Thuruk 2

THURÛK..!  (2)

Ziaktu: Toni Râlte

23rd, Nov, 2017.. Secret Society

. 

Pindan chhung chu a thim deuh ruai a, a uap churh bawk. Mi pahnih hi khunkhan fein an inkawm a. A changin an inhnial leh hlak hlak thin. Thinrima inhnial erawh an nih hmel loh. 

Dr Zira leh Eric-a te bawk an ni. 

"Leader hian a rang thei ang bera zawhfel a duh tawh a ni. Kan chet vat a ngai" Dr Zira chuan a ti a. 

Eric chuan, "Emy hian a hna a la zo fel chiah si lo va, engtin nge Dorothy hi a tawp kan kharsak dawn.. Tu nge a aiawh kan tirh ang? " a lo ti a. 

"Vawiinah ngei hian Emy hian a rawn hruai lut thei turah beisei i la; a hlawhchham a nih tak leh Beiseia kan tir tawh mai ang chu" Dr Zira chuan a ti sup a. 

Erica chu a ding hluai a, Dr Zira melh vang vang pah chuan, "Beiseia meuh thawh atan chuan a nep deuh lo maw?  Ani chu hmunpui lama palai tur emaw ka lo ti asin" a ti thak a. A aw chuan ngaihno a bei vak lo. 

Dr Zira chuan dam thlap hian, "Dorothy tluka tun generationa lar i hre chuang em ni? Ani hi kan mamawh alawm.. Hmunpui lamah chuan nangmah i kal ang" a ti ta a. Erica pawh a thu tha ve leh mai a. Dr Zira chuan dawhkana button sen chu hmetin, "Emy rawn luhtir teh.. " a ti a. Rei rial lo vin pindanah chuan Emy chu a rawn lut ta zan zan a. 

"Vawiinah i hna i zawh fel a ngai. Dorothy chu kan neih a ngai. Eng pawh ti rawh. Mahse, hnuhma engmah i hnutchhiah tur a ni lo" Thu pe aw zet hian Dr Zira chuan a ti a. Emy chu a ner sak. 

"Tharum thawhna a tel a ngai dawn anih chu.. Hun la ngah ila chuan a thluak ka su thei dawn asin le aw.. Mahse, i thu thu.. Zanin dar 8 ah hetah ka rawn hruai ang" Emy chuan inringtawk takin a ti a. 

"Emy, ka nawr hmanhmawh chhan che chu i hriat tawh kha.. Hna pawimawh zawk thawh tur i nei a tin ni. Nang hi he hna thawk tura thlan i ni a, i hlawhchham thiang lo" Dr Zira bawk chuan a ti leh a. Emy chu thu turin a hrilh nghal a. Eric chuan Emy chu a lo melh vawng vawng thing. 

"Eng hna ber nge ka thawh dawn tih ka hre duh" Emy'n a tih rual chuan, Dr Zira chu a ding a. Chhuatah chuan a vei tawn sek a. Ngawi rengin an lo thlir ringawt. Chutah Emy lam hawiin, "Hmeichhe naupang kum 15 mi hnenah a nu anga insawiin, hetah i rawn hruai tur a ni. Chuti maia awlsam a nih dawn loh vang ania nang kher kan thlan che. Kan target chu Zochhingpuii a ni a. A pi leh pu leh a putea te nen Ramhnuaia an villa-ah an khawsa mek a ni. Mihring dang a hmu ngai lo va, ramsa aiin a chungnung hret chauh tih a ni. Mahse, chu hmeichhia chu kan society hian hman ata tawh kan la mamawh ber tlat a ni.. Nasa taka ven a ni a, a putea saw a tawhkhirh ber tur a ni. Mahse, nakinah i zir chiang anga, hneh theih dan zawng a awm ngei ang" a ti ta a. 

"Chu naupang chuan min lo awih lo ta se" Emy chuan a ti chang rât a. 

"A awih ngei che a ngai. A chhan chu tunah hian a nu leh pa hriat chakin a buai mek a ni" Erica chuan a lo ti a. 

"Ok.. Anih engvanga pawimawh viau nge anih. " Emy chuan a lo ti khauh. Erica leh Dr zira chu an inmelh a, Dr Zira zawk chuan, "Kan society in Mizoram kan thunun theih na atana a fawng vuantu a ni tlat a ni. A thisenah sawn kan thurûk zawng zawng a luang mek a ni" a ti ta a. 

Emy chu a ngawi reng. Dorothy lakluh dan a ngaihtuah tan a ngai bawk nen, a chhuak ta a. 

Erica chuan thlir zui chungin, "Rintlak ber pawl mah nise; hlauhthawnna ka la nei fô thin" a ti sap a. 

"Kan rinngam rih phawt a ngai a ni. Rina leh a thuihhruai ten an mitmei reng dawn alawm.. Buai lo teh ang" Dr Zira chuan a ti a. 

