THURÛK…! (10)
Ziaktu : Toni Râlte
Secret Society:
Dr Bta hmaah Sophia chuan a video viral mek chu hmuhtirin Bta chek tlak tlak chu lainat hmel lek lek hian a melh a. Bta chu a thaw halh a, "Keimah ka ni lo" a ti sup a.
"Mahse, nangmah angin an ngai vek tawh. Duhthlan tur i nei lo. Kan pawl min zawmin hlawh tha tawk tak i hmu dawn nge inah i nupui leh fapa bulah inthiam lo reng rengin pawisa hmuh dan i zawng dawn" Sophia chuan a ti ta kalh kalh a.
"Ka hrethiam lo. Chhuah phawta kan senior te biak ka duh" Bta chuan a ti ta a. Sophia chu a thaw halh. "Kan hotu ten an remtih ka beisei" a ti a.
Dr Zira a lo lut a, Bta nen chuan an inbia a. Video chungchang bawk a ni. Tu emaw Bta phiarruk tumtu te thiltih a nih a rin thu leh Dr Ramhluna ten an buaipui tur thu a hrilh a. Tin, a haw theih tur thu te..
Bta pawh a thaw huai mai. A nupui lakah a insawi fel thei ang em? An veng chhungah an chirhtheh nasa tawh viau anh em? Amah lah a bo daih si a. Patliang rilru a buai ve ta nak mai. Engpawhnisea clinic an kharsak thu leh Doctor anihna atanga thla 3 chhung an suspend thu a hre tawh a. Sum khawlsa nei mah se; duhthlan tur tha tak awm renga thawh loh ngawt pawh chu tiin a ngaihtuah a. He pawl secret taka kalpui hi an insawi dana Zoram chhanchhuah tumtu an nih phei chuan a thawhna awm tak ni pawn a hre ve. Mahse, a nupui nen an sawi dun phawt ang chu.
Erica chuan Zochhingpuii room lam a pan mek a. Vawiin atangin hna an tan tawh dawn a ni. Emy taksa nal hen lah kha a suangtuah zen lehnghal. Zan tin a khum tawmtu atana ani tluk kha a la tawng hauh lo lehnghal. Hmeichhia hian a nunah pawimawhna em em an nei ngai lo. A nu chauh lo chu. Ni e, a nu amah hmangaihtu awmchhun kha. A thih dawna apa demna a la sawi lo fô te kha. A pa chuan hmeichhe dang umsanin a nu nen chauh a hnutchhiah anih kha.. Rethei taka hringnun bul an tan hnuah Dr Zira nen hian an intawng ta hlauh a, he pawlah hian lut vein a tirah chuan sum hmuh nan a hmang a, mahse, a rei a, a lut thuk tial tial. Tunah zet chuan chhuah leh tumna a nei tawh lo. He pawl thiltum leh thuruk hrechiang ber zing a mi a ni ve tawh lehnghal. A chhuak anih vaih chuan a thlan khur tur a lai tihna a ni mai.
Zochhingpuii chu a lo mu bâm a. A chauh hmel angreng. Anu Zohlupuii tleirawl lai hmel ang chiah chiah a ni. Tlemin a sang deuh a, a khal deuh zawk tih mai loh chu..
"Naute, vawiin atangin hna tan ang aw" Eric chuan a khuma thut pah chuan a ti a. A lo meng a, "Eng nge kan tih dawn" a ti zawi raih a.
"I chauh hmel riau mai. Vawiinah chuan kan society in hna kan lo thawh tawh dan file ho kan zir chiang dawn nia" Eric chuan nelawm zet hian a ti a.
A lo thu chhuak a. "Engtikah nge ka hawn theih ang? " a ti sap a.
"Kar hnih hnuah a niang. Mahse, i vannei, i putea a lo kal thei dawn a. A lo kan thei dawn che " tiin a lo chhang a.
"Anih ka pa ka hmu thei ang em? " a ti leh a. Eric chu a tîm deuh, "I hmu thei tèp ang. I pa chu enkawl lai a nia. Tunah chuan mi dang hmu turin a la fit tawk lo a ni" a lo ti a.
