ngai lo ania.. " tiin Pu Vanlala chu a tho tuih tuih a. Roomah lutin safe ami pawisa chu a va lachhuak a. Teteii chu a pe ta a. Teteii hmel chu a èng phát phât mai. A hlim hle tih a hriat. Chutia pawisa an inpek buai lai tak chuan Dinfela a rawn haw a. 

"Bawiha, taka hei Teteii anih hi, i nau aw.. I nu fanu a nih hi. Unau in ni a, engkimah intawiawm tur, kan bulah an lo la cheng lo vang tih pawh a sawi theih loh " Pu Vanlala chuan a ti sur sur a. Dinfela chuan hmel danglam hauh lo vin, "Ka hre tawh alawm.. Bakah ani te chu a lar alawm.. " a lo ti ro halh a. 

Teteii chu a lo nui sen sen.. Anu chuan, "I nau pakhat zawk pawh i la hmu vat ang. Ani erawh a danglam deuh a.. " a lo ti ve a. Dinfela rilru erawh a dang daih. Eng mah sawi tawh lo vin a roomah a lut daih. Teteii pawh chu a chhuak zui ve ta nghal a. 

A pawisa chu fimkhur takin a almira-ah thawmhnaw karah a dah a. A suangtuahna a kal thui kher mai. Amah chuan a nui a nui mai. Dinfela hmel kha a mitthla a, hmel tha vur chu a ni lo, mahse, a pa hliah hliah. Lar te a lo ti ve a, a lo hmu fo tawh a ni ngei ang. A unaupa tur mah nise, a star ringawt. A inthiam chiah lo naa mi tih loh dan pawh a ni bik hleinem. Diteii a lo bang a, Eirawng a bawl nghal. Teremi te nupa erawh an mu nge eng nge an tih pawh an hre lem lo. 

"Tete, ka material leina tur hi ka duh ee.. I nei mial lo maw? U Teremi lah in a nei si lo" Diteii chuan a ti a. 

"Nei bik lo. Mami dil mai rawh" Teteii chuan a lo ti a. Diteii a ngui rawih. Mami tihbuai fo chu a hreh ve si. Anu te a dil ngam der si lo. Bena pawisa puksak mai chu a tum rilru ta a. 

Zanah Puia leh Davida te an lo leng hlawl mai. Lawma te nupa an chhuak bawk a. An free viau. Diteii erawh roomah a tawm leh tlat. Teteii nui har har chu a hre reng. Puia chuan Diteij chu lo chhuak ve se a ti hle, a sawi ngam chiah si lo. 

"Taka Pui, Nunui kha i hria em? Ih, hman deuha Reieka ka rawn hruai kha.. " Teteii chuan a ti a. Puia inngaihtuah lai chu a harh kâwk. 

"Hre deuh.. Ti nge? " a ti a. 

"A star che a. I number min dil a, ka pe ania. Modelling hi a tui ve tawp a, mahse, a thau tep a.. A hmel chu a tha tawp.. Ni ula " Teteii chuan a ti hawr hawr a. Puia a nui ve tawp. A eizawnna leh a hmel te avang hian tlangval luck lo tak a ni bik lo. Model nih chák si, lar hleithei lo te lah a lakah an inphalrai fö!  A studio saw a hmang tangkai zing viau. Mahse, ngaihzawng nghet a nei lem lo. Nei hlei lo nghei hlei lo in a awm a ni ber. 

"I ho e a. Hmuh pawh ka la hmuh chian loh chu" Puia chuan a ti ve mai. 

Teremi te an lo haw a. An kai lutuk lo naa a boruak ngam tawk vel an nih hmel. 

"Awii nang hi ka hria che.. Photographer kha i ni tiraw.. " Teremi chuan Puia kawk vá chungin a ti nghal bawrh bawrh a. Teteii a lo ner ru sak. 

"A hming chuan ni ve e" Puia chuan a lo ti ve mai a. 

Puai bula inhnawh sawt sawtin, "Awii enteh, ka thla hi min la laksak ve teh e.. Dah that tur.. I thiam sia.. " a ti chung chung a. Lawma erawh a inthiar daih. 

