Thuruk 14

THURÛK… (14)

Ziaktu : Toni Râlte

Emy rilru a buai ta takzet mai. Chairman file a ruk chhuah theih loh chuan a fanu a him dawn lo phawt. Director lah naktuk maiah a lo haw dawn si. Pu Zira safe-a a ruk chhuah kha Pu Zira'n a hriat tawh phei chuan Director dawhkana file chu a theihtawpa venhim a tum dawn chiang. Emy meuh pawh a lu a hai ve ta viau mai. Chairman lah in a nawr et et reng bawk si. 

A fanu lahin pindan rûk luh chhuah a lo tum ve mek bawk. A ngaihtuahna chu a chawmawlh titih tlat. A hui pawp pawp mai. Erica a be ta poh a. A rawn kal nghal dawn. Tlem chuan a thaw a veng ta deuh e. 

Zochhingpuii chu a hriat lohin a eiturah damdawi a phulsak a, zanriah an ei kham atanga reivak loah a muhil bawrh bawrh tawh. Eric a rawn thleng. A buaina chu a lo sawi nghal bawrh bawrh a. 

"Pu Zira chuan engmah a la sawi lo. A bo tih a la hre lo anih hmel. Chet vat a ngai a nih chu" Eric chuan a ti a. 

"Eng nge ka tih ang ka hre lo a ni. Director lah naktukah a rawn thleng dawn si" Emy chuan a lo ti ngui rawih mai. 

"Kawng chu a awm ngei tur a ni. Emy, i thluak chak tak kha hmang rawh" tiin a lo fuih a. Emy chu wine lem  chungin a vei tawn sek a, a mitmeng chu a de sawr sawr mai. A ngaihtuahna a hman rim luatah tun hnai phei chu a mu mang lo va, amah pawh a cher kuam mai. Reife an ngawih vang vang hnuah a khi ta sak a. Eric chuan mitmeiin a lo zawt a. 

"Risk lak a ngai a ni mai. Ka hlawhchham a nih leh Director ka that mai ang" a ti ta a. Eric a lo thaw hawk. Emy'n mi nunna a lak zat a hre reng, mahse, chhuizui theih turin sulhnu pawr engmah a hnutchhiah ngai lo. An society-ah chuan hmeichhe zingah assasin awmchhun a ni reng bawk a. Tunah Sophia hian a hnung a rawn zui ve ek ek tan chauh a ni. Mipa lamah thung chuan Beiseia hi a rank a sang ber thung,. Ani phei hi chu thisena tuihal tihtheih a ni a. Mi nunna lak hi ar talh nen ang khat rengah a ngai tihtheih a ni. Amah Erica ngei pawh hian mi pahnih nunna chu a la ve tawh ngei alawm.. He pawl hian a va thunun rei ta em… 

"Ric, riak ve mai ta che" no zetin a rawn melh a. Emy hian a lem kual vel nia ngaihna nei thin mah se; an taksa a inzawm chiah hian an lungrual theih dan a ngaihtuah hian a tider mai mai lo niin a hre leh thin. 

"I fanu saw" a ti sup a. 

"Naktuk zingah chiah a harh ang. Sex hman kher ka duh lo. Ka chau.. Mipa pa tak ban lukhama hmeichhe dik tak anga mutthilh ve hi ka thlahlel zawk a ni" a lo ti duah a. A dik ang. Mipa ai pawha pa zawka a chet chang a awm fo a. Hmeichhia a nihna erawh a bo bik si lo. 

An inbual dun sar sar a. Saruak leh saruak inhaw bawk si lo han innawk kual vel chuan thisen a tilum thuai a. Bathroomah chuan rem leh rem lo vin an han inchen tawn leh rih. Emy pawh hian Zoliansanga tih loh mipaah Ericaah hian thlamuanna a hmu miau a. A hmangaih em tih chu a hre lo, mahse, a la hmangaih chhawm theih mai a beisei a ni. Zoa chu a tan beisei phak a ni tawh lo tih hi pawm hram a duh a ni. Lo pawmin lo ngaidam duh mah se; a damchhungin a inthiam thei dawn chuang lo. Tin, hnawk a tam lutuk. Chairman a vang ngawt pawn Zoa chu a tan hnaih loh a him zawk. 