Zoi nen chuan pindan chu chhuahsanin, Study roomah lutin file intiang urh chu an keu tan ta a. Anihna takah chuan heng file te hi a lem vek a ni. Tenawm taka bank-a thawkte an bumchhuah dan leh politician te an phiarruk dan engmah a chuang lo. Zochhingpuii rilrua ngaihthat lohna a pian an hlauh vangin lem an chang mai mai a ni. Ani lah mi ring hma chi a ni si a
.
Zoliansanga inbual zo inthlak mek lai chu a nuin a rawn be buai a, "Dr Bta a lo haw anih chu" a ti a. Zoa chu a bu nghut ringawt. Va hmuh a ngai in a hre nghal. Engvanga bo ringawt nge a nih tihte.. Emy a rilruah a rawn lang leh zawk. He nu hian hmana a phatsan tak ang khan a la phatsan reng anih dawn hi. Mahse, amahah hian thuruk enh emaw tak awmin a hre si a, chu chu a hriatchhuah ngei a ngai a ni
Jona nen Bta ina an va luh chuan inleng an lo awm ve nial a. Police pawh. Bta chu a that hmel viau, a sawi danin khami tlai khan hmeichhe pakhatin a nau damlo ngaihvensak tura a tih vangin a kal a. A lo na viau mai a, a thi ta nghe nghe niin a sawi. Mahse, khawi hmunah nge tu te nge tih. erawh engmah a sawi duh lo. Zoa chuan Bta hmel a en vang vang chuan dawt a sawi ni tlat hian a hria a. Mahse, zawh dilchhut viau kha dikin a hre si lo, a video chungchangah erawh amah a nih loh thu leh tu emaw ten an phiarrukna a nih a rin thu a sawi. Awih nhe awih loh tur pawh an hrethiam lo. Bta nupui erawh a lung a dam zan lo tih a hmelah a lang thei reng..
Jona nen an chhuak leh a, Jona tak pawh chuan thil dik lo awmin a hre ve. Mahse, amah Bta berin report a thehluh si loh chuan tihngaihna a vang angrenh si. Helhkam nei ru tûn chungin an ngawi zui ta rih. A la hma tho sia, tiin Emy va hmuh a rilruk ta a.
Emy hmel a hmuh chuan nizan lamah a mu tha lo tih a hre thei nghal. Ni e, khatiang zan zanah a chhuak ania. Eng emaw tak zawng a ti a ni ngei ang.
"I chhuak dawn na nge? " Zoa chuan thut pahin a ti satliah a.
"Dawn lo. Vawiin chu ka chawl hahdam dawn" a lo ti a.
"Eng nge i thawh ber? Hetiang in to tawk tak luah thei chu eizawnna i nei tha viau anih ka ring"
"Lo buai suh. Ka duh duh ka ti ang" Emy chuan a lo ti hmak.
Zoa chuan emy tuisik in lai melh chungin, "Vawiin chu kan inrim thei tihna anih chu" a ti sup a.
"A tha lawm.. I duh duh i sawi thei e" Emy chuan a ti ta a.
Sawi hmasak tur ber erawh a hre lo hle.
"Dr Gosa thih zan khan khaw nge i awm? " tiin bul a tan a. Emy chuan a sam huikiangin, "Inah.. Ka mu" a ti a.
"Dr Bta bo thu hi i hre ve ang chu tiraw.. Dr Gosa thihna nen khan a inzawm i ring em? Doctor ve ve an ni sia" Zoa chuan a ti leh a.
"Ka hrethiam lo. Inzawm maithei. Engmah ka hre ve lo. An ni chungchangah chuan. Ka chhawrtlak vak loh ang" Emy chuan a lo ti zangkhang vah a.
Zoa chuan thut hnaih deuhin, "Anih i chanchin sawi ang.. Ka hre chak ngawih ngawih" a ti ta thlawt a.
