Thuruk 7

THURÛK..!  (7)

Ziaktu: Toni Râlte

Khatia Emy'n Meeting lai a va tihbuaia, luhaia a tluk thelh khan, a hmaa a lo fit tawh Voice recorder te takte, dawhkan hnuaia a bel chu a la ru zeuh a, inah uluk takin a ngaithla tluan ta parh a ni. Chu chu Dory bona nen a inkaihhnawih ta zel a ni. Ni e, Dorothy chu amah anga nau hrintir tlak lo, test paltlang zo lo anga sawi a nih miau avangin Arianna hmanrua atana hman mai an tum ta kha a nia. Arianna hi Emy an lakluh tirh lai ang renga la nula leh nalh a nih theihna chhan hi chhan dang vak a lo awm lo. Thisen hmanga a vun a tihmar thin vang a lo ni. He Ariana hi a kal dik lo zo tawh a, A nu chu mizo a ni naa, a pa khasi a nih miau avangin a nu chuan a piantirh atangin Orphanage home-ah dahin a tal tala tal turin a hnutchhiah kha a nia. Kha Home atang khan Lucifera tirhkoh ten a chak lohna hriaiin an vehthlem a, ani mi khawhar, zalen chaka tuihal ta reng reng chuan a mang lama rawn kawmtu te chu a ngaina ta viau a. A lo nula chho va, Incubus te nen inkawp chhoin a pindan bikah vawi tam a nuam tuar thawm an hre thin. Rapthlak an tih em vangin an hnawtchhuak ta nge nge kha a nia. Mahse, a vakvai hauh lo. American khualzin satliah anga lang pa upa tawh lam hian a rawn hmu ta chat a. Tichuan, inhrethiam tawn takin secret society chu an inzawm tir ta a ni. Nasa taka train a ni a. Sex addicted a ni a, mahse, a mutpui tawh mipa a mutpui nawn khât viau. A hmeichhe mawina leh sex hmachhuanin mi ropui tak tak an pawla lut turin a hmin tawh a, USA lama tirh a ni naa, Mizoram zimteah Supervisor ang deuha a chet a ngaih tak avangin Mizoram a rawn chuangkai ta a ni.. Mizo mipa zinga a mutpui hmasa ber chu Eric kha a ni. 

Tichuan, Zohlupuii a bitum chho va, Erica kaltlangin Hlupuii an hneh thei a. Ariana hian a thluak a suksak ta bawk. Tichuan, an tum tihlawhtling tura khung hran a ni ta a. 

Ariana hi kum khatah thla hnih dan zelah Thisenin a inbual thin. He a ngaihdan puithuna atthlak zet hi Engtia a neih nge hriat a ni lo. Lehkhabu a chhiar nasa a, British ram roreltu lo ni tawh thin te tihdan a hria pawh a ni mahna le.. Tin, nuam a ti viau. Nula hmel tha tak thisen ngei hmanga a taksa a han bual zawh hi chuan hmel tha leh mar sawtin a inhre thin. A kum a upa zel a, mahse, a nalh tulh tulh. Hei hi chu a mak tih loh rual a ni lo. Luci puihna pawh a ni mahna le.. Tuin nge hre bik ang? 

Dorothy khan tangkaina a nei lo a ni tawp lo va, mahse, Zochhingpuii an nei tawh tho va, Dory hi Emy lam tang deuh anga an hriat vang a ni pakhat ang, Arianna kutah an hlan ta kha a nia. Chu chu Emy chuan a lo ngaithla vek si. Khami zan khan Dory chu an tihlum dawn tih a chiang; Zochhingpuii pa pawh puanzar a ni tawh dawn bawk. Chung thil pahnih a thlen loh nana ruahmanna siam chu a tihmakmawh a ni tih a hria. Lamtang pakhatmah a nei tawh lo, Jo lah phum lohin a ruang a la awm reng. Valtea a va be ta chawt anih kha. Nasa taka an inhnial hnuah Valtea chuan a tunu vang chauhin a lo pawm anih kha. 

Dory phone an kawlsak daih si avangin Dory hnena thu han chah dan tur a bangbo deuh a. Mahse, chairman a va hmu ta a ni. A tirah Dory hmuhtir turin a ngen a, a lo remtih loh vangin a vau ta hial a nih kha. 

"I hmuh duh chhan sawi teh" a tih khan, "Zochhingpuii nen training an hmachhawn dun dawn a, Tha taka lo enkawl tura chah ka duh a ni. A chhan chu Zochhingpuii ka enkawl thei ta si lo va, Dorothy hi a pawimawh em a ni" a ti anih kha. Chuti chung pawn rinhlelh a nih tlat avangin a thiamthil a hman a ngai ta nge nge a. 

