Thlarau thuchah 1

THLARAU THUCHAH..! 

Ziaktu: Toni Râlte

Kum 1990, june ni 13,  zan dar 10:13 ah chuan Thingtlang khaw pakhat, Zodai khuaa tlak lam in pakhatah chuan nausen pianghlim a tak ngâk ngâk a. Mi pali in a hringtu chu an kil laih bawk. Nausen chu a lai hrui chhatin, puanvarin a chhartu chuan a tuam a. A sawi pah hliau hliau bawk. Nau a rawn piang hlim hlawt tihah khan an khaw dai leh an inbul velah chuan ar a khuang chuah chuah mai a!  Ui ni se an bauh tuar tuar bawk. Ralkhatah sihal a û rawng rawng bawk a. Puithuna ring tan phei chuan ngaih tihthat lohna tham a tling hial awm e. Mahse, chu nau piang chu fatir a nih miau vangin a nu leh pa te tan chuan a hlu em em a, boruak danglam deuh han awm mah se; an ngaih a titha lo zo lo. 

Nau chhartu chuan, "Hmeichhia a ni e" a ti sap a. 

A hringtunu chu a lo thaw halh a. A pasal nen an innuih sak bawk. Nupa tuak thar tih mai theih tur an ni a. An inneih atanga kum khat leh thla hnihnaah fanu an nei ve ta chu a ni a. An tan chuan thil lawmawm tak a ni awm e. 

Nausen pu, putar lam lek lek tawh chuan a tunu chu rawn en vein, "Hei bak hi in fate hmel ka hmuh ve loh takin a hming hi ka'n phuah ang e. Ka pu atanga pasaltha chhung, huaisen leh hlauh nei lo kan nih angin kan thlah kal zel a lo hming than zual zel theih nan THANSANGZELI ni rawh se" a ti chuar chuar a. 

Thansangzeli chanchin chu a ni kan sawi dawn ni. A naupan lai, a tleirawl lai vel chu a sei lutuk loh nan sawi lo mai ila. Naupang dang ang tho vin danglamna em em a nei hran lo. Kum 18 a tlin champhaphak zanah erawh a muhil tui lai chu a rawn tap chhuak hlawl mai a. A nu leh pa ten thil awmzia an han zawh chuan, "Hmun pakhatah mihring tam deuh ka hmu a, an lo zi nuai nuai a. Hmel rapawm deuh deuh vek an ni. Kei chu min rawn pan ta hlawm a, an awmna hmun lah chu a ro in a reh khawp mai a, mihring lo chu eng thil dang mah a awm ve lo. Ka hlauh em vangin tlanchhiat ka tum a. Ka tlan tur ka lehhawi chiah chu ka pu kha a lo ding reng mai a. Ka pu chuan, "Mambawih, tun atanga kum 7 a vei leh meuh chuan thlarau khawvel ami te tan hringmi zingah thuchah i keng tawh dawn a ni. Chu chu i lo pianchhan pawh a ni e" mi lo ti a. Chu thu a sawi zawh veleh ka pu chu a ral ta riai riai a. Ka au vak vak a, ka hmu tawh si lo, ka tap ta ringawt a ni" tiin insut hlap hlap chungin a ti a. A nu leh pa an inmelh reng ringawt mai. An fanu pian zana thil thleng mak tak kha an hrechhuak lo thei lo. 

 Kum 25 a tlin meuh chuan Aizawlah a naute pahnih nen mi in hnuai an luah ve ran a. A vanneih asiamin kum 2 liamtaah khan LDC hna a hmu ve hlauh mai a. Anihna takah chuan a pa party belh a fuh vang a ni pakhat. Chu hna chu nuamti taka thawkin a naute pahnih lehkhazir a chwwm bawk. A nute erawh an khaw lamah a naute pahnih nen an awm ve mek bawk a. An hawng zeuh zeuh bawk. 

A mumang kha a hrechhuak zauh zauh thin. Khami zan atang khan kum 7 chu a vei ta chu a nia. Thil danglam em em a la tawng leh lo. Nunphung pangngai tak neiin bialpa te pawh a nei ve ran a. Pasal neih erawh a la ngaihtuah lem lo. 

