THURÛK… (3)
Ziaktu: Toni Râlte
Khatla : 10:30 am..
A kawngkhar chabi chu la chhuakin a hawng a, a flat-ah chuan a lut zui ta nghal a. A phone phawrhin tu emaw a call a, "Tunah rang takin rawn kal nghal rawh" a ti a. Chauh hmel zetin sofaah chuan a thu hnawk a. Eng nge a ngaihtuah a hriat loh. Rei rial lo vin a mi koh chu a rawn thleng a. Mitmeng nelawm fahran loh hian a lo melh râwm râwm mai.
"Engvanga Dorothy awmna kha hre thei nge an nih? " a ti vawt raih a. A hmaa palian tak ding chuan zaidawh hmel deuh zawk hian, "Rina leh a thuihhruai ten min vil reng alawm.. Hre rawh, Emy, nang pawh hi an enthla reng che ania. Engkim hi an hrechhuak tawh niin ka hria" a ti ta a.
Emy chu tumruh hmel takin a ding khawng lah, a mitmeng hriam zet chu a de sar sar bawk a.
"Rina chu kan dah that a ngai dawn anih chu. He thil hi ka kal pui laklawh tawh. Game an khelh chuan an peih chen chen ka khel ve thei. Mahse, kan pathum ringawt chuan kan paltlang lo vang, mi dang kan zawn belh a ngai a ni" a ti a.
A hmaa ding Jo tia an koh thin chuan, "Dorothy kha a thluak i su hman turah ka lo ngai asin" a ti sup a.
"Ka tum alawm. Ka tum mek laiin thupek thar ka dawng anih kha. Mahse, Headquaterah an dah chuan ka hmuh a ngai. Kawng chu a la awm ang. "A ti nghat a.
"Emy, engvanga Dorothy hi chhanhim tum nge i nih tih chu ka hria. Mahse, i chunga an tih ang khan an ti ve kher lo thei asin. Tin, thil a kal sual ve thei tho. Tunah hian police ten Dorothy bo thu report an dawng tawh a. Nang pawh hi an ko ngei ang che. Kan society pawh hi a him kher tawh lo maithei" a ti ta duah a.
Emy chuan, "Ka hria alawm. Zoliansanga leh Jonathana te an hmatheh ngei ang.. Mahse, tuna society hailang tur chuan a la hma. Keini pawh society lama kan tan rih a ngai ang aw" a lo ti a. A ngaihtuahna a seng kual leh tawh ni ngei tur a ni a kut zungtang chu a tikawm kual leh a. Hman atanga a tih fo dan a ni reng a. An society hian Emy tluka agent tha leh mi hneh thei an la kawl lo tih theih a ni. Mahse, Emy hi tu nge anih chiah? Chhungte a nei lo em ni? Khawlaia vakvai mai mai tur kha an chhanchhuak tak tak em?
Back to 2002, 20th, July..
Darthlalang chhah takin a hual vel chhunga dawhkan sei pûtah chuan hmeichhe pakhat chau leh dawldang zet a mu a. A mit chu a meng naa, a ngaihtuahna chu hmun dangah a awm tih a hriat. Ke pen ri a hria a, kawngka chu rawn inhawngin, Kawrfual var hain mi pakhat a rawn lut a.
"I tan khawvel thar ka dinsak dawn che a ni. Tuna i nihna leh i hmel zawng zawng kha chu khawvel mi te tan chuan a thi tawh ang.. " a rawn ti sup a. Rapthlak tih hmel zetin a lo melh kuau. Chu pa te takte chu a nui hak a, "Hlau mah ta che. Ka tina dawn hleinem che. I vanneih zia hi hre zawk teh, khawlaia thi sawn mai mai tur kha nun thar kan pe dawn che anih hi" a ti leh a.
A vein-a syringe a vih luh dawn lai tak chuan, "Gos, nang leh kei hi thian tha tak kan nih thin kha.. He thil hi i ti lo thei tih kan hria" a rawn ti tham chhal a. Dr Gos chu a tawp chat, "I sawi awmzia ka hre lo" a ti nghut a.
"Hriat kher a ngai hleinem. Inremsiamna kan nei thei alawm. Deal lian tak kan siam thei.. " beiseina awrawl hian a ti a.
"Nang hian ka tan tihtheih i nei dawn em ni? Han in en teh. Tangkaina i nei tawh lo" a lo ti hluk a. Mahse, syringe chu a dah thla ta tho va.
Thei leh thei lo va thu chhuakin, "Society ah hian rinngam pakhat ka la nei ve a, nang hian min thawhpui theih bawk chuan, ka tana i thiltih hi a thlawn ngai lo vang.. " tiin Dr Gosa mitah chuan chiang takin a melh a.
"Sawi chiang rawh" a ti thawt.
"Ka hriatna zawng zawng thaibo tura an rawn tirh che i ni tih ka hria. Chu chu i ti lo thei. He ka hriatna hi ka neih chhung chuan ka tan hnathawh a awlsam phah dawn a. Mahse, surgery tenau erawh ka hmachhawn a ngai ang. Hmel dang nen khawvel ka hmachhawn anga, he kan society a hmun pawimawh ber i luah theih nan theihtawp ka chhuah ang" a ti ta a.
Dr Gos chu a inngaihtuah mûk kher mai. Vawi tam tak mi hriatna a lo nawh rehsak tawh thin a, tin, plastic surgery lah awlsam te tein a lo tihsak tawh thin. Chu chu a hna tur hrim hrim a ni a, an hotu te thupek angin a ti mai thin. Nupui neiin fa pakhat an nei tihah a nupui leh a fapa chu electric in man hlumin baihvai takin khawvel a hmachhawn anih kha. Mahse, a nupui leh a fapa thih chhan dik tak a hria, amah chu he society te thlan a ni a, mahse, hnial zelin an sawmna chu a hnar thin anih kha. Tichuan, he pawla tlulut lo thei lo dinhmuna ding turin a nupui leh a fapa an laksak a, thinlung khawhar taka a awm lai remchanga hmangin an rawn tuamhlawm a. He pawl hi a zawm ve anih kha.. A chhungrilah erawh phuba lak chakin a za zek zek fô! Chu chu kum eng emaw zat daih a ni. Mahse, a thawk rei telh telh a. A thluak pawh suk sak a ni ta a, rinawm takin he pawl tan hian a thawk zui ta zel anih hi. Vawiinah eraeh he hmeichhia, a hmuh fô leh a hriatchian em em khan a vawi khat nan a dodal ta tlat! Chu pawh inremsiamna neihpui tur lehnghalin.. A lu a thing nawk nawk.
A hawi chhuah rual chuan, "Gos, i khawhar theihzia ka hria asin. I thawkrim em a, i taksa hian eng nge a mamawh ber pawh i hre tawh lo anih hi.. Ka hria kei hian i mamawh chu" tiin a biangah a rawn chul kual a, a hmel dawldang tak kara a mitmeng erawh a nung sar mai. Che chang map lo vin a lo dawh mai a. Chu hmeichhia chuan chet la zelin a nghawngah a rawn thaw lum hian a, a beng te chu rawn seh ner nerin, a beng kuaah te chuan a lei chu a rawn hawl kual a. A taksa chhung za vek chu a thup hram hram a ni.
A hmuiah a rawn fawp ta chat a. A lei chu a ka chhungah rawn hawl lutin a ka chhungah nawmna nasa tak a rawn thlen ta. A thaw hrâwih a. A chhing sawk.. "Zoi, he tah chuan ni lo ve" a ti khur dat a. Zohlupuii chu a nui hawk. Dr Gosa pindan an pan lai chu tuman an hmu lo.
