D Rose (1)

D ' ROSE…   (1)

Ziaktu : Toni Râlte

"Tete, a tawk. I tawngkam hi a dengkhawng mah mah thin. Nang pawh Dite, roomah lut rawh. " Mami chuan a ti hlak hlak a. A naute pahnih chu rum zeta inmelhin an ding dun ran bawk. 

"Eng nge a û ka nia, min zahna pawh a nei hleinem. Min phût em anih kha. Patil anih vang hian ka hlau maw a ti aniang e, ka hlau therte lo " Teteii chuan a ti hlawih hlawih a. A hmaa ding a nau chu a kawk sawk sawk bawk. 

"Ka phût lo che. Ka kut ka ti ât a, ka sil thei lo anih kha. Chuan patil ka ni bawk lo" Diteii chuan mittui tling pam chung hian a lo ti ve bawk a. Mami chu an inkarah tlazepin, "Aw a tawk. In dik lo ve ve. Engmah sawi tawh suh u. Unau ve si inkhik khak reng mai" a ti leh hlaih hlaih a. A tu amah chu an tawngzui ta bik lo. Diteii chu ngawi rengin a roomah a lut a. Khumah chuan a thu tau sawk. Tleirawl kum 15 mi a ni a, a rualpui te nen an inchen tawk viau ang, a ria lek lek a, a fuke engkim chu a lang sei thlurh mai. A vun a ngo a, a mam viau bawk. Chutih rualin a thawmhnaw hak chu a pa mah mah em aw tihtheih a ni thung. A sam chu a boys cut a, a inhmeh phian, a dum hlap bawk. Anihna takah chuan tupawn hmu se, 'Tom Boy' a ni e an tih tur chi a ni. A chezia pawh chu a nu zèm lem lo. A hming pum Zodingpuii niin Dite tia koh a ni. A û chiah Teteii nen hian buaina an nei ve ziah. Inchhang bung tih takah. 

Aizawl veng pakhat lian ve takah a pa hoin an khawsa mek a. Khawsak harsa em em an ni lo. Apa hi Health worker senior, pension lek lek tawh a ni a. An veng chhunga sawrkar hnathawk zingah a hlawh tam pawl a ni ve tawh. Apa hi Pu Sapliana a ni a. Pa hleitling lam, nelawm loh lek lek a pawl. Unau pali zingah Diteii hi a naupang ber a. An û ber Mami hi tunah chuan nula senior rawng a kai ve tan tawh a, a nau chiah Lawma hi tlangval pangngai zet zawt a ni tawh bawk. Mami hi an thenawm te schoolah a thawk ve a, hlawh tam le lu lo mah se, a zia ve viau mai. Lawma erawh college pawh a zo ta lo, phone siamna dawrah a thawk ve a, ruihhlo a duh ve hleuh hleuh em a, a thawh chhuah pawh a chhungte hian an chhawr ve lem lo. Lawma nau chiah Teteii erawh College a kal ve mek a, Diteii letling a ni. A hmel thain a pian a nalh hle a, a vun pawh a nung khawp mai. A hleitling bawk, a nu lamah a kal tih theih a ni. Modelling lam a tuipui ta reng a, eng show show emaw ah chuan a inlan ve fô mai. Lar pawh a lar ve deuh. Diteii nen hian kum 5 laiin an inthlau a, an inngeih tehchiam lo. Tlai khawhnua lo piang Diteii hi kum 2 lek anih laiin a nu leh pate inthen vangin an upa ber Mami enkawl seilen a ni. 

Ni e, Diteii pa hi zu ngawlvei a ni thin a. A duh ve bârh bârh thin em a. Nu ber beidawn hun a thleng ta pawh aniang e. Diteii kum 2na piancham an lawm zanin a nu nen eng emaw thilah an inhmu thiam lo pek a. An nu chu ni dang ang bawkin a tlan leh a. Reiloteah a rawn kir leh mai an rin laiin a tuk zingah bungraw la turin an lo lang ta mai a!  An hrilhhai tlang hle nghe nghe. Diteii pa chuan nasa taka ngaihdam dilin chelh a tum sateh a. Mahse, A tlin tawh ngang lo nge luhlul a chhuah ve tlat. Bungrua chu la luiin an inthen fel chu a ni ta der mai. Diteii pa hi zu ngawl vei mah nise, nupui fanaute rikrap zawnga khawsa chi a ni lem lo va. A phunchiar ve deuh thin e tih mai loh chu. Mahse, zu rim nam reng bula khawsak chu a tlin reng ta lo pawh aniang, an nu chuan a then miau si a!  A demawm em em bik loh. Pu Sapa chuan bungrua la mah se, beiseina sang tak a la nei tho va, karah fa an awm tawh a. Inthen hlen chu an nu pawn a duh a ring bik lo. Zu te a nghei chho ve a. Thla 5naah a va rim leh tan a. 

