Thuruk 18

THURÛK.. (18)

Ziaktu : Toni Râte

Dr Zira chu bathlarah dakin a fanu thihna vanga a chhuak thei si lo, rilru hah tawngkhawng chu a hui pap pap a. Nizan lama thil thleng rapthlak tak avang lah khan awmngaihna a hre mang lo. Beiseia a be pawp thei lo lehzel bawk nen. A thin te chu a rim hlur tawh a. A fanu thihna avanga tlawmngaia rawn lengte pawh chu hnawk a ti ru hial tawh a ni. A nupui nen thutlukna an siam fel vek tawh. Thla khat a ral hunah a nupuiin a chhuahsan dawn. Ni e, neih reng theih a ni tlat lo. A ze dik tak a rawn lang telh telh a, a nupui tan chuan ramhuai ang mai a ni tawh a ni. Pi Hruaii nen erawh an inbe zeuh zeuh. A fapa awm loh thu leh a biak pawh theih loh thu a sawi ve tho va, ani pawh rilru hah ru zetin hun a hmang ve mek tho a ni. 

Nizan lama ramsa beihna niawm tak ruang an chhar khan Pu Zira chuan rin dan a nei thiam nghal. Pu Liana a chhuak tih a hriat atang khan he thil thleng tur hi a lo hmu lawk diam tawh a ni. Zochhingpuii chu a chân ta a nih hmel a. Amah ngei pawh paihthlak leh tihhlum a la ni maithei. An society a kehdarh lo anih pawhin rapthlak takin he zoramah hian lal an hrawt ang. Pu Liana hnuhthlak dan tur chu a ngaihtuah buai peih rih lo. A mi huat em em Emy thih thu chiah a hre duh. Beiseia lah thehmeh ang maiin a reh vung vung si. 

Hetih lai mek hian Zoram khawvel chu inthlanpui lo awm turah an inpuahchah mup mup reng a. Thla hnih lai chu la awm mah se; boruak a sosang hle. Pu Zamliana pawh a tei vut vut mai a, opposition hoin an huphurh ber kha a ni miau a. An party ah na na na chuan a vawk lal len tihtheih a ni. An party leader upa lam tawh hi paihthlak duh hle mah se, thuihhruai tam tak a neih miau avangin a dinhmun a phet zawk thei tih hriain zai a ngai hram hram a ni ber. Leader nihna chanvo chu a ta tur a nih lohna a hre bik lo va, tlin leh phak tawk niin a inhria. A dik bawk. Mi tam takin an leader ni turin an ît ve hle tih a inhre kar. Mahse, An leader hian sum leh pai a ngah a, sum hmanga thunun theih a tam zawk an la ni hi a pawi a ni. 

"Paa, I naute pawh an lo thleng tawh ania.. " an nuin a ti lâng lâng a. Campaign beihpui an thlak tan dawn a. Zaithiam rual nen, lam thiam thlengin. Thuihhruai a ngah angreng. A dinna tur bialah chuan tling saa ngaih a ni. A phone lo ri sek chu a chhang hman meuh lo, mahse, a rik zin em vangin a pawimawh anih ringin a la ta a. Hmeichhe aw tliang ral leh ngaihnobei zet hian, "Hello, ka pu.. Thil sawipui che ka va duh em" a rawn ti a. 

"Tunah chuan hei kan chhuak tep tawh a. A pawimawh viau loh chuan hun dangah a theih mai em? " a ti zung zung a. Therhlo ilo beisei vanga rawn tlawn leh an vote hralh tum hi an awm ve nawk reng a. 

"A pawimawh viau asin. Leader i nih theihna tur kawng a nia " a rawn ti ta a. Pu Zama chu a kalsawn vat, "Eng nge i sawi awmzia" a ti ta a. 

