Amanda 9

BOSS AMANDA (Episode- 9)

Ziaktu: Toni Râlte

Pastor Ruatsanga thihna case kan buaipuina lama boss hliam tawrh pawn ziaawm lam a pan chho ve mèk a. Zin lam erawh kan sawi ri hrih lo. A chhan chu ruah hian sur hunbi a nei tawh mang hlek lo va, a rawn sur thut thut zel si a, zin veivah nan chuan boruak a nuam chiah lo bawk a ni. Christmas dawnah bazar paha zin mai mai a tha viau ang. In rawk chungchang kan close chiah a, chhui harsa a ni hran lo.

Ni 24,Oct a ni a. Zan lama ruah a sur vang nge khua chu a thiang vuk mai a. Boruak pawh a nuam tawk khawp mai. Office-ah file hlui lo ka remfel mek a. Boss erawh a chair-ah thuin Vanglaini a chhiar thung. Office kawngka chu an rawn kik dat dat a, lo lut tura ka tih rual chuan, hmeichhe pakhat a rawn pen lut ta a. Ka farnu Kimkimi nen an inrual vel maithei. A ria a, a ngo bawk. A hmel chu chuti tehluaa tha erawh a ni lo naa pawisawi lo tak a ni. A zakzum hle tih pawh a lang. Boss chuan nelawm takin thu turin a lo ti a.

"Hahdam la, tui te kha in phawt la.. Tichuan, i buaina chu min hrilh dawn nia.. " a ti a.

Tui chu a in khawlh khawlh a, mitmeng ngui taka boss melh in, "Min pui hram rawh" a ti tham chhal a. A aw chu a chher lek lek naa a tham tel vangin a mawi phian.

Boss chuan mitmeiin sawi turin a hrilh a. "Englo ania, ih, ka û a bo a" a ti tawi tak a.

"Engtin?engtikah? " a lo ti vat.

"Nimin zinga a chhuak kha a lo haw ta lo a ni.. "

"Report i thehlut em? "

"Aw.. Ka rawn thehlut fel chiah a, nangmah hi hmu tur chein min hrilh a"

"I û bo dan leh kan hriat tura i duh ang zawng zawng chu hmaih nei miah lo vin min han hrilh teh" a ti dam dap a. Kei pawh an bulah ka thu ve nghal.

"Aw.. Nia, ih, ka û nen chauha khawsa kan nia,kei hi Lawmpuii ka ni a.  ka u chu in hriat ve tho ka ring, Sanglianna a ni a, Rokhum Bakery neitupa kha a nia. Kum 2009 khan ka nu leh pa te an inthen a, ka pa bulah kan unauin kan awm a. Mahse, ka pa kha a hrisel lo chho ta a. Ka nu nen an inthen atanga kum 2naah a boral ta mai a. Ka nu chuan pasal a nei tawh si a, belh kan hreh ve tumhrang tawh nen, ka u nen kan khawsa ta a ni. Ka pa kha sipai pensioan a ni a, a thih khan sum tlem azawng kan la ve thei a. Chu chu ka u chuan bultan nan hmangin chhang siam a zir ta a. A hmain dawrah a thawk tawh thin a, chutatanga tui ta pawh a ni. Rei fe a kum tel meuh a beih hnuah ama pualin dawr a hawng ve ta a. A tirah lar lo mah se, beidawng lo vin a ti chho ta zel a. Tichuan, tun dinhmun hi a thleng ta a ni.

Amah ka u hi tawng mawi lo ni lose; miin a tuai deuh an tih tur ang type hi a ni a. Ngaihzawng pawh a nei ngai lo reng a. Mahse, thian chu a ngah ve mai. A thiante sawipuina zarah nge ka hre lo, nikum kum lai hawlah khan ngaihzawng a nei ve ta hlauh a. Sangteii a ni a, Mission vengah sawn an awm. A hmel tha a, an khawsak erawh kei ni aiin a hniam ve lehchhawng. Ka sawi chhan chu ka u hi tuai angin lang mah se; a sum leh pai vanga ngaizawng ve mai duh hi an awm ve tho va, mahse, tumah a duh ngai lo. Sangteii pawh chu chutiang turah a tirah kha chuan kei pawn ka ngai deuh a. Mahse, tihtakzetin a hmangaih ve niin ka hria, ka u pawn neih hial a duh ta a. Thla hnih liam ta khan palai te tir vein kan insawi rem a. Karleh mai ni 28-a innei tur an ni nghe nghe.

A bo dan chu kan sawi tawh ange. An inneihna tur thil vel buaipuiin a chhuak deuh reng a. Dawr pahnih kan nei a, pakhat chu keiman ka nghak ti mai ang. Thawktu an awm nual bawk. Pakhat a main zawk erawh ka u kutah a awm a. Manager fel deuh a nei tho bawk a, a chhuahsan deuh reng thin.. Nimin zingah khan tukthuan kan ei laiin, "Inneih kawr kan thuitir kha Sangteiin a duh leh lo deuh a, kan va fit thattir ange" a ti a. Chaw eikhamah a chhuak zui nghal.

Chhunah kan inbe lem lo. Inbiak reng chhan tur kha a awm bik lo bawk a. Tlaiah zanriah ei tur pawha a rawn hawn loh vangin ka call a, a switchoff tlat si. U sangteii ka call a, ani lah chuan dawra an kal hnuah a dawrah a let leh thu a lo sawi a, Manager ka  be nghal. Ani lah chuan dawra a rawn kal loh thu a lo sawi leh ta bawk sia. Ngaih that lohna em em erawh ka la nei lo, hna pawimawh eng emaw tak a nei a nih ka ring. Mahse, zan khuaa a rawn hawn tak si lohah chuan hlauhthawnna ka nei ta a. Tukthuan ka ei sawk sawk a, ka rawn kal ta vang vang a ni.. " Lawmpuii chuan a ti ta dap dap a.

