Amanda 7

BOSS AMANDA.. (Episode - 7)

Ziaktu : Toni Râlte

Dr Dingliana in ka va thlen ve meuh chuan, ruang chu an lo senghawi tawh a. Postmortem turin an lo phur chho tawh. Mahse, thlalaka a landan ka hmu ta tho. An nupa roomah a nupui zawk hi hmuh a ni a, a fapa erawh choka tui khawihna bulah a ni. Zing dar 5 bawr vela an awmpuinu bazar kal turin an fapa ruang hi a hmu phawt a, a rak chul a. Mi dang an lo tho va, Pu Dinga erawh dutyin Hospital lamah a riak daih thung. An nu kaih thawh tuma room an va hawng chu, an nu ruang pawh an hmu zui ve ta mai a ni. An fapa hi kum 4 mi lek a ni a, a lu ah hliam na tak a tuar a, chu chu a thihpui a nih hmel. A nupui erawh a hrawkah chem hriam taka zai a ni a, thisen pawh a chhuak nasa hle. Tin, a dulah vih a ni bawk. Thlalak chauha hmuh chu ka duh tawk. Thisuk hi ka nei aniang. Hmuh nuam lo ka ti thin takzet. Rang taka police call nghalin, Pu Dinga pawh koh haw nghal a ni a. A hrilhhai hmel kher mai.

Pu Dinga hi Surgeon a ni a, nizan khan dam lo serious tak pakhat an zai vangin hun an hmang rei deuh a, haw ta lo vin a riak nghal ta a ni awm e. Dr Dinga hre lo chu Aizawlah hian mi tlemte bak an nih a rinawm loh. A zai kher duha pan vang vang hi an tam khawp. A thiamna a ril a, a inzir peih bawk a. Senior pawl tak ni mah se; a kut a la damin tihsual a nei ngai lo tluk a ni. Tin, a larna dang leh chu Sumdawnna lian tak a enkawl tel hi a ni. Sawrkar phalna leh pawmpuinain thingrai hmangin a pa hun lai ata tawh an chhungkua an sumdawng thin a, sawrkar hnena an chhiah pek pawh a namai lo hle. Chu an sumdawnna chu a huang tilian zelin tunah chuan Mizorama sumdawng lian ber pawl a ni tawh a ni. A nu leh pa an boral tawh a, unau pathum niin a mah hi a upa ber a, a nau chiah hi  a pasal hna vangin USA ah an awm a. An tlum ber erawh an chhungkaw black sheep a ni ve a. Nupui a nei tawh a, Pu Dinga te nen an la chengho vek a ni. A nau kutah hian an sumdawnna kha a awm ren rawn a, a manage thiam loh chu thuhran amah a lo sual ve tumhrang bawk si a, a kuta dah zel ngam lo vin Pu Dinga hian Doctor ni chungin sumdawnna chu a enkawl deuh tawp mai a ni. A nau erawh theihtawpin a enkawl tho va, home ah te dahin mi puitlinga chher chhuah a tum mek lai a ni. Tuna Pu Dinga nupui thi ta hi a nupui pahnihna a ni nghe nghe, a nupui hmasa erawh an fanu te pahnih nen Lunglei lamah an khawsa a ni.

"Nizanah dar engzatah nge in mut a, han ngaihthat lohna tur thil ngaihbel tur eng emaw tal a awm em? " tiin Boss chuan Pu Dinga nau Hruaia leh a nupui Remi a melh a.

"Hmm.. Nizan khan zanriah ei khamah tv kan en ho va, Mami (Pu Dinga nupui)  leh Bawiha erawh roomah lehkha an inzirtir a. Rei kan en lo, kan mu ve nghal deuh mai. Dar 9 vel a ni maithei. Kan muhil lem chuang lo va, engmah han ngaihbel tur ka hre hran lo" Hruaia chuan a ti chuar chuar a. A chevel chu ruih nei te pawh a ang. A ni nghuai mai.

"Nia, kei pawh engmah ka hre lo. Hruaia mutthilh lai pawh ka hre lo, ka phone khawih lai khan ka lo muhil daih a. Zinga Sawmi rak ri ka hriat khan ka harh leh chauh" Remi chuan a lo ti ve bawk a.

"Pu Ding, han ngaihtuah vang vang la, i chhiatna duhtu, i nupui leh i fa an thih vanga hlawkna tel thei an awm em? " Pu Dinga chu a melh a.

"Aawm pawh ka hre lo. Kan sumdawnnah hi chuan han inbakkaih deuh chang chu a awm a. Mahse, hetiang ti duh tur chi niin ka hre hlawm lo" a ti a. An nu thihna vang nge a menrei vang a meng sen rám mai. A intipachang thei ka ti khawp mai.

"I nupui hmasa lam te? "Bossin a tih rual chuan Pu Dinga chu a phu deuh zuk a.

"Aa.. Saii chu a nih ka ring lo. Huat zawng min haw khawp mai a, mahse, chutianga nunrawng a ni lo"

Tlangkam atanga kan lo hriat danin tuna a nupui Mami hi nurse a ni thin a, inhmu fo ta na na na chu an lo innel deuh nge a rai ta mai a. Mi fate tih dan tho a ni naa, a nupui Saii kha hmeichhe induhtawk ve tak a ni bawk a, an pa chu ngaidam duh lo vin a chhuahsan a niawm e. Tichuan, Mami chu a la lut ta a ni. Saii hi College Lecturer a ni nghe nghe.

