Thuruk 5

THURÛK..!  (5)

Ziaktu: Toni Râlte

2013.. February:

Valtea chuan a duhthusam chiah ni lo mah se; motor parts dawr hawngin, company lian zual deuhte a be pawp bawk a. A lian chho ve zel ang chu maw.  A tunu venhim nana a hun tam zawk a hmang ta chu pawi tihna a nei lo va, a tunu a venhim rual hian Mizoram a venghim tel tih a chiang. Ni e, a tunu hi rawn lain an duhdan ang takin train se chuan, Zoram hi dictator hnuaiah a awm dawn tih a chiang. Chu Dictator pawh chu a tunu ngei a ni dawn tih lah a hai hek lo. Mahse, chu chu a duh tlat si lo va. Nunphung pangngai zawha hmeichhe tha tak nihtir turin a thawkrim mek a ni. Pasal te neiin fa te nei se tiin duhthu a sam sak thin. Chutih hunah chuan thlamuang takin a nu leh pate bulah a kal ve thei ang chu. Hmeichhe pakhat a û anga inchhal kha a mitthlaah a lo lang a. Kum engzat nge liam tawh a ngaihtuah peih lo, a û chu thi tur ang thawthangin an hnutchhiah kha a nia. Heng zawng zawng bultanna a nih miau vangin a hua a, chutihrualin a fanu tan hian a la tangkai ve thei mahna tih a ngaihtual tel bawk. Pawl pakhat, tenawm tak, mi thluak suk saka zoram inrelbawlna thlak danglam tumtu, phiarrukna hmanga Zoram awp tum tu te chu tu te nge an nih hre chiah lo mah se; luhchilha tihchhiat vek a châk thin. Mahse, amah maia hmachhawn chi a ni lo tih a hria. 

Zoi school luhna tur a ngaihtuah mek. Class X zir ve se a duh a. Ramhnuaia an chen chhung zawng khan kum tinin course thar a zirtir ve zel kha a nia. A zo ve mai turah a ngai. Mahse, School tha pangngaiah chuan an admit duh kher ang em a hre lo. A duh dan chuan Mizorama school tha bera admit a duh, mahse, a awlsam dawn hauh lo tih a hria. 

"Ate, chaw ei ka peih tawh aw.. " a rawn ti lang lang a. A sam huh chu hru thuak thuakin tawnzau a ha a. A chhuak phei ve ta a. 

"Aprilah daih tiraw school kan tan ang" Zoi chuan a ti a. 

"Aw anih hmel" a lo ti a. 

"Nih chuan, dawrah ka pui ve thei ang che.. " a lo ti vat. 

Valtea chuan, "Ni lo ve. In hi tha takin lo nghak la a tawk.. " tiin a lo hnial a. 

"Min zawngtu te hian kan awmna an hre leh tawh lo maw? " Zoi chuan a ti sap a. 

Antui hawp hruih pahin, "An hre maithei. Hria pawh nise kan lo hmachhawn mai ang chu.. Ramhnuai ang ngawt kha chuan an che ngam lo vang" Valtea chuan a ti a. Ni e, a hlau lo a ni lo. Tunah chuan khawpuiah an awm tawh a, misual ho kha an fimkhur a ngai tih a hrethiam ve tlat. Bakah a ning reng reng tawh. Inveh kual reng hi. Thil chu anih dan tur ang ni vat zawk se a duh. Mahse, chutiang a ngaihtuah apiang chuan Zochhingpuii, sawrkarin hmun danga tuma hmuh phal lohna hmuna an dah tur a mitthla thin a. A ngaingam leh thin lo. Ni e, Zochhingpuii nihna dik tak hi Sawrkarin a hriat rualin an tihlum lo anih pawhin an khung hrang nghal ang. Vengtu rinawm tak tak te venna hnuaiah. Hmm.. Chu chu a thlentir thei lo. 

Chaw ei khamah Valtea chu a insiam a, A dawr en fel turin a inkhalh chhuak ta nghal a. Zoi pawn a tihtur te ti sawk sawkin, a zai pah riai riai a. A nu a chhun nge zai a thiam viau. Hla a hre tlem em mai pawh a. 

Darthlalang hru paha a zai leh rât rât lai chuan kawngka chu an lo kik dat dat a. A pawnchhe ken lai chu dahin hlauthawng ru deuh chungin a va hawng a. A tawlh hnung dâwrh. Emy a lo ding reng mai. A nui sáng leh nghal. 

"Eng nge i lo tih? " zoi chuan a ti ram hmak. A nu anga inchhal avang hian a pi leh pute kha a chân ta angah a ngai laklawh tlat tawh a ni. 

Emy chu inah chuan a lut a, kawngka a kalh nghal rap. Nu leh fa chu an inhmachhawn ta ran mai. 

"Ka rawn zawng chhuak thei che chu ka va lawm em" a ti hap a. 

Zoi chuan, "Min zawn chhuah a ngai lo asin. Nangmah vangin ka pi leh pu an thi a, i lo lan vang khan. Nang hi ka ring miah lo che" a lo ti khur hlak hlak a. 

Emy chu hahdam hmel zetin sofaah chuan a thu thla a. "Ka nu leh pa an thi tih ka hriat zan khan ka tap zankhua thak tih hria la kha thu kha i sawi hauh lo vang. Tualthattu te kha ka thah ve hmain i lo that hlau a. Ka chanpual an ni zawk asin" a ti vawt raih a. A mitmeng chu a hlauhawm kher mai. Zoi chuan a melh reng ringawt. 

Emy bawk chuan a hma aia nem zawkin, "Ka fanu i ni tih hi awih lo mah la, dawt a ni thei dawn chuang lo. I putea ang bawk hian venhim hna che hi ka thawk ve ngat ngat tho asin. Tuman an tihnat che leh hmanruaa an hman che ka phal ngai lo vang" a ti leh a.

Zochhingpuii chu a thu ve hnawk, "He nun hi ka ning. Engvangin nge venhim ka ngaih bik?  Nunphung pangngai ka nei ve thei lo em ni? " a ti a. A aw ah chuan lungchhiatna a inphûm. 