"Phone-a sawi vak chi a ni lo. Puih che kan duh a. Leader i nih chuan, i CM thei ngei dawnin a lang a. In party hi in chak zawk a rinawm si a. Chu chu a pawimawh viau ang chu tiraw" a rawn ti a. Pu Zama chu a khur deuh. A ruka a suangtuah leh duhthusam chu he nula nge nu a hriat ngai loh hian a rawn hmatheh tlat si. Risk lak ve te pawh thaa a hriat vangin, "Aw le.. Anih chuan khawiah nge kan inhmuh ang" a ti ta nge nge a. Inhmuhna hmun tur leh hunte an sawi zawh hnuin a dah ta a. 

"Naktuk atangin kan tan zawk dawn nia. Ka nuamsam tlat lo. Bakah thu pawimawh tak sawiho tur kan nei a.. " tiin a assistant chu a hrilh a. Tunah rih chuan tumah la sawipui a tum hran lo. Amah an beihna thang pawh a ni thei tlat. 

Sophia chuan a bula chairman thu chu awmze nei zeta melhin, "A fel thlup e. A harsa lo turah ka ngai. Leader chu Zonuni chuan a bitum a maw? " a ti sap a. 

"Umm.. A va hmu thei ang e maw le.. Document buaipuitu te khan eng chen nge an thlen tawh le? " Chairman chuan a lo ti a. 

"Ka la hre chiah lo. An kal thui tawhin ka ring. Mahse, Document fel fai lo chin chu an dah that ka ring a. An hlawhtling kher lo thei.. " Sophia chuan a lo ti zat a. Chairman chu a bu nghut. 

Sophia chhuah hnuah a inngaihtuah vang vang a. Eng ber nge a ka tih leh zel dawn a hre lo. Tunah chuan Zochhingpuii a chân tawh, chairman ni mah se; amah aia thu leh lal zawk a awm tawh tlat. Ngaihtiahna mawlmang lutuk hmanga mihring an rikrap leh an that hial kha a ngaithiam thei thlawt lo a ni. He thil chingfel tur hian phungbawm a mamawh. Emy a rilruah a rawn lang nghal a. Hre ve ta se, a fanu thiltih te hi… A â thei hial lawng maw.. Mahse, Pu Liana thunun thei tur awmchhun niin a hre si. A rilru a buai takzet a nj. 

Zochhingpuii muhil chu a rawn harh a, a rawl thûm mai. A dang a ro huam huam bawk. An thilhtih te kha a ngaihtuah let a. Inchhirna tlem chu nei mah se, a sawt tawh lo tih a hria. Tin,thisen tuina a pawh laklawh tawh a, eng emaw ta riauah a inngai bawk. A putea a ngaihtuah chhuak thut. Hre ve ta se.. A ngaihtuah thui ngam lo. 

"Naute, i tha em? " apa chuan a lo ti var a. 

"Umm.. Atea ka ngai a" a ti tham chhalh a. 

Pu Liana chu a ngawi vung vung. A fanu hmel tha zet chu melh vang vangin, "Zaninah i va hmu dawn nia" a ti ta sup a. Zoi a meng phawk nghal.. "Tak tak em" a ti chul a. Apa chu a lo bu nghut. Hlim zetin a tho a, inbual turin bathroomah a lut ta nghal a. 

"Emy, mi engzat chiah nge i thah tawh ang?  " Zoa chuan Emy nak belna chu a thara thlak pahin a ti a. 

Emy chuan inthlahrun hmel lek lek hian, "Ka hre chiah lo. Ruang chhar leh mahni intihlum tam zawk hi kan society kuthlakna deuh vek a ni. Ka tel vek lo naa tel vena erawh ka nei nual" a lo ti a. Awlsam taka sawi puat tura a insanmar nasatzia chu Zoa pawn a hai bik lo. 

Zoa phone a ri a, a pa a lo ni. Chanchin an inhrilh a ngai ve bawk a. "Bawiha, Emy kha ka lo bia ang chu' Apa chuan a rawn ti a. Emy chu a phone chu a pe nghal. 

. "aw chairman" a ti a. 

"I dam vat a ngai. Nizanah ruang pali lai chhar a ni a. Ramsa beihna niin an ngai vek.. Tichuan, ngaihdan i nei thiam em? " a rawn ti nghal bawrh bawrh a. 