An awmpuinu pawh thu chu kan zawt ve tho a, a chiai angreng a, zawh tlak vak pawh a ni lo. In rawkna lah a ni hauh bawk si lo. Thil bo awm miau hek lo. A thattu hian hun thawl leh zalen tak a nei tih a lang reng mai. Mami phone kan han check a, a call records te.. An pa nen an inbe hnuhnung ber, a bak chu ama chhung leh khat bakah a thiante a biakna deuh vek a ni. Message pawh rinhlelh tur a awm lo ti ila, sms pakhat chuan mit a la deuh. Number hlang a ni a, "I tum ang chuan i nuamsa hauh lo vang, lo ngai reng mah rawh. I phutawk hremna zawng i la hmu dawn khawp" tih thu hi a ni a. Boss chuan chu number chu a la nghal var. Ruang pawh a lo thleng dawn hnai ta bawk a. An in chu kan chhuahsan ta a.

"Sam, Zoram pawh hi a ralmuang tawh lo a ni tiraw.. Tualthahna hi a thleng chho ve ta reng chu a nia" a ti sap a.

"Dik chiah, kan naupan laia rapthlak kan tih nen, tunah chuan ngaiah kan nei deuh mai mai tawh" ka lo ti ve a.

Airtel office lamah kan kal kawi a. Number kha tu number nge tih chhui a ngai ve tlat. An lo fel bawk a, sim card chu Pu Dinga Nupui hlui Saihmingliani hminga book niin, Ni 13, July thlaa book kha a ni. A la rei lo viau mai. Bawhzui tur kan nei hrim hrim pawh chu a lawmawm lamah ngai ang. Lunglei zin pawh a khat alawm le.

A tukah Lunglei chu kan kal ta a. Pi Saii te in pawh kan hre chawpchilh nghal mai. Chanmari-ah in tha ve tawk takah an lo cheng a. A nau hmeichhia leh a fate pahnih nen. Kan hmel a hmuh chuan mak a tih hmel deuh. Hawng leh nghal tur kan nih vangin pehhel kual lo vin kan sawi tur kan sawi a, Lunglei Police stationah kan hruai ta a ni.

"Ka book a ni lo. "Tih chu a tan dan a ni.

"Mahse, i ID tel lo vin tu chuan nge book ta ang? " boss chuan a lo ti chang fak a.

"Ngawi teh, i sawi takah chuan, July thla tir lam khan ka rawn zin a, ka ID ka tibo tak alawm.. Ka tihbona ka hre si lo va, chanchinbuah pawh ka chhuah hman.. In en duh chuan khami huna vanglainiah a la awm ngei ang. Chu ka ID chu an hmang a ni mai lo maw, a thar ka siam tir leh ringawt alawm? " a ti ta a. Lecturer a ni bawk a. A tawngkam a felfai thlarh mai. A zahawm riau bawk.

"Tin, ni e, ka pasal min chhuhsaktu a ni a, ka ngaina viau lo ang tih chu in hrethiam ang. Mahse, chutia a vau ang zawng leh va runluih ang zawga che chi ka ni lo. Ngawi tawp chi ka ni. Vawikhatmah ka la be lo" a ti zui bawk a. A hmel han enin tualthah duh chi niin a lang bawk si lo. Boss pawh chuan a thusawi chu a awih hmel tlat. Mahse, fiah ve hrim hrim nan Vanglaini chanchinbu hlui erawh kan hai ta a. A lo chuang vang mai. Saii chu a fihlim hrih phawt ti mai ang. Enthlak tho tur zawng a ni e.

Aizawlah kan haw phei leh ta phawt. Pu Dingte chhungkua pawh chim buai rih loh thain kan hria nge, kan be leh ta lo. Mak ka tih ve mai mai chu in pakhata thil thleng si, mi dang ten engmah an hre si lo kha. He tualthattu hian hmun dangah a that phawt nge rilru a tibuai. An hausa bawk a, inleng an nei kal reng mai. An in hi a chhawng a ni a, a chungah Pu Dinga te nupa leh an fapa room a awm a. Sitting room a awm bawk a, Pu Dinga library room nuam zet a awm bawk. In hnuaiah a naute nupa leh an awmpui nu room bakah mikhual room zau fe a awm bawk a. A hnuai leh chu garrage leh store room atan an hmang.

Ni 3 a liam hnuah Pu Dinga chu kan ko va, a hmel a pawr phang a, a chevel pawh a zang lem lo khawp mai. Doctor ni bawk, sumdawnna enkawl bawk. A hahthlak ve viau ang.

"Han inzawt ta mai mai ila, fimkhur thu hlaah.. I thurochhiah hi kan hriat a pawi viau loh chuan min hrilh thei ang em? ' boss chu a inthlahrun hmel angreng.

"Pawi lah lo ve. In hriat angin in leh sumdawnna hi kan ro chu a ni mai a. Tuna Chanmari-a ka in sak mek lai saw kan peih hunah kan chhungkuain kan va luah ve ang ka lo tia. Tuna kan awmna erawh ka nau kutah awm se, tin, Dinthara ka in pawh khu ka farnu tan ka dah bawk a. Ka sumdawnna erawh hmun thumah ka then a, ka fapa leh ka fanu te bakah ka nau tan share inang ka dah hrang vek a. Mahse, ka fapa in min boralsan tak si ah chuan tihdanglam pawh a ngai dawnin ka hria a. Mami chhungte lam pawh puih ve nan hrim hrim eng emaw tal tihsak chu an phû ka tia, a la hlimchhawn bawk a. Ka la siam danglam lem lo" a ti charh charh a. Pa nelawm tak zanwg a ni chiang a ni.

