Amanda 6

BOSS AMANDA (Episode- 6)

Ziaktu- Toni Râlte

Tahrik ni 10,August, 2017 (Thawhlehni zing)  a ni a. Kan office-ah chuan nu pakhat, hlauhthawn hmel tak a rawn lut hlawl mai a. Helhkam lian tak nei tih hriat takin a kut te chu a ti che sek a, Boss chuan thu turin a lo hrilh a.

Nu tar lam lek lek, hmai zur lam a ni a. Kum 57 bawr vel a ni maithei. Hna a thawk nasa deuh pawh a ni maithei. Zo nu ve tak mai a ni a. Office lama min rawn lenchilhtu hi an tam em em lo va, tuna a rawn kal pawh hi kan lo ngaihsak tha viau.

"Sam, Kuri kha han hrilh la, thingpui rawn dah teh se, kei chu a háng aw" Boss chuan a ti zung zung a.

"Le.. Ka pi, khawngaihin i buaina chu a bul atangin kimchang takin min han hrilh ta che" a ti sap a.

Chu nu chu a thaw hap a. "Aw le, nia, ka thiam ang angin ka'n sawi ange. Ka hming chu Hmingliani a ni a. Kum 1995 khan Zodai khua atangin Aizawlah kan rawn pem a. Chawlhhmun lamah sawn kan inbengbel ve a. Khatih lai kha chuan ram ruak a la tam bawk a, Chawlhhmun VC ten tuna kan awmna hmun saw min sahthlaksak ve a, in te sa vein vawiin thlengin kan la cheng a ni. Kan pa hian PHE Department-ah 4th grade hna a hmu ve hlauh mai a. Chu chuan kan intungnung ti ila, kei hian leipui te neiin ka thlai hralhna pawh hi kan chhawr ve viau mai. Fapa pahnih leh fanu pakhat kan nei a. Tunah chuan an nula tlangval ve tawh ti mai ang. Nikum May thla khan kan pa in Thin cancer vangin min boralsan a, kan nufazain kan hmeithai ta rak rak mai a ni. Vanneihthlak takin kan party hruaitu te min sawpuina a zarah kan pa ai kha kan fapa upa an la ta hlauh mai a, kan lawm khawp mai. Kan fanu neihchhun chuan puanthui te zirin tunah chuan bazarah sawn dawrah a thawk ve mek a. A naupangber mipa erawh College a kal ve tawh a. A û te hian a theih chen chen kal rawh se an ti ve tlat a. Kha kha kan chhungkaw chanchin chu ni mai se.

Ka rawn kal chhan ber ka'n sawi tawh ang e. Sawi tawh ang khan kan in saw kan pa khan a boral hma khan loan te puk ve in kan sa tha ve a. Assam type mai mai mah nise, kan neih chhun a ni ve a. Mahse, hei kan buai zo ta a ni ber mai. Thla hmasa ni 4 zan atanga intan kha niin ka hria. Zan laiah kan fanu mu lai chu a rawn tak tuar mai a!  Mangchhia a mang anih ringin ka va kal nghal a. A hlauh hmel khawp mai.

"Nu, ka hlau lutuk, mi pakhat lukawlh vek hian thosilen chhan atang hian min lo bih kur a" a ti a. A khur der der mai. Chumi zan chuan a u hi a thianpa te inah a riak a. A tuka a lo hawa kan sawi chuan a awih lo khawp mai a. Mahse, riak chhuak tawh lo turin kan ti a. Pa uap loh nih nen, ani fa û ber riah chhuah bawk chu kan thlamuang lutuk lo a ni.

Zanah chuan eng thawm mah kan hre ta lo va. Mahse, a tuk chhunah thil mak deuh a thleng ta a. Chawhma lamah leipuiah kawmchhaknu nen kan va kal a, kawngka pawh ka kalh thlap. Chabi erawh kan thuhruk thinna hmunah ka dah leh mai a. Kan leipui kal kan haw chu, kan in chu a lo inhawng huai a. Mama emaw bawiha emaw an lo haw tawhah ka ngai mai a. Mahse, tumah an lo awm lo. Ka roomah hian ti mai ang, kan te ber nen khum hran ve veah hian kan mu a. Ani hi chu kan la naute chei ve bawk a. Kan room ka va lut chu ka khum chu a lo let bul mai. Puanthuah zawng zawng erawh Bawiha khumah fel takin a lo inthlep thap thung. Ka hlau hran lo va, mak erawh ka ti deuh. Tin, bathrooma kan bel hun khap 8 zet chu a lo inkhaikhup ngût bawk.

Tlaiah an rawn hawng hlawm a. Thil awm dan chu ka sawi a. Mami chuan a hlau leh ta hle a, Mama erawh chuan, "Min ngamtlak te hian min fiam mai mai aniang.. Engahmah ngai suh u" a ti tlat a. Zanah Mami chu ka bulah a rawn insawn daih nghe nghe. Zing dar 2 vel bawrah kan in piah maia kan ar vulh chu an chiau chul mai a. An thawm a nat deuh vangin ka harh.

Ka va tho a, Mama a rawn tho ve chiah. Torchlight nen kan va phei a. Kan ar zinga a lian ber pahnih chu lu bungin an lo let ngût maj. Ka rilru a na viau nghe nghe. Ei an tling tan tawh a nia. Mama pawh a thinrim hmel khawp mai. An en kual a, tumah lah kan hmu si lo. Ar in bula kan din lai chuan Mami rak thawt kan hria a. Kan va luh chuan, chhuatah a lo mu a, a nau pawh rawn harhin bawihsawm a lo tum mek a.

"Ka ke hnuai a rawn za mer mer a, ka mutchhuah em vangin ka muhil zui leh mai a. Mahse, ka ke phah hi kut vawt zetin a rawn vuan niin ka hria, ka hlau lutuk kha khum atangin ka tla ni berin ka hria.. " a hmel atang chuan a hlau tih a lang reng mai. Mama nen kan inmelh reng ringawt. Mak kan ti ta viau mai.

Chumi a chin ni 2 chu a reh leh phawt a. Kan ngaih a tha ta deuh tihah thawm a rawn nei leh ta. Kan in bulah hian thing ding a awm lem lo va, kawmthlang lamah erawh zawngtah leh theihai te a awm ve. Kan in chung chu theirah lian tak tla ang mai hian a ri tawk tawk reng mai a. Zan tir mai chauh a nih avangin kan va tlanchhuak a. Tu ten emaw an rawn vawm anih ka ring. A reh ve leh mai a. Mut hnu dar 12 bawr velah kan tukverh thlanglam chu kut tin hriam zet in a ham ni mai awm hian a ri hrawih hrawih zel a. Kan in a sang a, thlanglam tukverh rawn ham thei tur chuan lawn san a ngai ve viau ang. Thil theih ni pawn ka hre lo.