Dr Gosa awma bei tlan chungin, "Ka hlawhchham miah lo vang tih ka tiam a che. I hna hi tha takin lo thawk zel phawt la, kei leh Jo-in kan hna kan thawk thung ang. Hun erawh kan duh rei dawn a. Dawhthei takin aw" a ti ham ham a. Gos lung erawh a awi ngang mai. Khatiang em ema nawmna nasa kha a damchhunga a tawn pawh a la hre lo. Zohlupuii chu ramhuaiin a pui hial a ni ta ve ang. Khatiang em em kha chu mihring tan tihtheih rual em ni?
Zohlupuii hmel hmai thlak nan kar khat chhung hun an hmang a. Dr Zira leh Erica ten an vil thin. A hriatna chu a bo fai vek tawh em tih test chi hrang hrang an neihpui fô va. Ni e, Zohlupuii chuan engmah leh tumah a hre tawh lo. Emy a ni ta tih chauh lo chu..
Villa:
Zochhingpuii tap faih faih chu lainat hmel takin a pi chuan a melh a, mahse, Valtea thinur hmel avang chuan a thlem ngam lo.
"I nu hriat i duh takzet a maw? Ni e, i nu kha ka û a ni. Ka u neihchhun. Mahse, nang a hrin che atang khan ani nen chuan bang chhah tak phènah kan awm tawh. Kan tan a thi tawh" Valtea chuan a ti nghat nghat a. Zoi erawh a ngawi reng thung.
"Naute, kei leh i pi leh pute hmangaihna che hi i tan a tawk zo thei thlawt lo em ni? Engvangin nge mi dang i la mamawh? " chhungril na tih hriat taka a tih leh meuh chuan, Zochhingpuii tap lai chu a tawp chawt a. A ngaihtuahna dik lohzia hrechhuak nghalin, a putea amah hmangaih ngawih ngawihtu lam chu a pan a. A va kuah ta chawt.
"Ate, ka tihpalh. Min ngaidam rawh. Kha nu khan ka mumangah zantin ka nu anih thu min hrilh thin a. Nu ka mamawh miah lo tih hre chang lo vin ka lo pan ruak ruak a ni.. Nangmahni in awm chhung chuan tumah ka mamawh lo" a ti ta a. Valtea pawh chuan lo kuah let vein an tap dun a. A pi leh pute chuan hmuhnawm ti taka lo thlirin an mittui an hru ve mial mial mai.
Huntera ngur chhur chhur thawm chuan tiharhin, dar 2:30 am chiah chiah a ni. Thla chu a eng vak tawh lo naa a hlau hran lo. Hman zana amah tihlau deuhtu kha a rawn lang leh ta lo bawk a. A zun a chhuah deuh tho vangin zung turin khum atang chaun a thu chhuak a, bathroom a lut dawn chiah tihin pawn lama mihring hlimthla niawm tak ding chu parda phen atang chuan a va hmu a. An in kawta far thing lian tak pahnih ding hnuaiah chu hlimthla chu a ding a ni. A va zung ta tho va. A zun zawha a bih leh chuan a hmu ta lo. An villa hi mihring dangin an rawn tlawhpawh ve tan dawn pawh a ni mahna. Khuma a mu leh chiah chu Huntera a rawn rum nghek. A phu chiang kher mai. An choka lama thawm ri thlep thlep chu a hre zui nghal a. A ngaichang vang vang naa a reh zui daih. Mutthilh leh mai tumin a saisir thawk a, a chhing siar siar tihin a pi te thawt thawm a hre ta. A thu chhuak hlawl. Api bawk chu a rawn te leh tuar. Hmanhmawh zetin a tho va, room atang chuan a tlanchhuak nghal a. A pite room kawngka bula a putea lo ding reng a hmuh chuan a thaw huai a.
"Ka nu, ka pa.. Lo hawng teh u.. Engkim a tha maw? ' valtea chuan a ti tuar tuar a. Thawm chu a reh tlawk tlawk. Valtea chuan kawngka chu a chum dat dat a. Chutah thaw hrâwp hrâwp ri an hre zui nghal. Hlauthawng takin an inmelh a.
"Min rawn tibuai suh u. Khawngaihin kal bo rawh u" Apu in thei leh thei lova a tih thawm an hriat phei chuan an hmanhmawh lehzual a. Valtea chuan kawngka chu a nek dawt dwt, a inhawng mai thei si lo.
"Naute.. Ka naute.. " api awin a ti chuai raih raih. Engmah a hrethiam si lo, a tap thawthang tawh a ni. A putea chuan vanneih asiamin a beih fe hnuah a nek hawng thei hram. Mahse, an tlai a nih hmel..
Chhuatah chuan a pu chu a lo tlu sawp niah a, a sam tuak var vo kar atang chuan thisen a lo luang nguah nguah mai! Api erawh khumah muin chunglam melhin thlabar hmel zein a lo thi fel der tawh bawk! Thil thleng chu a rang lutuk. A hamhaih vek. Valtea chuan a rooma silai chu va lain, rang zetin pawnah a tlan chhuak nghal. Silai chu vawi khat kap pawpin, "Zawngho khaw nge in awm? Min rawn hmachhawn ta che u.. Engvangin nge tar chak lo zawk in sawisak.. Rawn chhuak rawh u" a ti tuar tuar a. A thinrim sosanzia chu thing phen atanga lo thlir tu chuan a hai miah lo. Zawi supin, "Engtikah emaw kan la inhmachhawn ngei ang.. " a ti a. Zei taka insasengin tuikhuah piaha kawngtum lamah chuan a bawkvak phei ta zal zal a.
Zochhingpuii chuan a pi leh pu nunna nei tawh lo te ruang chu a melh ngawih ngawih. A mumang annih ringin harh chhuah hun a nghak a. A harh thei si lo. Engvang nge? Eng ati ringawt nge? A hrethiam lo. Chhunah pawh apu nen nghakuai chiahin hlimn takin an inzui anih kha.. An hawnah a pi chhang ur hlim tui tak eiin chawhnu lamah tuikhuahah an va cheng leh a. Engkim kha a nih dan tur ang thlap a ni asin. Vawi leh khatah a hlimna zawng zawng te chu an bo duak ringawt mai a ni.
Valtea chuan rilru na takin a nu leh pa, amah phatsan ngai lotu te ruang chu senghawiin a buaipui a. A chhungril chu a rum vawng vawng mai. An kal thui lutuk ta tih a hria. A nu leh pa te chu an kum a tam tawh hrim a, engtikah emaw chuan an la liam dawn tih a hria. Mahse, heti maia awlsam leh râwng taka thah ni lo hian, 'awmlai' te pawn an thi ve thei tur a ni asin. Zawngho chuan bultan nan a nu leh pa tar chak lo zawk te an rawn bitum ta tih a hai lo. A dawt leh chu amah ani tih pawh a hrechiang kher mai. Tunah chuan Zochhingpuii chher hriam a hun ta tih pawh a hming a hriatchian tlukin a chiang ta bawk.
An villa atanga pen 100 vel lekah a nu leh pate chu a phum ta a. Khawpuiah awm nise, ropui takin vuiliam an ni anga. Mi lian leh mi hausa tam tak ten an rawn ral ngei ang. Mahse, a tunu nen chauh thlan khawhar tak bulah chuan dingin, Pathian rorel dan mak tak chu a ngaihtuah a. Lungawi zira a kum tel meuh a thawhrimna chu a tawp ta. A thinlung chu khakna leh huatna hlirin a khat tawh a ni.
"Ate, keimah vang tiraw.. Pipi te hi an thih? " a tunu chuan hriat theih chang chang hian a ti tham chhal a. A tah nasat em vangin a aw te chu a chhang zo tawh. A mit nise a bui lâk tawh a, a hmai a sen vek bawk.