Chairman chu va hnaihin, a nectie chu a suih thatsak a, "Zaninah in inah i haw lo thei alawm.. Khatla lamah i rawn kal kual thei.. Kan hriat kha.. Emy hian mipa chakna a hipkang thei tih chu" tiin Chairman mitah a melh sawr sawr a. A hmui chu a pen fân kual a, a sexy takzet. 

"Emy, Thil tih tum i nei lo tih chian phawt ka duh, kan pahnihin Dorothy chu kan va hmu dun thei alawm" a ti ta a. Emy tan duhthlan tur a awm lo. A remtih mai a ngai. Zochhingpuii hmuh chu engtikawng maha phalsak a ni dawn lo tih a hriat vang ania Dorithy zawk a target ni. Tichuan, Dorothy awmna hmunah chuan an phei dun ta kha a nia. 

A phone a bih ngur ngur mai. Chairman pawn a khak nghe nghe.  Dory chu hmel chiái angreng takin a lo thu reng a. Emy a hmuh rual chuan a thaw huai. Mahse, Chairman in a rawn zui ve si. Emy chuan, "Zochhingpuii ka ngainatzia i hria, he nau hi kan pawl tana a pawimawhzia pawh i hria. Ka thian i ni a, ka thian i nih angin Tha takin Zohhingpuii hi i lo enkawl dawn nia aw.. " tiin Dorothy luah a va chul a. A nui sâng bawk. Chairman chuan ngun zetin a melh dun reng bawk. 

"Khaw nge i kal dawn? " Dory chuan a lo ti hû a. 

"Khawiah mah, mahse, nang leh Zochhingpuii chu ka hmu thei tawh dawn lo che u.. Khung hran in ni tawh dawn a ni" a ti a. Dorothy thih tur thu kha hria anga a awm a rem si lo. Chairmanin chhuak tura thupek a rawn neih takah chuan, Emy chuan ngaih hmel zetin Dory chu a kuah hlu hlu a, a kut veilam chu Dory kawr hnungah chuan a zen lut ta zauh a. Dory pawn a hnungzanga eng emaw awm chu a hai bik lo. Tho sawn ngam tawh lovin thuthmun atangin a thlir liam ve ta ngawt anih kha..

Emy chuan chhuah pahin a bubble gum thial lai chu a ham puar pawp!  Chairman in a lo nuih suk. Chairman in a hnungchhawn chhungin a thil thial lai chu phawrhin pindan kawngka kalhna zawnah chuan a nem bei ta zauh a. 

 Emy te chhuah hnuah a kawr chhunga Emy phone chu a phawrh vat a. A eng ber nge a en dawn tih a hre mai si lo. Whatsappah chuan lutin a numbera Emy msg lo awm chu a chhiar ta a. 

"Tihhlum i ni dawn a. Tun atanga darkar 4-ah. Zochhingpuii rooma Sister Ariana lut thawm i hriat rualin chet i la dawn nia. Tumah hlau suh. Kawngka kha i hawng anga, Corridor kha hmar lam hawi zawgin i zawh anga, Laboratory room a lo awm ang. Lut ang che. Duty an rawn vei anga, an rawn let leh hnuah Lab room-a chhuar lian tak bula Darthlalang hun kha chawisawn la, thawm neih loh hram i tum dawn nia. Siren a ri tawh ngei anga, mahse, chiâi suh. Darthlalang phèna cement rawng tak bik kha nem vak la, mihring leng tawk velin a lo inhawng mai ang. I lut anga, step kha i rawn zawh chho ang. Tichuan, kawngkhar a lo awm anga, Code number chu 7803 a ni e. Pawn i rawn chhuak thleng a, Chhim lam i zawh leh anga, Building pakhat a lo ding anga, ding lamah i hel dawn nia. I hel tawpah xenon a lo ding ang a, chuang ang che. A khalhtu kha ka nau a ni e" tih thu chu. Dory chu a thaw hawk. A huphurh rualin thih a duh bik lo. Emy chu a tan hlu viau mah se; he pawla lut tura sawmtu kha a ni si a. Mahse, khatih lai khan Emy kha rinhlelh a nih vang leh enthlak anih miau vangin Dory kha khatiang khan a thlem lo thei lo tih Dory pawn a hre thiam ve tho. Dr Zira'n pawisa pea Emy nen an inbiakna hrilh zel tura a tih pawh khan Emy lamah a tang ru ve reng a, thu pawimawh engmah a hlan chhawng ngai bik lo. Tunah chuan an inpuih tawn hun a thleng ta nge nge e. 

