Thlarau thuchah 2

THLARAU THUCHAH… (2)

Ziaktu: Toni Râlte

Azeli office bang chu chawhmeh vel lei kual lehin zangkhai takin in lam a pan a. Hlawh an la la bawk a, a rilru a hlim veng veng mai. Rinsiami thlarau pawh a rawn lang ta ngai lo va, thlarau lam hi a ngaina tehchiam lo bawk nen, nun pangngaia nun a duh a ni. In a thleng a, a nau te pawh an lo haw ve chiah, eirawng an bawl tlang a. An unau hi an inngeih bawk a; an titi siam siam thin. Zanriah ei khamah a nauten lehkha an zir a. Ani pawh tv a en mai mai. 

Chutia tv a en reng lai chuan kawngka an rawn kik a, a va hawnsak a. A ding châwih mai. Hman zana a mumanga a hmuh putar hmel dang em em kha a lo ding reng mai le!  A kha a chih a, tawng nachang pawh a hre lo. Chu putar mitmeng chu a ngui riai a, mangan hmel zet hian a rawn melh vawng vawng bawk. 

"Ka be thei che ang em? " a ti ta a. A aw chu a la tar lutuk lo. Azeli chuan a lu bu nghauh nghauhin kawngka chu a hawng zau deuh a. Chu putar chu a lo lut ta a. A naute lehkha chhiar ri pawh a la ri reng. Tv hmazawn thutthlengah chuan putar chu a thu hnawk a. Suit pawl, duk zet mai a ha zaih a, a smart viau. A chevel erawh a muangchang angreng hle. 

"Eng nge i duh? " Azeli chuan a ti ta nge nge a. He putar hi thlarau a ni lo maithei asin. A khawih ngam teuh si lo. 

"Ka dikna chanvo ka duh a ni" a ti thawp sat a. Azeli a lo thaw hawk. 

"Chu chu ka tihtheih a ni hleinem. Ka pu, min hai aniang" a ti a. 

"Ni lo, nula, Rinsiami i puih dan kha ka lo hre ve alawm.. Min puih ve theih ngei ka beisei a ni.. " a lo ti thung. 

"Enteh, kha thil chu min ngen nasat em vang ania. Tunah chuan engmah ka tithei tawh lo. Khawngaihin min chhuahsan rawh" Azeli chuan din hluai pahin a ti ta bawrh bawrh a. A awrawl a ring deuh nge,.. 

"Û, tu nge i biak? " room kawngka bulah a nau Mama a lo ding reng mai. A nau chu a va melh a, putara erawh hmuh tur reng a awm tawh lo. A nauin maktih hmel zeta a melh reng chu zahzelah, "Story ziah ka tum a, film atan a chan tlak dawn  em tih ka lo enchhin a nih kha" a lo ti bah nuai a. A nau chuan a awih vak lo tih a hrechiang ngang mai. 

"Va zir leh tawh rawh. Thingpui kan lum ang e" a ti a. A nau pawh a lut ve nghal. Thingpui a chhuang chiah tihin an bathroom kawngka a ri rak a, putara bawk chu a rawn chhuak leh.. Hlauh nachang tak pawh a hre tawh lo. A ngenngawl  em mai. 

"Zaninah ka rawn hmu leh ang che" a ti a. A bo nghal daih. 

Thlarau nghak titih deuhin khumah chuan a let chhen a, a harh kar mai. Zing dar 2 a ri ta. A lo kal dawn lo aniang tiin muthilh tumin a intuam tha ta sat sat a. Mahse, tukverh parda chu a rawn insawi hlawk hlawk a. A melh ta kar mai. Tukverh inhawng chuang lo chuan putara chu a rawn lut leh ta zan zan mai. Ani pawh khumah thu muin a tho chhuak ve nghal. 

"Ka hming chu Sanglawma a ni a. Zarkawtah sawn dawr lian ve pangngai tak ka nei a. Keini tak chu Thakthingah kan awm thung. Kan nu hi nikum hmasa khan a boral tawh a. Fapa pahnih leh fanu pahnih kan nei a, nupui pasal an nei vek tawh. Ka fapa naupang zawk te chhungkua nen kan khawsa mek a. Ka fapa pakhat zawk erawh Saitualah khian hna avangin an awm thung. Ka fanu te erawh Lunglei leh Hnahthial lamah an awm. Kumin kumtir atang khan ka thawhah a zual thin a, ka fapa sawn dawr chu enkawl zuiin an nu hlawh nen chuan kan khawsa thei ve pangngai. Kei hi savings ngaipawimawh chi ka ni a, ka inkhawl ve nual mai. Chung ka sum khawlte chu ka fapate pahnih insem atan ka ti nghe nghe a. Ram ka lei lawk nasa bawk a, ram pawh ka fanute pahnih ka sah thlaksak ve ve bawk. Thil felfai taka ti thin ka nih vangin ro chungchanga buai ka duh loh vangin an chan tur tawk chu ka tifel vek tawh a ni. 

