Thlarau thuchah 5

THLARAU THUCHAH… (5)

Ziaktu : Toni Râlte

A awmna hmun hnawng churh leh thim ruihah chuan hmuh nei chuang si lo vin a hawi kual ruai a. Khawi lai hmunah nge a awm a hre hauh lo. Thawm reng reng lah a hre si lo. Zawi zawiin a che sawn a, kalna tur a hre bawk si lo. Engvanga chu lai hmuna awm ngawt chu nge a nih a hrethiam lo. Zanriah a ei khamah a tuka an thianho picnic na tura a inthlakna tur vel te a siam lawk vek a. Dar 10 dawn thleng online lehin mutchhuakin a zem chiai chiai a, a hriat loh karin a lo muhil daih a nih kha.. Tunah hetah a lo awm daih chu a mumang a nih a ring. 

Ral hla fea eng te takte niawm tak awm chu a pan a. Kal kawng lah chu a rualrem lo nasa si. A hah phah hle. Mihring reng reng a hmu bawk si lo. Ramhnuai a nih leh nih loh a hre thei hek lo. A phun hlak hlak a. Hlauhna erawh a nei lem lo. Mak tihna hlirin a khat zawk. A kal zel a, kawngpui a pawh hlawl mai. Aizawl daifem lam niin a hria. Khawi veng nge anih erawh a hre lo. Thim chu a kiang tan tawh a, a rin danin zing khawvar tir la thim thet thet niin a hria. Ani hi a tho â pek em mawni le. A phone tal pai se a tha tur. 

In lo ding hmasa ber kawtah chuan a ding vang vang a. An la mu nge an inkhar thiap mai. A awmna chin chu hriat a duh si a, kawngka chu inthlahrung takin a kik ta dat dat a. Thawm reng reng an rawn chhuah lo. Nasa zawkin a kik leh a, thinrim dawn mah se, a pawisa zo tawh lo. Mipa puitling aw thian ri a hre zui a. "Tu nge? " a rawn ti nghal zat. 

"Ka pu, khawngaihin min pui teh. Ka bo a" a ti ta tawp a.  Hriat hleih theih si loha phun hluk hluk thawm a hre zui a, kawngka bulah a la ding ran mai. Ke pen thawm a hre zui a. Kawngka kalhna a ri rak a. Patling kum 56 bawr vel tur hian a rawn hawng ta a. A hmel chu a nelawm vak loh, a mutui lai a kaitho miau si a. 

Chupa chuan a rawn en hauh lo lehnghal. "Ka pu, khawngaihin ka awmna chin hi min hrilh teh. Ka hrethiam lo" a lo ti a. Chupa lah chuan amah en hlek lo vin kawngka bul leh sir vel chu a melh hû hû a. Mak a lo ti viau! 

"Ka pu, min lo hrethiam teh.. Khawngaihin min pui rawh" a ti leh vak a. Chu pa chuan, "Ui ho lah hi thlun ve tur a nia. Ninawm lutuk" a ti hluk a. Kawngka chu a khar daih!  Estheri hrilhhai lutuk chu a ding khawng reng mai! Engtin nge kha pa khan ui tia a koh theih? A hmu miah lo zawk em ni? A hma aia nasain kawngka chu a kik leh ta ngat a. A chumin a chum a ni ber e. 

In chhungah chuan mi pakhat aia tam ke pen thawm a rawn ri leh khut khut a. Kawnka chu an rawn hawng leh. "A va mak teh fo e.. Min fiam zawk mawni le… Luliana te ho an ni ngei ngei ang. Nghal lutuk" A hmaa patling bawk khan hawi kual ruai pahin a ti leh a. Estheri chuan a lo melh ngawt ngawt thung. A hriat chhun chu he pa hian a hmu miah lo tih hi. Eng nge a chungah thleng ta le…?! 

An hmuh theih miau loh vangin a kal san ta ngawt a. In dang pawh a kik phei zel, an rawn hawng thin naa tuman an hmu thei lo. Thenkhat mitmenga hlauhna lo langte pawh kha a hmu thei. Engvangin nge an hmuh theih miah loh le.. A mumang atanga harh chhuah chu a duh takzet. Building lian tak kawt zawla an pipu ah chuan a thu a. Inthen pahin a awmdan chu a ngaihtuah a. 

