Thuruk 1

THURÛK..! 

Ziaktu: Toni Râlte

A chal dara silaia tintu mitah tak chuan chiang taka en chungin, "Ti rawh. Min kap rawh le" a ti sap a. Silaia tintu kut chu a khur nia mawle!  Ni e, a harsa khawp ang le.. 

"Kawng dang awm se ka va ti em" a ti tham tuak a. 

Zamna tel miah lo va rawn melh lehin, "I tih ngei a ngai si a.. Ti rawh. Tichuan, buaina hi a tawp tawh ang" a lo ti zawih leh raih a. 

A kut khinghniha silai humin khur dawt dawt chungin a chal darah chuan a rawn hmehbel a. 

"Min ngaidam rawh aw" a ti sup a.. Silai chèng a hmet kau a. A maimichhing daih. 

"Ka thei lo. Ka thei thlawt lo" tiin silai chu a paih a. A hmaa ding chu va pawm chawtin, "Kawng dang kan zawng tur a ni" a ti hawk a. Lo kuah let vein, "Khawvel dangah, nun thar nen" a lo ti sap a.. 

Chapter- 1

13th, August, 2002 (Friday)  

Time: 10:43 pm.. 

Pindan chu a thim deuh riai a, a changa na tuar rum dat dat thin thawm chauh lo chu thawm dang hriat tur a awm lo. Chhuata pher an phahah chuan kum 27-30 bawr vel tur hian nau a vei mèk a ni. A bulah chuan a nu leh pa leh a nau mipa ten a nau hrin chhuah hun nghakin an lo chang thap a. Eng awmchhun chu dawkan chunga sathau khawnvar alh teng teng chu a ni mai e. 

"Bawihi, vawi khat chiah han sang leh teh.. " tiin nu chuan a dul chu a rawn zutsak a. 

Then chak chak chungin thawm chhuah ring ngam bawk si lo vin a han insang phek leh tâng tâng a. A thlanchhia chuan a bual huh hnèp mai. Apa chuan a chalah lo dawmin duat takin a sam chu a lo huikiang a. A nau erawh chuan a û kut chu chelhin awmhmunah a lo tang ve em em mai a ni. 

A thaw hawk a. Naute tap ri ngâk ngâk in a rawn zui nghal. Thim zingah chuan a nui ta sak a. Naute chu a pi chuan puana tuamin a tap chu tihban tumin a sawi hliau hliau a. 

"Hmeichhia a ni lo tiraw? " chau aw tak hian a hringtu chuan a rawn ti sap a. 

Anu chuan ngui zeta zuk melhin, "Hmeichhia a ni tlat" a lo ti a. A hringtunu hmelah chuan pawi tihna leh thinrimna a lang nghal. 

"Tihlum rawh u" a ti ta a.. 

Secret Society, Headquater..:

Mipa pahnih an inhmachhawn a. Pakhat zawk chu palian tak, hang lam lek lek, hmel tha tak a ni a. Pakhat erawh cher angreng tak, zang kul lek lek a ni thung. 

"Va luhchhuak turin ka naute ka tir tawh a, an rawn hruai vat turah ka ngai" Paliana chuan a ti thum dut a. 

"A that chu, anih a nu zawk kha le..? " pa te viau mah se, a aw chu a lian lam a ni. 

"  A hriatrengna kan nawhrehsak a nih loh chuan thah a ni mai" tiin paliana chuan a lo chhang a. 

Pa chera chuan, "A la naupang a, tangkaina a la nei leh mai lawng maw? Tihhlum nghal pawh chu ngaihtuah that leh chi a nih chu" a lo ti ve a.. 

"Doctor Gosa inpeih leh inpeih loh a ni mai e" paliana chuan a lo ti bawk a. 

Chutih lai tak chuan kawngka chu an rawn kik a. Lut tura a tih hnuah mipa satha lam, sang angreng tak hi a rawn lut a. 

"A pawi khawp mai. Kan hloh a" a rawn ti ta a. Paliana te chu an ding rual thawt. Dawhkan chum bur pahin, "Kan hloh thiang lo, A rang thei ang berin zawng nghal rawh u" paliana chuan a ti ta tuar a. 

14th, August, 2002.. :

Pindan thim tak chhunga chhuat vawt takah chuan a mu a. A taksa na thûm chuan a khua a tisik ser ser mai. Kawngka chu a rawn inhawng a, pindan chhung chu a eng ta pup bawk. A meng hleithei lo. A eng mah mah a ni. Ke pen ri chu a lo hnai zel a. Ngam leh ngam lo vin a han melh a. 

"Eric,. Khawngaihin" a ti tham chhal a. 

Mipa chu chair lo awmah chuan thuin, a hmaa hmeichhe mu hlawm reng chu melhin, "Khawiah nge a awm tih chiah ka hre duh.. " a ti ram hmak a. 

"Ka hre lo" a lo ti tawi tâk. 

"I hre ngei tur a ni.. "

"Hria pwwh ni ila ka sawi lo vang" a lo ti ve hmak. 

"Enteh, Zohlupui, he thil pawimawhzia i hria ni lawm ni?  Engtin nge min phatsan theih? " Eric chu a meng alh phat a. 

"Ka hria, phatsantu chu nangmah zawk i ni. Ka duhthlanna tel miah lo va ka taksa thununtu hian inphatsanna chu sawi ve suh" a lo ti let ve salh. 

"Ngawi tak rawh. Kan la hmu khawp ang.. Dr Gosa'n a rawn hmu ang che. I thi emaw i dam emaw kan lawm e.. I fanu chu tha takin ka lo enkawl ngei ang" Eric chuan a ti ta a. 

