Thuruk 6

THURÛK..!  (6)

Ziaktu: Toni Râlte

Secret Society:

Dr Gos thihna chu an buaipui tlang hle. Tuin nge that tih chu hre thei lo mah se; an pawl zinga mi ngei anih an ring ru thup. Rinhlelh tur an la thliar thiam lo mai chauh a ni. 

Zaninah Sister Ariana a lo thleng dawn tih an hre zui bawk nen, an phili chûk hlawm a. Sister Ariana chuan engtin tak Zochhingpuii chu train ang maw.. Emy lah chu Zochhingpuii hmuh ve an phalsak hauh si lo. Rilru buai ru zetin a táp ve reng a. Tum erawh a nei. Jo chiahin a hriatpui. 

Dr Zira Cabinah Eric leh Beiseia te nen an thuho a. 

"Gosa thihna hi an chhui zel chuan min la hrechhuak thuai ang" Dr Zira chuan a ti a. 

Beiseia chuan, "Engvangin maw.. Engmah sulhnu ka hnutchhiah lo ka tih kha" a lo ti thak a. 

Eric chuan inngaihtuah mûk zetin, "Kan lo dah tha hmanhmawh mah mah em aw ka tia, a hnen atang khan thil dang pawh kan hre maithei si a" a lo ti sup thung. 

Ni e, Dory test a neih zawhah Gosa kha a cabinah a inthlak a. Chutih lai tak chuan Emy'n a rawn bia a. Venthawn tur awma a hriat loh vangin, "Ka thusawi an awih hmel e. Jo chi chu a chambang tawh lo naa chambang angin ka sawi a, an duh ang chu an ti thei dawn lo anih hmel" a ti zung zung a. Mahse, a cabin kawngka bula ding reng chu a hmu hauh lo. Beiseia chuan rang takin Dr Zira te a hrilh nghal a. Gosa'n a phatsan tih an chian ngam hnuah a in thlengin Beiseia'n a zui ru a. A that ta mai anih kha.. Gosa avangin Emy leh Jo pawh an target ta a, a chhan chu Emy chakzia an hria, an thiltum dal theitu awmchhun anga an ngaih a ni. Mahse, heng thil zawng zawng hi puanzar ni ta se, chairman leh a hote hian an palzam mai an ring lo. A ruk tak chuan an hlau.. Chuvang chuan chhuichhuah theihna tur dan chah veka Emy leh Jo dah that bawka zalen taka an duhthusam kaltlangpui chu an tum ta a ni. 

Emy chu a rawn pen lut ve mek a. Chairman room a pan thung. 

"Dr Gosa thih dan chhui turin i fapa i ruai a maw? "A ti chang fak a. Chairman erawh a lo meng phâwk hle. 

. "Eng nge i sawi awmzia? " a lo ti vat a. 

"Tukin zingah min rawn hmu alawm. Mi dang an awm vangin ka hrilh duh lo che anih kha. Ani sawn min chhui zel chuan engkim a hre vek dawn ania" a ti ta a. Chairman pawh a buai ve ta nak mai. A fapa chu detective a ni tih a hre ngai miah lo. Journalist tha ber zing ami a ni tih chauh lo chu.. 

"Emy, ka fapa i hmuh hian danglamna i nei em? " a ti a. Chik zetin a melh nghal bawk. Satliah zet hian, "Engvangin nge ka danglam ang? Mipa dang ang tho ania.. Ani lawm ni? " Emy chuan a lo ti mai si a. Tlemin a ngaih a tha ta deuh. Emy rilru erawh a hre hauh si lo. 

"Sister Ariana hmuak tur te chu i tir chhuak tawh em? " Emy bawk chuan a ti a. 

"Aw an chhuak chiah" a lo ti a. 

"Chuti chu Zochhingpuii ka va lam ang e' tiin chhuah a tum a. 

'Ni lo ve, mi dang ka tir tawh. Nang chu Dorothy bulah va awm rawh. A rawn thleng chiah. Thil kal hmang i lo hrilhfiah dawn nia.. " Chairman chuan a lo ti a. Emy a ding chawt, a kut a hum ruh rap. Mahse, a insum hram. 

"Aw le.. Chairman" a ti nghat a. A chhuak ta a. Chairman chuan Emy file keu pahin, "I fanu i enkawl hi ka phalsak thei lo che a ni.. Min hrethiam dawn nia" a ti sup a. 