Mama nen bawk kan tho a, Engmah kan va hmu lo. Mahse, mu tura room kan luh leh hma chiahin thla ai nge ka hrethiam lo. Kan kawmthlang mau hmunah chuan a ri ta ruah ruah mai. Hmeichhe tap thawm na tuar mangang awrawl niin ka hria.. Ka thauah min man a, ka hlau ve ta khawp mai. Mama erawh chhuah a tum a, ka dang a. Mami te pawh rawn harhin sitting roomah chuan kan thu tlaivar ta ringawt mai a ni.

A tukah thenawm te kan han zawt vel a, thla ai ri chu an lo hre ve chiang mai. Awm a nuam lo chho ta hle a. Mahse, khami hnu atang khan kar khat lai a reh ta a. Kan lawm hle. Mami pawh a room lamah a insawn phei tawh a. Mahse.. Kar hmasa Thawhtan zan atang khan a rawn che leh ta a ni. A hma aiin a nasa ti mai ang.

Bawiha inthiar tur bathroom a lut chiah chu dum veka inthuam, sam thlah hnuang hi bathroomah chuan a lo inkhai reng mai a. Hlau em emin a rawn tlanchhuak a, kan va en ve nghal vat. Engmah kan hmu lo. A hmaa kan thil lo tawn tawh avangin awih loh sak ngawt chi a ni si lo. Kan chawhmeh te hi zingah a lo darh leh nuai zel a, zan laiah chhuat laia vei thawm niawm tak kan hre fô!  Kan va fiah pawn engmah kan hmu ngai lo. Kan inhnuaiah nise a ruka inbe ser ser niawm tak te, na tuar thaw hulh hulh ri te, nui ker ker ri te kan hre chamchi a. Chhun lawnah pawh Mami leh Bawiha chu anmahni pawn an awm ngam tawh lo. Kan khawtlang hruai tu ten lo hriain, nimin piah atang khan zan lamah chuan tlawmngaiin an rawn duty ta tawp a. A lawmawm rualin a zahthlak tho.

Mahse, chuti chung pawh chuan zuk che tho a mawle!  Nizanah khan kan inah tlangval pahnih an riak a, pawn lamah duty an awm bawk. Zing dar 3 velah kawmthlangah thla a rawn ai leh a. Kan harh vek. Thenkhatin kawmthlang lam an pan a, chutia kan buai lai mek chuan, Mama a rawn rak thawt a. Ani pawh kawmthlanga kal tura a insiam lai a ni a. A rooma kan va lut chu a mutna bula tulverh chu a lo inhawng hiai a, ani hi thlanglam roomah a mu a ni. Amah lah chu chhuatah a lo bawksawp niaih a.

A nák veilam chu na a ti hle mai a. A sawi danin tukverh a rawn inhawng thut a, kawrfual dum ha mi lian tak a rawn lut a, a nâkah a rawn chhuih ngawt mai a ni. Chu kawrdum ha chu a hmel a hmu thei lo, a samin a hliah vek. A nak chu kan han en sak chuan, a lo duk chur mai a, a thaw tha thei lo hial mai. Kawm thlanga kal te pawh an lo haw a, tumah an zu hmu lo. Kan tlaivar titih a ni mai e.

Zingah duty te an hawn hnuin kan chhungkuain kan han sawi ho a, "Nu, kei chu in hi hralh mai ka duh. Hralh mai ang u. Lei duh tawk an awm tho vang. Kalsan ringawt a uiawm sia. Kei chu luah tawh loh ka duh em mai.. " mamin a ti a. Ngaihtuahna a tithui viau. Mama lahin a nák chu na a ti viau mai a, Damdawiina kal ka sawi lahin, "A zia ve mai ang. Vawiin han en chhin phawt ila, eng ka an loh chuan naktukah kan kal dawn nia" a ti a. Mipa inti ve tak tlawmngai tak a ni a. Thawm kan han hriat leh eng emaw kan hmuh pawh khan hlau lo ang maiin min thlamuan ve thin. Duty te pawh a zah khawp mai a, mipa ka awm ve a, a inthlahrunawm em mai a ti thin a. Mahse, nizan kha chu a hlau ve khawp tih ka hre thei.

Kei hi nu dawihzep ka ni hran lo va, mahnia ramah te pawh kala riak mai thei kha ka ni ve thin. Mahse, tun tum erawh min tina zawngin a che tlat a, fate avang pawn ka thlabar ve khawp tawh mai. Kan in han hralh èm chu ka ngaingam si lo, kan pa in theihtawp chhuah a lo puitlin ve leh a lu nghahna hmun kha a ni miau si a..

Bawiha'n, "Nu, Pi Amanda-i va hmu tawp teh. Tih dan a hria ang" a tia. Ka rawn kal tawp mai a ni.. " a ti a. Ngaihnawm ka lo ti kher mai. A sawi hnem bawk a, a thaw hawk mai. Thingpui an rawn dah tawh bawk a, a in ta khalh khalh a. Boss chu a inngaihtuah nasat hmel khawp mai. Kum 2016 khan hetiang deuh case hi kan buaipui tawh a. A tawp dan nuihzatthlak deuh kha ka hre chhuak. An chhungkaw zing ami mi anglo thiltih vek kha lo niin, a ho duh khawp mai. Tun tum ami erawh ramhuai chetna tak tak a nih duh hmel riau. Ka tih ru viau bawk. Mipa e ti lo hian huai leh hrág lam hi ka ngaina viau lo.

"A ngaihnawm hle mai. Ka pi, ka phur zawng tak a ni. Anih leh in in hmun saw a hmain sawi thawm te a awm tawh em? " a ti a.

"Aih, ka bulah an sawi hreh pawh a ni maithei a. A hmain hetiang boruak hi kan hre ngai lo hrim hrim" a lo ti var a.

"Umm.. Eng emaw tak zawng a awm mai thei a ni. Anih in chu hralh dawn ta la, lei duh awm te i hrria em?  Entirnan: a hmaa i in lei duh awm te an awm tawh em? "

"Awm pawn ka hre lo. A hmun saw a rem em em lo bawk a" a lo ti ve mai a. Boss chu a meng nur deuh.

"Aw le, eng pawhnise, in in lamah chuan kan lo kal dawn nia. Chawhnu lamah aw.. A theih chuan lo awm kim ula ka duh hle mai" a ti a.

Pi Hmingliani pawh chu a chhuak zui ta a.