Emy chuan lainat hmel taka melhin, "Engkim bul tanna chu keimah ka ni. Ka tihsual chu tuarin rilru chawl hman miah lo in ka awm phah anih hi. Ka bultanna hi a tawp pawh ka khar ngei ang. " a ti a. A sawi awmzia pakhatmah a hre lo. 

"Ka nu i nih takzet chuan ka pa hi tu nge tih sawi rawh" a lo ti chang fak a. Emy chu a thaw hawk, lungngaih hmel zet hian, "Pa i nei lo" a ti tawi tak a. 

"Pa nei lo vin i pum chhungah ka awm a maw? Nge i chi lachhuakin tube hmangin min piantir zawk" a lo ti ve hmak. 

Rilru buai hmel zetin Emy chu a ding hluai a. "Ni lo. A ni lo vek. Hei hi hria la a tawk, ka fanu i ni a. Ka thisen i ni. Nangmah venghim tur hian ka thih thlengin ka bei ang. Nun pangngai i neih nan pawh. Tunah hian zawn mek i ni a, i awmna pawh an hre leh tawh hial ang. Lamtang tam tak an nei a, kei pawh an zing ami ka la ni reng. Mahse, ka rilru a danglam mai chauh a ni. An hmuh hunah che an headquaterah an hruai che ang a, an khung hrang ang che. Mi chi hrang hrangin i thluak suk sak an tum che anga, Doctor thiam tak pakhatin i hriatna a nawhreh sak bawk ang che. An uitè i nih hunah an duh ang ti turin an nawr che ang a, engkim.. Eng pawh. Rukruk, sex, inrawk,.. Engkim.. Inphiarrukna thlengin. Nang chuan hnial ngaihna i hriat dawn loh vangin i ti zel ang. Inchhir mah la, i kir thei tawh dawn lo. Tichuan, nangmah hmangin Zoram an awp bet anga, khawvel ram danga kan mi te nen kan ram hi an awp bet tawh ang.. Chu chu i la hmabak a nih chu" A ti ta dap dap a. Zoi chuan a ngaithla uluk kher mai. 

"Anih chuan min khungbo ngai lo vin kei hian pan ta zawk ila" a ti ta sap a. 

Emy chuan a lo melh kâwk, "I la naupang deuh a ni. An dai khalh hneh lutuk anh che" a lo ti sap a. 

"Nang hian min pui thei ang chu. Tichuan, ka tichhe vek anga, pipi leh papu thisen phuba ka la bawk ang. Atea pawh keimah vanga rilru hrehawm taka a awm a ngai lo bawk ang" inringtawk zet hian Zochhingpuii chuan a ti ta a. 

Emy chu a inngaihtuah buai kher mai. "I putea hian min hua a. Mahse, kan pathuma sawiho chi a ni tlat. Zaninah dar 9ah ka rawn kal leh ang. I putea i lo hrilh dawn nia. Kei pawh enthlak ka ni mek a.. Kan fimkhur a ngai viau ang" a ti ve ta a. 

Zoi chuan melh ralh pahin, "Anih nang hian min bum lo tih engtin nge ka chian ang" a lo ti khauh a. 

"I thi locket kha rawn dah lang teh.. " emy chuan a ti a. Zoi chuan a thi silver a locket thla chanve chu a phawrh a, Emy chuan a thi awrh lai phawrh vein a locket ve ve chu an dah dun a. Thla chanve pahnih chu a inpumkhat thei ta chiah. "Hei hi i piantirha in tlanbo dawn khan ka nu kha ka pe a. Nakinah ka thi emaw ka dam emaw i nu ka ni tih i hriat theih nan" a ti a. Zoi chuan rinhlelh ngaihna a hre lo. Bakah Emy chu hua angin lang mah se, a chhungrilah erawh ngainatna riau a nei tlat!  

Emy chhuah hnu chuan mûk takin a inngaihtuah a. Amah chu mi pangngai aiin a danglam tih a hria. Mahse, eng nge a danglam bikna a hre rih lo. Chu thurûk ngei chu a ni a zawnchhuah tur chu.. Tumruh takin a ding khawng lah a. Tukverh darthlalanga a thla lo lang riai chu a va nuih sak a, "Game chu kan tan ang" a ti sap a. Kum 16 lek a ni tih chu amah ngei pawn rin harsa a ti ta. 

Dorothy.. :

A zai tha viau. Mahse, Zoliansanga leh hmeichhe pakhat a hmuh dun atang khan a mood a chhe viau. A tilui hram hram a ni ber. A zai zawh hnuah chhuanlam siamin Hall chu chhuahsan mai a tum. A zai tawh dawn chuang lo va, tunah chuan inbual faia mut veng veng a chak tlat. Amah maia hawn a tum bawk. Tuma thlah a duh lo bur. Tah hawm hawm te a chak. Zoliansanga hi a lo hmangaih takzet em mawni le.. 

A puan bah chi chu khumin a hmel chu a thup deuh a, hmanhmawh zetin a chhuak ta. Hall pawn a thlen rual chuan a thaw hawk. Khua chu a la vawt deuh sûk nen, a khur lek lek. A motor dahna a thlen chuan amah zuitu an awm tih a hria. A lehhawi a. Tumah a hmu lo. A carah chuan lutin chabi a vuah chiah tihin a back seat atang chuan, "Ka nghak rei tawh hle mai che". alo ti sup a. A rak tuar. A phu chiang kher mai. A lehhawi vat a. Chu pa hmel a hmuh chuan tlemin a inthunun thei. Erica a ni. Kha society-ah khan a hmu tawh. 

"Eng nge i duh? " a ti ta a. 

"Tunah hian Headquaterah kan pan a ngai a. Chu lam pan chuan tlan rawh" a ti ta sup a. Hna an pe ngei dawn a ni ngei ang. Phurna pakhatmah a nei lo. Mahse, a hnial ngam miah lo thung. An tlan chhung zawng an inbe tawh lo. Aizawl hmar lamah an tlan zel a. Office pakhat building lian pui a to lurh a. A sir veilama Building lian lem lo kawtah chuan an ding chawt a. Chu building lam pan chuan an kal phei hlawk hlawk a. In chhunga lut lo vin a sir lama kawng tum te takte lo awm chu zawh lehin toilet lo ding hrang nalh kawngka chu hawngin, comode bul bang chu Erica chuan a hmet khep a. Bang chu a tawlh ta zál zâl a. An lut ta a. 