Mahse, a va lan leh atanga thla khatna lekah Diteii nu chuan an veng pathlawi hausa nupui sûn tawh Pu Vanlala a nei ta daih mai!  Pu Sapa tlawmla leh hrilhhai chu a fate pawn an khawngaih viau. Tihtheih a nei ta lo. Amah vanga thleng a ni ve tho bawk si. Chutihrualin Diteii nu hi fate hmangaihna kawnga huaisar vak chi a ni lem lo nge an inthen pawh khan hnute nghei hlim chauh Diteii hruai lo va a kalsan thei kha chu a mak ve deuh chu a ni. 

Chuvang tak chuan Diteii tan chuan Mami chu a û leh a nu a ni ber. Kum 7 a nih thleng khan a nu angah a ngai reng a. Anu tak tak nen an inhmuh tak avangin a u a ni tih a hrethiam chauh. Anu chu a ngaina lo va, a ngei chuang lem lo bawk. Mi hrang angin a en ti mai ang. Pu Sapa pawh nupui dang ngaihven tawh lem lo vin a fate a tulpui ta thak kha a nia. In leh lo tha tak a din ta bawk nen, an nu pawh a ngai ta vak bik lo. A khua erawh a har chang zawng a tam awm e. Mami hi pasal nei rual zet a ni tawh naa a naute avang hian a la hnar ve hram hram zel a. Tunah chuan Diteii pawn pawl sawm te hial a zir ve ta bawk a, senior tawh hnulamah ngaihzawng nghet a nei chho ve leh ta a ni. 

Teteii leh Diteii hi in chhang bung e ti lo vin an kum a lo inthlau deuh bawk a, ui leh kel thlunpawlh ang hi an ni hrim a. A tet lai chhung zawng khan Teteii inhrikthlakna a ni thin. Teteii hian a thik nge a hmumawh hle chu a hrethiam bik lo. An han tleirawl chhuah ve takah chuan kut inthlak lam chu an bansan chho ve a, mahse, in khik khak an la sim lem lo. Diteii hi a mizia nu zèm lo mah se; a u mami thu a awih bawk a, in chhung chet chu Teteii aiin a khawih tam zawk mah. Eirawngbawl erawh Mami kutah a la awm a. A bak tihfel ngai chu kum 13 a nih atangin a khawih deuh vek tawh a ni. A naupan lai atanga pa rukna riau a neih chu a chhawm chho zel si a, Mami leh a pa ten han thunun viau thin mah se; a thawmhnaw duhzawng leh lawm zawng chu an thlaksak thei lo a chha a ni. A inkhawm pawn kekawr nen a inkhawm mai zel a. Mahse, Patil nih a duh bau lo thung. Thanthi a neih tirh kum 13 anih laiin SS an kainaah a lo thut tlang palh hlauh pek a!  An zirtirtu chuan nui huah huah chungin, "Eheu, kan mipa neih chhun chuan thi a nei ve thei anih hi.. " a ti ta mai a! An pawla naupang dangte chuan an nuih hluah hluah ta mai. Chu chu a thinlung a tihel ta hlauh. Inkhawm leh SS kal chu a bansan phah ta a ni. Hei kher hi chu a pa meuh pawn a nawr kal zo lo. A luhlulzia an hre ta bawk a, nakinah a nulat chhuah tak tak hunah a la reh ve mai ang tiin an inhnem ta ngawt kha a nia. Make up a inbel ngai lo tihtheih a ni. Han inchei ve îk nise Teteii aimaha hmel tha tur hi a ni zawk a. Mahse, a thiam lo. 

Vawi khat Teteii mood fuh tumin a chei ve chiam pek a. A lang thain a duhawm lutuk. Thla te pawh a la ve nghe nghe. Mhase, amahah inthiam lohna eng emaw a awm tlat pek a. Make up chu a inbel lo zui ta zel a ni. Thawmhnaw pawh a man a inlei mai thin. Hmeichhe thawmhnaw tih hriat lutuk chu a inhmeh tawh lo zawk. 

Nu enkawlna dawng lo anih vang nge a luhlul a, a tih tawh lohah chuan nawrluih theih bau loh mize nei a ni. Mahse, thu awih thei tak a ni lawi a. Mami tan phei chuan naute a la ni reng. Diteii hi chu a nau dangte aiin a hmangaih bik tih amah pawn a hai lo. Teteii thik chhan pawh a ni maithei. Apa erawh hi chu pa tha leh fel duam, sawisel nei ngai lem lo, engkim Mami kuta dah tawp chi a ni. Anu hming hi sawi rik a ni zen zen lo, mahse, an vengte a lo inhlat lutuk lem lo va, han inhmuh zauh changte a lo awm thin a. Sawi rik zeuh chu a awm ve bawk. Diteii tak hi chu a nu te inah a la leng lo va, Teteii erawh a kal zing angreng. Anu pasal a hausa bawk a, thil thar pawh a nei deuh reng mai. A nu pasal hian fa pahnih a nei ve bawk a. A nu nen erawh fa an nei tawh lem lo. 