"Case dangdai tak a nih dawn kha. Tualthahna lam ngawt chhui ai chuan a nuam zawk.. I ti ve em? " a rawn ti a.

"Ka hre lo. Ka hlau deuh kei chu" ka lo ti leh thawr a. A nui saih a, "Ramhuai leh thlahrang hi an awm tak tak i ring em? " a rawn ti leh a.

"Ring e. Chuvang lawm ka hlauh" ka lo ti hmiah.

"Ka ni thin keipawh. Ka tet lai chuan. Thim te hi ka hlau thin a, mahse, ka pa hian, 'Hlauhna chu hmachhawn la, engmah a nih lohzia i hre mai ang' tiin min fuih thin a. Mahni intihuai luiin ka hlauh thin thil te chu tlanchhiatsan lo vin ka hmachhawn ta zel a. Ka hlau lo telh telh bawk" a ti ta duah a. A vawikhat nan apa chanchin a sawi ve.

"Dar 2 dawn kan la nei bawk a. Sam, khawngaihin nikuma thlan hai chungchang kan la  chhui chhuah tak loh file kha min rawn pe ta che" a ti leh puat a.

Ka va zawnsak nghal. He thil hi chu thil dangin min tlakbuak ve reng bawk nen, an che zui ta bawk si lo va, kan la close ta lo reng kha a nia. Bethlehem thlanmual pakhata thlan pathum lai an hai chungchang a ni. Setanic thiltihah ka ngai mai. An thawm a reh hmak tawh bawk si a. Boss pawh hian a ngaihven zui ta lo deuh niin ka hria. Tun ataka ennawn a duh leh ta chu tuna Pi Hmingliani te in rikrap nen hian a inkaihhnawih deuhah a ngai a ni mahna. Thlan hai chu thil rapawm deuh a ni ve bawk a.

Chawhnu dar 1 velah chiah Pi Hmingliani te in lam pan chuan kan chhuak ta a. Chawlhhmun lam hi ka kal khât angreng. An in chu lian ve deuh tak, la thar tha angreng tak a ni a. Kawtah chuan tlangval pali an lo thu a. Min en duh khawp mai. In chhung kan luh chuan in nuam ve tak mai a ni a. Mahse, an nula a hman vak lo a ni bawk a. A fai em em lo. Ka buaina tur. ani lo ve. Sitting room zau nuam deuh a lo ni nghal a, vei lamah choka chu tlemin a va hrang deuh a. Dinglamah room pathum a lo intlar a, a thlang lam ber chu an tlangval room a tih tawh kha..

"Ee.. Lo kal ru.. Hei hi Mama chu a nia, khaw nge mami kha.. Hei hi Bawiha chu a ni bawk.. Bawiha, i u mami kha khaw nge a kal? " Pi Hmingi chuan a lo ti zung zung a.

"Ka mut a chhuak lutuk a tia, Pu Taia te inah a han mu aniang" Bawiha chuan a lo ti a. A awm ve viau mai. Mama chu sa tha lam, hang lek lek, hmel fel tak. a ni a. Bawiha erawh cher sang lam, zahzum hmel tak a ni thung.

"I nak chu ka lo en ve chhin thei ang em? " Boss chuan Mama chu a melh a. Ngawi rengin a kawr a hlim a, a saisir deuh bawk a. A lo duk chur lah taka, a ruh a khawih phei chuan a na ve viau ang ka ring.

"Anih tlang takin inzawt ta ila, in ina rawn che thin hi ramhuai emaw thlahrang emaw anih i ring em? "/ Boss chuan a ti leh a.

" Ring lo. Ramhuai hi a awm maithei, mahse, min tihbuai ngawtna chhan tur ka hre lo. Ka rin dan chuan min hawtu te thiltih a niang" a lo ti a. A aw chu a thum lek lek.

"Anih in hi hralh ve mai i duh em? "

"Ka hrethiam lo khawp mai. Dik tak chuan ka ui viau a, mahse, ka nute leh ka naute thlamuang taka an awm theih chuan loh chuan tihral mai pawh pawi ka ti bik lo. Ka nu thu thu a ni mai" tlangval fel tak chu a nih dawn hi.

"Bawiha, anih thil ka zawt ve ang che aw.. Ih, bathrooma lo inkhai i hmuh kha mihring niin i hria em? Awmzia chu ramhuai anga sawi theih turin danglamna a nei em? "

"Ka hmu thut kha a nia, ka en rei si lo va, ka hrethiam lo. A sam kha a thlah hnuang a. A hmel ka hmu si lo va' a ti nuah nuah a. A mitmengah chuan a hlau tih a lang reng mai.

"Anih bathrooma in va en leh khan, ventilation emaw chhuah theihna tur ang chi hrim hrim kha a lo inhawng em.. In chunglam te pawh" Nu ber lam a hawi a.

"Aih, engmah khatiang kha kan hmu lo"

Bathroomah chuan kan va lut ve a. A zau em em lo. Tui pipe rawn luhna chung zawnah ventilation chu a awm a. A inkhar. Kha thil lo inkhaina nia an sawi chu bulb khaina rod kawm a ni a. Tum fe loh chuan inkhai a har viauin ka ring. Boss chuan in chung lam chu a melh rei angreng. Ka hmuh chin bak a hmu awm lo em mai.

Mami pawh a lo haw a. Nula vantlang chen vel, ngo ve pangngai tak a ni a. Hmel tha tia sawi theih ni chiah lo mah se, inchei thiam tak a nih hmel. Tin, make up a ngaina thawkhat ve viau anih a rinawm. A hmui pawh a sen hlar kha. Awm mai mai lai pawha nalh reng ang chi kha a ni ve maithei.

"I ke rawn vuantu nia i sawi kha i hmu lo tiraw?  I harh rual khan eng emaw han phe zauh te hmuh i nei em? " Boss chuan a ti a.

"Ka'n ngaihtuah lawk.. Eng emaw hmuh chu nei thánin ka inhria. Aw ka harh a, khum atanga ka tlak rual khan khum mawng lamah phe zauh chu ka hmu.. Mahse, ka ngaihbel pawh a ni maithei" a ti a. A kut a elh a, chunglam a melh leh zauh thin a, khami zana thil thleng kha a ngaihtuah let tih ka hre mai.

"Anih lukawlh deuh lo bihtu che kha, a lu a kawlh tih i hre thei a. A hmel pawh i hre thei deuh mai em? "

"Ka la hmuh ngai loh niin ka hria. A mitmeng kha a rapawm em a. A lian bawk sia, a hmel hrim hrim kha a rápawm. Ka sawi thiam lo" a ti bah nuaih a. A mitmenga hlauhna chu kei takngial pawn ka hmuh hmaih lo. Ka khawngaih reuh khawp mai.

