Thuruk 15

THURÛK.. (15)

Ziaktu: Toni Râlte

Pindan kil thim, meikhu niawm tak rawn chhuahna atang chuan a hmel hmuh hleihtheih loh hi a rawn ding chhuak a, a rum hrawih hrawih bawk. A rawn pen hnai zel a. Mak deuh maiin boruak chu a vawt nghal rawih rawih mai.. Zochhingpuii chu khur dar dar chungin a lo ding ran a. Tlanchhiatna tur a awm der si lo. 

A hmai bul chetah chuan a rawn ding ta a. A rawn chhuk en run mai. Zoi chu a rak thawt!  A thidang a ni ngei ang. A harh leh chuan a lo eng uar tawh a. A awmna hmun chu hai thelh nghe nghe. Pindan thim taka a awm laiin mi pakhat hmel rapthlak zet nen an inhmachhawn run anih kha. Tunah erawh pindan eng nuam leh fai, rimtui zetah khum nuam tak chungah a mu mek a ni si a. A bangbo kher mai. A thu chhuak a, a hawi kual ruai a. A mutna pindan chu a zau lutuk lo, bungrua a awm vak lo bawk. Chhuar sang leh lian tak pakhat a awm tawp a, khum piah lawka sofa bulah darthlalang, taksa pum lan theihna a awm leh bawk. Chu zawng chu a ni mai. 

A pum a dawm a, a riltamzia a hrechhuak nghal. Eitur rimtui zet nam chak chak chu a lo hip lut kâwk kawk a. A ke chu hlang thlain ke lawngin pindan atang chuan a chhuak ta a. Thutkhawmna pindan zimte leh choka chu a inzawm titih a. Chokaah chuan amah hnungchhawn zawngin mi pakhat sang tak hi a ding a, eitur a siam niin a hria., Zoi chuan a aw a thian a. Rawn hawi lem lo vin, "I lo harh tawh maw?  I riltam tawh ngawt ang" a rawn ti thum dût a. 

"Khaw nge ka awm? " zoi chuan a lo ti thung. 

Chupa chu a rawn inher a. Mipa hmel tha tak, zaidam hmel em em, vun rawng èng lam, chal arh phak mai a ni a. A mitmeng mawlh chu a ni, pawisawi lo tih hriat zet hian a meng kalh a, a mitmu dum zetah chuan huatna leh khakna hmuh tur a awm lo. A nui sáng a, "Hetah hian i him ang" a ti sup a. 

"Mahse, ka hriat hnuhnun ber kha chuan pindan thimah khan ka awm si a. " a lo ti niah niah a. 

"Ni e. I awm alawm.. Pindan thim kha a thim reng bik hleinem" a lo ti mai a. A sawi awmzia a hrethiam lo. 

"Tu nge i nih? " a ti tham chhal a. 

Chupa chuan rawn pan hnaiin, "I pa ka ni" a ti ta a. A aw chu a dam thlep thlawp viau mai. Zoi chuan a hmaa thil tawn kha a ngaihtuah let a, 'ka fanu" tia rawn pantu ta pa hmel rapthlak zet kha, he pa hi chu a ni hauh si lo. A ngaibtuahna bangbo zet avang chuan a chil a lem khawlh a, "Tunah chuan ngaihtuah vak vak suh. Engkim a tha mai ang" a ngaihtuahna hria niawm takin a rawn ti leh sup. 

Dawhkanah chuan eitur tui hmel tak tak a chhawp diat diat a, lo puih nachang pawh a hre lem lo. Thu turin a hrilh a, a thu a. A riltam lutuk chuan zah pawh dawn lo vin a ei ta buan buan a. 

A puar ta deuh tihin, "Emy khaw nge a awm? " a ti ta hlawl a. 

"Tunah chuan rip chhungah an khung mek. Ni 2  hnu velah an tihlum lo anih chuan, an hmanruaah an hmang ang" a lo ti a. 

"Chhanchhuak rawh" Zoi chuan a lo ti fak. Chu pa chu a nui hawk a, "Ka chhuak thei hleinem" a lo ti var a. 

"Keiman ka chhan chhuak ang" inringtawk zetin a ti a. Apa anga inchhal chuan a melh vawng vawng ringawt. 