Emy chuan a kutzungtanga dawhkan tlir zaih zaih pahin, "A pawimawh lo.. Ka damkhawchhuak ve tawp. Kan in a kan khan ka hriat ngai loh ten min la a, ka kang nasa viau a, chuvang ania ka hmel pawh ka thlak tak. Chumi te chuan mi thar angin min enkawl ta a. Tichuan, eizawnna te dapin tun hun hi ka thleng ve ta a ni" A ti dap dap a. Zoa mitmengah engmah a lang lo. A awih nge awih loh tih pawh.
"Min biak pawh tumna pawh i nei chuang lo tihna ni maw? " Tlema lungawi loh hmel deuh hlek hian a ti a.
"Ka ngam tawh lo alawm.. Ka phatsan che a, khatiang tawh hnuah hmel dang nena rawn bekbawr leh che kha min rin ka ring lo bawk. " Emy chuan a ti a.
Zoa chuan, "Kei chuan hei chen ka lo ngjak tawh che sin.. Anih i fa pai kha hmannia tleirawl kha a ni em? " a ti a. Emy a thaw hawk. Zoliansanga chu dawr hrilh reng harsa a ti takzet a ni.
"Ni lo.. Kan inang i ti ve mi? Kei pawn ka hmel hmasa nen kan inang ka ti lutuk. Ka fa pai kha chu thisain a lo piang alawm" a ti ta a.
. "Anih tu nge a pa? " Zoa chuan a hriat chak ber chu a zawt ta a.
Emy chuan a chil a lem khawlh. "Ka sawi thei lo. A thi tawh. A pawimawh ber tawh hleinem" a lo ti chang rât a.
"Aw le.. Anih bul kan tan tha leh thei ang em? " Zoa aw ah chuan ngenngawlna a tel.
"Thei tawh lo. Engmah kan thlentir thei tawh lo. Hmeichhe tha tak tawng la, nei rawh. Kei chu tihian ka ral ve tawp dawn. Neih tlak ka ni tawh lo" Emy lungchhiatna chu Zoa pawn a hre thei. A kut chu lain a chul sak a, "Khang kum kalta chhung zanwg khan i thih ring lo vin ka zawng thin che. Ka hmu ta che a, ka kalsan leh theih che i ring em ni? " a ti ta a. Emy rilru chu a buai kher mai.
"Ni lo ve, Zo, nang leh kei chu a theih tawh loh. Khawngaihin hriatthiam tum rawh. A khirh vek tawh" mangang zetin a ti a.
Zoa chuan engmah sawi tawh lo vin a rawn fawp thut! A hamhaih hle. Hmana Zoliansanga fawh ngei kha a ni. A nawm dan leh a thûk dan a la ngai reng mai. Mahse, a inngaihtuah fim lui tlat a, Zoa chu a nam kiang ta a.
"Khawngaihin.. Zo, haw rawh. Haw phawt teh. Ka lo inngaihtuah ang" a ti ta a. A thaw ham ham mai. Zoa fawhnain a taksa a tihdanglam hneh zia a hai lo. Zoa pawh chuan lungawi lo hmel pu chuang lo vin, "Aw le, thil tam tak i chungah a thleng a. Ka hrethiam che alawm.. Ka nawr lo vang che" a ti ve ta a.
Zoliansanga chhuah hnu chuan a inbual fai sar sar a. A inbual zawhah phone a hmang leh phawt. "Aw Dory, thu thar a awm em? " a ti sar sar a.
Valtea chuan a tunu a ngaihtuah kher mai. Amah maiin a awm lehnghal. Dorothy lah remruatna dang neiin a intatlut leh bawk si. A khua a har thlawt. Chaw pawh a ei hleithei lo. Tv te enin a rilru hruaipenna a dap a. Mahse, a thei lo a chha a ni. A tunu chuan a pa a hriat hunah danglamna a nei ang em? Amah leh amah te hi a intihlum duh mai lawng maw? A tha zawngin a rilru hruai thei hram se, a chanvo chelh chungin society do hna thawk pah se, tih te a ngaihtuah mai mai. Dorothy a rawn lang zauh zauh bawk. Ni e, a chhuahsan dawn khan, "Mipa tawngtam lo tak chu i ni. Mahse, ka rin ber i la ni e' tiin a biangah a rawn chuk zauh anih kha.. Dory hi a zai a ngaithla fó! Mahse, a star ngai lo. Khatia an chen dun chhung rei loteah khan eng emaw ti takin hmeichhhia angin a en ve deuh tlat a. A insum hram hram zawk a ni. An mut dun zan phei kha chuan a muhil der tawp anih kha.. A inthunun theih loh a hlauh vangin.