Villa: 9:57 pm.. 

Zochhingpuii chu roomah tawmin nasa takin a inngaihtuah a. A chhung ten a laka an thup thuruk chu hriat chaknain a khat. Mahse, hriat theihna kawng a dap fuh mai thei si lo. Ngaihtuah leh vil reng nih chu a kham tawh a, puitling ve tawk anga inngaiin amaha kawng zawh ve a duh a ni. Mahse, bultan dan a hre miah si lo. A hmasa berah a nu leh pate hriat theih dan kawng a dap a ngai tih a hria. Kawng awlsam tak erawh a nih hmel loh. An chhungkaw albumah mi dang reng reng an lang ve lo va, a tet lai thlalak chu a tam mai. Mahse, a nu niawm hmeichhia a hmu lo. Lei atanga rawn chawr chhuak chawt a ni em mawni le..? 

Zochhingpuii putea Valtea pawh chu a inngaihtuah buai kher mai. A tunu chuan ngaihtuahna a seng thiam ve tan tih a hai lo. A û vanga an chhungkaw buaina kal zel chu a tawp thei ngai dawn lo tih pawh a chiang ta khawp mai. Ni e, khawpui atanga an tlanbo zanah kha chuan him taah a inngai hman a. Ramhnuaia kumpui linglet an chen chhung zawng khan harsatna a tawk ngai lo tihtheih a ni. Mahse, kum 2 liamta atang khan a mang lamah tibuaitu a nei ta zeuh zeuh kha a ni a. A nute erawh a hrilh duh lem lo. Pathian a nei a, ani chuan a vantirhkohte hmangin a veng reng tih hi a ring bur tawp. A chang eraeh chuan a thiltiha inchhir chang a nei ve fô!  Nupui neiha mahni fa ngei mai han pawma chhungkaw dinte chu a suangtuah ve fô! Mahse, a kawng thlanah hian hmeichhe dang an tel ve a rem ngang si lo va. A tunu damkhawchhuah nana a thiltih zozai hi a tunu chuan hrethiam lo vin a do mek chu a ni si a! Thudik erawh hrilh a tum hauh lo. Thudik a hriat ruala Zochhingpuii hmel lan dan tur a ngaihtuah zawng ringawt pawn na a ti.. 

A nuin a thing eh laiin a rawn ko va. "Nauteii chu be leh la a tha lo maw?  Sawti ringawt chuan kan awmtir thei lo" a rawn ti a. A thlan hruk pâwk pahin, "Min be duh hauh lo vang" a lo ti a. Mahse, a thing eh lai chu dah felin an in lam chu a pan ta tho va. Zing atangin a tunu a la hmu lo. A roomah a tawm ngat ngat mai a ni.. Chaw lah a ei duh si lo. 

Zoi pindan kawngka chu kikin, "Naute, inbia ang. Lo hawng teh" a ti dat dat a. 

"Inbiak a tulna ka hre lo" a lo tih khum hmak si. A nu nen an inmelh ralh. Apa erawh nghakuai chiah turin a kal a. A nu chhang ur chu eiin muk takin a inngaihtuah a. 

"Thudik hi hrilh mai la" anu chuan a ti a. 

"Eng thudik maw? " a lo ti hmak. 

"Anu diktak hi mawle" 

"Pa a nei lo tih pawh maw" a lo ti leh. 

Anu chu a ngawi ta daih a. Ani zawng hmeichhia ngang a ni a, a tunu vang chuan a nèm leh hle tawh tih a lang reng. Valtea chu a roomah lutin inthlakna a la chhuak a, inbual turin bathroomah a lut ta daih a. A inbual lai te chuan naute duhawm tak, tap ngèk ngèk pawm chunga ramhnuaia a tlan vawn lai lai te kha a lo lang a. A û ngeiin, "Ka theih chen chen ka lo dang ang. Mahse, ka thih chuan engkim a tawp a ni ang" tia a thlah lai te. A û hnutchhiaha in atanga a nu leh pate nen an chhuah lai te kha.. 

Ni e, a û kha a la dam ang em?  He buaina hi a chingfel thei ang em?  Engmah a hre lo. 

A lo muhil sek a. A mumangah hmeichhe pakhat, sam sei leh hmel tha tak a hmu a.. An in piah lawka a putea tuikhuaha a chen laiin a ni nghe nghe. A taksa huh hliam chu towel thianghlim takin a rawn tuam a, nelawm taka nuiin, "Ka fanu, ka va zawng rei tawh che em" a ti a. Mak ti taka chu hmeichhia a melh ngawt ngawt lai chuan a putea tawng thawm an hria a, hmanhmawh takin chu nu chu a insaseng ta anih kha.. Tichuan, amah Zochhingpuii pawh chu a harh ve nghal a. A mumang chu a ngaihtuah let vang vang a, engkim kha a tak ang maia chiang a ni. Anu nia insawi hmeichhe hmel pawh chiang takin a la hre thei. "Aw Lalpa, Anu nen min inhmuhtir hram ang che" tiin a phun sep a. A ril tam tawngkhawng tawh em vangin a room atang chuan chhuakin ngawi rengin choka lamah ei tur a va dap a. 

