Thuruk 4

THURÛK… (4)

Ziaktu: Toni Râlte

Secret Society.. 

Dr Zira hmel dur khuih chu Beiseia tan chuan hmuh a nuam fahran lo hle. Dawhkan bawh uaihin hnai zetah Beiseia chu a melh ling hlar a. 

"I hlawhchham a maw? I thluak aiin tharum i hmang leh zawk tih a chiang reng. Engkim hi tharum hmanga chinfel theih a ni vek lo tih hre tawh tur i ni asin.. Tichuan, an thi vek a maw?! " a ti vin thak a. A aw chuan ngaihno a bei tehchiam lo khawp mai. 

Beiseia chuan tîm dui hian, 'Aw.. An thi vek. Ka duh aia rangin an che ve tho a tin ni". a ti a. 

Erica a rawn lut ve chiah, thil awmzia a hriat chuan a vei sek a. "Chairman hian a hre tawh em? A hriat chuan thi sa tluk kan ni. Ka hrilh che a, i zawm duh lo alawm.. He thil hi kan kaltlangpui thei lo, sister Ariana puihna tel lo chuan.. I hre reng. I kal pui tálh a" tiin Dr Zira chu a melh khûi khûi a. 

Thaw lak hawk pahin, "Aw le,  a tha vek e. A tawpna a ni hleinem. Ka buaina zawk chu Zochhingpuii hian a nihna dik tak a hre tawh em ni? Tih hi a ni" Dr Zira chuan a ti ta a. 

Beiseia chuan zawi raih hian, "Ka ring, hmeichhe naupang kum 15 mi lekim Rifle zei taka a lek theih chuan thil dang a awm ngei tur a ni" a lo ti a. 

Erica chuan, "Tu chuan nge hrilh ang?  Aputea sawn engtik khawtikah mah a hrilh lo vang. " a lo ti ngal ngal a. 

Dr Zira chuan a tarmit chu rit tih hmel zeta chawi kangin, aw fiah fai tak hian, "Hrilh theitu pakhat chu a awm. Emy" a ti ta sup a. 

Boruak chu a reh dûk mai. Beiseia hmela thinrimna leh huatna lo lang chu Emy laka phuba lakna tur a ni ngei ang. Ni e, ani khan a lo hrilh anih vaih zawngin a naute pathum nunna nei tawh lo te thisen phuba chu a la ngei ang le.. Emy nen hian eng lai mahin an inngeih ngai lo thin reng a. A hna tihthuanawp hi a tum pawh a ni mahna. 

"He hmeichhia hi engah nge in la chelh reng? Engvangin nge min dah thattir mai loh" a ti ta chher chher mai. 

Dr Zira chuan nem zawk hian, "Tunah chuan ni rih lo ve. Dorothy hmang hian chinfel kan tum zawk dawn nia. Mahse, Emy hi a fin kan chelh lo vang tih erawh a hlauhawm viau" a ti a. 

Erica chuan, "Chairman hian a voh tlat bawk si a. Keini tan khawih ngawt ngam chi a ni lo. Mahse, kan enthla thei reng alawm.. Rina leh a hote pawh kan tir leh thei ang" a ti a. 

"Umm tir rawh. Khawi kipah pawh zui rawh se. Kan rinhlelh ang thil a ti anih vaih chuan, paihthlakna remchang tak a ni. Tichuan, Dorothy hmang hian khawvel thar kan din thei bawk ang" Dr Zira chuan a ti ta a. An thaw sang sang mai. 

Villa.. :

"Naute, i that ringawt ania. Thisen chhuah kher kha a ngai lo asin" Valtea chuan a ti dat dat a. Zochhingpuii erawh hmalam melh ngurin a ngawi tlat. 

(Zochhingpuii hi Zoi tiin kan sawi zel tawh ang. Kan hriat pawlh loh nan, Zohlupuii (Emy)  kha Hlupuii emaw Emy emaw tiin kan sawi tawh ang) 

Valtea chuan thlan pathumnaa ruang pakhat  theh thlak pah chuan, "Khawpuia kan pem ngei chu a ngai takzet a nih hi" a ti a. 

"Ate, lungngai miah suh. Kan damkhawchhuak thei em em ang. Nunphung pangngai tak nei ve tur hian engpawh ka ti ang" Zoi chuan fiah zet hian a rawn ti a. 

Ruang pathum an phum zawh chuan Villa lam an pan ta a. Kawl a phe zawr zawr a, vanah khawpui a kal ruah ruah bawk. Ruah a sur dawn anih hmel. Kum tawp a ni tawh a. A vawt viau bawk. Inbual faiin zanriah an ei a. An inbe mang lo. An rilru an kawm dun ni ngei tur a ni. Zanriah ei khamah mei lum an ai leh a. 

"School kal ve ka duh a. A theih ang em? " Zoi chuan a ti a. 

