Ralte villa

RÂLTE VILLA..! 

Ziaktu: Toni Râlte

Khawlian khua chu a hming ang lo takin a lian hran lo. Mahse, a khaw thleng erawh a nuam ve viau, a boruak a zo vah mai a. Fate seilenna atan pawh a tha tho mai. An khaw zirna sang ber Middle Schoolah kan pa an transfer vangin kan chhungkuain kan zuk thleng thla ve râwih kha a nia. Kan pa hi kan khaw Middle school-a thawk reng thin a ni a, mahse, party lam inchirhthehna siper a dawng ve tlat!  Hèktu an awm si a. Kan la kal ngai reng reng lohna khuaah kan awm a ngai ta a ni. Ka vui ru viau naa, kan pa hi pa tha duam mai, nghet tlut mai a ni roh a. A vui duh mang hlek lo. Fapa pahnih kan nei a, Aizawla school kaltira, hostela dah mai ka duh laiin a remti leh tlat lo. 

"Tette atanga hostela dah chu an puitlin hunah nu leh pa hmangaihna an nei beitham duh" a ti deuh tlat a. Kan hmuh phaka awmtir kha a duh ni hmiang ka tia. Kan hruai ve ta a ni. 

Vcp inah kan innghat phawt a, in luah tur kan melh tan ta a. A váng hrep mai. An school piah lawkah chuan fál angreng takah in lian pangngai tak a awm a. A ruah leh ruah loh kan pa chuan a han zawt a, a ruah thu an sawi tak nain, an sawi nawi deuh zel mai a. 

"Nikum kumtir lam khan pem thar nupa tuak khat hian an rawn luah a, thla khat pawh awm tling lo vin an chhuak leh ta mai a. A chhan erawh an sawi lo" Vcp chuan a ti chuar chuar a. 

Amah bawh chuan, "Chuan an chhuah atanga thla 3 hnuah kan khaw thenawm helama huan nei te hian riah nan an rawn hmang thin a, kar khat pawh an awm tling lo. Thawm neuh neuh an hriat thu leh hmuh eng emaw an neih thu an sawi. A awmna saw a fal ve bawk nen, tisawn luah lovin a awm ta reng mai a ni. " a ti leh a. 

Kan pa bengverh zawng tak a ni teh chèk aniang chu a zawt dilchhut khawp mai. "Tu in nge ni hrim hrim, a satu te chu he khuaah an awm tawh lo em ni? " a ti a. 

"A neitu, a satu hi Ralliana Ralte a ni a, saw a inah pawh Rálte villa tih a tar ve ngat saw.  Huan puitling leh khanghu hmun a nei a, kan khuaa hausa ber a ni thin. An chhungkuain an luah thin, an sak tirh chuan a mawi si a, mikhual lo zin te pawh hian an tlawh fo thin.  A enkawl peih bawk a, a kawt zawl te saw a fai hliau thin. Mahse, an luah atanga kum 2naah an fanu upa ber nula tawh hi a chin hriat lohin a bo thut mai a. Khawtlangin kan zawng nasa khawp mai. Mahse, hmuh tur reng a awm lo. Ni 7 kan zawn hnuah kan vui ta tawp mai a ni. An fanu bo atanga kum chanve hnu velah engmah sawi lo vin an pem ta ringawt mai a ni. An pem dawn chuan ka û hi VCP a nih lai a ni a, a in chu vc kutah a dah thu leh luah duh an awm pawn man chawi lo va lo luahtir turin a chah thlap a ni. Chu chu kum 20 liamta kha a ni tawh a, a in chu luah tu neuh neuh nei thin mah se; an luah rei thei thlawt lo a ni ber. 

Tin, a lehlamah luahtu an awm hian thawm that ngai lai an thawm tha ve vek thin a, tisawn a la ding ve ta reng mai a ni. Tun hnaia luahtu te chu ka sawi tawh ang kha a ni mai.. " Vcp chuan a ti dap dap a. Kan pa hi pa huaisen leh rorum ve tak a ni a, ka thlamuanpui viau thin. Ramhuai leh thilmak lam chanchin ngaihven peih deuh, he lam chanchin buaipui phur thei zet a ni a. Chu in pawh chu luah luh a duh dawn tih ka hre nghal. Kei erawh ka phur tehchiam lo. A fál reuh si a, ka derthawng ve ropui si. 

Mahse, pa berin luah luh a duh miau si a. Ka hnial tung duh ta lo. Kan luah luh hmain kan va tifaiin thawm that ngai lai te kan va thawmtha phawt a. A in chu thinga sak niin, a thing hman chu a tha khawp anih ka ring, a la mawih lem lo khawp. A chhawng a nih ve vangin kan pali ringawt chuan kan thawl angreng viau. In hnuai lam chu choka leh sitting room atan kan hmang a, bungrua pawh a lo awm nual. Kan pa in Aizawl lamah chakkhai a han lam khawm a, thutthlengte pawh a rawn phur haw nghal a. Kan inrem mawi ve ta hle mai. In chung lam chu mutna a tan kan hmang thung. 

Kan fate pahnih hi mize inang lo zet an ni a, a upa zawk Tetea  hi harh leh ninhlei zet, awm hle hle thei lo khawpa tha za a ni. Kum 10-na a hmang ve mek tawh a. A nau Bawihpuia erawh ze zawi zet, awm mual mual chi, tawng pawh muang chet chut zet a ni thung. Kum 7-na a hmang ve mek bawk. Nau hi ka la pai leh ta lo, ka indang pawh a ni hran lo. Fanu erawh ka awt ve viau. Kan pa hi Ramropuia a ni a, Ropui tiin an ko mai thin. Pa lian lam, hang lek lek a ni a. A tlangval lai chuan 'A pa e' an tih ruk ve thin kha a nia. Kum 4 kan inzui hnuah kan innei.  Kum 8 laiin kan inthlau thung. Min duat ve reuh zèk a, ka innghahna a ni chiang khawp mai. Kei erawh nu tè lam, ze zawi lek lek, thinchhe ve hlek hlek zet ka ni. Kan pa hian min dawhthei thin khawp mai. 

In chu kan luah lut ve ta poh chu a nia. Kan fate erawh chuan nuam an ti phian. An unau an inkawmngeih tho va, thian kawm tam vak lo mah se, pawi ka ti rih lem lo. Khawlian Primary Schoolah kan admit ve a, a û zawkin class 4 zirin, a nau erawh a bil deuh hlek a, class 2 a zir ve mek thung. Zan khatna chu tui takin kan muhil ta a, Tetea intipa ve khanglang chuan room hran a ngiat tlat pek a. A nau nen kan room depah an mu ve a ni. 

Kar khat lai kan awm tling ta a. Hrehawm tihna ka la nei lem lo. Kan in atanga pen 100 velah school a awm a, kan pa pawh chhunah a rawn chawl mai thin. Chu bak chu thenawm kan nei lem lo. Zanah phei chuan kan pa pawh len chhuah ka phal lo. Kan nufa ringawt chuan a nuam lo ve bawk nen, ani pawh a leng bik lo. 

"Nuuu, A û lu a thi nasa lutuk" Bawihpuia a rawn tlan lut. Ani leh ni lo angin a rawn hmanhmawh ve ngang mai. Ka purunsen chan lai chu ka dah vat a, apa lah dawrah a kal daih si. A û chu kan in piah deuha hmawng kung hnuaiah a lu dawmin a lo ding vung vung a. 

