Thuruk 8

THURÛK..!  (8)

Ziaktu: Toni Râlte

Emy.. :

"Engkim ka hre duh. I thi tawh sia.. Thil awmzia zawng zawng ka hre duh" Zoliansanga aw ki chu a ngainatawm hliah hliah mai. Emy chu a thu ngawi tlat. Thudik hrilh ta se, apa ngei chu a bultumtu a ni a. Tin, Zoa hian engkim a hriat chuam a fanu a khung hrantir dawn tih a hai lo. Mahse, a fanu hum theihna kawng chu a awm tho. A pa atan tu emaw hming hawh se.. Mahse, engtikah emaw a fanu nihna dik tak chu a la rawn lang chhuak ngei ang a, enkawlna tha tak a dawn loh phei chuan Zoram tan hmelma hnawksak tak a la ni thei. A damchhunga an khung hrang a nih loh chuan… a inngaihtuah buai takzet a ni. 

"Hlupui, ka biak che chu" tiin a rawn nghawk salh a. 

"Emy tiin min ko rawh.. Hlupuii ka ni lo" a lo ti chang rât a. 

"I aw te, i tatoo te, i mizia zawng zawng te.. Engkim, pyramid te thlengin.. Zohlupuii ngei i ni" a lo ti chat chat thung. Eng nge a sawi tak ang.. Zoliansanga hi a bum kumkhua thei lo vang. A hmel chu thlak mah se; Zohlupuii a ni tlat si alawm le.. 

"Min chhuahsan rih rawh. Keimaha awm ka duh a ni.. Inngaihtuah ka duh. Khawngaihin" Emy aw -a ngenngawlna thûkzia chu a hai bik lo. Nawr tut tut chu a duh ta bik lo va. 

A chalah a fawp zauh a. "Ka rawn hmu leh anh che. Ka pui thei che alawm.. Engkim ka hre duh" a ti sup a. Emy chu a chhuahsan ta a. 

Chhuatah chuan a vei tawn sek a; a hui leh pap thin. Engkim buai zo ta chu chinfel ngaihna a hre lo. Arianna a lo that ta kher kha a tisual ta nge.. Mahse, that lo mah se, A fanu chuan kha ai khan a huat tho a ring. Tihtheih pakhat chu a la nei, Valtea hmin.. Mahse, Valtea hian a la ring pumhlum chiah si lo. Mahse, a rilru hneh theih mai chu a inbeisei. 

Tunah chuan Zochhingpuii pai tura a thil paltlang te kha a ngaihtuah a, Ni e, a lar vanglai kha chuan a pa fuihna leh zilhhauna kha a vawng reng a. Zoliansanga a nei bawk. A nun kha a kim em em a ni. Mahse, hun a kal zel a, lar lehzual chakna leh duhâmna chuan a nun a tibuai chho tan a. Chutihlai mek chuan Ariana a rawn lang ta kha a nia. Ani khan thiam leh fing takin a vehthlem kual a; a rilru a hneh tial tial bawk. Pawisaah a buai lo va, mi tam tak ngaihsan rawn leh ngaihven nih chu nuam a ti chho tial tial mai. A zai lah a mawi telh telh bawk. 

Ariana nen an chhuak dun fô a. Zawi zawiin an pawla lut turin a hmin chho kha a nia. Khatah khan a ni Zoliansanga pa nen an inhmachhawn tak. "Ka fapa nen hian in inneih ngei ka beisei" a tih nghe nghe kha. Mahse, an thiltum a hre hauh si lo. 

An pawl tana a thisen a hlan atang khan sal ang maiin an kai kual ta kha a nia. Banker tam tak a chhaih buai a, politician pahnih lai chu a hmin bawk. An pawl tan a thawh hlawk em em rualin chu chu an la duhkhawp ta lo fô a!  Duhthlanna harsa tak an chhawp chhuahsak a nih kha.. 

