D Rose 13

D' ROSE… (13)

Ziaktu : Toni Râlte

"Dite, a rawn zawng ngei ang che. Engtin nge niang aw" Puia chuan a ti a. Diteii mitmeng phelh phang chu lainat hmel zetin a melh a. 

"Ka hre bik lo. U Pui, Kolasib-ah ka chhuk mai ang" a lo ti hul hak. 

"Kolasib-a i awm chuan i rawn chho thei tawhin ka ring lo.. " puia chuan a lo ti nghut. 

Diteii'n a lo bia a, a aw-a manganna kha a bengah a la cham reng mai. In atanga a chhuah thu a rawn sawi anih kha. Tuman an zawn hmuh lohna tur hmuna awm a duh thu nen, Tichuan, a in chung berah a lo mikhual a. A chhuah chhan Diteii'n a sawi chuan a sa zak mai. Teteii chu awm nase, thuai sawk a chak kher mai. Dinfela lehzel pawh a lo set up tihna a nia. Diteii chu a la naupang nasa si, chuti ang mipat hmeichhiatna hmanga a thinlung hliam a ni chu pawi a ti. A tap hliam hliam mai bawk si a. Teteii khan video a lo thawn a lo ni. Dinfela nena an chet dan zawng zawng chu chiang takin a lang vek. Diteii tan in chhuahsan mai loh chu duhthlan tur a awm lo. Lawma te inah kal a tum zet a, mahse, an zawng hmu hma dawn lutuk tih a hria. Puia a bel ta tawp mai a ni. Puia chuan eng emaw chen a hum theih a beisei. 

Dinfela chu a hua a. Hmuh leh pawh a duh hek lo. A tenin a ten a ni ber. Engtin nge a unaunu ngei mai chu sex a hmanpui theih? A rapthlak a ti lutuk. Teteii chu a u a nih vangin a la hmangaih thei, mahse, Dinfela laka a rilru chu a dang vek tawh. A lo duh ve zia erawh a hriatchian phah thung. Ama tawkah thil a tawng tam tawh em a. Amah leh amah a inhai kuak a ngai tawh dawn a ni tih a hrethiam. Mahse, awmna tur a ngaihtuah phawt a ngai. Kolasib-a chhuk chu a duh, zalen deuhin tuma hriat lohin a awm chak. Mahse, Kolasib-ah chhung an nei tih Dinfela'n a hre tlat tawh. A hma khan aman a lo sawi tawh si a. A rawn zawn chhuah tho a ring. Tin, Puia sawi ang deuh khan amah a inhai kaw thei lo vang. Kolasib atang chuan..

Nghenchhan tur mi rintlak a va mamawh em.. Lawma lah belh tlak a ni mawlh si lo. Bena lah mi â ang maiin a khawsa tawh bawk si. A ac  pawh a khawih chet a ngai ngei dawn e. Engpawhnise, Phuba lak chakin a za, Dinfela chu tihnat ve theih a chak ngawih ngawih. 

"Dite, tihian ti ang. Hetah hian khawsa mai rawh. School i chawl ang a. Kum thar veleh film chu kan buaipui dawn nia.. Chuan Class Xii chu open atangin i pass tho ang" Puia chuan a ti ta a. Duhthlan tur a vâng ta hle mai. 

"Nia.. A pawi lo. Ka chhuak thei rih lo tun dinhmunah chuan" a lo ti ve a. Puia inah chuan bungrua engkim a awmsa vek a, a tan a lian deuh hlek tih lohah chuan nuam tak a ni. A thianghlim bawk a. Puia a bel ta ringawt chu a zak ve reng, mahse, rinchhan tur midang a hre tlat si lo va. 

Dinfela erawh mangang takin Aizawl khawpui a suar tluan tawh. Bena te in atangin a chhuak chiah. Diteii a awm si lo. Puia in lam a pan leh mek. A thil tihsual avanga Diteii thinlung na lutuk tur a ngaihtuah chuan, Teteii chu thah mai a chak et et.. Diteii chuan a thusawi a awihsak rih dawn lo tih pawh a hria, mahse, a hmu duh a ni tawp. Hmuh phawta zawi zawia hneh theih a inbeisei a ni. Kawngka a kik dat dat a, Puia'n thophang fe in a rawn hawng. 