"Ka taksa la dam fel loh vang nge engmah ka hrethiam lo' Emy chuan inngaihtuah buai hmel fe hian a ti a. 

"Zira kuta i awm hnu lawk khan Zochhingpuii chu a pa pindanah a lut a ni. Danny ka tir a, apa aiawh turin. Mahse, tihsual a awm aniang, apa nen Danny taksa an pawtsawm asin. Emy, Zoi hi kan chhanchhuah a ngai" Chairman aw-a manganna chu a thûk kher mai. Emy pawh a thu ngil zawt mai. A hlauh ruk thil chu a thleng ta ngei mai le.. Engtin nge a tih tak ang.. 

"Aw.. Ka dam ang. Naktukah rawn chhuah chhoh ka duh' a ti nghal hmiah reng a. Zoa chuan chîk zetin a lo melh thung. Phone a dah hnu chuan, "Eng nge thleng a? " Zoa chuan a lo ti a

"Thil pawi tak.. Engkim buaina" a lo ti chat chat. A hmel chu a ngui rawih bawk. 

"Enteh, ka lakah hian engmah zep nei tawh suh ka tih che kha" Zoa chuan zawldawh zetin a ti a. 

Emy chuan thil thlen dan chu a hrilh ta a. A chal a lo chuar nâng nâng mai. Sawrkar rawih Detective mahnise; Emy fanu chhuizuia man chu a hreh a ni. A chang chuan a inthiam lo thung. Hre reng sia a man mai lo chu. Emy tak pawh hi manna chhan tur a nei nual asin. Mahse, a thei lo. He hmeichhia hi a hum hram hram zawk zel kha a nia. 

"Eng nge tih i rilruk? " Zoa chuan a ti dam thlup a. 

"Kawng dang neiin ka inhre lo. Tunah a la tlai hma ngeia Pu Liana dah that hi ka kawng neihchhun a ni" Emy chuan a lo ti chang rât a. 

"Mahse, thil a tithei si a. I thei ang maw? " Zoa chuan ngaihtuah hmel fe hian a ti a. 

"Erica tal chu awm se, min pui thei ngei ang mawle" Emy chuan a ti ngui raih a. 

Zoa chuan a dar a lo san âk ringawt. Kha Erica kha a thîk lutuk tih a hre lo a ni ngei ang. Mahse, sawi lan kher chu tul a ti lo. Sangteii thih thu khan a thawng ve hle naa a ngaihtuah zui vak lo. A khawngaih rualin a dinhmun dik tak a hre lo ani bawk a, a nun a tibuai phak meuh lo. Mahse, Sangteii pa Pu Zira leh anu erawh a hua. An kawng dal chu a tum bur tawp. 

"Zo, lo piang ve lo law law ila a tha tur tiraw.. Engkim hi keimah vanga thleng vek a ni si a" Emy awin a rawn tih chuai raih chuan, a va pan hnai a. A lua chulin, "A ni lo. I lo piang lo vang tih hlau hi kan la awm ve bawk asin" a mita en chungin a ti sup a. Emy chuan zak hmelpu lek lek hian, "Min la hmangaih reng em ni? " a ti ta a. 

Zoa chu a nui a, "Ka hmangaih zo thei lo che hi ka inhaw hial thin" a ti thawp sat a. Emy lungphu chu a rang titih nghal. Khang kum chhung zanwga a thinlunga thi ngai lo Zoliansanga hi ani pawn a hmangaih tawp thei hleinem. Mipa dang bula mua nawmchenna hmanga a ngik nghar nghar lai paw'n Zoliansanga hmel a mithla thin anih kha. Mahse, Zoa tan a bawlhhlawlh mah mah tawh a. Kir leh thei niin a inhre lo a ni. A chang chuan Society saw chhe vekin nun thara bultan a chakin a suangtuah ve fô!  Mahse, chuti maia awlsama tihchhiat theih a ni tawh si lo. Khawvel ram danga an member ten an la rawn rikrap tho a ring. Amah phei chu hriat a hlawh zèk si a. 