Kolasib khua niin Aizawlah hian hna chhete a hmu ve a, chhungte tibuai lo va mahni inchawm theia a awm chu a lawm ve hle. A chhan chu a nu leh pa te hi an innei lo va, a nu bulah awmin a nuin pasal neiin pahrawn a hrawn a. A sual hran lo naa an khawsak a harsat ve deuh vangin a hmumawh lek lek fo tih a hre ve a ni. A unaute pawh an lo lian chho va, danglam a awm ta zeuh zeuh. A unaute chuan an ngaina hle nachungin a pa ber chuan a hmu hrang deuh tlat niin a hria a. Chawmhlawm a lo ni bawk nen. A thiannu makimi thurawn angin mi sum pukin online hmanga sumdawnna a khawih chho a, a hlawk ve phian a. A nun pawh a nuam ve deuh. Mahse, a naute zirna senso a sang telh telh si a, online-a sumdawn pahin Company pakhat-ah a inhnimphum ve ta a. Lehkhathiam a nih lem loh vangin a thawh awm tawk pawh a sang lem lo. Mahse, thla bi hlawh a nei ve ringawt pawh chu a lawm tawk. Tichuan, a chhungte kalsanin Aizawlah amahin in a luah ve ta kha a nia. Online shopping pawh a la kalpui zel tho va, a inren thiam bawk a. A thawhna company atangin Jio Company-ah insawnin a tih ve theih tawk tiin hlawh chhete a nei ve reng bawk a, a inkhawl thei fu. A nu te pawh a thawn ve ta zeuh zeuh. Apa pawn a hmumawh em em tawh bik lo vang chu. Tunah kum 25na a hmang mek a, nula hlim thei leh zangkhai tak a ni a. A taima bawk nen, mi ngainat a hlawh zèk a. Thian pawh a nei ve nual mai. A haw zen zen lo va, a hnaah an buai ve thei bawk nen. An thianho inrawt phurin chawlh laiin picnic an rawt a. Amah pawh a phur ber berah a tang a nih kha. Mahse, picnic niah tihian a awm leh ta daih si!  

Bialpa a nei chiah lo va, biak erawh a nei ve. Ngaihzawng nei hmanin a inhre lo a ni mahna le.. 

"Awii.. Mi râp em mai.. Thli a thaw bawk si lo" tih ri chuan a ngaibtuahna kal ding lai chu a rawn tiharh zawk. Tawng ri lo chhuahna lam chu a va hawi phei a. Building lian tak verandah chuan nu pakhat, thau deuh leh mipa pahnihn an lo ding a. Pakhat zawk chuan a phone chu a lam hawi zanwgin a lek kang vu lehnghal. A thla an laksak em mawni le.. 

Pipu atang chuan a tho va, an lam chu a pan a. "Ka pi, min pui thei ang em? " a ti leh tâwng a!  Chu nu chuan pipu lam a hawi daih. 

Ngawi rengin an chezia chu a en ve tawp. An hmuh theih miau loh vangin a thutna pipu inthen kha mak an ti a ni ngei ang. Chu chuan thil pakhat a ngaihtuah chhuahtir nghal. A phu zawk mai. Mahse, a theih loh. A ni lo reng reng. A thi thei lo. Thlarau a ni lo, mihring taksa nei a ni. Heng mi te hi an mawl em a, an hmu thei lo mai mai aniang. A ngaihtuahna chu a buai ta nuai nuai a. A maimichhing vang vang a. 

A han men leh chuan Buildingah khan a lo awm tawh awzawng lo. Ama in ngeiah a awm ta. A thaw huai mai. Roomah a phone la turin a lut a. A ding chawt. A room hnawk nuaih chu makti takin a thlir ngawt ngawt a. Mi chefel, hnawk ngaithei ngai lo a ni. Englaimahin a in hi a hnawkin a bal ngai lo. A kawr te chu chhuatah chuan a let rum a. A tlereuh bawm te chu a let bám mai. Tlereuh hi a ngaina ve a, a awh zawng chu a lei hmiah zel. A ngah ve viau reng a. Phun nuah nuah chungin a dah fel a. A khum lah a chuar ten tun a. Rizai pawh a lo tla daih. A phone lah chu a hmu thak lo lehnghal. Hrep taka! 