Dar 8 a pel awrh naa a tv en laiah a rilru pe thei hek lo. A off a. Mu turin a insingsa tan a. A rooma a lut tur chiah kawngka an lo kik. Inleng a nei ngai der si lo va. A va hawng a, hmanhmawh zetin Dorothy a rawn tlan lut. A hamhaih kher mai.
"Khar vat rawh. Min zuitu an awm takin" Dory chuan a ti a.
A khar a, a kalh ta nghal a.
. "Eng nge thleng a? " a ti hû a.
"Ka hre lo. Ka inah sawn ka awm ngam lo.. Hetah hian ka thlamuang zawk" Dory chuan a lo ti!
"A va mak awm ve.. Anih chuan va mu la.. I khumah sawn" tiin a khi suk.
"Kan pahnihin" Dory chuan a ti ta tlat! A mak a ti angreng viau. Ruih a nei mawni le a ti hial. A va hnaih a, ngun zeta thlekin, "I tha maw? " a ti sup a.
"Ka hre lo.. Ih, min hua angem ka hre lo. Mahse, ka rilruah nangmah chiah a awm. " Dory chuan a lo ti ta thlawt mai. Thil thlen dan mai mai chuh!
Dorothy chuan a rawn pawm chawt. A sam buk zetah chuan a tham nghal. 'Dory.. Hey.. I tha takzet maw" tiin a lo sawi nawk nawk a.
"Inlaichinna neih ka duh a ni.. Khawngaihin" Dory mitmeng tak ngal chuan a chhun ngang mai. Hei chen hmeichhe tel lo in a hun a lo hmang tawh.mamawh pawn a inhre ngai lo anih kha. Mahse, nula nalh leh lar tak, zaithiam em em bawk si. Chuan a hmaah inhawngsain a inbunruak mek a ni si a.
"Dory.. I ngaihtuah chiang meuh maw?" A ti nghut a. Ngun zetin a melh kul bawk.
"Aw.. Engkim ka ngaihtuah. Emy tan ka thawk anga, i tunu pawh ka chhanchhuak ang.. " a ti ta sap a.
Valte'an a hmui a rawn fawh chuan a lo ip chawih. Mipa tam tak fawh nen a danglam chiang a ni. A lo kuah ve nghal chawt. Valtea chuan zo zeta pawmin a roomah a luhpui ta a. Khumah chuan zalhin.. A rawn bawh nghal zat a.. Chet a han la tak tak chu Dorothy zawk chu a lo hmanhmawh. Taksa inmamawh tawn tak an ni ngei aniang, an duhthawh salh salh kher mai. Mahse, Valtea rilru kil khatah erawh fimkhur tura hrilhtu a awm reng bawk. Dorothy hian game a khel ve thei tlat. A game-a awh chu a tum lo bur. Mahse, hmeichhe dang ang erawh a ni lo tih a pawm.
"Eric, hei hi Emy chet dan maw? " tiin Zochhingpuii chuan Emy file chu a keu kual a. Eric chuan, "Aw ni e, Emy hi kan society hmeichhe zingah a laktlak ber a ni" a lo ti a.
"Anih ka nu anih i ring em? " Zoi chuan a ti ta chat.
"I nu chu a thi tawh alawm" a lo ti vat a.
"Anih tuin nge that? "
"Amah leh amah a intihlum alawm"
"Engvangin"
"Naute, i mimal nun chu nakinah a hranpain kan la sawi dun dawn alawm.. Tunah chuan i thil zir lai chiah kha ngaihtuah rih rawh. A tha em? " nelawm deuh thupe aw si hian Erica chuan a ti ta a. Zoi erawh a ngui rawih mai. A rilru buaizia hi hre ve se tupawn puih an chak em em ang mawle..