Ni e, Secret Society an nih miau vangin an Office hi an pawl ni ve lo te tan hmuh a thiang lo bur. Tuman an hre lo reng a. Corridor thim raih chu zawh dun zelin, darthlalang in a hual vel pindan pakhatah chuan an lut ta a. Doctor thuama inthuam pa pakhat hian a lo nghak ran tawh a. Dr Zira a lo thu khar bawk. 

Doctor chuan, "Mu rawh" a lo ti nghal thâwr. Dory chuan hrilhhai ru angreng takin a melh kual a, hnial chi nia a hriat loh vangin a mu ta nghal a. Doctor chuan a ke kawr chu a hlip sawt sawt a. Mak a ti tan hle. A panty thlenga hlihsak takah chaun a thu hlawl. Erica chuan a lo nem mu vat. 

"Test satliah chauh alawm.. Hlauthawng suh" a lo ti sup a. Tlemin a lang nelawm ve deuh. 

A serh chhungah khawl tereute a nawrluh lai chuan a heh a lo pet fan fan a. Mak a ti takzet tih chu a thup hleithei lo a ni ber. 

Chu khawl a phawi zawhah pipe tereuhte a hnawh lut leh a, a serh biang dinglam a thip zawk. A lo chiu ni ngei tur a ni.. Pipe a lak chhuah zawhah, "Kan zo e" a ti sup a. Dory chu rang taka tho vin a inha tha nghal sawk sawk. 

"Virgin lo" Doctor chuan a ti leh hmuk a. Dr Zira chu a lo thaw hawk. 

"Tin, mipa chi la chambang kha kan society member zinga mi a ni" Doctor bawk chuan a ti liam leh puat a. Chu zawng a serious deuh nge Erica leh Dr Zira an ding hluai. 

"Anih chuan kan kalpui thei lo tihna em ni? " Dr Zira a ni. A aw a nem tehchiam lo. 

"A ni mai ang chu.. I hriat kha.. Society zing ami a nih chuan pure seed a ni thei tawh lo" a lo ti a. Dory chuan an thusawi chu pakhatmah a awmzia a hre lo. 

Dr Zira chuan Dorothy chu ngun taka melhin, "Thudik chiah sawi ang che. Emyin a rawn ruk chhuak che khan eng thil dang nge a tih? " a ti ta a. Emy khan a ru chhuak tih a sawi hauh si lo va. Amah chhanhim tum ang khan a insawi si a. Chhan tuma a ka a an lai takin, "Thil thleng zawng zawng kha i tana ti ka ni tih hria la, engmah i sawi tur a ni hauh lo. Min rin chuan i chungah eng thil tha lo mah a thleng lo vang" tia a hrilh kha a hre chhuak a, rilru buai takin, "Aih.. Engmah a thleng lo" a ti bah niaih a. 

Eric chuan  a kekawr ipte zen tut chungin, "Heta tanga i chhuah hnu emaw chhuah hma emaw tun hnaiah mipa tu nge i mutpui? " a ti ta a. A mitmeng a lian sia, Dory chu a zak chem chem mai. 

"Ahh. Ih, ka hre tawh lo. Ka chhuah hnu khan ka ruih deuh laiin mipa khat nen kan mu dun a.. Ih.  Tu nge tih ka hre miah lo zingah a lo awm tawh lo va" a ti ta mial mial a. Dr Zira leh Erica an inmelh zauh. 

"Okay, Tunah chuan i haw thei tawh ang. Tuman an hmu tur che a ni lo. A chiang em? " Erica chuan a ti a. A aw chu dam thlap mah se, a hlauhawm riau. Dory chuan hmanhmawh takin an kal tawhna lamah chuan let lehin a car awmna a thlen thlengin a thaw tha ngam lo hial. A chungah hian eng nge maw thleng ta le.. 

Dr Gosa kal hnuah Dr Zira chuan, "Emy hian min tlan khalh leh a ni lo maw?  He nau hi ka rinrawl ber kha a ni thin a, mahse, ka duh aiin a fing ta mah mah" a ti sup a. 

"Vawi tam ka hrilh che alawm.. Tunah chuan a fin kan chelh lo mek a ni. Chairman nen an inzawmna a tha bawk si" Eric chuan a lo ti nghat. 

"Eric, tihtheih kan la nei ang. Nangmah hian.. " Dr Zira'n a tih mek laiin, Erica chu a lo nui hawk hawk.. "A tan engmah ka ni tawh lo. Zoliansanga lak atanga kan rukbo hnu atang khan tu mipa tak takin a thinlung an luah rei ngai lo. Kei chu a tan uicho tluk lek ka ni tawh" chhungril na tih hriat tak hian a ti ta nghat nghat a. 

Dr Zira chuan, "Mahse, i tum chhin thei alawm.. Chuan, i la hmangaih reng tih ka chiang bawk" a ti a. Eric erawh beidawn hmel takin a thu hnawk. "A hmelhriat satliah lek ka ni ta hi na ka tih chang a tam asin. Mahse, ka chunga thleng tur a ni tih ka pawm lui tlat zawk a, kei hian ka nawr lut tlat a, a hriatna kha rawn kir leh pawh nise, min huatna mitmeng bak ka hmachhawn dawn lo tih ka chiang" a ti ta a. An pahnih chuan beidawn hmel takin Dr Gosa damdawi hmanrua vel chu an melh vawng vawng a. 

Dorothy chu a carah thuin hmalam melhin a thaw ham ham a. A khur nasa lutuk chu thunun tumin a inhum ruh a. A phone phawrhin Emy a call ta a. 

"Aw Dory, motor ka khalh mek asin" a lo ti dam thlap a. A tah a chhuak. "Emy, min pui rawh. Lo kal teh.. Khawngaih" a ti ta thlawt a. 

In a thlen chuan Emy a lo awm reng tawh. A lawm bawk si, mak a ti bawk chu a hamhaih a. Chet nachang pawh a hre lo. Chhuatah chuan a vei sek a, Emy chuan ngawi rengin a lo thlir veng veng. 

