Thuruk 13

THURÛK… (13)

Ziaktu: Toni Râlte

Zoliansanga chu a vei vut vut a. A rilru a buai ve det!  Eng nge a tih ang a hre lo. A pa ngeiin Sangteii nei turin thutlukna siam turin a nawr ta chu a ni si a. Engvanga khalai hmuna va kal kher kher kha nge maw a nih le.. A bul chu Emy vek. Ani lah hmuh tur a awm hlek lo va. Thei reh takin a reh vawng vawng mai a ni. Nupui nei thei dinhmunah chuan a ding tawh ngei mai. Mahse, a nupui tura a nu leh pate hualsak hi a hmangaih tlat si lo. Chutih a hnekin a hne hluah hluah a ni ber. Mipa a ni a, thutlulna fel tak a siam a ngai. A damchhunga a hmangaih miah lo nena chen dun chu a zuam meuh lo a ni ber. Mahse, video kha a darh chak nasa si a, Sangteii phei chu mualpho tak a ni. A nei lo anih chuan a inthiam thei ang em? A duhthlanna ngeiin sex kha an hmang chu. ani bawk si. Hrai ruih a nih chu a inhria. Mahse, sawi mah se; tu khaw khain an awihsak a ring lem lo. Hotel manager a va biak lah khan a lo bangbo em em bawk. Sangteii nen an inbiak phawt a ngai a ni. 

Sangteii number chu a hmet chhuak a. "Hello" a rawn ti ngui raih mai. 

"Kan inbiak a ngai. Pawn lamah erawh ni lo se, ka lo kal mai ang" a ti a. 

Sangteii te in a va thlen chuan a nu nen an lo awm a. A hmel chu a tla ve dâwk mai. A cher deuh kuam bawk a. A ruk tak chuan a khawngaih ve reng. Mahse, a cho chhuah a ni a, a tuar ve tur a ni. Anu chuan thil awmzia a hriat ve vek vangin Sangteii rooma an lut dun pawh engmah a sawi lem lo. 

Khumah an thu dun ta reng a. 

"Damdawi kha tuiah khan em ni i pawlh? " Zoa chuan a ti bung nghut a. 

"Ummm" a lo ti hmiah. 

"Ti nge? "

"Min neih theih nan" a lo ti leh tawp!  Hmeichhia hian an duhnaah pawisak an lo nei lo tak tak a nih hi. 

"Neih tumna che ka nei hran hleinem" Zoa chuan a ti a. Sangteii chuan a mit a khap fak fak, "Ka lo luhkhung mai ang che" a ti leh hmiah. Zoa chuan he nu hi mak a ti telh telh mai. A mize zawi raih ang kha a ni miah lo. 

'Engpawhnise, chhungkua kan inrawn tlan a ngai a ni. Min tihmualpho tel vena a vang hian case ka file thei. Mahse,  mualpho nasa zawk i ni a, ka ngawi ang. Inneih erawh tunah mai chuan ka thei rih lo" a ti ta a. 

Sangteii chuan thawk la halhin, "Emy vang em ni? " a lo ti a. 

"Maithei. Hmeichhia min force deuhtu te hi ka ngaina lo bawk' a lo ti chang nghut. 

Zanriah an ei laiin Sangteii nen an inbiakna chu a sawi ta a. Anu a ling leh phat. Apain a khap ta hlauh zawk. 

"Bawiha, ka en ka en che hian i hmangaih thei ngang lo niin ka hria. Tu nge i hmangaih dik tak chu min hmelhriattir la, kawng kan dap mai aniang chu" Apa chuan a ti ta thlawt a! 

"Tih loh loh a nih chu. Sangteii mualphozia saw inhre pafa na nge?  In va nunrawng ve. He inah hian Sangteii bak a rawn lawi lut lo vang. Ka la dam ve tek tek chhung chuan" anu chuan thawh hmak pahin a ti ta mai. An pafa chuan a nu chu an melh dun ngawt ngawt. 

