D Rose 11

D' ROSE… (11)

Ziaktu : Toni Râlte

"Chhel takin lo awm la, School kha tha takin kal la; lehkhazir chiah kha ngaihtuah rawh aw. Modelling chu bansan hmiah rawh. Chuan, i sam kha zuah rawh aw" Dinfela msg chu nui chungin a chhiar a. Ni e, tunah chuan sum leh paiah buaina tur a nei ta vak lo. A mamawh tawk chu a ac-ah a awm ve tawh bawk. A theih hram chuan a nu leh a pahrawnte pur buai loh a tum ve a ni. Class xii pass vata amaha awm hran a châk ber. Pasal neih lam chu a la ngaihtuah ngai lo. Dinfela chu a tan mi hlu leh mipa awmchhun mah nise; an inneih theih tak tak rinna a nei thei ngai lo. Chu chuan a mut a titui lo fô mai. Nunui leh Teteii te pawn chimawm an chhuah kal reng a, mahse, amah leh amah infuihin engahmah ngaih loha namnul a tum ve tawp. Hrehawm mah se; damkhawchhuah a duh, Duati pawh la enkawl a ngai dawn si a. 

"Dite, chaw ei an siam aw.. " anu chuan a room kawngka kik pahin a rawn ti a. 

"Umm ka lo kal" tih pahin a uniform chu a pawt mar thuak thuak a. A chhuak nghal. 

Zing lamah chaw an ei rual vak ngai lo, Nunui hi dar 9ah te a tho thin. Teteii erawh nalh duh reng renga khawsa a ni bawk a, a work out ziah. A nalh reng bawk a. A pahrawn pawh zing atanga hna a thawh thin vangin tlai lamah bak chaw an eiho ngai lo. An nufa thumin chaw chu an kil a. 

"An la chhaih thin che em? In schoolah chuan" Anu chuan a ti a. 

"Chhaih tho a, mahse, engahmah ka ngai lo" Diteii chuan a lo ti a. Ni e, khatia a lar tak chiam hnu kha chuan an school bakah a khawlai kal pawh, "Zosangpuii bialnu.. " tih sep sep a hlawh thin. Zosangpuii nen an inkawmngeih phah ta hlauh thung a. A music video kha a hit phah zèk bawk. Model kha Diteii a ni ve kher bawk nen, viewers a ngah ta ber a, Hawkdak vang hrim hrim leh sel tur hrim hrima en an tam phah a ni. Mahse, Zosangpuii pawn zai lam chu a chawlhsan ta rih. Bansan hlen erawh a tum hran lo. A hmingchhiat zualpui a reh hnuah tha tharin bul a tan leh ang chu.. 

"Thuhrimin, zu te i in a, i che mawi lo em a ni.. I phutawk chiah alawm.. I û nij pawh a zahthlak, an sawi peih sia" Teteii chuan a ti hmarh hmarh a. An awmpui te chuan an rawn melh hrek hrek. 

"Zu a ni lo, juice alawm.. U Puia ten in vek tur an ti nih kha" a lo ti ve hlar a. Pi Zawmi (Diteii nu)  chuan Nunui leh Teteii zu heh rukzia a hriat vangin Diteii chu hauh a tum hran lo. A thusawi chu a ring hmiah bawk. 

"Engpawhnise, hetia insawiselna te hi chu a la reh chhawm ve mai ang. Mahse, nun uluk ula, tha takin lehkha hi zir phawt teh u. I pa pawh a zahawm" a ti a. An ngawi tlang ta rih. 

"Dite, Bena kan kaitho zo lo va, Hei tunah Civil Hospital kan panpui dawn" A chhuah hma deuhin Bena nuin a lo bia. A khur chhe lo chauh. Anu a ko vat a, khur hlawk hlawk chungin Bena awmdan chu a hrilh a. Anu pawh chuan, "Va inthlak rawh. Vawiin chu chawl mai rawh. Damdawiinah chuan kan han chho dawn nia" a lo ti a. Hmanhmawh zetin a inthlak. LalBena mai mai chu aw, nizanah pawh an inbe reng si a. Rilru hahna engmah a neih pawh a hre lo, ngaihzawng lamah nise Tki nen an inthen hnuah mi dang a la be leh lo hrim hrim a. Ti nge chutia a awm ringawt ang le.. A mak eee.. 