"Chairman, i thutna atang khan tho la, ka lo thu ve tawh ange aw.  Tin, duh i thlang thei ang. Ka zahngaihna sang ber ka hmang tih hrereng la.. Tunah hian ngawi rengin society i chhuahsan dawn nge ka thuhnuaiah i awm dawn? " tia Pu Zira tawngkam hriam zet ngaihthlak chu na a ti kher mai. Pu Zira bula ding te zingah a lamtang pakhatmah a hmu lo. Zawi muangin a tho a, "Ka chhuahsan ang e" a ti sup a. 

A room kawngka a hawng chiah tihin a chal darah tak silai a hmachhawn ta ran mai. Silai kengtu chu tudang ni lo vin Emy a ni. Nui sâwng chungin, "Khawvel mi te hriatah kan thuruk i puang thei tih hre reng chunga kaltir tur khawp chea mawl kan ni lo tih i theihnghilh ta  em ni? " a ti chang fak fak a. Emy hnungah Zochhingpuii chu a ding ran bawk. Ani pawh chuan mitmeng ngeiawm zeta rawn melhin, "Pua, dam takin le.. Tunah chuan i thiltih tawhte phuba chu lakin a awm dawn ta.. Engkim ka kutah a awm tawh dawn alawm.. Emy, silai kha hmet puak rawh le" a ti vawt raih a. Emy chuan silai cheng chu a hmet káu a.. A ri thawk.. 

A harh kâwk mai. A thu chhuak hlawl a, a thlanin a lo bual huh hnèp mai. Thawk a han la kâwk a. A manganzia chu a hmelah a lang chiang kher mai. A nupui thaw sák sâk chu a zuk melh a, reh hlum hial a nâp!  Amah vanga mangang a ni si a. Zirliana laka a uire na vang ngawt pawh khan chhuahtir tawh tur a ni. Mahse, Emy a hlawhchham vaih chuan vawnbeh tur leh Zia vaukhanna tur dang a neih miau loh vangin he nu tenawm hi a la kawl reng a nih hi. Emy a hlawhchham anih chuan he nu hi hmanruaah hman a la rilru hram hram a, Zira vaubeh nana a hmanraw neihchhun a la ni rih tlat!  Tui a in a, a va zung nghal a. Thla chu a bial khûng mai. A mutchhuak a reh laklawh si, an room balcony-ah chhuakin chairah chuan a thu hnawk a. Thla eng thlir chungin a tun hma nun a ngaihtuah kir a. 

Ni e, rethei taka lo seilianin a nupuia putea te awmpui a ni thin. Tihduhdahna nasa tak a tuar a, hnuchham in atanga la chhuaktu an nih vangin an lakah a vui ngam si lo. Kum 23 anihin an hnawtchhuak ta nge nge anih kha. A nupui pawh chung hun lai chuan a hmu fo. Ani chuan a hre tawh kher lo maithei. A vakvai ta kha a nia. Mahse, mi pakhat a lo lang a. Pu Liana tiin an ko mai. Ani chuan society ah lalutin a lehkhathiam theihzia hriain lehkha a zirtir leh a, A tuina ber Doctor zirin hun eng emaw chen vairamah a zu awm leh a. Heng a zirna senso zawng zanwg hi Society-ina a tum vek a ni. A zir zo va, Mizoramah ani aia Doctor thiam leh lar an awm lo chho zui ta a. A nupui Hruaii hian pu Zira a tangina a lo hmelhriat a. Hmana a putea te awmpui a tihduhdah leh a nuihsawh thin Muanpuia kha a ni tih a hre hauh lo. Ni e, Muanpuia kha Ramhluna a ni ta daih si a. Ani erawh chuan a lo la hrereng a. Phuba lak nan a nei hmiah anih kha. Zirliana hi chu a junior a ni thin. Society-a laluttu pawh amah a ni nghe nghe. A nupui chuan fa duhawm tak tak a hrinsak ta a. Kum tam tak an inneih hnuah pawh he hmeichhia hi a hmangaih miah lo tih a chiang ngang mai. Phuba pawh a la ngeiin a inhria. A that lai leh vanglai chhung zawng khan a nupui hriat theih tur ngeiin hmeichhe dang tam tak a ngaizawng a. A lerhsan thin. An nuin a hauh ve lahin tharum hmangin a thunun thin. A fate erawh chuan engmah an hre ve lo. Pi Hruaii hi a mawl bik lo va. Khatia a pasal in a thlim tak foah chuan a khawharna chuan sualah a tluktir ta chiah reng kha a nia. Zira lakah ngei khan. Ani Zira lah in Chairman paihthlakna hmanrua atan a nupui chu a hmang zui ve nghal ta reng a. An inbum tawn vek a lo ni. 