Ni e, a thluak kha a ta a ni tawh lo miau a!  Thil thui tak a ngaihtuah thei ngai lo. An pawl tana fanu hrinsaka chu a fanu hmanga zoram awp beh tumna chu a hnar thei ta lo a!  A fanu avanga a chanvo leh dinhmun tur a ngaihtuahin a hnar zo lo a ni ber. Khami kar chhung zawng khan a mang lamah tihbuai a ni fô a!  Mipat hmeichhiatna kaihhnawiha bawl zan kual a ni thin. Nula thianghlim erawh a la ni. Zoliansanga tana a hlan tur kha tu emaw tan a hlan dawn ta a ni. 

Kha mi zan, Zochhingpuii pa nen an mutdun zan khan mak takin a hriatna a fim chho va. Inchhirna namèn lo vin a tuam chho ta a. A rai puar chhung zawng khan a tawm tlawk tlawk reng a ni. Fanu chu a hring ang tih a hlau a, fapa ni se a duh. A hrin a lo hun a, fanu a hring ta si. Amah mai nise a rek hlum nghal maithei. A thei kher lo maithei bawk. 

A ruahmanna in a pa ten a fanu chu tlanbopuiin khawpui an chhuahsan a. Amah leh a fanu rawn lak tumte khan a mah chauh an rawn hmu ta kha a nia. Tichuan, Dr Gosa hmangin a hmel tihdanglam sak a ni a, a hriatna erawh a nawhrehsak ta lo a nih kha. Khang kum tal ta zawng zawng chhung khan tum pakhat chiah a nei. A fanu venhim. 

A ti a, a ti reng bawk. Mahse, venhim theih loh chin a nei ta a. A nu leh paten an thih phah ta hial a!  A kal zel a, a thian pahnihte a chân bawk. Lehlam lehlam atangin an hualbet si a. Dr Zira hian Chairman paihthlaka a dinhmun luahsak a tum tih a hai lo. A assistant Erica ngei pawh hian a pui zat zat zel anih kha. Chairman lahin Emy chu ringhlel ru chung siin a hna a thawhtir fö a. Anihna takah chuan Emy hi a thawk palai a ni ber mai. Erica a ngaihtuah, ani hian Zochhingpuii a neih hma khan nasa takin a ngaizawng thin. Ni e, Zoliansanga vang chauhin sex a hmanpui lo a ni mai. A ngaina a, a ngaisang bawk. Mipa diktak niin a hria. Zoa lo la lang lo nise chaun a thlang ang. A thlang zawk lo chung pawh khan Erica chu a kawm tam zawk. Engkim Sex tih loh chu an ti dun vek a ni. Ni e, engkim. 

Mahse, a hriatna hloh anga a lan a ngaih si avangin Erica chu a hmelhrit satliah anga a en a ngai ta a. Duh ni se chuan a lam tangah a siam thei maithei. Mahse, Dr Zira hi a mawl bik lo va, Erica chu a chîk ru ve reng tih a hai lo. Dr Zira leh Zoa nu te tangrualin chairman an paihthlak hnuah chuan Zochhingpuii hi paihthlak tel vea Dorothy hmanga khawvel thar din an tum tih a hria a. A tihtir mai zawk dawn nge…?! 

A tlaivar a ni mai e. 

Dorothy:

A ke hnuai rawn za mer mer chuan a tiharh a. A meng kâwk. A khum bula mihrinh ding a hmuh chuan a bo deuh hû mai. Vaktea emaw a ti hman a. Mahse.. Valtea aiin a palian zawk. A rawn hnai zel a. Hmana pawngsualtu kha erawh a ni lo. A hmai bul chetah a rawn thaw ham ham a. A mumang mai mai anih beiseiin a lo hmachhawn ve tawp. 

"Emy ta i ni lo va. Kan ta i ni.. Nang hi chu" a ti sup a. A aw chu a hriam hle. 

"Eng nge i duh? " a lo ti a. 

"Nangmah.. " a lo tih san nghut. Zo zet hian Dory chu a chawi kang a, harh chhuak thut niawm takin a rak chhuak ta thut. 

"Hei, i tha em? Ti nge?  Eng nge thleng? " Valtea'n ngaihtuah hmel taka a ti mawlh mawlh chu fiah lo ruaiin a han hmu a. 

"Ka.. Ih.. Kha pa kha" a ti bah nuaih a. 

"Tu kha pa maw?  Tumah an awm lo. Kei lo chu" a lo ti a. 