A hmuia a rawn fawhna chuan a ngaihtiahna chu a rawn titawp nghal. Dimtein a lo chhang let ve a. Zoa fawhna chu a nawm dan a la ngai reng mai. A maimichhing vang vang a.. Zoa'n a nghawng vel a rawn chul dan dan chua,  a lo thaw hawk. Tunah chuan inpeih lo mah se; an thlen chinah ringawt pawh a lungawi tawk e. 

Zanriah an ei khamah Tv an en dun mai mai a. Dorothy in luah lama awm chu an tum ta lem lo anih hmel. A nu leh pa te biain Valtea chungchang a hrilh vek a. An hrethiam chiah lo naa duhthlanna nei thei a nia, an hnial teh tung lo. Mi lar a ni a, Mipa satliah, lar ve lem lo inah a cheng chu a ni ta mai si a. Mi ten hmuin hre ta se, social media lama a lar leh dan tur a hriatsa avangin tuma hmuh theih turin a chhuak duh lo. Valtea pawh a dawr a nghak rih lo. An in awm heuh heuh a ni ber. An inhne thei der lo lehnghal. 

Kawngka an rawn kik dat dat a. Valtea nen an inmelh tawn zak zak. Dory chu roomah a lut zauh a. Valtea chuan kawngka lam a pan thung. 

"Ate… awiii.. I dam em? " a rin loh lutuk a hmuh vang chuan a khawng lo chauh. A tunu duat em em chu a hmaah a ding reng si a. A hamhaih titih. 

In chhunga a lo luh hnu chuan, "Naute, engtin nge.. A van mak" a ti bah nak a. 

Zoi chu a nui har har, "Ka pain min rawn hruai alawm.. Ani erawh a rawn lut ve lo' a ti ta a. Valtea chuan tlu mai dawnin a inhria. A tunu chu a pa nen an inhmu tawh maw.. Anih chuan, tukin chanchinthara an puan ruang pali chhar kha.. Kareiii! 

"Maw.. I pa nen in inhmu tawh maw? " a aw chu duh aiin a ring. 

Zoi chuan, "Hmu e.. A fel. Min duat sia maw.. Chuan, a bula awm pawh a nuam lutuk asin" a ti a. Valtea mitmenga hlim lohna leh hlauhthawnna chu a hrethiam chiah lo anih hmel. 

"Chuan, i awm reng tawh dawn tiraw? " a lo ti a. 

"Aih, ka haw leh nghal ang. Sawtah tihtur a tam sia. Inthlan zawhah ka pa sawi danin Zoramah lalna kan chang tawh dawn a. Chutih hunah chuan zalen takin ka awm ve thei tawh ang" Zoi chuan a ti sar sar a. Valtea pawiti lutuk chu a tah te lam a chhuak. A tunu rilru hliam chu a duh bawk si lo. A ngai ve tawh bawk nen, a kuah ta hlu hlu a. 

"Ka ngai lutuk che asin. Chuan, inthlan boruak te hi reh se, villaah zuk kal ang aw. Pipi te thlan pawh kan tlawh ang chu" a ti a. 

Zoi chuan lunglen hmel deuhin, "Umm ka chak lutuk. Ka pain rem a tih chuan kan kal dawn nia" a ti a. Apa chuan a hneh tawh hle tih a lang. Chu chu Valtea thinlung tina tu a ni ta. A tunu chuan a hlat tial tial tih a hai si lo. 

. "e taka, Emy i hmu mial em? " Zoi chuan a ti thut a. 

'Aih, i hmu zawk lo em ni? " a lo ti hu a. 

"Hmu lo. Khaw nge a awm ang le.. Ka pa pawn a hmu duh asin" a ti niah niah a. Emy zawng awm se, a tunu hi an la chhanchhuak thei mahna le.. Zochhingpuii kal liam thlir zui vawng vawng chungin, "Emy, khaw nge maw i awm le.. Kan mamawh che asin" a ti sup a. 