Kar hmasa Thawhlehni atang khan ka awm a nuam thei meuh lo va. Ka tho harh hleithei lo a ni ber. Ka monu saw a fel khawp a, min enkawl in min ngaihsak khawp mai. Ka tute pawh an la te naa min duat viau. Ka fapa erawh a dan a dang viau thung. I bula ka lo kal chhan pawh a ni nghe nghe. 

Nikum November thla atang khan ka fapa sawn ngaihzawng a nei a. A bialnu chu kan thenawm lawk ami nuthlawi fa pahnih nei a ni nghe nghe. Kan hriat ve meuh chuan an lo kal thui viau tawh mai a. Ka rilru a nain ka monu Sangi ka khawngaih em em a. Thil a fel dawn lo ve tiin chhungkua ka ko khawm a, ro kan rel ta a. A farnu leh a u Rema te pawn an hau tliar tliar mai. Ani pawn sim a tum thu a sawi a. Kan lo awihsak ve mai. Tin, rinhlleh turin an awm zui ta lo bawk nen, tikhan hlim takin kan khawsa ve leh ta a. 

Mahse, kar hmasa ka dam loh lai chuan kan monu hna kal hlanin a roomah a rawn hruai ta tlat mai. An thawm ka hre phak vek si a. Ka thinrim si ka che hleithei bawk si lo. Zanriah kan ei laiin na fek fawkin ka hau ta a. Sangi pawh a zahawm ka ti khawp mai. Chumi zan chuan Sangi chu a tlan ve nghe nghe. Ka dem miah lo. 

Mahse, a lo let leh vat a. Mama pawh a chhuak leh ta vak lo. Tichuan, kar tawp Sunday zan khan Sangi'n a fate a inkhawmpui a, kei ka la nawmsam chiah loh vangin ka mu thung. Mama leh A bialnu Lawmi te chu an lo lut leh a. Ka tuar thei ta ngang lo va, an room kawngka chu ka chum dawt dawt a. Mama chuan a lo hawng a. 

"He nu hi i duh zawk anih chuan i chhuak thei ang. He inah hi chuan Sangi bak mo ka mamawh lo ve" ka ti ta a. Ani rui kam nam bawk si chuan, "Aw ka chhuak ang. Mahse, ka ro chan tur erawh min pe ngei ngei ang che. " a ti ta a. Ka thinur lutuk chuan, "Ngaihzanwg i nei tih ka hriat atang khan ka thurochhiah ka tidanglam vek tawh. Chan i nei ve tawh lo ve, Sangi leh i u ten an insem zo tawh. He in pawh hi Sangi hmingin ka dah tawh" ka ti ve ta hmiah a. 

A thinrim lutuk pawisak nei tawh lo chu a tho lawk a, choka ami chemte a va la a, Lawmi chuan a lo dang. Chemtea min tin chungin, "Putar, hei hi hre rawh. Chan ka nei ve lo anih chuan i duh aia hmain i thi ang" a ti ta a. Lawmi nen chuan an inhruai chhuak zui ta nghal a. Sangi te bulah erawh engmah ka sawi duh ta lem lo. A haw daih chuan ka tan tak pawh a buaithlak si a. 

Thawhtan ni tlai lamah ka fapa dawr nghak haw chuan Vawksa a rawn lei hluah a. "Chhungkua hlim takin awm ang u. Kei pawh ka nun ka sim vek ang" a ti a. Engmah sawi zui lem lo vin puar takin chaw chu kan ei a. Zantirah ka khua a sik hluah a, damdawi ten min han jection a. Ka zia ve leh mai. Zing lam dar 3 bawr velah kawngka inhawng ri avangin ka harh a. Ka khum bulah ka fapa chu a lo ding reng mai. Chiang takin min melh a, "Ka pa,  I damrei tawk tawh tho va. I awm loh hian kan hlim zawk ang" a ti a. Syringe a rawn lekkang ta a. Auchhuah ka tum rualin ka hmui a rawn hup nghal. Ka taksa a chak si lo, min hneh khawp mai. Ka nghawngah a rawn chhun ta a, a damdawi kah luhin ka thisen a fan chhuah hnuah chuan a thim ta riai riai a. Ka thi chu a ni ta mai. Ka fapa te room leh ka room inkarah hian mikhual room leh ka tute room a awm a ni. Mama chu zawitein an roomah a lut zui leh ta a. 

