Thuruk 11

THURÛK… (11)

Ziaktu: Toni Râlte

Zochhingpuii muhil thaw sák sák chu a melh ngawih ngawih a. Erica khan kawngka kalh lo vin a chhuahsan tak tak kha a nia. Guards te hnenah, Erica'n a tirh thu sawiin a lut thei ta hram kha a nia. A fanu chu a cher hlein a hria. A rilru a hmang nasa dawn tih a chiang reng. Ani ang kum naupangteah chuan a hun tawn chu manganpui tham a tling tlat a ni. Arianna thawm erawh a reh ta nge, an hriat lohin an lo la inkawm ru reng tih chu tuman an hre lo. Ngam leh ngam lo vin a chal chu a zuk khawih a, a che dat a. Emy chuan a kut a la sawn dat. A chang chuan a rai tirha a lo titla mai lo kha a inchhir rum rum thin..a lainat ngawih ngawih a ni ber mai. Bunkerah a khawsak tawh dawn avangin a hmuh fô theih a beisei. 

A muttui em vangin tihharh hlau takin kawngka chu a hawng a. Mahse, "Emy" rawn titu avang chuan a ding chawt. Kawngka chu a khar leh ta riai riai a. 

Zoi chu ham bai bai chungin a lo thu chhuak a. "Eng nge i rawn tih? " a ti a. 

Emy chuan, "Ka ngai lutuk che a. Ka lo kal tawp" a ti a. 

A nui hak. "Ka putea a tha em? " a ti a. 

"Umm a tha. A ngaihtuah khawp mai che" a ti a. Khumah chuan a thu thla ve nghal a. 

"Ka ngai khawp mai. Mahse, ka awm rei telh telh a, he hmuna ka tihtur ka hrechiang tawlh tawlh.. He society hi ka phin darh vek hma loh chuan ka awm mai mai dawn lo" a kum ngaihtuah aiin a tawngkam chu a puitling. 

Emy chuan, "Arianna chuan a tibuai tawh lo che a ni maw? " a ti a. 

"Umm.. A rawn lang ngai tawh miah lo. A chhan chu ka pain a phal tawh lo a ni awm e.. Chumi sawi tur erawh chuan a lo kal" a ti ta a. Emy a kang awk.. "I pa i hre tawh maw?! " a ti hû a. A khur deuh dawt bawk. 

"Hre nang. Arianna khan sawi a tum a. Mahse, Chairman a lo lut a. A kalbo ta a ni.. Nangmah hian min hrilh ka beisei" a ti ta a. 

"Chairmanin a hun tur a bituk tawh alawm.. I pa chu i hmu thei tep tawh e" theihtawpa insum chungin a lo ti a. 

"Ka nu i nih si chuan ka pa nen nupa in ni lo em ni? " Zoi chuan a ti ta a. 

Emy a tim sawk, "Ni lo. Kan ni ngai lo bawk ang" a lo ti hrâwk a. Zoi chuan hriatthiam loh hmel takin a melh ran mai. 

"Engpawhnise, hetah ka khawsa tawh dawn a. Hun eng emawti chhung chu. Ka lo kal fo ang. Min ring tawh em? " Emy chuan a ti a. 

"Rin che ka tum mek a ni" a lo ti khauh. 

"Min rin theih ngei ka beisei tlat a ni. He society-a inphiarrukna pawh hi ka la hrilh vek ang che. Tunah chuan thu i awih phawt a ngai. A rei tawh dawn lo" Emy chuan a ti sawk sawk a. Guard ho thawm a hriat vangin, "Ka rei an ti deuh aniang. Ka kal phawt ange.. Lo tha rawh aw" a ti a. A chalah a fawp zauh a. A chhuak zui ta nghal a. Zochhingpuii chuan a melh zui vawng vawng mai. 