"Ka pa i nih leh nih loh ka hre lo, i hming pawh ka hre hek lo.. " Thawh pahin Zoi chuan a ti leh a.

"Danny ka ni" a lo ti thum chhak a. Ani pawh a tho ve nghal. An eina vel chu a sengfel sawk sawk a. 

"Anih ti nge hetah hian i chen? Engvangin nge i chhuah theih loh? " Zoi chuan dilchhut takin a ti leh a. 

"Hei hi ka chenna tur a ni miau alawm.. " a lo ti mai a. Tlemin a aw ah lungchhiatna a tel deuh. 

"Emy chu aw.. Ka va ngaihtuah em' Zoi chuan a ti vawng vawng a. Danny chuan, "Hmeichhe satliah a ni hleinem. A inhaikaw thei mai ang" a lo ti thliam a. 

"Lawk.. Anih nizan nge nichin nge ka hre lo. Pindan thima ka mi hmuh kha tu nge?  Rapthlak deuh kha" Zoi chuan a lo ti leh daih. 

Danny chu a khi suk a. 

"Ka hre lo" a ti thawp ta sat a.. 

Thir kawngkhar niawm tak chu a ri rawk rawk a. Ke pen tlut tlut thawm a lo hnai zel. A awmna pindan chu a rawn inhawng ta a. Eng a lo luh chuan a mit a khap sak sak a. A sam bu chhah takin a hmai a khuh hnûp chu tu emaw hian a rawn huihkiang a. A dah chhuah chuan Dr Zira chu a lo ding ran mai. 

"Uichonu, ti nge hman hmanah khan ka lo sahsawm tawh lo che ni.. I lemchan thiamna khan min dawlh hlum lo chauh a nih hi.. Tunah chuan ka kutah i awm ta. I thiltih pawizia i hriat hunah chuan inchhirin awmzia a nei taw lo vang. Nangmah leh nangmah pawh i intheihnghilh hmak ang" a ti chang fak fak a. A kuta Emy a awm chu a hlim viau niin a lang. 

Emy chu a ngawi reng. A fanu bak ngaibtuah a nei lo. An man ve ang em tih chiah hriat a duh. Ni e,Director dawhkan atanga file a ruk chhhuah hnu khan Chairmanin a lo dawng a. An lawm a kim tan ta deuh. Chairman pawn ruahmanna a siam pui a. A fanu nihna lang tan avang chuan hmanhmawh a tul tih hriain a naute pawh damdawiin atangin a chhuahtir chuk chuk anih kha. A tukah Goa-a an kal dan tur leh an awmdan tur sawipui turin a chhuak a. Thil tam tak an sawiho anih kha.. Zanah a fanu nen an chhuak ru anga, a tuk zing takah Goa lam pan turin Valtea motorin Gauhati an chhuk phawt anga, tichuan an ruahmanna an bawhzui zel dawn a ni. Ani Emy erawh sulhnu chingfel turin a la chambang thung ang. Valtea leh Dorothy pawn an bungrua an pack fel vek tawh a ni. 

Mahse, Headquater a thlen hmaim Beiseia ten an rawn nangching a. Civil mi te hriatthiam loh turin silaia tin ru reng chungin zui tura an thupek chu a zawm lo thei lo anih kha. Ni e, a thi ngei dawnin a hria a. Mahse, Chairman khan a fanu chu a lo humhim em ang chu maw.. abeiseina chaurau tak chuan a la tichhel ve fan a. Erica tal hmu thei sr chuan remruatna dang pawh a nei thej mahna. Mahse,  Erica hmel reng reng a lang si lo. 

"Engtia thih nge i duh ber? ' tih pahin Zirliana chuan a tukhum samah a rawn kek dak lawp a. A hmai dâng leh hriam lek lek chu a khem nuan mai. A hnar veilam pawh a thi tiam tiam bawk. A then chak chak a. A la tawng duh chuang lo. 

"Hmm.. I fanu pawn a rawn zui ve thuai ang che.. E ngawi teh, zui leh lo vang. Kei hian i fanu hmang sawn Zoram khawvel hi ka awp dawn a ni. Ka thuneihna hnuaiah he zoram hi a kal tawh ang.. Chutih hunah chuan ka hahdam ve der der tawh ang chu.. " tiin a nui hak hak a. Emy a then sawk. A chil a chhak pharh a. 