Ni a rawn chhuak suar suar a. Engpawhnise tiin ei rawng a bawl a. Chaw a chhuang a. A ril erawh a tam lem lo. A in chhung awm dan leh a awm dan a ngaihtuah chuan â mai dawnin a inhria. A buai nuaih nuaih mai si. A thianten an rawn sawm tep ang chu maw.. A tha vek mai ang chu. Chaw chu tlem a ei a. Picnicnaa kal tur chuan a insiam tan a. Nizan lama a pack fel sa thlap kha chu a lo la awm ran a. Insiam leh vak pawh a ngai tawh lo. A thiante chu rei a ti hle. A ning ta deuh a, in chungah an phone hmansak turin a tlan chho a. 

Eirawng an lo la bawl chauh a ni. In chungnu ber Pi Sangi chuan bawkbawn a lo chan mawlh mawlh a, Pa bet Pu Zova erawh Vanglaini a lo keu nuap nuap thung. A fate erawh an la tho leh pek lo aniang. 

"Nu Sang, phone ka lo hmang mai ka phone ka hmu miah lo va" a ti a. A bulah a va ding a. A bawkbawn chan lai chan mawlh mawlh chung chuan, "Ninawm lutuk, thawh nachang hre reng reng hlawm lo mai. Va kai tho ve teh.. Nangmah khan" a ti barh barh a. An pa a melh daih. Estheri chuan nûr lek lekin, " A mak.. Khawi phone chu" a ti leh a. 

"Esi chu a chhuk ta mi?  A va kal zing awm ve mawle.. Chabi pawh  a rawn dah lo ni maw? " Pa Zova chuan a lo ti leh daih a. Estheri chu a thinrim tûn tawh.. 

"Ni e, a hmanhmawh deuh aniang.. A nute lah hian an pur buai ve reng bawk sia. Chabi chu a keng aniang, kan tho tlai ve bawk sia" Nu Sangi chuan a lo ti ve bawk a. Tunah chuan an ni pawn an hmu thei lo tih a hre ta. A hming an sawi a, an khuaa haw tur angin an sawi. Hawn a tum renh reng si lo. Engkim chu a buai leh zo ta. A mang ang tan ta khawp mai. A inah a chhuk leh a. A vei a vei a. A thiante rawn lang har bawk si nen. A tah te lam a chhuak. Khumah a va mu ringawt a. Chunglam a melh vang vang a. Ani hi a thi tihna a ni thei ang em?  Thi ta se, khawiah nge a ruang a awm? Engvangin nge a thih? Thi tur chuan a inngaihtuah phal lo. 

Eng nge a tih tak ang le? A chhing vang vang a. Hman nia rawn lar hluah, Thansangzeli hming chu a ngaihtuah chhuak ta. Ani kha thlarau a hmuh theih leh biak theih vangin a lar hle anih kha. A lo ngaihven vak lo va, a hlauh deuh vangin. Mahse, tunah chuan hmuh ngei ngei a ngai. Venghluiah in an luah ve tih chiah a hria. An in awmna a hre si lo. In atang chuan chhuakin a hmelhriat a tawhte pawh chu biak tumna a nei tawh lo. An hmu thei chuang lo. Venghlui lam chu a pan ta ngat ngat a. Mahse, Azeli te in a hre si lo chu a buaina a ni. A vak a vak a. A chau hran lo thung. Tlai lam a lo ni ta reng mai. A beidawng ta. Ngui em emin a in lam a pan leh ta hna hna a. Zanriah pawh a ei peih lo. Tv chu a on a. Phone. anei tawh si lo va, awm tawp ai chuan a ti a ni. 

