Thuruk 19

THURÛK..!  (19)

Ziaktu: Toni Râlte

Zoram khawvel chu inthlanpui lo awm tur vangin boruak a sosang chho zel a. Hetih lai mek hian Secret Society pawhin hma an la kal ve reng bawk. An society chhungah buaina neuh neuh nei thin mah se; chinfel a ni thuai thin a. Mahse, Zochhingpuii leh a pa vangin phawrh mualpho leh tihchimih an nih hlauin an thaw dèp dèp ta mai. Emy pawh khungbo a ni ta rih a. Pu Liana thupek a ni. An pafa nunna a derthawnga a hriat vangin. Mahse, Emy chuan lawmawm a ti zawk. Khungbo lo se chuan a duh loh thlenh thleng a ti palh ang tih a hlau ve tlat a ni. Mahse, a la beidawng lo, engtikah emaw chuan a fanu hi chhanchhuah theih a la inbeisei tlat a ni. 

Pu Zira pawh a buai chho mek zel a. A thuihhruai a rin ber Beiseia reh ta hmak chu a thi tawh a nih a ring nghet bur. Report theh luh chi niin a hre si lo. A nupui lahin chhuahsan tumin an hun tiam a nghak mek bawk si. A fate phai leh hmun danga awm ho te lah anmahni buai buaiin am buai tawh a. A tlachhe mek zel chu a ni e. Dr Bta chiah a nei ta. Ani lah mi thar mai chauh anga a la lan avangin chet han la chiam thei a ni bawk si lo. Emy a huatna chu a sosang telh telh mai. Erica pawh a la khung reng a. Han thah em aia tha zawk tur a ngaihtuah mek a ni. A chhan chu khang kum chhung zawng khan atan Eric hian tha takin a thawk thin. A mei tluk zeta khawi kipa zuitu a ni a, mi rinawm a ni bawk thin. Emy'n a thinlung a ruksak tak chinah a pelhe ve a ni mai. Chuvang chuan a hriatna nawhrehsaka mi thar anga kaihhruai leh chu a tum rilru a. Dr BTA a la inpeih loh deuh vangin an la nghak rih zawk a ni. 

Zoliansanga pawh rilru khingbai leh helhkam nei tih hriat takin a hun chu a hmang chho ve zel a. Emy thutiam kha a vawng reng mai. "Society ka tihchhiata nunphung pangngai ka neih theih hunah chuan Zohlupuii kha ka ni leh ang" a tih kha. Puih a tum sateh naa amah Emy'n a duh tlat si lo. Hnuhluh ve chu a tum bau lo a ni ber e. A pa a hmuh apiangin nuam lo tihna a nei thin. Apa chu chhanchhuah a duh, Setana tirhkoh a han ni mai chu tawrhthiam harsa a ti a, chhandam tlak a la awm ang em tih a inzawt fô.. Mak a ti thin. Anu leh pate chu an kohhran huangchhungah pawh a ber kai pha, mi nawlpuite rin hlawh ber an ni si a. Apa sermon lah in hiptu leh eitu a ngah thei si. Engtin nge nun pahnih nena khawvel a hmachhawn theih bik?  Veng chhunga pawl hrang hrang tan lah a contribution a tha thei si, a hming tha em em reng bawk a. Mahse, a chhungril nihna dik tak erawh setana chhiahhlawh, setana tirhkoh a ni tlat si. Zoa chu mangang taka a rum chang a tam. A thiantha ber te bulah lah a sawi thei si lo. Tumah chu a ring ngam tak tak tawh lo. A rukin society member an lo ni ve reng thei tlat. Apa nen inkawmna hun thawl an la nei thei lo va, hun remchang a awm veleh apa chu an pawl chhuahsan tura ngen a tum nghe nghe a ni. 

