Thuruk 12

THURÛK.. (12)

Ziaktu: Toni Râlte

Dr Zira chuan a hmaa ding chu a melh run run a. Dorothy lah khawng zetin a lo ding bawk. An inmelh ran mai. 

"Engvanga he thutlukna hi siam nge i nih? " Dr Zira chuan a ti a. 

Dory chuan, "Duhthlan theihna nei ka ni a. Ngun taka ka ngaihtuah hnuin he thutlukna hi ka siam a ni. Khawngaihin" a lo ti nghet charh a. 

"Mahse, chuti maia chhuahsan thei i ni hleinem. Ka thua chhuak thei lah i ni hek lo. Chairman te pawh rawn an ngai ang" Dr Zira chuan a ti leh a, a aw chu lungawi lohna hlirin a khat. 

Dory chu a nui lui a, "Nia, hrilh ka tum alawm.. Ka hrilh hmasa che anih hi.. " a lo ti ve mai a. Chutih lai chuan chairman a lo lut ve hlawl. Dr Zira cabinah hian a lut khat viau ania. Chhan tha tak zawng a awm chèk ang chu. 

"Chairman, i lo kal hlauh chu a tihzia e. Hei Dorothy hian society chhuahsan a duh thu a lo sawi mek a.. " Dr Zira chuan nelawm fe hian a lo ti thliam a. 

Chairman chuan mak a tih hmel vak loh. "Chhuahsan theih nise kan chhuak vek tawj ang chu. Dorothy, i thisen i hlan tawh a, i kir thei tawh lo" a ti a. Dory a tum hmak. 

"Anih chuan zaninah ka live anga, engkim ka sawi chhuak ang, viewers ka ngahzia in hria alawm.. Tichuan, ka thih leh ka thi mai ang. Chuti ang thlentir in duh loh chuan min kaltir ula, min umzui lo bawk ula, engmah ka ka atangin a chhuak lo vang" Dory chuan a ti ve ta hmak a. Chairman te chu an inmelh reng ringawt. 

Dorothy danglam thut leh huaisen ta thut chuan a tihlauthawng ve ta deuh anih hmel. He pawl a zawm atangin hna tihtlak engmah a la thawk lo va, an target pakhat Minister ni mek thunun tir tura an sawiho mek lai a ni nghe nghe. Mahse, an tum ang ngawtin thil a thleng dawn lo a nih hmel. Tun generetionah na na na chuan Dorothy aia hna thawk tha thei tur an awm mang si lo, chuvanga ani pawh heta lalut kha an ni reng a. 

"Engvanga i rilru thlak leh nge i nih? " Chairman chuan a ti a. 

"Hmangaih ka nei a ni. Ani nen chuan inneih a, nunphung pangngai neih ka duh. Hetia min thunun tlattu in awm chhung chuan ka zalen lo va, ka hlim thei lo" Dory chuan a ti ta piap piap a. 

"I zalen alawm.. I duh duh i tithei. Hmangaih pawh i nei thei. Mahse, hna i thawk pah thei alawm" Chairman chuan nem deuh zawkin a lo ti a. 

"Ni lo, a ni lo. Min enthla reng a, min umzui reng a. Ka zalen hlawl lo.. Bakah mi dang hruai lut tur khawpin ka thluak a tha ve lo. Ka hmeichhiatna hman tangkaitir min tum anih lek phei chuan… kei chu mi pakhat ta chauh ka ni tawh" Dory chuan a ti leh hmiah. A ngaih dan leh tum dan chu sawhsawn a tum loh hmel kher mai. 

Chairman chu a thaw hawk a, "Aw le, kan lo sawiho ang. Chumi hma chuan hetah awm ang che.. " a ti ta a.. 

Boruak danglam tak takin tun hnaiah a tlak buak nasa a, a rilru pawh a hmang hleithei lo a ni ber. Dr Zira lahin a veh kual renh bawk si. Dorothy chu a intiamna anga a kal theih dawn chuan kaltir mai pawh pawi a ti ta vak lo. Mahse, mi dangin engtin nge an ngaih ang a hre lo. Dr Zira cabina a luh chhan erawh thil dang daih, a fapa leh a fanu chungchanh sawipui a tum zawk kha a nia. Mahse, Dorothy avangin an sawi dun leh thei ta lo. 

Khum chu a che lawih lawih a, mipa leh hmeichhe rum ri, nuam ti awrawl chuan a pawl hneh viau bawk. An zo ta aniang, an thawm chu a sosan hluai hnu lawkah a reh ve ta a. 

Emy chuan a panty hak pahin, "Sawi dun tur kan nei tak asin" a ti sap a. Eric pawh a inha tha ve mek. 

"Umm sawi ila" a lo ti nghut a. 

Emy tawmna bunkerah zu chhukin an inmamawh tawnna an hrithla zo chiah a ni. 

"Englo a nia.. Eric, Buaina i tawk dawn" Emy chuan a ti hlawl mai. Hriatthiam loh hmel deuhin Eric chuan a va melh a. 

"Eng buaina maw" a ti sup a. 

"Dr Zira hian Chairman paihthlak a tum tih ka hria.. Nang pawn i pui ngei bawk. Mahse, niminah khan thuthar ka hria a ni. Chairman dinhmun a luah veleh dah that che a tum. A chhan pawh keimah vangin. Ka hneh tawh cheah a ngai a, thil i hriat hnem em vangin i hlauhawm a ti bawk" Emy chuan zep nei miah lo vin a ti ta a. 