Valtea chuan, "Ka hre lo le. Certificate kha chu ka pa khan a lei ngei mai a.. A hman theih ka beisei.. Ni e, school kal la, nunphung pangngai i nei thei mai ang" a lo ti ve a. 

"Mahse, khaw nge kan awm ang. In kan nei si lo" naupangchhia zetin a lo ti a. 

A khi suk, tunu melh vawng vawng chungin, "I pu kha mi rethei a ni hleinem. In pakhat chiah kan nei lo. Hmanniah khan kan in luahtu te pawh ka hrilh tawh kha. In mal ding a ni bawk a, kan putu chuan nuamsa takin kan cheng thei ang" a ti a. 

Zoi chuan, "Mahse, engtin nge ei kan zawn ang?  Thing kan hralh thei tawh dawn si lo va" a lo ti leh niah niah a. 

"I nu pawisa khawl sa kan khawih chet a ngai tawh dawn a ni mai. Keiin sumdawnna bul ka tan ang a. Kan supplier te ka be tawh alawm" awlsam deuhin a lo ti thliam a. Zoi pawh a lungawi ta aniang. Engmah a sawi tawh lo. Zan a rei tak tak hmain mu turin an pindan ve ve an pan ta a.. 

"Min rawn hnaih hlek suh.. Kal bo rawh" tiin a thle tawn chhen a. A kut chuan lukham a hmer ngat ngat bawk. Chu mihring lian leh hmel rapawm tak lah chuan a rawn pan zel si. Nui sûng chungin, "Nang hi lawm ka zawn che chu. . i kal bo tawh lo vang" tiin a kut a rawn phar chhuak dû a.. Zoi hrawka reh a tum lai tak chuan, Zoi chu a rak thawt a. A harh hlawl mai. Mangchhia mai a ni e. 

Tuisik a in khawlh khawlh a. A mu leh. Mahse, a meng kar thung. A laka thurûk an zep tlat chu hriatchhuah a tum ngei ngei dawn. Eng anga rapthlak leh mak pawh nise a hre duh a ni tawp. Aizawlah chuan thil tih dan a awlsam ngei pawh a ring. Tu nge anih chiah tih chu a hriat chak ber a ni. 

A ke hnuai rawn za mer mer chu a hre ta. Rang takin rizai hnuaiah a ke chu a tawlh lut vat. A tho kang deuh bawk a. A khum zawn chiaha darthlalang lian zet inhungah chuan a va inhmu a. A hmel chu ngunthluk zetin a melh vang vang. Heti taka a lo hmel tha hi amah pawn a lo hre ngai lo. A sam dum hlap chu a thur deuh bam a, a mitmeng pawh a sen deuh. Mahse, hmel tha a inti!  A maimichhing a. Emy hmel kha a mitthlaah a rawn lang. Inanna pakhatmah an nei lo tih a hrechiang. A nu a ni thei lo vang. Aputea sawi ang deuh khan inbumna mai mai a nih a ring. A meng leh a, darthlalanga a va inen leh chiah chu a hmui a hup vat.. Rak chhuak lo turin a insum nasa hle. 

Darthlalangah chuan a mumanga a hmuh mipa lian leh rapawm zet khan a rawn nuih thaw nia!  A mumang ani leh ang tiin a ngaihtuah a. Mahse, chu paliana chuan rawn kawkin a rawn hnai ta zel a. Mangang zetin a lo thlir reng ringawt. A kha a chih a, a auchhuak thei miah lo. Lukham chu a la a, a va vawm a. Mahse, darthlalang a va vawm fuh ringawt. Kha paliana kha a la awm tho nia. A hawi kual a, a theihtawpa insangmarin a au chhuak thei ta hram a… ni e, a pindan kil tinah khang mi pathum a thah takte kha an lo ding tlat alawm.. Thisen nen. 

Valtea chuan a tunu au thawm a hriat rual chuan a inperh tho vat a. Hmanhmawh zetin a va tlan lut. A tunu chu khumah mangang zeta lo hawi kual ruai hian a va hmu ta a. 

"Ate, an lo kal.. Khang mi te kha.. An hlauhawm lutuk" tiin tap tuauin a lo pawm a. Tukin zing lama a chet rorum tehlul nen, huai leh hráng chuan a huaisenna an dawlh zo ta aniang e. A khur der der mai. 

. " A tha vek e.. Ka naute, engkim a tha aw. Ka awm alawm" tiin a lu ah a chul a, a hnungzang a beng thak thak a. Tlem chuan a ziaawm ta deuh. 

"Ka muhil ngam tawh lo vang" a ti tham tiak a. 

"Ka mutpui dawn che lawm.. Hawh le.. Mutthilh tum rawh" tiin puan chu a sin that tir a. Ani pawh Zoi sirah chuan inthawlh vein, rilru tawngtaina nen a chhing ta duar duar a. 