Dr Bta leh Dr Ramhluna chu khunkhan zetin an titi a. Bta chuan a bo dan mak tak chu zep nei lo vin a hrilh fai ta kèlh a, an offer te pawh. Video pawh kha society te thiltih a nih a rin thu a sawi bawk. Ramhluna chuan ngun takin a lo ngaithla a, "Umm.. Ka hrethiam e. Mahse, tunah chuan tihtheih kan nei rih lo. Suspend order ka khawih phak a ni tlat si lo va, Clinic chu lo khar rih pawh nise a pawi tham lo. Engpawhnise, i duhthlanna a pawimawh ber. Theihtawp ka lo chhuah ve bawk ang a.. " a ti ta dap dap a
Bta chuan, "Sum ka mamawh lam em em vang ni lo vin luhchilh saw ka chak deuh riau a. An sawi ang a ni tak tak em tih te, Director nen in inbe tha bawk a. Ka chungchang pawh lo sawipui ve leh tho la tiraw.. Naktukah thutlukna chu ka siam ang. Dr Zira a tel ve vang sawn tlem chuan ka ngaih a ngam deuh" a ti ta a.
Dr Ramhluna pawn theihtawp chhuah intiam chungin hawn zai a rel ve ta a.
A motora a chuan luh rualin phone a hmang nghal a. "Hello, video in uploadna account kha tunah tichhe nghal ru. Hnuhma leh chhui zui theih engmah a awm tur a ni lo" a ti hriam ta hraih a. Lehlam ami chuan, "Mahse, Dr Gosa thihna nen a inzawm ringa chhuizui tu an awm ania" a rawn ti a.
"Chu chu ka ngaipawimawh lo, hnuhma engmah ka duh lo a ni mai" a lo ti chang fak.
Lehlam ami bawk chuan, "Chairman, chhuitu te chu i fapa Zoliansanga leh a thianpa te an ni asin" a rawn ti ta a. Dr Ramhluna chu a rum nghut mai. Hmalam bihin steering chu a hmer ngawt ngawt a. "Zoliansanga hi a hnawksak tan tlat. Mahse, ka fapa a ni si a" a ti ta nghat a.
Hotel room no. 090 ah Dr Zira chu inha tha mawlh mawlhin, khuma lo inha tha ve mek chu a zu melh a.
"A tawp kan thleng tep tawh e. I fapa hian Emy a bansan theih nan theihtawp lo chhuah la, keiin Emy kawng ka lo dal ve thung ang. Ka fanu nen an inneih veleh kan ruahmanna angin kan kal dawn nia" a ti sur sur a.
Zoliansanga nu Pi Hruaii chuan, "Ka theihtawp chu ka chhuah ve lawm.. Mipa ania, apa ang maia luhlul a ni bawk. Ka hre thiam tawh lo. Kawng dang kan zawng thei mai lo em ni? " a lo ti a.
Pu zira chuan nui suk chungin, "Kan la ngaihtuah ang chu.. Hmanhmawh lo la, bawihte.. " a ti nem hliai a. Pi Hruaii a lo khi sak.
"Chairman pawh kan paihthla thei tep e. Paihthlak anih veleh Zochhingpuii saw kan dah tha anga, Dorothy hmangin kan duhthusam kan thlentir tawh ang" Dr Zira chuan a ti leh a.
Pi Hruaii chuan, "Thleng tawh se ka ti ngawt mai. Erica chungchang pawh i ngaibtuah fel tawh maw? " a lo ti a.
"Ani hi chu ka uipa rinawm ania, ka kawng a dal ngam lo vang.. A la rintlak zelin ka ring" a lo ti a.
"Mahse, thil ni thei ka suangtuah a, Erican Zochhingpuii a enkawl dawn si a, Emy hian kua a hreuh leh lo vang maw.. Erica lah hian a atchilh thawthang kha a ni sia" Pi Hruaii thluak fing zet chu a rawn lang tan ta.