Eric chuan a chal a chuar nâng, "Hei zawng a mak hle mai. I sawi awmzia i hre meuh maw?  Chairman paihthlak tum a! Chutiang ti tur chuan min ngai a maw? " a ti mial mial a. Emy a then sak, "Lemchan i thiam ve lo.. Ka bulah lek phei chuan. In ruahmanna hi a zawng zawng chu ka hre lo. Mahse, ka hre nual ania' a lo ti hmiah. Eric pawh a dang der mai. 

"Chuvang chuan, kan thawk dun tawh ang. Ka nawr miah lo che, mahse, kawng dang i nei lo ania" Emy chuan a tih zawm a. 

Eric chu a tho va, tuisik a va la a, thlit pahin, "Dr Zira chuan min dah tha lul lo vang.. A rin awmchhun ka ni asin" a ti  a. Emy chuan lainat hmel angreng deuh hian a lo melh thung. 

"I ni thin a, tunah keimah vangin a rin loh list ah i awm mek tawh.. Kan inhmuh leh riah dun engkim an hre vek alawm.. " a ti a. 

"Beiseia. anih chiah chu. Min hnaih mah mah thin ka ti reng a. A mak hle mai. Anih eng nge kan tih tak ang? " Erica chuan a ti ta a. 

Emy chuan a bana va kuah chungin, pangchang zet hian, "Chairman hi kan pui anga, kan hneh hunah nunphung pangngai tak nen kan innei ang" a ti a.. 

Eric chuan mak ti fe hian, "Inneih maw?! Kan innei ang maw?  Engvangin? " a lo ti hluai. 

"Engvang vak nge ni ang.. Kan inmamawh tawn a, kan inhrethiam tawn bawk" Emy chuan a lo ti chat a. 

Eric chuan, "Dr Zira chuan engchen nge a thlen tawh. File kha em ni a la buaipui.. Nia, i sawi takah chuan Zochhingpuii ka enkawl tak hnuah hian eng thu mah min hrilh ta lo.. Pawimawh a awm lo anih ka ring ringawt a.. " a ti a. 

Emy chuan, "File kha a la buaipui. Chu chu kan chetlakna tur a ni. Kha file khan Director hnen a thlen hma ngeiin kan chet a ngai' a lo ti a. 

"Kan ru dawn tihna maw? " 

"A ni mai ang chu. Engti kawng mahin min pe phal awm chai si lo va.. " Emy chuan a lo ti a. 

"Ruk chhuah chu a awlai kher lo vang. Mahse, kei hian tihtheih ka nei maithei" a ti ta sup a. Emy pawh a nui sak mai. Kawng chu a inhawng chho tan e. 

Valtea chuan a dawr a khar mek a. A dawr piah lawka Damdawi dawr nghak nula chuan a rawn melh leh reng tih a hai lo. He nula hian vawi tam hnaih a tum thin, mahse, a la insaseng thei zel. Nula hmel tha leh fel hmel tak, ze zawi deuh mai a ni a. A ngainatawm viau bawk. Dawr a hawn atanga ni 2na vel atangin a rawn hel tan tawh anih kha.. Ni e, Valtea hi tlangval lian tak, hmaifang dik zet a ni miau a. A customer te hi a tam zawk mipa an ni zawk a, hmeichhe dawrtu awmchhun te pawn an melh no thei viau nghe nghe. A inzuah buk naa a lang sexy ru tlat!  Chu chu nula tan enliam mai a harsa te pawh a ni ange. Mahse, tunah chuan Dorothy a nei tawh a, mi danga inhambuai loh law law a duh tawh. Nizan lamah Emy thurawn angin Dorothy khan society chhuahsan turin thutlukna kha a siam a. Vawiin lamah a sawi ngei ang a. Phalsak a ni ang nge ni lo vang emgmah a hre bik lo. An la rawn umzui tho chu a ring rilru deuh. Mahse, Dory mitmeng a en hian a lakah lem a chang lo tih a hmu thiam ve tlat! A lakah a zawr mek a, a luangliam em em tih a hai tlat lo. Ani lahin a chhungril takin a lo mamawh ve em em bawk a. A hmangaih em tih hre chiah lo mah se; a bula Dory a awm changa a danglamna erawh a hre hnehsawh viau thung. Tin a lainat tlat bawk. A chhan a hre bik lo. Venhim chu a tihtur niin a hre tlat a, a tum bawk. 

A motor-ah lutin a in lam panin a inkhalh hawng ta a. Khua a thim chhelh tawh a, Bawngkawnah mamawh a lam khawm zuai a. A tlan leh nghal. A in penna tur kawng peng a kual lut tur chu Bawngkawn atanga rawn tlan Bolero chuan a rawn su bur ringawt mai a!  Ani a kual tum lai lo ni si, a indawh fuh viau a. A chal a tauh bur mai. A thim ta vek. Rang takin chu lai hnaia awm te chuan an buaipui ta a. Bolera khalhtu kha tleirawlte a lo ni a, ruih a nei tih a hriat viau mai. A thian te pathum nen an ni nghe nghe. An pawr em em lehnghal. Mahse, Police an rawn lan takah chuan an zia a zawi ta deuh a, Valtea lah a harh thei mai si lo va, Taxi in chulai hnaia awm Pavalai chuan Hospital hnai ber a panpui ta a ni. Chung tleirawlte pawh chu Police in khawmin stationah an hruai ta a. Valtea motor pawh an hun that sak a. 

