Angelo

ANGELO…! 

Ziaktu: Toni Râlte

"Ka veng him che ang a. Ka dam chhung chuan, tu man an tina thei ngai lo vang che" 

Ruatfela… 

Kum 2 zet inlaichinna ka lo neihpui tawh ka bialpa, ka pasal tura ka lo ngaih tawh Sangpuia chu ka melh tlawk tlawk ringawt. Engtin nge hetiang thutlukna hi a siam theih? Engvangin nge kei chu min hnutchhiah tura thutlukna a siam theih?  Zawhna tam tak ka nei. Mahse, a chhang dawn lo tih ka hria. A mitmeng dawihzep zet chu ka melh kal a, "I fa ka pai a, tichuan, inthen i rawt a maw? " ka ti chang fal a. 

"Min hrethiam rawh. Kan lo kal thui mah mah a ni. Nupui nei turin ka la inpeih lo a ni.. Liz, khawngaihin" a ti a. Ben sawk ka chak. Mahse, ka tha a khur a, ka chhungril natna chuan ka taksa a tinghet lo, vawn tur ka dap ruai mai. 

"I fa ka pai hi" ka ti nawn leh sak. 

"Ka hria lawm.. Titla mai rawh. I pai tlang duh anih pawn engmah ka sawi lo vang. Mahse, tun atang chuan kan inkar hi titawp mai ang. Ka chhungte sawn inneih an phal dawn chuang lo.. " engtin nge chutiang thu chu zak map lo va a sawi theih le?! Mipa chu a inti ve si a. 

"Mahse, ka titla duh hleinem. Kawng dang a awm lo vem mi? Khawngaihin, kum 2 kan inzui tawh a, min ngenna avangin ka virgin pawh i hawng a, tunah nau ka pai tak vang maiin min phatsan ang maw? Khawngaihin hetiang hi chu ti suh.. " ka hmeichhiatna rilru no a rawn chhuak a. Ka tap! 

"Ka chhungten i rai tih an hriat chuan min hnawtchhuak duh ang. Bakah eizawnna ka la nei bawk si lo va.. Inhrethiam tawn zawk mai ang. Nuam ka ti bik lo a nia" a ti leh. Hmm.. Chuti taka min neih hlau mipa chu ka um ka um ang maw?  Ni e, a chhungte hian min ngaina lo tih ka hria. Mahse, khang kum chhung zawng khan ka thlavang hauhin kan inzawmna chu a tinghet sauh zawk thin kha a nia. Ka taksa a duh vang mai chauha lemchang maw a lo nih? Rei tak ka virginity ka hum a, min nawr paw'n theihtawpin ka hnar thin. Thla hmasaa a birthday kan lawm dun tum khan tihtakzeta min nawr vang leh ka hmangaihna vangin a tan ka inhlan a. Thil sual tiah pawh ka inngai lo. Chumi hnuah vawi hnih kan hmang leh a. Damdawi ei nachang hre bawk si lo chu ka rai ta a ni. Sex kan hman atang khan ka lakah ngaihthain min ngaihsakna a tlahniam tawh reng bawk a. Ka laka a thiltum a hlen a, min thlahthlam tan der a nih kha. Mipa tenawm lutuk.. 

Ka mittui luang hmu reng chunga min hnungchhawntu chu ka thlir liam a. Ka dul ka zut, thla pawh a la tling kher lo maithei, mahse, ka pum chhungah a awm tlat a ni. Ka thlatin thi neih hunah ka period loh vangin hlauthawng hma chi ka ni bawk a. Ka in test ta vat kha a nia. A lo positive ta kalh bawk si. Rang taka a mah biain he lai hmunah hian kan inhmu ta a. Mahse, ka beisei loh ber hnarna leh tawpna ka hmachhawn ta chu a nia!  Ka nuih a zat loh luatah ka nuih hak kha… a na takzet a ni. 

Ka chhungte hi engtin nge ka hrilh tak ang le? Ka pa hian min hnawhchhuah loh pawn kut min thlak nasa viau ang. Unau panga zinga a milai ka ni. Kan upa berin pasal a nei tawh a, ka u chiah mipa erawh a la tlangval. Ka nau chiah hmeichhia hian nikumah pasal a nei tawh bawk, kha pawh an lo tlan dun ve vang a nia, ka pa a thinrim hle anih kha. Kan naupangber mipa erawh college a la kal ve. Kei hi RMSA hnuaiah Higher lecturer hna ka thawk ve mek a. Ka thawhna pawh a la rei lem lo. Kum 28na ka hmang mek a, pasal nei rual chu ka ni ve tawh reng. Ka pa hian min duat bik ti mai ang, a thu ka awih thei a, lehkha ka thiam bawk. Tihian Pathian zarah hna te ka nei ve ta bawk nen, mi dang zawng aiin min duhsak ka ti mai ang. Thik enah min en bik lo. Ka û hi P&E department, -ah MR in a thawk ve bawk a. Ka nu in engmah a thawk lo. Ka pa erawh Kan veng middle schoolah Peon hna a thawk mek a. A pension ve tep. Khawsak harsa em em kan ni lem lo va. A rualpawl tawk kan ni. Ka pa loan puk hmangin kan in bul maiah in kan sa ve mek bawk. Sangpuia te hi kan veng thenawm an ni a, kan khawsak a inang thuak. Apa hi ka pa aiin a hlawh a tam deuh tih mai a ni. Unau pathum an ni a, amah mipa awmchhun a ni. Anu ten min duh loh chhan chu kan la tet ve deuh lai hian ka patea leh Sangpuia ni hi an innei tawh a. Sangpuia ni hian patea chu a uiresan ta si a, ka patea thinrim lutuk chuan thah a tum hial a. Attemted murder case-in a tang hial tawh a ni. Ka chhungte zawk hian duh loa hnar zawk tur an nih laiin engmah an sawi lo. Sangpuia chhungte lam a pa nu api hian nasa takin min duh lo a ni tawp. An pi thu chu an ngainep ngawt ngam si lo va. Sangpuia nu tak hi chu a fel reng, apa zawk hian kan chhungkua nena inzawm a duh lo bur. Mahse, hei an fapain a titawp tawh alawm.. Ni e, kan inzawm lo kumkhua ang. An thisen eraeh ka pumchhungah a awm ve tlat si. 

Inthup a la ngai em em hran lo. Ka taksaah a la lang lem lo va, mahse, ka rilru a nuam ngai lo. Ka nu tal chu hrilh ka duh, ka ngam ngang si lo va. Titla duh ni ila pawisa khawlsa zawng ka nei ve nual. Mahse, sex ka hmang ngam a, a rah chhuah pawh ka phur ngam tur a ni tiin ka tuang ka tichhah lui ve tlat!  Tin, piantir ngei ka duh. Ka ta a ni anga, apa te lam in rawn ngaihven an tum pawn ka nasa viau ang tihte thlengin ka ngaihtuah. Sangpuia nen kan inthen tih chu an hre ta vat reng a. Ka nuin min zawt, chhan ngaihna ka hre lo khawp mai. A chhungte vanga inthen angin ka insawi. A remchan tehlul nen ka rai thu eraeh ka hrilh ngam ta chuang lo. Buai ve nak alaiin ka nau pasal nei kha a rawn tlan zui. Fa an la nei lo thung. Ka pa in let leh a phal lo. "Fa in la nei lo va, sawtianga kutthlak rengtu che leh rui reng bula damchhung nun hman zawng i khawngaihthlak" tiin bungrua kan va la a. A la naupang á ve bawk nen. An pa nen an inthen chu tuar ang pawn a awm lem lo. Biak erawh an la inbe zeuh zeuh. 

Ka nautein thla hnih a tling ta. Raino stage ka hmachhawn dawn ta chu a nia. Rilru nuam lo leh inup reng renga khawsa ka nih vangin, "I van cher.. Tunlai hi.. I thu bawk sia" min titu an awm zeuh zeuh. Rin aiin raino chu ka la na leh ta nghal a. Ka ke a vûng a, thil engmah ka ei thei lo. Ka uak nghal zel. Lung no ka ei chak thin a, a rukin ka ei fô!  Ka pum a nuam lo reng bawk si. Thuruk kawl chunga hrehawm paltlang chu a va namai lo em.. Sawn pawm tam zawk te hi an lo chhel ngawt mai. Ka awm dan a vangin ka nu ngaih a tha lo tan a. Chhanna ka pe mai thei bik si lo. Ka va tap ru zing tak em.. 

Ka inbual zo ka luhai lutuk ka tlu ta a. Damdawiinah min hruai, chutah chuan nau ka pai thu chu an hre ta a ni. Damdawi min chawh a, kan haw leh ta mai. In chhung kan lut chiah tihin ka pa ka hmachhawn nghal. A meng thîp rám a. A hmai a sen vek. 

"Sawn i pai a maw? Engvangin nge hetiang hi i tih? Ka rin i va ang lo ve" a ti chang fak fak mai. Ka ngawi reng. Ka fa paina min zawt lo. An hrechiang. Ka nuta erawh ka rin aiin a thinrim lo. Zilh erawh min zilh hrep. Ka pa pawn kut min thlak èm lo. Mahse, a rilru a na takzet tih ka hriatna chuan min tina zual. Ka nu erawh nu a nihna ang takin ka lamah a tang. Hauh erawh min hau ve tho. Sangpuia nen kan inthen chhan a nih an ring thiam nghal a, chu chuan kan boruak chhe lutuk tur a bengdai ta hlauh zawk a. Amah Sangpuia chu an hua. Haw tak an ni. Min lainat phah ka ti lo thei lo. Ni e, an fanu duatlai laka a thiltih hi a rapthlak em a ni. Khang ka inthup chhung zawnga harsa ber chu Sangpuia ka ngaihna kha a ni a. Min block vangin engmah ka ti thei lo. Biak ka chak ngawih ngawih thin. Lo let leh thut se, min lo ru chhuak se tih duhthusam nen awm lo napui kha ka nghak thin a. Min phatsanna chu na hle mah se; amah ka hmangaihna hian a la ngaidam thei a. A la nghak tlat si! 

Tihtlak lam chu an sawi lo. Sawn man erawh an va thing a, Kohhranah thunun ka ni ta bawk. Sawn man an rawn pe a, sawn pai ka ni ta. Min lainat letling tawh a, ka dinhmun chu a hmaa ka lo ngaihtuah ang em emin a hrehawm ta lo. Mahse, ná chuan min kiansan ngai lo. Chaw ka hua a, hmawmsawm ka ei vak thei chuang si lo. Ka cher em em a. Ka hnaah pawh aikal ka la tawp. Kan hotute lamin min phalsak bawk a. A zia tak a awm. Thla 3 a rawn tling dawn tan a, tlem chuan ka taksa lam chu a zia chho tan. Ka thinchhe lutuk leh ka huatthu chhe lutuk hi ka naute phei chuan min be tha ngam lo. Mahnia awm ka duh fô a, ka chhuak ngai lo tihtheih a ni. Zan khat chu chakai an rawn lei haw a, ka ei chak nge ka ei teuh mai. Chaw tak chu ka ei mang lo. Arsa ka ei tel kher bawk nen, zan tir atangin ka pum a nuam lo tan ta a. Ka vial ka vial mai. A tawpah ka tuar thei ta ngang lo va, ka nu ka ko a. Ka pum chu a na satliah tawh lo; a turin a tur ka ti mai. Na tak a ni. A sa hat hat ten ka hria. Hmanhmawh takin damdawiinah min hruai ta a. Nachhawknain min chiu a, ka thlan in min bual huh hneh khawp mai. Ka nuin ka pum chu a zut a, min chhawk har si. A va hrehawm tak em.. Ka muhil lai chu ka pum leh kap lam na riai riai chuan min tiharh leh a. Thei leh thei lo vin ka thu chhuak a, ka kap chu a hnawng deuhin ka hria. Hlauthawng takin nurse ka ko vat a. Ka nu te pawn min ngaihven nghal. Min han enkual a, ka kap chu thisen in a lo tihnâwng a lo ni. Doctor a lo thleng a, min han endik zung zung a. 

"A thil ei sual khan a nau pai thlengin a nghawng tlat mai. A naute chu kan chhan hman ta lo" a tih ri chu na tuar chungin ka lo ngaithla a. Ka la pai rei lo naa hmathlir tam tak ka lo nei hman asin le.. Ka tap thei lo. Ka mittui erawh a luang. 