Dory chu a thu chhuak hlawl mai. A mumang nge a tak? Kha pa khan chhuahpui a tum ni ngeiin a hria. Mahse, a thlah leh lai a hre hauh lo. 

"I tha em? " vaktea chuan a rawn ti leh a. 

"Ka thain ka hria" a lo ti tawp. A hlau a ni. Emy sawi ang khan khang mi te khan an duh ang tih tir an tum niin a hria. 

"Ka.. Bulah i mu thei ang em? " a ti ta a. Valtea mitmeng danglam zawk chu a hmu. Mahse, a maha a mut chuan a rawn kal leh anga, he hmun atang hian an hruai chhuak dawn niin a hre tlat. A duh lo. A hlau! 

"Aw le.. A tha alawm.. " Valtea chuan a ti sup a. Puan sin tur a lak chhungin tui a lo in khawlh khawlh. A thlan te a tla bat bat mai. Khum lian lutuk lo vah chuan puan hran ve ve sin in an mu dun ta ral mai. 

"Pawi ka ti. Ka tibuai che a" a ti sap a. 

A lo nui hak ringawt. 

"A zo ve tep ang. He pawl mak tak hi ka chhuahsan dawn" a ti leh a. 

"An umzui zel ang che" a lo ti a. 

"Ka hria alawm.. Mahse, an duh ang chu ka thlentir lo vang" a lo ti ve hmiah. 

"Shillongah awm tawh la" a lo ti a. 

"Ka hre lo le" tiin a chhang. 

An ngawi ta vang vang a. Valtea muhil thaw sák sák chu a awt ngawih ngawih. Ngaihngam leh thinthi dapa a muhil thei bik te, a duhna hmun hmuna a kal thei bikte chu a thik lek lek hial. Eng thil pawi nge maw a lo tih le? A lar tawk tawh reng asin. Engvanga kha pawl maksak zet kha luhchilh ve mai nge. anih ang?  Emy vang a ni han ti ngawt mah se; Emy pawn tirtu a nei chhawng leh si a. Venhim a tum ve em em zawk si. A in let thawk a. Mutthilh tumin a maimichhing a. 

A bul maia awm ve dang awma a hriatna chuan a ngaih a titha thei lo. A meng a, tumah a hmu si lo. Valtea thaw sák sák bak thawm dang a awm hek lo. A maimichhing leh chiah tihin "Dorothy" rawn ti tu an awm. A meng vat. Room kawngka bula Ariana lo dinh reng chu a va hmu ta a. A hamhaih hman lo. A thi tawh tij kha Emy khan a sawi tawh a. A thlarau erawh a chawl dawn lo tih nen. A rawn tlawh ve ta mai em ni ang? A rawn kal hnai zel a. A hmai dang bai leh a chal atanga thisen rawn luang thla ngiai ngiai chuan a tilang rapawm hle. A mitmeng lian kel kawl chuan a melh ran bawk a. Dory chu a khawng vek a ni ber. 

"Emy lamah i tang a, eng pawh ti rawh. Kan umzui zel dawn che. Dangbet tur che hian hmanraw tam tak kan mamawh lo. I mipa mutpui tawh te avang pawh hian i hming thanna hi a chuai thei.. " Arianna chuan a ti ta fak fak a. Ni e, mipa a mutpui nual tawh. Mi pasal te pawh. 

"Ka nun chu ka duhthlanna a ni. Tihtheih engmah innnei lo" a lo ti ve a. Arianna chu a nui!  Nui hmel rapthlak tak a ni. 

"Tihtheih kan neih leh neih loh chu i la hre dawn chauh.. Tunah pawh i awmna hmun hi hriat a ni tawh e" a ti ta a. A khum bula ding chung chuan a rawn melh chhuk kuau a, rapthlak zet hian a nui ta a… 

Dory chu a rak chhuak thei hlek lo lehnghal. A tal vak vak a, Chu chu Valtea chuan a lo hria nge ni.. A rawn pawm bet ta a. A meng hlawl mai. Ti nge mumangin a tihbuai reng le.. A khur zaih zaih a, Valtea chu a kuah bet ve thlawp. A lungphu rang lutuk chu a hriat theih hial a ring. 