Emy.. :

"A chiang maw? jo, thudik i sawi tiraw? " tiin a hmaa ding palian tak chu a melh ralh a. 

Khi suk chungin, "Umm, thudik a ni e. An pathumin an thi vek" a ti thum chhak a. Emy chu a thaw hawk. Phurna mitmeng de sar sar hian, "Beiseia chu a thinrim khawp ang le.. Mahse, ka tlankhalh zel ang. Engti kawng mahin ka fanu saw a tihnat ka phal ngai lo vang" a ti sap a. 

"Mahse, Emy, heta an lo pem hunah chuan thil a harsa sawt dawn ania" Jo chuan a lo ti a. 

Emy chuan ral lehlama in lo lang tiar thlir vang vangin, "A awlsam dan kawng kan zawng mai ang chu.. " a ti hak a. 

Jo chuan amah hnungchhawn zawnga ding hmeichhia kum 40 ral kai tawh, hmel tha leh pian nalh, vun nalh zet chu a melh reng a. He hmeichhia hi Society-a a luh tirha lo dawngsawng hmasa bertu a ni. Amah aiin a û zawk bawk a. Finna lamah pawh a khan lo hle tih a hria; Engkim chu a bu ang thlapin a ti thin. A history a hre lo naa society tan a pawimawh hle tih a hria.. 

Kum 6 kal taah khan 'Rêver' hi a zawm ve a. A chhan a ngaihtuah apiangin a mit sulh thin. Ni e, kha hmeichhia a engkima engkim ni thin, neih ngei tuma a rilru zawng zawng a sènna khan bumin amaha awm turin a hnutchhiah a nih kha.  Engineer tha tak anihna ringawt khan a thinlung na chu a lo thawidam thei awzawng lo va. A nu leh pa leh a unaute ngei pawn a tawrhna chu èm êma an tihsak hial anih kha. Ni e, kha hmeichhia kha a hmangaih takzet a ni. Chutia rilru chavai taka a awm lai chuan Erica leh a hoten an rawn zar tan a. An pawla lut ve tura an sawm tirh kha chuan a lo hnial fithla thak kha a nia. Mahse, A bialnu vanga a tawrhna vanga a rilru natna inhrikthlakna atana zu a in nasat luat vangin a hna in a tuar ta hial a!  Tlangval zahawm tak thin kha a tlachhe ta hle anih kha. A nu leh pa te thinrim leh hrethiam lo chuan an ensan titih lehnghal. Beidawng taka damkhawchhuah beiseina a neih tawh loh laiin, Emy hi a rawn lang ta a. Dawhthei takin a enkawl a. Thiam taka hnehin Rêver chu a zawm ve ta kha a nia. Societyah chuan a hna thar thawkin, a thiam thil te chu tangkai takin a hmang chho ta a. Amah vanga Museum an rawk tum khan a kaisan phah hial a! Ni e, kha museum blueprint kha a zirchiang nasa a, harsa lo takin an thil duh kha an va la thei ta mai a ni. Pawisa lamah lungngaihna tur a nei ta lo va, khawi atangin heng sum zozai hi a lo kal thin tih a hre lo. A ngaihtuah ngai lem lo bawk. A dawn tawkah a lungawi a, Emy hnungzuiin hna ho te atanga hna lian tham thlengin a thawk chho ta zel a ni. Hmeichhia erawh a nunah lakluh tumna a nei tawh lo. 

"Jo, ka biak che chu.. " Emy chuan a rawn ti hlak a. A harh zawk. 

"Dorothy chu a tha zel ang chu maw" Emy chuan a ti satliah a. Ni e, kha Dorothy mutpui  tura Emyin a tirh ngawt chhan kha a la hre miah lo. A hriat phak thil a ni mahna le..Dorothy a ngaihtuah chuan a hmel thatzia leh hmana a nula nen inanna riau an nei tih a hrechhuak nghal a. A mutpui lai khan nuam tihna a nei hran lo, thupek anih angin a ti mai a ni. Mahse, hmuh leh a chak angreng. Dorothy khan a lo haw viau maithei si a.. A ruka enthlak bak tihtheih a la nei rih lo a ni. 

"A that ka beisei" a ti hul hak a. 

Emy chu a khi sak. Couch-ah thuin Emy chevel chu a lo thlir a. 

"Ka chhuak lawk dawn a. I duh hunah i haw mai dawn nia. I duh leh zanriah ei ve nghal la.. Hahdam pawh i mamawh alawm" a rawn ti zung zung a. He nu hi a chau ve thei lo aniang a lo ti rilru. 

"Eng nge i tih leh dawn? " a ti sup a. 