Valtea leh Dorothy pawh nupa angin an la khawsa zel a. Mi nawlpui chuan Dory chu zinbo angin an ngai vek. Tin, inthlan boruak a ni bawk a, tumah vakin an ngaihven chiam tawh lo. Party lian tak pahnih in buan tur chu hawkdak takin an thlir a ni ber. Dory nu ten an rawn biak khan engkim a lo hrilh kha a nia. Apa chuan shillonga haw ve phawt tur leh dan anga palai te tirh vea inneihna pangngai buatsaih chu tha a ti a. Mahse, Valtea zakw a la inpeih hleithei lo. A tunu tel lo va nupui neih a duh loh bakah mawlhtu a la nei tlat! . 

Thla khat velin inthlan a dang tawh tihah boruak thar a rawn awm ta tlat. Party lian tak pakhat zawka an leader Pu Sawmzuala video a rawn darh ta hak mai le.. Khum khata a mutpui nula hmaa saruaka rui phelh phawlha politics a khelh dan uangthuang taka a sawina video a ni. Chutah chuan a CM laia sum a lakluh dan leh fing taka an pawh kual dan te zuk sawi a!  Pa fing var tak chu a ni lo phawt. Nge a nula taksa nalh leh duhawm lutuk chuan a thluak a hip kang zawk. Nula lah chuan a chhimbudawi thiam fu lehnghal. Virus chi khatin an ram a run laia zoram mipuite harsatna sutkian nana Relief fund an pawh then dan leh a thlenna tur dik taka thleng lo va reh bun a tam zia te pawh chu nula chuan a sawitir zung zung mai nia!  Chu zet chuan mipui thin a tirim nasa ta mai a. An alh lo chauh a ni. Mizo thalai tangrualin a in beih tumin an inhawrkhawm hial nghe nghe. Amah lah a tawmbo hmiah a. A intihlum duh hial ang em tih chu hriat va ni suh. Mi harsa leh chanhai te tanpuina tur an lo fangmano ei hmiah hmiah chu mipui ngaihdan a ni lo nasa a ni e. 

An party chuan thuchhuah siamin, Opposition ho beihna a nih thu leh chu pa chu an leader a nih loh thu an sawi a. Rin erawh an hlawh lem lo. Party lehlam zawk tan erawh chakna hnar a ni ta ringawt mai. Pu Sawmzuala hnuai chiah Pu Zamliana pawn chung thil chu a lo hmu ve vek. Society ten chet an la tih a hai lo. Mahse, pawi deuh chu an party an hmu nikhua tawh lo tur chu a ni. Sawrkarna an chelh a rinawm ta lo hle. Lungawi lo zetin Pu Zamliana chu a thu tum vuau a. Khang Society a lo thawhpui kha a inchhir tan der mai. Pu Sawmzuala'n boruak a neih hak atanga kar khatna velah Party pakhat zawk chuan boruak a rawn nei ve leh ta tlat!  An sawrkar laia Hydel Project chungchanga ruahmanna siam sa, mipui bum nana an document lem siam chu a rawn lar leh ta tlat! Corruptiona an fihlim lohzia a rawn lang ta tliar tliar bawk. Zoram chu thimin a bawm a ni ber e. A tu ber nge an hruaitu atan an thlan ang tih an hrethiam ta lo. 

Mahse, Pu Zamliana chu an party-ah Leader-ah lak luh a ni ta tho va, hun an ngah vak tawh loh vangin chet hmanhmawh a ngai. Society hnen atanga a sum dawn leh a sum khawlsa hmang chuan "Thuphachawina" tiin mi harsa leh rethei, virus vanga rahbeha awm te chu a tuamhlawm chho a. A sum hrawm a nat em vangin rinhlelh te a kai lek lek a, mahse, tuman a fel lohna an finfiah thei ta lo. Thingtlang lamah a tla na ta hle a. A dinna tur bialah phei chuan tling saa ngaih a ni ta.. Society chuan zoram a thunun chho mek a nih ber mai chu.. 

