Thuruk 17

THURÛK… (17)

Ziaktu : Toni Râte

"Lalpa leh!  Eng thil nge thleng hi.. Ka duh thei lo.. Ni lo" Sangteii nu chu a rak tuar tuar a, an awmpuinu a rawn tlan lut ve nghal. Ani pawh a rak ve nghal tuar tuar mai. An pa ber a awm si lo, an thawm vangin thenawm khawveng an rawn lut nghal a. Ama room, ceiling fana lo inkhai reng Sangteii, nunna nei tawh lo tih hriat zeta meng kuau chu an han hmu ta a. Tupawn mak an ti!  Rang takin apa an call nghal a, Pu Zira pawh a thawng ve khawp ang le. Snagteii ruang chu an la thla a, a thihna a rei tawh hmel, a khawng vek tawh. Anu chu a thidang titih a, an bawihsawm nak nak bawk. Pu Zira a rawn thleng a, a fanuin a ma nunna ngei a la chu a rin phak piah lam a ni ve. Mahse, a intipachang thei khawp mai. Sangteii nu chu a lo harh tan a, a pasal hmel a hmuh rual chuan, sehchilh nawk nawk hian, "Nangmah vang a nih hi. Nang ramhuaipa vang hian ka fanu in a nunna a lak phah a nih hi. A duh loh thleng thlengin i nawr a, i duh ang a tih loh chuan i vau reng bawk a. Mateii khan nun nuamin a hun a hmang ngai lo.. Nangmah vang hian. Thi rawh.. Zawnga, thi ve nghal rawh " a ti ta phiar phiar mai le.. Mi dang an awm ve tih a hre lo a ni lo, tumah a pawisa zo tawh lo a ni. A pasal leh Dr Ramhluna nupuite hian eng thil emaw an buaipui tih a hria, eng nge a nih chiah a hre lo. A fanu an nawrluih chhan pawh an thil tih na behbawm vek a nih a ring bawk. Ni e, an nufa hian an rethei rei tawh bawk a, a fanu chuan a tlin ta ngang lo a ni e. Apa ngeiin Zoliansanga luhkhunga nei lui turin tap zawih zawih chungin a tir a; Zoa lah a lo chhuak bo daih si. Mi pangngai tiha mawi lo thil tam tak a ti tawh a, a tlin ta ngang lo aning e. A fanu tan chuan thih chu a nuam zawk hial ta ve ang. 

Pu Zira pawh a kal thui ta mah mah niin a inhre ve hial!  Mahse, tunah phei chuan ti lo thei lo dinhmunah a ding mek tawh zawk. A bansan thei tawh lo. A fanu thih thuin a rawn den hma lawk khan, Zochhingpuii leh a pa in Society-ah thuneihna an kenkawh tur thu a hria a nih kha. Kha pawh khan a thawn tawh tehlul nen, a fanu ngei chu a inawkhlum ta si. Emy lah zawn a la ngai bawk. Beiseina chhete erawh a la nei ve hram hram.. A kawng daltu apiang thah chimih a ni tawp mai. Beiseia'n a thawhsak theih a beisei. A mi rin em em Eric lahin a phatsan bawk si. A nun chu mumang ang mai a ni. 

"Zo, khaw nge kan awm?  " Emy chuan a ti sap a. A harh ve deuh tawh a. A nák veilam duk chur leh a malpui dinglam sir hliam chuan a la tur deuh tih mai loh chu a dang chu a tuar thei viau. A lum nasa em a, chhuntu a pui kha a ngah bawk si nen. Chauhpui loh chi a ni lo. 

"Ka thianpa te huanah kan awm.. Mahse, kan him lo. Min vil rengtu an awm" Zoa chuan mitmeng fing zeta melh chungin a lo ti a. 

"Beiseia te an nih dawn chu.. Dah that an hun tawh hle a ni" Emy chuan a lo ti chang rât a. 

"Emy, kei chu ka bo telh telh. Ka hriat ve loh thil i palhnawk tam lutuk a, ka inbat tâng laklawh ve si.. Ka buai mek a ni" Zoa chuan helhkam nei tih hriat zet hian a ti ta hlawl a. Emy pawn a hrethiam. Zoa kher a va tawng hi a vanduai nge vannei pawh a hrethiam lo. Tunah chuan engkim phawrh mai a rilruk tawh a ni. A hriatchhuah hun a la awm dawn tho tho. 