Tuman an hre si lo, a hruaitupa lahin a hmuh ve zeuh zeuh thu bak sawi tur a hre der lo. Engpawhnise, a hliam a nat hmel angreng sia, buaipui ve phawt chu a tum ta a. Valtea chu casualty atangin ward-ah an sawn a, a harh thei miah lo chu a mak hle. A bek dinglam chu a kak a, thisen a chhuak deuh reng mai. Chu chu em ni nikhaw hre lo va a awm chhan.. Doctorin a en anga a hriat mai ang chu maw.. A phone lah motorah a dah daih bawk si. Dorothy ph call pawh vawi 6 zet a ring quit nghe nghe. 

Zochhingpuii lehkhabu chhiar chu mutchhuakin a rawn zem chiai chiai a. Ni hi a vui zo hleithei meuh lo a ni e. A muhil leh bawrh bawrh mai. A nitin nun dan chu ngaiah a nei tan lek lek tawh a. Ninawm em em pawh a ti tawh lem lo. A taksa fit hunah martial arts leh silai kah te a la zir dawn a. Silai kah tak chu a putea khan a lo zirtir tawh a, a thiam ve sawlh sawlh tawh. Silaia a kah thi ta te kha hriatchhuah chang a nei ve fô!  Mahse, mak deuhin inchhirna a la nei ngai chuang lo. A pi leh pute hmel a mitthla tel zel vang a ni. Khang ruangte kha an phum ang ang khan an la zal renh ang em le.. 

Zanriah ei a hun tawh vangin guard pakhat chuan kawngka a rawn hawng a, a mutchhuah em vangin a meng duh lo lui tlat. Zanriah tur tuihnai zet zet chu Dawhkanah a chhawpsak a, a chhuak zui ve leh mai. Mahse, kawngka a khar leh miah lo. Pawn lama an tawng thawm chu chiang lo ruaiin a hriat theih. 

"Aw.. Nichin mai khan.. Motor nen an insu a. A na viau a niawm e. " tiin pakhat chuan a sawi a. 

A biak pa ni ngei tur chuan, "Zochhingpuii hi hrilh an tum lo mi le? A putea a nih chuan hrilh ve awm tak a nia. Buaipuitu an awm lo te kha an ti sia" a ti mawlh mawlh a. Zoi muhil siar siar harh deuh roh si chu a thu chhuak rang kher mai. A puan sin chu a theh hlim lawp a, hmanhmawh si, thawm dim thei ang berin kawngka hnaiah chuan a va ding ta a. 

"A sutu te chu police kutah an awm mek a, amah Valtea chu an insutna bul lawka pa pakhatin a buaipui ringawt a niawm e. Emy hian a nau a ni tih hria se chuan a buaipui mai awm sia. A khawngaihthlak angreng" pakhat chuan a ti bawrh bawrh a. Zoi erawh a hmui a hup a, a ding khawng reng mai. A riltam tehlul nen chaw ei chakna reng a nei ta hauh lo. A neihchhun, a putea chu nikhaw hre lo vin hmelhriat loh karah a mu mek a nih awm chu!  A mamawh dawn lutuk. Eng nge a tih tak ang le? A za sek a, tih ber tur a hre bawk si lo. Emy be thei tal se a zia tur. Ani lah a reh hmak bawk si. Guard te bula a sawi lahin a chhuah an hlauh vangin an veng uluk sawt zawk ang tih a hlau bawk si. Awmngaihna tak pawh a hre lo. A tah te a chhuak ut ut mai. 

A ngaihtuah fe hnuah zaninah tlanchhuah a rilruk ta a. A hlawhtling ang em a hre lo. Zanriah chu a taksain a mamawh avangin tui ti lo chungin a ei lui nghek a. A ei khamah guard te a ko va, an rawn seng hawi nghal. An chhuak a. Kawngka an kalh ta khap mai. Zoi chu khumah ngawi rengin a thu a. Chhuat a bih ngar ngar bawk. A awmna hmun hi a hrechiang bawk si lo, khawi laiah nge chhuahna kawngka pawh a hre hleithei tawj lo. Mahse, engpawhnise a tum phawt tur a ni. A putea tan. 

Zan dar 8 a ri tep ta. Zoi chu a vial ngawlh ngawlh a, a rum hlet hlet bawk. A thawm chu a ring tial tial a. Pawn lam atang pawn a hriat theih ta hial. Guard pakhat zawk chuan kawngka chu a hawng ta a. Khum bul chhuata Zoi bungbu kût leh rum ngal ngal chu a va hmu ta. Rang takin a va pan a, "Eng nge thleng a? ' a va ti hluai. 

Zoi chu meng sen rum chungin a lo dak chhuak a, "Ka pum a na" a ti tham chhal a. Guard chuan a thianpa a ko vat, an pahnih chuan khumah an zawn chho va, "Nangin Dr Bta va ko rawh. Pawn lamah chhuahpui chi a ni lo vang" tiin pakhat zawk chuan a thianpa chu a hrilh a. Hmanhmawh takin a thianpa chu a chhuak ta a. 

"I tha vat mai ang. Doctor thiam tak kan nei alawm" a ti a. 

"Hetah inenkawl ka duh lo.. Damdawiinah min hruai ru" a lo ti hlar a. 