Zohlupuii chu thei leh thei lo va rawn thu chhuakin, "Tenawmpa, ka fanu chu i kut hmawr pawhin i khawih tur a ni lo. Pathianin a veng mawlh ang.." A ti tuar a. Eric-a erawh verther takin a nui ver ver, rapthlak ti zetin Zohlupuii chuan a melh a. 

"Zoi, kan society tana i fanu pawimawhzia i hria alawm.. I fanu chu kan ta a ni" a ti nghut a. Kawngka lam a pan ta nghal a. Zoi chuan a au zui tuar tuar naa a bengkhawn lo kher mai. 

Chhuatah chuan a mu leh hnawk a. In chung lam melhin, "Lalpa, ka tihsual rah hi ka fanu sengtir lul suh ang che.. Khawngaihin" zawite hian a ti sap a. 

2017,  Villa: 

"Naute, kawngka lo hawng rawh. Biak che ka duh a nia. Khawngaihin" a room kawngka chu a rawn kik dat dat a. Khumah chunglam melhin a mu ngawi kar. Hawnsak a tum bau lo. A titau laklawh tlat. Vawi tam tak  khawpuia kal ve a dil tawh thin, phalsak a ni ngai lo chu tihtauhna chhan a tling ve tawh. Ni e, nikhua a hriat theih tirh ata ramhnuai chu a khawvel a ni miau a! Thing in lianpui chu a hmuh theih in a ni mai. A bak zawng chu thingkung leh sava bakah sazupui leh zawngte, lui te leh lungpui te chu an ni mai e. Naupang a nih lai kha chuan nuam a tiin ramhnuaia cheng tur hrim hrimah a inngai a. Tumah dang a ngai hran lo. A pi leh pu leh a putea te nen chenghoin engkim a nei thin. A pu nen luiah nghakuai chiahin an kal fô a, a putea thing kihna hmunah a kal fô bawk. Api eisiamna bula a lo tawlh ve hreuh hreuh chang a tam ber. Ramsa te chu a hlau hran lo va, an tina ngai hek lo. An saphai khawi lai Tintin tia a koh leh an chinghne khawi Huntera te bakah A sazupui No-i te nen an inkawm thei a, Zawngte pakhat Chimawma tia a koh mai erawh a rawn lang zeuh zeuh. A chhungte nen an cheng ve si a, rawn kawm fo a rem lo a ni mahna. A hun tam zawk erawh a putea nen lehkha zir nan a hmang thin. Lehkhabu a chhiar nasa a, a suangtuahna hruaikualtu ber pawh a ni. 

Hun a kal a, a kum a lo tam ve tial tial a. Thil chi hrang hrang a phak tawkin a ngaihtuah ve thin. Ti nge ramhnuaiah an chen bik? Khaw nge a mihringpui dangte hi an awm?  Khaw nge a nu? Khaw nge a pa? Kum 12 a tlin hma kha chuan nu leh pa an awm tih pawh a hre lo. Mahse, a lehkhabu chhiar tam takah nu leh pa an awm tih a hre ta a. Ani pawh hian nu leh pa a nei ve ngei awm si a. Khaw nge an awm ang le..? 

Zanriah an ei laiin vawi khat chu a sawi chhuak anih kha, "Pipi, khaw nge ka nu? " a ti tawl a. A pi chaw bar tur pawn a thulh leh tawp. An inmelh ta hrek hrek anih kha. A hnuah a puin, "Naute, i nu chu kan bulah a cheng ve lo va. A rawn kal ve tep ang" a ti anih kha. Chu thu chu a zawt nawn leh ta lo phawt. A putea hian thing lian pui pui kitin khawpuiah a motorin a phur chho thin a. A han hralh thin. Mamawh a rawn lei haw nghal thin bawk a, vawi tam a ngen thin, mahse, an phalsak ngai miah lo. An duat em em, mahse, an duhdan a pawimawh zawk fô!  

Thanthi a nei ve ta a. Rapthak a ti viau anih kha. Apiin a rawn pui ta hlauh a. Khami tuma api leh apu inbiakna a ruka a ngaihthlak tum khan eng emaw dik lo chu a awm niin a hre ve. "Kan fimkhur lehzual a ngai dawn anih hi. Pawn pawh chhuak tam tawh lo mai rawh se" an ti anih kha. 

Engvanga hlauthawng ta viau nge an nih a hre hauh lo. Zan tin an tawngtai thin a. Hlauhna hi a nunah a awm ve lo nge thim a hlau lo va, amah chauha lui dung a zawh chang pawn engmah a hlau ngai lo. Ramhuai leh thlahrang a hlau hek lo. A khum bulah apiin Bible a dahsak a, a hmuh phak rengah Rosary a inkhai nalh bawk. Bible chu a chhiar ve fô!  Mahse, a la hrethiam lutuk lo. Pathian chu a awm ngei tih erawh a chiang. 

"Naute, i rawn hawng lo vang maw?  Eng nge ka lo hawn che hi rawn en teh" aputea chuan a rawn ti leh a. A hmu chak ve tho bawk si. A tho ta nge nge a. 

Kawngka a va hawn chuan a hmai bul chetah teddy bear lian fahran, a dum leh vara intial hi a lo lek a. Rang zeta pawmin chhuatah chuan a lampui ta a. A chhungte chuan hmuhnawm tizetin an lo thlir thap. 

"Ka teddy vang hian ka ngaidam ang che. Mahse, engtikah emaw chuan min hruai ve tawh rawh aw" tiin a putea chu a va melh a. Aputea chuan a pi leh pu melh tawn zak zak chungin, "Lutuk, i kal ve thei tep tawh e" a ti ta a. 

