Amanda 8

(Dam chuan mondayah love story sei deuh kan beisei dawn nia)

BOSS AMANDA (Episode- 8)

Ziaktu: Toni Râlte

Shillonga zin tura ticket te pawh kan book fel thlap hnuah buaina dang bawk maw?  Ka va thinrim tak. Suangtuahna ka ngah hman nen. Hotelah room hranah awm mah ila; engtin tin emaw Boss chu ka chhaih kual theih ka lo inbeisei ve kha a nia. Pathian hian ka boss nen kan inngaihzawn hi a phal ve lo aniang! Ninawm lutuk mai a..

"Pastor a ni a, hmanni lawkah khan Pastor puitlinga nemngheh a ni asin le.. A khawngaihthlak hle mai" Mitthi in kan pan lai chuan a ti a.

"Zin kan tum nen.. Ka ui" ka ngaihtuahna chu ka thup thei hlawl lo a ni e.

"Nia, mahse, hun dang a awm turah ngai ang. Min zinpui pawh chu i va chak awm ve" a ti khauh a.

"Chak ve bawk e.. " ka ti a, "I chhe lo em alawm' tiin ka rilru chuan ka chhunzawm. Ka sawi lang ngam lo mai pawh a.

Zotlang chu kan thleng a. A ding ta a. In thar vak tawh lo, la tha ve tho si kawtah kan ding ran a. Zing dar 9:45 chiah a ni.  Mi an lo awm nak nak a, tap thawm pawh a tel. In chhungah chuan kan lut ta a. Ruang chu postmortem tur leh tur lo an lo sawi khawm mek a. Ruang awmna lam an sawiah chuan kan lut phei ta a.

Mipa satha lam, vun ngo tak, hrisel hmel tak a ni a. A ka atang chuan thisen a chhuak a, a taksa chu a khawng hle tawh. A mit chu a meng deuh rû bawk. A nak veilamah chuan chemte sei lutuk lo a bur vû bawk. Thisen erawh a khang tan mek thung. Chu zawng chu a hliam hmuh theih a ni. A ruang chu a lehkhabu chhiarna room, sermon te pawh a ziahna hmunah a ni a. Room zimtè a ni. Boss chuan postmortem loh chi a nih lohzia hrilhin thuawih takin an phur chhuak ta a.

He kan mitthi hming hi Lalruatsanga a ni a, kum 47 mi a ni. Chhim lam khaw pakhata post mek a ni a, tunah an nu nau neih chawlh la pahin an lo zin lai mek a niawm e. Tuna a thihna hmun hi an in pui a ni a. Thawhtanah an lo thleng a, vawiin hi Ninga ni a ni. An nu erawh kar hmasa khan a lo thleng tawh a, naute pawh a nei tawh nghe nghe. Thawhtan an pa lo thlen ni khan damdawiin atangin an rawn chhuak ve chiah a, a inhliam lem lo a ni maithei.

Pastor meuh a ni a, a thih dan runthlak tak chuan mi thinlung a khawih ngei a rinawm. A ruang a la awm lo bawk a. Tap nasa hlawm viau mah se; a sarhu laia thu zawh chu thain a hria nge Boss chuan a va bekbawr hlawm a. A nu leh pa leh a nupui te nen chuan an thenawm hnai berah chuan kan lut ta a.

"Kan naute hian zan tah a vei reuh a, kan mu mang lo thin. Nizan hmasa atang khan a zia ve deuh chauh a, ka taksa chau tawngkhawng tawh aniang chu ka mutui lutuk a, engmah ka hre lo. Dar 10 velah khan a tho a, ka harh ve nghal. "Sermon thar ka dawng, ka va ziak lawk ange" a ti mai a. A tih fô dan a nia, ka ngaihven zui lem lo, ka lo muhil leh daih. Kawngkapui inhawng thawmah ka harh leh a, kan kawngkapui saw rukru laka inven nan pawh a tha phian a, hawn hian a ri deuh thuai zel a. Sana ka en lem lo, mahse, ka ngaihtuah hian zing lam a nih ka ring. Ka mutchhuak tawngkhawng la reh lo nen ka muhil leh daih. Zingah ka tho a, kan pa chu a lo mu si lo va, ani hi badminton a khel leh aniang ti rilru chungin ka tho va. Hmun phiat turin a lekha chhiarna pindan ka va lut a, tikhan ka va hmu tawp mai a ni" Ruatsanga nupui Mary chuan inhnit hlawp hlawp chungin a ti a. Ka khawngaih ngei mai.