"Kan thei lo. I training chhung chu hetah i inkhung a ngai.. Thupek a ni tlat" a lo ti bur si. Zoi plan chu a flop ta ringawt. Mahse, kawng dang a ngaihtuah vat. Hei erawh a hlauhawm maithei. Guard chu khumah rawn thu vein a pum chu a chul sak a, misual tak chu niin a lang lo. Mahse, a tihnat a ngai dawn tlat. Guard kawng hrena silai chu a melh ran a, chet lakna hun erawh a nei tam viau lo. 

A thu mu titih a, "Tui ka duh" a ti ta a. Pindan kila cooler-a tui a dawhsak mek lai chuan Zoi chuan a hnunglam atangin a theihtawpa nain, A lehkhabu chhiar lai chhah zet chuan a hlap ta a. A pai nawk. A hamhaih chhungin a silai pai lai chu a va la ta vat a. A tin ta ran mai. 

"Tunah hian ka chhuak dawn a. Min rawn umzui lo turin ka duh che a ni. I thiante rawn thlen hma ngeia he lai hmun ka chhuahsan theih nan kawng min kawhhmuh a ngai bawk. I hrethiam em? " Zoi chuan a ti chang ta khal khal a. Zochhingpuii kum 16 mi lek a ni ang tih rinthiam a harsa kher mai. Hei vang hian em ni an lo vohbik?! 

Guard pawh chuan Zoi mitmeng atangin a fiamthu lo tih a chiang viau mai a. Tin, Beiseia thuihruai a lo kah hlum tawh dan te kha a hre ve bawk. Pal liam mai chi niin a hre lo. A chil a lem khawlh a. 

"Aw le.. A tha alawm.. He ta tanga i chhuah hunah dinglam corridor i zawh anga, thui vak lo hnuah pindan pakhat a lo awm anga, i lut anga, Pindan chhungah chuan pindan tepen a lo awm leh ang. I lut anga, step a lo awm anga. I zawh chho dawn nia. I chhuah chhohna pindan kawngkhar kha hawng la; step a lo awm leh ang a, i zawh leh ang. Bang pakhatin a lo pingdang ang. Kha bang kha nem vak la, a tawlh mai ang. Tichuan toilet roomah i chhuak anga, kha toilet kawngka kha hawng la, pawn i chhuak a ni mai" a ti ta dap dap a. Zoi chuan a ngaithla uluk kher mai. 

"Dawt i sawi anih vaih chuan min man hunah ka bitum hmasa ber ang che.. I hria maw? Ka tihtheih chu i hre mai ang" tiin a han vau deuh a. Chu pa chuan hlau hmel aiin mak tihna a pu nasa zawk. A silai chu Zoi chuan a keng zui ta zel a. Inven nan a mamawh tlat a ni. 

Bungrua engmah a luhpui lo bawk a, a hak lai nen chuan pindan chu a chhuahsan ta a. 

"Tunah rang takin luh chhuah theihna zawng zawng lockdown vek rawh u. Zochhingpuii a tlan chhuak" Guard- chuan a biak hlatna hmang chuan a ti a. Zoi chhuah atanga minute hnih vel lek a ni. He thil hi tih a tum tho vanga Zoi pawh engkim hrilj kha a ni reng a. An man leh hman tho a rin vang a ni. Intercom atangin tlanchhuak an awm thu puan zui nghal a ni ta bawk a. Siren a ri nghal ruai ruai bawk. 

Zoi chu a ding chawt. Thinrim takin a hnaih ber roomah chuan a lut ta vat a. Bungraw dahkhawmna ni ngeiin a lang. Parcel. Lian zet zet a inhung khup mai. Parcel lian deuh pakhat chu a hawng a, saranga pack thil var hlirin a lo khat!  Eng nge a nih a hre hauh lo. Tawmrukna tur a ngaihtuah a ngai. A hawikual a, parcelah chuan thil a awm vek si. Pindan kila chhuar angreng deuh chu a hawng a, a lo ruak hiai. A lut hman tawh. Mahse, he pindana an lo luha an hawn hmasak ber tur niin a hre leh si a. A chhuak leh vut. Thinrim deuhin kawngka chu a hawng leh a, tumah a la hmuh loh vangin a chhuak leh a, corridor bawk chu a zawh leh phawt. Pindan pakhat a lo awm leh a, chu chu kha Guard sawi kha a ni ngei ang. Mahse, lut ta lo vin corridor chu a zawh ta zel a. A tawpah step a lo awm a. A chhuk thla ta ngawt mai. Step tawpah kawngka a lo awm leh tawp. A hawng a, a lo ruak huai. Vaivut nawi te pawh a awm. Ngaih dan a nei ta deuh. Chu roomah chuan a chambang ta a. Bang leh chhuat te chu chik zeta enin a nem pah bawk a. A nghet em em vek. A beidawn tawh lamah vaivut intian urhna lai chhuat chu a han hai fai a. A thaw hawk mai. Inhnuai lam luh theihna kawngka a lo awm reng mai. Chu kawngka chu pawt hawngin step thimn tak lo awm zui chu a zawh ta a. Hlauhna a nei lo. A putea a ngaihtuah ngawih ngawih. 