"A duha a mualpho alawm. Video-a lo cover te, damdawia min hrai te kha a duhthlanna vek a ni. Anihna takah chuan a lakah hian case ka file thei. Mahse, ka khawngaihna sang ber avangin ka ngawihsan.. Chu chu lawm rawh se.  Ka nei dawn lo. Ka thei lo" Zoa chuan inringtawk takin a lo ti ve hmiah. A nu pawh a beidawn hmel rawih mai. An plan flop tur chu a ui hle a ni ta ve ang. 

Zochhingpuii chu a inbual sar sar a. A taksa nalh zet, nal hen chu a chul kual a. Darthlalang lian zetah chuan a saruakna zawng zawng nen a inenkual vel a. Emy bunkerah hian a tawm renh thei dawn lo tih a hria. A chhuah hma ngeia a pa zawn chhuah a tum bur a ni. Emy chhuah hlanin a lehkhabu leh file a hmuh theih zawng zawng a en tawh. Mahse, apa zawn hmuh nana tangkai pakhatmah a awm lo. Chairman leh a nu hian eng thil emaw takah ruahmanna an siam dun tih leh chu ruahmanna chu amah vanga thleng a ni tih a hre bawk. Emy chu a nu atan a pawm thap tawh. Tina duhin a nu thattu takb tak nise heti hian a hum reng duh lo vang. Aputea lah a ngaihtuah viau bawk si a. Ni tak, aputea chu eng tak ang ang maw.. A va ngai tak em.. Ani pawn a rawn ngai ngawt ang.

A inbual zo a inthlak lai chuan Emy a lo lut a. "Atea chu a tha zel ang chu maw? ' Zoi chuan a lo ti a. 

"Umm Amah hmangaihtu Dorothy'n a enkawl alawm. A tha vat vat mai ang. ' Emy chuan a lo ti a. 

"Anih engtin nge ka awm zel dawn" a ti ta a. Emy chuan a coffee no chu a sawi hliau hliau a, "I putea saw dam se, Dorothy te nen in pathumin Goa-ah chhuk ula ka duh a ni" a ti thawp sat a. 

"Chuan nangmah hi" Zoi chuan ngaibtuah hmel zetin a lo ti a. 

"Kei chu ka tha. Ka chungah engmah an ti thei hleinem" a lo ti mai a. 

"Mahse, min rawn zawng hmu ta se" a lo ti leh a. 

."Ka awm alawm.. " a lo ti leh thliam. 

"Emy saw lai kawngkhar hlui deuh tawh saw tuman an luah lo em ni?" Zoi chuan a lo ti daih a. Emy hmel landan a hmu lo thung. 

"Aw luah loh pindan a nia. An tifai ngai tawh lo bawk.. " a lo ti vat a. 

"Anihte chuan sawtah sawn biru ta mai ila.. Tifai ila, min zawng hmu nang" A ti sap a. Emy a vir zawk a ni ber e. 

"Ni lo e.. Naute, sawtah saw chuan i awm thei lo vang.. " a ti tuar a. A insum hman lo a ni ber. Zoi chuan makti deuh takin a nu chu a melh a, "ngati maw? " a lo ti a. 

"Ih.. Aa.. Saw pindan saw a hrâng alawm.. Ramhuai chenna hmun anih saw.. Ka awmtir thei lo che" a ti bah nuai a. Zoi erawh a ngawi rauh rauh. Huai leh hráng hi a hlau vak tawh lo, Arianna thlarau nen pawh an inkawm fo kha maw.. Anuin chutitaka pindan luh a phal lo chuan luh a tichâk sawt lehnghal. Saw pindan tlabal hmel zetah sawn tu nge awm tih a hre chak takzet. 

Emy chuan vawksa ti hrang chu lian pui puia chanin a hem hmin a, Thlai hnah a chhum bawk.. Chaw hi a ei tam ngai lo viau. Zoi erawh chuan Emy eisiam chu tui a ti viau mai. Ngawi rengin an ei dun mawp mawp a. An eikhamah Zoi chu study roomah lutin lehkhabu chhah pui pakhat chu la in a keu niap niap a. School kal a chak sawt thin. Naupang dangte nena infiam leh class-a thutho te chu a chak ve thin takzet. Mahse, a tun dinhmunah chuan chhuak chi a ni si lo. A lu a na riai riai a, a lungphu a rang hle bawk. Chutia a awm thut chu mak a ti deuh a. 