A pindan lehlam chiah kawngka a rik rual chuan a insangmar a. Rilru tawngtaina nen kawngka chu khur der der chungin a hawng a, tumah a hmu lo tak tak. Emy sawi ang zel khan a kal a, Lab room dawta step a zawh lai chuan a hah kher mai. A insangruh nasa bawk a ni. Building hel kuala a tawp a va thlen chuan xenon dum tle zar chuan a lo nghak reng tawh a. Hmanhmawh taka chuangin inbe miah lo vin Zemabawk lam an pan ta a ni. Emy nau chu mipa vantlang chen vel, hmuihmul leh khabe hmul nei a ni a. A mitmeng chu a nelawm vak loh, amah aiin a û hlek maithei. A be ngam lo va, an ngawi kawngtluan tawp mai. 

Emy nau inah chuan a riak ve ta ngawt kha a nia. Emy lah a biak theij si loh. Mahse, Emy nau chu a bulah rawn kalin, "Valtea ka nia, kei chuan ka hria che. Hetah hian i him ka beisei. Mahse, rei tak erawh i biru thei dawn lo a nia" a ti sup a. A aw chu a chang beng bawng viau naa a huat hmel hran loh. 

"Ka lawm e" a lo ti ringawt. Sawi tur a hre mai lo a ni. 

"Mutthilh chu a har maithei a. Mahse, tum lui rawh. Ramhnuaia kan tlanchhiat pawh a ngai maithei" a ti leh a. Engmah sawi tawh lo vin a mu ta nghal a. A tah a chhuak. Shillong a ngai, chhuk daih mai a chak a. Mahse, mawl viau mah se thil a ngaihtuahnthiam ve tlat. Shillonga a chhuk chuan an zawng hmu rang dawn lutuk,. Kha pawl kha eng nge. anih chiah a la hre thei ta chuang lo. A kut zai thiin a thisen far hnih vel kha a hlan ngei a. Setanist a ni ve ta mai em ni?  Chu chu sual ve hle mah se a duh bik lo. Tihian a ngaihtuah ve ta a. An rawn zawng hmua an that a nih pawhin heng an thuruk zawng zawng hi mi dangin an hriat ve theih nan tu emaw bulah a puang lawk ngei tur a ni. Zoliansanga a ngaihtuah chhuak nghal. Mahse, Kha pawl chairman kha Zoliansanga pa a ni si a, amah Zoa pawh hi society member a lo ni ve reng thei tlat! Tu hnenah nge thudik hi a puan tak ang le.. A inngaihtuah buai chhungin a lo muhil daih. 

Valtea chuana a tunu a ngaihtuah takzet. Emy sawi ang khan an confess hman ang em?  An confess a nih chuan a tunu tan a pawimawh tawh dawn si lo. A damchhan ber khan mi satliah ang leka a en anih chuan a tuar zo kher lo vang. 

Emy chuan mangan hmel zet hian, "Ka hmu zo miah lo. A kalna tur awm ka hre mai si lo va" Tiin Chairman chu a melh a. Chairman chuan ringhlel zetin a lo melh let ve thung. Mahse, Emy tel vena hnuhma a hmu chuang si lo. 

"Tu phiangsen chuan nge lo chhuahtir ang. Puitu zawng an awm ngei ang' a ti nghut nghut a. 

Emy chuan, "Zochhingpuii pawh saw ven a ngai ang. Arianna pawh bunkerah tawm rih se a tha lo maw? " a lo ti a. Emy thurawn chu pawm loh chi pawh ni lo chuan.. 

Zochhingpuii pindanah chuan mi pahnih an dah lut ta a. An veng zankhua thak dawn anih hmel. Ariana pawh bunkerah a lut thla ta nghal a. 

Pu Dinga chuan, "Dorothy inah mi panga ka tir phei tawh e. Tunah chuan hlauhlawpin a la awm ngei anga, engmah a la puan ngam ka ring lo.. " tiin chairman chu a melh pah a. 

"Chairman, i fapa leh Dory an inpawhn hle tih i hria em?  Dory hian eng emaw a ti thei ania">Emy chuan a lo ti vat a. Chairman pawh a hawiharh nghal viau. 

"Ok.. He thil hi he lai hmun atanga chinfel chi a ni lo. Ka hawn a ngai. Pu Ding, nangni pawh haw rawh u. Heta kan tawm chuan hriat chhuah kan awlsam dawn tlat" Chairman chuan a ti ta a. Emy chu thim zingah a lo nui sak. 