"Anih i thurochhiah chu i nau ten an hre ve em? "

"Hre ve vek e. Ka nau pawn a pawm thlap. A dinhmun sawti saw a nia, a vui lem lo chuan ka hria"

"Anih i nau nen in inkar hi a tha thawkhat em?  In nu nen an inkar te pawh"

"Umm.. Nia, zep thu a cheng lo, Saii kha û tak tak angin a en thin a. An inngaina bawk, Saii khan a hmangaihin a lainat ve bawk lah taka, khatia ka han chet phelh deuh takah khan ka nau chu a thinrim ve khawp mai a. Saii kha a tan em em bawk. Mami ka han lalut a, a lungawi thei meuh lo. Biak pawh an in be hleithei lo a ni ber. Mahse, hun a rei a, fapa te kan han nei chho a, an ni an nu sawn nau a la pai ve lo bawk nen ka fapa erawh a duat ta viau a. Mami nen pawh an in nel chho ve ta viau chuan ka hria.. " a ti leh dap dap a.

"An nu leh in nu inkar boruak te.. Mo ve ve ang an ni a, han inbakkaih changte an nei ve thin em? "

"Ekhai!  Teuh lo mai. Remi saw ka hmeichhe hriat tawhah chuan fel ka tih pawl zing a mi a ni ang. Ka nau nen sawn an inrual khat a, a puitling zawk. Saii nen khan an inhrawn rei hman vak lo naa Saii pawn a fak hle thin.. Mami kha amah aiin a nau zawk naa a u en thiam a, a zah thiam lutuk. Kei pawn mo ang pawn ka en meuh lo, farnu angin ka en ti ila a dik ang. Mahse, hei kum 3 pumhlum chu an innei ve tawh a, fa an la nei tlat lo va, a tu zawk chian lohna nge phei chu ka hre lo, Remi saw nei lo se an inthen daih tawh ang. Ka nau hi a bawraw ve thin nen.. Remi chu Mami nen an inkarah eng boruak mah a awm lo" a ti leh thliam a. A nau nupui kha keipawn fel hmel ka lo ti ve.

Pu Dawnga nupui leh fapa thihna chuan sawizui a hlawh viau a, chet lak a har ve tho si, demna kan han dawng leh ngawt a. Chutianga chhui chhuah zung zung chi ni nghal lo chuan. Pu Dinga pawn chawlh a la rih a. Upat lamah vanduaina a tawk chu a khawngaihthlak viau. Postmortem result-ah kha chuan thlalaka kan hmuh dan ang deuh kha a ni mai. Mahse, thil pawimawh deuh pakhat erawh a awm. Chu chuan boss pawh a tiphur zual a, an kawchhungah damdawi chi khat, mut duhna an hmu tel a ni. Tui taka an mutthilh laiin he tualthattu hian rawng takin a that tihna a ni ngei ang. Pu Dinga pawn mak a ti ve hle. An awmpuinu kan ko phawt, ani eirawngbawltu ber a ni a, a hmasa ber lo thei lo. Mahse,  a tang na ngang mai. A tan huai em vangin leh a hmel zawng zawng nen amah anih theih ka ring lo ve tawp. Remi kan ko ve leh a, ani chuan khami tlai khan an nupaa an ina chaw an ei loh thu a sawi tlat. Anpa thianpa ve ber ten an in thar lawmnaah an lo sawm a lo nia. Engmah a hre lo. Anih chuan tu nge ni ta ang le..

An awmpuinu chu bossin thiam takin a han zawt leh a. A ngaihtuah fe hnuah, "Ih, keimah ka insawi fihlim tumna ni lo vin khami tlai khan ka pu driver leh a thianpa ka ti mai. Chumi te chu rawng ka bawl lai chuan an lo lut a, Driver hi Hminga a ni a, kan inhre tha tawh a. Chawhmeh pawh a va tem nghe nghe.. Chutah chuan damdawite chu a lo thlak a ni mai lo maw? " a ti ta a.

Rang takin driver kan ko leh a. Tlangval hmel chhe lo tak, palian deuh mai a ni a. A mitmeng erawh a lerh tih a hriat, boss a melh dan vel chu ka lo ngaithei vak lo.

"Aw kan va kal ngei alawm. Chawhmeh pawh ka tem. Mahse, eng damdawi mah ka thlak lo. Engvangin nge ka pi chu ka thah ngawt ang"a ti hû.. Boss chuan a kaltir leh mai. A ring a ni chèk ang chu.

Zan dar 7 bawr velah Pu Dinga in lamah kan phei leh ta poh a. Inleng neuh neuh an lo la nei a. An room lamah enfiah duh a neih vangin kan chho a. An room ringawt pawh ka room let hnih vel aniang, hausak ve hi ka van chak thei tak. Room chu an chinfel vek tawh vangin eng em em hmuh tur a awm lo. Boss chu a vei thuak thuak a, Khum bula Filter changkang zet chu a l a en kual a. A hnim thul. Tui lo awm pawh chu a in a. Kan chhuk leh hnuah, "Filter -a tui awm khi in paih tawh em?  Tui in dah khat sia" a ti a.

Seni chuan, "Kei chuan ka dah lo, an room erawh ka singsa a" a lo ti var a.

"Aw.. Keimah a nih kha, Ka û hian dah turin min ti a" Remi chuan a lo ti ve bawk a. Pu Dinga pawh chuan, "Tui kha a lo tlem tawh sia, ka dah tir anih kha. A pawi em? " a lo ti tha ve mai a.

"Pawi lo ve. Ka zawt mai mai che u. Kan kal leh nghal mai ang" a ti a. Kan chhuak zui nghal. A chet dan hi a hawihhawm lo ve zeuh thin.