"Nia, kan la la ve dawn nia" puia pawh chuan a lo ti a. 

Teteii melhin, "Thingpui te i lumsak tawh em? Ka awm loh hi chuan engmah a nachang hi in hre thin lo va, ka va lum ange.  Tui deuhin.. Chutia mi lar inleng neihte chuan" Teremi chuan a ti leh zawt zawt. Teteii ngei tawk a tling leh kher mai. 

"I lum a ngai lo vang. Ka inleng te an nia, ka lum ve thei' a lo ti hmak. Lawma a lo chhuak ve mek bawk. 

Chokaah Thingpui lum turin a lut phei nghal. Teremi erawh Puia bulah a la thu reng a, an pa bulah chuan, "Puia hi thla la inlaktir ang aw.. A thiam sia, proffe tak a ni.. " a ti leh sar sar a. Puia tan pawh a lawmawm ve tho mai. 

"Mu ang" Lawma chuan a ti a. A thîk deuh nge mawni.. A hmel a rum riau. 

"Naaa.. A la hma.. Hei ka la kawm ve duh lawm. Lo va mu rawh" Teremi chuan a ti a. A ner náng bawk. 

"Mu ang ka tih chu' Lawma chuan pai deuh khut chung chuan a ti leh a. 

"A la hma ka tih chuuu, ka kawm ve duh alawm.. zawh tur pawh ka la nei" Teremi chuan zam map lo vin a lo ti leh. Lawma thinin a diar ta lo nge, phih thawh lawp pahin, "Nu i ni tawh tih hre rawh. I inleng pawh an ni lo. " a ti hrâwk a. Teremi lah lo kainam ve si, chutia a star ruk leh a lo ralkhat ngaihsan hmaa hnehsawh zeta a pasalin a han bawl kual chu a ngaithei thak lo. 

"Lawmzual, min thlah rawh. I thu thua awm tur ka ni lo" a ti ram hmak a. A aw ki pawh a sang angreng 

Lawma lah chuan nghet zeta chelhin rooma luhpui a tum a, Teteii pawh a rawn phei ve nghal. Puia chuan nuam lo a ti nasa mai. Teremi chuan Lawma chelh lohna lam a kut chuan Lawma bekah chuan a beng ta sawk a. Lawma pawh a ding chawt. 

"Khanglang che chuan le.. Tiang hian min ti reng reng suh. Khuta kan zuk kalnaah pawh kha nuthlawi bulah khan i tâp hruih hruih a. Eng ka sawi lo.. Tiang hian mi ti reng reng suh" a ti nghal tâwn tâwn a. Thinrimna a lo pai ru sa a nih hmel. Lawma lah chutia a mipatpui te hmaa a nupuiin a beng chu a ngaithiam awzawng lo. Rui lo hai lo chu nise a dawh ve mai mahna. 

"Zawngi, i leplerh vang anih kha. Rawn kal rawh" tiin a hma aia na zawkin a phih dawrh a. Room kawngka a hawng zui nghal. Teremi chu a rak in a rak a ni ber. A sarak ta chiam mai. Diteii lehkha zir pawh awm hle hle thei lo vin a lo tlan chhuak a, Puia te lah chuan nuam lo an tiin haw mai tur emaw ni an ti tawh. 

"A zahthlak thei e.. Eng nge in hriat" Diteii chuan a ti a. Teteii pawn a lo ti ve. An buaina kha a ho lulai em a ni. Mahse, zu han kam nam hi chuan buaina te hi kan cho ur ur thin reng a. Puia a lo ding chhuak ta a, "Lawma, duh tawk ru. In pawisawi kan tum lo ania. Tha tetein awm teh u" a ti ve a. Lawma chuan Teremi sama keh pahin, "Hei chu ka buaina tur a ni e.. Lo inrawlh suh u" a ti hmak a. A hnuk lut ta. Kawngka a kalh hmak a, Teremi thawm pawh a reh ta deuh. Diteii pawh a rooma let leh tumin a inher a, "Dite, lo thu ve rih la.. Thil sawipui che ka duh" Puia chuan a lo ti vat a. 