Dorothy.. 4:45 pm:

Zaninah Emy nen zanriah an kil dun leh dawn vangin phur zetin a inbual sar sar a. He a thiannu,  make up artist ni bawk hi a ngaina takzet tawh a ni. Ni e, hman zana a mumang nge a tak tih a hriatchian loh thil mak takin a tihbuai atang khan Emy hi a bulah a rawn riak ta zeuh zeuh a, kawm a nawmzia leh thil a hriatzia te a hrechiang telh telh, tin, amah ang maia zai thiam a lo ni tih pawh. Engvanga mi dang hriat theih tura zai ngai lo nge maw anih le.. A aw nalh leh tham riai  te chu a mawi dangdai hle si a. Emy ang chiaha zaithiam tih Mizo zingah a lo nei tawh thin. Mahse, ani chu a thi tawh thung. Kum 1998-2000 thleng mai khan Zoram khawvel a lo awi tlei tawh a, Chu zaithiam chu Zohlupuii a ni. A thih thu Zoram khawvelin a hriat khan ui lo fa reng an awm lo tihtheih a ni a. A thih dan rapthlak tak avang pawhin lainat a hlawh hle anih kha. Ni e, a hmel hmuh tlak loh khawpin a kang sáwr vek. An in kangah an chhungkua an thi fai vek a, bungrua engmah an chuh hman hek lo. Hun a kal zel a, Zohlupuii aiawh zo an awm hlei thei lo. Dorothy a rawn lang ta chiah a. Zohlupuii thih atanga kum 13naah chiah. Ani hian Zohlupuii thihna rawn hliahkhuhin zoram khawvel chu rimawi ngaihnatnah a hruai kir leh ta a ni tih theih a ni. 

Bathrobe-a intuamin cream a inhnawih mawlh mawlh a. Zoliansanga a ngaihtuah pah bawk. Emy nawrnain a duh thu a hrilh tawh a, nizanah mai khan a ni nghe nghe. Mahse, a chhanna dawn chu a lawmawm lem loh. "Dory,i duhawmin i ngainatawm ka ti, mahse, ngaihzawng ang chuan ka en thei rih lo che a ni" a ti anih kha. Tlang taka a chhan avang chuan a lawm tho nain, chhungrilah a na veng veng mai. Amah hnawl ngamtu mipa hi an tam lo kher asin le. Zoa chuan tu nge a hmangaih ang? Hmeichhe kawp a neih awm a hre si lo.. 

Door bell ri chuan a ngaihtuahna atangin a kai harh a. Emy anih ringin phur zetin a va hawng a. A tawlh kir dawrh!  Hman zana a khum bula palian tak ding nen chuan an inhmachhawn ta ran mai. 

"A tawpa tawpah chuan" chu pa chuan a ti thum chhak a. Kawngka chu a khar a, a kalh zui nghal bawk. Dorothy chu a tawlh zel a, a hlauthawng hmel thup lui hram hramin, "Tu nge i nih? Eng nge i duh? " a  ti dawt dawt a. 

"Oh.. Hlau mah ta che. Emy tirh ka nih hi.. Rawn hruai tur che in. Amah a rawn kal hman lo va, hotelah a lo nghak dawn che a" a ti ta a. Tlemin a awm a nuam ta deuh. Mahse, a mumang kha a ngaihtuah lo thei lo. 

"Aw le.. Ka la inthlak lo va. Lo thu la.. Ka va insiam ang nge" a ti bah nuaih a. Chu paliana chu a sofaah chuan thuin hahdam hmel zet hian a bawp a khawkherh thán a. Dorothy chu a roomah lutin hmanhmawh takin Emy a call nghal a. "Emy, tu nge i rawn tirh hi.. Min rawn hrilh lawk tur alawm" a ti chung a. 

"Maw.. Eng maw i sawi?  Tumah ja rawn tir hleinem" Emy aw ngei mai chuan a rawn ti a. Makti zeta a men phawk lai tak chuan, a pindan kawngka chu inhawngin Palina chu a rawn lut ta a. 

Phone chu a thlauh tawp! Emy in a rawn auh lawng lawng pawh chu a chhang thei lo. "Eng.. Eng nge i duh? " a ti khur dar dar a. 

"Nangmah hi mawle" tih pahin a rawn kuai her lawp a, a hmui chu a rawn hup phui ta hmiah a. Dorothy chuan engmah a hre chhunzawm ta lo. Khumah chuan chupa chuan a zalh a. Dorothy phone chhuata let reng chu chharin, "Ka tifel e. Eng nge ka tih leh tur" a ti sup a. 