A zawh zel a, a thui phian. A tawpah corridor bawk a pawh leh hlawl. Lei hnuaiah a awm tawh tih a hrechiang hle. Light a inchhit thluah vangin a thim tawh lem lo va. Silai hum ran chung chuan a kal zel. Chunglam thawm pawh a hre vuai vuai. Hetah daih daih chuan an rawn zawn loh hram a beisei. Tihian khawiah emaw tawmin boruak a reh hunah a chhuak thei mial maithei asin. 

Pindan pakhat a pawh leh ta hlawl a. Mahse, a inkalh tlat. Hawn tumin a sawi thin, a sak bur mai si. Beidawng zetin a hmalam panin a kal leh ta phawt. Thawm a hre ta. A lam pana ke pen tlut tlut thawm niin a hria. A hamhaih ta kher mai. Pen kawina tur pakhatmah a awm bawk si lo. Thawm lah chu a rawn hnai zel si, a tlanin a tlan ta a. A thim telh telh lehnghal. A hma zawnah chuan pindan pakhat chu a va hmu thei. Mahse, kulh kawngka ni mai awma mawi a ni. Luah loh tih hriat zetin a chul bam a, maimawm ril a zam nasa bawk. A kawngka ringawt pawh chutiang a nih chuan a chhung phei chu… 

Mahse, duhthlan tur neiin a inhre lo. Kawngka lam chu a pan zel a, a hnunga pen thwm pawh an rawn hnai zel. Kawngka kalhna a ban chiah tihin a hmui chu tu emaw hian a rawn hup thut mai a, zo zetin kawngka pawh a hmuh loh bang ni maia a hriat chu hawngin chutah chuan a luhpui ta a. A hrethiam chiah. Bang hlira a ngaih zingah khan kawngka a lo awm thluah dawn anih kha. Mahse, a tlai tawh. Hei an man leh ta chu a ni si a! 

In chhung an luh hnu chuan a hmui hupna chu la thlain a hmui huptu chu a hmaah a rawn ding ta a. 

"Nang maw? " Zoi chuan a lo ti tuar. 

"Shhs.. An rawn lut tep. Tah hian lut rawh" tiin carpet a phawk a, mihring lek tawk vel kawngka lo awmah chuan a luhtir ta a. A chep hle. A thim mup bawk. Boruak pawh ren a ngai hle dawn mai. Ngaihtuah pawh nei mang lo vin a thu ta tlawk tlawk a. Silai a hum tawh miah lo tih a hrechhuak chiah bawk. A laksak a ni ngei ang. 

Kawngka chu an rawn kik dat dat a. A sam hui mam thuak thuakin a va hawng a. Beiseia leh Lawma an lo ni. 

"Hetah a rawn kal mial lo maw? " Lawma chuan a ti a. 

"Aih.. Engtin nge a rawn kal theih tehlul ang.. " a lo ti hlak a. 

Beiseia chuan chik zeta rawn melhin, "I lo hum leh duh mai lo maw?  Chuvangin kan en kual dawn" a ti a. An lut nghal. In chhung chu an han enkual vel a. Bungrua pawh an hai. An duh ang erawh an hmu lo. 

"Khawiah emaw chuan a biru a ni ngei ang. Pawn lama chhuah theihna shut down vek a ni a. Khawiah emaw chuan a awm a ni" Lawma chuan a ti a. 

"Pindanah sawn a lut a ni thei ang em? " Beiseia chuan ngaihtuah nei deuh hian a ti su su a. 

"Ka ring lo" Lawm'n a lo ti thung. Room chhungah an hmuh miau loh vangin an kal lohna lama zawng leh turin an letsan leh ta a. 

"Hei… i tha em? I thaw a lo chham hman pek a ni maw.. Aw le.. A tha e.. I tha ania.. Engmah hlauh tur a awm tawh lo" A ti sar sar a. 

Zoi pawh a rawn meng diar diar a. A khuh thawt thawt. A thaw kâwk kâwk a. A hmaa thu chuan a lo nuih sen sen. 

"Emy, min pui rawh" a ti tham chhal a. 

"Ka hria.. Ka pui dawn che alawm.. Mahse, tunah chuan i chhuak thei rih lo..hetah hian i tawm rih a ngai a ni" a lo ti a. A hrethiam. 

"Ti nge hetah i awm?  Engtin nge min rawn hmuh theih? " Zoi chuan a ti mawlh mawlh a. 

"Engkim ka hre ve alawm.. He lamah i lo tlan dawn tih erawh ka hre lo. Zawn tum chein ka lo chhuak a, saw lai pindan kha hawn i tum mek niin ka hria " Emy chuan a ti a. 

"Heta i awm chhan chu?  An hrem che em ni? " hriat chak hmel zet hian a ti a. 

Emy chuan nui chungin, "Hrem lo ve. Pawn lamah tibuaitu ka neih vangin hetah ka inkhung rih mai mai.. Chuan engvanga tlanchhuak nge i nih? " a ti a. A la hre ve miah lo a nih hmel. 

"Atea a dam lo. A accident a, damdawiinah a awm alawm.. Buaipuitu pawh a nei lo. Eng emaw tal ti rawh.. Emy" ngenngawl zet hian Zoi chuan a ti ta a. Emy pawh a hamhaih viau. A na chu damdawiinah a awm mek a maw?  Tu chuan nge buaipui ang. A rilru a buai takzet. 

