Thuruk 15

THURUK..! (15)

Ziaktu: Toni Ralte

Pindan kawngka chu a lo inhawng khap a. Dr Zira chuan nui sawng chungin, “Phatsantu chantawk chu a tawrh a nuam lem lo em?” a ti thar thar a. Eric chu chauh hmel zeta hawi chhuakin, “Ka lo la hrechiang lo hle che kha a mak! Emy chu i hloh leh ta hram a ni maw?” a lo ti let ve hmak. Pu Zira mitmeng chu a rum nghal ul a; “Nang hi chu ka kut ngeiin ka that ang che. Mahse, Emy kan hmuh hunah. Tikhan i thih hun tur nghakin khawhar takin lo awm rawh” a ti rum ul a. Eric chu a lo nui hak..”Thih hi ka hlau emaw i ti em ni? He pawla min hnim luh atang khan thi ang tluk ka ni tawh e” a lo ti a. Ngawi rengin Pu Zira chu a chhuak ta a. Eric chuan Emy chu a ngaihtuah ru hle. Emy an man tih a hriat veleh a va kal ve nghal a.  Chhanchhuah dan kawng a dap ru nghal, mahse, an lo tlan khalh hman vek. A chhan sawi tur awm lovin an khung hrang nghal tawp  mai a ni.

Chu chu pawi a ti lo. Emy a hmangaih vang lam ai mahin Zochhingpuii avanga Zoram khawvel, Pu Zira’n a awp ai chuan, amah Zochhingpuii pawh chu dam lo zawk se a duh hial tawh. Pu Zira thil tum zawng zawng hriatpuitu a ni si a. Emy chu khawiah nge a awm ang le?a him hram a beisei. Ani erawh dam khawchhuah inbeiseina a nei tawh lem lo. Thi pawh nise a hlau lo va, mahse, a thihna chuan rah tha chhuah hram se a duh takzet a ni.

Chairman chu a vei sek a, Emy a ngaihtuah takzet. Engmah ti thei lovin Zira ten a kut an phuar tlat si a. Va luhchhuah ve ngawt dawn se thi tluk a ni. Thahna chhan tur tha tak nei lo mah se; an that tho vang. Emy nen an dinhmun derthawn dan a inang reng, tunge rina tu nge rin loh tur lah a hrethiam tawh hek lo. Danny lah Zochhingpuii lo buaipui turin a ti ta ngawt kha a ni a. A chingfel thei em ang chu maw..a office atanga chhuakin bunker lam chu a pan thla ta a. A reh kher mai. Emy room pawh an suasam nasa bawk a, a hnawk niaih mai. An duh ber an hmu ta si lo va, an thinrim kher asin le..

Pindan ruk code chu a chhu mawlh mawlh a. Pindan hmasa ber thim zet leh rimchhe zet chu a kal tlang a, thir kawngkhar lo awm chu code hmang bawka hawngin a lut ta a. A thil hmuh chuana tiding chawt. 

Chhuatah chuan Danny chu taksa darh nuaihin a lo let reng mai. A ril te chu a chhuak pur a! A lu leh ataksa pawh a hrang nawlh mai. Luak lo turin a insum hram hram, a hamhaih pawh a la reh hman lo vang tihin a hnung atang chuan, zawi leh fiah zet si hian,” Chairman, khawiah nge Emy?” a rawn ti thum ta chher chher mai le..muangchangin a inher a, Zochhingpuii pa chu thisen kai nuan chungin a lo ding khawng reng mai. “Khawiah nge i fanu?” a ti ta a.

Chu pa chu a khi suk a. “Ngaihtuah suh. A tha..” a lo ti a. A sawi zo chiah tihin, bed room atang chuan Zochhingpuii a lo chhuak ta a. An pafa hian thil tha lo tak an ti tih a hre nghal.

“Heng thil hi eng nge a awmzia?” a tit ham tuak a. Zoi chuan a rawn pan a, “I hre zawk ang chu..kha chen ka pa in thukru a, a lakah hian eng nge in tih zawk?” a tic hang fak a. Chairman chuan tlu mai dawnina  inhria. A tawlh hnung hrat a.

“Chhan a awm a lawm..amah hi mi hlauhawm a nit lat a ni” a ti ta a.

“Kei pawh ka hlauhawm tihna a nih chu” a lo ti nghat.

“Aw hlauhawm e, i hlauhawm vang alawm training pek che a ngaih. I nihna dik tak hi i pa anga a tha lo zawnga i hman kan hlau a ni” Chairman chuan a ti a.