An haw ta zeuh zeuh a. A hmun nghak chu Zochhingpuii vengtu te leh Dr Zira leh Erica leh an  thuihhruaite an ni mai. Emy pawh a chhuak ve. Mahse, zing lam dar 2 velah Dory lo chhuah rukna atang khan a lut thla leh ta zal zal a. Lab room atanga chhuakin pindan pakhat chu a hawng a, chhuat phah chu khawkin kawngkhar lo awm chu a kuai hawng ta a. Step lo awm thla zuiah chuan chhuk thlain kawngka chu a pawt khar leh khap. 

Corridor thui vak lo a lo awm a. Dinglamah peng leh hlekin pindan lo eng khap zawnah chuan a ding ta a. Kawngka kalhna chu a herh a, a sak tlat. A lo inrinlawk sa tawh vangin a bakkilh chu a phawi a. A theihtawpa kuai kauin a herh leh ngat ngat a. A kawm that hnuah pindan kawngka kalhna zawn chu a hawlh ta rek rek a. A inhawng ta hram e. 

Thawm dim zetin a lut phei a. Room nuam tak a ni. Lei hnuaia an room te hi changtlung taka siam an ni vek reng a. Nakinah emergency atana hman tura duan a ni. Bed room chu. a va bih dâk dâk a. Tumah an lo awm lo. Bathroom lamah thawm a awm bawk si lo. Arianna hian a lo chang ru reng zawk em ni ang? 

Sitting room lam pana a pen leh chiah chu a hnunglam atangin, "Hello, Emy" a rawn ti ta sap a. A ding chawt. Ni e, he nu hi amah aia fing zawk a ni a. A lo hre lawk a ni mahna le.. 

"Hai.. I tha em tih rawn enfiah ka tum a" Emy chuan a ti a. Arianna chuan mut kawr inbel chungin wine a lo in mek a ni. 

"I duh ve em? " tiin wine chu a melh zauh a. Emy chuan a lu a lo thing. 

"Tichuan, ka tha tih i hre tawh bawk a.. Min chhuahsan mai dawn em ni ang? Nge i tihtur diktak i ti zawk dawn" Arianna chuan a ti ta mai a. Emy chu a ngawi rauh rauh,. A rawn kal hual a. 

"Emy i ni lo va, Zohlupuii i ni tih chu ka rawn thlen tirh khan ka hre tawh. I fanu venhim nan engpawh i ti dawn tih hi ka hai lo" a ti a. A nui pah rah rah bawk. Emy chuan chhuat lam a melh ngar a, "Ni e, ka tihtur chu ka ti bawk ang" a ti chang fal a. 

"Oh!  Takzet hian.. I fanu hi tihluihna hmanga i pai pawh a ni lo va, engvanga hel leh ta tlat nge i nih? " a lo ti sak a. 

"A chhan a awm a ni mai. Kei chu ka thi emaw ka dam emaw ka pawisa lo, Zochhingpuii hian a dinhmun a luah dawn lo a ni bur mai" a lo ti ve hmak. 

Ariana chuan rawn hnaihin Emy bek sam chu a zut kual a, a beng bulah, "Zochhingpuii pa hian a remtih ve ka ring lo" a rawn ti sap a. Emy chu a chhing sawk. Ariana chu a nui har har a, wine chu lem lehin, "Min chhuahsan la a tha ang. Naktukah Dorothy thisen in ka inbual dawn si a, chawlh hahdam ka mamawh" a ti a. Emy a vir zawk, Arianna wine no chu chhuatah a tla darh chuai, Ariana hrawka rek in, bangah a nawrbet ta hmiah a. 

Mitmeng ling hlar hian, "muangchanga thih nge i duh rang takin" a ti fiak thak a. Ariana erawh zam hmel a pu eih lo. Emy nen hian an intiat viau a, mahse, Tharum thawhna aia thluak hmang chi a nih vangin tharumah chuan Emy chu a khan lo deuh hlekin a rinawm. 

"Min thlah vat rawh. Thih i duh loh chuan" thaw hrâwp hrâwp chung hian a ti a. Emy a khi sak, "Zohlupuii hian eng thil chiah nge a lo paltlang tawh tih in hre lo. Ka fanu damkhawchhuah nan hian eng pawh ka ti thei" tih hrâwk pahin chhuatah a namthlu thuai a. A rawn tho leh tur chu a nakah a chhuih zawt. Arianna chu a let reng mai. A tukhum samah zuk kekin chhuat chu a lu chuan a tauh ta nghek nghek a. Arianna hmai chu thisen hlirin a khat tawh. Emy chu a inkhawih tui laklawh nge a tawpsan thei miah lo. Thinrimna hlirin a rawn tuam ta bawk. 