Emy chuan thlalak pakhat lek kang vâin, "He nau hi ka hmuh a ngai" a ti a. Thlalaka hmeichhe hmel tha tak nui sâng chu melhin, "A nuam dawn hle mai" a ti leh sak a. Jo chuan Emy mitmenga eng emawni lo lang zawk chu a hmuh hmaih hauh lo. Mahse, eng nge a nih a hre lo thung. 

Zoliansanga.. :

Dorothy address pek chu ngun lehzuala bihin chu lam pan chuan a pen pawk pawk a. Building lian zet 3rd floor- lam chu a pan leh a. Tumah mihring a hmu lo. Door bell a hmet tlang tlang a. Reivak lohah a rawn hawng ta a. Amah ang chen vel tue mipa lian ve tak nen an inhmachhawn ran mai. 

"Min lo hrethiam lawk, hei hi Emy chenna hmun a ni lo em ni? " Zoa chuan a ti a. A nui sáng bawk. 

Jo chuan, "Ni e, tunah mai khan a chhuak a. I rawn tawk hial lo maw? " a lo ti a. 

"Tawk miah lo. Amah hmuh tuma lo kal ka nia. Ih, a thian hlui ka nia.. A awm hunah ka lo kal leh mai ang. " a ti a. A kalsawn leh nghal. Jo chuan a thlir zui reng a. "Hmuh tawhna ka nei chiang mai" a ti sup a. 

A mi hmuh tum ber a lo awm tak si lohah chuan anu nawrnain Sangteii chu hmuh ve a tum ta a. Chiangkuang takin an la inhmu lo va, eng ang hmeichhia nge anih pawh a hre chiang lem lo. Nawrna a nasa tawh a, a nu te tihlawm nan pawh hmuh ve hrim hrim chu bain a inhria a ni. Sangteii number chu hmet chhuakin a call ta a. 

"Hello" a rawn ti tliang ralh a. 

"Keimah Zoliansanga ka nia. Vawiin lam hun te i nei em?  Chaw chhun kan ei dun dawn em ni ang? " a ti ta a. 

"Aw a tha lawm.. Ka hman maiin ka ring. Khawi hmunah nge? " a rawn ti a. A hmun hming a sawi hnuin a dah ta a. Nupui nei tur anga a insuangtuah apiangin Zohlupuii hmel chiang takin a hmu thin. Kha nu tluk kha chu an awm thei ngai dawn lo anih hi. A thianpa Jonathana in lamah a kual lut a. Lehkha nen a lo inchap darh leh nuaih tawh. 

"Thu thar a awm leh em ni? " a ti lut nghal a. 

"Awm hran lo. Ka en kual mai mai" a lo ti a. 

Zoa en hluai pahin, "Dorothy chu a tha zel maw? " a ti leh a. 

"Tha turah ka ngai. Ka veng hleinem"a lo ti mai a. 

Nui hak chungin, "I sak ve tlat chu ania. Kei chu ni ila ka bawhbet tawh ang" a lo ti a. Zoa pawh a nui ve tawp. 

Sangteii chungchang an sawi dun leh a. Jonathana pawh chuan a lo hrechiang vak bik lo. A pa erawh Dr lar tak a nih vangin a hre khawp thung. Jona awmpui nuin thingpui a rawn dah a. 'Thianpa, he nu hi i hmu tawh thin em? " tiin Zoa chuan Emy thlalak chu a kawhhmuh ta a. 

'Hmuh tawhna nei thân chuan ka inhria..mahse, ka chiang ngam lo" Jona chuan a lo ti a. 

"Ka umzui mèk a ni" Zoa chuan a ti a. A chhan erawh a phuahchawp. 

Jonathana in atanga a chhuah hnuin Sangteii nen an inhmuhna hmun tur lam a pan nghal a. A kum zat ngaihtuahin fa nei tawh awm rual anihzia chu amah pawn a chiang. Hlupuii kha a bawraw hma khan lo nei daih se chuan an fate pawh an lian tawh ngawtin a ring. Rstaurant a thleng a, a motor park thain a lut ta a. 

Dawhkan no 9-na chu kilin Sangteii chu a lo nghak ta a. Mi an tam vak lo. An rawn ngaihven lem lo bawk. Hmeichhe pakhat sang zeih zawih, ria lam lek lek, hmai sin lam hmel chhe lo tak lo phei mek chuan a rawn hmu ta chat. Nui sáng chungin a rawn pan ta a. A hmaa thutnaah chuan thu nghal chatin, "Min lo nghak rei tawh em? " a ti a. A aw chu a tliang mawi hle. 

"Ka thleng ve deuh chiah a ni" a lo ti a. Anihna takah erawh chuan darkar chanve dawnin Sangteii chu a rawn tlai a ni. 

"Englo a nia, hmeichhe pakhat nen kan insu palh a!  A zia lo tak tak. " Sangteii chuan a ti siam siam a. 

"A va pawi ve i tha em? " Zoa chuan a lo ti nghal var. 