Anu nen chuan Damdawiin chu an pan a. An han thlen chhoh chuan a lo la harh lo va, anu chu a lo meng sen râm mai. Bena chu doctorin an en mek a, "Tun hnaiah a zia hi a dang hrim hrim, a rooma tawm tlawk tlawk te hi a duh dan a nia, chaw pawh a ei lo fö mai. A chhan ka zawh lahin ka tha reng, ka ei chak lo alawm.. Mahnia awm ka duh hi a ti mai zel a, nimin tlaiah khan a chhuak a, zanriah kan ei hnu fè ah a lo haw chauh a, apa phei chuan a hau nghe nghe. Tunlaiah mi an sual tawh a, zu te hi a lo in ve reng amawni le tih lahin zu rim a nam ngai lo va, rui angin a awm bawk si lo. Chuan dar 8 velah chaw chu amahin a va ei a. Lehkha ka zir dawn tiin roomah a tawm leh hmiah.. Ngaihtha deuhin kan mu, a tukah khan a thawh hun awmah a rawn tho si lo va, a dam tha lo mawni le ka ti mai a. Kaihthawh ka tumin a room a kalh bawk si. Ka ngaichang leh ren rawn a, mahse, school kal dawn thlenga thawm a rawn neih loh vangin ka ngaihtha loin a û hi a kawngka ka tihchhiattir a. Kan va lut chu tui deuha muhil angin a lo awm a. Ka va kaitho tur chu dik lo a awm tih ka hre ta nghal a ni" Tiin Bena nu chuan hnukulh teuhin a sawi a. Diteii a mangang kher mai. 

A thiantha ber, a neihchhun tak tak a ni a. Buaina a nei anih chuan a hrilh lo ngai lo. Tin, chutianga a danglam awm pawh a hre lo. Schoolah bak an inhmu thei vak tawh lo va, mahse, zanah pawh whatsappah an inbe fô tho. Ngaihthat lohna tur engmah a awm lo. Stroke vang a ni mai thei ni.. Chu chuan tlemin a tingaihtha deuh, thil dang vanga a rilru hah in damdawi a lo bar te a nih chuan hrehawm a ti dawn lutuk. Doctor ho chu an rei hrep lehnghal. Va luh ve an phal bawk si lo. Bena chhungkhat te pawh an rawn thleng tak tak mai. 

"Overdose a lo nia,a damdawi bar chu sawi ta lo mai ila; buaina eng emaw tak zawng a tawk a ni maithei.  in vannei hlauh zawk a ni. In va kaitho har ang tih a hlauhawm. Kan inchelh hman lo maithei a ni, mahse, tunah chuan theihtawp kan chhuah dawn nia. Tin, in hriat tur chu, mi pangngai a pha leh angem tih kan hre bik lo va.A damdawi hman saw a chak lutuk a, a thisen a fan hneh bakah a kawchhung lamah nghawng a nei nasa a.  Rilru pawh in lo siamfel sa dawn nia" Doctor thusawi chuan Diteii thinlung a nghawng na kher mai. A hlauh ang ngei ngeiin overdose maw lo ni a?! Engvang nge? Eng nge a chhan? Engmah a hre lo. 

Nileng deuhthawin Diteii chu Bena bulah a tal a. Anu eraeh chuan a hawnsan. Bena kut chu a chelh ran a, zawite tein a be reng bawk. Bena nu erawh a tap deuh reng mai. Bena hi an fapa naupang ber a ni a, fapa pathum neiin, a upa ber chuan nupui a nei ve tawh a ni. Chawhnu lamah an schoola Bena thian mipa thenkhat te pawh an rawn kal ve a, mak an ti ve khawp mai. Bena, mi harhvang, hlim reng thin, tawng duh leh ninhlei ve tak, chutia rilru hahna nei niawm taka damdawi hmanga a tlusawp mai chu hriatthiam a har bawk a ni. Diteii chuan a chhan a la hre êm ang chu maw.. Dinfela pawh a hrilh ve a, pawi a rawn ti ve khawp mai. Khua a thim dawn ta hial mai. Riah ve mai pawh pawi a ti lo. Mahse, Bena nu chuan, "Zanin chu ka riahpui ang. Dite, i chau lutuk ang, naktukah pawh school kal rawh aw. Banah i lo peng anga, duh leh eng kan la an loh chuan zan lamah i rawn riak ve zawk dawn nia. Tunah chuan i chhungte pawh an zahawm, zu haw phawt rawh.. " a ti a. Diteii pawh chuan riah luih hram chu a tum bik lo. 

"Nangmahin i haw ngam ang em? Bawiha ka call anga, inthlahtir rawh aw" Bena nu chuan a ti leh a. Dar 7 bawr vel chauh a la ni bawk a, "A ngai lo, ka hlau hleinem.  Taxi ka la mai ang" a lo ti vat a. Bena va melh lehin, "Lo harh vat teh aw" a ti sap a. A chhuak zui ta nghal a. 

Mi an la vei nuk nuk a, taxi lak kher paeh chu tulin a hre lo. Kea kal hi a support ve hrim hrim bawk a. Muangchangin an in lam panin a kal a. A ngaihtuahna a kawm nasa ngang mai. 

"Dite.. Dite" amah kotu lam chu â huihin a va hawi phei a, Puia a lo ni. Nui var var chunginna rawn pan a. An zin haw atang khan an inhmu leh chiah. Puia hi champhaiah a zin leh daih vang a ni pakhat. Tikhan an hmingchhe ta hrep bawk si nen, Biak chu an inbe zeuh zeuh tho. 

"Eng nge i tih? " a rawn ti a. 

