Thlarau thuchah 6

THLARAU THUCHAH.. (6)

Ziaktu: Toni Râlte

"Tu maw thi a? " a lo ti hâw a. A nau chuan, "Kha U Valtea kha.. Ih, U Muanpuia (an in chung tlangval)  te nen pawh an inkawm ve thin.. " a lo ti a. A naute lo hawn zanah mitthi an nei a ni. Tlangval thalai kum 30 chiah chiah a ni a, inawkhlum a nihna chuan mipui a thawng hle. Azeli hi mi tuallim lutuk lo anihnaah tu vak mah hi hriat chian tak tak a nei ve vak lo va, Inkhawm hunah a inkhawm ve tawp a. A thawhpuite bak han kawm em em hi a nei lem lo bawk a ni. 

"A va zia lo ve aw.  Ka va kal ve a ngai anih chu.. " Azeli chuan thleng seng pahin a ti a. 

A nau Hmeichhia Puii chuan, "Û, a thlarau i hmu mai angah" a lo ti a. Azeli pawh a nui ve tawp. 

Muanpuia a kal tawh vangin kalpui tur dap ve chu thain a hria a, an in piah lawka inkhawm tura a kalpui ve thin Vri chu a va sawm a. Ani pawn kalpui tur a lo dap ve mek a lo nia. Dar 8 bawr velah chuan mitthi lumen tur chuan an kal ta a. Veng a lian tham a, inhriat vek sen a lo har ve bawk a ni. Mitthi in erawh hai theih a ni lo. An han thlen takah chuan Azeli chuan a hre chawpchilh ve nghal mai. Valtea pa chu an veng chhunga hausa pawl, lar ve pawl a lo ni reng a. Amah Valtea hi phai lama a chet tlat tam zawk vangin an lo hre vak lo mai mai a ni. 

In chhung pawh an khat tha khawp mai. Thalai thi, chutah inawkhlum a lo ni chhap nen. Hawkdak leh thil hriat chak vang hrim hrima kal te pawh an awm nuk awm e. Azeli leh Vri pawh a hnunglam chang tawh hek lo, ruang hmachhawn zawng chiahin thutna awl la awmah chuan an va thu ve a. Ruang chu kil chiah lo mah se, an hmu chiang khawp mai. Tlangval lian thelhthawlh, hmel tha tak, ngo vuah mai a ni a. Azeli chuan Muanpuia te ina a lo kal tumin a hmu tawh tih a hrechhuak. Mahse, amah Valtea chuan a hre ve kher lo vang. A chhungte chu an tap deuh reng mai. Anu nu thau lam, sam kir chuat mai, milian nu tih hriat ngawih ngawih phei chu a khawng titih deuh reng a. A farnu niawm tak tarmit vuah, ria lam deuh pawn a u ruang chu a kalsan lo tihtheih a ni. Pa ber erawh a insum thei viau. Azeli te thut fel hnu darkar chanve velah chuan patling pakhat leh a fanu niawm tak, Azeli rualpui awm vel, hmel tha leh duhawm zet hi an lo lut ve a. Rose par sen, bawr nalh zet an rawn keng bawk. Ruang bul an rawn thlen rual rual chuan, Valtea nu chuan chu nula ngaihnobei tak chu enin, a ding hluai a. 

"Nangmah vang anih hi.. Engkim hi nangmah vang a ni. Ka fapa ka chân phah asin.. Ka fapa thih chhan hi nangmah i ni" tiin a lo kawk sawk sawk mai. Zai lai a ni naa a bul hnaia awm te chuan a tawng ri an hre pha vek. An thawm chu a ring ta deuh a. Valtea pa chuan an nu chu a kuah thu a, nula erawh a ding khawng at reng. A hrilhhai zia chu a hmelah a lang thei reng mai. Tah pawh a tap lo. 

Apa niawm tak a rawn luhpui khan, "Tirawh.. I haw phawt ang. A dik dawn tlat lo" a ti a. Ruang chu a zuk thlek ngawih ngawih a. A biangah chulin a chalah a zuk fawp ta a. Lo hmutu te thinlung no a kai chhuak tihtheih a ni. A tap lo naa a mittui chu a luang zawih zawih mai. A rilru a na takzet tih a lang bawk. Apa niawm tak chuan a kuah chhuak ta a. Valtea nu erawh a fapa ruang bawhin tah hla chhamin a tap leh tuar tuar a. Thil awm dan chuan chulai hmuna awm ve te nunphung chu a tikhaihlak vek mai. A tiphawklek kan ti zawk dawn nge, zai pawh a tui hleithei ta lo. Awmhmunah an phun ser ser hlawm mai. 