Ka chhungte erawh a ruk tak chuan an lawm zawk em mawni aw tihtheih a ni. Naute an duh loh vang lam aiin mahnia nau ka pawm tur chu an ngaingam chiah lo niin ka hria. Ka bulah erawh engmah an sawi hran lo. 

A tawi zawngin sawi ila, thla hnih a liam leh hnuah ka hna pawh ka zawm leh thei ta a. Ka nau chhiat thu kha hretu an awm tho nain ka rai thu hria, nau ka chhiat tih hre lo an awm ve tho a. Mahse, an zawhna erawh ka chhan vek kher ngaiin ka hre lo. Sangpuia nen kan inbe ngai lo va, min unblock tawh naa ka be duh bik lo. Khang thla li chhung zawng khan amah vangin tawrhna tam tak ka lo hmachhawnin a rukin min pek tawrhna kha ka lo tuar thin. A chang leh ka ngaih vangin ka tap a, a chang leh amah vanga ka tawrhna in min vel tap bawk thin. Ka hmangaih tawh lo chu a ni lo, mahse, khang ka tawrh chhung zawng zawng kha rilru lèt nan a lo tawk reng mai a lo ni a. Sangpuia chu theihnghilh ngai lo mah ila; va hnaiha va ngaihven leh tumna ka nei tawh lo. Chutihrualin mipa zawng zawng laka ka rilru pawh a danglam ve nghal. Ka ring lo a ni satliah lo. Hnaih leh tur chuan hun ka mamawh rei maithei. Mahse, hmalam hun ka hre lo thung. 

Miss Mamawii nen hian kan inkawmngeih a, engkim ka hrilh ve thin. Min lainat ve viau. Sangpuia a ngei hle bawk. Zirna lamah ka insawrbing nasa a, ka class pawh nuam an ti zual. Ka tui ve hrim hrim bawk. 

Kan school bang ka scooty la chhuak tur chu ka piah lawka mipa rual lo thu te chuan min lo chhaih ve khanglang a. Melh pawh ka melh peih lo. "A mawngbawr saw tlemin lian hlek se, model nazawng aiin a nalh ang" rawn ti thum chhaktu chu ka va melh zawk a. Naupang fai ving veng, ngeiawm zet hmuhin ka va hmu. Ka ner nawk a. Engmah sawi lo vin ka tlan daih. 

"U, vawiin chu Usangpuia leh a sas thar ka hmu a" ka nau chuan a lo ti thâwr a. Tlemin min la nghawng. 

"Anih chu" ka ti chhum hmak. 

"A bialnu chu i hria ang. Saw Zo food neitu te fanu saw… inla model ve deuh kha" a ti leh a. Ka hria alawm. Engmah ka sawi peih lo. Zanah group pakhatah "Virginity" chungchangah kan inhnial. A tirah ka tel ve duh lo naa an comment hmuh reng takah chuan ka insum zo ta bik lo nen, ka va comment ve a. Min reply nuai nuai. 

"Virginity hi a hlu lo aniang, ngaihlu ber bera insawite hian an hlut lo em mai. Tharum nen an nawr thu.. Inti ngaihlu deuh hian virgin tawh lo an hmusit ve ngawt zel lehnghal a" tiin ka comment miau a. Sangpuia vanga sawi ka ni tih ka chiang. Mipa zawng zawng ka hmertel bawk. Ni e, mipa hi ka ring lo. 

"Virgin tawh lo chiang" ka hmeichhiatpui ngeiin min rawn ti. 

"Ka virgin tawh loh vang alawm ka sawi" ka ti hmiah. Min rawn chhang zel a, min tantu awm tho mah se, virgin lo anga lan an hreh vangin langsar takin min tan ngam lo. Mipa pakhat nen kan inthlurbing deuh a, tawng thei tak a ni. Kei lah ka school kal chhung zawnga debate apianga chak ziah thin ka ni bawk a, ka ngawi duh bik der lo. Min thlirtu an awm nual tih hre mah ila ka dang duh bik si lo. Mi hur chhuah ten min chhuah thul, ka ngaipawimawh der si lo. A thinrim hle tawh tih ka hria, kei pawh zep loh chuan ka tum vuau mai. Ka mizia hi nu dèm anga lang, a ruka khauh ve deuh ka nia. Ka duh loh zawngah chuan nasa ve tak, tawng thei ve tak ka ni. Mahse, ka nel loh zawngte leh ka ngainat loh te bulah erawh intithutak thiam tak ka ni leh lawi a!  Ngei duhtu tan chuan ka ngeiawm viau ang. 

A tawpah a dang ta aniang. A reh daih. Kei pawh ka bang ve nghal. Mi dang thusawi neuh neuh chu ka chhang peih tawh lo. Messengerah ka lut a, ka thian hlui Lawmi nen kan inbia, number te kan inpe tawn. Msg pakhat a lo lut a, "Ka bialnu chungchangah rawn che ka duh a, khawngaihin i number min pe thei ang em? " a rawn ti. A profile ka en a, PP ah bike a hmang!  Han pek loh ngawt kha niin ka hre si lo. Ka pe ta ngawt a. Ka pek atanga minute tam a liam hmain whatssappah min rawn be nghal. 

"I number diltu che kha ka nia.. Ih, virginity chungchang in sawina kha ka lo hmu a. Ka bialnu hi a virgin tawh lo va, ka ngaisang thei lo' a rawn ti a. Ka sa zak. A dp ka en a, ka hmu tawh tlatin ka hria. 

"I va zak lo ve" ka ti tawp. Smiley a rawn dah tuar.. 

. "ka ti mai mai anih kha. I mize tlang lutuk kha ka ngaisang a, biak che ka duh sia.. Chuanlam ka hre lo va" a rawn ti. Mai mai a. Ka reply tawh lo. 

Groupah ka nawi, ka rai lai khan thianten min ngaihtuah vangin group hran hranah min add a, ninawm chang awm mah se, khawhar a tizia viau zel. Ka mut dawnah kha pa msg 10 chuang lo awm chu ner sak chungin ka hawng ta a. 

"Remruatfela ka nia, Ruatfel tiin min ko thin. 6'2 ft ka nia, 68 ka weight aw. Ka hmel tha a, ka ngo a, lehkha ka thiam bawk. Kan hausa bawk. Kum 23 ka ni mek a, 10th september hi ka birthday a ni bawk. Bialnu 4  ka nei tawh a. Insual pawh ka thiam. 

Kan inngaihzawn hunah ka chhan thin ang che. Ka duat ngawt ang che. Eng ang pawn min hlat tum mah la, ka zawng zel ang che. I bialpa ka la ni dawn khawp" tih thu chu. Ka nui a. Mahse, ka block!  Mipa ka mamawh lo tih a hre lo aniang. 

A chang hian ka mumangah ka naute kha thisen nena inchiahpiah nuaih hian ka hmu fô!  Hlauhlawpin ka harh thin. Ka duh vanga thi a ni lo va, ka inthiam leh deuh thin. Nuthlawi ka ni tihah ka chiang a. Nula anga awm ka tum lem lo. Pasal neih pawh ka tum ta lo. Beidawnna hian min lo tidanglam thei khawp mai. 

School ka thleng a, Mamawii chuan, "I bialpa Sir Sapa a lo kal dawn lo.. I ngai awm" a ti a. Kan nui hawr hawr mai. Sir Sapa hi kan senior lecturer a nia. Kan innelin kan inngaina em em a, pa phawk tak nuih heh deuh, rilru tha zet mai a ni a. A bula awm a nuam. Keimah nen bik hian kan inkawmngeih zual a, infiam tawn reng thin kan ni. A pension ve tep tawh. An nu hi Doctor a ni bawk a, an hausa viau ang. An in leh lo erawh ka la hmu lo. Tuirial lamah khuan spot rem zet leh hman man pawh to zet an nei a, cottage pawh a awm nual. A hova la kal ngei kan tum. 

"A fapa a lo kal dawn a niawm e… " Sir Tpa chuan a lo ti var a. Kan school hi  a nuam. Kan inpawh tlang a, Principal ber pawh a nawi ve fô nen, thawhhona a that chuan a lo nuam zel mai. 

Dar a ri tep tihin office piaha parkingah chuan bike a rawn inhung dat a. Sir Sapa fapa niawm tak chu a rawn phei ta thoh thoh a. A rawn luh chuan an lo be nghal bawrh bawrh. Ka bul mai chu apa thutna a ni a, a rawn thu. Nimin lawka min chhaihtu kha a ni chiang. Tlemin ka hmu puitling ta deuh. A ngo a, a fai piak mai. A fresh hle tih chu dawt a ni lem lo. A sam erawh a punk lek lek. A hming a sawi a. Ka va melh a, min rawn melh ve chiah!  "Remruatfela ka nia, Ruatfel tiin min ko thin" a ti! Hriatchhuah ka nei lo thei lo. In hriat kha.. 

Class ka la a, ka tui leh hle. Naupangho nen kan inpawh tha bawk a, zawhna hi an ngah thei ania!  Short break laiin Class xii. 'A' sec a mi Rammuana a lo lut a. A ngui khawp mai. 

"Miss, Johny te sawn ka lehkhabu min hawhsak a, min pe duh tawh lo.. " tiin complain a nei. Rammuana hi an classah a te ber a, a naupang ber bawk. Ze zawi tak, lehkha thiam thei tak a ni a. A pumrua leh a mizia vangin a thiante chhaih leh tihduhdahna rawngkai a tuar zeuh zeuh. Ka tho a, Ruatfela a rawn tho ve nghal zat. An class roomah chuan kan va lut a, Johny te chu an lo thu thap. Thil awmzia ka zawt a, "Miss, a ho ee.. Ani te chu a thiam alawm.. Ka tibo daih a.. " a ti. A tawng dan phar phar hi ka ngei sa a nia. A hma aia chang deuh zawkin, "I chawi a ngai anih chu" ka ti fak. 

"Pawisa ka nei leuh" a ti khanglang, chhan tuma ka an zuau laiin a biang a ri thawk. Ruatfela'n a beng! Boruak a reh dûk mai. 

"Khatiang kha zirtirtu te chhan dan tur a ni em? I nungchang hi a chhe hle tih ka hre nghal. A lehkhabu man chu naktukak rawn keng ang che" a ti hriam hrâk mai. A hmel phu lohin a aw a lian. Mi thar ania, a pa ai rawn kal ve mai si, a huai ka ti angreng. Naupangho ngei a hlawh dawn chiang. Mahse, Johny pawn a phutawk a hmu tih ka hria. Kutthlak kher erawh tha ka ti lo. 

Officea kan awm leh hnuah, "Kutthlak kher kha a ngai lo asin. Dan phal loh a nia" ka ti sap a. 

Min rawn melh, a mitmeng hi a fiah viau. A mitmu a dum tha hle bawk. "I zirlai ten khatianga an chhan che kha ka remti lo" a ti sup. Hm.. A zam lo ve e. 

Zanah number dang atangin, "Min unblock loh chuan ka tibuai zual. Zel ang che" a rawn ti. Vawiin nileng khan mi dang nen an inkawm char char, ka tawng ve mang lo. M. Sc (Chemistry)  a zo tawh a. Eng em em thawk rih lo vin apa ai a rawn kal anih ber chu. A hriatna a zau a, an ngaina hlawm viau. Mahse, hmeichhia anga min en tlat avangin ka ngaina lo. 

"Ka unblock nachhan tur che ka hre lo' ka va ti hmak. 

"I bialpa ka nih daen vangin" a rawn ti. 

"I mumang a nih chu.. " 

"Ka mumang a thleng dik ziah"

"Ka mamawh lo che"

"Min mamawh vangin tuman min ngaizawng ngai lo.. "

"I kum rualpui va chhaih rawh.. "

"Unblock teh… vat vat" 

Ka unblock awm lo em mai a. A tuk class kal ka peih loh phah. Thla engzat tak rawn kal ang maw?! 

"Miss Eli, i nalh hle mai' a lo ti sup. Rum zetin ka melh. 

"Min unblock loh chuan staff te bulah ka tlangau dawn" a ti. Min va daikhalh peih tak. Hmela hi.. Ka unblock ta nge nge a. 