"I tidik, bawihtuai, Erica leh Emy te chetla vil turin Beiseia ka tir tawh. Dorothy pawh Zochhingpuii putea pawh hnaih nan ka hmang tawh e. Ani saw kan member ni lo mah se; a ka kan hup a ngai tlat! Thuruk hi a hre ve zul si a. Thah ngawt thu a awm si lo" a ti ta a. Pi Hruaii pawh a thaw huai mai. An inthen hran dawnah an infawp leh vang vang a. Rilru zangkhai takin an kal hrang ta a.
Zoliansanga muhil lai chu tiharhtu awm ang hrimin a harh hlawl mai. A meng kawk a. Tumah a hmu lo. Thawm lah a reh hle bawk. A tho va, tui a in a. A mutchhuak lah a reh bawk si. A laptop chu chawi pheiin, Document a kawl ho chu a chinglet kual leh a. Zohlupuii te in a kan laia chanchinbumi te thuziah hrang hrang a lak khawm te chu. Zohlupuii ruang nia an sawi an hmuh laia a chhungte dang ruang an hmu ve miah si lo chu vawi tam a awmzia a ngaibtuah tawh. Finfiahna felfai tak a neih miau loh vangin eng a ti thei lo. Bakah a rei tawh lutuk tlat. Vawiina a thil hmuh kha a mitthlaah a rawn lang leh zawk. Ni e, Emy a chhuahsan hnu tlai lamah khan Emy leh Mipa pakhat amah ang tiat vel, inngeih hmel taka an inkai lai kha.. A chhing sawk. Emy bialpa a ni thei ang em? Emy chu a chhui nasa tawh. A eizawnna a hre thei hauh lo. Ani hi a lo inzuar a ni thei ang em? A ngaihtuah zawng pawn a tim sawk mai.
A mood off nak alaiin zanriah ei laiin a nu leh pate amah vangin an inhau leh nghal. Ni e, anu hian Sangteii nei turin a la nawr kal reng a, engahmah a ngaijsak loh vangin a sawi tam lo mai pawh a. Zanriah ei laiin a sawi leh pek a, apa in a lo khak anih kha. An inhnial phah ta chiam si a! Anuin Sangteii a duh dan em em hi a ngaih a tha lo hial! Sangteii pa Pu Zira leh anu hi an naupan lai ata tawh thian tha an lo ni tawh a. Chuvang chu em ni ang le… Sangteii erawh hei ni 2 dawn chu a reh ta hmak a. A thawven hawk rualin mak a ti ru deuh.
Tihtur ngah anga inhre si, a tihtur ber hre si lo vin a hui pawp pawp a. A hmasa berah Emy nihna dik tak zawn chhuaha chhui chhuah chu a tum ta bur a. Mahse, a ruk thei ang bera a chet a ngai dawn tih a hai lo. Kha tleirawl kha a hmu leh ngai ta hauh lo va, hmu thei se chaun eng emaw te pawh a hriat phah maithei sin le..
Emy chuan a panty hak pahin Eric hnenah chuan, "Zochhingpuii chu a fel em? Eng nge a an? ' a ti a.
"Umm.. A chau deuh tih mai loh chu.. A nu leh pa chanchin min zawt dilchhut deuh thin tih lohah chuan a tha vek e" Eric chuan a lo ti a.
"Anu leh pa te chanchin chu i hrilh dawn lo em ni? " a lo ti sak.
Erica inngaihtuah buai hmel chu ngun zetin a lo melh a, "Chairman in hun a tihah a hrilh mai ang chu.. Tunah chuan chher hriam bak tihtheih kan nei lo" a ti ta a. Emy chu a khi sak.. Eric chu va hnaihin, "Zochhingpuii chu ka ngainain ka lainat tih i hria a. Hmuh min phalsak ve la" a ti no ngher ngher a. Eric chu a melh de sar sar mai.
Eric chuan, "Ka theih ka ring lo. Guard an active si a" a lo ti ve mai a.