Vri pawh chuan,, "Awii, a bialnu aniang. A zak awm sia.  Ka khawngaih e" Azeli bulah a ti sar sar a. Azeli erawh a ngawi reng. 

Vri bawk chuan, "Valtea thlarau i hmu em? " a rawn ti leh thut. Azeli chuan a lu a thing ringawt. A hmu miau si lo va. 

Zing lam dar khat velah eitur an rawn sem a. Thenkhat chu zun zungin an chhuak sap sap bawk. Azeli te pawh an mawng a kham tawh bawk a, intihharh pahin an chhuak ve a. Vri zung a hliah lai chuan, "Awiii kha nula kha a hmel tha sia, hrehawm a ti dawn e" Vri bawk chuan a ti leh a. 

"Nia.. A hrilhhai hmel sia" Azeli chuan a lo ti ve mai a. Vri zung zo an kal leh chiah tihin Azeli chuan Valtea ngei maiin an in chhung a lut lai chu a va hmu ta a. A ding chawt a. Vri chuan, "Eng nge hmuh i nei mi? " a lo ti vat. 

"Neiin ka inhria.. Mahse.. Ka chiang ngam lo" a lo ti a. Vri chuan, "Ka hlau ee.. Tunah chuan hmu rih suh " a lo ti a. A nui deuh bawk. Ani ve bawk a, dawih deuh tan chuan Azeli pawh chu a tih awm lek lek tawh. Amah pawn hrehawm a ti ve tho si a. A khawngaihthlak letling. 

In chhungah   an lut leh ta a. An thu fel ruang awmna lam a va hawi leh chuan Valtea ngei mai chuan a ruang chu a lo kil ve reng mai. Anu bulah a thu a, a hmel hmaiah engmah a lang lo. A lungngaih hmel em em loh bawk. A nu a rawn tap leh a, khawngaih hmel takin a melh a, a ruang chu a thlek leh zauh thin bawk. A thiante leh a chhungkhat te a melh kual dan dan a. A hawi kual zel a, Azeli chu a rawn hmu ta a. An inmelh dun ngat ngat mai. Chulaia awm ve te chuan Azeli nihna chu an hre ve deuh fur a, chutia hmalam bih ngur ngur chu hmuh a nei a ni ang tih an ring thiam ve mai. Valtea hian puan tur a neih an ring bawk a. An rin dan te an lo sawi ve leh thul.. Azeli erawh chuan engmah a ngaihtuah lem lo. Kha nula khawngaihthlak leh hrilhhai tak, mittui tla chunga chhuak ta tih chauh lo chu… 

Zing dar 4 bawr velah chuan zai thei aram pawh an awm meuh lo, an muthlu nasa hlawm a. Azeli erawh a mut a chhuak eih lo. Valtea thlarau a bulah a thu reng mai si a. Vri erawh a muthlu nasa. A tep chuap chuap lehnghal. Khua pawh a var zui ve ta a. In lam panin an haw a. Valtean a zui zel. Vri nen an inthlah a. An in lam a pan ve nghal a, A sir maiah a rawn kal ve zel. A tawng miah lo thung. 

Tlem tal ka mutthilh loh chuan tiin khumah a mu a, a khum mawng lamah a ding reng si. 

"Ka chau dawn em mai. Hun dangah aw" a ti liam puat a. Valtea pawh chuan a hrethiam nge a ngawi reng a. A hriat loh hlanin a lo muhil daih. A harh chuan dar 8 a lo ri tawh a. Phak chuap in a tho. A intifai a, a insiam sawk sawk a. Tiffin apai ta mai. A hnaah a tlai dawn si a. 

Valtea thih atanga zan 3-naah Azeli muhil lai chu kaihthawh a ni leh ta a. A thih nia a thawmhnaw hak ang chiah kha hain Valtea chuan a lo nghak reng mai. Zing lam dar 4 bawr vel a ni a. Rizaia intuam hlun chungin, "Sawi duh i nei em ni? " a ti ta a. 