Johny pawn pawisa a rawn keng. Ruatfelan class a lak chuan an thawm a bengchheng viau. Eng tak ti ang maw? 

Kar khat lai kan kalho ta a. A lang apau chuan min chhaih lo. Mi dang hriat thiam theih loh tur hian a kal thiam. Ka tana ngeiawm tawk velin. Zanah nise whatsappah chhan sen loh thu a rawn thawn a. Ka seen ngai lem hlei lo. A la beidawng ve mai ang chu. Zirtawp chawhnu kan school bang ka scooty la chhuak tur chu a bike chuan a dal tlat a. A lo thlen hun ka nghak tawp. 

"I bike hian min dal" ka ti a. Engmah sawi lo chuan a la chhuak ve mai. Kan piah maia waiting shed-a thu tlangval pathum zu rui chuan min lo au el a. "Miss Eli saw maw, a chhe lo.. Mahse, a thlawi ve tawh tlat" an ti lung lung mai. Engahmah ka ngai duh lo lui tlat. 

"A thlawi a ni mai. Chu chu in sawi phak a awm lo" Ruatfela lehpek chu aw.. An ni zurui phur tawh lah chu an rawn rak leh chiam. Bawlhhlawh zet zetin. A bike a hung tha te te, a va pan phei leh ta. Va dan tumin kei pawh ka inhung tha a. Ka thlen phei hmain a lo awm hnai ber a thal huang mai. "Ehe, khanglang che chuan, naupang te si.. I va zak lo ve" tiin pakhat sa tha lam chuan a rawn bawh a, a leng phei leh dâwrh mai. A kuttum an dawng lawlh lawlh mai a. A bula dawr leh mi dang lo awm ve te chuan an thelh ta a ni. 

"Hmeichhiate hi kan farnu an nia. Chhaih nawmnah tur a ni lo.. Eng mi pawh nise" a ti thum chhak a. Min kai phei daih. A kut ka thing thla. "I puihna ka ngen em ni? Mawh, engvangin nge kut i thlak a? " ka ti hlaih hlaih. 

"Nangmah i nih vang a ni lo. Hmeichhe thlavang ka hauhna a nih kha" a ti sup. 

"Engpawhni rawh se, ka ngaina lo che. Min tihbuai hi bansan rawh" ka ti a. Scooty ka tinung a. Ka tlansan nghal. Mahse, awmzia a awm lo. Zanah min rawn be leh tho. Ka hau hrep. Tawngkam lah ka duhtui lo. "Hmangaih ka chân tawh a. Tumah ka mamawh tawh lo. Nang i ni emaw tupawh nise ngaihzawn ka duhntawh lo. Keimaha awm ka duh. A chiang em? " ka ti a. 

"Ka duh che lawm" tih chu a chhanna. 

"I chawh hle dawn anih chu. Ka duh ve si lo che a" ka ti hmiah. 

"Min duh hun a awm tho vang".. 

Ka chhang peih tawh lo. Mipa thenkhat betu pawh ka nei ve zeuh zeuh, ka rilru diktak ka hrilh chuan an reh zui ve mai zel. Ruatfela erawh a luhlul rei ngang ngang hle mai. A hlawhtling dawn der si lo. 

Kan chhungkaw lamah boruak neuh neuh a awm ta tlat.. Ka nau khan ruih a ching ta tlat!  Hmeichhia a ni si, a la naupang bawk si. Ka pa hian a khak ta fô. A sawt hleithei lo. Zanah nise chhuahna tur chhuanlam a hre si. Beauty Parlour-ah a thawk ve a, a changa riahchilh mai zel an ni bawk nen. A nun a loose chho ta viau. Sunday zanah a rawn haw thei si lo, kan call thin, a switch off tlat si. Inkhawm tura chhuak, inkhawm bana lo haw thei si lo chu ngaihtuah loh theih a ni lo. A thil chin kan lo hre tawh nen. Ka nu phei chu a za ruai tawh a. Zan dangah hi chuan dar 9 hmain a lo haw ngei ngei thin a. Zu rim nam mah se, a rui chhe viau ngai lo. A kamnam ang vel hi a ni thin. Dar 11 a ri hnai tawh tihin kawngka an lo kik a, ka pain a va hawng. Awiii, Ruatfela ngei mai khan ka nau chu puain a pheikhawk a khaisak bawk. Thutthlengah chuan a muttir a. Kan hrilhhai angreng nge kan lo en hâw ringawt. 

"Sawti laiah sawn a lo chatthla a" a ti a. 

"Ee.. Tlangval, kan va lawm ve aw.. Mahse, engtin nge kan in i rawn hriat? " ka pa chuan a ringhlel deuh niin ka hria. 

"Aw.. Zep loh chuan phunchawngah a thiante nen an lo kal ve a, an intithinrim a, an hawnsan daih a. Chuan, a chahthlak hmain a awmna ka zawt a, sawti laiah sawn mi ka rawn zawt bawk a. Ka rawn hre thei mai a ni" Ruatfela chuan a ti a. Ka nuin thu turin a lo ti a, mahse, "A tlai tawh em mai. Ka haw phawt ang. Mang tha u" tiin min rawn melh zauh. A chhuak ta nghal. Lawmthu pawh kan la hrilh tha hman si lo. Thawt thawt zel a. Ka nau chu hauh theih pawh ni lo chuan. A la hnar tluk tluk zui. Hrep taka.. 

"Ka nau i rawn hruai haw a. Kan lawm e" ka va ti ve a. 

"I nau ang kha chu ni ve suh aw" a rawn ti. 

"Ka nau chu i va hmusit awm ve"

"Hmusit lo ve. Mahse, bialnu zu rui thin ka duh lo va"

"Mang tha" ka ti hmak. 

School kan kal leh. Khua a lum angreng si. A ninawm. Ruatfela chu kan student hmeichheho in an star hle tih ka hria. Ka nuih a za. Mamawii pawh hian a star deuhin ka hria, amah aiin a nau ve tho naa.. A chanchin a sawi peih riau. 

"Sir, Nilaiah naupang ho nen kan huanah picnic ila" Principal bulah nel zetin a ti. Ani lah chuan a lo remti hle lehnghal. He pa hi a nunrawn tehlul nen an ngaina zèk zel a. Staff ho te pawn an lo chak sakhai a, bakah spot hman man kan chawi dawn bawk si lo. Ei leh in man a ni mai. Naupangho phei chu an rak chul hlawm a, Ruatfela zar an zo dawn anih hmel. Kei erawh chuan ngeiawm chhuahin, "Sir, kan buai deuh hlek a, ka lo kal ve lo mai dawn mawni ka ti. In kan sa ve bawk sia.. " ka ti a. Ruatfela mitmeng rum zia chu, Sir tawng hma hmain, "Kal vek tur.. " a lo ti thawt thawt. Sir pawh chuan kal ve ngei se min duh tih a lang. Ka hre lo le.. 

Thawhleh zanah nasa theihtawpin kal ve turin min sawm. Ka lo hnial zel si. A thinrim tih ka hria. Ka laka chance a neih chu pumpelh zel ka duh. A hmelchhe lo va, ka tlu lut palh ang tih ka hlau tlat. Ka mipa rin loh zawng tak a ni si a. 

Khua a lo var a. Mamawiin min rawn bia, chhuanlam ka siam zel si. Tukthuan ei hma deuhin kan kawtah bike a rawn inhung dawt. Ka hlauthawng deuh. 

"Ka pu, Miss Eli hi picnicnaa kal turin ka rawn hruai dawn a.. I la insiam. Na nge.. Hmanhmawh ve la" tiin min rawn melh. Huizzz.. He pa hi a. Ka nau chuan a lo hre viau mai. An inbe bawrh bawrh a. Ka pa lah chuan, "Va insiam ta che. Vawiin chu kan mistiri a dam tha lo va, kei pawh huanah ka zuk kal teh ang" a la ti zui!  Chhuanlam tur a váng ta raih mai. Phur lo zetin ka insiam a. Kan inphur phei ta. Kan innghahkhawmna kan va thlen chuan, "Tihian kan rawn inphur nghal mai ang. Kan va tlan hmasa ange" Ruatfela chuan a ti a. Ka tawng ve hmain a tlan zui nghal. Khawchhungah chuan a tlan chak. Vak lo. Khua kan pel ta maw tihah chak mangkhenin a tlan ta a. Ka dawihzepna lam tak a lo ni. A kawngah ka chelh a, ka au tuar tuar, "Hmela, mawla, tlanmuang rawh"ka ti a. Kawng a tha si, a hma aia chakin a lim phei fia fia mai. Ka tah a chhuak zawk e a. 

"Sawi rawh. Sawi la ka tlanmuang ang. Ka duh che ti la" a ti.. A tukhumah ka chhiatkhum hrep. Ka hlau si, motor kan tawh lai phei chuan ka pawm chawih chawih a ni mai. Ka va ngei tak em

.. 

"Elizabeth, sawi rawh. Sawi ta che.. " a ti a, kan thlawk a ni ringawt. Ka thaw te a chham lek lek. "Aw.. Ka duh che.. Ka duh che.. Tlan muang rawh. Khawngaihin" ka ti ta tuar tuar a. A tlan zawi ta nghal. A kawnga ka kuahna ka la thla a, ka khur der der mai. 

"Ka bialnu i ni ta" a ti.. Ka rilru chuan, "Mawla, i hre viau ang" ka lo ti a. 

An huan kan han thleng chu nuam tak a ni. Pool pawh a thianghlim, a zau tha bawk. Mahse, ka cheng ngam kher lo vang. Tuiah ka tla tawh a, ka hlau tawh lutuk. Mi dang pawh an lo thleng khawm tan a. Eirawngbawl hmain hunserh te kan han hmang a. Chumi zawhah chokaah kan lut phei ta a. Mahse, bawl a lo ngai lo. Heta thawk ten an bawl dawn. Mahse, mamawii nen chuan chawhmeh chan ngai chu kan chanpui ta tho va.. 

"Ruatfela hi maw an sawi danin phaia a awm lai hian a bialnu leh vai pa infawp lai a hmu a, a bialnu hi a sawisa hlum tep an ti mawle.. A mak e, a zia nen a inmil lo" Mamawii chuan a ti sar sar a. Ka nuih a za, kei chuan tharum a ngainatzia ka hre tawh. Mak ka ti eih lo. 

"Chuan, ka nau thiannu nen sawn an lo ni ve tawh aniang, ka nau sawi danin Ruatfela hian a tirethei tawp.,a bialnu lah khan a atchilh thawthang sia, zanah te hian a duh hun hunah a hruai chhuak thei an ti.. "A ti leh a. 

"An inthen tawh mi? " ka lo tia. 

"Then daih tawh e, tunah chuan a single.. Kha nu khan a la zar reng an tia.."

"A va khawngaihthlak ve" 

"Chuan taka Zo Food neitute fanu kha,Kimkimi lar ve deuh kha.. Model ve deuh kha i hria em? Kha kha lawm a sawisa an tih chu" a tih chuan ka phu zawk. Sangpuia bialnu Kimkimi maw Ruatfela ex chu!  Khawvel zim zia hi a. 

Mamawii hian a star tak tak aniang, a sawi peih em mai. Ruatfela nen kan inkar a hre der si lo. Ka inthlahrung zawk e a. Mahse, ka duh ve chuang hleinem. Pool lamah kan chhuk ve a, Ruatfela chu pool bula chawlhbukah chuan a lo thu a, kekawrbul nen chauh. Min lo thlir reng a, ka melh ráwm ráwm. Mamawii chu a bulah a thu chat. Ani hi a chhe lo ve a, a lian thain a sexy tawp. Luck pawh a luck angreng. 

"Tui hleuh min zirtir ve la" a ti a. Ruatfela chuan min rawn melh daih. Lehlam ka lo hawisan. 

"In pahnih in aw" a ti. Zawnga hi a. A thuk lo laiah kan cheng a, Tyre a lo awm hlauh a, ka chuh nghal vat. Min hnaih a tum nasa, ka kalsawn zel si. Mamawii nen chuan tui hleuh chu an inzirtir ta a. Ka lo melh ve reng zel chu ka inngei. Ka cheng ning tawh nen ka chhuahsan a, ka va inbual ta daih. Ka lu ka suk mek laiin bathroom kawngka a rawn kik a, "Eng nge? " ka ti vak. 