"Ka tihtir ngai lo vang che" a ti fiak thak a. 

"Mitthi mai turin chuti ang sawi suh. Zawngi, tangkaina i nei tawh lo. E.. Mahse, ka rilru ka thlak leh mai teh ang. I fanu i thuhrukna hmun sawi la, i nunna ka zuahsak ang che. Mahse, ka hnuaiah i thawk tawh ang " a ti sur sur a. Emy chuan hnuailam a melh ran mai. 

"Duhthlanna i kutah a awm e.. Ka chhuahsan phawt ang che. He pindan rimchhe zet nen hian in inhmeh tawk rih e" tiin pindan chu a chhuahsan zui ta nghal a. Light a off loh vangin a la eng deuh iar a. Emy chu a hawi kual a. A kut leh ke phuar chunga thuttir a nih vangin chet lak chu a tan a harsa viau mai. Hmanrua a melh kual a, a vâng hrep!  A zun lah chu a chhuak em em lehnghal. Zung turin an phelh dawn lo tih a hrechiang. A bawp chu a tikau hlek hlek a. A zung ta hmiah. A zun lum papin a mal bawr vel a rawn tihhuh chuan a ner sak. Eitur an la pek loh vangin a pum pawh a ri rawk rawk reng a. Mahse, riltam hi chu a tuar thei. Tunah chuan he lai hmun atanga tlanchhuah dan a ngaihtuah a ngai. Erica mawlh chu a ni. Awm se a hmang tangkai thei ngei awm si a. An dahna hmun hi a hrechiang. A hmain society atanga chhuak tau ho hrem nan an hmang thin, nasa taka hremin an zal rawih hma chu an khung reng thin a. Heng hremna hmun atanga dama chhuakte chu rinawm takin an damchhungin society tan an thawk tawh thin. Chairman tal khan hma a lo la ve em ang chu maw.. Mahse, a tan chetlak pawh a harsa ve tho maithei. Pawnlam mite ven a ngai tho si a. 

A fanu a ngaihtuah a, a ngai ngawih ngawih. An inhmuh tawh loh phei chuan.. A mittui a rawn hnám nghal. Heng zawng zawng buaina bul chu amahah bawk a tawp leh thin. A chingfel zo ngai dawn lo anih hi.. A ke a han chet zauh chuan eng emaw ni rah a nei ta a. Rang takin a zuk bih a. An thuttirna hmun thinga siam chair ke rahchhan kilhna perek a lo ni a. 3inch vel a ni maithei. Thei leh thei lo vin a zuk chhar a. Chain veka phuar a nih miau vangin phelh ngaihna a vang si. Duty lo luh hun a nghah phawt a ngai a ni. Thawk a la hawk a, inchunga bulb khai chu melh vang vangin "Pathian, i awm anih chuan min pui rawh" a ti ta sap a. 

Zoliansanga chuan chuti taka a nu thinrim hmel chu a la hmu tam lo viau mai. Ni e, tukthuan ei khama a chhuak a lo haw leh hi a rawn thinrim haw em em ringawt mai a ni. 

"Eng nge thleng a? " a lo ti a. 

"Thil tam tak.. Sawi ngawt theih pawh a ni lo. Bawiha, Zaninah Sangteii a rawn kal dawn aw" a ti a. A aw chu la nem chiah lo mah se; a la lungawi zan lo tih erawh a lang reng mai. 

"Eng nge a rawn tih dawn? " a lo ti hluk a. 

"Ele.. A rawn luhkhung dawn che" a lo ti awlsam èt a. 

"Mai mai a.. Ka nu, i timak teh e. Chuti chu thianpa te inah ka va awm rih teh ang. Tun kar chhung chu" a ti ta hmiah a. A roomah insiam turin a lut zui nghal. 

Anu chuan mitmeng thip zetin a melh zui a. A ke a per dat. Zira nen an plan a flop pawh tih tawh nak alaiin a fapa lah a control thei chai si lo. Engkim chuan a thin a tirim a ni ber. A duhthusam leh beiseina zawng zawng kha hmeichhe pakhat vangin a tlawlh ta vek si a!  Chu hmeichhia chu hmana a fapa in a atchilh Zohlupuii ngei a la ni zui! Hrep tak chuan a… a fapa in sangteii a hnar tlat chhan pawh he nu ngei hi a ni mahna. An lo inhmu tawh hial nge mawni le.. Mahse, Zohlupuii hmel kha thlak a ni tawh si a. A la hre thei dawn em mawni le.. 