"Ni lul lo mai.. Mahse, kan do let theih dan kawng erawh kan zawng ang' a lo ti chang nghut a..
Bawngkawn P. S..
Officer Lawma chuan, Jonathana leh Zoliansanga melh chung chuan, "In kutah kan dah ngam a, in hlawhchham loh hram kan beisei a nia" a ti dam dap a.
Jonathan chuan, "Tehreng mai. Amah hi kan thian a lo nihnaah theihtawp chhuah pawh kan tum ve mek a ni.. " a lo ti ve a.
Constable pakhat rawn lut chuan, envelope hlai hlep hlawp chu officer pein, "A phone kan hmu zo lo va, tin, vanduaithlak takin a in luahah sawn cctv dah a ni tlat lo pek a! Mahse, kha thlalakah khan tu te nge a hmuh thin tih erawh kan hre thei. Khang thlalak kha reporter pakhat hnen atanga kan hmuh a nia. A zui kualna lama a lak ho an ni" a ti zung zung a. A chhuak leh nghal.
Zoliansanga te chuan thlalak ho chu chap darhin an han en kual vel a. Hmeichhe pakhat hmel tha tak nen tun hnaiah an inzui tam hle tih a lang. Mi dang lang ve vak an awm meuh lo. Chu hmeichhia chu zawn chhuah phawt a ngai tih a chiang. Zoa chuan a hmuh tawh hnu ang chu a ti deuh a, mahse, a hre chhuak thei tawh lo.
"Mak ka tih zawk chu hei ni li lai a liam tawh a. A bo thu niminah chiah report kan dawng kha a ni" Jonathan chuan a ti a.
"Nia, mahse, a thiante ina han riah mai te,sawi lawk lem lo va shillonga chhuk zawk te a nei thin a, amah hi programme a neih lem loh chuan tuallim em em lo, a ina tawm chawt chi a lo ni bawk nen, a bo tih chu rin a harsa ve deuh a ni maithei" Pu Lawma chuan a lo ti a.
Zoa chuan, "Tuin nge report rawn thehlut? " a lo ti a
"A make up artist hlui, Ruata ania. A bungraw thenkhat Dorothy inah a la awm vangin la turin a kal a, mahse, kawngka a lo inkalh lo va, amah hmuh tur awm ta si lo chu a ngaih a tha ta lo a ni" Pu Lawma bawk chuan a ti a. An ngawi ta rauh rauh mai.
Zoa te thian dunin Dorithy in an thlen chuan chawhnu lam a ni ruai tawh a. Investigation bultan nan a in chu a pawimawh tlat si a ni. A roomah lut nghalin ngun takin an en kual a, hmuh tur em em a awm hran lo. Khum chu a chuar deuh tun a, engmah an la khawih danglam lo hrim hrim kha a nia. Bathrobe hi khum sir dinglamah a lo tla hlawm bawk. A almira chu a inhawng sa bawk a, a bak chu engmah han hmuh belh tur a awm lem lo.
"Eheu.. Hei chu ka hmuh tawh hnu a ang riau" tia Jonathana phun sup a hriat chuan a va pan ve vat. Jona thil ken lai a hmuh chuan a ding chawt. Pyramid lem lian lo tak chu Jona chuan a lek larh larh a. Saw thil saw a hmu tawh, ni e, hmanah khan a hmu tawh alawm..
"I tha em? Nau" Jona aw chuan a ngaihtuahna atang chuan a rawn kai harh zawk.
"Aw.. A.. Ka tha e.. Khaw maw kha chu ka lo en chiang" tiin a ban nghal zat. A han lek kual vel a, a rit nalh mai. He lai hmuna a lo awm ve ngawt dan a ngaihtuah thiam lo, tu emawin a theihnghilh emaw Dory hian a kawl ve hrim hrim a ni thei.
"Khum hi en la, an inchai ve deuh tih lang reng. Emaw an chhuah hmain hmangaihna an chen dun ani mahna" Jonathana chuan a ti a. Chu chu Zoa rin dan pawh a ni.
Dory in an chhuahsan hnuah Ruata hmu turin an kal leh nghal a. Ruata hi a lar tawh a, model zawng zawng tih theih deuhthawin an pan tawh a ni. Gay a ni naa a tumruhna hi a fakawm ngawt mai.
An kal chhan an han sawi zung zung a, customer a lo nei rih si, an han nghak leh rih. Rei vak lo ah a private roomah an inzui lut ta a.
"A ina ka va luh khan a lo awm si lo va, kawngka a kalh chuang si lo. Ka ringhlel ve ringawt. A bak engmah ka hre lo" a ti nuah nuah a.
Zoa chuan Dory leh hmeichhe pakhat thlalak chu a hmaah va lekin, "He nu hi i hmu tawh em? " a ti sup a. Ruata chuan phâwk hra hian, "Awij.. Hmu lutuk. He nu vang hian alawm min ban.. Ka ngei ania he nu hi. " a ti ta hlaih hlaih a.
"Han sawi chiang law law la" Dam thlap hian Zoa chuan a lo ti a.
"Umm.. Ih, nang pawn i la hria ang, i nu piancham in lawm ni zingah khan a nia. Amah chei turin ka kal a, mahse, a in kawtah kha nu khan min lo ti ding a, 'a fans ruhkawl ka nia, chance ka mamawh. Khawngaihin tun chiah i ai min lo awhtir.. ' a ti a. Pawisa min pek a tiam bawk a. Kei lah model chei tur ka ngah si, ka mood fuh vak lo nen ka lo remti ve ringawt. A formal lo tih chu ka hre tho,. Mahse, kha hmeichhia kha a ngenngawl ve angreng sia.. Tichuan, Dory bulah ka kal theih loh thu sawiin chu nu chu ka aiawhin a va kal ta a ni. Tichuan, kha nu kha a duhzawng tak a lo ni nge kei chu min chhawr zui ta lo a ni" Ruata chuan a ti suam suam a.
Jona te pahnih an inmelh zauh. Chu hmeichhia chu an hmuh a tul tawpkhawk tih an hai lo.
Coffee an in dun laiin, "Dory hi i ngaihven vak lo khan ka hre si a. Ti nge i mangang tlata ka hriat? " Jona chuan ti el rawngkai deuh hian a ti salh a.
"Ka ngaihven thar sawt a ni lo. Ngaihtuahna seng teh, kum 15 liam taa thil thleng kha. Khatih laia Zoram khawvela zaithiam lar ber mai chu rapthlak takin a thi anih kha.. Tunah Zaithiam lar ber, amah ter pha awm miah lo Dory chu a chin hriat lohin a bo leh mek ania.. Thil thleng palh niin i ngai em ni? " a lo ti ve thung a.
Jona chuan, " A ni thei viau ang. Mahse, a chanchin khati maia awlsama i sawi thei kha a mak ka ti. Rapthlak takin Zohlupuii kha a thi tih ring lo bertu i ni si a" a lo ti khauh a.
"Ka ring ka ti hleinem. Hlupuii thihna nen khan a inzawm ka ring ka ti mai chauh alawm.. Thianpa, Dory tang hian Hlupuii thih chhan dik tak kan hre maithei asin" a ti ta sup a.
Jona pawh chuan ngaihtuahna sen tam hmel zet hian, "Ka beisei. Tichuan, i thinlung na pawh a dam ve tawh anga, nupui tha deuh neiin i fate pawh kan pawm ve thei tawh ang chu" a ti ta duah a.
"Teh duah a che. Nupui nei turin rilru ka siam ve mek alawm.. Amah pawh i hre lutuk ang. Mahse, a hranpain ka la hmelhriattir ang che.. " a lo ti ve a.