"Lo hawng lawk.. Hei i towel" a ti a. Ruatfela aw tih ka hai lo. Towel ka lo keng lut lo tak tak. Ka hmanhmawh vang nge pawh ka hre lo. Ka hawng a, ka kut ka va dah chhuak. A rawn hawng zau a, a rawn zuanglut anih chu!  Bathroom chu a zau hlauh zawk a. Ka tawlh phei nghal dâwrh. 

. "eng nge i hriat a? " ka ti chang fal. 

"Ka bual chak che" a ti anih chu! 

"Tenawm lo mai teh. Ka au vak a ni mai. I hmingchhe viau ang. Chhuak rawh. Miin min hmu nge" hlauthawng takin ka ti a. Kawngka chu a hawng dek dek a, "Principal leh mi dang an thu chiah.. Tah sawn" a ti zui. Kan ep chiah annih chu a sawi. A chhuah chuan a hnu lawkah ka chhuak ve dawn si. Min ngai dik lo vek dawn. Ka va haw tak em. He mihring hi. 

"Tawng ring suh. An hre pha ange" a ti sup a. Min rawn hnaih nghal zat. Bang nghengin ka ding khawng lah, ka sam a la phuan buah bawk. Bra ka hreng a, kekawrbul ka la ha. A mitmeng chu a tizim san a. Min rawn hnaih hret hret. 

"Khawngaihin.. " ka lo ti tawp. Bangah a in nemkhalh a, kan hmai a insi tep. 

"Tihnat che ka  tum lo. Min ring la ka duh a ni" a ti zawi sup a. 

"Engpawhnise, chhuak phawt rawh" ka lo ti thawt. 

"Ka chhuak ang maw" a tih lai mek chuan, bathroom kawngka chu an rawn sawi a, "Tu nge awm" a rawn ti. Madam Tluangi, mi khermei zet a ni lehnghal. 

"Keimah.. Ka la inbual" ka aw chu a khur lek lek. Min rawn nuih sak a. Ka beng bulah a rawn kun, "Ka lawm e" a ti a. Ka beng a tiza. Ka tal aih, ka sam phuan buah chu a chul a, shower a on nghal. A mah pawh a inbual zui ve nghal a. Ka rin loh ang taka min khawih loh vang chuan ngawi rengin ka sam chu ka tleuh fai a. Ka inbual zui ve nghal. Mahse, ka inbual tui lo. Ruak veka inbual thin ka ni si a, ka khawr tlat. 

Shower-a ka intleuh lai chuan ka hnungzang chu a rawn chul  a. "A la phuan a" a ti mai a. A kut a la sawn nghal. Min khawihna kha a sa hat hat zel. Engvang teh hrep nge mawni.. Chhuah dan turah kan buai ta. Ka ngei ngawih ngawih. Rawn luh ve kha a ngai lo sin le. Mipa tenawm, mawl lutuk. Kawngka ka hawng dek dek, min hmu maithei awm an awm loin ka hria. Rang mangkhenin ka chhuak zauh a. Ani erawh ala awm!  

Engtin nge a rawn chhuah ve tak ka hre lo. Zanriah ei dawn hnaiah a rawn lang ve leh mai. Thla kan la nasa a, a ruka ka thla la mawlh mawlhtu a awm tih ka hai lo bawk. Ka ngaihven duh lo lui. Zanriah kan ei ta a, an siam tui phian. Hawn lamah chuan busa hawn ve ka duh tawh, hmanhmawh zetin ka lut a. Mahse, "Miss, lo kal vat rawh. An hauh vek tawh.. Naupangho thutna a nih kha" a rawn ti lung lung. Mi dang bula tihzah ka hreh èm vangin ka chhuk leh a. Tum bûr chungin a bike ah ka lawn. Kan tlan hmasa leh. A khalh chak tawh lem lo. 

Kalkawngah pawh kan inbe vak lo. Ka tawng peih lo bawk a. Kan inkawtah a ding dat a, "Mut tui aw" a ti sup. "Aw le" ka tia. Ka kal nal nal. Kei aia kum 5- naupang zûnah hian uai ka tum lo. Tin, a mizia hi ka ngaina lo. Mi dang tan chuan a nelawmin a ngainatawm a ni thei. Ka tan erawh ninawm, hnawksak a ni. Ka nau lah hian a star ve nge a sawi teivet. Mahse, ka hriat loh thil a lo hre nual, "Kimkimi nen khan an ni rei ve lutuk, phaiah pawh an cheng dun alawm.. Mahse, vai a lo kawp khanglang a, Ruatfela hian a beng hrep an ti. Kimkimi chhungten an report nghe nghe, mahse, an fanu mualphona ve tur tho a ni sia, an inhnukdawk leh an tia. Ruatfela hi chu insual a hrat ve hrim hrim, mahse, tumah a tibuai hmasa ngai bik lo" A ti sar sar a. Ngaithla lo awm taka lang siin ka ngaithla uluk viau. 

"Apa te sawn an duat bawk sia, an unauah a naupang ber a, amah ai chuan a u saw ka star zawk. A van pa tak" a ti leh. Ka nui tawp. 

"Taksa nalhnu.. " a rawn ti teh tawp a. Eng nge ka hriat pawh ka hre lo. Ka lo lawm ve ringawt. Nalh min tih vanga lawm ni lo hram ila ka va duh tak. 

"Ruatfel, hei hi hre rawh. Nang leh kei chu kan kum a inthlau, tin, ka duhzawng i ni lo. Kan inngaizawng thei lo vang. Hetia min duh tlat hi ka hrethiam lo. Ka ring lo che a. I ta ka ni ngai hek lo vang" tiin thu ka va thawn ta a. A reh vang vang hnuah, "Ka dawhthei ve lutuk. Min duh hun a la awm ve mai ang. Ka zei theih nan i lakah ka zei lo tlat a. A mak ee" a rawn ti. Ka dah daih. 

A tuk class ka chawl. Kan thenawmah mitthi kan nei sia, kan inhnaih si nen. A nuam lo ve deuh a ni. Min rawn text char char. Ka chhang lo. Ka buai ve deuh bawk a. Kuanga dah tur pangpar kan khawi a, ka khawi nalh ve phian. Tlai lamah eirawng kan va bawl bawk a, ka chau tep. Zanah kan leng zui lehnghal bawk nen. Mahsse, kan lengrei vak lo. Hmuh te ka phiah fel hnuah ka haw phei ve ta a. Kan in thlen dawnah min rawn ko. Sangpuia a lo nia!  Kan inhmu khât hle mai. Ka hmu zeuh zeuh naa ani chuan min hmu ve ngai lo aniang. 

"I dam maw? " a ti a. Zu rim a nam. 

"Aw.. Teh hlawl che chuan, ka tha lawm. Nang zawk" ka lo ti ve hlut a. Namnul hi ka tum ve èm a ni. 

"Hei ka pa cousin te an nia, ka rawn kal ve. Ka hmu reng che nichin pawh khan.. " a ti ve mai a. 

"Nih chu aw.. I la haw dawn lo mi? "

"Ka pate ka la nghak a"

"Nih chuan, ka luhsan mai ang che aw.. Mang tha phawt" ka ti a. Ka luhsan ta a. Ka thinphu dup dup chu ka duh lo kher mai. A dai hlen tawh emaw ka tih kha a lo la dai hlen awzawng si lo. Amah ka hmuha kan inbiak khan ka derthawng vek ni maiin ka hria. Ka inthlak vat vat a. Ka mu nghal. Phone pawh ka khawih peih lo. Sangpuia hlir ka mitthlaah a awm. Ti nge na taka min siama min hnuchhawn tawhtu ngaia ka la tal ka la tal mai le…! Hmangaihna zet hi chu.. 

A tukah erawh ka hnaah ka kal ve tawh a. Ruatfela chu a hlim leh sarh mai. Kan inbe mang lo thung. Chawhnuah Class XI roomah ka va lut a, an room hi a dam deuh a, building hi a hlui ve deuh tawh bawk. Sak that hun a nghahhlelhawm khawp mai. Lecture ka pek laiin platform kan dawh chawp hnuai atang chuan rul lian zet a rawn chhuak luau mai. Naupangho an rak, kei ka rak bawk. An tlanchhuak zut zut a. Rul lah chuan mihrng a hlau eih lo nge a awr a tiphek ag ûr ur a, Tlanchhuah ve tuma ka chhuk chu lecturn keah ka inpal a, ka tlu ta thlawrh mai. Rul chuan ka kheimit chung hleka a rawn chuk ta a. Ka rak thawt. Ruatfela rawn tlan lut chuan min rawn pawm tho lawp a, Rul lah a tlanchhe leh daih tawh si. Rul tur chuan rang takin min fan nghal. Office-ah min bil tuau a, Ruatfela chuan blade a rawn phawrh, ka ke chu a zaikhalh ta a. Na pawh ka hre vak lo. Ka hlauthawng lutuk chu. 

Ka chawnah a tawnkhalh tlat bawk. Tichuan, Sir Tpa motorin damdawiin lamah min phurchho ta a. Ka bulah Ruatfela chu a thu ve zel. Mamawii a tel ve bawk. Min lo jection a, ka thaw te chu a sak hman. Mahse, kan chet ran em vangin ka dam chhuak ka ti mai. Tlaiah ka haw leh thei nghal. Ka scooty lah ka hawn thei si lo. Mahse, Ruatfelan a rawn dah thlap. Ka laka mark that tum reng renga a khawsa chu ka la ngei tho. Ka nunna chhanchhuaktu ang a nih laiin ka la hel tlat.

Weekend a ni zui nghal bawk a. A tur chambang vangin ka la rap ngam vak lo tih loh chu na dang ka nei lem lo. Ka that leh that loh min zawt chamchi a, ka ning lek lek. Ka reply tha peih lo. Mahse, lawmthu chu ka hrilh. Sunday zanah min duhthu a sawi leh a, "Ka bialpa hlui a lo kir leh a, kan ni leh tawh. Sorry.. Min bansan tawh rawh" ka ti ta a. Ke na thinchhiat leh pms lai a lo ni kher nen. Ka mood a chhe tawp. 

"Theihtawp ka chhuah a, ka hlawhchham vawikhatna a nih ngei dawn hi.. Hlim takin le.. I duh ang ngeiin ka reh tawh ang.. " tiin min rawn chhang a. Ka reply tawh lo. 

Monday a lo thleng a, School erawh ka la kal peih lo. Min hrethiam tho bawk a. Ka thawh veleh ka phone ka khawih nghal. Zing tina morning wish mjn lo thawn ziahtu kha a reh ta. Pawi ka ti lo. Chhunah mistiri te ei tur ka siam a.  A bak tih vak tur a awm lo. Ka phone ka khawih apiangin Ruatfela ka hrechhuak ta ziah. A msg hmuh tur awm ta lo chuan ka khua a tihar ta deuh nge ka hre lo. A status te ka view vel, "Beidawnsan tur thil hi a lo awm tak tak anih dawn hi" tih thu hi a hmang. Keimah min sawi chhanna a ni tih ka hria. Tlemtein min dek deuh. Mahse, tawlh ka tum lo.. 

Zanah Sangpuian min rawn be nawlh.. "Liz, ka ngai thin che" tiin. Phuihnam an hmeh ve ngai lo mi le.. Ka chhang awzawng lo vang. Ka mu daih. Mak deuhin Ruatfela hmel ka mitthla char char. Ka tho a, ka va zung. Ka mu leh a ngaite bawk. A msg zawng zawngte ka chhuikir leh a, thu thlum tak a sawi ngai lo. Thupe aw duehin a sawi thin. Tawngkam a thiam falua lo bawk. "Kan inngaizawng anga, i hlim ve mai ang' tih te, "Nuthlawi ni mah la, ka thinlungah nula virgin nen in danglamna a awm lo" tih angreng. Huizzz.. A mak e.. Ti nge ka ngaihtuah tlat le.. 