Dorothy chuan a awmna room ruak zet chu a melh kual a, Rêver member pakhatin a rawn hruai anih kha. Enh nge an tih leh dawn tih a hre lem lo. Hlauh a sawt lo tih pawh a hrethiam ve tawh. Kawngka a ri rak a, Emy a rawn lut. A thaw huai a. 

Mahse, Emy chu a mood a fuh vak lo tih a lang. A phone a phawrh a, number pakhat a hmet chhuak. 

"Aw jo, min hreng bet a lawm.. Dorothy chhuanlama hmangin, i buaipui thei ang tiraw.. Umm.. Eng pawh ti rawh. Ka ngaipawimawh lo, a thi ngei tur a ni" a ti vin thak. Dory chuan a lo hlau angreng. Phone chu a dah a, Dory chu a rawn melh a. "Ka sawi apiang ti ang che" a ti sap a. A lu a lo bu nghat. 

"Zaninah Jo a hlawhtlin loh chuan Sister Ariana a rawn thleng dawn a. Ani chu min confess tu a ni. Mi hlauhawm tak a ni. A hnaiah i awm tur a ni lo. An khung hrang chea a lo hmu che anih pawn a thusawi engmah i ngaithla tur a ni lo. A chiang em? " a ti sak sak a. 

"Umm.. Ka hria" a lo ti tham chhal a. Dory chu a khawngaih letling. A talent ropui tak vanga he thim chhah tak hnuaia awm ve tura kaih luih a ni chu.. Chuvang chuan ani pawh hi venhim hram hram a duh a ni. Chhuatah chuan a vei sek a, helhkam lianpui a nei tih a chiang reng. Ni e, Ariana chu a lo thleg tur a ni lo tiin a inhnem mawlh mawlh. He hmeichhia hian a fanu a confess a nih teh chuan, thil thleng tur a ngaihtuah ngam lo zawk. A fanu chu a ta a ni thei tawh dawn lo va, a duhthusam a hlawhtling thei dawn lo. 

Dorothy pawn engmah a sawi ngam lo. A thu chawrh chawrh ringawt. Emy hmel lan dan chu a nelawm loh em a, a be ngam lo a ni mahna. He pawl mak zet hi a la hrethiam thei thlawt lo. A ruk takmeuha che thin an ni tih erawh a hre tawh. Mi pakhat a hmuh phei kha chu pa lar tak a nih kha.. Eng nge an tum chiah a hrethiam lo. He pawl nen an inzawm atang khan thinthia a mutthilh awm pawh hi a hre tawh lo. Mangchhia a mang fô lehnghal. A zaina lamah erawh a hma aiin hma a sawn zel thung. Engpawhnise, thih a hlau, he pawl hian pawisak an neih loh hmel si a, an tih ang anga awm ve phawt chu a tum tawp mai a ni. Emy hian a venghim zel thei èm ang chu maw.. 

Hall lamah an ri hak. Emy a vei tawp chawt bawk. A phone a ri nghal.. Rinawma a ni. A ner sawk a. A pick up ta tho va, "Joshua a thi" a rawn ti teh tawp a!  A ding khawng lah,"Jo a thi maw? " a ti tuar. 

"Aw, A ruang an chhar.. " a rawn ti leh a. A dah nghal bawk. Emy chu mitmeng ling hlarin a ding khur hlawk hlawk mai. "Zawngho chuan min lo dai khalh ve khanglang a ni maw.. A pawi lo ve, ar talh dan chi khat chauh a awm hleinem. Tunah chuan Zohlupuii in hmachhawn tawh ang" a ti hriam hraih a. Dory chu a lo kimki chawih chawih. Chutih lai tak chuan an awmna pindan kawngka chu an rawn hawng a, Dr Zira rawn dakin, "Sister Ariana a lo thleng e.. " a rawn ti a. Emy hmel a hmuh chuan a khi suk. 

"Hlawhchhamna hi i hmelhriat ve fô tawh ang" ama hriat tawk lekin a ti sup a. A chhuak nghal. Emy te pawh chu an chhuak ve ta a. Hall lam panin an pen hlawk hlawk a. Mi 30-50 awm vel tur chu an thu khap mai. Zochhingpuii pawh mipa pahnih inkarah zûm deuh takin a thu ve a. Platform-ah chuan Sister Ariana chu a ding a. Mizo tawng dik tak hian, "Ka lo lawm a che u. Hna pui kan tan tawh ang. Ka hna ka zawh hma chu hetah ka awm dawn a ni' tia khi sakin Zochhingpuii chu a zuk melh a. Emy a lo insangmar teuh. 