Rei tawk fang hnuah, "Test an neihtir che em ni? " a rawn ti ta a. Dory chu a ding chawt. 

"Umm.. Ih, ka serhah.. I hria em.. Mipa ka mutpui leh pui loh te min zawt a. Emy, engmah ka hre thiam lo. Nangmah min zawt bawk a. Mahse, engmah ka sawi lo" a ti bah nuaih a. Emy chuan, "Hahdam rawh. Thu la, tuisik ka lo lak ang che" a ti sap a. Tui chu a va thlitsak a. A in ta khawlh khawlh a. A la khur nia!  A sarhu lai khan a hriatthiam loh luatah hlauhthawnna chang pawh a lo hre lo va, tunah a hlau leh hle si. 

"Kha kha kan society kalphung alawm.. Kan pawl chhawm nung zel tur i hring thei dawn em tih an fiah che anih kha.. A chhan chu thil i tithei a, i thisen kha a pawimawh a ni.. Mahse, ka chhanhim ta che anih kha.. " Emy chuan a ti ta a. 

"Fa maw? Pai thei ni ta ila, tu fa nge ka pai ang? " Dory chuan mawlmang takin a lo ti hû a. 

Emy chu a nui hawk a, "Chu chu an thlang leh ang. I chakna leh thiltihtheihna te an zir chiang vek anga, chumi mil ber tur mipa chuan a pawl che anga, i rai anga. Kan pawl tungnung zel tur fapa emaw fanu emaw i hring ang. Mahse, i ta a ni dawn lo va, society ta a ni thung ang" a ti ta chat chat a. Dory chuan mak a ti telh telh. 

"Anih an test ve che em? " a ti chawt a. 

"Test e. Kei chu vanduaithlak takin ka lo virgin a.. Tichuan, ka damchhunga ka inchhirna tur thil chu ka hmachawn ta a ni" Emy mitmenga mittui chu a hmuh vawikhatna a ni hial ang. 

"Chuan, naute chu khaw nge?  Tu nge a pa? " a ti ta mawlh mawlh a. 

"Naute a ni tawh lo. Tleirawl hmel tha tak, chak leh huaisen tak a ni. Tu nge a pa tih erawh ka sawi thei lo. Dorothy, hei hi chiang takin hria ang che. Heng zawng zawng ka hrilh chhan che chu ka fanu chu kan society-ah a lo lut ve dawn a. Keimah ngeiin ka enkawl dawn a. Heng ka thuruk zawng zawng hi society member dangte bula i sawi anih vaih chuan, i lu leh i taksa kha a inzawm tawh lo vang tih hria ang che. Mi engzat lu nge ka lak tawh tih chu ngaihtuah buai suh. 

A tir atang khan venhim che ka tum char char a. Mahse, keimah mai chuan engmah ka ti thei lo. Jo kha mutpui tur chein ka ti a. A mutpui che a, jo chi la chambang vang chauhin keimah anga nun hrehawmah an nawrlut ve lo che anih kha. I tan thil tha ka ti a, nang pawh ka lamah i tang tur a ni. I hrethiam em? Tun atang chuan ka tan i thawk tawh ang. Society tan ni lo vin ka tan.. Ka tan chauh" Emy mitmeng hlauhawmzia a rapthlak lek lek. A de sawr sawr mai. 

"Eng… Eng nge ka tih ve dawn? " Dory aw khur nasa lutuk chu a lainatawm takzet. 

A samah rawn chulin, "Hahchawl phawt rawh. I hnena ka thusawi kha i damchhunga i vawn theih chuan hna dang vak i thawh a ngai lo vang" Emy aw chu a dang leh daih tawh. A nem leh hle tawh. Dory pawh a thaw suai suai mai. Ni e, Emy phatsan chu thihna tluk a ni tih a chiang viau. He hmeichhia hi hmeichhe naran a ni lo tih a hai ta bik lo. Chuvang chuan Emy thil hrilh zawng zawng kha khawiah mah sawi chhhuak lo turin a rilruin a intiam ta mawlh mawlh a. 

Emy.. :

Dorothy in a chhuahsan hnuah a in lam a pan nghal a. Zuitu a nei lem loin a inhria. 

Tlai tawh viau mah se; a inbual fai leh sar sar a. A inthlak hnuah Whisky a phawrh a, a khum bul carpet dûpah chuan khum nghenga thuin a dawm leh ta phawt. Tunah chuan a fanu ngei chu an societyah lo lutin an pahnihin harsatna an hmachhawn dawn ta chu a nia. Ni e, valtea kha chuan rem a ti chiah lo tih a hria. A û a ni tij pawh a la ringhlel fô anih kha. Mahse, a hnungzanga a tatoo chhut a hmuhtir takah chuan tlemin a ring ta deuh. Ni e, a tatoo kha a lar tirh, zoram khawvelin a hming an hriat tirh khan a nute phal lo chung a chhuttir kha a nia. A nau chuan a lo la hai bik lo anih kha. Thu tam tak a sawipui thei ta hram a, Valtea hmin chiah lo chungin Zochhingpuii chu a rawn lut dawn ta tho va. Valtea pawn a la pawm thiam ve mai turah a ngai. 

Zoliansanga a ngaihtuah chhuak.. Ni e, christmas bawr velah khan Aizawl chhuahsana a zin daih vangin a hmu ta ngai lo va. Zoa khan a zawng reng tih a hai lo. Sangteii vang a ni lo tih a chiang hle bawk. Kha pyramid lem kha, Jo fimkhur tawk loh vanga Dory ina an hnutchhiah palh vang khan Zoliansanga chuan a zawng tih a hrechiang ngang mai. Zoa hmel upa ve lek lek tawh, a taksa inphutmawi tak leh a mitmeng hriam lek lek te a mitthla chuan a hui pap a!  Zohlupuii hmel kha nei tawh lo mah se ; Hlupuii a nihna erawh a bo thei bik si lo. An chairman fapa a nih vanga thil zawng zawng a buai chhoh dan te kha. An chairman chu a hua a, mahse, tunah chuan a thu awih a ngai tih a hai lo. Zoliansanga vanga a tawrhna leh a chhungril hliam reng tawh tur hi amah Zoa hian a hre ve ang em le? A phatsan tak avanga a damchhunga a nuna mipa dang a nuna a lakluh theih tawh lohzia te hi a hre ve ang em? A number a thlak tak avanga a rawn biak theih tawh loh vanga a hrehawm a tihzia te hi.. Ni e, ani nen chuan khawvelah hian hun an nei tawh lo. An inkarah hnawk a tam tawh lutuk. Chung zingah chuan Zoliansanga pa, an chairman ngei hi a bul a ni si a. Zoa nun a chhe vek thei tlat. 