A tukah chuan school kal turin ka insiam a. Phur ru si leh huphurh ri si feelings chu a leh nawm phian. Ruatfela a lo la kal lo. A bike ri ka hriat rual chuan ka lai tût pek!  Engtia lo hmachhawn nge tha ang ka hre lo. A lo lut a. Min en miah lo. Mamawii nen an inbe char char. Class ka nei a, ka lut zui nghal. Zirlaiah ka rilru ka pe thuk thei lo. A mak!  Eng nge maw ka hriat leh. Min duh huam huama min zui rengtu kha a reh a, lawm viau tur ka ni asin le.. Break laiin fiamthu an thawh a, kan nui leh dar dar mai. Ruatfela pawn thla thar lama phaia a chhuk leh tur thu a sawi a. Ka lo ngui ve ringawt. Min be lo va, melh pawh min melh hek lo. A tha, mipa ka mamawh lo.. Tiin ka infuih char char. Bakah ka ring zo dawn chuang lo va, age gap vangin kan hma hun a eng lo bawk. Sir Sapa fapa a ni kher bawk. Tuna ui leh viau hi ka duh lo. A tlawmthlak. Chapona ka nei tur a ni. 

Tlai banah Mamawii nen an inphur haw. Mood chhe vekin scooty ka khalh. In ka luh pawn tumah ka be peih lo. Ti nge ka mood a off ve ringawt. Kha mihring. Vang khan maw.. Ni lul suh se. Ka ui leh hnuhnawh tih nia ka inhriatna hi paihbo daih ka duh. Sangpuia lah hian a khat tawkin min lo text chhen

. ka reply ngai lo naa ka block duh bik hran lo. Tihian awm. Ve rawh se, a tel lo va ka hmasawn theih dan hi hre ve rawh se. 

A tuk School ka kal erawh thil zahthlak tak ka tawk ta a. Tluang takin class kan kal nileng leh a. Ruatfela nen kan la inbe ta chuang lo. Inbe lo tihah mi awm lai chuan a thuphung chuan kan inbe tho. Mahse, a hmaa min biak dan ang khan vawikhatmah min be lo. Ka vui ru em em tih a hriat la hlauhna chuan min tihah zawk. Mamawii a ngaihven leh care riau te chu hmuh nuam ka ti lo. Ngaipawimawh lo deuha namnul ka tum reng a, chu chuan min tihah hluah hluah. Class kan la reng zawk a, kan inhmu tam lo hlauh. Banah scooty ka lak chhuah dawnin "Nang kha lo la ding teh" fiak thaka ti ri ka hria a. Ka hawi chhuak nghal. Kimkimi leh Sangpuia rawn inzui phei ka hmuh chuan ka chau zual. 

Ruatfela leh mamawii inphurh tum pawh an la ding ve a. Kan student thenkhat pawh an la tawi khawmuang. 

"Vawikhatmah ka bialpa hi lo be tawh suh ang che" tiin a kutzungchali min rawn kawk nia!  Ka hawi phawk ngang mai. 

"Eng nge i sawi awmzia? " ka lo ti hû! 

Kimkimi chuan, "Hre lo der suh. Nang ang mi lepchiah, zahna chang hre lo hian ka bialpa hi rawn hnaih tawh lo la a ni mai. I hria em? " a ti leh bawrh bawrh a. 

"Sangpui, ka lo be ngai che em ni? " dam thlapin ka ti a. Sangpuia zawk ka melh. 

Hmel pha dai hian, "Biak ve zeuh zeuh kha. Ka reply loh che pawn" a ti anih chu!  Ka leng lawp ni hian ka hria. Ruatfela min lo melh kartu ka va hmu zui. 

"Vawikhatmah kan inthen hnuah ka lo text lo che. Nangmah zawkin anih kha min lo bia. Ka reply lo chung che pawn min rawn be ziah anih kha.. Dawt chu sawi lo mai teh" ka ti ve hlak hlak a. Ka tah a chhuak. Hmeichhe nasa ve tak kha Ruatfela awm ve vang nge ka zâm tlat! 

"Awihawm loh e. I sawi letling anih chu.. Ka block reng che a, ka unblock veleh che min rawn be leh anih kha" Sangpuia dawthei lutuk chu ka melh tlawk tlawk ringawt. A msg nise ka lo clear vek tawh si!  A va pawi tak em. 

Kimkimi chuan hnai set sawtah min dinchilh a, "Nau titla i nih thu hi tlangaupui i duh loh chuan, ka bialpa hi hlat ang che. Eng atanmah a ti lo che. Nawmchen nan chiah a duh che" a ti ta phiar phiar a. Ka mittui a hnám sawk!  

"Duhtawk rawh u. Mi in an en thup che u hi.. Malsawmkim, miss Eli kha khatiang ankhum ngam tur i ni lo. Nang kha eng nge i nih? " Ruatfela aw chu a chang tha beng bawng viau. 

Ruatfela kha a hmain a lo hmu lo nge a hmu chiah chu Kimkimi chu a tawlh deuh dáwrh mai. Makti hmel a pu bawk. "Eng nge i tih ve a? " a ti tham chhal a. 

"Ka du duh" a lo ti bung nghut. 

"I lo inrawlh vena tur a awm lo ve.. Mipa ve si" Sangpuia chuan a lo ti ve. 

"Mipa tia i inchhal ve ngam chuan kei chu nang aiin ka pa hret ang. Miss eli, hawn san rawh.. An rui anih hi… " a rawn ti a. Ngawi rengin scooty ka la chhuak a, mittui khap per chungin ka tlan chhuak ta a. Eng tin nge an awmzui tak ka hre lo. Mamawii sawi leh danin Kimkimi zawk khan Sangpuia a kai a, kal a rawt ta chung chun a niawm e. Ni e, Ruatfela bialnu hlui a ni miau a. Kimkimi thusawi nau tihtlak thu kha ka bengah a ri ring viau. In ka thlen pawn ka la ngaihtuah zui zel. Sangpuia ka atanga chhuak ngei anih ka ring bawk. Ka student te an awm ve lehnghal a, nau titla anga min hre tur chu ka ngaingam thlawt lo. Ka tihtlak lohzia hretu ka nei. Ruatfela ka ngaihtuah leh a, a inrawlhna tur ni miah lovah a inrawlh leh ta. Nidang chu nise ka ngei leh maithei. Mahse, min chhanhimtu a ni tlat!  

Ka be chak ta tlat. Zak chung chungin, "Ruatfel, an sawi zawng zawng kha thudik a ni lo ania aw.. Ka be ngai lo. Nau ka titla hek lo" ka va ti tawp!  

"I insawifiah a ngai hleinem. Insawifiahna chhan tur i nei lo ve' a rawn ti. Ka tliak hnâwpin ka hria. Ka na ta lutuk anih chu. 

"Nia, mahse, ka sawifiah ve duh hrim hrim a" ka ti.. 

"A tha lawm.. Ka rin leh rin loh chu ka thu ania" a rawn ti. 

"Aw.. Hetiang mipa in nih vang hian alawm ka mamawh loh che u.. A tawk. Ka lawm e" ka ti a. Ka dah daih. Lukhumah ka hmai ka phum a. Ka tap. Tu vanga tap nge ka nih ka hre bik lo. A tuk School kal chu ka phur lo kher mai. Chawlh ngawt chi a ni si lo. Ruatfela hmuh ka hreh. Ka msg lah kha a chhang duh thak lo lehnghal. Schoolaj pawh min be leh ta chuang lo. Naupang thenkhat chuan min melh hrek hrek niin ka hria a, ka awm a nuam thlawt lo. Ka inringtawk lo a ni ber. Sangpuia ka huatzia chu a hmaa ka lo hmangaihna let hnih dawn aniang. Kimkimi tak chu ka haw hran lo. Mahse, khatia mi awm tam laia min rawn timualpho erawh hmeichhe fing tak niin ka hre bik lo. 

Ruatfela chuan phone a khawih malh malh reng a, Mamawii nen pawh an inbe tam vak lo. An inphur ve thin sia, an ni tawh maithei ni. Mahse, Mamawii hian engmah min la hrilh lo.

Kohhran hi a hma kha chuan ka bel ve viau a, mahse,thununna te ka han tawh chhoh takah hian ka inthlahdah chho ani ber. Ka inkhawm ngai meuh lo. Tupawh chu ka la zah thûm. Ka hna erawh loh theih loh anih vangin ka kal a ni mai. Veng chhunga chhiat tawk an awm pawn kan in hnai an nih loh chuan ka nau a kal hi ka duhtawk mai. Ka nu te pawn min hau lem lo. Ka la zum ve rih a ni mai. Kar tluanin Ruatfela nen kan inbe mang lo a nih ber chu.. Sunday zan a ni a, ka inkhawm leh ta lo. 

Naupangho project tur ka buaipui a. Ka zawh meuh chuan a lo tlai ve duai mai. Ka inphihfai a, ka mu ve ta a. Ka phone ka'n en nak chuan, Sangpuia msg a lo awm leh nawlh. Clear tawh miah loh tur a ni. Mahse, a thusawi chuan min tihrilhhai angreng. 

"Kimkimi khan min phatsan a. Kha pa Ruatfela in schoola thawk lakah khan, a ex a nia, an lo inbe tha leh aniang. Nichin lawk khan an pahnih thla lak dun min lo thawn.. " a rawn ti. Engvanga min rawn hrilh kher nge maw a nih le.. Ka hriat a tulna a awm miah lo asin. Ka na ve tho si a! 

"Chu chu enhvangin nge min hrilh? " ka va ti ta reng a. 

"Ka hre bik lo. Ka hrilh chak che aniang. A mak ka ti em a. Ngaihdam dil che ka duh bawk a. Ka lo biakna che kha ka delete hmaih palh a; a lo hmu sia. Tikhan dawt ka sawi ta ringawt anih kha.. Sorry aw" a rawn ti. He pa thisen sanzia hi chu aw

"A ho em mai. Ni mai mai teh se.. Ka ngaihven peih lo. " tiin ka chhang. 

"Chuan, nau tihtlak tih vel kha chu ka sawi miah lo. I titla lo tih ka hria kei pawn" te chu a la rawn ti. 

"Umm.. A ho.. Min lo be tawh lo la, i awm awmin awm rawh" ka ti hmiah. 

"Chuan,. Min hmangaih tawh miah lo tihna maw? " a la rawn ti!  Ka chhang peih tawh lo . Ruatfela last seen ka check, a lo online vû!  A status ka va en. A nei lo. Kimkimi nen an ni leh ta chu a mak ka ti angreng. An buai nasa viau khan ka hre sia. 

A tuk ka school kal, scooty ka hun that lai chuan Ruatfela pawh a rawn thleng chawpchilh ve nghal a. Ka lai leh ringawt. Ngawi rengin School kan pan. Office thlen dawn tèpah, "Sangpuia pawh a single leh tawh kha.. Ni leh ru" a ti sup. Ka ding chawt a. Ka melh reng ringawt. Min tielna tih ka hre tho, mahse, ka hamhaih a ni ber. "Ka duh tawh lo tlat' ka ti hmak a. Ka kalsan hmawk hmawk. Nilengin ka mood a off. Phone ka khawih sek ringawt. Biak tur ka hre chuang lo. You tube te ka en thul. Ruatfela lah a thawven hmel ropui bawk si. Ka ngei. Ka hua. 

Zanah ka nau a lo haw leh pek lo. Ka pa a thinrim si, ka call a, a chhang thei der lo. Ka u erawh an hna thilah an zin hlauh zawk a. Rempuii hi chu aw.. A va hahthlak thin tak. Ruatfela'n min lo call tehmial, "I nau hi a rui riau a, rawn hruai haw ka tum lahin a duh bawk si lo. I lo hruai mai dawn mi le? " a rawn ti. Lalrempuii mai mai chu!  Ka pa ka hrilh, amah kal a tum. Ka nuin mualpho a hlauhawm tiin a dang bet. Kei pawh chuan ka pa thinthawk natzia ka hriat vangin kal lo mai se ka duh. Thiam ang tawkin kan hrilhfiah a. Keimah ka chhuak ta a. Dar 10 dawn a ni tawh a, mahse, veivak an la awm ve reng a, ka hlau hran lo. Ruatfela sawina hmun chu ka thleng a, stepah ka chhuk char char, hetiang daih daihah Rempuii chu a lo kal thin tihna a nia. Min tihah lutuk. Ruatfela ka call a, pawnah ka awm thu ka sawi, lut turin min ti a. Ka va lut chu Ruatfela leh a thiante niawm tak pathum leh Hmeichhe pahnih bakah ka nau chu thutthleng seiah zawi em emin a lo mu. Inneitu niawm tak nu phanchang lam deuh, nelawm deuh si a lo awm ve bawk. 