Dorothy chu zai rat rat chungin a inbual a. Valtea nen an mutdun atang khan mak takin amahah thawvenna leh hlim riauna a awm ta a, nuam a ti a, dam reng a duh. Emy tanpui chu a dik nge dik lo tih a ngaihtuah pha lo, Valtea laichin a nih vang zawkin a pui ni maiin a ngai. Zoliansanga kha a hmangaih emaw. alo ti thin a. Mahse, a nuna valtea a rawn lan tak atang kha chuan Zoliansanga hming a ngaihtuah chhuak ngai miah lo. Amah pawn mak a inti. Vawiinah programme a neih vangin a chhuak dawn a, zanah erawh Valtea khum a tawm leh ang chu… Pu Zira lah hian a rawn be reng mai si a. Intihrinawm nan eng emaw a phuahchawp chu a la ngai a ni. Valtea chu a thuhnuaia dah a tum lo bur.. Emy hian an society hi tichhe vat se, nun thar nen Valtea nena inneih a suangtuah hial a ni. 

A inthlak laiin Dr Zira bawkin a lo call leh.. Phur fahran lo vin a la a, "Emy chu Bunkerah a cheng dawn a. Chairman fapa laka tlanchhiat nan.. Kan tan pawh a tha angreng. I hna kha tha takin lo thawk zel la, Valtea pawh chu hmin ngei lo tum ang che.. " a rawn ti a. 

"Chumi thu sawi tur ringawta min lo biak" a ti hlak a. Dr Zira chu a rawn nui hawk hawk a, "I tihtur i hlawhchham ka hlau alawm.. Anih tha takin le" a ti a. A dah zui nghal. Dory chuan ner sak chungjn ph chu khumah a thehthla a, a inchei zui nghal mawlh mawlh. Mahse, englai pawha enthlak leh zuiruk ni anga a inhriatna chu a bo thei tak tak lo va, chu chuan a awm a tinuam lo fô thin. 

Chairman chu a office-ah a vei nghut nghut a. Emy chuan hahdam hmel zeta thuin a lo thlir reng thung. 

"Kha file kha Zira kuta a awm anih chuan kei chu ka ral a ni nghal mai. Ka nupui ngeiin a lo hlan tihna a ni a. Eng nge ka tih ang? " tiin amah leh amah chu a inbia a ni ber mai. A thlan te chu a bawl tawk tawk mai. 

Emy chuan aw thian kharhin, "Dah tha mai rawh" a lo ti a. 

"Ka dah that ruala thil thleng tur i hriat kha. Zira leh a hote hi an inzarpharh hneh tawh lutuk. Kan ngam lo vang. Kha file in Diretor dawhkan a thlen hma ngeia ruk chhuah a ngai zawk a ni" a ti ta a. Emy chu awmze nei zetin a va melh a. 

"Keiman maw.. Ni lo ve. Beiseia ten min enthla reng a, chet ka la thei lo vang.. Dr Zira'n min ring lo hul hual tih i hre bawk" a lo ti vat a. 

"Mahse, Emy, thluak i la nei alawm.. A ni lawm ni? I fanu saw i hmangaih takzet anih chuan ka tan hei hi i ti tur a ni" Chairman chuan a ti a. 

"Ka tan eng nge i tih ang? " a lo ti fak a. 

"I fanu sawn a pa a hmu lo vang. Chu chu a tha tawk viau lo maw?  Apa a hriat kha i hlauh ber a ni lawm ni? " chairman chuan a ti ta a. 

Emy chu a inngaihtuah rauh rauh mai. "Mahse, an ni chuan Dorothy hi hman an tum kha a nia, ka fanu hmakhua ngaihtuah chuan an duh dan anga chettir zel hi a thlanawm zawk asin" a ti muang charh a. 

Chairman chu a thu hnawk a. "Ngaihtuah mai chuan a dik ang. Mahse, hei erawh theihnghilh lo la, i fanu saw an tan mutan a nih tlat avangin an that ngei ang. Nang leh i nau te nen' a ti ta a. Emy hmel chu a rum sawt. 