Pu Zamliana chu a za sek a, mawnga hawlh ang mai a ni. Chhuanlam siamin in a chhuahsan thei hram. Hotel a thleng a, a mi hmuh tumin a nghah reng thu an lo sawi a. Room kawngka chu a kik dat dat a. Nula hleitling zet zawt, ngo sar mai, khumpui kaipui chakawm zet hian a lo welcome a. A nui mawi kher lehnghal. Pu Zama erawh pa fing tih takah a inveng ru ran thung. Heng mi te hian thang an kam thei tih a hre ve tlat. Khumah nula chu thuin ani erawh chairah a thu a. 

"Hun kan ngah tawk lo va. Ka sawi tan mawp mawp mai ang. Keini society hian nang ang pa fing leh vengva hi kan mamawh che a. Chuvanga puih che pawh duh kan ni. Tunah hian Leader Pu Muana document felfai lo chhuiin kan naute an thang mek a. Thil felhlel a awm anih chuan, tlangzarh a ni ngei ang. Mahse, i hriat angin inthlan dawn boruak a ni a. Tuman felfai lo chu an paipawn duh a rinawm loh. Ani pawh a inthen thianghlim fe a rinawm a. Han khin thlak theihna tur kawng kan bangbo viau. Sum hmangin mi tam tak ka a hupsak thei bawk nen.. 

Mahse, chak lohna pakhat erawh a nei ve a. Mipa zawng zawng tihtheih deuhthaw te chak lohna ang kha a nei ve tlat.. I hria ang nang pawn. Chu chu ania kan biak chhan che. Pu Muana sex scandal siam thei dinhmunah kan ding a. Ani saw paihthlak anih chuan nang hian a dinhmun i luah theih a rinawm ber a. Mahse, kan hnenah thu i tiam a ngai thung. Scandal ringawt a tawk zo lo thei, kan puihna i la mamawh dawn chauh. Sum leh paiah pawh puih i ngaih chuan kan pui thei che. Mahse, kan society a i lo luh ve a ngai thung ang. Lalna i chana CM dinhmun i luah hunah kan society duh dana rorelna i kalpui a ngai bawk ang. 

I pawm thei a nih chuan keini lam chu kan inpeih" Nula chuan a ti ta dap dap a. Pu Zama rilru erawh a buai ru kher mai. Heti ang offer tha lutuk hi hnawl phal chi nia a hriat loh laiin an society chu a la hmelhriat ngai loh a ni a. A tan nakin hunah buaina leh harsatna la thlentu a ni thei ang em? 

"Ka lawm e. A tha hle mai. Mahse, chumi hmain in society kalphung min hrilh thei ang em? " a ti ta a. 

Sophia chu a khi sak. "Kan society hi hmun tinah kan inchap darh tawh a. Zoramah erawh kan la inthukru ve deuh. Mi thiam leh thiltithei tam zawk hi kan member an ni. Zoram siamthata rorelna pakhat hmanga luanza hi kan pawl thil tum ber a ni e" a ti a. Pu Zama chuan a duhkhawp lo hle naa dilchhut chiam kha a inthlahrung tlat! 

"Zaninah ka lo ingaihtuah ang e. Naktukah thutlukna chu ka lo hrilh ang che" a ti ta a. Sophia a bu nghat. A rin aiin a awlsam dawn e. 

Pu Liana leh Chairman erawh an inhnial bap bap reng mai. Chairman chuan inthlan boruak hmang tangkaia rorelna kenkawh a duh laiin Pu Liana thung chuan rikrapna hmanga zoram thunun a support tlat si. A rilru kalhmang dik tawh lo lutuk chu chairman pawn mak a ti. 

"Ramsa hian ro an rel ve thei hleinem.. Zoram hi thihnain tuamin chhe vek se i duh anih chuan ti mawlh ang che. Chu chu kan kalphung a ni hek lo. Kan inthlang anga, Zamliana a CM anga, kan society chuan zalen takin ro kan rel thei tihna a ni mai.. " chairman chuan a ti ta khawl khawl a. Ramsa tia koh chu a lo duh vak lo nge Pu Liana mitmeng chu a ling hlar a. 