"Anih mam, I naka chhuih tu che kha tukverh atanga rawn lut ni ngeiin i hria maw? "

"Ni chuan ka hria. Ka insiam buai atalang khan ka lo ngaihtuah bik si lo va, tukverh zawn atanga rawn ding ta thut kha a ni sia, ka hre chiang bik lo a ni"

Boss chu chhuatah chuan a vei leh sek a, room te pawh a va en dik tawh a. Engmah han hmuh chhuah tur a nei lo a ni maithei. A hmel a nung sarh lo tlat!  Chanchin dang a awm leh veleha inhrilh turin kan chhuahsan ta phawt a.

Ka mumangah ka lo mang phan vel. Ka va hlau e.

"Sam, thil pawi tak a thleng. Pi Hmingliani fapa mama kha a thi" Boss in a rawn tih chuan ka nghing lawih mai. A nák chhuihna ringawt kha chu thihpui tham a ni dawn em ni?

An in kan zuk thlenthlak chuan mi an lo pung tam tawh viau. Ruang chu kan va kil ve zuai a. Tui taka muhil hmel a pu. Tlangval fel tak kha a nia, ka hmuh vawikhatna atang pawn a fel tih ka hre nghal. Ka lo ui ve viau mai.

Pi Hmingliani lah han biak fal hkeitheih a ni rih si lo, a tap bang hleithei lo. Mami lah a khawng deuh reng mai bawk si a. An vui zawh lamah kan be mai ang chu. Mi thenkhat tawngkam atangin a thih dan erawh kan hre thei ta a.

A zanriah eikham inthiar zo kha a roomah a va tlu zal a. A hnu darkar khat velah a rawn chhuak a, 'Kan puten min lo bia a, tui line check a ngai tlat mai. Kan va en lawk ange' a ti a. Anu phei chuan a nák na avangin a lo phal lo viau nghe nghe, 'Hei na a awm vak tawh lo. Ka tha tawh lutuk, ka rei lo vang, keimahin ka ni dawn hleinem' a ti deuh tlat a. Kalpui kan tum lahin, 'Ka awm loh phei chuan ka nute an thlabar lutuk ang' a ti si a. A chhuak ta kha a nia.

Chuan, Dar 9 bawr velah Mami hi room atanga lo chhuakin, 'Nu, Au mama hi ka call tlang thei miah lo ania. U Puia ka bia a, min rawn sawm reng reng lo a ti bawk sia. An hotute kha be teh' a rawn ti a. Hlauthawng reng renga khawsa an ni bawk a. Anu pawh chuan an pute chu a be thuai a, an niin engmah an hriat loh thu leh tui kawng chhiat loh thu an lo hrilh ta si. Kan buai zo ta a. A kalna niawma kan rinah kan va zawng a, kan hmu mai si lo, mak deuh maiin Pi Hmingliani mangang kawta a vei vel chuan an in piah lawka huan pal hungna tur tia amah Mama'n a sah, mau an dah khawmnaah chuan mihring niawm tak mu reng a va hmu a. Rang takin a va tlan phei nghal a. Mama chu thichhawngin a lo let reng mai. Hamhaih nen an buai viau aniang. A mar a lo la phu a. Amah erawh a biak theih loh. Damdawiin pan pui tuma an insiam laiin a rawn phu uih a, a phun sep a. A chatthla ta mai a ni. A taksaah hliam engmah an hmu lo, a nak duk chur chauh lo kha chu.. An mualpho tawh si a, a ruang pawh postmortem loh mai anu khan a dil a ni awm a. A nâk na kha rawn zualin in a thlen hmain a tlukpuiah an ngai ta ringawt mai a ni. Hliam dang engmah nei hek lo.. Chutiang chu a hretute sawi dan a ni.

"Postmortem se a tha tur aw.. A va pawi tak" Boss chuan a ti sap a. Ka ngaihdan chiah. Tûr vanga thi pawh a ni thei. Pi Hmingliani chu a â ka ti khawp mai. Ka khawngaih tho bawk si.

"Mahse, Mama thi hi pawi viau mah se, thudik kan hmuhchhuahna hmanrua a ni thei" a ti leh a. Engmah ka hre ve thiam lo.

Vui zawh mi an haw rem deuh laiin kan va lang a. Inleng erawh an la awm nual tho a. Pi Hmingliani room lamah kan inzui lut ta a. Engmah a sawi hleithei lo. A tap nghal zel si a.

"Ih e.. Mama ka va hmuh khan awmngaihna ka hre lo a, ka sahal a ni ber. Mi kut tuara thi a nih rin ngaihna ka hre lo a ni. Ka chiái vek a, kan YMA hruaituin postmortem vel a rawn sawi pawh khan ka hrethiam lo a engmah. Mama ruang an han zai phel tur vel kha ka phal lo a ni ber, tih loh kha min dilsak turin ka ngen ta ringawt a ni" tiin a sawi a. A insut faih faih bawk.

"Chutak chu i tisual a ni. Nia, i fapa i thachhang dawltu ber. ania, i lainat tih ka hria, mahse, postmortem tir nila chuan thlabar taka siam thintu che u pawh hi kan manchhuak maithei asin" Duh aiin Boss aw chu a chang.

"Nia, ka tihpalh a ni. Mahse, Mama a thi tawh si a, kan in pawh hi ka hralh mai ang. Tichuan, min tibuai tawh lo ang" a ti a. A fapa thihna chuan a khawih na bawk aniang, a ngaihtuahna chu a fim vak lo tih ka hre thei. Mami lah buaipui a ngai reng a, a û ruang pawh kha a kil tha hman vak lo a ni ber. Bawiha erawh a ngawi reng a, a hrilhhai takzet tih a lang reng mai.

Office-ah Boss chu a vei leh thauh thauh tawh a. Dik tak chuan ruang postmortem a ni lo kha a ngaihdan a ni lo chiang, lo thinrim ve vak kha awmzia a awm miah bawk si lo. Mahse, Mama thihna leh an in hráng ti tawh mai ang hi a inzawm chiah em tih ka hre lo. Boss hian a ngaihruat ve pawh a ni maithei.

"Pi Hmingliani zawk hi kan enthla dawn mawni aw.. Nu fing fel tea ka ngaih si, a fapa atanga thudik hmuhchhuah anih theih reng laia a postmortem loh vang pawh khan rinhlelhawm list ah ka dah tlat" a ti nghat nghat a. Ka lo ngawi dâk ringawt.