"Nang hian ka thluak suin ka khawvel i tidanglam a, thimah min hnutchhiah a, ka fanu hmanga khawvel ro rel in tum a. A teuh lo. Ka tihtir ngai lo vang che u.. I thi dawn. Ariana, i thi dawn" a ti tuar tuar a. A kawnga a silai zeh chu phawrhin, lukham a va la te te a. Sister Ariana chau zet, thisen nena inchiahpiah nuaih luah lukham chu hmehbelin a silai chuan a tin ta vang mai. Thei leh thei lo va rawn melhin, "Ka thlarau in nang leh i fanu chu a umzui zel tho vang che u. Tin, min thah rual hian i fanu vengtu ten i fanu an that ve nghal ang.." A ti ta a. Emy mitmeng chu a buai deuh nak, ni e, Arianna hian Emy a rinhlelh ruk tawh vangin plan a lo nei sa a ni maithei. Mahse, a tlai tawh. A kal thui tawh. 

"In duh dana in khalh dawn ai chuan ka fanu chu thi se a tha zawk" Emy chuan a ti sap a. Khur miah lo vin a silai chu a hmet puak ta. Ariana chu che zui tur a awm ta lo. 

Hmanhmawh takin bunker chu a chhuahsan leh ta a. A fanu chu an tina tak tak ang em.. A va hmu anih chuan Arianna ruang an hmuh rualin an ringhlel dawn si a. Ngajhngam lo zetin a in lam panin a inkhalh haw ta a ni. 

Zochhingpuii muhil lai chu a rak chhuak thawt. Mangchhia hi a va ning tak em.. A khum bula Arianna lo ding reng nen chuan an mit a intawng chak.. Amah vengtu te erawh an kalsawn tawh a. Pawn lamah erawh an veng reng tho. 

"I tha em? " Ariana chuan a ti sap a. 

"Ka thain ka hria" a lo ti niah niah a. Arianna chu khumah rawn thu vein,"Emy hi i nu dik tak a ni lo tih i pawm hmasak phawt a ngai. I pa a sawi duh loh chhan hi i nu a nih loh vang. ani. Tu nge i nu dik tak tih chu i zawn a ngai. Emy hian i lakah game a khel mai mai a ni e. Anihna takah chuan i nu chu a thi tawh.. " Ariana chuan thawk a lak chhungin, Zoi chuan maktih hmel zetin, "Emy ka nu a ni lo maw?! " a lo ti tuar a. 

Nelawm zeta nui sangin, "Aw, amah hi i nu thattu a ni. A chhan chu i nu kha kan pawl tan mi tangkai leh rinawm tak a ni a. Thil tam tak a tih avangin chanvo tha leh dinhmun sang a luah chho ta zel a. Emy hian chu chu a ngaithei ta lo a ni. Tichuan, i nu chu phiar ruin a that ta a. A dinhmun a luah chho ta a ni. Thiam takin Chairman leh mi pawimawh ho a hneh zel a, mi fing tak a nih vangin tuman a kawng an dal thei lo. Mahse, nangmah hi hmanruaa hman a tum ta che a. I thluak suksak chea a uitè nihtir a tum che. A chhan chu nakinah he society rorelna fawng vuantu i la ni dawn tih a hriat vangin.. Chumi hunah chuan a thu thua awmtir chea a duh dana kal a tum a ni. Chu chu society mi leh sate hian an hai lo va, min rawn chah chho ta hial a ni. 

Engvangin nge Emy chu in tihhlum mai loh tih zawhna i nei maithei. He society-a thiltithei tak tak hi a lamtang an ni tlat a, dahbo na chance kan nei lo. Dah bo ringawt ila kan thuruk tam zawk a hriat ve avangin a thih hma ngeia heng thuruk hi a puanzar mai kan hlau ve bawk si a. Paihthlakna chance kan la zawng reng. Chu chu nang hian i tithei. 

Kei chuan tihtheih ka nei tawh lo. Emy khan min that tawh!  Tuna i hmaa thu hi thlarau mai ka ni tawh. Mahse, i tana thu pawimawh tawpkhawk hrilh che hi ka bat a ni si a. Thudik i hriat a hlauh vangin kei ngei pawh min that ta a nih hi. Hun ka nei tawh lo, I nu leh i pi leh pute thattu Emy lakah hian phuba i la ngei tur a ni.. I hrethiam em? " Tiin Zoi Lu chu a chûl a. A mitah tak a en ran bawk. An inmelh tawn reng laiin Arianna chu a ral ta riai riai a. Zochhingpuii chu khum atanga chhukin kawngka chu a chum ta nghek nghek mai. Thlarau chu a hlau takzet. A taksa chu a za vek ni maiin a hria. Kawngka chu an rawn hawng a.. "Ka haw duh.. Khawngaihin" a ti a. A tap ta hlawp hlawp mai. 