Sunday zing a ni a. Diteii chuan thleng a sil mawlh mawlh a. Mi dang erawh an insiam. A u Lawma nen erawh tumah chuan an phût leh lem lo aniang e. Lawma pawh thutthleng seiah muin a phone a kheuh leh char char tawh. Mami chuan a chhuah dawnin, "Dite, thingpui lo lum rawh aw, banah kan group kan inhmu khawm lawk dawn a" a ti a. A lo bu nghat. Teteii pawh a vul leh kher mai. Diteii mawi tih chi erawh a ni lem lo. Thleng a sil zawhah tv a en mai mai. Phone hi a ngaina ve vak lo nge khawih tur a hre vak ngai lo. Thian a ngah lem lo va,  a tette atanga a kawm ber thin Bena nen hian an inbe zauh zauh a, chubak mi dang chu an rawn bia a nih ngawt loh chuan a va be ngai lem lo. You tube a en ve paw'n Thil mak leh hlauhawm lam hlir a en thin. Chupawh a ning thuai zel. 

Teteii Laptop a la a, movie a en ta mai mai. A awm loh laia a khawih ve loh chuan a awm lai chuan a phal ngai si lo va. A movie neih ho lah hi a en peih loh chi hlir. Action movie a ngaina a, a nei tlem viau. A en tawh hnu te a en leh mai mai. Dar 11 rik dawnah a dah a, thingpui a va lum ta a. Lawma erawh a inchei a, a chhuak daih tawh. An zuk down dawn ani mahna. 

Mami te inkhawm bang pawh an lo haw ta a. An group OB te nen. Teteij erawh a pengkawi leh a ni mahna. Apa pawh a lo la haw lo. 

"Dite, inkhawm ve tawh la.. I chawl rei tawh mah mah" Mami thianpa, an KTP Branch-ah pawh committee member ni lai Puia chuan a ti lung lung a. A lo nui suk ringawt. Thingpui chu a siam mawlh mawlh a, a va sem kual a. Thingpui hmeh a chhawpsak bawk. A roomah a lut zui nghal daih. Bena'n a rawn call a, "Tki han kan ve ila" a rawn ti a. Tki chu Bena bialnu a ni. A zun kawng lam chiankuan loh vangin Damdawiinah a awm mek a, Diteii nen pawh an inngaina ve reng. Bena hnial a hreh vangin a lo remti a. Mami a hrilh a, a insiam zui nghal. Bena'n a lo lam a, an tlan chhuak zui ta nghal a. 

Tki pawh a lo nula viau mai. Cabinah a awm a ni bawk a, an free nen, an pathum chuan an ri leh bawrh bawrh. Diteii hi a nel zawngte bulah chuan a ri ve hlut thin a, mahse, a kawm ngai lem lo an tel ve chuan a ze ngai te angin a ngawichawi leh viau zel thung. 

"E.. Taka, Dite, kha Sarahi kha i hria em? Chaltlang a mi kha.. Enngtin nge i hriat ang aw, i u Teteii te leh a u te pawh inkawm ve thin, a u chu inla model ve deuh kha.. Kha nu khan Bena hi a lo bem ngei ania aw" Tki chuan a ti sar sar a. A thinrim loh danah a thik vak lem lo tih a lang. 

"Ka hria, Sarahi chu sam buang deuh, hmel ner deuh kha tiraw" Diteii chuan a lo ti ve vat a. 

Bena chuan nui chungin, "Hmel ner a.. Engtin nge a ner? " a lo ti a. 

Diteii chuan, "Hei, hmel ner a awm hi. An hmai hi a va awm dûk.. Ka sawi thiam lo' tiin amah leh amah chu a insiam chhia a. An nui hawr hawr mai. Tki pawh a tuk tlai lamah a chhuah theih an beisei a, hlim takin an inthlah ta a. 

Zanriah an kil laiin, "Pa, naktuk zanah show kan nei leh dawn sia, pheikhawk thar ka mamawh ee.. Min sponsore thei rih dawn lo va" Teteii chuan a ti nang nang a. Diteii a lo ner. 

"Hmm.. A tha lawm.. In show ve hi a. A hlawkna tak tak hi a awm pawn ka hre lo" a pa chuan a lo ti a. 

Lawma ta pek chuan,"Dik chiah, in in ha chhing chang ringawt a, mi zanwg zawng hmuhah in va in hlim thui a ni ringawt.. " a lo ti hluk hluk a. Mami'n a mitmei vat. Teteii tihtauh hratzia hre hek. An rin ang ngeiin a kham hmak a, thleng a dah tau sawk. An ngawi dâk mai. 

"Tui zawg a inang hleinem.. Tihian min ti ve ziah a, a hlawkna tel tur chuan hun a duh rei ve lawm" a ti hmuar hmuar a. Apa chuan, "Hmm.. Tihtauhna chi pawh nih loh chu.. I lei dawn nia. Pheikhawk chu" a lo ti dam thluam a. An ngawi tlang ta. 

An school hi an in atanga a hlat tham deuh vangin Teteii class kal tur hian a phur ve thin a. Mahse, a phur loh a tam zawk maithei. A thiante a ngaipawimawh zawk fô. Bena nen an school luhna a inang si lo va. Ke in a kal ngat ngat thin. Taxi hman kha a ui ve tumhrang bawk si. Chumi zing pawh chuan Teteii'n a kalsan leh daih. Mami pawh a kal tawh. Ngawi rengin a chhuak a, kein a kal leh ta poh. 