“Heng zawng zawng bultanna hi ka hre duh..a nih loh chuan, i lu kha ka thlawn ang” Zochhingpuii chuan a tit a hmiah mai. A mitmengah palzam chi a ni lo tih a lang chiang si a. Danny ruang hmu pha lo tawk velah a kal phei a, chair pawtsawnin a thu ta hnawk a. A hmaah a tawng hun nghakin Zochhingpuii te pafa chu an ding reng a.

1990..

Khawvel hmun hrang hrangah Secret Society, Luciferian society an tih mai chu a ding thluah tawh a. An ni hian khawvel thar dina, New World Order neih chu an tum ber a ni. Roreltu pakhat hnuaia khawvel a kun theih nan khawvel hmun hrang hrangah an inchap darh a. Music Industry leh Holywood ah phei chuan a mikhual lo hle. Sap milar kan tih tam zawk khu Illuminati member an ni deuh vek tih theih a ni. Larna leh hausakna offer chu an hnawl phal lo va, an duhthusam ang ngeia lar leh hausain an awm ta reng a, mahse, chhuahsan duh an awm ve tho. Chutimaia awlsama chhuahsan theih a ni lo thung, an chhuahsan rualin mualphona emaw thih dan  pangngai lo takin an nun chu tihtawpsak an ni thin. Kum 1990 kum chanve hnu lamah Mizoramaha he pawl hi a ding ve tan a. A dintu chu Pu Liana kan tih mai kha a ni. Ani hi American leh mizo (tahan) thlahpawlh a ni. Mi piang dangdai tih takah heti ang lam a ngaihven nasa a, amah ngeiin setana chu biak pawh theih inringin a bei chho va, Lucifera nen inbepawp thuaiin Mizoramah Secret Society chu din a ni chho ta a. A ruk thei ang bera din anih vangin mi satliah chu member atan an thlem ngai mang lo.sihhnip deuh tura an ngaih  leh a hun lai zeal mi lar leh thiltithei an chhaih kual thin. Chairman Dr Ramhluna hi Pu Liana enkawlna hnuaia Doctor zir zo thei a ni a. Society ah hian a duhthlanna ngeia lut a ni. A vanglai khan amah aia Doctor thiam leh lar an awm lo tihtheih a ni. Pu Liana chuan a dinhmun luah chho tura a hual lawk a ni nghe nghe. Khawvel hmin danga Society te nen an thawk ho thei ta thuai a, mahse, Pu Liana chuan khawvel ramdang a thlir vak lem lo. Setana fa nihna nei a nih miau avangin Lucifera lalram hi Mizorama darh tira lalna chan a tum ber a ni, ngaihtuahna danglam tak a nei chho va, ruahmanna a siam tan ta a. 

Science leh damdawi thiamna hmanga mihring siam danglam chu a harsa dawn lo tih a hre ve a, American Doctor thiam tak rawnin a tum dan chu a hrilh a, a phur zawng tak a lo ni lehnghal. Tichuan, mipakhat chu an experiment turin an ru bo ta a. Test chi hrang hrang paltlangin, a thisenah Lycantropy virus kap lutin ni 10 an khung hrang ta a. Ni 10 hnua an va en leh chuan a lo danglam ta. Mihring ni bawk, ramsa ni bawk a lo ni ta a. Pu Liana chu a lawm a la kim lo deuh, Lucifera nen inbiain, Lillith puihna hmanga thlarau hrang hrang thunun theihna neih a dil a, incubus leh succubus hmanga ram an lak theih tur thu nen. Chung zawng zawng pek a nih hnuah amah ngei chuan  Lycantropy  virus chu a thisenah a thun ta a. 

Thlarau koh chhuah theihna a nei ta bawk a, ram a la ta duai duai mai. Hmeichhe tam zawk an society mi leh sate hi incubus hmanga a rim lunglen an ni deuh vek. Kum 2000 an chuankai khan Mizoramah thil rapthlak tak a thleng chho tan ta a, eng ramsa nge tih hriat lohin an ran vulh a suasam chho ta a, Thingtlang lamah a thleng phawt a, an mangang kher mai. Chu ramsa chu insawn ve zelin Aizawl khaw chhung hialah a che tla chho tan ta a. Chet hunbi erawh a nei. Ranvulh ringawtin a daih loh hun leh a zawn hmuh loh hun a lo awm ta a ni chek ang chu! Mihring tlahlang ruang hmuh a ni ta zauh zauh mai. Thla bial zan apianga mihring ruang rapthlak tak chhar a nih tak fo ah chuan police te chuan rind an an nei thiam chho ta a. Mahse, awih harsa an ti viau mai.

Society lamah pawh buaina a inmung chho ve mek a, an hotupa ber chetdan chu sawiselna a awm chho tan ta a ni. Amah ngei pawh chuan a thunun phak bakin virus chuan a thunun chho tan ta si a. Dr Ramhluna leh Dr Zira bakah Professor  Hminga te ko vin a awmdan tur chungchang chu an sawiho ta a. 