"Ti nge? Eng tin nge i tih i lu hi " ka ti chul a. A chhip bawr lai tak chu a thi tuam tuam a, ka hup vat a, ka kai phei ta a. A tap miah lo. Ani hi zawng a pa fapa kha a ni miau a, Damdawi ka dap vat vat a, a tuamna tur nen. "Û,  a na em? Ti nge i van tap lo" Bawihpuia chuan a lo ti ve sek. Ka nuih te pawh a za deuh. A lu chu a pawp a lo nia, a ngawi ngal reng si. Apa a lo haw a, a fapa chu eng nge a chhan tih a zawt ta a. 

"Ka hre bik lo, hmawng bulah Bawihpuia nen kan inmarble a, chuan min lo vawm tawp.. Tu nge pawh ka hre bik lo" a beng khawih chung chuan  a ti niah niah a. Apa nen kan inmelh zauh. A dawt sawi apianga a beng a khawih thin vangin. 

"Sawi tha rawh. Tu in nge vawm che? " apa aia vinin ka ti that a. Mitmeng tîm deuh dai hian min melh a, "Ih, hmeichhe pakhat ania.. Pitar" a ti ta a. Apa chu hmawng kung bulah a va phei vut a, mahse, a rawn let leh vat. Tumah a va hmu lo aniang. An unau chu ka bualfai nghal a, Tetea ngawichawi ta lutuk chu a lu nat vang a nih ka ring ringawt. Mahse, ni danga hliam a neih pawn a mu a nih ngawt loh chuan, a ninhlei kal reng tho zel thin sia. Mak tihna erawh ka nei deuh. 

Zanriah kan ei a, a tawng chuang lo. Bawihpuia zawk chu a tawng chut chut a, Apa pawn Tetea chu a melh zauh zauh mai. Tv kan en ho a, Bawihpuia chu a muhil leh ta mai. Tetea erawh a meng kar. An infiam chau hi an muhil vat thin kha a nia. Zanin erawh a lu chuan a tur deuh mawni aw ka tia, "Tea, nachhawkna hi ei rawh aw. A tur ang che" ka ti a. A ei ve mai. 

"Nu, in roomah ka mu duh" a ti ta a. A pangchang angah ka la ngaih luihsak tho. Kan khum a zau tawk loh vangin Apa chu an roomah a mu a, keini nufa kan muho ta zawk a. 

"Nu, thawnthu sawi la" kan mut hnuah a ti a. A nau erawh a muhil sák sák tawh.. 

Mauruangi ka sawi leh dawn a, "Kha chu a ninawm tawh. Ramhuai lam sawi rawh" a ti vat a. Ramhuai sawi tur ka hriat loh thu ka hrilh a, "Nih chuan lehkhabu chhiar la" a ti lehzel. Ka mut a chhuak ve angreng tawh bawk si, buaithlak thin. Naupang thawnthu apain a rawn lei teuh zing ami chu ka la a, ka chhiar ta a. Ka inchhiar muhil zui ta daih. Ani pawh a muhil ve tho aniang, zan laiah, "Nu, tho teh. Ka zun a chhuak ee" a ti tiah tiah a. Meng chiang mang hlei lo vin ka kai a, in chungah hian kan pa in phuahchawp deuhin toilet a siam a, a tha ve viau mai. Kan va zung ta a. Thlang lama awm a ni a, thla chu a eng viau. Thlang lama thing sang pui pui chu a zun pah chuan a thlir vung vung a, "I zung zo tawh em? " ka ti a. A rei hrat a ni. 

"Nu, i hmu ve em? " khum kan pan lai chuan a ti sep a. 

"Eng chu maw? " ka ti hû. 

"Kha nu kha.. Pitar kha" a ti a. Ka tim sawk. A mitmeng buai nak chu ka melh reng a, "Kha  pitar kha maw, khu laia huan zau deuh kha i hria em? Khami enkawltu kha a nia" ka ti ta ngawt a. Ka fapa chuan a hlau tih ka hai bik si lo a ni. Ngaihtha tak chuan a mu ve leh ta mai a. Kei erawh ka harh kur thung. He in luahtu te tawn ang chu kan tawng chho ve dawn niin ka ngai a, kan pa vang vek. 

A tuk lamah erawh Tetea pawh a harh tan leh tawh a, school erawh chawl mai se ka tih vangin a kal lo va, a nau pawh a u tel lo chuan nuam ti hek lo. A chawl ve ta ringawt. An unauin in chhungah an infiam a, pawn chhuah erawh ka phal tawh lo. Kan pa a lo haw a, eitur ka lo siam a. Vawkte lak a tum thu a sawi a. Engmah ka ti chuang lo bawk a, a remchang khawp ang. Chawhnu an rawn haw hma a, vawk in tur ren a zuk sat a, Eirawng ka bawl laiin, "Nu, bawihpuia saw a tap vak vak mai. Ka vel lo ania aw" Tetea a rawn tlan lut. Ka buai laiin an lo chhuak leh daih a lo ni. Ka va tlan chhuak a, hmawng hnuaiah bawk an lo awm leh. Bawihpuia chu a thu sawp niaih a, a tap hliam hliam mai. Ka pawm lut a, a u ai hi chuan pangchang tak a ni. 

"Tete, i hau a mi? Hau lo la a tap ringawt lo vang. Engtin nge i tih?"  Ka ti a. 

"Ka hau lo reng reng, pipu suih ang kan tia, hrui kan zawn laiin a rawn tap tawp anih kha… " a ti ve tán tân a. A tang na ve si. A nau lah a la tap hliam hliam si. Apa a rawn thleng, "I û in a hau che mi? " a ti a, a lu a thing nar nar. "Ti nge i tah si a? " ka lo ti a. 

"Ih, a u kha pitar pakhatin min chhiat khum vak vak a nih kha" a ti leh boh boh a. Apa a tlan chhuak nghal, pitar teivet pawh chu a.. 

Kan awmtirh atang khan Kohhran kan bel ve chat a, kan pa pawh pavalai pawlah a theih ang angin a inhmang ve nghal a. Zaninah an fehchhuahnaah hruaitu atan an lo ruat ve kawkalh a. Kal lo turin ka ti ngam chiah si lo. Ka thla a muang lo ru khawp mai. Kan nufain tv kan en a, lehkha pawh an zir ta lo mai. Bawihpuia a muhil leh tawh. Tetea nen vai film kan en a, rei kan en hmain ani pawh a muhil ve leh ta mai. In chunga ka fate nena hah mut chu ka hreh riau. Kan pa lah a rei ropui si. A tlai ve zel bawk nen, ka fate chu ka thiar chho a, kei pawh intifaiin ka mu ve ta a. 

Ka muhil tan siar siar tihin kan pa lo haw thawm ni ngeiin ka hria, kawngkapui a hawng a. In hnuaiah chuan a tei vel niin ka hria. A lo chhoh ve mai ringin ka lo chhing leh daih. Mahse, ka zun chhuakin min tiharh a, ka va zung a, kan pa thawm ka hre nghal. Kawngkhar a hawng thawm leh a kalh ri rak ka hria. Hlauhna pawh ka la nei lem lo. A lo chho nghal a. 

. "kan rei ta phian a, kan banah kan han titi leh alawm mawle" inthiam loh hmel aw deuh hian a ti a. 