Tin, Zoa tan chuan a bawlhhlawh tawh mah mah. Mipa engzat nge a mutpui tak tih chu a chhut buai peih lo. Dr Gosa'n a mamawh chang apiangin a rawn be bawk. Tihlawm a ngai tlat si a. A hna avanga thil a awlsam zawk dawn chuan sex chu a tan infiamna hmanrua a ni tawh a, Zoliansanga mitthla chung zelin a taksa chu a hlan thin. 

Zu chu a tlak pawp a!  A ner sawk. Zochhingpuii a ngaihtuah leh. A fanu chu a chhuang a, hmel tha a tiin a hmangaih ngawih ngawih a ni. Mahse, a fanu in a pa a hriatchhuah hun tur a ngaihtuah apiangin a khur thin. Kha rip thim taka khum te takte kha a ngaihtuah let a. Saruak veka hnutchhiaha Zochhingpuii pa lo kal hun tur a nghah lai te kha. Ni e, a lo lut a, Rang taka a thiltih tur ti tura a lo ngen laia nui sâwng chunga, "Ka duh danin le" a tih sup te kha.. A rawn bawh a. Khum chu a te lutuk tiim chhuat daiah a pawm thla a, a taksa lian tak leh a mipatna a chhunga a lo luh laia na a tihzia leh a rak nasatzia kha.. Thisen a chhuak tiam tiam a.. 

"Lalnu, fanu i nei ngei tur a ni" tia a rawn hrilh sup lai te khan rapthlak tizetin a lo melh anih kha.. A inthing nawk nawk.. Nie, Zochhingpuii pa chu a ngaihtuah tawh tur a ni lo. A fanu tan chauh a ding tur a ni. 

A phone ri ral ral chu a melh a, zing dar 1 a pel tawh. Jo a lo ni. 

"Aw.. " a ti puat a. 

"Emy, Dr Gosa a thi"

A ding chhuak zawk. A phone a paih darh chuai. Thinrim zetin a kut a hum ruh a. An thuruk chu hriatchhuah a ni ta mai em ni?  Dr Zira leh Erica hmel chu chiang takin a mitthlaah an rawn lang. 

"He mi te pahnih ka dah that hma loh chuan ka chawl thiang lo" a ti ta nghat a. 

Zoliansanga.. :

Eng dang mah ngaihtuah thei lo vin khumah chuan a let tawn chhen. Anu nawrna nasa lutuk chu tlanbosan a duh hial. Sangteii chu nei ngei ngei turin a nawr si a. Sangteii lah hmeichhia anihna hrechang lo lekin a rawn lawr zing. A mak a ti telh telh a, a duh lo tial tial bawk. Heti ang hmeichhia a lo ni hrep chu!  Emy a ngaihtuah. Vawi tam a zawng, a number a nei thei hlauh a. Mahse, a phone tlang thei ngai reng reng lo va, a hmu leh tawh ngai hek lo. Dory bulah a zawt zeuh zeuh a, ani lahin an inhmuh ngai loh thu bak sawi tur a hre si lo. Chiang taka a hmel a hmuh ni khan Zohlupuii a ni lo tih chu a chiang viau. Mahse, a aw kha.. Hlupuii aw nen a inang viau. 

"Zo, sex chu hmang lo ang aw. Ka hnute hi chu khawih rawh ka phal" chance an neih tuma rilru thianghlim taka ti sar sartu Hlupuii kha a ngaihtuah let a. A nui hmel mawizia leh a ha var rual thah bakah a hmui sen hiam te kha.. 

Virgin ngeia pasal neih tum khan mipa dang fa a pai thu a hrilh tlat si a!  A tawrhna te kha hun hian a thawi dam ve thei ngai dawn lo em mawni le.. Ti nge Hlupuii bak a thinlungah an chen ve theih loh?!! 

Vawiinah a nuin, "Sangteii hi i nei lo anih chuan, kei chu ka damchhungin ka hlim leh tawh lo vang" a ti anih kha. Anu chuan eng nge maw a hriat le?  Ti nge Sangteii chu a duh em em. Sangteii lahin a zar reng a, a hna pawh duh angin a thawk thei lo. A pa erawh chuan, "I duhthlanna a ni e" a ti thung. Eng nge a tih ang a hrethiam lo. Nupui nei rual a ni tawh, fa pawh a awt ve viau. Hlupuii nen an fa ngei kha ni se tih thu hian a zui thin mai pawh a! 

A thu chhuak hlawl a. Cigaratte chu tanin a fawp vang vang a. Choka fridge-ah beer a dah tih a hrechhuak. Room atanga chhuakin choka lam chu a pan a. An room atanga a pa lo chhuak mek nen an intawk chiah. A pa chuan phone a hmang a. 

"Zan lai laiah eng thil nge? "/Zoa chuan a ti sup a. Fridge a hawng nghal. 

"Kan thawhpui pa a thi a. Dr Gosa.. " apa chuan zawi sup hian a lo ti a. 

Dr Gosa chu a pa thian hnai tak a ni a. A hre ve. Amahin clinic a hawng ve tho va, parawl a ni. A fel viau asin. 

"A va pawi ve. Engtia thi nge" beer hawn pah chuan a lo ti a. 

"Ka la hre bik lo. Ka chhuak dawn a. I nu kha zingah i lo hrilh mai dawn nia" apa chuan a ti zung zung a. 

"Zingah kal ve mai la, tih theih a awm chuang dawn em ni? " a lo ti hluk. 

"A pawimawh tlat. Ka thian tha tak a ni asin" apa chuan a lo ti a. Roomah a luhsan nghal. 

Ani pawh a roomah chho lehin khumah chuan thuin beer chu a in khalh khalh a. A phone chu a hmet eng a. A dah leh daih. Sangteii msg a tam mah. A seen peih lo. 