Rokhum Bakery te chu a lar hle a, hre lo kan awm mang lo. A neitupa pawh hi ka hre ve. Ani chuan min hre kher lo vang. A nau sawi ang deuh khan a tuai lek lek, mahse, tlangval fel tak niin ka hria.

"Chuan, Sangteii te nen chuan in inbe leh tawh em? "

"Aw, nizan khan chanchin min rawn zawt a, amah pawn a call tlang theih loh thu te a rawn sawi"

"Hetah i rawn kal tih hi a hre ve em? "

"Hria e, amah pawh rawn kal a duh viau naa an inneihna rawn hmang tur an chhungte an lo  thleng dawn sia, lo awm ve kha a duh deuh bawk sia. A mangang ve khawp mai" Lawmpuii chuan a ti a.

Boss chuan, "I û thlalak i kawl em?  Ka lo en chiang ve hrim hrim ange" a ti a. Lawmi chuan a phone chu hmetin a û nena an thlalak ho chu Boss a va hmuhtir a. Ka lo bih ve vat. Unau inngeih tak leh inngai tak an ni tih a hriat. Thla an la nasa dun em mai. An hlim thei bawk si.

" I û chuan tlereuh a lawm ve hle a ni maw? ". Boss chuan a ti sap a. A ni lah tak bawk a, Sangliana chuan thi leh zungbun bakah a beng dinglamah bengbeh a bet chi a beh tel a, mipa nazawngin an inbel peih loh tur tlereuh a uar ve hrat a ni.

"Umm.. Lawm tak a ni. Thla thar apiang hian a thar a lei ziah. Keiin engahmah ka ngai ve si lo va, ka nuih a tiza thei tawp" Lawmi chuan a lo ti ve mai a.

"Engpawhnise, i u hi a thiin nge a damin kan hmuh dawn ka hre lo va, paukhauh takin i lo awm dawn nia.. " tiin Boss chuan a thlah ta a. Kar leh maia nupui nei tawh tur han khuangcher bo ringawt chu a mak hle a ni. Eng emaw inphum zawng a awm chèk ang chu..

A hmasa ber atan a nupui hual Sangteii te in lamah kan va phei ta phawt a. An chhungkua pawh an lo awm kim thap. An ngui nghiai hlawm hian a hriat. Sangteii pawh chu a hlim lem lo tih a lang reng mai. Nimin an kalna vel te chu Boss chuan a han zawt a.

"Nia, ka kawr tura an thui kha duh loh lai ka nei a, chu chu kan va siamthattir lawk kha a nia. A rei lo rei pawh. Dawr lamah a let nghal tur thu te a sawi a, kei pawh ka haw ve nghal mai. Chu zawng chu" a lo ti a.

"Amah han rubo duh tur awm te i hria em?  Rinhlelhawm deuh te"

"Hre mai lo, Sanga kha mi tha tak a nia, tu pawi mah sawi ngai lo leh mi dang khawngaih thei tak a ni a, tuman an tihnat duh ka ring lo" a ti ve mai a. A bialpa chu mi tha tak a ni tih a hrechiang khawp mai.

A dawrah kan kal leh, a hnathawkte chuan an pu chu an fak vek. Hlawh chungchangah nise a fair em em a, an hlawh han batsak emaw han tih there emaw a nei ngai lo. Tin, a hnathawkte chungah mawi lo taka a khawsak sawi tur a awm lo bawk. A cake ur tu pa ber phei chuan, "Kum 3 ka thawk tawh a, vawi khatmah a thinrim ka la hmu lo" a ti hial. Chutiang khawpa mipa tha chu tu chuan nge tinaa rubo duh ta ang. Zu leh ruihhlo lamah a fihlim em em bawk si.

"A thiante hi hmu ve leh phawt ila" Boss in a tih angin a thiante a kawm ve ber ho mi pali chu kan va hmu leh ta poh a. An ni pawn Sanga bo chu mak an tih thu vek an lo sawi.

Henry chuan, "A bo kan han ti ngawt a, a bo lo ve thei tho, khawi hmunah emaw te hian a lo kal daih pawh a ni thei. Mahse, a kalna chin chu a nau leh a bialnu a hrilh ngei awm sia" a ti leh hnuhnawh a.

Hminga ve thung chuan, "Sum a ngah  tih an hria a, an kidnap a niang, a nau khuan ph call a dawng tep tawh maithei sin" a ti thung. Thil ni thei ve tak a ni. A thian te chuan pawi an ti theuh mai. Sawiselna tur an hre lo va, hmelma a neih awm an hre miah lo bawk.

Danny chuan ngui bûrin, "Engpawhnise, keini pawn kan lo ngaihven ve reng ang, hmuh leh ngei hi ka inbeisei tlat. Ka beidawng dawn lo" a ti nghut nghut a. Ani hi a palian ber a, an zingah rau rau chuan a man ber ti mai ang.