"Ka puih chea Dr Zira te kan hneh chuan ka fanu sawn a dinhmun a luah anga, in duhthusam a thleng dik ang. De Zira ka pui anih chuan kei leh ka fanu kan thi ang.. Hmm.. A khirh hle mai.. Thih hi ka hlau lo.. Mahse, ka fanu sawn pangngai takin nun hmang se ka duh a ni' a ti a.. 

"Chu chu a thleng thei maithei asin. Min puia he society thuneihna fawng vuantu ka la nih chhung chuan.. " chairman chuan a lo ti dam dap a. 

"Mahse, engtin, tupawn ka fanu nihna an hria alawm.. " a lo ti a. 

Chairman chu Emy lama va thu âwnin, "Tupawn an hria. Mahse, apa hi tupawn an hmu vek lo. Vohbik a ni tih chiah hria hi a tam zawk an ni. Nang hian Zochhingpuii pa dik tak zawk tia mi dang i puhthluk theih chuan an rilru hmin turin hun tam a ngai lo vang. Tichuan, i fanu leh nang in zalen thei ang. Emy, offer tha tak a ni asin. Tun atng chuan ka tan thawk tawh ang che" Inring tawk zet hian a ti ta a. Emy mitmeng pawh a buai nak mai. Chairman hi rinngam chi a ni ang em? 

"Mahse, i la ngaihtuah kim lo deuh. Ka fanu pa chu thlak thei mah ila, tuin nge a ai awh anga, tu nge vohbik kan nihtir ang? " a ti hak a. 

"Chu zawng kan la ngaihtuah zel mai ang chu. Zira hian a fanu leh ka fapa inneihtir a duh viau chhan chu an fa hmasa ber kha vohbik ni tura hrual a duh niin ka ngai a. A chhan chu an thisenah sawn kan thisen a tel ve ve tlat a!  Chu chu keipawn thlentir loh ka duh ve tho.. I hna thawk zo la, Zira leh a hote hi chingfel phawt la, naupang chu kan hmu mai ang" chairman chuan a ti ta a. Emy chu a ding a, "I rintlak tih engtin nge ka rin theih ang? ' chairman mita melh chungin a ti ve ta sap a. 

"Emy, ka lo rintlak ta lo anih chuan ka chungah engpawh i tithei ang. Tunah mai chuan thu dehkilh tur ka nei rih lo a ni" a lo ti hul hak a. 

A phone lek va chungin, "Hetah hian he society-a i luh dan, i nupui fanaute i bum dan leh in Association i phiarruk dan kimchang, ka fanu lo pian dan engkim.. Ka laka thil i lo tih tawh zanwg zawng sawi la, i thutiama i dinngheh leh si loh chuan chu video record chu i fapa kutah ka hlan ang. A nih nih ni turin.. " a ti ta a. Chairman chuan Emy mitmengah nawr luih chi a ni lo tih hriain leh a buaina a len ruk em vangin a thuawih mai chu kawng awmchhun niin a hre ta a.. A chairah chuan thuin Emy lam a en a. 

"Ti rawh le.. " a ti ta a.. Emy mitmeng pawh a de ta sar sar mai. 

Tunah chuan Dr Zira leh a thuihhruaite nuai chimih chiah a hmabak ta. Thisen rim erawh a nam ngei ang le.. 

Pi Hruaii chuan Sangteii melh chungin, "Ka fapa hi Emy nen an inngaihzawn thu a sawi ngei a maw? " a ti a. A lungawi lo hmel chu a lang chiang kher mai. 

Sangteii chuan, "Aw ka sawi duh lo reng a, mahse, Kha nu kha vawiinah ka hmu hlawl a, ka pa thawhpui nen an inzui a, Zoa nen inzawmna an neiin ka hre si a.. Ka hrilh mai mai che anih chu" a ti a. A rilru dik taka thîkna meipui alh hluah hluah erawh a thup ve hram hram thung. 