"A tha vek e" a ti sup sup a. Valtea taksa lianpui chu lo kuah let vein a awmah chuan a lu a thukru thân a. Engmah a sawi lo. Rei tawk fang chutia an awm hnu chuan a hriat loh hlanin a lo muhil ta daih a. Valtea pawh chuti tho chu. A harh chuan khua a lo var tawh a. Amahin a lo mu bawk. Mahse, artui kan rim tui zet a hriat chuan a khi ta sak a. 

Amah phèntu, lungpui ang maia sak leh nghet a awm ta niin a hria a. Thlamuang takin a tho chhuak ve ta a. 

Zoliansanga.. :

A hmangaih zohlupuii, a hmaa a lo rinhlelh ruk, a sawi ngam si loh, a hnungzanga a tatoo avanga a rinngam tak avanga a nun thar chu a zo lo lek lek. Zohlupuii chunga thil thleng hriat a chakna chuan a tihelhhawlh zo va, mutmu pawh a tuah hleithei lo. Zohlupuii chu a hmel landan danglam tawh mah se; a lo la hmangaih reng tih a hre chhuak tawj. Amah Hlupuii a nih chhung kha chuan. A chhungte erawh a hrilh hre duh rih lem lo. Engkim a hriat chhuaha a hriat tur tul zawng zawng a hriat hnuah chuan a la hrilh ve mahna. Hlupuii tuna Emy lo ni ta hmel chu chiang takin a mitthla a. A ngai veng veng nia. 

Chhuah tuma a insiam mawlh mawlh laiin, "Mama, Dr Bta chanchin kha i lo hre ve tawh em? " a nu chuan a rawn ti a. 

"Aih, eng nge thleng a? " thil dang a ngaihtuah hman meuh lo a ni e. 

"A clinic  atangin a bo.. An hmu zo lo tawp" a ti ta mai a! 

Mak a ti ta deuh. "Sawi chiang teh" a lo ti a. 

"Niminah a haw lo va, Hospitalah a buai anih an ring a. An call lahin a la thei si lo.. Tukinah khan an va kal a, Hospitalah awm bawk si lo, a clinic lah kawngkhar kalh lo vin a lo inhawng a. Amah hmuh tur awm bawk si lo. A assistant lah chuan nimin tlaiah khan a chhungte lamah harsatna a awm vangin hawn a dil a, a lo hawnsan daih a lo nia" a nu chuan a ti siam siam a. 

Dr Bta chu a pa thian hnai tak, Zoliansanga nen pawh inngaina em em an ni. Zoa farnu nen rei tak an lo inzui tawh thin a. Mahse, Doctor a zir chhungin a farnu chu rinawm zo lo vin mi dang a nei ta a. Mahse, chutiang boruak awm mah se, an inkar a chhiat phah lem lo. Amah aiin u deuh mah se; a thianpa ang tho in a en a. A pa thianpa a ni ve tho bawk nen. A chunga thil thleng chu pawi a ti hle. Tihtheih a nei ang em aw.. Emy va hmuh tum kha a nia. A thulh ve leh rih mai dawn nge le.. 

A chhuak ta phawt. An kawt ah chuan a ding veng vawng a. Engpawhnise, Jona in lam pan phawt tha a tih vangin chu lam pan chuan a inkhalh phei leh ta a. 

Jona chuan a lo hre leh vek tawh a. Dr Gosa thihna pawh an la chingfel thei si lo. Chhui zui ngaihna a vâng em a. Dr Gosa khan hna thawh eng emaw chu a nei tih an hria. Damdawiinah a thawk tawh lo va, mahse, a doctor nihna erawh a la hmang chhunzawm tih a hriat. Khawiah nge tihah an buai a ni. Nitin a chhuak ve ziah a, mahse,  zan reiah a lo haw chauh thin. A chang leh zan laiah te a inkhalh chhuak lawi bawk a! A thenawmho te bulah chuan private in a thawh thu leh chhungkaw hrang hrang a enkawl thu a sawi a. Tu te nge tih an lo zawt si se si lo va. Tihian a tawp tawp. Eng vak hmuh chhuah tur a awm lo. 