"Ka pi, kei chu ngaihtuahna dang ka nei ta tlat, Nupui a nei dawn a, a nupui nen an inkar lam te hi a ni lo maw.. Sangteii sawn bialpa a nei anga, chu pa chuan a lo dahbo te a ni thei ang em? " Tawngmawh hmel. Zet Zuala chuan a lo ti ve boh a. Boss pawn, "Ka lo ngaihtuah deuh a, kei pawn, mahse, kha chen tihbuaihna hun a awm a, an inneih hma kar leka a che leh chauh hi a mak viau. Amah Sangteii pawh saw chhuizui chu a tul viau ang. " a ti ve a.

Sangliana chu Aizawl khaw chhungah zawn hna an nei phawt a, a vâng khawp mai.

A tukah boss nen an kawr thuitirna dawr lam kan pan a. Engmah sawintur em em an nei lo. A awm ve reng. A bialnu nen an chhuak rual tih zawng chu an sawi theih a ni. Dawr thlanga dawrte pakhatah chuan Boss chuan a thuphungin a zawt a
.. A lo hmu mial mai.

"Aw.. A bialnu kha a va thlah alawm. A motorin" a ti ta a. Tlem chuan hma kan sawn. A chhan chu Sangteii khan dawr atanga an chhuah hnu khan kal hrang nghal ang khan a insawi si a. Sangteii bawk kan va hmu leh a, a tirah a hamhaih deuh, "Aih, min thlah lo, aw nia a motorah chuan kan chuang dun a, mahse, kal kawina tur ka neih vangin an dawr piah lawka taxi stand-ah ka chhuksan alawm" a ti a. A hmel chu a buai deuh nak hian ka hria. Ka ngaihbel pawh a ni maithei.

An inneih kawr thuitu pa hnen atangin call kan dawng a, kan va let leh. "Hei Tebawihi hian nimin khan a vil a, nichina in lo kal lai khan a lo la kal lo va, a lo thlen veleh a thuphungin ka sawi a. Hriat eng emaw a nei aniang" a lo ti var a. A fel hle mai. Tebawihi a tih chu nula tetakte ngo ving veng, hlim hmel tak a ni a.

"Nia, U Puian a bo tih a sawi khan, nimima a bialnu nen an inhauh deuhna kha ka sawi mai mai a. A lo ngai thutak sia. Ih, nimin khan a bialnu a inthlak laiin a ph a ri a, Pu Sanga khan a lo la a, a dah leh mai a. Mahse, msg a lo thleng aniang, chu chu a zuk en a. A bialnu a rawn chhuah leh chuan, dressing roomah a kai phei a, an tawng chu ka hre vek lo nain, "Min lo kawp reng a maw..? " tih vel niin ka hria. A bialnu chuan a pha nasa mai a. "Ka cousin ka tih kha.. " tih te a ri nawk nawk mai. Ngaihthlak kur kha ka hreh ve sia. An chhuah dawn pawh khan Pu Sanga chu a tûm deuh bûr mai" a ti ta a. Sangteii chu a rinhlelhawm ta riau mai le..

Office lamah kan ko ta nge nge a. A zum dákin ka hria. "Ni e, msg lo thawntu kha ka cousin alawm.. Kha en ula, a msg pawh ka la delete hleinem" tiin phone chu a rawn nawr phei a. Kan lo bih nghal.

Rema Cuz tih hnen atangin, "Ka hmu chak tawh che nia, inpa kha chu lo tel ve lo mai rawh se" tih thu chu a dawng a. Han huat vak tur a awm si lo. Boss chuan inngaihtuah hmuk hmel zetin, "Hei hi nimina i dawn chu a ni ngei maw? " a ti a.

"Aw.. Nia, Sanga thinrim chhan chu ka'n sawi ange, Rema nen hian a rukin zu kan in thin a, a lo hre sia, Rema hi kawm a phal tawh lo va. Chuvang a ni e" a ti a. A hmel pawh a pangngai leh tan.

"Mahse, min kawp tih te kha a sawi si a"

"A hresual aniang, Tebawihi khan.
I kawp leh tawh a ni maw.. A tia.. A hresual a nih ka ring. Rema pawh in duh chuan in zawt thei alawm.. Zep loh chuan kan kal hran hnu khan Rema chuan min lo lam a, zu pawh kan va in dun leh.. " a ti ta a.

Rema pawh chu kan hmu, Sangteii sawi ang tho khan a sawi. Amah lah chu Sanga ang deuh tho va tuai lam lek lek a lo ni a. Rinhlelhawm tak a ni hran lo. A khirh ru ta riau mai.

Amah Sangliana in lamah va kal ve hrim hrim ang tiin chawhnu her tawhah kan va kal a. Lawmi pawh a lo awm. Sanga room te chu kan han endik a. A felfai viau. Han chhui zuina tur thil a váng angreng. Lawmi room erawh kan lut ta lem lo.

"A bo hma zanah te khan ngaihbel tur thil awmin i hria em? " Boss chuan a ti a.

"Awm pawh ka hre lo. U Zuala a lo leng a, ka u thiante hi chuan min farnu en ve vek a, kan pathumin kan inkawmho mai mai. Danglam engmah ka hmu lo" a ti a.

"Ph call engmah i la danwg lo maw? '

" dawng miah lo. Ka pi, ka u hi nungdama kan hmuh leh theih i ring em? ' a ti ta a.

"Ka hre lo le.. A motor tal hi hmu thei ila, kawng a awm deuh tur" a ti ve mai a. Lawmi chuan amah maia awm nuam a tih loh vangin a cousin Apatea fanu a awmpui a ni.