"Vawiin tlai lam dar 6 bawr vel khan Zemabawk daiah Hmeichhe ruang pakhat chhar a ni a, bawlhlawh paihna hlui kawrah hmuh a ni. Ruang hmutu Pu Thansiama sawi danin a huan feh hawngin he kawr hi a zawh chho a, hnawmhnawk zinga buara chhungah ruang hi a lo awm a ni a ti. A sam a rawn lawr vangin ngaihtha lo takin a va hawng a, hmeichhia la thalai tak ruang hi a lo awm ngawt mai a ni tiin a sawi. Police ten rang taka chhui nghalin, he ruang hi tu nge a nih hriat a la ni lo va, tunah mitthi dahna hmunah a awm mek a ni. Kum 25-28 bawr vel tur, 5'4ft vel, ngo lam, hmai fang chhe lo tak a ni a. A chhungte zawn chhuah tum mek a ni. Ngaihthat lohna nei te chuan he ruang hi an hmuh phalsak a ni bawk. Tunah hian post mortem a la ni lo va. A hrawka zaina chu a thihpui nia rin a ni" 

Estheri chu a ding hluai. Ruang pianhmang leh san zawng an sawiah khan a inngaihbel tawp!  Tunah chuan a thi nge thi lo tih fiah turin a kal dawn ta. Mitthi dahna pindanah chuan ti deuh tak in a lut a. Tuman an hmu thei lo tih hre mah se; a hlauthawng tho. Ruang pathum a lo intlar pât a. Puan varin an khuh vek. A keu phei diat diat a. A pathumna a keu chiah chu a rak thawt!  A rin ruk mah nise, a taka a han tawn meuh chuan rapthlak a ti a, a hlau ngawih ngawih. Ama hmel leh taksa ngei mai chu muhil ni awm takin a zâl reng mai. Amah a ni tih a hai lo chiang kher mai. Thinlung tawt zetin a ding ngat ngat mai. Thawm a hre ta. Pindan kil thim deuh lai atang chuan a rawn pen chhuak a. Ruang pakhatna kha a ni. Pavalai a ni a, a cher lek lek. A mitkhur te chu a thuk viau. Rei tak na tawh a ni ngei ang. 

"Nula, nang pawh i thi ve em ni? " a ti a. 

"Aw nih hi. Mahse, ka pu, ka thih hi ka ring lo asin. Thih ka la duh lo" a lo ti nghal bawrh bawrh. Chu pa chuan lainat hmel takin a melh a, "Ka hrethiam che. I la thalai si a. Engvanga thi nge i nih ve le? " a ti a. 

"Ka hre lo. Chu tak chu ka hre tlat lo a ni" a lo ti a. 

"Ngaihtuah let rawh.. I rilru kha vah kualtir rawh" a ti a. A ruang bulah chuan a ding a. A ruang chu a zu thlek a. Esi lam chu rawn hawi lehin, "Kei chu ka chambang thei lo. He khawvelah hian tihtur engmah ka nei tawh lo ve" a ti sap a. A ral nghal daih. Esi chu a ruang bulah a thu ran a. A thih dan ngaihtuah chhuah ngei tumin a chhing ta vang vang a. 

Azeli zing tho chu a ham bai bai mai. Inphihfai turin tuikhawihna lam a pan a. Nizan a mengrei deuh nen mut a hmu tha vak lo hle a ni. Ni e, nizanah ramhuai an sawi chiam pek a!  Amah hi thlarau hmu thei anih vangin an sawi thaih ve pah bawk a. A thian thenkhat te chuan an râp mek tih a hai lo. Amah hretu tam zawk lahin an melh hrek hrek duh chauh tawh bawk. An hlau a, an tih ru tih a hai bik lo. A duh vang a ni tawp si lo va. Nizan khan damdawiin mitthi dahna hmuna thawm an hriat vangin damdawiina thawk nurse thenkhat chu an thlabar viau a niawm e. Hmeichhe tap thawm leh kawngkhar sawi thawm bakah an ruang chhar thar hmeichhe ruang kha an mutna hmun atangin chhuatah a lo tla reng bawk a niawm e. A hlauhawm ve viau ngei ang le. Azeli  chuan tukthuan tur a bawl nghal a. Karlehah an khuaah a haw dawn a. A chak tawh viau. Sawi tur lah a ngah tawh bawk. 

"Azeli i ni tiraw? " a rawn ti hlawl mai. Kawngka kha a la hawng miah si lo va. Hmeichhe hmel chhe lo tak amah ang rual vel a ni. Thlarau a ni tih a hre nghal. 

"Aw ni e. Eng nge i duh? " a lo ti ve mai a. Hlauh enah a en buai peih tawh lo. 