"Lehkha ka zir" ti hmakin a lut daih. Puia a hrilhhai hle. Teteii chuan thingpui pek pahin, "Diteii hi i star chiang" a ti ta a. Puia a lo nui hawk. "I ti ang lo em mai. Ka model atan ka duh ringawt alawm" a lo ti var. 

Davida chuan, "Mawina.. Eng emaw tak chu a awm aniang, a vei em mai. A sawi ziah' a lo ti ve a. An nui dar dar naa Teteii hmel erawh a ngui deuh. A nau chu a thik nge pawh hriat va ni suh. Boruak han nei hluai mah se, an inkawm pangngai zui leh thei mai.. Thingpui an in zawh atanga rei vak lo ah an haw ve ta a. 

Teteii chu Diteii roomah lutin, "Khatin mi an chhang hmuk ngai lo. Tunah phei chuan mark tih that a ngai ania.. Puia hi be tha rawh" a ti a. 

"A ho em mai" Diteii chuan a lo ti puat a. 

"Mawl viau zel suh. Miin an pák nasat nen.. Nangmah vanga min puih duh loh vaih chuan aw" Teteii chuan lungawi loh hmel zet hian a ti a. 

"Okay, ka lo be tha dawn nia' a lo ti leh a. 

"Mahse, mi lerh lutuk ania.. I lo ngaizawng ange aw.. A zei sia.. Tunah hian ka thiannu ka tihpui mek a" Teteii chuan mawlmang zetin a lo ti a. Diteii a khi thaw.. "Ka duh pît pèt lo.. A hmel a tuai si" a ti a. 

Teteii pawh a nui ve tawp. Mahse, tibuaitu erawh a nei deuh. Diteii hi a pa vak tawh lo nge puia kha a duhzawng a nih loh thu a sawi tlat nia!  Nidang chu nise, "Ngatan nge mipa chu.. I mawl mi? " a ti leh hrep awm sia. Tlem chuan a dang deuh. 

Dinfela chuan a phone-a thlalak chu a crop kual chiam a, vawiina lo kal, a hma pawha a lo hmuh tawh a nu fanu Teteii thlalak a thlir mek a ni. Hmel tha a tih vang ni lo in eng ang mi nge a nih hriat a duh mai chauh a ni. A hmain a thlalak chu IG-ah a lo hmu thuak tawh a. An lo infollow ve reng a lo nia,a lo ngaihven lo a ni. Apain pawisa a pe lai kha a hmu a, eng atan nge a pek tih chu a chhut buai peih lo. A tan a tangkai ve chuang lo. Mahse, engtikah emaw an bulah an la khawsa ve mai thei tia a pa sawi erawh kha chuan a kap deuh. A nuhrawn pawh engtia tih thu loh, a nuhrawn fate lehzel an chhawmdawl chuan, zalen lo riauin a inhre thar leh ngei ang. Ni e, a nuhrawn chi leh kuangte lakah rilru tha a pu lo tih a hria, pawi tihna a nei lo. A pa ngei pawh hi chhuahsana amaha khawvel hmachhawn a duh kha a nia. 

Call a lo kal, a ner náng a, Lo call tu chu tudang ni loin, Zonuni a lo ni. He nu hian a star mai a ni satliah lo, a atchilh thin. Hman atangin. A thianpa Mike ngei pawn "Nihpui ve mai rawh. A khawngaihthlak" a tih hial khawp kha a ni ve a. Nihpui tuma ngaihtuahna a sen apiangin a hnual thin. A tui lo a a phur hlawl lo. Zonuni chu nula pangngai ve tak, hmel pawh chhe em em lo a ni ve a. An khawsak a harsa lo va, thian pawh a ngah. A ek chhe lar ve zèk lehnghal, engvanga lar ve viau nge anih tih chu Dinfela chuan a hrethiam vak lo. A neih sum leh pai hmangin a invawrh lar zawk nge ni. Amah aia hmel tha pawh a hmu ve reng, Mahse, Zonuni hian a tibuai zel. Bialnu ve deuh reuh neih tuma chet a han lak pawn Zonuni hian engtin tin emaw chung a hmeichhe kawp te chu lo hriain a thiante nen an lo bawlzan chiam thin. Chutiang khawpa hmeichhe nasa chu tuman an khing let ngam ngai si lo va.. 