Zanah chuan inah ka tawm kûk. Sas lam  pawh a lang thei lo, tun lai chu. Boss hnute kha ka mitthlaah a chám a, hisap em chu ka hreh ve si. Ka khi suk suk ringawt. Kan mi bo Sangliana chu ka ngaihtuah leh a, he inrukbona phènah hian eng emaw tak zawng a awm ka ring a ni. Sangteii hmel hri hre kha ka rin zawng a ni vak lo, dawt te kha a sawi ve bawk nen.

Zing dar 8 bawr velah Bossin min lo call a, "Muallungthu lamah Sangliana ruang leh motor hmuh a ni' a rawn ti. Kal ve kher a ngaih  loh thu a sawi vangin ka kal ta lo. Office ka va thlen chuan a mah pawh a lo awm a.

" Engtin nge an hmuh " ka ti a.

"Kawngthlangah a lum a niawm e. Rin danin nizan lama lum niawm tak a ni. A chhan chu chhun lamah eng hnuhma mah a la awm tlat lo. A lum thui viau. Taxi driver hmuh a nia.. A piah lawka tui khawhthlaah tui va dawhin a zung nghal a, motor lumna lo pe thla un chu a hmuh ngai loh vangin mak a ti deuh a, a va en chiang a. A va hmu ta mai a ni. "A ti charh charh a.

"Chuan Sangliana ruang chu" Ka lo ti a.

"A chhe hran lo, mahse, a lo nam tawh. Postmortem turin sawtah a awm tawh" a ti sap a. A hmel chu a thim mak mai. Ngaihtuahna a hmang leh nasa tih a hriat. Ruang an postmortem zawh tawh, a ina an phurh thlak hnuah kan zuk kal ve a. Lawmi a tap nasa khawp mai. Sangteii lah a khawng deuh reng bawk. Lawmi mawlh chu a ni, engtin nge amah maia a khawsak tak ang le..

'Û, nangmah bak hmangaihtu ka nei ve lo asin.. Ti nge min kalsan? " tia a tah hla te chuan ka ngèng a chhun pha ve tlat!  Sangteii erawh chuan eng em em a chham ve lem lo, an buaipui deuh laih laih reng a. A thiante ho pawn a ruang chu an kil thap. An tap ve fuih fuih hlawm. Sangliana ruang chu ropui taka vuiliam a ni ta a ni.

A tuka office ka va thlen chuan tukverh bulah pawn lam hawiin a lo ding reng a, "Sam, postmortem result kha en teh" a ti sap a. A dawhkan chunga file pakhat chu ka la a. Uluk zetin ka chhiar ta a.

Sangliana chu a bo ni emaw zan vel emawa thi a ni tawh!  A dulah vih a ni a, a tukhumah thil rit tak hmanga vuak a ni bawk. Motor lum khan a thi tawh sa chu a tichhe zual a, hliam neuh neuh a nei nual. Mahse, a thih chhan ber erawh a dula vihna kha a ni.

"Kha kha ka rin dan sa a nia. Mahse, tu in nge that tih ka hre thei lo.. Thil hrang hrang ka ngaihtuah a, ka phuarkhawm hleithei tlat lo a ni" a ti a. Chairah a thu hnawk. A mitmeng chu a dul hnak mai. Zanah a mu tha lo a ni maithei.

"Chawl hahdam rih la, tunah chuan chhui zuina tur pawh a váng si" ka ti ve a.

" A ruang ka va hmuh laia mak deuh chu tlereuh engmah a inbel tawh lo, a bengbeh eraeh a la awm. A thi leh zungbun pahnih, a sana a bo vek" a ti leh daih.

"In suamna lam te a ni thei em? " ka lo ti a.

"Maithei, mahse, suam ni ta se a thih kher a ngai lo maithei… he thil titu hian plan mumal tak a nei a ni" a ti a. A mitmenga tumruhna lo lang chhuak chu ka lo melh reng.

Sangliana Thlan nghah ni chawhnu lamah Sangteii leh a cousin Rema kha an lo kal a. Zu rim an nam deuh, mahse,  a nasa lo. Sangteii hian a duh ve riau anih ka ring.

"Sanga khan motor a khalh fimkhur thei lutuk, accident satliah a nih ka ring lo, thah a ni ngei ang" a ti hliam hliam a. A rui lungpuam deuh nen, a tap deuh par bawk a. Postmortem result kha a hre ve lo a ni ngei ang.

"Nia, kawng kan dap ve zel dawn alawm" Boss chuan a ti a. Chiang zetin an pahnih chuan a melh tawn bawk a. Thu tam sawi lo vin an chhuak leh daih. An mumal vak lo. Ka ringhlel deuh tlat nia.

"Postmortem result kha an hre ve lo mi? " ka ti a.

"Chhui a awlsam zawk nan leh tualthattu a rawn inlan theih nan kan hotute kaltlangin zep turin ka ngen rih a. Lawmpuii pawn a la hre lo" a ti a. Thil hi a ngaihtuah kim thei asin aw.  A hming a tha a, hotute lam pawn a thu hi an ngaichang ve riau tawh a ni.

Sangliana case chu a theihnghilh hmak emaw tih turin ni 4 lai chu a reh. Thil dang a buaipui ti mai ang, Rangvamuala zu zuar fanu leh Pastor fapa inngaihzawnna hnawk zet chungchang a buaipui a. Inngaihzawnna lam hi a tuipui tehchiam si lo va, mak ka ti deuh.

Sangliana thih atanga ni 5na chawhma lamah Lawmpuii kan va tlawh a. "Thih sarhu mi lenluh tam lai hi chuan chimbuai vak lo ila a tha" a ti a. Hmalam a bih ngur mai.