Zoliansanga chuan Jona a be zo chiah. Chhuanlam siamin kar khat vel a va awm ve rih dawn ani. Bakah an in chu nuam a ti tlat lo. Anuin englai pawha Sangteii a sawi chu a chhangkham hluah hluah a ni ber e. Muangmarin a inbual a. Emy bawk a ngaihtuah leh tawh. A hmuh lohna a rei ta hlein a hria. Khawiah nge a awm ang le.. A in lah a la inkalh bám mai si a. A inbual zo a inthlak fel a, bag lian vak lo ak chunga in hnuai lam a pan thlak lai chuan a pa a rawn lut ve mek a. A pa chu a hmu tar sawt mai. A chezia chu a zangkhai loin a hawi harh lo hlein a hria a. 

'Kha.. Khaw nge i kal dawn? I zin dawn mi? " a pa chuan a ti a. 

"Jona inah ka va awm rih lawk ange. Hna pawh kan thawk tha thei deuh ang ka tia" a ti ve mai a. 

"A tha lawm.. Ka hrethiam che. Inenkawl tha la aw " a ti sup a. A room lam a pan nghal. Zoa chuan a pa awmdan chu mak a ti ru viau. Buaina eng emaw tak a tawk anih a ring deuh. 

Valtea leh Dorothy chu Valtea inah an vei sek a. Emy hmel hmuh tur reng awm thei si lo. A tunu Zoi lah thei reh takin a reh hmak bawk si. Thil dik lo eng emaw tak zawng a awm chiang a ni. Society va luhchilh a duh rum rum hial tawh a. Doryin a la khap bet hram hram. Emy ph lah a in off tlat si. Dory chuan Dr Zira number a hmet chhuak ta a. Tim deuh dai chungin a call a, a ring quit tep tihin a lo la mial a. 

"Eng nge ni ta? " a rawn ti dam thluam a. 

Dory chuan, "Office-ah i awm em? " a ti sap a. 

"Awm lo, eng nge ni ta? " a rawn ti a. 

"Emy ka be tlang thei lo va, buaina a tawk anih ka ring a. Nge i kutah a awm zawk? " Dory chuan insangmar teuh chungin a ti ta a. 

Dr Zira chuan hul hakin, "Kei pawn a awmna ka hre hauh lo mai" a lo ti a. Phone chu a dah nghal. 

A thaw hak a, Valtea a va melh, ani lah a mangang tih hai rual a ni si lo. Dorothy chuan, "Keimah ngei ka va kal ang e. Ka lut leh mai ang" a ti ta a. 

"Kawng dang a awm ang.. Dory" Valtea'n a lo ti bur si. 

Mahse, an han ngaihtuah ngial pawhin va luhchilh mai loh chu kawng dang awmin an hre si lo. Va lut ringawt mah se; Emy an zawn chhan an zawt ngei ang a. Tlanbo an tum thu sawi chhuah chi a ni der si lo. 

"Engpawhnise, zanin chu ngaichang leh phawt ang. Naktukah a rawn lan loh chuan kan lut dawn nia" Valtea chuan a ti ta a. 

Emy chuan perek chu a hum ran a. Duty  a lo luh rual chuan, "Ka thih hma chuan zalen taka inthiar ka phu ve lo maw? " a lo ti sap a. Duty chu Beiseia kid a ni. A khi suk a. 

"Nia.. Thi mai tur i ni bawk a. Ek cheh pura thihtir che kan duh bik hleinem" ti chungin Emy ke phuarna chu a phelh rak rak a. A kut phuarna pawh a phelh zo ta. 