'Naktuk zanah inhlanna kan nei ang. Kim taka kal kan tum dawn nia. Kan tan zan pawimawh ber a ni dawn si a " Ariana chuan a ti leh a. Boruak chu a reh dûk mai. 

An hruaitu te nen pindan rûk-ah an luh khawm hnuin Emy chuan hmanhmawh zetin Rinawma chu a va bekbawr a, "Jo chu khaw nge? " a ti nghal tâwng. 

"Mitthi ruang dahnaah, a chhungte zawn chhuah ngaihna an hre lo va, a ruang hlawm tur ngaihtuah mek a ni" a lo ti a. Emy a chhing sawk. A thianpa, a lamtang la dam awmchhun pawn a kalsan ve ta chu a ni si a. Pawisak nei tawh lo vin Secret room lam a pan sawk sawk, kawngka chu a kik dat dat hnuah sawmna pawh hmu lem lo vin a hawng hmiah. 

An lo en thap mai. Chairman phei chu a lung nih loh hmel viau. "Ka tibuai che u a, pawi ka ti. Mahse, Joshua ruang lakchhuah ka duh a ni. Keiman a vuina programme siam ka duh" a ti ta hmiah a. 

"A hmanhmawhthlak viau em ni? Thu pawimawh tak kan sawi mek asin.. " chairman chuan a lo ti bung nghat a. 

"Ka tan Joshua hi a pawimawh ve tho. Tu nge a that tu tih pawh ka kutah a awm ang, keimah ngei hian Dr Gos leh Jo thattu hrawk hi ka zai ang" inringtawk zetin a lo ti ve sak. 

Chair hnuksawn thawm a ri nghal rawk, "Emy, tuin nge thupek pe tura ruat che. I chunga thu hi kan la tam ania. Nang chu hnathawk i ni.. I nihna hre rawh" Chairman aw chu a nelawm fahran loh hle. 

Emy chuan awm pho lah hian, "Ka hria, mahse, ka thianpa nunna hi a hlu asin. Ka muangchang thei lo. Phuba la tur hian In phalna ka lak kher a ngai lo.. Eng nge ka tihtheih i hria alawm" a ti ve ta hmak. Chairman chu a meng hnual rawih mai. Arianna chuan a khabea a kut nghatin nui sâih chung hian, "Emy duhtak, inthlahdul rawh. I thawkrim mah mah a ni.. " a lo ti a. A aw chu a nem hle. He a aw nèm tak phena tûr hlauhawm tak hi Emy chuan a lo lem ve tawh anih kha. Tawlhsawn a tum hauh lo. An dawhkan kil chu a va hnaih deuh a, a melh kual ralh ralh a. A lu chu a dawm vung vung, a luhai thut chu a ngaihna a hriat loh hmel hle. A pai chawn chawn a, Chairman chuan a lo dawm vat, mahse, chairman bawh deuh ruak siin dawnkanah chuan a kut a zu nghat a. A thaw halh halh mai. Insangmarin a ding lui leh ta hram a. 

"Ka chhuak dawn a. Ka duh duh ka ti ang. I mite emaw Dr Zira mi te emaw tupawn min lo dan an tum anih chuan,. Ka tihtheih in hria ang" a ti ngal ngal a. An chhan leh hmain a chhuak nghal. 

"He nu chungchang hi kan rel that a ngai dawnin ka hria" Pu Zauva chuan a ti sup a. 

Chairman chuan meng hnuai raih chungin, "Awmtir mai mai rawh u. Thil pawi a khawih hman lo vang" a ti a. 

Ariana chuan, "Zochhingpuii hi a fanu tih a hre tawh a ni thei ang em? " a lo ti ta chat a. 

"Ka ring lo. Mahse, a hauh khawp mai. A vehthlem lai khan a lo ngaina hman a nih ka ring. " chairman chuan a ti a. 

Pu Dinga chuan, "Emaw A hriatna kha Dr Gosa khan a nawtreh miah lo a ni thei bawk' a lo ti khauh a. An ngawi dûk mai. Dr Gosa'n a ro khawm tura  Emy a ruat tih an hriat atang khan thil dik lo eng emaw awm tlata hriatna an lo nei tawh a. Zochhingpuii avangin chhui tura rilru sen an la hman lo deuh chauh zawk a ni. 