Kan thleng a, Lawmi chuan min lo dawngsawng tha hle mai. A patea fanu pawh a lo la awm a. Tin, a patea te chhung chuan an lo la chenchilh ve deuh hrim hrim bawk.

"I û bialnu khan i û kha thah a nih a ring a, a lo kal tak asin" Boss chuan a ti a.

"Aw. a ni maw.. U sangteii chu ka khawngaih ve lehchhawng ania aw. Zu te a in phah hial asin. Mahse, ka u kha a accident a nih loh chuan tuin nge that ang? " Lawmi chuan a ti a. Boss tawng leh hmain, "Kei pawn a accident kha ka ring hleithei bik lo.. Ka u kha mi fimkhur tak a ni a, vawikhatmah a la chesual ngai lo" a ti leh zat a. A rilru a buai ve hmel kher mai.

"A nih inleng in la nei deuh reng em? " Boss chuan a ti daih a.

"Nei ve nek nek, ka u thiante an lo leng ve reng bawk a. Khua pawh a la har hman lo. An fel tak tak ania aw" Lawmi chuan a ti a.

"Chuan, i u sumdawnna hi i enkawl zui mai dawn tihna nge? "

"A ni mai ang chu.. Tak a na in bulah lo sawi awm tak ka nia, thil mak deuh a thleng alawm.. Sumdawnna lam kha ka lo ngaihven loh em vangin ka lo hrechang tawh lo a ni. Min lo nghak lawk ru" A ti zung zung a, A roomah a va lut a. A lo chhuah leh chuan file pakhat a rawn keng chhuak ta a.

"Nimin piah khan a room ka chingfel a, thil hmuh chhuah tum pawh ka ni lo. A bo atang khan ka lut ngai mang lo va, a ruang an hmuh atang phei kha chuan ka lut duh lo. Ka tap dawn zel a. Mahse, ka va chingfel ta chu he thil hi a lukham hnuaiah ka hmu ta a. Chhiar ve teh u, ka û khan a thih tur thu a hre lawk nge ka hre lo, chuvang ania accident a nih pawh ka rin loh deuh" a ti a. File chu boss chuan hawngin, lehkha chu a chhiar ta a.

Sangliana chuan a thih chuan a ro zawng zawng a nau hminga a dah thu leh sumdawnna engkim pawh a nau tan a hlan vek thu a lo ziak a. Thil mak vak ni pawn ka hre hran lo. Mahse, boss chuan a chhiar uluk kher mai. Uluk taka type, printout thlap a ni a, a tawpah a hnuaiah Sangliana signature a chuang vá bawk. Hawrawp lama expert ka boss tan pawh han examine vak ngaihna a váng viau.

"I u chuan a hmangaih hle che anih hi.. Mahse, nupui a neih dawn hnaia hetiang thutlukna a siam hi a mak riauin ka hria.. " a ti a.

"Chu chu lawm keipawn mak ka tih. Nupui a neih te chuan fate pawh a la nei ve ngei anga, a ngaihtuah ve tho chuan ka ring sia. Nge a nupui neih hma khan a thi dawn tih a hre lawk nge ka hrethiam tawh lo.. " Lawmi chuan a ti ve a.

"La dam pawh nise, chan chu i nei tho awm sia, mak ka tih zawk chu, a nupui neih hma khan a thi dawn tih pawh in hre lawk ni se; a ro zawng zawng chu i chan tur tho a ni mai dawn lo vem ni?  Chuhpui duh tu tur che an awm tihna em ni zawk? " Boss chuan a ti ta duah a.

" Zep loh chuan, an hriat leh chu ka duh hauh lo va, ka patea te hian kan in pawh hi hman deuh khan neih an tum tawh a, kan buai ve laih tawh. A hlauthawng a ni maithei" zawi sap hian Lawmi chuan a ti ta a.

Boss chuan a chal a tichuar náng a. Eng nge a ngaihtuah rinthiam ngaihna ka hre lo. Kan haw leh ta phawt.

Chawhnu lamah boss chu a chhuak daih, khaw nge a kal dawn ka hre lo. Kan tlai banah ka nauin a kawr thui tir lamsak tura min tih vangin Sangliana te in lamah ka tlan a. Pen erawh ka peng lo, Ka rin loh deuhin Sangliana te in chhak lawka eichawp dawrah boss a lo thu. Min hmu ve lo niin ka hria.

A tukah boss chuan Sangliana thihna chu a ruka chhui a tum thu a sawi ta a. Mipui ngaihah accident-a thi ni mah se, boss chuan a awih tlat lo. Kei pawn ka awih lo. A nupui hual sangteii lahin a rawn tahawh deuh reng bawk si. Amah zawk hian a pasal hual kha a that zawk a ni thei angem?

A tukah eng nge a tih ka zawt a, "Ka kawm lawk mai mai" a ti satliah a. Chawhnuah Sangliana te inah bawk kan va kal leh. Lawmi leh apatea te nupa leh an fanu kha an awm lo awm a. Kan thlen atanga rei vak lo vah sangliana thianpa te pahnih Henry leh Danny an rawn kal ve bawk.