"Nichin khan i lo haw tawh maw ka tia" ka lo ti a. 

"Ka lo haw ve chiah" a ti nghut a. Ka mut leh hnu chuan ka ngaihtuah zui a. Mak ka ti ta riau. Kan pa lo haw hmaa lo lut kha tu nge ni ta ang?  A lo lut ngei si. In hnuaia a vei vel thawm pawh ka hriat ngei kha le.. Zan dangah chuan a chhuah ve chhunah pawh darkar khat hnu lekah te a lo haw a, kan lo la mu ngai lo bawk. Zaninah erawh a lo haw har si a, kan mutsan ta ringawt kha a nia. Mak ka ti telh telh. 

Zing lam dar 3 bawr vel a ni maithei, kan choka bungbel chu a ri ta rum rum mai a; ka harh kâwk mai. Thawm chu a reh leh nghal dûk a, mahse, sitting room-a ke khawl kan hun chu a ri ta cher cher mai. Thil thui thawm ang chiah niin ka hria. Ka hlau ta riau mai. Kan pa lah room lehlamah muin a hnar kuk kuk si. Ka meng kar reng a, khawl ri chu a tawp thut a. In chung panna kailawn chu a rawn ri ta thlep thlep mai. Thawh lawka kan pa va kaihthawh chu ka duh, mahse, ka tiril a khur nasa lutuk, ka ngam ngang lo. Ka thaw ri pawh a ring ka ti hial zawk. Ngawi rengin rizai hnuaiah ka ngaithla ta kar a. A rawn pen chho zel a, in chung chhuatah chuan a vei kual leh ta a. Almira leh dressing table te kan hung ve a, roomah chuan khum bak kan hung lo. A lian lo bawk a. Ka hriat danin dressing table hmaah chuan dingin ka make up chu a khawih niin ka hria. Ka ngaihruatna pawh a ni maithei. Va en turin ka huaisen tawk tlat si lo. Chutah room lehlama kan pa mutna kawngka chik ri tâwt chu ka hre zui ta nghal a. Au vak ka chak, Kan pa hnar ri chu a tawp hmak lehnghal. A harh ve ni turah ka ngai hman a, mahse, thawm a nei si lo. 

Kan in daidanna bang plywood chu a zut ri hrawih hrawih a, ka insum thei ta ngang lo. Ka rak ta thawt a. Bawihpuia a rawn tap chhuak nghal hlawp hlawp.  Ka rak thawt rual khan a ri phurh a, thawm a reh nghal daih. Kan pa chuan thophang aw zet hian, " Bawihi,.. Eng nge ni ta" a rawn ti a. 

"Lo phei teh" ka ti nghal thawt. Muangchangin a rawn phei ta a. 

"He tah hian mu ve mai rawh" ka ti ta tawp. A chepa chep chuan kan inhnawh ta a. A chhan hriat a chak bawk a. Bawihpuia ka chul mut hnuah zawite tein ka thil hriat ho chu ka hrilh ta a. 

.. "Ti nge min kaihthawh loh" a ti. 

"Ka ngam teuh lo" ka lo ti hmak. 

"Naktukah partition wall hi thiat la, room khatah mu vek tawh ang u" ka ti zui a. Kan tawng tawh lo. Pasal bula mut takah chuan ka thla a muang ta deuh nge ka muhil ve leh ta a. Ka harh chuan dar 7 a lo pel tawh. Kan pa felzia hi chu aw, mut ka hmu tha lo tih a hriat vang a ni ngei ang, eirawng alo bawl vek a. Bawihpuia te tiffin tur pawh a lo siam thlap. An school hi a hla deuh a, tiffin kan paitir thin. 

"Nangmahin i awm hlau em? " a ti a. 

. "Chhunah chuan hlau bik lo ve" ka ti naa ka awm a nuam chiah lo. 

"Chawhnu kan chawl dawn alawm.. Ka lo haw vat ang" a ti a. An pafa inzui chhuak lai chu ka thlir liam a. Thawmhnaw suk tur ka la khawm a. Kan in bula tuizem lian tak bulah chuan ka su ta a. Nizan thil thleng erawh ngaihtuah loh hram hram ka tum. Mihring nge ramhuai a nih ang aw… kawngka kan kalh lo tih a hria a ni ngei ang. Ka rin danin kan pa lo haw hmaa a lo luh khan a biru anga, kan mutthilh tawh hnuah a che anih ka ring. Mahse, thil ruk tum nise engmah a ru chuang si lo. Ka bo telh telh mai. Thawmhnaw ka zar lai chuan hmawng kunga sava fu chu an hram chul a, mak tak maiin boruak chu a uap nghal churh bawk. In chhungah ka lut ta vat a. Kareii!  Ka rak tuar.. Ka chhuat nawhfaiah chuan ke thla ringawt hi in chung panna kailawn bul thleng a awm phei zui mai. A langchiang nasa mai si. Ka ke hniak a ni der si lo. Khaw en lai a ni bawk a, chiái loh hram tumin chemte ka va la a, insehruh chungin in chung chu ka pan chho ta them them mai. Tumah ka hmu hauh lo. Ke hniak erawh a lo awm leh a, kan nupa roomah lutin thlang lam tukverh bulah a tawp chat. Tukverhah chuan ka zu dak a, engmah hmuh tur a awm lo. Rei awm lo vin in hnuaiah ka chhuk ta vat a. Hniak erwh kan pain hmu ve se ka duh vangin ka tifai duh rih lo. 

A rawn haw kawngkaa a din lai chuan, ka entir ta a. Mak a ti ve hle. A chhui ve ta zel a. Kan nupa roomah a chhui lut ve tho. 

"Mihring tu emaw hian min tihthaih nan an ti der mai mai aniang" a ti mai a. Ka awih der si lo. Room inpindanna chu a thiat ta a. A harsa lem lo bawk nen, a zawhah kan nupain vawk in tue chu kan rel dun leh a. 

Ka fate an lo bang a, engmah kan sawi zui lo. Tetea hi thil a hrethiam ve tan tawh a. Sawi vak chi pawh a ni lo. Zanriah kan ei a, "Nu, hei hi a hing" tiin chaw ei hma lawka ka bai thar, maian chu a rawn nawr phei a. Ka lo hnim vat. A hing lo, mahse, a rimtui lo. A rim chu ka sawi thiam chiah lo, a thang nghur mai. Kan ka pa ka melh a, engmah a sawi lo. Engkim chu a mak. Maian ka bai zawh lawk khan in chungah ka fate inthlakna tur ka han la kha a nia. Khami kar bak kha khawiahmah ka kalsawn lo. Engtin nge ka maian bai chu a uih theih… 

Zanah kan pa a chhuak tawh dawn lo va, ka thlamuang. Ka fate lehkha ka zirpui a. Ani erawh tv a en. Bawihpuia chuan paruk hmun leh pasarih hmun a kai a, Tetea erawh chuan mathematics tho a chawk a. Thlanglam tukverh hnungchhawn zawngin ka thu a, bawihpuia rawn kai chuan tukverh lam a hawi thung. A sawi boh boh a, a tawng a sak em vang hian ka lo hah lek lek thin. 