"Keni chuan engmah kan hre lo. Room saw a inkarkik ve deuh bawk nen, zinga Mary au thawmah kan hre ve chiah" Ruatsanga pa Pu Ruatliana chuan a ti charh charh a. A nu erawh a biak tlak meuh loh. A tawng dawna a tap nghal zel a ni.

"Anih a ruang chu dar engzat velah nge i va hmuh" Tiin Mary chu a melh a.

"Sana ka lo en chiah lo va, kan chhungkua hi kan tho hma vak lo hrim hrim a, dar 7 bawr vel a ni maithei" a ti a. 

An sawi ang khan Ruatsanga te in chu Assam type niin a lian hle a. Luh chiah hian common room a ni nghal a, zuk kal tlangin choka a ni a, common room dinglamah darthlalang chhanah Sitting room a awm a. Sitting room depah a nu leh pate room a awm a. Common room veilamah daih Ruatsanga te nupa chu an mu thung, an room depa room awm chu Ruatsanga naute nupa room a ni thung a, an ni lah an  nu te khuaa an zin lai a lo ni bawk si.

Sawi tawh ang khan Ruatsanga hi Pastor a ni a, Pro Pastor a nih laiin Mary nen hian an innei a, Mary hi  Lunglei Bazarveng a ni thung. Kum 30 bawr vel a ni maithei. Fa pahnih an nei anih chu. An fa û zawk pawh kum 3 lek a la ni,. An khawngaihthlak hle mai. Tu phiangsen chuan nge Pastor nunna chu rawng taka laksak ta ang le?

Ruatsanga phone call record kan han check a, nizanah khan Pa Lawma tih hnen atangin call a dawng a, a bak chu a bial lama upa leh rawngbawltu te an ni mai. Inbox a ruak a, a whatsapp kan luh erawh chuan, mit la deuh chu a awm. "Kei chuan ka theihnghilh tawh ngai lo vang che" tih thu hi number save loh atangin a dawng a, a seen a, a reply na a lang lo thung. A bak chu han rinhlelh tur a awm lo. Chu number leh Pa Lawma number chu a la ta a.

A naka vihna kha a thihpui tih a lang a, a ka atanga thisen chhuak ber kha result atangin a hriat ang chu maw.. An lumen dawn a, keini erawh khaw thim dawnah kan haw. Zin mawlh kha ka lo ngaihtuah leh thin.

A tukah Boss nen khang number pahnih kha kan chhui ta a. Chhui chhuah a lo harsa lem lo, an in kawtah kan ding ta ta ran a. Door bell a hmet tlang tlang a; kawngka chu an rawn hawng ta a. Nu valai lam, samkir zet mai, hmel tha deuh tak a ni. Nelawm takin, "Lo lut rawh u, eng nge in duh tak" a lo ti nghal var a.

"I pasal leh i fanu rawn hmu turin kan rawn kal a" BOss in a tih mek lai chuan, in chung atangin hmeichhe pakhat a rawn chhuk thla a. A kal dan atang chuan dam tha lo a ang. A zawi angreng tlat. A hmai pawh a dáng bái mai, a hmel erawh a tha viau. A cher hle bawk.

"Nu, Sanga thihna chungchangah an rawn kal a nih hi. Zingah khan kan inbia alawm.. Lo thu ru" a ti sawk sawk a. Ni e, an numberah khan boss in a call a, pafa an lo ni reng kha mak kan ti hle nghe nghe a nih kha..

"Khaw nge i pa? " Boss chuan a ti sap a.

"Sanga vuinaah a va kal ve anih kha.. Kal lo thei lo niin a inhria ani mahna" Chu nula (?)  Chu a awm dan leh tawng dan chu a confi riau, zámna engmah a nei lo.

"Aw le, i nu hi awm ve se a pawi em? " boss chuan a ti leh a.

"Pawi lo ve, a hre vek alawm, i duh duh min zawt rawh" a hma aia nelawm hian a ti ve mai a.