A pa tlan chhuak thawm chu a hre zui nghal. Apa hi inah a awm tam lo hle. A clinic lamah hian a tui mah mah a ni maithei. Engpawhbise, a nuam tih zawng a nih chuan a tha vek mai. Inmil lohna an nei ngai lem lo naa.. A damchhunga a hriatreng tawh tur apa hian a lo ti tawh tlat! 

Hlupuii mizia a danglam chhoh lai khan Hlupuii bansan turin a nawr chiam tawh anih kha. A chhan a hre hauh lo. Apa chhuanlam te kha a ho a ti. Mahse, apa sawi ang deuh khan Hlupuii zawk chuan a phatsan ta anih kha. Khang zawng zawng kha apa khan a lo hre sa em ni ang! 

A tukah a nu bulah Dr Gosa thih thu a sawi a. Mak a tih ve hmel hle. Ani pawh tukthuam ei khamah a insiam a. Jonathana in lam panin a kal nghal. Ni e, zing karah khan jona hian, "Dr Gos kha thah a ni. A ruang kha a inah thisen nena inchiahpiah nuaia hmuh a nia" a rawn ti anih kha. Chu thihna chu an zir dawn ani mahna. A rilru a sen lohna a rei ta bawk a. A phur viau mai. 

Jonathana insiam zawhah Dr Gosa in lam chu an pan ve ta a. Doctor a lo ni tawh thin bawk a, mi pawh an tam viau mai.. A ruang hmutu an thenawm pa chuan, "Dar 12 a pel tawh. Pu Gosa au ri niawm ka hria a. Mahse, a reh leh daih vangin ka mu tha leh a. Mahse, a hnu lawkah a rak leh tuar a, a reh vang vang hnuah motor tlan chhuak thawm ka hre ta nghal a ka ngaih a tha ta vak lo va. Tukverh atangin ka va thlir a, a in chu a lo eng pap a. Min mawlhtu a awm tlat vangin ka va kal ta ngawt a. Kawngka a inkalh lo va, ka luh chuan bungrua vel chu a lo hnawk niaih mai. Chuan ka ko va, min chhang si lo a, a roomah ka lut ta a. Ani hi khum hnuai chhuatah thisen nena inchiahpiah nuaihin a lo tlu der mai a. Rang taka va bawihsawm nghalin a lo thaw feih feih a. Thei leh thei lo hian, "Anmahni ngei a ni.. Anmahni ngei" a ti sup sup a. A chatthla nghal a ni mai" tiin ruang a hmuh dan a sawi. Zoa te thian dun pawh chuan ruang chu an va en ve zuai a. An postmortem tawh nghe nghe. A lu lamah hliam engmah a nei lo. A taksa erawh an khuh tlat si a. Tihngaihna a awm lo. 

Dr Gosa in kawt hul hliap hnuaiah chuan thu vein mi lo kal chu an thlir dun a. Dr Gosa chhung leh khat te pawh an tap ve rawng rawng mai. A nupui leh a fapa bulah a kal ve dawn ta chu a nia. A lawmpuiawm zawk letling e. A nun khua kha a nuam tak tak ngai lo va, tunah chuan a zalen tawh ang chu. 

Zoa hawi kual chuan Emy leh Jo rawn inzui phei chu a hmu ta hlawl mai. Thawk pawh thaw tha ngam lo vin a lo melh a. Emy chuan pangpar bawr khat nalh zet hi a pawm a. A sam chu thlah in thawmhnaw dum vek a ha a. In chhungah inzui lutin rei vak lo ah an rawn chhuak leh a. Kawta thutphah awlah chuan an thu ve a. An tawng lem lo va, an zai chuang lo bawk. Zoa chuan ngunthluk takin a lo thlir vawng vawng mai. 

"Thiana, saw nu saw lawm ka zawn reng thin kha" Jona chu a nghawk salh a. Jona pawh chuan a hmu ve thuai. 

"A chhiat loh saw" a ti liam puat a. 

"Chutiang zawngin ka en lo" a lo ti nghut. 

Emy te chu an thu rei lem lo. An inbia a, an kal leh daih. Zoa chu a tho thurh. Jona chuan, "I zui dawn mi? " a lo ti a. A lu bu nghatin a kal zui nghal. 

Emy motor chu zui zelin Khatla lanah an tlan ta. Hloh hlau taka hmalam bih ngur ngurin a zui ve zel a. Building lian ta pakhat kawtah an ding ta. An chhuk a, chhuk rih lo vin an thlir reng a. Mipa zawk khan kawngka thleng a thlah a, taxi pharin a kalsan daih. Emy chuan Guard lo thu hnenah motor chabi pein building chhungah chuan a lut ta nghal a. Zoa chu a chhuk ve nghal zat. 

Guard lo thu chu nelawm zeta biain, "Ka thiannu kha a in number min lo hrilh thei ang em? Tun lawka lut kha" a ti ta a. Guard chuan a melh vung vung a, "Room no 034 a ni e" a ti a. Lawmthu hrilhin building chhungah chuan a lut ve ta nghal a. Elevator khawl a lo chiankuan loh vangin step thui zet a zawh chho a, a infit bawk a, a hah lem lo. Room no 034 bulah chuan a ding ta ran mai. Biak ngei a duh si a. Engpawhnise ti rilru chungin kawngka chu a kik ta a. 

Kawngka a rawn hawng ta. Emy chuan awmhmun kawr a lo ha tawh a, coffee a lo in mek bawk. "Eng nge i duh? " nelawm vak lo hian a lo ti a. 

Nui chungin, "Ka biak che a ngai.. " a ti hmak a, sawmna dawng lo mah se, a lut hmiah. Emy chuan ngawi rengin kawngka chu a khar a. A hmaah tak a rawn thu ta a. 

"He thil i neih dan hi ka hre duh" tiin pyramid lem chu a lek ta vâ a. Emy mitmeng chu chiang takin a melh bawk. Danglam awm miah lo vin, "Ka nei lo hrim hrim" a lo ti ta hmiah a. 

"Ka hmuh vawikhatna " a ti zui nghal sap. Zoliansanga chu a hrilhhai lek lek hman. 