"Bena kha damdawiinah a awm a. Ka kal ve a, Hei ka haw dawn chiah.. Nang eng nge i tih zawk? " a lo ti ve var a. 

"Bena chu a va zia lo ve.. Saw lai dawrah sawn ka nu bungrua ka lamsak lawk a. Ka va thlah dawn che mi? " Puia chuan nelawm zet hian a ti a. 

Nunui a mitthla nghal, a lu thing nar narin, "Aih a ngai lo.. Ka kal thei alawm" a ti chul a. 

"I ho thei, thil sawipui che ka duh bawk a. Hawh kal ang" tih leh kaih a rual ta mai si. Diteii tan pawh han hnial fun kha thil mawi ni hek lo. A thu lut ve ta thán a. 

"Dinfela nen in tha em? " Puia chuan hmalam melh chungin a ti a. 

"Tha a ni mai" a lo ti ringawt. 

"A that chu. Mahse, an inah te i awm sia.. Buaina a tling thei maithei ni" 

"Eng nge i sawi awmzia? "

"Mi ngaihah unau in ni a. Inngaizawng anga in awm chuan chhungkaw hmingchhiatna a ni dawn asin" Puia chuan thupui fun fe hian a ti a. 

"A dik ve reng. Nia, ka hrethiam tawh lo. Inngaizawng pawh kan ni loin ka hria" Diteii chuan a ti niah niah a. Puia nuih a lo za. 

"Chuan modelling i bansan ta bawk si a. Dite, hmabak i nei vak lo ania. Nangmaha din tum rawh. I tithei" Puia aw chu a ring thut. Diteii chuan va melh zauhin, "Class Xii pawh ka la pass si lo va, mahni kea ding tur chuan ka la upa lo em a ni" a ti a. 

"Ka pui dawn che lawm" a rawn ti sup. 

"Engtin"

"Ka studio chung ber saw a ruak a, i duh chuan i luah thei ang. Mahse, hna kan thawk dun zel ang.. Kan inpuitawn a ni mai. Zirna hi chawlhsan law law mai la, duh leh open atangin i exam mai ang a.. " Puia chuan a thiltum dan chu a hrilh ta a. Diteii chu a ngawi ran mai. A inngaihtiah buai hle. Thlem sam tawk leka la naupang rilru hmang thiam vak lo a ni si a. Puia hian rilru kawi a pu hran hauh lo, mahse, Diteii khatia a lar hluai hnuah phei chuan a tan Diteii chu a tangkai sawt dawn tih a hmuthiam vek. Tunah hian project pakhat a nei mek a, Mizorama la awm ngai reng reng lo, movie siam a rilruk a ni. Chutah chuan Diteii hi a lan ngei a ngai, a film vawrhlar nan ani tluk an awm tlat lo. Diteii hmingchhiatna kha a hmang tangkai dawn a ni mai. A chhan chu Mi tam takin Diteii ei lohsa tum leh chîk tum reng rengin a film chu an ensak dawn tih a chiang, chutah chuan hlawkna a tel thei dawn thung a ni. 

"Zirna chawlhsan ngawt chu ka theih ka ring lo. U puia chu i sawi har e, kan in ka chhuahsan hma te khan sawi tur a nia. Tunah te chuan ka nu te an zahawm ve tawh a, chhuah ringawt chu" Diteii chuan a ti hliai a. 

"Mahse, ngaihtuah teh, Dinfela lo haw ta se, unau angin in awm a ngai dawn sin, i awm hrang anih chuan hmeichhia leh mipa angin in inlen pawh thei ang a. Chu ringawt pawh chu a tha asin.. Ka nawr lo vang che. Ka hmanhmawh lutuk lo, lo inngaihtuah la, i thutlukna min hrilh dawn nia. Film industry leh modeling hi eizawn nan a tlak ve tawh ania,. Zirsan vaka hna mumal hmuh loh ai chuan.. Hrethiam em? " Puia chuan a ti dap dap a. Diteii pawh a bu nghat nghat mai. Tunah hian Dinfela chu sawi tel ta lo ta ila, chhungkhat tak tak amah hnaiha hrethiamtu a nei miah lo. Anu pawh a nu a ni ve satliah ringawt a. A ngaihtuahna leh duhdan engmah a hre lo. Teteii lah a laizawn neihchhun ni tawh mah se, hmelma ang maiin an awm si. Lawma te lah belh tlak miah lohin veng tlabirh takah zu leh sa nen hun an hmang mek a ni si a. Amah maia a damkhawchhuah hi chu a la ngai dawn hrim hrim. 

An in kawt an thleng a, "U Pui lo chhuk ve suh. U nunui'n min hmu palh ang" a ti sar sar a. Puia nuih a za ru hle. Diteii chu a chhuk a, an in lam a va hawi chuan in chung bathlar atanga rawn en thla rengtu chu a va hmu nghal. A rilru a hah lawk tawp. Puia pawh a tlan zui nghal daih. Zanriah an lo ei tawh a. A ril a tam vak lo naa ei loh ngawt aiah tiin thleng a chawi a, tlemte a ei ve. Thleng a sil laiin Nunui chu a rawn chhuk ta a. A melh duh lo lui tlat!  Teteii erawh a lo la haw lo thung. 