Thutkhawmna pindanah a va chhuak a, Emy chuan chanchinbu niawm tak a lo bih ngur ngur a. 

"Emy, ka lu hi a na deuh a, ka thinphu hi a rang lutuk bawk" a ti ta sap a. Emy chu rawn hawi chhuak thuaiin ngaihtuah hmel zet hian, "Damdawi ka'n ngaihtuah ang e. Lehkhabu chhiar bansan rih la a tha ang" a ti a. Room dangah lutin damdawi a rawn keng chhuak a. Zoi chuan a lo ei a. 

"Anih ka mu mai dawn" a ti a. Emy chuan a chala fawp zauhin, "Tui deuhin muhil ang che. Kei pawh ka mengrei lo vang" a ti sap a. Mu turin bed roomah a luhsan ta a. A damdawi ei kha a chak deuh nge a na pawh a reh chhawm mai. A mut pawh a chhuak tan deuh nghal. A hriat loh karin a lo muhil daih. Mipa tawng bul bul thawmin a mutui lai chu a rawn tibuai a, a mumang emaw a ti hman. 

Mahse, a han men takah chuan thutkhawmna pindan atanga lo ri chhuak a ni tih a hre thei. An thusawi erawh chiangkuangin a hre thei lo. Chairman a ni maithei tih a ngaihtuah chhuak nghal a, a thu nghal vat. Apa chungchang an sawi leh maithei asin.. Ti rilru chungin a tho ta them them a. Kawngka chu a inkhar phui loh vangin tawng ri pawh kha a hre ruai ruai thei a lo ni. Zawitein kawngka chu a tikau leh hret a. Kawngka bul chetah chuan a ding ta vang vang mai. 

"Chuan, Pu Zira ina luh mai chu i rilruk ta em ni? " Mipa chuan a ti a. Tu aw nge tih a hria. Erica aw a ni. Teh daih chuan… 

"Kawng dang kan nei miau si lo alawm le" Emy chuan a ti hul hak a. 

"Mahse, khawi lai takah nge a awm i hre hleinem" a lo tihsak a. 

"A library roomah emaw an nupa roomah emaw chuan a awm ang. An nupa room luhchilh erawh a harsa viauin a rinawm. Kawng dang nei ila ka ti ve tho" Emy chuan a lo ti ve leh a. 

"Anih Zochhingpuii hi engtia tih zel nge i tum?  Emy, i kawl reng tin hre chunga hre lo anga awm reng hi thil harsa tawpkhawk a ni tih i hria em? " Eric chuan awki hniam deuh zawkin a ti halh a. 

Emy chuan zawi sapin, "Ni e, ka lawm asin. I chungah hian. Ka lamtang i ni tawh nge min set up zawk tihah erawh ka la buai deuh" a lo ti sap a. 

Eric chuan thut hnaih sauh pahin, "Emy, i thusaiw kha ka ngaihtuah tha leh a. Chhungkaw din ka duh ve a ni. Nupui neiha fate nena hlim taka nun hman ve ka duh a ni. Ka set up lo che. Ka dinhmun hlauhawmzia hrereng chungin ka hum hram hram che u anih zawk hi.. Min phatsana tum dang i lo nei leh si anih chuan ka thungrulhna che chu i hrerei viau ang" a ti ta a. Emy pawn a ringhlel hauh lo. 

"Ni ngei rawh se.. Thil hi fel phawt se.. Kan pahnih chungchang chu kan la ngaihtuah dawn nia" a lo ti a. 

"Ka la hriatthiam loh erawh chu Emy, Zochhingpuii hi i eng nge anih takzet? Hetitaka i ngaihtuaha i hum duh zel hi. Tin, tuna i hum chhan leh society chhuahsan tura puih i duh hial chhan hi Dr Zira i huat vang ngawt zawng a ni lo vang" Eric chuan mawlhtu a neih reng chu a sawi ta nge nge a. 

