D Rose (2)

D' ROSE… (2)

Ziaktu : Toni Râlte

Diteii te pawh an han exam chho ve ta a. Study camp an neihpui a ni bawk a, thiam loh vak a nei bik lo. Mathematics hi a nin ber a ni thin, mahse, passna khawp chu chhang vein a inhria. A chau khawp bawk mai. Tibuaitu thil dang em em a nei lo bawk a, tluang takin exam chu a zo ve thei ta. Zawh niah Bena nen Tki te inah an leng a. Noodles te chhumin an hlim dar dar viau. Pawl sawm an pass chuan, Higher chu school khata kal ngei an tum ruh hle. Bena leh Tki hi chu an luhna a inang sa. Tichuan, khaw thim dawn lek lekah Bena nen an haw ve ta a. 

In chhung a va lut chu a phâwk kher mai. Lawma leh Mami an lo inhau nasa mai a. Lawma chuan an tv chu chhut chhiat tum niawm takin chartin bung hian a tin run a, an thenawm pa Pu Nghaka'n a lo dang mek a ni. Teteii erawh a awm lo. A la haw lo a ni maithei. 

"Hei hi hre rawh, he in hi ka in a ni. Mipa awmchhun ka nia, ka ta a ni. Ka hralh vaih chuan in vakvai a ni mai. Chuvang chuan ka sawi ang hi chu ti mai rawh u" Lawma chuan a ti pawr huar a. A rui hle tih a tawng sehchilh danah a hriat bawk. 

Mami chu a lungchhiat hmel takzet. A khur deuh bawk. "Lawma, hetiang mi i nih hi ka lo rinh ngai lo asin. Ka pa thihna pawh a la rei lo va, tiang hian i awm nghal a maw? A va rapthlak tak em" a ti khur dat dat a. Pu Nghaka pawh chuan, "Ka sawi tur chu a awm lo naa, Lawmte, i unau te hi hmeichhia vek an nia, a mipa ber hetia i awm chuan a dik lo, tha tetein awm rawh u.. Puitling takin awm rawh khai' a lo ti ve dap dap a. 

"Pawisa tam pawh ka dil lo va, min pe ve mai ang hmiang.. Eng nge a uikual vel ni" a ti leh tûn tûn a. Mami chuan pawisa phawrhin cheng 500 hi a lek va a, "kha la rawh. I duh duh chu va ti rawh.. " a ti sawk sawk a. Lawma chuan a la ve mai a, rum zeta Mami leh Diteii melh chung chuan, "Min zah hle rawh u.. Mai mai che u hian" a ti hluk hluk a. A chhuak zui nghal. Pu Nghaka chhuah hnu chuan, "Mami, Au Lawma kha a rui sual ve aniang.  Tiang khan a awm ngai miah si lo va" Diteii chuan a ti sap a. Mami chu a lainat ve lehchhawng. 

Mami pawh chuan, "Ni e, a rui sual ve deuh bawk anih kha.. a rui a reh anga, a tha ve leh mai ang. Eng nge vawiin chu i chhang tha em? " a ti a. Hlim hmel put luih a tum hram hram. 

"Umm.. Tha ve thawkhat.. Ka huphurh loh ber kha a ni ve bawk a.. Ka pass ka ring" a lo ti a. Inbual turin bathroomah a lut nghal. Teteii pawh a lo haw ve a, Mami chuan Lawma nen an intihbuai dan te chu a lo hrilh ve a. "Ka ring reng a ni. A bialnu sawn a fuihpawrh chiang lutuk, hmelchhe rapthlak sia.. Kei chu ka nu te bula awm daih ania ka duh" a ti tân tân a. 

"Ni lo e, ka nu te chu tihbuai loh hram a tha. Pathian zarah eng em kan ti lo vang" Mami chuan puitling takin a lo ti dam dap a. Zanriah pawh an pathumte chuan an kil a, an tawng vak lem lo. 

Zanriah ei khamah Teteii chu hla zir turin a chhuak a, Diteii erawh a roomah a tawm. Games te a khel vel mai mai. Lehkha zir tur awm ta lo chu a khua te a har lek lek mai. Sangtea a lo leng leh a. Mami nen an titi leh siam siam mai. Nupa ang deuh an ni tawh a, inzah tit tet ang kha a awm tawh lem lo bawk. 

"Palai chu ka rawn tir ang aw" Sangtea chuan thupui fun zetin a ti sup a. Mami a lo thaw hawk. 

"A ngaih hmel.. Vawiinah test kit ka lei a, naktuk zingah ka test ang ka tia.. A positive chuan a rang lama inhruai pawh a pawi lo. Dan khatna kan tlin tawh chuang lo' a lo ti a. Sangtea pawh a bu nghut. Ni e, Mami dinhmun hi a khirh takzet. Khatia Diteii study camp neih lai, Teteii te lah Khawchhak fanga an zin daih lai khan an free dun si a. Lawma lah inah a awm khât si. Mami rilru hah leh chawl lo lahin Sangtea a thlahlel tawlh tawlh si a, an beisei phak miah loin inngaihna sualah an tlu lut dun hlauh mai a!  Vawi khatin vawihnih a hring tih ang deuhin vawi li lai an mut dun hnuah Mami hian chintawk hriat tha a ti a. An hmang zui leh ta lo. Mahse, a thla bi hlawh lak hunah a la ta tlat lo mai a. Ngaihbel theih tur thil an tih miau vangin ngaih han tihthatna chi ni hek lo. A in test poh aniang chu.. 