Headquater, Secret Society: 

"Emy, he thil hi i tithei ang maw? " tiin Putar lek lek tawh chuan a hmaa hmeichhe ding chu a melh ran a. 

A high heel chu phelhin carpet dupah chuan a ke no zet chu a nghat a. "Ka beisei.. A chanchin kha min han hrilh chiang teh" a ti sap a. 

"Kum 23-25 a ni a, mi chapo tak a ni. Mahse, chak lohna a nei. Pawisa tam thamah a sihhnip thin. Chuvanga hmatheh che kan ni. I tihtur chin i hriat kha. Thiana siam a ni mai. Mahse, chuti maia awlsam chuan i hnaih nghal lo vang, mi lar a ni miau a. A zai pawh vawi tam i ngaihthlak tawh kha.. " Putara chuan a ti dap dap a. 

Emy tia a koh hmeichhia chu kum 38-40 bawr vel a ni a, a pian chu duhthusama nalh a ni. A hmai erawh tlemin a lang upa deuh tawh a, make up hmanga an han chei erawh chuan nula thalai zet zawt ang mai a ni. A sam buang tháng chu a kir deuh chiat a. A mitmu lian kel kawl chu a zahawm ru riau. He Society-ah hian rei tak hna a thawk tawh a, amahin flat lian tak luahin a nuamsa mèk a ni. Chhungte a neih leh neih loh a ngaihven tehchiam lo va, an society -a an boss Dr. Zira hian tuamhlawmin khawlaia a vakvai mai mai tur chu an pawlah lalutin tihian a chher chho kha a nia. Chuvang chuan he society hi a tan chuan a hlu takzet a ni. 

Emy chu a ding a, "I duh dan takin thil chu a thleng ang" a ti a. A nui sak bawk. A chhuak tur chu an society ami tho a hmuh fo thin nen an intawk a, "Emy, zanriah chu min kilpui hman ang tiraw? " a lo ti a. 

"Zanin chu min hrethiam teh, nakzanah a ni mai" tiin a lo chhang a. A chhuak ta nghal a. 

Dr Zira hmachhawn zawnga thut pahin, chu pa chuan, "A hriatna hi a rawn kir leh i ring em? " a ti a. 

Dr  Zira chuan chhing duar duar chungin, "Kum 15 a liam tawh a, Emy tih bak hming dang a la nei lo chu a nih hi" a ti sup a. 

"Chuan target dang chu kan nei thei ta maw? " a hmaa thu chuan a lo ti zawm zat a. 

"Anih hmel. Mahse, Zohlupuii fanu tluk erawh an awm dawn lo a nih hmel.. " Dr Zira chuan a lo ti khauh a. 

"An awmna kan hre vek tawh tho a, engvangin nge order hi kan hmuh mai loh? " a lo ti nghut. 

"Meeting leh hmasa berah kan rel dawn alawm.. Kum 15 a ni tawh a. Kum 18 a nih hma ngeia kan lak chhuah a ngai ang" 

"Anih chuan tuna kan target hi eng nge a tangkaina"

"Mi dang laka kan hmai phihnna tur hmanrua a ni e" Dr Zira chuan a lo ti a. 

DOROTHY:

"Ninawm eee.. Min chei turin ka beisei vek tawh a, engtin nge hetianga a tih theih.. Zanin hi ka tan a pawimawhzia a hre lo aniang" a ti hmarh hmarh a. A roomah chuan tei kual sekin darthlalang hmaah chuan a han ding leh ngawt thin. Make up tel lo pawha a that tehlul nen, tha a inti tawk tlat si lo va. A phone ri val val chu lain nelawm vak lo hian, "Hello" a ti a. 

"Emy ka nia, nangmah cheitu tur che thian kha ka nia, a hman leh ta si lo va, keiman ka chei mai che a ngai dawn a ni. Rem i tih chuan" lehlam ami chuan a rawn ti nem diai a. Tlem chuan a záng ta deuh. 

"Aw a tha lawm.. Ka inah i rawn phei mai dawn nge.. Ka hmanhmawh deuh tawh a" a ti a, a aw pawh a chang ta vak lo. 

"Aw.. Hei i in kawtah ka awm mek e. Ka rawn lut nghal ang" a rawn ti a. Phone chu a dah a. 

Emy chuan a bula gay chu nui sak chungin pawisa clip a pe a, "Ka lawm e. A thiantha tak ka nih ngei ka beisei" a ti sap a. Gay pawh chuan pawisa chu lo la vatin, "Duhsakna ka hlan a che" a lo ti ve a. A kalsawn ta nghal a. 

A kawngka kik ri a hriat chuan rang takin a va hawng a. Hmeichhia a mah aia upa hlek tur nen an inhmachhawn ran mai. 

"Hai, Emy ka nia, nangmah cheitu tur che kha" tiin a kut a lo phar chhuak a. Tui vak lo va a kut lo chelhsak vein, "Lo lut rawh" a ti a. A room lamah an inzui lut nghal. Darthlalang lian zet hmaah chuan thuin Emy chuan a khawih tan ta nghal a. 

"Dik tak chuan hetia ka chei thei che hi ka lawm takzet a ni. Ka ngaisang lutuk che a, i zai ngaithla lo chuan mut pawh ka mu thei tawh lo.. " Emy chuan a ti siam siam a. A rilru erawh chuan, "Nanga zai satliah hi vawite khatmah ka la ngaithla lo" a ti a. A ngaihtuahna chuan a tinui deuh. 