Zoa nachhawkna pek chu a dawlh a, a thut dan a siamrem te te a. Muangchangin a hun tawn chu hmaih nei lo vin Zoliansanga chu a hrilh ta a. Zochhingpuii pa nen an mutdun zan atanga vawiin hun thlengin. Zoa hmel chu a changin a ngui a, a changin mak tihna hlirin a khat thul. A rin phak bak thuruk inthup a lo awm chuan a thawng tih piahlam a ni. Chung zawng zawng aia mak a la tih erawh a ma pa ngei a fawng vuantu a lo ni chu a ni. Anu leh Dr Zira ten a pa an phiarruk dan te thlenga hrilh a nih takah chuan a kut a hum ruh a, a thisen zam te chu a pawng tâwlh tâwlh mai. Emy paltlang thil chu a namai lo hle tih a hria. Chuti ang hmeichhia a lo nih vang a nih chu a hlatah a lo awm zel ni.. Mahse, a mah hlat zeltu Emy hian a hmangaih vang tih a chiang si.. 

"Emy,. Oh.. Hlupui, engkim hi a va mak ngai em.. Iluminati chu ka la hrethiam.. Lycantropy hmanga zoram thunun tum dan tak chu ka bo tlat!  " a lo ti hluai a. Emy chuan a chil a lem khawlh. 

"Pu Liana hian thlarau tam tak a thunun thei a, a rin dan chuan thih theih a inring lo bawk. Setana tirhkoh rinawm tak a nih vang pawh aniang. Ramsa anih tel dawn vangin warewolf tam tak khawi tela hlauhna hmanga mipui thunun theih a inring a nih ka ring ber. A thisen saw ka fanu thisenah a beh tlat avangin ka fanu pawh sawn thiltihtheihna a nei ve tlat a, a la hrechhuak tam lo mai pawh a.. Amah ka fanu ngei pawh saw ramsa a nih saw" rilru nat hmel zetin a lo ti a. An ngawi dun vang vang mai. 

An thlang mel chanve velah mi pahnihte chuan an hmanrua te an en fel mek a; "A nung chunga kan man theih ka ring chiah lo. " pakhat chuan a ti a. 

Beiseia chuan khik vur vur pahin, "A bialnu chu a thihchilh duh mai i ring em ni?  " a lo ti a. 

"Chupwwh a ni lo, a fit ve zekin ka ring" a lo ti a. 

"Hmanraw kawltu zawk kan nih hi" Beiseia chuan a lo ti a. An in check fel zawh chuan thawm dim takin huan lam chu an pan chho ta a. 

Society Headquaterah chuan Chairman officeah Pu Liana leh mi 7 in dawhkan chu an kil laih a. An hruaitupa rawn lang thut leh a la tar mang hauh lo chu mak an ti tlang viau. Khungbo a nihna hun kha thangkhat lian zet a ni tawh a. A lo awm tharte phei chuan an hre lo hial. A thih tawh ring an awm nawk bawk. Mahse, engtin chiah nge a damkhawchhuah theih tih chu amah Pu Liana chauh chuan a hria ang chu.. Chairman pawh a meng hniam raih a, a rilru buai mup mup chu tihkian dan a hre si lo. 

Pu Liana chuan fiak thak hian, "Kan hna hi duh aiin kan thawk chak lo tlat. Ka awmbo hlana in hmasawnna hi a nep lutuk a ni. Ram hruaitu zawng zanwg in hip luh tawh ka lo ring a nia. Tunah Home Minister leh CM ber in la hmaih tlat hi ka hrethiam lo. A behbawm ho hi chu an tangkai nep.. Tunah chuan ka duh dan angin kan kal tawh ang. Naktukah Thingtlang lama kan unaute hnenah thu thawn chhuak nghal ula, An lo inralrin theih nan. 