"Naktuk zanah a kawngka kalh lo vin chhuahsan la.. Ka va hmu ve lawk ang aw" Emy chuan Erica awm bawr chul kual dan dan chungin a ti leh ser ser a.
Eric chuan, "Ka lo tum ang. Mahse, an hmuh che chuan a pawi viau ang' a ti ta a. Emy pawh a thaw hawk mai.
A bula Emy muhil sâk sák chu melhin rilru buai zetin Eric chu a thu reng a. Emy zunin a phuar viau tawh, mahse, Dr Zira thu ang chuan Emy hi dah that tur a ni si a. Ani chuan a dah tha thei dawn lo, Beiseia kut a ni tawh mai. Mahse, Emy lak atangin engmah fiahna leh rinhlelhawm a la hmu hauh lo. Zochhingpuii chu a ngaina takzet tih a chiang, a fanu kha a ni miau a. Mahse, chairman an phiarruk dan lam engmah a sawipui ngai lo. A hre ve kher lo maithei. Chuti a nih a hnu engvangin nge an dah that kher ang? An lamtanga siam an tum zawk mai tur a ni lo em ni? Dr Zira sawipui ngei a tum ta a. Thaw hak chungin Emy sirah chuan a mu ve leh ta a..
"Dorothy, Valtea chu i hmin thei dawn awmin ihria em? " Dr Zira chuan a ti a. Dory chu khawng zeta dingin, "Ka beisei. " a ti tawi tak a.
"I mutpui em ni? " a lo ti a.
"Aw" a ti leh hmiah.
"I tum loh kawngah i kal palh ang nge aw. I tihtur chu Valtea leh Emy ten Zochhingpuii chungchang an ngaihven dan heta rawn thlen zel a ni. Tin, Valtea rilru hmina a ka hup a ni bawk" Dr Zira chuan a lo ti khal khal a.
"Ka hria.. Ka tum ve mek alawm.. Emy chu ka hnaih thei rih lo. A buai lutuk. Mi pakhat in a zawng a, pumpelh a tum mek" a ti a.
"Tuin"
"Chairman fapa, Zoliansanga" Dory chuan a ti ta a.
"Aw le.. Valtea zawk i bitum deuh ngar ngar rih mai dawn nia" Dr Zira chuan a ti ta a.
Dorothy chuan a in kawngka chu hawngin a pheikhawk a phelh a. "Ka nghak rei tawh hle mai che" tij ri a hriat chuan a phu zawk. Felfai zeta Emy lo thu a hmuh chuan a thaw leh huai a.
"Min lo nghak tih ka hre hleinem" a ti ve mai a.
Tui a in khawlh khawlh a, "Hun ka ngah lo a.. Eng nge chanchin" Emy chuan a ti a.
"Nangmah leh i nau bula tâp chawt tura thupek ka ni.. Chuan, Zoliansang an buaipui dawn bawk" Dory chuan a ti a.
"Engtin? " a lo ti vat.
"Ka hre lo.. Nangmah hnaihtu anih vangin an buaipui dawn anih ka ring" a lo ti a.
Emy hmel chang zet chu a tum nghal bûr.. "A chungah engmah ka thlentir lo vang" a ti thawp sat a.
"Emy, Zoliansanga ka atchilh thinzia i hria.. In inkarah hian eng nge awm ka hre duh a ni" Dorothy chuan a ti ta a..
Emy chuan, "Hman lai thil a ni. I hriat hun ka tihah ka la sawi vek ang. Tunah chuan ka beng leh mit ni phawt rawh. Umm" nelawm zetin a ti a. Dory mitmeng pawh a danglam nghal.
Dorothy in a chhuahsan hnuah chairman a call a,"Naktuk atangin bunkerah ka awm rih dawn. Ka him lo. I fapa lakah leh Dr Zira te lakah " a ti sap a.
Amah zuitu an awm tih hre rengin ngil takin a in lam a pan ta a.
(Ka pum tha lo a chhuak leh a. Ka luak thul ka luhai nen… min khawngaih ve tho vang. A hrehawm em mai.) 😢😢
Comments
Post a Comment