Rei fe a ngawih vang vang hnuah, "Eric, Zohlupuii ka ni a, ka la ni reng alawm.. Emy chu ka hmai kawr a ni a, ka fanu hi ka duhthlanna ngeia he pawl tana hlan ka ni ngei mai. Mahse, ka harh chhuak a, ka tlai deuh tawh naa a theih chen chenah hum zel ka duh a ni. An duh anga an hman theih turin ka fanu hi ka hlan thei lo a ni" a ti ta a. Eric chuan a lo rin ruk sa a nih vangin makti hmel a pu lem lo. Mahse, a ngaih erawh a la ngam zan lo deuh nge, "Mahse, tunah chuan a nih tur ang a la ni chuang hleinem.. Training kan inpe chauh a, Pu Zira nen inzawmna a nei a ni zawk lo maw? " a ti ta a. 

Emy chuan hul haka nuiin, "Nei e. Chairman an paihthlak hunah ka fanu hi hman an tum alawm. An duh dan tihlawhtling turin. Chu chu ka remti lo. Tin, Chairman hi an paihthla thei ta lo anih pawhin ka fanu hi ka la ven a ngai tho dawn tih ka hriat vangin ania Chairman pawh ka vau lawk, engpawh a ti anih phawt chuan a inpuanna zawng zawng saw ka thih hma ngeiin a fapa hnenah ka hlan dawn a ni" a ti a. 

Eric chuan, "Chairman fapa nen khan in la inhmu thin tak tiraw? " thikna tel lek lek hian a lo ti a. 

"Bunkera ka awm chhan ber hi amah alawm. Min zui a bansan thei si lo va" a lo ti awlsam èt thung. 

Eric chuan thawk la halhin, "Mahse, Emy, Zoi bawk chu.. Nangmah hi an enthla mek che a, i fanu chu hetah a awm tih an hre thuaiin ka ring. Tin, an dap lese vek hunah chuan i hum zo in ka ring lo" a ti a. 

"Chutak chu lawm ka buaina.. Thuhrukna tur dang chu pawn lamah a awm ngei mai. Mahse, pawn chhuahpui theihna zawng zawngah an duty vek si a" Emy chuaan a lo ti hawk a. 

"Pakhat chu a awm alawm" Eric chuan a lo ti khauh. Emy chuan melh kâwk pahin, "Chairman pawn a ti. Mahse, ka ti lo vang" a ti hmak a. 

"Mahse, aman engmah a hre chuang hleinem" 

"A hria emaw hre lo emaw apa sawn a fanu a hmuh ve ka remti lo a ni mai' sehchilh deuh nak hian Emy chuan a ti ta a. 

Zochhingpuii a tawm chawih!  Apa chu khawiah nge a awm ang? Apa bulah a him theih tur thu an sawi vek. Mahse, anu ber hian a awmtir duh si lo. He lai hnaiah leh he building chhungah ngei hian a pa chu a awm ve tih a hre thei ta phawt. Mahse, room a tam ropui si, khawi berah nge a awm tak ang le.. 

Pu Zira chuan a nectie phelh thawl pahin a nupui bulah, "Mateii chu va ko teh. Biak ka ngai" a ti a. An nu pawh chu rang taka kalin Sangteii room chu a kik kauh kauh a, "Aw' a rawn ti chuai raih a. 

. "i pa in a be duh che a. " a ti a. Sangteii a chhing sawk. Phur lo zetin a pa te roomah chuan a lut a. Anu erawh choka lamah a phei nghal daih. 

"Zoliansanga chuan neih che a tum lo chiang maw? " a lo ti chang bawng a. 

"Aw.. Hmangaih a nei ka tih kha" Tim dai hian a lo ti a. 

"Anih chuan i va awm chilh mai a ngai dawn anih chu' a lo ti hmuk. 

Sangteij chuan, "Mahse, ka pa, chutiang em em chu ka tithei lo. Khawngaihin. Ti nge ani chu i duh em em.. Min hmangaih lo tu pasalah neihtir min tum ania. Pa, ngaihtuah tha leh hram teh' ngenngawl zet hian a ti a. 

Pu Zira erawh a khawng tlat, "Ka thu anga i tih loha i chunga thleng tur i hriat kha.. Ka sawi ang hian ti la engkim a fel ani mai. Mi hnial hlek suh. ' a ti bau mai si. 