"A lo kal miah lo tak tak maw.. Puia, ka va mangang ve.. " a ti chuai raih a. Puia pawh chuan a khawngaih ru viau. 

"Kal lo.. Biak chu min rawn bia, khaw nge a kal dawn ka hre bik lo a ni. Kei pawn hmuh ka duh " a lo ti a. Dinfela chu chhuah leh mai a tum. 

"Lo lut ve hrim hrim la" puia chuan a ti khawmawi a. 

"Aih, ka zawng leh dawn sia.. " ti chungin a chhuak. Puia chuan lainat zetin a thlir liam a. In chunga khawhar taka mu mek hmeichhe naupang chu a mitthla a, eng chen tak biru thei ang maw.. 

"I nau ania.. Dinfela nen an chungchang i hre vek bawk. Engtin nge khatiang kha i tihtheih.. I awm dan hi ka duh miah lo aw.. I rapthlak ka ti lutuk" Tetei chuan a nu chu a melh ngam lo. Tiang reng renga a nu thinrim hi a la hmu ngai lo. 

"Amah alawm" a ti tawi tâk a. 

"Mipa chu an lo ruih phei chuan an danglam nghal a, engtin pawn thlem che se la, lo hnar tur i ni asin. I thiltih pawizia hi i la hre dawn alawm" anu chuan thinlung na zetin a ti khawl khawl a. Ni e, Teteii avang chuan an chhungkua pawh an la kehchhe mai thei a ni. Hriat va ni suh. Dinfela lah Diteij bo atangin tuman an be tawng zo tawh lo. Chaw lah nise a ei ngai lo tluk a ni. A hnaah pawh a kal meuh lo. A tawm tlawk tlawk ringawt. Kolasib-ah pawh a zuk kal tawh. Tunah chuan a beidawng famkim tawh a ni maithei. Zawn tumna pawh a neih tawh loh danah. 

Christmas a liam a, Hun chu a kal ngaiin a kal bek bek, Dinfela leh Diteii thinlung na erawh a la dam lo. Diteii pawh a cher kawk kawk mai. A thu that bawk. A chhuak ngai lo va. Puia'n ei tur a rawn leisak mai zel. Chimbuai a duh lo va, amaha awma inngaihtuah vak vak chu nuam a ti ber. A chang chuan Dinfela chu a ngaidam fô!  A tawpah erawh mittui nen huatna thinlung a pu leh thin. Bena a ngai thin a, kan turin a chhuak thei tawh bawk si lo. Bena nu nen erawh an inbe zauh zauh. A sim card a thlak ta bawk a. Tu khawkhain a number an hre ta lo. Puia chu a tan pa ang mai a ni, a ngaihtuah em em a. A mamawh engpawh a sawi apiang a lamkhawmsak thin. Chuvang chuan a be chhe thei lo. Inngaihzawnna lam hawi erawh chuan an inkawm ngai lo thung. Mipa tumah ngaihzawn a duh tawh lo. Tumah a ring lo. Phatsan nih leh ai chuan lentar daih a duh zawk. 

Kum a thar ta. 

"Nu, englo.. Ih, ka la period miah lo" Teteii aw ah chuan manganna a tel. Anu chuan a melh vawng vawng ringawt. Tlaiah Test kit a pe a, "Va test rawh" a ti zawi sap a. Bathroomah Teteii a lut nghal. Minute nga hnuah a rawn chhuak a. Kit chu a lek vâ bawk. 

"Ka rai" a ti ta a. 

"A duh a a rai alawm.. Engvangin nge ka neih ngawt ang. Ka fa pawh a ni lo ang. Mi dang fa a niang" Dinfela chuan a ti nghut ngut a. Pu Vanlala chuan a chal a dawm vung vung. 

"Chhungkaw mualphona a ni.. Bawiha, engtia han tih chi nge mawni dawn le.. I nu pawh a zahawm viau asin" a ti dam thluam a. 

"Ka zah ve lo ve. A fanu hi enkawl tha hek lo. Ka fa pai a duh anih chuan pai se, ka tan engmah a ni ve lo ve.. Ka nei dawn lo. Chuan taka ka pa, ka in dang dawn. February thlaah ka chhuak ang" a ti ta a. Pu Vanlala chu a meng phawk hru mai. 

"Engvang chuan nge i indan ang a. Hei hi i in a nih hi".. A awki chu a sang hret. 