"Ka u leh Puia hi kawp i tum deuh em ni? Ka u bulah engkim ka sawi dawn. I tenawm reuhzia hi" Nunui aw chu a ring hran lo naa a thinrim hle tih a lang. 

"U puia hi ka ngaizawngi lo. Ani pawn nau angin min en" a ti ve hmak a. Nunui chu za lo zetin a nui, "Nau a?!  Haha.. Puia mizia i la hre tawk lo anih chu. Saw mihring sawn c*** nei tawh phawt chu a duh vek aw. Nang pawh hi a lo bawhbet tawh lo che maw? " zahpah hlek lo hian a ti ta a. Diteii a za ve zak, "Virgin ka nih hi. U puia chu chutiang mi a ni lo. Nangman a nih kha then zawk, ti nge min thik ve ringawt" a ti ve hmiah a. 

Nunui chuan a kut kuangkuahin, "Sorry, patil i ni tak e, hmeichhia bak i ît hleinem.. Mahse, Puia hi chuan siam nulat che a tum tih a chiang reng. Ni daih ru, ka u nupui atan chuan i tling lo" a ti a. A aw chu a rin tak deuh vangin pu Vanlala te pawh an rawn lang ve vat. 

"Eng nge awmzia ni leh ta? " a ti dam thlup a. 

"He i fahrah rawn hawn hian ka ex a lo kawp leh hman a, ka u tana rinawm turin ka lo zilh mek anih hi" Nunui tawngkam zet chu! 

"Dawt anih kha. U Puia saw ngaihzawng enin ka en ngai lo. U angin ka en aw. U Dinfela pawn a hre vek" Diteii chuan a lo ti tlat. 

Pi Zawmi chuan Diteii melhin, "Vawikhatmah Puia saw hmu tawh suh ang che. I hmu leh tih ka hriat chuan ka hrem khawp ang che.. I u bialpa hlui, mi rinawm lo anih saw. A hna thawhsak pawh a ngai lo. Lehkha hi zir la a tawk" vin deuh hlek hian a ti a. 

"Hmuh ka tum pawh ni hran lo sin" a ti hman chauh a, "Ngawi rawh. Khatin nu leh pa kan chhang ngai lo. In chhungkaw zia rawn phawrh suh" Nunui chuan a lo ti thawt. Diteii chuan a ngaihna hre vak loin a dar a san âk a, a roomah a luhsan ve hmiah. An hrilhhai letling. 

Bathrooma darthlalang hmaah chuan dingin, "Tumah hlau tawh suh. I dika i rinawm anih phawt chuan i tan hlauh tur an awm lo ve" tiin amah leh amah a inbia a. A inbual ta sar sar mai. Ni e, an tawngkhum reng a, mei nei zet zetin. Chhan ngaihna a hriat ve ngai loh vangin dik lo zawk hmuhin an hmu reng a, tunah chuan a danglam ve tawh ang. Duh leh hnawtchhuak daih se la.. Puia bulah a awm thei tho.. Mahse, puia bul tih lai tak chuan a tibuai deuh. Dinfela a ngaihtuah a, a lawm a ring miah lo. A mut dawnah an inbia a, Puia nen an inbiak dan chu a sawi ta nge nge a. 

"A teuh lo. I awm lul lo vang. A vehthlem che a nih kha.. A ngaizawng che,. " a rawn ti lung lung. 

"A mak, min ngaizawng lo" a ti hlak. 

"Mipa ka nia, ka mipatpui rilru leh awmdan chu ka hre ve.. Tha takin lehkha kha lo zir phawt teh" a rawn ti a. Dinfela thu zawm loh chu a tum bik lo. A hlauh vang ni loin a thlavang hauha engkima buaipuitu a ni a, a zah ve a ni. Tin, a bialpa a ni bawk.. Hmm.. Bialpa si.. An inbiak dan hi a thlum vak ngai bawk si lo. Inngaizawng dangte hi tiang hian an inbe thin mawni le.. 

Muthmunah erawh Bena chauh a ngaihtuah. Harh vat se, a damdawi bar chhan chu a hre chak tawh. Eng tak ni ang maw.. 

"Pui.. Min lo hruai mai teh.. Ka kai mah mah.. Mi dang ka ring zo si lo" Teteii chu a aw atang ringawt pawn a kai tih a hriat. 

Phur vak loin a tho va. Teteii nen hian an inhmu khât ta hle. Diteii vangin a hlat ta tih a hre reng. Tuna a belh tak photographer hi a mi hriatchian a ni a, Teteii nen pawh hian an inchulnel fe tawh a ring. Tin, Teteii hian sum a dawng tam lem lo tih a hre bawk. Show tenauah ngat phei chuan va inthehlar bak kha hlep a nei vak lo. Lar a chak a, a lar reng bawk a. A duhtawk a ni maithei. Teteii sawina hmun chu a va thleng a, in chhungah lutin sofa-a lo mu zawi hnuang chu a kai tho a. Mi dang pawh an awm tho va, an rui tlang hle. 