"He society-ah hian kei aia thunei leh thiltithei an awm lo tihah hian chiang phawt ang. Ka duh danin kan kal ang. Virus pawh thehdarh hun ka tihah in thehdarh ang. Thi phawk phawk se, kan tam anga, ram buai kan ni ang. Chutah tak chuan kan che ve chiah anga. A tam zawk hi an rawn tlan lut dawn.. Kan lo tuam hlawm anga, Zoram thar kan din tawh ang" A ti hluk hluk a. Chairman erawh a ner saawk. Khawvel ram dangah pawh natna hrang hrang an thehdarh fô!  Mahse, khawvel hi a lo hausa ve tawh khawp a. An inenkawl dam ve leh thei zel a, an duh angin New World Order an la nei thei ta chuang lo anih hi. One government phei chu a la hnai lo nasa… tunah hian virus chi khat, Coronavirus tia an sawi chu buaipui leh mek a ni a. China ram atanga thehdarh tura ruahman a ni nghe nghe. An release na hmasa ber tur khawpui pakhat erawh an vanduai deuh maithei. Thi an awm nual dawn si a. Mahse, china mihring tamzia chu hriat a ni a. An hruaitu lawk zual, Society member te khian chu chu pawi an ti lem lo. Chu virus chuan khawvel a fang chhuak ngei ngei tur a ni tih chu an thutawp a ni tawp. Mahse, tunah siam fel a la ni lo va, ruahmanna kalpui a la ni chauh. An rin aia hmain a thleng thei a, kum sangbi tharah daih pawh a thleng thei.. 

"Emy, ti lui lo mai teh khati chung chuan engmah i ti thei dawn chuang lo" Zoa chuan Emy bai sauh sauh chu a va dawm a. Tumruh zetin hmalam a bih ngar mai. 

"Ni lo. Ka kal a ngai. Zo, ka chhan chhuah a ngai. Ka thi emaw ka dam emaw ka fanu saw ramsa ka nihtir thei lo a ni" a ti fiak thak a. Zoa tan tak pawh tihngaihna a vang angreng. 

Luhlul tak hmeichhia a ni miau si a. An in phur chhuak ta nge nge kha a nia. Emy chu a in luah lamah a haw leh phawt. A tlawh lo rei tawh a. A ngaibtuah ve deuh bawk nen. Zoa pawh an in lamah a let ve ta. Anu a lo awm a. Sangteii thih thu bakah thu tam tak a lo chham khum chiam mai. Mahni lo maha rilru buai sa tawh nak alaiin, "Ka nu, duhtawk rih teh. Ka chau ania. Hahchawlh ka duh" a ti hrâwk a. A roomah a lut zui hmiah. Eng nge a tih zel ang tih a hrethiam lo. Emy chu puih a duh, mahse, a phal tlat si lo. A inhnamhnawih ve chu a duh lo bur.. 

Nilengin Emy chu a chawl hahdam ti ila a ngaihtuahna a sawrbing a. Thei leh thei lo vin exer te a la thul. A rilruah mi pakhat chiah a awm. Zochhingpuii.. 

Zan dar 8 a ri chiah tihin Society buildingah a lut a. An lo melh hrek hrek. A bo rei ve bawk a tin ni. Chairman office a pan nghal. A lo awm lo. Bunkerah a kal anih a ring. Chu lam pan chuan a chhuk ve nghal a. 

Kawngka chu a pawt a, a lo inkalh lo. A luh chuan thinrim inhnial thawm a hre zui nghal. An thu ngai bawk Zoram awh beh dan turah an lo inhnial leh hlak hlak mai. An bulah Zochhingpuii chu hahdam hmel zetin a lo thu bawk. Emy chuan a aw a thian a. An lo hawi rual thap. Mak ti zetin an ding suau bawk. 