"I ta anih thu Dorithyin a sawi sia" a ti a. 

'A hre sual anih dawn chu.. Ka ta a ni lo " a dar san âk chungin a lo ti leh hmak. 

"Enteh, he thil hi ka tan a pawimawhzia i hre lo a ang hle mai. I neih dan chiah ka hre duh. " Zoa aw chu a chang khek khawk hle. 

"Ka phalna tel lo vin ka in chhungah i rawn lut a, chutah tawngkam vin i hmang ngam a maw?  Tu nge i nih ka hre lo. Khawngaihin min chhuahsan rawh" Emy chuan a lo ti chang rât a. Zoa chu a ding hluai a. Inhmatawn ran chungin ngawi rengin an inmelh ngat ngat mai. 

"Ka la hre tho vang" a ti ram hmak a. Chu hmeichhia induhtawk leh inchhuang lutuk chu a ngaina hauh lo. Mahse, a hriat duh hre theitu a ni miau si a. 

"I hre ngai lo vang" a lo ti ve salh. Emy kawngka a chhuahsan rual chuan a rilruin, "Zoliansanga chhaih kawlh hlauhawmzia i la hre lo pek a ni maw? " a ti rilru a. 

Emy ve thung chuan, kawngka lam melh ran chungin, "Zo, min ngaidam rawh aw… engtikah emaw chuan i la hrethiam ngei ang" a ti rilru ve thung a. 

Secret Society:

Chairman mitmeng ling hlar leh a hmel nelawm loh zet chu an en thap. A hmaa thu kual te melh kual pahin, "Tu in nge Dr Gosa chu that tih hi kan hre ngei tur a ni" a ti bung nghut a. A aw chu a chang beng bawng viau. 

Pu Dinga chuan aw then kharh pahin, " A nâka vih a ni a. Chumi hnuah a dula vih a ni bawk. Pawn lam mi Pawh an ni thei" a lo ti var a. 

Chairman chuan, "Mahse, a ruang hmutu khan 'Anmahni ngei a ni' tih thu a sawi a tih kha. Tu te nge anmahni ngei a tih chu ni ang? " a lo ti a. Tlemin a aw pawh a dam deuh tawh. 

Dr Zira chuan "Nizan khan a hmu hnuhnungbertu kan ni hial awm e. Dorothy test kan neihpui a, min chhuahsan hnu khan kan hmu leh ta lo a ni" a lo ti ve bawk a. 

A bul chiaha thu Pu Ruata chuan, " Test chu eng nge a an? " a lo ti nghut a. 

"A hlawhchham.. " Dr Zira chuan a lo ti bung vut. 

"Dorothy chu kan dah tha rih thei em? Dr Gosa thattu leh thih chhan hi kan hriat a ngai hmasa ber" Chairman chuan a lo ti hriam hraih a. An ngawi thap. 

Pu Lawma chuan ngui zetin, "Kan pawl pawh hi a him ta lo a nih hmel.. In thlitfim hi kan ngai tawh a ni" a lo ti ve a. 

"Dr Gosa kha kan pawl tana mi tangkai leh rinawm tak a ni. A chetsual kan hre ngai lo. A aiawh tur mihring an váng teh asin" Pu Zaua chuan a lo ti be boh. 

A tu amahin a thattu niawm an sawi thei si lo. An meeting pawh chu awmze nei lo mai a ni. Meeting chawlh lailawk lai chuan, Erica cabinah Dr Zira leh Beiseia an lut nghal a. 

"Eric, a tawp kan hnaih tan ania. He thil hi kan din tlangpui ngam ang chu maw? " Dr Zira chuan a ti sup a. 

Erica chuan, "Nang aiin ka serious zawk" a lo ti khauh. 

Beiseia melhin, "Hnuhma engmah i hnutchhiah lo takzet maw? " a ti hluk a. 

Beiseia chuan ram hmakin, "Ka hmel a hmu tih mai loh chu engmah sulhnu ka hnutchhiah lo" a lo ti a. 

"Aw le, Tunah chuan hlauh tur pakhat chiah kan nei tawh. Emy.. He hmeichhia hi kan dah tha anga, tichuan, Dorothy hmangin Zochhingpuii kan hmet mit anga. Society chu kan lalramah kan siam thei tawh ang" Dr Zira chuan a ti ta a. 

"Emy dah that hmain A kid rinawm Jo hi kan hual phawt dawn lawm ni? " Beiseia chuan a lo ti khauh. 

Eric chuan, "Ni dawn tak.. Ni e, he pa rual hian Emy pawh kan vaihma thei ang chu. Dorothy chu zaninah ka va rim ang e" a lo ti sup a. An khi tha hlawm mai. 

Zochhingpuii.. :

Emy pek Kawrfual a khup chung vel, fit zaih mai, simple angreng tak chu hain darthlalang hmaah chuan a in en kual vel a. Inringtawk zeta a mah leh amah inmelhin, "Tun atanga reiloteah Zochhingpuii hian a hna a thawk tan ang" a ti sap a. A nui sâng bawk. 

Dar 9:15-ah Emy chuan a rawn call a, a putea nen a awmna hmun a sawiah chuan an va kal ta a. A putea chuan a let leh dawnin, "Ka naute, I nihna diktak hre reng ang che. Mi pangngai i ni a, i pi leh pu te phuba la tur leh zoram chhanhim tura kal i ni tih theihnghilh hauh suh ang che" a ti a. An invai liam ta. 

Emy chuan an hmunpui lam panin a tlanpui a. Hmunpuia awm thinte hming leh an mize tlangpui chu a hrilh melh melh a. Ngun takin Zoi chuan a lo ngaithla. 

Building chhung an luh rualin Erica a hmu hmasa ber. A hmuh vawi khatna a ni. Erica chuan makti zetin a lo melh a. Hmanhmawh zeta kal kiangin mi dang a hrilh dawn a ni ngei ang. Chairman room kawngka chu Emy chuan a kik karh karh a. Lut tura sawmna an dawn veleh an pen lut dun ta a. 

Chairman chu a lo ding hluai. Zochhingpuii chu a melh ta ngawih ngawih a. 

"Emy, eng nge thil awmzia" a ti thawp sat a. 