Lengpui Airport-ah chuan an vei nuk nuk a, bungraw pawm bawr fe fe lah an tam. Mipa kum 24 bawr vel tur hi a rawn kal phei ve chhat chhat a. A luggage chu a hnungah mutia pakhatin a rawn nawr phei mek a. Amah nghaktu Bolero var lam chu panin, a hmel chu a nelawm tehchiam lo. Mipa sang tak tia sawi theih ni lo mah se; a vantlang tawk vela sang chu a ni hrim hrim a. A thau lo va, a sa erawh a inphutmawi tawk ve tho mai. A chal chu a arh phak a, a vun pawh a thim lem lo, ngo hlung erawh a ni lo. A khabe hmul chu tlem te tak tak a awm ve siar a. Hmul ngah chi a ni lem lo anih hmel. A sam a dum hlap a, a kir lek lek. A mitmeng a dum a, a lian lutuk lo naa a melh a nat hmel zèk.. 

Pu Vanlala chuan motor chhunga lo lut a fapa chu melh zauh pahin, "A pawi teh zawng a nih hi" a lo ti nghut a. A fapa erawh a ngawi reng. An in lam panin an tlan ta nghal a. An tawng zui tawh lem lo. Biak chakawm loh takin head phone a vuah hmak si a. In an thleng a, a bungrua te chu an awmpui ten an rawn hlang a, ani erawh in chhungah lutin a room lamah a lut tlang nghal. Tumah a be lo va, lo awm ve te pawh chuan biak buai an tum rih lem lo a nih hmel. 

Zanriah an ei dawnah a rawn chhuak ve chiah. Chaw eia an han thut bial takah chuan, apa chuan, "Engtin chiah maw in intihbuai a? " tiin a fapa chu a zawt ta a. 

A chaw thleng melh run chung chuan, "A thleng ve tawp. An ngam a, kan ngam ve bawk a. Kan insual" a ti bung nghut. 

A farnu chuan, "Facebookah an sawi ania aw.. A zahthlak e, i hming pawh an sawi" a lo ti a. A lo chek hluk ringawt. Anu erawh chuan, "Aa.. Hetah awm se a tha zawk. Kan hmuh phaka an awm hian ngaih a tha alawm" a lo ti a. Dinfela chu a ner sawk. Mahse, tuman an hmu lem lo. 

"Engtia awm nge i tum? M. A te hi zir leh mai ta che.. Helamah.. Admission lak a la hla tho a" apa chuan a ti a. 

Thawh pahin, "Computer zirna ka hawng dawn.. Bul min tanpui la, a tawk mai. Lehkha ka zir peih tawh lo' a ti ve ta a. A aw pawh tlem chuan a nem ve ta deuh. Apa pawh chuan a fapa luhlulzia a hriat tawh vangin a nawr lui duh lem lo. 

A roomah a tawm leh char char. Ni e, Software Engineer zirin phai ramah a zuk awm reng thin a. Kumin hi a zawhna tur a ni nghe nghe. Mahse, new comer vai ho nen an inngeih ta lo va. Neuh neuh a awm ta zeuh zeuh. Northeast lam chu an tangrual viau. An tam lo zawk naa.. Tichuan, kar kalta nilaini khan inpheksualna a thleng ti mai ang, an boruak inmûng reng tawh kha a puakkeh a. Dinfela pawh vai ngaina lem lo tak a lo ni sa nen, a intatlut chiang ve kher mai. Ani phei chu insual thang a lo ni bawk a, a khawih sil viau a niawm e. An hnawhchhuah zingah a tel ve ta hial nghe nghe a. Certificate nei hman lo chiah chiahin a rawn hawn a ngai ta a ni. Pawi a ti hran lo, a thiam tur ang a thiam vek tawh tho, a tuina lam a ni a, a inzir ve thei tawh mai ang chu.. Chubakah a hne ve tawh renh reng a. Mizorama awma hna chhete neih kha a duh tawh zawk. Mahse, an ina chen kumkhua erawh a tum lo bur. A theih hram chuan an ina awm ve loh a thlang, tunah chuan tihtheih a la nei miau si lo va; Hlawh te a neiha a maha bul a tan ve theih hunah apa in hi chhuahsana  in luah hran a tum rilru a ni. A chhan chu he in hi a ngaina thin, anu dam lai kha chuan. Ni e, anu khan duat chikimin a duat a, a farnu pawn a thik hial thin. Mahse, class X a exam zawh niah tak a nu chu heart attack vangin a boral kha a nia! A rilru natzia leh hrilhhai zia kha aw.. Mipa a ni naa, a nu ruang bawha tah hawm hawm kha tlawmna leh chak lohnaah a ngai lo. A nu thih sarhu lai chuan mi â ang maiin a tawm tlawk tlawk a. Apa pawh a mangang hial a ni. 