Dr Bta bo dan chu an sawi dun a. Amah Jona chuan a clinic te pawh a lo va enfel diam tawh a. Engmah a hmuh loh thu bak sawi tur a hre lo. A rubotu te hi an fimkhur hle emaw amah ngei hian a zui a nih a rinawm. Han inchai buaina engmah a awm lo. Zoa rilru pawh a buai ve ta map mai. Bta chu a thian leh a pa thian a ni a, mi tha tak, an veng chhung tana mi thawhhlawk em em a ni. Dam lo harsa leh rethei te tan pa nih a tling em em a, a thlawna a enkawl leh damdawi man a tumsak te hi sawi sen pawh an ni tawh lo. Chuti ang mi tha lutuk chu a bo ngawt thei lo. 

Emy a call a, a pick up leh lo. A rinsa reng a nia. A hmu duh vak lo tih a hria. Mahse, a hrechhuak tawh tho va, a inpeih hunah engkim a la puanzar a beisei a ni. Jona nen Bta te in lam an va pan ta phawt a. Tihtheih em em a awm si lo. A nupui leh an fapa naupang chu an tap keuh keuh reng mai a. Han bo ngawt mai chu mak a ti tawlh tawlh. Dr Gosa thah a nih atanga kar hnihna chiah a ni. A inzawm hial lo maw aw tih te a ngaihtuah. Chawhnuah inah a haw a. A pa a lo awm khiah. Bta vang a ni maithei. 

"Pa, U Bta chungchang chu engtin nge in ngaihtuah dawn? " a ti a. 

"Kan hrethiam lo khawp mai. Police ten theihtawpinn an zawng anga.. An hmu ngei turah ngai ila" a lo ti a. 

"Mama, Sangteii a lo kal dawn a.. Chhuak tawh suh aw" anu chuan a lo ti a. 

"Hah.. Ka nu ka sawi zing tawh. Lo kal fo suh se. Ka duhzawng a ni lo. Ka hmeichhe duhzawng chu ka hmu tawh e. Ka nei dawn bawk" a lo ti hriam hraih mai. Makti zetin a nu leh pate chuan an melh a. 

"Ka la hmelhriattir ang che u. Nula hmel tha leh fing tak a ni" a ti leh a. A roomah a chho zui nghal. 

"Nang pawh in i luahlum lo lutuk a, i fapa hian nupui a mamawh tih i hre reng.. I mak em em lutuk. Hna ringawt buaipui" an nu chaun a ti hlak hlak a. 

"Mipa a nia, tlangval a ni tawh bawk a. A duh ang chu nei ang hmiang" a lo ti nghut. 

Zoa nu chuan, "Sangteii hi nei se ka duh a ni" a lo ti a. Zoa pa chuan a nupui mita chiang taka enin, "Engvangin? " a ti zawi sup a. 

"Ka.. Ih.. A hmel tha a, a zahawm a, hna tha tak a nei bawk" zoa nu chuan lehlam hawi chungin a lo ti a. 

"Dr Zira fanu a nih vangin maw? " a lo ti leh a. 

"Ni pakhat e. Kan chhungkaw inthianthatna kan chhawm zui zel thei dawn a" Zoa nu chuan a ti ta a. Zoa pa erawh ngawi rengin inthlak turin roomah a lut ta a. 

Zoa nu chuan a awm a dawm a, a thaw hawk mai. An awmpuinu Hruaii chuan a lo en reng tih a hre lo. Hruaii hi thla hnih liamtaa an awmpui kha a ni a, an awmpui hmasa a khum hneh hle. A taimaa a che fel bawk. A tawng tlem bawk. Duhthusam a ni tawp mai. 

Zoa chuan Emy call a tum leh.. A la thei si lo. Zanriah ei chhuah mai a tum ta a. Sangteii a lo kal dawn si a, a hmu peih lo. Thawmhnaw hak nuam deuh thlangin khumah a dah chhuak a, inbual turin bathroomah a lut ta a. A faifuk rat rat mai. Bta bo mah se; eng emaw ni deuh hian a thawveng tlat. Emy vang tih a hrechiang ngang mai. 

Secret Society: 

Dr Bta hmaah chuan kawisawi zetin hmeichhe pakhat a ding a. A pian nalh zia chu a mak zawk. A vun mam leh ngo var mai tilang tam turin a thawmhnaw hak a themlem viau lehnghal. Room chhungah chuan Vice Chairman a rawn lut a. 