TAWN VAWIKHATNA.. 

Fur lai a ni a, ruah a tla deuh siar siar reng mai. Thansangzeli (Azeli tiin kan sawi tawh ang)  office bang chu a thianpa dawrah a peng kawi a. Treasury, Petrol pump bul lawkah a ni. A thianpa chuan customer a lo nei nial a, a han pui ve lawp lawp a. Chutia an buai mam mam lai chuan an thawm a ri chul mai a,  an thwwm a ring viau mai. Tukverhah chuan an va dak vat a, accident a thleng a lo ni. Mipui an pungkhawm chak kher mai. Motorin mihring a chil tih chu a hriat theih mai. An hual thup mai. Hmanhmawh zetin an va tlan chhyak ve a, kawng lai takah chuan motor kal theih loh khawpin mipui an lo pungkhawm tawh. Thei leh thei lo va ring fánin a dak ve fan fan a, ruang chu a va hmu ve thei hram. Hmeichhia a ni nghe nghe, a dul chu a keh emaw tih mai turin a ril te chu a rawn chhuak pur mai a. Mahse, chulai hnaia dawr nghak nu pakhat chuan puanin a khuh ta vat a. 

Azeli chuan nunna nei tawh lo tih hriat taka let reng chu a melh reng a, chutia a en reng lai chuan chu ruang atang chuan mihring tho hi a rawn tho tial tial mai. A tirah chuan a la dam emaw a ti hman a. Mahse, mitthi kha chu a la mu reng si!  Mak a ti lutuk chu hawisan nachang pawh a hre lo. A melh tlawk tlawk ringawt mai. Chutah chu thlarau niawm tak chu a hawi kual ruai a, a mangang hmel pawh chu a zuk hmu thei. Mi dang chuan an hmu ve miah lo nge ni an ngaihven miah lo mai. Chu thlarau chu a lamah a rawn hawi chho ta a. An inmelh chiang kher mai. Azeli hlau lutuk chu a tawlh hnung dâwrh a. 

A thianpa chuan maktih hmel deuh hian, "I tha em?  I va hlauh hmel em em" a lo ti vat a. Nia, a dang var pap mai. 

"Ka.. Ih.. Ka tha.. I lo hmu ve em? Kha thil kha" a ti bah nuaih a. A thianpa hrilhhai hmel a hmuh chuan a hmu ve lo tih a hrethiam nghal. Chhuanlam siamin hmanhmawh takin a haw ta a. Zanriah pawh a ei tui meuh lo. A naute chuan ngaihthat loh nachang an hre lem lo. Hrilh kher pawh tul a ti lo bawk. Zanriah ei khamah chuan Tv an en a. News-ah an lo puang em ang chu maw.. 

"Vawiin tlai lam dar 4 bawr velah khan Treasury petrol pump-ah Bolero,  MZ-01-K- 0976 chuan nula pakhat chilin nula chu a hmunah a boral nghal a ni. Hmutu te sawi danin nula hi a va inbarh lut niin an sawi. Bolero khalhtu hi police custody-ah awm mekin, ruih a nei lo tih finfiah a ni. He thu buatsaih a nih lai hian nula boral ta hi tu nge. anih hriat a la ni lo va, Civil Hospital, Mitthi dahna hmunah dah mek a ni. " tia news readerin a rawn puan lai chuan a insangmar teuh va. A awm a nuam lo kher mai. A nauten lehkha an zir a. Ani erwh rilru lakpen nan lehkhabu a chhiar a. Book worms tih mai tur chi hi a ni ve a. A hun awlah chuan phone khalh aiin lehkhabu nena hun hman a thlang fo zawk reng a ni. Mahse, tun tum chu a rilruah a lut mawh viau mai. A va zung sek ringawt. 