"Nimina an ruang chhar kha ka nia. Ka hming chu Estheri a ni. Tunah hian ka thi tih tuman an hre lo.. Min hrilhsak a ngai a ni" a ti nghal bawrh bawrh a. 

"A va mak awm ve. Anih tuin nge that che? " Azeli chuan a tuilum so mek suan thlak pahin a ti a. 

"Kan kawmthlang tlangval leh a thianpa te an ni" a ti ta a. 

"Engtin" a lo ti nghal var a. 

"Zanah ka mut tawh hnuah min rawn kai tho va, zu an rui hle bawk. Kan innel sa tawh a, zan reia min lo kaitho pawh chu a mak lem lo. Ka lo hau leh bawrh bawrh a. Mahse, ngaihtuahna dang daih an lo nei reng aniang. Pawisa puk min dil ta a. Thla nawi anih vangin hlawh kan la la lo nen, ka lo nei remchang mai si lo va. Ka lo hnial a. An ni zu rui khan thinrimna an lo nei sa tawh anih ka ring. An thinrim ringawt a. Mahse, an ngawi leh daih. Mut ka duh thu leh haw tawh mai turin ka ti ta a. A thianpa chuan ka inrin hmain min lo pawm bet chawt a, ka ka a hup nghal. An chetdan chuan min tihhamhaih em vangin engmah tih nachang pawh ka hre lo. Min phuarhlawm a. Ka rooma thil hlu leh pawisa ka dah that te chu an la ta vek a. Ka phone pawh an la.. Chumi thleng chauh chu ka hrechhuak thei. Hei pawh hi ngunthluk taka ka ngaihtuah hnua ka hriat chhuah leh chauh a ni. Anmahni bak an nih ka ring lo" Estheri chuan thinrim hmel deuh hian a ti ta zung zung a. 

Azeli chuan, "nangmahin i awm em ni? " a lo ti a. 

A lo bu nghat. 

"I inluahna te pawn an thawm chu an hre ve lo em ni? " a ti a. 

"Hre lo vang. Ka awmna chung chiah hi an luah ve tho a, mahse, an zin lai a ni thung. Slab chhun vek a nih vanginnthawm hi a hriat vak theih loh hrim hrim" a lo ti a. 

"Mahse, i awm lo tih an hriat te chuan ngaihthat lohna an nei ve tho lawng maw? " 

"Aih, nei lo. A chhan chu ka phone atang khan khang mi te khan ka thiante leh kan inchungte an lo bia aniang. Kan khuaa haw tur angah min ngai vek. Tin, ka in kawngka a inkalh bawk" Esi chuan a lo ti a. A hmel chu a thim raih mai. 

"A va buaithlak ve aw. Anih in khuaa i chhungte chuan an hre mai lawng maw? " 

"Ka ring chiah lo. Ka haw dawn tih an hriat si loh chuan kan inbe khât a. Pawimawh tawpah lo chuan kan inbe vak lo" a lo ti bawk si. Azeli pawh a buai ve ta deuh. 

"Hnaah ka kal a ngai sia.. Kan pu ka lo be dawn nia.. Kawng a awm mai ang. Thlamuang takin lo awm phawt rawh aw" Azeli chuan lainat hmel takin a ti ta a. Esi pawh a bu nghat mai. 

An pu ber hnenah chhuah lawk a dil ta a. A lo phalsak mial a. Rei tak a chhuak dawn lo bawk nen. Police station hnai ber chu a pan ta a. 

An lo hre deuh tawh bawk a. An ngaichâng ve ta deuh e. Estheri a hmuh dan leh ruang chungchang chu a sawi ta zung zung a. Estheri hrilh a chhungte phone number pawh pein an call ta nghal a. An lo chho dawn a ni. Estheri thiante pawh call kualin ruang chu an entir ta a. Estheri ngei a ni tih an finfiah thei ta phawt. A thiante chuan Khami zan tlai tawh lamah khan an thianho groupah Estheri chuan, "Ka haw thut a ngai a. Ka rawn kal ve thei lo vang. Ka cham chhung tur pawh ka hre thei lo" tiin a lo post a. A haw turah an lo ngai vek a lo ni. 