"Journalist angin em ni a lakah i chet dawn.. Nge Detective angin" Jonathan chuan a lo ti leh zauh a.
"Ngawi mai teh. A eng a pawh ni ve ve se, hmeichhe chak lohna chu a inang vek" a lo ti thawp sát a. A mitthlaah erawh Zohlupuii nui sen sen a lang daih thung.
Dorothy: Headquater.. 08:30 pm.
Ral hla tak atanga eng lo lang chu a rawn hnai tial tial a, a hnuah phei chuan a awmna hmun chu a lo eng ta uar mai. A mit chu a meng siar siar a, a meng tha hleithei lo. A eng mah mah a ni. A awmna pindan kawngkhar ri khep thawm chu a ngaichang ran a. Ke pen thawm chu a lo hnai zel a, a mutna bulah chuan a tawp ta chat a.
A meng chiang ta, a hmaa ding a hmuh chuan a phu zawk. A hamhaih viau mai. A lo nuih vur vur a. A hmel dam thlup chuan a ngaih a titha leh deuh.
"Khaw nge ka awm? " a ti tham tiak a.
"Hmun him takah i awm mèk a ni. Tihnat tum tu che an awm a. Venhim che kan tum mek a ni" a lo ti a.
Dory chuan, "Tu ten maw min tihnat tum? Ka hriat dan chuan mi pakhat palian tak khan min pawm bet a. Ka kaah eng emaw ni a rawn hmehbel a, engmah ka hre zui tawh lo kha a ni sia" a lo ti dat dat a.
"Ni e, kha pa lak atang khan kan chhanhim che a ni. He lai hi kan hmunpui a ni"
"Engmah a awmzia ka hre lo. Anih chuan ka haw thei ang em? "
"Thei rih lo. Tunah hian Zoram mipui te chu nangmah vangin an chiái mek a ni. Mi bo angin i thang tlat si a" chu pa chuan a lo ti a.
"Ka bo hleinem.. Hawn ka duh" a lo ti hlar a.
"Dory, kan pawl hi i zawm ve dawn anih loh chuan, nangmah tihnat tumtu te lak atangin i him dawn hauh lo ania.. " a lo ti vawt raih a. Dory chu a thlabar hmel kher mai. A ngaihtuahna chu buai tak a ni. He pa a hmaa ding hi a hmuh fo thin a ni, mahse, eng pawl nge a sawi chu a hre si lo. Tu ten nge tihnat tum? Engmah a hre lo.
"Engpawhnise, chawl hahdam phawt la.. Nangmah hmu turin tu emaw a rawn kal anga.. Engkim i hrethiam vek mai ang" a ti dam thlap a. Ngawi rengin a chhuak zui nghal.
A mutna bula tui chu in in, a awmdan mak tak chu a ngaibtuah neuh neuh a. Palian tak bak kha mitthla theih tumah a nei lo. Tu pawi mah a sawi si lo va, engvangin nge tihnat an tum? A chau deuh nge a lo muhil leh daih. Kut nel thep hian a hmai a rawn chul a. A harh nghal.
"Emy" a ti sap a.
A khumah chuan rawn thu vein, "I muhil rei hle mai.. I tha em? " a rawn ti a.
"Tha chuan ka inhria. Eng nge ka awmdan hi ka hrethiam lo. Hei hi khawi hmun nge?" Buai zet hian a lo ti a.
Emy chuan nelawm taka nuih sakin, "Dory, i hmaah duhthlanna an siamsak mek che a ni. Tunah hian pawl pakhat, hel pawl nia hriat, zoram tihchhiat tumtu leh thiltithei deuh te chu an pawla lakluh tum an awm mek a. Sawrkar inrelbawlna thunun tum in khawi hmunah pawh an inchap darh mek a ni. An ni chuan nang pawh an target che a, mi lar i ni a, thil i tithei tih an hriat vangin. An ni chuan an pawla lakluh chea Zoram tichhe tura hmanruaa hman che an tum a ni. An kut atang chuan kan chhanchhuak ta che a..
Kan pawl erawh thil tha chauh duh pawl kan ni. Zoram chhanchhuah nan thil tam tak kan ti tawh ani. Kei ngei pawh hi he pawl chhanchhuah hi ka ni. Tichuan, kan pawl hi rawn zawm vea kan tana hna thawk ve turin kan duh che a ni… " a ti ta dap dap a.
Dory chu a ka buai nuaih tih a lang reng mai. Chuti ang zawng chuan ngaihtuahna a la seng ngai der si lo va.
"Zawm ve ta che u ila, ka haw thei dawn tihna em ni? Engkim kha a ngai ang chiahin a awm leh thei ang em? " a ti ta a.
Emy chuan, "Tehreng mai. Mipui bulah i bo lo va, i zin thut thu i sawi mai dawn a ni. Tichuan, i hna thawh tur chu keimah kal tlangin hriattir che a ni thin ang. Harsa a awm lo.. " a lo ti zung zung a. Hawn a chak tawh ropui si, bakah Zoliansanga a hmu chak tawh bawk.
"Anih chuan in pawl zawm turin ka inpeih e" a ti ta a. Awlsam taka thutlukna a siam mai chu Emy chuan mak a ti hran lo. A lo tawn tawh kha a ni miau a. A lawm vang ni miah lo vin Dory hmuhah chuan a nui sáng a. A samah chul sakin, "Kan lo lawm a che" a ti sap a. Pindan chu a chhuahsan leh ta phawt.
Dr Zira room pan nghalin, Erica leh Beiseia ten an lo nghak thap.
"Zochhingpui leh aputea chuan min rawn zawm thuai kan beisei. A pi leh pu kan dah tha tawh" Dr Zira chuan a lo ti nghal a. Emy a ding chawt. Beiseia zawk chu a va melh râwm a, "Thisen chhuah kher ngai lo va thawh theih reng si a harsa zawngin in kalpui a. A la pawi thei maithei ani" a ti hriam hraih a.
Erica chuan, "Kan tih ngei ngei ngai a ni tlat a tin ni. Tisawn, Zochhingpuii putea saw kan target leh ang a, a mangan tawpah kan kutah a rawn tlulut dawn tih ka chiang" a ti a.
Emy chuan nuih hak pahin, "I ring a maw? Saw pa nghehzia leh luhlulzia saw i hria alawm" a lo ti nghek. Emy chu an melh thap.
"Eng nge? Khatia min melh.. Silaia min tin zan kha ka theihnghilh hleinem. A mitmeng tumruhzia kha" a ti nawn leh salh a.
Dr Zira chuan, "Zochhingpuii hi chu Beiseia kutah kan dah pumhlum tawh ang. Nang chuan Dorothy chauh i ngaihven tur a ni" a lo ti khawl a.
"Tehreng mai. Saw nau pawimawhna pawh ka hre ve si lo va, ngaihven loh hi ka duh fô zawk.. Chairman mimal hna ka thawh a ngai bawk nen" a lo ti sam èt a.
Beiseia chuan, "Zaninah kan thawk chhuak nghal ang. Zochhingpuii tak saw chu a putea kan hneh chuan harsatna kan nei dawn lo va, aputea saw kan hneh vat a ngai" a lo ti bul bul a.
Erica chuan, "Ni e, i duh duh ti rawh. Mahse, Zochhingpuii chu nung damin kan duh tih theihnghilh lo la" a lo ti chang rât a. Emy erawh a chhuak daih. An thlir zui vang vang a.
"Emy hi ka ringhlel a ni. Nge Zochhingpuii kha a lo ngaina hman zawk? " Eric chuan a tih zawm zat a.