Lehlam ami chuan, " Mutpui rawh" a rawn ti vawt raih a.. 

Zoliansanga.. 

Hotel Bella: Room no- 119.. 

A zei hrep mai. A bra chu tuai thlain, a hnute chu a hup nghal chat. A lo ngik faih a, a hnute chu zei taka a leia hawl kualin a tawlh thla hret hret a, a dul thuar te chu zei zeta a kutzungtanga zut kualin a lai chu a zuk fawp ner ner a. Chutah a panty sexy chu hlipin, hmeichhiain a chhunga lut tura a sawm thleng chuan a han sawisa kual ta mai a!  A tawp lamah phei chuan chu hmeichhia chu a tap titih hial tawh. A taka an tih hma hauhin vawi hnih a zo hman! Hei tak hi Zoliansanga danglamna a ni. A hmeichhe mutpui ten an hriatreng theih nan dawhthei takin a tha ber tihsak a tum thin. Hmeichhia a thlang uluk ziah bawk. A pawnlam nun danah tlangval senior tawh lam, nungchang tha leh a hna hnehsawh tak niin lang mah se; khumlaizawlah chuan ramsa koham ang maiin a inhrithla thin. Ni e, mipa tam zawk hi an ni vek ang. Hei hi siamtu duan dan zawk pawh a ni maithei asin. 

"Zo.. Ka hmangaih che.. Umm.. I ta ka ni. I ta liau liau" tiin hnuailam atangin a rawn nawr et et a. Rum nghut chungin a tum ram thleng turin thapui thawhin an bei leh a, hei zet chu a ni pawn a zo ta lo. A vawrtawp chu thlengin a zawi ta hnak mai. Hmeichhe sirah chuan mu thlain a thaw ta hle hle a. An lungawi dun tih erawh a lang reng mai. 

"Zo, min nei ta che" tiin a awm chu a rawn chul a. A mutpui zawh chiah hmeichhia chu a melh vang vang a.. A nui sak, "Nupui neih ka la tum lo a ni" a ti thawp sat a. A mitmengah nawrluih ngam chi nia a hriat loh vang nge hmeichhia pawh chu a ngawi ta rauh rauh a. He nu nen hian vawi tam sex an hmang dun tawh. A mamawh chang apiangin a tan bel chhung sa a ni thin. A chang phei chuan he hmeichhia zawk hian a rawn sawm hial thin. Aizawl mi hausa fanu, pawisak nei lem lo, pawnlama fel tak leh zahawm tak si ve tho a ni. Mipa a mutpui nasa tawh tih chu Zoa ngei pawh hian a hai lo. Mahse, a fimkhur tho.. Natna tha lo a kai lem lo tih a hriat vang ania hetia a duh duha a bawlzan tak ni. Pawnlama an inhmuh chang erawh chuan pangngai takin hmelhriat satliah angin an inbe thin. 

An tihtur an ti zo ta bawk a. Hotel chu chhuahsanin hotel kawtah chuan an motor ve ve chuan an inthen hrang leh ta vang vang mai. Vawiin atan chuan a tawk viau mai. Zoa pawh an in lam panin a inkhalh haw a. An inthlen hma deuha College hawn thar kawtah chuan mi an lo ding laih a, motor a din nasat vangin ani pawh chu ding vein, a chhuk a. A hnaih bera taxi driver niawm tak bulah chuan, "Eng nge thleng? " a ti satliah a. 

"Jeep  leh taxi  an in su ani awm e" a lo ti a. Mipui pun khawmna lam chu va pan vein, taxi driver niawm tak chu a tawng lar lar a. Jeep bulah chuan a neitu te niawm tak tlangval amah aia nau deuh hlek tur leh a bialnu emaw a nau niawm tak nula an lo ding a. An ngawi reng thung. An jeep zawk chuan a mit a la lehpek, wrangler niin Mizoramah nei an tam lo kher ang chu!  A man pawh 63.94 lakhs vel a nia.. Chuti ang neitu chu a rethei miah lo vang tih a lang reng mai. Mahse, an insu na deuh nge a hma lam chu a sawi deuh bám a. Nasa lutuk erawh a ni lo. Hmeichhe tleirawl zawk chuan mipa chu a banah chelhin, "Ate, i na em? " a ti a. Chu aw a hriat chuan Zoliansanga chu a phawk hrû nghal. A hmaa mi dingte chu a keu sawt sawt a. Chiang zawka hmuh tumin a va pan hnai a. A ding chawt.. 