Thawm danglam tak avangin Emy muhil lai chu a harh zawk. Rum chhur chhur thawm a ni. A hliam te chu la dam fel chiah lo mah se; han natpuia behpui tlawk tlawk tur a ni tawh lo va. A inbengkang a. Pindan lehlam atanga lo chhuak a ni tih a hria. Chhuatah chuan kelawnga kalin kawngkhar chu a va hawng dèk dèk a. Zan lai ti ila zing lam dar 3 bawr vel a ni tawh. Tun ang huna thawm danglam siam chu mak a ti ve deuh a ni. Thawm dim zetin pindan lehlam chu a pan a. A inkhar phui vek. Ramsa ngur thawm chu a hma aia ring zawkin a rawn ri leh a. Emy pawh a ding chawt. A fanu te pafa an ni thei ang em?  A tim sawk mai. Pindan inkhar phui tlata luh ruk dan tur kawng chu váng a ti si. Hriata hmuh ngei a duh bawk si. A rilru a buai kher mai. Kawngkhar bulah chuan a ding reng ringawt. Chutah hrechhuak thut niawm takin a pindanah a tlanlut a. Thutkhawmna pindana dawhkan a hun chu chawi sawnin carpet chu a phawk sawk sawk a. Kawngkhar a lo awm a. A hawng a. A thim bakah a rimtui vak lo. Torchlight a va la a, a lut thla ta a ni. Step chu a thui lem lo. Dinglam zawngin kawng chu te taktein a phei raih a. A zawh a. He kawng rûk hi Gosa leh Josh te nen an siam a ni. An dinhmun a derthawn thut pawha bihrukna atan a ni. Chu kawngte takte chuan a pindan bul chiaha pindan kha a pawh a ni. Mahse, chuti maia han luh ruk chi a ni lo maithei. 

Chhuah chhohna kawngka te takte a pawh ta a. A han nem chho a, a sak viau. An hawn lohna a rei tawh bawk nen. Carpet an phah hnan em a hre chiah lo thung. A theihtawpa nem leh vakin a kau ta hret a. Thawm erawh a hre tawh rih lo. A tha neihte sawmkhawm lehin a nam leh tang tang a. Tlemin a kau zau ve ta deuh e. A lu chu a leng awm e. A beng chu a chhi vang vang a, Ramsa ngur thawm chu room pakhat atanga lo chhuak a ni tih a hre thei ta phawt. Zawi zawiin a chhuak chho a. Study roomah a chuang chhuak. Zimte mai a ni a, lehkhabu a intiang urh mai. Chhuahna kawngka chu a hawng a, a ep chiah rooma thawm lo chhuak chu ngaichang ran chungin dim tein a pan ta hriau hriau a. Kawngka erawh a inkalh. An tawng ri erawh a hre thei ta. A rin ang ngeiin ramsa kha Pu Liana chu a ni. A fanu tawng thawm erawh a hre ve lo. 

"In thawk zo tep tawh e. Vawi khat che chhuak leh u la, tichuan a tawk thei mai ang. Chuan i zalen tawh ang" tih thawm chu a ngaithla khiau a. Tu aw nge tih a hai lo. Pu Liana aw ngei mai chuan, "Mahse, ani hi ka fanu a ni lo tiraw?  Chu chauh chu sawi la i hna chu ka thawk vek ang" a ti a. 