Ramsa kan chhuah ang.. A tam thei ang ber kan that tur a ni. Kei leh ka fanu erawh kan la chhuak lo vang. Police leh sawrkar lu kan tihhai lai takin Virus kan thehdarh ang a. Ram buai kan ni nghal a ni mai. Kil tin kil tang ngaihtuah hman kan ni tawh lo. Ram a buaia ei leh bara kan tlak chhiat hunah chiah lalna leh thuneihna chu kan chang ang.. Sawrkar kan paihthlak theihna chance tha ber a nih dawn vangin.. Ènna ram chu thim lalna ramah kan siam tawh ang.. Luci leh a tirhkoh ten kan ram hi an luah tawh ang.. " a ti ta hmiah hmiah a. 

A bul chiah thu Pu Dinga a rawn ding chhuak hluai, "Ka hnial e. Ka zah viau na che a, i sawi. zawng zanwg kha naupang rilru la hmang thiam lo te sawi awm tawk lek a ni e. I ngai awlsam mah mah. Chuti maia hneh chi a ni lo. Zawi zawia muangchanga hneh chi a ni. Ngaihtuah rawh, khawvel ram ropui tak taka kan mi leh sa, keini aia thiltithei leh fing, hausa leh remhre zawk ten an nghah rei tawhzia khu.. A ruk thei ang berin an la kal zel zawk a ni. Kei ni pawn ram chu kan la tam ve tawk tawh bawk, mahse, chuti maia sawrkar paihthlak chu a awlsam lo vang.. Ka pu, pawi i tih loh chuan kha aia remruatna fing zawk kha kan ngaichang e" a rawn ti ta hmiah mai le.. Pu Liana thinrim meng ling hlar chu a hlauhawm khawp mai. Ni e, setana tirhkoh kha a ni mai a, khawvel thiamna lamah a sang falua lo. A thisena ramsa thisen tel ve avang chuan engkim tithei emaw. a inti a ni mahna. Chu chu thil mak pawh va ni suh. 

Mi dang ho pawh chuan Pu Dinga chu an lo thlawp ve tliar tliar mai si. Pu Liana chu a thinrim takzet. Dawhkan a chum bur a. "Anih chuan he ramah hian engtikah nge lal ram thar kan din ang? " a ti chang fak a. 

Chairman chuan zawi sapin, "Kan din reng tawh alawm.. Mi thiltithei leh mi lian tam zawk hi kan mi leh sa an ni. Kan chhinchhiahna nei vek an ni. I hmanhmawh lu deuh a ni. Khawvel ram dang te pawh kan ngaichang ve tur alawm.. Chu chu Luci duhdan pawh a ni zawk ang" a lo ti a. Pu Liana pawh a ngawi ve vung. Vung mai. A inkhungbo rei tawh a, a hmanhmawh khu ruai ve bawk a ni. Bakah a inhmu lian mah mah. Amah aia thiltithei an awm tawh maithei a ni. 

"Aw le, a tha alawm.. Anih chuan Dr Zira thil tih dan tenawm tak hi eng tia tih chi nge ni dawn.. Society tan mi rinawm tak kha a ni thin si a" a ti ve ta a. 

Pu Hruaia chuan, "Ni e. Zira hi ka rin phak bakin thil a kalpui thui tlat. Tunah hian society hi thuang hnihin kan kal tlat a ni. Emy a kawl mek bawk" a lo ti chat chat a. 

"Keimah min paihthlaka ka dinhmun luaha amahin Zoram thunun kha a tum ber a ni a. Zochhingpuii hmanga engkim thunun vek kha a tum a ni. Mahse, a tlawlh ta si a, tum ruk zawng a la nei khawp ang.. Ka buaina ber chu pawnlam mite ai in kan society chhungah ngei buaina chhuakin pawnlam mite hriat loh theih lohin kan inphawrh mualpho ang tih hi.. " Chairman chuan a lo ti ban chhalh a. 

Pu Liana chuan, "Aw le.. Anih chuan Zira chu kan dah that a ngai anih chu. Awm lo se kan him a ni mai. Amah bakah a thuihruai zawng zawng kan nuai chimit ang" a lo ti leh hmanhmawh a. 