A tukah zing tin min kaitho ziahtu ka tupa Puipuia chu ka roomah a rawn tlan lut leh cheng cheng a, "Apu, apu.. Tho rawh" tiin min rawn sawi leh a. Kei chu ka khawng vek tawh. A hrethiam si lo, chokaah a va tlan leh a, "Nu, apu saw a tho thei miah lo' a ti a. Nidangah chuan min lo kaihthawh hian ka tho nghal var a, kan inkai chhuak thin. Sangi pawh chuan hmanhmawh takin ka room a rawn pan a, min rawn sawi ve a. Ka awmdan a dik lo tih a hrethiam nghal. A rak ta chul a. Ka fapa inthiar zo pawh rang taka rawn tlan lutin a buai ber berah a tang a, damdawiina min phurhchhoh an tum laiin kan thenawm nurse Masiami'n min han dap vel chuan damdawiin kal in awmzia a neih tawh loh thu a sawi ta a. Tichuan, mitthi ka lo ni ta a ni. 

Ka fapa ngeiin ka nunna min chhahsak chu na ka ti a, tawrh dan tur pawh ka hre lo. Mahse, ka upa tawh a, ka la thi mai dawn tih ka hria. Ka thi tawh ta sa sa, a la dama te ka ngaihtuah zawk mah a ni. Sangi chungah sawn eng emaw tak tih leh an tum niin ka hria a. Ka ngaingam lo a ni. Ani lahin a pasal saw rinhlelh nachang a hre si lo, lem a chang thiam si a. A nunna thleng sawn a la tawrh ve ka hlau a ni. Khawngaihin ka dikna chanvo min hmuhsak la, Sangi te nufa saw min venhimsak hram bawk teh. Ka fapa u zawk Rema hnenah kal la, ani hi chu min hmangaihtu a ni a, kawng a dap thei mai ang. Ka ruang pawh phawrh a ngai hial maithei. Ka thihchhan dik tak an hriat theih nan… sawng ramhuai pahnihte nawmchenna saw titawp hram te" Pu Sanglawma aw chu a zawi hle naa a fiahfai viau mai. 

Azeli chuan a lo ngaithla tui leh hle mai. Mahni pa te ngei han thah chu rapthlak a ti hle bawk. 

A tukah office ban pahin Pu Sanglawma inah chuan a peng kawi ta a. Inleng neuh neuh an lo la nei ve a. A in pawh a la tha viau mai. Hmelhriat loh nula rawn lut ta mai chu mak an lo tih hmel viau a. Sangi niawm tak chuan, "Lo leng rawh.. Eng nge ni ta? " a lo ti siam siam a. Azeli pawn a ngaina nghal ni maiin a hria. 

"Aw. Ih, Pu Rema biak ka duh deuh a.. " Azeli chuan a ti ban chat a. Pu Rema chu a lo ding nghal vat,pu Sanglawma nen pawh an inang lek lek mai. 

"Aw keimah ka nia, eng nge ni ta? " a lo ti var a. 

"Ih, a fala biak lawj che ka duh a. Thil pawimawh a nia" Azeli chuan a lo ti leh niah niah a. Engmah sawi zui tawh lo vin room pakhatah an inzui lut ta a ni. 

"I pa ka hmu a" tiin bul a han tan a. A awihsak leh dawn lo tih a hre tho. 

"Ka pa chu a thi tawh alawm.. Ni li kalta khan" a lo ti nghut a. 

"Ka hria alawm… nizanah min rawn hmu a, a dikna chanvo a duh a ni" a ti ta a. Pu Rema chu a tho zawk, "Ka pa thlarau i hmu tihna mi?  Engtin? " a ti hluai a. 