Amah chiah chiah a ni. Mahse, a lang naupang fe zawk mai. A hmaiah make up a chambang miah lo na chungin kha nu ang maia hmel tha kha a ni. Traffic police rawn kalin an buaina chu an rawn chinfelsak a. Taxi driver zawk chuan pawisa chawi turin a nawr a, mahse, Jeep neitu zawk chu a tang ve tlat. A ruk tak chuan chulaia pungkhawmte pawh chuan an tan ru thûm. Police chuan taxi driver chu a rui deuhin a hria nge a va hnimhnai a. A lo rui chiah reng a. Danah chuan a thiam lo chiang bal.. Bakah a motor a hmelhem miah lo bawk. Taxi driver zawk chu jeep siam thatna man tur chawi tura inremsiamna neihpui a tum laiin, "Sir, khawngaiin min kaltir mai ula ka lawm ngawt ang. Engmah chawi a ngai lo. Tikhan kan inrem ni mai rawh se" tiin mipa chuan a rawn ti ta a. Hmeichhe tleirawl chu kaiin kawngkhar a hawnsak a. A lut a. Ani pawh lutin an tlan zui ta chu a ni mai. Zoliansanga chu hamhaih buai miah lo vin a motorah thu lut ve zatin a hmaa jeep tlan chu a umzui ve ta nghal chat a. Phurna namèn lo vin a tuam hlup hlup mai. 

Mahse, a rin lohna lamah an tlan ta zel, Aizawl an chhuahsan dawn ta mai. Zemabawk daiah chuan a ding ta nge nge a. Khawi khua tak ni ang maw?  A nula kha a ni lo tih chu a hria. Mahse, kha nula hmelah khan a nula ni thin hmel kha a hmu tlat a ni. A nula a ni lo tih hre mah se, hriatchian chakna in a khat a. A hun liam tawh te thlengin a ngaihtuah hman anih kha.. 

In a thlen chuan a nuteii leh a nu an lo titi nasa mai a. A luh rual rualin, a nuteii chuan, "Mam, i nupui tur chungchang kan lo sawi a" a lo ti nghal bawrh bawrh a. 

A nui hak ringawt. "Ni e, hei i tlangval rei ve tawh. Nupui nei tawh rawh. Tu hmel hmuh pawh kan chak tawh" anu chuan a lo ti nghal zat. A nu hian a nawr rukna chu a rei tawh. A hnial zel anih kha. Ni e, kum 41 lai a ni ve tawh. A thian leh a rualpui zingah nupui la nei lo chu vâng tak an ni. Mahse, a nuna kim lo hnawh khat thei tur khawp hmeichhia a la tawng miau si lo alawm le.. 

"Mam, enteh, Sangteii ania. A pa chu Doctor Zirliana kha, i pa nen pawh inhre tha lutuk an nia. Sangteii chu kuminah khan Collegeah a thawk ve chauh a, mahse, lecturer meuh chu an hlawh pawh a chhe dawn lo hrim hrim. Ka lo haulsak ve tawp che. Kan inpawh ve lutuk a, ani chuan a hre lutuk che. I lar ve ta maw.. Ka fapa hi ka chhuang ania" Anuteii chuan a ti lar lar a. A nui hawk hawk bawk. Anuteii mizia hi ngainatawm deuh a ni a. Amah tak pawh hian a ngaina viau. 

"Nupui hi neih loh mai ka duh" a ti duh chauh a. Anu hmel ngui deuh chu lainatin, "Tak taka ka lo hmelhriat ve phawt dawn nia" a ti ta a. Amaha a awm hnu chuan a rilru a siamfel tan a, heti reng renga hmangaihna vanga ka hliam tawrh ka kalpui thui anih chuan ka nute hi keimah vangin an hlim thei dawn lo. Ka paltlanga ka tihluih ve deuh a ngai dawn a nih hi… tiin. 

A inbual lai chuan vawiina a tleirawl hmuh kha a rawn lang thar leh a. A hmel pawisawi lo zet leh zahzum hmel angreng tak te kha.. A rawn hmu ve hauh lo naa, inzawmna nei tlatin a inhria. Hmuh leh a châk.. A la zawng chhuak thei em ang chu maw.. 

Zanriah an ei khamah a hnaah a buai nghal a. Hna hautak a ni lem lo naa ngaihtuahna sen nasat a ngai ve thin si a. A hahthlak lek lek thin. A phone ri ral ral chu banin, "Aw.. Ka pu" tiin a nui sak a. 

"Naua, hna kan nei. I phur viau ang.. " a thianpa, amah aia û hlek, pathlawi Jonathana chuan a rawn ti a. 

"Sawi la" a ti a. 

"I rilru a lo na ange aw.. Ih, Dorothy a bo! " a rawn ti ta a.. 

Villa:

Valtea chuan a nute bulah taxi nen an insut thu leh motor chu thawm that hlek a ngaih thu a sawi. Zoi erawh a pi si châtin a thu a. 

"A va zia lo em.. Nauteii kal ve chhunah. Mamawh chu i rawn lei hman tho ang chu maw? " apu chuan a ti a. Valtea chu a bu nghat. 