"Ka lawm e.. Zanina ka hmuh tur hi a pawimawh lutuk a, nalh deuhin min chei ang che" a lo ti ve mai a. 

"I bialpa a ni chiang" tîm ru deuh hian a lo ti a. Dorothy chu a nui hawk, "Ni se ka ti khawp mai. Mahse, kan la ni chiah lo va" a lo ti ve mai a. 

"Ka rin danin ZOLIANSANGA, Journalist kha a nih ka ring" Emy chuan nelawm zetin a ti a. 

"Engtin nge i hriat" Dorothy chuan a lo ti vat. 

"I chanchin ngaihven bertu tan chuan hriat harsa ni hek lo. In inhmeh ka ti thlawt. In inneih hunah a thlawnin ka chei ang che aw" a lo ti leh siam siam a. 

Dorothy chu a rilru takin a hlim ngei mai. Ni e, a mipa tawn tawhah chuan Zoliansanga tluk hi a la hmu  lo. Amah Dorothy hi zaithiam lar tak a lo nih ve bawk avangin Zoliansanga te nen hian inhmelhriat chhoin thian tha tak an ni a. A ruka a ngaihzawnna hi a rei thawkhat ve viau ta. Amah Zoliansanga pawh hian a haw lem lo niin a hre ve, mahse, inngaihzawnna lam hawiin an inbe rih lem lo. Zaninah hian Zoliansanga nu piancham lawm turin a kal dawn a ni. A zai dawn nghe nghe a, nalh leh mawi taka awm a duh takzet a ni. 

"Han meng teh le.., " Emy aw chuan a rawn ti dat a. A meng ta. A thil hmuh chu a awih lo hial!  A hmel tha lutuk tlat! Make up chu chhah si lo a mawi tawk chauh a inbel. Mahse, a tilang zahawm bakah a titharlam sar mai. A duhthu a va sam si em.. 

"Awiii ka van lawm.. Hetiang hi lawm ka duh chu. Ruata kha chuan min bel chhah mah mah zel a.. " a ti ta hlut a. 

Emy chuan a sam siam pahin, " Ka active thei alawm.. Ruata chuan khawih tur a ngah tho va, i mamawh chang chuan ka inpeih reng ania" a ti a. 

"Emy maw i hming kha" Dorothy chuan a ti leh hnuhnawh a. A lo bu nghat, a nui sâng bawk a. 

"Ka lo call ziah tawh ang che.. mahse, i rate ka la hre si lo va" a ti niah niah a. 

"I tan chuan engpawh ka tithei alawm.. Ka idol i ni ka tih tawh kha.. A thlawn vek in ka tihsak ang che" a ti ta mai. Dorothy a kang awk. Mak a ti tih a hmelah a lang reng mai. 

"Ni em em lo ve, tlem azawng chu kan inpe ve ang chu.. A thlawn ngawt chu ka duh bik lo" a ti ve a. 

"Anih chuan zanriah min la kilpui la a tawk mai" a ti ta a.. 

ZOLIANSANGA… 

"Mama, engkim inpeih tawh maw.. I naute hi khaw nge maw an awm le? " a nu chuan a ti lang lang a. 

"Ka hre bik lo. Nu, hetia tih bung bûng hi eng nge maw a tulna le? " a lo ti nghut. 

"I naute lawm .. An ti laklawh tawh si a nih hi.. I thiannu chu a lo kal thei ang chu tiraw? " anu chuan a lo ti var a. 

Zoliansanga chuan, "Ka beisei.. A phur viau kha maw.. " phur vak lo hian a lo ti ve mai a. 

Zoliansanga hi Journalist lar tak niin, Chennai-ah kum eng nge mawti chhung a zuk inzir hnuah Mizoramah rawn chuang chhuakin a hna hi tha takin a rawn thawk nghal a. Thiamna lamah sang falua lo mah se; a chet dan a professional theih em vangin ngaihsan leh fak a hlawh a. A huaisen bawk nen, A lar ve riau. Pa tè chhe lo tak, taksa inphut mawi tawk tak mai a ni a. Gym a ngainat danah a mak lem lo. A hmel chu a tha hluah hluah han tihtur chi ni lo mah se; a pa riau a. A mitmeng fing zet chu a zahawm hliah hliah. An unau zinga upa ber dawttu niin a u hian pasal a nei tawh a. A nau mipa leh hmeichhia te erawh an la nula tlangval ve. Apa hi Doctor niin, a upa ta deuh a, private clinic te hawngin a la ti ve tlauh tlauh mai. Anu erawh sumdawnna lam khawihin a nu thawhchhuah atang ringawt pawn sum chu hai lut tak an ni. Thlahtu te atanga rethei bakberh an ni lo hrim hrim bawk. 

Hmeichhe lam a ngaihven tehchiam lo, a chhan erawh a awm. A tleirawl chhuah hlawt hian ngaihzawng lungrun tak mai a nei ve a. Kum 2 dawn an inzui hnuah a bialnu chuan mi dang fa a pai ta hlauh mai si!  Rilru na em emin a kiansan ta kha ania. Khatih lai khan a la naupang bawk a, thih mai te a tum hial thin. Mahse, Apa hian a fuih nasa a, phaiah a tir bo ta bawk nen. Eng emaw ti tiin a damkhawchhuak thei ta hram a. A Kum a lo tam chho ve zel a, hmeichhia chu a mutpui fô!  Hmangaihna lamah erawh a tlu lut duh tawh lo. Engtikah emaw hmangaihna dik taka hmangaihtu a la tawng ngei ang chu.. A beisei. 