"Rempui, heiii.. Harh rawh. Haw ang" ka ti nghal thâwr a. An rui vek tho va, ka zahpah duh lem lo. 

A zi telh telh a, mitmeng paw phûtin, "Khaw nge ka awm' a ti niah niah a. An lo nui hak. Ruatfela a rawn phei ve a, "Rempui, haw tawh rawh. Duh aiin i rui tlat a. A tha lo.. Hei i u nen hian inphur haw ru" a rawn ti ve a. A tung tho lawp. Ka nau lah a bu suau ringawt a, min va tizak tak. Ti nge maw pasal a then hnu hian zu hi a ruih fo ni.. A pheikhawk ka buntir a, ka kuah ta a. A zawi si, min tlukpui lek lek zawk. Ruatfela leh a thiante chuan an zawn ta a. Mahse, engtin nge scootyah kan inphurh theih ang le.. 

"Rempuii hi chu in pui tawh lo vang u, nawi ziah chintawk a hre ngai lo si. A zahthlak. Thing thei em mai" an thiannu niawm tak pakhat chuan a lo ti bawrh bawrh bawk a. Kan buai nen ka chhang duh lem lo. A sawi dik ve tho bawk sia. A rui chhe thei em a ni. Thiante tan pawh a ngeiawm ang. A kawlh ve fang lehnghal a. In thlen hunah a chák lo vang chu.. 

"Engtin nge niang le.. A tlak ka hlau bawk sia"Ruatfela ka melh a. 

"Ka hre bik lo. Kalna tur kan la nei sia" a ti sup. 

"Ka pi, khawngaihin hrui i nei mial em le?min lo hmantir hram ta che.. " tiin in chhungah ka zuk lut leh. A lo fel hlauh a, hrui sei angreng tak min lo pe a. Scootyah chuan ka thu a, Rempuii zawi nen, bûk bûk chu a kawngah hrui chuan ka vet a, ka kawngah ka phuar ta bawk a. Balance a buai ngei dawn e. Mahse, kum eng emaw zat scooty ka khalh ve tawh a. Ka tlukpui èm lo vang chu maw. A mah Rempuii chu ka be reng bawk a. 

"Chuan, ka lawm e aw. Min lo hrilh a. Ka nauin a tibuai thei che u sia, a tihbuainaah che u ngaihdam ka dil nghal bawk e.. Ka lawm lutuk ania" tiin a thiante chu ka melh kual a. Ka tlan ta a. Ka tang teuh mai. Ani lah a thle tawn sek bawk si, Engtin tin emaw in chu kan thleng ta hram. Ka nuten an kuah lut a, scooty ka hun that lai tak chuan kan in piah lawka bike ding, min hnungchhawn zawnga tlan tum mek chu ka va hmu!  Saw bike dawn min zui zel anih kha.. A bike ri atang chuan tu nge tih ka hre thei? Engvangin nge min zui?! Remruatfel leh! 

Phone pawh khawih tawh loin ka mu nghal. Ka nau chuan ka mang a tiang a ni. Khuahkhirh a ngai tawh anih hi. Zingah ka pa in a hlap thak thak mai. Ka nu pawn a tan duh tawh lo. A sual reuh em a ni. A tap vei par a, a titau leh bur bur mai. Tuman kan be duh si lo va, hrehawm a ti ngawt ang. 

School ka kalsan ta a. Ka nau chu ka rilruah a awm ve reng mai. Ruatfela nen kan thleng rual leh chiah. Ka zah duh vak tawh lo va, "Nizan khan min rawn zui leh tho sia, ti nge dawt i sawi kher a? " ka ti nghal tâwng a. A khi suk. "Ka hre bik lo" a ti mawl tawp. 

Ka be zawm ta chuang lo. Mahse, vawiin chu min melh zing leh hle. Min melh zing tih hre turin ka lo melh zing ve zel tih erawh a lang. Ka bialpa ni turin ka la suangtuah duh chuang lo. Zu a in thin a, hnathawh mumal a nei hek lo, tin, insual a la hrat reng bawk. Kei aiin kum 5 in a naupang. Kha kha theihnghilh chi a ni lo. Mamawii nen an inbe tam lem lo. Ka mitmei veng ang hian a awm. Banah pawh a hawnsan daih. In ka thleng a, ka nuin, "Lo call che kha ka hreh deuh a, i pa ka hrilh ngam si lo va, Rempuii a chhuak leh tawh. A chhuak tau bawk sia, ka ngaibtuah riau mai" a lo ti nghal sawk sawk. Chauh ve nak alai hian aw. Ka u tal awm se a zia tur. Kan teber lah hi mi zakzum leh chut lutuk a ni bawk si. Bakah a rooma tawm tlawk tlawk chi, thu leh hla nei lem lo a ni. Ka pa erawh a lo la haw lo. Ka inthlak a, Rempuii zawng turin ka chhuak leh nghal. Ka call a, a ring quit thak thak

.. 

Ruatfela ka be ta tawp. Ka hrilh a, tihdan ka lo dap ang a ti a. Ka haw leh ta phawt. Ka pa a lo haw tawh a. Ka nu chuan a thu zaizap zawngin ka nau chhuah tauh thu chu a lo hrilh mek a. A rum nghut nghut, "Lalrempuii hi chu aw.. Tu chu nge maw a chhun ni.. Heti reng renga han nun tlat mai chu.. Zawn a ngai lo, a duh duhnaah va theuleu rawh se. Keini aia hmangaihtu a hmu dawn chuang lo. A nin hunah a rawn haw ve mai ang" a ti nghut nghut a. A vei kual sek bawk. Ka nu nen kan ngawi dák mai. Zanriah kan ei a, kan ei tlem tlang kher mai. Ruatfella ka ngaichang deuh a. Ka beisei ang ngeiin dar 8 bawr velah min lo call ta a. "Kan inah ka hruai a, ka roomah a awm" a rawn ti ta mai!  Lalpa leh! 

Ka pa chu meeting turin a chhuak a. Ka nu ka hrilh nghal. A rang arangin ka chhuak zui nghal. Ruatfela te in chu la kal chiah lo mah ila, a awmna lai vel chu ka hre tho va. Sir Sapa a awm ngei awm sia, ka va zak tak em.. Chuta karah a fapain min la ngaizawng zui!  Ka thlen dawnah ka call a, a lo chhuak. Vanneih asiamin in hnuaiah a room a lo awm a. In chhung luh kher ngai lo vin in hnuai lamah kan inzui thla ta a. Engtin nge a biak pawh theih tih erawh ka zawt lo. Ruatfela call chu a la duh tih ka hai lo. 

Ruatfela khumah a lo mu a. A rui leh hle. Keh nawk nawk hi ka va chak tak. Ka insum hram hram a ni. Min hmuh rual chuan a thu chhuak a, "Ka rawn haw dawn lo" a ti nghal. 

"I rawn haw khawp ang" ka lo ti sak. Ka va ban a, khum kil lamah a tawlh phei, keiin a chhip samah ka va kek bawk. Kan innawr ngat ngat mai. Ka thinrim tawh a, min timualpho zing tawh. Dim ka tum lo. Ruatfela bak an awm lo bawk a. 

"Insum teh u. A chi loh em mai" a lo ti a. Keimah chu min pawm bet. 

"Ka rilru natna pawh in hrethiam lo. Zuala nen inneih leh pawh kan duh, mahse, ka pain a phal tawh lo va, ka hmangaih asin.. Engmah in hre lo" tiin ka nau chu a tap hliam hliam a. Zu rui tap hi chu thlem vak dan a awm lo. 

"Zuala chu i va pan chuang si lo ve. Engvangin nge Ruatfela khumah i mut si.. I. Zak lo mi? "Ka lo ti. 

"Keiman ka hruai lawm.. Insum rawh.. Liz.. " a rawn ti sup a. Ka ding khawng lah, tunah khan engtin nge min koh?  Liz tiin maw? Sangpuia chiahin Liz tiin min ko thin. Mahse, chutiang ngaihtuah hman ka ni lo. Ka nau chu ka theihtawpa nemin ka thlem a. Ruatfelan min lo pui bawk. A tawpa tawpah kan inthlem chhuak thei hram. Kan chhuah dawn chuan ka banah a rawn vuan a, ka nau chu a kal hmasa a. 

"Ka la danglam lo" a ti thawp sat a. A mitah tak ka va melh. 

"Kimkimi i neih kha" ka ti nghat a. Ka chhuahsan nghal. 

Rempuii chungchang chu kan sawiho a, Zuala nen chuan inneihtir leh mai chi nge ka hrethiam lo. An inthen leh tho a rinawm bawk si. Ka nau in buaina a tawh apianga Ruatfela lang ve ziah pwh hi a mak!  He pa hi kei pawn ka haw tawh lo. Haw tawh lo tak ka ni. Mahse, Ngaihven huam ka duh lo mai a ni. Kimkimi nen an ni leh tawh bawk si. 

Ka pa remruatnain Rempuii chu ka papuia te awmna Chhiahtlangah a zin ta a. A hreh lem lo bawk a, rilru a tihah tawh lo deuh ang chu. School kan chawl bawk a, in ka ti fai a. Darthlalang nawh pahin ka zai rát rát. Tumah mi dang an awm ve lo. 

Kawngka a inkalh lo va, a rawn inhawng rawk. Sangpuia a lo lut hlawl mai. A mitmeng chu a chiang vak lo bawk. Ka pa te an awm ang tih ka hlau kher mai. 

"Eng nge i lo tih dawn a? " ka ti chang rát. 

"Liz, ka ngai lutuk che.. Khawngaihin bultan leh ang" a ti a. Min kuah a rawn tum nia!  Chutiang taka a laka ka zuamawm ka hre hauh si lo. 

"Min chhuahsan rawh. Nang ang mi tenawm leh bumhmang hian min hneh theih ring suh..ngaihzawng ka nei tawh" ka ti a. Ka aw pawh a ring angreng. Thil dang a sawi leh hmain ka nam chhuak nawk nawk mai. Ka thinrim em em bawk. Min zah lo lutuk leh min hmusit lutuk chu. 

Zanriah ei hmain ka patea fanu Tluangi tleirawlte mai chu an bathroomah a tlu palh hlauh mai a, chaw pawh ei lo vin ka han buaipui ve. Damdawiinah kan chho a, a insawh na reuh viau mai. A khel bawr vel chu na a ti ngang mai. Nuteii nen kan buaipui vat vat a, Doctor leh nurse ten an han buaipui takah chuan pawnah ka va hawi khawthawng a. Ka rin loh deuhin Kimkimi ka hmu. Ka hma zawnah a rawn phei zel a, tu emaw a awmpui a ni maithei. Min hmuh chuan a ner nak. Kei ka lo dak deuh vah bawk. Ka hlau lo nasa. Bakah Ruatfela bialnu a nia. Ka ngei ve hrim hrim bawk. 

Tluangteii chu an admit tak siah chuan, anuin a riahpui dawn a. Patea ten chaw an rawn pe a, inthlakna leh puanthuah tih vel te. Kei pawh an ruala haw turin ka chhuak ve a. Damdawiin kawtah Kimkimi leh Ruatfela ka hmu dun. Ka en duh lo lui naa ka mitsirin a hmu reng. Ruatfela zawk chuan min rawn en niin ka hria. In ka thlena phone ka en chuan, "Min hmuh loh der kha a ngai mi? " a rawn ti. A msg ka dawng khat tawh a, ka hmuh chuan ka khi sak. 

"In nu kha ka hlau alawm" ka va ti ve. 

"I la hre mai ang" a ti ringawt. Eng nge ka hriat tur ka hre lo. 