"Ka pu, chu chu thil tha tak anga lang tih chi miah si loh a ni. Zira hi kan ngaih ang ngawt aiin a lo fing ve thei tlat. Invenna tur eng emaw tal a neih ka ring. Tin, nuai chimit ila, pawn lamah nghawng a nei lo thei dawn lo.. Kan buai chho anga. Society hi an rawn luhchilh hun a la awm ngei ang" Pu Lawma chuan dam dup hian a lo ti ve a. A sawi dik. 

In thahna chu a tawpkhawkah bak hman chi a ni tlat lo. Pawnlam mite mitmei ven a ngai tlat si a. 

Chairman  chuan, "Inthlan kan hmabak dawn a. Anih chuan chet vat kan ngai. Zonuni leh Sophia ten an hna tan rawh se. Kan target kha tun atanga belbul a ngai tawh ang. Tin, Pu Hruaia leh a hoten document lo chingfel bawk se " a ti ta a. Chu remruatna erawh chu an pawm tlang hle tih a hriat. An bu nghat nghat mai. 

Pi Hruaii chu a tûm bur mai. A fapa a call nasa tawh, a switch off tlat si. Sangteii thih thu pawh a hre ve lo aniang. Amah vanga thleng a ni lehnghal. An plan a flop ta zel chuan a tithinur hlur tawh a, engkim chuan a thin a tirim a ni ber mai. Plan an thlak a ngai dawn a nih hmel. Emy lah a tlanchhuak bawk si. An dinhmun a khirh sawt ta hle. An pa a lo haw a, Sangteii thihnaa a kal ve lo chu a lo vui khum a. Dam thlup hian, " Nang i va lang tho va,  a tawk mai alawm.. I hnem thiam ber ang chu, pu Zira te chu' Chairman chuan a lo ti mai a. Pi Hruaii sawi tur hre lo thinur bawk si chu a kal tau sawk sawk ringawt. 

Ni e, a pasal hi duh leh hmangaih taka a neih kha a ni ve ngei mai. Mahse, ani a pasal erawh chuan phuba lakna hmanrua a tan lek a lo hmang si a. An inneih atanga kum 5 vel thleng kha chuan an la hlim dun viau. Mahse, hun a liam zel a; a pasalin a thlim ta zauh zauh. A hnaah a buai a, in a uap lum hman meuh lo pawh tih tawh nak a laiin a hun awl ve angah pawh chhuanlam siamin a chhuak leh zel thin anih kha. An fate pawh hi apa hian a enkawlpui mang lo tihtheih a ni. A fate pawn an nel lo reng a. Zoa erawh hi chu mipa a lo ni bawk a, a pa chu a zah der thiam viau thung. Dr Zira a rawn lang a, an inthian that tawhna dinthar lehin Zira chuan a ruahmannnaah a pawtlut hret hret a, a nun khawharzia hriain a thiam thil a hmang hreh si lo. Zawi zawiin an inhneh chho ta a. A tawpah phei chuan uirena sualah an tlu dun ta hial anih kha.. 

Tuna an tum ber Chairman paihthlaka an pahniha rorelna kenkawh leh thuneihna neih chu a ni. Mahse, chung an ruahmanna te chu a fuh lo chho ta zel si a!  An kal zel dan tur chu Pu Zira kutah a awm ta. 

Valtea leh Dorothy pawh buai mam mam tak an ni. Emy a reh char char si, Society va luhchilh mai tumin an va kal a, mahse, tumah an luhtir duh lo. Boruak eng emaw tak chu a thleng tih an hrethiam. Emy awmna an zawt chawt a. A tu amahin an hrilh thei si lo. Zochhingpuii tal hmuh an dil a, chu phei chu phalsak an ni lo zual. Valtea thinthawkin police bula kalah a vau ta nghe nghe anih kha. 