Kan hna chu a khirh angreng. An chhungkaw member zingah rinhlelhawm an awm si lo. Hruaia hi kei chuan ka ringhlel deuh ber a. Boss lah hian a ringhlel ve lo nge thu pawh a zawt ve ngai lo.

Hna pakhat la zawh fel chiah loh kan khawih tel pah a, kan zo lek lek tawh. Sihhmui lamah kan liam thla a, he kan hna pakhat hi hmeichia kum la tling lo a bialpa nena an inruk thubuai kual vel a ni a. Ho ka tih zawng tak. Sihhmuia kan awm laiin Boss chuan ph call a dawng ta a. A ner sak danah thu lawmawm lam a nih loh hmel.

Chawhnu her a ni tawh a, khua a dur khuih khuih lehnghal. "Sam, kan zo fel thawkhat tawh tho bawk a. Pu Dinga te in lamah kan kal leh a ngai tlat" a ti a. Mi dang lo awm ve te chu an phawk deuh naa, engmah a hrilh lo.

Kan hawn kawngah, "Pu Dinga a inawkhlum a nih chu" a ti ta a. Ka nghing ve lawih thei!  Mak ka ti nasa. Pu Dinga hmel dam thlup kha ka mitthla nghal. A va mak em.

A ruang an lo senghawi tawh a. Postmortem turin an phur chho tawh. An lo tap chuah chuah a, tumah han kawm hleitheih pawh a ni rih lo. An thenawm te ka atanga kan hriat danin a library roomah a ruang hi hmuh a ni a, an awmpuinu bawkin a han hmu leh a niawm e. Seni tak pawh a khawngaihthlak reuh, ruang han hmuh ziah pawh chu..

Ruang an vui fel a, Hruaia min lo hrilh tawh angin zanah kan va phei ve ta a. In chung lamah kan chho dial a, an farnu USA-a awm pawh a lo hawng dawn a niawm e.

"Ka û khan lehkha a hnutchhiah a, hei in chhiar duh chuan" tiin lehkha phek hlai hlep hlawp hi a rawn lek kang va a. Boss chuan a lo la vat a.

"Kei hian ka nupui leh ka fapa kha ka that a ni. Damdawiin atangin a rukin ka hawng a, Damdawiina ka chhoh hma khan an eiturah mutthilhna kha ka pawlh sa a. Ka zuk hawn pawh chuan an lo mutui hle. In chung kawngka atangin ka lut a, in hnuai lamah thawm engmah an hre thei dawn lo tih ka hria. Ka thah hnuah damdawiin lamah ka chho leh ta a ni. Engvanga that nge ka nih tih erawh ka nupui hlui Saiin a hria ang. Ani nen hian kan la inhmangaih reng a, kan inkara harsatna awm thei chu thenfai hna ka thawk ve mai a ni. Mahse, mangchhiain min tibuai fo va. Mami leh ka fapa te thlarau khan mumang ramah min sawisa thin. Tunah ngei pawh a tak ngeiin min tibuai tawj a ni. Ka tuar zo thlawt lo a ni e. Khawngaihtakin min lo ngaidam dawn nia" tih thu chu.

Ka lo thaw huai. Kan case chu tikhan a close theih maiah ka ngai. Boss erawh chuan thuziak chu a chhiar nawn zing khawp mai. A mitmeng nur lek lek chuan min rawn melh ralh a. Ka hrethiam lo.

"Hei hi i û kutziak a ni ngei a maw? "

"Aw ni e, a hawrawp hi Doctor dang ang lo takin a chhe ve lem lo" a lo ti a.

Remi erawh a in hnit faih faih reng a, mit bui lák chungin, "Kei chu ka û khan a thah ka ring thei lo. Tu te emaw thiltih aniang" a ti a.

"Maithei. Saii pawh kan koh phei chu a ngai dawn anih hi' Boss chuan a ti sup a. Pu Dinga ruang an hmuh dan leh thil thlen dan a zawt zui nghal a.

"Chawlh a la bawk a, inah a tawm deuh chawt reng a. Chaw pawh a ei mumal vak lo. Zan hnih lai chu an roomah pawh a riak lo. Library roomah a riak mai zel a. Kan hrethiam em em. Chuan tukinah tukthuan a ei peih loh thu a sawi a, mahse, ka han pe tho. Chhun lamah khan kan pa hi inentir turin a chhuak a. Kei pawh ka nute tlawh turin ka chhuak ve nghal. Chhun lamah hi chuan inleng kan nei lutuk tawh lem lo. Seni hian min lo call a, a thiannu in buaina a tawh thu leh va hmu tura chhuah min rawn dil a, a kal hmain ka u kha han hrilh hrim hrim turin ka ti a. Chuan chawhnuah ka hawng a. Kan pa erawh a lo la thleng lo. Ka call nghe nghe.. Ka u pawh ka han ngaihsak lem lo, tihbuai ka hreh ve deuh bawk a, eirawng ka bawl a. Seni a lo haw a, thinrim deuhin, a thiannu in a bum thu leh an va inhmuh loh thu a sawi bawrh bawrh a. Thingpui ka siam a, amah pawh ka siamkep nghe nghe. Ka û chu han pe lawk turin ka ti a. A han chho chu tikhan a ruang kha a han hmu ta mai a ni" Remi chuan a ti a. A mittui a hru zauh zauh bawk.

Seni ve thung chuan, "Nia, ka pi te chhuah hnu lawk khan ka thiannu Lalpari'n min lo bia a, buaina lian deuh ka tawk a, lo kal mai teh. Min puih ka ngai.. A rawn ti a, ani hi kan khuaa ka thiannu ve ber a ni a, mi ina awm ve tho ania. Ka khawngaih ve bawk nen, Ka pu ka han hrilh pawn tha takin, Aw le va kal rawh.. Min ngaihtuah suh.. A lo tia, tikhan ka hmu leh ta mai sia.. " a inhnit hlawp hlawp a. Ka lo khawngaih reuh.