"Nunui pe mai rawh. Ka awt lo ve. Keimahin ka inenkawl thei. In bulah ka cheng thei tawh lo. " a lo ti hmiah. 

A fapa luhlulzia hretu tan chuan nawrluih vak a sawt dawn lo tih a hria. An chhungkaw boruak danglam chho zel leh nuam lo ru deuh chu a chhut a chhutin Teteii lo awm atang khan a intan tih a hre thei. He nau hi a hnawksak tlat. Mahse, a fahrawn a ni miau a. Tin, Teteii hian a tilawm thiam lutuk tlat. Nunui ai mahin a hmangaihin a enkawl thiam zawk. Chuvangin a thlauhthla ngawt thei bik lo. 

Muthmunah an nu bulah a fapa nen an inbiak dan chu a sawi a. 

"Ni e, ka hrethiam lutuk, a nei duh dawn lo tihte chu.. Ka buaina zawk chu naute hi lo piang ta se, tu nge a pa tih zawhna hi engtin nge kan chhan ang" an nu chuan a ti a. 

"A pa hming an hriat chuan kan mualpho dawn tho tho.. Amah Teteii hian eng rilru nge a put ve? " pu Vanlala chuan a ti a. 

"Tihtlak te a sawi ut ut a. Ka remti si lo.. Ani pawh a rilru a hah ve khawpin ka hria. Ani chuan inneih mai a hnial hran lo" an nu chuan a ti a. 

"Dinfela hi kan tilui thei bawk si lo, nau hi lo piang se, a rilru chu a danglam tho ka ring" a ti a. 

"Anih Diteii chu i la zawntir reng em? Chanchin thar engmah a la awm lo em ni? " an nu chuan a ti a. 

Pu Vanlala chuan, "Umm awm rih lo. A kalna tur awm ang chu an en thla reng a, mahse, hmuh tur a awm lo a ni. Lungngai suh, kan zawng hmu em em ang. " a ti dam thlup a. Diteii zawng turin mi eng emaw zat a ruai tih hi an nu nen bak an hre lem lo a ni. 

Dinfela chuan phur lo zetin a kawngka rawn kiktu chu, "Lo lut rawh" a ti zawi raih a. Teteii chu tim dai hian a lo lut a. A chauh hmel viau, a dâng em em bawk. A rilru chu a hah ve deuh a nih hmel. 

"Engtin nge ni dawn? " a ti sap a. Dinfela chuan thawh kan pahin, "Eng tin vak nge niang, i duh a. I rai a. Ka mawhphurhna i ni lo ve" a lo tihkhum a. 

"Mahse, i fa a nia"

"A ni takzet em tih pawh kan hre hleinem. Chuan, ka nei dawn lo che. A chiang em? " a ti ta khal khal mai. Teteii chuan inhumruh chungin, "Miin a pa min zawt dawn asin"

"I sawi mai ang chu.. I buaina a lawm.. " 

"Mahse, Dinfel, min neih chu ti nge i hreh viau a? " amah pawn zak lo a inti reng, mahse, neih ngei a duh si a ni. 

"Hmeichhia ka hriat tawhah i la zak thei lo ber.. Nang neih che ai chuan thih a tha zawk" a lo ti hmiah. A rilru nghet lutuk chu tihdanglam rual ni pawhin a lang lo ve. Beidawng zetin Teteii chu a chhuak ta hna hna a. Mahse, beiseina tlem erawh a la nei. Nau a piang anga, Dinfela chuan a fa vang chauh pawn a la pawm theih a beisei deuh. Diteii lah hmuh tur a awm rih lo va, chumi chhung chuan a inchingfel hman em ang chu. 