Zan dar 11 a ri mek, a muhil ve siar siar dawn tihah a khum mawng lam hniam sut leh ri deuh rep avang chuan a harh hlawl mai a. Thinthia mu a nih loh vangin a harhvang khawp. A zuk hawi thla vat a, a au chhuak thelh!  A auchhuak lo kha a mah pawn mak a ti. A khum mawngah chuan amah hnungchhawn zawngin mihring ruangam pu hi a thu reng mai. A naute hian room an intawm a, ani erawm room chhakah amahin a mu thung. 

Light on turin chakna a nei lo. A melh ngawt ngawt ringawt. Chutah muangchangin chu thil chu a rawn inher ta a. Karei!  Vawiina thi ta ngei kha a ni. A lo rinlawk sa mahnise, mitthi tawh tih hriat lutuk han hmuh chu a dan a dang hle a niang. A khur ta zawih zawih a. Chu thlarau chu a insiamchhe hran lo, lungngai hmel a pu a, a ngui kher mai. 

"Khawngaihin min hlau suh. Ka tina dawn lo che. Mi dang tuman min hmu ve thei si lo va, nang chiahin min hmu thei. Chuvangin ka lo pan tawp che a ni" a ti a. A aw chu a chher lek lek, mahse, a mawi phian. Tawng turin thahrui a nei lo nge, Azeli chuan ang deuh pam chungin a la melh ngut ngut mai. 

"Ka thih chhan dik tak leh tu nge ka nih tih hi min puanzarsak la ka duh a ni. Khawngaihin, chuti lo chu ka chawl hahdam thei dawn lo" a rawn ti leh a. Azeli hlau khawng tlat pawh chu harh chhuak niawm takin a che ta hrut a. 

"Tu.. Tu nge i nih? ' a ti ta tuak a. 

"Ka hming chu Rinsiami a ni a. Ramhlun North-ah sawn mi inah ka awm a. Awmpui ka nih ber chu. Kan khua chu Hliapzau a ni a. Kan harsat em vangin Aizawlah hian inhlawhna zawngin ka patea'n min rawn hruai a, awmna tur min hmuhsak ta hlauh a ni. Tuna ka awmnaah sawn kum 2 ka awmna chiah a ni… chuan" a tih mek lai chuan, Azeli chuan, "I chhungten i thi tih an hre tawh em? " a lo ti a. A lo tawng ring deuh nge, pindan lehlam atang chuan a nau Saitea chuan, "Au Mam, tu nge i biak a? " a rawn ti thum dût a. Thlarau chu a bo nghal hmak. 

"Ka lo tawngvai a nih dawn kha" Azeli chuan a lo ti vat a. Saitea pawh a reh zui ve nghal. 

A mu leh a, a muhil thei lo. Rinsiami bak a ngaihtuah thei meuh lo. Kum 18 a nih laia a mumanga a pu thusawi kha a hrechhuak leh a, a sawi dik tak tak em mawni le.. Hlauhna chuan la kiansan lo mah se; Rinsiami chu puih ngei duhnain a khat a. Chutia a inngaihtuah buai lai chuan tukverh parda chu a ri set set a. Tukverh inhawng miah si loin Rinsiami bawk chu a rawn lang leh ta. Thla eng chuan a chhun fuh bawk a; a hmel chu a lang chiang kher mai. Nula hmel chhe lo tak, hang lam lek lek a ni a. A lian lem lo thung. Chhun lama a thawmhnaw hak Tshirt dum nghawng bial leh jean kekawr pawl tak tha tak chu a la ha a. Crocs dum a bun bawk. 

"Ka sawi anga, lo ngaithla tawp rawh aw.  Min hlau tawh lo hram rawh. Ni e, thlarau chu an hlauhawm ang, mahse, i puihna ka mamawh si a. Pawi ka ti lutuk. 

Ka nu te chuan ka thih thu an hre tawh e, tunah hian ka ruang la turin an lo kal mek. Chuan ka thih chhan chu ka'n sawi tawh ang e. Ka awmna te saw an fel a, pa ber saw Department pakhata Director ni lai a ni nghe nghe. An hausa takmeuh a ni. An fate pawh ka chungah an fel em em vek, kei aia u vek an nia, nau angin min en ti ila ka sawi sual lo vang. 