"Ka thih chhanah Ruthi an mawhpuh tlat a. Hei hi min sawifelsak la ka duh a ni. Khawngaihin" a ti fiah kâk a. Ruthi a tih chuan lumen zana nula kha a nih a ring nghal. 

"Ruthi chu tu nge?" A ti a. 

"Ka bialnu hlui a nia.. Hmeichhe tha tak. " a lo ti chuai raih a. 

"Inawkhlum i ni tak tak em? " 

"Aw.. Inawkhlum ka ni. Ruthi sawn tel vena leh inrawlhna engmah a nei lo. Thil dang daih a ni zawk e. Tunah hian ka chhungte huat rawn a hlawh mek a,chu ringawt chu ka la enliam thei. A rei anga, a reh ve mai ka ring. Mahse, Ruthi awmdan zawk sawn min tihlauthawng a ni. Dem rawn a hlawh nasat avangin amah leh amah pawh a inringhlel hial tawh a, a inthiam lo mek tawh a ni. Amah vanga intihlum angah min ngai titih ve tlat saw ka buaina a ni. Ngaihtuahna tha lo takte neiin ka thiltih ang hi a rawn ti ve mai ang tih ka hlau' Valtea chuan a ti ta duah a. Azeli chuan a ngaihnawm dawn riaua hriatna a nei, a thu tha sauh sauh a.

"Ka hriat tura i duh chin chu han sawi vek teh le' A ti ta a. 

Valtea chuan a kut pahnih chu suihin, thil hlui ngaihtuah let niawm takin a ngawi vang vang a. A maimichhung bawk. Chutah muangchanga rawn meng lehin, "Phuba ka tuar a ni. Ka thiltih ngeiin min vawlet a. Thi tlak ka ni reng a ni. I hriat angin kei chu College ka kal atangin phaiah ka awm char char a. Kum tawpah paeh rawn haw loh chang ka nei fo. In ka luah a, pawisaah ka buai lem lo bawk a. Ka nun pawh ka thlahdah sawt hle. Mipa ve ta na na na chu hmeichhe riahpui zeuh zeuh changte pawh ka nei thin. Tin, zu in ka ching bawk. 

Kum 2 liamtaah khan Naga tleirawl pakhat, jasmine nen kan intawng ta a. Spa-a thawk a ni a. Nula class em em bik lo, khawsak pawh nuamsa lem lo a ni a. A thiante nen in an inluah tawm ve a. An spa-a kan va kalna lama intawng kan ni. Hmel tha ka tih zawng tak a ni a. A fel reuh a, mi biangbiak a thiam bawk. Phone kaltlangin kan inbe chho a, ngaihzawng pawh la nei miah lo a lo ni a. Zawi zawiin ka hneh chho a, inngaizawng ang chuan kan awm ve ta a. Mahse, amah leh a hna zawng zawng nen ka thiante chu ka hmelhriattir duh lem lo. Engmah ni si lo khan ka zahpui ve deuh a ni ber. Bakah Spa-a thawkte kan ngaihndan leh en dan chu i hrethiam ve thoin ka ring. 

Jasmine nen chuan a rukin kan inzui ve zel a. Mahnia awm ka ni bawk a. A rawn riah hi a tam zawk awm e. Kum khat zet chu tikhan nuam kan chen ti mai ang. Vawi hnih zet nau kan paih bawk. Min ring em em a, nau a pai pawn ani chuan paih lam a sawi ngai lo. Mahse, keiin hna thawh ka neih phawt loh chuan nupui neih ka la ngam loh thu ka sawi thin a. Hnialna engmah nei lo vin nau pawh a tltla ve mai zel a ni. 