Chairman chuan, "Dr Gosa aiawh tur pawh kan thlan a ngai ta a.. Kei chuan sawi tawh angin. Dr Bta saw bitum tha ka tia, thiamna sang tak nei a nih bakah an veng chhungah pawh mi ngaihsan rawn a ni a. Kan tan a tangkai viau ang" a ti a. An tawng mar mar a, an meeting tawp lamah erawh Dr Bta bitum chu tha an ti tlang ta a.. 

Emy chhuak ta khan thinrim takin Hospital lama a pan a. Joshua chu a ngaihtuah a, a tana a rinawm zia leh mi tha tak a nihzia te. He pawl teh hrep vang hian chân leh hloh a va ngah tawh em.. A mah hnaihtu apiang hmeh mih an nih zel dawn chuan Valtea pawh a him dawn lo tih a hria. Lamtang a mamawh belh ta bawk. Dorothy ringawt hi chu atan engmah a ni lo. A la huaisen tawk lo. A fanu lah a venghim thei tawh si lo. Thil tam tak a ngaihtuah kai zel a, Ariana enkawlna hnuaia a lo seilen chuan a fanu nen an la indo lo vang tih a sawi theih tlat loh. He thurûk inlumlet kual vel lak atanga khai chhuak thei mipakhat chu a awm.. Zoliansanga… 

Zochhingpuii… :

Amah enkawl tura an chah chhoh hmeichhe hmel tha tak kha a mitthlaah a lo lang a. Emy vanga inhnimphum a ni si a,Emy tel lo chuan eng nge a tih theih tak ang?  A thluak an suksak anga, a putea leh a nu meuh te pawh a la do maithei sin. Chung thil a thlen ai chuan thih mai pawh a thlang zawk awm e. 

An dahna pindan kawngka chu a rawn inhawng a. Sister thawmhnaw inbel chungin Ariana a rawn lut ta zan zan mai. A hmai khuhna chu hawngin a nuih sen sen a. A ngainatawm thlawt. Huat pawh tum se a thei lo a chha a ni e. 

"Ka rawn tlai hlek a, pawi ka ti hle mai. I khua a lo har tawh em?  ' a ti sar sar a. A bulah lo thuin a kut nel thep chuan a biang a rawn chul a. 

"Ka inenkawl ve thei alawm. Enkawl ka mamawh lo" a lo ti sap a. Ariana chu a nui saih, "Tunah chuan i mamawh rih alawm. Kum i tlin hnuah erawh nangmahin i tal ang" a lo ti a. 

"Anih engtin nge min enkawl dawn? " a ti a. 

"Chu zawng inhlan thianghlimna kan neih zawh lamah kan ngaihtuah ang chu" a lo ti a. Inhlan thianghlimna.. A râpawm riauin a hria. 

'A tha lawm" a lo ti ve mai a.Ariana a chhuak a. Kawngka an kalh leh khap. He tah hian riahtir an tum chu a ni awm si a. 

Emy a ngaihtuah, a nu angah la ngai tak tak thei lo mah se; a ngaina a, a bulah chuan a him niin a inhre bawk. Emy khum bula thlalak hlui tawh tak a hmuh kha a hrechhuak a, khata mipa lang ve kha tukina Emy ina lo kal kha niin a hria. Eng nge Emy nen an inzawmna ni ta ang?  A thu tha a. Mûk zetin thil a ngaihtuah kual. A pa hi ani chuan hriat a tum ber kha a nia. Tuman an sawi duh loh danah an zing ami tu emaw ber fa a nih a inring. Emaw kha pa Emy thlalakpui kha a pa a ni thei mai ang em? Emy nen inngeih hmel takin thla an la dun si a. A pa dik tak hi hria ni se chuan a thla a muang deuh mahna.. 

Zoliansanga.. :

Emy nghaka chawhnu pum a thut hnuah rawn lan tih reng a nei si lo va, lunghnûr zetin a haw ta kha ania. A thinur hlur mai. Mahse, Emy chu hmuh ngei a la tum ruh khawp mai. He hmeichhia hian pawimawhna eng emaw tak zawng a nei chiang. 

"Mama, Sangteii ten chaw an rawn ei dawn kha aw… " anu in a tih láng lang chuan a ner sawk. A hne. Thil dang ngaihtuah lai laia.. A inbual a, a inthlak lai chuan in hnuai lama an ri hlut chu a hre ta a. An lo thleng ta a ni ngei ang. A va phur lo ber em. A room kawngka chu an rawn kik dat dat nghal. 