Tichuan, intiharhin a tuina lam. Kawng zawh turin vai ramah a liam thla ta a. Anu chu englaimahin a theihnghilh ngai lo. Anu lung èm pawh an phun hmain apa chuan ngaihzawng a nei tih a hre ta a. A lungawi lo kher mai. Mabse, Mizoramah a awm si lo va. Apa chuan a nu lung chu inrawnna pawh awm. Miah lo vin a phun ta chûk chûk a. Kar loah a bialnu chu a nei ta a ni. A nau chuan anuhrawn chu a ngaina mai a. Bakah a nuhrawn chu misual tak a ni hran lo. A tilawm thiam hle si a. Dinfela thinlung erawh engtikahmah a hneh a rinawm loh. Anu aiawh turin tumah an tling tawk thei lo vang. Apa chu a hua a, runluih a chak thin. Mahse, anu zirtirna te khan an thunun leh thin a. Mipa sual tak a ni hran lo, anu damlai phei chuan thuawih leh hlim thei tak, infiamna lam pawh ngaina ve tak a ni thin. Mahse, thihna hi chuan mi a khawih danglam hneh khawp a, anu thih hnua a nungchang chu a mak tia sawi loh rual a ni lo. A tawng ngai mang lo va, tumah a ngaina lo ni maiin a lang. Phai chu a ngainat vang ni lovin a nu sulhnu hmuha rilru nat fo a duh loh vangin Mizoramah a haw ngai mang lo. Tunah loh theih lohin a haw a ngai ta si a. Engpawhnise, a inthunun hram hram chu a ngai a ni. 

Pu Vanlala chuan a fapa rilru a hrethiam. Fapa mal a ni a, a thlah kal zel tur chhawmnungtu tur. ala ni dawn tih pawh a hria. Chuvang chuan a duh ang tihsak rih zel phawt chu a tum a ni. Sumah a buai rih lem lo bawk a, Bultansak pawh chu a phur ru viau zawk mai. Engmah ti lo va ina awm mai mai ai chuan hlawk lem lo mah se, a fapa thluak chawlhtir loh chu a duhthusam a ni. A fate pahnih mize inang lo lutuk chu enkawl thiam harsa a ti viau. Nunui hi chu mi lian leh hausa ngaichang chi, an nun dan pawh la ve duh mai, hruaikual awlsam zet a ni a. Tihlungawih a awl tluk zetin tihnat pawh a awl. A pangchang a, duat a lawm hle. Anu hian tih dan a thiam bawk a, a nu tak tak aia a ngainat lohna a awm lem lo. A nu fabik Teteii nen lah an kum a lo inrual khat bawk a, an inkawm thei fû. Modelling lam a tui ve viau naa a pian hian a zir chiah lo va, mahse, sum a awm chuan kawnh a awm zel a. Pu Vanlala pawn Nunui chu engtin emaw taka la tihlar dan a ngaihtuah ru ve reng a ni. 

Pa tha pui, dam thlup mai a ni roh a. Huat em em pawh a nei lem lo. A hnuaia hnathawk te zingah fak lo chu an váng viau. A nupui fate pawh a ngaihtiah ru ve reng. Inhuat leh neuh neuh awm hi a duh ve lem lo. An pa ber a boral tawh si a, engtikah emaw chuan an chhawmdawl a la ngai dawn tih a hai lo va, chutiang hunah pawh tlanchhiat loh hram a tum ve a ni. 

"Maw.. Mami, i rai maw? " Diteii makti meng phawk chu a hmuhnawm ngei mai. Mami chu a melh reng a, "Umm, thla hnih vel a ni tawh ang" Mami chuan a lo ti sap a. 

A û, mi perfect nia a ngaih pawh a lo chesual ve thei tho a nih dawn hi. Mak a ti hle tho mai. Lawma leh Teteij te pawh chuan Mami rai thu chu an hre ve a, mak an ti ve khawp mai. Lawma hi khatia Mami nen an han inbakkaih deuh hnu kha chuan a zia a zawi leh viau tawh a. A inchhir nge len pawh a leng chhuak ngai meuh lo. Mami lahin a thiam ang tawkin a zilh ve reng bawk a. 

"Chuan, engtin nge in awm dawn" Lawma chuan a ti a. 

"Palai a rawn tir dawn. Hautak lo deuha invawn mai kan tum" Mami chuan a lo ti a. A rai thu a naute bula sawi tura a insanmar nasatzia kha. A zak ve bawk si, an veng chhungah nula fel, vengva leh hawiharha sawi a ni thin. Nihna neuh neuh te pawh a lo chelh ve fô!  Chutiang karah a naute nen chauha khawsa an nih nak alaia sâwn lo pai chu a suangtuah phak bak a ni ve thin tho. Mahse, mihring kan famkim lohzia lanna te pawh a ni mahna. A nih ang ang chu a tawrh mai loh chuan… 

A sawi lawk tawh angin sangtea chuan palai a rawn tir ta ngei a. Pu Sapa nau leh a farnu te nen an lo dawngsawng a. Pu Sapa te hi unau pali niin a nau mipa hi Falkawnah an awm a. A farnu naupang zawk hi an veng chhungah pasal neiin chhungkaw khawsak sang lem lo tak an ni. A u zawk erawh Kolasib-ah an khawsa a, Mami hian a chah chho ve tawp mai a ni. A lo ruak tawh lo bawk nen, awlsamtein an inrem a. Kohhran Upa ina inkutsuih mai an rel thlu ta a ni. Buangbar bara tih huk kha a hautak bakah an dinhmun vang pawn a tul em em an ti lo aniang. Mami pawh a pawisa lo khawl ve te chu a thuam chhawm tur lei nan a hmang chho tan a. Sangtea te lam an felin an bengvar hlauh a, thuam chhawm pawh duham lo turin an inhrilh hre reng mai. Diteii erawh a ngui bûr reng. Engtikah emaw chuan Mami hian pasal a la nei dawn tih chu a hre ve, mahse, a duh aia hmaa a lo thleng thut chuan a tihrilhhai a ni ber. Nei tawh rawh ti ve fo mah se, chutia a han nei tak tak tur chu a ngaingam leh chiah lo a ni mahna.. Teteii erawh a phur viau thung. 