"I patea hi kawm lawk ka duh a, i room lamah sawn ka be lawk thei ang em? " Boss chuan a ti a. Lawmi chuan maktih hmel deuh hlek hian, "Aw.. Tehreng mai.. " a lo ti var a. Khawpuiah zanwg mi kan buai tawh a, inleng pawh an nei em em tawh lo, in riak te pawh zan 3 bak an riak ngai tawh lo. Lawmi chu a khua a la har dawn chauh niin ka hria. Lawmi roomah chuan a patea ho chuan kan thu ta thap. Boss chu a vei kual sek a, a awmdan chu mak ka ti deuh.

"In hmun chungchanga in buaina kha han sawifiah deuh teh" a ti ta khawl mai a. Sanga patea chu a meng phar deuk awk.

"Aa.. Buaina han tih hluai chi pawh a ni lem lo, Ka u kha Sanga te nuin a uiresan hnu khan an khawsak a lo harsa chho ve nen, ka pa khan a khawngaih a, nnagni chu in nupain hlawh in nei tho a tiin in hmun kan neihsaah in kan sa thar a, tuna an awmna inpui erawh ka pa khan a thuin a pe ta a ni. Ziaka dah a awm lem lo va, chuvanga a hnua buai kan ni. Ka va chuhpui reng reng lo, ka hminga a lo la awm vang khan kan siam tha mai zawk a ni" a ti ta charh charh a.

"I u fapa kha thah a nih i ring em? "

"Rinhlelhna chu ka nei. Mahse, tu nge that duh ang tih rin ngaihna ka nei thiam lo a ni"

Rei pawh kan awm lo. Boss thu zawh lah chu a ho angreng sia. Kan haw zui nghal daih. Mahse, kan hawn kawngah, "Sam, Sangliana a thih vanga hlawk thei tur chu pakhat chiah a awm. A nau saw" a ti dam thlap a. Ka nui deuh hawk. Lawmi hmel leh a û bo thu rawn thlen hmasa bertu a nihna zawng zawng nen, Lawmi anih ka ring hlawl lo.

"I ngaihtuah kha ka hria lawm.. A nau hmang sawn tu emaw pawn a hlawkna a tel ve thei bawk. Chu tu emaw chuan a that ngei bawk ang. " a ti chang fak a. Hmalam a en tlat vangin a mitmeng ka hmu thei lo. Boss hian eng emaw tak zawng a hria a ni ngei ang le..

Sangliana thiante ho kan kawm thuak thuak, An thianpa thih danah chuan an lungawi lo vek. An ringhlel vek bawk. Danny phei chu a insehruh nasa.

"Anih Lawmpuii sawn bialpa a nei em? " Boss chuan a ti teh daih a!

An hawi hû hlawm.. "A neih awm ka hre lo kei chuan,. Nau ang tak tak sawn kan en ve a. Kan len zin nen inleng a neih awm ka la hre miah lo" Henry chuan a ti sup a.

"Kei pawh a neih awm ka hre lo, bakah a misa vak lo. A zakzum bawk sia" Zuala chuan a lo ti ve bawk.

"Anih a bialnu Sangteii saw han chîk ta vang vang ula, ngaihbel theih tura awm a neiin in hria em? " a ti leh a.

"Hre lem lo, ka thiannu ve tho ania, zep loh chuan Sanga pawh ka sawipui a ni nghe nghe, zu saw a in ve zauh tih lohah chuan hmeichhe fel tak chu a ni" Puia chuan a lo ti thung.

Henry bawk chuan, "Thah chhan tur a nei lo ee.. " a lo ti ve niah niah a. Boss a nui sak.

Sangteii chanchin chu kan han chhui chiang deuh a, kohhran a bel lutuk lo naa mi biangbiak thiam tak leh zuanzang tak a ni. Lerh pawh a lo lerh ve thin tho va, mahse, Sangliana a tawn hnu atang hian a zia a danglam ve dawrh niin hrechiangte chuan an sawi tlat a ni.

Zing dar 7:02 chiah a ni. Boss in kal tura min tihna lam ka pan a, nizanah Sangliana te in rawk a ni!  Boss pawh a lo thu leh vang tawh a. Lawmi leh apatea te chuan thil awmzia an sawi fiah a.

"Ka muhil tui angreng a, kan lo meng rim rei ve tawh nen, ka û room lama thil ri kauh thawm ka hriat rual chuan  ka harh nghal. A tirah chuan ka hlau angreng a, patea te hi mikhual roomah an mu daih bawk si. Mahse, a rik leh thin vangin hlau chung chungin ka tho ta a. Mahse, ka rak nghal tuar tuar, ka room chu a lo lut hmasa tawh nge ka almira leh tlereuh bawm te chu a let phung a. Safe pawh a lo inhawng vû mai. Ka au vak avang kha nge ka u rooma che mek kha a tlanchhuak ta daih a, patea hian a hmu hman nghe nghe" Lawmi chuan thlabar takin a ti a. A khur hlak hlak mai.

"Nia, a au thawm kan hriat khan kan tho nghal a, room kawngka ka hawn rualin kawngkapui atanga a chhuak lai ka va hmu hman. A dum. Vekin a inthuam tih zawng chu ka hriat dan a ni e" Apatea chuan a lo ti ve bawk.

Tu tak ni ang maw… Sangliana thiante pawh an lo thleng ve nghal a, an hawihai angreng hle. Boss chuan Lawmi room leh Sangliana room chu a lut tawn chhen a. An lo singsak vek tawh vangin engmah han hnemhnanpui tur a awm hran lo.

Lawmi chuan thil bo a awm loh thu a sawi bawk si. A mak ta hle mai. kan chhuah hma chuan, "Hei a khawngaihthlak, Sanga thiante in ni bawk a, riahpui tawh ula a tha ang" tiin Henry te ho chu a hrilh a.