"Dorothy a kawmnaah kha chuan engmah rinhlelh tur a awm loh kha.. Ni e, Zochhingpuii kha a ngaina hman a ni ngei ang.. Saw nau sawn a thiltihtheihzia a la hre lo mai pawh a. Emy te ang thinlung sak pawh reilote chhunga a hneh thei anih ngai chuan, kan ta anih hunah phei chuan….. " sawi zawm lo vin a ngawi daih. Hrethiam takin Eric leh Beiseia erawh an lo bu nghat a.
Villa: Ramhnuai..
Zing vartian chauh a la ni. Valtea leh Zochhingpuii erawh far thingin a hual vel hnuaiah ngawi rengin an ding dun a. Rifle la thar tha veng vawng tak an pu dun ran bawk. An hma pen sawmhnih awm velah chuan target siamin, ngawi rengin an kap tan ta a. Zochhingpuii chu a la zei hawi lo hle naa, a kut a khur eih lo. A kokia rifle chu chhuangin target chu a mitmeng fim kâk chuan melhin a tinzawn vang vang a, a hmet ta khap mai.
"A fuh ta" Valtea chuan a lo ti hap. An hlim hmel ta deuh.
"Naute, i pi leh pu te phuba la tur i nih kha. He kawng hi kan zawh a ngai.. I tithei" tiin a fuih sar sar a. Zochhingpuii chuan ral khata a pi leh pu te thlan chu va thlir vang vangin, "Ni e, kei hian an ni ho chu ka that vek ang" a ti fiah kâk a. A mitmenga huatna lo lang zawk chu a thûk kher mai. A hmangaih te a chánna chuan a naupanna theihnghilhtirin huaisenna leh tumruhna nen phuba lakna kawng a zawhtir ta.
Chhun lamah erawh an putuin lehkhabu chhah pui pui an chhiar dun a. An tan a tangkai a ni mahna. Khaw thim hma, ni tlak dawn suar suarah chuan an villa atanga pen 200 velah an thirlen chu chep chatin, mi pathum an rawn lut ve mèk a. A thlang lawka lui tui luang ri her her lamah chuan chhuk thlain, "Hetah hian riah buk kan sual anga. Zaninah Valtea chu kan bitum ang. A dam erawh a ngai ka tih kha.. " an hotupa ber niawm tak chuan a ti a.
Zanriah an ei khamah bathlarah an putuin lui lam thlirin an thu dun a.
"Ate, pipi te kha vanah an awm ang tiraw? " a ti sap a.
"Tehlul mai. Van atangin an rawn thlir reng che tih hre reng ang che. Tin, naute, kei hi ka awm ta lo anih pawhin mi pakhat ka hrilh che bulah khan kalin, engkim hi i sawi vek dawn nia.. " a ti a.
Zoi chuan, a putea va chelhin, "I kal ve ka phal hauh lo vang. Ka bula i awm loh chuan kei pawh ka dam duh bik lo" a ti tham tiak a.
"Ni e, ka tum alawm.. Chuan, khawpuia awm chu i duh lo tak tak maw? " a lo ti a.
"pipi te sulhnu kalsan hi harsa ka ti a ni" alo ti sap a.
"Mahse, phuba la tur chuan he ramhnuai atang ringawt hi chuan engmah kan ti thei dawn lo asin" valtea chuan a lo ti thung.
"Te, i thu thu aw. Mahse, he tah hian zuk kal fo ka la duh tho vang" a ti ta a.
Valtea chuan,"Naktuk atangin in lei tur ka han ngaihven nghal anga, kan sumdawnna pawh kan tihtawp rih a ngai ang. Ramhnuaiah kan teihawi reng thei dawn si lo va" a ti a.
"Te, pawi i tih loh chuan, kan hausak viauna chhan hi ka hre ve duh. Tin, ka pi leh pute thattu te hi tu te nge an nih ka hre duh bawk. Ka nu nen inkaihhnawih a nih chuan sawi kher a ngai chuang lo a nia" Zoi chuan inthlahrun hmel lek lek hian a ti ta a.
Valtea chu a thaw hawk. Tun bak hun remchang a awm lo tih a hria. A hrilh hma hian a thihsan mai ang tih pawh a hlau. Engkim chu hrilh turin a intintuah ta a. Coffee a va siam te te a, bathlarah awm tawh lo vin Zoi roomah khunkhan takin an inhmachhawn ta ran mai.
1999:
Pu Lianmawia sumdawnna pawh a kal tluang ve zel a, thingrai hmanga sumdawngin sawrkar nen inbiakremna tha tak an nei bawk a. Harsatna an tawk ngai lem lo. A nupui Dingliani leh a fate pahnih Sanghmingliana (Valtea tia koh) leh Zohlupuii te nen Zarkawta an in lianpuiah nuam takin hun an hmang mek a ni. Pu Lianmawia hi pa tha leh thil phal tak a ni a. Mi harsa a tanpuina ringawt pawh hi tam tham tak a ni. Vawi khat phei chu Pathian ram thilpek a thawh tur ai kha Hnuchham inah a pe lut pek a! An kohhran hruaitu te ho in an lenchilh luih luih phah a ni. A ngaihdanah chuan Kohhrana chhung lut kher lo va Mi rethei chanhai te a tanpui khan Pathian tana pe ang tho in a inngai a ni. Mahse, chu chu mi tam tak ngaih dan a ni ve lem lo.
A fanu tleirawl hmel tha leh duhawm tak chu Pathianin aw tha leh mawi tak a la pe zui zel a! An neihin a tlin bawk nen, zai lamah a kal chho ta a. A hmel a lo tha kher bawk nen, mi lawm a hlawhin a lar ta thuai reng a. An fapa Valtea erawh lehkhazir tuichilh rumrut mai a ni a. Amahin Laboratory room te nei hrang thlapin experiment hrang hrang tih kual chu hna berah a nei a. An khap duh lem lo. A chut deuh roh a, a luhlul hle bawk.
Zohlupuii pawh nula ve tan tir, star neih hun lai a hmang ve mek bawk a. A kum rualpui chiah Zoliansanga nen an inhmel duh ta a. Zoliansanga pa hi Doctor lar leh thiam tak a ni. An chhungkaw dinhmun chu a inchen viau ang. Langsar takin inngaizawng ngam lo mah se; an inhmangaih ve em em tawp. An rinawm tlut mai bawk a. A rukin an la inhmu thin. Hmeichhiat mipatnain a la pawlh buai lo va, Zohlupuii chu nula thianghlim pure virgin a ni. Apa in a zilhin anu lahin a hrilh chamchi bawk a, sex lama tlan chu a tum chhin ngai lo.
A lar tial tial a, a zaithiam telh telh bawk. Zoliansanga nen pawh kum 2 an inzui tling ta. Chutia enghelh reng nei lo va hringun an hman lai chuan, buaina mak tak maiin a rawn nangching ta a. Zohlupuii rilru chu thil dangin a pawt buai chho tan a, a larna leh hmingthanna chuan duhâmna sualah hnuk lutin a aia nasaa lar leh thuneihna thlenga pumhmawh a thlahlel ta a ni ber.
Chutia hmasawn tuma theihtawp a chhuah lai chuan mi pakhat a rawn lang ta hlawl mai. Zoliansanga tih lohah chuan chupa chu hmel tha a ti ber awm e. A bula awm a nuam a, a kawm thiam hle bawk. Chu pa nen chuan inanna tam tak an nei a, lar leh hmingthan duhnaah an lungrual a, eng emaw ti taka mi dang thunun theih chaknain an khat bawk. Zoliansanga nen an inkar pawh a tlakhniam phah nasa angreng. Chutihlai hun chuan Valtea kha apain phaiah zirna a chhunzawmtir daih a. Engmah a û chunga thil thlenh chu chiangkuangin a hre ve lem lo.