Man inhlan zanah chuan Mut dawnah Mami chuan a naute bulah, "Kei chu heti mai hi ka ni ta a. Nangni erawh chuan ka hnung hi rawn zui ve miah suh u. Virgin ngeiin pasal in nei tur a ni. Dan puitling /thianghlim hi a ropui riau na chu Thianghlim taka inneihna a nih vang a ni. Fimkhur ula, mipa pawh nel lutuk suh u. Diteii hi chu tiang kawngah chuan a ngaihtuahawm loh, Tete, nang ber hi ka ngaihtuah che. I khawsak dan han en hi chuan pawisak nei lo te pawh i ang thin. Mipa i nel mah mah, inkawm fal te hi duh loh tur, kei pawh ka chesual ta reng a, min entawn miah suh u.. Ka pa thlarau pawh a zahawm.. Kan dinhmun hi hre reng ula, unau inngeih leh inhmangaih tak nih zel tum tur" tiin a fuih ve dap dap a. Diteij chuan a ngaithla uluk kher mai. Ngaihzawng nei ve turah a indah lem lo va, mahse, Mami'n fiamthu titaka, "Mipa ngei ngaizawng la, pasal atan pawh mipa ngei nei ang che. Nulat hlen te hi duh loh tur, upat hunah unaute chuan chhungkua an ngaihtuah tawh a, min ngaihsak tha hman dawn lo, pasal i nei lo anih pawhin fa tal chu nei ngei ngei ang che" a tih thin te kha a dikna chen a awm a ti, mahse, ani tehlul hian pasal a nei ang maw?  A ngaihtuah zawng ringawt pawn a luak a chhuak. 

Mami te pawh felfai thakin an innei ta a. Mi an sawm zau vak lo nachungin duhsaktu an tam a. A rai pawh hi pawi an lo tihpuiin an dem em em miah lo. Hrethiam takin duhsakna nen an thlah hlawm a, mi hi an tha thin teh e. Mami a awm ta lo… an in chu a ruak huai ngei ang le.. 

An result a lo chhuak ta bawk a. 1st div ah a pass ve hlauh mai. Mami a hrilh hmasa ber. A lo lawmpui em em a. Teteii leh Lawma pawh an lawm ve khawp mai. A lawmna ni pahfawmin, Lawma chuan arpui tuilai a lei a, Mami te nupa nen hlim takin zanriah an kilho nghe nghe kha. A school luhna tur pawh an tifel thuai a. Bena te nen admission an han la a. An hlim ve khawp mai. Tleirawl tak tak a lo ni ve ta a, a taksa pawh a nalh telh telh. A nalh tij hre miah si lo va pawisawi lo taka a awm chu mipa mit latu a ni chho tan a. "Awew.. He nau hi chu han nu hlek se aw' an ti ru ta fô mai. Amah lah chuan a nunphung thlak tumna a nei der si lo. 

Kum chanve dawn a ral leh ta a. Diteii pawh an school chu nuam a ti chho ve tan. Bena te nen an lut tlang thei bawk nen.. A mizia vangin fiam tawk zauh thin mah se, a insiamrem thiam ve zel tawh a. Bena leh Tki ten an fuih renh bawk. Vawi khat phei chu Tki pek hian a kawr, hmeichhe kawr tih hriat lutuk hi ha turin a nawr tlat pek a. Diteii a tap teuh mai. A duh lo lutuk chu an lo nuih khiah khiah thung. Ni e, a pa hlen bik lo turah ngai ang. 

In chhung uap lum bertu Mami awm ta lo erawh an chhungkaw boruak a dang ta hret hret. Lawma pawn zu a in chho leh tan a. Nuthlawi a birh tlut tlut mai le.. Teteii'n an chhungkaw sum a kawl thung a, ani lah inren thiam lo, a duhna leh awh zawnga tim hlek lo va pawisa khawhral mai thin anih vangin an rethei chho tan viau. Mahse, apa pension tlem avangin an la nung ve hram hram a. Lawma hlawh erawh aman a chang vek, a hlawh tam loh nak alaiin. Diteii pawh a broke ta zeuh zeuh. Tiffin a pai mai zel a, hrehawm tihna em em a la nei rih lo. Pu Sapa kha a â lo em a, a fate account-ah sum dah zeuh zeuh a ching a. An account ami erawh a tu amah chuan an la khawih che duh rih lo. 

Teteii nen chauh zanriah an ei laiin, "Au Lawma bialnu hi i hmu ve tawh em? " Teteii chuan a ti a. 

"Hmu nang. Tu nge? " a lo ti leh hû. 

"Tuikual ami ania, nuthlawi fa pahnih nei, mahse, a fate a awmpui lo. Zu duh ve deuh, inchei parh ve thei deuh ania. An innei ang tih ka hlau' Teteii chuan a ti nghal bawrh bawrh a. 