"Lawkin, i thiannu awmnaah chuan i va kal ta em ni? Engtin chiah nge a lo bum che a? " boss chuan a lo ti vat a.

"Umm.. An in ka va kal chuan a lo awm a. 'Ka call lo che' a lo tia. Ka ngeizia chu" a ti a.

"Khawi maw.. a lo call na che number chu" a lo ti var a. Seni chuan a phone chu a pe a. Boss khi sak chuan min tihlim ve ringawt.

"Aw le, engpawhnise, Pu Dinga lehkha hnutchhiah hi chu ka lo kawl rih lawk ange, chuan khawiahmah lo sawi darh rih lo ula ka duh bawk. Thil hi a khirh deuh thin naa a tawpah thudik bawk a dingchang leh thin ania" a ti a. Library roomah kan pahnih chauhin kan lut a. A felfai hle mai. Lehkhabu chhah zet zet a intiang thût mai. Ka chhiar peih chi. an ni lo ve a.

"Sam, hei le Pu Dinga kutziak chu.. Han enkawp teh. A danglamna i hre thei em? " tiin amah pawh chuan a enkawp a. Ngun zeta ka han en dun pawn a danglamna ka hmu thiam vak lo. Dawhkan chunga fan in khaiah ania Pu Dinga kha a lo inkhai ni. Dawhkan pawh a tlu a, an lo tung tha tawh zawk a ni.

"Lawk.. Sam, hei enteh, L hi a danglam deuh lo maw.. Pu Dinga hi chuan a L hawrawpte hi a thai thla pawp a, mipa kutziak tam tak angin, hetah ve thung chuan L tè hi a chung lamah a zul nawn leh kher a nih hi, chuan T hawrawptè pawh hi Pu Dinga chuan a hnuailam a tikawm deuh a, hetah chuan a kawm lai hi a tawi hret.. " a ti zung zung a. Ka'n en chîk ve leh deuh chuan a sawi ang chu a nih ve theih dan a awm.

"Mahse, a intihhlum dawna a ziah te pawh a ni thei a, a hlauthawng kut khur vangte pawn khatiang mai mai chu a danglam ve thei tho" ka lo ti a.

"Kum tam tak chhung kan chun than tawh hi kan kut hian ngaiah a nei a, eng anga hmanhmawh pawh ni ila, a tih fo dan hi a hmaih emaw a belh thei vak lo asin.. " a ti ve mai a.

Kutziak lam chu kan dah tha rih ta phawt a..  Kan haw zui ta nghal  a.

Postmortemah kha chuan thu thar a awm lo. Mahni intihlum anga ngaih a ni. Boss pawh hian chutiang chuan ngai thei se ka ti. A phur sauh emaw tih turin a awm leh tlat a. Ka ning.

Saii chu kan hmaah a thu ran a. A pasal hlui thihna chuan a deng na ve deuh nge a mitmeng a dul ve hnak mai.

"I fate avang pawn a ruang kha i kil ka lo ring a" Boss bultanna teh tawp thin hi.

"Nia, ka hria lawm.. Min rawn hrilh khan ka insiam nghal a. Mahse, vanduaithlak takin Ka fanu upa zawk hi a luak vak a, nikhua hre lo titihin a rawn awm a. A thil ei sual vang a lo nia. Kan buai zo leh ta si a, a ruang kan rawn nang hman ngang lo a ni" a ti dam thliam a.

"Thil buaithlak tak a awm leh a ni. I hminga sim card an bookna tho khan an awmpuinu bumchhuah a ni"

"Eng a?!  Seni an bum a maw? " mak a ti tak tak tih ka hre thei.

"A ni mai ang chu. Kha number ngei khan Seni kha a call tlat a ni.. "

"Chuan keimah angah in ngai leh tihna em ni? "

."Ngai chiah lo. I ID i tihbo dan kha min hrilh la ka duh. Khawiah nge tih tal? "

"Awii chutia sawi mai dawn chuan ka hrechiang bik chiah lo. Ka'n ngaihtuah ange. U Dinga khan a thurochhiah chungchangah min rawn bia a, a ukil te nen kan inhmu a, chuan ka haw a.. Ni lo, Hruaia'n min lo bia a, a dam loh thu te a rawn sawi a. Damdawiinah ka han tlawh zuai. Seni leh Remi pawh an lo awm ve nghe nghe. Chuan, ka chhuahsan a.. Ee.. Ngawi rawh.. Ka hrechhuak, ti nge ka tihbo tirh khan ka hriat chhuah loh theih zawk. Damdawiin atanga ka chhuak chiah tihin mi pakhat lukhum khum nen kan in su dawrh a, ka bag ka thlauh a, ka thil ah a tla darh vek tak alawm.. Min chharpui a, ngaihdam te min dil a. Kha pa ngei khan ka purse kha min ruksak a ni ngei ang. In ka thlenin ka purse a awm tawh lo. Purse ah pawisa tlem azawng leh ID bakah Atm card ka dah a.. " a ti ta zung zung a. Mangan tawh chuan thil hriatchhuah zung zung a awl an tih kha a dik a ni ngei ang.