"Ruatsanga i textna kha kan lo hmu a. Eng emaw chu a awm niin ka hria.. I sawifiah thei em, i hming pawh kan la hre ta chuang lo va? " Boss aw pawh a nelawm lo hran lo.

Kan hmaa thu chuan, "Hmm.. Zonunsiami ka ni a, Zonun tiin min ko thin. Ni e, Ruatanga ka textna kha a hmutu tan chuan a ngaihthatawm loh viau ang. An nu phei chuan hmu se a ngai dik lo viau ang. Englo a nia, Sanga nen hian kan college kal lai atangin kan inngaizawng tawh a, thianghlim takin kan inngaizawng thin. Kan graduate ve ve hnuah a pa thu zawmin Pathian thu a zir leh ta a, khatih chhung zawng pawh khan rinawm takin kan inngaizawng dun zel a. A nu leh pa leh ka nu leh pa te pawn engkim an hre vek a ni. Pastor te a nih ve theih hunah inneih ngei pawh kan tum a ni.

Mahse, vanduaithlak takin Pathian thu zira a thangbo hlan in Accident ka tawk ta a, ka lu ka sawh avangin ka thluak lam a khawih tel ta deuh a. Ka hriatna thenkhat ka hloh ta a ni. Ka bialpa ka hmangaih em em Sanga pawh ka hre ta lo va, ka chhungte pawh rei tak chhung ka hre lo a ni. An niin hmangaih leh lainat takin min enkawl ta a, Sanga'n a zirna a zo va, a rawn haw a. Ka lo hre taeh si lo. A rilru natzia leh mangan thinzia hi tun hnuah an sawi thin a, ka inhaw hial thin. Doctor ten min nawr lutuk an phal si lo.

Ka nu leh pa te fanu neih chhun ka ni a, ka u leh ka naute chuan tunah chuan nupui an nei ve ve tawh. Tichuan, Sanga chu Pro Pastor a ni ta a ti mai ang. A tawi zawngin.

Kei lah ka hriatna ka neikir leh mai si lo, zawi zawia rawn kir tur a ni a. Rilru na taka siam chi ka ni hek lo. Sanga khan kum 2 dawn chu min nghak hial asin. Chutiang khawp chuan min hmangaih a ni. Mahse, ka chhul a lo cancer leh ta zel a!  Ka hriatna hloh chu thuhran, buai chang te ka nei chho va, neih tlak ka ni ta lo a ni ber mai. Kan neihin a tlin em a, tunah chuan ka dam viah tawh a ni.

Tichuan, Sanga Pa sawn, "Pastor te in ni si a, nulat tlangval kawngah mualpho a hlauhawm. Zonuni chu beidawnsan tawh mai rawh" tiin nupui tur an dapsak ta a. Hei hi an tih awm reng pawh a ni. Ka pa te pawh an rawn hrilh thlap, ka nu te pawn an khawngaih em vangin leh beisei tlak ka awm tawh loh vangin an thutlukna chu an pawmpui thlap a ni. Tichuan, an nu Mary saw inngaihzawnna mumal tak pawh nei lem lovin an sawiremsak ta a, mahse, a lo fel em em a, an inhmangaih chhawm zui ta a ni ngei ang. Nupa hlim tak leh awhawm tak an ni chho ta a ni.

Vanduaithlak takin Sanga nupuiin an fa pahnihna tur a pai tirha he lama an rawn zin lawka kan ina an rawn len tum khan ka hriatna hloh tawh chu a rawn kir leh ta tlat mai a!  Thil awmzia hre miah lo vin ka hamhaih rei viau nghe nghe. Ka pain thil nih dan min hrilh ta vek a. Ka hmangaih em em, ka pasal hual khan nupui nei tawhin fa hial an lo nei tawh chu a nia! /ka hriatna kha lo kir lo law law se a tha tur. Na ka ti a, ka tap ka tap mai. A chang chuan Sanga chu ka dem dawn dawn a, mahse, ka ngaihtuah chiah hian a dinhmunah ding ve ta ila,  a tih ang tho hi ka ti ve ang tih ka ring. Ka dem lo, ka thiam loh bik pawh a ni chuang lo. Ka natna kha a ni zawk. Tih theih a awm ta chusng lo bawk a, ka dinhmun chu pawm thiam mai ka tum ta a ni.