Ka thiannu thin Mazawni te inneihna hmang turin ka chhuak a. Ani nen hian college kan kal dun thin. Mahse, a hriselna lam chiangkuan loh vangin a chawlhsan a. Kan la inbepawp zui ta zel a ni. Pasal tha tak mai a nei dawn a, ka lawmpui khawp mai. Kei pawh hi pasal nei lo rual ka ni tawh hran lo, mahse, ka tum ta lo kha a nia!  Sangpuia vang vek.. Inneihnaa kal pawh kan tam. Kan khat mup mai. Banah thla te ka han lakpui ve a, ka rin loh deuhin Ruatfela leh Kimkimi ka hmu. Tin, Sangpuia pawh. Mazawni pasal hi nupui sûn tawh, fa pahnih nei, hausa zet mai a ni a. A lar a, chhungte an ngah bawk nen. Chung vang pawh aniang, heng mite pawh ka hmuh. Kei erawh Mazawni cousin Tei te nen kan awm ho a. Kan inhresa ve vek. Tlaiah a lawmna chawhlui kan ei laiin buaina ka tawk leh ta pek!  Teivet zel hian.. 

Sangpuia chuan ka chaw dawh lai chu min rawn dinchilh ren rawn a, "Ka fa paitu i nih hi. Ka lakah induh ve vak suh' ring tawk tak maiin an ti mai chu!  Ka thlawk lo chauh. Ka zahzia chu thih daih ka chak. Min rawn en thup bawk si. Chhan ngaihnna lah ka hre hauh lo lehnghal. Ka hamhaih a ni ber ang chu.. 

"Biak che ka duh a ni.. " a hma aia zawi deuhin a ti leh a. Hetiang khawpa min hmusita min kalpahtu hi ka hmachhawn ngei tur a ni. Satui chu ka la lawk a, a hmaiah ka theh ta hmiah! A rak thawt. Min ben tumin a kut a lek uaih a, mi pakhatin a ban chu a lo man chawt!  Ruatfela bawk! 

"Kalsan zawk la a that ka ring" rum el awl hian a ti sup. 

"Lo inrawlh suh. A eng nge i nih? ' Sangpuia rui chu a tawng sehchilh nawk nawk mai. 

"Ka bialnu a nih hi" a ti ta a. Ka lo ding zum zût ringawt. Ka banah a rawn kai, kil khata Sir Sapa te nupain min rawn melh reng chu ka va hmu vuai. Min kalpui hlawk hlawk a, ngawi rengin ka zui ve tawp. A car bul kan thlen chuan Kimkimi a lo ding. Rum zetin min melh a, a biang a tai hlar bawk. 

"Eng nge i tih hi? " Ruatfela a melh há. 

"Kal sawn la a that ka ring. " a lo ti nghut. 

"He nu hi eng nge anih? Nau titla tawh hi? "

"Sawi nawn leh la chuan hmana Ruatfela kha ka la ni reng tih ka hriattir ang che" 

"Zawngi, nangmah vang hian kan buai ziah.. Eng nge i hriat? "Tiin min rawn melh. Ka ngawi reng. Ruatfela chuan Kimkimi chu a nem sawn a. Car kawngkhar chu a hawng a. Lut turin min mitmei a. Ka lut ve mai. 

"Chuan, Kimkim, kan tawp aw. Ka hmanrua mai chauh i ni.. Ka bialnu i tihnatna phuba anih hi" tia Ruatfela sawi chu maimichhing chungin ka lo ngaithla. 

Kan tlan lai mekin ruah a rawn sur thut. A sur hnem zèk lehnghal. An in lamah min tlanpui. Engmah ka sawi thei lo. Ka zak lutuk chuan min ngawihtir a ni ber. A roomah kan tlan thla. Kan huh hman nual tho. Khum bulah ka ding ngawi reng a, towel min rawn pe a, ka lo inhru hul thuak thuak. Ka puan bih leh ka kawr hak chu a hnawng chuap sia, thut pawh ka inthlahrung. Tshirt leh a boxer niawm tak min rawn pe leh tawp. Bathroomah ka va inthlak ve mai. Eng nge ka ngaihtuah ka hre miah lo. Mahse, Ruatfela hi a la danglam miah lo tih ka chiang. 

Ka va chhuah chuan khum bul sofaah a lo thu a. A inthlak vek tawh bawk. "Thu rawh" a ti a. Ka thu ve mai. 

"Ka chet dan kha pawi i ti em?" A ti leh a. 

"Ka hre lo" tiin ka chhang. Ka kut a rawn la a, ka mitah chiang taka enin, "Sangpuian a tihnat man che kha hmu se ka duh a, Kimkimin a tihmualphona che man kha hmu bawk se ka duh vangin khang zawng zawng kha ka ti a ni.. " a ti dap dap a. A aw a dam thluam mai. Kei aia Naupang mah nise; a chet dan chu kei aiin a puitlin hmel zawk. A hmaa ka ngeina leh ka huatna te kha a bo vek tawh. Ruatfela chu ka mamawh em em tawh zawk niin ka inhre hial. 

"Ka lawm e" ka ti sap a. 

"Chuan, ka bialnu i ni thei tawh ang em? "Ngenngawl zet hian a ti a. 

"Ka hre lo.. I pa ten…."ka tih lai mekin ka hmui a rawn hup a, "Ka buaina tur a nih chu' a ti leh sup a. Ka inrin hmain min rawn fawp nghal. A duhthawh nghal kher mai. Ka lo chhanglet ve nghal zat. A zeizia chu mak ka ti thlawt.. Ka hnute a rawn hup nghal chat bawk. 

"Ruatfel, sex hman ka duh lo ania" ka ti tham chhal a. 

"Ka hria.. Kan hmang lo vang" tiin a inlahrang nghal a. 

"Buaina tam tak kan la tawk dawn ania. Chuvang chuan inlaichinna nei lo law law ang. I chhungte bakah age gap" ka ti nghal tawp tawp. 

"Ka ngaihtuah vek tawh.. Ka chingfel ang' a ti ve fun si. 

"Min play mai mai a ni lo maw?  I rualpui hmeichhe nalh tak tak an tam a. Kei kher " ka rilrua awm reng ka sawi chhuak. 

"Ka hmuh hmasak ber che chu school bula ka lo chhaih tum che khan a ni. Chuan facebookah tlang taka i comment ka hmuh khan, ka hmeichhe duhzawng ka hmu ka ti tawp.. Ih, maw, ka atchilh lutuk che hi ka inhaw ngawih ngawih thin asin

. ka tana Pathian ruat i nih ka ring' a ti nghet charh mai. 

"Nau tihtlak vel kha.. "

"Ka hria.. I hriat loh hlan hian ka chhui ve nasa che alawm" a ti. Ka thawl hawk. 

Ruah a la si. A chhungte an lo la haw mai lo nen, a khumah kan insawn a. Kan inkeih leh mial mial mai. Mahse, a insum thei ngang mai. Mipa naupang, fit rual lek kha a ni si a. A hmel tha zet chu ka en ning thei thlawt lo. A la naupang deuh tih erawh a lang. 

"Ti nge inkiss lai hian hnute hi inkhawih kher zel a? " ka ti a. A ban lukhamin ka mu mek. 

"A sehhmeh alawm" a ti sup. A tawng pah chuan ka hnute chu a khal pah niap niap bawk. 

Ruah a han tan a, min va thlah hawng ta a ni. Ka hlim veng veng mai. Mahse, zanah Sir Sapan min lo bia!  

"Ka fanu ang chiaha ka en che i nia, duat pawh ka duat che. Mahse, ka fapa hi nula hnahkhat leh ama rualpui awm vel neihtir ka duh a. Puitling zawk i ni a, i lo hnar thei ang em? " a rawn ti. Zahawm ka ti mang e. Buaina kan tawk nghal ta pang chu a nia!  Ruatfela chu apa min lo biak dan ka hrilh. Lo lungngai lo turin min hrilh ringawt. Ka rilru a hah ru tho. 

Weekend chu ka bulah a hmang tihtheih a ni. Sunday chawhnuah phei chuan an huanah kan zuk kal daih. Kan pahnih chauha awm nawmzia leh ka hlimpuizia ka ngaihtuah hian Pathian ruat a nih ka ring ve rum rum thin. Induat hliak hliak si lovin thian tha pangngai angin kan inkawm a, kan titi a, a chang leh kan inum thul. Ka naupangtha leh a ni ber. Kum chungchang sawi a phal ngai lo va. Sawi pawh ka tum tawh hek lo. Ka indaidanna bang a chhutchhiat theih vang nge ka tan chuan a hlu a, a pawimawh lawtlak. Mahse, insum ka tum tho. Duh huam anga lan ka duh lo. Mipa puitling angin an la nghet tak tak si lo. 

A sawi tawh ang ngeiin Mondayah chuan Sir Sapa a rawn kal ta zawk a. Ruatfela nen kan inhmu khât dawn ta. Pangngai takin Sir nen pawh kan inbe tho. Kan nui leh huah huah, mahse, mi dang hriatthiam theih si lohin kan inkar boruak chu a nuam lo ru hle thung. Ka zah em em, mahse, a fapa hi chuti maia hnawla hnar theih a ni lo. Fapa tumruh leh luhlul tak a nei tlat si a. 

"Liz, karlehah ka zirna chhunzawm turin Hyderabad-ah ka chhuk dawn ta anih chu" Ruatfela msg chu ka chhiar nawn ka chhiar nawn mai. Keimah vang tih ka hai der si lo. Zantin a rawn leng a, ka nute pawn an hre vek tawh. A la naupan vangin min khak, mahse, min khak na lem lo. Kan inngaihzawn atangin zu a in ngai tawh lo va,tumah a la sual miah lo bawk. Mahse, sunday zanah ka nute inkhawm hlanin a lo leng a. Sangpuia a rawn lut ve hlawl mai. A meng sen rûm a. 

"Liz, in be lawk ang" a ti a. 

Ka ding hluai a, "I hmuh hi. Ka bialps a awm ve reng hi" ka ti nghat. 

"A play mai mai che anih hi.. He mihring hian, kimkimi nun pawh a tichhe tawh. I nun a tihchhiat ka phal lo" a ti pawr hlar a. A ding bu luk luk mai. 

"Chu chu ka buaina tur a ni e. I lo buai ve a ngai lo. Nang hian ka nun i tichhe tawh a, rawn lang fo lo zawk teh" ka ti a. Min rawn kai ve ngawt. Ngawi renga thu Ruatfela ngaihdan a ni ta lo aniang. Eng sawi set set lovin Sangpuia khabeah a hnek bur mai. A tlu thal thuai a, ka lo rak tuar thung.

"Ka bialnu, ka nupui hual hi i biak pawh ka phal lo. A hmaah hian rawn inlan tawh suh.. " a ti a. A kawr nghawngah thamin, kawngkaah chuan a hnukchhuak ta a. Ka zui ve zel. Pawnah a nam thlu thuai a, Sangpuia rui tawh si chuan a hneh vak lo a nih hmel. Engmah sawibtawh lo vin kawngka a khar a, in chhungah min luhpui daih. Mahse, a titau thung. 

"A la biak reng ngamna chhan che hi a awm ang" tiin. A thinrimna chu âwm ka tihpui ve tho. Mahse, ka theibtawpin ka hrilhfiah a, lungawi tak chuan a haw ve tak kha. Nilaiah phaiah a chhuk tawh dawn si a. Nilenga inhmuh kan duh si, Principal bulah kawthalo angin ka insawi tawp. Sir Sapa chuan a hrethiam ngei ang. Ka pawisa zo ta bik lo a ni e.  Tuesday nilengin an huanah kan zuk in awm. A changin kan mu a, tui kan cheng thul. Body massage kan ti thul. Kan insum thei lo hman thelh a. Mahse, mak takin amah zawk a inlahrang! Ka lawm takzet. Ka hrechiang telh telh a. Ka ngaisang tulh tulh. Man ka ti em em bawk. Sangpuia nen ka compare chang a awm lo thei lo va, an danglam lawtlak. Sangpuia chu hrilh chawpa ka duhna tihhlawhtlintir a ngai fo. Ruatfela erawh a famkim ka ti tawp. Engmah hrilhchawp leh nawrluih chawp a ngai lo. Mipain a bialnu laka a tih theih awm zawng zawng hi ka tan a ti ti mai ang. 

"Ka chhuk anga, lo rinawm ang che. I rinawm lo tih ka hriat rualin ka rawn thlawk chho nghal ang" a ti hem mai. Kimkimi laka a chet tawh dan ngaihtuah chuan rinawm lohsan ka ngam ka ring lo. 