"Aw.. " a ti chhum hmuk a. 

"I mu tawh em? " a rawn ti hawm hawm a. 

'Mu tawh" a ti leh hmuk. 

"Hmuk hmuk a, i thinrim mi? " zahna hi a va tlachham tak. 

"Rim lo, ka mood a chhia" a lo ti leh a. That chhuaha hawihhawm pawh hi tul a ti vak thin lo. 

"Van pawi.. I ngaihawm em a. Ka lo bia che, naktuk dawr ah mi i kal leh ang" 

"Um. Ni e"

"Ka lo peng ang, eitur tui deuh ka lo leisak ang che.. Umm anih muttui.. Muah muah" 

Dinfela chuan a off daih!  A mood chu a chhe tak tak. Mihring hian hne leh kham hi kan nei lo thei bik lo a ni. 

Diteii chu a insiam mawlh mawlh a. Uniform hi a inhmeh phian, bakah pawl 10 a pass ve hnu atang hian a mize pa lutuk leh a hmel thlenga nu zèm ngai lo kha a bo ve telh telh mai. A sam erawh a la sei ta chuang lo. A kal dan te pawh sim ngawt theih ni nghal lo chuan. 

Teremi lo thu hnûr bulah chuan dingin, "Material leina tur chu min lo pe tawh la, U Terem" a ti a. 

Ani a mit hnuailam duk chur chu a lo chul heuh heuh a, an pa in a khawih sil ve deuh bawk a ni. Zingah erawh an inngeih leh viau lawi a. 

"Ka nei lo, i u Lawma dil rawh' a lo ti hmuk. A rin sa kha a ni tho bawk a. Lawma chu dil a sawt dawn chuang lo tih a chiang. Hmm.. Bena pawisa chu a puk mai a ngai dawn anih hi. A chhuak a, Teteii'n a kalsan tawh vangin kein a kal leh tâuh tâuh a. Anu te in a kal pelh dawn lai tak chuan, hmannia amah sutu kha Anu te in kawtah chuan a rawn lang hlawl. Mahse, ngaihven chuang lo in a kal zel a. 

"Hawh, lo chuang ve rawh. In school ka kal tlang dawn alawm" a lo ti a. 

"Aih" a ti tawi tâk. 

"I va titau rei reuh e. Ka sut tawh lo che hi.. Kha i hah anih kha. I thlante a tla ania.. Lo kal rawh" tiin muangchang hian a tawlh del del a. 

"A va mak tak. Ka duh lo" a lo ti pawr leh hlar. Dinfela hian he nau hi a lawm tlat!  A pa reuh si, a hmel tha tho bawk si. A thinchhe reuh em em zui. 

"Ka thuphachawi nan pawh.. " a ti leh a. A aw chu a ngenngawl riau. Diteii pawh chu a hah ve tho nen, khua a tha si, ni a sa lek lek tawh nen. A thu lut ta nge nge a. 

"Tu nge i hming? " Dinfela chuan a ti a. 

"Ngatan" a lo ti hluk. A nui chhuak hawk, "Aw.. Koh ve duh che pawn i hming ka hre si lo va.. Kei chu Dinfela ka nia.. " a ti a. 

"Diteii" a ti zawi sap. 

"A va nu si ve i aw chu" tawngsual a inti leh hnuhnawh. A rawn melh rum ngang bawk si nen. 

"Hmeichhia ka nia.. A nu lohin.. I mawl a mi? " tehzèk a. Mahse, Dinfela chuan a ngai haw hlek lo. An school an thleng a, "Tah chuan ding suh. Kal leh hlek la, mi hmuh lohin ka chhuk ang" Diteii chuan a ti a. 