Diteii pawh chuan, "Au Lawma hian zu a nghei thei tawh si lo va, buaithlak e" a lo ti a. 

"Kei chu anu te bula awm daih ka duh" Teteii bawk chuan a ti a. 

Diteii a ngawi hmak. Teteii hi chuan remchang hmu ngat se, insawn chhuah a duh reng tih a hria. Mahse, ani ve thung hi.. Anu nen an innel loh bakah a pa lu nghahna hmun chhuahsan chu thih hrehin a hreh. A ma tawkah a rilru a buai ve khawp mai. Lawma lah a ni telin a bawraw telh telh mai si. Mami ten han hau thin mah se, chenho leh chenho loh kar a hla ta nge, a zawm lem lo khawp mai si.. Mami rilru pawh a chawl hleithei lo .. 

Bena te nen an document thenkhat xerox turin dawr lian ve tak pakhatah chuan an lut a. He dawr hi a dinna a la rei lo naa, a lun chho hle. A chung chu computer zirna a ni nghal a. Zirlai an tam em em lo naa, a fees a sang a. An hlawk tho a rinawm. Nula pakhat hian hawihhawm fe hian a lo dawngsawng a. An lehkha pawimawhho chu an phawrh sap sap. An xerox lai tak chuan in chung atang chuan mipa pakhat a rawn chhuk thla a, Diteii'n a lehkha ho a lo sam mek lai a ni. Chupa pui chuan a rawn nghawk chawrh mai a. A lehkha chu a darh nuaih mai. A chhar khawm nghal vat.. 

"Tihpalh lutuk" ti chungin chupa pawh chuan a rawn chhar pui nghal a. 

An ding rual leh chiah, an inhmachhawn chiang ngang mai. Dinfela chuan chu tomboy rawngkai chu a hmuh hnu ang a ti hle. Diteii lahin chupa chuan an deuh a neiin a lo hre ve bawk. An innuih sak a. Dinfela chu a chhuak nghal. Chu chu an inhmuh tawpna ni nghal se thil tha tak tur pawh a ni mahna.. Mahse, a bultanna chauh a ni si a. 

Dinfela pawh a dawr a la hawn loh rei ngaihtuah chuan thawk chhuak tha a inti ve viau. A nun pawh a hlim chho tan. A thianpa Mikea'n a rawn pui thei hlauh bawk. Mikea nen hian tleirawl chhuah atanga inkawm an ni tawh a. Hmun hrang an awm vang hian an inzui chawt thei lo mai pawh a.. An mizia erawh a inang tehchiam lo. 

"Braaa.. Kan nu a rai pek a.. Engtia tih chi nge ni dawn ni. Nupui neih ka la peih si lo" Mike-a ti lang lang ri avang chuan a lo khi suk. 

"Chu.. Kan ti huk dawn a ni maw? " a lo ti nghut a. 

"Naaa.. Nupui neih ka la duh lo ee.. Ka pa te pawh ka la hrilh lo, min hrilhsak la, a nuam vak lo" Mikea chuan a ti leh a….. 

"Hrilh tehreng e. Amuani chu a hlim awm, neih loh che a hlau ve sia" Dinfela chuan a lo ti a. An nui dun hawk hawk. Mikea chu enghelh nei lem lo, mi rilru tha tak a ni a. Thiante tan chuan engpawh ti duh mi a ni. An khawsak a sang em em lo naa, a rualpawl tawk an ni ve a. Tin, amah hi a luck ve reng reng a, a hmel that bakah a zei riau a. Hmeichhia hian an lawm riau zel. Dinfela aiin kum 2 velin a upa thung. Dinfela hi a ngaisang ru viau. Kum naupangtea hmachhawp lian tak a nei thei bik hi. A kum rualpui tam zawk te chu eng e em ngaihtuah nei lo, changpat cheh chhum anga tal ve mai mai an nih laiin, Dinfela erawh tihian ama pualin Dawr leh institute a hawng thei tlat ania. Kum 30 vel anih hunah phei chuan a pui ngawtin a ring. 

Dinfela thung chuan Mikea hlim thei reng, enghelh nei lo chu a lo awt ve tumhrang thung. Hetia dawra a chettlat lai hi chuan a hlimin a thla pawh a ngam sârh thin. Inah a haw a, a ngui leh vek zel. A nuhrawn hmel a hmuh apianga a nu a hmuh tel thin tlat vangin a rilru chu hliamin a awm nitin a ni ber. Chuvang ania indan pawh a chak em em ni. Tun dinhmunah erawh a remchang rih si lo. 

Lawma chuan a bialnu Teremi si hlarh hlarh melh chung chuan a han nawr na deuh a. A tawp an thleng ta. Teremi khur der der chu a fawp zauh a. He hmeichhia, nuthlawi fa pawh pahnih lai nei tawh, amah aia kum 3-a upa lakah hian a tuiral zo tawh. A zawrin a zawr hnep a ni ber. 

Teremi sira muthla vein a thaw hle hle a. "Hetia awm reng hi ka ning tawh. Kei chu" Teremi chuan a ti tham chhal a. A la thaw deuh hlai hlai mai. A biang sen tèk chu piai sakin, "Min zui haw mai la" Lawma chuan a ti a. 