A tukah boss chu a chhuak daih. A thil chhui kawngah hian zui ve zel tur ka ni naa, vawiin kher hi chu ka pum a nawm loh em vangin kal lo mai turin min ti ta kha ania. Ka chau viau mai. Chawhnu lam a ni tawh a. Boss chu a rawn lut ta zan zan a, a hnungah Lawmi leh apatea leh Henry te thianho an rawn kal. Eheu!  A tawp a khar tawh em ni le?  Rei vak loah Sangteii leh Rema an rawn lut bawk. Kei chu tun case ah kher chuan ka tangkai nep viau tih ka hria, ka ngaihtuahna ka seng thiam lo a ni bawk a. Boss hian ka tel lo vin a lo chingfel leh vek tawh tihna em ni le?

"Lawmi, i u bak neih i nei tawh lo asin. Sum vangin i u hmangaihna che kha i phum bo thei ania!  Eng ang hmeichhia nge i nih teh hrep? " Boss aw chu a chang kher mai. A ngaihna ka hre ta map lo. Kei ai mahin Lawmi a hrilhhai. Boss chu a melh kuau ringawt!

"I û thihna kha ngaihven lo awm takin ka awm.. A ngai tlat si a. A tawp ka khar theihna hi a rei tawh, mahse, i thurualpui hi hriat ve hrim hrim ka duh vangin ka nghak zel a nih kha.. Ka hre tawh bawk a… " Boss chu a nui sâng.

"Hetianha min puh tur hian tu nge i nih?  Ka u te chu accident vanga thi an tih mawlh mawlh kha.. Engtin nge ka thah ang a?  Engvangin nge ka thah ngawt ang? " Lawmi aw chu a  ring hle.

"I û i thah thu reng reng ka la sawi lo. Engvangin nge i û chu i thah ngawt ang? " Boss chuan a lo ti leh lawi si!

"A.. I sawi hmangah khan ka û thattu angah min puh emaw ka ti alawm" Lawmi hmel. Chu chawplehchilhin a danglam nghal vek nia!

"I û te chu Zuala leh Sangteii thah alawm" a ti ta a. Ka thlawk lo chauh!  Lawmi leh mi dangho pawh an rawn phu suau!

"Maw… engtin.. U zuala leh u sangteij maw.. Mahse, ka u kha inah khan.. " a ti a. A tawngsual tih a inhria anianh, a ngawi ta daih. Lawmi chu kan melh thap. A zâm ngawih ngawih.

"Nia, inah khan a awm reng a, nangmah ngeiin i that kha a ni sia tiraw?  Engvangin nge sangteii chu a lo tel ve daih theih ang.. Hehe.. Lawmi, holam taka hun khawhral ching ka ni lo va. I û i thah chhan ka hria.. I thah dan erawh sawi la.. Nge Zuala zawk khan i sawi dawn? " Boss chuan a ti leh ta zung zung a. Ka lo insangmar ve vak ringawt.

"Ka thianpa kha ka that lo. Engvangjn nge ka thah ang? " Zuala chu a ngawi rei thei ka lo ti reng a.

"Hote te avang hian thudik hi a lang fiah thin. Hei sama te ang ho hi chuan thil ropui tak, beihpui thlaka hnuchhui tur angah an inngai thin. Mahse, ka hnuchhui dan hi chu a ho thei teh mai ania. A ropui lua ngai lo, ni thei awma ka ngaih loh te hi ka ringhlel hmasa phawt thin…

Ka sawi leh mai ang. Ka hriat dan.. A hmasaberah chuan Sangliana a bo, a bialnu kha ka ringhlel deuh, an inhauh thu ka hriat khan. Mahse, Sangteii hi ka lepse hneh viau, a zu inna thlengin ka zui ru, rinhlelhawm a ni ta lo phawt. Pawi ta ber chu a bo tirha Sanga te ina ka lo kal lo kha a ni. A bo miau a, kal ngaiin ka hre lo. Ka thluak ka hloh then a ni maithei.

A ruang kan hmu ta a. Motor brake a fail nge engtin nge a chetsual tih lam ai chuan, Sanga taksaa a bengbeh chiah a tlereuh kan hmuh khan ka rilru a la zawk. Tlereuh ngaina tak a ni a, a bo ni pawh khan a bialnu hnen atanga ka hriat leh danin tlereuh a inbel. Mahse, a thih hnuah a awm tawh lo. Insuamna a ni thei em tih ka ngaibtuah a, tlereuh zawrhna zawng zawng ka fangkual, ka duhthusam ka hmu lo. Tuman tlereuh an zawrh tlat lo.

Lawmi hnen atangin thu thar kan hre leh ta a, ro chungchang kha. Kha khan phurna nasa tak min siamsak ta a ni. Sanga khan a nupui neih dawn aruaiah thurochhiah a siam lo vang. Print a ni thlap te khan ka rinhlelhna a tizual. Mahse, signature erawh a signature ngei a ni tih fiah a ni tlat lawi a!  Game khel zawng in awm chiang.

Khami tlai khan Sanga te in chhak dawrah ka leng lut mai mai a, Sanga chungchangte ka sawipui a. Ka tana thu pawimawh tawpkhawk ka hre ta a ni.