"Aw i fanu a ni lo. Tu fanu nge tih chu kei leh Dr Gos chauh in kan hria. Ani lah a thi tawh bawk si. Hotu sang zawk ten an hriat rualin kei pawh mjn hling ngei ang.. Mahse, a hun takah i rawn lang ta hlauh a; a lawmawm e.  Ka tum ang khan kan la kal zel ang. Inthlan boruak zo se, kei hian rorelna fawng ka vuan tawh ang a. Nang pawh ka thlah zalen tawh ang che. Tin, Zochhingpuii pawn a hna a thawk anga, Emy erawh a bo tawh ang" a ti ta a. Emy chu a lo insehruh teuh. Mak a ti bawk. A thu hriat chuan a thawng a, mahse, hamhaih vanga boruak siam erawh a tum lo. Zochhingpuii chu Pu Liana fa a ni lo maw?  Anih pu Liana bula mi sawn eng nge a tum? Eng thilah nge ruahmanna a siam a, Pu Liana chu engtin nge a thuhnuaiah a dah theih? Engkim chu a buai vek. Phiarrukna leh inbumna chuan hmun a va luah thuk sawt em.. Pu Liana chuan, "Khawngaihin min chiu tawh rawh. Ka chau a ni" a ti zuai raih a. An inchiu a ni ngei ang. An reh vang vanv mai. Emy pawh a hriat tur chin hre tain a inhria a niang e. Thawm dim takin a pindanah a lut leh ta a. 

Eng nge a tih tak ang aw.. Pawn lamah a chhuak thei rih si lo. Zoliansanga a be mai dawn nge ani han hnuhluh ve zel chu tha a ti bawk si lo. Amah ngei pawhin a hriat loh a fanu pa chu hriat a tum ruh hle. Pu Liana a ni lo chu lawmna riau a nei. Chutih rualin Pu Liana pawh thununna hnuaiah a awm ve tho tih a hriat chuan mak a ti. Khang kum kalta chhung zawnga khungbo anih lai khan remruatna fel tak an lo nei tawh a ni maithei. Heti chen chen a la dam thei te hi.. Lucifera tirhkoh a nih vang ngawt chu a ni lo vang. 

A tukah Emy chuan chairman biain chhuah a dil ta a. Chairman pawh chuan a lo phalsak ve mai. Mahse, building pawn lama kal erawh Pu Zira lak atanga la him lo va a hriatsak vangin a phalsak rih lo va. Building chhungah chauh veivah phalsak a ni. Zochhingpuii hmuh a duh a, chu erawh a tan a khirh hle ang. Valtea tal be thei se aw.. A pindanah chuan a vei a vei a. Thutlukna siam niawm takin a chhuak leh nulh a. Pu Liana awmna pindan lam chu a pan ta a. Kawgka a kik a, a reh vung vung mai. Vawi tak fe a kik hnuah a rawn hawng ta hram a. A hmel a phelh phang mai. Mut a hmu tha vak lo tih a lang thei. 

"Eng nge? " a lo ti hû a. 

"Thu pawimawh tak sawi dun tur kan nei a ni. " Emy chuan kawngka chu a kalh zui nghal hmak. Pu Liana pawh chuan makti hmel a pu hran lo. 

Hahdam hmel deuha thu chungin, "Ka fanu DNA test ka duh a" Emy chuan a ti ta a. Pu Liana erawh chu thu kher chuan a thawng deuh nge a thu ngil zawt mai. 

"Eng.. Engvangin maw? " a ti bah nak a. 

"A chhan chu a pa i nih ka ring lo a ni. Engvanga ring lo nge ka nih tih erawh min zawt suh" a lo ti hmiah. 

"I tithei lo.. Emy.. I kawng dal tur an tam lutuk tlat" A lo ti chuai raih mai. 

Emy chu a ding chhuak a, "Engvanga thup tlat nge i nih?  Thil thleng zawng zawng hi ka hre tawh alawm.. Thunun mek i ni tih leh an hmanrua ve mai i ni tih hi.. A dik em? " a ti ta salh salh a. 

"Ni e.. Ni e, ka chak tawh lo a ni. Tumah hian thudik in hre si lo va, I fanu pawh hi venhim ka tum hram hram zawk a ni. Engkim ka tel vena anga langah khan nawrluihna leh tihluihna a tel vek. Ramsa nih hi ka duh bik lo asin.. Emy" Pu Liana awrwl chu a khawngaihthlak kher mai. 

Emy chuan ding khawng lah chungin, "Nang pawn Zochhingpuii pa chu i hre bik lo maw? " a ti sap a. 