"Ehhee… nuuu.. Saw " a ti ta phut. A mit chuan tukverh lam a hawi a. Ka va lehhawi ve, parda ka la zar lo va, pawn lam chu a hmuh theih deuh. Tukverh piah lawka tengtere kung ah chuan eng emawni hi a lawn chho zawt zawt a. Chu chu Bawihpuia thil hmuh chu a ni. Kan pa ka ko chul a, mahse, a bo hman. Mihring chu a ang tho naa ramsa eng emaw tak pawh a ni maithei. Ka la hlau tehchiam lo. Kan mu ta a. Bawihpuia te pawh an khumah an mu tawh a. Room khat vek a ni tawh bawk a, an hlau lem lo. 

Kan pa a hnar leh sûk sûk tawh. Muhil hma thei si. Ka ning. Kei erawh mawlhtu awm ang hrimin ka meng leh kar  tawh a. Eng emaw tak beisei ka nei niin ka hria. Thli a rawn thaw vuk vûk a, kan in bulah thing a awm nual vangin a thawm pawh a na  viau. Boruak erawh a uap churh thung. 

Vawi leh khatah tukverh chu a rawn inhawng thuai a, ka phu chiang kher mai. Pawnlam chu a thaw fur fur ngei mai. Hlau chunh chungin ka va khar a, men pawh ka meng tha ngam lo. Ka mu leh chiah tihin kan piah lawk hmawng kung atanga rawn ri chhuak niin ka hria, thla ai thawm a rawn ri ta mai!  Kan pa ka tlawh pawp. Harh thei hek lo. A rawn harh hlawl, thla ai thawm a reh hmak. Mak ka ti nasa mai. Kha thla kha hmeichhe aw niin ka hria, a tap ruai ruai a, "Min pui ruuu" tih bak a sawi erawh ka hre lo. Ka thauah min man a, ka khur hleuh hleuh mai. Kan pa lah chuan a hre ve hman si lo va, awih loh hreh si, awih hreh siin a awm. Min rawn kuah thawk a, kei pawh tlem chuan ka thla a muang ta deuh. Ka lo muhil ve ta daih a. 

Zing karah chawhmeh an rawn zuar hlauh, va bazar ngai lo vin. A tihzia tak tak a ni. Ka hriat ngai erawh an ni chiah lo. Pahnih an ni a, ka dawr nual a, an lawm ve hmel hle mai. 

"Nizan thli kha a na sia, in chhia te a awm lo maw? " ka ti a,. An hawi phawk angreng. 

"Thli a tleh mi? " tiin an inmelh tawn a. "A tleh awm reng reng kan hre lo. Khua pawh a that em kha" an ti ta mai a. An chhuak zui nghal mai bawk si. Ka hamhaih hle. Kan pa bulah ka sawi a, "He tah chuah a tleh aniang" a ti ringawt. Inrinni a ni bawk a, tukthuan ei kham atangin vawk in a sa nghal. Ka pui ve zeuh zeuh bawk a. Bawihpuia te erawh apa vawk in sakna bul lawkah an inkhualtelem a. An unau hian an tlei ve hret hret ania. 

Zan a lo thleng leh ta. Ka huphurh ru viau. Chhung inkhawm kan hmang a. Zanin chu kan vaiin tv kan en. Crime patrol kan en nghe nghe. Dar 8 bawr velah kan tv chu a mur cher cher a, a thim ta hmiah. Curent a rawn thim ve nghal zat. Solar plate kan lei a, kan rinrawl ber. ani nghe nghe. Mahse, a eng thei tlat lo, a low han ti dawn ila, vawiinah ni a sa tha a, en loh na chhan tur a awm lo. A chhia aniang. Bati lah pakhat chiah kan la nei zui. Mu turin kan inzui chho ta ngawt a. Thim hnuaia mut hi ka thiam bawk si lo. 

A lum em em lehnghal. Rizai kan si peih chang chang a ni mai. Ka mumangah kan in piaha hmawng kung hnuaiah khan ka lo ding a, khua a dur khuih khuih a, chhum a zing bawk. Ruah mal hraw zet zet a rawn tla fuap fuap a, Bawihpuia te hi ka lo au vak vak mai. Ruah chuan min rawn nan huh tan a, vawt ka ti tan. Ka kal sawn thei der si lo. Mangang takin ruah chu ka lo do char char a, vawt ka ti lutuk chu ka khur ta hlak hlak a.. Ka harh zui nghal. Ka khawng titih. Au chhuah ka tum a, ka kha a chih, ka au thei lo. Ka harh vek tawh si.. Engvanga chutianga awm chu nge ka nih.. 

Kan rizai chu khum mawngah a hlawm tel a, ka pyzama hak lai chu ka khup thleng vel hian a lo inhlim chho vek a, ka kawr a inhlim bawk, ka dul thuar vel chu a huh dup a. Ka chawn pawh tuiin a far fep fep ang hian a awm. Ka tho vat a, ka in enkual, tumah ka hmu si lo, kan pa kaihthawh em chu ka hreh si. A va hrehawm tak em.. Hmuh theih si loh, thawm hriat theih si.. A hlauhawm dan a nep miah lo. 

Zinga Bawihpuia lo tho chuan a û satzia a rawn sawi a. Ka va en nghal vat, a pang a lo sa vur mai. Hlauthawng takin ka kaitho a, a muhil nge a kaih pawh ka hrethiam lo. Kan pa pawh a rawn lang ve nghal zat a. Tetea chu a harh hleithei ta mai lo, nachhawkna ka eitir a, a muhil char char ni maiin ka hria. Khawm pawh ka inkhawm ve ta lo, apa leh Bawihpuia an inkhawm. Eng a an theih loh chuan chawhnu lamah khaw thenawm PHC-a kalpui mai ka rilruk a. Ka vil chawt mai. Apa te lo haw hnu lawkah a rawn luak ta vak a, a luak chu a rimchhe ngei mai. A ek chhuah thu a sawi a, ka va hruai a, a ek pawh rimchhe tak a ni. Mihring tawih rim a nam. A pum lam fel lo anih ka ring deuh a, pum damdawi kan kawl ang angte ka pe a. Apa  nen kan inráwn a, PHC- a hruai mai chu kan titlu ta a. Mahse, kal tura kan insiam lai chuan, "Nu, ka dam tawh alawm" a rawn ti ta hlawl a. A meng fiah em em lehnghal. 

A pang ka dek a, a lo dai diak bawk si. Zanin ngaichang leh phawt mai ang tiin kan kal ta lo phawt a. Chaw pawh a rawn ei ve thei a, kan rin aia tam a ei!  Vawksa te chu a thau ei ngai hlei lo kha a thau thau a thlang a, a hmawm hmak hmak mai a. A khawsik râwp anih kan ring ringawt. Zanah erawh ka bulah a mu a, apa leh Bawihpuia an mu thung. 

Kan mut hma vangin dar 11 bawr velah ka harh a. Tetea chu a lo mu ta hauh lo mai!  Mangang zetin ka tho a, a zung anih ringin toilet ka va en nghal. A awm si lo, Kan pa ka kaitho a, kan pahnih chuan kan zawng ta a. Ka tiril hi a khur nasa mai. Kan pa pawh a mangan hmel kher lutuk. In chhungah kan hmu mai si lo, kawngkapui chu a in kalh loh vangin hmanhmawh zetin pawnah kan tlan chhuak a, Hmawng hnuaia kan fapa ding chu kan va hmu ta. 