Zochhingpuii a mitthlaah a rawn lang hlawl!  Chair atangin a tho hlawl. A hmai a tuai nawk nawk a. He nau, he tleirawl duhawm leh pawisawi lo tak lakah hian eng thil tha lo mah a thlentir phal bik lo. Anu ang ni ve turin a duh hek lo. Mahse, Emy a hlawhchham chuan Zirliana ten an duhtawkin an nghaisa anga, a thluak an su ang. 

Nausen a ngaihtuah chhuak thut. A vir nawk mai. An buai deuh vangin a lo ngaihthah rei deuh a ni. A enkawltunu khan a enkawl tha em ang chu maw.. Ni e, a nuin a thihsan tak, a pain a duh loh naute kha. Apa duhthlanna ngeiin a faah a la anih kha. Mahse, tuman an hre lo. Nausen chu thi angin an kaltir miau a. Aizawl daia khaw pakhatah nu pakhatin a enkawl mek a ni. Chu nu pakhat chuan chairman lakah bat tam tak a nei a, chuvanga lawm taka enkawlsak a ni reng a ni. 

Ar a khuang thliai thliai a. Mumal lo zetin mu turin pindan lam a pan ta hnak hnak a. 

A tuk khawvar chu thenkhat tan chuan helhawlhna tham anih laiin thenkhat tan lungngaihna ni a ni hial awm e. Tukthuan an ei kham veleh Emy chu a inchei malh malh a. Zoi chuan a lo thlir reng. 

"Ka rei lo vang. Thil dik lo a awm anih chuan Erica a awm a. A buaipui ang che. A thu lo awih rawh aw" a ti mial mial a. Zoi erawh a lo bu nghat ringawt. 

"I va ngui ve" Emy chuan a ti leh a. 

"Atea ka ngai" a lo ti sap a. Emy chuan hrethiam takin ngui deuhin a va melh ve a. "A tha mai ang. Tunah rih chuan tihtheih kan nei si lo a ni. Kan chhuak thei tep aw.. Naute" a ti thawp sat a. 

A chhuah dawn in, "pindan hi lo chhuahsan miah suh aw. Dr Zira leh a hote thawm i hriat rualin hmannia i bihrukna hmunah khan i lut thla dawn nia. Ka lo kir vat ang. " a ti a. An invai liam ta. Zoi chu ruak huaiin a inhria. Pindan rûk lah kha a lut thei bawk si lo. Lehkhabu a chhiar peih rih bawk si lo. A nun chu a ning lek lek. Ramhnuaia an in leh a thiante kha a ngai ngawih ngawih. Khatah kha chuan reh tho mah se, a khua a har hman ngai lo asin le.. Tintina, Huntera leh chimawma te nen an infiam fo va, luiah nise nuamti takin an cheng a. Huntera phei chu mihring ang chiaha biain a kawm thin anih kha. Ramhnuai an chhuahsan dawn khan a putea khan khawpuia an hruai ve theih loh tur thu a sawi a. A lungngai em em anih kha. Ni e, a rem tlat si lo. Huntera nen an inthen dawn phei kha chuan a tap zawih zawih hial a ni. Engtikah tak hmu leh ang maw… 

A hriat loh laiin a mitui a rawn luang ngiai ngiai a. A tho va, a inhruhul a, a lu rawn na leh tan chu a hre reng. A nat tak tak hmaa damdawi ei tumin Emy damdawi bawm chu a hai rawk rawk a. A hmu mai si lo, hmun hrang hrang chu a hai kual a. Chhuar pakhata pangpar khawi chu a titla palh ta hlauh. A tla darh chuai a, chek hlak chungin a zu chharkhawm vat vat.. Darthlalang themin a kut a la át zui. A thing nawk nawk a. Thisen a rawn chhuak tiam tiam a. Tihngaihna hre lo chuan a fawp ta ngawt a. Mak tak maiin thisen chu tui a ti ta tlat!  A fawp ta ngawt ngawt a. Tuihal huam huam ang maiin a vir ruai a. Chokaa chemte chu va lain inngaihtuah fim miah lovin a banrek chu a zai ta a.. Thisen rawn chhuak tiam tiam chu a zuk dawt ta khawlh khawlh mai. Mak takin a lu na a reh hmak. A mah chu a zangkhai sawt a, ruih nei ang mai hian a nuam riai riai a ni ber. A meng phelh phat bawk a. A banreka a zaina hmuamhma chu a tuam phui leh ta phawt a. Na engmah a hre hek lo. Chhuat laiah tak chuan muin chunglam melhin a phun sep sep a. Eng nge a sawi eraeh a hriat theih loh. A maimichhing ta vang vang a. 