Pu Liana chuan a lu thin nghut pahin, "Hre lo takzet. Zochhingpuii pa ka ni lo tih hi nau i hrin zan khan ka hre chiah. Mahse, a pa erawh ka hre bik lo. Kha ka thuhriat vang khan khungbo ka ni ta reng a. Rei tak pindan thimah khung ka ni a. Ramsaa min siamtu ten sa hel hmangin min chawm thin. Ka la dam ve reng hi mak i ti tiraw?  Damdawi chak tak an hmang a ni.. Keipawn chu damdawi chu eng nge anih ka hre bik lo. Khatia Lycantropy virus hmanga khawvel hneh tum anga ka lan lai khan thunun ka ni asin. Ka duh bik renh reng lo. Ka thluak an su a, thlarau ka biak theihna hmang tangkaiin an duh an ti thin. Kei chu an chhiahhlawh rinawm tak ka ni a nih ber chu" A ti ta a. Emy pawn lainat hmel takin a lo melh ve reng ringawt. Thil hi a va buaichuar tak em. 

"Kan thawh dun a ngai anih chu" Emy chuan a ti ta a. 

"Engtin? "

"An duh angin an hna chu thawk la, keiin Zochhingpuii pa hriat chhuah ka tum ang. Tin, i beng leh mit hmang tangkai bawk ang che. I zalen theihna tur kawng kan dap bawk ang. Kan target ber erawh Zochhingpuii chhanchhuah a ni" Emy chuan a ti fiah ta kâk a. 

"Mahse, inthlan hi a zo anga, an tum angin rorelna an thunun tawh dawn. Chutah chuan i fanu hi khawl ang maiin hmanruaah an hmang tawh ang. Lucifera tan an hlan dawn. Chutih hunah chuan, Zochhingpuii hian tu nge i nih a hre tawh lo vang, Râwng takin ro a rel ang a, thiltihtheihna a neih tawh dawn vangin tuman a kawng an dal ngam lo vang. Mahse, ani pawh hmuh theih loh hruihrual hmanga phuar a ni reng tho ang" Pu Liana chuan a ti ta hmiah hmiah a. Emy chu a chhing sawk. Zochhingpuii chu engvanga duh leh hman tangkai tum em em nge an nih le?  Hmeichhe naupang mai a ni si a. Mahse, tunah chuan Ramsaah an siam tawh tih a hria, a taksaa virus saw lakchhuah a nih theih chuan chance chu la awmin a hria. Hmeichhe dang tam tak an awm laia Zochhingpuii kher an thlang chu chhan a awm a ring a, chu chu a pa nihna nen pawh a inthlunzawm ngei ang. A hma kha chuan Pu Liana, an societya thuneihna kengkawhtu fanu angah a ngai a, Amah Pu Liana tum dan leh ruahmanna te a hriat avangin chhan chhuah a tum mai chauh kha a ni a. Tunah phei chuan a khirh telh telh tawh, chhanchhuah a ngai nasa zual zawk. He a fanu nihnaah hian eng thuruk dang nge la inzep cheu ang le?  A buai ta map mai. 

Pu Liana nen inremsiamna felfai tak an thlun ruk hnuah a pindan lam a pan leh ta a. Zochhingpuii chu khaw nge an dah a hre lo. Pu Zira hian heng thuruk hi a hre ve ang em?  Mi dang pawh hian an hre ve ang em? Pu Liana fanu angah an la ngai vek ang em? Dr Gosa khan engvangin nge a lakah a zep.. A sawi ngam loh khawpa rapthlak a ni zawk em ni ang?  Chhuat dungah a vei a vei a, a hui leh pap thin. A nun kawng bumboh leh hahchawlhna awm reng reng lo chu thihsan daih a chak fô. Mahse, a fanu vang chauhin dam a la duh a ni. Tunah phei chuan a fanu ngei chu a a thluak an ruksak tawh tih a hai lo. Pu Liana chaldara silai a lekkawh laia Pu Liana thih ai pawh thi ngam a fanu kha a fanu a ni tawh lo. Heng zawng zawnga bultumtu, remruattu leh ruahmanna siamtu hi a dahbo thei ang em?  A ngaihtuah zawng ringawt pawn a khur thei. 