Pi Hruaii chu a tum hmak a, "Zoliansanga luhlul lutuk hi chu aww.. Nangmah hnar nan a sawi ve mai mai a nih ka ring. Sangte, ka fapa hi i hmangaih takzet em?" A ti ta hlut a. 

Sangteii chu a hamhaih deuh, "Hmangaih chuan ka hria.. " a ti ta sap a. 

"Neih ngei i duh tiraw? " a ti leh zel a. 

"Ka duh alawm' a lo ti leh a. PiHruaii chu a thaw hawk a, "Remruatna ka nei a, i pawm theih chuan ka monu i ni thei tihna a ni mai.. " a ti ta a. 

Sangteii chuan a pa a ngaihtuah nghal, engtin pawn apa khan Zoa hi nei turin a nawr anih kha. Zoa nu lahin an inneih theih dan ngawt a ngaihtuah bawk. Engvang nge mawni le..? 

"Sawi la" a ti ta nge nge a. 

"Zaninah Hotel pakhatah ka rawn kaltir anga, i lo chelh ngei ngei tur a ni. Damdawi pakhat ka pe che anga, chu chu a ei ngei ngei tur a ni. I bulah zu a in duh dawn hauh lo va, a tui in turah emaw ipawlh dawn nia. Tichuan, zoliansanga chu i taah i siam anga.. Kei nin in inneihna tur kan buaipui ang" a ti ta hmiah hmiah a. Sangteii chuan mak a ti ru hle. A lawm tho bawk si. Nula virgin a ni tawh bik hauh lo naa chuti anga mipa han thlem kual chu tlawmthlak a ti ve tho mai. Mahse, apa tihlawm a duh a, tun hi a pa tihlawmna chance tha ber niin a hria. Zoa nu remruat vek a ni dawn bawk si. A pawm sak ta nge nge a. 

Zoliansanga inbual zo chu faifuk rut rut chungin a inhru hul a, a kum chu tam ve deuh tawh mah se; Aizawl tlangvalah ani aia sa tha leh pian nalh hi an tam vak bikin a hre lo. Emy nihna dik tak hriatchhuah tuma a beihna a la kal zel a, hma erawh a sawn mawh angreng. Vawiinah khan a inah a va kal leh a, a rukin. Mahse, Emy lut chhuak hmuh tur a awm lo. Khawiah emaw eizawnna kawng a dap a ni mahna.. Eng hmeichhia pawh nise a la hmangaih reng tihah a chiang. Mahse, a nuna thuruk tam tak erawh hriatchhuah a duh takzet a ni. Thil mak ngaina mi kha a ni tlat a. A phone chu lain a msg dawn ho a enkual a. Aizawl mi hausa fanu a mutpui reng thin msg a hmuh chuan a khi sak. An inhmu khât ta viau mai. A buai ve bawk a ni. A chhang lem lo, msg pakhat a hawn leh chuan a meng kâwk. Number ringawt a ni a. 

"Zanin dar 9:00-ah.. Abigail Hotel -ah.. Emy" tih chauh hi.. Emy chuan a hmu dawn tihna a nih chu. Phur namèn lo in a phur a ni. Chu number chu a call nghal a, mahse, switch off!  Hm.. Emy hi a fimkhur viau a ni ngei ang a ti rilru a. Zanriah ei turin a chhuk thla zui ta a. 

"Bawiha, chhuahna tur i nei em ni? " anu chuan a ti a. A helhawlh atalangin chaw pawh a ei tha thûm lo tlat a tin ni. 

"Aw.. Ka chhuak lawk dawn.. Ka riak nghal maithei bawk aw" a lo ti a. Apa in a lo melh reng chu, "Ka thian pakhat nen inhmuh kan tum a" a ti leh a. A roomah insiam turin a chho nghal. 

Chairman chuan an nu melh pahin, "A bialnu chu i hriatpui ve em? " a ti sup a. 