"Dory, ka chhuak chak tawh. Ka in pawh ka ngaibtuah tawh" valtea chuan a ti sup a. A dam ve tan viau tawh naa chhuah an la phal chiah si lo. 

"Nghak leh hram hram rawh. I inte chu ka va tlawh zeuh zeuh alawm.. A tha vek" Dory chuan a lo ti dam diai a. He mite pahnih khawvel hi a nawm hmel ngawih ngawih. Valtea thinlung kaptu pakhat a la awm tih mai loh chu. Englai pawha a kuta vuantu Dorothy vangin chak sawt sawtin a inhre thin. Emy'n a rawn tlawh zeuh zeuh bawk a. A tunu that thu hriat chu a tan damna a ni tel bawk. 

Emy khan a dam chian hunah Goa-a chhuk turin a ti a nih kha. A chhan erawh a la hrilh leh em ang chu. A bulah a hmangaihte pahnih an awm dawn phawt chuan khawi hmunah pawh awm se pawi tihna a nei lo. Mahse, Dorothy hi an la rawn zawngin an la chhaihbuai angem tih chu a ngaibtuah fo. Chutiang hun a lo thlen tak leh mipa takin a hmachhawn ve tawh mai ang chu. 

"Kha ei rawh.. A thlum ania" Dory'n Apple zailep a rawn barh lai takin cabinah chuan nula pakhat hmel tha angreng tak hi a rawn lut hlawl mai. Nui sang chungin a rawn pan nghal a. 

"Ate, i dam em? Ka ngai tawh lutuk che" a ti hawm hawm a. A rawn kuah nawk nawk lehnghal. Makti zetin Dory nen chaun an melh reng ringawt. 

A nam kiang deuh a, "Ka tha e.. Ih, ka va hre ngai lo che em.. " Valtea chuan a ti sup a. Chu nula chuan mittui tla lek lek hian, "I tunu Zochhingpuii ka nih hi.. Ate, dam vat rawh aw. Ka ngai lutuk che a. Ka lo tlawh tawp che.. ' a ti mial mial a. Valtea leh Dorothy chuan a hma aia makti hmelpuin an melh leh kâwk!  

"Ngawi teh, tu nge i nih ka hre hauh lo mai. Lem chu rawn chang buai duh suh. Society rawn tirh em ni i nih? " Valtea chuan a hma aia vin deuh hlek hian a ti leh a. Chu nula chu a tap ta faih faih a, "Atea chu min ngaih ve ka ring ania. I tunu ka ni reng sia… ' a ti hliam hliam a. Dory chuan tawng nachang a hre meuh lo. 

A tap chu a tawp thut a. A thutna atang chuan tho thutin Valtea te pahnih chu a melh tawn sek a. 

"Ka.. Ih, khaw nge ka awm a.. Ti nge hetah ka awm? " a ti hû a. Amak aiin mak an lo ti zawk. Dory phei chu a khur lek lek. 

"Min hrethiam ru. Ka hai aniang" a ti leh a. A chhuak ta vut a.  Boruak chu a reh ngawih ngawih mai. 

Emy chu Director office lam panin no zetin a kal hnalh hnalh a..amah tawk apiangin an enzui ziah lehnghal. Hmalam bih ngar chungin a kal thoh thoh a. Director pindan bul a thlen chuan reception dawhkanah chuan, "Director zin a lo la haw lo tiraw? " a tliang ral a. Chu pa chuan a computer chhut lai chu dahin a rawn melh a, 'Mm.. Aw.. Nia, vawiinah a lo haw dawn" a ti bah nak a. Chutiang hmeichhe hleitling leh hmel tha zet chu a hmu zen zen lo aniang e. A buai dat danah. 

"A va pawi  em aw. Englo ania. A zin hma ni khan kan inkawm a, ka file pawimawh lutuk ka theihnghilh hlauh mai a. Keipawh ka zin ve daih a, niminah khan ka lo haw chiah a, vawiinah hian kha file kha kan Manager kutah ka hlan ngei ngei a ngai a" a ti siam siam a. 