Kei pawh chuan kan inchenchilh nasa bawk nen, ka duh ve tawlh tawlh a. Ka hmangaih leh hmangaih loh ka hre lo naa, mipa dang bula mu ve tura ka ngaih chang chuan ka na thin. Ka thiante lakah pawh thup sen a ni ta lo va, engmah an sawi lo naa.. Min hmuh dan a danglam phah tlata hriatna ka nei a. A hma te chu mizo nula kher lo, hnam dang pawh tlema class ve deuh hlek lo chu ka kawp ngai lo. Ngaihzawng tak tak anga kawp zui ka nei ngai hek lo. Mahse, Jasmine chu thlah ka tum paw'n amah hian min lo pan zel bakah kei tak pawh hian ka thei lo a chha a ni. Nula dang laka han pelhe zeuh chu ka nei tho. A hriat pawn ngaihdam ka dil ngai lo, a haw ngam hek lo. Chutiang khawp chuan min duh ve a ni.. 

Tichuan, Christmas hmang turin ka rawn haw chho a. Ka rawn hawnna lamah Ruthi nen kan intawng ta a ni. Ani chu Goa atangin a hawng ve thung. A changkang ka ti a, a smart hle bawk. Kei aiin a nau hlek naa a titi reng reng a puitlingin a fingfel khawp mai. Mahse, kan inbe zui lem lo. Kan thianhoa kawn chei kan en tumin an lo en ve a. Kan inhmu leh ta hlawl a. Ta tang chuan kan inbe chho ta a. Ani chuan min lo star ru reng tawh a lo nia. Ka lawm viau rualin ka zah bawk. Ka nun atanga paihthlak hleihtheih loh hmeichhia ka kawp reng si a. Mahse, Jasmine chu ka thingthla thei tawh mai ang ti chungin Ruthi chu ka kawp chho ta a. Kan inzui ve chawt a. Ka zahpui ngai lo bawk. Atan ka sitawm viau zawkin ka ring. A zahawm bakah a puitling lutuk chu ka zah ru thin. Ruihhloah a talbuai ve lo va, sex ah a insum thei hle bawk. A la virgin ang tih ka ring thlap. Kei pawn khawih chhiat duhna ka nei lem lo. 

Tichuan, kum a lo thar a. Phaiah bawk ka chhuk leh ta a. Ka zirna pawh ka zo ve dawn hnai a. Mizoramah hna pawh ka hmuh mai ka inbeisei ve a ni…. Ruthi pawh a chhuk ve tho bawk. Jasmine a rawn lawr vat. Mahse, ka nunah amah aia lal an awm tawh vangin hawihhawm takin ka lo hnar ta a. A tap nasa khawp mai. Min ankhum nasa bawk. Mahse, tuna ka tih loh chuan nakinah ka talbuai ka hlau si a. Khawngaih viau mah ila ka kalsan lo thei lo a ni. Mahse, Jasmine chu a beidawng duh hlek lo mai. Min rawn riahchilh hmiah zel a. Khawih tumna ka neih miah loh laiin a rei a, ka chak lohna a hre tawh si. Ka tlawm leh ta nge nge a. A hma ang bawkin kan khawsa leh ta a ni. Ruthi nen pawh kan inbe reng tho. Ka inthiam lo ru em em naa Mizorama ka awm theih hunah engkim a fel mai ka beisei tawp a ni. 

Hun a kal ve zel a. Mizoramah ka awm thei ta. Ka beisei aia hmain hna pawh ka hmu rang a. Ka hlim ve hle. Ruthi pawh a zir zi hnai a, ka nghakhlel viau. Jasmine chuan min rawn be chamchi a. Mahse, ka chhang ngai ta lo. Ngaih ruk veng veng chang chu ka nei thin. Mahse, ka kum te a lo tam ve tawh a, puitling leh felfai taka awm ka duh tawh a ni. Ruthi hi nupui atan ka duh bawk. Rinawm deuha inkawp zel ka duh a ni ber. 

Ruthi a zo va, ani pawh helamah a rawn awm ta a. Kan hlim thei hle. Inneih te pawh kan sawi thin. Amah hian hna neih ve phawt a duh si a. Kan la innghak rih a ni. Kan chhungte ve ve nen pawh kan inhre pawh a. Engmah harsatna kan nei lo. Kan inah pawh chaw a rawn ei zauh zauh. Kei pawh an in ah chuan tlangnel tawh tak ka ni. Jasmine vangin ka number ka thlak a. Tibuaitu ka nei ta lo. 