Hlim deuhin ka awm ve reng a, mi thatchhia ka nih loh vangin ka pite mit pawh ka tlung ve khawpin ka hria. Kum khat zet ka awm ta a. Hlawh pawh ka chhungte ka thawn zat zat thei a. Ka chhungte pawh an lawm ve viauin ka hria. Tichuan, thla hnih liamtaah khan thilmak tak ka tawng ta a ni. Mikhual kan nei a, mikhual ti ila ka pu fapa Makima thianpa a ni. An sawi danin Delhi-a awm an ni a. Mizoramah chhungte an neih loh vanga lo thleng angin an sawi. Tin, Umakima hna velah a pui bawk a. Umakima hi engineer a nia. Chuan U Puia chu ka chungah pawh a fel khawp mai. Mahse, ni khat chu ka piin bazara kal turin min tir a, ka chhuak ta a. 

Ka hawn chuan a lo reh thap mai. In chhung ka lut a, tumah ka hmu lo. Ka pi hi englai pawha ina awm hi a ni ve a. A mak ka ti angreng viau. Dawhkanah ka thil lei vel chu ka dah a, Ka naute thil tur ka leisak ve chu ka roomah dah tha turin ka kal zui nghal. Ka room bul chiah hi mikhual room a ni a, mahse, Upuia chu a riak ngai lo. U makima bulah a mu ve mai. In chungah ka pi leh pute room bakah u muanpuii room a awm. Chutia ka rooma ka luh rual chuan mikhual room lama thawm chu ka hre zui ta a. Ka room pawh hi mikhual room ang tho anih vangin room pahnih hi an uluk vak lo va, an pindanna pawh plywood tha chi ang kha a nia. Thawm chu a hriat theih deuh vek tho a ni. 

Ka hriatthiam dan chuan na tuar thawm niin ka hria a, a ngaihna ka hre lo khawp mai. Ngaihtha vak lo chungin ka rooma ka naute thil ka dah that hnu chuan chu room kawngka chu hawn ka va tum a, a lo inkalh tlat. Mak ka ti khawp mai. Ka sawi ta nghek nghek a, ka pi ka au pah bawk. Thawm chu a reh nghal hmak. 

Ka pi lah a rawn lang thei der lo mai. Tihngaihna ka hre si lo va, eirawngbawl turin chokaah ka luhsan ta daih a. A hnu minute tam a liam lo vang tihin Upuia leh ka pi chu room atang chuan an lo inzui chhuak ta a. An hmel a phelh phang a, ka pi sam te chu a thur deuh bám mai. Mahse, chutiangin ka ngai khaw lo miah lo. Ka mawl em vang pawh aniang. 

"Ehe.. Nangmahni law.. Na tuar thawm kha ka hria a.. " ka lo ti vat a. An inmelh ralh ringawt. 

Upuia chu a chhuak nghal daih a. Ka pi chu ka chawhmeh channa bulah a rwn thu ve a. "Siamte, vawiina i thawm hriat kha sawi chhuak suh aw.. Ka pum a na a, chuvang anih kha.. I pu bulah pawh sawi a ngai lo ania" a ti a. Ka lo bu nghat ringawt. Mak tihna ka la nei chuang miah lo kha ka mawl ngawih ngawih. 

Ka sawi chhuak ta lo reng a. Mahse, ni hnih hnuah khatiang bawk kha ka tawng leh a. Chutah erawh chuan ka ngaibtuahna a dang ve ta deuh a, ka room atang chuan enthlakna tur ka ker ru ta a. An chet leh veleh enthlak ka tum a ni. An reh vang vang hnuah ni khat chu an che leh ta a. An chet dawn ni hian ka pi hian min tir chhuak ziah. Mahse, min tirh pawn ka hawn te chuan lo zawh ve tawh awm. An lo la awm dun ziah chu a mak. Min ngaipawimawh tehchiam lo niin ka hria. Ka enthlak theih takah chuan ka lo rin dan ang chiahin ka pi chu a uire thin a lo ni. Rapthlak ka ti khawp mai. Ka sawi ngam der si lo. 