Mahse, hmanni a rawn haw khan kan inhmu hlawl a, ka lo ngai in ka lo la thlahlel em em a lo nia. Tikhan msg kha ka va thawn ta mai a ni. Reply pawh min reply hek lo. Ka dem lo.. Chu zawng chu a ni.. Kan thawnthu chu" Zonuni thusawi chu ngaihnawm ka lo ti viau. Ka khawngaih hle bawk.

"A thih thu i hriatin a nghawng ve che em? "

"Ka sawi thiam lo zawk. Tunah hian engtin nge felfai taka ka hmachhawn theih zawk che u tih ka ngaihtuah.. Va kal ve ka duh, mahse, ka pain min khap, ka va mualpho ang tih an hlau a" A hnuk a ulh aniang, a ngawi daih a. A melh ngai a melh ngawt ngawt bawk.

"Anih amah tina duhtu awm ang tur te i ngaihtuah thiam em? "

"Aih, a teuh lo. Lalruatsanga, mipa famkim sawn hmelma a neih chuan, khawvel hi a chhe tawpkhawk tihna a niang" a lo ti chul mai. A bialpa hlui chu a thlavang hauh a tina ngei mai.

"Anih a thih thu kha tuin nge rawn hrilh che"

"Ka nu hian min lo kai tho va,zing dar 6 rik hma deuh khan a nia,  a la hma sia, mut chhuak tawkin ka va tho a, mahse,  a thih thu ka hriat khan ka mutchhuak a reh vek" a ti a.

Thingpui kan in a, a pa chu kan nghak pah bawk. Zonuni nu chuan Ruatsanga fel zia leh puitlinzia a sawi malh malh a, a fanu pasal atan pawha a iai loh zia te pawh a zep tel. Mahse, Nupui a neih vanga an dem lohzia leh an hriatthiampuizia pawh a sawi. Chawhnu her. ani tawh a. Pa Lawma pawh a lo haw ve ta hnak hnak a.

"Aw.. Aa.. Sanga nen kan inbiakna kha maw, ni e, an lo zin ve bawk si a, chhungkhat ang kan ni tawh a, inhuatzuia in hmelhriat satliah mai kan nih ka hlau a, chaw eiah ka va sawm anih kha. Mahse, an nu damsam loh thu sawiin a phá kha a nia. Tikhan zanah tiang kha a tawk leh ta mai bawk si a.. A vanduai ka ti em mai, a pawi tak tak a ni" Pu Lawma chuan a ti charh charh a. Pawi a ti tak tak a nih hmel, a hmel a ngui hle. Pa hleitling tak, hmaitluak tha zet a ni a, a zaidam hmel khawp mai.

Tun tum zawng Boss lu pawh a hai ve hmel hle. Pastor thihna a ni a, rawng taka thattu hian hrem a phu hliah hliah a ni. Kan haw kawngah, "Mam, i ngaihtuah ve em ka hre lo a, Sap movie pakhat, "Pastor's Wife" kha i en tawh em? Khatiang deuh te kha a ni ve thei lawng maw? Mary sawn an pa leh Zonuni chanchin a lo hre ve anga, a thinrim rilru na hian a that te hi a ni thei mai ang em? " ka ti a.

"Thil ni thei tak chu a ni ve reng mai. Mahse, Sam, Mary hmel ka hmuh khan chutiang ti duh tur chi niin ka hre lo" a ti sap a.

Kei lah chuan tifuh inti fahran hian, "Hmm.. An hmel lan dan atangin teh suh i tih kha. Nunnem hmel viau mah se; a chhungril nun a lo kha viau thei ve tlat.. " ka ti phar phar a. Nuam ka ti hle.

A nui sak a, " A va tha em.. Anih chuan Mary saw i enthla anga, a phone records detail kan neih a ngai bawk ang" a ti ta a.