Diteii te pawh film lamah an insawrbing dawn tan a. A cher chhiat hman em vangin Puia'n a work out pui thin. Ei leh in a tui chho ve tan ta bawk a, tlem chuan hmuh a nuam chho ve deuh. March thla vel atanga shoot an tum a, mi dang pawh Puia'n a dawr tan mek. Ama duan a ni a, a uluk bawk a, a hit viau a ring. Ni khat chu Bena nuin Diteii chu a lo bia a, "I thianpa hi rawn hmu thei la ka va ti tak, hei a kal mai dawn niin ka hria. A chau tawh khawp mai" a rawn ti a. Diteii mittui a hnam sawk. Bena chu a theihnghilh ta a ni lo a, a chhuak thei rih si lo a ni. Mahse, eng pawh ni raw sek sek, Bena va hmuh chu tul a ti ta lutuk. Puia bulah a sawi a. A va kalpui thei dawn hlauh. Pawn boruak chu a hip vang vang a. A khawr tut ten a inhria. A tawm rei bawk a ni. Bena te in an va thlen chuan inleng dang pawh an lo nei tiai a. Anu chuan a lo dawngsawng vat. Bena roomah a luhpui ta nghal a. Diteii chu a ding chawt. Chuti em ema mihring cher, dam lai ni bawk si chu a la hmu ngai lo. Ruhkawl a ni ringawt. A vuin a la tuam ve der der chauh. A insum zo ngang lo aniang, a va kuah thlawp a, a tap ta. Puia pawh chuan lainat zetin a lo melh ve tlawk tlawk mai. Bena chuan chunglam a melh reng a, a mitmeng chu a fim em em thung. Eng natna nge a neiha a chungah eng nge thleng tih tuman an hre thei bawk si lo lai hi a mak em em a ni. 

"I dam a ngai. Film kan chang dawn asin" Diteii chuan a ti a. A lu chu a chulsak heuh heuh, Bena chuan zawimuanga a lu rawn herin Diteii mitah tak chuan a rawn melh ta kuau a. A rapawm lek lek. 

"Min hria tiraw.  Keimah Diteii, i best friend kha" A lo ti var a. A nui sâng bawk. 

Zawite, fiah zet si hian, "Dite" a rawn ti ta!  Diteii a zuang lo chauh. Bena nu a ko ta chul a. An rawn tlan lut hlawm. "A tawng ania.. Min ko.. Min hria, awii Lalpa, ka lawm e" a mittui hru chawt chawt chung hian a ti a. Bena chuan a rawn melh vawng vawng. 

"Ka hre reng che alawm.. Ka thian tha ber i nia" a rawn ti leh. Bena nu tap bawk, A unaute lah tap ri loin an inhru mawlh mawlh bawk. Ni e, a tawng lohna a rei tawh em a ni. 

"Bena, i dam dawn.. I dam dawn tiraw.. Thil ei rawh aw.. " a ti mawlh mawlh a. An monuin ei tur a va la nghal. Bena chu an thut muttir a, Diteii chuan a barh ta a. A ei tam lo naa thil a ei hrim hrim chu an lawm. Beiseina an nei leh ta. 

"Dite, a mak em mai. Engtin nge hetia a awm theih le.. I rawn tidam a ni ringawt alawm.. Ka lawm em mai" Bena nu chuan a ti a. An hmel atang chuan an lawm takzet tih a hriat reng mai. 

Bena bulah thuin, "Bawiha, film kan chan a ngai tak tak ania aw.. I dam vat a ngai.. " Diteii chuan a ti leh a. Bena chu a khuh kharh kharh a, "Min chhuahsan leh chuang lo vang. A lo kal leh tep ang" a ti ta a. An hawi â vek. 

"Tu maw lo kal leh dawn" ngaihtha vak lo hian a ti a. 

"Amah kha, kha nu kha" a lo ti ringawt. Rin dan an nei ta. Chenchilhtu a nei tih chu a chiang ta phawt. 

"Tu nge chu nu chu? "

"Ramthari kha.. I hre lo maw.. Aw hei a lo kal leh tawh" tiin Bena chu a khi ta vur vur a. A hma zawn chu a melh bawk. Diteii chuan a bana va vuanin, "Bena, hnar rawh. Inchenchilhtir tawh suh. Khawngaihin" a ti mawlh mawlh a. Mahse, Bena mitmeng chu a buai leh vek tawh. A tawng duh tawh hek lo. Tu nge Ramthari tia an han inzawh chuan nikum kum laihawl vela an veng nula inawkhlum kha a ni tih an hre ta.. Ni e, Bena pawh a thlanah a thut thin tak kha.. An ngaihtuahna a kal thui tlang ta kher mai. 

An hawn kawngah, "U Pui, U Dinfela i hmu ngai em? " a ti sap a. 