"Sophi, i thawk tha takzet e.. Mipa tha tak te pawh hian chak lohna an nei vek alawm.. A ni lawm ni? " tiin Hmeichhia chu a nuih a. 

Sophia chuan, "Mahse, a rawn harhchhuah hunah chuan mak a ti viau ang' a lo ti sap. 

"Ni e. A bak hi chu kan lo chhunzawm tawh mai ang" Vice chuan a lo ti a. Sophia chu a chhuak zui nghal. Dr Bta chu damdawi hmanga hrai ruih a ni mek a, a meng vai ruai mai. Ni e, a clinic a chhuahsawn dawn mek laiin nula pakhat, nalh zet mangan hmel tak si a rawn lut hlawl anih kha. "Khawngaihin ka pu, ka unaunu a thi tep.. Min ensak hram rawh" tiin a ngen anih kha.. ani mi khawngaih thei tak chuan a lo remti ve mai a. A ken tur thil vel lakhawma a buai laiin a tukhum a rawn thip zawk a. A lu a hai chhalh a, a meng vai nghal ruai mai. Hmeichhia chuan a kai a, a car pawh hmeichhia chuan a khalh ta a nih kha. Engmah mumalin a hre lo. 

Arianna ruang an phum fel tawh a. A thattu nia an rinhlelh ber Emy laka fiahna hmuh tumin an vehthlem mek a ni. Chairman pawh zan dar 8ah a rawn thleng a. A thianpa Dr Bta vai ruai hmaah chuan a ding vang vang a. A hmelah engmah a lang thei lo. Dr Gosa aiawh tur in he pa tluk an hre miau si lo alawm le.. An offer a pawm thei ang em a hre lo. 

"Emy a lo kal" A sira ding chuan a ti sap a. 

"Ka lo hmu ang" Chairman chuan a ti a. 

Chairman roomah ngawi rengin an inhmachhawn ta ran a. Emy hmel chu a thim mak a, a mitmeng pawh a thip angreng viau. 

"Tu nge Zochhingpuii chu enkawl dawn ta? " a ti ta a. 

"Sophia emaw Zonuni emaw an ni ang. Erica a ni thei bawk" Chairman chuan a lo ti var a. 

A rum nghat. "Ka tha tawk ber lo em ni? " a ti a. 

"I tha ber tih ka hria. Mahse, aman harsatna a nei tlat a ni. A nu thattu angah a ngai che a. Hmuh che pawh a duh tawh lo a ni" chairman chuan a lainat hmel riau! 

"Mahse, ka hrilhfiah thei alawm" a lo ti vat. 

"Ka ring lo. A nihna dik tak hrilh turin zanin dar 12-ah ka lut ang" a lo ti a. 

"I tithei lo. I hrilh lo vang" a lo ti hlar a. 

"Ka tih a ngai si alawm.. Emy, anihna saw a hriat hmasak loh chuan a mentor salah a táng thei asin.. Chu chu a tha ber lo" 

"Mahse, i tihlauthawng thei asin. Naupanh a nih saw.. Naupang" 

"Emy, thudik tak min hrilh rawh. Saw naupang saw i tan eng nge anih? " Chairman chuan chîk zetin a melh a. 

Emy chuan thuruk neih chu a sâwt tawh lo tih hriain, "Ka fanu a ni. Zohlupuii ka ni tih ka hria alawm" a ti ta a. Chairman chuan a lo rinsa a nih vangin makti hmel a pu lem lo. 

"I fanu venhim i tum chu ka dem lo che. Mahse, Arianna i that kha a pawi a ni.. Arianna thlarau i ko chhuak ta si a" a lo ti a. 

"Thlarau chuan min tina thei lo. Hun min pe la, Ka fanu rilru chu ka hneh thei ang. Khawngaihin" Emy chuan a ti a. 