Amah Pu Liana chuan he virusin a nunna hial a lak theih mai a rin thu leh a aiawh tur a thlah ngei siam a duh thu a sawi a.Fanu a duh bawk. Chu a thisen a fa chu Grande Mother nihtir ngei a duh thu leh  amah hmanga Zoram khawvel an la awp theih tur thu a sawi ta a. Amah khan awp a tum kha a ni a, a ngaih ang maia awlsam a lo nih loh bakah ramsa a ni thin tlat! He ramsa hian a thunun theih piahlamin hna a thawk tawh a ni. Chuvang chuan a thisen ngei mai fa a duh a ni. Amah ngeiin a fa hrinsak tu tur a ngaihtuah bawk. A hun laia lehpek awm thei lo tur khawpa lar leh hmingthang Zohlupuii chu a thlang ta a. Zohlupuii chu member a nih tawh vangin a harsa lo turah a ngai. Zohlupuii chu an rim chho tan a; ani lah a fanu hmanga Zorama thuneihte chu a lo chak sakhai a, tin, an hotu lu ber fa hrinsak pawh chu chawimawina ang maiah a ngai hial a nih nghe  nghe kha..a hunah leh a hmunah nau pai turin an mu dun ta a. Zohlupuii chu a vawikhatna a ni nghe nghe.

Mahse, a naupaiin thla thuma  rawn tlin chuan a thluak nu but thin kha a rawn fim chho tan a, inchhirna neiin inlamlet a duh chho a. Mahse, chu chu a theih tawh si loh. Mangang takin a rum a rum thin. A thisen ringa thaw ve tek tek a fa chu a lo piangchhuak anga, a ta ni lo vin society ta a ni ang. Kum a tlin hunah apa anga ramsa nih ve hmabak a ni bawk a. Grande mother  anih hunah phei chuan khawvel hian a hming an hria anga; mahse, a tawpna chu hremhmun, chatuana dai thei tawh lo tur a ni ang. Zohlupuii chuan a ngaihtuah thui tawlh tawlh a, a mangang telh telh. A chhungte bulah a sawi ta hial a; ramhuai fa a pai ni hialin a inhre chho. Tichuan, apa ten en remruatna neiin an inbuatsaih ta kha a ni a. Apa chu eng ang mi pawh lo nise; anu erawh mi pangngai a la nih ve miau avangin eng em a ti lo tuah an beisei tawp mai a ni. Tin, society hlata awmtir an tum ruh hle bawk. Hetihlai hian Dr Ramhluna chu chairman dinhmunah a ding tawh a,  Amah enkawla a duhthusam tihlawhtlingtu Pu Liana khan ko hrangin a tan pindan ruk, tuma luh ve theih lohna siam turin a ti a. Chu hmunah chuan a fanu puitlin hun  nghaka a lo dam tur thu sawiin, thlarau khawvelah thlarau tam takte hnena chakna lak a tum thu a sawi a ni. A chhan chu mihring kum bithliah danah a upa tawh a, thi mai tur  ani tawh, a thih hunah society a buai loh nan a fapa anga a en, fing leh remhre tak chu a aiawha dah ngei a duh a ni. Tichuan, a fanu lo lan hunah a rawn kir le hang a; Zoram khawvelah ro a rawn rel ang tiin a sawi. Dr Ramhluna chuan pindan him tak buatsaihsakin chu hmunah chuan Pu Liana chu a dah ta a ni. Thla bial zan apiangin a chhuak thin thung. A chhan chu a thisenin a mamawh miau a. Mahse, a intiam angin mihring a khawih tawh lo thung. Ramhnuaiah vakin ramsa a pel thin. A chhan chu mihring a khawih leh a nih chuan, man chhuah a hlauhawm a tin ni.

Zohlupuii’n nau a hring a, an tum dan lo ang takin an buai chho ta a ni. Mahse, an beidawng lo va, Zochhingpuii chu an zawng ru reng tho. Tichuan, tun hun an lo thleng ta hial a. Mahse , thil hnawk leh khirh a tam tawh lutuk, Dr Zira’n phiarrukna a lo kalpui ve kawkalh si a, emy lah a hnawk em em bawk si. An tum dan an thlak ta vek reng a nih kha..chu an thiltum chu Zoi pa hi an hrilh lo. A nihna takah chuan an tlawhpawh ngai tawh lo tihtheih a ni. Arianna thlarau hnawtkiang tura a zuk hmu tih loh kha chu a hmu leh tawh lo. Society member tam zawk hian a awm ve tih an hre hauh lo bawk. A hotu lawk zualte erawh chuan an hria, Dr Zira pawh hian a hria, mahse,a ngaipawimawh lo, a damchhunga pindana khung a tum hmiah mai a ni. A rawn chhuak a nih chuan engkim a buaiin a tawp vek dawn tih an hai lo. Chairman ngei pawh hian a hai lo va, khung hlen kha a rilruk titih ve hial a nih kha..mahse, hei a fanu nen an intawng leh ta si.