Teteii chu kuah chhuakin motorah chuan a thuttir a. 

"I inah ka riak mai ang" a la ti zui!  Puia a ner sak. Kha chen an lo inkawm ve tawh si a, thlauhthlak hmak chu a hreh ve si. A in lam chu a panpui ta a. A studio chung chiah hi a luah ve a ni. A awm hranna a rei tawh. Chutihrualin an inpuiah pawh a la kal reng tho. 

Sofa-ah chuan a muttir a. Kalsan mai a tum chu a lo pawt tlat, "Pui, tlem i la nei em? Ka awm dan hi a laklawh, ka zawi vek sia.. Tlem tihbelh ila ka zia ang" a ti a. Puia pawh chuan a neihsa chu phawrhin a intir a. Amah pawn a lem ve hlek. Teteii chu a kai tha leh tih mai turin a dak leh par par tawh a. A tha a zat hmel viau. Puia pawh a kamnam chho tan bawk a, a hmaa a phur lohna kha a reh ta deuh. Zan a rei lam ta bawk a, "Ka mutsan tawj ang che" tiin a roomah a luhsan ta a. 

Zing lam dar 2 velah a room kawngka chu a rawn kik leh dawt dawt. "Pui, ka mu ngam lo ka hlau" a rawn ti. Phun hluk chungin a va hawng a. A khumah chuan a mu ve hmak. Puia chuan Teteii rilru chu a hrethiam. A hrethiam daih tawh a, chet lak a duh lo mai chauh kha a nia. A zu in bang chu a va lem sauh sauh a, khumah chuan a mu ve ta hlun. Teteii chu kuahin a lamah a kuaiher a, mipain hmeichhia a sawngbawl dan tur diktakin a sawngbawl chho ta. Teteii lah a vawikhatna ni lo nafam chu a zei hlarh hlarh khawp mai. An lo ck zuai tawh naa sex èm an hmang hman lo kha a nia. Tunah chuan a tawp an thleng ngei dawn e. 

"Nunui hrilh suh aw.. Min haw dawn lutuk" Teteii chuan a ti niah niah a. 

"Ka hrilh ten.. " a lo ti ve mai. Chet a la sauh sauh a, mak deuhin Diteii a rawn lan atang khan hmeichhe dang a ngaihven hman ta mang lo kha a nia. Nunui kha a ni tawp a, ani nen lah boruak tha lo an nei deuh reng si. Sex hmang zeuh zeuh mah se, hmana Puia ai kha chuan danglam tawh tak a ni. A hrisel a, a hur bawk. A châkna leh a râwpna te chu Teteii-ah a hrithla ta hmiah hmiah mai. An thawm pawh a ring. Mitmei ven tur awm hek lo.. Puia chuan Teteii chu eng hmuh mahin hmu lo mah se; chutianga a châkna hrikthlak theiha a lo awm chu manhla a ti viau tho mai. 

An zawh hnuah Teteii chuan a kuah chial a. "Pui, kan inngaihzawn theih i ring em? " a ti sar sar a. 

"Ka hre lo le.. Kan inhrechiang em a. A harsa maithei" a lo ti sup. 

Teteii rilru erawh a hrethiam hauh lo. Puia'n film a siam dawn tih a hriat atangin chet lak theihna remchang a dap char char tawh. Diteii sawm a tum tih a hriat phei kha chuan a za sek tawh, Puia chu hneh ngei a tum. He movie bawn takah hian a changtunu nih ngei a tum bur mai a ni. Chuvang ania Puia hmaah a zangthal ni.. A bultanna chauh a la ni zui!  Dinfela a chang tawh lo ta sa sa, Lar a duh. Lar belh zela nuamsa hek hawka awm a duh. Mahse, an hlawh a beitham a, zirlai mai a la ni bawk nen, Patling pahnih lai chu a rukin a kawp ta reng bawk a. Mahse, tuman an hre lo. An ni hian a mamawh zualpui an tumsak thei a. A hautak nasa si a, engkim branded vek a duh, a duhthawhna chuan a hruai thuk ta hle anih hi.. Diteii aia dinhmun sang zawka awm zel a duh vang a ni mah zawk. Ni e, a nau hi a thîk a hua. An ina a lo awm ve hi amah aia pawiti an awm kher lo vang. Amah aia a tlatlum anih ngat phei chaun a thi duh hial ang tih tur a ni. 

Diteii chuan School a thleng a. Dar a ri nghal. Bena thutna a va melh, a ruak huai si. A na zawk mai. Nikhaw hre lo vin a la let reng mai si a. An class ho pawn Bena issue vang nge an chhaih vak lo. Amah a ngawichawi bawk nen. Puia pawh a biak vat a ngai, a lo ring ve awm si a, Dinfela a pal lui ngam chiah si lo. Nilengin engkim chu boring a ti zet mai. An bang ve ta hram, hmanhmawh takin Damdawiin lam a pan nghal. Damdawiin kawtah Teteii a hmu nawlh lehnghal. Nizanah a lo haw lo va, zingah a lo haw leh hma siin school a kal daih bawk si. 