Mahse, an inhnial buai lai takin chairman a rawn kal a, rawn ko hrangin, "Emy chu kan hmu leh mai ang. Lo mangang lutuk suh u. Zochhingpuii erawh a pa nen an inhmu tawh a. Tunah hian buaina kan tawk mek a ni. Inthiarfihlim rih zawk ula in tan pawh a tha zawk ang. Ka awm a, chinfel ka tum mek zel e. I tunu leh i unaunu te hi hi i hloh hlen miah lo vang. Police chu pur buai lo hram rawh. Police in an hriat rualin i tunu hi dinhmun derthawngah i dah nghal dawn ania.. Hre reng rawh" tiin a hrilh a nih kha. Dory'n a lo tuihnih ve bawk nen, nghah leh phawt chu a tum lui ve ta hram a nih kha. Mahse, a za sek a, awmngaihna pawh a hre mang lo. Dory pawh a ni ve tho. A programme zawng zawng a lo cancel vek tawh si a, mi dang hmuha in lar chhuah pawh thil tihchi nia a hriat loh vangin Valtea in lamah an tawm dun tlawj tlawk ringawt mai a ni. 

"Dr Bta ka call mai dawn em ni? Lo kal se, i hliam hi enkawl mai se ka va duh em.. " Zoa chuan Emy melh chungin a ti a. 

"Aih, call suh. Dr Bta hi i rin ang a ni lo ania. Dr Zira lamtang zinga inrawlh thuk tak a nih hi. Min bum chiang kher asin.. Keipawh hi. I pa chuan a hre tawh" Emy chuan a lo ti vat a. Ni e, Hmana Pu Zira cabina file a zawn tuma Pu Zira rawn luhpui kha Dr Bta a ni tlat!  He Society a zawm hma daih khan Zira hian a lo vehthlem hrep tawh a. Chairman leh mi dang bum nan tihluihna hmanga society zawm angin a lo awm mai mai zawk a ni. Mi tha tak emaw kan tihte pawh hian chak loh rukna an nei vek. Dr Zira pawn chu chu a hai lo, Bta hi mipat hmeichhiatna lama a sihhnipzia a lo hre daih tawh. An society doctor atana thlan a nih hma khan a lo rim fe tawh a, offer tha tak tak nen. Bta pawn aw a lo pawh daih tawh a ni. Chu chu Emy bawk hian a lo chhui chhuak leh diam tawh a ni. 

Zoa chu a ner sawk a. "Lehzel chuan, ngawi teh, ka rin loh deuh deuh hi Society member an nih ka ring ta tlat mai" a ti ta hial a. 

Emy pawh za vak lo va nuiin, "I rin phak bak mawle.. I bul hnai, i chhehvel ami te zinga a tam zawk hi kan ta an ni.. " a lo ti a. A nâk rawn na leh zawk thin avang chuan a ner leh sak thin. Zoa lah dam lo enkawlna lama talent nei lo ve zet a lo ni si. A ruka veh leh enthlak niin a inhre bawk si. A buai ru viau. 

A phone chu a on a, msg a lo thleng nghal zut zut.  Anu miscall nen. Msg pawh chu en ta chuang lo chuan apa a call ta nghal a. 

"Bawiha, i nu thin a ur hlur tawh mai. I ph tal chu off loh tur alawm" a rawn ti nghal. A inthiam lo ve lej lek. 

"Ka tihpalh lutuk.. Ka pa, thil pawimawh tak a thleng a, ka nu kha chu hrilh ve kher pawh a ngai lo vang. Jona te huanah khan ka awm a, chuan, ka bulah Emy a awm ve.. " a ti ta zung zung a. Chairman hmela maktihna chu a hmu thei lo thung. 

"Chuan"  a ti tawi tâk a. 

"Emy hian hliam a tuar a, enkawl a mamawh. Tin, amah umzui tu te hian tunah pawh min veh reng niin ka hria. Kan awmna hi a him lo, mahse, kan chhuah chuan min lo bitum mai ka ring si a" Zoa chuan a ti a. 

"Aw le.. A englai nge hliam tih lo sawi teh. Ka rawn kal mai a ngai dawn anih chu" Chairman chuan a ti ta a. Zoa chuan a sawi zung zung a. Phone chu an dah ta a. 