"Ti ve ziah. Retheih ka peih lo ka tih kha. I hlawh a tlem si, i pa pension lah i nau ten an kawl vek a. Engtin nge kan khawsak ve ang " Teremi chuan pangchang zet hian a ti sar sar a. 

"Aw.. Kan inneih te chuan, ka pa hlawhte chu nu ber i ni dawn a, i kawl tawh mai ang chu" Lawma chuan a ti liam puat a. 

"Nia kan hre mai ang chu.. Mahse, inruk chu ka duh vak lo eee" Teremi chuan a ti a. A nui deuh bawk. 

"Hmm.. A awlsam ber alawm.. Palai tirh kual vel kha ka zak, tihian inru ve tawp ila, nakinah tlan koh angin kan innnei ve mai dawn lawm.. " Lawma chuan a ti a. Teremi pawh chuan a pawm nge ni a lo bu nghat a, zu fun khat la awm chu an thli leh karh karh a. An tlak zui nghal hmak.. Thawmhnaw te hain, Lawma te in lam pan tur chuan an chhuak zui ta nghal a. 

"Tete, Au Lawma hi chaw ka chhum kep dawn em? " Diteii chuan a ti lang lang a. Room atangin, "Chhum kep duh suh. A rawn haw leh pawh ka ring lo" a rawn ti a. 

Mahse, chutih lai tak chuan kawngka a rawn inhawng a. Lawma leh Teremi te chu meng sen rám chungin an rawn lut ta. Diteii hamhaih lutuk chu a ding reng ringawt. Chutah harh chhuak thut niawm takin, "Tete, lo chhuak teh" a ti ta vak a. Lawma te chu thutthleng seiah an thu nghal. Teteii pawh a rawn chhuak a. A thil hmuh chuan a tilungawi vak lo nge a tum nghal hmak. 

"Dite, chaw min chhum kep rawh aw. Hei i û tur. anih hi.. Ka nupui" Lawma chuan thuneih hmel zet hian a ti a. Sawi tur vang a ti kher mai. Lawma rooma an inzui lut lai thlir pahin, "Ka hlauh ang ngeiin.. Kha nu kha ka duh hleinem" Teteii chuan a ti hlak hlak a. 

"Mahse, a lo fel phian maithei sin" Diteii chuan a ti a. 

. "Fel awm lo em mai. Zu a heh si.. A tawp ngawt ang" A lo ti hmak. 

Zanriah ei dawnah Diteii chuan a va kai tho a. An kil ho ve ta thap. Teremi chu a tawng lem lo. Lawma zawk chuan, "Zah hle ang che u. Pawisa pawh a kawl vek tawh ang. Engahmah phût lo bawk ula.. " a ti huah huah a. Teteii a khak nghal hmak. 

"Zomuanawm, i titau khanglang elaw? " Lawma aw pawr zet chu hlauh hmel takin Diteii chuan a melh nghal. 

"Tau lo. mami ka be dawn.. " Teteii chuan a lo ti tha ve mai a. An ngawi zui leh phawt. An rim lah chu a na phian. Chaw ei khamah roomah an inzui lut leh nghal. Teteii chuan Mami a call nghal a. Mami chuan chek tlak tlakin, "Kan rawn phei dawn nia" a ti a. 

Mami te rawn luh lai chuan Lawma te nupa chuan an roomah zu an lo in mek. Mami chuan a ko va, an rawn chhuak ve vat. 

"Hei, Lawma, a zia lo hle mai. In la kalthui lo bawk a, tha tetea awm a tha. Va indah leh ru.. Palai te pawh kan tir mai ang chu, hetia tlan kher ngai lo hian" Mami chuan a ti a. Lawma chuan thu bu lûk lûk chungin, "A ho em mai kan induh a, kan inhmangaih a, a tawk. Lo inrawlh ve suh. Pasal neia chhuak tawh i nih kha" a ti a. 

A sawi chu a dikna chen a awm ve tho tih Mami pawn a hai lem lo. Mahse, Lawma nepzia leh puitlin lohzia a hre si. 

"Ni e, a dik alawm.. Mahse, engtia chawm nge i tum in nu chu" a ti tha ve mai a. 

"Buhfai no khat thlak belh a ni mai alawm" a lo ti leh hluk. 

Mami chuan beidawn hmel zetin a nutapa chu a melh a, Teremi a en leh. Ani erawh nuthlawi lungfing tih takah a nungchang a tha kher mai. Zakzum awm fè hian a awm thiam reuh a, han ngei vak theih pawh a ni lo. "Teremi maw khah.. Hei Terem, kan chhungkaw dinhmun i hre vek a. Ka nau i lo duha i lo hmangaih ve hi a lawmawm pawh ka ti. Chutihrualin, hei in lo inhruai tawh si a, palai te pawh kan tir ang a. Hei erawh min hriatsak la ka duh a, nu leh pa nei tawh lo kan ni a, ka naute hi i lo kilkawi thiam a ngai dawn hlein ka ring. Lawma hi chu heti mai hi a nia, nangman i zir phawt chuan thu te hi a awih ve fû ania. Diteii leh Teteii mawlh hi, i nau te ang tak taka i en theih ka beisei.. An sual lo va, i kaihhruai thiam phawt chuan i tan buaina an thlensak lo ang che.. In nun chu a ni tho va, mahse, in inneih tawh chuan zu te pawh in tawh loh tum ve bawk ula" Tiin Teremi chu a han hrilh leh ta dap dap a. Teremi tan pawh han ngaihkawih em em tur a awm lem lo. Eng han tih theih ni hek lo, Mami te pawh thingpui te an inzawh chuan an haw zui ve nghal a. Lawma te pawh roomah an lut zui bawk. 