"Amah ngei hian Rêver hi zawm a duh a ni. A duhthlanna a ni e" Emy chuan fiahfai takin a lo ti a. 

"Hall-ah kan kal a ngai anih chu.. Khawngaihin" tiin a rawn kal phei nghal. An pathum chuan Hall lam chu an pan a. Intercom atangin Hall lama kal tura inhriattirna a ri bawk. Hall an va luh chuan an lo thu deuh thap tawh a. Zoi chu a zâm lek lek. An en duh viau mai. 

Platform-ah chairman chu a lawn a, a aw thian kharhin, "Zaninah thil dangdai tak kan tawng tlat mai. Zochhingpuii, Zohlupuii fanu chuan kan society a rawn zawm ve ta" a ti hluai a. Boruak chu a reh dûk mai. 

Zochhingpuii chu pen chhuakin, "Engkim ka hre tawh a, hetah hian kan pawl thiltum tihlawhtling tura lo kal ka ni. Kan zavai tan hian ka thawk dawn ani" a ti a. An tawng noh noh mai. Dr Zira leh Erica hmel zet erawh ngaihno a bei lo chiang teh e. An thinrim hmel chu an thup hleithei lo a ni ber. Mi dang zawng erawh an hlimin an phur hle tih hriat takin an hawiher pawh a zang vah mai. 

"Kan lo lawm a che. Naktuk atangin i hnathawhna atana i mamawh tur lamkhawm a ni anga, training i nei nghal bawk ang.. Kan rin aia hmaa he thil a lo thleng hi kan lawm hle a ni.. " Chairman chuan a ti a. A hlim takzet tih a hriat. 

'Tehreng mai. Min kaihruaia min vil turin Emy hi ka thlang nghal bawk e" Thupe aw deuh hian Zoi chuan a ti zang vah a. 

Chairman chuan Emy a va melh, Emy mitmeng awmze nei zet chu en rei ngam lo vin, "Tehreng mai. Emy hi i mentor a ni e" A ti ta a. Dr Zira leh Erica mitmeng erawh a ngui rawih rawih mai. Emy mitmeng de sar sar chuan a tihlauthawng a ni mahna. 

Chumi zan atan chuan an duhtawk ta phawt. Zoi pawh a hahchawl ve rih lawk ang chu. Emy bulah a riah nghe nghe kha. Ni e, a hmasa ber atan a nu kuahlumna hnuaiah tui takin a muhil sák sâk mai. 

Khua a lo var a, Emy eirawngbawl thawm chu khum atangin a lo ngaithla a. Khi sak chungin a tho chhuak ve ta a. A hmai phih zawh inn Emy pek Thingpui chu a in khalh khalh a. Kawngka an rawn kik dat dat. 

Emy chuan, "Jo a ni ngei ang" tih pahin a apron hak lai chu a phelh a. 

Kawngka chu a va hawng a. A tawlh hnung det. Zoi chu rawn kal hnaiin kawngka lam chu a hawi ve nghal a. Zoliansanga chuan a hmaa hmeichhe pahnih ding te chu mit khap miah lo vin a melh tawn zak zak mai. Zochhingpuii a hmuh chuan hmana a hloh tak tleirawl kha a ni tih a hai lo. Emy bulah eng nge a tih?  A rilru a va buai tak em.. 

"Eng nge i duh leh tak? " Emy chuan chang fakin a rawn ti ta a. 

"Tun tum chu Dr Gosa thih dan chhui tura lo kal ka ni.. " a ti sup  a. 

"Tangkaina ka nei ve lo ve" a lo ti nghat. 

"Mahse, Dr Gosa rokhawmtu i ni si a" Zoliansanga chuan a lo ti ta khauh a. Emy pawh a hrilhhai ve lek lek. Inthing harh lehin, "Inzawmna kan nei alawm" a ti a. 

"Ni e, inzawmna thûk tak in nei. Chuvang chuan a thattu zawn chhuah kawngah min pui dawn a ni" Zoa chuan a ti ta nghut a. 

"Emy, ka hriat ve ngai a awm em? " Zoi chuan a lo ti ve a. 

"Aih, hei chu i tan a pawimawh lo.." emy chuan a lo ti var a. Zoa melh lehin, "I lo kal hun hi a fuh chiah lo ani. Khawngaihin chawhnu lamah kan inbe thei ang em? " a ti ta a. 

Zoa pawh chuan, "A tha alawm. Chawhnu dar 2ah Abigail Restaurant-ah hmuh che ka lo inbeisei ang.. Chuan, saw tleirawl saw i fanu a nih loh hram ka beisei" a ti chang nghut a. Emy chu a nuih a za deuh. Zoliansanga rilru kal dan chu a ngaihtuah thiam si a. 

"Aw le.. Ka lo kal ang.. " tiin kawngka chu a khar ta a. 

Tukthuan an ei khamah Zochhingpuii chu an hmunpuia dah turin a hruai chhuak leh a,. Hmunpui an thlen rual chuan Zoi chu mipa pahnihin an hruai hrang nghal. Emy chuan vin thakin,"A mentor ka ni a, ka phalna tel lo chuan in hruai thei lo" a lo ti a. 

Chairman rawn kal phei lam chu pan nghalin, "Eng nge a awmzia? A mentor ka ni si a" a ti vat a. 

Chairman chuan nuih suk pahin, "Sister Ariana a lo kal dawn. A kutah kan dah ta zawk a ni" a ti ta a. 

Emy chu a dâng ta sâwp sáwp a..!  Engtin nge a nih theih? A theih loh.. Ni lul lo ve.. A tihtir thei lo vang.. 

"Engtikah nge a lo thlen dawn? " Emy chuan Chairman hnungchhawn zawnga ding chungin a ti sap a. 

"Zaninah, Pu Dinga leh a hoten an va hmuak ang" Chairman chuan a ti a. A kalsawn nghal. 

Emy chuan nui sak chungin "He lai hmun a rawn thleng lo vang. Ka fanu tan chuan eng pawh ka ti thei" tiin a phun ta sap a! 

(Hei ka nuin min tir leh chhen tawh. Nula ka ni ve bawk sia maw.. Tangkai ve a ngai thin si a.. Duhtawk leh phawt ang aw 😍😍