Khami zana Mama kalna kha hria ila chuan thil hi a fel duak ka ring. Tu nge a va hmuh ang le?

"Kei chu Mama pawh a rinhlelhawm ka ti. An in hrângah khan a nia ka tih. Khatia a chhungte an thlabar ngawih ngawih laia dawt sawia a chhuak duh tkat kha. Tu nge a va hmuh ang tih hriat a chakawm" ka lo ti ve a. Boss hmel chang tak kha a nem leh ta deuh bawk nen.

"A dik ve tho. A phone kan check kha chuan a biak hnuhnunber kha a thianpa Puia a ni a. Puia lahin eng vak an sawi loh thu loh thu bak a sawi si lo. Khami zan khan Puia chu a pum nawm loh vangin a tlan sek tih a chhungte ka atangin kan hre tawh a, a thianpa te inah pawh a va kal thei ta lo kha a ni reng a. Bakah an inthiantha lutuk a, thahna chhan tur a nei lo vang." A lo ti leh hmiah a.

Chhan ngaihna ka hre leh ta lo. Chumi ni nileng deuhthaw chuan lehkabu a chhiar a. Kan inbe mang lo.  Eng tak buaipui ang maw..

Pi Hmingliana kan hmuh leh chuan a landan pawh a zia ta deuh. A la tap fo tih erawh a lang.

"I in chu i tiral dawn ta em ni? ' Boss chuan a ti a.

"Mama boral hlimchhawn te a la ni si a, thla khat te han liam leh se, ka tiral anga, he lamah ka rawn inbengbel ve mai ang chu ka ti " a ti charh charh a.

"Rawn bia che an awm tawh em? In lei duh tur"

"Pahnih chu an awm a. Pakhat chu mama thawhna lama an pu ber hi a nia, kan boruak hre vek tu a nia, in chu thiaha a thar sak a tum a niawm e. Pakhat leh chu ka hriat ngai pawh a ni lo. Chhim lam mi a niawm e, mi ka a tangin ka in ka hralh duh tih a lo hria aniang, min rawn pan nal nal a. An nu hna avangin he lamah awm a ngai sia, in luah ai chuan tiin min rawn dawr a ni"

"Tu zawk nge i leitir tak ang? "

"Ka hrethiam lo. Kei chuan Mama te pu hi ka duhsak mah zawk a. Min khawngaihtu a nia, Mama pawh kha a duhsak thei em a. Rulh venaah ka ngai deuh. Mahse, mami te chuan pakhat zawk chu an duh a, a chhan chu apa in harsa taka a sak sa thiah leh vek a ni tur kha an ngaingam lo a ni ber"

"Ramhuai chu a rawn che leh em? "

"Che lo aniang, khawhar in riak pawh kha an ti ru deuhin ka hria. Mahse, hei eng thawm mah kan la hre lo"

Pi Hmingliani kal hnuah chuan inngaihtuah muk hmel zetin a chairah chuan a thu vang vang a. Pi Hmingliani in lei tumtute pahnih address kha kan la a. Eng emaw zawh a tum aniawm e. Chutiang daih daih buaipui chu ka lo ti rilru a.

Mama te thawhnaa an pu ber chu kan va hmu a. Pa nelawm tak, dam thluam mai a ni a. Mama a khawngaih vang leh an hralh dawn rau rau chuan man man deuh hleka leisak a duh thu te a lo sawi a. An in boruak vel a hriat vangin a in chu thiah phawt a duh thu a sawi bawk.

Pakhat ve thung kha chu Lunglei lama a hawn lai a lo ni a. Kan va hmu ta lo. Boss chevel chu a phur ta riau hian ka hria a, ngaihbel tur ka hre si lo.

Zan dar 8 a la ri lo deuh tihah Bossin min lo bia a, 'Chawlhmunah kal ang" a rawn ti a.

'Pi Hmingi khan min lo bia a. Ramhuai a chet leh thu a rawn sawi a ni.. " kan tlan lai chuan a ti sup a. Ka awm a nuam lo nghal.

"Dawih viau suh. Ka awm hi. Ka thih hma chuan i tlanchhe hman hrim hrim" a la ti zui. Hmeli chu a.. Mi hi a hmusit alawm he nu hian. Ka tau bûr a. A nui leh suk zel a.

"Duhawm lutuk" a ti sap a. Kan chhuk ta a.

"Thalai len hun a tawp tawh vangin puitling lam ho an rawn leng a. Kan titi mai mai laiin, Mami hi a room atangin a rawn rak chhuak ta hlut a. Ani hi a u thih atang khan thinthiin a muhil tawh mang lo. Chuvangin a mut theih lai. Chuan mu se tiin ka muttir kha a ni reng a, kan va luh chuan tukverh lam a kawk a, tukverh chu a lo inhawng a, a ûin a thih zana a hak a tshirt pawl kha thisen kai nuan hian tukverhah chuan a lo inkhai chu niin. Kan va pawtthla a, kan buai mek laiin thla ai thawm kan hre zui nghal zat a. Mipa thla ai thawm ngei a ni. Min râp takzet… " tiin Pi Hmingi chuan a sawi a. Mami chu an chiu mu tawp mai a ni. A cher kuam tawh lehnghal.

Chumizan chuan tlaivar thakin kan awm ve ta a. Engmah kan hre zui ta lem lo. A ho duh khawp mai. A tuk chhun chu chawlh min pe bawk a, ka mu nileng deuhthaw. Boss hi a muhil ve ang em aw..

Ni 2 lai chu engmah kan ti lem lo. Boss erawh chu a chhuak deuh reng a, "Sam, Pi Hmingliani, nikhaw hre lo vin a awm mèk anih chu" A va hahthlak ve mawle.. Eng nge an chungah thleng zel ang. Damdawiin kan va thlen chuan a lo muhil bám a. Mami chuan tap fuih fuih chungin, "Inleng kan nei ta vak lo bawk a a tia, chawhmeh a váng si leipuiah ka va kal lawk ang e. In lo nghak rawh u a tia. Ka thiannu Sawmi a lo leng bawk a. Bawiha erawh class a kal leh tawh a. Kan va kal zawk ang ka tih pawn a phal tlat lo va. A rawn haw har ta sia, ka mangang tawh lutuk a, Pu Bela (YMA president)  ka call ta tawp a. An va zawng a, tihian an va hmu ta mai a ni" a ti a.

"Ka pi, khawngaih takin min pui rawh. Ka nu hi a thi lo vang tiraw? " a ti a. A mittui a sur zung zung a. A lainatawm takzet. Bawiha pawn thlaphang takin a nu kut chu a vuan ran a.  In riak te pawh an tin tawh a. Dik tak chuan riah reng kha thil chakawm fahran a ni lo a ni.