"Hmu ngai miah lo. A awmbo mawni ka ti" a lo ti a. Puia in an thleng tep tihin, "Dite" tia rawn ko tuar ri an hre ta. Puia a break hrâwk.. Diteii pawh rawn autu lam chu a hawi zui nghal. Kawng rawn kan phei mektu a hmuh chuan a thaw halh. A tawpa tawpah chuan.. 

"Dite" a rawn ti dam thlap. A hmel chu a lang upain a inzuah chhup mai. Mahse, Dinfela mitmeng erawh a la ngai reng. Diteii chuan melh pawh melh loin, "Tu nge i nih ka hre lo ve" a lo ti hmak a. 

"U Pui, kal ang" a ti zui nghal bawk. 

"Kal suh.. Khawngaihin" a rawn ti. Puia chuan awmngaihna a hre lo kher mai. Puitling takin, "Dinfel, hetah ni lo ka inah inbia ula a that ka ring. Lo chuang rawh" a ti ta a. Diteii ang ziau chu mitmeiin a khap bawk. Boruak inmung reng leh kap tlattu awm reng chu amah Puia tak pawh hian a ning tawh a ni mahna. Dinfela chu ihe loin a thu lut ve nghal. Puia in an thleng a, an lut diak. Puia chuan, "Tikhan lo inbe ru, tha takin in buaina sawi ula, kei chu studio-ah ka chho lawk dawn" tiin a chhuahsan ta nghal a. Thutthleng seiah inhlat zetin an thu dun. A reh ngawih ngawih mai. 

"Hetah hian maw i lo chen? " Dinfela chuan a ti ta a. 

"Aih, a chung berah khian" a lo ti ve mai. 

"Ka zawn nasatzia che i hria em? " 

"Hre lo. Zawn ka ngai hleinem"

"Hun min pe ve ta che.. Ti nge engmah ka sawifiah hmain i kal"

"Sawifiah a ngai em ni? Engkim a chiang vek tawh alawm" Diteii chu a tap lek lek, A huat tehlul nen a bula a la danglam reng chu a inhua. 

A kut a rawn vuan a, a lo thing thla vat. 

"Lo haw rawh.. Khawngaihin.. " a ti tham tuak a. 

"Hetah hian ka tha zawk" a lo ti ve hmak. 

"Teteii khan min hrai alawm.. Damdawi hmangin, kha thil kha ka duhthlanna a ni lo asin" Dinfela ngenngawlzia chu a khawngaihthlak takzet. 

Diteii chuan, "A tlai tawh.. Engkim a tawp vek tawh.. " a lo ti chuai raih. A rilru chu a nem leh tan tawh reng, mahse, video kha.. Ni e, hlim takin an awm dun thei kher tawh lo vang. Sex kher kher zawng a palzam thei lo. 

"Hun min pe rawh.. Khawngaihin, i rilru dam hun ka nghak thei. Mi dang tan ka phal lo che" Dinfela chuan beidawn hmel zet hian a ti a. 

"Ni lo ve, Teteii kha tha takin enkawl zawk rawh. Kei chu ka tha.. Pasal pawh ka nei dawn lo" a lo ti ve tlat. 

Dinfela a thaw hawk. Diteii kut chu a va vuan leh a, lo tang teh mah se, nghet zetin a hum ve tlat, "Hei hi hre reng rwh. Min ngaihdam theih nan engpawh ka ti ang. Kum 10 pawh nghah ngai mah se, ka nghak ang. Ka ta chauh i ni" a ti ta hmiah a. Diteii chuan sawi tur a hre lo. 

Puia a rawn lut a, Dinfela pawh a chhuak zui ve nghal. A chhuah dawnin Puia hnenah, "Tha takin lo enkawl rawh aw.. Khawngaihin" a ti zauh a. Puia pawh a bu nghut. 