Zochhingpuii chu darthlalang hmaah dingin a inen vang vang a. Nui hmel a pu lo va, ngui hmel a pu chuang lo bawk. Nizanah khan a mutui lai chu mi pakhat hmel tha leh sang tha tak, ngaihnobei em emin rawn kai thoin, "Ka fanu, i lut thûk telh telh tawh ania. Thudik zawng chhuak rawh" a rawn ti anih kha. Kha mipa kha a la hmu ngai lo naa a bulah khan a ngaih a ngam a, a thla a muang huai huai mai. A rim lah a tui chèk mai si a. Eng thudik nge a zawn chhuah tur a hre lo. Tunah chuan a duh hun hunah ramsa a ni thei a, a thisen hmangin a duhna hmunah mi taksa hawhin a kal vel thei tih a hria. Thiltihtheihna mak tak a neih vang chuan nuam a ti chuang miah lo. Mihring taksa eia an thisen a dawt lai pawh khan a ngaihtuahna kil khat chu a la fim ve reng a. Mahse, tal chhuak turin a chak tawk tlat lo a ni. Emy a ngaihtuah a, ani khan apa kha thah a tum anih kha.. Engvang nge tih erawh a hre lo. 

Darthlalanga a thla chu a rawn nui sak a. Zoi chu a per dâwrh. A harh nghal zawk. Khur der der chungin a va inen leh a. Amah tho chu a rawn tawng chhuak ta mai. "Nangmahah khan ka awm a. Nangmah tho ka ni. Nangma ta kha i ni lo va, keima ta i ni..ka sawi ang apiang i zawm tur a ni" tiin. 

"Tu nge i nih.. " Zoi chuan a ti tuar. Darthlalang chu a chum zui bawk. "Awm mai mai teh. Lucifera chuan nangmah venghim turin min tir a ni. Nakin lawkah he society rorelna hi i la kenkawh dawn vangin" a rawn ti leh a. 

"Venhim ka ngai lo. Ka duh chu ka ti ve thei bawk" Zoi chuan a lo ti hmak a. Amah leh amah chu rum zetin a inmelh bawk. 

Chu a thla chu a nui hak a, "Nangmah ringawt chuan engmah i ni lo. I taksa tawmpuia ka thunun chinah che chuan mi chak tak i ni ta anih hi.. " a rawn ti a. 

"Aih.. Hei hi a thleng lo. Ka mumang anih hi.. zochhingpui,  harh rawh. Engmah a ni lo.. Engmah" Tiin Zoi chu a phun mawlh mawlh a. A lu a thing mat mat bawk. 

A thla bawk chuan, "Emy i that tur a ni.. Chu chu thupek hmasa ber a ni e" a ti ta a. Rapthlak ti em ema ding khur hlawk hlawk chungin darthlalanga a thla chu a kawk a, 'Ka ti lo vang ka ti ngai lo vang" a ti tuar tuar a. A sarak chiam lai chuan a pindan kawngka chu rawn inhawngin chairman a rawn lut a. A rawn pawmbet a. 

"Eng nge thleng? Hahdam rawh.. A tha vek e' a ti dam thlup a. Chairman awm nghenga tap chungin, "Keimah ka ni lo. Keimahah hian awm ve a awm" a ti a. Chairman mitmeng chu a danglam zawk. 

"Zoi, ngun takin ngaithla rawh. Hun khirh tak i hmachhawn mek a ni. Kum i tlin hun atan buatsaih lawk mek i ni. Thil tam tak i la tawng dawn chauh. Chhel takin i awm tur a ni. Huai leh hrangte hi hlau lo la,, huaisen takin hmachhawn rawh. A chhan chu heng huaite hi nakina i la thunun tur te an ni. Chumi atan chuan training pek i ni kal reng tin hrereng ang che" chairman chuan a ti ta dap dap a. 