Kum khat zet enghelh nei lek lo va hun ka hman hnuah ka beisei loh lam atangin thil thleng a awm ta a. Fur lai a ni a, ruah a sur cherh cherh vangin kei pawh inah ka awm a. Ka tlu zal mai mai. Laptop on in movie download ka tum a. Jasmine nena kan thlalak ho kha ka delete vek tawh a ni. Ruthi hian a hmu ve ang tih ka hlauh vangin. Laptop ka on screen a rawn eng tihin ka wallpaperah chuan Jasmine nena khuma nui chunga kan thlalak kha a lo lang kalh mai. Mak ka ti lutuk chu ka hamhaih vek. A zan hmasa lawkah pawh ka khawih reng a, engmah ka tidanglam si lo. Bakah wallpapera hmang turin a thlalak engmah ka kawl tawh si lo. Mak ti ru chungin ka thlak nghal a. Movie pawh ka en tui loh phah vek. Mut mai ka tum ta a. Ruthi ka va mang tha a. Ka mu ta nghal. 

Ka muhil siar siar tihin, "Valte' a rawn ti fiak thak a. Ka harh kâwk mai. Aw lo chhuahna lam chu ka hawi vat a. Ka khum atanga hla vak loah sofa ka hung a, chutah chuan Jasmine ngei mai kha saruak titij hian a lo mu zar mai. Ka tho hlawl a, ka en ngawt ngawt. Min en ve reng bawk. 

"Jasmine" ka ti a. A tho va, min rawn pan ta a. Ka mumang anih ka ring fan a. Mahse, a tak ngei a ni. Engtin nge ka roomah hian a lo kal theih.. Engmah ka hrethiam lo. Ka hmaah tak a ding a, a hmel chu a nguiin min huat hmel khawp mai. 

"Ka taksa hi i duh a ni lawm ni?  Nei rawh.. Vawi khat tal chu min mutpui leh ta che" a ti a. Ka nghawngah a rawn khawih a, a kut vawhzia chu.. Ka tim sawk. Min fawh a tum a, ka lo dang a. A chak em em lehnghal. A taksa vawt ngiai chuan min si thlap a, hlauhna hlirin ka khat tawh. Ka au chhuak thei miah lo lehnghal. Mahse, "Kal bo rawh.. Khawngaihin" ka ti tuar a. A ral zui nghal. Ka lung chu phu rang tak a ni. Khur dar dar chungin meizial ka tan a, ka fawp kawk kawk a. A mak ka va ti em.. 

Zan lai mah nise ka buai em vangin Jasmine thiantha tak Nebo-i ka zuk call ta a. A la thei lawk lo zui. Ahnuah phak deuhin min rawn chhang ta a. 

"Nebo, valtea ka nia. Mizoram atangin ka lo bia che. Jasmine chanchin ka hre duh" ka ti nghal tâwng a. A reh deuh vang vang hnuah, "Jasmine chu a thi tawh alawm.. Kar hnih lai a ni tawh" a rawn ti ta a. Ka rin ruk mah nise, ka tim sung sung mai. 

"Engtia thi nge a.. A va mak ve" ka ti nawk nawk a. 

"Amah a intihlum alawm.. Bathroomah a inkhai a.. Hrilh ngaihna che ka hre lo a ni. Ka be tlang thei si lo che a" a rawn ti a. Ka chhing sawk. Phone chu ka dah a. Chhuat lam ka bih ran a. Ka ngaihtuahna a kal thui khawp mai. 

Khamizan atang khan Jasmine thlarau rethei tak chuan min chenchilh chho tan ta a. Ka hlau a, mi râp bawk. Min insiamchhiat khum changte a awm a. A changin min tah khum bawk. Keimah vanga a nunna la a ni a, min tibuai chu ka rin sa a ni. Mahse, ngaia neih a har khawp mai. Ka mizia leh nunphung pawh a danglam tan ta a. Keimaha awm ka ching chho va. Biak nei niawm taka ka phum bul bul te pawh min phawk zauh zauh. Ka chhungte ngaih pawh a tha lo chho ta viau. Ruthi lahin min ngaihtuah em em bawk. 

Zan khat chu Jasmine chuan vauna dengkhawng tak min chham khum ta a. Ruthi kalsan turin, anih loh chuan Ruthi a chenchilh tur thu a sawi a. Awmngaihna ka hre lo khawp mai. Ka pangngai lo telh telj bawk si. Mut ka hmu tha ngai si lo va, ka nun ram chu a chau ngawih ngawih zel a ni. 