Valtea eitur siam rim tui zet chu khum atangin a lo hîp vang vang a. A mutui lutuk chu mak a ti angreng. Zawi deuhin a tho chhuak a. Amah hnungchhawn zawnga lo ding Valtea chu a pan a. 

"A rimtui hle mai" a ti ta sap a. A lo lehhawi rang kher mai. 

"I lo tho tawh maw.. Emy pawh a lo thleng tep ang" a lo ti vat a. A u kha "Mami" tiin a ko thin a. Emy tia a sawi chu a inthiam lo deuh. Mahse, rinngam loh chin neih thain a hre si a. 

"Aw le.. Ka inbual duh a.. " Dory chuan a ti a. Bathroom an inkawhhmuh a. Inthlakna a nei lo tih a hrechhuak. Mahse, Valtea chuan, "Emy'n a rawn kensak ang che" a ti a. An ngaihtuah kim unau hle mai. 

A inbual lai chuan Emy tawng ri a hre ta a. Towela intuam hlan chungin a va chhuak ve. 

An pathum chuan dawhkan an kil thap. Emy chu a mut tlem hmel kher mai. 

"Shillongah ka haw thei ang em? " Dorothy chuan inthlahrung takin a ti a. 

"Thei lo. Hei phone ka lo leisak che a.. I fans te an chiâi loh nan i zin bo rih tur thu post siam ang che. Khawi hmun pawh sawi mai rawh. Kar hnih vel chu hetah hian i inkhung a ngai" Emy chuan a lo ti ta a. Dory chu a ngui rawih mai. 

Valtea chuan, "Kar hnih em em te chu a him dawn em ni? An rawn zawng chhuak tepin ka ring" a lo ti a. 

Emy chuan a kutzungtanga dawhkan tlir zaih zaih pahin, "Ramhuai an ni hleinem. Mihring ve tho an nia, chuti maia awlsamin an zawng hmu lo vang. Kei pawh ka rawn kal tawh lo vang. Dory, pawnah i chhuak tur a ni lo va, tuman i hmel an hmu tur a ni lo" a ti a. 

"Ka tunu chanchin chu le.. " valtea chuan hlauthawng hmel deuh hian a lo ti a. 

"A tha turah ka ngai. Tuman an tina ngam dawn lo. Vohbik a ni tih theihnghilh suh..Ariana a thi tawh a, ka kutah an dah ka beisei" mitmeng nung sar hian a ti a. 

"Ariana a thi maw?! " Dory chuan a lo ti vat. 

"Aw.. A thi tawh. A thlarau erawh a chawl lo vang. Thim lalin phalna a pe bawk anga, kei chuan thlarau ka hlau lo. Ka fanu erawh chuan a hlau ang. Chutak chu ka buaina a ni" a ti ta a. Tumah an tawng tawh lo. 

Emy chu a ruk thei ang berin a chhuak a. Valtea pawh a hnaa kal turin a chhuak bawk. Dory chu a mah chauhin khawhar zetin a awm ta a. Ngaihtuahna a hmang thiam thlawt lo. Emy thu thua awm mai chu a tum ta ber. Mi hlauthawng chi, derthawng tak a ni miau a. 

Society lamah erawh buaina a chhuak nasa hle. Bunkera Arianna ruang chu Erica leh a hoten an hmu hmasa ber. A thattu niawma rin pawh an nei nghal. Mahse, fiahna an nei tlat si lo. Chairman pawh a vei sek ringawt. Zochhingpuii lo lan hnua buaina awm ziah chu buaithlak a ti ru hle. Chutih lai meka a rilru tibuai leh em emtu chu a fapin Dr Gosa thihna a chhui mek chu a ni. Engtikah emaw an hmunpui chu a rawn luhchhuah a ring tlat a ni. A nupui leh Dr Zira inkara thil thleng mek hi hre phei se la chuan awmngaihna a hre lo hial maithei a ni. 

Emy pawh a rawn thleng ve chiah. An lo melh hrek hrek tih a hai lo. Chairmanin a koh vangin a roomah a va lut nghal a. "Emy, i tih a ni lo tih chiah ka hre duh" a lo ti nghal thâwr a. 

"Arianna thihna hi maw? " a lo ti hâ. A lo bu nghat a. 

"Ka tih a ni hauh lo mai. Dr Zira te tih a nih ka ring' a ti hmak. 