Ka kuah chawt a, chechang miah lo vin hmawng kung chu a thlir doh dah ringawt. A phun sep sep a, eng nge a sawi phei chu ka hre lo. Apa nen chuan kan pheipui ta nghal a. Kan zawhna chu pakhatmah a chhang lo. Mutmu pawh tuah tha hman lek lo vin ka vil ta chawt a. A hma zana mut that loh nen ka mit a thial urh mai. Zing lamah ka lo chhing sek a, Bawihpuia tap thawmin min tiharh. In hnuaiah chuan ka zuk chhuk a, Kan pa leh Tetea chu an lo indinchilh ran mai. 

"Engvangin nge i nau i velh.. Eng nge a chhan? " tiin a lo zawt mek a. Bawihpuia chuan tap chungin min lo pan, a ban dinglam chu a kut veilamin a chawi a, a na tih ka hrethiam. Ka lo pawm a, "Ka ban a herh vak a, nu, a tliak aniang. A na lutuk" a ti tap tuau a. A ban chu ka'n khawih vel a,  na a ti ngang mai si. 

Apa leh Tetea te lam chu ka va en a, Kan pa chuan a lo la zawt ngat ngat. A thinrim hmel viau lehnghal. 

"Ka duh leh ka vel ang, ka thu thu" Tetea chuan a ti ta mai a. Vawikhatmah hetiang hian a nu leh pa min la chhang ngai lo. A nau hi a duat em em a, a vel ngai mang lo bawk. Apa chuan a chalah a pen lawlh a, a tap lo. Luhlul zetin in chungah a chho daih. A chezia chu a mak ka ti. Kan pa nen pawh kan inmelh reng ringawt. Tukthuan pawh a ei duh lo, school kal a duh hek lo. A nau lah a u tel lo chuan a kal duh ngai si lo. Kan han inhrem a, awmzia a awm vak lo. Kan fapa chu a danglam tlat. A tawng duh lo va, a en ngai a en reng ringawt. A khawsik khan a thluak te hi a lo khawih em mawni dawn le.. 

Bawihpuia chu ka bulah a tâp chawt a, puan ka thui leh a.. Tetea erawh in chungah a awm. Thil ri thuai thawm ka hria a, hmanhmawh takin in chungah ka tlan chho nghal. Awi leh!  Kan Almira chu a lo let hawl mai nia! A inkalh avangin engmah chu a tla lo. Engtin nge a tluk ringawt theih? Almira bulah chuan Tetea chu a ding ngal bawk. Hnuailam a bih tlat. Chutiang Almira lian leh a chhunga thil awm bawk si chu ka chawi kang zo awzawng lo. Tetea hnenah chuan, "Engtin nge a tluk theih? " ka ti a. Ka aw pawh a nem hran lo. 

"Ka namtlu" a ti mawl tawp. Ka fapa chu ka tih ru ta tlat. Hnuailam bih ngur chungin in hnuaiah a chhuk a, pawnah chhuakin hmawng thing hnuaiah a va thu ta daih a. Apa lo hawn hnuin Almira chu kan dah tha ta a. Apa pawn dik lo chu a awm a ni a ti ve. Kan fapa chu a danglam em em si a. Zanriah pawh a ei duh ta lo. Biakin min chhang duh si lo. Chaw ei khamah pawh in chungah a chho nalh a, a han tawm tlawk tlawk. Bawihpuia lahin a û chu a hlau tlat tawh si. Kan mangang ru ta viau. 

Mu tura kan han chhoh chuan, a noteah thil eng emaw a lo ziak a, ka va en nák chuan, mi lem rapthlak pui pui a lo siam nia!  Nula niawm tak an vit lai te, thisen nena a tlu reng lai te.. Chemte lem ringawt te.. Thinrim zetin ka pawtthla a, "Mu rawh" ka ti vin thak. 

A mu ve mai. Chep zetin khum pakhatah kan inhnawh. Zan dang ang lo takin ka muhil tui zèk, mahse, in hnuaia thleng paih darh niawm tak thawm chuan min tiharh, kan pa a lo harh ve chiah, Tetea a awm lo. Hmanhmawh zetin kan chhuk a, tuikhawihna bulah a lo ding ngawi reng a, thleng leh fian te chu a lo darh nuaih!  A mit chu a sen rám a, Tetea a ang thlawt lo. Ka fapa duatlai chu engin nge tibuai ta ang le?! Ka va kuah a, "Bawihte, engtin nge i awm? " ka ti a. 

Hmai zangthal há hian min rawn melh chho, a mitmeng chu a rapawm lutuk. Min nam kiang dawrh a, a chakzia chu a mak!  Apa in a lo chelh vat, "Min awmtir mai mai rawh u" a ti tuar a. Amah atanga chhuak a ni lo chiang. Tibuaitu a nei.. Ka fapa hian. 

Tlaivar zakin apa nen kan veng ta a. A tukah Pastor a zu ko va, Kohhran Upa pathum nen an lo kal. A awmdan te kan han sawi a. 

"In inluah vang hi a nih ka ring" upa pakhat chuan a ti halh a. 

"Engpawhnise, tawngtaina nei phawt teh ang u" Pastor chuan a ti ta a. Kan zavaiin Tetea chu kan kil bial laih a, kan theihtawpin kan tawngtai ta a. Kan tawngtai zawh chuan tui zetin a lo muhil chiah chiah. A hmel pawh a hmaa dáng lip lep leh tla dâwk kha a ni tawh lo. Chawp leh chilha a hmel rawn danglam leh rawn tha leh ta chu mak ka ti takzet a ni. 

Thingpui te in in an thu khawmuang ve a. Upa Ngura chuan, "Ralliana fanu bo a tang khan he in hian sawi neuh neuh a kai tlat mai a. A theih chuan insawn rang ula ka duh ngawt mai. Naupang thanlen nan pawh a tha lo" a ti a. Kan pa ka va melh, a lo thu ngawi kur. 

"Ni e mawle, Khatih laia kan VCP kha saw tuna kan VCP Lalliana u kha a nia, ani pawh khan an fanu bo ta thla niawm tak kha a hmu niin a sawi tlat a ni. A thih dawn phei kha chuan kha thla khan a tibuai an ti tlat!  Pu Sawia kha Pu Ralliana te nen khan an intlawhpawh viau a, an ni Pu Ralliana te an pem tak hnu khan an in hi a kutah khan a awm ta deuh bawk nen, an fanu thla khan a tibuai zui a nih ka ring.. Mahse, an fanu thla kan han ti ngawt a!  A ruang pawh kha kan hmu ta lo hrim hrim a, khatiglai khan la dam pawh nise; tunah chuan a thi tawh ang ka ring" Upa Nghaka chuan a lo ti ve chuar chuar a. Thu dang an sawi leh hnuah an chhuak ta a. Pastor pawh chuan chanchin hrilh tur leh eng emaw a thleng leh anih pawn inthlahrung lo turin min chah a. A thlamuanthlak khawp mai. 

Kan pa pawh a chawl a, vawkte a lo thleng bawk nen, kan khung a. Kan titi ta mai mai a. Kei chuan insawn mai ka duh, hlauhlawpa awm reng hi ka ning. Ani erawh a khauh fang reng mai a, ka ngei zawk. "Eng pawh nise, thlahrang a ni emaw ramhuai a ni emaw chhan nei lo chuan a inlar ngawt lo vang.. A chhan a awm ngei tur a ni" a ti ta tlat a. A thu lah hi a duh ve thin si. Ka hnial zui peih ta lo. 