"Zo.. " rawn ti hliaitu lam chu a va hawi vat. Dorothy a ni. A nalh kher mai. Hmanni a zinnaa a hawnsak bracelet kha a rawn bun ngei bawk. Mitmeng nung sârh hian a rawn melh a. "Min lo hmuah ve tur alawm" a ti no ngher ngher a. 

"Ka la hman lo deuh a.. Sorry" a ti ve mai. Dorothy hian a ngaizawng tih a hriatna a rei tawh. Mutpui satliah atan chuan duhthusam a ni. Mahse, a mutpui anga, a kalsan leh mai dawn si a, a khawngaih ve tlat!  Hmeichhe satliah a ni bik lo va, mi lar a ni ve miau si a. A hming te thlenga hliau thei a nih vangin a fimkhur ve a, thian ramri bak kal pelh a tum lem lo. 

Dorothy chu a titi siam siam a. A mah cheitu fel a tihzia leh thiam a tihzia te a sawi. Ni e, a cheitu hian a chei thiam a ni. A lang nalh takzet. Zoa mit pawh a nghal ru ve tlat. 

Zoliansanga nu Pi Sangpari chu ding chhuakin a piancham lawmpui tura lo kalte chu lawmthu a hrilh a. A la nalh zeih zawih hle. A nu lian bawk a, a zahawm takzet. Dorothy pawh a inbuatsaihna ang chiaha thain a zai thei a. Engkim chu a nih dan tur ang thlap a ni. Zoliansanga pa erawh a la rawn haw lo fô!  A hnathawh hi a laklawh ve fô bawk a, tuman engmah an sawi lem lo. 

VILLA :

Aputea nen thing kit turin an chhuak dun leh a. Hreipui a pu a, a bawp sei thlarh chuan a pen sau pawk pawk a. Ramngaw thelh nuam zet an thlen chuan an ding ta a. 

"Te, thing i hralh leh dawn hunah chuan ka zui ve tawh ang che aw" a ti sar sar a. 

Aputea chuan ngawi rengin thing chu a zai mial mial. An khawl hman ri a ring tha bawk a. An inbe zui ta lem lo. Aputea rilru erawh a buai angreng viau. Dan theih loh hun a la nei ngei anga, khawpui a hmuh chuan a hmeichhiatpui te chetla a hmu lo thei dawn lo. Rualawhna a nei anga, helai ramhnuaiah hian a cheng kumkhua peih dawn miah lo. chu tak chu buaina a ni. 

A tunu chu a melh zauh zauh a. Kum 15 a tling ve tawh a. A taksa a inphutmawi tawkin a inkhaithli thlarh mai. A vun pawh a nu a chhun a, a ngo paw phak mai. Make up a hmang ngai lo chung pawn a hmel chu a thlir ning thei ngai lo. A hnar ngul invuah fuh lutuk te, a mitmeng lian kelkawl, mitmu dum tha zetin a kah en sar te, a hmui vam hiam chhah lek lek te chu.. Khawpui nula ho angin make up te hmang ve nise a va tha chungchuang dawn em.. A hnute pawh a um lian ve viau tawh a, a kawng fek rat leh mawngbawr khal tâlh mai te chu mipa tu emaw sual tak a tawng fuh palh ang tih hlauhthawnawm khawp a ni. A tunu hi a damchhan ang hial a ni tawh. Nupui pawh nei lo vin hei chen a chenpui ta a, a theih chin chinah vemhim zel a duh a ni. A û chanchin a hre ngai lo va, hriat tumna pawh a nei hek lo. A û kha a hua.. A chhan erawh hunin a la hril ang chu.. 

"Teee.. Ka biak che chuuu" a beng bulah a rawn ti vin thak. A phu zawk mai. A thing zaina khawl chu a lo nung tawh hauh lo va, lungawi hmel vak lo va lo melh rengtu a tunu lam chu hawiin, "Eng nge i sawi? " a ti hû a. 

"Saw laia far thing hmunah khan mi pahnih ka hmu.., " a ti ta a. A ding nghal hluai, hlauhthawn hmel takin, "An hmu ve che em? " a ti chung a. 

"Hmu lo aniang, ih, thla an la a" a lo ti mai a. A putea hlauthawng hmel chu mak a lo ti zawk. A putea chu hmanhmawh takin a che sawk sawk a. Thing tan ho chu a phuar khawm zawhah a tunu chu kaiin, in lam a pan pui ta vang vang a. Ngawi rengin a zui ve dat dat ringawt. 

"Pipi, mi ka hmu asin" in chhung a luh chuan a ti hliai a. Api chu a putea ang bawkin a phâwk!  

"Maw.. Tu te nge? ' a lo ti nghal hluai a. 

"Ka hre bik lo. An hmel pawh ka hmu chiang bik lo.. Thla an la a" a ti a. 

"An hmu ve lo che tiraw? " a lo ti ve leh. A mak!  "Hmu lo" a lo ti hmuk. Eng nge maw an hlauhthawn em em ni. 

Zanriah eikhamah an inkhawm leh a, a tawngtai zan a ni nghe nghe. An inkhawm zawhah a roomah lehkhabu chhiar turin a lut leh nghal. A lehkhabu chhiar lai chu mutthilhsan lehin thosilen pawh zar hman lo vin a muhil leh pek. A mutthilh tawh hnuah a pi rawn lutin a rawn mut thattir a, a tunu chu a melh vawng vawng a, eng nge a ngaihtuah tih erawh hriat a ni lo. 