Pi Hruaii chuan, "Aih, hun a la ti lo nge engmah min la hrilh lo" a lo ti a. 

"Dr Zira fanu kha i duhpui hle si a.. Ani lahin a ngaihven si lo va.. " Chairman chuan a ti leh a. Pi Hruaii chuan nui chungin, "I hre ngawt em ni?  An lo inhnim hnai ru viau maithei asin" a ti a. Chairman erawh a ngawi zui nghal. 

Zoliansanga chuan Abigail Hotel kawtah a car chu parkin, phur zetin a lut nghal a. Reception counter nghaktu hnen a va thlen rual rualin, "Room no 038 aw.. A lo nghak che" a lo ti nghal. Hmm.. Nui sâng chungin a kalsan ta a. 

Room kawngka chu a kik ta koh koh a. Zawitein a lo inhawng a. Zoa chu a tawlh ngjal dâwrh. Shit!  He nu hi a hmuh tum a ni lul lo mai. Engvang phiangsen nge ni ngai.. 

"Khawngaihin kal suh. Lo lut rawh. Sawipui tur che ka nei a. Min hmuh duh loh ka hlauh vangin Emy hming ka hawh anih kha.. I bialnu hming kha" Sangteii chuan a ti a. 

Zoliansanga pawh chu mawihawiah lungawi vak lo chung chuan a lut ve ta a. Khumah chuan thu dunin, "Zo, engti zawng mahin i thinlung ka hneh zo dawn lo tih ka hria.. Kei chuan neih che ka duh. Mahse, i tan engmah ka ni ve si lo va. A tawp nan ka rilru dik tak hrilh tur chein ka ko tawp che a ni. Chuan, pawimawh pakhat a la awm bawk a" a tih lai mek chuan, Zoa chuan, "Aw ka ngaithla e.. Pawimawh chu eng nge" a lo ti hriam hraih a. Sangteii hmel chu a ngui nghal rawih. An ruahman ang kha a ti lo law law zawk dawn mawni a ti hman hial. Mahse, apa in, "Zoliansanga hi engtikawng zawng pawn i nei tur a ni. Ka fanu nih i la duh chuan" tia mitmeng tur khui chunga a melh lai kha a hrechhuak a. Ti lo thei lo niin a inhria. 

Dawhkana Whisky chu thli chhuakin a lem khalh khalh a, a then chak chak mai. "I duh ve em? " tiin Zoa chu a va melh a. 

A lu a lo thing, "Min hrethiam rawh aw.  Zu hi ka in vak ngai lo va, mahse, ka in chak thut a" Sangteij chuan a ti a. 

Zoa chu a tho va, Tui zawk chu thli chhuakin a in ta a. Sangteii chuan a melh ran mai. A rukin a lo tang ru teuh bawk. 

"Sawi la' Zoa chuan a ti nghut a

"Hmm.. Ih maw, Emy kha mipa dang nen ka hmu a. Ih, hotelah ania" Sangteii. Chuan a ti ta a. 

"Tu mipa nen nge? " a lo ti chang leh rût. 

"Ka pa thawhpui a nia. Erica a niin ka hria. Ka hrechiang vak bik lo va, mahse, an inngeih hmel khawp mai" Sangteii chuan a ti a. A zu in khan a pum a ti sa hat hat mai. 

"Aw le.. A tha alawm.. Thian pawh an ni thei a" Zoa chuan a lo ti mai a. 

"Nia, a ni ve thei tho. I duh hmel sia, ka sawi ve mai mai" a lo ti sap a. Zoliansanga chu a tho leh hluai a, "Ka kal phawt mai ang. I sawi tur i sawi zawh tawh chuan" a ti a. Sangteii chuan ngawi rengin a phone a melh. Damdawi kha a thawh a hun tawh si a. Zoa chu kawngka  a hawng dawn mek tihin a lu rawn hai thut vangin a pai khut khut a. Sangteii a tho nghal vat. A lu chu a dawm vung vung a, "Tehchaia ". A ti sup. 