"Chu pa chu hmu la i la hre thei ang em? "

"A hmel kha ka hmu chiang thei lo. Lukhum a khum tlat a. Pa sang tak chu a ni"

"Nangmah awhna tur nisiin saw chhungkua saw tu ten emaw an chhaih buai mek a nih hmel. Anih, nangma lamah hawtu che an awm em? Hetianga awhtir duh tur khawp che"

"Awm ka hre miah lo. " a lo ti leh tlat bawk si. Huiham…

"Thil dang lawk, pu Dinga thurochhiah kha i pawmpui ve mai em ni? "

"Umm, a tir kha chuan ka chapona avang khan a ngai lo ka ti zet a, mahse, thil thui tak ka ngaihtuahin ka fate tana tha tur niin ka hria a. Ka pawmpui ve ta mai a ni" a ti a. Kan kaltir leh ta phawt.

Zanah Pu Dinga in lam bawk kan pan leh. Kan va kal kual zing tak. Seni roomah kan lut ve thung. Engmah kan hmu lem hlei lo va.

"Seni, anih i pi leh a fapa thih zan khan engmah thawm hriat i nei miah lo em ni? " boss chuan a ti daih.

"Umm, a mak lutuk khami zan kha. Zan dangah te chuan ka mengrei ve thin ania. Dar 8 vel atang khan ka mut a chhuak lutuk a, ph pawh ka khawih peih lo. Ka mutui lutuk" a lo ti ve mai a. Boss chu a bu nghut nghut.

Hruaia te roomah kan lut ve leh. A felfai angreng. Fa an la nei lem lo bawk a. Hruaia hi a kawm tlak meuh lo, a u thihna khan a deng na lutuk a. Amah a vanglaia a ruihhlo tihna ten a taksa an lo ei chhe bawk nen, a hriselna a tlahniam zual a. Drip an lo khai nghe nghe a ni. Engvakmah hmasawnna tur kan hmu lem lo.

A tuka office ka va thlen chuan boss a lo la thleng lo va. Ani leh ni lo anga a han tlai ve ni.. A rawn thlen chuan a chauh hmel riauin ka hria. Mut a hmu tha vak lo a nih ka ring.

"Kei chu Pu Dinga ber a inpuang tawh a. Chhui leh vak hi a ngai em ni ka ti. Hruaia te pawn an pawm thiam mai lo maw? " ka ti a.

"Pu Dinga kha pa tha tak, mi nunna tam tak chhanhimtu a ni asin. A dikna chanvo hmuh chu a phu ve lo maw? " a ti daih. Ani hi chuan inawkhlumah a ngai therte lo tih a chiang reng.

"Nizan chu ruk ka va ru a" tih pahin a bag khai chu a zen rak rak a. Mak ti deuhin ka lo melh hruk hruk ringawt.

Lehkha phek tam deuh inzial hi a rawn phawrh a. A phelh darh nghal a. Ka'n en nák chuan, Pu Dinga lehkhathawn hnutchhiaha thuziak ang hlir kha a lo ni mawle!  Ti nge hetianga tam deuh a ziak kher kher..

"Sam, i man thiam tawh em?  Kan mi veh mèk hian Pu Dinga kutziak a zir nasa hle tih a lang. A ziah that hnemzia hi.. A vawi 20na velah a duhtawk ta chauh a nih kha" a ti ta a. Ka man thiam tan e.

"Anih chuan heng hi khawi atangin nge i va ruk chhuah? "

"Ele, garbage bag atangin.. " a nui hak a. Ka lo melh rum.

"Pu Dinga te garrage-ah. Vawiina bawlhhlawh phur motora paih tawh tur kha ka va hai a. A tam sia, ka hai rei hman alawm" a ti ta a.

"Anih chuan a tu ber saw nge kan target dawn? "

"An ni thei vek. Pu Dinga thahna chhan tur tha tak an nei vek. Ro vang te, chhung leh kua vang te pawn.. "

"Eng nge a awmzia? "

"Hruaia te nupa saw chuan ro vangin an that maithei. Seni saw chuan a ni Saii vangin"

"Saii kha a nî maw? "

"Hla tak atanga a nî a niawm e. Saii avanga awmpui alawm an nih. Saii a chhuah hnuah pawh a la awm ta zel a, a la awm zelna sawn chhan tha tak a nei ve maithei asin" a ti ta a.

"Anih chuan Saii pawh a inhnamhnawih ve thei tihna a nih chu"

"Ni mai e.. "

Kan ngaihtuahna kan kawm ta melh melh a. Tu ber nge rinhlelh tur ka hre hauh lo. Hruaia ber lah a dam lo si.

A tukah Hruaia a that vak loh thu te kan hriat vangin amah kan pah fawm leh mi dang thlithlai pahin kan va kal leh a.

A lo khuh bur bur mai. An farnu pawh a lo thleng tawh a. Nu hmelntha tak, zahawm zet mai a ni a. Biak a nuam viau. Mahse, ani hi chuan min pui thei tehchiam lo vang. Hruaia mawlh chu a ni, thei leh thei lovin, "Ka pi, ka u khan khatiang thil kha a ti thei lo reng reng ang, khawngaihin chhui chhuak rawh" a ti tham chal a. Boss pawn a khawngaih hmel khawp mai. Boss chu in chung lamah a chho leh a, eng tak han ti dawn ni maw.. A rawn chhuk leh chuan a hmel chu a phur deuh sarh hian ka hria. Engmah phei chu a sawi lem lo.

"Sam, a tawp kan hnaih ta.. Hruaia min ngenna ang ngei khan a u dikna chanvo chu kan hmuhsak ngei dawn e" a ti a. Ka lo hlim ve ringawt.

Saii leh Pu Dinga ukil te nen Pu Dinga in lam chu kan pan ta a. Eng nge kan va tih dawn ka hre bik hauh lo.