"Ngati maw.. I zak ni maw? " 

"Aw.. A zahthlak.. Miin min nuih ang" 

"Aw le.. Tha lawm"

An school piah deuha wholesale dawr bulah chuan a ding ta a. A chhuk dawn chuan, "Ka lawm e aw" a tih ve sap kha. Dinfela chuan a number a lo dil lo chu pawi a ti kher mai.  A lo hamhaih deuh bawk a ni. Diteii pawh chuan Dinfela chu mak a ti deuh, an inhmu fuh thei riau lehnghal. A la upa lutuk lo vang tih a hrethiam. Mahse, a chet dan vel kha a inla patling vel sia, a ngei. A hmel pawh kha tha a ti mai mai lo. 

"Ben, ka u ten pawisa an nei rih si lo va, min puktir tur i nei mial em? " Bena chu a bekbawr nghal. 

"Nei maithei. Mahse, vawiinah chuan ka lo keng lo, naktukah aw' a lo ti thliam a. Diteii thin tawt zual pui pawh a reh hawk e. Nilenga lehkhazir chu hneawm tih chang nei mah se, ina awma a u te zurui thawm hriat reng ai chuan nuam a ti zawk. A nun dan danglam tial tial chu a phak tawkin a chhut ve fö. A la naupang deuh bawk a, engkim a la chhut thiam lo mai pawh a. A dinhmun chu a la derthawng hle dawn tih erawh a hrethiam pha ve. U Teremi leh Lawma an inneih chhung chuan rual a pawl phak ve thei dawn lo niin a hria, pawisa an heh si a. Zu hi a hua, ti nge a U Lawma hian a in kher kher ni. 

Tlai banah Bena te an len kawi vangin amahin a haw leh hnak hnak. Mahnia kal hi hrehawm a ti lem lo, a ti thang tawh bawk a. 

Horn a ri tuar.. A petek dâwrh. Taxi driver hian, 'Kawng en ta che.. Mawl hi he lutuk" a rawn ti tuar a. Ani erawh a ding khawng reng ringawt. A piah lawk atang chuan Puia a rawn kal phei a, "Ka lo nghak che a. Hawh ka thlah ang che" a ti a. Diteii a hawi â ho. Puia chuan a rawn kai ta mai si, a hamhaih atalangin a lo thingthla lem lo. 

"Min veh reng suh" Motora a thut luh hnu chuan a ti hlar a. Puia chuan nui sang chungin, "I thla vawikhat chiah min laktir a, pawisa ka pe ang che" a ti a. Diteii chu a thu ngil awt. Pawisa kha a mamawh viau tak asin mawle. Bena ta puk dawn mah se, a rulhna tur a nei leh vat ang em?  A inngaihtuah buai angreng. Mahse, chutia pawisa uma thla lak kual chi a duh loh ber te zing ami a ni bawk si. A ngaihtuahna hrethiam niawm tak hian, "Mi te chuan an thla laksak turin min ngen a, pawjsa min pe thin. " Puia chuan alo ti khauh. 

"Engtia lak nge i duh.. Ka thla chu" a ti ve ta a. 

"Ti tawp khan. I ngaihdan anga sexy leh mawng leh mal lang huai kha a ni lo' a ti ta duah a. Diteii pawh a nui ve tawp. 

"Anih engzat nge mib pek ang? " a ti ta a. Diteii mitmenga inthlahrunna awm chu Puia chuan a hrethiam ve tlat. An chhungkaw boruak kha a hre nel nual si a, pawisa lamah a pháng ve riau anih a ring. 

"Contract sign ila.. Thla bi angin inpe ila, mahse, chu erawh chu ka duh dana i awm ve a ngai dawn a. Thawmhnaw lam pawh.. Tin, video-a i lan te pawh a ngai ang, mahse, i hlawh chu a chhe lo vang tih ring tawp rawh" a ti ta a. 

Diteii a thaw hawk. Hmalam a bih ngar a. Mi in an nuihzat a hlau, tin, a thiam ve dawn em ni? A mizia leh a nundan a hai bik si lo. 

"Mami pawh rawn ve ka duh a, zaninah ka lo inngaihtuah ang aw.. Mahse, ka zawh duh che chu ti nge kei kher? " a ti ta sap a. 