Lehkha thiam tak tia sawi theih ni lo mah se; a zir peih a, pawl a la sawn ve zel. Lehkha zir lam hi a timi vak lo hrim hrim, mahse, a tuizawng pawh a la thlang thiam chuang lo. A mize pa sa vang hian Army lam te hi a âwn ve deuh. An classah hian thian mumal tak han sawi tur a nei lo naa, a tlangtla ve viau. Patil emaw tia rawn bem chawt chawt lah bang lo. Zak lo hi a ti thei khawp thin mai. Mipa ho pawn ngaihzawn enah an en lem lo anih hmel. 

"Dite, eng nge i lo ngaihtuah? " an miss Remruati chuan a rawn ti a. A harh kâwk. A suangtuahnaah film an lo chang a, kungfu a lo thiam em em mai. 

"Sorry miss" a ti sap a. Miss pawh chuan a sawi tur chu a sawi zawm leh nghal a. 

A nitin hun hmam dan chu ninawm a tih chang a awm a. Mabse, a thlak danglam thei si lo. An bang a, a haw ve nghal. An in thlen hma kawng kawiah a nu leh a pahrawn a tawk ta hlauh mai. A pahrawn hi Pu Ruata a ni a, pa fel duam mai, mi pawisawi hlau tak a ni. Diteii pawh hian a haw hran lo. 

"Dite, in bang chiah law.. Rawn pen ve thin tur lawm.. " anu chuan a ti hlut a. Lem tihna riau a lo nei lehpek. 

"Nia.. Ka hmanhmawh thei lutuk a" a ti tha ve mai a. 

"Taka naktuk zanah hei i pa birthday hi kan lawm dawn a. Lo kal vek ru aw.. Mami pawh ka hrilh tawh kha.. Ka lo beisei dawn che u ania" anu bawk chuan a ti leh a. 

"Nia, kan lo tum dawn nia" ti sapin a kal san zui nghal a. A rilru te te chuan, "kal nguar ang. Tar tawh lamah piancham lo lawm.. A overthlak' a ti ve tán tán mai. 

Mahse, a tuk zanah chuan Mami chuan Teteii nena va kal ve turin a nawr tlat. "Dite, kan nu a nia, a ni reng tawh dawn. Mamawh hun pawh a la awm thei. Chuvang chuan nu leh fa chu in tihhran loh hram tur" a ti dap dap a. A hreh viau naa a u mami a zah èm vang chauhin Teteii nen chuan an va kal ve a. Teteii hi chu a phur sárh reng mai. 

An lo awm deuh tiai tawh a. Anu chuan a hmuh veleh a rawn besáwm nghal a. Teteii chu a leng halh bik mai. A leng zing bawk a. Diteii erawh kil khatah inthlahrung fein a thu ve khar a. Mi lian deuh deuh an awm nual. Thalai lam chu an tam lutuk lo. Teteii leh amah ang rual vel tur hi an rawn kal phei a. 

"Dite, hei hi Nunui a nih hi, ka pa fa… " a ti liam puat a. A pahrawn fa bik a ni tih a hrethiam nghal. 

"Umm " a lo ti ve mai. An inchibai a. Nunui chu amah aiin a hniam zawk naa a hmel tha khawp mai, a khal lam a pawl a. Pian nalh tak chu a ni hran lo. Tin, a thinchhiat ve hmel tawp. Teteii nen chuan an inkawm theih hmel phian. 

"Nunu, i û chu a lo la haw ve lo maw? " Teteii chuan a ti a. 

"Umm.. Kum tawpah daih a lo haw ang. Ani chu Mizoram aiin nuam a ti zawk alawm" a lo ti ve mai a. Chutih lai tak chuan hunserh an hman tur thu an rawn sawi a. An thu tha ta thap a. 

Diteii nuam tih chi a ni hlawl lo, an ri hut hut a. A zo lo lam a ni. Hawn a rawt chhen a, Teteii lah a la muangchang angreng si. Ninawm a ti khawp mai. Teteii te nen Nunui roomah an chho a. A pui khawp mai. A room nen chuan inthlau tak a ni. A khum bul dawhkanah chuan frame mawi zetah an family thlalak a lo intar va a. A zuk bih mai mai. Nunui nu chu nu hmel tha leh zaidam hmel tak a ni. A sam a sei hle.. Nunui bula ding mipa rawlthar chu a nichina an sawi kha a ni ngei ang. A hmel a nelawm vak loh. Rei vak lo an awm hnuah an chhuk a, an ni pawh an haw ve nghal. A chau angreng. Teteii a phul hlut. 

"Anu te bulah hian ka la awmdan daih maithei che u a ni. Milian hmelhriat an ngah sia, ka tan chuan a tha dawn tawp. Bakah an hausa sia" a ti sar sar a. Diteii a lo ner nawk. An inang lo teh e. 

Tukthuan an ei laiin Mami chuan, "Pa, vawiin chu va in checkup ngei ngei teh aw.  Ka ngaih a tha lo riau.. I ngaih hi a sam thei lutuk a" a ti hlak hlak a. Ni e, Pu Sapa hi tun hnai thla khat vel atang khan a aw hi a rawn chhang thut thut zel a, a lei leh ka a pilhin a na fô bawk. Ni 2 vel liamta atang khan a nghawng veilam rawn na zeuh zeuh chu a sawi bawk a. Mami ngaih a tha thei meuh lo a ni. 