A hmaa Sangteii nui sâng chu a hmu phe ruai mai. Chutih mek laiin a mipatna chu rapthlak khawpin a rawn insangmar a, ngaihtuahna fim a hmang thei ta hauh lo. Sangteii chuan khumah a nam thlu a, Zoliansanga meng phe chiai hmuh theih turin a thawmhnaw chu a hlip ta mawlh mawlh mai. Emy taksa nen an nalh dan a inang reng.. A rawn bawh a, a rimtui zet mai. A hmuiah rawn fawpin, "Zo, ka ta i ni dawn.. Ka ta liau liau' a ti heuh heuh a. Tang tur a awm hlawl lo. A lo vuan ve chat a, duhthawh zetin a lo keih buan buan mai.. Zoliansanga chu rui lo hai lo pawha a pa tehlul nen, damdawi hmanga hrai anih chiah phei chuan a mipatna chuan a tlin rei ngat ngat kher mai. Sangteii pawh a chau hnawk nia. An zawh hnuah chuan chau zetin an mu ta hle hle a. Zoa pawh a muhil zui nghal daih. 

Sangteii chuan a phone phawrhin tu emaw a call a, "Kan zo fel chiah e" a ti sap a. Lehlam ami chuan, "I cover maw? " a rawn ti a. 

Kawngka chung zawna a camera kam chu han melh zauhin, "Tehreng mai" a ti zui sap a. Phone chu a dah ta nghal a. 

Valtea chuan zanriah tur Bawngsa a roast mek a, a tunu leh Dorothy ngaihtuah kawpin thawm dim zeta Dorithy rawn lut lai pawh chu a lo hre lo va. A mit a rawn hup thut chuan a phu zawk mai. Mahse, a kut nel thep leh a perfume atang chuan A lo ngaihtuah mek pakhat zawk ani tih a hrethiam. Dim vak lo va a kut chu lakthlaksakin amah chu a inher nghal a, a lamah a kuai bet nghal thlawp. 

"Zanriah min kilpui dawn em ni? " a ti sup a. 

"I phal chuan" a lo ti no ngher ngher.. Valtea chu a khi suk a. 

"Anih chuan ka eirawngbawl lai hi min lo tibuai miah suh" a ti a. Bawngsa chu a chawk zui nghal a. Dorothy chu chairah a thu a, "Emyin a rawn be tawh che em? ' a ti a. 

"Be miah lo.. In inbe zawk em? " a lo ti a. 

"Be chiah lo a, mahse, bunkerah a awm dawn a. Umzuitu a neih vangin. Mahse, chu chu i tunu tan a tha zawk. A hmu fo thei dawn a' Dory chuan a ti siam siam a. 

Valtea chuan, "A that chu.. Ka naute chu ka ngai tawh khawp mai. Awm lo phei la chuan khawharin ka thi maithei a ni" a ti fiamthu hlut a. 

. "Hmm.. Awm lo ta ila chuan hmeichhe dang i hruai lut anga" Dory chuan a hmui tipawrh chungin a lo ti a. 

Valtea chuan nui hawk hawkin, "Hmeichhia ka mamawh lohzia i hria alawm.. " a ti a. Dory pawh a awih. Rinhlelh tur a hre lem lo. Valtea inbual zawhah zanriah chu an kil dun a. Thian dun ang chiahin an titi siam siam reng mai. 

An ei khamah Tv an en dun mai mai. Valtea malchungah muin Dory chu a tawng pah reng bawk. A phone a rik chuan a tho hluai a. A tum nghal hmak. Chu chu Valtea pawn a hmuh hmaih lo. 

Choka lamah kalin phone chu a va be daih a. "Aw ka awm. Min lo call taw lo teh. A pawimawh tawpkhawk loah chuan" a ti hlak hlak a. Valtea hian tirh a nih chhan a hriat vaih chuan a chân dawn tih a hria.. Chu chu a ngaingam thlawt lo a ni. 