"Umn tha a ni mai. Na ka nei lem lo, mahse, a motor kha a chhe deuh a, pawisa chu ka sen ve hlek a ngaih hmel" a lo ti a. 

"Engtin nge in insut theih?  Khawi hmunah nge? " topic dang sawi tur a hre lo bawk nen.. 

"Saw lai lawkah sawn. Ka hre bik lo, a rawn tlan chak angreng a, side ka la ve chuan ka inhria" 

"Buaina a chhuak lem lo maw? " 

"Umm hmeichhe fel tak a lo ni hlauh a. Number erawh kan inpe tawn. Min lo bia ang ka ring" Sangteii chuan a ti a. 

An eitur order a rawn thleng a. An ngawi det. 

Zoa chu a lai ve deuh tlat!  Nula fel tak niin a hria a, a hmaa a hmeichhe lo kawm tawh te anga bawlzan chi niin a hre si lo. Thutak deuha han kawm lah a thiam vak bawk si lo va. Sawi tur a haihchham angreng. 

"I nuteii sawi aiin i fel daih" Sangteii zawk chuan a ti ta hlauh a. Chuta tang chuan tlema hmasawnin, inngaihzawnna rawngkaiah a kailut thei ta hlauh. Mahse, phurna pakhatmah a nei lo chuan a tilunghnûr deuh. Hmeichhe dang ang bawka a la tihnat ve mai a inring a, Sangteii chu a khawngaih lawk. A fel reuh si a. Chumi ni chu a langa hlim leh inpawh hmel tak chuan an hmang ve ta chu a nia. Phawt a na.. 

Zanah an inbe zui nghal bawk a. A zia chho ve viau. Mahse, tuina em em a nei rih lo chuan a lung a tizing deuh. Anu te bulah erawh engmah a sawi duh rih lem lo. A tuk chu holiday a ni bawk a, Sangteii chuan, "Inkawm nan hun kan mamawh bawk a, chhuak dun ila, ka motor sutna nu kha workshop-ah va hmuh phawt a ngai a. Min kalpui theih chuan a lawmawm viau ang, a cash- ngeiin a dawng duh tlat sia" a ti a. Zoa pawn hna a nei em em rih lo bawk a. A lo remti ve mai. Anu te nawrna chuan a ke a pentir ve ta zel chu a nia. Huiham.. 

A tuka workshop an pan dun lai chuan, "Khaw nge kan len ang? " Sangteii chuan a ti a. 

"Kan farm-ah kan zuk kal mai dawn em ni ang"?  Zoa chuan a lo ti a. A hla lem lo bawk a, chuta kal dun chu an tithlu ta a. Inngaizawng ang deuhin an awm ve tawp tawh. Nula tlangval, nupui pasal neih hun ve ve tawh, chhungte sawizawm chawp mah nise; an inhnaih chho anga, induhna chu a piang ve mai ang chu maw.. Hemi te pahnih mize inanna riau chu, Inngaihzawnna hi an la runthlak tehchiam lo va, an hnaah an tui dun a, inngaihzawnna chu time passna ang deuhah an ngai ni maiin a lang. 

Workshop an thleng a, an mi hmuh tum motor pawh a lo ding ran tawh. Amah erawh an hmu mai lo va. An hawi kual ruai mai. An hnunglam atangin, "Hello.. Min zawng em ni? " a rawn ti puam tâlh a. An lehhawi rual thawt. Zoa chu a nghing lawih mai. A hmaah a mi zawn ruk, A nun nena inzawmna thil kawltu Emy chu a ding ta ran mai le.. Sangteii chuan biain pawisa a mamawh zat chu pek a tum a. 

"Ngawi teh, ka ngaihtuah chiang a, nimin chetsual kha ka thiam loh ni zawkin ka hria. Chuvangin thupha chawi ka duh vang zawkin ania ka koh che. " Emy chuan a lo ti ta daih a. Sangteii zawk chu a hawihil viau. 

A rawn kal hnai leh deuh a, a kut phar chhuakin, "Emy ka nia" a ti sap a. Sangteii chuan a kut chu rawn vuanin, "Sangteii ka nia.. Hei ka thianpa Zoliansanga a nih hi" a lo ti ve a. An innuih sak. Anmahni lo thlir rengtu Zoa ngaihtuahna chu tuman an hrethiam hauh lo vang. Emy chuan a rawn nuih ve sak. 

An kal san hnu atang chuan Zoa chu ngawi ran reng a. Thil dang daih ngaihtuah hmel a pu. "I van ngaihtuah mûk hmel" Sangteii chuan a ti ta chiah reng a. A inthing harh vat. "Nia, nizan ka mu tlem deuh a, ka mut a chhuak deuh alawm mawle" a ti vat a. Inthununin titi a vawrh kai ta zui a. Farm house an thlen chuan a la hma angreng. An huan enkawltu te chuan tuikhuah an lo siam tha mek a, inah lutin lai angreng takin an thu dun a. 