Hmeichhe thianghlim leh pawisawi lo Ruthi chu keimah vanga a buai loh nan leh ngaihzawn reng tlaka ka khawsak chhoh loh tak avangin kalsan turin rilru ka siam fel ta a. Mi dang duh ka neih zawk thu hmangin ka thlah ta a ni. A awih lo va, a ngaithla duh hek lo. Mahse, ka tum ruh laklawh tawh a. Ka hmu duh lo lui tlat a. Ka chhungte bulah kan inthen thu ka sawi bawk. A ngaihna an hre lo va, a chhan hriat an duh bawk. Mipa tha tak a tawng a, ka kiansan a ngai tih thu hmangin ka chhungte ka bum a. Kha kha ka tihsual lian tak a ni. Keiman ka kalsan zawk a ni reng si a. Mahse, ka kalsan chhan dik tak an chhui chhuah kha ka hlau em a tin ni. Ka nun a bawraw chho zel a. Ka nghei tawh hnu zu te ka in chho leh a. Ka chhungte mang ka tiang thin hle. A chang chuan ka ruiphur hian Jasmine chu ka hauh chiam changte a awm thin. An ni ngaihah chuan Ruthi laka ka natna ka hrithla a ni zawk si. 

Tichuan, dam reng kha nuam ka ti lo chho ta a. Chenchilh tu neih reng kha ka hne tawh a ni ber. Ka hna lah ka thawk tha thei tawh bawk si lo. Ngaibtuahna fim hmang lem lo vin ka nunna chu ka titawp ta a ni. Ni e, ka duhthlanna a ni e. Jasmine vang a ni naa ka duhthlanna a ni tih hi hria se ka duh.. Ka thlarau chawlhna tur lam ka enghelh lo. Dam ve reng kha ka hne hluah hluah a ni ber mai.. Mahse, keimah vangin Ruthi diriam leh huat mek a nih phah ta si a. Tel vena a nei lo tih hi hria se, lungdam takin a hma ang khan en leh se ka duh ber a ni" 

Azeli chuan Valtea thusawi chu ngaihnawm leh mak ti ru takin a ngaithla tluan parh a. Thawk a la hawk. Valtea pawh a chauh hmel riauin a hria. Tunah chuan thlarau mai a ni tawh si a. Azeli chuan a lainat ve lehchhawng kher mai. 

A tukah Valtea te in lamah a kal ta nal nal a. Inleng an lo la nei tiai a. Mahse, Azeli hi an lo hriat tawh vangin thu pawimawh tak ken a nei a nih an ring a. Roomah an inzui lut ta dial a. Sawi tan dan tur a hre chiah lo hle. A chil a lem khawlh a. Valtea thuchah leh a sawi zawng zawng kha hmaih neih hlau takin a sawi ta vek a. An lo meng phawkin mak an ti tih a hriat hle. Anu phei chuan inthiam lo hmel a pu bawk. 

"Aw le.. A lo nih dawn chu.. Ka fapa chu ka va lainat e aw. Ni e, a buai chhoh tak em vang khan Dr Hrekima pawh a rawn nghe nghe a. Kan nawrluih vangin.. Mahse, eng a ang thei ta lo kha ania. Thlarau lam thil daih a lo nih vang a nih chu.. A va pawi tehlul em" apa chuan a ti vawng vawng a. 

Anu chuan, "Ruthi pawh ngaihdam dil a ngai anih chu.. A ruangte kha kil ve a duh dawn tehlul nen aw.. Ka va tisual chiang tak em.. " tiin a inhnih faih faih mai. Azeli chuan kawngka bula Valtea, hmel hlim taka lo ding a hmuh chuan a nui ve sak a. Tunah chuan ani pawn tibuai tu nei tawh lo vin a chatuan hmun a pan ve thei tawh ang chu..

Ni e, tumah hi thinlung na ngawih ngawih leh beidawnga siam tur a ni lo. Kan tihsual phuba chuan min nangchin hun a nei leh thin a. A theih chin chinah mi dang tihlimtu kan ni thei lo a nih pawhin, mi dang tinatu kan ni lo thei alawm…