"Phakar i chhuah vaih zawngin i lu kha a darh nghal ang" a ti chhar chhar a. Emy chuan ngaihnep hmel zetin a hmui a lo tisawi zauh. Toilet kawngka a hawng a. Toiletah chuan lutin rei mawi tawk a thu a. Zo niawm takin tui chu a leih pap pap a. Kawngka a hawng a, a chhuak leh nghal. Chupa chuan chain-a phuar leh tumin a ban a rawn phar a, Emy chuan chet a la zui nghal vat. A va Bawh rawk a, a hrawkah tak chuan perek chu a tlum thawih mai. A rak hman eih lo. A thaw ri bawrh bawrh a, thisen a rawn chik nghal thawt bawk. A tluk hnuah chupa silai pai lai chu lain, a kekawr a zun khum huh hnuang chu a phelh mawlh mawlh a. Chu pa kekawr lian zet chu a ha ta a. Chemte leh silai a nei ta a. A hlauhawm khawp tawh ang le.. Thawm dim zetin kawngkaah chuan a chhuak ta a. Corridor tawn tawn chu thlek kualin chhim lam chu a zawh ta a. Thawm ri va engmah a awm lem lo. Corridor tawpa step pahnih lo awm thiang rial chu ngaihtuah buai hauh lo in veilam zawk chu a zawh thla a. Light chu fel lo lai a awm nge a phe zut zut mai. Reiloteah a awm lo tih an hre thuai anga, an zawng dawn tih a hria. Chumi hma ngeia he lai hmun hi chhuahsan a ngai a ni. A lam pana ke pen thawm a hriat rualin a sir lawka pindanah chuan a petek lut zauh a. Mi pahnih rawn inzui pheite chuan Zochhingpuii chungchang an rawn sawi dun mawlh mawlh a. 

A sang zawk chuan, "Emy hian a pa bulah a hnutchhiah ka ring.. A pindan kha kan chinglet nasa tawh em mai." A ti bawrh bawrh a. A fanu a la him tih a hriatna chuan a tinui sak. Mahse, khaw nge a awm ang?  Apa bulah chuan a awm tak tak ang em? ni lo, a pa bulah chuan awm lul suh se.. An kal liam chiah tihin a chhuak ve nghal. Step bawk a zawh leh a. Rumrawk dahna pindan a pawh hlawl mai. Ventilation awmna chu sang deuh mah se; chu bak chhuahna kawng a awm lo. Bungraw lian tham deuh chu a fawm khawm a, a dawh ta ur mai. Mahse, thawm a hre ta tlat. Ri khup khup thawm a ni, a awm lo tih an hrechhuak ta ani ngei mai. Hmanhmawh a ngaihzia a hai lo. Luh chhuah theihna zawng zawng an dangping nghal ang tih a ring. Mana awm leh ai chuan thih a thlang zawk. Zira uite nih ai chuan dam ve reng tul a ti lo a ni mai. A pum ruak riltam chau tawh bawk si lah chuan thahrui a nei chaurau kher mai. A bungraw chheh vumah chuan a lawn a, a nghing der der lehnghal. A mah pawh a khur deuh. A hlauh vang lam aiin a tamchhawl titih deuh tlat a ni. A awmna hmun lam pan thawm a hre zui bawk. A che buai ve takzet a ni. 

"Store roomah en ru.. Vat.. " Dr Zira aw tial ruan ri a hriat phei chuan a thaw a sa phat phat. A awmna chu an lo hnaih zel a, ani lah a bungraw chheh vum a nghet lo va, a tla zel si. Phun hluk chungin a lawn leh a, mahse, a zuangthla leh vat. Kawngka bul maiah thawm a hre tawh tlat a ni. A lawn chhuak hman dawn si lo va. 

Nichin lawka titi te pahnih bawk kha an rawn lut ta a. A bungraw chheh vum phenah a bawk phek nghal. An rawn lut ril zel a. Thawm an nei hauh lo lehnghla. Meng kar chungin a lo nghak ran a. "Bungraw chheh vum kha" pakhat zawk chuan a ti zauh a, an inkarah 3ft thum pawh a awm tawh lo vang.. Emy chuan bihruk a sawt lo tih hriain a chakna zawng zawng sawngkhawmin amah lo hnaih mek tu chu a han zuan ta rawk a!  A chemte hriam tle var chuan a thinhnunah a vit nghal hrâwih bawk. An thawm hriain a thianpa chuan a silaia tin rapin a hmel a rawn pholang nghal a. 