"Eng nge i tih dawn? " nelawm vak lo hian a lo ti a. A bula mipa ding chu photographer lar zet, Apuia a ni. A en duh viau lehnghal. 

. "Bena ka kan dawn" a ti mai a. A kalsan nghal daih. 

"I nau kha tiraw, live-a ka hmuh vawikhatna, a va chhe lo reuh " Apuia chuan a ti sur sur a. Teteii chuan a chil a lem khawlh. Ti nge amah aia Diteii chu an ngainat zawk ziah le?! Hrep taka.. 

"Nia, mahse, mipa a ngaizawng ngai lo ania" a ti ram hmak. 

Apuia chuan nui huah huah chungin, "A zia dawn e, A thla ka la laksak ve chiang khawp ang" a ti ta a. Teteii erawh a khur der der. A thinrim apiangin a khur thin miau a. 

Bena chu a lo harh tawh a. Harh tawh tih lemah a tawng duh miah lo thung. A meng kuau a, tumah hmu awm pawn a awm lo. A melh ngai a melh reng ringawt. Diteii chuan a ko mawlh mawlh a, a rawn melh hû. A hriat loh hmel tawp. 

"Tikhan min melh suh, i best friend ka nih hi aw.. Benjamin" vin deuh hian a lo ti a. Bena nu chuan lainat zetin a lo melh vawng vawng. 

"A tawng duh miah lo hi a mak ka ti em mai. Kan thusawi hi chu a hriat tho ka ring, Doctor kha chuan be buai rih lo ula a tia" Anu chuan a ti a.. 

"Umm nia a tha mai ang. A lo harh tawh hrim hrim hi ka lawm" Diteii chuan a ti ve a. A dam lo ber tawng duh hek lo, Bena nu nen chuan an titi ta vel mai mai a. Bena nu hian fanu a neih loh vang nge Diteii hi a fanu ang chiahin a en a, Lawma te chhuah dawn pawh khan an hnena awm turin a thlem reng. Mahse, thian te ina awm ve ngawt chu tlawmah a la ve tumhrang a, anu ten an rawn ngaihven ta bawk nen. Engtikah emaw chuan belh hun te pawh a la nei maithei a ni. Khaw thim hmaa in thlen a duh vangin a haw ta a. Bena pawh a tha ve zel ang chu maw.. 

In a lut chiah tihin a ding chawt. A thil hmuh chu a awih lo kher mai. Choka dawhkan bulah chuan Dinfela a lo ding reng nia!  A awmdan a theihnghilh vek. A lai hûih mai. A rawn nuih sâng mai si. A inbual zo chiah aniang, a sam te chu a la hnawng chhap. A rawn surprise vel chu Diteii chuan a ngei lek lek bawk. 

"Lo kal teh" tiin Diteii roomah chuan an lut dun a. 

Khumah a nam thu a, "Ka ngai tawh lutuk che a. Ka lo haw tawp" Dinfela aw chu a thûk hle. 

"I zak lo" a lo ti hlak. A lai ngawih ngawih. A ngaih ve thozia erawh a sawi ngam der lo thung. 

"Tak taka buai a awm deuh vangin training hun an sawn leh a, nakkum kumtirah thla hnih ka zuk awm leh ang a, a bak chu i bulah.. Hetah" a ti a. Diteii biang tai tèk chu a piai zauh bawk. 

"Ih,. Ka inbual dawn.. Chhuak teh" Dteii chuan a ti hluai a. 

"Infawp phawt ang" 

"Aih.. Thlan rim te ka nam si,. Ka duh lo"

"A ho chutiang.. Khawi". a rawn kai tho zat. Diteii chuan a chhoh en hâ a. 

Mitmeng thuk leh tak zetin a rawn melh chhuk ran a.. Diteii hmuiah chuan a fawp ta a. A lo chhanglet ve thiam lehpek lo. Mabse, engtin emawni a awm. 

A sama tuai thurin, "Inbual zo vat rawh.. Ka ei zo chak tawh che" a ti sup a. A chhuak ta a. Diteii a thaw hap. A kut a lo hum ruh vak mawle.. Huiham. A inbual lai te chuan a lo nui leh vur vur zel a, a lei a chhuah leh thul, amah chu a ni hûuih, a sawi thiam bik lo. A hlim aniang. Bena pawh a hrechang rih lo. A inbual zawhah zanriah ei a hun nghal a, zanin chu an kim thap mai. 

"Dite, Puia ina i sana theihnghilh kha ka rawn hawn tak aw.. " Teteii chuan chawhmeh suah pah chuan a ti a. Diteii a hawihai kher mai. 

"Eng nge Puia inah i va tih a? " Nunui chuan a rawn melh rum ngang mai. Dinfela pawn a rawn en. 