"A va pawi tak ve aw.. Amah a awm si lo va. Tihngaihna a va vâng awm ve le" chu pa chuan a lo ti a. Pawi a tih ve hmel tak tak. Mahse, Emy a beidawng mai lo. Dawhkan bawh deuh titihin a rimtuizia hre phak tawk vel in a zuk hnaih a. Mitmeng no zeta melh ralhin, "A pawimawh sia, file kha ka hlan lo anih chuan min ban duh ngei dawn si a. Heti ang dinhmunah hian ding ve la, kei i dinhmunah hian ding ta bawk ila.. Ka luhtir ngei ang che" a ti sap a. Chupa mitmeng chu a buai nak mai. 

"Mahse.. Eng emaw thleng ta se" a lo ti tham tuak a.. 

"Engmah a thleng lo vang. Director hi ka thian tha tak a ni a. Ka hming i sawi chuan buaina a awm lo vang. Muanpuii ka ni e" a ti a. 

Chupa chu a tho tuah tuah a. Hreh hmel zetin chabi a la a, pindan kawngka chu a hawng ta a. 

"Englo ania.. Nimin piah khan Dr Zira'n file a lo dah a.. A pawimawh hmel sia, ka fimkhur mai mai mawle" a ti ta a. Emy a khi sak. Pindan chhungah chuan lutin chu pa pawh chu a rawn lut ve a. File pakhat chu dawhkanah chuan a let va mai. Chupa hmuh laia lak chi a ni si lo, Chhuar vel chu a dap kual lui vel a, A rawn hawi thut. Mitmeng danglam deuha chupa melh chung chuan, "Ka hmuh tawh hnu i ang tawp.. " tiin a rawn pan a, file pakhat a keng bawk. 

"Hei ka hmu e" tiin a lek vah a. Chupa bul a thleng chiah tih chuan a pheikhawk bun chu a lek thut pek a. Chupa chu a va bawh deuh rawp a. 

"Awiij leh…! " a ti tuar bawk. Chupa chuan a lo pawm bet vat a, hnai zetah an inmelh ta ran mai. Chupa lungphu ranzia chu a hre thei. A hmui chu a melh bing ngar a, chupa pawh chuan thil awmzia hai hek lo, eng sawi set set lo vin a rawn fawp chawt mai. Emy nge nge.. 

Duhthawh zeta chupa a kawihher lawp pah chuan a file ken lai chu dawhkanah a dah a. Dawhkan si chatin chupa chu a nawr bet a. Ani lahin a lo hrawm nawk nawk bawk. A kut dinglam chu thlak thlain a file laksa leh dawhkana file let reng chu a thlak thleng ta zauh a. 

"Kan la inhmu leh dawn nia.. " a ti sap a. Hlawhtling inti zetin a chhuak nghal nal nal. Chupa pawh chu a nui sak mai. Hmeichhe danglam tak a ni.. A ti rilru vawng vawng mai. 

Emy chuan a motor tidingin ph call chu a la a, "Aw, Dory, engkim a tha maw?" A ti sap a. 

"Lo kal vat teh. A pawimawh' a rawn ti chul a. A awa manganna chu a hre thei. Hmanhmawh zetin damdawiin lam pan chuan a inkhalh phei ta a. A va thlen chuan an pahnih chuan an lo indawm kun reng mai. 

"Eng nge thleng a? " a ti hû a. Rang takin an rawn hawi chhuak. 

"Khaw nge ka tunu a awm? " Valtea chuan a lo ti thawt a. 

"Bunkerah. Ka pindanah.. Eng nge? " Emy mitmeng a buai nghal. 

Thil awmzia an han sawi takah chuan Emy chu a dâng sáwp sâwp mai. Chhuatah chuan a thu ta hnawk a. A mita mittui tling pam chungin,  "Ni lo.. Hei hi thleng lo tur. ani asin. A theih loh.. " a ti sap a. 

"Emy, i tha em? " Dory chuan a lo ti vat a. Chutah Emy chu harh thut niawm takin a tho vut a, "Ka haw vat a ngai.. Engkim ka siam tha ang. Chuan, zaninah he ta tang hian lo chhuak ngei ngei ang che u.. A chiang em? " a ti. Sawk sawk a. A chezia chu a buai  em vangin ngawi rengin an lo thlir tawp. Motora a luh hnuah chairman a call nghal, "File chu ka kutah a awm. Mahse, buaina kan nei" a ti ta a. 