"Ka nu te hian nupui nei turin min nawr reng a, nang hi min kawhhmuh a, i hriat tawh hnu chu a ni tho naa ka sawi ve leh reng reng anih chu.. I rilru chu ka hre lem lo naa, kei chu ka inpeih rih chiah lo" Zoa chuan helhkam nei tih hriat takin a ti ta a. 

Sangteii chu a lo thaw hawk, a chhungril chu a na zawk. A chhan chu Zoa hi hman atanga a hriat tawh, a ruka a lo star ve em em thin a ni miau a!  Tin, ani pawh a pain a nawr nasa ve tho. Apa tihlunghnur a hreh hle bawk. Zoa chuan a hnawl niah a ngai a, chhan dan tur pawh a hre lo hle. "Nia, ih.. Ka hrethiam alawm.. Kei pawh ka ni ve tho" a lo ti bah nak a. 

"Ka laka i rilru tur pawh hre lo vin ka sawi tawp anih kha. Tihian thian tha tak kan ni chho anga.. Kan chhungte beisei ang pawh hi kan la thlentir maithei asin tiraw? " Zoa chuan nelawm takin a ti a. 

"Nia, kan inkawm zui zel ang chu"Za vak lova nui chungin Sangteii chuan a lo ti ve a. 

Eitur te siamin an ei a. Chawhnu lamah chuan hawn zai an rel leh ta mai. Dik tak chuan an inkar chu a hla viau. Zoa lah chu a rilru hmun dang daihah a awm si a. Sangteii chu fing fel viau mah se, tun dinhmunah chuan a thlang lo tlat. Amah aia pawimawh zawk an awm tlat si a. 

Anu bulah pawh chiang takin a sawi. Chuti maia sangteii hnena rilru a pek theih rih loh thu chu. Anu erawh a la beidawng duh lo. A fapa chuan nupui tur a hmu zo lutuk tih hre mah se; a duhthusam mo a duh ve tlat si. Inrawlh chu duh lo teh mah se, a ngainat loh zawng tak a nei ang tih a hlau ru ve tlat a. Dik tak chuan Zoa leh Sangteii an inhmuh hma fe khan Sangteii hi a be nual tawh zawk. A fapa mizia leh a hun kal tawh tlem a zawng a zep tel bawk. Mahsw, a fapain Sangteii a hnawl rih thu a hriat chuan a thin a ur ru teuh tawh. A phone la chhuakin number pakhat a hmet chhuak a. "Kan hlawhchham tlat" a ti sap a. Lehlam ami chuan, "Beidawng suh. Kawng a la awm em em ang" a rawn ti a. 

"Ka pasal hian engmah a hre tur a ni lo" Zoa nu chuan a ti dam thlap naa a mitmeng erawh a verther hle. 

Lehlam ami chuan, "Chairman hian a hriat rualin kei chu thi sa tluk ka ni alawm.. Tuman engmah an hre lo vang" a lo ti a. 

Villa: 

Valtea chuan parcel-ah bungraw thenkhat chu a khung mawlh mawlh a. Zoi erawh a pi te thlanah a kal daih. Ni e, vawiin chawhnuah he Villa hi an chhuahsan tawh dawn si a. Aizawl lam pawh a be fel tawh. Christmas erawh hetah an zu hmang hram maithei. Tunah chuan an rawn thawhrip hma ngeia an chhuahsan a ngai tlat a ni. A u account-a pawisa zawng zawng te a account-ah a transfer tawh a, a pa sumdawnna chhunzawm theih dan tur kawng dapin sawrkar atangin permit a nghak mek a ni. An permit kha an tihtawpsak daih tawh si a. A hmu thei ta lo anih leh sumdawnna kawng dang a dap mai aniang chu. Tuna a sum neihsa hmang hian kum eng emaw zat chu an khawsa thei maiin a rinawm a. Mahse, mi dang ngaihthat lohna a piantir thei dawna a hriat vangin inphenna tur a dap a ngai a ni. 

"Ate, kan motorah a leng vek dawn si lo va" bungraw melh kual pahin Zoi chuan a rawn ti lut a. 

"Ka vei mai ang. Vawi 3 ka thiar chuan a zo ve mai ang " a lo ti dam diai a. 

"Kei chu ka hreh leh thut thin. Pipi te ka ngai dawn eee" lungchhe aw deuh hian a ti leh a. A tunu biang tawn tawna chelhin hnai takah a melh a, "Kan zuk kan fô dawn alawm.. Tunah chuan kan kal phawt a ngai a ni" a ti sup a. A putea tlangval hmel tha tak, hmuihmul leh khabe hmul buk chhup si chu a tan a awmchhun a ni tawh. A innghahna a ni. A tilungawi lo hauh lo vang. 