"I hlauhawm sawt a nih chu. I fanu saw chhanchhuah i tum ngei dawn si a.. Emy, ka tan hna tam i lo thawj twh vang chauhin ka haider lui ang. Mahse, tun atang chuan i fanu saw a deh pawh i dek tawh tur a ni lo. Ani saw kan ta tih i hrereng tur a ni" chairman chuan a ti ta a. A thu chu thutawp a ni tih Emy ngei pawn a hre chiang. Mahse, mi mawl a ni bik tlat lo. 

"Chairman, hei hi hre rawh. Tunah hian i fapa hian hmana a hmangaih kha ka ni tih a hre tawh. Thil tam tak hriat a duh nghe nghe asin. Ka ka ka ang anih chuan.. Eng nge thleng thei i hria em? " a ti vawt ta raih a. Chairman chuan a kut a hum ruh nasa mai. 

"Tichuan i hrilh anga.. I him thei mai turah i ngai em ni? I thiltij zawng zanwg, banker i bum dan, pawisa i ruk chhuah dan, politician i vehthlem dan leh Tual i thah tawh dan te kha document felfai tak nen hmun himah kan thukru thlap asin. I him dawn hauh lo' Chairman chuan a ti ve ta sak sak a. 

Emy chu za lo zeta nui luiin, "Ka hria. Ka hre vek. Him ka duh ber hleinem. Ka fanu saw in duh tipuitling tura in hrual ka rem ti dawn lo. Ka fanu chhanhim nan engpawh ka ti ang. Ani saw a thi emaw an khung hrang emaw, he pawl tana a ding lo a nih phawt chuan ka lawm ang" a ti ta hmiah mai. 

"Emy, ramhuainu, i thu i sût leh a maw?  Engvangin maw? " chairman awki chu a sang ta hle. Zam map lo va melh let vein, "Ka hun tam zawk he pawl tan ka hmang tawh a. Ka fanu lehzel sal anga in chhawr ka phal tawh lo. Ramhuai chu nangmah hi i ni.. Nangmah. " a ti ve ta sawk sawk a. An inhlau lo dun hle. 

"Anih chuan eng ti turin nge min duh? " chairman chuan a ti ta nge nge a. 

"Ka fanu saw min pekir rawh. Buaina ka siam lo vang" a lo ti nem thlap. 

"Inngaihtuah nan hun ka mamawh dawn anih chu.. " a lo ti a. Emy chuan ngawi rengin room chu a chhuahsan ta a. 

A fanu chu a hmu thei rih dawn chuang lo tih hriain Valtea in lam a pan nghal. Bawngkawn a thleng a, a motor a park tha a. Shopping mall lun ve takah chuan lut zauhin eitur a lam khawm a, thawmhnaw tlem nen.. Dressing room panin a kawrfual lei thar chu a ha a, a sam chu a sir ve veah a phiar kak a,a hmui sen no hiamah chuan lipstick sen mangtara a hnawih belh a, a biangah a hnawih bawk. A mit chu a a chung leh hnuai a hnawih dum huam bawk. A inen nawn leh a. A nui sak. Inpawm bawr deuhin Mall chu a chhuahsan ta a. Taxi lo awm hnaj berah chuan lut zauhin a kalna tur chu a sawi ta a. Hnunglam chu a va thlir a, amah zuitu te pahnih, Mall lam hlir melh mek te chu a va hmu a. A khi sak mai. 

"Lo kal tawh lo tur i ni asin. A hlauhawm" Valtea chuan a lo ti a. 

"A ngai tlat" a lo ti mai a. A hmel landan leh a incheina chu mak an lo ti viau. Ni e, chhul tha lo a ang takzet. A duhdan a ni tlat si a. 

"Dory, khawngaihin hun min pe lawk ta che. Ka nau hi biak fal ka duh a" a ti a. Dorothy pawn hrethiam takin a kal san ta a. 

"Valte, ka mangang tan ta a ni e. Ka fanuin min hua" a ti ta thlawt a. 

"Engvangin" a lo ti vat. 

"Ariana thlarauin a lo kawm a.. Anu thattuah min ngai. A pi leh pute thattuah nen" a ti chuai raih a. 

"Kei pawn i ni lo takxet em tih ka hre hauh lo" valtea chuan a lo ti hmiah. 