"Aw le.. Umm.. A tha e.. Naute, keimah ka kal ang. Nang chu hetah i lo awm ang. I hmel an hmuh chuan an khung leh nghal dawn che. Ka duh aiin thil a thleng chak. Keipawh muanhchang hman ka ni tlat lo. Dorothy kan bia ange.. " a ti sawk sawk a. Dory a call nghal. A nau chetsual dan a sawi zung zung a, Dory chu a rang thei ang bera damdawiina kal turin a ti bawk. Ani pawh a rawn kal ve tur thu nen.. zoi chuan a lo thlir reng ringawt. 

"Enteh, hetah hian nangmahin i lo awm ang. Engmah hlauh tur a awm lo. He floor ah hian keimah chiah ka cheng a, ka chung floorah khian mi pathum vel an cheng bawk. Hlauh tur a awm lo ania. Kawngka chu pawn lamah ka kalh mai ang. I hrethiam tiraw.. Ka naute" a ti dam diai a. Zoi pawh a bu nghat. Emy bak belh tur a nei lrh si lo chuan a lungte a tichhe lek lek mai. 

Emy chu a insiam saek sawk a. A chala rawn fawp zauhin a chhuahsan ta a. Tunah chuan a mal leh ta tlawk tlawk mai. Khum lianpuiah chuan chunglam melhin a mu ta reng a. 

Emy chuan in chung a chuang chhuak a, Zochhingpuii vangin midang ho chu an phusa viau. An Headquater hi a lian tham si a, an zawn nasat chu a ngai viau maithei a ni. Bunker ringawt pawh a awm nual si. Hotu lawk zual erawh an haw tawh hlawm vangin hmuh tur an awm lo. Dr Zira erawh a lo thleng pheo leh hman tawh. Emy a hmuh chuan, "Khaw nge i kal dawn? " a ti a. 

"Chhuah lawk ka ngai. A pawimawh lutuk. " a lo ti mai a. 

"Zochhingpuii aia pawimawh an awm em ni?  Chhuak suh. Nge Zochhingpuii tan chance i siamsak zawk? Plan te i lo nei reng lo maw? " rinhlelh hmel zet hian a ti a. Emy a meng ling phat, "Enteh, hotu dinhmunah chuan i ding a ni maithei. Mahse, k chhuak dawn. Min lo dal i tum anih chuan i lu ka thlawh darh ang. Ka mimal buaina a ni. A chiang em? " a ti ta hmiah mai a. Chutih lai tak chuan mi pakhat hian, "Pu Zir, bungraw la tur an lo thleng chawp chilh lehnghal.. " a rawn ti ta hlauh a. An inbiak buai laiin Emy chu a kal sawn daih. 

Zoliansanga chuan a room kawngka chu hawngin a nu nen an inhmachhawn ran mai. "Eng nge a.. Nu" a ti liam puat a. Anu chu a serious hmel kher mai. 

"He thil hi i sawifiah dawn em? " tiin a phone chu lek kangin video chu a play ta a. Zoa chu a tawlhsawn dawrh. Khai a!  Sangteii nen an chet dunna kha ngialngan takin a hmaah pholan a ni tlat mai. Engtin nge a nih theih. Zingah a harh khan a bula sangteii lo mu avang khan a buai deuh a, mahse,  angaihtuah chhuak ve leh mai. A duh loh thil a tih vang chuan pawi a ti khawp mai. Mahse, siam that dan a awm tawh si lo. Sangteii a thlah haw a, a haw zui ve nghal mai kha a nia. 

"Ka hre lo" a lo ti tawp. Anu chuan chiang zetin a melh ran bawk si. Chutih lai mek chuan apa chu hmanhmawh takin room atangin a lo chhuak ve nghal a. Chhuah a tum anih hmel. 

"Khaw nge tun ang zanah i kal dawn?" A nu chuan a lo ti vat a

Stepa chhuk thla zawt zawt pahin, "A pawimawh.. Zingah ka rawn haw ang" a ti satliah a. A chhuak a ni mai. 

"Nu, hei hi khawi atangin nge i neih? " a ti a. 

"Ka thiannu min lo thawn anih hi. A darh viau tawh a niawm e.. Sangteii chu i duh lo ni khan ka hre si a" tiel rawngkai lek lek hian a ti a. 

"Ka duh vanga thil thleng a ni hleinem. Min bum chhuak a, min hrai rui alawm" a lo ti hmak. 

Anu chuan, "Engpawhnise, Sangteii chu a hmingchhe hle dawn mai a. I neih mai a ngai dawn a ni. Kawng dang a awm lo. Ngun takin ngaihtuah ang che. Hmeichhe pakhat hringnun hi i tichhe vek dawn nge.. I tuamhlawm dawn tih hi" a ti ta a. Zoa chuan a chhang tawh lo. 

Anu chhuah hnu chuan a vei sek a. A buai ve takxet. A hmel a lang chiang ngang si a. Sangteii pawh a chiang khawp. Tuin nge lo cover ang.. A chhui chhuah ngei a ngai dawn a ni. Sangteii chu ngei rilru viau mah se; anu sawi ang khan a khawngaihthlak tihna chen pawh a nei ta deuh. Mahse, neih em chu a ngaihtuah zanwg pawn a ner sawk. Emy in a hmu ve tawh ang em.. A hmu anih ngat chuan a na ve ngei ngei ang. A nat ve a beisei ringawt pawh chu tlawmthlak a ti letling. Jona a bia a, a tuka hotela kalpuiah a sawm. Jona pawn video chu a lo hmu ve tawh a, mipa ngang an nia, an mualpho dan a nep deuh bawk a, a rawn uankhum zaw mah. Zoa erawh mawlhtu a neih miau vangin a nui hleithei lo achha a ni e. 