"Che tawh suh" a ti fiak thak a, a biak hlatna chu phawrhin, "Store roomah.. " a tih lai mekin, a chaldarah silai mu a rawn ving lut thawih!  A tlu nghal der a. Che zui tur a awm tawh lo. Chemtea a vih pa erawh a tal aih aih a, thawk harsa a tihzia chu a lang reng mai. Emy chuan, "Sorry" a ti sap a. A bungraw chheh vumah chuan lawn lehin ventilationah chu a han vuan ta a. A hma aia thawk rip zawkte thawm a hre zui nghal. Leng leh leng lo va inhnawhin, a hnuai lam a san leh san loh ngaihtuah hman miah lo vin a zuangthla ta a. Hnim zingah a lum nawk nawk. A awih phian lehnghal. A tawpah thing lian ve angreng tak hian a lo dal hlauh a. A thal reng mai. Mahse, chutia mu reng hman a nih lohzia hriain thei leh thei lo vin a insaseng a. A thim angreng si, a sir lamah vak pheiin a piah ral hla deuh hleka eng awmna lam chu a pan risk ta tawp a. Tu te emaw kawmthlang huanah a awm mek tih a hria. A tuihal huam huam chu tawrh harsa a ti tan hle. Mahse, rawn umzui thawm niawm tak a hriat vangin a fanu hmel mitthla chungin a bawkvak phei ta zel a.

Mi dang mitmei an ven ve tho dawn avangin chuti maia awlsam chuan an hmuh a ring bik lo va. Eng awmna lah chu a thleng hleithei lo. Kawr niawm tak a pawh ta hlawl a. Chu chu a zawh ta tawp. A khawkrawk viau lehnghal. A tlu zing kher mai. A ban leh a hmai te chu a khem nuan tawh a, a kawng lah chu thinga a zuk insawhna nge ni a na tur ut ut reng bawk. Amah umzuitu te thawm pawh a hla ta tial tial a. Khua pawh a var lek lek, leilung a lang tan ta a. Kawng pawh a hmuh theih deuh tawh e. 

Zing dar 4 velah chuan huan puitling tak pakhat, inhung khap mai a pawh ta hlawl a! A thaw hawk. Gate chu a lawn liam a. A chau takzet a ni. Huanah chuan serthlum leh balhla bakah thei chi hrang hrang a awm nual mai. Tuikhuah zau angreng fa a awm bawk a. Huan kil lamah thlam aia lian hret tur in a ding bawk. Chu lam chu a pan ta tawp a. Kawngka chu a lo inkalh lo hlauh.. 

A kik dat dat a. Thawm lah chu a reh vung vung mai si. Mahse,  abeidawng duh lo. A hmanraw pai chu a thukru sawk sawk a. Thawm a hre zawm nghal. Kawngka kalhna chu a ri ta rak a. A rawn hawng ta. Mi pahnihte chu makti zetin an inmelh dun ta tlawk tlawk a.. A mak a ni!  

"Hetah.. Eng nge.. " kawngka lo hawngtu chuan a ti bah nak a. 

Emy chu a chau tawngkhawng tawh lutuk, a chhang thei lo. Hmalamah a awn ruai ruai a, a tlu dawn ta mai. A lo dawm vat a. A pawm kang nghal. Thutthleng seiah chuan mutin tui a va la vat a. A leih huh a, a kaah a fartir bawk. A sawi nawk nawk a. A meng peih chang chang a ni ber e. 

"Emy, harh rawh. A tha vek ania.. Harh teh" tiin a ko mawlh mawlh a. 

Emy chu fiah lo ruaia lo mengin mangan hmel zeta lo thlir rengtu chu a han melh a, "Zo, ka fanu.. Ka fanu" a ti tham chhal a. A mit a chhing zui nghal… 

Zoliansanga manganzia chu Chunglam khian a hriatpui ngei ang le.. 

Zochhingpuii chu a harh hlawl mai. A lo thim vek a. A mutchhuak bo duak chuan a ngaih a titha lo lek lek. Khum atang chuan a chhuk a, light chu on tumin switch a zawng a. A hre thei mai si lo. Chutia a buai viau lai chuan thutkhawmna pindan lama inbe thawm chu a hre ta a. A ding chawt. Bawk vakin a hnaih hrat hrat a. Tun ang zan rei tawhah tu te nge inbia ang.. Engkim hian a thawn zel tawh avangin makti lo turin a insum nghal. A beng chu a chhi ta ran a. 