A tuk atang chuan hna kan tan chho ta mawp mawp mai. Ruatsanga ka atanga thisen chhuah chhan kha hriat a ni ta. A kawchhungah tûr chak tak hmuh a ni a, chu chuan fan chhuakin thisen a luak chhuak ta hial a ni. A nâka vihna kha chu police buma mai mai zawk a ang, a thih hnua vih a nih hmel. Mary chu ka belchiang telh telh a, ka ringhlel lo tulh tulh thung. A phone ah lah han rinhlelh tur engmah kan hmu lo. A call record pawh a felfai, mahse, mak deuhin Zonuni nen an inbiakna a awm.

"Min lo bia a, a unaunu anga min en thu leh min huat loh thu a sawi a. Chu zawng chu" a ti mai si. Zonuni kan va biak leh pawn a lo pha lem lo. Mary chhuina chu bansan mai ka duh ta rum rum mai..

Boss erawh chuan Ruatsanga diary a bih ngun ngang mai. Eng em em a hmu bik lo chuan a tithinur hlur mai. Aizawl a lo phei atangin engmah a ziak tawh lo miau a!  Han hnemhnanpui tur awm hek lo.

"Sam, Zonuni te inah va leng leh lawk ang hmiang' Ruatsanga thih atanga kar khatna chiah a ni. Rin aiin hun kan duh rei tlat!  Boss meuh pawh a buai ve a ni maithei. Ka inpeih a ni nghal mai.

"Mam, bialpa nei ve la" a steering a hum nghet sawt chu ka hmu thei. A khi sak a, "Ngah maw? ' a ti satliah a.

"Nangmah venghimtu tur mipa i mamawh alawm"

"Venhim ka ngai em ni? "

"I ngaih hun a la awm ang, mipa nge nge chu an tangkai zawk ania"

"Sam, min duh tih hi frank deuhin sawi mai la" a ti thut. Ka va zak si eee..

"Ka duh che pawh ka hre lo" ka ti niah niah.

"Engtikah emaw chuan mipa leh hmeichhia angin chaw te pawh kan la ei dun maithei asin" a ti sap a. Hmalam a bih ngur mai. Engmah ka sawi ngam tawh lo. Min man chhuak chiang em mai.

Zonuni te inah chuan rei kan awm lem lo.

"Ruatsanga nu te lam sawn an nu nen an boruak an sawi tha duh tlat lo mai a. Nangni lam hian hriat innneih mialin ka tia. Mary lahin an pa a hmangaih thu bak sawi tur a hre meuh si lo" Boss in a tih lai chuan mak ti deuhin ka lo awm. Vawikhatmah Ruatsanga pa te bulah an nupa inkar a zawt miah si lo.

"Ka hriat ve theih chinah chuan nupa inpawh leh inngai tak an niin ka hria.. " Zonuni chuan a lo ti a.

"Nia, Mary saw a fel riau asin.. bawihi nen an chungchang a hre vek chungin puitling takin a la hmachhawn thei zel ania.. Boruak tha lo chu an neih ka ring lo" Pu Lawma chuan a lo ti ve bawk a.

Boss bawk chuan, "Anih zonun, eng nge i an zel? " tiin Zonuni chu a en a.

"Ka tha a ni mai. Ka hriatna ka neih let leh atang khan nitin na ka tuar tawh a, hetia a thih tak hialah hian ka lawm ni miah lo vin ka tuar belh em em lo.. " a ti sap a. Apa chu a en a, "Ka pa hian a ruang va hmuh ve kha a phal tlat lo va. Kha erawh pawi ka ti" a ti a. A mitmengah pawh lung nih lohna a awm. A awm ve reng.

"Ti daih ila, a thih thu kha tuin nge lo hrilh che u? " Bioss chuan a ti a.

"Sanga pain min lo hrilh a. Ka lo awih lo lek lek hial alawm" Pu Lawma chuan a ti a.

"Engoawhnise, a thih dan hi a runthlak em mai a. Theihtawp kan chhuah ve mek zel a nia" a ti a. A phone chu a khal neuh neuh a. Thingpui an lum si avangin kan nghak rih a ni. Zonuni nuin thingpui a rawn chhawp a,. Nu fel tak zawng a ni e.