"Thu phawt teh. Aw, nia thlarau ka hmu thei a. A chhan ka hre bik lo. Hmanni lawk khan thlarau pakhat chu a thih chhan dik tak hrilh turin a lo inlar a, i pa hi a pahnihna a ni. I awih leh awih loh ka ngaipawimawh lo. Mahse, i pa kha thawhah vanga thi a ni lo tih hria la ka duh a ni. Tur hmanga thah a ni" Azeli chuan a ti ta hmiah hmiah mai a. Pu Rema chuan a lu a dawm vung vung ringawt. 

"Tunah hian police hnenah report thehlut la, i pa thih dan kha chhui chiantir leh rawh. " a ti leh a. 

"Anih tuin nge that? " Pu Rema chuan a ti ta a. 

Azeli chuan hreh hmel zet hian, "I nauin" a ti ta a. Pu Rema a kun ngâwih mai. 

Azeli chhuah hnuah Pu Rema chuan Azeli nen an inbiak dan chu a chhungte bulah a sawi ta a. Hetih lai hian Mama chu a awm ve lo thung. Ro an han rel a, a farnute chuan chhungkua kan mualpho zual tiin ngawih mai an duh a, mahse, Sangi leh Rema chu an tang dun tlat. A tuk lama bawhzui turin an inti ta a. Mama erawh a bialnu nen hun remchang chuhin an inhmu fô a, A pa thihna chuan chhete pawhin a khawih lo emaw tih theih a ni. Mahse, an in chhungah erawh a ngui ber leh a pa ngai ber niawm in a lang thiam lawi si! 

A bialnu Lawmi nen Sangi chungchang pawh an sawi dun fô, "Ka pa thihna hi thla te han liam se, a chhuah ngei theih nan ka hruai lut mai ang che.. " Mama chuan a ti a. Sangi dah that ve kher chu a ngaih a ring lem lo. 

"Mahse, inah kan awm thei nang, In saw Sangi hmingin a awm si a" Lawmi chuan a lo ti vat. 

"Ni dawn tak. Mahse, ukil ka bia anga, kawng dang a awm em em ang. Ka fate saw kan awmpui phawt chuan in saw chu kan chang ang' Mama chuan a ti a. Lawmi erawh a ner ru sak. Anihna takah chuan Lawmi hi an khawsak a harsa ve a, amah mi intuaifai peih leh harh vang a nih vang hian a lang mawi mai mai zawk a. Incheina manto te hi a awt ve thei lutuk. A pasal nen an inthen chhan pawh a pasal pa kohhran  sum kawl a lo ruk vang a nia. A lo khawih chingpen nasa hman si, a pasal nen inhauin an inthen phah ta hial kha a nia. A fate erawh a pa ten an awmpui thung. Mama hi a lakah a zawr hneh em a, an khawsak a lo harsa em em lo bawk nen.. A duh dan ang taka mi lian nu a nih theih nan lang lo lam atangin kua a lo hreuh ve mawlh mawlh mai a ni. 

Pu Rema te chhungkua chuan zanriah an ei mek a. Azeli chungchang kha tuman an sawi chhuak lem lo. Mama chezia erawh an chik ru vek thung. Sangi tak phei chuan a pa thih chhanah a ngai nghet tlat tawh. Nu mawl a ni lo va, a pasalin a la thlim reng thin tih a hre vek, a ngawi rih mai zawk a ni. A fate vang leh a pa avang khan inthen thei dinhmunah dingin a inhre lo va, chuvanga la chambang a ni pakhat. A pa ber a boral tawh phei chuan awm renh tulin a hre tawh lo. Mahse, lusun khawhar te han kiam ve phawt se a chhuak ang tiin thutlukna a lo siam ru daih tawh a ni. 

Zanriah eikhamah Pu Rema chuan mi dang lo len hma siin, "Nizan ka mumangah ka pa ka lo hmu a, 'bawiha, thawhah vanga thi ka ni lo' a lo ti chiam mai a. Ka ngaih a tha thei lo renh reng. Chhui chiantir hial ka duh a ni" tiin a nau hriat theih ngeibtur chuan thu a han thet ta a. Mama chu a vir zawk a ni ber e, "Ka pa i hmu maw.. a van mak" a ti chul a. A awmdan danglam thut thunun tum takin, 'Ka pa chu ka ngaih tehreng nen ka mangah te lo inlar zawk tur alawm" a ti zui zat. 

"Ka pa thihdan tak tak chu aw.. Enhtia tih chi nhe mawni ni dawn le" Pu Rema chuan a ti leh a. 