Mahse, ka lo fimkhur seng ta lo va, ka hria tih an hre ta a ni. Chutah chuan min vau hrep a, ka sawi chhuah ruala ka thih tur thu nen. Keipawh sawi lo turin ka intiam bawk. Ka pite rooma chet ve mai awm.. An huai ka ti khawp mai. An nupa khum èm tihbawrhban a duh lo ve pawh a ni mahna. 

Tichuan, thla khat lai a liam ta a. Ka pu nena kan awmdun te hian an ngaih a tha lo ringawt tawh zel a, Umuanpuii rooma ka kal te hian min enthla reng niin ka hria. Tichuan, ka pu chu hna vangin a zin a. Chumizan chuan mitthi an awm vangin Umuanpuii pawh tlaivar turin a kal a, kei erawh ka awm a nawm meuh loh vangin ka kal ta lo. Umakima erawh a hnaah a thawk ngawrh deuh a, Aizawl atanga hla vak loah an thawk a, a rawn haw lo. Tlaiah Upuia erawh a lo haw thung. Ka mu hma ta daih a. 

Thaw deuh su su avangin ka harh hlawl mai. Ka men chuan Upuia hian hnai takah min lo melh reng mai a. Ka rak tur chu ka ka a lo hup nghal. Zu rim a nam huam bawk. Chutah dim baksak lo vin min khawih zui ta a. Ka tang ve nasa, mahse, ka hneh mawlh lo a ni. Mahse,  ahlawhtling thei mai bik lo va, chutah ka pi a raen lut ve a. U puia chu a rawn pui ta a. Kei chu ka lo tal zawi tawh nen ka hneh ta ngang lo va, U puia chuan min pawngsual ta a ni. 

Ka pi chuan video in a lo cover. anih chu!  Ka tap zankhua thak. Ka la virgin a sin. Video chu min hmuhin ka pi nen an chetdan ka sawi rualin a darh nghal tur thu an sawi a. Tin, ka chhungte thahsakah hial min vau bawk. Engmah ka sawi loh tehlul nen. Ka rilru a na lutuk chu thih leh thih tiha sawi chhuah hial ka duh rum rum tawh zawk. Mahse, kan rethei si, an ni thil an tithei si a, ka thusaei ve chu tuman min awihsak ka ring si lo. Rilru na em emin hun ka hmang ta a ni. 

Khata tang khan hun remchang apiangah upuia chuan min pawngsual ta ziah a. Thil tenawm tak tak min tihluihtir fo a. Ka pi te nen kan pathuma khum khata sex kan hman ho changte a awm thin. Rapthlak ka ti lutuk hi ka khur zawih zawih zel. Intihhlum hial ka ngaibtuah thin a, ka ngam bik chiah si lo. Hawn dan tur ka ngaihtuah ta a. Ka pu bulah ka sawi a. Chhuanlamah ka nu dam that loh thu ka sawi ta tawp a. Min phalsak ta mial a. Ka lawm khawp mai. 

Hawng tura ka inbuatsaih zanah chuan Ka pi a lo kal a. Thinrim takin min hau a. Ka chhuah hlen tur thu ka sawi pawn min awih duh lo, ka chhungte bul ka thlen hunah ka sawi chhuah a hlau a ni ber. Keipawn ka sawi ka ring ve tho. Tichuan, ka haw anih chuan video tlangzarah min vau ta a. Ka hlauthawng ve tho si. Ka rilru a va hah tak. Ka haw lo ta phawt. 