Tetea a tha ta bawk a, a mize ngai a rawn pu leh ta chu ka hnuk a ulh lek lek. A nau pawn a ngaina leh tawh aniang, a bulah a tal hraih hraih mai. School erawh an chawl ta zeuh zeuh a, chawlh tir chi pawh an ni tawh lo. 

Kar khat a liam a, ka thla pawh a muang chho tan. Eng thil mah kan hre zui ta bawk lo nen. Mahse, tlai khat ka vawk chaw pe zo in chhung ka luh dawn lai chuan, School kawng atanga rawn phei mek hmeichhe pakhat chu ka va hmu a. Kan in a rawn pan tih ka hre thei. Ka lo nghak titih ngawt. A rawn thleng ve mai bawk a. Ka la hmuh ngai pawh ka hre lo. A hah hmel angreng, "Ka pi, khawngaih takin min mikhual thei ang em? Zan 2 vel bak a ni lo vang, ka thiante nen kan sumdawng a, kan inhloh daih a, mahse, he khuaa an lo luh hi ka ring tho a, ngaihchan ka duh a" a ti a. A hmel chu ka khawngaih zawng tak a ni teh chèk aniang chu, tha deuhin ka lo dawngsawng a. Bungrua engmah a nei lo, kawr par hman lai angreng tak a ha a, pawnfen a sir tawna kak a feng bawk. A oldies viau mai. A sam chu a dum a, a tawn mawl tawp. A hmai chu a dang bai mai, a vun a ngo angreng viau bawk. A silipar pawh chu burma silipar kan tih ang deuh kha a pawl a bun a, hman lai mi a ang tawp. A hmingte ka zawt a, "Laltlanchhuahi ka nia, Tlani tiin min ko thin.. " a tawngkam. Chu a felfai reuh khawp mai. Kan inrual vel ka ring. Inbual turin ka hrilh a, thawmhnaw pawh lungngai lo turin. Ka thawmhnaw hak tawh vak loh ho ka han haisak a, ka rin danin sumdawng a nih ka ring lo, chhungte nei lo vakvai a nih ka ring ve tawp. A va inbual a, kan pa pawh a lo haw ve. Ka lo hrilh ta var a, mak a tih hmel viau. 

Bawihpuia chuan a nel lem lo, Tetea nen erawh an inkawm thei phian. Tetea hi chu a fel ve hrim hrim. Zanriah kan ei ta a. A ei hnem ngang mai. Ka khawngaih zawk. Chaw pawh chhum âm deuh a ngai tawh dawn a nih hi ka ti rilru a. Tv te chu a en duh khawp a, hmuhnawm a tih hmel viau. Kan pa nen erawh an inbe mang lo. Zanah chuan thutthleng seiah a mu a, keini kan chho dial. Thil hlauhawm a thlen loh hram ka beisei, Tlani chuan a hlau dawn si a!  

In hnuaia tei vel thawm chuan min tiharh leh tawh. Tlani a nih ka ring. Mahse, a vei chhen mai a, rukru te hi a ni mai ang em tih te ka ngaihtuah a. Mahse, in hnuai lamah chuan ruk tur a awm vak chuang lo tiin ka ngaih ka titha chawp a. A thawm chu a reh ta deuh,. Mahse, darkar chanve hnuah, hmawng bul velah chuan hmeichhe tap thawm ka hre ta. Ka thauah min man a, khur nasa tak ka ni. A tap hliam hliam a, a rapawm bawk si. Tlani chuan a hre ve ang em? .. Kan pa pawh a rawn harh a, a tho va, ka tho ve nghal. 

Tlani chu a lo awm hauh lo mai. Rang takin Hmawng hnuai chu kan pan ta a. Hmawng kung nghenga thuin a lo tap!  

"Eng nge awmzia? " ka ti thâwr a. A rawn hawi chhuak, a mitmeng chu a sen phût ni maiin ka hria. A tho vat, "Ka lung a leng em a ni" a ti a. Amah zawk chuan in lam a pan nal nal. Kan zui ve leh ta ngawt a. Kan pa chuan engmah a sawi lo. Thil eng emaw ngaihtuah hmel a pu. 

Zinga in hnuai ka zuk chhuk chu Tlani chuan hmun a lo phiat a. Min lo nuih sen sen mai. Kan pa erawh vawk chaw a chhum a. Naupangte pawh an infiam rak chul a. Tukthuan ei khamah an chhuak leh ta diak. Tlani nen chauh kan awm ta a. A chanchin ka han zawt kual vel a… 

"He khua hi kan khaw hlui a nia, kan pemsannna erawh a rei tawh deuh, ka nu leh pa te chu an thi ve ve tawh, ka unau te pawn nupui pasal an nei tawh a. Kei erawh hei tihian ka la awm ta reng anih hi" a ti siam siam a. 

"I thiante chu an lo kal leh kal loh engtin nge i hriat ang? " ka ti a. 

"Hriat dan a awm mai ang" a ti liam puat a. Ngaihdan sa ka lo neih tawh vangin ka zawt thui duh ta lo. 

Puan ka thui lai chuan hmawng bulah a va tei vel a, tukverh atangin ka thlir zauh zauh, hmawng piaha kham angreng deuh, sang lutuk lo ah chuan a dak vang vang a, a lunglen hmel tak tak. Nizana a tah chhan dik tak ka zawh lah khan, "Kan khaw hlui a ni sia, ka thiante awmna hmun ania, ka ngai em a ni" a ti ringawt kha a nia. Ngaihthat lohna ka nei miah lo kha a mak!  Ka ngainat zawng tak a nih vang aniang. 

Zan a lo thleng a, tv kan en leh. Tetea ten lehkha an zir thung. Kan mu hma angreng, kan pa chuan min kuah hlu hlu a, min thawkkhum ham ham reng mai. Tun hnaiah kan buai ve deuh nen nupa nun kan hmang khât viau mai a, a chák ve tawh anih ka ring. Naupang an mutthilh leh thilh loh ka va en fiah phawt a, Tlani chuan a hriat phak ka ring chuang lo. Thawm dim tho siin duhthawh takin nupa nun chu kan hmang ta a. Kan zo fel ka kekawrte ka ha tur ka dak chhuak chu, kan room kawngka chung atanga Tlani lo dak hru chu ka va hmu ta. Ka rak tuar. Ani lah rang lutukin a zuang thla a, kailawnah a chhuk thla zawt zawt. Min enthla tihna a ni ang em?  Ka thin a rim ta riau. Ka tho ta ngat a. 

A lo inkhuh hlun. Ka ko va, a che zuk zuk. "Khatiang kha a mawi hleinem, engvangin nge min enthlak" ka ti ram hmak a. 

A puan sin lai chu ka zuk hawng a, a mitmu lian kel kawl chuan min rawn melh ta kuau mai. Ka tawlh hnung zawt. A rawn thu chhuak ta a. Chutah thil rimchhe uchuak tak mai, mihring tawih rim, mitthi uih rim hi a rawn nam nghal huk. Ka hnar ka hup a, kan pa ka ko tuar tuar. A rawn chhuk thla zawt zawt a. Tlani lah a thu ngawi reng a, thil rim pawh chu hria angin a lang lo. Min en char char. Ka khur nasa tawh lutuk. A hmel chaun mi ráp lutuk. A dáng bawk si. 