Mak an lo tih hmel khawp mai. In leng an lo awm mang lo va, a lawmawm zawk. Ukil chuan a aw a thian kharh a, "Hei kan lo kal chhan chu ro chungchang a ni a. Pu Dinga khan a thih hma ni chiah khan min rawn bia a, a thurochhiah thlak danglam turin..

He in hi chu Hruaia te nupa tan a dah a, Dinthara a in pawh hei Marovi tan a dah bawk a. A sumdawnna erawh Saii kutah a dah ta a ni.Mahse, Saii hian zankhat mitchhin a lo tawk palh hlauh anih chuan, sumdawnna hmun hniha thena hmun khat Hruaian a chang anga, hmun khat erawh a fanu ten an chang ang. An la puitlin hma erawh Hruaia hian a chhunzawmsak dawn a ni.  Chuan an nupa tana a sak lai mek saw chu Mami chhungte tan a dah bawk a. Chu chu a hun lo maithei a, mahse, thil hi hriat vat a tha zawka ka hriat vangin ka rawn sawi a ni e". A ti charh charh a. An meng phawk hlawm kher mai.

"Ka u chuan a ngaihtuah thui khawp alawm.. Matea lah heti hi a ni si a, sumdawnna han enkawl chi a ni si lo va.. Mahse, eizawnna dang an nei bawk si lo va, kei chu helamah ka awm ngai chuang lo, Dinthar ami khu chu Matea te hian lo enkawl mai se a tha ang. A luah man ringawt pawh khuan an intungnung ve mai ang" Marovai chuan a lo ti var a.

Hruaia pawh chuan, "A tha reng alawm.. Kei chu ka nep em a ni" a lo ti ve a. Vui hmel a pu lo.

Remi lahin, "Dik tak chuan a thurochhiah hmasa zawk khan min tibuai deuh a, sumdawnna kha chu keini nupa hian kan chhunzawm thiam dawn si lo va, chutiang a lo ti chu a that hlauh chu.. " a lo ti ve thliam bawk. Ka beisei loh lam a ni daih. Ka rin dan chuan an thinrim hle ka lo ring a. Boss ka va melh a, a mitmeng chu a nung sar mai.

"Eng nge kan va tih ve ber a.. Khatah khan" ka ti a.

"An hmel lan dan theuh kha ka en duh alawm" a ti sap a.

"Anih i beisei ang i hmu ta em? "

"Hmu tain ka inhria" a ti. Ka hmuh ve si loh…

Ni 2 a liam leh tawh a. Case dangin min tlakbuak zui leh nen, Boss pawn a hma angin rilru a pe ta vak lo em mawni chu aw ka ti.

Saii pawh a haw dawn ta a. A hawn hma zanah Pu Hruaia te chu a va tlawh ve leh hrim hrim. A. An sumdawnna chungchangte pawh sawifel a ngai ve bawk nen. Boss nen an in piah lawka kawng kawi zau laiah chuan kan lo nghak ran a. Eng vang teh reng nge mawni ka thin a phu dup dup mai. Saii amaha lo kal phei chu kan lo thlir reng a. A hawi kual zak zak mai. Kan zawn a rawn thlen hma deuh chuan chak zetin Alto a rawn tlan duk zawk a, Saii chu a pan ding kher mai. A su thawi thuak chuan ka hria, a rak tuar a, kawngsirah a tlu bawkkhup ta hnawk a. Motor. Chu a break ri tuarh a. Mahse, a tlan leh nghal daih. A bul hnai in atang chuan mi an lo chhuak liai liai a. Boss eraeh chuan, "Alto car var, mz 01-D 4378 a ni e, lo man ngei ang che u" tiin Police a call nghal a. Saii chu kan va buaipui zawm ve ta a.

A tuka thil thleng erawh Misual te tan chuan anchhia a ni ta a ni. Hei hi he case tawpna chu a ni ta.

Pu Hruaia chu chauh hmel zetin a thu zawi hniang a, a bulah Remi, Senin a dawt a, Marovi bulah Saii, An ukil leh Pu Dinga driver te an ni. Boss chuan a melh kual dan dan a, an ngui nghiai hian a lang.

"Tunah chuan thudik kan hre ta chu a nia. Pu Hruai, i u nupui leh fapa mai bakah i û ngei thattu te chu i hre tawh dawn e. I nupui Remi leh in driver Hmingsanga te hi an ni e" a ti fiak thak a. A tu amai pawh chu an hawi phawk hra mai.

"Eng a.. Eng maw.. Kei hian ka that ang maw.. Engvangin maw?" Remi chuan a ti tuar a. A ding khur hlak hlak bawk.

"Hmingsang, nizan khan Saii kha i sut thelh lui nge i su hman lo zawk? " tiin Hmingsanga lam a hawi daih.

"Sut ka tum lo hrim hrim.. " a ti ringawt a.

"In luhlul ve riau dawn mai. Hman ang bawkin ka'n sawi hmasa leh mai ang e. A hmasa berin mami leh a fapa thihna khan min tibuai. Chhui zui tur engmah in hnutchhiah tlat lo va. Mahse, an taksa chhunga mutthilhna damdawi hmuh anih takah kha chuan tlemin ka phur leh deuh. Chawhmeh atangin kan han tan a, engmah awmzia a nei lo. An nupa room ka han fan hmasak khan Filter tui kha a chanve aia sang a la awm a, a hnua ka han kal leh khan a lo khat piau tawh. Pu Dingan tui a tlem vangin Remi a dah khah tir thu ka hre ta a. Khami kar lekah khan tui chanve aia sang kha dah belh ngai khawpin a tlem hman lo tih ka chiang. Tu emawin a paih a ni ngei ang. An chhungkaw zing ami a ni ngei bawk anga, tin, Mami te nufa kha kha filtera tui an in vang khan tui takin an muhil tih a lang. In chung lama thawm hi inhnuai atangin a hriat theih mang loh avangin tualthattu te chu duhtawkin an che thei ta a ni.