Xenon dum hlarhah chuan bungrua chu hlang dunin, a leng thei chin chin chu an hnawh a. Villa lan theih chhung chu Zoi chuan a thlir ngat ngat. A putea erawh chuan hmalam bih ngar chungin motor chu a khalh a. 

"Ate, jeep saw engtin nge ni dawn? " a ti hluai a. 

"Zaninah ka zuk la mai ang" a lo ti a. 

"Kein i kal a ngai dawn asin.tu emaw hruai mai la" a lo ti vat. Mahse,  a inchhir leh nghal. Thian tumah an nei lo tih a lo theihnghilh a ni. Kea an villa zuk pan vang vang tur chuan a hla tham èm a ni. 

Kawngpui an pawh hnuah ruah tlem a rawn sur a, bungrua te chu an va khuh tha leh phawt. Dar 12 velah an chenna tur chu an thleng ta a. Lo ngaihsaka lo dawngsawngtu an nei lem lo. In chu a zau khawp a. A lian mah mah a ni. Bungrua chingfelin Zoi chuan a duh dan ang thlapin a rem kual a. Hun a duh rei viau. Valtea erawh a let leh a. Bungraw la bangte chu a zuk thiar zo thei ta mai a. An putu chuan ngawi rengin an bungrua chu rem thain an tifai pah bawk a. Tawng pawh an tawng hman meuh lo. Zanah pawh an la buai avangin Valtea chu a jeep la tur pawn a kal thei ta lo. Chau zetin dar 11 velah an mu thei hram. An mutui phian. 

A tukah Valtea chu zuk kal lehin khaw thim dawnah a jeep nen a rawn thleng leh thei ta hram. Tikha chuan ngaih a ngam ta deuh e. An in chu Zemabawkah awm niin an thenawm hnai ber pawh pen 200 velah a awm a. Assam type mah nise, a tha in a nghet viau. A mawi bawk. A luah hmasatu te khan an enkawl uluk ve bawk a, siamthat leh thawm that ngai lai a awm rih lem lo. Chu inah chuan an putu chuan khawvel thar an hmachhawn dawn ta chu a nia. 

Kum tharah law law school luhna tur chu ngaihtuah an tum a. Christmas pawh kar khat chiahin a dang tawh a ni. Zoi chu a chhuak ngai lem lo. Lenna tur a hre miau lo va. An thenawm te erWh vawihnih chu an lo chuangkai tawh. Valtea te nen an inkawm a. Lunglei atanga lo pem an nih thu leh in chu an luah hawh thu Valtea chuan a sawi mai a. Apa hming sawi se an hriat mai a rinawm. Mahse, he khawpuiah hian tuman hre lo se a duh zawk. Ni e, kum a liam tam tawh a. Miin an ngaihven em em lo bawk a. Nun thar in an nung thei em ang chu. Chu chu a tunu tan pawh thil tha tak a ni. 

Sawrkar office dawr lehin a sumdawnna tur atana phalna chu a va dil leh a. Mahse, a ngenna chu hnawlsak a ni ta a ni. Nj e, a pa hun lai kha chuan thil a tithei em a, rin a hlawh bawk a. Permit kha awlsam takin a hmu mai kha a nia. Tunah chuan kha sumdawnna kha smugling rawng a kai tak avangin permit pek chu a harsa ve tlat a ni. Valtea pawh chuan a hrethiam ve reng mai. 

A motora a lut leh tur chiah hi a hming ngeia rawn kotu avangin a ding chawt. A lehhawi vat a. "Nang maw.. Eng nge i duh? " a ti nghal tâwng. 

"Dama ka hmu leh che chu ka va lawm tak em.. Ka nu leh pa te chu an awm tawh lo tak tak em? " a hmaa ding chuan a ti nghal bawrh bawrh. A hawihai hman. 

"Ka û anga awm tum hi sim tawh la ka duh khawp mai. " Valtea chuan a ti chang rât. 

"Khawngaihin motorah lut rawh.. Vat" a ti tuar. A sir tawn tawn chu a melh tawn a. Valtea a hawihai kher mai. Mahse, a rawn nawr et et vangin motorah chuan lutin a tlan zui nghal a. Emy chuan motor tlan liam melh zui vawng vawng chungin, "Ka nau, engtikah emaw chuan i û ka ni tih hi i la pawm ngei ang" a ti sap a. 

Secret Society:

Dawhkan pakhat kilin mipa paruk an thu pap a. 

"Beiseia naute chu kan chân ta chu a nia. Mahse, kan tlangzarh thei hauh lo vang. " Chairman chuan a ti fiah kâk a. 

Pu Dinga chuan a kut hum ruhin, "Dr Zira leh a thuihhruai te hian an ti thei lo anih hi. Engvangin nge a kutah he thil hi in la dah reng  " a lo ti salh a. 