"Ti nge ka chungah hian i nunrawn viau mai le.. " Sangteii chuan a lo ti nghat a. A mittui a tla lek lek mai. Mitmeng nelawm loh zeta a fanu melh chungin, "Ka sawi anga i ti dawn lo anih chuan.. Saw i nu laktlak loh zet nen in chunga ka thiltih dan tur chu i ngaihtuah ngam lo zawk ang" a lo ti vawt raih a. Apa nunrawnzia leh pawnlama thuro, in chhunga keipui a nihzia hre tawh tu a ni a. Sangteii chuan engmah a sawi ngam tawh lo. A mize hloh thak khawpa mualpho taka a pa thu zawm loh hlau sia a awm chhan a ngaihguah thiam lo. Apa hian eng nge a lakah a duh tih a hre lo bawk. Mahse,  hei erawh chiang takin a hria, Zoliansanga nu in apa kuta eng thil emawni a hlan atang khan apa chu a hmanhmawh hle tih a hre thei.

A tleirawl chhuah phat atangin mipa kawm phalsak a ni ngai lo va, a nuta te erawh an zalen hle si. Anu nen a pa thinrim kut an tuar fo va. Kum 2 liamta atang phei kha chuan a pa chuan sal ang deuhthawin a sawngbawl anih kha. A chhan a hre miah lo. Zoliansanga nen an inhriat tak hnu atang phei kha chuan, Zoa a neih loh chuan thahah a vau reng a, Zoa'n hmangaih dang a neih thu a sawi chhuah tum phei kha chuan, "A hmangaih i nih hma loh chuan i bei tur a ni" a ti a. Ani lahin a lo hnial ve si, Room thimah ni 3 leh zan 3 lai a khung a nih kha.. A pa rapthlak a tih zualna leh sakei hlauha a hlauh tak chhan erawh pain a fanu ngei mi dang a pawngsualtir atang khan a ni. Apa thawhpui Erica khan vawi hnih lai a mutpui anih kha. Chu pawh a pa remruatna vek. Khata tang phei kha chuan apa chu mihring angin a en hleithei tawh lo a ni ber. A hlau a, a tih ngawih ngawih a ni ber e. Zoa chuan lo duh vein nei daih se la a duh chhan ber pawh an inah a awm duh tawh loh vang a ni. A lamtang awm chhun anu lah amah vangin kut a tuar ve zel si a. Anu pawh hi chhanchhuaha a pa hmuh phak lo va kal bo daih te a rilruk hial thin. Mahse, anu hian a pa a hmangaihzia a hrait vangin apa hlata kalbopui chu a ngaingam leh thin lo. 

Zoliansanga laka a sihhnip chhan te, mawi lo taka a zar chhen chhante hi a pa nawrna vek a ni. Apa tihlungawi loh chu thih hlauhin a hlau miau si a. Sangteii hringnun phena a pa chet dan pawh hian chhan a nei vek awm si a. Tuin nge hria.. Apa chauh lo chuan an hre lo vang. 

Dorothy leh Valtea pawh an la inenkawl ve mek zel a. Emy bak a rawn kal ngai loh vangin tuman an hmu ve ngai lem lo va, Dory tan tak phei chuan a tha phian. Paparazzi ho te a pumpelh thei ringawt pawh chu nuam a ti phian zawk a. A mipa hmangaih a enkawl bawk nen, Valtea lah a zia chho ve zel bawk a. An pahnih chuan thil tam tak an ti dun fo a ni. Lehkhabu a chhiarsak changte, game khela an nuih hawk hawk changte.. Muk taka an titi changte a awm a. An pahnih khawvel zimte chu nuam an ti tawk hle tih a lang reng mai. Zochhingpuii vangin Dorothy lah Society lamin an hlamchhiah tan lek lek a ni si a. 

Emy chuan Dr Zira ina luh a tum tho Chairman a hrilh zo chiah a ni. Chairman eraeh a ngawi reng. Muk takin eng emaw a ngaihtuah mek a ni ta ve ang. 

"Chairman, i tha em? " ka biak che chu.. Emy chuan a ti a. Chairman chuan a rawn melh kuau a. "Emy, ka fapa nen in mu dun tawh em? " a ti thut mai. 

"Aih.. Engvangin maw? " a lo ti vat. A aw chu a lungawi hmel tehchiam loh. 