Mama chuan ngaihpawimawh loh hmel zet hian, "A kal tawh a. Tihngaihna tak a awm tawh si lo va, bakah kei chu a thawhah kha a nasa em a, a thihpui ta a nih ka ring ber" a lo ti a. A chhungte inmelh kual ralh ralh chu a hmu ve lem lo. 

A tukah Pu Rema chu Police stationah kalin thil awmdan a sawi ta a. Azeli'n a pa a hmuh thu erawh sawi loh hram a duh. An awihsak dwn lo tih a hre ve tlat. Report a thehluh chhanah, "ka ngaih a tha thei chiah lo va, thil dik lo eng emaw tak a awm ka ring a ni" a ti. Ruang phawrh a ngai dawn ta ngei e

A u in report a thehlut tih Mama'n a han hria chu a thinrim kher mai. Min timualpho ti zawngin a tang a, Rema erawh  chuan a ringhlel telh telh thung. Sangi lahin a rukin an pa a thlithlai reng a, an room pawh a lepse nasa a, eng emaw thuhruk a lo nei mial em tih thu ah. Eng em em phei zawng a hmu lem lo. 

Pu Sanglawma ruang chu an phawrh ta a. Miin an ngaichang ru ta thup mai. An han exam hnuah a tûr chak tak vanga thi a nih thu puanzar a ni ta a. Mi sawi pawh a hlawh khawp mai. 

Tichuan, Mama chu an hling ta phawt. A tang na hle. Mitthi tawh khin chu a awlsamzia a hria a ni mahna. Mahse, Rema a beidawng duh lo. Police lamin theihtawp an chhuah bawk. A inpuang duh thlawt bawk si lo. An beidawn dawn tawh lamah Pu Rema thusawi thenkhat avangin Mama bialnu Lawmi chu an va hruai ve ta a. Pindan hran ve veah an kawm dun ta melh melh a. Ani Lawmi lah lo hlauthawng ru sa, hmeichhia a nihnaah lo nem sa a nih vangin police in thiam taka an han chhimbudawi kual vel chu a tuar zo ta lo va, a inpuang ta a ni. 

Police ten, "I bialpa chuan Lawmi min tihtir vek alawm. Ka pa ro saw a duh a, kei hi hmanruaah min hmang a.. Amah vang vek a ni' a ti a. I inrawlh nasa hle tih a lang a. Tualthah thubuai vangin i damchhung jailah i hun i hman a ngaih hmel" an han tih meuh chuan, a insum zo ta lo va. A puakkeh ta a ni. 

"Amah per pur saw a lawm. Kei chuan thah kher kha ka duh reng reng lo. Ka hriatpui miah lohin damdawi a lo lei a,a tirah apa kha a that tih ka hre bik reng reng lo. A ruang thlak zana kan inhmuh khan a sawi anih kha.. Syringe pawh an thenawmte huana a paih thu a sawi nghe nghe.. Tel vena ka nei reng reng lo" a ti ta bawrh bawrh a. Police ho pawh an thaw huai hlawm mai. 

Azeli pawh putara dikna chanvo hmuh a nih takah chuan thlamuangin a muhil ve leh thei ta a. Thlarau dang hmu tawh lo se a duh takzet.. 

Mahse, thla khat a liam chiah tihin nu pakhat cher leh dawldang zet hian a office bang haw a zui a. An kawngka bulah an ding dun ta ran mai. Chu nu hmel chu a rapawm riau. A mitkhur te chu a tla dûk mai a

, a hlim mawlh bawk si lo. 

"Eng vangin nge min zui? " Azeli chuan a ti ta a. 

"Ka fanu min chhanchhuahsak rawh.. Khawngaihin" a ti tham chhal a. 

"Police ho hrilh rawh.. Kei chuan tijtheih ka nei lo" a lo ti chang bawl. 

"Min hmu ve thei si lo va, tuman min tanpui thei lo. Nang chauh lo chuan" a ti ta a. Thlarau azawnga thlarau rethei ber niawm tak hmel a put. Miau vangin Azeli pawn hnial ngaihna a hre lo. 

"Amak, ka u hi ti nge nangmah hian i phun ziah leh? " a nau te lo haw chuan an ti hlut a. 

"Ka zawl ka lo bia a" a ti fiamthu hlut a. An nui dar dar a. In chhungah an lut ta a… 

To be cont…