Boss phone chu a ri tlang tlang a," Hello.. Aw keimah.. Aw… a ni maw, a va lawmawm ve. In pa diary ngei a ni chiang maw?  Aw le.. A that nasat chu, tualthattu min kawhhmuh thei ngei ang. Lo la chhiar lo ula ka va duh em.. Umm… ni e, mahse, zaninah hna laklawh lutuk ka nei a, khutah Sairang lamah ka liamthlak a ngai dawn a. Zanin chu lo kawl tha phawt mai la.. Naktukah ka rawn lam ange.. Aw.. Inleng neuh neuh te kha an la awm ve bawk sia.. A lawmawm e.. Aw le.. Anih leh le" A ti a. A phone hman chhung zawng chuan kan lo melh thap.

. "Ruatsanga Diary an hmu chhuak a, min pui thei ngei turah ka ngai.. Mahse, zanin kha Sairangah kan tlang nghal a ngai dawn sia.. " tiin min rawn melh a. A phur sârh mai.

"A van lawmawm em.. Sanga kha thil ziak peih tak a nia, a diary chuan a pui thei khawp che u in ka ring.. He tualthatttu hian a phutawk hremna a hmu ngei tur a ni" Pu Lawma chuan a lo ti dam thlap a. A fanu chu lainat hmel takin a melh bawk a. Zonuni eraeh chuan chhuat lam a melh reng thung.

Kan chhuah hnuah, "Sairangah chuan eng nge kan tih dawn? " ka ti nghal thâwr a. A nui hak.

"Game khelh ve zeuh a ngai thin alawm.. Sam, ngaihtuah la, Mary khan an pa ruang kha zing dar 7 bawr vela a hmuh thu a sawi a, mahse, Zonuni chuan dar 6 rik hma velin a a bialpa hlui thih thu a hre tawh tlat!  Pu Lawma khan Sanga pain a rawn hrilh angin a sawi a. Khatiang ruang hmuh buai lai khan a tumah Sanga pa sawn a call theih ka ring chiah lo. An makpa te lamin an chhungkhat ho chu an hrilh zawk ngei ang..

Tin, niminah khan Sanga pa te chu ka kawm tha leh a, Zonuni te nen an inkar boruak vel te. An inpawh tho naa, Sanga hian tlawhpawh a remtih vak tawh loh thu an sawi tlat a ni. An huat loh thu erawh an sawi. Zonuni te lam thiltih a nih an rin loh thu pawh an sawi tho. Mary thung kha chuan, A pasal a hmangaih lutah Zonuni kha a ringhlel lek lek a, mahse, chutia han ringhlel bur erawh a ni lo.

Engpawhnise, zaninah thudik chu kan hre thei mai ang chu maw? " a ti sar sar a. Ka hawi â vek. A eng thudik nge niang le.. Diary te, Phone biak der te.. Ti nge maw ka thluak hi a thawl em em bik ni. Ka hmingpui Samsona ang deuh khan nula lamah ka zei hawrh ringawt mai.

Kei chu ka haw nghal a, Boss chuan min thlah thlap. Khawiah nge a kal leh dawn tih erawh ka zawt duh lem lo.

"Sam, zanin chu ka thi mai thei a, ka dam chhuak maithei bawk.." A msg chu leh!  A fiamthu thawh ve dan te lah hi a a dead thei mai siah.

"I thih ka la phal lo" ka va ti a.

"Ka dam chhuah chuan, zin programme kan duang tha leh dawn nia" smiley a rawn dah tuar.

Ka replay hmain, "Nih phawt" a ti.

Ni chu tuk dang ang bawkin a rawn chhuak leh a, kei pawh phak zetin ka tho. Ka phone ka zuk ban chiah tihin a rwwn ri nghal mawle.. Amanda..

"Aw" ka ti mawl tawp.

"Tukthuan chu hetah i ei mai dawn nia, Ruatsanga te inah lo phei rawh" a ti a. Ek chhuah mah nak alaiin a..

Ka va thlen phei chuan, an lo buai deuh nuai mai. Boss chu ka va pan vat a.

"Nizanah an in hi tu emawin a rawk a" awmze nei zetin min rawn melh. Ka lo melh ve hû ringawt.

"Tu nge niang le"ka ti sup.

"Diary kal zel kha.. " a ti hmuk. Tlem chuan ka man tan. Diary kha an hmuchhuak si a, Zonuni te khan lak an tum tihna  a ni thei ang em?  Mahse, Zonuni te kha chu an inhnamhnawih loh hmel si. Lehkha chhiarna pindan kha a hnawk deuh niaih a, lehkhabu a darh nuaih bawk.