Zanah kan han kal leh a, a lo la harh chuang lo, An unau chuan riahpui mai an lo tum a. Mami chuan damdawi vel a zuk lam khawm a.

"Anih Bawihpui, i nu khan in hralh vel kha a sawi leh reng reng em? " boss chuan a thuphungin a ti a.

"Aw.. Nizanah a sawi a. Ka hralh dawn lo a tia. Au mami nen a chhan kan zawh pawn a sawi duh lo. I pa leh i u mama lu nghahna hmun a nia a ti tlat a. Au mami nen phei chuan an inhnial hrep alawm" a ti a. Pi Hmingliani rilru thlak thut vang em ni ang hetia a awm le..

"Anih ramhuai a rawn che leh em? "

"Che lo. A rawn che tawh dawn lo emaw ka ti tawh kei chu" a ti ve mai a. Rawlthar ngaihtuahna la hmang thiam vak lo a ni tih ka hre ve thei. Mami a rawn kal hnu chuan thil dang kan sawi a.

"Mami, engpawhnise, zanin chu in in lamah kan zuk riak thla ange, eng emaw hmuh chhuah kan neih takin.. I nu chu a dam leh em em ang, chuan he misual hi kan man bawk ang" BOss chuan inringtawk fe hian a ti ta a.

"Kan inah tumah an riak tawh lo asin. In hlau lo mi? " a lo ti a.

"Hlau lo ve.. Kan ngaihtuahawm loh ang" a ti a. Kan chhuahsan ta a.

Pi Hmingi te sitting roomah thutthleng seiah kan mu ta a. Thil nuam tak a ni lem lo. Boss chu a muhil ni maiin ka hria. Kei erawh ka harh tulh tulh mai. Thawm ri hlekah ka phawk hrû zel bawk si. Thil hlauhawm lam ngaihtuah lah hi a awl  em em lehnghal.

Kawmthlang huan chu a ri rawk rawk a. Ramsa eng emaw thawm aniang tiin ka inhnem chawp a. A rawn hnai zel a, mihring hah deuh thaw ri huam huam ka hre ta. Ka lungphu chu a thlawk chhuak ang tih a hlauhawm. Huai leh thlahrang lam ka ngaina lo ka tih mawlh mawlh kha.. Boss chu ka va en a, a zangthal zawngin a lo muhil a, a thaw sák sák mai. Ka ngei zawk. In hnuaiah thawm chu a tawp ta a. Ka che ngam eih lo. In hnuai lam thawm chauh ngaihtuaha ka beng ka chhit ngur ngur laiin in chung chu a rawn ri dawp mai. Ka thu chhuak hlawl a, ka darh kut nem takin a rawn vuan nghal chawt. Ka rak chhuak tur chu ka hmui a rawn hup leh hmak.

A hmuia a kut dahin tawng lo turin min signal a. A hmel ka hmuh chuan ka thèp suai suai mai. Engtik laiin nge a rawn harh tehreng ni.. Zawitein kawngka a hawng a, mahse, kawngka inhawng chik ri tuarh chu a ring hrat. Hmanhmawh zeta kawmthlang lama tlanthla niawm tak kan hre zui. Ta a. Tukverh atangin kan zuk bih a. A thim si a, tumah kan zuk hmu ta lo. Ramhuai ni lo vin mihring kan veh tih ka hrethiam ve ta.

"Sam, muhil tawh tak tak ang. An lo kal tawh lo vang" a ti dam thlap a. Puan a sin tha sawk sawk a, lehlam a hawi nghal. Kei erawh thinthiin ka muhil ta chuang lo. Eng nge kan zawn tak ber le..

A tuk chawhnu lamah Boss min tirhna angin Pi Hmingi te chu ka va kan leh a, a lo harh tawh a.

"Khatia thlai hnah vel ka lak khawm lai khan min en rengtu awm hian ka hre tlat a, ka ngaih a tha thei hlek lo mai a. Hmanhmawh deuhin ka che ta sawk sawk a. Bèkte kan zar veah chuan ka fun ta hlawm a. Haw mai ka tum a, ka tui pai sa chu paih mai a uiawm tiin ka in khawlh khawlh a. Ka in zawh rual chuan ka ni ta nghulh a. Ka zawi nguai mai. Ka tluk thlawrh kha chu ka hria a, ka harh chuan damdawiinah ka lo mu reng tawh" tiin a chetsual dan a sawi a. A fapa thattu bawk khan thah ve a tum a nih ka ring. Ka sawi tur erawh ka sawi tho a ngai.

"A vanduaithlak khawp mai. Ka rawn kal chhan ber zawk chu kan boss chungchang a nia. Nizana in ina kan va riah atang khan a mumal thei miah lo va, hmeichhia a lo nihnaah a hlau niin ka hria, nichin lawk khan a in enkawltuin min lo bia a, amah leh amah a lo inzai vak a, tunah hian Durtlang hospitalah a awm mek. Nikhua a hre vak lo.. Pawi ka ti lutuk, i fapa thattu pawh mi dangin case an la dawn niin ka hria, mahse, engmah an la tifel lo va, hun a duh deuh dawn a, min lo hrethiam hram dawn nia" ka ti a. Ka theih ang tawkin ka intimitak ve.

"Nizanah hmuh in nei ve em ni? " mami chuan a lo ti var a.

"Umm a ni mai ang chu. Hmeichhe tan phei chuan hmuh a nuam vak lo ve ang. Hmeichhia leh mipa an nia, a hma lawkin thawm danglam tak kan hre tawh a. Kha mi te kha chu mihring niin ka hria. Mahse, a hnua rawn kal te erawh ramhuai ngei an ni. Tukverhah rawn dakin thisen hlirin an khat a. Kei pawn ka hlau..,,zep loh chuan.. Boss lah a melh ngai a melh reng bawk sia. In hnuaiah an tawm niin ka hria, eng emaw tak an zawng aniang, lei te chu an hai vak vak a. Mi dang ka pun tèp nghe nghe. Mahse, mak deuh maiin ar a rawn khuang a, an thawm a reh ta hmak mai a ni" ka ti a. Ka dawt sawi chu ka awih leh vak ang tih ka hlau. An nufa chuan phawk takin min melh reng a, an hlauh hmel kher mai.

Ka chhuahsan ta a. Mahse, an awmna ward hnaih ber bathroomah chuan ka lut vat a. Ka tawm ngawi ta reng mai. Rei lutuk lo ah ka mi nghah chu a rawn lut ta ngei a. Phone chuan mi tu emaw a be mawlh mawlh a.