A fapa leh Emy an awm dun!  Chu chuan thil tam tak a ngaibtuahtir. Emy hliama a awm anih chuan a fapa chuan a chhan a zawt ngei ang. A hma zawng kha chuan Emy khan a zep ve char char thin a. Tunah a zep zo kher ang em?  A fapain a lo call mai danah khan engkim hre tawh te pawh a ang tlat. A hui pap a! A insiam zui nghal sawk sawk. A nupuiin a mitmei reng tih hre mah se; engmah hrilh a tum lo. Amah pawh hi Zira thuihhruaite chuan an lo kap thal tawp maithei. Emaw an lo hling mai thei bawk. Dr Bta lah an lamtang a ni si lo va, Doctor dang tirh mai tur a hre si lo. A hre teuh, mahse, a chhan hriat chaka za ruai tur vek an ni a, a ngam lo a ni zawk. A inkhalh chhuak leh ta chu a nia. 

Beiseia leh a thianpa chuan Thlam piah 28ft awm vela theihai leh serthlum kung bulah chuan thuin chetlak dan tur an rel mek a. 

"Va luhchilh tawp mai ila" a thianpa chuan a ti nang nang a. 

"Thil ngai awlsam viau zel suh. An lo inralring ru reng thei. Emy chu i hriat kha.. " a ti nghut a. Pu Zira biaka mi dang lo tirh belhtir mai tur em ni ang aw tih te a ngaihtuah hman. Mi 10 vel ni ta se chuan luhchilh mai pawh a ngamawm mahna. Chutia an inngaihtuah buai lai mek chuan Kawng chhak kawng atanga mi pakhat rawn chhuk thla nghauh nghauh hi an hmu ta a. Ngun lehzuala an han en chuan Chairman a ni tih an hre chawpchilh nghal. Beiseia a khi sak. A fuh dawn e. 

Chairman chuan Emy chu a han enkual vel a, a damdawi ken te chu hnawihin a sawngbawl a. A hliam thui ngai lai te chu thuisakin a theih ang angin a sawngbawl chho mawlh mawlh a. A rin aia a lo hliam nat vang chuan a khawngaih ru hle. Amah vang a nihna chen a awm miau si a. Nachhawkna chak chi a eitir bawk a. Emy pawh a zia huaiin a inhria. Zoa ringawt kha chuan tuiluma deh leh nachhawkna ei tir bak tihtheih a nei vak si lo va. Mahse, a bulah a thlamuang tih erawh a hria. 

An pathum chuan ro an rel ta mam mam a. Heta awm reng chu a him lo tih an hria. Bakah eitur an chhek khawl lem si lo. Zoa pawh kha reitak awm tura kal kha a ni lo ve bawk nen. Emy chu a in lama dah chi a ni lo phawt. Chairman ina kawl chi a ni hek lo. Anu venthawn a ngai dawn tlat!  Society-ah ama bunkerah khan tawmim leh ta zawk se.. Mahse, chairman chuan Emy hriat loha thil thlengte kha a la zep a, Emy hian hre ta in hmu ta se a tuar zo kher ang em? A intihlum duh hial mai lawng maw? Rilru chu buai duh mep mep tak a ni. 

Zira ten thah ngei tumin an veh reng bawk si. Police venhimna dil ngawt dawn se, thuruk a tam lutuk. Engpawhnise, a fapa chah ang khan silai leh eitur tlem a zawng a kensak chu ringin ni 3 vel chu hetah awm leh phawt se, veh rengtu te hian an luhchilh ngam bik an ring lo bawk a. Silai an nei ve tawh bawk a, tlem chuan an thlamuang ta bawk nen. Chairman chuan a hawnsan leh phawt dawn a ni. 

"Ka fanu enh nge a an? " Emy chuan chairman chu melhin a ti sap a. 

"A tha" tih chiah bak chhanna tur a hre lo. 

"Erica ve thung hi le" Emy chuan a ti leh a. 

Chairman chu a ngawi vang vang. 

"Zira te kutah a awm a" a ti zawi sup a. Emy a lo ner nâng. Erica chu amah vanga hreng ve an ni tih a chiang. Chhanchhuak thei dinhmunah a ding rih mawlh si lo. 