Mahse, tu nge tih ka ngaihtuah thiam bik lo. Pu Dinga in thah leh chiah khan kawng ka hmu ta zawk a ni. A kutziak kha. Fihlim in tumna lamah in inbarhlut ta zawk a ni ber. Kutziak hi ka lo zir chiang nasa tawh a. A danglam dan ka hre ve thei tlat a ni. Tichuan, khami kar khan zan khat chu zan reiah in inah ka rawn kal a, garrage-ah garbage bag in hun thluah kha ka hai ta chiam mai a ni. Ka beisei ang ngeiin Remi'n Pu Dinga kutziak a zirna, a ziah that teuhna chu ka hmu ta a. Kha tah khan a chiang thawkhat viau naa ka la duhtawk mai lo deuh.

Marovi lo hawn hnua Library room-a ka han kal leh khan, bawlhhlawh bawma meizial bung leh arsa roast tlang hnih ka hai chhuak a. A la tharlam viau. Dawhkana no chu a hmaa kan kal khan pakhat a ni a, khamini eraeh kha chuan pahnih a lo ni tawh. Tu te emaw chuan kha roomah khan nuam an chen tih a hriat. Marovi a ni thei lo va, Hruaia leh Remi chuan room an nei ve reng. Seni chuan a ti ngam lo vang. Anih chuan Remi hian a pasal thlimin in chung thawm hriat phak lohnaah tu emaw a tawmpui a ni.

Ka la duhtawk mai lo va, Thudik tih lan nan dawt hmangin thurochhiah kan thlak ta a. In hmel landan ka hmuh duh vang ringawtin Sama nen kan lo kal ve nghe nghe kha. Remi mitmenga huatna leh thinurna kha kei chuan ka hai der thei lo. Mitmeng hian tumah a bum thei tlat lo a ni. Saii dinhmun a derthawng tih ka. Hre nghal. a, amah pawh hian a pasal hlui thattu hriatchhuah nan chuan huaisen taka ke pen a lo hnial lo bawk a. Nizanah khan khatiang thil a thlen kha kan ring sa a, Saii kha kan tawktarh a nih kha. A huaisenna hi ka fak duh. A nunna a thap ka ti ngam.. Hmingsanga car khalh kha a thianpa ta a ni. Tih pawh kan hre tawh e.. Le… in sawi ve hun" dawhkana tuisik chu a lem khawlh khawlh a.

Hruaia thisen zám pawng tawlh tawlh leh Remi hlauthawng hmel chu ka melh tawn sek.

Hmingsanga chuan a aw a thian kharh a.

"Aw ni e, a dik vek e. Engkim kha Remi nen inthuruala kan tih vek a ni. Pu Dinga drivera kan tan tirh atangin Remi nen hian kan inhmel duh tawh a. Hruaia hi a hrisel vak lo nen, bakah a lo bawraw ve thin bawk a. Kei ka riak zeuh zeuh bawk a, hun thwwl kan nei fo mai. Ruahmanna kan siam dun ta a. An hausakzia te kan hre ve bawk nen, Engkim kha Kan plan vek a ni. Saii kankai tir kan duh vangin a hminga sim card book nan a ID ka ruksak a, tichuan, chumi number atang chuan Mami kha ka vau thin.

Mami te kan thah zan khan i sawi dik, an filterah khan damdawi kan pawlh a, Pu Dinga a lo haw dawn lo tih kan hre bawk a. Tichuan, an nufa chuan an muhil zui ta mai a. Seni leh Hruaia te pawh kha roomah damdawi kan kah luh avangin an mutui hle. Kan duhtawkin kan che thei ta a ni. Mahse, man chhuah kan hlau a, i dap kim bawk si nen, Amah Pu Dingaah khan burbun vek kan tum ta a. Khamini khan an chhuah vek hnuah an in chung kawngka atang khan ka lut a, ka pu kha ka call lawk bawk a, buaina nei anga insawiin.

A hnunglam atangin ka hrui kenin ka rek bet ta tlat a. A thi har lo. Tichuan, Remi a rawn haw a, kan pahnihin fanah khan kan khai ta a. Remi thuziak kha dawhkanah kan dah bawk. Kei chu ka chhuak zui leh ta nghal a ni. Tuman min hmu lo kha a lawmawm hle naa, man kan ni ta tho a. Nih hi. Chuan Librarya i thil hmuh kha chu, zan reiah in chung kawngka a tangin ka lut thin a. Ani a lo chho a. Kan duhtawkin nuam kan chen thin.. " a tawi kim viau.

Remi biang a ri thuai. A rak nghal tuar bawk.

"Ka u khan a hmangaiha a duhsak tehlul. Che nen i thungrulh dan chu a va rapthlak ngai ve leh… tenawmnu" Hruaia chuan a hachang a thial rap rap mai. Marovi pawh a inhup tlawk tlawk mai. Saii pawh a thinrim tih a hriat takzet..

Kan hawn dawnin, "Boss, thurochhiah kha engtin nge ni zel dawn.. " ka ti a.

"Tumah an rethei lo vang. Pu Dinga khan a ngaihtuah kim vek alawm" a ti sap a.

"Tun kar chhung chu chawlh hmangin Shillongah zuk zin ang hmiang" a ti zui zat a. Ka lo hmin leh thlap tawh.

A mawngbawr khal zet, pen sau pawk pawk thlir chungin, "Ka la bawhbet dawn khawp che' ka ti sap a. A hre pha lo erawh ka vannei..