"Ka kal teuh lo mai. Tun hnaiah phei chuan a studio-ah pawh ka kal ngai lo. " a lo ti bah nuaih. 

"I kal aniang chu, Hospitala kal tur ang khan i insawi sia, eng nge i va tih daih, Puia Studio-ah thla kan va la a, min pe alawm" Teteii chuan a lo ti leh hmiah. 

"I van dawthei e aw. Hospital kawtah pawh kan inhmuh reng kha. Ka lut lai pawh in hmu reng. Tin, ka sana ka tibo lo. A awm reng" Diteii aw pawh a ring ve hle. Dinfela a awm bawk si a, tun tum chu a tang na ve khawp mai. 

"Va en la, a awm ka ring lo.. Dawt sawi kher a ngai hleinem.. Engtin in va awm ka ti lo, mabse, Mipa mahnia awm ina kal fo kha a mawi lo" Teteii chuan thiamchang inti fahran hian a ti lrh a. Diteii a tho nalh. Pu Vanlala chuan, "in ho mai mai thin e aw.. Sana pakhat vanga buai chiam mai.. " a lo ti hluk. Diteii chu a roomah lutin dressing table-a a sana dah kha va lak a tum a ni. Mahse, a ding chawt. Sana a awm miah lo. Teteii'n a set up tih a hai lo. 

"Tete, ka inbual hlanin ka sana kha i rawn la tiraw.. Engvangin nge hei hi i tih? Eng nge i hriat? " a va ti thâwr a. 

"Ka sawi reng kha.. I theihnghilh ka tih mawlh mawlh kha mawle.. Khatia inlak fel kual a ngai lo" Tetei chuan a lo ti sam èt.. Diteii chuan sawi tur a hre tawh lo. A dang chep tawh tlat. Dinfela a tho va, a kam a thuah te te hnuah, "Inhnialna atthlak tak a ni. Puia kan zawt thei reng alawm" tiin a phone a phawrh nghal. Teteii a rawn ding zawk, "Puia chuan a sawi duh kher lo vang. Call buai duh suh" a ti a. 

"Ka thu thu" Dinfela chuan a ti hmak. 

"Aw puia, vawiinah Diteii a lo kal em ni? " a tih zawm zat. 

"E.. A ni maw, Teteii hian a sana theihnghilh rawn hawn angin a insawi a. Ka hre duh mai mai, ka rawn haw a, vawiinah.. Umm, nia, kan la inhmu dawn nia.. " tiin a phone a dah a. Teteii lam hawiin, "Mi dawhehnu" a ti chhum hmak. Teteii chu a sen tawn tawn mai. A kham ve nghal bawk. Pu Vanlala leh Pi Zawmi te chuan awmngaihna pawh an hre lo. 

"Ka daw bawk lo. Puia chuan i bulah engtin nge a sawi duh ang.. Diteii i duh tih a hria alawm" Teteii chuan a ti ve tâng tâng a. 

"Lang chhuak leh mai tura dawt sawi hi sim hmak rawh. Diteii rooma i lut lai kha ka hmu reng alawm.. " Dinfela aw chu a confi hle. 

"Ka lut lo" 

"Engpawhnise, mi dang zawngin ring lo mah ula, Diteii hi ka ring zawk. Engtin pawn set upin danchep tum mah ula, a bulah ka ding zel ang. Nunu, nang pawn hria ang che.. A tha em? " A mitmeng chu a hlauhawm angreng. A pa pawh a ngawi dûk mai. Diteii a kai a, roomah a luh pui daih. 

Bathlarah an chhuak a, "Teteii leh Nunui lakah hian i inveng dawn nia. Chhanglet lo la, i kal ngaiin kal zel rawh. Chuan, ka rilru ka thlak, Puia bulah pawh i thawk leh thei ang . " a ti ta a. Diteii chuan a han melh hâw ringawt. 

"Ka bialnu ka support zel ang.. I lawm em? " tiin a rawn kun hniam a. 

"Model nih ka peih tawh lo" a lo ti a. 

"Hmeichhe dik tak i nihzia kan pholang ang. I sam hi a than chakna lei a ngai a ni. Naktuk tuk lehah kan bazar dawn nia. Hmeichhe thawmhnaw chauh i inbel tawh, ang" a lo ti leh ssuh sauh. 

"I mawl ami? " Diteii chuan a lo ti vak ringawt. 

"Mawl e.. Ka mawl vek tawh. Bialnu patil ang deuh neih ka duh bik hleinem" a lo ti hluk a. Diteii pawh a nui tawp. 

Pu Vanlala leh Pu Zawmi pawh mut hmunah an titi a. 

"Diteii hi hostelah kan dah rih zawk mai dawn mawni le.. Hetia in khata an chen dun chuan rin aia hmain kan mualpho thei dawn tlat" Pu Vanlala chuan a ti sup sup a. 

"Ka hrethiam lo le.. I thu thu aw. Mahse, Dina hian a remti dawn mi? A luhluh nasa si a" Pi Zawmi chuan a ti a. 