"Awii ih maw, pipi, motor a tam lutuk, mihring an tam bawk si, in phei chu a tlep tuar mai.. Paris a nih ka ring rum rum.. Ka lehkhabu chhiarah sawn Paris a lang tam sia, Paris nen ka ngaihpawlh tawp" a ti sar sar a. A hlim hmel chu hmuh nuam an ti kher mai. Ni e, ni 2 dawn kha a titau a. Tumah a be duh lo. Mahse, ni 3na atangin a rawn inhawng leh tan a. "Khawpuia min hruai chuan ka lungawi ang" tiin. An pawmsak a. Aputea rualin a kal ve ta anih kha. A mihring hmuh zozai te hmel kha a hre seng tawh lo. An chesual zui ta bawk nen. An hawn kawngah aputea'n khawpuia chen ve a chak leh chak loh a zawt a, "Ka chak miah lo. Huntera leh titin te nena infiam nuam ka ti zawk" a ti anih kha. Aputea pawh a khi sak mai. 

Zanah a chau ve deuh nge a muhil hma viau. Chimawma leh Huntera inchhaih thawmin a tiharh a. Dar 10 vel chauh a la ri. Chimawma hi tun hnaiah a rawn lang zing a, zanin pawh a riak ve dawn a ni maithei. Aputea inkhel en thawm chu a hria a, a pite erawh an mu tawh a ni maithei. Khumah chuan a mu meng kar a, sana a bih zauh zauh bawk. Dar 11 a rik rual chuan a rizai sin chu hlimin khum chu a thawhsan a. Thawm dim zetin tukverh chu hawngin, leia uai thlakna tura a hrui dah that chu a va pawt chhuak a. Thawm ngaichang leh vang vangin a uai thla ta a. Lei a thlen rualin ke lawngin tuikhuah lam a pan ta nghal a. Tuikhuah a va thlen chuan a hmuh tum chuan a lo nghak reng tawh a. Tuikhuah bula chawlhbuk sakah chuan lo thuin a lo nuih sen sen a. A bulah chuan pawt thu vein, "An hmu lo che maw?" A ti a. 

"Hmu lo vang. Atea'n inkhel a en a. Pipi te chu an mu tawh" a ti a. A thaw hlliam hliam mai. Chu hmeichhia chuan a kut nel thep chuan a sam te chu huikhawmsakin, thla eng hnuaiah chuan a hmel chu chiang takin a melh vawng vawng a. 

"Ka fanu chu i ni takzet e.. " tiin a chalah a rawn fawp a. 

"I fanu ka nihna chiah i sawi a. Anih chuan ti nge kan bulah i chen loh?  Engvangin nge a ruka kan inhmuh a ngaih? " Zoi chuan fiah zetin a ti ta a. 

Emy chu a thu ngil at a. Tuikhuah lam chu melhin, "I pi leh pu ten min hua alawm" a ti ta a. 

"Engvangin nge an huat che" 

"A tam mai. Naute, thil zawng zawng hi i hriat ve loh tur chin a awm a tin ni" a ti sap a. 

"Anih tu nge ka pa?  Khawiah nge ka pa? " a ti ta a. 

Emy chuan a chil a lem khawlh. A maimichhing vang vang a, mipakhat hmel chiang takin a hmu. Mahse, a lu a thing leh nawk, a chezia chu makti takin Zoi chuan a lo thlir a. 

"Pa i nei lo tihah hian lungawi thei la ka duh ngawt mai" a zawi ta raih a. 

"Pa nei lo in ka lo piang ve tawp tihna em ni? " a lo ti hlar a. 

"Aih.. Pa i nei. Mahse, i pa ni lo se ka duh a ni" 

"A awmzia ka hre duh" Zoi chu a auin a au a ni ber. A ding hluai bawk. 

"Naute, khawngaihin.. Kum 18 i nih hunah engkim hi i la hrefiah vek dawn alawm.. Tunah chuan i hriat tur chin bak ka sawi thei lo a ni" a lo ti dam thlap a. 

Zoi chuan tap teuh chungin, "Kei hi piang ve lo tawp ila a tha zawk. Ramhnuaiah tumah hmuh phalsak lo vin ka seilian a. Ka khua a har ve thin asin. Thian te neiha infiam te ka chak ve, ti nge phalsak ka nih ve loh? .. Ti nge Aizawlah khan ka awm ve theih loh? " a ti a. A ngik faih faih. Emy chuan lainat hmel takin a melh tlawk tlawk ringawt. Zoi mittui hruksak tuma a va ban lai tak chuan, "Tu nge i nih? " Villa kawng lam atang chuan a rawn ti fiak thak a. A ding khawng lah mai. 

Thla eng hnuaiah chuan Valtea chuan a shot gun chuan Emy chu a tin ta ran mai. An inkarah Zoi chu a ding ran bawk a. Zochhingpuii hamhaih lutuk chu a hawi tawn chhen ringawt. 

"Ka nau, i lo dam em? " Emy chuan a ti ta sap a. 