Chu mihring lo lang thar chuan Hlupuii chu zawi zawia hnehin pawl pakhat a awm thu leh chu pawlin amah an mamawhzia te a fah chho tan ta a. An pawl thiltum chu thil sual a ni hauh lo tih hriain Zohlupuii chuan ihe lo vin a zawm ta a ni. Chu chu a bultanna chauh a ni ta.
Chutia pawl pakhat zawma a insingsak lai bawr chuan a pa sumdawnna chu a tlachhe ta thut!ba bungraw pekna te chuan an sumdawnna tihtawp lailawk an duh thu an sawi tlat! Pu Lianmawia pawh chuan nawr lui lem lo vin, a sum kawlsa erawh bank-ah a dah lut vek a. An damchhung khawsakna daih tur tawk khawpa tam a ni tawh hrim hrim. Mi duham a ni hran lo bawk a. Lungawi takin a pawisa khawlsa chu a chen ve mai. A fanu lahin sum tam tak a lalut ve mawlh mawlh bawk nen. Mahse, a fanu nunphung danglam tan chu a duh lo angreng viau. Vawi tam a zilh tawh. Luhlul rual lek a la nih bakah fate haua kutthlak chi a lo ni bik si lo. An tha en ve deuh tawp mai a ni.
Zohlupuii pawh an pawl duhdan angin a hna a thawk chho zel a. Zoliansanga nen pawh an la inkawp reng tho naa a hma a pha tawh lo.
"Ka tan hun i nei tlem ta khawp mai" tia Zoliansanga vuivaina pawh eng he huah a ngai ta lo. A suangtuahna leh duhthusam chuan a nunkhua zawng zawng a luah a, tihhlawhtlin a nih huna a awm dan tur te suangtuahin a hun tam zawk chu a khawhral a ni ta deuh ber.
Kum 2001 a lo inher chhuak ta a. Zohlupuii tana duhthlanna harsa tak inchhawpchhuahna hun chu..
Zoliansanga nen an inhmu khat tial tial a, mahse, an la inthen èm lo thung. Pu Lianmawia te nupa rilru a hah tial tial bawk. An fanu nunphung chu a danglam nasa tawh hrat a ni. Zan rei tak tak thleng in chhuahsanin rui chungin a lo haw fo a. Mi lar anih miau vangin mi te ngaihven a ni si a, a chanchin thang mawi lo pawh a ri chhuak ta zeuh zeuh. Vawi duai lo an hau, a zawm duh der si lo. Valtea pawh rawn haw vein a u nungchang dik tak chu a rawn hmu ve ta a. Mak a ti viau nghe nghe.
Kum a tawp a, December thla chhung zawng Zohlupuii chu an inah awm duh lo vin, "Hna pakhat ka nei a. Min lo ngaihtuah suh u. Ka lo kir leh hunah chuan engkim a tha tawh ang" tiin in a chhuahsan ta a. A chhungte rilru a hah kher mai.
Kum a lo thar a. A rawn let leh ta. A sawi ang tak tak khan a nun a danglam dawrh. A tawng ngai lo va, a melh ngai a melh ngawt ngawt thin. Mi â ang maia a awm tak si avangin pawn a chhuak ngai lo va, zai pawh a zai ngai ta hek lo. Zoliansanga nen an inkar pawh tuman an sawi thei ta lo. March thla an chuankai meuh chuan, Zohlupuii pum chu a rawn puar ta mai a! Ni e, nau a lo pai reng chu niin.
"Tu nge naute pa? " tih zawhna chu mitthi biak ang chauh a ni. Chhanna tuman an hmu thei ngai lo. Zoliansanga nen khan inngaizWng mah se, a nu leh pate hriatah a la kawp lang ngam lo va, hriat pawh an hre ve vak lo reng a ni. Anmahni ai mahin Zoliansanga chuan mak a ti zawk. A bialnu anga a la ngaih, Zohlupuii chu a rai tlat si! A fa a ni lo chu ania tina em em tu.
Mahse, nau a neih hma kar thumna velah khan Zohlupuii chuan a nu leh pa leh a naute chu a roomah ko lutin, Naute pa leh naute chungchang chu hrilhin, "Ka hrin chhuah veleh mipa anih chuan in damtir anga, hmeichhia anih erawh chuan in tihlum tur a ni.. " tiin a chah a. Rapthlak ti zetin an lo ngaithla. An awih thei lo zawk.
Fanu a nei ta si a. Mahse, Pu Lianmawia te nupa chuan an tihlum thei tlat lo. Chu naute thisenah chuan an thisen a tel ve tlat si a!
He thil hi an ti thei dawn lo tih an hriat lawk vangin ruahmanna felfai tak an lo nei lawk thlap tawh thung. Kum eng emaw ti liamta ah daih khan Aizawl tlak lam atanga kal zela rammgaw pakhat, khua atanga hla fu siah Pu Lianmawia hian ram a lei a, An fapa Valtea tuizawng ngaihtuah ran chungin amaha a intawllen vena hmun atan in a saksak a. An tlawh pawh zeuh zeuh thin. Amah Valtea tak hi chu phai atanga a lo haw apiangin chu lai hmunah chuan chawlh a va hmang fö! Tuma tlawh pawh ni si lo, ram reh leh dai nuam tak chu a tan hmun nuam a ni miau si a.
Tichuan, Zohlupuii nau hrin zanah chuan an ruahmanna angin naute leh an bungraw pawimawh zual ho kengin Ramhnuai lamah chuan an tlanchhe ta a ni. Zohlupuiin thudik a hrilh a tang khan an bungraw thenkhat an dah thla zeuh zeuh tawh sa reng a! Mipa emaw hmeichhia emaw pawh hring se Zohlupuii kuta dah an tum lo sa hrim hrim a lo ni a!
Tichuan, Zohlupuii pawn a chhungte thiltum chu dan chi a ni lo tih hriain, "Ka theihtawpin dan beh ka lo tum ang" tiin a thlah liam kha a ni a. A fanu vanga a tawrhna leh a chhungte nen an inthen tak vanga a natna chu a intan chho ta a ni.
A nau hrin hlim hlawlah amah leh a fanu lam turin mi pahnih an rawn lut nghal a. Mahse, amah chiah an va hmu. "Thudik an hre tawh a. An tlanbo.. Kei pawh min hnutchhiah " tiin a lo chhang a. Ani chu Headquaterah hruaiin, hmanrua atan a la tha ang em tih an ngaichang a. An tan hna pawimawh tawpkhawk a thawh tlat avangin tihhlum èm chu ngaingam lo vin an damtir a. Emy a lo piang chhuak ta a ni.
Zohlupuiii leh a chhungte bo thu mipui nawlpuiin an hriat hunah thil a buaiin harsatna an tawk thei tih hriain a zan la lain, Pu Lianmawia in chu halin an thih mang vek thu a thang ta a nih kha. Zohlupuii ruang niawm an sawi hmeichhe ruang kha tu ruang nge tih erawh khawvel hian a hre ngai dawn lo a nih hmel e..
Valtea te chu Villaah chengin a tirah engkim chu an tan thil thar niin harsa mah se; a rei ve tial tial a. Pu Lianmawia te nupa pawh chuan ramhnuai chu an ngaina zawk mah ta hial a! An tunu erawh anmahni ai mahin Valtea'n a khawih tam zawk. Bawnghnute hmuh mai tur a vân vangin sazupui hnute an hnektir chang a tam, mahse, thi thiang a ni tlat lo. Naupang hmel tha tak, anmahni tihlim ber tu niin a lo thang lian chho ve zel anih kha.. Zochhingpuii ngei mai chu..!