Mami School kal tur pawh a inngaihtuah buai hle. Apa hriselna chu a tlahniam zel tih a hai lo va. A chîk thin bawk nen. Apa awm ta lose an unau ho chauha an awm tur a ngaihtuah chuan a hui pap pap thin. Amah lah tuna a bialpa Sangtea hian a nawr ve reng tawh a. Pasal nei lo rual a ni tawh bik lo nen, apa pawn a sawipui tawh. "Ka dam lai ngei hian nang tal chuan nei rawh. Tu hmel hmuh pawh a chakawm alawm.. Min vengthawng suh" a ti thin. Mahse, ama lamah hian inpeih lohna riau a la nei tlat si a. Sangtea chu an veng chhung ami tho, chhungkaw pangngai tak an ni a. Electric department-ah a thawk nghe nghe. Rethei bakberh chuan an awm hauh lo vang tih a ring. Sangtea te chhung lahin an ngainain an fiam zauh zauh lehnghal. Pasal nei tur anga a inngaihtuah apiangin a nau duat Diteii a hrechhuak hmasa ber thin. A tel lo va nun a hmang chho tur chu a ngaihtuah a ni. Mahse, hei a nula chho ve tan ta bawk a, tlem chuan a ngaih a tha ve deuh. Lawma ber hi a ni, zu in a bansan thei tlat si lo va, nakinah nupui chhia tha te a la nei ve ang a, a naute hi a hmangaih zel thei ang em tihah a buai a ni. A laktlak loh nasa si. 

Teteii pawh social media lamah a lar chho tan a, nuam a tiin, enghelh em em a nei lo bawk a. Lar chu a khel a ni deuh ber. A thlalak duh dan te pawh a dang chho tial tial a. Mami paw'n a khak tawh. Mahse, a nasa sauh zawk. Tik tok a rawn lar chho a, mi aia nasa leh sexy deuh hlekiin a han inpholang leh a, sèp zuitu an tam tual tual a, ei lotu pawh an kat nuk. Amah a nalh si a, ei lo ru viau mah se, mipa tam tak chuan an be tha hûrh tho. Ngaisangtu aiin hmuhnawm tia thlirtu a ngah zawk a. Chu chu an ngaihsan vangah a la ngai vek zui. Diteii nen hi chuan an danglam lawt lak a ni. 

Tlaia a pa a lo hawn chuan chanchin an lo zawt vat a. "Biopsy lak a ngai a" a ti tham tuak a. A aw pawh a chhang leh tawh. Mami ngaihthat lohna a zual sauh. A naute bulah erawh engmah a sawi duh rih lo. Apa hi a ngaisang a, a zah em em bawk. Nupui te kha nei leh turin a nawr nasa thin. "Inthlahrung suh, nupui pasal te hi chu fate nen an inang thei lo. Dam loh hritlanah pawh kawppui te nge nge hi a ni kan mamawh zawk.. " tiin a nawr ru fô!  Mahse, Pu Sapa hi pa hawiharh taka ti lo chuan fate hmangaih tlut chi, hmeichhe lèm thiam vak lo a ni a. Neih tul a ti tawh lem lo. A khua erawh a har thin khawp mai, a fate hriat loha a tei ruk ruk chang a tam khawp. An nu lah mi lian nu a ni ta der si a. A thinlung a na zawk zawk fô. Mahse, mipa a ni a, a fate avang pawn a intipachang hram hram thin. 

"Pa, exam dawnah study camp kan nei dawn a. Mahse, ka awm ve peih lo ania. Hetah ka zir tha thei zawk. Min sawi sak rawh aw" Diteii chuan a ti a. 

"Awm ve mai la, a intih engmaw thlak" Tetei'n a lo ti leh hluk. 

"Aih, thian pawh ka nei si lo" a lo ti a. 

"Umm kan sawi dawn nia.. Rual lah hi i pawl si lo va. Nakinah hrehawm i la ti ange aw" apa chuan a lo ti a. Diteii chuan dik tihna chen a nei. Ni e, Bena bak thian tha tia chhal ngam a nei lo hi chu ama lam dik loh vangte pawh a niang e. 

Chumizan chuan Photographer lar ve deuh leh a thianpa an lo leng nawlh mai a. Teteii an rawn len chhan a ni deuh. 

"Naktukah studio-ah lo kal mai la, chawhnu lamah Reiekah chuan kan va kal dawn nia" Puia chuan a ti a. Chutih lai tak chuan Diteii tui la tur a room atangin a lo chhuak a. Kekawrbul hring a ha a, tawnzau dum nen, khua a lum bawk lah taka. Puia chuan a en duh kher mai. A thianpa Davida pawh chuan a melh zui nasa. 

"I nau nge i û? " Puia chuan a ti sup a. Teteii chuan, "ka nau anih kha" a lo ti a. 