Puia chuan awlsam fe hian, "I hmel that bakah hmeichheho duhzawng i nia. Ka sawi awmzia chu an dream girl i ni tihna, an ngaizawng che ni lovin. Tin, mipa lamin hriatchian che an chak phah dawn bawk" a lo ti zung zung a. A dik nge dik lo pawh Diteii chuan a hre lo. 

"Mahse, bialpa tih vel anga mipa nena lak dun ka duh lo. Tin, hmeichhia nen inngaizawng tue anga miin min suangtuah ka duh hek lo. Keimah nih tawp ka duh" fiah zet hian a ti ta a. Puia pawh a lo bu nghat. A hlim ru kher mai. 

An in an thleng a, Puia erawh a let leh nghal. Diteii'n kawngka a hawng chiah chu Teteii thinrim hmel a hmachhawn nghal. Thutthlengseiah a u te nupa an lo thu khar bawk. 

"Zodingpui, engvangin nge ka pawisa kha i lo ruk.. Mawh.. I material lei nan tiraw i ruk? Khawi min pe leh vat rawh" a lo ti nghal bawrh bawrh mai. A biang a ling hlar a, a mitmeng pawh a sen rám mai. A tap pawh a ni maithei. 

Diteii hrilhhai lutuk chu a ding khawng reng ringawt. A ngaihna a hrethiam hlawl lo. Teteii chu a melh reng ringawt. 

"Ru lo angin min melh suh. Nang bak i ni thei lo, he mi te nupa an nih loh chuan" a lo ti vin leh thak. Teteii thinrim hi chu a kawlh bakah pawisak engmah a nei ngai lo. 

"Ka ru miah lo. Pawisa i nei tih pawh ka hre lo" zawi zet hian a lo ti a. 

"Daw lo mai teh" tih pahin a bag pawhthlaksak a rual nghal. Chhuatah a lehkhabu chu a bun ruih a, a dap ngial pawn a hmu si lo. 

"Tete, ruk ka ru ngai lo tih i hria. Bakah pawisa i nei tih ka hre miah lo tak tak.. A van mak em em, tu nge la ang le? " Diteii chuan a hma aia huai deuh hlek hian a ti a. 

Teteii thinrim chu a sen vek tawh a ni ber. A mangang tel bawk. A pahrawn pawisa pek zozai kha a zahve dawn a bo tlat si. Lawma te nupa lah tan taktein an tang a, Teremi phei chu a tap vel. Tunah Diteii lahin a ruk loh thu bak sawi tur a hre si lo. A rilru chhungril takah chuan Diteii hi a ringhlel lem lo. Pawisa a nei tih a hriat loh bakah a ruksak lo vang. Teremi annih a ring si, fiahna a nei si lo lai tak chuan a thin a tirim hluah hluah mai. 

"U Terem, nangmah i ni lo tih ka chiang.. Ka lo haw lai khan inah i lo awm a, nangmah bakin ka dahna pawh i hre thei lo.. Khawi min pe rawh. Ka tan a pawimawh asin' tap lek lek hian a ti leh a. Khawngaihthla a la takzet. 

Teremi chuan tap tuau chunga a pasal melh pahin, "Awii a zahthlak e.. A ngaihna ka hre si lo. Ka ru lo asin. Ruk ka ru ngai lo" pangchang theihtawp hian a ti a. Lawma thin a thawk leh ta. Teteii chhip samah a tham lawk a, chhuatah chuan a theh thlu ta a. A inring lo lai a lo ni chhap nen, a thal chiang hle. Diteii a rawn lawr nghal vat. Lawma a chelh, Teremi erawh a thu ngawi reng thung. 

"Chhuak rawh. Zomuanawm, i hmel ka hmu peih tawh lo. Per pur che hian, nanga inlak model tumna pawisa kha kan mamawh lo ve. I u nupui hi rukruah i puh ngam a maw? Zak thei lo lutuk. Khang pawisa pawh kha i c*** man bak a ni lawng e.. Tenawm lutuk. Chhuak rawh" Lawma chuan sehchilh deuh hian a ti nawk nawk a. Teteii chu a tho nghat a, ngawi rengin a roomah a lut. Diteii'n a umzui nghla. Teteii chuan a thawmhnaw chu a dah tau sawk sawk a, a mittui a hru zauh zauh bawk. A bulah Diteii chu a lo ding ngawi reng. Sawi tur a haihchham tlat. 