Diteii muhil thei lo chu a tal a tal mai. A u nupui chu a sual angem tih ngawt a ngaihtuah. A sual viau chuan Lawma lah in a ngam loh hmel si a, a hrehawm dawnin a hre ve a ni. Teteii pawh chu ti tho chu. Ani erawh chuan a nu te bula awmna chance ah a ngai mai thei a, mahse, Unau an nihnaah Diteii chu lainatna te pawh a nei ve tho. A theih chin chin chu han awmho phawt se, a peih loh tawpa insawn mai a tum rilru a ni. 

Thil chu a kal ve nek nek a, Lawma leh Teremi pawh mi dang tibuai vak lo leh hriatpui em em lohin an innei tha ve ta a. Lawma a khi vun vun reng mai. Teremi erawh rilru a nei ru kar thung. A mo tirh chuan mo dang te ang bawkin a tha hruah hruah viau. Diteii pawn a rin ang a ni dawn lo a nih hi a ti hman hial. An ni pawh an exam chho tan a. Term exam ani bawk a, a tang em em lo. Teteii erawh a khawsak duhdan a ngai reng, lar a chakna chuan a tih duh loh pui pui a tihtir ta zeuh zeuh. Zu pawh vawi 3 lai a in ta. A chhungten an la hre lo hlauh. 

Chutihlai chuan Super Model thlanna huaihawt a ni chho tan a. Tel ve a tum ruh hle. A thiante pawn tel ve turin an nawr sap sap bawk a. Mahse, a buaina chu incheina leh thawmhnaw a duh anga a nei tha lo chu a ni. Anmahniin an inbuaipui rih a ngai dawn si a. Apa kha chu la dam se, engtin tin emaw tihdan te pawh a hre leh maithei ania. Tunah chuan tihngaihna a vang. A nu pur buai mai loh chu.. 

A nu te in lam apan lai chuan, photographer Puia nen an intawk hlawk. Ani hi a zin bo char char a, an inhmu lo rei viau. An inkuah thuak thuak a. 

"Tel ve i tum mi? " puia chuan a ti nghal. 

"Tum chiang e.. Mahse, duhthusamin hmanrua ka la nei tha lo va. E taka, ka thla latu atan ka duh che nia aw. Hlawh erawh ka pe tam thei lo maithei che" Teteii chuan a ti sar sar a. Puia mitmeng danglam zawk chu a hmu lem lo. 

"Nia, kan inpui ang chu.. Ka tan pawh intihlarna zel ani ve a. Chuan, i nau kha tel ve a tum lo mi? " a ti ta daih a. Diteii kha a la vei reng a ni mahna. Teteii a nui hawk, "Engtin nge tel se i tih?  Mawl lutuk. Mipa ang annih saw" a lo ti hluk. Nui mah se, a lungawi chiah lo niin a lang. 

"A lo la nu chuang na nge? " puia chuan a ti ve mai a. 

"A nu tawh lo vang.. Chuan, zanah lo leng la, kan sawi tha dawn nia. Tunah chuan kalna tur ka nei a" Teteii chuan a ti sawk sawk a. An inthlah liam ta a. 

A nu te in ropui zet kawtah chuan a ding váng a. A thaw halh bawk. Anu hian a tuipui ve thin a, mahse, pawisa hlawm kher hi chu a la dil ngai bik lo. A zâm ve deuh. Door bell chu a hmet ri tlang tlang a. Rei vak lohah an awmpuinuin a lo hawng a. Anu pawh sitting roomah pangpar a lo buaipui ve mek. 

"I va rawn kal khât ve.. " a lo ti chul a. Ni e, tun hnaiah a tlawh khat ve bawk a ni. 

"Nia, ka buai ve em alawm.. Khaw nge Nunui" a ti nghal a. Ngampa zetin a thu zui nghal. 

"A rawn haw tep ang.. Eng nge i U lawma nupui chu a an zel? " anu chuan a ti a. 

Ner deuh nâng chungin, " A la tha ve reng, mahse, zu an la in zeuh zeuh a" a lo ti a. 

Teteii nu hi Mami'n pasal a neih khan nu man an eitir a, a la dam miau a, a ei tur kha a ni reng a. A fanu tan khan Amira tha ber chi, to zet mai a leisak nghe nghe. Mami pawh a lawm ve viau. An inneih pawh a zuk hmanpui ve a. Mahse, langsar takin a che lem lo. An pa pawn a tawiawm tha hle. Lawma nupui neihah erawh Pawisa a pe thung a, an pa hriatpuina thoin. An inhruai zanah khan anpa thianpa ber a boral a, an rawn hmanpui ve thei lo a ni. A theihna chinah chuan a fate chu a thlahthlam hlawm tawp bik lo. Mabse, an pa mitmei a veng ve thin a, pa tha tak nimahse, eng emawchenah inthlahrunna chin a nei lo thei lo. Dinfela lo haw hnuah phei hi chuan a awm a nuam thei vak lo. He nau hian a dîp ve tlat!  A hma ang ngawt chuan a che ngam tawh lo. Mahse, that chhuah hram hram erawh a tum ve tho. 