A in luah lamah va kal lehin a in luahna te pawn Estheri msg an dawn thu an lo sawi ve chiah bawk. Tualthattu hi mi mawl satliah chu a ni lo tawp mai. Azeli mi sawi Estheri te kawmthlang tlangval leh a thianpa te chu an hling ta phawt. Mahse, mitthi tawh khin chu thil harsa ni hek lo. An inpuang duh si lo va. An chhuah leh ta phawt. 

Theihtawp chhuahin tualthattu an zawng zui zel a. Estheri thlarau pawh a chawl hahdam thei lo. Azeli nen an inzui reng tihtheih a ni. Esi phone erawh an tichhia nge chhui zui ngaihna awm lo vin a thi hmiah. Estheri mi sawi Zuala leh Kima te chu enthlak reng an la ni tho a. An fimkhur ve nge rinhlelh turin an awm duh miah lo. 

Kar hnih dawn a liam tawh ang tihin thu thar a awm ta hram. Estheri tlereuh thenkhat chu tlereuh dawrah hralh a ni ta tlat!  Rang takin an chhui leh ta a. Esi khan rangkachak leh silver a lei nual a, a man pawh a tlawm chhe lem lo. Tlereuh zuartu te chuan tlereuh rawn kengtu chu hmeichhia a nih thu an lo sawi si. Chu hmeichhia chu an zawng leh ta. Khawlaia vak thin, ks an tih mai ang kha a lo ni a. A hlauthawng viau mai. 

A sawi danin tlangval pahnihin tlereuh te chu zawrhsak tur leh pawisa an pek tur thu an sawi vangin a zawrhsak mai a ni tiin. A sawi dik ang. Amahni kha chuan an zuar ngam lo tawp ang. Chu nula hmang chuan Zuala leh Kima te chu an rek chhuak leh thei ta. Tlereuh chu an chhar a nih thu sawiin an la tang nasa a. Mahse, police te chuan chhuah mai an tum tawh bik lo. Thiam taka dâwp kualin a hrang ve vein an kawm bawk a. Thudik chu a lo lang ta. 

Zuala in puanna hi lo ngaithla ila,  "Khami zan khan kan thianho kan intithiam lo va. Kan insual hial nghe nghe. Pawisa nei lo, chawm ngai reng, thiante neih zarzo ah min puh a. Chu chu na kan ti hle. Kan rui lungpuam chuan ruahmanna kan siam ta a. Esi kha nula hausa ru tak a ni tih kan hriat avangin sum puksaka min hmusittu kan thiante laka inlak len ve chu kan duh a ni. Esi chu kan kai tho a, mahse, pawisa chu min puktir duh miah lo. Kima rui thinrim laklawh tawh khan a va pawm bet ta a, pawisak nei loin a in chu kan rawk ta a ni. Kan chhuah dawn chuan kan ngaihtuah leh a. Nula fing tak a ni a, a ngawih mai mai kan ring ta lo. Dah bo mai loh chu.. Tichuan, Chemte lain Kima khan a hrawkah a zai ta a ni. Rui phel phuala ti kan nia, timna pawh kan nei lem lo. Mahse, khatia thisen nena inchiahpiah nuaia a awm takah kha chuan kan mangaang leh si a. 

A tukah a ruang an hmuh chuan a ina kan lut lai te kha min lo hmu rengtu an awm chuan rinhlelh kan kai dawn si a. Chuvang chuan a phone chu lain Keiman chhuanlam kha ka siam ta a ni. An khuaa haw angah ngai se, tuman ngaihven lo se tih chu ka duh dan a ni. An ngai ta reng a nih kha. A ruang chu a rimchhe thuai dawn tih kan hai bik lo bawk a. Buaraah dahin kan zawn chhuak ta a. A in pawh kan kalh nghe nghe. Kima bikein zemabawk daiah khan kan va paih ta a ni… " tiin. 

Damchhung lungin tang tura hremna pek an ni ta a ni. 

Azeli mu tur chuan khum bula Estheri ding reng chu, "Tunah chuan thlamuang takin kal tawh rawh.. " a ti sap a. 

Estheri chuan, "Thih hi ka la duh lo asin" a lo ti hnual raih a. 

Ni e, tumah hian kan hmalam hun kan hre si lo va. Naktuka thi tur anga inngaiin kan vawiin hun hi tha takin i hmang theuh teh ang u 😍