"Mahse, ka duh lo. Chung thil chu ka duh ve lo. Nun pangngai chauh la duh. Aputea bula awma pangngai taka awm ve ka duh a ni" a lo ti a. A ngik faih faih bawk. 

Chairman chuan khal zet hian, "Chu chu i thei lo. I damchhungin Lucifera ta i ni tawh. I pensan thei tawh lo.. " a lo ti hmiah mai. 

Zoi chu chairman lak atanga tal chhuakin, "Ka ni lo. Ka thisen pawh ka la hlan ve lo.. " a ti ve ta sak a. 

"I thisen maw.. Oh!  Thisena inzawmna hi a pawimawh ber lo. I nuin a pai lai atang che khan i thisenah Lucifer thisen a bet tawh. Vohbik i ni a, nangmahah khan thiltihtheihna tam tak a awm.. Secret Society hi i la awp dawn a ni.. " Chairman chuan a ti a. 

"Aih, ka duh lo. Min tilui thei lo vang. Mi dang zawng mai rawh. Khawngaihin.. " a lo tihsan a. 

Chairman chu a nui hak, "Zan 13naah inhlanna tak tak chu a thleng ang. Chumi hma chu hahdam takin lo awm la, lo hahchawl ang che. ' a vawt ta raih a. Zochhingpuii a tim sung sung mai. 

Chairman chhuah hnu chuan hmanhmawh zetin kawngka chu a va pan a, mabse, pawn lamah a inkalh!  Ni e.. Hetah hian an tawmtir tlawk tlawk dawn anih hi. Ti nge maw a lo pian ve kher le.. Thiltihtheihna chu eng pawh nei se a duh lo. Nei miah lo va, a putea bula awm a thlang zawk. 

Chairman dawhkan hmaah Emy chu a thu ngil at a.

" Ka fanu chu ka kut ngeiin ka that thei dawn lo. Mi tu emaw ka mamawh a ni' a ti nghat a. 

"Emy, i thah kher hi a ngai lo maithei. Amah leh amah khu a intihlum duh maia rinna ka nei. A rilru a buai mek a ni. Tibuaitu leh chenchilhtu a nei chho tan a. " a lo ti a. 

"Chu chu Pu Liana thupek a ni em? " Emy chuan a lo ti vat a. 

"Ani ngei ang' Chairman chuan a lo ti nghut a. 

"Pu Liana hi a hmasa berah kan dah that a ngai dawn ani. Amah hian ka fanu chu a thunun tlat si a.. Kan thudang alai chuan, chairman, Naute kha engtin nge ni ta zel? ' Emy chuan a ti thut a. Chairman a hawi phawk deuh. 

"Ni tak.. Kan buai atalangin ka lo ngaihven hman lo deuh a. A tha turah ka ngai.. " a lo ti a. Emy a khi sak, "A that chu.. Ka fanu aiawh tur a ni si a. Enkawlna tha tak a dawn ngei ka beisei' a ti a. 

"I fanu chu nungdama awmtir i va tum hmel si ve" Chairman chuan a ti a. 

"Pu Liana ka dah that theih chuan ka la chhan chhuak hman ang.. " a lo ti vat a. 

"Aw le, a tha alawm.. I kutah a awm e. Ka dal lo vang che">, Chairman chuan a ti thliam a. Emy pawh a chhuak zui nghal. Chairman office kawngkhar bula ding chungin Emy chuan mitmeng nelawm loh zet hian, "Ka fanu chhanchhuak tur hian engpawh ka ti thei tih hi in la hrechiang tawk lo annih dawn hi.. Lo en rawh u' a ti zawi sap a. A kalsawn ta nghal a. 

Chairman chuan Emy chhuak chu melh zui chungin, "I fanu ngei hi i tan a hlauhawm tih i hre si lo" a ti zui sup bawk a. 

(Ka hman ta lo)