"Ka tatoo zawng zawng i hmu a. Engkim fiahna chu ka pe tawh che. I u ka ni. Kum. 14 i nih kuma i pianchama ka thilpek che kha i la hria em?  I ngainat em em sazupui pahnih anih kha. Kum 16 i nih kumah erawh ka pa nen inthawh tawmin i experiment atana i mamawh tur kan leisak che kha" Emy chuan a ti ta zung zung a. Valtea chu a thaw hawk. A û chu a nih hmel viau si. 

"Enteh, Valte, i u angah min ngai emaw ngai lo emaw ka pawisa tawh lo. Min ring phawt la ka duh, ka fanu venghim tur hian. I tunu hian min mamawh a. Min mamawh tih a hre si lo hi ka buaina a ni" a ti leh a. 

"Eng nge ka tih ang? An rawn hawtir duh si lo va" a lo ti a. 

"Nangmah ngei hian va kawm la ka duh a ni. Chairman ka lo hrilh ang a. Tichuan, kei hi anu ka ni takzet tih i rintir a ngai" 

"Ka tunu luhlulzia kan hria alawm" 

"Kei aiin i kawl rei zawk a. A rilru hneh dan i hre ngei ang" 

"Ka lo tum dawn nia.. Mahse, ka tiam thei lo che ania" Valtea chuan a ti a. 

"Aw le, chhunah chuan lehkhabu chhiarna hun an hman avangin remchang a awm lonvang. Naktuk zan dar 10 ah ka sawina hmunah i lo awm dawn nia.. " Emy chuan a ti ta a. 

Amah bawk chuan, "Dory chu enkawl a hahthlak em? " a ti a. 

"Aih.. a fel sâwt khawp mai" a lo ti var a. Nizan lama a taksa deh nawmzia a ngaihtuah hman. Mahse, Emy bula sawi kher a tulna a hre lo. 

Zochhingpuii chu rilru buai takin a mu a. A chunga thil thlen chhoh dan chu mumanh ni se harhsan a chak tawh a ni. A putea a ngai tawh bawk. Tu nge anih a hetia a awm bik?  Tleirawl satliah nih a duh.. Mi naran maj mai nih a duh ngawih ngawih. Tu nhe a pa tih lah tuman an hrilj duh si lo. Chairman hi a nih te a ring rum rum.. Emaw Rawn ngaihsak ve viau thintu Erica kha a ni thei mai ang em le… 

Kawngka a ri rak, chairman a lo lut a. 

."Haw ka duh" a lo ti nghal thawr a. 

"I haw thei tep tawh e. Thil pakhat a la awm a. Emy khan vawi khat chiah hmuh leh che a duh a ni" a lo ti a. A ner sawk. 

"Ka hmu duh lo" a ti tawi tak a. 

"Ani kha helaia mentor tha ber a ni asin"

"Ka tan a ni ve lo. Tualthattu mi dawhheh a nih kha" a lo ti hlar a. Chairman pawh a beidawn hmel angreng. 

"Anih naktuk zanah i putea i hmu duh ang em? " a ti ta a. 

"Duh ang em a..!  Duh lutuk zawk.. Ka ngai lutuk" a lo ti chul a. 

"Aw le.. Thu awih takin lo nghak la.. I putea chu i hmu em em ang. Tunah chuan muhil tawh rawh. Thil tam tak ngaihtuah lo la, thlamuang takin awm ang che" a ti a. Nelawm taka nui chungin a chhuahsan nghal. 

Khuma muin chunglam a melh vang vang a. Light bulb chu a tek chhek chhek a. A inrin hmain Arianna chu in chung atang chuan a rawn tum thla chhak. Hlau miah lo vin Zoi chuan a lo melh kar a. 

Mawi zeta nui saih chung hian, "I putea chu i hmu tur a ni lo. Ani pawh saw bumtu. ani. Emy nen inthuruala thawk dun an ni e. Engkim kha an plan vek a ni. Ramhnuai te, Villa te.. Tuna khawpuia pem te.. Engkim kha.. Ani chu i hmu tur a ni hauh lo" a ti ta a. 

Zochhingpuii mitmeng buai zet chu nui chung bawka thlirin a ral leh ta riai riai a… 

(Hun awl hi ka ngah ta vak lo a ni e. Ka duhtak te u, lo hlim phawt mai teh u 😍