"Tuman an hre lo mi?  An harh lo em ni? " ka ti a.

"Harh lo a ni maithei.. An meng rim ve te pawh a niang. He rukru hi zing lam muttui lai takin a che pawh a ni mahna'

Thil bo lian tham a awm lem lo bawk a, FIR an thehlut lem lo. An fapa tualthihna kal zel a nih erawh an ring.

Tukthuan ei turin Boss in lam kan pan a, Artui kan tur a rawn chhawp. A nui saih a. A hmel tha hle mai. Ka artui kang zo leh a frigde hawng tur kan in su deuh dawt a. A kun ta ngawih ngawih. Kei ka na vak si lo va, mak ka ti deuh. A âwm vei lam a hnute chung deuh chu a dawm vung vung a, "Huixz, a nat vak loh kha.. " ka lo ti hmanhmawh.

"Umm.. Ka tha" a ti tham chhal a. Na deuh tuar hmel a pu tlat. Mak ka ti deuh a, a dawmna zawn chu ka va nèm a, a rak thawt. Ka kut ka la rang kher mai.

"Eng nge.. Ti nge a? " ka ti hû a.

A kawr hak lai chu a hlip ta a, a hnuaia a tawnzau dum hak chu a hlim a, a bra pawh a lang vek. Kareii, a hnute chung zawn chu a rawn thi tuam tuam mai. Thil hriam taka vihna a ang.

"Ti nge.. Eng nge thleng a? ' ka ti tuar.

"Min vit hman a" a ti sap a. Ka buaipui nghal. Damdawi ka la a, a ka hnawih a, bandage nen plaster nen ka buai ve tawp. A ngawi reng thung.

"Damdawiinah kal ang" ka ti a.

"A tul lo. A tawp kan thleng tep" a ti vat.

"I mawl mi?  A thi chhuak kha a reh vat a ngai. Ka buaipui thiam hleinem che" ka ti vin thak.

"Oh.. Sam, hahdam rawh. Ka thi lo vang. A vit thut hleinem. Tukin ka chhhuah hma khan ka bel ve thlap asin le.. "

"Tu nge vit che.. Sawi teh"

"Ruatsanga thattu khan"

"Chu chu tu nge ka tia lawm le"

"Chaw ei khamah kan fiah dawn alawm.. Tu nge tih ka sawi thei bik lo. A hmai khuhna ka hawng hman bik lo va. Mahse, Zonuni emaw Pu Lawma emaw an nih beisei phawt ang"

"Mahse, engtin nge kan fihfiah chuan anga.. "

"Kei pawn kut ka thlak ve alawm.. A chal dinglamah hliam a nei ngei tur a ni. Tin, a banrek veilam pawh a hmang ngam miah lo vang" a ti ta a.

Tukthuan pawh ka ei tui nek lo ve. Ani chuan Diary chungchang kha Mary a hrilh thu leh mi dang erawh hrilh lo tura a chah thu a sawi a. A chhan chu an helhhawlh atalangin misual tan chance an siam sak thei lo vang tih a hlau a ni. Ani chu Lehkha chhiarna roomah khan a biru a. Misual lo kal hun kha a lo nghak a niawm e. A lo kal ta reng a, mahse,  a hmai a tuam. Diary kha a zawng ta chiah reng a, a hmu zo lo va, mary roomah a va lut leh a, mahse, Mary khan thawm a neih tak avangin a tlan chhuak ta a. Boss chuan umzui ve nghalin a hmai khuhna chu hlihsak tumin an inchai ta a ni. Tikhan hliam insiamsak tawnin an intha then kha a ni a. Boss chuan a umzui tho naa, a rin loh lamah a kal daih si a, Zemabawk lamah a tlan daih!  Ani a awmah hliam a tuar si a, a hawnsan ta a ni.

Tun tum. Chu a thil chhui lai ka hre ve ta zel a, ka kaw ve sâwt riau. Chaw kan ei khama a inbual fai a. Kan chhuak zui nghal.

"Zonun, i pa a awm em le? " Boss chuan a ti sap a.