Chuan nizanah khan Upuia rawn kal lehin min pawngsual leh a. Chutah chuan HIV a positive thu a sawi ta a ni. Ka mawlmang em a, Hiv chu thihna tlukin ka hlau. Ka chhungten hre ta se tih ka ngaihtuah a, min haw ngei dawn si a. Min thinhrik bawk ang. Ka ngaihtuah thui ngam lo. Ka rilru a buai em a. Thih chiah ka duh. A tukah ka pi bulah chhuanlam siamin ka chhuak ta a. Eng nge ka tih ber ang tih ka hre lo. Khalai hmun ka thlen khan ka rilru buai lutuk khan ngaihtuah nei miah lo vin motor a lo tlan mek tih hre lo vin kawng kha ka kan ve tawp a ni ber. Tikhan ka tawp ta chu a ni ta mai a.. " Rinsiami chuan a ti ta dap dap a. Chil pawh lem tha ngam lo vin Azeli chuan a lo ngaithla. Hlauhna reng a nei tawh lo. 

"Engti turin nge min duh? " zawi te hian a ti ta a. 

"Khawngaihtakin ka awmna hmunah va kal la, ka pu mawlh kha thudik hi min va hrilhsak hram teh" a ti ta a. 

"Mahse, an awih duh dawn em ni? Bakah hriatchhuah hun an la nei tho ang" Azeli chuan hreh hmel zetin a lo ti ban chhalh a. 

"An awih theih dan tur kan ruahman dawn alawm. " a lo ti ve leh a. 

"Mahse, thlarau thusawi chu tuin nge ring duh ang? Thlarau ka hmu tih pawh an ring duh nang" a lo ti ve leh zel a. 

"Lungngai suh. An ring em em ang che.. Ka awm alawm" a lo ti awlsam èt a. Biak hman lohin a ral leh ta daih. Azeli chu a tlaivar thak mai. 

Mit thial ûrhin a tho va, Holiday anih vangin a lawm viau. Heti chunga office kal chu a peihawm loh bawk a ni. A naute erawh chawlh denchhenin an picnic daih. Tukthuan a ei khamah a muzal mai mai a. A lo muhil daih. Boruak uap churh vangin a harh leh a. A khum bulah Rinsiami kha a lo ding leh reng mai. A hlau tawh lem lo. 

"Khawngaihin tunah va kal rawh. Ka pu chu va hmu hram rawh. An bum zel dawn asin. Tin, ka chhungte pawh min hrilhsak hram rawh" a ta mawlh mawlh a. A hreh kher mai. Mahse, a insiam ta tho va, a rilru a kap run tho si a. 

Rinsiami pu nen nen an inhmachhawn ta ran mai. 

"Ka pu, Rinsiami min tirh vanga lo kal ka ni. " a ti nghal thawr mai. Rinsiami pu Pu Manliana erawh a awmdan a danglam eih lo. 

"A thi tawh" a lo ti chang bawl a. 

"Ka hria alawm, a thlarau ka hmu a ni" a lo ti a. Pu Mana a meng phawk ta. Awih loh hmel takin a awm leh a, "Nula, eng nge i duh ka hre lo. Mahse, hna ka ngah viau ania, hna ka ngah vang ania Siamteii ruang pawh ka zui ve loh' a ti ta mial mial a. 

"Ka pu, engmah ka duh lo. Thudik hria la a duh vang a ni. I nupui leh i fapa thianpa te sawn an bum mek che a ni." A ti leh hmiah. Pu Mana file la tur a tawp chawt. 

"Mi mawlah min ngai em ni? Nge nang hi i chiang lo zawk.. " a ti leh a. A aw pawh a nelawm vak tawh loh. 

"Keipawn mak ka ti ve tho. Anmahni vanga Siamteii kha thi a ni. An thah chu a ni lo, mahse, an thiltih tenawm tak vangin a rilru a buai a, a thih phah ta hial anih kha" Azeli chuan a ti leh hmiah. Pu Mana hmel zawk chu a buai nuaih tawh. 

"Min chhauhsan mai teh. Mi â kawm nan hun ka nei lo" a lo ti leh tuar. 