Chairman chuan a hriat chak leh amah mawlhtu chu zawh rawih mai a duh a, a hreh ve deuh bawk si. A tawi a tawi a, "Bawiha, Emy nen hian in lo sawi dun tawhin ka ring a.. Engkim i hria tiraw? " nuam tih loh hmel deuh hian a ti ta a

Zoa chuan, "Umm.. Engkim ka hria" a lo ti nghut a. Apa chu chhuahchhalh duh mah se; a hun lo tih a hriat vangin a sawi sei duh lem lo. Hun a la awm ngei ang chu. Chairman pawh chu haw turin a chhuak ta. Mahse, lo chang rengtu te pahnih silai kaw zawnah chuan a meng hniam ta raih mai. An rin aia thil thleng chu a ran vangin an hamhaih deuh. Silai erawh Zoa khan a thukru tawh a. In chhungah Beiseia leh a thianpa te chu an rawn lut a, an silai pawh an lek kang ve zel. Chairman chu a thaw hawk ringawt. Amah vanga a fapa pawisawi miah loin nunna a chân anih vaih chuan dam reng a tum bik ta lo. 

"Sava pathum.. Hehe.. Vawiin hi ka vannneih ni a nih dawn hi.. Aw le.. A tha e. Thu rawh u. Zuia, va phuar hlawm rawh le" Beiseia chuan ngeiawm zeta melh kual chungin a ti nghut nghut a. Emy chuan a huat hmel kher mai. 

"Keimah hi min that ula, an ni hi chu kaltir rawh u. Kei hi a ni lawm ni min duh ber" chairman chuan a ti a. 

"Ni mai lo ve.. An ni an dam ve chhung chuan kan pu ber saw thinthiin a muhil thei nang.. Inhmangaihna lantir hun pawh annih loh hi. Emy chiah a thi ang. Nang leh i fapa hi chuan damin kan pu in hmachhawn ang a, duhthlanna a siamsak che u ang a, i fapa avang hian i dinhmun chu i dah kham ngei ang" Beiseia chuan fiah zetinna ti a. 

Emy chu a va hnaih a, "Mihring dang zinga min bitum ve tawk i ni hi lawm hle rawh. Nangmah vang hian buaina ka tawk zing viau mai. Tunah chuan i thih a hun tawh.. I dam rei mah mah" tiin a silai chu Emy chaldar zawnah a lek kang ta a. Chairman leh Zoa chuan hlauthawng takin an lo thlir ngawt ngawt. Phuarbeh an nih tawh avangin chet ngaihna a wm si lo. Zoa chu a chhing sawk. A tawngtai ru hial mai. Emy chu thu mu titihin a la awm a, a saisir lek lek bawk. Ngawi rengin Beiseia mitah chuan a melh ve kal a, a kut veilam erawh rizai chhungah a la awm.. 

"Ti rawh" a ti sap a. Zoa a va melh zauh. A nui sak a. Beiseia thianpa erawh Zoabte pafa hmachhawn zawngin a ding a. Beiseia chuan a silai cheng chu a hmet kau ta.. 

Emy kut velilam a che zawk, Thil eng emaw ni a vir nghal zawk bawk. Beiseia chu a awp rawk a, chhuatah chuan thingthi titihin a silai chu a hmet puak hram. Mahse, Emy mutna bula pot chu a kehdarh chuai ringawt. A hrawk dinglama chemte bur vu chu a lehpui ta tual a. Beiseia thianpa hamhaih lah chet lawk nachang hre hek lo. Zoa chuan a ke chu vawrin a kapah na zetin a han tlawh ta a. A let tawp. Emy chu thei leh thei lo va rawn tho in Beiseia chu a pan ta chhat chhat a. A hnuk a la chat lo deuh naa a thaw hrâwp hrâwp mai. 

A hrawka chemte chu phawi pahin, "Chawl hahdam tawh rawh aw. I thawk tam tawk tawh alawm" Emy chuan a ti sap a. Beiseia thi tur chalchang mitmeng sen rûmah chuan na zetin a melh bawk. Beiseia chu a zal ta riai riai a. A thi ta. A thianpa erawh a la vial reng a. Emy chuan dimdawihna tel miah lo vin a hrawkah a zai puat. Chumi zawhah Zoa te pafa chu a phelh ta chauh a. 