"Engvangin maw? " a lo ti a. 

"Zochhingpuii aiah Dorothy hi lakluh an tum mek alawm.. I chanvo chhuhsak chea Dorothy hmanga lalram thar din an tum tih chu i hai lo vang chu" a lo ti ta hmiah a. Chairman pawh chuan a ringhlel lem lo. An phiarru nasa tih a hre ve tho va. 

"Anih chuan Zochhingpuii hi tu kutah nge kan dah ang? " Emy bia ang pawn a lang lo. 

"Ka kutah" a lo ti chang fak. 

Chairman erawh ngawi rengin banga Zohlupuii thlalak lian tak intar kalh chu a thlir a. Emy erawh a ding khawng lah thung. 

Zochhingpuii chu hmun himah amah vengtu te nen an awm mek a. A tawng lo. A ngaihtuahna erawh buai tak a ni. Ni e, kum 16 chauh a la ni a, a hun tawn hi a rapthlak tawh mah mah. Arianna sawi kha a dikna chen a awm thei. Emy thusawi zawng zawng kha a awih ngai lo reng a!  Arianna a thah mai theih danah hmeichhe nasa tak a nih zia chu a lang tawh reng mai. A nu chu Emy hian a lo that tak tak em? Engvanga venhim tum anga insawi nge a nih? Emy zawk hian bumin a thluak a su mek zawk a ni thei em? Ama tawkah a ngaihtuahna chu buai tak a ni. 

Kawngka a rawn inhawng a. Emy ngei chu a lo ding zan mai. A nui sang bawk. Vengtu te chu an chhuak nghal bawk. 

"I lo tha ang tiraw? " a ti ban chhalh a. 

"Ka tha e. Arianna i that em ni? " A lo ti nghal tâwng. 

Emy chu a ner sak a, "Aw.. I tan ka that" a ti ta tawp. 

"Ka tan nge i tan? "

"I tha takzet em? " emy chuan mak a ti deuh. 

"Ka tha ka tih chu.. Ka nu i thah ang khan em ni Ariana chu i thah? " a lo ti chang leh bawl! 

Emy chu a tawlh hnung dat. "I nu ka ni tih ringhlel tura kawmtu che an awm a ni maw? " a ti ta a. 

"I chan thatna tur atan chuan thisen i chhuah hreh lo fö a ni lawm ni? Ka nuna i lo lan atangin buaina ka tawk chiah. Ka tan buaina bul i ni.. Khawngaihin min kalbosan rawh" Zoi chuan thinrim takin a ti ta hmiah mai. 

Emy thinlung chu a na zawk, "Naute, a tu phiangsen chuan nge rawn bia che le.. Arianna thlarau a ni hial lo maw.. I tan chauh hian ka la dam asin" a ti thei tâwk.. 

"Ni lo ve. Kei chu ka putean min venghim thei. Tin, he society hi ka zir chiang anga, thûk takin ka inhnamhnawih ang. A hmasa berah ka nu leh ka pi leh pu i thahna phuba ka la ang. Thiam taka min bumna ka lo hre chhuak hma hi ka lawm.. Nang hian min enkawl lul lo vang. Keimahin ka hmachhawn thei" Tumruh zetin Zochhingpuii chuan a ti ta a. 

"Engkim ka sawi fiah thei" Emy aw chu a zawi raih mai. 

"Ka pa pawh i hre lo. Tu nge ka pa tih i sawi thei lo. Ka nu i nih si chuan ka pa pawh i hre ngei tur a ni.. Chuvang chaun min hnaih tawh lo la ka lawm ngawt ang. I thih hun tur lo nghak tawp rawh" Zoi aw ah chuan huatna a tel chiang khawp mai. Emy chu a khur thei hial. 

"I pa maw.. I hre duh takzet em ni? " a ti tham chhal a. A hnuk a ulh deuh. 

"Keimah ngeiin ka zawng chhuak ang. Vengtu te u, he nu hi khawngaihin la bo rawh u. Ka hmu duh tawh lo ve" a ti nghal tuar. Vengtu te chu an rawn lut a. Emy chu an kai chhuak ta. 

Valtea motor thawm a hriat rual chuan a sam a huih tha mawlh mawlh a. A thiam ang angin eirawng a bawl ve a. Tui a ti em ang chu maw. Ngawi rengin a lo lut a. Lo biak dan tur a ván leh hle. A inbual zawhah zanriah an ei a. An inbe lo. Mipa tawng tlem tak a nih dawn hi. Kar hnih an awm dun dawn chu a ni sia. A boring dawn mang e. Emy phone leisak vang khan hrehawm ti lutuk lo in ni a vui thei hram a. Valtea chu kawm nuam tak ni se a ti rilru hle. Han biak lumlam dan tur a hre eih si lo. 