A biak zawha sitting rooma a va luh leh chuan, "Chairman a nia.. Emy awmna min zawt a" a ti a. A hmel erawh a pha dai mai. 

"Engtik laiin nge chairman chu Dr Zira a lo nih tak? " valtea chuan a ti zawi ta raih a. Dorothy a ding chawt. 

"Ih.. Takntaka nia, Pu Zira anih kha. Kan chungchang hi a hre ve a. Emy an huat vangin min enthla ve alawm" a ti niah niah a. 

Valtea chuan mitmeng dum khaka melhin, "Dory, engkim ka hria alawm.. Lem i chan dan te, engkim. Ka taksa chu i nei a ni mahna.. Ka rilru erawh i hmin dawn lo ania.. I taksa mamawh chu ka pe ang che" a ti nghut a. Dory chu a pawm lawk a, roomah a luhpui nghal. Khumah chuan dim vak lo vin a nghat a. Dory hamhaih hmel chu a en rei duh lo. A thawmhnaw chu dim lo zetin a hlihsak nawk nawk a, "Lawk.. Valte, ka sawifiah thei. I ngaih ang kha a ni lo. Khawngaihin" a ti lawm lawm a.

"Sex i duh ani lawm ni. Ka pe ang che. Tichuan, ka nun atangin i kalbo kumkhua tawh ang" 

A ti nghut nghut mai si. Dory a hrilhhai hle. Valtea. Hmel rum leh tak ngal chu a melh a, "Ni e, Dr Zira te chuan nangmah hmina an lamatanga siam tur chein min ti alawm.. Mahse, Valte, ka tum lo chu chu.. Ka hmangaih che asin" a ti ta a. Valtea che lai pawj a tawp chawt. Dory chu a melh vang vang a. A inlahrang ta nghal a. 

"Haw rawh" a ti a. 

"Maw.. Aih.. " a lo ti vat. 

"Min hmangaih tih an hriat chuan tangkaina i nei tawh lo tih an hria anga, an dah tha ang che" a ti a. 

Dory chuan valtea banah vuan chungin, "I ta nih reng ka duh. Engpawh tawk dawn mah ila, i bula awm ka duh. Khawngaihin min nei rawh" a ti ta hmiah a. Valtea zawk chu a hrilhhai letling. 

"Buaina ka ngah tawk tawh asin.. Dory, ka ngaina che. Mahse, Society member te nena inlaichinna neih ka duh lo" a ti ta a. 

Dory chuan, "I u leh i tunu pawh an ni ve tho alawm" a ti a

"An duh vang a ni hleinem.. Nawr luih an ni a.. Chhan neiin ka tunu phei chu a lut asin" Valtea chuan a ti a. 

"Anih chuan ka bansan ang. Ka chhuak ang. Ka duh vang a ni bik hleinem. Ka neih theihna che anih dawn phawt chuan, ka bang ang. Saw society atang sawn" Dory chuan a ti ta fak fak a. 

"Mahse, a awlsam dawn lo ania. Umzui i ni dawn" a lo ti sup. 

"Ka bulah i awm dawn chuan ka hlau lo ve" a lo ti ve hmak. Valtea chuan Dory kut chu lain a fawp a, "Emy kan biak phawt a ngai ang" a ti ta a. 

Dr Zira Cabinah chuan thawm nei miah lo va lutin, a bungrua ho chu a dap kual a. A duh ber erawh a hmu mai lo. Inah a kawl zawk anih hmel. Tawng ri a hre zui lehnghal. Hmanhmawh zetin chhuar lian zet phenah chuan a tlum lut nghal a. Rei rial lo vin kawngka a rawn inhawng zui nghal. 

Dr Zira chuan zuitu a nei tih a hre thei bawk. Erica a ni maithei. A va enthla ngam chiah si lo. 