Huntera rum chhur chhur thawmin a tiharh a, thla bial zan a ni bawk a, a tukverh zawn chu a rawn chhun eng ruah mai. A mutchhuak reh duak chu a ngei hle. Huntera lah a rum chhur chhur reng bawk si. A thu chhuak a, a mit a nuai chat chat a. Tukverh lam chu panin parda chu a keu a, pawn lam chu a thlir vang vang. Huntera rum thawm a reh rual chuan mak deuh maiin a room chhung boruak chu a uap ta churh a. A nuna la thleng ngai reng reng lo hlauhna mak tak chuan a tuam ta tlat mai!  Hmanhmawh zetin khumah a mu leh nghal a. Rizai chu pawt chhoin a intuam hlan a. A hawi kual hrek hrek. A room hi a zau em em hran lo va, a chung pawh a hniam angreng. Ramhnuai anih vangin boruak a nuam thin a, mahse, zanin erawh a uap tlat. A room kawngka chu a rawn inhawng riai riai a. Hlimthla ringawt a rawn lang zui zat. Mit pawh khap mang lo vin a lo melh ngawt ngawt a. Hlimthla chu a lian viau, a chenpuite hlimthla niin ua hre lo. A che ta zuk a, a bo leh daih. Mahse, tukverh chu a rawn intheh hawng thuai. A va phu chiang tak.. Thli a rawn thaw lut nghal fua a. A hriatna te chuan amah chauhin pindanah chuan a awm lo tih a rawn hriattir nghal. Awm ve an awm tih a hria, mahse, tu nge tih a hre thei lo. 

A rilruin a tawngtai char char a. Rosary intar kalh chu a han melh thul, A khum bul dawhkantea Bible chu lak tumin a ban a, mahse, a khum hnuai atanga, "Zochhingpui" tia rawn kotu aw a hriat chuan a tawp chawt. A kha a chih a, a tawng chhuak thei lo. "Zochhingpui" a rawn ti fiak leh thak  a. Hmeichhe aw a ni. Khum atang chuan a chhuk thla ngam tawh si lo, muhil ngam bawk si loin a thu tlawk tlawk a. A chhungte hian engmah an hre ve lo mawni le.. 

Tukverh atang chuan hlimthla ringawt a rawn tawlh lut ta zul zul a. A inrin hmain a rak ta tuar tuar mai. A harh leh meuh chuan a chhung ten ngaihtuah hmel takin an lo kil thap. 

"Naute, i tha em?  Eng nge i hmuh? " apu chuan a lo ti var a. 

"Ka.. Ih.. In hmu ve lo maw? " a ti sap a. Hre chhuak thut niawm takin a tho hluai a, "Khum hnuaiah hian mi an awm' a ti nghal tuar. A putea chuan a bih vat. Tumah a hmu si lo. 

"Min ko a ni. Ka hming ngeiin chiang takin min ko" a aw chu a khur deuh a. 

"Naute, mangchhia i mang a nih hmel.. Hahdam rawh.. Engmah a ni lo ve.. A tha vek mai ang" apu chuan a lo ti dam diai a. 

"Aih, hetah hian ka mu duh tawh lo, papu, ka hlau" a ti tap tiau a. Aputean a rawn kuah vat. A khur der der mai. 

"Ka riahpui dawn che alawm. Ka naute duat hi eng thil mahin an tihnat ka phal reng reng lo" a ti sup sup a. 

A putea bulah chuan him tain a inhria nge tui tak chuan a muhil ve leh thei ta mai a. Hlauhna awmzia erawh a hrechiang ta khawp mai. 

SECRET SOCIETY: 

"Emy hi chu kan tihtir thei lo vang.. I hria lawm.. " Eric-a chuan Dr Zira bulah chuan a ti sup a. 

" Mahse, amah aia chhawr tlak leh rintlak kan nei chuang em ni? " a lo ti khauh. 

"Mahse, thil thleng thei kan hria alawm.. Ambasador- nen kan inbia a, ani pawh khan rem a ti chiah lo a ni. Sister Ariana kan chah chhoh mai a ngai maithei ni.. Nizan lamah kha chuan a thlabar viau a. Kha ringawt khan hna a thawk tak tak dawn lo, saw mi te bula a chen chhung chuan" .. Erica aw chu a ring tha viau. 

"Chutak chu lawm.. Emy kan mamawhna chu.. " Dr Zira chuan a ti zawi sup. 

Boruak chu a reh dûk mai. Hmachhawp hautak ru tak an nei tih an hmel landanah a hriat. Engvangin nge Hmeichhe pakhat chungchang chu an khel reng?  Engvanga pawimawh em em nge a nih tak ang?  

Kawngka kik thawm an hriat chuan an lan dan an siam tha sawt sawt a. Emy a rawn lut ta zan zan mai. A nalh leh hle mai. Erica chuan a melh vung vung a, hman hun kha a ngai fô!  Khatihlaia he hmeichhe tana a pawimawh theihzia kha. Tunah erawh a hmelhriat satliah ang chauh a ni tawh si. Thil a tisual tih a hai lo, mahse, a nunah Emy ang ema pawimawh hmeichhia chu pakhat chauh a awm. 

"Kan hlawhtlin hmel e. Min ngaina sawt khawp ania" Emy chuan a ti láng láng a. Hahdam hmel zetin chairah chuan a thu a. 

"I hlawhchham ngai reng reng em ni? " Dr chuan a lo ti zawm zat. Inhrethiam tawn takin an innuih sak a. 

"Mahse, hmanhmawh chung a ngai lo. Kan virpilh palh thei. A hmin zan hunah hna kan tan chauh ang" Dr Zira chuan a tih zawm nghal a. 

"Chutak chu ka hriat ve loh thil a ni. Ka hriat ve phak bak a ni tih ka pawm. Mahse, ka hnathwh chhan hi hriat ka phu ve tawh lo maw? " Emy chuan a lo ti sak a. 