" Tu nge i nih? Nang hi" kan pa chuan hnar hup chungin a ti a. 

"Keimah" a rawn ti dut a. 

"Min ngaidam rawh u. Ka tum reng a ni lo. Thawm ka hria a, ka lo kal mai a ni. Engmah ka hmu lo" a ti ta zawt zawt a. A hmel lan dan pawh a nelawm leh ta deuh. Inngaihtlawm hmel zetin min rawn melh, a khawngaihthlak ngawih ngawih. 

Mutthilh erawh a har tawh angreng viau. 

Zingah kan pa a chhuak daih, khaw nge a kal dawn pawh min hrilh lo. Tlani chuan Bawihpuia te chu a infiampui a, an nui hawr hawr mai. Nizan thil thleng kha chu sawi tawh loh mai thain ka hria. 

Kan pa chu a rawn lut a, a hnungah Upa Ngura leh Upa Nghaka an rawn lang ve. A ngaihna ka lo hre lo deuh. "Khaw nge Tlani kha" kan pa chuan a ti a. Kawmchar lama Tlani awm chu ka va au va, Bawihpuia a pua a, Tetea a kai bawk. An rawn inzui lut ta a. 

Upa Nghaka te hmel a hmuh rual chuan Bawihpuia chu a thlauh tawp. Ani lo inchelh nghet si lo kha a let tawp mai. A tap lo thung. 

"Khai a, Tlante… nang maw? " Upa Ngura chuan a ti phâwk hru a. 

"Nangmah ngei chu i ni sia, engtin nge? " Upa Nghaka chuan a rawn ti ve nghal. Ka lo bo hle mai. Tlani chuan engmah sawi lo vin Hmawng kung lam a pan vut a, kan umzui nghal. Hmawng piaha kham ka sawiah khan kan hmuh lai rengin a zuangthla nia!  Ka rak thawt. Khamah chuan kan va dak a, tumah kan hmu lo. 

Kan inah kan let leh. Ka fate lah an hawihai. Kha Tlani kha hmana he in neitu Pu Ralliana fanu bo ta kha a ni ta tlat!  Upa Ngura te chuan an hai si lo. Tlani chu an aia nau deuh a ni naa, an hrechiang ngang si. A va mak tak em… hlauh nachang pawh ka hre lo. A thi nge a dam?  Engvangin nge hetiang hian thil a thlen?! 

Kan pa chuan a lo rinhlelh ruk tawh thu te a sawi a. Eng emaw tak erawh kan tawn leh a rin thu a sawi. Kei chuan in sawn ka sawi leh, "Nghak hram hram rawh.. Insawn pawh a la ngai maithei, mahse, ka awm chhung chuan in him ang" a ti tlat mai si!  

"Thil mak hi ka hre ve fô a, hei aia mak hi ka la hre lo, thi daih tawh anga ngaih nisi kha engtin nge a lo lan leh theih?  Kum 20 dawn a bo tawh sia" Upa Nghaka chuan a ti ta chuar chuar a. 

"In duh phawt chuan, min lo fin thei ania, in ruak te chu a awm ve leh mai ang, kan in hnuaite pawh luah theih chuan a siam theih mai ang" Upa Ngura chuan a lo ti ve bawk a. Kan pa erawh a ngai reng. 

"Kha nula khan chhan nei lo vin min rawn tlawh lo vang, thurûk eng emaw tak pawh a awm mai thei asin.. Kan lo ngaichang phawt ange. Mahse, khawngaihin thil thleng hi lo sawi darh lo hram ula kan lawm ngawt ang" a ti a. An zèp thei ngût ange maw.. 

Kan chhungkaw bil te chuan kan khawsa leh ta rak rak a. Keimahin ka awm ngam tawh lo. Naupang pawh ka thlamuanpui hek lo. Ka in bual lai te hian ka ngaihtuah chhuak a, ka inbual vat vat thin. Kan fate  erawh chuan engmah an hrethiam chiah lo anih hmel. Tetea mawlh hi a rawn tibuai leh ang tih ka hlau a ni. Kar khat dawn a reh ta vang vang a. Thinthiin ka muhil ve thei tan. 

Zirtawpzan a ni a, curent a awm leh pek lo. Mahse, kan solor a tha hlauh,. Thil a thaw vûk vûk a, ralkhatah sihal a û ruah ruah bawk. Ruah mal a tla fuap fuap a, boruak pawh a dai tan viau. Kan mu hma ta ringawt a. Chhun lamah kan vawkte chhuak, kan pa nen kan umna lamah ka chau deuh bawk a, ka mut a chhuak angreng viau. 

Ka mumang anih leh nih loh ka hre lo. In hnuai kawngkapui a ri thuai a, a inkhar ri leh khap. Kailawn chu a rawn ri khep khep a, ruah a sur cherh cherh naa ka hre thei tlat. Kan room kawngka chu a rawn inhawng riai riai a, kan pa a sir berah a mu a, keiman ka dawt. Thil rimchhe lutuk kha a rawn nam leh ta huk a. Kawngka lam chu ka va hawi a. Tlani ngei mai kha kan inhmuh ni hmasa bera a thawmhnaw hak chiah chiah kha hain, kawngka zawnah chuan a lo ding reng mai. A hmel chu mitthi hmel nen danglamna a awm lo. A dáng em em a, a mitkhur a tla dûk bawk. A hmui a duk chur mai bawk a, a mit chu a zim san a. Min rawn en ve chiah. A insiamchhe hran miah lo, mahse, ka hlau. Hlau tak ka ni. Au chhuah ka tum a, ka thei miah bawk si lo. Maimi zialin ka awm nge ka mumang nge a tak tak.. Engmah ka hre lo. 

Khum bul kan pa lu zawnah chuan a ding a, thosilen chhanah chuan min rawn chhuk melh kur mai. Ka en lo thei si lo. A mitmu chu a lian tial tial a, a meng zau sáwt khawp mai. 

Ka tawng chhuak tak tak em ka hre lo, "Eng nge i duh" ka ti thám tuak in ka hria. Ka rilru lamin ka bia pawh a ni maithei. 

"Ka ruang saw zahawm taka vuiliama phum ka duh ve a ni. Chu chauh chu a ni lo. Ka thih chhan diktak hi mihring dam lai te hian hria ula ka duh a ni" a ti ta a. Thosilen chu a che der der, a khawih miah si lo. Hlauthawng takin ka ka inbengkang a. 

"Min hlau suh. Ka tina dawn lo che. Ka dikna chanvo ka duh ve mai a ni.. ". A ti leh a. 

"Engvangin nge i thih? " ka ti ta tawp a. 

Chutah rapthlak zet hian a nui ta uar uar a, a nui ri chuan ka beng a luh hneh kher mai. Ka tal aih aih niin ka hria, "Bawihi, i harh em? Heii… i tha em? " kan pa awri ka hriat chuan ka thèp suai suai mai. Thlabar zetin a awmah ka bei thlawp. Duat takin min lo kuah a. Min chul heuh heuh a, ka mut chu a chhuak leh ta em em mai. Ka lo muhil leh daih. Mumang ka nei leh ta a. Hmawng kung hnuaiah ka lo thu a, khua chu a tlai lam tawh, ni a tla dawn suar suar. 

Hnahthel a rawn rap ri riap riap a. Ka lehhawi a, Tlani chu hmel hlim takin a rawn lang ta a. Hlauhna ka nei miah lo. 