Sum leh paiah an buai lo. An pawisa khawlsa piahlamah Zohlupuii khan a neihsa zawng zawng a hlan vek a. Kha ringawt pawh kha tam tham tak a ni. An theih ang angin an chenna hmun chu an humhalh ve a, chenna hmun nuam taka siam tumin theihtawp an chhuah chho va, Valtea sceince thiamna pawh an hmang tangkai nangiang mai. Kum 15 a liam meuh chuan, Villa leh a chhehvel chu vanram ang maia duhawm leh mawi, nuam a ni ta a. Mahse, tunah chuan chu hmun nuam tak chu chhuahsan a ni dawn ta.
Dorothy: Flat @ khatla.. :
"Zo, ka ti tak tak alawm. Ka zin thut a. Ka nu a serious deuh a.. ".. Dory chuan titak zet hian Zoliansanga chu a melh a.
"Ka awih lo ka ti hleinem. Kawngka pawh kalh hman lo, thawmhnaw pawh engmah keng hman lo va i kal thut kha a mak ka lo ti zawk a" Ringhlel tih hriat takin a lo ti a.
Thingpui no ban pahin, "Min lo ngai em? " Dory chuan a ti ban chhalh a. Tlemin a inthlahrun ve hmel. deuh.
"Ngai a ni mai ang chu" a lo ti satliah a.
Pyramid lem lek va pahin, "Dorothy, hei hi enh nge anih i hria em? I inah kan hmu a" a ti ta a. Dory mitmeng chu a buai nak mai.
"Ka… ih, ka thiannu ta a nih kha. A theihnghilh a.. " a ti hul hak a. A heh chu a liak pah zauh.
"I make up artist thar Emy ta kha a ni tih sawi i tum tiraw? " Zoa hmel thutak zia chu Dory chuan mak a lo ti.
"Umm. Aniang, amah bak inleng ka nei vak lo va" a ti niah niah a.
"Hmuh ka duh a ni. Dory, khawngaihin " Zoliansanga aw chu a thûk angreng hle. Emy chu a pawimawh viau ani ngei ang.
Ni e, Emy ngaihvena Dorothy bo dan chhui an tum mek laiin, "Dorothy a lo haw" tih thawm an hre ta a. Ani lahin a zin thut thu bak a sawi si lo. Awih harsa ti hle mah se, nawr chiam a duh lo. Mahse, Emy an tih fô hi a hmuh ngei a ngai. He pyramid lem nen hian inzawmna an nei tlat a ni. Chu chu Zoliansanga tan a pawimawh lutuk tlat.
Dorothy chu amah chauha a awm hnu chuan rilru mang zetin a tei kual ruk ruk a. Eng nge a tih dawn engmah a hre lo. Emy ngaihchan a ni deuh tawp mai. A inbual sar sar a. Kha paliana a ka huptu kha a mitthlaah a rawn lang leh, a hlau hran lo naa kha pa khan a chungah eng emaw tak a ti niin a hre tlat. Inzawmna eng emaw tak an nei a ni mahna..
Zanriah pawh a in thlang mai chaw dawrah a ei chhuak a, mi chuan an en duh hlein a hria. Ni e, bo than khan a thang tlat si a! Nakinah interview a la hmachhawn ngei anga, a sawi dan tur erawh Emyin a hrilh vek tawh. He Emy tel lo hi chuan engmah a ti thei tawh lo achha a ni ber e.
"Hello, Dory, i bo emaw kan tih laia kan manganzia kha aw.. A lawmawm e him piala i lo kir leh hi" tia rawn betu A singer pui ve tho, Jeneti hmel lan dan tur chu a lo suangtuah daih. A lawm tak tak a ring hauh lo. Anihna takah chuan a er ru em em zawk kha a nia. Bo hlen daih mah se, a lawm ber tur a ni tlat!
Phone call neuh neuh a dawng reng a, a then chu a chhang peih lo. A bo hmaa a programme hmachhawp sa ho kha a cancel fai vek phawt, mahnia awma muk taka inngaihtuah a mamawh a ni. Kha pawl a zawm tak, "Rêver" tia hriat kha a ngaihtuah thin. Khatiang pawl kha an awm ngai a hre lo. Pawl pakhat amah tihnat tuma veh kualtu nia an sawi lah kha a hre ngai hauh si lo. Shillonga chhuka zuk chawlh hahdam deng deng a chak viau rualin, Emy ten an khap tlat si. Mak deuhin an thu awih loh chu a hreh tlat tawh bawk.
Door bell a ri tlang tlang, chanchinbumi an nih ringin a then sak a, hawnsak loh mai a duh rum rum. Phur fahran lo vin a va hawng ta tho va, Emy a lo ding vang mai.
"I tha takzet em tih rawn fiah ka tum a" In chhunga. arawn luh hnu chuan a ti a.
Dory chuan, " Ka tha alawm. Ka tha mah mah" a lo ti ve mai a. Sofaah chuan an thu dun a.
"Naktukah interview neuh neuh i hmachhawn dawn a. Sawi tura ka tih chin chauh kha i sawi dawn nia. Ngaihventu che an awm ve reng tih theihnghilh lo la" Emy chuan a ti a.
'Hmm.. Tehreng mai. Chuan, Emy, eng ber nge ka tih leh dawn" hawihai fe hian a lo ti a.
Dam thlap hian, "I zai zel ang. I lar telh telh bawk ang. Tichuan, i lar vanglai takin mi pakhat i bitum ang. Mi pawimawh tak a ni" a ti ta a.
"Aw le.. Ka hrethiam e. E taka Zoliansanga khan hmuh che a duh tak asin. Ih, pyramid lem vang khan" a ti a.
Emy chuan a chal a chuar nâng a, "Ka hmu châk lem lo asin le.. Mahse, a rinhlelhna tihbo nan ka lo hmu dawn nia" a ti ta a.
An pawl dinchhan a sawi leh fe hnuah an in mang tha ta a. Emy a chhuak fel chiah tihin, Dorothy chuan number pakhat hmetin, "Engkim a tha vek e. I rinhlelh ang kha a ni lo. Emy hi hmeichhe tha tak a ni ka tih tawh kha.. Hahdam tawh rawh" a ti chang fal a.
Aw hniam reih rawih hian, "I hna i thawk tha e.. " a rawn ti a.
Phone chu dahin mu turin a khum lam a pan ta nghal a.
Zoliansanga: @ Farm house:
Pyramid lem te takte chu hnai taka bihin a zir chiang vel a. A chal a chuar leh nâng thin. A hmui chu pet sawiin hmeichhia ang maiin a thaw leh hak thin a. He thil lemin a tihbuaizia a ngaihtuah chuan a thinrim hlur mai.
Ni e, Zohlupuii khan he thil ang chiah hi a lo kawl tawh thin a ni. Zohlupuii hming a hriatchhuah ruala, "Zo, nang leh kei chu mi hran kan ni tawh. Engtikah kan innei thei ngai lo vang, ka pum chhungah hian naute a aawm a ni" tia a thlahna aw ri kha a bengah a lo ri leh thin.
Tleirawl mai an ni nachungin a rukin an inhmu ve reng a. A bialnu kha a lar em vangin duh angin hun thawl pawh an nei ve tak tak thei ngai lo anih kha. A zaithiam a tih em vangin a va be ve a, Zoi chuan a hre reng hauh lo. Mahse, zah theih loh chhuahin a be ta fô a. Hlupuii nin hun awm velah a reh leh daih zel a. Vawi khat apa kaisan lawmna an neih tumin a rawn zai a. Khata tang khan pangngai taka inhmelhriat chho in inngaihzawnna khurah an tlu lut dun ta kha a nia. Anmahni tawkah an hlim a, an lungawi takzet. Zohlupuii chu khawvel hmeichhiaah a aia hmel tha leh duhawm an awmin a hre ngai lo hial!