Mipa pahnih chu an inmelh zauh. "Emy, dawhthei takin le.. I hre tep tawh ania. Tuna i hna i zawh hunah hna pakhat i thawk leh anga, chu chu a tawpna a ni tawh ang. Chumi hnuah chuan chair-a thu chungin mi dang i kawk kual ve tawh ang" Dr Zira chuan thutak zet hian a ti ta a. 

"Okay, ka pawm e. Doctor Gosa ka hmuh a ngai a. Ka chhuahsan mai ang che u" tiin Emy chu a tho nghal a. 

A chhuah hnuah, "Sister Ariana chu kan chah chhoh a ngaih lo vang. Emy ngei hian thawk se ka duh" Dr Zira chuan a ti leh a. 

Erica chuan, "I thu thu le.. Kan fimkhur lehzual erawh a ngai dawn anih chu" a ti sup a. 

DOROTHY.. 

Anu in apa hriselna lam a hniam deuh vangin a rawn chah a, Shillongah kar khat lai a zu cham hnuah a rawn haw leh a. Ni e, Shillonga piang leh seilian a ni. Zai ngaina tak niin club-ah te zaiin hlawh chhete a nei ve thin. Chu ringawt chu a duhkhawp lo. Zirna a chawlhsan hnuah nasa zawkin zai lamah a kal ta a. A nu leh paten an phurpui bawk a, Shillongah na ná na chuan a lar thawkhat viau. Mizo hla erawh a sa ngai mang lo. Zan khat club-a a zai haw lam chu mi pakhatin a zui haw ta a. Mizorama awm a nih thu sawiin promote tlak a nihzia leh producer a nih thu te a sawi luam anih kha. Kha putar kha a la hmuh ngai loh mah nise a ring nghal tawp mai. Bakah Mizo ten zaimi an ngaihhlutzia a lo ralkhat hriat ve tawh a, mizo ngei anih bawk avangin a hnampuite zinga tlang tlak chu a thlahlel khawp mai. 

A tukah Agreement sign chûk chûkin a nu leh pa remtihna ngeiin Producer nia insawi chu Mizoramah a zui chho ta kha a nia. A thlenna tur hotel ngaihtuahsak niin recording an nei ta mawlh mawlh mai. Studio lun lem lo tak a ni a,mahse, ngaihthat lohna a nei hran lo. A zaithiam bawk a, recording a neih atanga thla khat lekah a zai chuan Zoram khawvel a rawn tuam chho ta mai!  Amah pawn a awih lo hial anih kha.. A boss Pu Liana chuan a chenna tur flat nuam tak ngaihtuahsakin a khawvel chu a tinuam chho ta zel a. Mahse, mak deuh maiin Pu Liana chu a bo daih! A Assistant Masanga kutah engkim chu a awm ta a. Masanga nen chuan an inngeih thei ta der lo mai a. Tichuan, Pu Liana hnuai atanga chhuakin a kal hrang ta kha a nia. Mahse, a tifuh ta zawk a nih hmel. A hma ai mahin a lar ta zawk a. Sawmna nise a dawng kal zut reng a, Shillongah pawh chhuk hman lèk lo vin Aizawlah a cham bang ta a ni. 

Vawiinah hian Programme a nei a, zan lamah a hritlan lek lek vangin a cancel titih kha a nia, mahse, a ziaawm leh deuh vang leh Zoliansanga tel vena tur a nih avangin a kal leh thei dawn a ni. Zoa hi a vei bur a ni tawp. 

A kawr hak tur a en kual a, a duh ang a hmuh loh vangin Vakiria te biain, a duhzawng a sawi a. An ni hi a wardrope an ni ta ber mai. A make up artist thar Emy lo kal hun a nghak a. A call lawk tawh vangin a rawn thleng har lo turah a ngai. Shillonga a chhuk hma zanah khan zanriah an kil dun anih kha. Khata tang khan Emy chu a ngaina sawt a, thian tia han sawi theih em em tur a la nei lo bawk a, a thian a tan a pawm nghet hmak tawh a ni. Tin, a hausak hmel tlat. Dory hian pawisa a ngaipawimawh hle a, sum a awm chuan tih theih loh awmin a hre ngai lo. Thawk khat lai phei kha chuan hetia a la lar hma daih hian a sum mamawhna vangin mipa pathum lai chu a mutpui hial tawh anih kha. Engkim a changkang thei ang ber neih tum thin mi a ni bawk a, a che na lo thei lo a ni. 

Emy a rawn lut a. Thian pangngai inbiak ang maiin an inbe tawh a ni. Emy anga vun nalh neih ve a chak ru thin. Amah ai fe chuan a upa anga, mahse, vun nalhah a tluk tlat lo. A chhungkaw chanchin a zawt ngai lo va, hriat a tulna pawh a hre hran lo. 

"Zoa chu i hnaih hret hret em? " a mit a hnawih lai chuan a ti sar sar a. 

"Ka hrethiam lo a awmdan hi. Min hlat dan a zawng tlatin ka hria" a lo ti a. 

"I ngaihbel aniang, tih tak takah chuan ani aia tha saw i hmu dawn asin le.. " a ti a

"Nia, mahse, amah saw ka duh sia lawm" Dory chuan a lo ti khauh a. 

Emy chuan nui chungin, " Kan la kherh hrep dawn nia" a ti a. An nui dun hawk hawk mai. 

An inpeih hnuah an chhuak a. An inthen ta rih. 