"Thla thar kan chuankai leh meuh chuan Chairman chu kan paihthla thei tawh ang. Director zin a lo haw anga, file pawh ka pe zui mai ang.. " Dr Zira chuan a ti a. A cabin chu him tawk hlein a hria a ni ngei ang. Tawng a insumkar loh danah. 

"Ni e. Beisei ang. Mahse, Chairman kan paihthlak chuan Zochhingpuii saw engtin nge ni dawn? " tu aw nge tih chu Emy chuan a hre chiang kher mai. Mak a ti lutuk chu a hmui a hup tawp. Engtin nge..?!! 

"Zochhingpuii chungchang chu ka ngaihtuah fel vek tawh. Emy nen kan dah tha ang.. Anni rual hian Eric pawh tel ve rawh se" Dr Zira chuan a ti ta a. Emy a lo insang ruh teuh. 

"Mahse, Erica chu i hnuaia thawk zinga rintlak ber. A ni lo em ni? " pakhat chuan a lo ti a. 

"A ni tawh lo. Emy'n a thinlung a ruksak tawh. Nizanah pawh Emy tan Zochhingpuii pindan kawngka a hawnsak alawm.. Erica hi a chak a, a thluak a tha bawk. Ka tan a la hnwwksak thei. Engkim hretu a ni bawk a. Dah that chu kan tihmakmawh a ni" Dr Zira aw ah chuan nunrawnna a tel. Emy chuan a heh a pet fan fan. 

Kawngka an khar rik khap hnu chuan a bihrukna atang chuan a chhuak a. Kawngka lam chu melhin,,"In tum ang chuan in va kal dawn lo rua em… Emy hian eng nge a tihtheih chiah chu in la hre khawp ang le" a ti ta chher chher a. 

Zing lam dar 3:42 chiah chiah a ni. Nu pakhat chu zai mek a ni a, a chhan pawh a nau pai chu hrin pangngaia a hrin theih loh vang a ni. A taksa chu a chau riau a, Doctor ngaih a tha ta lo. Hmanhmawh zetin Doctor Ramhluna ko turin mi a tir nghal a. A rawn thlen ve chuan an tihtur chu an ti nghal. sawk sawk. Naute chu an la chhuak thei ta. Hmeichhia a ni a. A ngo veng mai. A tap miah lo thung. 

Dr Ramhluna chuan naute nu mit chu keuin a marphu te chu a check kual a. A hmel nur danah thil dik lo zawng a awm chiang mai. Hmanhmawh takin chet an la ta sawk sawk a. Thawktir leh tumin theihtawp an chhuah, An buai mam mam viau. Mahse, an theihtawp chhuahna chu a tawk zo ta lo nge.. A kal ta. Chu hmeichhia chu an chhan zo ta lo. 

Pawnlama lo nghak rantu a pasal leh a chhungte bulah chuan pawiti zetin naute nu nunna an chhan theih loh thu leh naute erawh a dam thu a sawi ta a.. An tap nghal hawm hawm. A pasal erawh a ngawi ran a, a mitmeng chu hriatthiam a har angreng. 

"Anih chuan ka nupui min laksak tu saw naute saw tihlum ve nghal mai rawh" tiin Dr Ramhluna hnenah chuan a ti ta a.. Dr Ramhluna mitmeng erawh a dang ta daih mai. 

A tuka Emy leh chairman an inhmuh chuan, Dr Zira cabina a thu hriatte chu Emy chuan a sawi ta a. 

"Erica hmangin file chu ka lak theih ka beisei a. A theih ngang loh pawn keimah ka lut mai ang.. " Emy chuan a ti a

"Ka beisei.. I hlawhchham ngai hleinem.. Chuan thil pawimawh tak.. Emy, zochhingpuii aiawh tur naute ka hmu tawh".. Chairman chuan a ti ta a… 

(Tawp leh phawts aw.. Eirawng ka bawl. Dawn 😍😘