"Emy.. Khaw nge i awm daih.. Ka ngaihtuah lutuk che asin" Zoi chuan a ti nghal var. A rawn pan bawk. Emy chuan a lo kuah thlawp a, "I nu ka ni a. Ka kalsan hlen thei hleinem che " a hmaa mi pahnih dingte melh chung chuan a ti a. 

"A tha e.. Emy, i lo lang a. Kan kim ta chiah e. Rorelna kenkawh dan tur kan sawi mek a ni. Min thlawp ngei ka beisei. " Pu Liana chuan a lo ti a. 

"Eng nge i ruahmanna " Emy chuan thu chungin a ti a. 

Pu Liana chuan a sawi zung zung. A ngaihtuahna mawlmang leh nunrawng zet chuan Emy tha a tikhur thei. A fanu chu hman tangkai a tum takzet mai le.. A tihtir hauh lo vang. 

"Heta ka rawn let leh chhan chu ka fanu hi hmeichhe pangngaia siam leh turin a ni. Ramsa ni lo vin" Emy chuan a ti vawt ta raih a. Boruak chu a ngawi dûk mai. 

Mahse, Zoi chuan din hluai pahin, "Emy, tunah chuan ka pa nena ramsa nih hi ka thlang rih zawk a ni" a ti ta a. Emy a chhing sawk. A thinlung natzia chu tuman an hrethiam lo vang. 

"I fanu hi i ta a ni tawh lo.. Ka ta chauh a ni. Tihtheih i nei tawh lo.. Emy " Pu Liana aw ri chu râp zetin a lo ngaithla a. A in seh ruh bawk. 

"Anih chuan, ka kawng neih chhun ka tih mai a ngai dawn anih chu.. " tiin zawi muangin a ding a. A kawnga a pai ruk revolver chu phawrhin Pu Liana chal darah tak chuan a tin ta vang a. Tupawh chu an hamhaih vek.. Chuti ang ema Emy a hmanhmawh chu Chairman pawh chuan a ring phak bik lo. 

"Emy, ti miah suh. I tih vaih chuan ka that ang che" Zochhingpuii aw fiak thak chu a rawn ri zui bghal a. Pu Liana hmaah tak a rawn zing zui zat bawk. Zoi phena pu Liana mitmeng verther zet chu a de sar sar mai. 

"Khawngaihin kal sawn rawh. He ramhuaipa hi ka dah that a ngai.. Engkim i la hrethiam mai ang" Emy chuan a ti sap a. Zoi erawh khawng takin a ding at thung. 

Emy chuan a silai cheng chu a kau rap a.. Mitmeng fim káka Pu Liana zawk melh chungin, "Ka fanu hi ka ta chauh a ni.. Ka ta chauh, tunah erawh ka fanu vang chauhin i nunna ka zuah ang. Mahse,i thil tum tihlawhtling tura ke i pen vaih chuan.. Ka thihchilh ang che" a ti ta hmiah mai. A silai a dah thla a. Ngawi rengin a chhuak. Chairmanin a umzui vat. 

"Ngaihtuahna fim i la hmang thei lo tih a lang reng. Engvanga hmanhmawh em em nge i nih? Emy, i thiltih kha a hun lo.. a hun hlawl lo. Ti kha chuan an pafain an target tawh ang che. Chetna hun i nei leh tawh ngai lo vang" Chairman chuan a ti bawrh bawrh a. 

Emy chu a nui hak, "Thah kha ka tum tak tak hleinem. Ka fanu hi chhanchhuah tlak a la ni nge ni lo tih ka fiah mai a ni. Ka hre ta bawk. Zochhingpuii saw chhanchhuah tlak a awm tawh lo. Ka that dawn a ni. An pafa sawn" A mitmeng vawt zetah chuan tumruhna leh thinrimna a alh phat phat mai. Chairman chuan Emy chu hrilhhai takin a melh ta ngawih ngawih a… 

(Writer dang nen khaikhin ka duh lo ania. Tumah ka tluk ve lo tih ka hria. Toni ka ni ve tawp tihah hian chiang tlang ila a tha mai e.. Hman atanga vawiin thlengin Toni ka la ni ngat ngat aw 😂😘😍