Nakin deuhah chuan, "I chhuak tak tak danw mi? " a ti ta hram a. 

"Chhuak vang vang dawn. He in chhungah hian ka awm peih tawh lo.. Ka nu te bulah ka nuamsa zawk" a lo ti hmarh hmarh a. A chak thin, a sawi fo kha a ni bawk a. Diteii chuan dang mah se a sawt dawn lo tih a hria. Ngawi rengin a en tawp. 

A bungrua nen kawngka a kan dawn chuan, "Ka pa pension hlawh kha ka chanpual ania, ka kutah a lut tawh ang. In duh duh danin ei in zawng tawh mai dawn nia" a ti nghat a. An chhan hmain a chhuak nghal. Thil chu a thleng zut zut mai si a. Diteii chu a hamhaih vek. Lawma te nupa a ngei em em bawk. Teteii hian mil viau lo mah se,Diteii hian  a lakah rilru chhe tak a pu ve ngai lo. Tunah chuan a mal lehzual ta hle mai. Anu te ina awm ve lah a duh bau si lo. A u te nupa hian an la hnawhchhuah duh ve mai a ring. Khaw nge a kal tak ang le? A lung a chhe ve tlat. Tah hi a duh loh ber zing a mi a niawm e. Mahse, chumi zan chuan chaw pawh ei lo vin a tap muhil daih. Puia nen an thil sawi dun pawh a ngaihtuah leh miah lo. 

An nula in, "Pi.. Teteii a lo kal" a rawn tih chuan, chuti ang zana a fanu lo kal chu mak a ti deuh a. Hmanhmawh deuhin a va chhuak a. Teteii chu suitcase nen a lo thu ran mai. A tap faih faih bawk. Nunui te unau in chaw an ei chhuak a, Pu Vanlala lah Tukinah Culcutta-ah a zin daih. 

"Tete" a ti sap a. Teteii chu a lo hawi chhuak, a nu a hmuh rual chuan a baw hawk. A tap ta hlawp hlawp a. Anu chuan duat deuhin a lo pawm a. An nula lah chuan mak ti deuhin a lo en ve reng. 

"Eng nge thleng a.. In unau in intithiam lo em ni? " anu chuan a ti a. 

Tlema a tah ban hnu chuan, "Ka pa pawisa min pek zahve dawn kha min ruksak a. U Teremi anih ka ring ber. Chuvang kual vel chuan  Au Lawma'n kut min thlak bakah min hnawtchhuak a" a ti a, a inhnip hlap hlap bawk. 

Anu chu a chek tlak tlak a, "Lawma mai mai chu aw.. Ti nge hetia a awm tlat ni.. Aw a pawi loh chu.. Heta lo awm turin ka sawm ziah che u alawm.. Diteii khaw nge? " a ti zung zung a. 

"A lo kal ve duh lo.. " Teteii chuan a ti a. Anuin Diteii a ngaihtuah viau chu a la na tlat bawk. 

"Amahin a awm dawn chu ania. A va ngaihtuahawm ve aw. Naktukah rawn hruai tum rawh. A zja lo em mai. Hawh, i roomah va indahfel rawh. I pa pawh a lawm ngawt ang, nunui pawh" a nu chuan a ti leh a. Teteii pawh chu a tho va, Nunui room dawt chiaha room ruak ti mai ang, mikhual an ngah zual changa an luahtir thinah chuan a lut ta a. 

Diteii a kalsan kha pawi tihna a nei hran lo. Sawm pawh a sawm ve duh lo reng anih kha. A chhan chu a nau hian ngainat a hlawh thei riau a, anu lahin a ngaihtuah thei si. Heta a awm ve zel chuan amah aia an ngaihsak a hlau a ni ber. A chanvo hi a chhuhsak tir thei lo. Tunah chuan a lo suangtuah thin chu a thleng dawn taah a ngai. Khumah chuan a mu zangthal a, chunglam melh vang vangin, a rilruin, "Model hlawhtling tak i ni dawn ta" a inti sap a. 