"Aw sawi rawh.. Emy" a rawn ti a

"Ka fanu nihna a rawn lang tan tawh.. Kum a tlin hunah inti a ni lawm ni?  Engtin nge he thil hi a thlen theih? " a ti tuar tuar a. A thaw a sa vek, a khur hlek hlek bawk. 

Chairman chuan dam thlapin, "Lo thleng phawt la, muangmarin sawi dun ang. Tunah chuan i awmna kha a him lo" a rawn ti a. Emy pawh helhkam. Nei tih hriat takin a inkhalh haw ve leh ta a. 

Kawngkhar a hawng chiah tihin Zoi inbual zo a lo chhuak ve mek a. A fanu chu chik zein a melh vang vang. Chairman khan a lakah engmah an tih loh thu a sawi nasa viau. Kum a tlin hma chuan nunphung pangngai tak a neih tur thu an tiam si a!  Engvang nge… a fanu ban veilam banrek intuam chuan a mit a la nghal. 

"I banrek kha ti nge? " theihtawpa insum chungin a ti a. 

"Awii.. emy, pawi ka ti lutuk. Pangpar khawi ka titla palh a, ka in ât anih hi" a lo ti hliai a. A banrek daih daiha a in ât chu Emy te ang hmeichhe fing tan awih theih a ni lo tawp. Mahse, a zawt zui duh lo. 

"Emy,i hria em?  I kal hnu lawk khan atea ka han tlawh asin.. Mak i ti ngawt ang. Mahse, ka mumangah ka lo tlawh a. Ka ngai hle aniang" a ti leh siam siam a. Emy a tap lo chauh tawh

"Ni e, ni e, kan ngaih deuhte hi mumangah kan hmu thin alawm" a lo ti hram. Bathroomah a lut zui daih. A luak te chu a chhuak ut ut mai. A tah a chhuak takzet a ni. A fanu chuan dawt a sawi tih a hrechiang nasa si a. Darthlalangah chuan a hmai hriam lek lek chu a melh vang vang a. 

"Emy, tihtheih pakhat chiah i nei ta… " a ti sap a. 

A tuk zan dar 7 a pel awrh tihin Emy bunker kawngkhar chu a rawn inhawng thuai a. Emy emaw tiin a va hawi a. Mahse, chairman a ni. 

"I nu an man.. Nang pawh la tur chein an lo kal mek. Min rawn zui rawh" Chairman chuan a ti sawk sawk a. Tukthuan ei khama Emy chhuak kha a lo la haw lo reng a ni. Mak a tih hman hmain chairman chuan a rawn pawt dawrh a. A bangbo takzet a ni. Emy khan a chhuah dawn khan, "Vawiinah i putea te nen Goa -a in kal dan tur kan sawi anga. Naktuk lamah chuan in kal thei mai ang. Zanin zan reiah kan chhuak ru dawn nia" a ti anih kha. Emy hmanhmawh em em ta chu a hrethiam chiah lo. Mahse, he ta inkhung reng ai chuan pawn chhuah chu a chak em rm zawk a. Nghakhlel takin a lo haw hun tur a lo thlir tang tang anih kha.. Mahse, chairman thusawi kha eng nge a awmzia ni ta ang?  Emy an man maw…!! Tu ten.. Engvangin? 

Chairman chuan hmanhmawh zetin a luh chak em em pindan rûk lam chu a panpui a. Code chu a chhu sawk sawk. Kawngka chu a rawn inhawng ta ruau mai. A thim vek.. Meikhu niawm tak a zâm riai bawk. 

"Lut rawh. Hetah hian i him ang.. Ka rawn lak chhuah leh hma loh che chuan i lo tawm daen nia" a ti sup a. 

"Mahse, ka duh lo. Emy'n a phal hleinem" a lo ti ve hlar a. 

"Emy a thi tawh.. Tin, i pa i hmu duh a ni lawm ni?  Hei hi i pa chenna chu a nih hi. I pa bulah hian i him ang.. " tiin a nam lut a. Zoi a rak thawt. Kawngka chu a inkhar phui ta khap.. 

"Ka duh lo.. Khawngaihin.. Lo hawng rawh. Mawh.. Ka duh lo" tiin kawngka chu a chum vak vak a. A tap bawk. 

"Ka fanu" aw danglamin a rawn tih chuan a tawm chawih. A ngawi hmak bawk. Thaw dèp dèp chungin aw rawn chhuahna lam hawi chuan a inher ta a.. 

(In chawh leh ciah chiah 😂😘😘