A chhuk ni chuan ka ngui nileng a ni tawp. Mamawii hian a hrethiam ve tawh a. Ruatfela kha lo star ru mah se; min hnem thiam angreng. A fel ka ti khawp mai. Chutiang chuan Ruatfela nen chuan khaw hmun lohah kan han awm ta phawt chu a nia. Kan inbe awl lo. Video call lah kan hmang rei. Kan inzaisiak thul. Inngaihzawnna hlimawm zawng zawng hi ka tan min chhawpsak ka ti tawp. Then phal chi a ni lul lo a ni. 

Kum tawp a lo hnai tan a. Ani pawh mas a rawn hmang turah ka ngai. Sir Sapa hian a fapa chungchangah min be leh ta miah lo. A awmdan erawh a ngai reng. A la ngainatawm reng mai. Ka nau pawh chhiahtlang atangin a rawn haw tawh a. A nun pawh a fel chho tan. Phone dawrah hna a hmu ve hlauh bawk a, mi biangbiak a thiam bawk a. A thawhnate pawn an duhsak chho ta hle. Zuala nen erawh an tawp hlen ta nge bialpa a nei leh daih tawh. 

Ka nau nen chuan kan bazar a. Lei tur a hre thei sia ka ning. Ruatfela nen kan chanchin ka hrilh ve vek a, min lawmpuiin Ruatfela a fak thei rap. A tan khan a hlu ve em bawk a. Zion street -a pheikawk sale kan en laiin Sangpuia leh a thianpa te nen kan inhmu leh ta hlauh mai. Inhmatawnin kan ding dun a, "In bazar ve law" a ti a. 'Aw nih hi" tiin ka chhang a, ka nau nen kan kalsan nghal. 

Zanah Ruatfela'n Sangpuia nen kan ding dun lai thlalak a rawn thawn a, "Tenawmnu" tiin min rawn ko nia!  Mak ka va ti em! Tu rawn thawn che nge ka tih lahin a sawi duh si lo. 

"Naktukah ka rawn thlawk haw dawn" a ti!  A zirna a laklawh si. Apa te mitmei ka veng a, Lo chho rih lo tur leh ka rinawmzia hrilhin kan inhau chu a ni ta ber mai. A luhlul si. Tihngaihna ka hre lo. Kha thlalak kha Kimkim thawn a nih ka ring. A sawi duh tlat si lo chu ka ngei. 

A rawn thlen zan chuan min rawn hruaichhuak. Ka nute phalna erawh kan la thlap. A cousin te inah min hruai a, kan inhre ve tawh tho naa ka nel lutuk lo. A cousin roomah kan chho. Bang thlanglamah min nawr bet a. Thinrim hmai sen vekin, "Kha mihring i theihnghilh theihna tur khan eng nge ka tih la ngai! " a ti hrâwk a. Hlau leh kimki in bang ka ngheng rawk rawk. 

"Engmah a thleng lo" ka ti chhuak thei tâwk!  A kut a hum ruh a, min khawih hrep duh hmelpu hian min en. Ka lo maimichhing tawp. Bang chu a hnek ta bur a. Ka lo phu zawk. Min rawn kuah thlawp a, ka awmah a hmai a phum. 

"Ka ta i ni. Ka ta chauh i ni" a ti tham tuak a. A luah chulin duat takin ka lo pawm a. Ka tah a chhuak takzet. Khumah chuan kan thu a. A thawnthu ka zawt sek sek, a phone min pe ta a. Mak ka ti!  Mamawiin a lo thawn! Tin, a lo bem char char bawk.

"Eli hian a bum che tih i hre si lo va, Sangpuia nen an la inhmu reng, Sangpuia hi a fa paina a ni a, a theihnghilh ring suh.. " ti lamin a lo be ngat ngat nia. Ka thinrim takzet. Mahse, min khap a. Mamawii chu, "Hei i dawt sawi zawng zawng kan manchhuak tawh e. Kan awm dun mek. Thian tha anga lang, chhungril tenawm tak nih kha bansan a tha" tih thu ka thawn ve ngat. A rawn reply lo. Ka block hmak bawk. Ani pawn Sangpuia min block sak. A tawpna chu nuihna a ni leh thei ta hram e. 

A chhuk duh tawh der lo. Min hmu phak lo va awm kha a hreh tawh a ni ber. Theihtawpin ka nawr. A tum lo bur. "Hna ka zawng mai ang. Ka hmu bawk ang" a ti tlat!  Huizzz… 

Inrinnin zingah Sir Sapa leh a nupui an rawn leng ta hlawl mai. Ka lo zám em em. Ka hlauh ang ngeiin a fapa nen kan inkar titawp turin min rawn ngen. Mi sual tak an ni lo. Mahse, hmangaihna an hrethiam lo a ni mahna. Ka ngawi reng. An chhuah hnuah ka pain thupek a chhuak. Ruatfela ka hmu tawh tur a ni lo tiin. 

Inhmuh theih loh leh a ruka inbiak a ngaih tak chinah phei chuan kan inthlakhlelhna a zual sawt a. Inhmuh ruk dan kan dap char char. Ka nau a tangkai ta. Ani chu a fel tawh bawk a. A zalen a. Inhmuh ruk dan tur min ngaibtuahsak thin. Zan khat erawh kan laklawh ta tlat. 

Ka nau remruatnain ka nau nen kan chhuak a, a thiannu damlo kan turin, scooty a khalh theih loh chhuanlamah a hmang a. Ka pa hmin lo chung a nawr tlat a. Phalna kan hmu ta hram. Damdawiina kan awm laiin Ruatfela a lo kal a. A bikein Aizawl daiah kan va tlan ta daih. Duhtawh zetin kan inkuah chial a, fawh pawh kan infawp nasa. Min ngaih tawhzia a sawi chamchi a, kei erawh ka hnuk a ulh. Naupang zunah ka uai a, nula apumpa zah pawh dawn lo vin ka zui a. Ni e, he mipa naupang hi ka hmangaih a ni. Neih ka duh. 

Ka nauin min lo call a, "U, ka pa a lo kal a. Ih, kan thenawmpa, pa Ngura kha a sugar a zual a, damdawiinah an rawn kalpui a. Ka pa chuan a rawn zui ve a. A zawng mek che" a rawn ti ta mai. Ruatfela ka hrilh. Ka mangang hle. Ka pa thinrim hlauhawmzia ka hre si. Bakah Ruatfela nu leh pa ten min rawn kalchilh tawh a, ani tan a tlawmthlakna chen a awm. 

"Engtin nge niang" ka ti a. Ka hlauthawng hmel chu lainat zetin min lo thlir. A ngawih vang vang hnuah, "Tun bak chance kan nei tawh lo. Kal ang. Inru ang" a ti ta mai. 

"Remruatfel, i mawl mi? " ka ti tuar. 

"Mawl tawh. Kawng dang a awm lo. Ka pa te pawn an hre tawh ngei ang. I pain a khung bet leh che anga, kan inhmu thei tawh dawn hleinem.. Hawh.  Ti mai ang. Kal ang" a ti ta tlut tlut a. Ka buai a ni. 

"Khaw nge kan kal ang a? " 

Ka ti a. 

"Kan huanah a ni mai. Min lo zawng anga, chuan palai kan rawn tir anga.. Inneih a ni mai" a ti leh tawp. 

"Ngaihsam viau suh.. Ruatfel" ka ti chang fak. 

"Lal û, ka duatpui… min hmangaih chuan min zui a ngai" a ti nghet charh. Ka nau lah chu a rawn mangang si. Ka pa thinrimzia a rawn sawi chamchi a. Amah pawn a tawrh phah ngei dawn e. 

A zan azanin an huan lamah kan tlanthla ta vawn vawn a. Huan enkawltute an awm loh lai a ni hlauh. Thlamah kan lut. Zan a rei ve deuh tawh nen, ka hlau ru viau. Ka dawih ropui bawk si. Kan mu ta a. Rilru helhkam kan nei ve ve a ni bawk a. Inkhawih pawh kan uar lo. Sex pawh kan hmang lo. Zing lam khaw en hma siin chingpirinu a rawn hram thut. Rang lutukin ka va bawh a, a nui hak. Ka ngei si, "Min nuih khanglang suh" ka ti hlak a. 

"Ka bulah chuan i him ang. Kan thi dawn anih pawn ka thi hmasa ang" a ti nghut a. Ka biang rawn piai zauhin min rawn fawp nghal. A duhthawh telh telh a, kei paen ka lo dang lem lo. Mahse, a phone a ri thut. Kan va phu chiang tak. 

"Bawiha, khaw nge maw i awm le.. Hei i pa lung tha lo a chhuak leh thut a. Damdawiinah kan kal mek.. Rawn lang vat teh" anu aw a thlabarna kha ka hre thei. Mangang zetin kan inmelh ta reng a. Ka nawr nasat em vangin kan haw leh ringawt. A va hahthlak tak em. Ka phone ka off vangin kei chu tuman min be lo. Biak theih ni nghal lo chuan.. 

Damdawiin kan va thleng a. Apa chu oxygen an lo pe. Anu chu a rawn chhuak a. Min hmuh chuan a phawk deuh naa engmah a sawi lo. Apa khum bulah chuan kan thu ve ta reng mai. 

"Ka pa hi a thi emaw a dam emaw kan pahnih vang a ni lo tih hria la ks duh. Chuan, engmah a danglam phah dawn bawk lo" a ka ti hram. Ni e, heti khawpa min neih duhtu hi kei pawn ka zui zel ang. 

Zing lam dar 7 velah apa chu a rawn harh ta a. Min rawn hmuh chuan a rum nghut a. Anu leh Ruatfela u te chuan an lo bawihsawm vat. A rawn thu chhuak a, a thaw hlawi hlawi mai. Oxygen erawh an phawi tawh thung. 

"Heti em ema in inhmangaih chuan, engah nge in inneih mai loh ang? " a ti zawi sap a. 

"Pa, dam vat la.. Eli hi neih ka duh a ni" Ruatfela aw ah chuan inrintawkna ka hre thei. 

"Umm.. Ni e, bawiha, mahse,, damchhung a daih tur a ni… Eli, nang pawn ka fapa hi i phatsan tur a ni lo" a ti a. A khuh bawrh bawrh mai. 

"Aw le" ti chiahin ka chhang. Ka chhungril nun erawh a hlim. Ka pa chu hlau viau mah ila, ka hneh theih mai ka beisei. 

Ruatfelan min zuk thlah a. Inah min luhpui. Ka pa chu sitting rooomah a lo thu a. Min hmuh rualin a ding nghal. 

"Ka pu, khawngaihin i thinrim hmain ka thusawi hi min ngaihthlaksak hram rawh. I fanu nen hian kan inhmangaih a, ka pa phalna pawh kan la tawh e. Ka pa dam veleh inneih kan tum a ni. Khawngaiihin min phalsak hram rawh. Chuan, Eli hi kut thlak lo hram la ka duh a ni" tiin Ruatfela chuan a ti dam thlap a. Ka pa mitmeng a danglam hle. Ruatfela chuan nui sak chungin min rawn melh a, "Chaw ei tui aw. Ka rawn kal leh vat ang" a ti a. Min chhuahsan ta a. 

"Pa.. " ka ti sap a. 

"Aw.. Ni e.. Umm… a tha vek e. Ka fate hlimna tur hi ka duh ber a nia lawm.. Thlamuang deuhin awm rawh" min ti!  Ka nui chhuak hawk. Tunah chuan hlimna hmanga tihnuih ka ni ve dawn ta. 

Sir Sapa dam loh chhung chu Ruatfela a rawn kal leh. Mamawii nen erawh kan inchukha thei ta vak lo. A pawi lo. Ka bula ding tlat thin mipa ka nei alawm. Sangpuia pawh a tal bawraw sawt hle. Ka ngaihven duh lo. A chantawk a ni. Karma.. Karma.. 

"Ka pa a chhuak ta  e. Palai hmel hmuh lo inring rawh u" A rawn ti lung lung a. Ka nui tawp. 

"U Eli, ka hmangaih che" a rawn ti leh sup… 

"Ka nau Ruatfel, kei pawn aw' ka lo ti ve a. 

Kil khata hlim hmel taka min lo thlirtu ka nau chu ka va melh a. 

Ka nui ta sak a. 

The End.. 

(Boss Amanda chu next-ah)