"Ee.. Tha dawn lutuk, tuna Lawmzuali music Video thar turah hian model atan a fuh dawn tawp. Kan kutah a dah sia, i nau ang hi ka zawnna a rei tawh lutuk" Puia chuan a ti chul a. Teteik eraeh a chhan hriat si lohin a tum hmak. 

Diteii rawn let leh chu, Puia chuan inti nelawm deuhin, "Bawihi, khawngaihin lo thu ve lawk teh.. Thil sawipui che ka duh e" a lo ti a. Diteii chu a ngaihna hre lo zetin a thu ve mai a. 

"Thla tharah video thar kan buaipui dawn a, Lawmzuali hla thar tur., chutah chuan modelah tang ta che. I duh mai lawm ni? A hit viau ang" a ti nghal zung zung a. Ditei a meng phawk hle. 

"Aih, ka lawm.. Ka tih chi a ni lo" a ti hmak a. A tho daih. Hawihhawm pawh a chhuah thei meuh lo. A tihchi ni lo lutuk thil chuan a thin a tirim titih tlat. 

Teteii chuan, "Nia a tihchi a ni lo alawm.. Ani chu a danglam lutuk, in hrethiam ang" a lo ti ve vat a. 

Davida chuan, "A danglamna tak kha lawm kan duh chhan.. A nu em em si lo va, a pa over bawk si lo a. A hmel tha tho bawk si" a lo ti ve a. Diteii erawh a awm tawh lo. 

Mahse, amah berin a duh loh miah chuan tihngaihna awm hek lo. Mi dang an sawm mai loh chuan. Mahse, Puia mitthlaah a chám zui tlat!  Hmeichhe tleirawl la naupang tih hriat tak, pa lam lek lek, vun dik leh nung sar si, zakzum tih hriat tak kha model atan chauh ni loin hriat chian duhnain a khat tlat. Teteii hi chu an hre lutuk tawh, a cheiza leh tawngkam hi an ei vak lo sa a. Mahse, tun hnaiah a rawn lar chhoh tak em vangin an bekbawr a ni mai a. A nau zawk kha chher a chak khawp mai. Mahse, a zei viau lo vang tih chu a hre ve. 

Pu Sapa test result pawh lam theih a ni ta a. Mami'n a han lamsak. A tawngtai ru mawlh mawlh a, a huphurh khawp mai. A hlauh ang ngei ngeiin apa chu hrawk (nghawng)  cancer a lo ni reng mai! A stage a lo sang deuh tawh a, amah a fit that chuan chemo khai erawh a la ngamawm thung. Mami rilru a kal thui kher mai. A lungchhe takzet bawk. Sangtea nena han kal an ni a, Sangtea pawn a khawngaihin a hnem ve mawlh mawlh mai. A tan tak pawh a pawi, a nupui hual neih mai a duh tawh kha a pa a cancer leh si chuan a nei thei lawk dawn lo tih a hria. Pawi a ti takzet a ni. 

Zanriah an ei laiin apa chuan, "Hmm.. Hei vawiinah ka test result Mami'n a han lam a. Vanduaithlak takin ka cancer hlauh mai a! Ka inrinhlelhsa tawh ania, min thawng lem lo. Ka thi nghal dawn pawh a ni lo va, lo thlaphang lutuk suh su. Pathian zarah kan inenkawl chho ve zel anga, rei tak ka la dam thei ang.. Mahse, hei hi ka sawi duh, ka lo thi ta anih pawhin unau inhmangaih leh inngeih tak in nih zel ka duh a ni. Ro chungchanga intihbuai te hi thil zahthlak a ni a, hre reng rawh u.. In û ber Mami thu hi lo awih tlat ang che u. A theih chhung chu i nu saw pur buai lo hram bawk ula, a pasal fanaute mitmei ven a ngaih saw.. " a ti ta dap dap a. Chaw ei lui thei an awm ta lo. 

Diteii chuan mittui parawl kiang chungin thleng a sil mawlh mawlh a. Apa chu thi thuai turah a ngai tawp. Cancer hlauhawmzia a hre ve tho si a. Pathian te a han dem dawn ut ut a, a ngam chiah si lo. A nun chu a ngui nghiai mai. Teteii pawh a ngui khawp mai. Apa hian a duat viau a, a mamawh leh a sawi tawh chu a tihsak lo ngai lo. Tin, Mi emotional deuh mai a ni a, a chiái nghal titih. A thiante bulah pawh a sawi leh vek tawh a, a whatsapp status thlengin a pa dam loh thu a upadate nghal. An rawn hnem nghal liai liai bawk a. 

Lawma pawh a inngaihtuah muk ve kher mai. Zu ngawlvei mah nise, apa hi a nu awmdan vang pawhin a zah ve a. Zanriah ei ho loh te hi a phal loh vangin eng anga laklawh pawh nise, zanriah ei turin a haw ngei ngei thin. A theih chinah apa thu hi a hnial ngai mang lo. Rinchhan tur a la awm avang hian a puitling lo ve bawk a. A pa boral ta chiah se, mipa awmchhun a ni tawh dawn a, a mawhphurhna pawh a sang viau ang. A puitling lo nasa si. A rilru a hah ve takzet a ni. 