"Khami ni a bo ni khan chawhnu lamah a lo haw a, Zarda a rawn lei leh nghe nghe.. Ka hmuh hnuhnun ber ni a lo ni ta reng sia" tia dawr nghaknu in a sawi chu thu pawimawh tawp a tling. A chhan chu lawmi khan zing atanga a lo la haw loh thu a sawi tlat. Hei tak hi a nia pawi chu, an inah a tirah khan kal ila ka chhan hman maithei. A motor erawh khaw nge inthehthang ka hre miah lo. A bo tirha a thiante lo kal khan a motor an hmuh thu an sawi tlat si lo va. Garage ah a awm lo chiang. Chu erawh in la sawi turah ngai ang.

Thil chu a fiah ta uar a. Mahse, fiahna ka duh, Lawmi hian thurualpui a neih ngei ka ring bawk. Chhuanlam siamin Lawmi patea hi Lawmi roomah thu zawt turin ka luhpui a. Khatah khan ka duh ang thil. Chu ka hmu ta anih kha. Khum bul dawhkanah khan Mipa sana a awm a, khami hma zanah khan chupa chu a riah ngei ka ring. Chumai ni lo vin Dustbinah khan meizial bung pali lai a awm. Lawmi'n mei a zu lo. Lawmi pindan tawmpui thintu chu tu nge tih hriat chakin ka phili a. Ngaihdan ka siam thiam hek lo.

Mahse, nizanah in inah misual tu tih hriat loh a rawn lut anih kha. Lawmi, i rooma ka awm laia i bula mu ka hmuh khan i û thisen avangin i thinhnuna vih ve siah che kha ka chak asin. Mahse, thawm. Dim taka ka chet a ngai thung. I û bo tirha ka bula i sawi, tlereuh ka lawm lo lutuk i tih kha i la hria em?  Mahse, i almiraa tlereuh bawma i û thi leh zungbun ka hmuh khan, tlereuh chu i lawm lo pawh a ni thei. Mahse, i kawl tih a chiang.

Ka duh ang ka hmuh theih loh chèu vangin i û room ka chinglet leh a. Hei hi ka hmu ta a ni.. A chiang vek tawh tho a, i u i thah chhan dik tak fiahna a nih hi" Tiin Lehkha phek tam fe a theh thla a. Blank paper vek emaw tih tur a lehkha mawng lama Sangliana signature chuang vek si hi a ni. Ni e, kha signature kha nakinah eng emaw buaina pawh tawk se an la mamawh dawn vangin an sign lawk tir chiam tih a lang reng.

"Chuan, khami zana i bula mu chu Zuala ngei kha. ani e" Boss chuan a rawn ti hriam hraih a. Kan ngawi thap. Lawmi chu mak ka ti ngang mai. A mak em a ni.

"Aw ni e, ka sawi ang. U zuala nen hian kan inngaizawng a, Ka û in nupui a neih dawn khan buaina kan nei ta tlat a. Nupui a neiha fate a neih chuan a hnen atangin chan ka nei ve lo mai ang tih ka hlau a. Mahse, tih dan tur kan hre si lo. U zuala hian ruahmanna a siam ta a. Rapthlak ka ti viau naa, kawng dang awmin ka hre lo a ni. Thah tumna ka nei lo. In leh sumdawnna kha ka hminga dah tura ngen mai ka tum a ni. A bo ni khan a lo haw ngei a, Uzuala pawh a awm. Tichuan, ro chu ka hminha dah turin kan ngen ta char char a, U zuala nen kan inngaizawng tih pawh a hre ve chiah. Mak a ti hle nghe nghe.

Ka awm dan avang chuan a thinrim a, a dah duh tlat si lo. U zuala hian kut a thlak ta hial a, a sawisak lai phei chuan ka awm lo. Ka va hmuh leh chuan khang lehkhaho ah khan a lo sign mek a. A tap zawih zawih mai. Ka khawngaih leh ta deuh a, ngaihdam pawh ka dil nghe nghe.

Zanah khan U Zuala a riak ve nghal a, mahse, zan laia kan phuarna kha phelhin tlanchhuah a lo tum a, kan man leh hman hlauh a ni. Tichuan Uzuala khan a tukhumah a vaw ta pawp a, a dulah a vit zui ta nghal a ni. A ruang chu a roomah kan thukru a. Mahse, thil a buaithlak ang tih hlauin a motorah dahin U zuala khan a tlanchhuahpui ta a. Mahse, tih dan tur a hre mai lo. Ramhnuaiah a hnutchhiah tawp thu a sawi a. A tukah khan ngaihdan thar kan nei ta a. Accident anga lantir chu. Ka scooty in a motor dahna lamah kan zuk kal a, ramhnuai tihah mi kal vel pawn an hmu nual ang. A ngaihdan chuan miin an hmuh pawn an rawk anga a lan theih nana a tih kha a ni ve reng reng a. Mahse, tuman en chian nachang an hre lo a ni maithei. U zualan motor chu khalhin muallungthu lamah kan tlan ta a. Khamah khan kan nawrliam ta a ni.. A bak chu i hriat tawh kha.. " Lawmi chu a tap hlawp hlawp a.,.

"Zawnga" ti tuar chungin Danny chuan Zuala bek dinglamah a hnek dawp. A tlu nghal nawk. An chelh nghal laih mai.

An chhuah hnuah boss chuan, "Thihna lam rinhawt zawng a hahthlak a ni. Inngaihzawnna lama buaina te hi hnawk deuh awm se.. Umzui a chakawm " a ti sap a.

. "Ngaihzawng pawh i la nei si lo" ka lo ti thung.

"Ka nei mai thei asin.. Tu ge hria? " tih pahin min nuih ta sak a..