Dorothy chuan Valtea lu an tuam var lûk chu a chul a, a hmel chu a ngui takzet. A ngaihdanah chuan society te thiltih anih a ring bur. Chhuahsan a tum vangin a hmangaih lakah chet an rawn laah a ngai. A thinur hlur mai. Emy'n a lo biak lai khan engmah a la hre lo va, Valtean a call a lak theih loh vangin a ina va kal tuma a insiam mek lai a ni nghe nghe. Emy thusawi vang khan a khawng lo chauh a ni. Hmanhmaeh zetin damdawiin a pan nghal a, an dahna Hospital ber a hre baek si lo. Mahse, Accident an tawhna atanga hnai berah an dah rinna a neih vangin Bawngkawn lamah a tlan ta nghal a. A kal sual lo hlauh bawk. Cabin awl a lo awm hlauh a!  Rang takin an indahlut zui ta a ni. Mi dang bula Valtea awmtir ve chu amah mi lar a lo ni bawk nen, thil a kal dik loh a hlau ve deuh a. Cabin lo ruak chu a lawm viau. 

Emy a rawn lut hlawl. A tlai tawh viau mai. A nau bulah chuan thuin mittui tling pamin a melh ta reng a. 

"A thi thei lo ania. Ka nau hi" a ti sap. 

"Dory, i kutah ka dah aw. I hmangaih tih ka hria. Lo enkawl tawp la, i enkawlna man chu ka pe leh vek ang che. Thil dang buaipui tur ka ngah si a. Duh anga zingin ka rawn lang thei kher lo vang. Min lo hrethiam hram hram dawn nia" a ti zui mawlh mawlh a. 

"Enkawlna man engmah ka phût lo. Ni e, i hna kha tha takin thawk la, lo ngaihtuah miah suh. Ka awm alawm" Dory pawh chuan a lo ti ve thliam a. Emy pawh a thaw huai mai. 

A tuk tlai lam dar 3 velah Dr Zira cabinah Erica chu a lut a. Mi dang panga an awm ve bawk. 

"Ruahmanna a kal tluang zel em? " Eric chuan a ti a. 

Dr Zira chuan, "Kan tluang a, kan tluang lo bawk. Dorothy vangin plan kan thlak leh mek a, mahse, Zochhingpuii a bo leh bawk si" a lo ti nghat a. A lungawi chiah lo tih a lang reng. 

"Eng plan maw? Ti nge engmah ka hriat tawh ngai loh? " Erica aw a ngaihnobei lohna chu a chiang viau. 

"I buai em a, kan hrilh lo mai mai che alawm.. Zochhingpuii bulah i tâp chawt si a. Ni e, Dorothy khan society chhuahsan a tum vangin plan kan thlak a. Bakah ani hi rintlak niin ka hre tlat lo. Saihlum pakhata sava pahnih perhthlak kan tum ta zawk a. Dorothy a chhuak anih pawn Zochhingpuii saw kan lama behtir dan kan zawng ang tiin. Vohbik a ni bawk a, kan thei anih phawt chuan chu aia tha reng reng a awm lo tih i hriat kha" Dr Zira chuan a ti ta dap dap a. 

Erica chuan, "Ka sawi reng alawm.. A. Hma pawn. Engah nge Dorothy kha hman in tum teh tlat reng ni. Chairman kan paihthlak theih phawt chuan Zochhingpuii chu kan kut a ni mai a. An nufaa dah that kha a kawng lo lulai em a ni. Kan lamtanga siama kan hmanrua atana chher tluka tha kha ka hre lo reng a. Tunah min zawm ve leh ta chu a nia. A lawmawm e" a ti nghat nghat a. Nuam a tih hmel viau. 

Dr Zira thu chuan, "Ni e, chu chu a tha. Mahse, tunah chuan Zochhingpuii ber a bo tlat si a! " a lo ti chuar chuar a. 

"Emy room in en tawh em? " Eric chuan a ti vat. 

"Beiseia ngeiin a en tawh. A awm lo. Bakah khulam daih daihah a kal a rinawm loh.. He kulh chhunga a awm phawt chuan zawn hmuh hun kan la nei em em ang" Dr Zira chuan tumruh tih hriat zetin a lo ti a. 

Mi dang an chhuah fel hnuah Erica chu a la tawi khawmuang  a. 

"Mimal taka biak che ka duh" a ti sup a. 

"Umm sawi la" Dr Zira chuan a lo ti  a. 

"File kha Emy hian ruk a tum tih i hria em? " a ti ta a. 

"Ka hriat i ring em?  Ka hre lo va, ka ring zawk. Chuvang chuan hmun him takah ka dah" Dr Zira chuan a lo ti a. 

"A that nasat chu.. Emy hian hlawhchham a tum ngai si lo va, ka lo vengthawng deuh mai mai" Eric chuan a ti a

"Anih Emyin file ruk a tum tih chu khawi atangin nge i hriat? " Dr Zira chuan a ti ta khalh a. 

"Ele, Emy tawngkam atangin. Ka bulah a sawi alawm.. A lamtanga min hmin a tum a. Nangin min thah i tum thu a sawi bawk" Eric chuan chiang fekfawk hian a lo ti a. 