"Thil dang ka ngaihtuah daih a.. Dr Zira ina lut lo va File hmuh theib dan tur. Lut ta la, i hlawhchham theihna a sang zawk. Tin, an man maithei che. Tu tana thawk nge i nih tih an hre nghal ang. Min rawn miah lo vin an dah tha che anga, i thihna chu accident angin an lantir bawk ang" a lo ti ta duah a. 

Emy chuan, "Ka hre vek alawm.. Mahse, kawng dang a awm tlat lo' a lo ti hnual raih a. 

"A awm mai thei asin.. " chairman chuan beiseina mitmeng nen a lo ti dût a. 

Emy chuan a melh ringawt. 

"Ka fapa hi kan hman tangkai mai a ngai ang.. " a lo ti sup a. Boruak a reh dûk mai. 

"Engvangin.. " a lo ti chang fak. 

"Emy, hei chen kan kal tawh a. Awmze nei lo va ral daih ka duh hleinem.. Ka fapa hmangin file kan nei thei maithei" a ti a. 

"Ka ti lo vang. " a lo ti ngal ngal thung. 

"Hei hi ka ngen a che. Ka fapa bia la, hmuh i duh thu sawi ang che.. A hrechhuak tawh ta sa sa che a. Hman lai hunah khan kir leh rawh. I kirpui leh ngei tur a ni. Chu chu nang leh i fanu tan a pawimawh" a ti ta mai a. 

Emy a ding hluai, "ka fanu leh keima tan ni lo vin i tan a ni zawk alawm.. A ni lawm ni?  Chairman, hei hi hre rawh. I fapa saw ka la hmangaih reng a, he thil tenawm taka hnuhluh ve ai chuan keiman ka remhriatnain ka bei zawk mai ang. Ka hlawhchham lo vang" a ti vin ta thak a. 

Chairman pawh chu a dang daih. Emy chu a melh vang vang a. A zah lek lek hial. A ngaihtuahna tenawm tak kha chu sawi chhuah leh tawh loh a duh hial. 

"Anih i lut poh aniang chu.. Zaninah em ni? " a ti a. 

"Aw chutak chu meeting i ko tur a ni. Amah Pu Zira hi a awm loh a ngai' Emy chuan a ti a. 

"Aw le, meeting chu ka lo ko ang e" a lo ti thluam a. Emy chu a chhuak zui ta nghal a. 

Zan dar 10 a ri tep, Sangteii te nufa pawh an room ve veah an tawm tawh a. An awmpuinu pawh a mu tawh a nih hmel. An inah hian Pu Zira telin chung ho zawng chu an cheng a ni. Sangteii u te ho an indang vek tawh a, a nau lah phaiah zirna vangin a awm daih bawk si. 

Emy chuan zawitein kawngkapui chu a hawng a. An kalh dawn lo tih a hria, a chhan chu pa ber a la meeting miau a. In chhung chu alo la eng uar a. Thwwm nei lo thei ang berin in chung lamah chuan a pen sak pâwk pâwk a. Pu Zira te nupa room bul chiah roomah chuan lutin lehkhabu intiang ûrh chu a melh kual a. Dawhkan chu a hnawk niah mai. A thil duh zawng chuan a hai let kual a, pawhdawh te..lehkhabu kar zawng zawngte.. A hmu miah lo!  File thuhruk theihna zawng zawng a dap kimin a hria. He Zira hi a fimkhur hle. aniang, a awm tlat lo. A roomah a dah a nih dawn hi. An room kawngka chu zawi theihtawpin a hawng dek dek a. Pu Zira nupui chu chhak lam hawia saisirin a lo mu a. A muhil a ni maithei. Chhuat phah chu a dup hlauh a, a ke pen thawm a hriat vak loh. Almirah chu pathum lai a inhung a, pakhat inkalh tlatah ngeiah chuan file chu a awm a ring. Pahnih kha chu thawmhnaw hlirin a khat ve ve. 