"Lo lut rawh" a ti a. Sangteii a rawn lut a. He nu zah theih loh sawtzia hi aw.  

"Room hi kan zauh a ngai dawn nih hi.. " a nui har har a. Zoa a luak lo chauh. Mipa a ni a, a ei loh zawng tilang ngai lo a ni. A insum hram hram. 

"Sangte, ka sawi tam tawk viauin ka hria. Emy kha i hria em?  I motor nena insu kha.. Kha nu nen khan inneih kan tum a ni" a ti ta hmiah a. Mawihawih zawn pawh a thei tawh ngang lo a ni. 

Sangteii chu a la nui tho. Mahse, a hnual hle tih erawh a hriat. Pawi a ti lo. Kalbo se a duh ngawih ngawih. In hnuai lamah an inzui thla ta a. A pa erawh a lo la haw leh lo. Anu leh Dr Zira an titi siam siam a, Sangteii nu nen an inkawm thung. Sangteii erawh phone khawihin a buai hle. 

Dr Zira chuan zawi sup hian, "Ariana a lo thleng a, a la rawn haw lo vang. Zanriah ei khamah document chu min pek hman ka beisei ania" a ti a. Zoa nu chuan buk nghat pahin, "Remchang a awm mai ang" a lo ti a. An inmelh danah an inhaw lem lo tih a lang reng. Mahse, tun hma atanga inkawm tawh thin an ni a, chu chu lo thlirtu te mithmuhah chuan fel lo a awm lo. Thian tha an ni tih a lang a ni mai. 

Zanriah an ei kham a, thingpui hang te an han in leh a. Sangteii erawh a zia a zawi ta riau. Zoa lahin biak a tum der si lo. A pa erawh a lo la haw lo fô. Zoa chuan haw tawh se a ti rilru khawp mai. Emy hmu tura kal a tum si a. Aw an ding ve ta.. Hawn an tum hnai a ni ngei ang. Anu chu room lamah a han chho zuk a, thil fun, uluk taka tuam hi a rawn pawm thla a. Dr Zira pek pahin, "Hei aw.. I lo zir chiang dawn nia" a ti a. Mi dang mitmenga zawhna awm chu hrethiam takin, "Kan thianho file hlui a nia, reunion neih kan tum a, zawn chhuah nan heng thil hi kan mamawh a ni" a ti a. Awih lo an awm lem lo. 

An hawng fel tihah Zoa chu a insiam sawk sawk a, anuin titipui a tumna pawh chu hnawlin a tlan chhuak ve nghal. Emy in lam a pan vang vang mai. Mahse, Emy rawn tlan chhuak tur nen an intawk chiah. 

"Rawn hmuh che ka tum asin" a ti a. 

"Ka buai rih. Tihtur pawimawh lutuk ka nei a" a lo ti a. 

"Min pehhel zel suh.. " a lo ti hrâwk. Emy chuan a mita en kal chungin, "Dr Gos a boral a, tunah hian kil tu nei lo vin ka thianpa ruang a mu reng bawk asin. Chutiang karah chuan ka kawm hman rih lo che" a ti ta hmak a. A nelawm vak loh. 

"Ka thianpa a..!?  Tu maw? " a lo ti hû. Emy chuan Joshua thihna chu an tlangzarh lo tih a hrethiam. Ni e, doctor tam tak saw an pawl zinga mi an ni miau a. Police ko lo va chinfel dan an hria a ni mahna. 

"I hriat ve a tul chuan ka hrilh mai ang che. Tunah chuan ka kal dawn." A ti a. Biak zui hman lohin a motorah a lut a. A inkhalh chhuak nghal. Zoa hrilh a hai kher mai. 

Emy chuan Zoa'n a lo zui leh zui loh a en zauh zauh a. A zui lo tih a hriat hnu chuan chak zetin Headquater lam a pan nghal. Ni e, zaninah inhlanna a awm dawn. A fanu pawh a tel dawn. A tihtir thei lo. 

Valtea a bia a. Chung thil chu a hrilh zung zung a, "Ka hlauhthawn ang chiah anih chu. Nang khan i chinfel theih ka ring lo reng a ni. Keimah ngei rawn kalin ka tunu kha ka rawn la chhuak dawn ani" a rawn ti ta chiah. 

"Aih, ni lo ve. I lo kal chuan engkim a buai ang. Kan pathumin kan thi ang. Hriatreng kan ni hek lo vang. Tun tum chauh chu min ring leh rawh. Ka chingfel ang" a ti a. 