Danny khan tu emaw a bia tih a hria. Mahsw, a biak pa tawng ri a hriat ve loh vangin ph call hmangin an inbia niin a ngai. 

"Aw.. Ka thup reng thei lo maithei ania. Naktuk zan hi thla bial zan a ni si a. Ka thunun theih thil a ni dawn tlat.. " a ti sur sur a. Tu chungchang nge maw a sawi le.. 

"Aw. ani chu a tha. Mahse, apa anga awm reng hi ka thei lo ka tih kha.. " a ti leh a. Zoi a chhing sawk. Inbumna hi a va tawng zing tak em.. Danny hi a pa tak tak a ni miah lo ang tih a rin ruk kha a lo dik chiah mai. A kut a hum ruh nget nget a, "Umm.. A pa chu ka chiu mu rih. A harh chuan a fanu hi a rawn la ngei ang. Chumi hmaa chet lak vat a ngai.. " Danny aw chu a zawi hle naa a bengah chuan ring tak a ni. Apa an hrengbet ve tho maw?  Engvang nge? Eng nge a tih? Engkim hi a mumang nise chuta tanga harh chhuah chu a duh a ni. Ni e, thangharhsan a va chak tawh tak em…! 

Dr Zira mitmeng hlauhawmzet chu Beiseia chuan melh ranin, "A hnu kan hloh " a ti sup a. 

Dawhkan a hnek bur. "Phiangsen che u hian, hmeichhe pakhat pawh in veng hneh lo a nia. Ngaithla rawh, He nu hi a rawn let leh anih ngai chuan phuba a nia a rawn lak dawn ni. Kan chelh zo in ka ring. Chuvangin a rang thei ang berin Chairman hi that rawh" a ti ta a. 

"Mahse, chairman thihna chuan Emy a tidanglam lo vang" a lo ti khauh. 

"A tidanglam dawn lo. Mahse, society ka thuhnuaia a awm chuan Emy tan hmelma ka siam hnem tihna a ni anga, A fanu pawh kan ta a ni thei ang" a ti vin thak a. 

"Chairman lamtang an la awm ve tih i theihnghilh niin ka hria" Beiseia chuan a la ti hram a. Dr Zira chu a meng rum tawh kher mai. 

"Ka ngaipawimawh lo. A lamtang te pawh zawi zawiin kan dah tha ang. Tunah chuan Emy'n inphen nana a hman theih awmchhun hi kan dahbo hmasak a ngai" Dr Zira chuan a ti a

Beiseia chuan lungawi hmel vak loh hian, "Heti ang dah bo mai tur te chu file buaipui kual lo khan engah nge hmanah kan thah mai loh. Tunah chuan a fimkhur viau ang.. Kan mualpho thei" a ti leh a. 

"Beisei, eng nge maw i hriat le.. Ka thu hnial ngai lo khan engvangin nge min hnial tak? Emy khan i thinlung a ruksak ve che chu a ni em lo maw?" Pu Zira chuan chang zet hian a ti fak fak a. 

Beiseia a khi suk.. "Ni lo ve. Chairman ka thah chuan a fapa sawn a pa thihna hi a thih thlengin a chhui dawn tih ka hria. Ka hlau a ni lo, mahse, society hian a tlakchhiat phah ang tih ka ringhhlel lo" a lo ti dam thlap a. Pu Zira a meng kâwk. A thinrim laia a thinlunga awm ang ang a lo sawi chhuak phiar phiar chu a inzahpui hnuhnawh kher mai. A thuneihna chan duh luat vanga mi nunna a lak tam taehzia a ngaihtuah tel bawk. Zoliansanga hmel a mitthla a, a makpa la ni mai thei a la ni zui.. Ni e, ngaihtuah that leh a ngai anih hi. Emy vanga a buaina hian a va daihrei tak em.. 

"Aw le, ka lawm e.. Anih chuan Emy zawng chhuak la, i hmuh na hmun apiangah khawi hmunah pawh nise that ang che. A chiang em?  " a ti vawt ta raih a.. 

Beiseia chu a bu nghauh. An awmna pindan chhun engtu bulb vuahna bula eng sen vet vet chu a phe zek zek a… 

(A tawp hleithei lo reng reng 😏