"Nunui leh Teteii te lahin an mil bawk si lo, eng nge maw an mil loh ve viau ni.. Pawi a sawi loh tehlul nen" Pu Vanlala hi zawng a rilru a tluang tih a lang reng mai. 

"Ni ngawt mai. Ka lo zilhhau ang e" an nu chuan a ti a. 

Teteii chu lukham chu a chum nghek nghek a. A thinur zia chu a landan chuan a tichiang kher mai. Ni e, a plan a flop leh phawt. Dinfela khan Puia kha a call duh a ring miah lo ania. Chuti taka Dinfela'n Diteii a duh chuan a chhun zawk zawk niin a inhria. Chuta karah Puia lahin a film chang turin a la sawm eih bawk si lo. A awm zel dan tur pawh a ngaibtuah thiam tawh lo, a zirnaah lah Subject pahnihah ngawt ba a la nei zui. Chungte erawh chu a zep tlat thung. Diteii rawn lan hnu hian a nun chu a tluang lo chho ta riau hian a hria a. Pawisak nei miah lo va chet a lak a ngai dawn a ni. Diteii hi amah aiin a sang tur a ni lo… 

Nunui erawh chuan mipa dang a be leh daih tawh. Puia chu la ngaiin la duh viau mah se, amah Puia'n a rawn hawi ta hlek si lo va, a va be zauh zauh naa a rawn reply tawi thei si. Eng atanmah a ti lo niin a inhre tawh a. Diteii pawh hi a haw em em hran taeh lo, mahse, Puia bula hna thawh leh chuan a mil lo leh ngawt ang. Puia aia duh hi a la nei ngai tlat si lo a ni. 

"Dite, Bena a bo daih.. Awii keizawng" Zan dar 12 a ri lek lek tihin Bena nuin a rawn call.

"Eng a?!  Eng maw? " a ti nghek. 

"A bo.. Kan hmu zo lo.. Ka zun hlan in a lo chhuak aniang. Ka hre bik lo engmah" a tap hlawp hlawp mai. 

"Aw ka lo chho ve dawn" tiin phone a dah a. A inthlak. Sawk sawk. Dinfela a call pah bawk. Mutchhuah hmel zetin a lo la a, "Tho rawh.. Chhuah kan ngai.. Bena a bo" hlauthawng zetin a ti a. 

"Maw.. Ehe.. A va zia lo" tiin a tho ve nghal. Dar 12:05ah chuan an tlan chhuak der tawh. Damdawiin an han thleng chu an lo buai nuaih mai. Doctor leh nurse te pawh an lo mangang ve khawp mai. Bena hmel lah hmuh tur reng a awm si lo. 

Eng nge a chungah hian thleng ta ang le?! Dinfela nen Aizawl khawpui chhung an suartluan a, an hmu zo si lo. Khua a var lek lek tawh tihin, Bena te veng thlanmual chhaka hmawng thing hnuaiah Bena chu ngawi renga thuin an hmu ta a. Diteii  chuan a zuk kuah rawk rawk nghal. Bena erawh a chechang eih lo. 

"Ben, hei Benjamin.. Ti nge hetia i awm.. Bawiha, a mak eee.. Min en rawh" tiin a lu chu a sawi nawk nawk a. Dinfela pawh a rawn thu ve nghal. 

Diteii chuan Bena nu a call a, an hmuh thu a hrilh. 

Dinfela chuan Bena chu a be mawlh mawlh, a en ngai a en reng ringawt. Mi â ang chiah a ni. "Hawh, hawng ang aw.. " tiin an kai tho a, a tang hran lo. Thlanmual an pel fel tèp tihin a ding leh ta tlat. Zawimuangin a inher a, thlanmual mawng lama thlan la thar angreng tak lam chu melhin a kawk vû a. 

"Ka lo kal e" a ti sup a. A tlan thla nghal. A rang teh phut lutuk a, Diteii te pawh an inring hman lo. Mahse, Dinfela chu harh zawkin a um zui ve nghal a. A zuk man hman hram. A chaka a chakzia chu.. An pahnih chuan an pawt ngat ngat, a tawpah phei chuan an hnuk chho ta hmiah. Awrawl a chhuah miah lo, a rapawm lek lek mai. Mahse, Diteii chuan a lainat em em zawk. Motorah chuan an hnawh lut thei hram. Mi dang pawh an rawn lang ve ta bawk a, engtin tin emaw an inphur thei ta a. Dinfela phei chu a hah viau ang. 

Khua a eng iar tawh a, boruak chu a vawt lek lek, damdawiin bathlar thlanglamah chuan an ding dun vang vang a. 

"Engkim a tha vek mai ang.. Hlauthawng suh aw" Tiin Dinfela chuan a kuah a. 

"Ka lawm e. Mipa tha ber i ni" Diteii chuan zawitein a ti sap a. Dinfela mitmenga hlimna lang chhuak chu a lem a ni lo tih a hriat takzet. 

(Tihian lehkha ka zir leh nghal daen ania. Awiii ka hmangaihzia che u hi 😢