"Eric, Erica chu i lo la ni reng mai ka ti.. Ka nau, i titha e.. Emy itawmna sawn a hneh tawh che emaw ka lo ti hman asin.. " Dr Zira chuan Erica darah a beng thak thak a. 

"Chuti maia ka chanvo hi ka hralh phal hleinem. Emy thluak te chu ka man thiam ve alawm.. Chuan, fimkhur takin File chu lo vawng tha khiau rawh aw. Keiin a kawng dal ka lo tum zel ang" Eric chuan a ti leh a. 

Dr Zira chuan, "Lungngai suh. A ruk mai theih turin hetah ka kawl hleinem. Ka in chhunga rawn luh ngawtna chhan tur chhuanlam kan siamsak lo anih phawt chuan File chu a him ani mai" a ti ta a. An chhuak zui ta nghal a. 

Chairmanin Dr Zira chu a koh vangin chairman roomah a lut zui a. Eric erawh kal zelin a cabinah a lut a. A hawi kual vak hnuah a phone. aphawrh a. Emy a call nghal, "Aw.. File chu a inah a dah e" a ti zawi ta sup a. 

Chairman chuan, "Pu Zir, ka fapa leh i fanu video darh mek chuan boruak a siam ta hat chu ania. Engtia hmalak chi nge ni ta ang" tiin Dr Zira chu a melh a. 

"Nia, a buaithlak viau. Ka fanu sawn i fapa a atchilhzia ka hria. I fapa bia la, innei mai rawh se.. " Dr Zira chuan a lo ti a. 

Chairman chuan, "Aw le.. Ka lo bia ang. A rang lama inneihna buatsaih a tha. In pawi kan sawi ang a nia. A nuam fahran lo. Mipa mualpho chhung chu a rei lo va,Sangteii erawh an hriatsak reng awm si a. Chumi khuhbo nan chuan ka mo nu a nih a ngai a ni" a ti a. Dr Zira chhungril lawmna chu a sosang hle. Chairman chuan chu chu a hai hauh si lo. 

Zochhingpuii pawh zawn kal reng a ni a. A váng rih hle mai. 

Emy bunkerah Chairman chu a chhuk thoh thoh a. Emy kawngka hawng tur nen an innangching. An lut dun ta a. 

"Hetah a awm em? " chairman chuan a ti nghal. 

Emy chuan chik zeta chairman melhin, "Aw.. " a ti ta hmiah a. 

"A that chu.. Chuan, Emy, eng nge i ruahmanna? " a ti ta a. 

"Tihian awm se, boruak a ziaawm hunah ram dangah thawn ka tum. Dorothy leh Valtea te bulah a cheng ang.. Chu chu a hmaa kan ruahmanna nen a danglam hran lo" Emy chuan a ti a. 

Chairman chuan,"Mahse, thil pakhat i hmaih. File ka kutah a la awm hauh lo a nia. Tin, Dr Zira ten Zochhingpuii an thlan leh zawk vangin ngawrh theihtawpin an zawng dawn" a ti a. Emy a meng kawk, "An thlang a?! " a lo ti tuar. 

"Aw.. Dorothy a hman tlak tak si lohah chuan kei min paihthlaka nang leh i fanu hi hrual che u an tum" a lo ti hmiah. 

Emy chu a thu hnawk. Chhuat chu a melh ran a. "Ka tihtir ngai lo vang. Ka chet vat a ngai anih chu. Zoi pawh hetah a him lo, khawiahmah a him dawn lo.. Eng nge ka tih ang? " a ti khur dat dat a. 

"Hmun pakhat chu a awm. A himna tur chu.. " chairman chuan a lo ti sup a. 

Emy chuan chairman a melh kawk, "Ni lul lo mai. A teuh lo. Ka awmtir thei lo vang" a lo ti fun a. 

"Mahse, i room i chhuahsan hunah an lut anga, an suasam thei. Tunah khaw nge Zochhingpuii chu" chairman chuan a ti a. An inbiak tui atalangin Zoi a awm ve tih an lo hrechang tawh lo a ni. Emy chu a tho vat a. Bed room kawngka chu a hawng a. A fanu muhil lai chu a thlir ta reng a. 

Chairman pawh chuan a rawn thlir ve a. "Emy, ti mai rawh. Kawng dang a awm lo. A rei dawn chuang lo. I fanu hi a him i duh takzet chuan.. " a ti hniam raih a. 

Emy chu a thaw halh, "Apa bula awmtir ai chuan thi se a tha zawk" a lo ti hmiah. Chairman pawh a chek hluk ringawt. 

Chairman chhuah hnuah Emy chu inbual turin bathroomah a lut  a. Rilru kawmin ngawi rengin a inbual mawlh mawlh. 

Zochhingpuii maimichhing chu a rawn meng hlawl a. Emy leh Chairman inbiakna zawng zawng kha hmaih nei miah lo vin a hre vek. Hriatchian a chak ber erawh an sawi thui si lo. Amah hi mi eng emaw tak chu a ni tih a inhrechiang tawh. Tu nge a nih a?  Tu fanu nge a nih.. Tu nge a pa tih chu tuman an hrilh ngai dawn lo nia a hriat avangin amah ngeiin zawn chhuah a tum bur tawh a ni. 

Emy khum bul dawhkana pyramid lem ding chu melh vang vang chungin, "Ka pa hi tu nge anih tih ka hriatchhuah hma loh chuan, ka thi lo vang.. " a ti vawt raih a. 

(Tawp leh ta 😍😍😁