"Nikum Siamteii pianchama i thil leisak kha i la hria em?  Purse sendang, 1300 man a nih kha.. Chuan, thla nga liamtaa i fapa Makima hna hmuh lawm nana i sana leisak pawh Nixon porter niin a dum anih nghe nghe kha. A man pawh a to viau ani lawm ni? I fanu Muanpuii pasal hual pawh Sangzuala niin Advocate a nih nghe nghe kha.. " Azeli chuan a ti ta mawlh mawlh a. Chung thil chu rin a nih theih nan Siamteii khan a lo hrilh diam tawj a ni. Pu Mana chu a vir zawk a ni ber. Makti lutukin a hmaa thu nula ngo ver mai chu a melh ta tlawk tlawk a. A thusawi kha dawt pakhatmah a awm lo. 

A thlan fim rawn bawl tawk tawk chu hruin, "Eng nge ka tih ang? " a ti ta a. 

"I nupui leh Puia te sawn i awm loh hlanin thil tenawm tak an ti thin a, Chu chu Siamteii khan man chhuakin ani pawh a ka hup nan an vau zui a, Puian a pawngsual a, video an nei thlap bawk. Puia sawn Hiv a positive thu a sawi bawk. A rilru hah mangang, nun chèp lutuk khan ngaihtiahna mumal pu miah lo vin kwng a kan a, motor lo tlan lai nen inangchingin a va inbarh lut ta a ni. Dam ve reng kha a phu asin.. Chu chu a chhungte pawn an hre ngei tur a ni. An fanu kha mahni intihlum angah an ngai thei, an rilru a hrehawm viau thei.. Chu chu Siamteii chuan a tuar thei thlawt lo a ni ber e" Azeli chuan a ti ta dap dap a. Pu Mana ngaihtuahna pawh a fim chho tan. A nupuiin a phatsan tih thu hriat chuan a thawng hle tih erawh a hriat mai. A thisen zam pawn tawlh tawlh danah. 

"Aw le.. Mahse, chutia ka rinhlelh ngawt chuan a fel nang. Fiahna ka mamawh alawm" a ti ta a. 

"Office ban hmain haw la, i nanchin hun a la awm mai ang. I fate erawh engkim fiah a nih hma chuan engmah hrilh suh.. Siamteii dikna chanvo kha hmuhtir hram ang che. " Azeli chuan a ti a. A tho va, a chhuak zui nghal. 

Kar hnih a liam leh meuh chuan Pu Manliana nupui Pi Thanchhungi chu mak chhiat tawkin an in lamah a haw ta. Mahse, an inthen chhan erawh tuman an hre lo. A chhan chu Azeli'n puangzar lo tura a ngen vang a ni. Siamteii chhungte pawn thudik an hre ta a. An fanu dinhmun dik tak an hriat takah chuan rapthlak an ti takzet. Pu Mana'n zangnadawm nan pawisa thahnem tham takin a ral nghe nghe. Mahse, upa alamah nupui then a ni ta reng mai. Kha tak kha ania Azeli pawn sawi loh tha zawka a hriat. Mahse, lehlamah chuan engtikah emaw a la manchhuah tho a rinawm a, Siamteii kha a nupui uirena vanga thi a ni tih a hre dawn si lo. Puia pawh Delhi-ah a chhuk ta vang vang mai. Hremna hmu tlak anih rualin mi nu uire vang ngawta hremna pek chu Pu Mana tan pawh a mualphothlak vangin an ngawi ta mai a ni. 

Sunday zan a ni a. Azeli tv en lai chu a lo muthlu a, a mumangah Kha accident thlenna hmunah khan a lo awm a. Tumah mi dang erawh a hmu ve lo. Hmar lam atangin Siamteij ngei mai kha a rawn phei hnak hnak a. Lungngai hmel a pu tawh hauh lo. 

"Ka lawm e aw.. Tunah chuan thlamuang takin ka chawl ve thei tawh ang.. " tiin Azeli chu a nuih var var a. A ban a vai lap lap a, chhim lam hawi zawngin a tawlh ta del del a. 

Azeli'n a thlir reng lai chuan, a darah tu emawin a rawn khawih a. A lehhawi vat. Putar hmai dang bil bel, sam tuak pheuh pheuh tawh hian, "Nula, min pui rawh aw.. Khawngaihin.. " a lo ti boh boh a. 

Azeli chu a harh zui ta nghal…