"A thisen far khat pawh a chhuak anih chuan nangmah kha ka bitum hmasa ber anh che" a rawn ti vawt raih mai. 

Emy chuan a nau mize dik tak a hre ta. "Aw le.. A thisen far khat mah a chhuak lo vang. Ka tiam a che" a ti a. Phone chu a dah ta nghal a. 

Pindan zau angreng tak pakhatah mi 50 bawr vel chu chhuatah an thu a. A laiah Sister Ariana chu a dum veka inthuamin a thu bawk. A sir ve veah Chairman leh Vice Chairman an thu bawk. Zochhingpuii leh Dorothy te chu an thu dun a. Thil awmzia engmah an hre thiam lo. Emy chu kun zauh zauh chungin Zochhingpuii hnungah chiah a va thu ve a. Hunserh hman a nih tawh vangin tuman engmah an sawi lo. 

Arianna chuan, "Aw le, kan kumtin hunpui vawikhatna chu kan hmang dawn a. Zaninah hian mi thar duhawm tak pahnih kan lalut dawn ani. Hei hi thil chhinchhiahtlak tak a ni e. Ka aiawhin Chairman leh Vice chairman hi an rawn kal kual anga, in tihtur chu in lo ti theuh dawn nia" a ti fiak thak thak a. Tumah reng an tawng lo. 

Emy chuan, Zoi chu kheuhin bawm lian lem lo, hum tham lek leh lehkha them a pe ru ta zauh a. Zoi chuan a lo en chiang vat. "I thisen kha hralh suh" tih ringawt a ni. Bawm chu a hawng a, rimtui i chulh chi bawm a ang viau. Mahse,  achhungah chuan thisen a lo awm. Zochhingpuii chuan engkim a hrethiam ta.. 

He pawl hi pawl satliah zawng an ni hauh lo ve.. Chairman in a zawn a lo thlena blade a pek chuan a lo la ve mai a, mahse, a kut zai awm taka awmin bawma thisen chu a kutin a zuk chiah a. A thawmhnaw hakin a zir bawk a, an hre lo nge an kal kal mai. Dorothy erawh chuan a thisen a pe ta. Mahse, a hmel landanah engmah pawisak leh pawitihna hmel a lang lo. Emy pawn mak a ti viau mai. 

"Kum 16 kal taa nau piang danglam tak, rei tak chhung kan lo zawna kan lo nghah tawh Zochhingpuii chu kan pawl tan a rawn dingchhuak ta a. Amah vangin Zoramah chuan kan society hian thang a chhuah dawn ta" Chairman chuan a ti a. Zoi a îp chawih. Emy erawh thuawih awm takin hmalam a en a. A rilru erawh a rum a ni. 

An programme zawh hnuah Pindan pakhatah Dorothy leh Zochhingpuii chu an hruai leh a. A hnu lawkah Ariana leh chairman an lo lut. 

"Tunah chuan kan pawl nihna dik tak in hre ta a. Sawi duh in nei em? " Ariana chuan a ti a. 

An ngawih reng hnuah Zoi chuan, "Ka pa ka hre duh a ni" a ti ta sap a. Ariana leh Chairman an inmelh zawk. An bu ta nghat a. 

Dorothy chu mipa pakhat in a rawn hruai chhuak a. Chairman pawh a chhuak zui ve nghal. Ariana nen an inthutchilh ta ran mai. 

"Ka sawi tur hi ngun takin ngaithla la.. Khawiahmah a ri chhuak leh tur a ni lo vang. I pa i hre duh a. I pa chu tu nge tih i hre dawn e.. " a aw chu zawi hle mah se,  a fiah viau. 

Zochhingpuii chuan, "Aw le" a lo ti chang fak. 

Ariana chu a ding a, "I nu hming chu Zohlupuii a ni a. A thi tawh thung.. I pa.. " a tih mek lai chuan, kawngka chu a rawn intheh hawng thuai a. 

Chairman chuan thaw hlawp hlawp chungin, "Dorothy a tlan chhuak.. A puanzar chuan kan chhe vek a ni mai" a rawn ti ta a. Arianna hmel landan chu a danglam nghal vek. 

"Hmu ngei ula, in that nghal dawn nia" a ti zawi raih a. Zochhingpuii chuan kil khat atangin a lo melh kal a! 

(Ka tlawm.. Vawiin zet chu ka ziak hman lo a ni ber e. Ka ziak dawn chauha tihtur a lo kal zel. Min ngaidam ru aw.)