Chhuna Apple an velna chemte kha dawhkanah a la awm a. Beiseia te an lo luh rual khan Emy chuan a lo la ru vat a lo ni. Emy nge nge… 

Ruang senghawi dan tur an sawi ho a. An thlang lawka kawrte bul zawlah chuan phum mai an titlu ta a ni. Police hrilh chi ni nghal lo chuan… chairman pawh a haw ta lawk lo. 

"Ka fanu, tunah chuan chawl hahdam rih rawh. Zanah kan chhuak dawn si a" tiin Pu Liana chuan Zochhingpuii lu ah chuanna chul a. Zoi pawh nui sáng chungin a bu nghat. Apa nen ni 2 zet an inbelbul ta a, a ngaina telh telh mai.. Apa chuan an kal zel dan tur a hrilh malh malh reng a. Zochhingpuii, tleirawl pawisawi lo kha tunah chuan a danglam vek tawh. Apa hnungzuia thuneihna neih chu a tum ber a ni rawh. A putea leh a nu te chu la hre ve bawk mah se; a chanvo hi a hloh phal lo. Tin, inrikrakna chu nuam tih riauna a nei tawh bawk. Chutiang mi ni tura piantir kha a ni miau alawm le.. 

Zan dar 10 a rik meuh chuan Pu Liana leh Zochhingpuii te chu Aizawl khawpui daifema bung lian tak pakhat hnuaiah an ding dun ran mai. Thli chu a thaw vûk vûk a. Thla lah a eng telh telh mai. Aizawl khawpui pe uar chu an thlir dun vang vang a. 

Pu Liana chuan, "I inpeih em? " a ti a. 

Zoi chu a bu nghat. Pu Liana chuan a fanu chu din hnaih sauhin, a nghawng var hai chu a  ha hriam hmel zet chuan a zuk dît ta hlawih a. Zoi a chhing sawk, a kut a hum ruh hle bawk. A na a ti a, mahse, a tuar thei ang. Thisen rawn chhuak chu Pu Liana chuan tui ti zetin a lo lem diak diak a. Minute tam a liam lo vang tihah Zoi hmel landan chu a rawn danglam chho ta. A ha chu a thang thut a, a hmui pawn lamah a rawn lawr ta vun mai. A mit pawh a sen rûm a, a kut leh ke tin te chu rawn thang in an zum tha hle bawk. A taksa chu a insangmar tial tial a, a kawr hakte chu a tet hawk hawk a, hmul khawng leh bit takin a taksa chu rawn tuam chhuakin a rum hraih a. Ramsa rapthlak leh lian tak a lo ni. Amah ang chiagin Pu Liana pawh chu a rawn danglam ve nghal a. An pahnih chuan ngur chhur chhur chungin Aizawl khawpui lam chu an pan ta hriau hriau a.. 

"Tukin dar 5:20 velah khan ruang pali lai chhar an ni a. Heng ruangte hi in hlat lo tak takah an lo awm a ni. An ruang hi hmuh tlak a ni mang lo va, nasa taka sawisak niin an taksa bung thenkhat te chu a darh nuaih bawk a ni. Pahnih hi hriat an ni tawh a. Pahnih erawh tu te nge an nih hriat a la ni lo. He tualthahna rapthlak tak hi Police lam ten investigation ti nghalin a thattu chhui nghal a ni. Rin dan hrang hrangah ramsa khawihna a nih rinna te pawh a awm.. He thil thleng hi Zorama la thleng ngai lo a ni a. A rapthlak hle".. Tih thu chuan Aizawl khawpui a tuam ta. Mipui an phili a, an thlabar hle bawk. 

Chairman chu hmanhmawh taka bunker lam panin pindan rûk chu a hawng a. Khur hlawk hlawk chungin, "Engvang nge.. Engtin nge he thil hi i tih theih?.. " tiin a hmaa lo thu chu a au khum ta chiam a. 

Pu Liana chu a ding a, room atanga a fanu lo chhuak mek chu melhin, "Bul kan tan chauh alawm.. A ni lawm ni naute" a ti zawi sup a. Zochhingpuii lo nui ver ver phèna a hmel danglam chu Chairman chuan râp zetin a lo thlir a…. 

(Muah vek u 😍