Valtea chu a meng phar awk. Mahse, inthlahdul hauh lo va Emy la tin ran chung chuan, "I nau ka ni hrep lo ve, tu nge i nih? " a ti leh hrâwk a. 

"Ka lawm e. Ka fanu hi i theihna zawng zanwgin i lo enkawl a. Nau nih leh putea nih i lo tlin khawp mai. Kei hi i û, i u neihchhun Zochhingpuii nu Zohlupuii kha ka ni" a ti ta khalh khalh a. Zochhingpuii chuan, "Ate, kap suh. Ka nu a nih hi.. Khawngaihin" tiin Emy chu a din hliah ngjal vat. Valtea tan pawh chet lak a harsa ta hrat. A u nia inchhal chu a u nen an intiat viau ang, mahse, a u hmel a pu tlat si lo. Awih harsa a ti. Inbumna a nih a ring bawk. Ni e, khang mi tenawm ho khan he hmeichhia hi hmathehin hmanruaah an rawn hmang chiang a ni. 

Insehruh teuh chungin Zoi chu a va kai dawrh a. "He lai hi ka ram chhung ani. I hmel hmuh leh hi ka duh tawh lo. I hmel i rawn lan leh rualin hmel hmai hmuh tlak loh khawpin ka kap darh ang che" a ti rum ta thak a. Emy chu a ngawi ran mai. A mitmeng erawh a ngui angreng. Zoi tal aih aih chu hnehsawh zeta kai luiin Villa lamah an inkhalh hawng ta a. Emy erawh tuikhuah hmar lam kawngtum te takteah chuan kal pheiin, a phone a phawrh a, "Dorothy chu a harh tawh em? " a ti sap a.

Lehlam a mi chuan, "Harh lo.. A harh hunah eng nge ka tih dawn? " a rawn ti a. 

"Engmah eitur lo pe la, lo chiu mu leh nghal mai rawh" a ti a. A dah a. Mahse, a rawn ri leh nghal, ner sak chungin a la a, "Aw.. " a ti satliah a. 

"Eng nge chanchin.. " Dr Zira aw chuan a rawn ti a. 

"Anu angah min ngai tawh. Mahse, chuti maia awlsama lakchhuah theih a ni lo vang. Vengtu a nei tha lutuk" a ti a. 

"Beisei te kan tir mai dawn em ni? " a rawn ti dût a. Emy chu a tim sawk. "A ngai lo vang. Beiseia inrawlhna tur chi a ni lo. Ka buaipui thei ang" a ti ta sap a. 

Hnunglam hawi letin thing hmun zinga Villa, thla eng in a chhun chu a va melh vawng vawng a. 

"Engtikah emaw chuan.. " a ti sap a. Hmalam panin a kal leh ta a. 

Secret Society.. :

Pindan pakhata mipa panga thu kual te chuan tu emaw an nghak mek a ni. Kawngka chu a ri rak a. Emy chu rawn pen lutin a hmaa thu te chu nui sáng chungin a melh kual a. Mahse, a tu amah chuan nui hmel an pu lo. 

"I thiltih ruk chu hriatchhuah a ni tawh" chang fe hian amah hnaih bertu chuan a lo ti a. 

"Maw.. Eng thil maw? " a lo ti hawk. 

"Dorothy i thuhrukna hmun kan hre tawh. Kan nauten an la dawn mek e" Dr Zira chuan a ti ta a. Emy chuan a awm a dawm vang vang. 

"Chuan eng thil nge ka tih ruk?? " a la ti fan a. 

"Thupek i hmuh ang kha chuan nizan hmasaah khan he lai hmuna awm tawh tur a ni a. Mahse, i flat-a a awm daih chhan saw i sawifiah erawh kan phalsak ang che" An pawl Vice Chairman Pu Dinga chuan a ti a. 

"Sawifiah nan hun min la pe lo hrim hrim alawm. Zochhingpuii lachhuak tura thupek ka ni bawk a. Dorothy chungchang ka lo ngaihven hman tawh lo a ni. Ka tihpalhah ngaihdam ka dil e. Ni e, min khalhtu an awm alawm. Dorothy ka va hmuh hma khan tu emaw chu a inah va lutin Dorothy chu a pawngsual a ni. Chuan, a khum bulah pyramid lem a lo hnutchhiah bawk. Kan hriat ve loh pawl pakhat hian min veh ru mek zawk a ni. Ka hlauhthawn bakah fiahna neih ka duh vangin Dorothy chu ka inah ka hruai ta a nih kha.. " a ti ta sak sak a. Khawng takin a ding bawk. 

Dr Zira chuan, "Thudik a ni maw.. Pawl pakhat thiltih nge mimal hurherhna vang tih chu kan la chhui chhuak ang chu.. " a lo ti nghut a. 