"Hmanah chuan nula hlim thei tak ka ni thin. Unau pali zinga a upa ber ka ni. Ka pa chuan ram a ngah a, huan zaupui a nei bawk. Sum pawh kan lalut tam ve thin khawp mai. Rilru nei takin ka pa chuan sum chu a dah tha thin. He laia kan in kan luah hnu hian ka hlimna chu a chuai tan ta a. Kan vcp Pu Lalliana chu ka pa nen inkawmngeih tak an ni a, ka pa hnenah sum te a puk thin. A rawn leng fo zel a, kan innel viau. A fate ang chiahin min en ve thin. Mahse, ni khat chu ka thingphur haw chu inah tumah an lo awm lo va, ka naute chu school an kal tih ka hria, ka nu hian in a nghak thin a. Ka pa erawh huanah a kal leh anih ka ring. 

Ngawi rengin inah ka lut a, tui te in in ka thu thlandai a, mahse, kawmchar lama kan buhzèm hlui lamah chuan thawm ka hre ta a. Ka va pan a. Ka nu leh Pu Lalliana mu dun chu ka va phawk ta a ni. Min hmu ve lo va, ka chiai vek. Rapthlak ka ti bawk si a. Engmah sawi lo vin ka awm ta ringawt a ni. 

A hnu ni 4na velah chhunah bawk ka hmu leh ta a. Ka pa hrilh mai ka duh tawh. Mahse, ka pa ka khawngaih bakah kan chhungkua kan kehdarh dawn si a. Ka ngawi leh ta phawt. Chumi hnu lawkah ka pa chu a hlawhfate nen a huanah an riak lut ta a. Ka naute chu zan lamah lehkha an zir a, kei erawh ka pum chian loh vangin ka mu hma. In chungah sawn kan mu vek thin. Ka naute pawh an mu ve ta a. Ka nau chiah tlangval erawh a thianpa nen chakai chhitin an riak daih a. 

Zan laiah ka pum nain min tiharh leh a, ka nute pindan atang chuan thawm ka hre nghal bawk. Ka nu leh Lalliana ngei an ni. Inthiar ka duh si, an thawm a la tha si. Pumna em emin ka nghak ta ngat ngat a. An rei si a, ka insum zo ta ngang lo va, ka tho ta a. Ka thawm an hriat rual chuan an reh nghal hmak. Ka va inthiar a. Ka leh leh chuan an pindan chu ka va hawng ta a. Puan pakhat hnuaiah an lo mu dun rial a, nupa nun erawh an lo hmang tawh lo. 

"Ka nu, i va tenawm ve. Ka pa ka hrilh vek dawn " ka ti ta a. Ka nauten an hriat ka hlau bawk si. An rawn tho vat a, in hnuaiah min kai thla a, hlauh nachang ka hre lo. Ka pa hrilh lo tur in min thlem ngat ngat a, ka duh bik si lo. Ka nu chuan kut min thlak ta hial a. Ka luhlul ve tlat si. 

Tichuan, ka inrin loh laiin ka hnung lam atangin Lalliana chuan min rawn rek bet ta tlat a. A chak si, ka hneh ngang lo a ni. Ka nu chuan min puih a hnèkin ka ka a lo hup a. Ka mittui a tla zawih zawih mai. Ka tlin ta ngang lo va, ka thlarau ka thlah ta a ni. Tichuan, ka ruang chu an zawn chhuak a, hmawng hnuaiah hian min phum ta a ni. Kan in a fâl em vangin tuman an hmu lo. Hnim hnah te chu la khawmin an hnuhma chu an thup a. Tichuan, an nupa khumah chuan an mu dun zui leh ta a. Khawvar hma deuh hlekin Lalliana chu a tho va, a silai a lo ken tawh sa chu puin ramvak niawm takin school lamah a phei a, school atangin khaw lamah a chhuk thla leh ta a ni. A nupui fanaute bulah chuan zan riaka sa chang angin a insawi a ni ngei ang. 

A tukah chuan ka bo thu chu a thang ta a. Min zawng a, hmuh ngaihna ka awm si lo. Ka hriattir thei bawk si lo. Ka nu chu a tap vel a, a hnunglamah ten hmel takin ka lo en reng thin. Min hmu thei si lo. Ka pa chu a mangang khawp mai a. Ka khawngaih em em thin. Tichuan, ni 7 hnuah min vui ta kha a nia. Khami hnu atang khan thawm ka siam ta zeuh zeuh a. Ka nu kha chuan a chhan a hria, ka pa in a hre ve lo. Ka nu chuan pem a rawt ta reng a, ka pa rilru hnehin an pem ta a. 

Lalliana erawh ka tibuai zui ta zel a. Thih tha pawn a thi ta lo reng anih kha.. Ka nu pawh a â a, mi á anih hnuah a inawkhlum ta a ni.. " Tlani thusawi chu rapthlak ti zetin ka lo ngaithla a. Ka lo chek tlak tlak mai. 

"Anih engvangin nge keimahni kher min hrilh? Ka fapa pawh i tibuai a"?  Ka ti a. 

"I fapa hmang khan thudik hailan ka tum a, ka hlawhchham ta anih kha. Engvanga hrilh che nge ka nih tih chu ka pa kha i pu sâwn a nih vang a ni. Mahse, chu chu i pu ka pu ni ve tho khan a hre ta lo.. A tlangval chhuah hlawtin ka pa nu lakah sawn a thlak a, mahse, an zin vahna lamah a nih vangin chanchin engmah an inhrilh thei ta lo va, ka pa khan a pa hre lo leh hmu miah lo vin a dam chhung nun a hmang liam ta a ni… " a ti ta a. 

Ni chu a tla fel der tawh a. Thla a lo chhuak a, Tlani chu kham lamah a tawlh phei dalh dalh a. 

"Ka ngenna che kha i tihhlawhtlin chuan ka reh hlen tawh ang" a ti a. Khamah chuan a zuangthla leh ta a. 

Ka harh chuan zing a lo ni tawh. Kan pa pawh a tho daih tawh. Hmanhmawh zetin ka chhuk a, kan pa ka ko. Ka mumang chu ka hrilh ta mial mial a. A ngai thutak hle mai. Vcp leh Upa ho a zuk ko khawm a. Hmawng hnuai chu an lai ta a ni. Thuk vak lo ah ruhro chu a rawn lang ta a. An phu dual mai. 

Ruhro chu an tifai a, puan faia tuamin, hmawng hnuaiah tho chuan Pastorin urhsun takin vuina hunserh a hmang ta a. Ka hriat loh hlanin ka mittui a lo tla ve ringawt. A thlan chungah kraws kan phun bawk a. A lungawi ngei ka beisei. Kan vcp erawh a u chungchang kha kan hrilh ta lo. A zah kan hlau ve deuh bawk nen. Tetea te chuan an hrethiam lo. An upat hnuah kan la hrilhfiah ang chu. 

Ni chu kawlkilah a tla suar suar a, thlan hmaah chuan ding dunin kut kan insuih rial a. 

"I lo huaisen zawk daih anih hi.. " a ti sup a. 

"Nang awm lo la chuan ka huaisen thei lo vang" ka lo ti thung. 

Kan nupa chuan kan innuih sak a, Râlte Villa tih intarna in, kan in lo ni ta lam chu kan pan dun ta ral ral a. 

A tawp 😎