Diteii chu mit bui lâkin a tho chhuak a, Teremi a la tho si lo, eirawng a bawl nghal a. A thawh tlai deuh vangin chaw pawh ei loh mai a tum. A insiam sawk sawk a. Puia a hrechhuak thut. Bena a call nghal a, "Ben, pawisa kha a ngai leh lo aw.. Ka nei leh si a" a ti a. Mami a call leh, thil awmdan chu a sawi a. Teteii chhuah thu te, mami chuan pawi a rawn ti viau. Chuan, Puia nen an inbiakna te chu a hrilh zui ta a. 

"Ka naute, i duhthlanna ang ang kha a ni mai. Tunah phei chuan dinhmun harsa takah i ding mek si a, kei lah nau ka nei tep tawh a, ka chhuakvak thei tawh si lo. Tha i tih ang ang khan ti tawp rawh. Nangmah i inngaihtuah a ngai" a rawn ti a. Diteii rilru pawh a nuam sawt mai. 

A school kal dawn ruaiah Teremi chu phak chuapin a lo tho ve. Biak pawh be lem loin a chhuhsan zui nghal. Puia no a nei miah si lo va, a rawn hmu leh mai ang chu maw.. Amah tein a kal leh hnak hnak a. A nute in peng a thleng a, chawl chuang lo vin a a va hawi phei, Teteii scooty pawh a va hmu nghal. 

"A mak, kan intawng thei e.. Hawh le" Anu te in a kal pel chiah tihin a rawn lang leh tawh. A mak a ti amah pawn. Eng sawi set set loin a lut ve leh hmiah. Dinfela zawk a lo hrilhhai. 

"Nizanah i tap chiang" Dinfela'n a tih chuan, a phu zawk.. a hriat viau mawni le. 

" Ka mu tui mah mah" a lo ti sap a. Dinfela a nui sak. 

"I mit kha a bui a" 

"Duh leh" a lo ti hlak. 

An in be tam lo, vawiin chu. School pelhah bawk a chhuk leh. Mahse, class Xii ami hmeichhe rual khat Akimi ten an rawn hmu hman tlat. Dinfela tlan liam hnu chuan a bulah an rawn din liai a, "I sas a ni chiang.. " an rawn ti teh ngawt. 

A nui hak a, "A teuh loh dan chu a rapthlak" a lo ti hmiah. 

"A number i nei mial lo maw.. Kan star teh mai nia.. " Akimi chuan a ti a.. Tunlai thangtharho hi chuan pawisak an nei vak lo. 

"Nei miah lo. Ka neih veleh ka pe dawn che nia" a ti a. An senior te an nj ve sia, zah lo deuha biak kha a hreh ve deuh. Dinfela an lo star em em chu mak a ti. A chhiat kher khawr nen, inla pa ropui si.. A ngaihtuahna avang chuan a kalna a lo en kim lo nge a inchhuih khut khut.. A hmaa hmeichhe pahnih kal dun a samsei zawk hnungah chuan a va bet deuh thlawp. Chu nu rawn hawi let leh a ni hamhaih buai chu an hmai a insi deuhthaw.. An lo E dual mai. 

Rang zetin a in la hrang vat.. Chu nu lah chuan a melh reng bawk si. "Ka tihpalh aw.. Ka inchhui palh a" a ti niah niah a. 

"Mawina.. Chutiang a nih ka ring lo, Hriati saw i star chiang.. Eh.. In inkiss kha" An section-a mipa nghal zet Samuela chuan a rawn ti lung lung a. An en thup. Hriati pawh a zah hmel viau. Diteij cu a ner sak a, "I daw zep zuap.. " tih pahin an roomah a lut nghal daih. 

Mahse, Kha thil thleng accident takmeuh avang khan amah a lo pa sa nen, patilah anga entu an pung ta sawt mai. Huiham, hmeichhe nih ve tum nak a laiin aw… 

(Tawk aw.. Ka dar a kham lutuk..