Tun tum a zai zet chu a zai tha ngang mai. Lawm a hlawh leh hle a. Back stage-ah a fans ten an chang nghûk bawk. A chang chuan a ning lek lek thin. Mahse, hlim hmel put hram hram a ngai bawk si. Lar a zo lo lek lek, hei hi a duhthusam kha a ni si a, a lo nuam ber chuang lo a nih dawn hi. A fans ten thla an lakpui mawlh mawlh lai chuan, Zoliansanga leh a thianpa Jonathana te a va hmu a. 

"Zo, min lo nghak ru aw" a ti a. 

"Kan la haw dawn lo deuh a" tiin a lo chhang. A ngui nghal rawih. Hmeichhe dang a biak leh kawm chu a hre ngai hauh lo naa, an inhnaih thei der lo chu a lungawi thei mawlh lo. A duhzia hi a thup seng meuh lo a, a hrethiam vek tih a hria. A lo duh lo zawk em ni ang?.. 

Chau zetin a khumah chuan a thu a. A phone pawh a lek peih lo. A ding leh hluai a, a thawmhnaw chu hlipin chhuatah a kalsan tawp a, bathroomah lutin shower chuan a inphuh sar sar a. Tlem chuan a harh ta deuh. Bathrobe-a intuam hlanin roomah chuan a tei kual a. 

A mit latu thil a hmu ta tlat. A dressing table ke bula Pyramid lem lo let ngât chu a zuk chhar a, tu ta nge niang le tiin a ngaihtuah a. Emy a ngaibtuah chhuak nghal. A khum bul side table-ah chuan a hung a. A mawi reuh khawp mai. Mu turin a intintuah tan ta a. 

A khum mawng lama mipa ding chu a sang hle. Thawmhnaw dum vekin a inthuam bawk. Hlauh ngaihna pawh a hre lem lo. 

"Dorothy, kan tan hna thawk tawh ang che. Tun atang chuan" a rawn ti thum bul a. 

"Eng hna maw.. Tu nge i nih? " a ti dat dat a. 

"Min la hre mai ang. Ka hmel hi chiang takin en la.. " tiin a rawn kal hnai a. A la hmuh ngai loh mipa hmel tha tak a ni. Zoliansanga nen pawh an inang lek lek mai. Mahse, Zoa ai chuan a lian hret anga, a upa zawk bawkin a ring. 

Kawngka chu a inkhar ri khap a. A mumang ram atangin a rawn harh ve nghal zat. A thu hluai a. A mumang chu a tak tak a ang hlein a hria. Mahniin a khawsa rei tawh a, engmah thil hlauhawm a la tawng ngai lo. Zanina thil thleng kha hlauh tur a nih leh nih loh pawh a hrethiam chuang lo. Mak erawh a ti khawp mai. Muhil leh lawk lo vin a let tawn sek a. Zing ni chhuakin a room tukverh atanga a rawn chhun takah chuan a lo muhil ve leh hlek tih a hre thei. Phur fahran loin a tho chhuak a. A ham bai bai mai. Tui in tumin side table chu a va ban a. A kut a la let leh. Emy thil theihnghilh pyramid lem kha a lo awm ta hauh lo mai!  

A tho vat a, khum hnuai zawng zawng a bih kual.. A hmu lo. A mumang kha a ngaihtuah let leh, rang takin a room kawngka a va khawih. A lo inkalh miah lo. A mut dawnah a kalh chiang si. Hmm.. A mumang a ni lo. Hlauhna chuan a rawn tuam ta hlup hlup a. 

VILLA.. 

Zochhingpuii chuan tun hnaia a pi te khawsazia chu mak ti ru tak chungin a ngaihtuah neuh neuh a. A tet lai ata tawh a lakah an finkhurin a intihnat hlek pawn an ngaihsak nghal chung zel a. Kha tia hman zana hlauhlawpa a awm tak atang phei kha chuan an veng deuh run ni hian a hria. A awm a tinuam lo zo vek. 

"Pipi, thil dik lo a awm em ni? Ti nge hlauthawng hmel in put reng a? " a ti ta thlawt a. 

"Bawihte, thil zawng zawng hi i hriat a la hun rih lo a ni. Ni e, kan hlauthawng a ni. Nangmah lak tumtu te hian chet an rawn la leh tan ta a nih hi. Kan laktir hauh lo vang che" a pi chuan a ti a. 

"Tu ten nge min lak tum a. Sawi chiang teh" tiin a nawr sek sek. An ngawi leh hmak si. A thinin a diar ta lo. 

"Engkim hi ka hre ve duh. Engvangin nge ramhnuaiah kan chen bik?  Engvangin nge mihring dang ka hmuh ve theih loh? Khaw nge ka nu leh pa te.. Ka hre vek duh. Sawi rawh u" a ti ta tuar tuar a. A putea chuan a rawn chelh bet, a kut chu a lo thing thla nawlh a. 

"Keimah ngeiin thudik hi ka zawng ve tawh ang.. " a ti ram hmak a. 

"Mama, engkim sawi a hun tain ka hria.. " apu chuan aputea melhin a ti ta sup a. 

Aputea chuan Zochhingpuii melh vawng vawng chungin, "Ka naute, he thurûk  hi i damchhungin i hriat ka phal dawn lo.. " a ti zawi raih a. 

"Anih chuan, nang leh kei chu kan indo a ngai anih chu.. " Zochhingpuii chuan mitmeng de sawr sawr hian a ti ta a. 

(Ka rawn dah theih hun tur hi ka sawi chat chat thei lo va. Regular chu ka tum ang a. Mahse, july ah kan exam dawn vangin han khaihlak hlek ka nei maithei. Min lo hrethiam dawn u nia)  😍😍