"Min hua em? " a ti tawp a. Valtea a khi sak. 

"Huatna chhan tur che ka nei hleinem" a lo ti mai a. 

"Ka zai i ngaithla ve ngai em? " 

"Ngaithla ve thin e. I thiam khawp mai" a lo ti leh tawp. 

Sawi zui tur a vang leh ta hle mai. Dar 9 vel bawrah an mutna tur an pan leh tawp a.. Valtea pawn Dory chu biak dan a hre bik tlat lo a ni. A lainat ru viau naa hnem dan a hre chuang lo. A mawhphurhna angah a ngai a, venhim erawh a tum ve viau. Kar hnih an chen dun dawn chuan thil tam tak a ngaihtuah ve. Nula leh tlangval inhre ngai miah lo in khata chen dun reng chuan eng emaw thleng thei a ni tih a hria. Inven lawk pawh a tum. Ngaihzawng hi pakhat chiah a la nei ve, a hun tam zawk ramhnuaiah khan a hman tak si avangin hmeichhia a ngaihven ngai ta lo va. Nupui neih pawh a tum lem lo. Mahse, Dorothy hmel tha tak leh inthlahrung tak a ngaihtuah chuan a zauthau lek lek dawn thin. A pindan bul maiah a mu ve reng si a. A insum tluan thei èm ang chu maw.. 

Emy chuan a vawi thum nan whisky chu a tlak leh pap. A ril a tam lo va, mahse, a ruak ngawih ngawih. A fanu hmangaih em emin huatna nena a lo hmachhawn khan a tikehsawm chiang hle. A tan hei chen a dam tawh a, a damchhan khan a hnawl si a. Damchhan tur nei chuangin a inhre tawh lo. Eng nge a tih ang tih pawh a ngaihtuah thei lo. Mittui a uiawm ti thintu biangah mittui a luang mek chu a ni si a. A door bell ri ral ral chu hriain a mittui a hru hul a. Phur fahran lo vin a va hawng ta a. Ber kher a!  Zoliansanga bawk maw.. Khar leh mai a tum laiin a lo man ve tlat. 

"Min hnar thei tawh lo vang" a ti bur mai. Kawngka chu a kalh zui nghal rap. 

"Ka mood a chhe teh mai a nia. Eng nge ni fo le? " a lo ti hlak a. 

"A ngai bawk. Dr Gosa chungchang" a lo ti hmuk. 

. "engmah hriat ka nei lo. Tu in nge that duh ang?  Khatiang mi tha lutuk kha' a lo ti bah niah a. 

" I zu in chhan te hi a ni mai lo maw? " a lo ti sup. 

"Nang hian mimal takin min hmu dun tih pha buai duh suh. Eng nge ka lakah hian i duh? " Emy chuan a ti ta a. 

Zoa chuan hnai taka rawn melhin, "Min zaisak rawh" a ti thawp sup a. Emy a tawlh hnung däwrh. 

"Ka zai ngai lo" a ti hlar a. Zoa chuan a rawn pan zel, a mitmeng tak ngalah chuan engmah hmuh tur a awm lo. 

"Min lo hnaihntawh suh" Emy chuan a ti tuar a. 

"Nang hian engvanga min pehhel zel nge i nih chu ka hre dawn khawp e" a lo ti hmiah. Bangah a nem bet a, a beng bulah, "Ka bulah i danglam ziah' a ti leh sup. Emy chu a kuai her lawp, ani a zu in zawi tawh sa chu a che hman lo chiang kher mai. A awm hmun kawr hak lai chu a hlim chho ta pawk a. Emy a rak tuar… 

Zoliansanga chu a ding khawng ta reng a. A mitmeng chu chhiar thiam harsa tak a ni. 

"Zohlupui… Zohlupuii maw.. Engtin nge.. " a ti bah ve ta nak mai. 

Emy chuan a kawr siam that pahin, "Min chhuahsan la a tha ang". alo ti sap a. 

"Engkim ka hriat vek hma loh chuan ka chhuak dawn lo.. " a lo ti hmiah. 

"Zo.. Ni lo, engmah ka sawi thei rih lo.. Khawngaihin" chhuatah a tlu sawp niah a. A mittui a rawn hnâm nghal. 

Zoa chuan va pan hnaiin, "Zoliansanga ka la ni reng asin. Engvangin nge Zohlupuii i nih reng ve mai loh ang? " a ti ta a.. 

(Ka pum a na 😢😢