Tichuan, Pu Sapa chu a han in ei fit a. Chemo khai turin Zemabawk Cancer Hospitalah a insawn phei ta a. Diteii leh Tetei'n an riahpui thin. Mami erawh in chhungah a pawimaw si a. A rawn kan zeuh zeuh chauh. Mihring hi kan derthawng khawp a, natna hlauhawm tak kan vei tih kan hriat loh lai chuan kan hlim a, na pawh kan hre chang ngai lo. Mahse, natna kan nei tih kan inhriat chhuah chiah hian rilru hian min hruai thui khawp a, taksa pawh a chhe rawk rawk thin. Pu Sapa pawh a tirah tuar thiam viau mah se; a rilru a hmang nasa a, a thih hnua a fate awmdan tur a ngaibtuahin a zeldin nasa a, chu chuan uai ritin a taksa thlengin nghawng a nei a. A chhe chak riau mai. 

Diteii nu paw'n a lo hre ve a. Fate pa na ná na chu a khawngaih ve hle. A fate pawh a ngaihtuah ve tho mai. Tihtheih nei em em lo mah se, chanchin a zawt ve fô a. Pawisa pawh a thawn ve nghe nghe. Diteii a kalsan kha a inthiam lo thin hle a, mahse, khatih lai khan a thinrim leh rilru na khan khua a hmuhtir thei lo a ni ber. Diteiin a ngaina lo pawh hi mak a ti lem lo. A hrechiang miau si lo va. A pasal Pu Vanlala nen hian a tleirawl chhuah hlimin an lo inhmel duh daih tawh a. Mahse, Pu Vanlala hi phai lamah zirna avanga a awm tak daih avangin inhmu lo reng ta nafam chu Diteii pa nen an intawng chho a. An chesual ta mai si nen. Tikhan an inru ve ta tawp kha a nia. A pasal kha a hmangaih lo miah lo. Mahse, Zu khan a ei chhe zel a, a hhlawh kha zu manah a tlak ral thin vangin an kham ngai meuh si lo. Khati reng renga nun hman reng chu tiin a beidawn tawpkhawk hnuah a chhuahsan ta hlawl kha a nia. A demawm em em hran lo, mahse, Diteii a hruai ta lo erawh dem rawn a hlawh phah ta kha a nia. A han thlawi takah chuan Vanlala hian a rawn beisei ta chat a. An awlthawng dun si, hman lai nunah khan an kir leh ta a ni ber mai. A chhungte lahin an lo phurpui hurh bawk si nen; remchang an hmu tam bawk si. A tawpah an inhruai ta mai kha a nia. A nun chu hlim hmelin nawm hmel viau mah se; a chhungrilah a fate an thi ngai bik lo. Mami tak hi chuan a haw deuh tlat a, biak pawh a be tha ngam vak lo. Teteii hian a rawn chhun fuh ta em a, an inbelbul viau. Lawma pawh an inbe zeuh zeuh. Mipa a nia, ani chu ngaihtuahawmah a ngai lo. Diteii erawh a ngaihtuah thin takzet. Tihtheih erawh a nei mang hauh si lo. 

Pu Sapa dam loh taj tak atanga thla a tlin meuh chuan a chau zual ta riau. Diteii pawh school a chawl zeuh zeuh, in lamah an inenkawl tawh a. Inleng neuh neuh pawh an nei ve zut mai. Mami pawh a taksa a tlahniam rawk tawk, a rilru a hmang nasa a, a hah bawk si. A khawngaihthlak takzet a ni. Sangtea hi a fel em zawk a, a rawn tawiawm thei reng a, Diteii nen phei chuan an inngaina viau. Lawma pawh a rui lo ve zeuh zeuh, a pa natna chuan a siam tha dawn te pawh a ni ange. Pu Sapa nghawng veilam chu a bawk luau tawh a. A taksa pawh a cher kuam tawh mai. Mahse, pa hawiharh leh intipa chi a ni bawk a, a la nui sáng thei zel. Chu te chuan a fate lung a tichhe zual zawk thin. 

"Ben, zanin apa awm dan hi a dik lo riau, lo kal rawh khawngaihin" Diteii chuan Bena a text a. A mittui a hru a hru mai. Ni e, zanriah an ei kham hlim atang khan a pa chu a buai zual tlat mai a. Vanduaithlak takin a cancer mah tih tawh nak alaiin a la santen zui a. Chu chuan a taksa a tichhe zual a ni. Engmah a eiin a in hleithei tawh lo va, Thisen chaw an khai chu a ni deuh mai. A na a chhuah chuan awmngaihna a hre mang thin lo va, nachhawkna chak ber chi in an chiu thin, chu chuan thisen a heh si a. Chhe lo chi pawh a ni lo. 

Bena a rawn luh lai chuan Diteii chuan thingpui a lum mek a. Inleng an nei nual a, a pa bulah pawh a awm ve hleithei lo. Bena chuan a pan vat a. A thiannu hmel ngui leh tla dâk chu lainat zetin a melh a. 

"Zanin hi a daih pawh ka ring tawh lo" Diteii chuan a ti sap a. 