"Zanin bak chance a awm lo. Min hmakhalhtu an awm chu" tia a tawng lawng lawng chu nui sak chungin ka lo ngaithla a. Kan hlawhtling dawn ta e.

Thla mang lai a nih piah lamah khua a nuam lo va, ruah a tla cherh cherh reng mai. Boss nen chuan sana kan bih sek a. Ka chau deuh nge ka lo muthlu sek.

"Sam, a hun e. Kal ang" a rawn ti sup a. Rang takin ka zui nghal.

Pi Hmingliani te in hnuaiah chuan thim thamah kan bawkvak lut a, choka hnuaia an ar in hlui phenah chuan kan thu ta ran mai. Dar 2 a pel hret ang tihah thawm a rawn awm tan ta a. Mi pahnih thawm niin a lang. Kan piah lawka in hnuai zawl laiah chuan an thu a. An phun sar sar a. Lei chu an lai tan ta a.

"A thuk viau loh ka beisei" pakhat chuan a ti sap a. Èng an chhi lutuk ngam lo naa laltin pakhat chu an chhi ve. Thenawmte an harh chuan an rawn hmu nghal thei mai ang.

"Che tawh suh u" tia a silai kau rapin, a torchlight ken chuan an hmai a zuk chhun ta siah a. Ka la la hmuh ngai loh ve ve an ni.

Boss a tawng zo chiah tihin kan sir lawk atang chuan police an rawn chhuak ta sap sap a. Tlanchhiat ngaihna a awm ta lo.

"Sawi rawh u. In thawnthu chu le.. " Boss chuan dawhkan bawh titiha an pahnih va melh chung chuan a ti a.

"Engmah kan ti lo. " pakhat a hotu zawk niawm chuan a lo ti ram hmak a.

"Rawn hruai rawh u.. " tiin Constable chu a va melh a. Kawngka a rawn inhawng a, Mami an rawn hruai lut ta a. A hnungah Pi Hmingliani leh Bawiha leh Chawlhmun YMA hruatu thenkhat an lo lut bawk.

" Tikhan a danglam deuh em? " a ti leh a.

"Engvang in nge kei hi min man ve ngawt. Eng nge ka tihsual? " Mami chuan a lo ti hmarh hmarh a. Boss a nui sak. Hetianga a nuih hian a dawhthei lo tan tihna a ni fô!

. "Ka sawi hmasa leh mai aniang chu.. Pi Hmingin min rawn pana a thusawi thenkhat vang khan kei chuan ramhuai thiltih a ni lo tih ka ring nghet hmiah tawh. Mahse, Maman hliam a tawrh khan ka buai deuh a. Khami nia kan lo kala bathrooma rei ngial in chung lam ka melh kha in la hre ngei anga. In chung rangva kha hmuh hleitheih lohin a inrin kual raih a, phui tak anga lang si khan a rukin a thler tih ka hria. In bathroom kha thlanglama awm a nih vang leh in chung pangngai aia a hniam avangin thenawm ten an hmu phak lo chiah chiah tih pawh ka finfiah thlap. Anih chuan Bawiha hmuh mihring niawm tak inkhai kha siamchawp niin in chung atanga khai thlak a ni tih ka ring nghal a. He ramhuai hian tum eng emaw tak a neih ka rin vangin in chung lamah ka han lawn duh ta ting tang lo anih kha. A duh anga chettir ka tum vangin. Maman hliam a tuar dan kha han ngaihtuah leh ta ila, Mama room chu thlanglam berah a awm a, tukverh atangin lei pawh a hniam fahran lem lo. Khami zan khan in chung lama lo tawm ru reng tawh ramhuai kha Mama tukverhah rawn inkhawhlutin Mama nakah a chhuih ta a. Maman thawm a neih rualin inthazo takin in chungah a inhamkai leh nghal zat. He ramhuai hi a fit hle tih a lang.

Mami ramhuai hmuh kha chu sawifiah a ngai lem lo. A chhan chu a hmu tak tak lo miau a. Lemchan erawh a thiam reuh khawp mai. Min bum hman thelh a ni. Ka buaina ber erawh engvanga tibuai ta che u nge an nih tih tak kha a ni. In hmelma ti dawn ila kha zawng chetna hun a awm a. Engmah a ti lo. Mama a boral ta a. Khatah tak khan Mama khan he thil titu hi a hrechhuak a, chuvanga boral a nih ka ring ta nghal a. Tu nge tih lam aiin engtin nge a hriatchhuah tih chu ka buaipui ta zawk a. Mama thih hlimchhawn laia Mami a buai tuma a nuin min lo biak khan, a ruk tein mami phone kha ka ru chhuak a, mahse, a fing ve riau a, a lo delete deuh vek. Mahse, ka khawih lai rengin msg a lo lut a, "Ka thleng tawh" tih hi. A number chu lain msg chu ka delete zui nghal a. Mami ph pawh chu ka dah let leh nghal a ni. A pattern kha chu ka tan hriat a har hran lo. Chu number chu ka chhui ta ngat ngat a. A tawpah he pa ah hian ka chhui lut ta a ni. (An hotupa ber niawm chu a kawk a)

Mahse, fiahna engmah a la awm lo va, man ngawt chhan tur ka hre lo, inngaizawng pawh an lo ni thei. Pi Hmingliani ka be ta a, in hralh kha phal leh ta lo turin. A fate bulah a lo sawi ta reng a. In kha a pawimawh niin ka hre tlat si a. A pawimawh chhan erawh min hrilh turah ngai ang. Pi Hmingliani hi nu mawl tak a ni hauh lo. Leipui kal tura nawrtu pawh keimah ka ni. Khatihlai khan amah hmu theiin ka awm reng. Ka beisei ang chiahin nang i lo kal ta a. (An thawhpui kha)  Mama thih zana in pek ang chiah damdawi kha a in turah i thlak ta a. A thihpui mai i beisei erawh i tisual ta a ni. Tui kha a in lo va, mahse, nikhua erawh a hre ta lo. Engkim kha plan vek a ni. Doctor te pawh ka be lawk vek a, a serious thei ang bera lo ngai turin.

Damdawiina a riah zan hmasa berah khan Sama nen kan zu riak a, min tihthaih tuma thawm in raen chhuah vel kha ka nuih a za. In thiam fahran lo ka ti. A tukah Sama hian ka dam loh thu leh zan lama mi dang rawn lan thu a rawn sawi ta a. Mami a lo mangang ta. An thuruk chu hre ve tu an awm niin a hre ta a. Rang takin a thawhpuite a be nghal ta chung chung a. Sama ngeiin a ngaithla a nih kha.