Zirna vang leh Hlupuii hming thanna avangin an inhmu khât ta tial tial a. Mahse, rinawmna an vawng dun reng thin. Zan khat erawh apa in a kamkhat a, Zohlupuii then turin a ti anih kha. A chhan a hre lo. Then a tum bawk hek lo. Apa chuan mi lar an nia, a duh ve tak tak lo vang che tiin chhuanlam fahrah tak hmangin then turin a nawr a, mahse, mipa diktak angin a ding khawng ve tlat.
A rin loh lamah Zohlupuii chuan kua a hreuh ta daih a. An inhlat ta dâwrh mai. Chuti chung pawh chuan a la bansan phal ta chuang lo va. Mi dangin sawisel mah se, a thlavang a la hauhsak ve tang tang thin. Mahse, zan khat chu Hlupuiin a rawn hmu ta a. A rai thu a hrilh anih kha. Vawikhatmah sex an la hman miau loh vangin Hlupuii pum chhunga naute chu a fa a ni lo tih a chiang si, kha kha a tikehsawm ta vek anih kha..
Mumalin a khawsa lo chho zui a. Apain phaiah a dah ta hial anih kha. Huatna leh hmangaihna inkarah damkhawchhuah a zir a. 13th, july, 2002- zana Zohlupuii te in a kan ral vek hunah khan ani chu zu hnathawh do zo lo vin mitthi ang maiin a chatthla daih anih kha..
Zohlupuii hi a thih a ring phal ngai lo. Mahse, hei chen a zawng ta.Journalist hmingpu siin private Detective hna a thawk pah a, heng zawng zawng phenah hian Hlupuii a la ding zar zar bawk. Kum kal ta lawk khan sawrkarin a rukin a thianpa nen an lalut ta kha ania. Hnuchhuina kawngah a hming lamrik ni ngai lo mah se; engkima an chhuantawlawl a ni tlat! Chu chu a nu leh pa te ngei pawn an hre lo. Zohlupuii a zawng pah zel naa, hei chen a hmel hmuh tur awm ta si lo chu a thi tak tak anih a ring ve ta hial a. Hmeichhia erawh a nunah tihtakzein a la lut thei ta chuang lo. Ni e, Zohlupuii aiawh thei hmeichhia a tawng ngai dawn lo tih pawh a chiang, Sangteii hi a nei mai ang nge? A la hnar zel dawn tihah a buai chho mek a ni. Nuka fel tak, hleitling leh hmel tha tak a ni a. Hna zahpuiawm loh tak a nei bawk. Mahse, a hmangaih thei ang em?
Dorothy bo dan leh a lo haw ngawt dan chuan a ngaih a titha lo nasa. Chhui zui anga lang si lo va enthlak erawh a tum khawp mai. Jonathan pawh a hrilh tawh nghe nghe. Dorothy chungah hian eng emaw tak a thleng tih a hria, chu thil chu eng nge anih a la hre lo mai zawk a ni.
Villa:
A khum mawng lama mi pathum ding thim muk chu a zuk hmu a. Hlauhna pakhatmah a nei lo. A lo rinlawk ang chiah a nih vang a ni.
"Eng nge in duh? " a ti sup a. A thu chhuak nghal.
"Kan duh chu i hria alawm.. Rikrap tur chea rawn kal kan ni lo. Thupe tur chein kan rawn kal.. I rawn lut ngei tur a ni" aw thum chang bel bawl hian a rawn chhang a.
"Ka rawn luh ai chuan thih ka thlang tih in hria alawm" a lo ti chang rât.
Pahnih chuan an rawn vuan chat, a rak hma in a ka an rawn hup phui hmiah bawk. An villa chu chhuahsanin chhun lama a tunu nen silai an kahna hmunah khan an thut hual taih a.
"Amah ringawtin a awm a, ka kalsan thei lo. Ka haw dawn" tiin kal a tum a. Rang taka vuanin an phuar bet nghal. Au a tum hran lo, a sawt dawn lo tih a hrechiang em a ni.
"Nang leh i tunu hian loh theih loh vangin kan pawl in rawn zawm ve dawn tih ka hria.. a dik em? " an hotupa chuan a ti a.
"I mumang a nih chu! Thih thlengin ka bei ang" a lo ti hmiah.
Nui huah huah chungin an hotupa chuan a rawn pan hnai a, "Hmalam hun ngaihtuah ta che, nupui, fanau.. Engkim" a ti su su a.
Valtea chuan, "Chung thil chu ka thlang lo zo tawh a, hei chen ka kal tawh. A tawp thlengin ka bei ang" a lo tih khum a.
"Mi luhlul tak i ni a, heti mai chuan i pawm dawn lo tih kan hria alawm.. I tunu saw i hmuh lai ngeia kan mutpui hunah kan thu hi i zawm ngei ang"
Valtea chu a tal awrh, thinrim meng sen râm chungin, "In kut bawlhhlawh zet khan vawi khat pawh in tawk anih chuan, ka thih thak thlengin ka bei ang che u. Ka chansawm vek bawk ang che u" a ti ta chher chher mai.
A ding lama ding chuan, "Phuarbeh zawkin chutiang thu sawi suh. Kan kuta awm i nih hi" a lo ti nghut a.
"In kuta awm tak tak ni ila min that daih tawh ang. Mahse, tu nge in hlauh ber tih ka hria alawm.. Ani saw in hlau tlat alawm. Ni e, ani saw in hlau.. A dik em? " ti el lek lek hian a ti ta a. An pathum chuan an ngawi thap.
"Eng thil tehchai nge i hriat a. Nnag hian" Tiin a khabeah a rawn hnek dawt. Leiah a tlu thuai a, na ti miah lo hmel pu hian, "Engkim ka hria. Engkim" a ti hrâwk a.
A veilama dingin rawn reh tuma a kut a phar lai takin, silai a puak thuai. Chu pa chu hnunglamah a tawlh nghal dawrh a, che zui tur a awm lo. Thim zing atang chuan, aw nelawm loh zet fiah fai tak si hian, "Che tawh hlek suh u" a rawn ti ta a.
Makti zetin silai rik chhuakna hmun chu an va hawi a, Rifle hmaw a rawn lawr zat, a kengtu chu a rawn hnai zel a. Mitmeng hriam leh huatnaa khat, mittui tling piau si hian, "Phuba chu a in tan ta chiah e. " a ti vawt raih a. A silai chu vawi hnih hmet puakin, mipa pahnih te chu leiah chuan an let hlawm ta reng mai.
Valtea phuarna chu phelhin, "I tha em? " a ti sap a.
"Ka tha e.. Thihna èm chu a thlen loh ka beisei asin" Valtea chuan a lo ti a.
Verther hmel lek leka nui hmel puin, "Buaina bul ka ni a, Buaina titawp theitu pawh ka ni" Zochhingpuii chuan a ti zawi sap a..Villa lam a pan zui nghal hmiah.
"Zochhingpuii dik tak a ni ta.. " Valtea chuan a hmela pawi tihna lang chungin a ti zui sap a.
(Tikhan in man deuh tawh em 😂 duhtawk leh rih ang aw. Hming hi ka hriatpawlh thin vangin tihsual a awm hlek maithei. Lo remkhawm dik ve mai ru.. In hrethiam tawh bawk a, in herrem thiam ve zel tawh mai ang. Next-ah kum a thar tawh ang 😂😍
A fiah ta kuar e, next nghahhleh awm vet vet hle mai
ReplyDelete