"Daih ang. Mahse, Dite, kei chu ka ti i pa hi a khawngaihthlak a na a ti sia, thi zawk se a nuam daih zawk ang" Bena pek chuan a ti ta bawl a. A tawngkam thiam loh a leiah a sawi frank mah mah a ni. 

Mahse, Diteii pawh chuan, " A dik ve reng.. Ka khawngaih lutuk keipawn" a lo ti ve sap a. Thingpui chu siam dunin nula pakhatin a rawn pui bawk a. An sem zo chiah tihin room lamah chuan an ri ta hak mai. Mami chuan thlaphang takin, "Ka pa.. Ka pa.. Harh teh.. " tiin a ko mawlh mawlh a. 

Diteii te chu an lut ve vat. Apa chu an lo bawihsawm mek a, Kil khatah Teteii a lo tap pur bawk. Diteii chuan a va din hnaih ve a. A pa thaw hrâwp hrâwp ri chu rapthlak a ti hle, a khawngaih bawk si. Vawi leh khatah apa chu a zawi hnawk a. A che zui ta lo. An thenawmpa, Doctor chuan a han bawihsawm kual a, a mar te a han dek a. A beidawng hmel chu Diteii pawn a hai bik lo. Apa chuan khawvel a chhuahsan ta tih a hrethiam. Mami a tap nghal rawng rawng a. "Ka pa, a ni thei lo.. I kal thei lo. Engtin nge i fate kan awm ang.. Mawh.. Ka pa" a ti lawm lawm a. An thenawmnu leh a ni te pahnih pawh an rawn tap ve hawm hawm.. Teteii chuan a pa ruang chu va bawhin, "Pa.. Lo kir leh rawh" tiin a tap hlap hlap a. Diteii erawh a ding khawng reng. 

Apa thih sarhu lai chuan mi an tam a, an tlawmngai bawk a. Khawhar leh na em emin a awm lo. A pa ruang thlak zanah erawh Bena nen an kawm thlang huanah an chhuk a. A zuk tap nghek. Mi zingah a tap hleithei lo va, Bena bulah erawh a insum zo ta bik lo. Bena pawn a lo tahpui ve tawp. Hnem vak ngaihna a hre si lo. An veng chhung ten an lainat bawk a, nu nei tawh lo an lo ni bawk nen. An kilkawi rei angreng. Mami lah nula fel leh vengva tak thenrual ngah mi a lo ni bawk si, inleng pwh an nei rei viau. Pa an nei ta lo chu a ni ta reng mai. 

Kum a tawp dawn ruai tawh a. Hunpui lo thleng tur chu an huphurh ru kher mai. Zirna lamah pawh an tlakhniam phah deuh. Mami erawh a hma ai mahin a chhel zawk emaw tih tur a ni. A naute a kil kawi hneh khawp mai. A hma aiin an zah sawt bawk. Mi fak pawh a hlawh viau. 

Hunpui chu engtin tin emaw an hmang zo ve mai a. Teteii pawh a inpenparh leh tawj viau. Lawma pawh zu a in chho leh tan a. Mami rilru a hah thei khawp mai. Diteii nen chauha in an nghah chang a tam. Pa ber awm ta lo chu an zahawm lo sawt ni ten a inhria. Anu erawh pur buai loh hram a la tum ve hram hram. Sum leh paiah an la buai lutuk lo bawk a. Sangtea lah in kum thar lamah chuan neih ngei a tum thu a fah chhen bawk, a nghak rei tawh bawk a. Hnar vak dan a hre tawh lo. A naute a chhuanlam zel chuan a damchhungin a nei lo thei takngial dawnin a hre ve a. Pasal neih a chak vang lam ai mahin sangtea hmai zah a tina tawh zawk a ni ber. A thawi tham deuhin Diteii bulah a sawi tawh a. "Mami, ka ngai ngawt ang che. Mahse, i upa tawh a, fa te i nei thei lo ang tih a hlauhawm. Nei rawh. Kei chu min ngaihtuah suh" a lo ti ve thliam a. A lungte a chhe lek lek hial. Apa khan an inneih te han hmang ve thei se a tha tur.. 

Kum a lo thar ta. Diteii te school pawh an tang bawk a, study camp an nei chho nghal. Apa dam lai khan a duh lo kha a nia, mahse, Mami'n, "I. Zir tha lo em mai. I pass zo lo palh ang." A tih tlat vangin camp pawh chu a zawm ve ta a. Class X pass vata Higher sectiona awm ve chu a chak tawh. Bena nen an luhna a inang tawh bawk ang a. Eng nge a tum ber leh a zir chhan ber erawh a la ngaibtuah ngai meuh lo. A kal ve mawp mawp a ni ber e. 

(Duh tawk phawt ila, a tawi maithei. Ni khat danah ka rawn dah thin ang. Harsatn a awm loh chuan. 

Tin, 1st person kha in duh hlawm viau naa, ka ti leh ta lo mai. Character hrang hrang ka duan dawn vangin a rem thei meuh lo a ni e. POV ang kha ka tih mi a ni lem lo va, keima style ve tein ka kal leh ta mai. Ngaihnawm in tih loh pawn in lo chhiar hram hram dawn nia. Ka hmangaih vek che u tih kha hre phawt ula 😍😊