Let leh lawk ila, ni 2 chhung deuhthaw ka reh vang vang lai khan lehkhabu hlui ka hai nasa a. In kha engvanga hlu ta em em nge. anih hriat tumin. Ka duh ang ka hmu lo. Chawlhmun VC te biain Pi Hmingliani te in hmun chungchang ka sawipui a, engmah an hre bik lo. Risk ka la ta tawp anih kha. A chhan chu a innhrim hrim kha duh chhan em em tur a awm hran lo, Assam type a ni ve mai a, a awmna hmun lah veng tlabirh lam a ni bawk si. Ka ngaihdan ka kaltlangpui ta ngawt a, an in hmunah hian eng emaw thil hlu tak a awm a ni ang tiin. Ka ring dik ta chiah a nih kha..

Le tunah chuan Mama in thah dan leh saw in hlutna chhan saw sawi ve teh u le" A ti ta dap dap a. A hmaa thute chu a melh kual ralh ralh a.

"Aw le.. Ni e.. Mama kha thah kan tum reng reng lo, kan thuruk a hrechhuak ta si a. Tihngaihna a awm lo  a ni. Mami nen kan inbiakna a lo hre ru a, khami zan khan mami kha a room tukverh atang khan a lo chhuak a, Kan inhmu. Kan awm zel dan tur kan sawi laiin Mama kha a rawn lang ta thut sia, mami hi a beng nghe nghe. Kawng dang kan neih tawh loh vangin a nák na saah khan ka theihtawpa na in ka hnek ta a. A awng rawp a, a na ti lutuk a then chak chak laiin ka damdawi ah lai chu ka barh lui ta a ni. Kha damdawi khan a fan chhuah chuan a thih mai ka ring. Mami nen kan zawn a, duty an awm ve reng sia. An in thlen hmain kan chawl a, mami pawh kawng dangah a ruk thei ang berin a hawng ta a. Khatia mama an zawn buai chhung khan an hmuh vat theih nan an hmuhna hmunah khan ka va dah leh a ni.

Chuan, Saw in hlutna chu kan sawi ange. Nikum June thla khan ka pu lehkhabu hlui ka hai chhuak a, lehkhabu karah chuan lehkhathawn niawm tak uluk taka envelopea dah ka hmu ta a. Ka chhiar chak ta tlat. Ka chhiar ta a. Chutah chuan rambuai laia Buddhist temple an rawk naa rohlu an lak an dahna hmun chu chipchiar takin a lo chuang ta a. Ka phur kher mai. Amah leh a thian pahnih ten an hriat thu a ziak a. A thiante hming pawh a ziak thlap. Zawn chhuah an har ka ring lo.

Tichuan, tum nei ranin ka awm ta a. Ka pu thiante khan an lo la tawh em tih ka fiah ta phawt a. An lo thi ve ve tawh a, ro chu an la lo anih ka ring, an khawsak a sang lo tlat a. Tichuan, Chawlhmun lamah chuan ka kal ta fô a. Ka pu khan a ziak chiang viau naa hriat a lo har ve tawh si, mi biak rawn vak lah a him si lo.ka ngaihruat vak vak a, Tichuan, tuna Pi Hmingliani te awmna lai ngei hi niin ka hre ta a ni. Ro an phumna bulah zairum kung leh khiang lian tak a din thu a sawi a. Mahse, in an sak avangin an kit anih ka ring. Mami hi ka be tha ta a, kan inkawm nel hnuah thingkumg chungchang chu ka zawt ta a. An lo kit ngei mai. Mak a ti deuh tih pawh ka hria, mahse, ka pu ram a nih thin thu leh chawlhmun VC te kuta a pek thu ka sawi. Takah. Chuan a awih ve mai a.

Mahse, engtin nge ro chu ka neih theih ang tihah ka buai ta tlat. A ruka zuk laih ngawt chi a ni lo. Thenawm ten min hmu thei tlat. Bakah Mami nu hi inah a awm tam si a. Mami hi incheina uar ve tak, sum duhthawh ve deuh a ni tih ka hria a, amah hi thawhpui ta mai ila ka ti a. Ka chhimbudawi tan ta a. A lo phur nasa mai.

Remruatna kan nei a, in chu hralh ta se.. Tiin. Mahse,  a nu a hmin theih a inring lo. Luah ngamawm loh khawpa hrantir kan tum ta a. Kan chet dan chu in hriat kha. Mama a thih takah khan Mami hi a hel deuh a, mahse, ka ti laklawh tawh tiin ka hnem kual a, sum ka pe kal reng bawk a. Mahse, Anu khan in hralh kha a remti leh ta tlat lo va, kan buai leh ta a ni. Kha Lunglei pa in lei duh anga insawi kha keimah vek ka nia, ka inchei danglam ve mai mai anih kha.

Tikhan, a nu chu tirhbo dan kan zawng ta a. A nu kha thah kan tum hran lo, damdawiinah awm se, an riah chhuah vek hlana chet kan tum a ni. Kan ti ta reng bawk a, mahse, Amanda te hian min lo tlankhalh zar zar tih kan lo hre lo a ni" Tiin. A lang upa sawtin ka hria. Tlangval emaw pathlawi emaw a nih ka ring. Mi sual hmel erawh a pu hran miah lo.

Mami biang chu a ri thak. Anu ngei mai chuan thinrim em emin a lo melh khui bawk a. "I nutapa nunna aiin rosum i thlang zawk a maw? Tenawmnu leh.. Ka fanu ni tlak pawh i ni lo ve. A tira ka rinhlelh kha a lo dik ngei anih hi.. Dik lo hram se tiin ka tawngtai thin asin" Pi Hmingliani tap zawih zawih chu ka thlir reng ringawt. Ka khawngaih takzet a ni.

Boss Dilna angin Sawrkarin Pi Hmingliani te nufa hnenah ro phumruk hmun 3 a thena hmun 2 chu a hlan ta a. An in, a pasal leh a fapa te lu nghahna hmunah chuan a fapa nen an cheng dun ta rak rak a. Boss hian a lainat ngang aniang, a zuk kan zeuh zeuh thin.

"Sam, Samson, khatia rizai hnuaia hmeichhe hisap kual lo khan rang takin Venghluiah rawn kal rawh. Dr Dingliana nupui leh a fapa te ruang hmuh an ni" Boss chuan a rawn ti vawt raih a.

Engtin nge ka rizai hnuaia ka thiltih te chu a hriat theih le tiin ka lo ngaihtuah daih…!  He hmeichhia hi chu a..