Pu Liana chu tlangval tha lai amg maiin a chak a, a hmel pawh a danglam tawh. thlarau tam tak hnen atangin chakna chu a dawng tak tak a ni mahna..

Chairman chuan Pu Liana chu melhin, “I duhthlanna a ni a, min dem thiang lo. Thil tam tak a thleng si a” a ti a.

“Tunah chuan ka fanu nen ro an rel tawh ang” Pu Liana chuan a ti a.

“Mahse, i thei lo.  I fanu hi dinhmun hlauhawmah id ah dawn asin” a lo ti  vat a.

“Ka chingfel ang. Dr zira chungchang pawh. Tunah chuan kan chhuak chho ang a, tupawn ka nihna an hre tur a ni..a chiang em?” Pu Liana chuan a lo ti hriam hraih a.

“Emy, khawngaihin harh teh , engkim a tha vek ania. He tah hian i him aw” Zoliansanga chuan Emy lu chu a sawi nawk nawk a. Emy chu a rum tiah tiah ringawt. Zoa mang chu a ang kher mai.

Khatia Jona ina va chawlh hahdam a tum kha a thlen atanga reivak loah Jona chhungte Lunglei lam mi pali lai an lo thleng leh si a, thaw  a veng dawn lo riaua hriain Jon ate huan a hnai zawk tiin a kal fo tawhna a ni bawk a. An huana zuk awm rih turin a inkhalh chhuak leh ta kha a nia. Emy nen an intawng ang tih rinngaihna a hre hauh lo. Emy file hlui a dap khawm mek lain thi chhawngin a rawn lum lut zui ta si a! Pathian rorel dan chu hriatthiam a harsa a ti kher mai. Emy hi a dam ngei ngei a ngai. Tunah chuan a dinhmun a derthawng tih a hai lo va; venhim hna a thawk tawh ang.

“Ka fanu..” tiin a rawn rum leh tiah tiah a.

“I fanu chu a tha. I dam a ngai, EMy” a lo ti tawp.

A fanu chu tu nge a nih a hre hauh lo. Mahse, a hmangaih leh duhber chuan a naupai kha a pai puitlinga fanu a nei tiha chiang ta khawp mai. Tui in tur a thlitsak mek laiin kawngkhar an rawn chum dawt dawt mai. Fimkhur zetin a kal phei a, “Tu nge” a ti sup a.

“Hmeichhe pakhat ka rawn zawng a, ka nupui a nia” pawn lam atang chuan mipa aw thum lam hian a rawn ti a. Zoa chuan Emy chu pindan tepenah a va pawm lut te te a, kawngkhar chu a hawng ta a.

Mi pahnih an lo ding dun a, a hriat ngai loh an ni.

“ka laklawh deuh a, eng nge nit a?” a ti hnuhnawh a.

Rinhlelh hmel zeta melh chungin, “Hmeichhe pakhat hliam tuar i lo hmu mial em? Ka nupui a nia, ka fanu nen min tlanbosan a ni” amah hnaihtu zawk chuan a ti a.

Zoa chu a chhing duar duar a, “Hmu miah lo.mahse, khawvar hma deuh kha chuan tlan khut khut thawm chu ka hria” a ti a.

“Khawi lamah” a lo ti vat.

“Kawng thlang lam khu a pan niin ka hria” a lo ti a. Hmanhmawh zetin an kal nghal, zoa pawh chuan kawngka chu a khar a. Emy a dahna hmunah chuan a zu lut a. Emy chu a lo la mu reng, a la harh chuang lo niin a hria.

“Ka bulah chuan i him ang” a ti thawp sup a.

A awmna thlam thlang lawka Khiang thing bulah chuan mi pahnih te chu an ding ran a.

“Chairman fapa a nih vang chauhin ka ringhlel a ni lo. Emy nen nunhlui an lo nei tawh alawm” pakhat chuan a ti su su a.

Pakhat  chuan, “Anih chuan eng nge kan tih ang? A fimkhur dawn si a” a ti a.

Beiseia chuan mitmeng verther tak pu chung hian,”Emy kan that ang a, Zoliansanga kan phuar ang. Chairman dinhmun chu kan tichhia tihna a ni mai. Pu zira a lawm khawp ang, sava pahnih a rualin” a ti ta chhar chhar a.

(ka ziak lo vang ka ti zet a. Ka ziak leh si e)