Dr Zira chuan a tarmit phelhin, "Pawi ka ti khawp mai. Ka inringtawk viau asin. Mahse, chan loh khan ah a chhuak palh ta hlauh a ni. Rem in tih chuan chance min pe leh ula, ka hlawhtling tawh ngei ngei ang" inthlahrung aw deuh hlek hian a ti a. 

Chairman chuan na zeta rawn melhin, "Nangmah vang leh i intiamna vangin kan nau te pathum kan chân a, chance i la beisei a maw? I thi lo hi vannei inti hle rawh. Zochhingpuii chungchang hi society pumpui ngaihtuah tawh tur a ni ang.. " a lo ti kha fak a. Dr Zira chu a ngawi dâk mai. 

"An awmna hmun chu hriat a harsa dawn hauh lo va. Mahse, buaithlak zawk chu kan la lut anih chuan, mipui ten zawhna an nei ngei ang. Khawpuiah chuan thil a harsa tawh si a" Pu Zawma chuan a lo ti nghut a. 

"Ka ngaihdan sawi ve in phal chuan ka lo sawi ve ang e. Zochhingpuii hi kum a tlin hun nghak law law ila, chutih chhung zawng kan naute zinga a tha ber ten vehthlem se, tharum tel lo va thluak hmanga phumluh dan kan zawn hi a tha zawkin ka ring" tawngtam lo tak, Pu Ruata chuan a lo ti charh charh a. 

Chairman chu a inngaihtuah mûk hmel kher mai. "Aw le.. Engpawh nise, Zochhingpuii hneh dan tur chungchang chu meeting lehah sawi mai ila. Dorothy chungchang kha, test kha a paltlang ta em? " a ti ta a. 

Erica chuan, tîm deuh dai hian, "Aih, la nei lo. Amah kha a la inpeih lo deuhin kan hria a" a lo ti a. 

Pu Dinga a ding hluai, "Nnag leh i boss Zira te hian engmah in ti thei lo anih hi.. Muangchang lutuk kum a tawp tep tawh asin" a ti pawr huar a. A hlauhawm kher mai. Chairman chuan thu turin a mitmei a. 

"Aw le, vawiinah Dorothy test ula, a paltlang theih chuan in hna thawk rawh u. A khirh viau chuan Emy in ruai dawn nia" a ti ta a.. 

An meeting zawhah Dr Zira leh Erica chu pindan pakhatah an lut zui nghal a. "Kan va chhe teuh ve le.. " Erica chuan a ti sar sar a. 

Dr Zira chuan, "Lungngai suh. Zochhingpuii awmna hriat tum ila, he savano hi kan hup theih chuan kan mark a tha leh a ni mai. Dorothy chu i kutah ka dah a nia.. Inthlahdah lo la.. " a ti a. 

Eric chu a lo bu nghat. 

Emy chu chairman roomah a pen lut zan zan a. Chairman mita chiang zeta melhin, "Engvangin nge min zui ruktir? " a ti chang rât a. 

"Thil i hresual aniang. Tumah ka zui tir lo che" a lo ti dam thlup. 

"Anih chuan tu ten nge min enthla ta ang " tiin Emy chuan chunglam a melh zauh a. 

Chairman chuan, "I hriat kha.. He society ah ngei pawh hian phiarrukna a awm mèk reng alawm.. Ka hre vek a ni.. Emy, mahse, ka buai lo. Chuan, i hna chu eng nge chanchin? " a ti zui zat a.. 

"Hmeichhe tha tak a ni. A fing a, a zaidam bawk. A hawihhawm viau bawk. Mahse, vanduaithlak takin a pa uitè a ni. " Emy chuan a ti zawi sap a. Chairman chu a khi suk. 

"I thawk tha e.. Tunah chuan Sangteii ni lo vin Apa zawk hi mim umzui sak la ka duh a ni." A ti ta a. 

Emy chuan, awmze nei zeta chairman va melhin, "Anih chuan thil pakhat min tihsak ve a ngai dawn anih chu" a ti sap a. 

"Eng nge sawi la"

"Zochhingpuii leh a putea   chungah hian engmah ti suh.. A chiang em? " a ti fiah kâk a. 

Chairman chuan makti hmel pu hian, "Emy, i tha em? " a ti háw a. 

"Ka chanpual an nih hi. Keiman ka hmachhawn duh. Chu chu i remti lo anih chuan, i spy nih hi ka bansan anga, i thurûk zawng zawng ka puangchhuak ang" a ti vawt raih a. A mitmeng de sar sar chu Chairman chuan a melh ta tlawk tlawk a..! 

(Naktuk ka chawl ang.. A thui lo. Mahse, in hriatthiam dan te lo sawi ve ula.. A nuam ve lawm 😊😍