A awmna a hre tawh si. Nitin deuhthaw a rawn lang ta mai. Diteii pawh chuan a lo hmachhawn ve tawp zel. Hnar a sawt miau si lo va. A rilru erawh a la tikhauh ve tlat. Chuti maia let leh a tum bik lo, a chang chuan naupangchhia takin a lo runluih ve thin. Mahse, Dinfela chuan rawn kal a thulh phah chuang lo. An training leh tep tawh a, an inhmu lo vang vang dawn si, a zin hma ngeia hneh a tum nge a birh ve tlak tlak khawp mai. In lamah pawh Dinfela pheikhai zang ta riau chu mak an ti a, a chhan an hre lo. Diteii a hmuh thu a sawi bik si lo. In luah hran erawh apain tihtakzeta a ngen avangin a la insawn chhuak em lo va. Inah erawh a awm tam vak lo. Teteii pawh raino a haw chho tan a, a thinchhiat sa nak alaiin a thinchhiat belh chu tawrhhlelhawm tak a ni. An awmpui ten an tuar ber. A rilru a chawl lo ve bawk a, a cher kuam mai. Nu na na na chuan fate chu lainat a lo awl aniang e, anu chuan a duat leh tawh khawp mai. Nunui erawh a chhuak deuh reng a, bialpa thar neiin nun a chen ve leh mek a ni. Teteii leh Dinfela mudun erawh mak a ti ve reng, a ngaihtuah ve nasa thin. Teteii chu a rukin nasa a ti ve tho, mahse, dik tak chuan tihthinrim a hlau!  A chhan pawh a hmain an thu a inhmu lo va, an inhnial vak tumin, "I nundan zawng zawng ka hre vek, ka puanzarsak che i duh loh chuan ngawi hmak rawh. Keo chu min sawi mah la mi rindan sa a nia, mak an ti dawn chuang lo. Nang erawh kohhrana inhmang, a langa fel leh zahawm i ni si a, i chet dan dik tak an hriat chuan rapthlak an ti ngawt ang che" Teteii chuan a ti a. Chuvang chuan Teteii tihlungnih loh chu a hlau ru tlat tawh. A che tenawm ve bawk si a. 

"Dite, i inpeih em? Lo chhuk tawh la" Puia chuan a rawn ti a. Darthlalanga va inmelh zauhin, "Aw ka hman a ni mai" a ti a. A chhuak zui nghal. Studio a zuk thlen chuan a film chanpui turte chu an lo awm thap tawh a. A hriatsa chu pahnih lek an ni. A bak chu atan mi thar vek. Puia chuan thupui fun takin an kal dan tur leh channa hmun tur te a han sawi a.Chutah an role tur a han sem ta diat diat a. Changtupa tur chuan Diteii chu rawn nuih var var a, ani pawh a la naupang ve hle tih a hriat. An inhmeh reuh ngawt ang. Diteii thiantha ber tur pawh chu a fel hmel khawp mai. Bena a hrechhuak lo thei lo thung. 

Zanah Puia a han chho va, Diteii chuan a role tur kha a lo chhiar leh mek a. "Dite, hrilh che ka hreh viau naa, mahse, hre vek law law la ka duh, Teteii a rai a" Puia chuan a ti ta a. 

A thinphu rawn rang thut chu Puia chuan a hria ang tih a hlau hle. A nui lui a, "A tha lawm.. ' a ti tawp. Tha erawh a ti lo nasa. Dinfela fa ngei paitu a u chu a hua. Ani chuan Dinfela fa a pai bik a, chu ringawt pawh chuan a tina vawng vawng. A kum tam ve deuhin thil nihphung hria ni se Teteii hian a chhaih buai reng thei awm si lo. Mabse, Teteii fin a chelh lo va, a thangkamah a awk fó bawk. Tunah erawh a zalen ta a, a rawn tina phak tawh lo. Mahse, a na tho. 

"Film kan han chang chho ang a, i natna chu i theihnghilh vek mai ang" Puia chuan a ti ringawt a. Diteii hmelah a na a ni tih a lang miau si a. 

"U Pui, ka na lo. A ho lutuk" a lo ti ve hliai a. Kar tharah Hmuifangah an va kal ang a, scene khatna an va shoot dawn a ni. Dinfela pawh chumi karah chuan a zin thla ve dawn chiah. Puia chuan a biangah a rawn piai zauh a, "Tuman an tina tawh lonvang che. Ka awm alawm" a ti sup a. Diteii a nui tawp. Puia chu a tan a hlu em a,a thu awih loh leh tihlungnih loh a hlau tawh zawk. A lakah a thain a fel em em reng bawk si. 

"Zawngi, uichonu, chhuak rawh.. Kal rawh" Lawma chu a pawr kher mai. Teremi sam thur bamah chuan kek lawpin, chhuatah a hnuk kual ta a. Teremi a rak nasa mai. Inleng thenkhat chuan an lo pawt hrang ta vat a. 