"Nu, Super modelah khan tel ve ka tum a. Mahse, make up leh thawmhnaw hi ka nei tha lo lutuk a, mahni inngaihtuah rih tur a ni sia.. Ka rilru buai tawp" Teteii chuan pangchang aw tak hian a ti a. A lo thaw hak ringawt. Chutih lai tak chuan in chung atang chuan Dinfela a rawn chhuk thla chhat chhat a. Teteii chuan a lo en reng. 

A lo haw tih chu a hria a, mahse, tun hi a hmuh vawikhatna chiah a ni. A pahrawn fapa Dinfela a hmuh rual chuan amahah danglam eng emaw a awm. A mipa duhzawng tak a ni tih a hria a, a star nghal vawng vawng a ni ber e. 

"Bawiha, i chhuak dawn em ni? " anu chuan a lo ti vat a. 

."Aw, Mikea te inah kal lawk a ngai a.. " A lo ti tha ve mai a. Teteii chu a rawn melh zui nghal. Anu chuan, "Hei i nau tur a nih hi.. Ka fanu ania' a lo ti vat a. An inchibai a. Dinfela chu a chhuak zui nghal. 

"Awii, nu,  a van nelawm loh em em.. " Teteii tih ri chu a hre hman. A khi suk. An nufa laka a nelawm viau chhan tur a hre hauh lo mai. 

"A zia ve anih kha.. Chuan, engtin maw model vel chu" anu chuan a ti a.  Teteii chuan a sawi tha leh, a sum mamawh dan te.. 

"Umm.. Thla nawi lam a ni sia, kei chuan kawlsa ka nei tawh mang lo, i pa hi dil la.. A mawi pawh a mawi.. " anu chuan a ti ta a. Teteii a ngui rawih. A beisei dan chuan a nu chuan a pawisa kawlsa a pe anga, hlim deuhin a hawng anga tiin. 

Mahse, "Nia, ka pa chu naktukah ka dil ang. Ka hrethiam alawm.. " a ti tha mai a. A mawl bik lo. A hawn hmain Nunui a lo haw a, an ri leh hlut. Model thlannaa tel ve turin an insawm a, Nunui erawh chuan "Ka thau tawh mah mah a. Tel rawh. Ka lo support ang che" a ti a. Rei mawi tawk hnuah Teteii pawh haw turin a ding chhuak a, Nunui chuan a thlah ve nghal. 

"Ka sas thar hi a chhe lo viau lo maw" tiin Teteii hmaah a phone chu a va lek va a. Teteii pawh chuan chhe lo a ti hle. Nunui chuan a phu lo a ti. An hausak vang a ni ngei ang. A langah erawh, "Awii i van nei chhe lo. In inhmeh tawp" a ti hlut a. An invai liam ta a. 

Dinfela chhuak ta kha Mike-a te in lam panin a tlan zui nghal a. Bike khalh muang thiam vak lo a ni a, a lo tlanchak deuh nge kawngsir tuihawk chu motor nen an inside na lamah a lo chil per deuh nge, hmeichhe rak thawt thawm a hria a. A ding nghal chawt. 

"I â mi?  Ka berh vek hi" a rawn ti. A va melh phei chuan, hman deuha a dawra a sut nu kha a ni tih a hre nghal. A. Chhuk vat a. "Ka tihpalh lutuk.. Ka lo ngaihtuah miah lo va. Tuihawk a awm tih pawh" a ti sawk sawk a. A romol chuan Diteii kawra tui kai chu a hru pawk pawk a. Fur chu pel tawh mah se, sik leh sa hian awmzia a neinthei meuh tawh lo nge ruah a la sur zeuh zeuh a, side drain awm ve thluah tawh mah se, chu lai ber kher chu kawng khuar lai a lo ni a, tui a lo tling ve bawk a ni. 

. "khawi teh, min khawih suh. Nang pa hi mi sut i ching hrim hrim, dawrah pawh min su tawh" Diteii chuan a lo ti pawr hlar a. Dinfela nuih a za deuh. Amah ai chuan a naupang fe ang, a lawmawm riau. 

"Eitur tui deuh ka la leisak mai ang che. Min ngaidam la" a ti a. Diteij chuan rum deuhin a melh, "Ka duh bawk lo. I mawl si" a lo ti hluk. Dinfela chu a nui hawk hawk.. Chutia a nuih hawk hawk lohna chu a rei leh tawh riau. 

"I nula e.. Hawh ka va thlah ang che.. Khaw nge in awm? " a ti a. 

"Ka chuang duh teuh lo. Ka kal ve thei.. " a lo ti leh hlar a. 

"Hmm.. Buaithlak ve aw. Anih pawisa i duh em? " 

"Duh lo ka kal dawn. Fimkhur tawh rawh" Diteii kal mai tum chu a pawt a. 

"Lo nula rawh aw. Lo tlangval miah suh. I hmel tha si" a ti zui sup. Diteii mitmeng alh phat chu a hmu lo thung. A tlan liam lai thlir vung vung pahin, "Hmela mai mai chuh.. Nula ka ni ve reng e aw.. I mawl si" a ti leh hmuk a. A kal tau ta sawk sawk a. 

(Hemi chinah hian duhtawk leh mai teh ang.. Ka kut a kham tawh em mai)  😍😊