"Awm ang.. Kan ko ange.. Ngati nge? " Zonuni chiái hmel chu ka hrethiam ve tlat. Hliam erawh a nei lo.

Room atangin apa chu a lo chhuak ta a. Ka au chhuak thelh a ni. A chal dinglamah bandaid a bel!

"Eheu, Pu Lawm, engtizia nge i chal chu? ' Boss chuan a lo ti var a. Makti awm fe hian a melh bawk.

"Nia mawle, hei nizan kan meeting bang kha ka tlu palh a, bike ka khalh lohna a rei ta deuh aniang, ka inhliam palh a nih hi.. ana lem lo nat chu" a ti dam thluam a.

An tukverh thlanglama dah tum niawm takin Boss chu a kal phei a, chhuat chu a lo nal nge a pai nawk a, Pu Lawma banah a va chelh chawt!  Pu Lawma rak thawt chuan Boss a tinui sak. A banrek chu a chet tir ngam miah lo. A chiang ta.

"Pu Lawm, Pastor Ruatsanga i thah vangin man i ni e" a ti vawt raih a. Zonuni nu chiah a hamhaih!

Ruatsanga chhungte lam an lo thleng kim. Ta bawk a. Boss chuan a chhui dan chu a sawi zar zar a, a sawi zawhah, "I thah dan leh i thah chhan kha ka hre duh" a ti ta a.

"Aw ni e, ka sawi em em ang. Ruatsanga khan dam reng a phu lo a ni. Ka fanu neihchhun hian a hmangaih ngawih ngawih asin. Mahse, ani chu a nupui leh fate nen an hlim tawh si a. Ka fanuin hriatna a neihkir leha a tawrhna a tahpui thin atang khan ka danglam vek ta a ni. Sanga chu ka be fô va, an nu thena ka fanu nei turin. Mahse, min hnial fithla zel a.

Chuan a lo zin tum khan Bawihi hian inhmuh a chak em em a, a dil ngawih ngawih hial!  Mahse, chu pawh chu a hnial a, amah Bawihi hian va pan chilh hial a tum tak avangin a rawn kal ta a ni. Chumi tum. Chuan amah tibuai tawh lo tur in a ti a, Bawihi chu a vau hial. Ka. Rilru a na a, ka hua a ni tawp.

Ka va bia a, a nupui ka vau zawk tur thu ka hrilh ta hial a. Engahmah a lo ngai lo. Ka thinrim a sosang ta em a, zanah khan ka va chhuak ta a, ramhuaiin min tanpui aniang e. Awlsamtein an inah khan ka lut thei ta mai a. An roomah a lo awm loh vangin lehkha chhiarna roomah khan ka va lut ta a. A lo awm. Min hmuh rualin a ka ka hup a, a ka ka hupna puanah tur chak tak kha ka tat lawk vek a ni. A thi zui ta mai a. Ka vit leh ta a ni.

Ina ka hawn leh chuan Bawihi hi a lo la meng reng mai a. Nasa taja min dawp hnuah a bialpa chu ka va that tih ka saawi ta a ni… ani hian engkim a hre vek. Mahse, ka hmangaih leh lainat vanga ka tih a ni tih a hriat vangin khawiahmah a sawi ta lo a nih kha..

Diary kha chu in hriat tawh ang kha a ni mai e" Pu Lawma chuan inchhir hmel zetin a ti a. A fanu a hmangaih luat vanga a thiltih rapthlak tak chuan a fanu leh amah a lahrang dawn si a.

"Tun tum chu a khirh hmel tehreng nen.. Rin aiin kan awlsam leh si a" Boss chuan a ti sap a.

"Nia" ka ti ringawt.

"Zin chu" a ti leh a.

"I hliam kha dam fel phawt rawh se" ka ti a. Ka inla puitling tawp.

"Engkim kha i hmu vek sia" a mitmeng chu ka hrethiam lo.

"Hmu e.. Hnute nalhnu" tih leh chhuah ka rual nghal..

(Tun tum chu ka hmanhmawh em a. Ka ti kikawi ta lo a ni e. Hun dangah chuan ni khat dan zel a ni tawh dawn bawk a. Kan tikimchang thei tawh ang..

Ka hmangaih che u 😘