"Hei chen hi kan pawl tan hna ka thawk tawh a. Tihsual ka neih in hre tawh em? Vawikhatmah ka la hlawhchham ngai hek lo. Dorothy chungchang bikah chuan chet phelh zauh ka lo nei ani mahna.. Mahse, a la pawi thui chuangin ka hre lo. Kan pawl venhim ka duh vang zawk a ni e" Emy chuan a ti leh ta fak fak a. 

Chairman chu rawn ding hluaiin, "Ni e, Emy, nang hi ka mi rin ber zing a mi i ni thin a. I la ni zel bawk e. Zochhingpuii hi chu Beiseia kutah awm tawh mai se la; Nang erawh ka mimal hna min thawhsak la ka duh a ni.. " a rawn ti ta a. 

Emy chuan, "Ka lawm e. Mahse, Zochhingpuii hi Beiseia line a ni lo. Ka hlawhtling thawkhat viau asin.. Tharum thawhna leh inrikrapna tel lo va lakchhuah theih ka inbeisei asin mawle" a ti ve mai a. 

"A mah vengtu sawn hmanrua a neih that bakah a luhlul a. A pi leh pute saw chu hmeh mih theih an ni. Kawng dang kan nei tlat lo atin ni" Chairman chuan a ti a. 

"Anih thil pakhat chiah.. Zochhingpuii chu in lakluh hunah tu nge a pa tih hi hrilh in tum em? " a ti ta a. 

An ngawi thap. Chairman chuan a aw thian kharhin, "Chu zawng hunin a la hril ang chu.. A hriat hun erawh a la awm ngei dawn.. " a ti ta a. 

Emy chuan, "He ta a lo luh hunah ka hnuaiah awm se ka duh. Engmah ka dil ngai lo che u a. Mahse, he nau hi ka enkawl duh a ni.. " a ti a. A inrintawk hmel kher mai. 

 A hmaa thu te chuan an melh thap a, Dr Zira chuan, "A nakin hun tur i ngaibtuah vang zawk a ni thei em? Chanvo tha zawk hmuh theih inbeiseina lam te a kai em? " ti el lam lek lek hian a rawn ti a. 

Emy chuan chiang khek khawk hian, "Ni lul lo mai. Nu anga a en theih tur a mamawh alawm.. " a ti a. 

A chhuak zui nghal. 

An phun zui mam mam a. Pu Dinga chuan, "Ngaihthat lohna tur phei chu a awm lo va, Mahse, Emy hian Zohlupuii nihna dik tak kha a hria a ni mai lo maw? Zochhingpuii a ngaihven danah hian" a ti sup a. 

"Ka ring chiah lo. Test hrang hrang a paltlang tawh a. Tun ataka a tharthawh ka ring lo. A tan pawh hei hi a pawimawh hle si a " Pu Zama chuan a lo ti khauh. An ngawi ta a. 

10:23 am.. 

Chairman room kawngka chu kikin lut tura a rawn tih hnu chuan kawngka chu hawngin a lut ta a. Chairman chuan, "Okay, Emy, vawiin atangin ka mimal hna chu min thawhsak thei ang tiraw? " a lo ti a. A nelawm hle. 

"Tehreng mai" a lo ti ve mai a. 

"Hmm.. Hei hi i hna tur chu a ni.. He hmeichhe nungchang leh mizia zawng zawng  engkim ka hre duh.. " tiin hmeichhe thlalak a rawn lek va a. Emy chuan lain makti hmel a pu deuh. 

"Hei te chu Dr Zirliana fanu a nih hi" a ti hliai a. 

"Ka hria alawm.. Ka hriat vang alawm min ngaihven sak tura ka tih che" a lo ti a. 

"Mahse, engvangin?  "

"A chhan chu ka fapa nupui tur atana a nuten an hualsak anih vang a ni.. " a ti ta a. 

Emy mitmeng chu a hmu hauh lo. 

Emy chhuah hnuah, Chairman chuan Emy file keuin.. Sept, 2000 tih chuanna thlalak chu a lek kang a, hmeichhia leh mipa thlalak hlim taka an nui hmel chu melh vang vangin, "ka fapa , min hrethiam ang che.. Kawng dang ka nei lo atin ni.. " a ti sup a. 

(Ka duhtawk rih mai dawn.. Muthlu chungin ka ziak a. A sawt mawh em mai. Khaw awmdan hian a zir sia. Mut hi. 

In la hrethiam lutuk lo maithei. Hriatthiam in duh chuan, hmaih nei lo vin lo chhiar zel ula, ngaihtuahna hmang peih tan chuan a harsa lo ania. Zohlupuii hi a changtunu ber tur angah in lo ngai maithei. A role hi a pawimawh viau naa, a changtunu a ni kher lo maithei 😂 Valtea pawh hi a ni daih thei. Kan kual kan kual ve dawn chu a nia. Thluak sawizawi nan a tha phian. Love story lover tan chuan ek mai a ni e.. He story chu aw 😁