"Lallawmzual, i duh duha i khawih theih ka ni lo aw. I va zak thei lo ve" lungchhe aw lek lek hian Teremi chuan a ti khur dat dat a. 

"Uirenu, i uire hi a mak mai mai lo. Ka lo nei che hi ka inchhir ngawih ngawih. Kan nupa khumah ngei mipa i mutpui thei chu ania.. Ka awm lai rengin" Lawma aw pawh a khur ve tho, a rilru a na hle a ni mahna. Ni e, tlai atangin zu a in rehg a, a chatthla ta nge nge a. An sitting room thutthleng seiah a mu hnar kuk kuk a. Inleng neuh neuh awm mah se, kaihthawh enah an en lem lo. Mahse, zan dang ang lo takin dar 10 bawr velah a harh ta thut a. An awmpui Zawrtea chuan zu a lo hralh mek. "Khaw nge Teremi" a tih chuan, "A mu tawh" a lo ti a. Awmpuite kuta zu dah chu fuh a ti vak lo chuvanga Teremi awmna zawt a ni. A mut ve duh chuan, hralh chhuah tawh loh mak tur a nia. Room chu a lo inkalh si a sawi dawt dawt a, a inhawng thei lo. Reife hnuah Teremi chuan pawr fapin a rawn hawng ta a thil danglam em em a la hmu lo.. Zu vel chu hralh chhuak tawh lo tur leh inleng te pawh hnar haw turin a hrilh a. Amah chu khumah a let nghal hawl. 

Teremi chuan zawrtea kut atangin pawisa a dawng a, a chhiar vel mek a. Lawma muhil hleithei tawh lo inlet kual chuan sana a delh fuh ta a. Mak a ti deuh, Teremi nen sana an bun ngai lo ve ve. Tu ta tak ni ang maw a tih ruk mek laiin Teremi a rawn lut a. Zu a rawn keng bawk. "Kha in la, i muhil leh  mai ang" a ti. Ni dangah a zu in nasa lutuk chu an inhauh phah fo si a. Mak a ti leh ta bawk. Sana kha a thukru daih a, rindan a nei a, a zeldin kual ta bawk. Teremi zu lo lak chu a in khalh khalh a, rui deuh angin a lang kual ta vel a. Room chu a chhuahsan duh hauh lo. Inleng tam zawk an tin tawh. Teremi chuan a rawn ngaihven deuh reng tih a hria. No 2 lek a in zawhah a chatthla ta der mai. Teremi rawn lut them thawm a hriat hnu lawkah khum hnuai atang chuan thawm a rawn awm ta a. Lawma chu a meng kawk, Teremi leh Mipa lo ding dun chu a hmu ta. A tho nghal var, Teremi phawkzia chu aw… thlawk thei se a thlawk daih ang. 

Chu chu an inman dan a ni. Teremi chuan, "Zu ngawlvei i nia, pa pawh i pa thei tawh hleinem.. I nupui hi engatanmah min ngai lo va. Ka duh danin ka awm ve a ni mai" a ti a. A tap hlap hlap bawk. A sawi dikna chen chu a awm. Mahse, uire kher erawh a tha si lo. Lawma chuan a khawih leh duh mai ang tih an hlauhthawnpui vangin Teremi chu chhuak turin an ti hlawm a. Teremi pawh chuan kawng dang nei bik hek lo, a chhuak ta a. Lawma chu pathlawi a ni ta reng mai. 

"Teteii a rai chuan nei ta che. I va sual ve" Diteii chuan Dinfela chu a melh a. 

"Nang ka nei thei lo che anih pawhin Teteii kher chu ka nei lo vang" a lo ti hmiah. Diteii chu a chhing sawk. Teteii chu a tan sual viau mah se, sawn a pai ta mai chu a khawngaih ve lek lek. Dinfela lahin a nei duh der si lo. 

"Ka zin dawn a. Nangin film i chang dawn bawk. Khawngahin tumah ngajzawng suh aw" Dinfela aw chu a ril reih rawih viau. Diteii erawh a ngawi tlat, a thinlung erawh chuan, "Tihian leng tar ve ve mai ang" a ti thung. Pawm leh a duh lo va, kalsan hlen a phal hek lo. Hmeichhe naupang hi a talbuai ve ta hle mai. 

(Duhtawk leh ang.. Ka nuamsam hlawl lo vawiin chu. A tawp tep aw.. Dteii…