A han pawtin a han nem thin. A sak bur mai si. Chabi a neih a ngai. Chabi awmna a melh kual mek lai chuan Pu Zira nupui chu a rawn inlet thut a. A rang arangin tukverh chhim lam parda phenah a lut nghal. Mahse, a meng lo hrim hrim a. A hmu lo. A thwk leh sâk sâk hnu chuan chabi bawk chu a zawng leh a. A vâng hrep mai. Lu kham hnuai chu a zen de de a. A awm hlauh mai. Lukham hnuaiah kher kher.. 

Almira nena inmil hmel ber tur chu a rawlh lut a. Inmil lo phawt. A hawlh lawr dan dan a, pathum chiah a ban tawh hnuah a inmil thei ta hlauh. A thaw huai mai. Almira a hawn zawng chuan thawm a awm deuh a, a ner sak. A han chawl leh vang vang a. Chutah a hawng chiang ta chauh. File tamzet a lo intiang ûrh a. Safe awm lehchhawngah ngei chuan a awm a ring. Chu mi chabi erawh a zawng hmu thuai. Ni e, File chhah lutuk lo chu a lo mu khiau mai le.. A la chhuak a, a keu thuak thuak. Dr Ramhluna file ngei a ni tih a chian hnuah file pakhat chu safe ah dah lutin Dr Ramhluna file chu a la chhuak ta a. 

Almira a kalh leh mek lai chuan, kawngkapui hawng khap thawm a hre ta. Khai.. Pu Zira a lo haw chiang. Almira lah a inkalh fuh mawh hrep. Thawm siam pawisa tawh lo vin a hawlh rawk rawk a. Pu Zira nupui tep chuap chuap pawh a ngaipawjmawh thei tawh lo. A inkalh thei ta hram e. A ngai angin lukham hnuaiah a dah leh vat. Pu Zira ke pen thawm a hre zui nghal. Room atanga a chhuah chuan an inangching dawn tih a chiang. Bihrukna tur a váng nasa si. Almira pakhat lian deuh tak, an nu thawmhnaw dahna bik a hnuai lamah chuan a lut ta hmiah. Kawngka a khar fel chiah tihin Pu Zira a rawn lut ve chiah!  Thaw dep depin a thawm chu a ngaithla a. Bathrooma a luh veleh chhuah a tum ran mai. Pu Zira pawh chu a inthlak fel hnuah bathroomah chuan a lut ta ngei a. 

Emy chu rang zeta chhuakin file keng chung chuan room chu a chhuahsan ta a. 

A tuka thil thleng erawh chuan a thin a tithawng kher mai. 

Chairmanin hmanhmawh taka a rawn koh vangin a han chho va. 

"File chu ka rawn keng nghal e" tiin a pe zui a. Chairman erawh a hmel a thim a, a chauh hmel ngawih ngawih mai. 

"Emy, kan tlai. Hei a original lo zawk a nia. A original chu Director dawhkanah a mu tawh. Naktukah Director a lo haw dawn" a ti ta a. Emy chu a pai nawk. 

"Anih chuan Director ngei ka bitum a ngai anih chu" a ti ta a.. 

Dr Zira erawh thlamuang takin a clinic lam a pan mek a ni. Hnehna a chan teuh tawhzia a ngaihtuah a. A faifuk rat rat mai. 

Zochhingpuii pawh Emy a chhuak fel chiah tihin room thim lam panin a pen chhat chhat a. Tihtur dang a nei lo bawk a, thil dang buaipui chu a chak ve tlat. 

Kawngka chu a bal leh hle, a kik kauh kauh a. Chhangtu reng an awm lo. A sawi dat dat a. A reh tlawk tlawk mai. Mahse, kawngka sira code hmehna tur lo awm chu a hmu ta a.. A ner sawk. 

Code chu a risk kual vak ringawt. A dik thei der lo. Chutia a hmeh mual mual lai chuan, "Hetah hian lut suh tiin ka hrilh lo che em ni? " a hnunglam atang chuan a rawn ti vawt raih a. A phu zawk. A lehhawi nghal. Emy mitmeng thip zet chu a hmachhawn ta ran a. 

"Ka tihpalh" a ti sap. A. 

"Zaninah kan chhuak ang. Hetah kan him lo. Harsa mah se, kan chhuak ngei tur a ni" Emy chuan a lo ti nghet charh a.. 

(In chawh)